၁-၃။ (က) အေသင်မြို့မှာ တမန်တော် ပေါလု ဘာကြောင့် စိတ်အနှောင့်အယှက် ဖြစ်နေသလဲ။ (ခ) ပေါလုရဲ့ ပုံသက်သေကနေ ဘာသင်ယူနိုင်သလဲ။

 ပေါလု အကြီးအကျယ် စိတ်အနှောင့်အယှက် ဖြစ်နေတယ်။ ပညာရေးအချက်အချာ ဂရိနိုင်ငံ၊ အေသင်မြို့ကို ရောက်နေတယ်။ တစ်ချိန်ကဆိုရင် အတွေးအခေါ်ပညာရှင် ဆိုကရေးတီး၊ ပလေတို၊ အရစ္စတိုတယ်တို့ ဒီနေရာမှာ သွန်သင်ပေးခဲ့ဖူးတယ်။ အေသင်မြို့သားတွေဟာ ဘာသာတရား သိပ်ကိုင်းရှိုင်းတယ်။ ဗိမာန်၊ ပြည်သူ့ရင်ပြင်၊ လမ်းတွေပေါ်မှာ ရုပ်တုတွေ အများကြီး တွေ့ရတယ်။ ဘုရားအများကြီးကို ကိုးကွယ်ကြတယ်။ ရုပ်တုကိုးကွယ်မှုကို စစ်မှန်တဲ့ဘုရား ယေဟောဝါ ဘယ်လို ရှုမြင်ကြောင်း ပေါလု သိတယ်။ (ထွ. ၂၀:၄၊ ၅) ယေဟောဝါလိုပဲ ရုပ်တုတွေကို ပေါလု ရွံတယ်။

^၂ ပေါလု ဈေးထဲ ဝင်တာနဲ့ တွေ့လိုက်ရတာတွေဟာ ရွံစရာတွေချည်းပဲ။ ဈေးရဲ့ အဓိက ဝင်ပေါက်အနီး အနောက်မြောက်ဘက်ထောင့်မှာ ဟေရမေဘုရားရဲ့ လိင်အင်္ဂါပုံ ကျောက်တိုင်များစွာ တန်းစီ စိုက်ထူထားတယ်။ ဈေးထဲမှာလည်း နတ်ကွန်းတွေ ရှိတယ်။ ထက်သန်တဲ့ တမန်တော်ဟာ ရုပ်တုကိုးကွယ်သူတွေကို ဘယ်လို ဟောမလဲ။ ကိုယ့်စိတ်ကိုယ် ထိန်းပြီး ပရိသတ် လက်ခံနိုင်မယ့်အကြောင်းကို ဟောမလား။ စစ်မှန်တဲ့ ဘုရားအကြောင်း သိလာပြီး ဝတ်ပြုနိုင်ဖို့ တစ်ဦးတစ်ယောက်ကို ကူညီပေးနိုင်မလား။

^၃ ပညာတတ် အေသင်မြို့သားတွေကို လိမ္မာပါးနပ်မှု၊ ပိုင်းခြားသိမြင်မှု ရှိရှိ ပေါလု ဟောကြောင်း တမန်တော် ၁၇:၂၂-၃၁ မှာ မှတ်တမ်းတင်ထားတယ်။ နားထောင်နေသူတွေ လက်ခံတဲ့အကြောင်းကို အခြေပြုပြီး ဘယ်လို ကျိုးကြောင်းဆင်ခြင်နိုင်ကြောင်း ပေါလုရဲ့ ပုံသက်သေကနေ ကျွန်တော်တို့ သင်ယူနိုင်တယ်။

၄၊ ၅။ အေသင်မြို့ရဲ့ ဘယ်နေရာမှာ ပေါလု ဟောသလဲ။ ပရိသတ်တွေထဲမှာ ဘယ်လို လူတွေ ရှိသလဲ။

^၄ ပေါလုဟာ အေဒီ ၅၀၊ ဒုတိယ သာသနာပြု ခရီးစဉ်မှာ အေသင်မြို့ကို ရောက်ခဲ့တယ်။ a ဗေရိမြို့ကနေ သိလနဲ့ တိမောသေ ရောက်မလာခင် ပေါလုဟာ ထုံးစံရှိတဲ့အတိုင်း “တရားဇရပ်မှာ ရှိတဲ့ ဂျူးတွေ၊ ဘုရားသခင်ကို ကိုးကွယ်တဲ့သူတွေ၊ စျေးမှာ နေ့တိုင်း တွေ့ရတဲ့သူတွေနဲ့ ကျိုးကြောင်းဆင်ခြင်တယ်။” အေသင်မြို့က ဂျူးမဟုတ်သူတွေနဲ့ တွေ့နိုင်ဖို့ “ဈေး” ကို သွားခဲ့တာ ဖြစ်တယ်။ (တ. ၁၇:၁၇) အေသင် မြို့ဈေးဟာ အခရာပိုလစ်ခံတပ်ရဲ့ အနောက်မြောက်ဘက်မှာ တည်ရှိပြီး ၁၂ ဧက ကျယ်တယ်။ အရောင်းအဝယ်လုပ်တဲ့ နေရာသာမက မြို့တော်ရင်ပြင်လည်း ဖြစ်တယ်။ “မြို့တော်ရဲ့ စီးပွားရေး၊ နိုင်ငံရေးနဲ့ ယဉ်ကျေးမှုရဲ့ အချက်အချာ ဖြစ်တယ်” လို့ စာအုပ်တစ်အုပ်က ဖော်ပြတယ်။ အေသင်မြို့သားတွေဟာ ဒီအရပ်မှာ စုဝေးပြီး ပညာရပ်ဆိုင်ရာ အကြောင်းတွေကို ဆွေးနွေးတတ်ကြတယ်။

^၅ ဒီဈေးက လူတွေကို ဟောရတာ ပေါလုအတွက် စိန်ခေါ်ချက်ပဲ။ အတွေးအခေါ်နဲ့ ပတ်သက်ပြီး ပြိုင်ဘက်ဂိုဏ်းတွေဖြစ်တဲ့ ဧပိကုရုနဲ့ သတောအိတ် အဖွဲ့သားတွေ ပရိသတ်ထဲမှာ ရှိနေတယ်။ b ဧပိကုရုဂိုဏ်းသားတွေက အသက်ဟာ မတော်တဆ ဖြစ်လာတယ်လို့ ယုံကြည်တယ်။ “သေပြီးသွားရင် ဘာနာကျင်မှုမှ မရှိတဲ့အတွက် ဘုရားကို ကြောက်စရာ မလိုဘူး။ ကောင်းတာကို လုပ်နိုင်တယ်။ မကောင်းတာကို သည်းခံနိုင်တယ်” လို့ ယူဆကြတယ်။ သတောအိတ် ဂိုဏ်းသားတွေက ယုတ္တိရှိရှိ စဉ်းစားတာကို အလေးပေးတယ်။ ဘုရားကို ပုဂ္ဂိုလ်တစ်ပါးအဖြစ် မယုံကြည်ကြဘူး။ ခရစ်တော်ရဲ့ တပည့်တွေ သွန်သင်တဲ့ ရှင်ပြန်ထမြောက်ခြင်းကို နှစ်ဂိုဏ်းစလုံး မယုံကြည်ဘူး။ သူတို့ရဲ့ အတွေးအမြင်တွေဟာ ပေါလု ဟောတဲ့ စစ်မှန်တဲ့ ခရစ်ယာန်ဘာသာရဲ့ အမှန်တရားနဲ့ ဆန့်ကျင်ဘက်ပါပဲ။

၆၊ ၇။ ပေါလုရဲ့ သွန်သင်ချက်ကို ဂရိပညာရှင်တချို့ ဘယ်လို တုံ့ပြန်ကြသလဲ။ ဒီနေ့ ဘယ်ထပ်တူ တုံ့ပြန်မှုကို တွေ့ရသလဲ။

^၆ ပေါလုရဲ့ သွန်သင်ချက်ကို ဂရိပညာရှင်တွေ ဘယ်လို တုံ့ပြန်သလဲ။ တချို့က သူ့ကို “စကားအိုး” လို့ ခေါ်ကြတယ်။ (တ. ၁၇:၁၈) ဒီဂရိစကားလုံးနဲ့ပတ်သက်လို့ ပညာရှင်တစ်ဦး ဒီလို ပြောတယ်– “အစက ဒီ ‘စကားအိုး’ ဆိုတဲ့ စကားလုံးကို မျိုးစေ့ကောက်စားတဲ့ ငှက်ကလေးအတွက် အသုံးပြုလေ့ရှိပြီး နောက်ပိုင်း၊ ဈေးမှာ စားကြွင်းစားကျန်၊ တိုလီမုတ်စ ကောက်သိမ်းသူတွေအတွက် အသုံးပြုလာတယ်။ အဲဒီနောက်၊ အဆက်အစပ် မရှိတဲ့ အကြောင်းအရာတွေ စုဆောင်းပြီး သေသေချာချာ နားမလည်ဘဲ ပြောတတ်သူတွေကို တင်စားပြောဖို့ အဲဒီစကားလုံးကို သုံးလာကြတယ်။” တစ်နည်းအားဖြင့်၊ ပညာရှင်တွေက ပေါလုကို မဖြစ်စလောက် သိလာတာလေးတွေနဲ့ ဆရာလာလုပ်နေသူလို့ ခေါ်နေခြင်း ဖြစ်တယ်။ အဲဒီလို ရှုတ်ချပြောဆိုခံရပေမဲ့ ပေါလု စိတ်ဓာတ်မကျခဲ့ကြောင်း ကျွန်တော်တို့ တွေ့ရမယ်။

^၇ ဒီနေ့လည်း အလားတူပဲ။ ယေဟောဝါသက်သေတွေဟာ ကျမ်းစာအခြေပြု ခံယူချက်တွေကြောင့် နာမည်အမျိုးမျိုးနဲ့ အခေါ်ခံရလေ့ရှိတယ်။ ဥပမာ၊ ပညာရှင်တချို့က ဆင့်ကဲအယူဟာ အမှန်တရား ဖြစ်တဲ့အတွက် အသိပညာရှိသူဆိုရင် လက်ခံရမယ်လို့ အခိုင်အမာ ဆိုတယ်။ တစ်နည်းအားဖြင့်၊ ဒါကို ငြင်းပယ်သူတွေကို အသိဉာဏ်နည်းသူလို့ သတ်မှတ်လိုက်တာပဲ။ ကျမ်းစာသွန်သင်ရာနဲ့ သဘာဝတရားရဲ့ ဆန်းကြယ်တဲ့ ဒီဇိုင်းတွေကို ကျွန်တော်တို့ ပြောပြတဲ့အခါ ဒီပညာရှင်တွေက ကျွန်တော်တို့ကို “စကားအိုး” တွေလို့ လူတွေ ထင်အောင် လုပ်တယ်။ ဒါပေမဲ့ ကျွန်တော်တို့ စိတ်ဓာတ်မကျဘူး။ ကမ္ဘာပေါ်က သက်ရှိတွေဟာ ဉာဏ်ကြီးရှင် ဒီဇိုင်နာ ယေဟောဝါကြောင့် ဖြစ်လာတယ်ဆိုတဲ့ ခံယူချက်အကြောင်း ယုံကြည်စိတ်ချမှု ရှိရှိ ပြောကြတယ်။—ဗျာ. ၄:၁၁။

၈။ (က) ပေါလု ဟောတာကို ကြားသူတချို့ ဘယ်လို တုံ့ပြန်သလဲ။ (ခ) ပေါလုကို အာရေတောင်ပေါ် ခေါ်သွားတယ်ဆိုတာ ဘာကို ဆိုလိုသလဲ။ (အောက်ခြေမှတ်ချက်ကို ကြည့်ပါ။)

^၈ ဈေးမှာ ပေါလု ဟောတာကို ကြားရသူတချို့ကတော့ “လူမျိုးခြားတွေရဲ့ နတ်ဘုရားတွေအကြောင်း ပြောနေတာ ထင်တယ်” လို့ ကောက်ချက်ချကြတယ်။ (တ. ၁၇:၁၈) ပေါလုဟာ အေသင်မြို့သားတွေကို  နတ်ဘုရားအသစ်အကြောင်း ဟောနေတာလား။ အဲဒီလိုဆိုရင် သိပ်အန္တရာယ်ရှိသွားပြီ။ အစောပိုင်း ရာစုနှစ်တွေက ဆိုကရေးတီးကို ကွပ်မျက်ခဲ့တဲ့ စွဲချက်တွေမှာ နတ်ဘုရားအသစ်တွေအကြောင်း ဟောပြောလို့ဆိုတဲ့ အချက်လည်း ပါတယ်။ ဒါကြောင့် ပေါလုကို အာရေတောင်ကို ခေါ်သွားပြီး မြို့သားတွေအတွက် အသစ်အဆန်း ဖြစ်နေတဲ့ သွန်သင်ချက်တွေကို ရှင်းပြစေတာ အံ့သြစရာ မဟုတ်ပါဘူး။ c ကျမ်းစာအသိပညာ လုံးဝ မရှိသူတွေရှေ့ သတင်းတရားကို ပေါလု ဘယ်လို ဟောမလဲ။

၉-၁၁။ (က) ပေါလုဟာ ပရိသတ် လက်ခံတဲ့အကြောင်းကို အခြေခံပြီး ဘယ်လို ဟောသလဲ။ (ခ) အမှုဆောင်မှာ ပေါလုရဲ့ ပုံသက်သေကို ဘယ်လို အတုယူနိုင်သလဲ။

^၉ ပေါလုဟာ ရုပ်တုမြောက်မြားစွာကို တွေ့ပြီး စိတ်အနှောင့်အယှက် ဖြစ်နေတယ်။ ဒါတောင် ရုပ်တုကိုးကွယ်မှု မှားတယ်လို့ တည့်တိုး မပြောခဲ့ဘူး။ စိတ်ငြိမ်ငြိမ်ထားတယ်။ အများ လက်ခံတဲ့ အကြောင်းကို အခြေပြုပြီး ပရိသတ် လက်ခံလာအောင် လိမ္မာပါးနပ်မှု ရှိရှိ ဟောတယ်။ “အေသင်မြို့သားတို့၊  ခင်ဗျားတို့ဟာ တခြားသူတွေထက် အရာရာမှာ နတ်ဘုရားတွေကို အင်မတန် ကြည်ညိုသူတွေ ဖြစ်မှန်း ကျွန်တော် သတိထားမိတယ်” လို့ နိဒါန်းပျိုးတယ်။ (တ. ၁၇:၂၂) တစ်နည်းအားဖြင့်၊ ‘ခင်ဗျားတို့ဟာ ဘာသာတရား အလွန်ကိုင်းရှိုင်းသူတွေဆိုတာ ကျွန်တော် သတိထားမိတယ်’ လို့ ပေါလု ပြောနေတာပဲ။ ဘာသာရေး ကိုင်းရှိုင်းသူတွေ ဖြစ်တာကို ပေါလု ချီးမွမ်းတယ်။ အယူမှား သွန်သင်ချက်တွေကြောင့် ဉာဏ်မျက်စိ ကွယ်နေသူတွေထဲမှာ အမှန်တရားကို ရှာနေသူတချို့ ရှိနိုင်တယ်။ မိမိကိုယ်တိုင်လည်း တစ်ချိန်က “ယုံကြည်ခြင်း မရှိလို့၊ မသိနားမလည်ဘဲ လုပ်ခဲ့” တယ် မဟုတ်လား။—၁ တိ. ၁:၁၃။

^၁၀ “ငါတို့ မသိတဲ့ ဘုရားသခင်အတွက်” လို့ ကမ္ပည်းထိုးထားတဲ့ ပလ္လင်တစ်ခုကို တွေ့တယ်ဆိုပြီး အများ လက်ခံတဲ့ အကြောင်းနဲ့ ပေါလု စပြောတယ်။ ကိုးကားချက်တစ်ခုအရ “ဂရိနဲ့ တခြားသူတွေဟာ ပလ္လင်တွေ တည်ပြီး ‘ငါတို့မသိတဲ့ ဘုရားသခင်အတွက်’ လို့ ကမ္ပည်းထိုးလေ့ရှိတယ်။ နတ်ဘုရား တစ်ပါးပါးကို ချန်လှပ်ထားမိရင် အဲဒီနတ်ဘုရား စိတ်ဆိုးမှာ စိုးရိမ်လို့ ဖြစ်တယ်။” အေသင်မြို့သားတွေ အဲဒီလိုပလ္လင်တစ်ခု တည်တာဟာ မိမိတို့ မသိတဲ့ ဘုရားတစ်ပါး ရှိကြောင်း ဝန်ခံနေတာပဲ။ ဒါကို ပေါလု အခွင့်အရေး ယူပြီး “ခင်ဗျားတို့ မသိဘဲ ကိုးကွယ်နေတဲ့ ဘုရားသခင်အကြောင်း ကျွန်တော် ပြောပြချင်တယ်” လို့ သတင်းကောင်းကို နိဒါန်းပျိုးတယ်။ (တ. ၁၇:၂၃) ပေါလုရဲ့ ကျိုးကြောင်းဆင်ခြင်ပုံဟာ လိမ္မာပါးနပ်ပြီး ထိရောက်တယ်။ လူတချို့ စွပ်စွဲသလို နတ်ဘုရားအသစ် တစ်ပါးအကြောင်း ဟောနေတာ မဟုတ်ဘဲ သူတို့ မသိသေးတဲ့ စစ်မှန်တဲ့ ဘုရားသခင်အကြောင်း ပြောနေတာ ဖြစ်တယ်။

^၁၁ အမှုဆောင်မှာ ပေါလုရဲ့ ပုံသက်သေကို ဘယ်လို အတုယူနိုင်သလဲ။ ကြိုးစား အကဲခတ်ကြည့်ပါ။ ဒါဆိုရင် လူတစ်ဦး ဝတ်ဆင်ထားတဲ့ ဘာသာရေး အဆောင်အယောင် ဒါမှမဟုတ် အိမ်တွင်း၊ ခြံတွင်းက ဘာသာရေး ပစ္စည်းတွေကို သတိပြုမိပြီး ဘာသာရေး ကိုင်းရှိုင်းသူ ဖြစ်ကြောင်း သိနိုင်တယ်။ အဲဒီအခါ ‘မိတ်ဆွေက ဘာသာရေး ကိုင်းရှိုင်းသူပဲ။ မိတ်ဆွေလို လူစားမျိုးနဲ့ စကားပြောချင်နေတာ’ လို့ ပြောနိုင်တယ်။ ဘာသာရေး ကိုင်းရှိုင်းစိတ်ကို လိမ္မာပါးနပ်စွာ အသိအမှတ်ပြုခြင်းအားဖြင့် အများ လက်ခံတဲ့ အကြောင်းကို အခြေပြုပြီး ဆက်ဟောနိုင်မယ်။ လူတွေရဲ့ ဘာသာရေး ခံယူချက်ကို ထောက်ပြီး သူတို့ကို မစီရင်သင့်ဘူး။ ညီအစ်ကို/မ တချို့ဆိုရင်လည်း တစ်ချိန်က ဘာသာရေး အယူအဆမှားတွေကို စိတ်ရင်းမှန်နဲ့ ယုံကြည်ခဲ့သူတွေ ဖြစ်တယ်။

၁၂။ ပေါလုဟာ နားထောင်နေသူတွေကို လိုက်ပြီး ဟောပြောနည်းကို ဘယ်လို ပြောင်းလဲသလဲ။

^၁၂ ပေါလုဟာ အများ လက်ခံတဲ့ အကြောင်းကို အခြေပြုလိုက်နိုင်ပြီ။ ဆက်ဟောဖို့ကော အခွင့်အရေး ရပါ့မလား။ ပရိသတ်ဟာ ဂရိအတွေးအခေါ်ပညာကိုပဲ သိပြီး ကျမ်းစာအသိပညာ လုံးဝ မရှိကြောင်း သိလို့ ဟောပြောနည်းကို အမျိုးမျိုး ပြောင်းခဲ့တယ်။ ဦးဆုံး၊ ကျမ်းစာသွန်သင်ချက်တွေအကြောင်း ကျမ်းစာကနေ တိုက်ရိုက် မကိုးကားဘဲ ဟောပြောခဲ့တယ်။ ဒုတိယ၊ “ကျွန်တော်တို့” ဆိုတဲ့ စကားလုံးကို အကြိမ်ကြိမ် အသုံးပြုခြင်းအားဖြင့် မိမိဟာ ပရိသတ်နဲ့ တန်းတူ ဖြစ်ကြောင်း ဖော်ပြတယ်။ တတိယ၊ မိမိရဲ့ သွန်သင်ချက်တချို့ဟာ သူတို့ရဲ့ ဂရိစာပေတွေမှာ ပါကြောင်း သိစေဖို့ ဂရိစာပေတွေကို ကိုးကားခဲ့တယ်။ အခု၊ ပေါလုရဲ့ ပိုင်နိုင်တဲ့ ဟောပြောချက်ကို သုံးသပ်ကြည့်ကြစို့။ အေသင်မြို့သားတွေ မသိတဲ့ ဘုရားသခင်နဲ့ပတ်သက်ပြီး ဘယ်အရေးကြီးတဲ့ အမှန်တရားတွေကို ဖော်ပြခဲ့သလဲ။

၁၃။ စကြဝဠာရဲ့ မူလအစအကြောင်း ပေါလု ဘယ်လို ရှင်းပြသလဲ။ ဘာကို ဆိုလိုသလဲ။

 ^၁၃ ဘုရားသခင်ဟာ စကြဝဠာကို ဖန်ဆင်းတယ်။ “လောကနဲ့ လောကမှာ ရှိသမျှကို ဖန်ဆင်းတဲ့ ဘုရားသခင်ဟာ မိုးမြေပိုင်စိုးတဲ့အရှင် ဖြစ်လို့ လူဆောက်တဲ့ ဗိမာန်တွေမှာ မစံမြန်းဘူး” လို့ ပေါလု ပြောတယ်။ d (တ. ၁၇:၂၄) ဒီစကြဝဠာဟာ မတော်တဆ ဖြစ်လာတာ မဟုတ်ဘူး။ စစ်မှန်တဲ့ ဘုရားသခင်ဟာ အရာခပ်သိမ်းကို ဖန်ဆင်းရှင် ဖြစ်တယ်။ (ဆာ. ၁၄၆:၆) မိုးမြေကို ပိုင်စိုးတဲ့အရှင်ဟာ ဘုရားမ အသီနာနဲ့ တခြားနတ်ဘုရားတွေလို မဟုတ်ဘူး။ ဗိမာန်တွေ၊ နတ်ကွန်းတွေ၊ ပလ္လင်တွေကို မှီခိုနေဖို့ မလိုဘူး။ လူဆောက်တဲ့ ဗိမာန်တွေမှာ မစံမြန်းဘူး။ (၁ ဘု. ၈:၂၇) ပေါလု ဘာကို ဆိုလိုကြောင်း ရှင်းပါတယ်။ စစ်မှန်တဲ့ ဘုရားဟာ လူဆောက်တဲ့ ဗိမာန်တွေမှာ တွေ့ရတဲ့ ရုပ်တုတွေထက် မြင့်မြတ်တယ်။—ဟေရှာ. ၄၀:၁၈-၂၆။

၁၄။ လူသားတွေကို ဘုရားသခင် မှီခိုစရာ မလိုကြောင်း ပေါလု ဘယ်လို ဖော်ပြသလဲ။

^၁၄ ဘုရားသခင်ဟာ လူတွေကို မှီခိုစရာ မလိုဘူး။ ရုပ်တုကိုးကွယ်သူတွေဟာ အဖိုးတန် လက်ဆောင်တွေ၊ အဝတ်အစားတွေ၊ အစားအသောက်တွေကို ရုပ်တုတွေအတွက် ပူဇော်တတ်ကြတယ်။ ဒါတွေကို ရုပ်တုတွေ လိုအပ်တယ် ထင်နေကြတာ။ ဒါပေမဲ့ ပရိသတ်ထဲက ဂရိအတွေးအခေါ်သမားတချို့ကတော့ နတ်ဘုရားတစ်ပါးဟာ လူတွေဆီက ဘာမှ မလိုဘူးလို့ ယူဆကြတယ်။ ဒါကြောင့် ဘုရားသခင်အတွက် “လူတွေ အလုပ်အကျွေးပြုစရာလည်း မလိုဘူး” ဆိုတဲ့ ပေါလုစကားကို သူတို့ လက်ခံနိုင်မယ်။ မှန်ပါတယ်၊ လူတွေဆီက ဖန်ဆင်းရှင် ဘာမှ မလိုအပ်ဘူး။ လူတွေ လိုအပ်တဲ့ နေ၊ မိုးနဲ့ အသီးအနှံ ထွက်တဲ့ မြေအပါအဝင် “အသက်နဲ့ ထွက်သက်ဝင်သက်ကို” တောင် ဘုရားက ပေးထားတာ။ (တ. ၁၇:၂၅။ က. ၂:၇) ဒါကြောင့် အရာခပ်သိမ်း ပေးသနားရှင် ဘုရားသခင်ဟာ လူသားတွေကို မှီခိုစရာ မလိုဘူး။

၁၅။ တခြားလူမျိုးတွေထက် သာတယ်လို့ အေသင်မြို့သားတွေ ယူဆနေတာကို ပေါလု ဘယ်လို တည့်မတ်ပေးသလဲ။ ပေါလုရဲ့ ပုံသက်သေကနေ ဘယ်အရေးကြီး သင်ခန်းစာ ရသလဲ။

^၁၅ ဘုရားသခင်ဟာ လူကို ဖန်ဆင်းတယ်။ အေသင်မြို့သားတွေက မိမိတို့ဟာ တခြားလူမျိုးတွေထက် သာတယ်လို့ ယူမှတ်တယ်။ ဒါပေမဲ့ နိုင်ငံသားဂုဏ်၊ လူမျိုးဂုဏ် တက်တာဟာ အမှန်တရားနဲ့ ဆန့်ကျင်တယ်။ (တရား. ၁၀:၁၇) ကိုင်တွယ်ရခက်တဲ့ ဒီကိစ္စကို ပေါလု လိမ္မာပါးနပ်စွာ၊ ကျွမ်းကျင်စွာ  ဖြေရှင်းခဲ့တယ်။ “ဘုရားသခင်ဟာ လူတစ်ဦးတည်းကနေ လူအမျိုးမျိုးကို ဖန်ဆင်း” တယ်လို့ ပြောလိုက်တဲ့အခါ ပရိသတ် စဉ်းစားစရာ ဖြစ်သွားမှာပဲ။ (တ. ၁၇:၂၆) ကမ္ဘာဦးကျမ်းမှာ ပါတဲ့ လူသားမျိုးနွယ်ရဲ့ အဖ အာဒံကို ရည်ညွှန်းနေတာ။ (က. ၁:၂၆-၂၈) လူအပေါင်းဟာ လူတစ်ဦးတည်းကနေ ပေါက်ဖွားလာလို့ ပိုသာတဲ့ လူမျိုး၊ နိုင်ငံသားဆိုတာ မရှိဘူး။ ပေါလု ဆိုလိုချင်တာကို နားထောင်နေသူတွေ သဘောပေါက်မှာပဲ။ ပေါလုရဲ့ ပုံသက်သေကနေ အရေးကြီး သင်ခန်းစာ ရတယ်။ ကျွန်တော်တို့ သက်သေခံချိန်မှာ လိမ္မာပါးနပ်မှု ရှိရှိ၊ အကျိုးသင့်အကြောင်းသင့် သဘောနဲ့ ဟောပေမဲ့ တခြားသူတွေ လက်ခံအောင် အမှန်တရားကို လျှော့ပေါ့ပြောမှာတော့ မဟုတ်ဘူး။

၁၆။ လူတွေအတွက် ဖန်ဆင်းရှင်ရဲ့ ရည်ရွယ်ချက်က ဘာလဲ။

^၁၆ လူတွေ မိမိနဲ့ ရင်းနှီးစေဖို့ ဘုရား ရည်ရွယ်တယ်။ လူတွေ တည်ရှိရတဲ့ ရည်ရွယ်ချက်ကို ပေါလုရဲ့ ပရိသတ်ထဲက အတွေးအခေါ်သမားတွေ နှစ်ပေါင်းများစွာ ငြင်းခုံဆွေးနွေးခဲ့ကြရင်တောင် ကျေနပ်လောက်တဲ့အဖြေ ရမှာ မဟုတ်ဘူး။ ပေါလုကတော့ ဖန်ဆင်းရှင်ရဲ့ ရည်ရွယ်ချက်ကို ဒီလို ရှင်းရှင်းလင်းလင်း ဖော်ပြတယ်– “ဘုရားသခင်ကို ကြိုးစားရှာမယ်ဆိုရင် တကယ်ပဲ တွေ့နိုင်မယ်။ တကယ်ဆိုရင် ဘုရားသခင်ဟာ ကျွန်တော်တို့တစ်ယောက်နဲ့မှ မဝေးပါဘူး။” (တ. ၁၇:၂၇) အေသင်မြို့သားတွေ မသိတဲ့ ဘုရားသခင်ဟာ လူတွေ မသိနိုင်တဲ့ ဘုရား မဟုတ်ဘူး။ ဘုရားသခင်ဟာ မိမိကို အမှန်တကယ် တွေ့လိုသူ၊ သိကျွမ်းလိုသူတွေရဲ့ အနီးအပါးမှာ ရှိတယ်။ (ဆာ. ၁၄၅:၁၈) “ကျွန်တော်တို့” ဆိုတဲ့ စကားကို ပေါလု သုံးခဲ့ကြောင်း သတိပြုပါ။ ဒါက ဘုရားသခင်ကို “ရှာ” ရမယ့်သူတွေထဲမှာ ကိုယ်တိုင် ပါဝင်တယ်လို့ ဆိုလိုခြင်း ဖြစ်တယ်။

၁၇၊ ၁၈။ လူတွေမှာ ဘုရားသခင်နဲ့ ရင်းနှီးချင်စိတ် ဘာကြောင့် ရှိသင့်သလဲ။ ပရိသတ် လက်ခံနိုင်ဖို့ ပေါလု ပြောဆိုပုံကနေ ဘာသင်ယူနိုင်သလဲ။

^၁၇ လူတွေမှာ ဘုရားနဲ့ ရင်းနှီးချင်စိတ် ရှိသင့်တယ်။ “ဘုရားသခင်ကြောင့်သာ ကျွန်တော်တို့ ဖြစ်တည်နေတာ၊ အသက်ရှင်ပြီး သွားလာလှုပ်ရှားနေတာပါ” လို့ ပေါလု ပြောတယ်။ ဒါဟာ ဘီစီ ခြောက် ရာစုက ခရိကျွန်းသား ကဗျာဆရာ အက်ပီမီနီဒီးစ်ရဲ့ စကားကို ရည်ညွှန်းနေတာလို့ ပညာရှင်တချို့ ဆိုတယ်။ “ခင်ဗျားတို့ရဲ့ ကဗျာဆရာတချို့တောင် ‘ငါတို့လည်း ဘုရားရဲ့ သားသမီးတွေပဲ’ လို့ စပ်ဆိုကြတယ် မဟုတ်လား” လို့ ပေါလု ပြောတယ်။ ဒါဟာ လူတွေ ဘုရားသခင်နဲ့ ရင်းနှီးချင်စိတ် ရှိသင့်တဲ့ နောက်အကြောင်းရင်း တစ်ခုပဲ။ (တ. ၁၇:၂၈) ဘုရားသခင် ဖန်ဆင်းတဲ့ လူတစ်ဦးတည်းကနေ လူအားလုံး ဆင်းသက်လာတဲ့အတွက် ဘုရားနဲ့ တော်စပ်တယ်လို့ လူတွေ ခံစားသင့်တယ်။ ပေါလုဟာ မိမိရဲ့ ပရိသတ် လက်ခံလာစေဖို့ သူတို့ တန်ဖိုးထားတဲ့ ဂရိစာပေတွေကို ပညာရှိရှိ တိုက်ရိုက် ကိုးကားခဲ့တယ်။ e ကျွန်တော်တို့လည်း ပေါလုရဲ့ ပုံသက်သေကို တုပပြီး လောကသမိုင်း၊ စွယ်စုံကျမ်း၊ လူတွေ လက်ခံထားတဲ့ ရည်ညွှန်းစာပေတွေထဲက အချက်အလက်တချို့ကို တစ်ခါတလေ ကိုးကားနိုင်တယ်။ ဥပမာ၊ လူအများ အသိအမှတ်ပြုတဲ့ စာပေထဲက သင့်တော်တဲ့ အချက်တစ်ခုကို ကိုးကားခြင်းအားဖြင့် မှားယွင်းတဲ့ ဘာသာရေး အကျင့်ဓလေ့တွေ၊ အထိမ်းအမှတ်ပွဲတွေရဲ့ ရင်းမြစ်ကို သိအောင် ရှင်းပြနိုင်တယ်။

^၁၈ ပေါလုဟာ ဘုရားသခင်အကြောင်း အမှန်တရားကို ပရိသတ် လက်ခံနိုင်ဖို့ ဟောပြောနည်းကို အလိုက်သင့် ပြောင်းလဲတယ်။ အရေးပါတဲ့ ဒီအကြောင်းတွေကို အေသင်မြို့သားတွေ ကြားပြီးနောက် ဘာဆက်လုပ်ဖို့ လိုသလဲဆိုတာ ပေါလု ဆက်ပြောတယ်။

၁၉၊ ၂၀။ (က) ရုပ်တု ကိုးကွယ်တာ ဘယ်လောက် မိုက်မဲကြောင်း ပေါလု ဘယ်လို လိမ္မာပါးနပ်စွာ ဖော်ထုတ်သလဲ။ (ခ) ပေါလုရဲ့ ပရိသတ်တွေ ဘာလုပ်ဖို့ လိုသလဲ။

^၁၉ နားထောင်သူတွေ လုပ်သင့်ရာကို ပေါလု ပြောပြတယ်။ “ဘုရားရဲ့ သားသမီးတွေဆိုတော့ ဘုရားသခင်ဟာ လူတွေ ထုလုပ်ဖန်တီးထားတဲ့ ရွှေရုပ်တု၊ ငွေရုပ်တု၊ ကျောက်ရုပ်တုတွေနဲ့ အတူတူပဲလို့ ကျွန်တော်တို့ မယူဆသင့်ဘူး” လို့ ဂရိစာပေတွေကို ကိုးကားပြီး ပြောတယ်။ (တ. ၁၇:၂၉) လူတွေကို ဘုရား ဖန်ဆင်းထားတယ်ဆိုရင် ဘုရားသခင်ဟာ လူတွေ လုပ်တဲ့ ရုပ်တုနဲ့ ဘယ်လိုလုပ် တူပါ့မလဲ။ ပေါလု လိမ္မာပါးနပ်မှု ရှိရှိ ကျိုးကြောင်းဆင်ခြင်ပြလို့ ရုပ်တုကိုးကွယ်တာ ဘယ်လောက် မိုက်မဲကြောင်း ပေါ်လွင်သွားတယ်။ (ဆာ. ၁၁၅:၄-၈။ ဟေရှာ. ၄၄:၉-၂၀) “ကျွန်တော်တို့ မယူဆသင့်ဘူး” လို့ ပြောတဲ့အတွက် ပရိသတ် ခံရ မခက်တော့ဘူး။

^၂၀ “အဲဒီလို မသိနားမလည်ခဲ့တဲ့ [ရုပ်တုကိုးကွယ်သူတွေကို နှစ်သက်မယ်လို့ လူတွေ ယူမှတ်ခဲ့တဲ့] အချိန်ကာလတွေကို ဘုရားသခင်က အပြစ်မယူပေမဲ့ အခုတော့ နေရာတိုင်းမှာရှိတဲ့ လူတွေကို နောင်တရကြပါလို့ ပြောနေတယ်” လို့ ပေါလု ရှင်းရှင်းလင်းလင်း ပြောတယ်။ နားထောင်နေသူတွေ တစ်ခုခု လုပ်ဖို့ လိုတယ်လို့ ပြောနေတာ။ (တ. ၁၇:၃၀) နောင်တယူသင့်တယ်လို့ ပေါလု ပြောလိုက်လို့ ပရိသတ်တချို့ လန့်သွားကြမှာပဲ။ ဒါပေမဲ့ ဘုရားဟာ အသက်ပေးရှင် ဖြစ်လို့ ကိုယ့်အသက်ရှင်နေထိုင်ပုံနဲ့ပတ်သက်ပြီး ဘုရားဆီမှာ စာရင်းရှင်းရမယ်ဆိုတာ နားလည်အောင် ပေါလု ထိထိရောက်ရောက် ပြောပြတယ်။ သူတို့ ဘုရားသခင်ကို ရှာရမယ်။ ဘုရားနဲ့ပတ်သက်တဲ့ အမှန်တရားကို သင်ယူရမယ်။ အမှန်တရားနဲ့အညီ အသက်တာတစ်ခုလုံးကို ပြုပြင်ပြောင်းလဲရမယ်။ ဒီလိုလုပ်နိုင်ဖို့ အေသင်မြို့သားတွေဟာ ရုပ်တုကိုးကွယ်တာ အပြစ် ဖြစ်ကြောင်း အသိအမှတ်ပြုရမယ်။ ဒါကို ရှောင်ရမယ်။

၂၁၊ ၂၂။ ပေါလု ဟောပြောချက်ကို ဘယ်လို ပိုင်ပိုင်နိုင်နိုင် နိဂုံးချုပ်သလဲ။ ပေါလုရဲ့ စကားတွေက ဒီနေ့ ကျွန်တော်တို့အတွက် ဘာအဓိပ္ပာယ် ရှိသလဲ။

 ^၂၁ ဟောပြောချက်ကို ပေါလု ဒီလို ပိုင်ပိုင်နိုင်နိုင် နိဂုံးချုပ်တယ်– “ဘုရားသခင်က ကိုယ်တိုင် ခန့်အပ်ထားသူကတစ်ဆင့် ကမ္ဘာပေါ်မှာရှိတဲ့ လူတွေကို ဖြောင့်မတ်ခြင်းနဲ့အညီ တရားစီရင်ဖို့ နေ့ရက်တစ်ရက် သတ်မှတ်ထားတယ်။ အဲဒီနေ့ သေချာပေါက် ရောက်လာလိမ့်မယ်။ ဘာလို့လဲဆိုတော့ ဘုရားသခင်က ခန့်အပ်ထားသူကို သေရာကနေ ရှင်ပြန်ထမြောက်စေပြီ ဖြစ်လို့ပဲ။” (တ. ၁၇:၃၁) တရားစီရင်ရာနေ့ ရောက်လာတော့မှာ ဖြစ်လို့ စစ်မှန်တဲ့ ဘုရားသခင်ကို ရှာဖို့ အရေးကြီးတယ်။ ခန့်အပ်ထားတဲ့ တရားသူကြီးဟာ ဘယ်သူလဲဆိုတာ ပေါလု မပြောပြဘူး။ ဒါပေမဲ့ အဲဒီတရားသူကြီးဟာ လူအဖြစ် အသက်ရှင်ခဲ့တယ်၊ သေပြီးနောက် ဘုရားသခင် ထမြောက်စေခဲ့တယ်ဆိုတာ ပြောပြတယ်။

^၂၂ စိတ်လှုပ်ရှားစရာကောင်းတဲ့ နိဂုံးချုပ်စကားဟာ ဒီနေ့ ကျွန်တော်တို့အတွက် အဓိပ္ပာယ် အများကြီး ရှိတယ်။ ဘုရား ခန့်အပ်ထားတဲ့ တရားသူကြီးဟာ ရှင်ပြန်ထမြောက်ပြီး ဖြစ်တဲ့ ယေရှုခရစ်ပဲဆိုတာ ကျွန်တော်တို့ သိကြတယ်။ (ယော. ၅:၂၂) တရားစီရင်ရာနေ့ဟာ အနှစ်တစ်ထောင် ကြာမှာ ဖြစ်ပြီး အလျင်အမြန် လာနေကြောင်းကိုလည်း သိထားကြတယ်။ (ဗျာ. ၂၀:၄၊ ၆) တရားစီရင်ရာနေ့ကို ကြောက်စရာ မလိုဘူး။ သစ္စာရှိသူအဖြစ် သတ်မှတ်ခံရသူတွေဟာ အဲဒီအချိန်မှာ ကောင်းချီးများစွာ ခံစားရမှာ ဖြစ်လို့ပဲ။ အရေးပါဆုံး အံ့ဖွယ်အမှု ဖြစ်တဲ့ ယေရှုခရစ်ရဲ့ ရှင်ပြန်ထမြောက်ခြင်းဟာ ကျွန်တော်တို့ စောင့်မျှော်နေတဲ့ ကြည်နူးဖွယ် အနာဂတ် တကယ် ရောက်လာမှာကို အာမခံတယ်။

၂၃။ ပေါလုရဲ့ ဟောပြောချက်ကို ဘယ်လို တုံ့ပြန်ကြသလဲ။

^၂၃ ပေါလုရဲ့ ဟောပြောချက်ကို အမျိုးမျိုး တုံ့ပြန်ကြတယ်။ တချို့က ရှင်ပြန်ထမြောက်ခြင်းအကြောင်း ကြားတဲ့အခါ “လှောင်ကြတယ်။” တချို့က “ဒီအကြောင်းကို ထပ်ပြီး နားထောင်ကြည့်တာပေါ့” လို့ အားနာပါးနာ ပြောကြတယ်။ (တ. ၁၇:၃၂) “တချို့ကတော့ ပေါလုနဲ့ ပူးပေါင်းပြီး ယုံကြည်သူတွေ ဖြစ်လာတယ်။ အာရေတောင်က တရားသူကြီး ဒယောနုသိ၊ ဒမာရိလို့ခေါ်တဲ့ အမျိုးသမီးနဲ့ တခြားသူတွေလည်း ယုံကြည်လာကြတယ်။” (တ. ၁၇:၃၄) ကျွန်တော်တို့လည်း အမှုဆောင်လုပ်ငန်းမှာ တုံ့ပြန်မှု အမျိုးမျိုး ကြုံရနိုင်တယ်။ တချို့က လှောင်မယ်။ တချို့က ယဉ်ယဉ်ကျေးကျေး ငြင်းမယ်။ ဒါပေမဲ့ ဘုရားသခင့် နိုင်ငံတော်သတင်းကို တချို့ လက်ခံနာယူပြီး ယုံကြည်သူတွေ ဖြစ်လာတဲ့အခါ ကျွန်တော်တို့ ဝမ်းသာကြတယ်။

၂၄။ အာရေတောင်ပေါ် ရပ်ပြီး ပေါလု ပေးခဲ့တဲ့ ဟောပြောချက်ကနေ ကျွန်တော်တို့ ဘာသင်ယူနိုင်သလဲ။

^၂၄ ပေါလုရဲ့ ဟောပြောချက်ကို သုံးသပ်ကြည့်တဲ့အခါ ယုတ္တိရှိရှိ တင်ဆက်ခြင်း၊ ယုံကြည်လက်ခံလာအောင် ဆွေးနွေးတင်ပြခြင်း၊ ပရိသတ်နဲ့အညီ အလိုက်သင့် ပြုပြင်ပြောင်းလဲခြင်းအကြောင်း သင်ယူနိုင်တယ်။ ဒါ့အပြင် ဘာသာရေး အယူအဆ အမှားတွေကြောင့် ဉာဏ်မျက်စိ ကွယ်နေသူတွေကို စိတ်ရှည်ဖို့၊ လိမ္မာပါးနပ်မှု ရှိရှိ ဆက်ဆံဖို့ လိုကြောင်း သင်ယူနိုင်တယ်။ ဒါပေမဲ့ ပရိသတ် လက်ခံအောင် အမှန်တရားကို လျှော့ပေါ့မပြောသင့်ဘူး။ ပေါလုရဲ့ ပုံသက်သေကို အတုယူခြင်းအားဖြင့် အမှုဆောင်မှာ ပိုထိရောက်တဲ့ သွန်သင်သူတွေ ဖြစ်လာနိုင်တယ်။ ကြီးကြပ်မှူးတွေလည်း အသင်းတော်မှာ ပိုအရည်အချင်း ပြည့်မီတဲ့ သွန်သင်သူတွေ ဖြစ်လာနိုင်မယ်။ ‘ဘုရားသခင်ကို ရှာတွေ့နိုင်’ ဖို့ တခြားသူတွေကို ကူညီပေးရာမှာ အသင့်ရှိသူတွေ ဖြစ်လာနိုင်ကြမယ်။—တ. ၁၇:၂၇။