အိမ်နီးချင်း ကို​စိုးမိုး​နဲ့ မ​သီ​တာ​တို့ ဇနီးမောင်နှံ အမြဲတမ်း အေးအေးချမ်းချမ်း​ရှိပြီး ကျေနပ်​ရောင့်ရဲစွာ နေထိုင်​ကြ​ပုံ​ရတာကို မစ​န္ဒာ သတိပြုမိတယ်။ သူတို့မှာ ဘာ​လျှို့ဝှက်ချက်​များ ရှိပါ​လိမ့်၊ မ​သီ​တာ​ကို သွား​မေးကြည့်​ဦး​မှ​ပဲ​လို့ ခင်ပွန်း ကို​အောင်နိုင်​ကို ပြောတယ်။ ဒါနဲ့ နောက်​တစ်ကြိမ် မ​သီ​တာ​နဲ့ တွေ့​တဲ့အခါ မေးကြည့်​တော့​တယ်။

မ​သီ​တာ ဒီလို​ပြောတယ်– “တကယ်တော့ မစ​န္ဒာ​နဲ့ ကို​အောင်နိုင်​တို့မှာ​ရှိတဲ့ ပြဿနာ​နဲ့ စိုးရိမ်​စရာတွေ ကျွန်မတို့ဆီမှာလည်း ရှိပါတယ်။ ဒါပေမဲ့ သိပ်​မကြာခင်​တုန်း​က ကျွန်မတို့​မိသားစု​အတွက် တကယ်​လက်တွေ့ကျတဲ့ လမ်းညွှန်ချက်​တချို့​ပါတဲ့ စာအုပ်​တစ်အုပ် ရခဲ့တယ်။ အဲဒီ​စာအုပ်​က ငြိမ်သက်မှုနဲ့ ပျော်ရွှင်မှု ရစေတဲ့​လမ်းကို ဖော်ပြ​ထားတယ်။ ကျွန်မတို့ နေ့စဉ်​ကြုံတွေ့​နေရတဲ့ ဖိစီးမှု​နဲ့ စိုးရိမ်​သောကတွေ ရှိနေတဲ့ကြားက ပျော်ရွှင်​နိုင်အောင် အဲဒီ​စာအုပ်​က ထောက်ကူ​ပေးတယ်။”

မစ​န္ဒာ စိတ်ဝင်စား​သွားပြီး ပို​သိချင်တဲ့​အတွက် အဲဒီ​စာအုပ်​အကြောင်း မ​သီ​တာ ထပ်​ရှင်းပြတယ်။ “ဒီ​စာအုပ်ဟာ ရှေးကျတဲ့​စာအုပ်​ဖြစ်ပြီး အရှေ့အလယ်ပိုင်း​နဲ့ အရှေ့ပိုင်း​က ဖြစ်ပေမဲ့ ဘယ်​ဘာသာတရား၊ ဘယ်​ဂိုဏ်းဂဏ​ကို​မှ ကိုယ်စား​မပြုဘူး။ လူတိုင်း​အတွက်ပဲ။ တကယ်တော့ ဒီ​စာအုပ်ကို ဘာသာစကား ရာနဲ့ချီ​ပြီး ဘာသာပြန်ခဲ့​လို့ လူတိုင်း​လို​လို ဖတ်​နိုင်တယ်။” အဲဒီ​စာအုပ်ကို ပညာတတ်​တွေ မကြာခဏ ကိုးကားလေ့​ရှိပြီး နိုင်ငံ​အတော်များများ​ရဲ့ တရား​ဥပဒေ​တွေ​အတွက် အခြေခံ​ဖြစ်တယ်လို့​လည်း မ​သီ​တာ ပြောတယ်။

အဲဒီ​စာအုပ်ကို မစ​န္ဒာ သိပ်​တွေ့ချင်​လာတယ်။ ဒါနဲ့ အဲဒီ​နေ့ မွန်းလွဲ​ပိုင်း​မှာ မ​သီ​တာ​အိမ်ကို သွားတယ်။ မ​သီ​တာ​က အောက်ပါ​အကြောင်းအရာတွေ​နဲ့ ပတ်သက်တဲ့ စာအုပ်ထဲက လက်တွေ့ကျ လမ်းညွှန်ချက်တွေကို ပြခဲ့တယ်–

• “ကလေးကို သူ​သွားသင့်တဲ့​လမ်းအတိုင်း လေ့ကျင့်ပေးပါ။ အသက်ကြီး​လာ​ရင်တောင် အဲဒီ​လမ်းကို သူ​စွန့်ခွာမှာ မဟုတ်ဘူး။”

• “ဖခင်​တို့၊ သားသမီးတွေကို စိတ်ဆိုး​အောင် မလုပ်ကြနဲ့။”

• “ခိုး​တတ်တဲ့​သူလည်း မခိုး​ပါ​နဲ့​တော့။ ကောင်းတဲ့​အလုပ်ကို ကိုယ်တိုင်​ကြိုးစားလုပ်​ဆောင်​ပါ။ ဒါမှ လိုအပ်သူ​ကို ပေးကမ်း​နိုင်မယ်။”

• “အလုပ် မ​လုပ်ချင်တဲ့​သူ အစာ​မစား​စေ​နဲ့။”

• “ကိုယ်​စိတ်​နှစ်ပါး​ကို ညစ်ညူး​စေတဲ့​အရာ ရှိသမျှနဲ့ ကင်းစင်​နေကြစို့။”

• “စပျစ်ဝိုင်ဟာ လှောင်ပြောင်​စ​ရာ ဖြစ်စေတယ်။ အရက်​က​လည်း ထိန်း​မ​နိုင်​သိမ်း​မရ​ ဖြစ်စေ​တယ်။ အဲဒါတွေကြောင့် လမ်းလွဲ​သွား​သူဟာ ဉာဏ်​ပညာမဲ့​တယ်။”

• “အိမ်ထောင်မင်္ဂလာ​ကို လူတိုင်း လေးစား​ရမယ်။ အိမ်ထောင်မင်္ဂလာ​ကို မညစ်ညူးစေပါနဲ့။”

• ‘လိင်​အကျင့်​ယိုယွင်းမှု​ကို ရှောင်ကြဉ်​ကြပါ။’

• “မိန်းမ​တစ်ယောက်ကို ရာဂစိတ်နဲ့ ကြည့်နေတာဟာ အဲဒီ​မိန်းမကို စိတ်နဲ့​ပြစ်မှားတာ​ပဲ။”

• “မိဘကို ရိုသေပါ။”

• “မင်းကို​မွေးဖွား​စေတဲ့ ဖခင်ရဲ့​စကားကို နားထောင်ပါ။ မိခင်​ကို အသက်ကြီး​သွား​လို့ ဆိုပြီး မထီလေးစား မလုပ်နဲ့။”

• ‘ခင်ဗျားတို့ ကိုယ့်ကိုယ်ကိုယ် ချစ်သလို ဇနီးကို ချစ်​ရမယ်။ ဇနီးကလည်း ခင်ပွန်းကို အလွန်​ရိုသေ​ရမယ်။’