သွန်သင်ခြင်း လေးထောင့်ကွက် ၄က
“သတ္တဝါတွေကို ကျွန်တော် ဆက်ကြည့်နေတုန်း”
နန်းတော်တွေ၊ ဘုရားကျောင်းတွေရှေ့ အစောင့်တွေလို ရပ်နေတဲ့ အတောင်ပံပါတဲ့ လူ့ခေါင်းနဲ့ ဧရာမ နွားရုပ်၊ ခြင်္သေ့ရုပ်တွေကို ယေဇကျေလ မြင်ဖူးမှာပါ။ ရှေးခေတ် အဆီးရီးယားနဲ့ ဗာဗုလုန်ပြည်တစ်လျှောက် ဒီလိုရုပ်တုတွေ တွေ့ရတတ်တယ်။ တခြားကြည့်ရှုသူတွေလိုပဲ ယေဇကျေလလည်း ဒီဧရာမရုပ်တုတွေကို တအံ့တဩ ကြည့်ခဲ့မှာပဲ။ တချို့ရုပ်တုတွေဆို ပေ ၂၀ နီးပါး မြင့်တယ်။ ဒါပေမဲ့ ဘယ်လောက်ပဲ တန်ခိုးကြီးပုံပေါက်နေပါစေ ဒီရုပ်တုတွေဟာ သက်မဲ့ကျောက်ထွင်းရုပ်တွေသာ ဖြစ်တယ်။
ဆန့်ကျင်ဘက်အနေနဲ့ ယေဇကျေလ စိတ်အာရုံမှာ “သတ္တဝါ” လေးပါးကို မြင်ခဲ့တယ်။ တကယ့်ကို ကွာခြားပါတယ်။ ပရောဖက်ပြုချက် နိဒါန်းပျိုးချိန်မှာ “သတ္တဝါတွေ” ဆိုတဲ့ စကားလုံး တစ်လုံးတည်းကို ၁၁ ကြိမ် သုံးရလောက်တဲ့အထိ ဒီမြင်ကွင်းက ယေဇကျေလကို စိတ်ထိမိစေခဲ့တယ်။ (ယေဇ. ၁:၅-၂၂) ဘုရားရဲ့ ရာဇပလ္လင်အောက် ပြိုင်တူရွေ့လျားတဲ့ သတ္တဝါလေးပါးအကြောင်း စိတ်အာရုံက ဖန်ဆင်းရာအားလုံးကို ယေဟောဝါ အပြည့်အဝ ထိန်းချုပ်ထားကြောင်း ယေဇကျေလကို စွဲမှတ်စေခဲ့တယ်။ ဒီနေ့လည်း ဒီစိတ်အာရုံက ယေဟောဝါရဲ့ ကြီးမြတ်မှု၊ တန်ခိုးကြီးမှု၊ အချုပ်အခြာအာဏာကို သိသိသာသာ စွဲမှတ်စေတယ်။—၁ ရာ. ၂၉:၁၁။