၁၊ ၂။ (က) ဘယ်လို အလုပ်​မျိုးကို ရုသ လုပ်​နေသလဲ။ (ခ) ဘုရား​ပညတ်၊ ဘုရား​လူမျိုးနဲ့ ပတ်သက်ပြီး အပြုသဘော​ပါတဲ့ ဘယ်​အချက်တွေကို ရုသ သိလာ​သလဲ။

ရုသဟာ တစ်ရက်​လုံး ကောက်သင်း​ကော​က်​ပြီး စုပုံ​ထားတဲ့ မုယော​စပါး​စည်း​တွေ​နား​မှာ ဒူးထောက်​နေတယ်။ ဘက်သလီဟင်​မြို့​ပတ်လည်​က လယ်ကွင်း​တွေ​မှာ မှောင်​စ​ပျိုး​နေပြီ။ အလုပ်သမား အတော်များများလည်း တောင်ထိပ်မှာ​ရှိတဲ့ မြို့ငယ်​လေး​ရဲ့ ဂိတ်​တံခါး​ဆီ သွား​နေကြပြီ။ မနက်​က​စပြီး ညနေစောင်း​အထိ မနားတမ်း အလုပ်လုပ်​ထားတဲ့​အတွက် ရုသ​ခမျာ ဘယ်လောက် ပင်ပန်း​နေမယ်​ဆိုတာ မြင်ယောင်​ကြည့်​လိုက်ပါ။ ဒါပေမဲ့ မုယော​စပါး​စည်း​တွေကို တုတ်​တစ်ချောင်း​နဲ့ ရိုက်​ပြီး ခြွေ​နေတုန်းပဲ။ ပင်ပန်းပေမဲ့ ဒီနေ့​တော့ သူ​ထင်ထားတာ​ထက် ပို​အဆင်ပြေ​နေတယ်။

^၂ မုဆိုးမ​လေး​ရဲ့ အခြေအနေ တိုးတက် ကောင်းမွန်​လာတော့​မလား။ ရှေ့အခန်း​မှာ သိခဲ့ရတဲ့​အတိုင်း သူဟာ ယောက္ခမ နောမိ​နဲ့ သေ​အတူ ရှ​င်​မ​ကွာ အမြဲ​နေဖို့၊ နောမိ​ကိုးကွယ်တဲ့ ဘုရားသခင် ယေဟောဝါကိုပဲ ကိုးကွယ်​ဖို့ ဆုံးဖြတ်ထား​မှန်း သိခဲ့ရပြီ။ ဝမ်းနည်းပူဆွေး​နေတဲ့ သမီး​ယောက္ခမ​နှစ်ယောက်ဟာ မောဘ​ပြည်​ကနေ ထွက်လာပြီး ဘက်သလီဟင်​မြို့မှာ ရောက်နေ​ကြတယ်။ ဒီကို​ရောက်တော့ ယေဟောဝါရဲ့​ပညတ်​က တိုင်းတစ်ပါးသားတွေ အပါအဝင် ဆင်းရဲတဲ့ အစ္စရေး​လူတွေ အကျိုးအတွက် ထည့်တွက် စဉ်းစား​ပေး​မှန်း မောဘ​အမျိုးသမီး ရုသ သိရတယ်။ အခု အဲဒီ​ပညတ်ကို ချစ်မြတ်နိုးပြီး ပညတ်တရား​နဲ့​အညီ နေထိုင်တဲ့ အစ္စရေး​လူ​တချို့ရဲ့ သနား​ကြင်နာမှု​ကို တွေ့မြင် ခံစားရ​လို့ ဝမ်းနည်းပူဆွေးမှု​တွေ သက်သာ​လာတယ်။

၃၊ ၄။ (က) ဗောဇ​က ရုသ​ကို ဘယ်လို အားပေးခဲ့​သလဲ။ (ခ) စီးပွားရေး​ကျပ်တည်းတဲ့ အခု​ချိန်မှာလည်း ရု​သရဲ့ စံနမူနာ​က ဘယ်လို ကူညီ​ပေးနိုင်​သလဲ။

^၃ အဲဒီလို ကြင်နာတတ်သူ တစ်ယောက်ကတော့ သူ ကောက်သင်း​ကော​က်​ခဲ့​တဲ့ လယ်​ပိုင်ရှင် ဗောဇ​ပဲ။ ဒီ​က​နေ့ သူဌေးကြီး ဗောဇ​က အဖေ​တစ်ယောက်လို သူ့ကို ဂရုစိုက်တာ၊ ယောက္ခမ နောမိ​ကို ကြည့်ရှု​စောင့်ရှောက်​တာ၊ စစ်မှန်တဲ့ ဘုရားသခင် ယေဟောဝါကို ခိုလှုံ​ဖို့ ရွေးချယ်တာ​တွေ​နဲ့ ပတ်သက်ပြီး ချီးကျူး​စကား ပြောတာတွေကို ပြန်​စဉ်းစား​တဲ့အခါ ရုသ ပြုံး​မိတယ်။—ရုသ ၂:၁၁-၁၄ ကိုဖတ်ပါ။

^၄ ဒါပေမဲ့ ရုသဟာ သူ့​ရှေ့ရေး​ကို တွေး​နေမှာ​ပဲ။ ရေ​ခြား​မြေ​ခြား​ကနေ ရောက်လာပြီး ဆင်းရဲနွမ်းပါး​တဲ့ မုဆိုးမ​တွေ​အနေနဲ့ လာမယ့်​နှစ်တွေမှာ သူတို့​နှစ်ယောက် ဘယ်လို စခန်းသွား​ ရ​ပါ့​မလဲ။ ကောက်သင်း​ကော​က်​ရုံ​နဲ့ ရပ်တည်​နိုင်​ပါ့မလား။ ပြီးတော့ သူ အသက်ကြီး​လာတဲ့အခါ ဘယ်သူက ကြည့်ရှု​စောင့်ရှောက်​မလဲ။ ရုသ အဲဒီလို စိုးရိမ်​ပူပန်​မိ​နိုင်တယ်။ စီးပွားရေး ကျပ်တည်းတဲ့ အခု​ချိန်မှာလည်း လူ​အတော်များများဟာ အဲဒီလိုပဲ စိုးရိမ်​ပူပန်​တတ်ကြတယ်။ ရု​သရဲ့ ယုံကြည်ခြင်းက အခက်အခဲ​တွေ ခံရပ်​နိုင်အောင် သူ့ကို ဘယ်လို ကူညီ​ပေးခဲ့တယ်​ဆိုတာ လေ့လာ​ကြည့်တဲ့အခါ အတုယူ​စရာတွေ တွေ့​ရပါမယ်။

၅၊ ၆။ (က) ဗောဇ​ရဲ့ လယ်ထဲ ကောက်သင်း​ကော​က်​တဲ့ ပထမ​နေ့မှာ ရုသ ဘယ်လောက် စုသိမ်း​နိုင်​ခဲ့သလဲ။ (ခ) ရုသ​ကို မြင်တဲ့အခါ နောမိ ဘယ်လို တုံ့ပြန်​ခဲ့သလဲ။

^၅ မုယော​စပါး​တွေကို ရိုက်​ခြွေ​ပြီး​လို့ စုသိမ်း​လိုက်တဲ့အခါ တစ်​ဧဖာ​လောက် (မြန်မာ​အချိန်​အ​တွယ်​အရ ကိုး​ပြည်​လောက်) ရတာကို ရုသ တွေ့​လိုက်တယ်။ အဲဒါက ပေါင် ၃၀ လောက်​ရှိတယ်။ အဲဒါကို အဝတ်​နဲ့​ထုပ်၊ ခေါင်း​ပေါ်​ရွက်​ပြီး နေဝင်ချိန်​လောက်​မှာ ဘက်သလီဟင်​မြို့ကို ပြန်သွားတယ်။—ရု. ၂:၁၇။

^၆ ချွေးမ​လေး ပြန်ရောက်​လာတာကို တွေ့​တော့ နောမိ သိပ်​ဝမ်းသာ​သွားတယ်။ ရုသ ရွက်​လာတဲ့ မုယော​စပါး​ထုပ်​ကြီး​ကို နောမိ​တွေ့​တဲ့အခါ အံ့သြ​သွားမှာပဲ။ အလုပ်သမားတွေကို ဗောဇ​ကျွေး​တဲ့ နေ့လယ်​စာ​ထဲ​က အစားအစာ တချို့​ကိုလည်း အိမ်ပြန်​ယူလာ​လို့ သမီး​ယောက္ခမ​ နှစ်ယောက် အတူတူ မျှ​စား​ကြတယ်။ နောမိ​က “ဒီနေ့၊ ဘယ်မှာ ကောက်သင်း​ကော​က်​တာလဲ။ ဘယ်မှာ အလုပ်လုပ်​ခဲ့သလဲ။ သမီးကို ဂရုစိုက်​တဲ့​သူ ကောင်းချီး​ခံစားရ​ပါစေ” လို့​ပြောတယ်။ (ရု. ၂:၁၉) တစ်ယောက်ယောက်​က သူ့​ချွေးမ​လေး​ကို သတိပြုမိ​ပြီး ကရုဏာ ပြ​လိုက်တယ်​ဆိုတာ ယူလာ​တဲ့ အထုပ်​ကို ကြည့်တာ​နဲ့ နောမိ သိလိုက်တယ်။

၇၊ ၈။ (က) ဗောဇ​ပြ​တဲ့ ကြင်နာမှု​က ဘယ်သူ့​ဆီကလာ​မှန်း နောမိ သိနေ​သလဲ။ ဘာကြောင့်လဲ။ (ခ) ရုသဟာ ယောက္ခမ​အပေါ် ခိုင်မြဲ​တဲ့ မေတ္တာ​ရှိကြောင်း ဘယ်လို ထပ်​ဖော်ပြခဲ့သလဲ။

^၇ သမီး​ယောက္ခမ​နှစ်ယောက် စကားစမြည်​ပြော​ရင်း ရုသ​က သူ့ကို ဗောဇ ကြင်ကြင်နာနာ ဆက်ဆံ​ခဲ့​တဲ့​အကြောင်း နောမိ​ကို ပြော​ပြတယ်။ အဲဒီအခါ နောမိ စိတ်လှုပ်ရှား​သွားပြီး ဒီလို​ပြောတယ်– “အသက်ရှင်​သူ၊ သေလွန်သူတွေကို ခိုင်မြဲ​တဲ့ မေတ္တာ​ပြဖို့ မပျက်ကွက်​တဲ့ ယေဟောဝါ​ဘုရားက သူ့ကို ကောင်းချီး​ပေးပါစေ။” (ရု. ၂:၂၀) ယေဟောဝါ​ဘုရားက ဗောဇ​ကနေ​တစ်ဆင့် ကြင်နာမှု ပြ​နေတယ်​ဆိုတာ နောမိ သိမြင်​လိုက်တယ်။ ဘုရားသခင်ဟာ ရက်ရက်ရောရော ပေးကမ်း​ဖို့ သူ့ရဲ့​ဝတ်ပြု​သူတွေကို လှုံ့ဆော်ပေး​ပြီး သူတို့​ပြ​တဲ့ ကြင်နာမှု​ကို ဆု​ချမယ်​လို့ ကတိ​ပေးထားတယ်။ *—ပညာအလိမ္မာ ၁၉:၁၇ ကိုဖတ်ပါ။

^၈ ဗောဇ​မှာ​တဲ့​အတိုင်း သူ့​လယ်​မှာ​ပဲ ဆ​က်​ကောက်သင်း​ကောက်ဖို့၊ ကော​က်​ရိတ်​သူတွေ နှောင့်ယှက်​တာ မခံရအောင် အလုပ်​သ​မ​တွေ အနားမှာ​ပဲ နေဖို့ ရုသ​ကို နောမိ အကြံ​ပေးတယ်။  ရုသလည်း အကြံပေး​တဲ့​အတိုင်း လုပ်တယ်။ “ယောက္ခမနဲ့​အတူ ဆက်နေ​ထိုင်တယ်။” (ရု. ၂:၂၂၊ ၂၃) အဲဒီ​စကား​အရ ရုသ​ဆီမှာ အရည်အသွေးကောင်း​ဖြစ်တဲ့ ခိုင်မြဲ​တဲ့​မေတ္တာ​ရှိ​မှန်း ထပ်​သိရတယ်။ ကျွန်တော်တို့ တစ်ဦးချင်း​စီ​လ​ည်း မိသားစု​လိုအပ်ရာတွေကို သစ္စာရှိ​ရှိ ထောက်ပံ့​ကူညီ​ပေးနေ​သလား​လို့ ကိုယ့်ကိုယ်ကိုယ် မေး​ဖို့ ရု​သရဲ့ စံနမူနာ​က လှုံ့ဆော်ပေး​နိုင်ပါတယ်။ အဲဒီလို ခိုင်မြဲ​တဲ့ မေတ္တာပြ​တဲ့​သူတွေကို ယေဟောဝါ​ဘုရား အမြဲ သတိပြု​တ​ယ်။

၉။ မိသားစု​အကြောင်း ရုသ​နဲ့ နောမိ​ဆီကနေ ဘာသိ​နိုင်သလဲ။

^၉ နောမိ​နဲ့ ရုသ​ကို မိသားစု​လို့ ခေါ်​နိုင်မလား။ မိသားစု​ဆိုရင် ခင်ပွန်း၊ ဇနီး၊ သားသမီး၊ အဘိုး၊ အဘွား စ​သဖြင့် ရှိရမယ်​လို့ တချို့က ယူဆတယ်။ ဒါပေမဲ့ မိသားစု​ထဲမှာ တစ်ယောက်​နှစ်ယောက်​ပဲ ရှိပါစေ ယေဟောဝါ​ဘုရားကို ဝတ်ပြု​ကိုးကွယ်​သူတွေဟာ တစ်ယောက်ကို​တစ်ယောက် နွေးထွေးမှု၊ ကြင်နာမှု၊ မေတ္တာ ပြ​နိုင်တယ်ဆိုတာ နောမိ​နဲ့ ရုသ​တို့ရဲ့ ပုံနမူနာ​က သင်ပေးတယ်။ ကိုယ့်​မိသားစုကို တန်ဖိုးထား​ပါသလား။ မိသားစု မရှိသူတွေ​အတွက်​တောင် ခရစ်ယာန်​အသင်းတော်ဟာ မိသားစု ဖြစ်လာနိုင်တယ်​လို့ တပည့်​တွေကို ယေရှု ပြောခဲ့တယ်။—မာ. ၁၀:၂၉၊ ၃၀။

၁၀။ နောမိ​က ရုသ​ကို ဘယ်လို ကူညီ​ပေးချင်​သလဲ။

^၁၀ မုယော​စပါး ရိတ်သိမ်းချိန်​ဖြစ်တဲ့ ဧပြီလ​က​စပြီး ဂျုံ​ရိတ်သိမ်းချိန်​ဖြစ်တဲ့ ဇွန်​လ​အထိ ရုသ​ဟာ ဗောဇ​ရဲ့ လယ်ကွက်​တွေ​ထဲမှာ​ပဲ ဆက်ပြီး ကောက်သင်း​ကော​က်​တ​ယ်။ တစ်ပတ်​ပြီး​တစ်ပတ် ကုန်​သွားတာ​နဲ့​အမျှ နောမိ​ဟာ ချစ်​ရတဲ့ ချွေးမ​လေး​အတွက် ဘာလုပ်​ပေးရင် ကောင်းမလဲ​လို့ စဉ်းစား​နေမှာ​ပဲ။ မောဘ​ပြည်မှာ​ရှိတုန်းက ရုသ​ကို နောက်​အိမ်ထောင် ချပေး​နိုင်​တော့​မှာ မဟုတ်ဘူးလို့ နောမိ ထင်​ခဲ့​တာ။ (ရု. ၁:၁၁-၁၃) အခုတော့ ရုသ​ကို အိမ်ထောင်ချ​ပေးဖို့ စဉ်းစား​နေပြီ။ ဒါနဲ့ ရုသ​ကို နောမိ ဒီလို​ပြောတယ်– “ငါ့​သမီး ကောင်းစား​ဖို့ နားခို​စ​ရာ​အိမ်ကို အမေ ရှာပေး​ရမှာ​ပေါ့။” (ရု. ၃:၁) အဲဒီခေတ်​က မိဘတွေဟာ သားသမီးတွေ​အတွက် အိမ်ထောင်ဖက် ရှာပေး​ရတဲ့ ထုံးစံ​ရှိတယ်။ ရုသဟာ နောမိ​အတွက် သမီးအရင်း​လို ဖြစ်နေ​တော့ သူ့​အတွက် “နားခို​စ​ရာ​အိမ်” ရှာပေး​ချင်တယ်။ ဆိုလိုတာ​က ခင်ပွန်း​တစ်​ဦးရဲ့ အရိပ်​အောက်မှာ လုံလုံခြုံခြုံ ရှိစေချင်တယ်။ ဒါပေမဲ့ နောမိ ဘာလုပ်​ပေးနိုင်​မလဲ။

၁၁၊ ၁၂။ (က) နောမိ​က ဗောဇ​ကို “ပြန်​ဝယ်​ခွင့်​ရှိသူ” လို့ ပြောတဲ့အခါ ဘုရားသခင်ရဲ့ မေတ္တာပါ ဘယ်ပညတ်ကို သူ ရည်ညွှန်း​နေတာလဲ။ (ခ) ယောက္ခမ အကြံ​ပေးတာကို ရုသ ဘယ်လို တုံ့ပြန်​ခဲ့သလဲ။

^၁၁ ဗောဇ​အကြောင်း ရုသ စပြော​ပြ​တုန်း​က “သူဟာ ငါ​တို့​အမျိုး​ပဲ။ ငါတို့ကို ပြန်​ဝယ်​ခွင့်​ရှိသူ တစ်ယောက်ပဲ” လို့ နောမိ ပြောခဲ့တယ်။ (ရု. ၂:၂၀) ဘာကို​ဆိုလို​တာလဲ။ အစ္စရေး​လူတွေကို ပေးတဲ့ ဘုရား​ပညတ်​မှာ ဆင်းရဲ​လို့ ဒါမှမဟုတ် ယောက်ျား​သေဆုံးသွားလို့ အခက်အခဲ ကြုံတွေ့​နေရတဲ့ မိသားစု​တွေ​အတွက် မေတ္တာ​ပါတဲ့ အစီအစဉ်တွေ ရှိတယ်။ အမျိုးသမီး​တစ်ယောက်ဟာ  သားသမီး​မရှိဘဲ မုဆိုးမ​ဖြစ်သွား​ရင် ခင်ပွန်းရဲ့ နာမည်​နဲ့ မျိုးရိုး​ကို ဆက်ခံ​မယ့်​မျိုးဆက် ပြတ်သွားမှာ​ဖြစ်လို့ သူဟာ ယူကျုံး​မရ ဖြစ်နိုင်တယ်။ ဒါပေမဲ့ သေလွန်သူ ခင်ပွန်းသည်ရဲ့ နာမည်ကို ဆက်ခံ​ပြီး မိသားစု​ပိုင်ဆိုင်ရာတွေ​ကို ထိန်းသိမ်း​မ​ယ့်​သား​ရဖို့ ဘုရား​ပညတ်​က အဲဒီ​မုဆိုးမ​ကို ခင်ပွန်းသည်ရဲ့ ညီ ဒါမှမဟုတ် အစ်ကို​နဲ့ အိမ်ထောင်ပြု​ခွင့် ပေးထား​ပါတယ်။ *—တရား. ၂၅:၅-၇။

^၁၂ နောမိ အစီအစဉ်​ဆွဲ​နေပြီ။ ယောက္ခမ​ရဲ့​စကားကို ရုသ တအံ့တသြ နားထောင်​နေတာကို မြင်ယောင်​ကြည့်ပါ။ အစ္စရေး​လူမျိုးရဲ့ ပညတ်​နဲ့ ဓလေ့​ထုံးစံတွေ​က ရုသ​အတွက် အသစ်အဆန်း ဖြစ်​နေတုန်းပဲ။ ဒါပေမဲ့ ရုသဟာ နောမိ​ကို လေးစားတဲ့​အတွက် သူ့ရဲ့​စကားကို တစ်ခွန်း​မကျန် ဂရုတစိုက် နားထောင်​နေတယ်။ နောမိ​ရဲ့ အကြံပေး​ချက်​တွေ​က သူ့​အတွက် အဆင်ပြေမယ့်​ပုံ မ​ပေါ်​ဘဲ စိတ်​ကသိကအောက် ဖြစ်စရာ၊ ရှက်​စ​ရာ​တောင် ဖြစ်နေ​နိုင်တယ်။ ဒါပေမဲ့ ရုသ သဘောတူ​လိုက်ပြီး “အမေ​မှာ​တဲ့​အတိုင်း လုပ်ပါ့မယ်” လို့ နှိမ့်ချ​စွာ ပြောတယ်။—ရု. ၃:၅။

၁၃။ လူကြီးတွေ အကြံ​ပေးတာကို လက်ခံ​တဲ့ ရုသ​ဆီကနေ ဘာသင်ခန်းစာ ရနိုင်သလဲ။ (ယောဘ ၁၂:၁၂ ကိုလည်း​ကြည့်ပါ။)

^၁၃ တစ်ခါတလေ လူငယ်တွေဟာ ကိုယ့်ထက်​အသက်ကြီး​ပြီး အတွေ့အကြုံ​ရှိသူတွေရဲ့ အကြံပေး​ချက်​တွေကို လိုက်နာ​ရ​ခက်တယ်။ သူတို့​ရင်ဆိုင်​နေရတဲ့ အခက်အခဲတွေကို လူကြီးတွေ နားမလည်​ပေး​ဘူးလို့ အလွယ်တကူ ယူဆ​မိ​နိုင်တယ်။ တကယ်တော့ ကျွန်တော်တို့ကို​ချစ်​ပြီး ကောင်းစား​စေချင်တဲ့ လူကြီးတွေရဲ့​ပညာရှိ အကြံပေး​ချက်​တွေကို နားထောင်တာက အကျိုး​အများကြီး ရှိတယ်ဆိုတာ ရု​သရဲ့ နှိမ့်ချမှု​ရှိတဲ့ စံနမူနာ​ကနေ သိရ​ပါတယ်။ (ဆာလံ ၇၁: ၁၇၊ ၁၈ ကိုဖတ်ပါ။) နောမိ ဘယ်လို အကြံပေး​ခဲ့သလဲ။ အကြံပေး​တဲ့​အတိုင်း ရုသ လုပ်လို့ တကယ် အကျိုး​ရခဲ့​သလား။

၁၄။ စပါး​နယ်​တဲ့ တ​လင်း​ဆိုတာ ဘယ်လို​နေရာ​မျိုး​လဲ။ အဲဒီမှာ ဘာ​လုပ်ကြ​သလဲ။

^၁၄ အဲဒီ​ညနေခင်း​မှာ ရုသဟာ စပါး​နယ်​တဲ့ တ​လင်း​ကို ထွက်​သွားတယ်။ လယ်သမား​အတော်များများဟာ အဲဒီ​နေရာမှာ စပါး​နယ်၊ စပါးလှေ့​ကြတယ်။ ညနေစောင်း လေ​တိုက်​တဲ့ တောင်စောင်း ဒါမှမဟုတ် တောင်ထိပ်​တွေ​မှာ စပါး​နယ်​တဲ့ တ​လင်း​တွေ ရှိတတ်တယ်။ အလုပ်သမားတွေ​က နင်းနယ်​ထားတဲ့ စပါး​တွေကို ကော​က်ဆွ​နဲ့ လေ​ထဲ မြှောက်​ပစ်လိုက်​တဲ့အခါ အဖျင်း​တွေ​က လေ​ထဲ လွင့်ပါသွား​ပြီး အ​ဆန်​အောင်​တဲ့ စပါး​တွေ​က တ​လင်း​ပေါ် ပြန်​ကျ​လာတယ်။

၁၅၊ ၁၆။ (က) ညနေခင်း အလုပ်​သိမ်း​ချိန်မှာ ဗောဇ ဘာတွေ​လုပ်သလဲ။ (ခ) ခြေရင်းမှာ ရုသ အိပ်​နေတာကို ဗောဇ ဘယ်လို သိသွား​သလဲ။

^၁၅ ရုသဟာ ညနေပိုင်း အလုပ်​သိမ်း​ချိန်​ကို သတိရှိရှိ စောင့်ကြည့်​နေတယ်။ ဗောဇ​က စပါးလှေ့​တာ​ကို တစ်​နေ​ကုန် ကြီးကြပ်​ခဲ့​တ​ယ်။ ညနေပိုင်း​မှာ စပါး​တွေ အပုံလိုက် ရှိနေပြီ။ အခု ဗောဇ​ဟာ ညစာ​ကို မြိ​န်​ရေ​ရှက်​ရေ စား​ပြီးတဲ့နောက် စပါး​ပုံ​အနားမှာ လှဲချ​လိုက်တယ်။ သူခိုး​တွေ၊ လုယက်​သူတွေ​ကြောင့် ပိုင်ရှင်​တွေဟာ စပါး​ပုံ​နား​မှာ စောင့်​အိပ်​တတ်တယ်။ ဗောဇ အိပ်​တော့​မ​ယ်​ဆိုတာ ရုသ တွေ့​လိုက်တယ်။ နောမိ​ပေးတဲ့ အကြံ​ကို အကောင်အထည်ဖော်​ဖို့​အချိန် ရောက်လာ​ပါတော့မယ်။

^၁၆ ရုသဟာ ရင်တထိတ်ထိတ်​နဲ့ ဗောဇ အိပ်​နေတဲ့​အနား ချဉ်းကပ်​သွားတယ်။ ဗောဇ အိပ်မောကျ​သွားတဲ့အခါ နောမိ​ပြောတဲ့​အတိုင်း ရုသ လုပ်ပါ​တော့​တ​ယ်။ သူ့​ခြေရင်းနား​သွား၊ စောင်​ကို မ,လိုက်ပြီး အသာလေး လှဲ​အိပ်​လိုက်တယ်။ အဲဒီနောက် အခြေအနေကို  စောင့်ကြည့်​နေတယ်။ အချိန် တရွေ့ရွေ့ ကုန်​လာပေမဲ့ ရုသ​အတွက်​ကတော့ ည​တာ​ရှည်​လွန်း​နေတယ်။ ညသန်းခေါင်​လောက်​ကျတော့ ဗောဇ နိုး​လာတယ်။ ချမ်း​လို့ စောင်​ကို လှမ်းဆွဲ​လိုက်တော့ သူ့ခြေရင်းမှာ လူတစ်ယောက် ရှိနေတာကို သိ​သွားတယ်။ မှတ်တမ်းအရ “အမျိုးသမီး​တစ်ယောက် လှဲ​အိပ်​နေတာကို တွေ့​လိုက်ရတယ်။”—ရု. ၃:၈။

၁၇။ ရု​သရဲ့​လုပ်ရပ်​က မသင့်တော်ဘူးလို့ ပြောတဲ့​သူတွေဟာ ဘယ်အချက်​နှစ်ချက်​ကို လျစ်လျူရှု​နေသလဲ။

^၁၇ “မင်း​ဘယ်သူ​လဲ” လို့ ဗောဇ မေးတော့ ရုသ​က အသံ​တုန်တုန်ယင်ယင်​နဲ့ “သခင်ရဲ့​ကျွန်မ ရုသ​ပါ။ သခင်ဟာ ပြန်​ဝယ်​ခွင့်​ရှိသူ ဖြစ်တဲ့အတွက် ကျွန်မကို ကာကွယ်​စောင့်ရှောက်​ပေးပါ” လို့ ပြန်​ဖြေတယ်။ (ရု. ၃:၉) ရု​သရဲ့ လုပ်ရပ်​နဲ့ စကားတွေက အကျင့်​ယိုယွင်း​လို​တဲ့ သဘော​ရှိနေတယ်​လို့ ခေတ်​သစ် ကျမ်းစာ​အနက်ဖွင့်သူ​တချို့ ယူဆကြတယ်။ အဲဒီလို ယူဆ​သူတွေဟာ ရိုးရှင်းတဲ့ အချက်​နှစ်ချက်​ကို လျစ်လျူရှု​ထား​ကြတယ်။ ပထမ​တစ်ချက်​က၊ ရုသဟာ အဲဒီ​ခေတ်အခါ​က ဓလေ့​ထုံးစံတွေ​အတိုင်း ပြုမူ​နေတာ​ဖြစ်တယ်။ အဲဒီ​ဓလေ့​ထုံးစံ အတော်များများကို ဒီနေ့​ခေတ်​လူတွေ မသိကြ​တော့​ပါဘူး။ ဒါကြောင့် ရု​သရဲ့ လုပ်ရပ်တွေကို ဒီနေ့​ခေတ်ရဲ့ ကျဆင်း​နေတဲ့ ကိုယ်ကျင့်တရား​စံနှုန်းတွေနဲ့ နှိုင်းယှဉ်​မ​ယ်​ဆိုရင် မှားသွား​ပါလိမ့်မယ်။ ဒုတိယ​အချက်ကတော့၊ ရု​သရဲ့​လုပ်ရပ်​က စင်ကြယ်​ပြီး ချီးမွမ်းထိုက်​တာ​ကို ဗောဇ သိ​မြင်တယ်​ဆိုတာ သူ့ရဲ့​တုံ့ပြန်ပုံ​က ဖော်ပြတယ်။

၁၈။ ရုသ​ကို နှစ်သိမ့်​ပေးဖို့ ဗောဇ ဘာတွေ​ပြောခဲ့​သလဲ။ ရု​သရဲ့ ခိုင်မြဲ​တဲ့​မေတ္တာနဲ့ ပတ်သက်ပြီး ဘယ်လုပ်ရပ်​နှစ်ခု​ကို ဗောဇ ရည်ညွှန်း​သလဲ။

^၁၈ ဗောဇ​ဟာ ရုသ​ကို နူးညံ့​ညင်သာ​တဲ့ လေသံနဲ့ “ငါ့သမီး၊ မင်းကို ယေဟောဝါ​ဘုရား ကောင်းချီး​ပေးပါစေ။ မင်း​က ဆင်းရဲတဲ့​လူငယ်၊ ချမ်းသာတဲ့ လူရွယ်​ကို မ​ရှာ​ဘူး။ ဒီနည်းနဲ့​ပြ​တဲ့ ခိုင်မြဲ​တဲ့​မေတ္တာဟာ အရင်က​ပြခဲ့တဲ့ မေတ္တာ​ထက် သာ​တ​ယ်” လို့​ပြောပြီး နှစ်သိမ့်​ပေးတယ်။ (ရု. ၃:၁၀) “အရင်က​ပြခဲ့တဲ့​မေတ္တာ” ဆိုတာ နောမိ​နဲ့​အတူ အစ္စရေး​ပြည်​ကို လိုက်​လာပြီး သူ့ကို ကြည့်ရှု​စောင့်ရှောက်​ပေးတဲ့ ရု​သရဲ့ ခိုင်မြဲ​တဲ့​မေတ္တာကို ရည်ညွှန်းတယ်။ “ဒီ​နည်းနဲ့​ပြ​တဲ့ ခိုင်မြဲ​တဲ့​မေတ္တာ” ဆိုတာက​တော့ ရုသ လက်ရှိ​ပြ​တဲ့ မေတ္တာကို ဆိုလိုတယ်။ ရုသ​လို အမျိုးသမီးငယ်​တစ်ယောက်ဟာ သက်တူရွယ်တူ​တွေ​ထဲ​က ဆင်းရဲသား​ဖြစ်ဖြစ်၊ ချမ်းသာတဲ့​သူ​ဖြစ်ဖြစ် တစ်ယောက်ယောက်ကို အလွယ်တကူ လက်ထပ်​နိုင်တယ်ဆိုတာ ဗောဇ အသိအမှတ်ပြု​တ​ယ်။ အဲဒီအစား ရုသ​က နောမိ​ကို​သာမက နောမိ​ရဲ့ ကွယ်လွန်သူ ခင်ပွန်းသည်ရဲ့ နာမည်ကို​ပါ ဆက်ခံ​နိုင်ဖို့ ကူညီ​ပေးချင်တယ်။ ရု​သရဲ့ ကိုယ်ကျိုးစွန့်​စိတ်ဓာတ်​ကို ဗောဇ ဘာကြောင့် အထင်ကြီး​သွားတယ်​ဆိုတာ နားလည်​ရ မ​ခက်​ပါဘူး။

၁၉၊ ၂၀။ (က) ဗောဇ​က ရုသ​ကို ဘာကြောင့် ချက်ချင်း လက်မ​ထပ်​တာလဲ။ (ခ) ရုသ​ကို သနား​ကြင်နာကြောင်း၊ သူရဲ့ ဂုဏ်​သိက္ခာ​ကို ထောက်ထား​ပေး​ကြောင်း ဗောဇ ဘယ်လို​ပြခဲ့သလဲ။

^၁၉ ဗောဇ ဒီလို ဆက်ပြောတယ်– “ဒီတော့ မစိုးရိမ်ပါနဲ့ ငါ့​သမီး။ မင်း​ပြောတဲ့​အတိုင်း ငါ​လုပ်ပေးမယ်။ မင်းဟာ မွန်မြတ်တဲ့ အမျိုးသမီး​ဆိုတာ တစ်မြို့လုံး သိပါတယ်။” (ရု. ၃:၁၁)  ရုသ​ကို လက်ထပ်​ယူရ​တော့​မှာ​ကို ဗောဇ ဝမ်းသာ​နေတယ်။ ပြန်​ဝယ်​ခွင့်​ရှိသူ​အဖြစ် လုပ်ဆောင်ဖို့ ရုသ​တောင်းဆိုတာ​ကို ဗောဇ အံ့သြ​ပုံ​မရဘူး။ ဒါပေမဲ့ ဗောဇ​ဟာ ဖြောင့်မတ်သူ​ဖြစ်လို့ သူ့​သဘော​အတိုင်း လုပ်မှာ မဟုတ်ဘူး။ နောမိ​ရဲ့ ကွယ်လွန်သူ ခင်ပွန်းသည်ရဲ့ ဆွေမျိုးသားချင်း​တွေ​ထဲမှာ သူ့​ထက် အမျိုး​ပို​နီးစပ်​တဲ့ ပြန်​ဝယ်​ခွင့်​ရှိသူ​တစ်ယောက် ရှိသေးတယ်​လို့ ရုသ​ကို ဗောဇ​ပြော​ပြတယ်။ ဒီတော့ အဲဒီ​အမျိုးသား​ဆီ အရင်ဆုံး သွားပြီး ရု​သရဲ့ ခင်ပွန်း​ဖြစ်ဖို့ ကမ်းလှမ်း​မယ်​လို့ ပြောတယ်။

^၂၀ ဒီ​နောက် ဗောဇ​က ရုသ​ကို မိုး​မ​လင်း​ခင်​အထိ ဆ​က်​အိပ်​ခိုင်း​ပြီး လူတွေ သတိ​မထား​မိနိုင်​လောက်​တဲ့ အချိန်မှာ ပြန်​ခိုင်း​လိုက်တယ်။ သူတို့​နှစ်ယောက် ဖောက်ပြန်​နေကြပြီ​လို့ တခြား​သူတွေ ထင်​သွား​နိုင်တာ​ကြောင့် ဗောဇ​က နှစ်ယောက်စလုံးရဲ့ ဂုဏ်​သိက္ခာ​ကို ကာကွယ်​နေတာ ဖြစ်တယ်။ သူ့ရဲ့ အသနားခံချက်​ကို လိုက်လျော​ပေးမယ်လို့ ဗောဇ ပြော​ပြီးတဲ့နောက် ရုသဟာ စိတ်သက်သာရာ ရသွား​ပြီး ဗောဇ​ရဲ့ ခြေရင်းမှာ ပြန်​အိပ်​လိုက်တယ်။ မိုး​မ​လင်း​ခင် မှောင်​နေတုန်းမှာ​ပဲ ရုသ ထတဲ့အခါ ဗောဇ​က ခြုံထည်​ထဲမှာ မုယော​စပါး​တွေ အများကြီး ထည့်ပေး​လိုက်တယ်။ အဲဒီနောက် ရုသလည်း ဘက်သလီဟင်​မြို့ထဲ ဝင်​သွားတယ်။—ရုသ ၃:၁၃-၁၅ ကိုဖတ်ပါ။

၂၁။ ဘယ်အချက်တွေ​ကြောင့် “မွန်မြတ်တဲ့ အမျိုးသမီး” ဆိုတဲ့ နာမည်ကောင်း​ကို ရုသ​ပိုင်ဆိုင်ခဲ့​တာလဲ။ သူ့ကို ဘယ်လို အတုယူ​နိုင်မလဲ။

^၂၁ ရုသဟာ အစ္စရေး​လူတွေ ကြားမှာ “မွန်မြတ်တဲ့ အမျိုးသမီး” ဆိုပြီး နာမည်ကြီး​နေတယ်လို့ ဗောဇ ပြောပြ​တာ​ကို ရုသ ပြန်​စဉ်းစား​ရင်း သိပ်​ကို ပီတိဖြစ်​နေမှာ​ပဲ။ အဲဒီလို နာမည်ကောင်း​ရတာက ယေဟောဝါ​ဘုရားကို သိကျွမ်း​ပြီး ဝတ်ပြု​ကိုးကွယ်​ချင်စိတ် ထက်သန်​ခဲ့​တာနဲ့ အများကြီး သက်ဆိုင်​မှာ​ပဲ။ ဒါ့အပြင် သူဟာ နောမိ​နဲ့ သူ့​လူမျိုးအပေါ် သိပ်​ကြင်နာ​ပြီး စာနာခဲ့​ရုံ​မ​က အစိမ်း​သက်​သက်​ဖြစ်နေတဲ့ ဓလေ့​ထုံးစံတွေ​အတိုင်း နေထိုင်ဖို့ တလိုတလား​ရှိခဲ့လို့​လ​ည်း ဖြစ်မယ်။ ရု​သရဲ့ ယုံကြည်ခြင်းကို အတုယူ​ချင်​ရင် တခြား​သူတွေနဲ့ သူတို့ရဲ့ ဓလေ့ထုံးစံတွေကို လေးစား​ရမယ်။ အဲဒီလို လုပ်မယ်ဆိုရင် ကျွန်တော်တို့လည်း နာမည်ကောင်း ရလာမယ်။

၂၂၊ ၂၃။ (က) ရုသ​ကို ဗောဇ​ပေးလိုက်တဲ့ လက်ဆောင်​မှာ ဘာ​အဓိပ္ပာယ် ရှိ​နိုင်သလဲ။ (အောက်ခြေ​မှတ်ချက်​ကိုလည်း ကြည့်ပါ။) (ခ) နောမိ​က ရုသ​ကို ဘယ်လို အကြံပေး​သလဲ။

^၂၂ ရုသ အိမ်​ပြန်​ရောက်တော့ နောမိ​က “ငါ့​သမီး၊ အဆင်ပြေ​ရဲ့​လား” လို့​မေးတယ်။ ရုသ နောက်​အိမ်ထောင်ပြု​ဖို့ အလားအလာ​ရှိ၊ မရှိ​ဆိုတာ နောမိ သိချင်​လို့​မေး​တာ ဖြစ်နိုင်တယ်။ အဲဒီအခါ ရုသ​က ချက်ချင်းပဲ ယောက္ခမ​ကို အဖြစ်အပျက်​အားလုံး ပြောပြ​လိုက်တယ်။ နောမိ​အတွက် ဗောဇ ပေးလိုက်တဲ့ မုယော​စပါး​တွေ​ကိုလည်း ပြတယ်။ *—ရု. ၃:၁၆၊ ၁၇။

 ^၂၃ အဲဒီနောက် နောမိ​က ရုသ​ကို ဒီနေ့ ကောက်သင်း သွား​မ​ကော​က်​ဘဲ အိမ်မှာ အေးအေးဆေးဆေး စောင့်နေဖို့ အကြံ​ပေးတယ်။ “ဒီနေ့ ဒီ​ကိစ္စ​မပြီးပြတ်​မချင်း ဗောဇ အေးအေးဆေးဆေး နေမှာ​မဟုတ်ဘူး” လို့​လ​ည်း ဆက်ပြောတယ်။—ရု. ၃:၁၈။

၂၄၊ ၂၅။ (က) ဗောဇ​ဟာ ဖြောင့်မတ်​ပြီး တစ်ကိုယ်​ကောင်း​မ​ဆန်​သူ​ဖြစ်ကြောင်း ဘယ်လို ဖော်ပြခဲ့သလဲ။ (ခ) ရုသဟာ ဘယ်လိုနည်းနဲ့ ကောင်းချီး​ရခဲ့​သလဲ။

^၂၄ နောမိ​ပြောတာ မှန်တယ်။ ဗောဇ​ဟာ အသက်ကြီး​သူတွေ စုဆုံ​တတ်တဲ့ မြို့တံခါး​ကို​သွားပြီး သူ့​ထက် အမျိုး​ပို​နီးစပ်​တဲ့​သူ ဖြတ်သွား​တာ​ကို စောင့်နေတယ်။ ဒီ​နောက် ဗောဇဟာ သက်သေ​တွေ​ရှေ့မှာပဲ အဲဒီ​လူကို ပြန်​ဝယ်​ခွင့်​ရှိသူ​အဖြစ် ရုသ​ကို လက်ထပ်​ယူဖို့ ကမ်းလှမ်း​လိုက်တယ်။ ဒါပေမဲ့ အဲဒီ​လူက သူ့ရဲ့​အမွေမြေ ဆုံးရှုံးသွား​မှာ​စိုးလို့ မဝယ်​တော့​ဘူးလို့ ငြင်း​လိုက်တယ်။ ဒီ​အခါ ဗောဇ​က မြို့တံခါး​မှာ​ရှိတဲ့ သက်သေ​တွေ​ရှေ့မှာ ပြန်​ဝယ်​ခွင့်​ရှိသူ​အဖြစ် နောမိရဲ့ ကွယ်လွန်သူ ခင်ပွန်းသည် ဧလိမလက် ပိုင်ဆိုင်ရာတွေ​ကို ဝယ်ယူ​မ​ယ်၊ ဧလိမလက်​ရဲ့​သား မဟာ​လု​န်ရဲ့ ကျန်ရစ်သူ မုဆိုးမ​လေး ရုသ​ကို လက်ထပ်​မ​ယ်​ဆိုပြီး ပြော​လိုက်တယ်။ အဲဒီ​လိုလုပ်တာက “ကွယ်လွန်​သူရဲ့ အမွေမြေ​ကို သူ့​နာမည်​နဲ့ ဆက်ရှိ​စေဖို့” ဖြစ်တယ်လို့ ဗောဇ​ပြောတယ်။ (ရု. ၄:၁-၁၀) ဗောဇ​ဟာ တကယ်ပဲ ဖြောင့်မတ်​ပြီး တစ်ကိုယ်​ကောင်း​မ​ဆန်​သူ ဖြစ်တယ်။

^၂၅ ဗောဇ​နဲ့ ရုသ​တို့ လက်ထပ်​လိုက်ကြတယ်။ အဲဒီနောက် ကျမ်းစာမှာ ဒီလို ဖတ်​ရတယ်– “ယေဟောဝါရဲ့ ကောင်းချီး​ကြောင့် ရုသ ကိုယ်ဝန်ရ​ပြီး သားလေး​မွေးလာတယ်။” အဲဒီအခါ ဘက်သလီဟင် အမျိုးသမီးတွေဟာ နောမိ​ကို ကောင်းချီး​ပေးပြီး သူ့​အတွက် သား​ခုနစ်​ယောက်​ထက် ပို​ကောင်းတဲ့ ရုသ​ကို ချီးမွမ်းကြတယ်။ နောက်ပိုင်းမှာ ရု​သရဲ့​သား​ဟာ ဘုရင်​ဒါ​ဝိဒ်ရဲ့ ဘိုးဘေး ဖြစ်လာ​မှန်း သိရတယ်။ (ရု. ၄:၁၁-၂၂) ဒါဝိဒ်​က​လ​ည်း ယေရှုခရစ်ရဲ့ ဘိုးဘေး​ဖြစ်တယ်။—မ. ၁:၁။ *

၂၆။ ရုသ​နဲ့ နောမိ​တို့ရဲ့ စံနမူနာ​က ဘာကို အမှတ်ရ​စေ​သလဲ။

^၂၆ ရုသဟာ တကယ် ကောင်းချီး​ခံစားခဲ့​ရ​ပါတယ်။ နောမိ​လ​ည်း မြေးလေး​ကို သား​အရင်း​လို ကြည့်ရှု​စောင့်​ရှောက်​ခွင့်​ရတဲ့ ကောင်းချီး​ခံစားခဲ့​ရ​ပါတယ်။ ဘဝကို ခက်ခက်​ခဲခဲ ရုန်းကန်​ရင်း ယေဟောဝါရဲ့ လူမျိုးနဲ့​အတူ သစ္စာရှိ​ရှိ ဝတ်ပြု​နေ​သူတွေကို ဘုရား သတိပြုမိတယ်​ဆိုတာ ဒီ​အမျိုးသမီး​နှစ်ယောက်ရဲ့ ဇာတ်လမ်း​က သိ​စေတယ်။ ဘုရားသခင်ဟာ ဗောဇ၊ နောမိ​နဲ့ ရုသ​တို့​လို သစ္စာ​ရှိသူတွေကို ဆု​မချ​ဘဲ မနေဘူး။