၁၊ ၂။ အခု​အချိန်​မှာ ယုံ​ကြည်​ခြင်း​ကို တည်​ဆောက်​ပေး​ဖို့ ဘာကြောင့် အရေး​ကြီး​သလဲ။ ဥပမာ​ပေး​ပါ။

ယုံ​ကြည်​ခြင်း ဆို​တာ တ​ကယ် နှစ်​သက်​စ​ရာ​ကောင်းတဲ့ အရည်​အသွေး​တစ်​ခု​ပါ​ပဲ။ ယုံ​ကြည်​ခြင်း​ဆို​တဲ့ စကား​လုံး​ကို တွေ့​တဲ့​အခါ “အရေး​ကြီး​တယ်” ဆို​တဲ့ နောက်​စကား​လုံး တစ်လုံး​ကို​လည်း သတိ​ရ​သင့်​တယ်။ ကျွန်တော်တို့မှာ ယုံကြည်ခြင်း မရှိ​သေး​ရင် ရှိ​လာ​အောင်​လုပ်​ဖို့ အရေး​ကြီး​တယ်။ ယုံ​ကြည်​ခြင်း ရှိ​နေ​တယ်​ဆို​ရင်​လည်း အဲ​ဒါ​ကို ထိန်း​သိမ်း​ထား​ဖို့​နဲ့ အားဖြည့်​ပေး​နေ​ဖို့ အရေး​ကြီး​တယ်။ ဘာ​ကြောင့်​လဲ။

^၂ သဲ​ကန္တာ​ရ​ထဲ​မှာ ခ​ရီး​သွား​နေ​တယ် ဆို​ပါ​စို့။ အဲဒီ​လို​ခ​ရီး​စဉ်​မျိုး​မှာ သောက်​ရေ မရှိ​မဖြစ် လို​အပ်​တယ်။ ရေ​ရပြီဆို​ရင် အ​ပူရှိန်​ကြောင့် အငွေ့​မပြန်အောင် ဘူး​ထဲ​ထည့်၊ အလုံ​ပိတ်​ပြီး ယူ​သွား​ရ​မယ်။ ဒါ့​အပြင် ရေ​ဘူး​ထဲ ရေ​ပြန်​ဖြည့်​ပေး​ဖို့​လည်း လိုတယ်။ ဒါ​မှ လို​ရာ​ခရီး​ကို ရောက်​အောင်​သွား​နိုင်​မယ်။ ကျွန်တော်​တို့​ဟာ ယေဟောဝါ​ဘုရား​ကို ဝတ်​မပြု​ချင်​တဲ့ ဒီလော​က​မှာ နေ​ထိုင်​နေ​ရ​တယ်။ ရေ​နဲ့​တူ​တဲ့ စစ်​မှန်​တဲ့​ယုံ​ကြည်​ခြင်း​ဟာ ရှား​ပါး​တဲ့​အပြင် မထိန်း​သိမ်း​ထား​ဘူး၊ ပြန်​အား​မဖြည့်​ပေး​ဘူး​ဆို​ရင် အလွယ်​တ​ကူ ပျောက်​သွား​နိုင်​တယ်။ ရေ​မရှိ​ရင် အသက်​မရှင်​နိုင်​သလို ယုံ​ကြည်​ခြင်း​မရှိ​ရင် ယေဟောဝါ​ဘုရား​နဲ့ ကောင်း​တဲ့​ဆက်ဆံ​ရေး မရှိ​နိုင်​လို့ ယုံ​ကြည်​ခြင်း​က သိပ်​အရေး​ကြီး​ပါ​တယ်။—ရော. ၁:၁၇။

၃။ ကျွန်တော်တို့ရဲ့ ယုံ​ကြည်​ခြင်း ခိုင်​ခံ့​နေဖို့ ယေဟောဝါဘုရား ဘာ​လုပ်​ပေး​ထား​သလဲ။ ​လုပ်​ရ​မယ့် ဘယ်​အချက်​နှစ်​ချက်​ကို မှတ်ထား​ရ​မလဲ။

^၃ ကျွန်တော်တို့မှာ ယုံ​ကြည်​ခြင်း​ရှိ​ဖို့ ဘယ်​လောက် အရေး​ကြီး​တယ်​ဆို​တာ ယေဟောဝါ​ဘုရား သိ​တယ်။ ဒီ​နေ့​ခေတ်​မှာ ယုံ​ကြည်​ခြင်း​ကို တည်​ဆောက်​ပေး​ဖို့၊ ထိန်း​သိမ်း​ထား​ဖို့ ဘယ်လောက် ခက်​တယ်​ဆို​တာ​ကို​လည်း ​သိ​တယ်။ ဒါကြောင့်​လည်း ကျွန်တော်တို့ အတုယူဖို့ စံ​န​မူ​နာ​ရှင်​တွေ​ကို ဖော်​ပြပေး​ထား​တာ​ပါ။ “ယုံကြည်ခြင်း၊ စိတ်ရှည်ခြင်းကြောင့် ကတိတော်ကို အမွေရခဲ့သူတွေကို အတုယူကြပါ” လို့ ရေး​သား​ဖို့ တမန်​တော်​ပေါလု​ကို ယေဟောဝါ​ဘုရား လမ်း​ညွှန်​ခဲ့​တယ်။ (ဟီ. ၆:၁၂) ဒါ​ကြောင့် ဒီစာအုပ်​မှာ ဖော်​ပြထား​တဲ့​သူ​တွေ​လို​မျိုး သစ္စာ​ရှိ​အမျိုး​သား၊ အမျိုး​သမီး​တွေကို ကြိုး​စား အတု​ယူကြ​ဖို့ ယေဟောဝါ​ဘုရား​ရဲ့ အဖွဲ့​အစည်းက ကျွန်တော်​တို့​ကို အား​ပေး​နေ​တာ ဖြစ်​တယ်။ ကျွန်တော်​တို့​ဘက်က ဘာ​လုပ်​သင့်​သလဲ။ အချက်​နှစ်​ချက်​ကို မှတ်ထား​ကြ​ရ​အောင်– (၁) ယုံ​ကြည်​ခြင်း​ခိုင်​ခံ့​အောင် ဆက်လုပ်​နေ​ရ​မယ်။ (၂) ကျွန်တော်​တို့​ရဲ့ မျှော်​လင့်​ချက်​ကို အမြဲ ရှင်​သန်​နေ​စေ​ရ​မယ်။

၄။ စာ​တန်​က ကျွန်တော်တို့​ရဲ့ ယုံ​ကြည်​ခြင်း​ကို ဘယ်​လို​နည်း​နဲ့ တိုက်​ခိုက်​နေ​သလဲ။ ဘာ​ကြောင့် စိတ်​ဓာတ်​မကျ​သင့်​သလဲ။

^၄ ယုံ​ကြည်​ခြင်း​ခိုင်​ခံ့​အောင် ဆက်​လုပ်​နေ​ရ​မယ်။ ကျွန်တော်တို့ရဲ့ ယုံ​ကြည်​ခြင်း ပျောက်​သွား​အောင် ရန်​သူ​ကြီး စာတန် ကြိုးစား​လုပ်​နေ​တယ်။ ဒီ​လော​က​ရဲ့ အုပ်​စိုး​ရှင် စာတန်​ဟာ ကျွန်တော်တို့ရဲ့ ​ယုံ​ကြည်​ခြင်း ဆက်​ထိန်း​ထား​ဖို့ ခက်အောင် လုပ်​ထား​တယ်။ သူ​က ကျွန်တော်တို့ထက် အများကြီး တန်ခိုး​ကြီး​တယ်။ ဒါ​ဆိုရင် ကျွန်တော်​တို့​ရဲ့ ယုံကြည်​ခြင်း​ကို မတည်​ဆောက်​နိုင်​မှာ၊ ခိုင်​ခံ့​အောင် မလုပ်​နိုင်​မှာ ကြောက်​နေ​သင့်​သလား။ လုံး​ဝ ​မကြောက်​သင့်​ပါ​ဘူး။ ယေဟောဝါ​ဘုရား​ဟာ စစ်​မှန်​တဲ့ ယုံ​ကြည်​ခြင်း​ရှိ​ဖို့ ကြိုး​စား​နေ​သူ​တွေ​ရဲ့ မိတ်ဆွေ​ဖြစ်​တယ်။ ကျွန်တော်တို့ဘက်​မှာ ယေဟောဝါဘုရား​ရှိ​မယ်​ဆို​ရင် မာရ်​နတ်​ကို ခု​ခံ​တွန်း​လှန်​နိုင်​မယ်၊ ထွက်သွား​အောင်​တောင် လုပ်​နိုင်​မယ်​လို့ ဘုရားသခင် အာ​မခံ​ ထား​တယ်။ (ယာ. ၄:၇) ကျွန်တော်တို့​ဘက်ကလည်း နေ့​တိုင်း အချိန်​ယူ​ပြီး ယုံ​ကြည်​ခြင်း​ကို တည်ဆောက်​တာ၊ ခိုင်ခံ့​အောင်​လုပ်​တာ​က မာရ်​နတ်​ကို ခု​ခံ​တွန်း​လှန်​ရာ ရောက်​တယ်။ ဒါ​ကို ဘယ်​လို လုပ်​နိုင်​မလဲ။

၅။ ကျမ်း​စာ​ပါ အမျိုး​သား၊ အမျိုး​သမီး​တွေ​ဟာ ယုံ​ကြည်​ခြင်း​ကို ဘယ်​လို ရ​ရှိ​ခဲ့​ကြ​သလဲ။ ရှင်း​ပြပါ။

^၅ သိခဲ့ရ​တဲ့​အတိုင်း ကျမ်း​စာ​ပါ အမျိုး​သား၊ အမျိုး​သမီး​တွေ​ဟာ ယုံ​ကြည်​ခြင်း​ကို ကြိုး​စား တည်​ဆောက်ခဲ့​ကြ​ရ​တယ်။ ယုံကြည်​ခြင်း​ဟာ ယေဟောဝါ​ဘုရား​ရဲ့ စွမ်းအား​တော်​ကြောင့် ဖြစ်​ပေါ်​လာ​တယ်​ဆို​တာ သူတို့​အသက်​တာ​က ဖော်​ပြပါ​တယ်။ (ဂလ. ၅:၂၂၊ ၂၃) အကူ​အညီ​ရ​ဖို့ ယေဟောဝါ​ဘုရား​ဆီ သူတို့ ဆုတောင်း​ခဲ့​ကြ​ပြီး ဘုရားသခင်​က​လည်း သူတို့​ရဲ့ ယုံ​ကြည်​ခြင်း​ခိုင်​ခံ့​အောင် ကူညီ​ပေး​ခဲ့​တယ်။ သူတို့​ကို အတု​ယူကြ​ရ​အောင်။ စွမ်းအား​တော်​ကို တောင်း​ခံ​တဲ့​သူ၊ ဆုတောင်း​ချက်​နဲ့​အညီ လုပ်​ဆောင်​တဲ့​သူ​ကို ယေဟောဝါ​ဘုရား​က စွမ်းအား​တော်​ကို ရက်​ရက်​ရော​ရော ပေး​တယ်​ဆို​တာ ဘယ်တော့​မှ မမေ့​ပါ​နဲ့။ (လု. ၁၁:၁၃) နောက်​ထပ် ဘာ​လုပ်​ရ​ဦး​မလဲ။

၆။ အကျိုး​အပြည့်အဝ ရအောင် ကျမ်း​စာ​မှတ်​တမ်း​တွေ​ကို ဘယ်လို​လေ့​လာ​ဖို့ လို​သလဲ။

^၆ ဒီ​စာ​အုပ်​မှာ ယုံ​ကြည်​ခြင်း​ကို ထူး​ထူး​ခြား​ခြား တင်ပြ​ခဲ့​သူတ​ချို့ အကြောင်း​ကို​ပဲ ဆွေး​နွေး​ထား​ပါ​တယ်။ နောက်ထပ် အများ​ကြီး ရှိ​ပါ​သေး​တယ်။ (ဟီဘရူး ၁၁:၃၂ ကို​ဖတ်​ပါ။) သူတို့ တစ်​ယောက်​ချင်း​စီ​ရဲ့​အကြောင်း​ကို ဆုတောင်း​ပြီး စိတ်နှလုံး​ပါ​ပါ လေ့​လာ​သင့်​ပါ​တယ်။ ယုံ​ကြည်​ခြင်း ခိုင်​ခံ့​သူ​တွေ​ရဲ့ ကျမ်း​မှတ်​တမ်း​ကို အပေါ်​ယံ​ပဲ လေ့​လာ​သွား​မယ်​ဆို​ရင် ကျွန်တော်တို့​ရဲ့ ​ယုံ​ကြည်​ခြင်း ခိုင်​ခံ့​သင့်​သလောက် ခိုင်​ခံ့​မှာ မဟုတ်​ဘူး။ အကျိုး အပြည့်​အဝရ​ချင်​ရင် ဆက်​စပ်​နေ​တဲ့ အကြောင်း​အရာတွေ​နဲ့ နောက်​ခံ​အခြေ​အနေ​ကို အချိန်​ပေး​ပြီး ရှာ​ဖွေ​လေ့​လာ​ဖို့​လို​တယ်။ အဲဒီ မစုံလင်​တဲ့​သူ​တွေ​ဟာ “ကျွန်တော်တို့လိုပဲ ခံစားချက်ရှိတဲ့ လူ” တွေဆိုတာ​ကို အမြဲ သတိ​ရ​နေ​မယ်​ဆို​ရင် သူတို့​ရဲ့ စံ​န​မူ​နာ​က​နေ ပို​အကျိုး​ရ​လာ​ပါ​လိမ့်​မယ်။ (ယာ. ၅:၁၇) ကျွန်တော်တို့​လို အခက်​အခဲ၊ ပြဿ​နာ​တွေ သူတို့​ကြုံ​ခဲ့​ရ​ချိန်​မှာ သူတို့​ရဲ့ ခံစား​ချက်​ကို ကိုယ်​ချင်း​စာ​ကြည့်​နိုင်​ပါ​တယ်။

၇-၉။  (က) ကျမ်း​စာ​ခေတ်​က ယုံ​ကြည်​ခြင်း​ရှိ​သူ​တွေ​သာ ယေဟောဝါ​ဘုရား​ကို ကျွန်တော်တို့​လို ဝတ်​ပြု​ခွင့်​ရ​မယ်​ဆို​ရင် သူတို့ ဘယ်​လို ခံစား​ရ​မလဲ။ (ခ) ကျွန်တော်တို့ရဲ့ ယုံ​ကြည်​ခြင်း​ကို လုပ်​ရပ်​နဲ့ ဘာကြောင့် ခိုင်ခံ့​စေ​သင့်​သလဲ။

^၇ ကျွန်တော်တို့ ဆုံး​ဖြတ်​တဲ့​အရာတွေ၊ လုပ်​ဆောင်​တဲ့ အရာတွေ​နဲ့​လည်း ယုံ​ကြည်​ခြင်း​ကို ခိုင်​ခံ့​စေ​နိုင်​ပါ​တယ်။ “လုပ်ရပ်မပါတဲ့ ယုံကြည်ခြင်းကလည်း အသေပဲ။” (ယာ. ၂:၂၆) ကျွန်တော်တို့​ရထား​တဲ့ တာဝန်​ကို ဒီ​စာ​အုပ်​ထဲ​က အမျိုး​သား၊ အမျိုး​သမီး​တွေ​ကို​သာ ယေဟောဝါ​ဘုရား ပေးမယ်​ဆို​ရင် သူတို့ ဘယ်​လောက် ပျော်​လိုက်​မလဲ​ဆို​တာ စဉ်းစား​ကြည့်​ပါ။

^၈ ဥပမာ၊ အာဗြဟံ​ကို ယေဟောဝါ​ဘုရား​က တော​ကန္တာ​ရ​ထဲ​မှာ ကျောက်​တုံး​တွေ​နဲ့ ယဇ်​ပလ္လင် တည်​စ​ရာ​မလို​ဘဲ နိုင်​ငံ​တော်​ခန်း​မနဲ့ စည်း​ဝေး​ကြီး​တွေ​မှာ ယုံ​ကြည်​သူ​ချင်း​တွေ​နဲ့​အတူ ဝတ်​ပြု​နိုင်​တယ်။ အဲဒီ​မှာ သူ “အဝေး” က​မျှော်ခဲ့​တဲ့ ကတိ​တွေ၊ အဲ​ဒါ​တွေ​ရဲ့ အသေး​စိတ်​အချက်​အလက်​တွေ​အကြောင်း ထိုင်နား​ထောင်​နိုင်​တယ်​လို့​ပြော​ရင် အာဗြဟံ ဘယ်​လို​နေ​မလဲ။ (ဟီဘရူး ၁၁:၁၃ ကို​ဖတ်​ပါ။) ဧလိယ​ကို​လည်း အယူ​ဖောက်​ပြန်​တဲ့ ဘုရင်​လက်​ထက်​မှာ ဆိုး​ညစ်​တဲ့ ဗာလ​ပရော​ဖက်​တွေ​ကို သတ်​တဲ့​အလုပ်​မျိုး လုပ်​စ​ရာ​မလို​ဘဲ နှစ်သိမ့်​မှု​နဲ့ မျှော်​လင့်​ချက်​သတင်း​ကို အေး​အေး​ဆေး​ဆေး လိုက်​ဟော​ပါ​လို့ ပြော​မယ်​ဆိုရင် သူ ဘယ်​လို​နေ​မလဲ။ ကျမ်း​စာ​မှာ​ပါ​တဲ့ ယုံကြည်​ခြင်း​ရှိသူ​တွေ​သာ ကျွန်တော်တို့​လို တောင်း​ဆို​ခံ​ရ​မယ်​ဆို​ရင် ဝမ်းသာ​အား​ရ လုပ်ကြ​မယ်​မဟုတ်​လား။

^၉ ဒါ​ကြောင့် ကိုယ့်​ရဲ့ ယုံ​ကြည်​ခြင်း​ကို လုပ်ရပ်တွေနဲ့  ဆက်ပြီးခိုင်​ခံ့​အောင် လုပ်ကြပါစို့။ အဲဒီ​လို​လုပ်​မယ်​ဆိုရင် ကျမ်းစာ​မှာ​ပါ​တဲ့ ယုံ​ကြည်​ခြင်း​ရှိ​သူ​တွေ​ရဲ့ စံနမူနာ​ကို လက်တွေ့ လိုက်​လျှောက်​နေ​တာ​ဖြစ်​တယ်။ နိ​ဒါန်း​မှာ ပြော​ခဲ့​သလို​ပဲ သူတို့နဲ့ ပို​ရင်းနှီး​လာ​တယ်​လို့ ခံစား​ရ​ပါ​လိမ့်​မယ်။ သိပ်မကြာ​ခင်​မှာ သူတို့​နဲ့ အမှန်​တ​ကယ် မိတ်​ဖွဲ့​ခွင့် ရ​ပါ​တော့​မယ်။

၁၀။ ပရ​ဒိ​သု​မှာ ဘယ်​ပျော်​ရွှင်​မှု​ကို ခံစား​ရ​မလဲ။

^၁၀ ကျွန်တော်တို့​ရဲ့ မျှော်​လင့်​ချက်​ကို အမြဲ ရှင်​သန်​နေ​စေ​ရ​မယ်။ သစ္စာ​ရှိ အမျိုး​သား၊ အမျိုး​သမီး​တွေ​ဟာ ဘုရား​ပေး မျှော်​လင့်​ချက်​က​နေ အမြဲ ခွန်​အား​ယူ​ခဲ့​ကြ​တယ်။ သင်ကော။ ဥပမာ၊ “ဖြောင့်​မတ်​သော​သူ” တွေ အသက်​ပြန်​ရှင် လာ​ကြ​တဲ့​အခါ ဘုရား​သခင့် သစ္စာ​ရှိ​ကျေး​ကျွန်​တွေ​နဲ့ တွေ့ဆုံ​ရ​မယ့် အချိန်​ဟာ ဘယ်​လောက် ပျော်​စ​ရာ​ကောင်း​မလဲ​ဆို​တာ စဉ်း​စား​ကြည့်​လိုက်​ပါ။ (တမန်​တော် ၂၄:၁၅ ကိုဖတ်ပါ။) သူတို့​ကို သင် ဘာ​မေး​ခွန်း​တွေ မေး​ချင်​ပါ​သလဲ။

၁၁၊ ၁၂။ ကမ္ဘာ​သစ်​မှာ ဒီ​လူ​တွေ​ကို သင် ဘယ်​မေး​ခွန်း​တွေ မေးကြည့်​ချင်​ပါ​သလဲ။ (က) အာ​ဗေ​လ။ (ခ) နော​ဧ။ (ဂ) အာဗြဟံ။ (ဃ) ရုသ။ (င) အဘိ​ဂဲလ။ (စ) ဧ​သတာ။

^၁၁ အာ​ဗေ​လ​နဲ့ တွေ့တဲ့​အခါ သူ့​မိ​ဘ​တွေ​အကြောင်း မမေးကြည့်​ချင်​ဘူး​လား။ ဒါ​မှ​မဟုတ် “ဧ​ဒင်​ဥ​ယျာဉ်​အဝင်​ဝ​ကို စောင့်ကြပ်​နေ​တဲ့ ခေရုဗိမ်​တွေ​နဲ့ ညီ​အစ်ကို စကား​ပြော​ဖူးသလား။ သူတို့ စကား​ပြန်​ပြော​သလား” လို့ မေး​ကြည့်​ချင်​သလား။ နော​ဧ​ကို​ရော “နက်​ဖလင်​တွေ​ကို ညီ​အစ်ကို ကြောက်သလား။ သင်္ဘော​ထဲ​မှာ​ရှိ​နေ​တဲ့ တစ်​နှစ်​လုံး​လုံး တိရစ္ဆာန်တွေ​ကို ညီအစ်ကို ဘယ်​လို စောင့်​ရှောက်​ခဲ့​သလဲ” လို့ မေး​ချင်​သလား။ အာဗြဟံ​ကို​ရော “ရှေ​မနဲ့ အဆက်​အသွယ် ရခဲ့သလား။ ညီ​အစ်ကို့​ကို ယေဟောဝါ​ဘုရား​အကြောင်း ဘယ်​သူ သင်​ပေး​ခဲ့​တာလဲ။ ဥရ​မြို့​က​နေ ထွက်​ခွာ​ရ​တော့ ညီ​အစ်ကို ဘယ်​လို ခံစား​ရ​သလဲ” လို့​ရော မေး​ကြည့်​ချင်​ပါ​သလား။

^၁၂ ရှင်​ပြန်​ထ​မြောက်​လာ​ကြ​တဲ့ သစ္စာ​ရှိ အမျိုး​သမီး​တွေ​ကို​ရော သင် ဘာ​မေး​ခွန်း​တွေ မေး​ချင်​သလဲ။ “ညီ​အစ်မရုသ၊ ယေဟောဝါ​ဘုရား​ကို ဘာ​ကြောင့်​ကိုးကွယ်​ချင်​ခဲ့​တာ​လဲ။” “ညီအစ်မ အဘိ​ဂဲလ၊ ဒါဝိဒ်​ကို ညီ​အစ်မ ကူညီ​ပေး​ခဲ့​တဲ့​အကြောင်း နာဗလ​ကို ပြော​ပြရ​မှာ ကြောက်​ခဲ့​သလား။” “ညီအစ်မ ဧ​သတာ၊ ကျမ်း​စာ​မှာ မှတ်​တမ်း​တင်​ထား​တာ​တွေ ဖြစ်​ပြီး​တဲ့​နောက် ညီအစ်မနဲ့ မော်​ဒ​ကဲ​တို့ ဘာ​ဆက်​ကြုံ​တွေ့ခဲ့​ရလဲ” ဆို​တဲ့ မေး​ခွန်း​တွေ သင် မေး​ကြည့်​ချင်​မှာ​ပဲ။

၁၃။ (က) ရှင်​ပြန်​ထ​မြောက်​လာ​သူ​တွေ​က သင့်​ကို ဘာ​မေး​ခွန်း​တွေ မေး​ချင်​မလဲ။ (ခ) ရှေး​ခေတ်​က သစ္စာ​ရှိ​အမျိုး​သား၊ အမျိုး​သမီး​တွေ​နဲ့ တွေ့ဆုံ​ရ​မှာ​ကို သင် ဘယ်​လို ခံစား​ရ​သလဲ။

^၁၃ သစ္စာ​ရှိ အမျိုး​သား၊ အမျိုး​သမီး​တွေ​မှာ​လည်း သင့်ကို မေး​စ​ရာ အများ​ကြီး​ရှိ​မှာ​ပဲ။ နောက်​ဆုံး​နေ့​ရက်​တွေ​အကြောင်း၊ ဒီ​ခက်​ခဲ​တဲ့​ကာလ​မှာ ယေဟောဝါ​ဘုရား​က မိမိ​လူမျိုး​ကို ဘယ်လို ကောင်း​ချီး​ပေး​ခဲ့​သလဲ​ဆို​တဲ့​အကြောင်း သူတို့​ကို ပြောပြရ​တဲ့​အခါ ဘယ်​လောက် ပျော်​စ​ရာ​ကောင်း​လိုက်​မလဲ။ ယေဟောဝါ​ဘုရား​က ကတိ​တော်အားလုံး​ကို ဘယ်လို ပြည့်​စုံ​စေ​ခဲ့​တယ်​ဆို​တာ သူတို့ သိ​ရ​တဲ့​အခါ သိပ်စိတ်​လှုပ်​ရှား​သွား​မှာ​ပဲ။ ကမ္ဘာ​သစ်​ရောက်​ရင် သူတို့​အကြောင်း ​မြင်ယောင်​ကြည့်​နေ​စ​ရာ မလို​တော့​ပါ​ဘူး။ ပရ​ဒိ​သု​မှာ ကျွန်တော်တို့​နဲ့​အတူ သူတို့ ရှိ​နေ​ကြ​ပါ​လိမ့်​မယ်။ အခု​အချိန်​မှာ​တော့ သူတို့​အကြောင်း ဆက်​လေ့​လာ​နေ​ကြ​ပါ။ သူတို့​ရဲ့ ယုံကြည်​ခြင်း​ကို ဆက်​တု​ပနေ​ပါ။ သင်​ချစ်​ရ​တဲ့ အဲဒီ​မိတ်ဆွေ​တွေ​နဲ့​အတူ ယေဟောဝါ​ဘုရား​ကို ထာ​ဝ​စဉ် ဝတ်​ပြု​သွား​နိုင်​ကြ​ပါ​စေ။