၁၊ ၂။ နယ်​လှည့်​ကြီး​ကြ​ပ်​မှူး တစ်​ယောက်​ဟာ သစ္စာ​ရှိတဲ့ ကျမ်းစာ​ဇာတ်​ကော​င်​တွေ​ကို ဘယ်​လို ရှု​မြင်​ခဲ့​သလဲ။ သူတို့​ဟာ ဘာ​ကြောင့် သိပ်​ကောင်း​တဲ့ မိတ်ဆွေ​တွေ ဖြစ်​မလဲ။

“အဲဒီ​ညီ​အစ်​ကို​က ကျမ်း​စာ​မှာ​ပါတဲ့​သူ​တွေအကြောင်း ပြောတဲ့​အခါ သူ့ရဲ့ ရင်းနှီး​တဲ့ သူ့​မိတ်ဆွေ​တွေ​အကြောင်း ပြော​နေ​သလို​ပဲ။” ဒါ​ဟာ သက်​ကြီး နယ်​လှည့်​ကြီး​ကြ​ပ်​မှူး​တစ်​ယောက်​ရဲ့ ဟော​ပြော​ချက်​ကို နား​ထောင်​ပြီး​နောက် ညီအစ်မ​တစ်​ယောက် မှတ်​ချက်​ချ​တာ​ဖြစ်​တ​ယ်။ သူ​ပြော​တာ မှန်​တ​ယ်။ အဲဒီ​ညီ​အစ်​ကို​က ကျမ်း​စာ​ကို နှစ်​ပေါင်း​အတော်​ကြာ လေ့​လာ​ခဲ့​သူ​တစ်​ယောက်​ဆို​တော့ ကျမ်း​စာ ဇာတ်​ကော​င်​တွေ​ဟာ သူ့​ရဲ့ ရင်းနှီး​တဲ့​မိတ်ဆွေ​တွေ​လို​ပဲ ဖြစ်​သွား​တယ်။

^၂ ကျမ်း​စာ​ထဲ​မှာ ဖော်​ပြ​ထား​တဲ့​သူ​တွေ​နဲ့​သာ မိတ်ဆွေ​ဖြစ်​ရ​ရင် ဘယ်​လောက်​ကောင်း​လိုက်​မလဲ။ အဲဒီ​လူ​တွေ​ဟာ သင့်အတွက် တ​ကယ်​ရှိ​နေ​တဲ့ လူ​တွေ​လား။ နော​ဧ၊ အာဗြဟံ၊ ရုသ၊ ဧလိယ၊ ဧ​သ​တာ​တို့​လို လူ​တွေ​နဲ့ လမ်း​လျှောက်​ထွက်​ရင်း စကား​ပြော​ရ​မ​ယ်​ဆို​ရင် ဘယ်​လို​နေ​မလဲ​ဆို​တာ မြင်ယောင်​ကြည့်​ပါ။ သူတို့​ပြော​လာ​တဲ့ အဖိုး​တန် အကြံ​ပြု​ချက်​တွေ၊ အား​ပေး​စကား​တွေ​ကို ကြား​ရ​မ​ယ်​ဆို​ရင် သင့်​ဘဝ​အတွက် ဘယ်​လောက်​အကျိုး​ရှိ​လိုက်​မလဲ​ဆို​တာ စဉ်း​စား​ကြည့်​ပါ။—ပညာအလိမ္မာ ၁၃​: ၂၀ ကို​ဖတ်​ပါ။

၃။ (က) ကျမ်း​စာ​ပါ ယုံ​ကြည်​ခြင်း​ရှိ​တဲ့ အမျိုး​သား၊ အမျိုး​သမီး​တွေ​ဆီ​က​နေ ဘယ်​လို​အကျိုး​ရ​နိုင်​သလဲ။ (ခ) ဘာ​မေး​ခွန်း​တွေ​ကို သုံးသပ်​ကြ​မလဲ။

^၃ “ဖြောင့်မတ်သူ​ရော မဖြောင့်မတ်​သူတွေပါ ရှင်ပြန်ထမြောက်​လာ” တဲ့​အခါ သူတို့​နဲ့ အမှန်​တ​ကယ် မိတ်​ဖွဲ့​ခွင့် ရပါ​လိမ့်​မယ်။ (တ ၂၄:၁၅) ဒါ​ပေမဲ့ အခု​အချိန်​မှာ​တောင် သူတို့​ဆီ​က​နေ အကျိုး​အများ​ကြီး ရ​ရှိ​နိုင်​ပါ​တ​ယ်။ ဘယ်​လို​နည်း​နဲ့​လဲ။ “ယုံကြည်ခြင်း၊ စိတ်ရှည်ခြင်း​ကြောင့် ကတိတော်ကို အမွေ​ရခဲ့​သူတွေကို အတုယူ​ကြပါ” ပါ​ဆို​ပြီး တမန်​တော်​ပေါလု​က လက်​တွေ့​ကျ​ကျ အကြံ​ပြု​ပါ​တ​ယ်။ (ဟီ. ၆: ၁၂) ပေါလု​ရဲ့ အဲဒီ​စကား​တွေ​ကြောင့် မေး​ခွန်း​တ​ချို့ စိတ်​ထဲ​ပေါ်​လာ​နိုင်​တ​ယ်။ ယုံ​ကြည်​ခြင်း​ရှိ​သူ အမျိုး​သား၊ အမျိုး​သမီး​တွေ​အကြောင်း စတင် မ​လေ့​လာ​ခင်​မှာ ဒီ​မေး​ခွန်း​တွေ​ကို အရင်ဆုံး သုံးသပ်​ကြည့်​ရ​အောင်။ ယုံ​ကြည်​ခြင်း​ဆို​တာ ဘာလဲ။ ဒါ​ကို ဘာ​ကြောင့် လို​အပ်​တာ​လဲ။ ကျမ်း​စာ​မှာ ဖော်​ပြ​ထား​တဲ့ သစ္စာ​ရှိ​သူ​တွေ​ကို ဘယ်​လို​တု​ပ​နိုင်​သလဲ။

၄။ လူ​တွေ​က ယုံ​ကြည်​ခြင်း​ကို ဘယ်​လို​ယူ​ဆ​နေ​ကြ​သလဲ။ သူတို့ ဘာ​ကြောင့်​မှား​သလဲ။

^၄ ယုံ​ကြည်​ခြင်း​ဆို​တာ နှစ်​သက်​စ​ရာ အရည်အသွေးတစ်ခု ဖြစ်​ပါ​တ​ယ်။ ဒီ​အရည်​အသွေး​ကို ဒီ​စာ​အုပ်​မှာ​ပါ​တဲ့​သူ​အားလုံး သိပ်​တန်​ဖိုး​ထား​ခဲ့​ကြ​တ​ယ်။ အခု​ခေတ် လူ​အများ​စု​ဟာ စစ်မှန်​တဲ့ ယုံ​ကြည်​ခြင်း​က ဘာ​လဲ​ဆို​တာ မသိ​ကြ​တော့​ဘူး။ အထောက်​အထား​မရှိ​ဘဲ ယုံ​တာ​လို့ တ​ချို့ ယူ​ဆ​နေ​ကြ​တ​ယ်။ သူတို့ မှား​နေ​ပါ​တ​ယ်။ စစ်​မှန်​တဲ့ ယုံ​ကြည်​ခြင်း​ဆို​တာ ပြောတိုင်း​ယုံ​တာ မဟုတ်​ဘူး။ ခံစား​ချက်​လောက်​ပဲ မဟုတ်ဘူး။ ယုံ​တ​ယ် ဆို​တာ​လောက်​နဲ့​လ​ည်း မပြီးဘူး။ ယုံလွယ်​တာ​က အန္တရာယ်​ရှိ​တ​ယ်။ ခံစား​ချက်​ဆို​တာ​က ပေါ်လာ​ပြီး ပြန်​ပျောက်​သွား​နိုင်​တ​ယ်။ ဘုရား​သခင်​နဲ့​ပတ်​သက်​လာ​ရင် ယုံတယ်​ဆို​တာ​လောက်​နဲ့​လ​ည်း မပြီး​သေး​ဘူး။  “နတ်ဆိုး​တွေ​တောင် ယုံ​လို့ ဖိမ့်ဖိမ့်တုန်​နေကြ” တယ်​မဟုတ်လား။ — ယာ. ၂:၁၉။

၅၊ ၆။ (က)စစ်​မှန်​တဲ့​ယုံ​ကြည်​ခြင်း​က မမြင်​ရ​တဲ့ ဘယ်​အရာ​နှစ်ခုကို အာ​ရုံ​စိုက်​သလဲ။ (ခ) ကျွန်တော်​တို့​ရဲ့ ယုံ​ကြည်​ခြင်း​က ဘယ်လောက်​အထိ ခိုင်​မာ​သင့်​သလဲ။ ဥပမာ​ပေး​ပါ။

^၅ စစ်​မှန်​တဲ့ ယုံ​ကြည်​ခြင်း​ဆို​တာ ခု​န​က​ပြော​ခဲ့​တဲ့ အရာတွေ မဟုတ်​ပါ​ဘူး။ ကျမ်း​စာ​က ယုံ​ကြည်​ခြင်း​ကို ဘယ်လို အဓိပ္ပာယ်​ဖွင့်​ထား​သလဲ​ဆို​တာ ပြန်​အမှတ်​ရ​ပါ။ (ဟီဘရူး ၁၁:၁ ကို​ဖတ်​ပါ။) စစ်​မှန်​တဲ့ ယုံ​ကြည်​ခြင်း​ဟာ မမြင်​ရ​တဲ့​အရာ​နှစ်​ခု​ကို အာ​ရုံ​စိုက်​တ​ယ်​လို့ ပေါလု​ဆို​ခဲ့​တ​ယ်။ ပထမ​တစ်ခု​က “မမြင်​ရပေမဲ့” တ​ကယ်​တည်ရှိ​တဲ့ အရာတွေ ဖြစ်တယ်။ ယေဟောဝါ​ဘုရား၊ ကိုယ်​တော်​ရဲ့​သားတော်၊ အခုကောင်းကင်​မှာ ​အုပ်​ချုပ်​နေ​ပြီ​ဖြစ်​တဲ့ နိုင်​ငံ​တော် စ​တဲ့ ကောင်းကင်​က အရာတွေ​ကို ကျွန်တော်တို့​ရဲ့ ပကတိ​မျက်​လုံး​နဲ့ မမြင်​နိုင်​ပါ​ဘူး။ ဒု​တိ​ယ​က ယုံ​ကြည်​ခြင်း​ဟာ မဖြစ်​သေး​တဲ့​အရာတွေ​ကို “မျှော်​လင့်” တယ်။ ဥပမာ၊ ဘုရား​သခင့်​နိုင်​ငံ​တော်​က မကြာ​ခင် လုပ်​ပေး​မ​ယ့်​ကမ္ဘာ​သစ်​ကို အခု​မမြင်​နိုင်​ဘူး။ ဒီ​လို​ဆို​ရင် တ​ကယ်​တည်​ရှိ​တဲ့​အရာတွေ၊ ကျွန်တော်​တို့ မျှော်လင့်​တဲ့​အရာတွေ​က အခြေ​အမြစ်​မရှိ​ဘူး​လို့ ဆိုလို​နေ​တာ​လား။

^၆ မဟုတ်​ပါ​ဘူး။ စစ်​မှန်​တဲ့ ယုံ​ကြည်​ခြင်း​ဟာ ခိုင်လုံ​တဲ့​အကြောင်း​ရင်း​ပေါ်​မှာ အခြေ​ခံ​တ​ယ်​လို့ ပေါလု ရှင်း​ပြပါ​တယ်။ ယုံ​ကြည်​ခြင်း​ဟာ “စိတ်​ချ​စွာ စောင့်​မျှော်​နေတာ” ဖြစ်တယ်​လို့ ပြော​တဲ့​အခါ “ရ​ပိုင်​ခွင့်​စာ​ချုပ်” လို့​လ​ည်း ပြန်ဆိုနိုင်တဲ့ စကား​လုံး​ကို သူ​အသုံး​ပြု​ခဲ့​တ​ယ်။ သင့်​ကို တစ်ယောက်​ယောက်​က အိမ်​တစ်​လုံး​ပေး​မ​ယ်​လို့ ပြော​တ​ယ်​ဆို​ပါ​စို့။ သူ​က ပိုင်​ဆိုင်​ခွင့် စာ​ချုပ်​ကို​ပေး​ပြီး “ဒီ​မှာ ခင်​ဗျား​ရဲ့​အိမ်” လို့​ပြော​တ​ယ်။ ဒီ​စာ​ချုပ်​ပေါ်​မှာ သင်​နေ​ရ​မ​ယ်​လို့ သူ​ပြော​နေ​တာ မဟုတ်​ပါ​ဘူး။ ဒီ​စာ​ချုပ်​က အိမ်​ကို သင်ပိုင်​တယ်​ဆို​တဲ့ ခိုင်လုံ​တဲ့​အထောက်​အထား​ဖြစ်​တဲ့​အတွက် ဒီစာချုပ်​ကို ရ​ရှိ​ထား​တာ​ဟာ အိမ်​ကို​ရ​ရှိ​ထား​တာ​နဲ့ အတူတူပဲ​လို့ သူ ဆိုလို​နေ​တာ​ဖြစ်​တ​ယ်။ အဲဒီ​လို​ပဲ စစ်​မှန်​တဲ့ ယုံ​ကြည်​ခြင်း​ရှိမယ်​ဆိုရင် ကျမ်း​စာ​မှာ​ပါ​တဲ့ ဘုရား​သခင့်​ကတိ​အားလုံး​ကို ပြည့်​စုံ​ပြီး​သလိုပဲ ယုံကြည်​စိတ်​ချ​မှာ​ဖြစ်​တ​ယ်။

၇။ စစ်​မှန်​တဲ့ ယုံ​ကြည်​ခြင်း​မှာ ဘာ​တွေ ပါ​ဝင်​သလဲ။

^၇ ခြေ​မြစ်​ခိုင်လုံ​ပြီး မ​ယိမ်း​ယို​င်​တဲ့ စစ်​မှန်​တဲ့ ယုံ​ကြည်​ခြင်း​က ယေဟောဝါ​ဘုရား​အပေါ် အခြေ​ပြု​ပါ​တ​ယ်။ ယုံကြည်​ခြင်း​ရှိ​မ​ယ်​ဆို​ရင် ယေဟောဝါ​ဘုရား​ကို မေတ္တာ​ပြည့်​ဝ​တဲ့ ဖခင်​အနေ​နဲ့ မြင်​လာ​မှာ​ဖြစ်​တ​ယ်။ ကိုယ်တော်​ရဲ့ ကတိ​အားလုံး အမှန်​တ​ကယ် ပြည့်​စုံ​လာ​မ​ယ်​ဆိုတာ ယုံကြည်​စိတ်​ချ​မှာ​ဖြစ်​တ​ယ်။ ဒါ​ပေမဲ့ စစ်​မှန်​တဲ့​ယုံ​ကြည်​ခြင်း​က အဲဒီ​လောက်​ပဲ မဟုတ်​သေး​ပါ​ဘူး။ သက်​ရှိ​အရာ​တစ်​ခု ဆ​က်​ရှင်​သန်​နေ​ဖို့ အမြဲ အား​ဖြည့်​ပေး​ရ​သလို ယုံ​ကြည်​ခြင်း ဆ​က်​ရှင်​သန်​နေ​ဖို့​လ​ည်း အမြဲ အား​ဖြည့်​ပေး​နေ​ရ​မှာ ​ဖြစ်​တ​ယ်။ ယုံကြည်​ခြင်း​ရှိ​တ​ယ်​ဆို​တာ လုပ်​ရပ်​နဲ့​ဖော်​ပြ​ရ​မ​ယ်။ မဟုတ်​ရင် ယုံကြည်ခြင်း သေသွား​နိုင်​တ​ယ်။ — ယာ. ၂:၂၆။

၈။ ယုံ​ကြည်​ခြင်း​ရှိဖို့ ဘာ​ကြောင့် သိပ်​အရေး​ကြီး​သလဲ။

^၈ ယုံ​ကြည်​ခြင်း​ရှိ​ဖို့ ဘာ​ကြောင့် သိပ်​အရေး​ကြီး​သလဲ။ တိုက်​တွန်း​နှိုးဆော်​မှု​ဖြစ်​စေ​တဲ့ အဖြေကို ပေါလု​ဖော်​ပြခဲ့​တယ်။ (ဟီဘရူး ၁၁:၆ ကို​ဖတ်​ပါ။) ကျွန်တော်​တို့​မှာ ယုံကြည်​ခြင်း​မရှိ​ဘူး​ဆို​ရင် ယေဟောဝါ​ဘုရား​ဆီ မ​ချဉ်း​ကပ်​နိုင်​သလို ကိုယ်တော့်​စိတ်​တော်​နဲ့​လ​ည်း မ​တွေ့​နိုင်​ဘူး။ အသိ​ဉာဏ်​ရှိ ပုဂ္ဂိုလ်​တစ်​ဦး ထား​နိုင်​တဲ့ အမြင့်​မြတ်​ဆုံး၊ အကောင်း​ဆုံး ရည်မှန်း​ချက်​က ကောင်း​ကင်​ဖခင် ယေဟောဝါ​ဆီ ချဉ်း​ကပ်​ဖို့​နဲ့ ကိုယ်​တော့်​ကို ဂုဏ်​တင်​ဖို့​ဖြစ်​တ​ယ်။ ယုံကြည်​ခြင်း​မရှိ​ရင် အဲဒီ​ရ​ည်​မှန်း​ချက်​ကို မ​ရောက်​နိုင်​ဘူး။

၉။ ကျွန်တော်​တို့ ယုံ​ကြည်​ခြင်း​ရှိ​ဖို့ လို​တ​ယ်​ဆို​တာ ယေဟောဝါ​ဘုရား​သိ​ကြောင်း ဘယ်​လို ဖော်​ပြသလဲ။

 ^၉ ကျွန်တော်တို့​မှာ ယုံ​ကြည်​ခြင်း​ရှိဖို့ ဘယ်​လောက် လိုတယ်​ဆို​တာ ယေဟောဝါ​ဘုရား သိ​ပါ​တ​ယ်။ ဒါ​ကြောင့်​လည်း ယုံ​ကြည်​ခြင်း တည်​ဆောက်​နိုင်​ပုံ၊ တင်​ပြ​နိုင်​ပုံ​ကို သင်ပေး​ဖို့ စံန​မူ​နာ​ရှင်​တွေ​ကို ဖော်​ပြပေး​ထား​တ​ယ်။ ကျွန်တော်​တို့​အတွက် စံ​န​မူ​နာ​အ​နေ​နဲ့ သစ္စာ​ရှိ​သူ​တွေ​ကို အသင်း​တော်​မှာ ဦး​ဆောင်​စေ​ပြီး ကျမ်း​စာ​က “သူတို့ရဲ့ ယုံကြည်ခြင်းကို အတုယူ​ပါ” လို့ တိုက်​တွန်း​ထား​တယ်။ (ဟီ. ၁၃:၇) ဒီလောက်​ပဲ မဟုတ်​ပါ​ဘူး။ ပေါလု​က ‘တိမ်​ထု​ကြီး​လို​များ​တဲ့ သက်သေ​တွေ’ ဖြစ်​တဲ့ ယုံ​ကြည်​ခြင်း စံ​န​မူ​နာ​ရှင် ရှေး​ခေတ် အမျိုး​သား၊ အမျိုး​သမီး​တွေ​အကြောင်း​ပါ ဖော်​ပြခဲ့​တယ်။ (ဟီ. ၁၂:၁) ဒါ​ပေမဲ့ ဟီဘရူး ၁၁ မှာ ပေါလု မှတ်​တမ်း​တင်​ထား​တဲ့ စာ​ရင်း​က အပြည့်​အစုံ မဟုတ်​သေး​ပါ​ဘူး။ ကျမ်း​စာ​ထဲ​မှာ ဘဝ​နောက်​ခံ​အသီး​သီး​က အမျိုး​သား​အမျိုးသမီး၊ လူကြီး​လူငယ်​တွေ​ရဲ့ သစ္စာ​ရှိ​ခဲ့​တဲ့ အကြောင်း​တွေ​ကို ဖော်​ပြ​ထား​တ​ယ်။ သစ္စာ​မရှိ​တဲ့ ဒီ​နေ့​လော​က​မှာ သူတို့​ဆီ​က​နေ ကျွန်တော်တို့ သင်ခန်းစာ အများ​ကြီး​ယူ​နိုင်​ပါ​တ​ယ်။

၁၀။ ကျမ်း​စာ​မှတ်​တမ်း​မှာ​ပါ​တဲ့ သစ္စာ​ရှိ​သူ​တွေ​ကို တု​ပ​နိုင်​အောင် ကိုယ်​ပိုင်​လေ့​လာ​မှု​ကို ဘယ်​လို​လုပ်​ရင် ကောင်း​မလဲ။

^၁၀ လူ​တစ်​ယောက်​အကြောင်း ကောင်း​ကောင်း​သိ​မှ သူ့ကို အတုယူ​နိုင်​မ​ယ်။ ဒီ​စာ​အုပ်​မှာ​ပါ​တဲ့ သစ္စာ​ရှိ​သူ​တွေ​အကြောင်း သင်​ကောင်း​ကောင်း သိ​လာ​နိုင်​ဖို့ အများ​ကြီး ရှာ​ဖွေ​စုဆောင်း​ပေး​ထား​ပါ​တ​ယ်။ သင်​ကိုယ်​တိုင်​ရော ထပ်​ဆ​င့် မ​လေ့​လာ​ကြည့်​ချင်​ဘူး​လား။ ကိုယ်​ပိုင်​လေ့​လာ​မှု လုပ်​တဲ့​အခါ သင့်​မှာ​ရှိ​တဲ့ စာ​အုပ်​စာပေ​တွေ​ကို​သုံး​ပြီး ရှာ​ဖွေ​လေ့​လာ​ပါ။ သင်​လေ့​လာ​တဲ့​အခါ အဖြစ်​အပျက်​ရဲ့ တည်​နေ​ရာ​နဲ့ နောက်​ခံ​ကို ကြိုး​စား​မြင်​ယောင်​ကြည့်​ပါ။ မြင်​ကွင်း​တွေ​ကို မြင်​ယောင်​ပါ၊ အသံ​တွေ​ကို ကြား​ယောင်​ပါ၊ ရ​နံ့​တွေ​ကို ရ​နေ​သလို ခံစား​ကြည့်​ပါ။ အထူး​သဖြင့် ပါ​ဝင်​နေ​သူ​တွေ​ရဲ့ ခံစား​ချက်​ကို သိအောင်​လုပ်​ပါ။ သစ္စာ​ရှိ​တဲ့ ဒီ​အမျိုး​သား၊ အမျိုး​သမီး​တွေ​နေ​ရာ​မှာ သင် ဝင်​ခံစား​ကြည့်​တဲ့​အခါ သူတို့​ဟာ သင့်​အတွက် တ​က​ယ့်​ပု​ဂ္ဂိုလ်​တွေ ဖြစ်​လာ​ပြီး သူတို့​ကို သင်​ရင်းနှီး ချစ်​ခင်​လာ​ပါ​လိမ့်​မ​ယ်။

၁၁၊ ၁၂။ (က) အာ​ဗြံ၊ စာ​ရဲ​တို့​နဲ့ သင် ဘယ်လို ရင်းနှီး​လာ​နိုင်သလဲ။ (ခ) ဟန္န၊ ဧလိယ၊ ရှ​မွေ​လ​တို့​ရဲ့ ပုံသက်သေ​က​နေ ဘယ်​လို အကျိုး​ရ​နိုင်​သလဲ။

^၁၁ သူတို့​အကြောင်း ကောင်း​ကောင်း​သိ​လာ​ပြီ​ဆိုရင် သူတို့​ကို အတုယူ​ချင်​လာ​ပါ​လိမ့်​မ​ယ်။ ဥပမာ၊ အမှု​ဆောင်​လုပ်ငန်း​ကို တစ်​နည်း​နည်း​နဲ့ တိုးချဲ့​ဖို့ အဖွဲ့​အစည်း​ရဲ့ ဖိ​တ်​ခေါ်​ချက်​ကို သင်​ရ​ရှိ​တ​ယ်​ဆို​ပါ​စို့။ ဟော​ပြော​မ​ယ့်​သူ ပို​လို​အပ်​နေ​တဲ့​နေ​ရာ​ကို ပြောင်း​ရွှေ့​ဖို့ တောင်း​ဆို​တာ ဖြစ်​ရင်​ဖြစ်​မ​ယ်။ သင် အကျွမ်း​တ​ဝင်​မရှိ​တဲ့ ဒါ​မှ​မဟုတ် သိပ်​သဘော​မကျ​တဲ့ ဟော​ပြော​ခြင်း​ပုံ​စံ တစ်​မျိုး​မျိုး​မှာ ပါ​ဝင်​ဖို့​ဖိ​တ်​ခေါ်​တာ ဖြစ်ရင်​ဖြစ်​မယ်။ ဒီ​တာဝန်​အသစ်​အကြောင်း ဆုတောင်း စဉ်းစား​တဲ့​အခါ အာ​ဗြံ​ရဲ့ စံ​န​မူ​နာ​ကို အတု​ယူပါ။ အာဗြံ​နဲ့ စာ​ရဲ​ဟာ ဥရ​မြို့​ကနေ လို​လို​လား​လား ထွက်​ခွာ​ခဲ့​ကြ​လို့ ကောင်း​ချီး​အများ​ကြီး ခံစား​ခဲ့​ရ​တ​ယ်။ သူ့​စံ​န​မူ​နာ​ကို တု​ပ​တဲ့​အခါ သူတို့​ကို အရင်​က​ထက် ပို​သိ​လာ​တ​ယ်​လို့ သင်​ခံစား​ရ​ပါ​လိမ့်​မ​ယ်။

^၁၂ အဲဒီ​လို​ပဲ သင်​နဲ့ နီး​စပ်​သူ​တစ်​ယောက်​က သင့်​ကို မုန်း​နေ​လို့ စိတ်​ပျက်​ပြီး အစည်း​အဝေး​တွေ​တောင် မ​တက်​ချင်​တော့​ဘူး ဆို​ရင်​ကော။ ဟန္န​အကြောင်း၊ ပေနိန္န​ရဲ့ မုန်း​တီး​မှု​ကို သူ​ရင်ဆိုင်​ခဲ့​ပုံ​အကြောင်း စဉ်း​စား​တာ​က မှန်​ကန်​တဲ့ ဆုံးဖြတ်​ချက်​ချ​ဖို့ ထောက်​ကူ​ပေး​ပါ​လိမ့်​မ​ယ်။ အဲဒီ​လို​လုပ်​တဲ့​ အခါ ဟန္န​ကို သင့်​ရဲ့ မိတ်ဆွေ​ရင်း​တစ်ယောက်​လို ချစ်​လာ​ပါ​လိမ့်​မ​ယ်။ အသုံး​မကျ​ဘူး​လို့ ခံစား​ရ​ပြီး စိတ်​ဓာတ်​ကျ​နေ​တယ်​ဆို​ရင် ဧလိယ​အကြောင်း၊ သူ့​ကို ယေဟောဝါ​ဘုရား နှစ်သိမ့်​ပေး​ပုံ​အကြောင်း စဉ်း​စား​လိုက်​တဲ့​အခါ သူ​နဲ့ ပို​ရင်းနှီး​လာ​ပါ​လိမ့်​မ​ယ်။ အကျင့်​ယို​ယွင်း​တဲ့ ကျောင်း​နေ​ဖက်​တွေ​ကြား​မှာ ရှိ​နေ​တဲ့ လူငယ်​တွေ​ဟာ ရှ​မွေ​လ​အကြောင်း လေ့လာ​နိုင်​ပါ​တ​ယ်။ တဲ​တော်​မှာ ဧ​လိ​သား​တွေ​ရဲ့ မကောင်း​တဲ့​သြဇာ​ကို သူ​တုံ့​ပြန်​ခဲ့​ပုံ​အကြောင်း လေ့​လာ​တဲ့​အခါ သူ့​ကို သင်​တို့​ရဲ့ သူ​ငယ်​ချင်း​တစ်​ယောက်​လို မြင်​လာ​ပါ​လိမ့်​မ​ယ်။

၁၃။ ကျမ်း​စာ ဇာတ်​ကော​င်​တွေ​ရဲ့ ယုံ​ကြည်​ခြင်း​ကို အတု​ယူတဲ့​အတွက် ယေဟောဝါ​ဘုရား​ရှေ့ ကိုယ့်ရဲ့​တန်​ဖိုး လျော့​သွား​သလား။ ရှင်း​ပြပါ။

^၁၃ ကျမ်း​စာ​ဇာတ်​ကော​င်​တွေ​ရဲ့ ယုံ​ကြည်​ခြင်း​ကို အတုယူလို့ ယေဟောဝါ​ဘုရား​ရှေ့ ကိုယ့်​ရဲ့​တန်​ဖိုး လျော့​သွား​သလား။ လုံး​ဝ​မ​လျော့​ပါ​ဘူး။ သူတို့​ရဲ့ ယုံ​ကြည်​ခြင်း​ကို အတုယူဖို့ ယေဟောဝါ အား​ပေး​ထား​တ​ယ်​ဆို​တာ အမှတ်​ရ​ပါ။ (၁ ကော. ၄:၁၆။ ၁၁:၁။ ၂ သက်. ၃:၇၊ ၉) ကျွန်တော်တို့ လေ့​လာ​သွား​မ​ယ့် သူ​တ​ချို့​လ​ည်း သူတို့​ရှေ့​က သစ္စာ​ရှိ​သူ​တွေ​ကို အတုယူ​ခဲ့​ကြ​သူ​တွေ​ပါပဲ။ ဥပမာ၊ ဒီ​စာ​အုပ်​ရဲ့ အခန်း ၁၇ မှာ​ပါ​တဲ့ မာ​ရိ​က ဟန္န​ရဲ့​စကား​တွေ​ကို ကိုး​ကား​ပြော​ဆို​ခဲ့​တဲ့​အတွက် ဟန္န​ကို သူ အတု​ယူ​ခဲ့​တ​ယ်​ဆို​တာ သိသာ​တ​ယ်။ အဲဒီ​အတွက် မာ​ရိ​ရဲ့ ယုံ​ကြည်​ခြင်း​က သိပ်​မ​ခိုင်​မာ​ဘူး​ဆိုတဲ့ သဘော​လား။ မဟုတ်​ပါ​ဘူး။ ဟန္န​ရဲ့ စံ​န​မူ​နာ​က မာရိရဲ့ ယုံကြည်​ခြင်း​ကို ခိုင်​ခံ့​စေ​ခဲ့​တဲ့​အတွက် မာ​ရိ​ဟာ ယေဟောဝါ​ဘုရား​ရှေ့ နာ​မည်​ကောင်း​ရ​ခဲ့​တ​ယ်။

၁၄၊ ၁၅။ ဒီ​စာ​အုပ်​ရဲ့ အသွင်​အပြင်​တ​ချို့​ကို ပြော​ပြပါ။ ဒီ​စာ​အုပ်​ကို ဘယ်​လို ကောင်း​ကောင်း အသုံး​ပြု​နိုင်​သလဲ။

^၁၄ သင့်​ရဲ့​ယုံ​ကြည်​ခြင်း ခိုင်​ခံ့​လာ​စေ​ဖို့ ဒီ​စာ​အုပ်​ကို ထုတ်ဝေ​ရ​တာ ဖြစ်​ပါ​တ​ယ်။ ဒီ​စာ​အုပ်​က ၂၀၀​၈ ကနေ ၂၀၁၃ အတွင်း ကင်း​မျှော်​စင် မှာ​ပါ​တဲ့ “သူတို့​ရဲ့ ယုံကြည်ခြင်း​ကို တုပပါ” ဆို​တဲ့ ဆောင်း​ပါး​တွေ​ကို ပြန်​စု​စည်း​ထား​တာ​ပါ။ ဒါပေမဲ့ တ​ချို့​အကြောင်း​အရာ​က အသစ်​ဖြစ်​တ​ယ်။ ဆွေး​နွေး​သုံးသပ်​ဖို့ မေး​ခွန်း​တွေ​လ​ည်း ထည့်​ထား​ပေး​တ​ယ်။ ဒီ​စာ​အုပ်​အတွက် အရောင်​အသွေး​စုံ​ပြီး အသေး​စိတ် အချက်​အ​လက်​တွေ​ပါ​တဲ့ ရုပ်​ပုံ​တွေ​ကို ပြင်​ဆင်​ထား​ပါ​တ​ယ်။ အရင်​ရုပ်​ပုံ​တွေ​ကို​လ​ည်း ပုံ​ကြီး​ချဲ့​ထား​ပြီး ပို​ကောင်း​အောင် လုပ်ထား​တယ်။ အချိန်​ပြ​မျဉ်း၊ မြေပုံ စ​တာ​တွေ​ကို​လ​ည်း ထည့်​ထားတယ်။ သူတို့​ရဲ့ ယုံ​ကြည်​ခြင်း​ကို တု​ပ​ပါ စာ​အုပ်​ကို ကိုယ်ပိုင်၊ မိသားစု​လိုက်​နဲ့ အသင်း​တော်​မှာ လေ့​လာ​ဖို့ ရည်ရွယ်​ထား​ပါ​တ​ယ်။ ဒီ​စာ​အုပ်​ကို မိ​သား​စု​လိုက် အပျော်​တမ်း​ဖတ်ရင်​တောင် အကျိုး​ပါ​တ​ယ်။

^၁၅ ယေဟောဝါ​ဘုရား​ရဲ့ ရှေး​ခေတ်​ကျေး​ကျွန်​တွေ​ရဲ့ ယုံကြည်​ခြင်း​ကို အတု​ယူဖို့ ဒီ​စာ​အုပ်​က သင့်​ကို ထောက်​ကူပေး​မယ်​လို့ မျှော်​လင့်​ပါ​တ​ယ်။ ဒီ​စာ​အုပ်​ကြောင့် သင်​တို့ရဲ့ ယုံကြည်​ခြင်း တိုးပွား​ပြီး ကောင်း​ကင်​ဖခင် ယေဟောဝါ​နဲ့ ပိုရင်းနှီး​လာ​နိုင်​ပါ​စေ။