၁၊ ၂။ (က) ယေဟောဝါ​ဆီက ဘာညွှန်ကြားချက်​တွေ ယေဇကျေလ ရသလဲ။ (ခ) ဘယ်​မေးခွန်းတွေ သုံးသပ်ကြ​မလဲ။

လွန်ခဲ့တဲ့ အနှစ် ၉၀​၀ နီးပါး​က မောရှေ​နဲ့ ယောရှု​တို့​ခေတ်​အကြောင်း ပြန်တွေး​မိ​စေတဲ့ စိတ်အာရုံ​တစ်ခုကို အခု​လေး​တင် ယေဇကျေလ မြင်ခဲ့တယ်။ ယေဟောဝါ​က ကတိထားရာပြည်ရဲ့ နယ်နိမိတ်​အကြောင်း မောရှေ​ကို ဖော်ပြပြီး နောက်ပိုင်းမှာ အစ္စရေး​မျိုးနွယ်​တွေ​အတွက် တိုင်းပြည်​ကို ဘယ်လို ခွဲဝေ​သင့်​ကြောင်း ယောရှု​ကို မိန့်မှာခဲ့တယ်။ (တော. ၃၄:၁-၁၅။ ယရ. ၁၃:၇။ ၂၂:၄၊ ၉) အခု ဘီစီ ၅၉၃ ရောက်တော့ ကတိထားရာပြည်​ကို အစ္စရေး​မျိုးနွယ်​တွေ​အတွက် ခွဲဝေ​ပေးဖို့ ယေဇကျေလ​နဲ့ ပြည်နှင်ခံတွေကို ယေဟောဝါ ထပ်​ညွှန်ကြားတယ်။—ယေဇ. ၄၅:၁။ ၄၇:၁၄။ ၄၈:၂၉။

^၂ စိတ်အာရုံမှာ ယေဇကျေလ​နဲ့ ပြည်နှင်ခံ​တွေ​အတွက် ဘာ​သတင်းစကား ပါသလဲ။ ဒီစိတ်အာရုံဟာ မျက်မှောက်ခေတ် ဘုရား​လူမျိုး​အတွက် ဘာကြောင့် အားပေးမှု​ရင်းမြစ် ဖြစ်သလဲ။ အနာဂတ်မှာ​ကော အကြီးစား ပြည့်စုံချက် ရှိ​မလား။

၃၊ ၄။ (က) ယေဇကျေလရဲ့ နောက်ဆုံး စိတ်အာရုံ​က ပြည်နှင်ခံတွေကို ဘယ်အာမခံချက်​လေးချက် ပေးခဲ့သလဲ။ (ခ) ဒီ​အခန်းမှာ ဘယ်​အာမခံချက်ကို ဆွေးနွေးကြမလဲ။

^၃ ယေဇကျေလရဲ့ နောက်ဆုံး စိတ်အာရုံ​ကို ယေဇကျေလကျမ်း အခန်းကြီး ကိုးခန်း​မှာ မှတ်တမ်း​တင်ထားတယ်။ (ယေဇ. ၄၀:၁–၄၈:၃၅) ပြန်လည်​တည်ထောင်​ထားတဲ့  အစ္စရေးလူမျိုးနဲ့​ပတ်သက်တဲ့ အားတက်ဖွယ် အာမခံချက် လေးချက်​ကို စိတ်အာရုံ​က​တစ်ဆင့် ပြည်နှင်ခံ​တွေ ရရှိ​ကြတယ်။ ဒီ​အာမခံချက်​တွေ​က ဘာတွေလဲ။ ပထမ၊ ဘုရားသခင့်​ဗိမာန်တော်မှာ စင်ကြယ်​တဲ့ ဝတ်ပြု​ကိုးကွယ်မှု ပြန်လည်​တည်ထောင်​မ​ယ်။ ဒုတိယ၊ ဖြောင့်မတ်တဲ့ ပုရောဟိတ်တွေ၊ သိုးထိန်း​တွေ​က ပြန်လည်​တည်ထောင်​ထားတဲ့ လူမျိုးကို ဦးဆောင်​မ​ယ်။ တတိယ၊ အစ္စရေး​ပြည်​ကို ပြန်လာ​သူ​တိုင်း အမွေမြေ ရရှိမယ်။ စတုတ္ထ၊ သူတို့နဲ့အတူ ယေဟောဝါ ပြန်လည်​စံမြန်း​မ​ယ်။

^၄ စစ်မှန်တဲ့ ဝတ်ပြုရေး ပြန်လည်​တည်ထောင်​မှု၊ ဖြောင့်မတ်တဲ့ သိုးထိန်းတွေရဲ့ ဦးဆောင်မှု​အကြောင်း ပထမ​အာမခံချက်​နှစ်ချက် ဘယ်လို ပြည့်စုံ​လာမယ်​ဆိုတာကို ဒီ​စာအုပ် အခန်း ၁၃ နဲ့ ၁၄ မှာ ဆွေးနွေးခဲ့​ကြတယ်။ ဒီ​အခန်းမှာ အမွေမြေ​နဲ့​ပတ်သက်တဲ့ ကတိတော်​အကြောင်း တတိယ​အာမခံချက်ကို အာရုံစိုက်ပါမယ်။ ယေဟောဝါ စံမြန်း​ခြင်း​အကြောင်း ကတိတော်ကို​တော့ နောက်​အခန်းမှာ သုံးသပ်ပါမယ်။—ယေဇ. ၄၇:၁၃-၂၁။ ၄၈:၁-၇၊ ၂၃-၂၉။

၅၊ ၆။ (က) ယေဇကျေလ စိတ်အာရုံပါ ခွဲဝေ​ရမယ့် နယ်မြေ ဆိုတာ ဘာလဲ။ (ဆောင်းပါး​အစမှာ​ပါတဲ့​ပုံကို ကြည့်ပါ။) (ခ) တိုင်းပြည် ခွဲဝေခြင်း​အကြောင်း စိတ်အာရုံရဲ့ ရည်ရွယ်ချက်​က ဘာလဲ။

^၅ ယေဇကျေလ ၄၇:၁၄ ကိုဖတ်ပါ။ မကြာခင် “ဧဒင်ဥယျာဉ်​လို” ဖြစ်​လာမယ့် ပြည်​အကြောင်း ယေဇကျေလ​ကို စိတ်အာရုံ​ထဲမှာ ယေဟောဝါ ဖော်ပြခဲ့တယ်။ (ယေဇ. ၃၆:၃၅) “မင်းတို့​အစ္စရေး ၁၂ နွယ်​က ဒီ​နယ်မြေ​ကို အမွေမြေ​အဖြစ် ခွဲဝေယူ​ရမယ်” ဆိုပြီး ယေဟောဝါ မိန့်ဆိုခဲ့တယ်။ (ယေဇ. ၄၇:၁၃) ခွဲဝေ​ရမယ့် “နယ်မြေ” ဆိုတာ ပြည်နှင်ခံ​တွေ ပြန်လာ​ကြ​မ​ယ့် ပြန်လည်​တည်ထောင်​ထားတဲ့ အစ္စရေး​ပြည်ပါ။ ယေဇကျေလ ၄၇:၁၅-၂၁ မှာ မှတ်တမ်း​တင်ထားတဲ့​အတိုင်း တိုင်းပြည်​တစ်ခုလုံးရဲ့ အပြင်​နယ်နိမိတ် အတိအကျ​ကို ယေဟောဝါ အသေးစိတ် ဆ​က်​ဖော်ပြခဲ့တယ်။

^၆ တိုင်းပြည် ခွဲဝေခြင်း​အကြောင်း စိတ်အာရုံရဲ့ ရည်ရွယ်ချက်​က ဘာလဲ။ ချစ်မြတ်နိုး​ရတဲ့ တိုင်းပြည် သေချာပေါက် ပြန်လည်​တည်ထောင်​ခံရမယ်ဆို​တာ​နဲ့​ပတ်သက်ပြီး အတိအကျ တိုင်းတာ​ထားတဲ့ နယ်နိမိတ်​တွေ​အကြောင်း ဖော်ပြချက်​က ယေဇကျေလ​နဲ့ ပြည်နှင်ခံတွေကို စိတ်ချ​စေခဲ့တယ်။ ယေဟောဝါ​ဆီက ရုပ်လုံးပေါ်​ပြီး အသေးစိတ်ကျတဲ့ အာမခံချက်​ကြောင့် ပြည်နှင်ခံ​တွေ ဘယ်လောက် စိတ်အားတက်​သွားမလဲ​ဆိုတာ မြင်ယောင်​ကြည့်ပါ။ အမွေ​အဖြစ် ခွဲဝေ​ပေးတဲ့ တိုင်းပြည်​ကို ရှေးခေတ် ဘုရား​လူမျိုး တကယ် ရခဲ့​သလား။ ရခဲ့​ပါတယ်။

၇။ (က) ဘီစီ ၅၃၇ မှာ စတင်တဲ့ ဘယ်​ဖြစ်ရပ်တွေက ဘာ​အကြောင်း သတိ​ရစေ​သလဲ။ (ခ) ဘယ်​မေးခွန်း​ကို ဦးဆုံး သုံးသပ်ကြ​မလဲ။

^၇ စိတ်အာရုံ​ကို ယေဇကျေလ မြင်ရပြီး ၅၆ နှစ်လောက်​အကြာ ဘီစီ ၅၃၇ က​စပြီး ပြည်နှင်ခံ​ထောင်နဲ့​ချီ အစ္စရေး​ပြည်​ကို ပြန်လာပြီး အမွေမြေ ရယူခဲ့​ကြတယ်။ ကြာမြင့်လှပြီ ဖြစ်တဲ့ ဒီ​ဖြစ်ရပ်တွေက မျက်မှောက်ခေတ် ဘုရား​လူမျိုးအလယ်​ရှိ အလားတူ​ဖြစ်​စဉ်​ကို သတိ​ရစေတယ်။ မျက်မှောက်ခေတ် ဘုရား​လူမျိုးလည်း ခွဲဝေ​ထားတဲ့ ပြည်​ကို ရခဲ့တယ်။ ဘယ်လို​နည်းနဲ့လဲ။ ယေဟောဝါ​က မိမိ​ကျေးကျွန်တွေကို ပုံဆောင်​ပြည်​ထဲ ဝင်ခွင့်​ပေးပြီး အမွေ ရယူ​စေခဲ့တယ်။ ရှေးခေတ် ကတိထားရာပြည် ပြန်လည်​တည်ထောင်ခြင်း​က မျက်မှောက်ခေတ် ဘုရား​လူမျိုးရဲ့ ပုံဆောင်​ပြည် ပြန်လည်​တည်ထောင်ခြင်း​အကြောင်း များစွာ သင်ပေး​နိုင်တယ်။ ဒီ​သင်ခန်းစာတွေကို မ​သုံးသပ်​ခင် “မျက်မှောက်ခေတ်မှာ  ပုံဆောင်​ပြည် အမှန်တကယ် တည်​ရှိတယ်လို့ ဘာကြောင့် ကောက်ချက်ချ​နိုင်သလဲ” ဆိုတဲ့ မေးခွန်းရဲ့ အဖြေကို ဦးဆုံး သုံးသပ်​ကြည့်ကြစို့။

၈။ (က) ပကတိ​အစ္စရေး​လူမျိုးကို ဘယ်​လူမျိုးနဲ့ ယေဟောဝါ အစားထိုး​ခဲ့သလဲ။ (ခ) ပုံဆောင်​ပြည်၊ ပုံဆောင်ပရဒိသု​ဆိုတာ ဘာလဲ။ (ဂ) ဘယ်အချိန်မှာ စတင်​တည်ရှိ​ခဲ့သလဲ။ ဘယ်သူတွေ အခြေချ​နေထိုင်ခဲ့​ကြသလဲ။

^၈ “ကျွန်​ဒါဝိဒ်” (ယေရှု​ခရစ်) ဘုရင်အဖြစ် စတင်​အုပ်ချုပ်​ပြီးနောက်မှာ ပြန်လည်​တည်ထောင်ခြင်း​နဲ့​ပတ်သက်တဲ့ ပရောဖက်ပြုချက်​တွေ အကြီးစား ပြည့်စုံ​လာမယ့်​အကြောင်း ယေဇကျေလ​ကို အစောပိုင်း​တုန်း​က ပေးခဲ့တဲ့ စိတ်အာရုံ​တစ်ခုမှာ ယေဟောဝါ ဖော်ပြခဲ့တယ်။ (ယေဇ. ၃၇:၂၄) အေဒီ ၁၉၁၄ ခုနှစ်မှာ ဘုရင်အဖြစ် ယေရှု စတင်​အုပ်ချုပ်​ခဲ့​တ​ယ်။ အဲဒီအချိန်မှာ ပကတိ​အစ္စရေး​လူမျိုးကို ဘိသိက်ခံ​ခရစ်ယာန်တွေနဲ့ ဖွဲ့စည်းထားတဲ့ ဘုရားသခင့် အစ္စရေးလူမျိုးနဲ့ အစားထိုး​လိုက်တာ ကြာခဲ့ပြီ။ (မဿဲ ၂၁:၄၃။ ၁ ပေတရု ၂:၉ တို့ကို​ဖတ်ပါ။) ယေဟောဝါ​က ပကတိ​အစ္စရေး​လူမျိုးကို ဘုရားသခင့် အစ္စရေးလူမျိုးနဲ့ အစားထိုး​လိုက်​ရုံ​သာမက ပကတိ​အစ္စရေး​ပြည်​ကိုလည်း ပုံဆောင်​ပြည်၊ ပုံဆောင်​ပရဒိသု​နဲ့ အစားထိုး​ခဲ့​တ​ယ်။ (ဟေရှာ. ၆၆:၈) ဒီ​စာအုပ် အခန်း ၁၇ မှာ တွေ့ခဲ့​တဲ့​အတိုင်း ပုံဆောင်​ပြည်​ဆိုတာ ဝတ်ပြုရေး​ပိုင်း​မှာ  လုံခြုံမှု​ရှိတဲ့ ပတ်ဝန်းကျင်​နဲ့ လုပ်ဆောင်မှု ဖြစ်တယ်။ ၁၉၁၉ ခုနှစ်​ကတည်းက ဘိသိက်ခံ​အကြွင်းအကျန်​တွေက ပုံဆောင်​ပြည်မှာ ယေဟောဝါကို ဝတ်ပြု​ကိုးကွယ်​ခဲ့​ကြတယ်။ (“ဘာကြောင့် ၁၉၁၉ ခုနှစ် ဖြစ်​ရသလဲ” လေးထောင့်ကွက် ၉​ခ ကို ကြည့်ပါ။) အချိန်​ကြာ​လာတာ​နဲ့​အမျှ မြေကြီးဆိုင်ရာ မျှော်လင့်ချက် ရှိတဲ့ “တခြား​သိုး” တွေ​လ​ည်း ပုံဆောင်​ပြည်မှာ အခြေချ​နေထိုင်​လာကြတယ်။ (ယော. ၁၀:၁၆) ဒီနေ့ ပုံဆောင်​ပရဒိသု ဆ​က်​တိုးပွား​ကျယ်ပြန့်​နေတယ်။ ကောင်းချီးတွေကို​တော့ အာမဂေဒုန်​ပြီးမှ အပြည့်အဝ ခံစား​ကြရမယ်။

၉။ တိုင်းပြည် ခွဲဝေခြင်း​နဲ့​ပတ်သက်ပြီး ယေဟောဝါ ဘယ်လို အသေးစိတ် ညွှန်ကြားခဲ့​သလဲ။

^၉ ယေဇကျေလ ၄၈:၁၊ ၂၈ ကိုဖတ်ပါ။ အပြင်​နယ်နိမိတ်​ကို သတ်မှတ်​ပြီးနောက်မှာ ယေဟောဝါ​က တိုင်းပြည်​ကို ဘယ်လို ခွဲဝေ​ရမယ့်​အကြောင်း အသေးစိတ် ဖော်ပြတယ်။ မြောက်ဘက်​အစွန်​ဆုံး ဒန်​အနွယ် နယ်မြေ​ကနေ တောင်ဘက်စွန်း ဂဒ်​အနွယ် နယ်နိမိတ်​အထိ အစ္စရေး ၁၂ နွယ်​အတွက် အမွေမြေ​ကို အညီ​အမျှ၊ အတိအကျ အကွက်​ချ​ပေးဖို့ ဘုရား ညွှန်ကြားတယ်။ အမွေမြေ ၁၂ ခု​ဟာ တိုင်းပြည်ရဲ့ အရှေ့ဘက် အပြင်​နယ်နိမိတ်​ကနေ အနောက်ဘက် မြေထဲပင်လယ်​တစ်လျှောက် ဖြစ်တယ်။—ယေဇ. ၄၇:၂၀။

၁၀။ စိတ်အာရုံရဲ့ ဒီ​အပိုင်း​က ပြည်နှင်ခံတွေကို ဘာ​အာမခံချက်​တွေ ပေးခဲ့ဖွယ် ရှိသလဲ။

^၁၀ စိတ်အာရုံရဲ့ ဒီ​အပိုင်း​က ပြည်နှင်ခံတွေကို ဘာ​အာမခံချက်​တွေ ပေးခဲ့ဖွယ် ရှိသလဲ။ တိုင်းပြည် ခွဲဝေခြင်း​အကြောင်း ယေဇကျေလရဲ့ အသေးစိတ် ဖော်ပြချက်​ကြောင့် ခွဲဝေခြင်းဟာ စနစ်တကျ ဖွဲ့စည်းထားတဲ့ စီမံကိန်း ဖြစ်မယ်​ဆိုတာကို ပြည်နှင်ခံ​တွေ စွဲမှတ်​ခဲ့​ကြမှာပဲ။ ဒါ့အပြင် ၁၂ နွယ်​အတွက် တိုင်းပြည် အညီ​အမျှ ခွဲဝေခြင်းက ပြည်တော်ပြန် ယောက်စီယောက်တိုင်း ပြန်လည်​တည်ထောင်​ထားတဲ့​ပြည်မှာ အမွေမြေ​ ကျိန်းသေ​ရရှိ​ကြမယ်​ဆိုတာကို အလေး​ပေးတယ်။ ဘယ်သူမှ အိမ်​မဲ့​ယာ​မဲ့​ဘဝနဲ့ ပြန်လာ​ရမှာ မဟုတ်ပါဘူး။

၁၁။ တိုင်းပြည် ခွဲဝေခြင်း​အကြောင်း ပရောဖက်ပြုချက်​ဆိုင်ရာ စိတ်အာရုံ​ကနေ ဘာသင်ခန်းစာ​တွေ ယူ​နိုင်သလဲ။ (“တိုင်းပြည် ခွဲဝေခြင်း” လေးထောင့်ကွက်​ကို ကြည့်ပါ။)

^၁၁ ဒီနေ့​အချိန်မှာ ဒီ​စိတ်အာရုံ​ကနေ အားရှိစရာ ဘာသင်ခန်းစာ​တွေ ယူ​နိုင်သလဲ။ ပြန်လည်​တည်ထောင်​ထားတဲ့ ကတိထားရာပြည်မှာ ပုရောဟိတ်တွေ၊ လေဝိ​အမျိုးသားတွေ၊ အကြီးအမှူး​တွေ​အတွက်သာ​မ​က ၁၂ နွယ်​သား​အားလုံး​အတွက် မြေနေရာ ရှိတယ်။ (ယေဇ. ၄၅:၄၊ ၅၊ ၇၊ ၈) ဒီနေ့လည်း ပုံဆောင်​ပရဒိသုမှာ ဘိသိက်ခံ အကြွင်းအကျန်​တွေ၊ “လူအုပ်ကြီး” ထဲ​က ဦးဆောင်​ပေးနေ​သူတွေ​အတွက်သာ​မ​က ကျန်​လူအုပ်ကြီး​ဝင်​အားလုံး​အတွက် နေရာ ရှိတယ်။ * (ဗျာ. ၇:၉) အဖွဲ့အစည်း​အတွင်း နိမ့်ကျပုံ​ရတဲ့ ဘယ်အခန်းကဏ္ဍ​က​ပဲ ပါဝင်​ရ​ပါစေ ပုံဆောင်​ပြည်​ထဲမှာ လုံခြုံတဲ့​နေရာ၊ တန်ဖိုး​ဖြတ်​မရတဲ့ တာဝန် ရထား​ကြတယ်။ တကယ့်ကို စိတ်​ကြည်နူးစရာ အာမခံချက်​ပါပဲ။

၁၂၊ ၁၃။ မျိုးနွယ်​အလိုက် အမွေမြေ ခွဲဝေခြင်း​နဲ့​ပတ်သက်ပြီး ဘယ်​သတ်သတ်မှတ်မှတ် ညွှန်ကြားချက်​တွေ ယေဟောဝါ ပေးခဲ့သလဲ။

^၁၂ နယ်မြေ ခွဲဝေခြင်း​နဲ့​ပတ်သက်တဲ့ ယေဟောဝါရဲ့ ညွှန်ကြားချက်​တချို့ဟာ မောရှေ​ကို ပေးခဲ့တဲ့ ညွှန်ကြားချက်​တွေ​နဲ့ ကွာခြား​တာ​မို့ ယေဇကျေလ စိတ်ရှုပ်​သွားနိုင်တယ်။ ကွာခြားချက် နှစ်ချက်​ကို သုံးသပ်​ကြည့်ပါ။ တစ်ချက်​က နယ်မြေ​နဲ့​ပတ်သက်​တယ်။​ နောက်​တစ်ချက်​က ပြည်သူပြည်သား​တွေ​နဲ့ ပတ်သက်​တ​ယ်။

 ^၁၃ ပထမ၊ နယ်မြေ။ လူဦးရေ​များတဲ့ အနွယ်​တွေကို လူဦးရေ​နည်း​တဲ့ အနွယ်​တွေ​ထက် မြေ​ပို​ပေးဖို့ မောရှေ ညွှန်ကြား​ခံရတယ်။ (တော. ၂၆:၅၂-၅၄) ဒါပေမဲ့ ယေဇ​ကျေလ​စိတ်အာရုံထဲမှာ​တော့​ ယေဟောဝါ​က​ မျိုးနွယ်​တိုင်း​ကို ဝေစု “အညီ​အမျှ” ခွဲဝေ​ပေးဖို့ အတိအကျ ညွှန်ကြား​ထား​တယ်။ (ယေဇ. ၄၇:၁၄) ဒါကြောင့် မြောက်ဘက် နယ်နိမိတ်​ကနေ တောင်ဘက်​နယ်နိမိတ်​အထိ မျိုးနွယ်​အလိုက် အမွေမြေ ဝေစု ၁၂ စုဟာ တစ်ခုနဲ့ တစ်ခု တူ​နေရမယ်။ ဘယ်​မျိုးနွယ်​က​ပဲ ဖြစ်ပါစေ အစ္စရေးတိုင်းဟာ သီးပွင့်​ဖြစ်ထွန်း​တဲ့၊ ရေ​ပေါများ​တဲ့ ကတိထားရာပြည်မှာ သဘာဝ​သယံဇာတ​တွေကို ညီတူညီမျှ ခံစားနိုင်​ကြမယ်။

၁၄။ တိုင်းတစ်ပါးသားတွေ​နဲ့​ပတ်သက်တဲ့ ယေဟောဝါရဲ့ ညွှန်ကြားချက်​တွေ​က မောရှေ​ပညတ်​မှာ ဖော်ပြ​ထားခဲ့တာ​ထက် ဘယ်လိုနည်းနဲ့ သာလွန်​သလဲ။

^၁၄ ဒုတိယ၊ ပြည်သူပြည်သား​များ။ မောရှေ​ပညတ်​အရ တိုင်းတစ်ပါးသားတွေ ကာကွယ်​ခံရတယ်၊ ယေဟောဝါကို ဝတ်ပြု​ကိုးကွယ်ရာ​မှာ ပါဝင်ခွင့်​ရတယ်။ ဒါပေမဲ့ တိုင်းပြည်မှာ မြေနေရာ​တော့ မရကြဘူး။ (ဝတ်. ၁၉:၃၃၊ ၃၄) ဒါပေမဲ့ အခု ယေဇ​ကျေလ​ကို ယေဟောဝါ မိန့်မှာ​တဲ့ အချက်​က ပညတ်တရားမှာ ဖော်ပြ​ထားတာ​ထက် သာလွန်တယ်။ “တိုင်းတစ်ပါးသားကို သူ​နေထိုင်တဲ့​အနွယ်ရဲ့ နယ်မြေ​ထဲမှာ အမွေ​ပေး​ရမယ်” ဆိုပြီး ယေဟောဝါ ညွှန်ကြားတယ်။ ဒီ​မိန့်မှာချက်​အားဖြင့် “ပြည်မှာ​မွေးတဲ့ အစ္စရေး​တွေ” နဲ့ ပြည်တွင်း​ရှိ တိုင်းတစ်ပါးသားတွေ​ကြား​က ကွာခြားချက်​ကြီး​ကို ယေဟောဝါ ဖယ်ရှား​လိုက်တယ်။ (ယေဇ. ၄၇:၂၂၊ ၂၃) စိတ်အာရုံမှာ ယေဇကျေလ  မြင်ရတဲ့ ပြန်လည်​တည်ထောင်​ထားတဲ့​ပြည်မှာ ပြည်သူပြည်သား​တွေ တန်းတူညီတူ၊ စည်းစည်းလုံးလုံး ဝတ်ပြု​နေကြတာ တွေ့ရတယ်။—ဝတ်. ၂၅:၂၃။

၁၅။ တိုင်းပြည်၊ ပြည်သူပြည်သားတွေ​နဲ့​ပတ်သက်တဲ့ ညွှန်ကြားချက်​တွေ​က ယေဟောဝါရဲ့ မပြောင်းလဲတဲ့ ဘယ်အမှန်တရားကို အတည်ပြု​ပေး​သလဲ။

^၁၅ တိုင်းပြည်၊ ပြည်သူပြည်သား​တွေ​နဲ့​ပတ်သက်ပြီး ယေဇကျေလ ရရှိတဲ့ ထူးခြားတဲ့ ညွှန်ကြားချက်​နှစ်ခု​က ပြည်နှင်ခံတွေကို စိတ်​သက်သာရာရ​စေခဲ့တယ်။ အစ္စရေး​လူမျိုးတွေကိုရော ယေဟောဝါကို ကိုးကွယ်တဲ့ တိုင်းတစ်ပါးသားတွေ​ကို​ပါ နယ်မြေ အညီ​အမျှ ခွဲဝေ​ပေးမှာ ဖြစ်ကြောင်း သူတို့ သိထားကြတယ်။ (ဧဇ. ၈:၂၀။ နေ. ၃:၂၆။ ၇:၆၊ ၂၅။ ဟေရှာ. ၅၆:၃၊ ၈) ကျေးကျွန်​အားလုံး ယေဟောဝါ​အတွက် တန်းတူ တန်ဖိုး​ရှိတယ်ဆိုတဲ့ အားတက်ဖွယ် မပြောင်းလဲတဲ့ အမှန်တရားကို ဒီ​ညွှန်ကြားချက်​တွေ​က အတည်ပြု​ပေးတယ်။ (ဟဂ္ဂဲ ၂:၇ ကိုဖတ်ပါ။) ကောင်းကင်ဆိုင်ရာ မျှော်လင့်ချက် ရှိသည်​ဖြစ်စေ၊ မြေကြီးဆိုင်ရာ မျှော်လင့်ချက် ရှိသည်​ဖြစ်စေ ဒီ​အမှန်တရားကို ကျွန်တော်တို့ မြတ်နိုး​ကြတယ်။

၁၆၊ ၁၇။ (က) တိုင်းပြည်၊ ပြည်သူပြည်သား​တွေ​အကြောင်း အသေးစိတ်​အချက်​တွေ သုံးသပ်ခြင်းကနေ ဘယ်လို အကျိုးကျေးဇူး ရသလဲ။ (ခ) နောက်​အခန်းမှာ ဘာ​အကြောင်း သုံးသပ်ကြ​မလဲ။

^၁၆ တိုင်းပြည်၊ ပြည်သူပြည်သား​တွေ​အကြောင်း အသေးစိတ်​အချက်​တွေ သုံးသပ်ခြင်းကနေ ဘယ်လို အကျိုးကျေးဇူး ရရှိ​သလဲ။ တန်းတူ​ညီမျှမှု​နဲ့ စည်းလုံးမှု​တို့ဟာ ဒီနေ့ခေတ် ကမ္ဘာချီ​ညီအစ်ကို​အသင်းအပင်းရဲ့ ထူးခြားတဲ့ အသွင်အပြင်​တစ်​ရပ် ဖြစ်ဖို့​လို​ကြောင်း သတိ​ရစေတယ်။ ယေဟောဝါ​က မျက်နှာ​မလိုက်ဘူး။ ‘ယေဟောဝါရဲ့ မျက်နှာမလိုက်​မှု​ကို ငါ​ရောင်ပြန်ဟပ်​နေ​သလား။ လူမျိုးရေး​နောက်ခံ၊ ဘဝ​အခြေအနေတွေကို ထည့်မတွက်​ဘဲ ယုံကြည်သူချင်း​တိုင်း​ကို လေးလေးစားစား ဆက်ဆံ​ရဲ့​လား’ လို့ ကိုယ့်ကိုယ်ကိုယ် မေး​ရမယ်။ (ရော. ၁၂:၁၀) ကောင်းကင်ဘုံစံ​ဖခင်​ကို စိတ်နှလုံး အကြွင်းမဲ့ ဆည်းကပ်​ကိုးကွယ်​နိုင်တဲ့၊ ဘုရား​ကောင်းချီးတွေ ခံစား​နိုင်တဲ့ ပုံဆောင်​ပရဒိသုမှာ နေထိုင်ခွင့် ကျွန်တော်တို့​အားလုံးကို ယေဟောဝါ ညီတူညီမျှ ပေးထားတဲ့​အတွက် ဝမ်းမြောက်​ကြပါတယ်။—ဂ​လ. ၃:၂၆-၂၉။ ဗျာ. ၇:၉။

^၁၇ ပြည်နှင်ခံတွေနဲ့​အတူ ယေဟောဝါ စံမြန်း​မ​ယ်​ဆိုတဲ့ ယေဇကျေလရဲ့ နောက်ဆုံး​စိတ်အာရုံပါ စ​တု​တ္တ​မြောက် အာမခံချက်ကို သုံးသပ်​ကြစို့။ ဒီ​ကတိတော်​ကနေ ဘာသင်ခန်းစာ​တွေ ယူ​နိုင်သလဲ။ နောက်​အခန်းမှာ အဖြေကို လေ့လာပါ​မယ်။