အဲဒီ​နေ့ ညနေပိုင်း​မှာ ကို​အောင်နိုင် အလုပ်​က ပြန်လာတဲ့​အခါ မစ​န္ဒာ​က မ​သီ​တာ ပြောပြ​သ​မျှ ပြန်​ပြောပြတယ်။ စိတ်ဝင်စားဖို့ ကောင်းတယ်လို့ ကို​အောင်နိုင် ယူမှတ်​ပေမဲ့​လည်း ငြိမ်သက်မှုနဲ့ ပျော်ရွှင်မှု ရစေတဲ့ တခြား​နည်းလမ်း​တွေ​အကြောင်း တခြားသူတွေ ပြောဆို​ကြတာကို ကြားဖူး​တဲ့​အတွက် အဲဒီ​အကြောင်းကို သံသယ​ဖြစ်​မိတယ်။ ဒါပေမဲ့ အဲဒီ​အကြောင်း ကို​စိုးမိုး​နဲ့ ပြော​ကြည့်မယ်​လို့ ဆုံးဖြတ်ပြီး နောက်​စနေနေ့​မှာ စကားပြော​ဖြစ်ခဲ့တယ်။

ကို​စိုးမိုး​က ကို​အောင်နိုင်​ကို ဒီလို​ပြောတယ်– “ဒီ​စာအုပ်ကို သမ္မာကျမ်းစာ​လို့ ခေါ်တယ်။ ဒီ​စာအုပ်ကို ကျွန်တော် ဖတ်နေ​တုန်း​ပဲ။ တိကျ​မှန်ကန်​ပြီး ယုံကြည်​စိတ်ချ​နိုင်တယ်ဆိုတာ ကျွန်တော် အပြည့်အဝ ယုံကြည်တယ်။”

ကို​အောင်နိုင်​က သံသယဝင်​နေတဲ့​အချက်ကို ဒီလို​ပြောပြတယ်– “ကျွန်တော်တို့ ပတ်ဝန်းကျင်မှာ​ရှိတဲ့ ဆင်းရဲနွမ်းပါးမှု​နဲ့ စိတ်​ဆင်းရဲ​စရာတွေ​က မ​ပျောက်သွားတဲ့​အပြင် ဒါတွေကြောင့် လူမျိုး​အားလုံး၊ နိုင်ငံ​အားလုံး ထိခိုက်​ခံစား​နေကြတာ​ကို မြင်​နေ​ရတယ်။ လမ်းမှန်​ပါလို့ ပြောနေတဲ့ ဘာသာ​တရား​တွေ​နဲ့ အတွေးအခေါ် ပညာရပ်​တွေ အများကြီး ရှိပေမဲ့​လည်း ဘယ်​တစ်ခုက​မှ စစ်မှု၊ ညံ့ဖျင်း​တဲ့ အုပ်ချုပ်မှု၊ လူမျိုးရေး မုန်းတီးမှု၊ ဆင်းရဲနွမ်းပါးမှု​တွေကို မဖြေရှင်း​ပေးနိုင်​ဘူး။ ဒီ​စာအုပ်မှာ​ပါတဲ့ အကြောင်းအရာက အဲဒီ​ဘာသာတရား​တွေ၊ အတွေးအခေါ် ပညာရပ်​တွေ ပြောတာနဲ့ ဘာကွာ​ခြား​မှာ​မို့​လို့​လဲ။”

ကျမ်းစာထဲက အချက်တစ်ချက်​ကို ကို​စိုးမိုး ဖတ်ပြ​လိုက်တဲ့အခါ ကို​အောင်နိုင် အတော်​အံ့သြ​သွားတယ်။ ဖတ်ပြ​တဲ့​ကျမ်း​စကားကတော့– “လူ​လူ​ချင်း အုပ်ချုပ်​တာ​ဟာ ထိခိုက်​နစ်နာ​စရာတွေ​ပဲ ဖြစ်စေတယ်။” ‘လူဟာ ကိုယ့်​ခြေလှမ်း​ကို လမ်းညွှန်​ပိုင်ခွင့် မရှိဘူး။’ ဒီ​စကားတွေရဲ့ မှန်ကန်မှု​ကို ဘယ်သူမှ မငြင်း​နိုင်မှန်း ကိုအောင်နိုင်​ သဘောတူတယ်။ ဒီ​စကားတွေဟာ အနောက်နိုင်ငံ​တွေ​မှာသာမက​ ကိုအောင်နိုင် နေထိုင်တဲ့​နိုင်ငံက လူတွေ​အတွက်ပါ မှန်ကန်တယ်။

 ကို​စိုးမိုး​က တခြား​အကြောင်းရင်း​များစွာ​ကြောင့်လည်း သမ္မာကျမ်းစာကို ယုံကြည်​စိတ်ချ​ကြောင်း ကို​အောင်နိုင်​ကို ဆက်​ရှင်းပြတယ်– “မစ​န္ဒာ​ကို မ​သီ​တာ ပြောပြ​ခဲ့​တဲ့​အတိုင်း သမ္မာကျမ်းစာက နေ့စဉ်​အသက်တာ​အတွက် လက်တွေ့ကျ လမ်းညွှန်ချက်တွေ ပေး​ရုံသာမက လူတွေ ရင်ဆိုင်​နေရတဲ့ ပြဿနာတွေရဲ့ ရင်းမြစ်ကို​ပါ ရှင်းလင်းစွာ ဖော်ထုတ်​တယ်။ သမ္မာကျမ်းစာ​ဟာ သိပ္ပံ​ပညာ​အရ​လည်း တိကျ​မှန်ကန်တယ်​ဗျ။”

ကို​အောင်နိုင် သံသယဝင်​နေတုန်းပဲ။ ဒါကြောင့် ဒီလို​ဆက်​မေးတယ်– “သမ္မာကျမ်းစာ​လို ရှေးကျတဲ့ စာအုပ်​တစ်အုပ်​က မျက်မှောက်ခေတ် ပြဿနာတွေနဲ့ သက်ဆိုင်တဲ့​အပြင် သိပ္ပံ​ပညာ​အရ​လည်း တိကျ​မှန်ကန်မှု ရှိတယ်ဆိုတာ ဘယ်လို ဖြစ်နိုင်မှာလဲ။” ဒီ​စာအုပ် ရေး​တဲ့​သူကိုလည်း သူသိ​ချင်တယ်။

ကို​စိုးမိုး ဒီလို​ရှင်းပြတယ်– “သမ္မာကျမ်းစာကို လူ​တစ်ယောက်တည်း ရေးခဲ့တာ မဟုတ်ဘူး။ တကယ်​ဆိုရင် ဒီ​စာအုပ်ဟာ နှစ်ပေါင်း ၁,၆၀၀ လောက်​အတွင်း လူပေါင်း ၄၀ ကျော် ရေးသားခဲ့တဲ့ စာအုပ်​ငယ် ၆၆ စောင်​ကို စုစည်း​ထားတာ​ဖြစ်ပြီး လွန်ခဲ့တဲ့​နှစ်ပေါင်း ၁,၉၀၀ ခန့်​က ရေး​ပြီး​ခဲ့​တာ။ ရေး​တဲ့​လူတွေဟာ သိပ္ပံ​ပညာ​ဆိုင်ရာ အသိပညာ အနည်း​အကျဉ်းသာ ရှိပေမဲ့ နောက်ပိုင်း နှစ်​ထောင်ချီ​ကြာ​တော့​မှ သိလာတဲ့ အချက်အလက်​တွေကို ရေးသားခဲ့​ကြတယ်။ ဥပမာ၊ ကျမ်းရေးသူ​တစ်ဦး​က ကမ္ဘာမြေကို ‘ဘာနဲ့မှ​မ​ချိတ်ဆွဲ​ဘဲ ဆိုင်း​ထားတယ်’ လို့​ဖော်ပြပြီး နောက်​တစ်ဦး​က ‘ကမ္ဘာလုံး’ လို့ ဖော်ပြတယ်။ ကျမ်းစာ ရေးသားခဲ့​ချိန်​တုန်း​က အဲဒီ​အချက်တွေကို ကျယ်ကျယ်ပြန့်ပြန့် မသိကြ​သေး​ဘူး။ ဒါတွေ မှန်ကန်တယ်​ဆိုတာ သိပ်​မကြာခင်​ကမှ သိပ္ပံ​ပညာရှင်​တွေ သက်သေထူ​နိုင်ခဲ့ကြ​တယ်။”

“စိတ်ဝင်စားစရာ​ပဲ” လို့ ကို​အောင်နိုင် ပြောတယ်။ ကို​စိုးမိုး​က ကို​အောင်နိုင်​ကို အလားတူ စိတ်ဝင်စားစရာ​ကောင်းတဲ့ နောက်​တစ်ချက်​ကို ပြ​ချင်​နေတယ်။

“သမ္မာကျမ်းစာက ဗာဗုလုန်လို့​ခေါ်တဲ့ ကမ္ဘာ့​အာဏာစက်​တစ်ခု ကျဆုံး​မှု​အကြောင်း နှစ်ပေါင်း ၂၀၀ လောက် ကြိုပြောထားတယ်။ ဗာဗုလုန် ဘယ်လို​သိမ်းပိုက်​ခံရမယ်ဆို​တာ​အပြင် သိမ်းပိုက်​မယ့်​ဘုရင်ရဲ့ နာမည်ကို​တောင် မမွေးခင် အတော်ကြာကြာ​ကတည်းက ဖော်ပြ​ထားတာ အံ့ဩစရာ​ပဲ။ အမှန်​ဆိုရင် ကျမ်းစာမှာ အနာဂတ်​အတွက် ကြိုဟောထားချက်တွေ ရာနဲ့ချီ ရှိတယ်။”

 အဲဒီ​အချက်တွေကို ကို​အောင်နိုင် စဉ်းစား​သုံးသပ်​နေရင်း ပို​အံ့သြ​သွား​စေတဲ့​အရာကို ကိုစိုးမိုး ပြောပြတယ်။ “ကျွန်တော်တို့​အပါအဝင် တခြားသူတွေ ဒီနေ့ ရင်ဆိုင်​နေရတဲ့ အခက်အခဲတွေကို လွန်ခဲ့တဲ့​နှစ်ပေါင်း ၁,၉၀၀ ကတည်းက သမ္မာကျမ်းစာမှာ ကြိုဟော​ထားတယ်​ဆိုတာ သိလား။” ကျမ်းစာထဲက ဒီ​ကျမ်းပိုဒ်​ကို ကို​စိုးမိုး ဖတ်​ပြတယ်–

• “နောက်ဆုံး​ကာလဟာ အလွန် ခက်ခဲ​ကျပ်တည်းမယ်​ဆိုတာ သိထားပါ။ ဘာလို့လဲ​ဆိုတော့ လူတွေဟာ ကိုယ့်ကိုယ်ကိုယ်​ပဲ ချစ်တဲ့​သူ၊ ငွေကို​ တပ်မက်သူ၊ ဝါကြွားသူ၊ မောက်မာ​သူ၊ ဘုရားကို စော်ကား​ပြောဆိုသူ၊ မိဘ​စကား နားမထောင်​သူ၊ ကျေးဇူးကန်းသူ၊ သစ္စာ​မရှိသူ၊ ချစ်ခင်​တွယ်တာ​စိတ် မရှိသူ၊ ညှိနှိုင်းလို့​မရသူ၊ သွားပုပ်လေလွင့်​ပြောသူ၊ မချုပ်တည်း​နိုင်​သူ၊ ကြမ်းကြုတ်သူ၊ ကောင်းမြတ်ရာကို မုန်းတီး​သူ၊ သစ္စာဖောက်​သူ၊ တဇောက်​ကန်း​နိုင်​သူ၊ မာန​ထောင်လွှား​သူ၊ ဘုရားသခင်ကို မချစ်ဘဲ​ အပျော်အပါး​ကိုသာ နှစ်သက်သူ၊ ဘုရား​တရား ကြည်ညိုဟန်​ရှိပေမဲ့ တရားကို လက်တွေ့​မကျင့်​သူတွေ ဖြစ်ကြလိမ့်မယ်။”

စစ်၊ ရောဂါ၊ အစာ​ခေါင်းပါး​မှု၊ မြေငလျင်၊ မတရားမှုတွေ အပါအဝင် ကမ္ဘာတစ်ဝန်းမှာ ဆင်းရဲခက်ခဲမှုတွေ ဖြစ်ပျက်​မှာ​ကို သမ္မာကျမ်းစာရဲ့ တခြား​နေရာတွေမှာ ကြိုဟော​ထားတယ်​ဆိုပြီး ကို​အောင်နိုင်​ကို ကို​စိုးမိုး ပြောပြတယ်။

သူနဲ့ မစ​န္ဒာ​တို့ ကြုံတွေ့​နေရတဲ့ ပြဿနာ​တော်​တော်​များများ​ကို ကြာမြင့်စွာ​ကတည်းက သမ္မာကျမ်းစာမှာ တိကျ​စွာ ဖော်ပြ​ထားတာကို မြင်တွေ့​လိုက်​ရလို့ ကို​အောင်နိုင် အံ့သြ​သွားတယ်။

“တော်​တော် ထူးခြား​တာ​ပဲ” လို့ ကို​အောင်နိုင် တ​အံ့​တ​ဩ ပြောတယ်။