သွန်သင်ခြင်း လေးထောင့်ကွက် ၁က
ဝတ်ပြုကိုးကွယ်မှုဆိုတာ ဘာလဲ
ဝတ်ပြုကိုးကွယ်မှုဆိုတာ “ဘုရားတစ်ပါးပါးကို ချစ်ခင်ကြည်ညိုကြောင်းပြတဲ့ လုပ်ရပ် ဖြစ်တယ်။” ကျမ်းစာမှာ ‘ဝတ်ပြုကိုးကွယ်’ လို့ ပြန်ဆိုတဲ့ မူရင်းစကားဟာ ဖန်ဆင်းရာတွေကို အလွန်ကြည်ညိုလေးစားမှု၊ လက်အောက်ခံမှုလို့လည်း အဓိပ္ပာယ်ရှိတယ်။ (မ. ၂၈:၉) ဘုရား ဒါမှမဟုတ် နတ်ဘုရားတစ်ပါးကို ပြတဲ့ ဘာသာရေးလုပ်ရပ်ကိုလည်း ရည်ညွှန်းနိုင်တယ်။ (ယော. ၄:၂၃၊ ၂၄) အကြောင်းအရာပေါ် မူတည်ပြီး စကားလုံးတွေကို ဘယ်လို နားလည်ရမလဲဆိုတာ ဆုံးဖြတ်နိုင်တယ်။
ဖန်ဆင်းရှင်၊ စကြဝဠာ အချုပ်အခြာအာဏာပိုင်ရှင် ယေဟောဝါသာလျှင် ကျွန်တော်တို့ရဲ့ အကြွင်းမဲ့ ကိုးကွယ်ဆည်းကပ်မှုကို ရထိုက်ပါတယ်။ (ဗျာ. ၄:၁၀၊ ၁၁) အချုပ်အခြာအာဏာကို လေးစားခြင်း၊ နာမတော်ကို ဂုဏ်တင်ခြင်းအားဖြင့် ယေဟောဝါကို ကျွန်တော်တို့ ဝတ်ပြုကိုးကွယ်ကြတယ်။ (ဆာ. ၈၆:၉။ မ. ၆:၉၊ ၁၀) ယေဇကျေလကျမ်းမှာ အဓိကဖော်ပြထားတဲ့ အကြောင်းအရာနှစ်ခုကတော့ ယေဟောဝါရဲ့ အချုပ်အခြာအာဏာနဲ့ နာမတော် ဖြစ်တယ်။ ယေဇကျေလကျမ်း တစ်စောင်တည်းမှာတင် “အချုပ်အခြာအာဏာပိုင်ရှင် ယေဟောဝါ” ဆိုတဲ့ စာသားကို ၂၁၇ ကြိမ်၊ “ငါဟာ ယေဟောဝါပဲဆိုတာ မင်းတို့ သိရကြလိမ့်မယ်” ဆိုတဲ့ စာကြောင်းကို ၅၅ ကြိမ် သုံးထားတယ်။—ယေဇ. ၂:၄။ ၆:၇။
ဝတ်ပြုကိုးကွယ်မှုဆိုတာ ခံစားချက်သက်သက် မဟုတ်ဘူး။ စစ်မှန်တဲ့ ဝတ်ပြုရေးမှာ လုပ်ရပ် ပါတယ်။ (ယာ. ၂:၂၆) ကိုယ့်အသက်တာကို ယေဟောဝါဆီ ဆက်ကပ်အပ်နှံတုန်းက ဘဝကဏ္ဍတိုင်းမှာ အချုပ်အခြာအာဏာပိုင်ရှင်ကို နာခံပါ့မယ်၊ နာမတော်ကို အလွန်ရိုသေလေးမြတ်ပါ့မယ်လို့ ကတိပြုခဲ့ကြတယ်။ တတိယသွေးဆောင်မှုကို ယေရှု တုံ့ပြန်ချိန်မှာ ကိုးကွယ်မှုနဲ့ ‘ဝတ်ပြုမှု’ ကို ဆက်စပ်ဖော်ပြခဲ့တာ သတိရပါ။ (မ. ၄:၁၀) ယေဟောဝါကို ကိုးကွယ်သူတွေအနေနဲ့ ကျွန်တော်တို့ဟာ ဘုရား အမှုဆောင်ချင်ကြတယ်။ * (တရား. ၁၀:၁၂) ကိုးကွယ်မှုနဲ့ တိုက်ရိုက်သက်ဆိုင်တဲ့၊ ကိုယ်ကျိုးစွန့်ဖို့ လိုအပ်တဲ့ လုပ်ဆောင်မှုတွေမှာ ပါဝင်တဲ့အခါ ဘုရားကို ဝတ်ပြုနေတာ၊ အမှုဆောင်နေတာ ဖြစ်ပါတယ်။ ဘယ်လုပ်ဆောင်မှုတွေလဲ။
ဝတ်ပြုမှုပုံစံ အမျိုးမျိုး ရှိပြီး အားလုံးကို ယေဟောဝါ တန်ဖိုးထားတယ်။ တခြားသူတွေကို သက်သေခံတဲ့အခါ၊ နိုင်ငံတော်ခန်းမမှာ ကျင်းပတဲ့ အစည်းအဝေးတွေမှာ ပါဝင်တဲ့အခါ၊ အစည်းအဝေး ကျင်းပတဲ့ နေရာတွေကို ထိန်းသိမ်း၊ ဆောက်လုပ်တဲ့အခါ ဝတ်ပြုရေးမှာ ပါဝင်နေကြတာပါ။ ဒါ့အပြင် မိသားစုဝတ်ပြုမှုမှာ ပါဝင်တာ၊ ဒုက္ခရောက်နေတဲ့ ယုံကြည်သူချင်းတွေအတွက် ကယ်ဆယ်ရေးလုပ်ငန်းတွေကို ထောက်မတာ၊ အစည်းအဝေးကြီးတွေမှာ စေတနာ့ဝန်ထမ်း လုပ်တာ၊ ဗေသလမှာ အမှုဆောင်တာတွေကလည်း ဝတ်ပြုနေတာပါပဲ။ (ဟီ. ၁၃:၁၆။ ယာ. ၁:၂၇) ကျွန်တော်တို့ရဲ့ စိတ်နှလုံးထဲမှာ စင်ကြယ်တဲ့ ဝတ်ပြုကိုးကွယ်မှုက အဓိက ဖြစ်မယ်ဆိုရင် “နေ့ညမပြတ် အမှုဆောင်နေ” ကြမှာ ဖြစ်တယ်။ ယေဟောဝါဘုရားကို ဝတ်ပြုကိုးကွယ်ရလို့ ကျွန်တော်တို့ ဝမ်းမြောက်ကြပါတယ်။—ဗျာ. ၇:၁၅။
^ အပိုဒ်၊ 5 ကိုးကွယ်မှုဆိုတဲ့ ဟီဘရူးစကားလုံးဟာ ဝတ်ပြုမှုဆိုတဲ့ အဓိပ္ပာယ်လည်း ရှိတယ်။ ဒါကြောင့် ကိုးကွယ်မှုမှာ ဝတ်ပြုတာလည်း ပါဝင်တယ်။—ထွ. ၃:၁၂။