၁၊ ၂။ အထူးသဖြင့် ဘယ်လို ပြည့်တန်ဆာ​မျိုး​က စက်ဆုပ်​စ​ရာ​ကောင်း​သလဲ။

ပြည့်တန်ဆာ​တစ်ယောက်ကို မြင်ရတာ စိတ်မကောင်း​စ​ရာ​ပါပဲ။ ဘာကြောင့်​များ ဒီလို​နိမ့်ကျတဲ့​ဘဝမျိုး ရောက်​သွားပါ​လိမ့်။ အိမ်တွင်း အကြမ်းဖက်မှု၊ နှိပ်စက်မှု​ကြောင့် ငယ်ငယ်ရွယ်ရွယ်နဲ့ လေလွင့်​သွားတာများလား။ ဆင်းရဲလွန်းလို့​များ ကိုယ့်ကိုယ်ကိုယ် ရောင်းစား​လိုက်​သလား။ ရက်စက်​ကြမ်းကြုတ်​တဲ့ လင်​ယောက်ျား​ရန်​ကနေ ထွက်ပြေးခဲ့​ရတာ​များ​လား။ ဆိုးညစ်​တဲ့ လောကမှာ ဒီလို​ဝမ်းနည်းဖွယ်​အဖြစ်တွေ ကြားရ​တတ်တယ်။ ဒါကြောင့် ပြည့်တန်ဆာ​တချို့ကို ယေရှု​ခရစ် ကြင်ကြင်နာနာ ဆက်ဆံ​ခဲ့​တယ်။ နောင်တ​ရပြီး ဘဝ​လမ်းစဉ် ပြောင်းလဲ​ကြ​သူတွေဟာ ပို​ကောင်းတဲ့​ဘဝကို မျှော်လင့်​နိုင်ကြောင်း ယေရှု အလေး​ပေးခဲ့တယ်။—မ. ၂၁:၂၈-၃၂။ လု. ၇:၃၆-၅၀။

^၂ ဒါပေမဲ့ ပြည့်တန်ဆာ​ဘဝကို တမင်တကာ ရွေးချယ်​တဲ့ အမျိုးသမီး​တစ်ယောက်​အကြောင်း စဉ်းစား​ကြည့်ကြစို့။ ပြည့်တန်ဆာ​အလုပ်ကို နိမ့်​ကျတယ်​လို့ မမြင်​ဘဲ ဩဇာ​လွှမ်းမိုး​နိုင်တဲ့​အလုပ်​လို့ မြင်တယ်။ ဒီ​အလုပ်​ကြောင့် ရတဲ့ ငွေနဲ့ ဩဇာ​ကို မက်မောတယ်။ ပို​ဆိုး​တာ​က သစ္စာရှိ ခင်ပွန်းကောင်း ရှိပါ​လျက်​နဲ့ ပြည့်တန်ဆာ လုပ်ဖို့ တမင်တကာ ဖောက်ပြန်​တာ​ဆိုရင်ကော။ ဒီလို​မိန်းမ​မျိုး၊ ဘဝ​လမ်းစဉ်​မျိုး​က တကယ် စက်ဆုပ်​ စ​ရာ​ကောင်းတယ်။ ဒါကြောင့် ယေဟောဝါ​ဘုရားက မှားယွင်းတဲ့ ဘာသာရေး​နဲ့​ပတ်သက်တဲ့ မိမိ​ခံစားချက်ကို ဖော်ပြဖို့ ပြည့်တန်ဆာ​အကြောင်း သရုပ်ဖော်ချက်ကို မကြာခဏ သုံးတာ ဖြစ်တယ်။

၃။ ဒီ​အခန်းမှာ ဘယ်​မှတ်တမ်းတွေ​အကြောင်း ဆွေးနွေးကြမလဲ။

^၃ ယေဇကျေလ​ကျမ်းမှာ ပြည့်တန်ဆာ​မှု​အကြောင်း မှတ်တမ်း​နှစ်ခု ပါတယ်။ အဲဒီ​မှတ်တမ်းတွေက အစ္စရေး​နဲ့ ယုဒပြည်မှာ​ရှိတဲ့ ဘုရား​လူမျိုးရဲ့ ဆိုးဝါး​တဲ့​သစ္စာမဲ့မှု​ကို သရုပ်ဖော်​ထားတယ်။ (ယေဇ. အခန်းကြီး ၁၆၊ ၂၃) ဒီ​မှတ်တမ်းတွေကို မ​လေ့လာ​ခင် ပုံဆောင်​ပြည့်တန်ဆာ​အကြောင်း လေ့လာ​ကြပါမယ်။ ပုံဆောင်​ပြည့်တန်ဆာ​မှု​ဟာ ယေဇကျေလ​ခေတ် မတိုင်ခင်၊ အစ္စရေး​လူမျိုး မတည်ရှိ​ခင် ကြာမြင့်စွာ​ကတည်းက ပေါ်ပေါက်​ခဲ့​ပြီး ဒီနေ့​အထိ ရှိနေတုန်းပဲ။ ဒီ​ပြည့်တန်ဆာ​အကြောင်းကို နောက်ဆုံး​ကျမ်းစောင် ဗျာဒိတ်​ကျမ်းမှာ ဖော်ပြ​ထားတယ်။

၄၊ ၅။ “မဟာ​ဗာဗုလုန်” ဆိုတာ ဘာလဲ။ ဘယ်လို သိရသလဲ။ (ဆောင်းပါး​အစမှာ​ပါတဲ့​ပုံကို ကြည့်ပါ။)

^၄ အေဒီ ပထမရာစု အဆုံးပိုင်းမှာ တမန်တော် ယောဟန်​ကို ယေရှု ပေးခဲ့တဲ့ စိတ်အာရုံမှာ မိန်းမ​တစ်ယောက်​အကြောင်း ကွက်ကွက်ကွင်းကွင်း ဖော်ပြ​ထားတယ်။ အဲဒီ​မိန်းမကို “ပြည့်တန်ဆာ​ကြီး၊” “မဟာ​ဗာဗုလုန်၊ ပြည့်တန်ဆာ​တွေ . . . ရဲ့ မိခင်” ဆိုပြီး ခေါ်ထားတယ်။ (ဗျာ. ၁၇:၁၊ ၅) ရာစုနှစ်တွေ​တစ်လျှောက် ဘာသာရေး​ခေါင်းဆောင်​တွေ​နဲ့ ကျမ်းပညာရှင်​တွေ​က ပြည့်တန်ဆာ​ဆိုတာ ဘယ်သူဘယ်ဝါ​မှန်း စဉ်းစား​မရ ဖြစ်ခဲ့ကြတယ်။ ဗာဗုလုန်၊ ရောမ၊ ရိုမန်ကက်သလစ်​ကို ကိုယ်စားပြု​တ​ယ်​ဆိုပြီး အမျိုးမျိုး အဓိပ္ပာယ်​ကော​က်​ကြတယ်။ ဒါပေမဲ့ “ပြည့်တန်ဆာ​ကြီး” ဘယ်သူဘယ်ဝါ​မှန်း ယေဟောဝါသက်သေတွေ နားလည်ခဲ့​တာ ဆယ်စုနှစ်​များစွာ ရှိပြီ။ ပြည့်တန်ဆာ​ကြီး​ဆိုတာ မှားယွင်းတဲ့ ကမ္ဘာ့​ဘာသာရေး အင်ပါယာ​ပါ။ ဘယ်လို သိရသလဲ။

^၅ ပြည့်တန်ဆာဟာ “မြေကြီး ဘုရင်တွေ” (နိုင်ငံရေး အင်အားစု​တွေ) နဲ့ ဖောက်ပြန်တဲ့​အတွက် ရှုတ်ချ​ခံရတယ်။ ဒါကြောင့် ပြည့်တန်ဆာဟာ နိုင်ငံရေး​အင်အားစု မဟုတ်​ကြောင်း ရှင်း​ပါတယ်။ မဟာ​ဗာဗုလုန် ပျက်စီး​သွားတဲ့​အတွက် “မြေကြီး​ကုန်သည်​တွေ” (ကူး​သန်း​ရောင်းဝယ်ရေး၊ စီးပွားရေး​အင်အားစု​တွေ) ဝမ်းနည်း​ကြတယ်​ဆိုပြီး ဗျာဒိတ်​ကျမ်းမှာ ဖော်ပြတယ်။ ဒါကြောင့် မဟာ​ဗာဗုလုန်​ဟာ စီးပွားရေး​ကို ကိုယ်စားပြုတာ မဖြစ်နိုင်ဘူး။ ဒါဆိုရင် ဘာကို ကိုယ်စားပြု​သလဲ။ သူ့မှာ ရုပ်တု​ကိုးကွယ်ခြင်း၊ လှည့်စားခြင်း၊ ‘နတ်ဆိုး​ပညာ​လိုက်စားခြင်း’ အပြစ်တွေ ရှိတယ်။ ဒီ​ပြစ်ချက်​တွေဟာ ယိုယွင်း​နေတဲ့ ဘာသာရေး အဖွဲ့အစည်း​တွေ​နဲ့ ကိုက်ညီတယ် မဟုတ်လား။ လောက​နိုင်ငံရေး​အင်အားစု​တွေ​အပေါ် ပြည့်တန်ဆာ ထိုင်​နေတယ်၊ အတိုင်းအတာ​တစ်ခု​အထိ သြဇာလွှမ်း​မိုး​နေတယ်၊ ယေဟောဝါ​ဘုရားရဲ့ သစ္စာရှိ​ကျေးကျွန်တွေကို နှိပ်စက်​ညှဉ်းပန်း​တ​ယ်​ဆိုပြီး သရုပ်ဖော်​ထားတာ​ကိုလည်း သတိပြုပါ။ (ဗျာ. ၁၇:၂၊ ၃။ ၁၈:၁၁၊ ၂၃၊ ၂၄) မှားယွင်းတဲ့ ဘာသာရေး​က ကျွန်တော်တို့​ခေတ်​အထိ ဒီအတိုင်း​ပဲ လုပ်နေတယ် မဟုတ်လား။

၆။ မဟာ​ဗာဗုလုန်​ဟာ ဘယ်လိုနည်းနဲ့ ‘ပြည့်တန်ဆာ​တွေရဲ့ မိခင်’ ဖြစ်သလဲ။

^၆ မဟာ​ဗာဗုလုန်​ကို “ပြည့်တန်ဆာ​ကြီး” လို့ ခေါ်ထား​တဲ့​အပြင် ‘ပြည့်တန်ဆာ​တွေရဲ့  မိခင်’ ဆိုပြီး ဘာကြောင့် ခေါ်​သလဲ။ မှားယွင်းတဲ့ ဘာသာရေး​ဟာ အလွန် ကွဲပြား​နေတယ်။ ဂိုဏ်းဂဏ​တွေ၊ အသင်းအဖွဲ့​တွေ မရေမတွက်​နိုင်အောင်​ပဲ။ ရှေး​ဘေ​ဘယ် (ဗာဗုလုန်) မှာ ဘာသာစကား ရှုပ်ထွေး​သွား​ချိန်​က​စပြီး မှားယွင်းတဲ့ ဘာသာရေး​အယူဝါဒ​မျိုးစုံ ပျံ့နှံ့​သွားတယ်၊ ဘာသာတရား​အမျိုးမျိုး ပေါ်ပေါက်​လာတယ်။ မှားယွင်းတဲ့ ဘာသာရေး​တွေရဲ့ ရင်းမြစ် ဗာဗုလုန်​မြို့ကနေ ဆင်းသက်​လာတဲ့ “မဟာ​ဗာဗုလုန်” ဆိုတဲ့ နာမည်ဟာ တကယ် သင့်လျော်​ပါတယ်။ (က. ၁၁:၁-၉) ဒါကြောင့် ဒီ​ဘာသာတရား​အားလုံးကို ပြည့်တန်ဆာ​ကြီးရဲ့ “သမီးတွေ” အဖြစ် ယူဆ​နိုင်ပါတယ်။ လူတွေ မှော်အတတ် လိုက်စား​အောင်၊ ရုပ်တု​ကိုးကွယ်​အောင်၊ ဘုရားကို ရှုတ်ချ​ဂုဏ်ဖျက်​တဲ့ ယုံကြည်ချက်၊ ဓလေ့​တွေ လက်ခံ​လာ​အောင် ဒီ​ဘာသာတရား​တွေ သုံးပြီး စာတန် သွေးဆောင်တယ်။ ဒါကြောင့် “ငါ့​လူ​တို့၊ သူ့ရဲ့ အပြစ်တွေ​မှာ မပါ​ချင်ဘူး၊ သူ​ခံရမယ့် ကပ်ဘေး​တွေကို မခံ​ချင်ဘူး​ဆိုရင် သူ့ဆီကနေ ထွက်သွား​ကြ” ဆိုပြီး ယိုယွင်း​နေတဲ့ ဒီ​ကမ္ဘာ့​အဖွဲ့အစည်း​နဲ့​ပတ်သက်ပြီး ဘုရားလူမျိုးကို သတိပေး​ထားတာပါ။—ဗျာဒိတ် ၁၈:၄၊ ၅ ကိုဖတ်ပါ။

၇။ မဟာ​ဗာဗုလုန်​ကနေ “ထွက်သွား​ကြ” ဆိုတဲ့ သတိပေး​ချက်​ကို ကျွန်တော်တို့ ဘာကြောင့် နာခံကြသလဲ။

^၇ ဒီ​သတိပေး​ချက်​ကို အရေးစိုက်​နေရဲ့လား။ ​လူသားတွေကို ‘ဘုရားသခင်ကို မှီခို​ဖို့ လိုအပ်ချက်’ နဲ့ ယေဟောဝါ ဖန်ဆင်းခဲ့​ကြောင်း သတိရပါ။ (မ. ၅:၃) ဒီလို​အပ်​ချက်​ကို ယေဟောဝါရဲ့ စင်ကြယ်​တဲ့ ဝတ်ပြု​ကိုးကွယ်မှု​က​ပဲ ဖြည့်ဆည်း​ပေး​နိုင်တယ်။ ယေဟောဝါရဲ့ ကျေးကျွန်တွေဟာ ပုံဆောင် ပြည့်တန်ဆာ​ကြီး​နဲ့ အတတ်နိုင်ဆုံး ကင်းကင်းရှင်းရှင်း နေချင်​ကြတယ်။ ဒါပေမဲ့ စာတန်​မာရ်နတ်​မှာ တခြား​ရည်ရွယ်ချက် ရှိတယ်။ ဘုရားလူမျိုးကို ပြည့်တန်ဆာ​လမ်းစဉ်​ထဲ ရောက်​သွား​စေချင်တယ်။ မကြာခဏ​လ​ည်း အောင်မြင်ခဲ့ပါတယ်။ ယေဇကျေလ​ခေတ်မှာ ဘုရား​လူမျိုးဟာ ပုံဆောင်​သဘော​အရ ပြည့်တန်ဆာ​လမ်းစဉ်​မှာ အချိန်အတော်ကြာ ပါဝင်​ပတ်သက်​ခဲ့​တ​ယ်။ ယေဟောဝါရဲ့ စံနှုန်း၊ တရား​မျှတမှု၊ ကရုဏာ​အကြောင်း များစွာ​သင်ပေး​နိုင်တဲ့ ဒီ​သမိုင်းကြောင်းကို ဆန်းစစ်​သင့်ပါတယ်။

၈-၁၀။ မှားယွင်းတဲ့ ဘာသာရေး​မှာ ပါဝင်ခြင်း​နဲ့​ပတ်သက်ပြီး ယေဟောဝါရဲ့ ခံစားချက်ကို စင်ကြယ်​တဲ့ ဝတ်ပြု​ကိုးကွယ်မှု​ရဲ့ ဘယ်​အရေးကြီး​တောင်းဆိုချက်​က နားလည်စေ​သလဲ။ ဥပမာ​ပေးပါ။

^၈ ယေဟောဝါ​က မိမိ​ခံစားချက်ကို ဖော်ပြဖို့ ယေဇကျေလ​ကျမ်းမှာ ပြည့်တန်ဆာ ပုံဥပမာ သုံး​ထားတယ်။ ဘုရား​လူမျိုးရဲ့ သစ္စာမဲ့မှု၊ ဖောက်ပြန်မှု​ကြောင့် ယေဟောဝါ စိတ်နာ​ကျင်​ကြောင်း၊ သစ္စာဖောက်​ခံရတယ်လို့ ခံစားရ​ကြောင်း မှတ်တမ်း​နှစ်ခု ရေးသား​ဖို့ ယေဇကျေလ လှုံ့ဆော်​ခံရတယ်။ ဘုရားက မိမိ​လူမျိုးကို ပြည့်တန်ဆာ​နဲ့ ဘာကြောင့် နှိုင်းယှဉ်​သလဲ။

^၉ အဖြေကို နားလည်​နိုင်ဖို့ ဒီ​စာအုပ် အခန်း ၅ မှာ ဆွေးနွေးခဲ့​တဲ့ စင်ကြယ်​တဲ့ ဝတ်ပြု​ကိုးကွယ်မှု​ရဲ့ အရေးကြီး တောင်းဆိုချက်ကို ပြန်​သတိ​ရဖို့ လိုတယ်။ “ငါက​လွဲလို့ တခြား​ဘုရားတွေကို မကိုးကွယ်​နဲ့။ . . . မင်းတို့ရဲ့ ဘုရားသခင် ငါ​ယေဟောဝါဟာ ငါ​တစ်ပါးတည်းကိုပဲ ကိုးကွယ်​ဆည်းကပ်​ဖို့ တောင်းဆိုတဲ့​ဘုရား” ဖြစ်တယ်လို့ အစ္စရေးတွေကို ပေးတဲ့ ပညတ်​မှာ ယေဟောဝါ မိန့်ဆို​ထားတယ်။ (ထွ. ၂၀:၃၊ ၅) “တခြား​ဘုရားကို ဦးမချနဲ့။ ငါ​ယေဟောဝါဟာ ငါ​တစ်ပါးတည်း​ကို ကိုးကွယ်​ဆည်းကပ်​ဖို့ တောင်းဆိုတဲ့ ဘုရား​ပဲ။  ငါတစ်ပါးတည်း​ကို​သာ ကိုးကွယ်​ဆည်းကပ်​ဖို့ တောင်းဆိုတဲ့​အရှင်​ပဲ” ဆိုပြီး နောက်ပိုင်းမှာ မိန့်ဆို​ပြန်တယ်။ (ထွ. ၃၄:၁၄) ယေဟောဝါ ပြောတာ ရှင်း​ပါတယ်။ ယေဟောဝါကို အကြွင်းမဲ့ မကိုးကွယ်​ရင် ကျွန်တော်တို့ရဲ့ ဝတ်ပြု​ကိုးကွယ်မှု​ကို လက်ခံ​မှာ မဟုတ်ဘူး။

^၁၀ ဥပမာ၊ အိမ်ထောင်​အကြောင်း စဉ်းစား​ကြည့်ရအောင်။ လင်​နဲ့​မယား နှစ်ယောက်စလုံး အချင်းချင်း​ဆီက အကြွင်းမဲ့ သစ္စာစောင့်သိမှုကို မျှော်လင့်​ခွင့် ရှိတယ်။ ကိုယ့်​အိမ်ထောင်ဖက် မဟုတ်​သူနဲ့ ချစ်​ကျွမ်းဝင်​နေမယ်​ဆိုရင် အိမ်ထောင်ဖက် သဝန်တို​နိုင်တယ်။ သစ္စာဖောက်​ခံရတယ်လို့ ခံစား​နိုင်တယ်။ (ဟီဘရူး ၁၃:၄ ကိုဖတ်ပါ။) အလားတူပဲ ယေဟောဝါ​ဆီ အကြွင်းမဲ့ ဆက်ကပ်​ထားတဲ့ လူမျိုး​က မှားယွင်းတဲ့ ဘုရားတွေကို ဝတ်ပြု​ကိုးကွယ်တဲ့​အခါ သစ္စာဖောက်​ခံရတယ်လို့ ယေဟောဝါ ခံစား​ရတယ်။ သစ္စာဖောက်​ခံရတယ်​ဆိုတဲ့ ခံစားချက်ကို ယေဇကျေလ အခန်းကြီး ၁၆ မှာ ထိထိမိမိ ဖော်ပြ​ထား​ပါတယ်။

၁၁။ ဂျေရုဆလင်​မြို့​နဲ့ မြို့​ရဲ့ မူလ​ဇာစ်​မြစ်​အကြောင်း ယေဟောဝါ ဘာ​ဖော်ပြသလဲ။

^၁၁ ဟီဘရူးကျမ်း​စောင်​တွေ​ထဲမှာ ယေဇကျေလ အခန်းကြီး ၁၆ ဟာ ယေဟောဝါရဲ့ အရှည်ဆုံး မိန့်ဆိုချက်၊ အရှည်ဆုံး ပရောဖက်ပြုချက်ပါ​ပဲ။ သစ္စာမဲ့ ယုဒ​လူမျိုးကို ကိုယ်စားပြုတဲ့ ဂျေရုဆလင်​မြို့​အကြောင်း ယေဟောဝါ အလေးပေး​ထားတယ်။ ယုဒရဲ့ မူလ​ဇာစ်​မြစ်​အကြောင်း၊ သစ္စာဖောက်​မှု​အကြောင်း ဝမ်းနည်း​ထိတ်လန့်ဖွယ်​အဖြစ်ကို ဖော်ပြ​ထားတယ်။ ယုဒဟာ ကူညီ​ပြုစုသူ​မဲ့ ညစ်ပေ​နေတဲ့၊ ကော​က်​ရတဲ့​ကလေး ဖြစ်ခဲ့တယ်။ မိဘတွေက တိတ္ထိ ခါနန်​တွေ။ တကယ်လည်း ဂျေရုဆလင်​မြို့ဟာ ယေဗုသိ​လူမျိုး၊ ခါနန်​တွေရဲ့ လက်အောက် အကြာကြီး ကျ​ရောက်ခဲ့တယ်။ နောက်ပိုင်း​မှ ဂျေရုဆလင်​မြို့ကို ဒါဝိဒ် သိမ်းပိုက်​ခဲ့​တာ။ ယေဟောဝါ​က ဒီ​ကလေးကို သနား​ပြီး သန့်စင်​ပေးတယ်၊၊ ကြည့်ရှု​စောင့်ရှောက်​ပေးတယ်။ နောက်တော့ ယုဒဟာ ဘုရားအတွက် ဇနီး​လို ဖြစ်လာတယ်။ ဂျေရုဆလင်​မြို့မှာ အခြေချ​နေထိုင်တဲ့ အစ္စရေး​တွေဟာ မောရှေ​ခေတ်​တုန်း​က ယေဟောဝါနဲ့ စိတ်လိုကိုယ်လျောက် ပဋိညာဉ် ဖွဲ့​ခဲ့​ကြတယ်။ (ထွ. ၂၄:၇၊ ၈) နောက်ပိုင်း ဂျေရုဆလင်ဟာ မြို့တော် ဖြစ်လာပြီး ယေဟောဝါ​က ကောင်းချီး​ပေးတယ်၊ ကြွယ်ဝ​စေတယ်၊ အလှဆင်​ပေးတယ်။ ဩဇာ​ကြီး​ပြီး ချမ်းသာ​ကြွယ်ဝတဲ့ ခင်ပွန်းသည်​က ဇနီးကို အဆင်တန်ဆာ​တွေ ဆင်မြန်း​ပေး​သလို​ပါပဲ။—ယေဇ. ၁၆:၁-၁၄။

၁၂။ သစ္စာမဲ့မှု​က ဂျေရုဆလင်​မြို့ထဲ ဘယ်လို စိမ့်ဝင်​လာ​ခဲ့သလဲ။

^၁၂ ဘာ​ဆက်ဖြစ်​သလဲ။ “မင်းဟာ အလှ​မာန် ယစ်​ပြီး ဂုဏ်​သတင်း​ကြီးလာ​တဲ့​အတွက် ပြည့်တန်ဆာ ဖြစ်လာတယ်။ လမ်းသွားလမ်းလာ​မှန်သမျှနဲ့ ပြည့်တန်ဆာ​လုပ်တယ်။ မင်းရဲ့ အလှဟာ သူတို့​အတွက်ပဲ ဖြစ်​သွားပြီ” လို့ ယေဟောဝါ မိန့်ဆိုတယ်။ (ယေဇ. ၁၆:၁၅) ရှောလမုန်​ခေတ်မှာ ယေဟောဝါ​က မိမိ​လူမျိုးကို အလွန်​ကောင်းချီး​ပေး၊ ကြွယ်ဝ​စေခဲ့တယ်။ ဂျေရုဆလင်​မြို့ဟာ ရှေးခေတ်​မြို့တော်​တွေ​ထဲမှာ အ​ခမ်းနား​ဆုံး၊ အထင်ပေါ်ဆုံး မြို့တော် ဖြစ်လာတယ်။ (၁ ဘု. ၁၀:၂၃၊ ၂၇) ဒါပေမဲ့ သစ္စာမဲ့မှု တဖြည်းဖြည်း စိမ့်ဝင်​လာတယ်။ ရှောလမုန်က တိုင်းတစ်ပါး​မိန်းမ​တွေ ကျေနပ်​စေဖို့ တိတ္ထိ​ဘုရား ကိုးကွယ်မှု​တွေ​နဲ့ ဂျေရုဆလင်​ကို ညစ်ညူး​လာ​စေတယ်။ (၁ ဘု. ၁၁:၁-၈) ရှောလမုန်ရဲ့ အရိုက်အရာ ဆက်ခံသူ​တချို့​ဆို ပို​တောင်​ဆိုး​သေးတယ်။ တစ်ပြည်လုံး​ကို မှားယွင်းတဲ့  ဝတ်ပြု​ကိုးကွယ်မှုနဲ့ ညစ်ညူး​စေ​ကြတယ်။ ဒီလို​ပြည့်တန်ဆာ​လုပ်ရပ်၊ သစ္စာမဲ့​လုပ်ရပ်​နဲ့​ပတ်သက်ပြီး ယေဟောဝါ ဘယ်လို ခံစားခဲ့​သလဲ။ “ဒါဟာ လုံးဝ မဖြစ်​သင့်၊ မဖြစ်ထိုက်​ဘူး” လို့ ဘုရား မိန့်ဆိုတယ်။ (ယေဇ. ၁၆:၁၆) ဒါပေမဲ့ ထင်ရာစိုင်း​တဲ့​လူမျိုးဟာ ဆိုး​သည်ထက် ဆိုး​လာတယ်။

၁၃။ ဂျေရုဆလင်​မြို့ရှိ ဘုရား​လူမျိုး​မှာ ဘယ်​ဆိုးညစ်​မှု​အတွက် အပြစ်​ရှိသလဲ။

^၁၃ ရွေးချယ်​ထားတဲ့​လူမျိုးရဲ့ ဆိုးသွမ်းမှု​နဲ့​ပတ်သက်ပြီး “မင်း ပြည့်တန်ဆာ​လုပ်​နေတာ မကျေနပ်​နိုင်​သေး​လို့ ငါ့​အတွက် မွေး​ပေးတဲ့ သားသမီးတွေကို ရုပ်တုတွေ ဝါးမျို​ဖို့ ပူဇော်ဦး​မ​လို့​လား။ မင်း​က ငါ့​သားတွေကို သတ်​ပြီး မီးရှို့​ပူဇော်​တ​ယ်” လို့ ပြောခဲ့​တ​ယ်။ ယေဟောဝါရဲ့ စိတ်​နာကျင်မှု၊ စက်ဆုပ်​မှု​ကို မြင်ယောင်​ကြည့်ပါ။ (ယေဇ. ၁၆:၂၀၊ ၂၁) ဒီလို​စက်ဆုပ်​စ​ရာ​လုပ်ရပ်တွေ​က စာတန် အလွန်​ဆိုးညစ်​ကြောင်း ဖော်ပြတယ်။ ယေဟောဝါရဲ့ လူမျိုးကို ဒီလို​စက်ဆုပ်ဖွယ်​လုပ်ရပ်တွေ လုပ်မိ​အောင် သွေးဆောင်​နိုင်တဲ့အခါ စာတန် သိပ်​အားရ​ကျေနပ်တယ်။ ဒါပေမဲ့ အားလုံးကို ယေဟောဝါ သိ​မြင်တယ်။ စာတန်ရဲ့ အဆိုးရွားဆုံး လုပ်ရပ်တွေကို​တောင် ဖယ်ရှားပစ်​နိုင်တယ်။ ဘုရား တရား​သဖြင့် စီရင်ပါ​လိမ့်မယ်။—ယောဘ ၃၄:၂၄ ကိုဖတ်ပါ။

၁၄။ ယေဟောဝါ ဖော်ပြတဲ့ ဥပမာ​မှာ ဂျေရုဆလင်ရဲ့ ညီအစ်မ​နှစ်ယောက်​က ဘယ်သူတွေလဲ။ ညီအစ်မ​သုံးယောက်​ထဲမှာ ဘယ်သူ အဆိုးဆုံးလဲ။

^၁၄ ဒါပေမဲ့ ဂျေရုဆလင်ဟာ ကိုယ့်​ဆိုးညစ်​မှု​ကို ထိတ်လန့်​ရ​ကောင်း​မှန်း မသိ​ဘူး။ ပြည့်တန်ဆာ ဆက်လုပ်​နေတယ်။ ငွေ​ပေးပြီး ဖောက်ပြန်တဲ့​အတွက် တခြား​ပြည့်တန်ဆာတွေထက် ပိုလို့တောင် အရှက်မဲ့​သူ​လို့ ယေဟောဝါ မိန့်ဆိုတယ်။ (ယေဇ. ၁၆:၃၄) နယ်မြေ​ကို ကြီးစိုးခဲ့​တဲ့ မှားယွင်းတဲ့ ဝတ်ပြု​ကိုးကွယ်သူ “အမေ” နဲ့​တူတယ်လို့ ဘုရား မိန့်ဆိုခဲ့တယ်။ (ယေဇ. ၁၆:၄၄၊ ၄၅) မိသားစု ဥပမာ​ကို ဆက်ပြော​ရ​ရင် ဘာသာရေး ပြည့်တန်ဆာ​ဘဝ​ထဲ အရင်​ရောက်သွားတဲ့ ရှမာရိ​ကို ဂျေရုဆလင်ရဲ့ အစ်မ​ဆိုပြီး ဖော်ပြ​ထားတယ်။ ဆိုးလွန်းလို့၊ မောက်မာလွန်းလို့ ဖျက်ဆီး​ခံခဲ့ရတဲ့ သောဒုံ​နဲ့​လ​ည်း ညီအစ်မ တော်တယ်။ ရှမာရိ​နဲ့ သောဒုံ ညီအစ်မ​နှစ်ယောက်လုံး​ထက် အဆ​မတန် ဆိုးတယ်။ (ယေဇ. ၁၆:၄၆-၅၀) ဘုရား​လူမျိုးဟာ မရေတွက်​နိုင်တဲ့ သတိပေး​ချက်​တွေကို လျစ်လျူရှု​ပြီး စက်ဆုပ်ဖွယ်​လမ်းစဉ်​ကို ဆက်လျှောက်​ခဲ့​ကြတယ်။

၁၅။ ဂျေရုဆလင်​မြို့ကို တရား​စီရင်​ရတဲ့ ယေဟောဝါရဲ့ ရည်ရွယ်ချက်​က ဘာလဲ။ ဘာ​မျှော်လင့်ချက် ပေး​သလဲ။

^၁၅ ယေဟောဝါ ဘာလုပ်မလဲ။ “မင်း​သာယာမှု ပေးနေတဲ့ ရည်းစား​တွေ . . . ကို ငါ​စုဝေး” ပြီး “မင်းကို သူတို့​လက်ထဲ ငါ​အပ်” မ​ယ်​လို့ ဂျေရုဆလင်​ကို မိန့်ဆိုခဲ့တယ်။ အရင်က မဟာမိတ်ဖွဲ့​ခဲ့​တဲ့ လူမျိုး​တွေ​က ဂျေရုဆလင်​ကို ဖျက်ဆီး​ကြမယ်။ အဝတ်တန်ဆာ​တွေ၊ အဖိုးတန်​အရာတွေ လုယက်​ကြမယ်။ “မင်းကို ကျောက်ခဲ​နဲ့ ပေါက်၊ ဓားနဲ့ ခုတ်​ကြ​လိမ့်မယ်” လို့ ဘုရား မိန့်ဆိုခဲ့တယ်။ ယေဟောဝါ ဒီလို​စီရင်​ရတဲ့ ရည်ရွယ်ချက်​က ဘာလဲ။ ဘုရားလူမျိုးကို အစတုံး ဖျက်ဆီး​ပစ်ဖို့ မဟုတ်ဘူး။ “မင်း ပြည့်တန်ဆာ လုပ်​နေတာကို ငါ​ရပ်​တန်း​က​ရပ်​စေမယ်” လို့ မိန့်ဆို​နေတာ။ “အဲဒီတော့​မှ ငါ​အမျက် ပြေသွား​လိမ့်မယ်။ မင်းကို ဒေါသ မ​ထွက်​တော့​ဘူး။ ငါ့​စိတ် တည်ငြိမ်​သွားပြီး ဗွေမယူ​တော့​ဘူး” လို့ ထပ်​မိန့်ဆိုတယ်။ ဒီ​စာအုပ် အခန်း ၉ မှာ ဆွေးနွေးခဲ့​တဲ့​အတိုင်း ယေဟောဝါရဲ့ ရည်ရွယ်ချက်​က မိမိ​လူမျိုးကို သုံ့ပန်း​ဘဝကနေ ပြန်​စုသိမ်း​ဖို့ ဖြစ်တယ်။ ဘာကြောင့်လဲ။ “မင်းရဲ့ ငယ်​ဘဝမှာ မင်းနဲ့ ဖွဲ့​ခဲ့​တဲ့ ပဋိညာဉ်ကို ငါ​သတိ​ရမယ်။ ထာဝရ​ပဋိညာဉ်​အဖြစ်  တည်​စေမယ်” လို့ ဘုရား ပြောခဲ့​တ​ယ်။ (ယေဇ. ၁၆:၃၇-၄၂၊ ၆၀) ယေဟောဝါဟာ မိမိ​လူမျိုးနဲ့ မတူဘဲ အလွန်​သစ္စာ​စောင့်သိတယ်။—ဗျာဒိတ် ၁၅:၄ ကိုဖတ်ပါ။

၁၆၊ ၁၇။ (က) အဟောလ​နဲ့ အဟောလိဗ​တို့ဟာ အမည်ခံ​ခရစ်ယာန်​ဘာသာ​ကို ပုံဆောင်​တ​ယ်​လို့ ဘာကြောင့် မပြော​ကြ​တော့​သလဲ။ (“ပြည့်တန်ဆာ ညီအစ်မ​များ” လေးထောင့်ကွက်​ကို ကြည့်ပါ။) (ခ) ယေဇကျေလကျမ်း အခန်းကြီး ၁၆ နဲ့ ၂၃ ကနေ ဘယ်​လက်တွေ့ကျ သင်ခန်းစာ​တွေ ယူ​ကြ​မလဲ။

^၁၆ ယေဇကျေလ အခန်းကြီး ၁၆ နဲ့ ၂၃ မှာ မှတ်တမ်း​တင်ထားတဲ့ ယေဟောဝါရဲ့ စကား​ကနေ ဘုရားရဲ့ ဖြောင့်မတ်တဲ့ စံနှုန်း၊ တရား​မျှတမှု၊ နက်ရှိုင်း​တဲ့ ကရုဏာတော်​အကြောင်း သင်ယူနိုင်တယ်။ မိမိ​လူမျိုးရဲ့ ပြည့်တန်ဆာ​လုပ်ရပ်​နဲ့​ပတ်သက်ပြီး ယေဟောဝါရဲ့ ရှင်းလင်း​တဲ့ စကားကို ဒီနေ့ ခရစ်ယာန်စစ်​တွေ နှလုံး​သွင်း​ကြတယ်။ ယုဒနဲ့ ဂျေရုဆလင်​တို့​လို ယေဟောဝါ စိတ်​နာကြည်းအောင် ကျွန်တော်တို့ မ​လုပ်ချင်​ကြဘူး။ ဒါကြောင့် ရုပ်တု​ကိုးကွယ်မှု မှန်သမျှ ရှောင်ကြဉ်​ကြတယ်။ ရုပ်တု​ကိုးကွယ်ခြင်း​မှာ လောဘ​ကြီး​ခြင်း၊ ရုပ်ပစ္စည်း​လိုက်စားခြင်း​တို့ ပါဝင်​တ​ယ်။ (မ. ၆:၂၄။ ကော. ၃:၅) ယေဟောဝါ​က နောက်ဆုံး​ကာလမှာ စင်ကြယ်​တဲ့ ဝတ်ပြု​ကိုးကွယ်မှု​ကို ကရုဏာပါပါ ပြန်လည်​တည်ထောင်​ပေးပြီး ယိုယွင်း​စေမှာ မဟုတ်​တော့​တဲ့​အတွက် အမြဲ ကျေးဇူးတင်​ကြပါတယ်။ သစ္စာမဲ့မှု ဒါမှမဟုတ် ပြည့်တန်ဆာ​မှု​ကြောင့် ဘယ်တော့မှ ပျက်စီး​မ​သွားမယ့် “ထာဝရ​ပဋိညာဉ်” ကို ဘုရားသခင့်​အစ္စရေးလူမျိုးနဲ့ ယေဟောဝါ ဖွဲ့ခဲ့တယ်။ (ယေဇ. ၁၆:၆၀) ဒါကြောင့် ယေဟောဝါရဲ့ သန့်ရှင်းတဲ့​လူမျိုးအဝင် ဖြစ်ခွင့်​ရတာကို တန်ဖိုးထား​ကြပါစို့။

^၁၇ ယေဇကျေလ​ကျမ်းပါ ပြည့်တန်ဆာတွေနဲ့​ပတ်သက်ပြီး ယေဟောဝါ မိန့်ဆိုတဲ့​စကားက “ပြည့်တန်ဆာ​ကြီး” မဟာ​ဗာဗုလုန်​အကြောင်း ဘာသင်ပေးသလဲ။ ကြည့်ကြရအောင်။

၁၈၊ ၁၉။ ယေဇကျေလကျမ်းနဲ့ ဗျာဒိတ်​ကျမ်းပါ ပြည့်တန်ဆာ​တို့မှာ ဘာ​ဆင်တူချက်တွေ တွေ့ရသလဲ။

^၁၈ ယေဟောဝါဟာ ပြောင်းလဲခြင်း မရှိဘူး။ (ယာ. ၁:၁၇) သမိုင်း​တစ်လျှောက် မှားယွင်းတဲ့ ဘာသာရေး​နဲ့​ပတ်သက်တဲ့ ဘုရား​ခံစားချက်လည်း မပြောင်းလဲ​ဘူး။ ဒါကြောင့် ယေဇကျေလ​ကျမ်းပါ ပြည့်တန်ဆာတွေနဲ့ ဗျာဒိတ်​ကျမ်းပါ “ပြည့်တန်ဆာ​ကြီး” တို့​အပေါ် ဘုရားရဲ့ တရားစီရင်ချက်​တွေ​မှာ တူညီချက်​များစွာ တွေ့ရတာ အံ့ဩစရာ မဟုတ်ပါဘူး။

^၁၉ ဥပမာ၊ ယေဇကျေလ ပရောဖက်ပြုချက်ပါ ပြည့်တန်ဆာ​တွေ​အတွက် ပြစ်ဒဏ်​ဟာ ယေဟောဝါ​ဆီက တိုက်ရိုက်​လာတာ မဟုတ်ဘူး။ ဘုရားရဲ့ သစ္စာမဲ့​လူမျိုး ဘာသာရေး​အရ ရော​ထွေး​ဖောက်ပြန်​ခဲ့​တဲ့ လူမျိုးခြားတွေ​ဆီကနေ လာတာ။ အလားတူပဲ “ကမ္ဘာ့​အုပ်စိုးရှင်​တွေ” နဲ့ လိင်​အကျင့်​ယိုယွင်း​တဲ့​အတွက် မှားယွင်းတဲ့ ကမ္ဘာ့​ဘာသာရေး အင်ပါယာဟာ အပြစ်တင်​ခံရတယ်။ သူ့​အတွက် ပြစ်ဒဏ်​ဟာ ဘယ်သူ့​ဆီက လာသလဲ။ နိုင်ငံရေးသမား​တွေ​က “ပြည့်တန်ဆာ​ကို မုန်း​လိမ့်မယ်။ သူ့ကို သိမ်း​ရုံး​ဖျက်ဆီး​ပြီး အဝတ်​ဗလာ ဖြစ်စေမယ်။ သူ့​အသားကို စား​ပြီး သူ့ကို အစ​အ​န​မကျန်အောင် မီးရှို့​ပစ်​လိမ့်မယ်” လို့ ဖတ်​ရတယ်။ ကမ္ဘာ့​အုပ်စိုးရှင်​တွေ ဘာကြောင့် ရုတ်တရက် ပြောင်းလဲ​သွားကြမလဲ။ “ဘုရားသခင်က မိမိရဲ့ အကြံ​ကို သူတို့ရဲ့ စိတ်ထဲ​ထည့်ပေး” မှာ ဖြစ်လို့ပဲ။—ဗျာ. ၁၇:၁-၃၊ ၁၅-၁၇။

၂၀။ ဗာဗုလုန်​ကို တရား​စီရင်ခြင်းဟာ နောက်ဆုံး​စီရင်ချက် ဖြစ်ကြောင်း ဘာက ဖော်ပြသလဲ။

^၂၀ အမည်ခံ ခရစ်ယာန်​ဘာသာ​တွေ အပါအဝင် မှားယွင်းတဲ့ ဘာသာရေး​အားလုံးကို  တရား​စီရင်​ဖို့ လောက​တိုင်းနိုင်ငံတွေကို ယေဟောဝါ အသုံးပြုမယ်။ ဒါဟာ နောက်ဆုံး တရားစီရင်ချက်​ပဲ။ ခွင့်လွှတ်​တာ၊ ပြောင်းလဲဖို့ အခွင့်အရေး ပေးတာ မရှိတော့ဘူး။ “နောင်​ဘယ်တော့မှ ပြန်တွေ့​ရမှာ မဟုတ်ဘူး” လို့ ဗျာဒိတ်​ကျမ်းမှာ ဖော်ပြ​ထားတယ်။ (ဗျာ. ၁၈:၂၁) “ယေဟောဝါကို ချီးမွမ်းပါ။ ပြည့်တန်ဆာ​ကို လောင်​မြို​က်​နေတဲ့ မီးခိုး​တွေ အစဉ်​ထာဝရ လွင့်​တက်​နေပြီ” ဆိုပြီး ကောင်းကင်တမန်တွေ ကြွေးကြော်​ကြ​လိမ့်မယ်။ (ဗျာ. ၁၉:၃) ဒီ​တရားစီရင်ချက်​က ထာဝစဉ် အကျိုး​သက်​ရောက်မယ်။ မှားယွင်းတဲ့ ဘယ်​ဘာသာရေး​မှ ပြန်​ပေါ်လာ​တော့​မှာ မဟုတ်ဘူး။ စင်ကြယ်​တဲ့ ဝတ်ပြု​ကိုးကွယ်မှု​ကို မ​ညစ်ညူး​စေနိုင်​တော့​ဘူး။ ဗာဗုလုန် မီးရှို့​ဖျက်ဆီး​ခံရတဲ့​အတွက် ပုံဆောင်​သဘော​အရ မီးခိုး​တွေ အစဉ်​ထာဝရ လွင့်​တက်​နေပါ​လိမ့်မယ်။

၂၁။ မှားယွင်းတဲ့ ဘာသာရေး​ကို ဖျက်ဆီးခြင်းက ဘာရဲ့ အစ ဖြစ်သလဲ။ အဲဒီ​အချိန်ကာလ ဘယ်လို အဆုံးတိုင်​မလဲ။

^၂၁ လောက​အုပ်စိုးရှင်​တွေ မဟာ​ဗာဗုလုန်​ကို ဆန့်ကျင်တဲ့​အခါ ဘုရားရဲ့ တရားစီရင်ချက် စတင်မယ်။ ဒီ​ဖြစ်ရပ်​က ယေဟောဝါရဲ့ ရည်ရွယ်ချက်ကို အကောင်အထည် ဖော်​ပေးမယ်။ တစ်ခါ​မှ မဖြစ်ဖူးသေးတဲ့ ကြီးစွာသောဒုက္ခရဲ့ အစ ဖြစ်လာ​ပါလိမ့်မယ်။  (မ. ၂၄:၂၁) ဒီ​လောက​စနစ်ဆိုး​ကို ဖျက်ဆီးမယ့် ယေဟောဝါရဲ့ စစ်ပွဲကြီး အာမဂေဒုန်​ဟာ ကြီးစွာသောဒုက္ခရဲ့ အထွတ်အထိပ် ဖြစ်ပါမယ်။ (ဗျာ. ၁၆:၁၄၊ ၁၆) ယေဇကျေလ​ကျမ်းမှာ ကြီးစွာသောဒုက္ခ​အကြောင်း ဖော်ပြ​ထား​ပုံကို ဒီ​စာအုပ်ရဲ့ နောက်​အခန်း​တွေ​မှာ တွေ့​ရပါမယ်။ ယေဇကျေလ အခန်းကြီး ၁၆ နဲ့ ၂၃ ကနေ ဘယ်​သင်ခန်းစာတွေကို မှတ်သား​ပြီး လက်တွေ့​ကျင့်သုံး​ချင်​ပါသလဲ။

၂၂၊ ၂၃။ ပြည့်တန်ဆာ​တွေ​အကြောင်း ယေဇကျေလကျမ်းနဲ့ ဗျာဒိတ်ကျမ်း ဖော်ပြချက်​တွေ​က ဝတ်ပြု​ကိုးကွယ်မှု​အပေါ် ဘယ်လို သက်ရောက်​နိုင်သလဲ။

^၂၂ စင်ကြယ်​တဲ့ ဝတ်ပြု​ကိုးကွယ်မှုမှာ ပါဝင်​သူတွေကို စာတန် ဖျက်ဆီး​ချင်တယ်။ ကျွန်တော်တို့ကို စင်ကြယ်​တဲ့ ဝတ်ပြု​ကိုးကွယ်မှု​ကနေ လမ်းလွဲ​သွား​အောင်၊ ယေဇကျေလ​ကျမ်းပါ ပြည့်တန်ဆာ​တွေရဲ့ လမ်းစဉ်​မျိုး လိုက်​အောင် လုပ်နိုင်တာ စာတန် အပျော်ရွှင်ဆုံး​ပဲ။ ဝတ်ပြုရေး​နဲ့​ပတ်သက်လာရင် သစ္စာမဲ့မှု​ကို ယေဟောဝါ လုံးဝ သည်းမခံ​ကြောင်း သတိ​ရဖို့ လိုတယ်။ (တော. ၂၅:၁၁) မှားယွင်းတဲ့ ဘာသာရေး​နဲ့ ကင်းကင်းရှင်းရှင်း​နေဖို့၊ ဘုရား​အမြင်မှာ “မသန့်ရှင်းတာ​မှန်သမျှ လက်နဲ့​တောင် မထိ” ဖို့ ကျွန်တော်တို့ ဂရုစိုက်​ကြတယ်။ (ဟေရှာ. ၅၂:၁၁) အလားတူ​အကြောင်းရင်း​တွေ​ကြောင့် လောက​နိုင်ငံရေး ပဋိပက္ခ​တွေ၊ ရန်လိုမှုတွေ​မှာ ကြားနေကြတယ်။ (ယော. ၁၅:၁၉) မျိုးချစ်​စိတ်ဟာ စာတန် အားပေး​အား​မြှောက် လုပ်​နေတဲ့ မှားယွင်းတဲ့ ဝတ်ပြု​ကိုးကွယ်မှု အသွင်​တစ်​ရပ် ဖြစ်လို့ ကျွန်တော်တို့ မပတ်သက်​ကြဘူး။

^၂၃ သန့်ရှင်း​စင်ကြယ်​တဲ့ ပုံဆောင်​ဗိမာန်တော်မှာ ယေဟောဝါကို ဝတ်ပြု​ကိုးကွယ်​ရတာ အခွင့်ထူး ဖြစ်ကြောင်း သတိရ​ကြပါစို့။ ဒီ​အခွင့်ထူး​ကို လေးမြတ်​တန်ဖိုးထား​ဖို့၊ မှားယွင်းတဲ့ ဘာသာရေး၊ ပြည့်တန်ဆာ​လုပ်ရပ်တွေ​နဲ့ ကင်းကင်းရှင်းရှင်း​နေဖို့ စိတ်ပိုင်းဖြတ်​ထား​ကြရအောင်။