ဘုရားသခင် ပြုလုပ်​ထားရာတွေက ကိုယ်တော်ရဲ့ တခြား​အရည်အသွေးတွေကိုလည်း ဖော်ပြ​ကြောင်း ကို​စိုးမိုး ရှင်းပြတယ်။ ကို​အောင်နိုင်​နဲ့ မစ​န္ဒာ​တို့ကို စိတ်ဝင်စားစရာ​ကောင်းတဲ့ ဒီ​ကျမ်းချက်ကို ဖတ်​ပြတယ်–

• “ယေဟောဝါဘုရား၊ ကိုယ်တော့်​လုပ်ဆောင်မှုတွေ များ​လိုက်တာ။ ဒါတွေ​အားလုံးကို ဉာဏ်ပညာနဲ့ ဖန်ဆင်း​ထားတယ်။ ကမ္ဘာမြေဟာ ကိုယ်တော့်​လက်ရာတွေနဲ့ ပြည့်​နေတယ်။”—ဆာလံ ၁၀၄:၂၄။

ကို​စိုးမိုး ဒီလို​ပြောပြတယ်– “အင်မတန် သေးငယ်တဲ့ အင်းဆက်​လေး​တွေ​မှာ​တောင် ယေဟောဝါရဲ့ ဉာဏ်ပညာ​ကို တွေ့နိုင်တယ်။ ဥပမာ၊ သမ္မာကျမ်းစာက ပုရွက်ဆိတ်​ရဲ့ ပင်ကို​အသိဉာဏ်​အကြောင်း ပြော​ထားတယ်။”

သစ်​ရွက်​အပိုင်းအစတွေကို ကိုက်ဖြတ်​ပြီး ပုရွက်ဆိတ်အုံ​ဆီ သယ်ဆောင်​သွားဖို့ အလုပ်​ရှုပ်​နေကြ​တဲ့ ပုရွက်ဆိတ်​တွေကို မကြာခဏ မြင်ဖူး​ကြ​ကြောင်း ပြန်​ပြောပြတယ်။ ဒီလိုလုပ်​ရမယ်ဆိုတာ ပုရွက်ဆိတ်​တွေ ဘယ်လို သိ​ကြသလဲ။ ကျမ်းရေးသူ​တစ်ဦး​က ပုရွက်ဆိတ်​မှာ “ပင်ကို​အသိဉာဏ်” ရှိကြောင်း ရှင်းပြ​တယ်။ ဒါဆိုရင် ဒီလို​အသိဉာဏ်​ရှိတဲ့ ပုရွက်ဆိတ်​ကို ဘယ်သူ ပြုလုပ်ခဲ့သလဲ။ ပုရွက်ဆိတ်​ထဲမှာ အဲဒီ​ပင်ကို​အသိဉာဏ်​ကို ဘယ်သူ ထည့်သွင်း​ပေးသလဲ။ ကောင်းကင်နဲ့ မြေကြီးကို ဖန်ဆင်းတဲ့ ယေဟောဝါ ဖြစ်တယ်လို့ သမ္မာကျမ်းစာ​က ဆိုတယ်။—ပညာအလိမ္မာ ၃၀:၂၄၊ ၂၅။

ကို​အောင်နိုင် ဒီလို​ပြောတယ်– “ဒီလို​ပင်ကို​အသိဉာဏ်​ရှိတဲ့ သတ္တဝါ​တွေ​မှာ ဒီဇိုင်း​ရေးဆွဲ​သူနဲ့ ဖန်ဆင်းရှင် ရှိရမယ်​ဆိုတာ ကျွန်တော် လက်ခံ​ပါပြီ။”

ဒီ​နောက် ကို​စိုးမိုး​က ကို​အောင်နိုင်​နဲ့ မစ​န္ဒာ​တို့ အလွန်​စိတ်စွဲမှတ်​သွား​စေတဲ့ အရာတစ်ခု​ကို ပြော​လိုက်တယ်– “ကျွန်တော်တို့ ဆက်​အသက်ရှင်ဖို့ ယေဟောဝါရဲ့ ဉာဏ်ပညာ​ကို မှီခို​နေရ​ကြတယ်ဆိုတာ သိသလား။” ဘယ်လို မှီခို​နေရသလဲ ဆိုတာကို စဉ်းစား​ကြတယ်။

သက်ရှိတွေ ရှင်သန်​နိုင်​ရေး​အတွက် ကမ္ဘာမြေရဲ့ ပတ်ဝန်းကျင် အနေအထားဟာ အသင့်တော်ဆုံး ဖြစ်နေတာ အံ့သြစရာ သိပ်​ကောင်း​ကြောင်း ကို​စိုးမိုး ရှင်းပြတယ်။  မိမိ​ဝင်ရိုး​ပေါ် ကမ္ဘာ​ရဲ့​လည်ပတ်​နှုန်း​နဲ့ နေကို လှည့်ပတ်​နေတဲ့ ပတ်လမ်းကြောင်း​မှာ ကမ္ဘာ​ရဲ့ ရွေ့လျား​နှုန်း​တို့​က နေ​စွမ်းအင်​ကို ကမ္ဘာ့​မျက်နှာပြင်​ပေါ် အကောင်းဆုံးနည်းနဲ့ ပျံ့နှံ့​သွားစေတယ်။ ဆွဲငင်​အား​ဟာ ဓာတ်ငွေ့​တွေ အချိုး​ကျ​ကျ​ပါဝင်တဲ့ ကမ္ဘာ့​လေထု​ကို အာကာသ​ထဲ ပျံ့လွင့်​မသွား​စေဖို့ ထိန်းထား​ပေးတယ်။ ဒါပေမဲ့ ဒီ​ဆွဲငင်​အား​က ကျွန်တော်တို့ လွတ်လွတ်လပ်လပ် မလှုပ်ရှားနိုင်​လောက်​တဲ့​အထိ​တော့ မ​ပြင်းထန်​လွန်း​ပါဘူး။ သက်ရှိတွေ ဆက်​ရှင်သန်​နိုင်ဖို့ မရှိမဖြစ်​လိုအပ်တဲ့ ရေထု​ကြီး​လည်း ရှိသေး​တယ်။ မြေကြီး​ထဲမှာ​တောင် အပင်​တွေ စုပ်ယူ​အသုံးပြု​နိုင်ဖို့​အတွက် ရေ​နဲ့ အလွယ်တကူ ပေါင်းစပ်​နိုင်တဲ့ အာဟာရဓာတ်​တွေ ပြည့်နှက်​နေတယ်။

ကို​စိုးမိုး ဒီလို​ပြောတယ်– “ဒါတွေ​အားလုံး မတော်တဆ ဖြစ်မလာ​နိုင်ဘူး​လို့ ကျွန်တော် လုံးဝ​ယုံကြည်တယ်။ သက်ရှိတွေ တည်ရှိ​နိုင်ဖို့ လိုအပ်သမျှ​ကို အကန့်အသတ်မဲ့ ဉာဏ်ပညာ​ရှင် ယေဟောဝါဘုရား ဖြစ်ပေါ်​စေ​တာ​ပဲ​လို့ ကျွန်တော် ယုံကြည်တယ်။”

ကို​အောင်နိုင်​နဲ့ မစ​န္ဒာ​တို့ ခေါင်းတညိတ်ညိတ်​နဲ့ အသံတိတ် ထောက်ခံ​နေကြတယ်။

ကို​စိုးမိုး​က ဘုရားသခင်ရဲ့ နောက်ထပ်​အရည်အသွေး​ဖြစ်တဲ့ တန်ခိုးတော်​အကြောင်း ပြောပြ​တော့ စွဲမှတ်​သွား​ကြ​ပြန်တယ်။ ယေဟောဝါရဲ့ တန်ခိုးတော်​အကြောင်း သမ္မာကျမ်းစာ ဘာ​ဖော်ပြသလဲ​ဆိုတာကို ကို​အောင်နိုင် သိချင်​နေခဲ့တာ။ ကို​စိုးမိုး​က ကျမ်းချက် ဖွင့်ဖတ်​ပြတယ်–

• “အချုပ်အခြာအာဏာပိုင်ရှင် ယေဟောဝါ၊ ကိုယ်တော်​က ကောင်းကင်နဲ့ မြေကြီးကို ကြီးမားတဲ့​တန်ခိုး၊ အားကြီးတဲ့​လက်ရုံး​နဲ့ ဖန်ဆင်းခဲ့တယ်။”—ယေရမိ ၃၂:၁၇။

ကို​စိုးမိုး ဒီလို​ပြောတယ်– “နေ​စွမ်းအင်​ကို စဉ်းစား​လိုက်မယ်​ဆိုရင် ယေဟောဝါရဲ့ ကြီးမား​လှတဲ့ တန်ခိုးတော်​အကြောင်း ကျွန်တော်တို့ အနည်းငယ် သိနိုင်တယ်။ ပူပြင်း​တဲ့ နေ့တစ်နေ့မှာ အပြင်ထွက် ရပ်ကြည့်​မယ်​ဆိုရင် နေပူရှိန်​ကို ခံစား​ရတယ် မဟုတ်လား။ နေဟာ ဘယ်လောက် စွမ်းအား​ပြင်းသလဲ​ဆိုတာ ခန့်မှန်း​နိုင်သလား။”

 “ဒီမှာ​ဆိုရင် မိုး​ရာသီ ရောက်​ခါနီး​ရင် အရမ်း​ပူ​တာ သတိထား​မိတယ်” လို့ ကို​အောင်နိုင် ပြန်​ပြောတာကို ကို​စိုးမိုး​လည်း သဘောတူတယ်။

နေရဲ့ ဗဟိုမှာ အပူချိန် ၂၇ သန်း ဒီဂရီ​ဖာရင်ဟိုက်​လောက်​ရှိကြောင်း ဖတ်ဖူး​တယ်လို့ ကိုစိုးမိုး ပြောတယ်။ တကယ်လို့ နေရဲ့​ဗဟို​ကနေ ပင်​အပ်​ထိပ်ဖျား​အရွယ် အပိုင်းအစ​တစ်ခုကို ယူပြီး ဒီ​ကမ္ဘာပေါ်မှာ ထားမယ်​ဆိုရင် ဒီ​အပူခဲလေး​ကနေ မိုင်​ပေါင်း ၁၀၀ လောက် အတွင်း ဘေးကင်း​စွာ ရပ်နေ​နိုင်မှာ မဟုတ်ဘူး။ နျူကလီးယား​ဗုံး သန်းပေါင်း​ရာနဲ့ချီ ပေါက်ကွဲမှု ပမာဏ​နဲ့ ညီမျှတဲ့ စွမ်းအင်​ကို နေ​က စက္ကန့်​တိုင်း ထုတ်လွှတ်​ပေးနေ​တယ်။

“နေရဲ့ စွမ်းအား​က ဒီလောက်​ပြင်းထန်​တယ်​ဆိုရင် နေကို ပြုလုပ်တဲ့​ပုဂ္ဂိုလ်ဟာ ဘယ်လောက်တောင် အစွမ်း​တန်ခိုး ရှိမလဲ။ ကိုယ်တော်ရဲ့ အစွမ်း​တန်ခိုး ဘယ်လောက်​ရှိတယ်ဆိုတာ ခန့်မှန်း​လို့​တောင် မရနိုင်ဘူး။ နေကို သုံးသပ်​ကြည့်တဲ့အခါ ဖန်ဆင်းရှင် ယေဟောဝါမှာ​ရှိတဲ့ အကန့်အသတ်မဲ့ တန်ခိုးတော်​ရဲ့ အထောက်အထား အနည်းငယ်​လောက်​ကိုပဲ မြင်တွေ့​ရတာ” လို့ ဆက်ပြောတယ်။

ဒီ​အံ့သြဖွယ်ရာ​အားလုံးဟာ မတော်တဆ ဖြစ်လာတာ မဟုတ်​နိုင်ဘူး​ဆိုတဲ့​ ကိုစိုးမိုး​ရဲ့ ပြောပြချက်​ကို ကို​အောင်နိုင်​နဲ့ မစ​န္ဒာ​တို့ လက်ခံ​လိုက်ကြတယ်။ ဖန်ဆင်းရှင် ရှိ​ကို​ရှိ​ရမှာ​ဖြစ်ကြောင်း၊ ဖန်ဆင်းရှင် ယေဟောဝါဟာ မျက်မြင်မရ နာမ်ဝိညာဉ် ဖြစ်ပေမဲ့ စုံလင်တဲ့​မေတ္တာ၊ တရား​မျှတမှု၊ ဉာဏ်ပညာ၊ တန်ခိုး​တို့နဲ့ အရာအားလုံးကို ပြုလုပ်​ထားတဲ့ အမှန်​တည်ရှိတဲ့​ပုဂ္ဂိုလ် ဖြစ်တယ်ဆိုတာ သဘောပေါက်​လာ​ကြတော့တယ်။