သေလွန်သူများအတွက် သေချာသော မျှော်လင့်ချက်
အသက် ၂၅ နှစ်အရွယ် အမျိုးသမီးတစ်ဦးက ဤသို့ရေးသားခဲ့သည်– “၁၉၈၁ ခုနှစ်တွင် ကျွန်မ၏မွေးစားမိခင် ကင်ဆာရောဂါဖြင့် ကွယ်လွန်ခဲ့သည်။ သူကွယ်လွန်ခြင်းသည် ကျွန်မနှင့် ကျွန်မ၏မွေးစားမောင်လေးအတွက် ပြင်းထန်စွာဂယက်ရိုက်ခတ်မှု ဖြစ်ခဲ့သည်။ ထိုစဉ်က ကျွန်မအသက်မှာ ၁၇ နှစ်နှင့် မောင်လေးအသက်မှာ ၁၁ နှစ်ဖြစ်ကြသည်။ သူ့ကို ကျွန်မ အလွန်လွမ်းဆွတ်သတိရသည်။ သူသည်ကောင်းကင်ဘုံသို့ ရောက်ရှိသည်ဟု သင်ကြားခံရသောကြောင့် ကျွန်မသည်ကိုယ့်အသက်ကို အဆုံးစီရင်၍ သူနှင့်အတူသွားနေချင်သည်။ သူသည်ကျွန်မ၏ အခင်မင်ရဆုံးမိတ်ဆွေဖြစ်သည်။”
သေခြင်းက သင်ချစ်ခင်မြတ်နိုးသောသူကို လုယူနိုင်စွမ်းရှိသည်မှာ မတရားဟုထင်ရသည်။ ဤသို့ဖြစ်လာသည့်အခါ သင်ချစ်ရသူနှင့်စကားပြောခြင်း၊ အတူရယ်မောခြင်း၊ ပိုက်ထွေးခြင်း နောက်တစ်ဖန်ဘယ်တော့မှ ပြုလုပ်နိုင်တော့မည် မဟုတ်ဟူသော အတွေးသည် ပို၍ခံရခက်သည်။ သင်၏ချစ်ခင်မြတ်နိုးရသူသည် ကောင်းကင်ဘုံသို့ရောက်နေပြီဟု ပြောပြရုံနှင့် ထိုဝေဒနာပြေ ပျောက်သွားမည်မဟုတ်ပါ။
သို့ရာတွင် သမ္မာကျမ်းစာက အလွန်ခြားနားသည့်မျှော်လင့်ချက်တစ်ခုကို ကတိပေးထားသည်။ ရှေ့ပိုင်း၌ဖော်ပြခဲ့သည့်အတိုင်း မဝေးတော့သည့်အနာဂတ်ကာလ၌ သေဆုံးသွားသော သင့်ချစ်မြတ်နိုးရသူတို့နှင့် ပြန်လည်ဆုံစည်းနိုင်မည့်အလားအလာရှိကြောင်း သမ္မာကျမ်းစာက ပြဆိုထားသည်။ သို့သော် ဘာမှန်းမသိသောကောင်းကင်ဘုံ၌မဟုတ်ဘဲ ငြိမ်းချမ်းသာယာ၍ ဖြောင့်မတ်သော အခြေအနေအောက်ရှိ ဤကမ္ဘာမြေကြီးပေါ်တွင် ပြန်လည်ဆုံစည်းကြမည်ဖြစ်သည်။ ထိုအချိန်ကျလျှင် လူသားတို့သည် စုံလင်သည့်ကျန်းမာမှုကို ခံစားနိုင်မည့်အလားအလာ ရှိလာမည်ဖြစ်ရာ နောက်တစ်ဖန်သေစရာအကြောင်း မရှိတော့ချေ။ ‘ဒါကတော့ ဖြစ်စေချင်တဲ့ဆန္ဒကိုး!’ ဟူ၍အချို့သူများ ပြောကောင်းပြောမည်။
ဤသည်မှာ သေချာသောမျှော်လင့်ချက်ဖြစ်ကြောင်း သင်ယုံကြည်လက်ခံနိုင်ရန် အဘယ်သက်သေအထောက်အထားများ လိုသနည်း။ ကတိတစ်ခုကိုယုံကြည်ဖို့ရာ ကတိပေးသူသည် အလိုဆန္ဒလည်းရှိရမည်၊ ထိုကတိကိုဖြည့်ဆည်းပေးနိုင်စွမ်းလည်း ရှိရမည်ဖြစ်ကြောင်း သေချာဖို့လိုသည်။ သို့ဖြစ်လျှင် သေလွန်သူများ ပြန်လည်အသက်ရှင်လာမည်ဟူသောကတိကို မည်သူပေးခဲ့သနည်း။
စီ.အီး.၃၁ ခုနှစ်၊ နွေဦးရာသီ၌ ယေရှုခရစ်က အောက်ပါအတိုင်း ရဲရင့်စွာကတိပေးတော်မူ၏– “ခမည်းတော်သည် သေလွန်သောသူတို့ကို ထမြောက်ရှင်ပြန်စေတော်မူသကဲ့သို့ ထိုနည်းတူ သားတော်သည်လည်း အလိုရှိသမျှသောသူတို့ကို ရှင်စေ၏။ ဤအမှုအရာကို အံ့သြခြင်းမရှိကြနှင့်။ သင်္ချိုင်းများမှာရှိသောသူအပေါင်းတို့သည် သားတော် [ယေရှု] ၏စကားသံကိုကြား၍ ထွက်ရမည့်အချိန်ကာလရောက်လတ္တံ့။” (ယောဟန် ၅:၂၁၊ ၂၈၊ ၂၉) မှန်ပါသည်၊ ယခုသေလွန်သွားသည့် သန်းပေါင်းများစွာသောသူတို့သည် ဤကမ္ဘာမြေကြီးပေါ်တွင် ပြန်လည်အသက်ရှင်လာကြပြီး ငြိမ်းချမ်းသာယာသော ပရဒိသုအခြေအနေအောက်တွင် ထာဝစဉ်နေထိုင်သွားမည့် မျှော်လင့်ချက်ရှိကြောင်း ယေရှုခရစ်ကတိထားတော်မူ၏။ (လုကာ ၂၃:၄၃။ ယောဟန် ၃:၁၆။ ၁၇:၃။ ဆာလံ ၃၇:၂၉ နှင့် မဿဲ ၅:၅ နှိုင်းယှဉ်။) ဤကတိတော်ကို ယေရှုပေးတော်မူခဲ့သောကြောင့် ယင်းကိုဖြည့်ဆည်းရန် ကိုယ်တော်၌ဆန္ဒရှိတော်မူကြောင်း ယုံကြည်စိတ်ချသင့်ပေသည်။ သို့သော် ထိုအတိုင်း ကိုယ်တော်ပြုလုပ်ပေးနိုင်ပါသလော။
ထိုကတိတော်ကိုပေးပြီး နှစ်နှစ်မပြည့်မီ ယေရှုသည် ရှင်ပြန်ထမြောက်ခြင်းပြုလုပ်ပေးရန် လိုလားသည့်ဆန္ဒရှိရုံမက တတ်လည်းတတ်နိုင်ကြောင်း အစွမ်းထက်လှသည့်နည်းဖြင့် ပြသတော်မူခဲ့သည်။
“လာဇရု ထွက်၍လာလော့!”
ရင်နင့်စဖွယ်မြင်ကွင်းဖြစ်ပေသည်။ လာဇရုသည် အသည်းအသန်ဖျားနေသည်။ အစ်မနှစ်ယောက်ဖြစ်သော မာရိနှင့်မာသတို့သည် ယော်ဒန်မြစ်တစ်ဖက်တွင် ရောက်ရှိနေသောယေရှုထံ ဤသို့သတင်းပါးလိုက်သည်– “သခင်၊ ကိုယ်တော်ချစ်တော်မူသောသူသည် နာလျက်နေပါသည်။” (ယောဟန် ၁၁:၃) လာဇရုကို ယေရှုချစ်တော်မူကြောင်း သူတို့သိကြသည်။ ဖျားနာနေသည့်မိတ်ဆွေကို ယေရှုအကြည့်အရှုမကြွဘဲ နေတော်မူမည်လော။ အံ့သြစရာကောင်းသည်မှာ ယေရှုသည် ဗေသနိရွာသို့ ချက်ချင်းကြွတော်မူမည့်အစား ထိုရွာ၌နောက်နှစ်ရက် ထပ်၍နေတော်မူ၏။—ယောဟန် ၁၁:၅၊ ၆။
ယေရှုထံသတင်းပို့၍ မကြာမီတွင် လာဇရုသေဆုံးသွားလေသည်။ မည်သည့်အချိန်တွင် လာဇရုသေဆုံးကြောင်း ယေရှုသိတော်မူ၍ တစ်စုံတစ်ရာပြုလုပ်ရန် ကြံရွယ်ထားတော်မူ၏။ ဗေသနိရွာသို့ ယေရှုရောက်ရှိချိန်တွင် ကိုယ်တော်၏ ချစ်လှစွာသောမိတ်ဆွေသည် သေ၍လေးရက်ရှိလေပြီ။ (ယောဟန် ၁၁:၁၇၊ ၃၉) ထိုမျှကြာကြာသေဆုံးသွားသူအား ယေရှု ပြန်လည်အသက်ရှင်စေနိုင်မည်လော။
ယေရှုကြွလာတော်မူကြောင်း ကြားရသည့်အခါ၌ သွက်လက်ဖျတ်လတ်သောမာသက ကိုယ်တော်အားပြေး၍ ကြိုဆိုလေ၏။ (လုကာ ၁၀:၃၈-၄၂ နှိုင်းယှဉ်။) မာသ၏ပူဆွေးဝမ်းနည်းမှုကြောင့် စိတ်တော်ထိခိုက်ပြီး ယေရှုက “သင်၏မောင်သည် ထမြောက်လိမ့်မည်”ဟု သူမအားစိတ်ချစေတော်မူ၏။ မာသက အနာဂတ်ထမြောက်ခြင်းအပေါ် ယုံကြည်ကြောင်း အရိပ်အမြွက်ပြသသည့်အခါ ယေရှုကသူမအား ဤသို့ရိုးရိုးပင်မိန့်တော်မူ၏– “ငါသည်ထမြောက်ခြင်းအကြောင်း၊ အသက်ရှင်ခြင်းအကြောင်းဖြစ်၏။ ငါ့ကိုယုံကြည်သောသူသည် သေလွန်သော်လည်း ရှင်လိမ့်မည်။”—ယောဟန် ၁၁:၂၀-၂၅။
သင်္ချိုင်းတွင်းသို့ရောက်သောအခါ ယေရှုသည် တွင်းကိုပိတ်ထားသည့် ကျောက်ကိုရွှေ့ရန် အမိန့်ပေးတော်မူ၏။ ထို့နောက်၊ ကျယ်လောင်စွာဆုတောင်းပြီးနောက် “လာဇရု ထွက်၍လာလော့!” ဟု အမိန့်ပေးတော်မူ၏။—ယောဟန် ၁၁:၃၈-၄၃။
လူအားလုံးက သင်္ချိုင်းတွင်းကို စိုက်ကြည့်နေကြသည်။ တစ်ဆက်တည်းတွင် အမှောင်ထဲမှ လူသဏ္ဌာန်တစ်ခုပေါ်လာသည်။ ထိုသူ၏ခြေလက်၌ အဝတ်ဖြင့်ပတ်လျက်၊ မျက်နှာ၌ ပဝါဖြင့်စည်းလျက်ရှိ၏။ “သူ့ကိုဖြေ၍လွှတ်ကြလော့” ဟု ယေရှုမိန့်တော်မူ၏။ ပတ်ထားသည့်အဝတ်များကို ဖြေချလိုက်ကြသည်။ မှန်ပါသည်၊ လေးရက်ကြာ သေလွန်ခဲ့သူ လာဇရုဖြစ်ပေသည်!—ယောဟန် ၁၁:၄၄။
တကယ်ဖြစ်ပျက်ခဲ့သလော
လာဇရုထမြောက်ခြင်းအကြောင်းကို ယောဟန်ခရစ်ဝင်ကျမ်းတွင် သမိုင်းဖြစ်ရပ်မှန်အဖြစ် ဖော်ပြထားသည်။ အသေးစိတ်အချက်အလက်များသည် ကွက်ကွက်ကွင်းကွင်း ထင်ရှားလှသည်ဖြစ်ရာ ယင်းသည် သရုပ်ဖော်ဇာတ်လမ်း သက်သက်မျှသာမဟုတ်ပေ။ ဤမှတ်တမ်း၏ သမိုင်းဝင်မှုကို သံသယဖြစ်လျှင် ယေရှုခရစ်ကိုယ်တော်တိုင် ရှင်ပြန်ထမြောက်ခြင်းအကြောင်း အပါအဝင် သမ္မာကျမ်းစာမှ အံ့ဖွယ်အမှုရှိသမျှတို့ကို သံသယဖြစ်ရာရောက်သည်။ ယေရှု၏ရှင်ပြန်ထမြောက်ခြင်းကို ငြင်းပယ်လျှင် ခရစ်ယာန်ယုံကြည်ခြင်းတစ်ရပ်လုံးကို ငြင်းပယ်ရာရောက်သည်။—၁ ကောရိန္သု ၁၅:၁၃-၁၅။
စင်စစ်ဆိုလျှင် ဘုရားသခင်တည်ရှိတော်မူကြောင်း သင်လက်ခံယုံကြည်ပါက ရှင်ပြန်ထမြောက်ခြင်းအကြောင်း ယုံကြည်ရန် ပြဿနာရှိမည်မဟုတ်ပေ။ သာဓကဖြင့်ရှင်းပြရသော် လူတစ်ဦးသည် သူ၏သေတမ်းစာဖတ်ကြားခြင်းကို ဗီဒီယိုဖြင့်မှတ်တမ်းတင်ထားနိုင်ပြီး သူသေဆုံးသွားပြီးနောက် သူ၏ဆွေမျိုးများနှင့် မိတ်ဆွေတို့သည် သူပိုင်ပစ္စည်းဥစ္စာများကို မည်သို့စီမံခန့်ခွဲရမည်အကြောင်း သူကိုယ်တိုင်ရှင်းပြနေသည့်အလား သူ့ကိုမြင်၍ သူ့အသံကို ကြားနိုင်ကြသည်။ လွန်ခဲ့သည့်အနှစ်တစ်ရာလောက်ကဆိုလျှင် ဗီဒီယိုဖြင့်မှတ်တမ်းတင်ခြင်းမှာ မစဉ်းစားဝံ့သောအရာဖြစ်သည်။ ယခုခေတ်၌ပင် ဝေးလံသီခေါင်သည့်ဒေသများ၌ နေထိုင်ကြသောသူအချို့အဖို့ ဗီဒီယိုမှတ်တမ်းတင်ခြင်းဆိုင်ရာ နည်းပညာမှာ အံ့ဖွယ်သရဲပမာ ဉာဏ်မမှီနိုင်သည့်အရာ ဖြစ်နေပေသည်။ ဖန်ဆင်းရှင်ပြဋ္ဌာန်းတော်မူသည့် သိပ္ပံနည်းကျဥပဒေသများကိုအသုံးချ၍ ဤကဲ့သို့ မြင်နိုင်ကြားနိုင်သည့်ရှုခင်းမျိုးကို လူတို့ပြန်လည်ဖန်တီးနိုင်မည်ဆိုပါက ဖန်ဆင်းရှင်အနေဖြင့် ထိုထက်မကပြုလုပ်နိုင်စွမ်းရှိမည် မဟုတ်ပေလော။ သို့ဖြစ်လျှင် အသက်ကိုဖန်ဆင်းတော်မူသောအရှင်သည် အသက်ကို ပြန်လည်ဖန်ဆင်း နိုင်စွမ်းရှိသည်မှာ ကျိုးကြောင်းမဆီလျော်ပေလော။
လာဇရုပြန်လည်အသက်ရှင်လာသည့် အံ့ဖွယ်အမှုသည် ယေရှုနှင့်ရှင်ပြန်ထမြောက်ခြင်းတို့ကို ယုံကြည်စိတ်တိုးပွားရန် အထောက်အကူပြုသည်။ (ယောဟန် ၁၁:၄၁၊၄၂။ ၁၂:၉-၁၁၊ ၁၇-၁၉) ယင်းဖြစ်ရပ်သည် ယေဟောဝါနှင့်သားတော်တို့၏ ရှင်ပြန်ထမြောက်ခြင်းကို ပြုလုပ်ပေးလိုသည့် စိတ်စေတနာတော်နှင့်ဆန္ဒတော်တို့ကိုပါ စိတ်ထိခိုက်ဖွယ်ကောင်းသည့်နည်းဖြင့် ပေါ်လွင်စေသည်။
‘ဘုရားသခင်သည် တသတော်မူလိမ့်မည်’
လာဇရုသေဆုံးခြင်းနှင့်ပတ်သက်၍ ယေရှုတုံ့ပြန်ပုံက ဘုရားသခင့်သားတော်၏ နူးညံ့သိမ်မွေ့သည့်သဘောကို ထင်ရှားစေသည်။ ထိုစဉ်က ကိုယ်တော်၏ နက်ရှိုင်းသည့်ခံစားမှုများက သေလွန်သူကို ရှင်ပြန်ထမြောက်ပေးလိုသည့်ဆန္ဒ ပြင်းပြကြောင်းရှင်းလင်းစွာ ဖော်ညွှန်းလျက်ရှိသည်။ ဤသို့ဖတ်ရသည်– “မာရိသည် ယေရှုရှိတော်မူရာအရပ်သို့ရောက်၍ ကိုယ်တော်ကိုမြင်လျှင် ခြေတော်ရင်း၌ပျပ်ဝပ်လျက် ‘သခင်၊ ကိုယ်တော်ရှိတော်မူလျှင် ကျွန်မ၏ မောင်မသေပါ’ ဟုလျှောက်၏။ မာရိမှစ၍ လိုက်လာသောယုဒလူတို့သည် ငိုကြွေးကြသည်ကို ယေရှုသည်မြင်တော်မူသောအခါ အလွန်ညှိုးငယ်ခြင်း၊ စိတ်ပူပန်ခြင်းရှိ၍ ‘အလောင်းကို အဘယ်မှာထားကြသနည်း’ဟုမေးတော်မူလျှင် ‘သခင်ကြွ၍ကြည့်တော်မူပါ’ ဟုလျှောက်ကြ၏။ ယေရှုသည် မျက်ရည်ကျတော်မူ၏။ ယုဒလူတို့က ‘ကြည့်ပါ၊ လာဇရုကို အလွန်ချစ်တော်မူပါသည်တကား!’ ဟုဆိုကြ၏။”—ယောဟန် ၁၁:၃၂-၃၆။
ဤတွင် “ညှိုးငယ်ခြင်း၊” “စိတ်ပူပန်ခြင်း၊” “မျက်ရည်ကျတော်မူ၏” ဟူသော အသုံးအနှုန်းသုံးမျိုးဖြင့် ယေရှု၏ လှိုက်လှဲသော အကြင်နာတရားကို ဖော်ညွှန်းထားသည်။ ရင်နင့်စဖွယ်ကောင်းသော ဤဇာတ်လမ်းကို မှတ်တမ်းတင်ရေးသားရာ၌ အသုံးပြုခဲ့သည့် မူရင်းဘာသာစကား၌ ယေရှုသည် ချစ်လှစွာသောမိတ်ဆွေလာဇရု ကွယ်လွန်ခြင်းနှင့် လာဇရု၏အစ်မ ငိုကြွေးနေသည့်မြင်ကွင်းကြောင့် အလွန်စိတ်ထိခိုက်တော်မူသဖြင့် မျက်စိထဲမှမျက်ရည်များ လျှံကျလာသည်ဟုဖော်ပြထားသည်။ *
ထူးခြားမှတ်သားဖွယ်ကောင်းသည်မှာ ယေရှုသည် ယခင်အခါက အခြားလူနှစ်ဦးကို အသက်ပြန်ရှင်စေတော်မူခဲ့ပြီး ဖြစ်သည်။ လာဇရုအားလည်း ထို့အတူပြုရန်ကြံရွယ်တော်မူ၏။ (ယောဟန် ၁၁:၁၁၊ ၂၃၊ ၂၅) သို့သော် ကိုယ်တော် “မျက်ရည်ကျတော်မူ၏။” သို့ဖြစ်သောကြောင့် လူသားများအား အသက်ပြန်လည်ရှင်အောင်ပြုလုပ်ပေးခြင်းသည် ယေရှုအဖို့ ပုံမှန်လုပ်ထုံးလုပ်နည်းမျှသာ မဟုတ်ပေ။ ၎င်းအချိန်အခါ၌ ကိုယ်တော်ပြသခဲ့သည့် နူးညံ့သိမ်မွေ့သည့်သဘောနှင့် လေးနက်သောခံစားချက်တို့က ကိုယ်တော်၌ သေခြင်းတရား၏ ဒဏ်ရာဒဏ်ချက်များကို ပျောက်ကင်းစေလိုသည့် ပြင်းပြသောဆန္ဒရှိတော်မူကြောင်း ရှင်းလင်းစွာတွေ့မြင်နိုင်သည်။
လာဇရုအား ရှင်ပြန်ထမြောက်စေရာ၌ ယေရှုပြသတော်မူခဲ့သည့် နူးညံ့သိမ်မွေ့သောခံစားချက်များက သေခြင်းတရား၏ ဒဏ်ရာဒဏ်ချက်များကို ပျောက်ကင်းစေလိုသည့် ပြင်းပြသောဆန္ဒရှိတော်မူကြောင်း ထင်ဟပ်လျက်ရှိသည်
ယေရှုသည် ‘ယေဟောဝါဘုရားသခင့် ဇာတိတော်၏ တိကျသောပုံသဏ္ဌာန်တော်’ ဖြစ်သောကြောင့် ကျွန်ုပ်တို့၏ ကောင်းကင်ခမည်းတော်သည်လည်း သားတော်နည်းတူ ကရုဏာမေတ္တာကြီးမားတော်မူမည်ကို ကျွန်ုပ်တို့လျောက်ပတ်စွာ မျှော်လင့်ပါသည်။ (ဟေဗြဲ ၁:၃) ရှင်ပြန်ထမြောက်ခြင်းပြုလုပ်ပေးမည့် ယေဟောဝါ၏ စိတ်စေတနာတော်နှင့်စပ်လျဉ်း၍ သစ္စာရှိသူယောဘကဤသို့ဆို၏– “လူသေလျှင်ရှင်ဦးမည်လော။ . . . ကိုယ်တော်ခေါ်တော်မူသောအခါ အကျွန်ုပ်ထူးပါမည်။ လက်တော်ဖြင့်ဖန်ဆင်းရာကို တသတော်မူလိမ့်သတည်း။” (ယောဘ ၁၄:၁၄၊ ၁၅၊ သမ) ဤနေရာ၌ “တသတော်မူလိမ့်သတည်း” ဟူ၍ပြန်ဆိုထားသည့် မူရင်းဘာသာစကားသည် ဘုရားသခင်၏ ပြင်းပြသောတောင့်တခြင်းနှင့် ဆန္ဒတော်တို့ကို ဆိုလိုသည်။(ကမ္ဘာဦး ၃၁:၃၀။ ဆာလံ ၈၄:၂) ယေဟောဝါသည် ရှင်ပြန်ထမြောက်ခြင်းကို စိတ်အားထက်သန်စွာ မုချမျှော်လင့်လျက်နေမည်မှာ ရှင်းပါသည်။
ရှင်ပြန်ထမြောက်ခြင်းကတိတော်ကို ကျွန်ုပ်တို့ အမှန်ပင်ယုံကြည်နိုင်ပါသလော။ ယုံကြည်နိုင်ပါသည်။ ယင်းကို ယေဟောဝါနှင့် ကိုယ်တော့်သားတော်တို့သည် စိတ်စေတနာတော်ရှိရုံမျှမက ပြည့်စုံအောင်လည်း တတ်နိုင်တော်မူသည်။ ယင်းသည် သင့်အဖို့ အဘယ်အဓိပ္ပာယ်ရှိသနည်း။ အသင်၌ ယခုနှင့်အခြေအနေ အလွန်ကွဲပြားသည့် ဤကမ္ဘာပေါ်တွင် သေလွန်သွားသည့်ချစ်ရသူတို့နှင့် ပြန်လည်ဆုံစည်းနိုင်မည့် မျှော်လင့်ချက် ရှိနေပါသည်!
သာယာလှပသည့်ဥယျာဉ်တစ်ခု၌ လူသားများအား စ၍နေရာချပေးတော်မူခဲ့သည့် ယေဟောဝါဘုရားသခင်သည် ယခုဂုဏ်ကျက်သရေနှင့် ပြည့်စုံလျက်ရှိသော ယေရှုခရစ်၏လက်ဝယ်ရှိ ကိုယ်တော့်ကောင်းကင်နိုင်ငံတော် အုပ်ချုပ်မှုအောက် ဤကမ္ဘာမြေကြီးပေါ်တွင် ပရဒိသုဘုံကို ပြန်လည်တည်ထောင်မည်ဟု ကတိပေးထားပြီးဖြစ်သည်။ (ကမ္ဘာဦး ၂:၇-၉။ မဿဲ ၆:၁၀။ လုကာ ၂၃:၄၂၊၄၃) ပြန်လည်တည်ထောင်လာသည့် ထိုပရဒိသုဘုံတွင် လူ့မိသားစုကြီးသည် ဖျားနာခြင်းနှင့်ရောဂါအပေါင်းမှ ကင်းဝေးပြီး အဆုံးမရှိသောအသက်တာဖြင့် မွေ့လျော်ကြရမည့်မျှော်လင့်ချက် ရှိကြပေမည်။ (ဗျာဒိတ် ၂၁:၁-၄။ ယောဘ ၃၃:၂၅။ ဟေရှာယ ၃၅:၅-၇ နှိုင်းယှဉ်။) မုန်းတီးမှု၊ လူမျိုးရေးငဲ့ကွက်မှု၊ လူမျိုးစုအကြမ်းဖက်မှုနှင့် စီးပွားရေးကျပ်တည်းမှုအားလုံးတို့လည်း ရှိတော့မည်မဟုတ်။ ယေဟောဝါဘုရားသခင်သည် ယေရှုခရစ်တော်အားဖြင့် ထိုသို့သန့်ရှင်းသည့်ကမ္ဘာပေါ်သို့ သေလွန်သူများကို ရှင်ပြန်ထမြောက်စေတော်မူလတ္တံ့။
ခရစ်တော်ယေရှု၏ ရွေးနုတ်ဖိုးပူဇော်သကာအပေါ် အခြေပြုသည့် ရှင်ပြန်ထမြောက်ခြင်းက လူမျိုးအပေါင်းတို့အား ဝမ်းမြောက်ရွှင်မြူးစေလိမ့်မည်
ဤအပိုင်း၏အစ၌ ဖော်ပြခဲ့သည့် ခရစ်ယာန်အမျိုးသမီးသည် ယခုအခါဤအတိုင်းပင် မျှော်လင့်ချက်ထားရှိသည်။ သူမ၏မိခင်ကွယ်လွန်ပြီး၍ နှစ်အတန်ကြာပြီးနောက် သမ္မာကျမ်းစာကိုဂရုတစိုက်လေ့လာရန် ယေဟောဝါသက်သေများက သူမအားကူညီပေးခဲ့သည်။ သူမဤသို့ပြန်ပြောပြသည်– “ရှင်ပြန်ထမြောက်ခြင်းမျှော်လင့်ချက်အကြောင်း သိရှိရပြီးနောက် ကျွန်မငိုချမိတယ်။ မိခင်ကိုပြန်တွေ့ရမယ်လို့ သိရတာဟာ ဝမ်းသာစရာသိပ်ကောင်းတာပါပဲ။”
ချစ်ခင်မြတ်နိုးရသူတစ်ဦးကို ပြန်လည်တွေ့မြင်လိုသည့် အလားတူ တမ်းတမှုမျိုး သင်၌ရှိပါက ယင်းသေချာသောမျှော်လင့်ချက်ကို သင့်ကိုယ်ပိုင်မျှော်လင့်ချက်ဖြစ်အောင် မည်သို့လုပ်ရမည်ကိုသိရှိရန် သင့်အား ယေဟောဝါသက်သေများက ဝမ်းမြောက်စွာကူညီပေးပါလိမ့်မည်။ အနီးအနားရှိ ဘုရားသခင့်နိုင်ငံတော်ခန်းမသို့သွား၍ သူတို့နှင့်ဆက်သွယ်ပါလေ။ သို့တည်းမဟုတ် စာမျက်နှာ ၃၂ တွင်ဖော်ပြထားသည့် အနီးဆုံးလိပ်စာဖြင့် စာရေးဆက်သွယ်ပါလေ။
^ အပိုဒ်၊ 20 “ညှိုးငယ်ခြင်း” ဟူ၍ ပြန်ဆိုသည့်ဂရိစကားလုံးမှာ နာကျင်စွာ၊ သို့မဟုတ် လေးနက်စွာ စိတ်ထိခိုက်သည်ဟူ၍ အဓိပ္ပာယ်သက်ရောက်သောကြိယာ (အမ်.ဘရီ.မားအို.မိုင်) မှဆင်းသက်လာသည်။ ကျမ်းစာပညာရှင်တစ်ဦးက ဤသို့ဂရုပြုဖော်ပြထားသည်– “ဤနေရာ၌ ယေရှုသည် ပြင်းပြသည့်စိတ်လှုပ်ရှားမှု၏ ချုပ်ထိန်းခြင်းကိုခံလိုက်ရသဖြင့် ရင်ထဲမှညည်းညူသည့်အသံ အလိုအလျောက်ထွက်ပေါ်လာခြင်းဟူ၍သာ အဓိပ္ပာယ်ရှိနိုင်သည်။” “စိတ်ပူပန်ခြင်း” ဟူ၍ ဘာသာပြန်ဆိုထားသည့် အသုံးအနှုန်းမှာ စိတ်လှုပ်ရှားခြင်းကိုညွှန်းသည့် ဂရိစကားလုံး (တာ.ရားစ်စိုး) မှဆင်းသက်လာသည်။ အဘိဓာန်ပြုစုသူတစ်ဦး၏အလိုအရ ယင်းသည် “ရင်ထဲ၌ ဗယောက်ဗယက်ဖြစ်စေခြင်း၊ . . . ပြင်းပြသောနာကျင်မှု သို့မဟုတ် ပူဆွေးဝမ်းနည်းမှုဖြစ်စေခြင်း” ဟူ၍အဓိပ္ပာယ်ရှိသည်။ “မျက်ရည်ကျတော်မူ၏” ဟူသောအသုံးအနှုန်းမှာ “မျက်ရည်ထွက်သည်၊ အသံမထွက်ဘဲငိုကြွေးသည်” ဟူ၍ အဓိပ္ပာယ်ရသော ဂရိကြိယာ (ဒါ.ကရီးအို) မှဆင်းသက်လာသည်။
ကြိုက်လို ကြိုက်ငြား အကြောင်းအရာများ
နိုးလော့!
ဝမ်းနည်းပူဆွေးသူများအတွက် အကောင်းဆုံး အကူအညီ
သမ္မာကျမ်းစာက ဝမ်းနည်းပူဆွေးသူတွေကို အကောင်းဆုံး အကူအညီ ပေးနိုင်တယ်။
