၁-၃။ ဘယ်စိတ်အာရုံကို ပေတရု မြင်သလဲ။ ဒီစိတ်အာရုံကို နားလည်ဖို့ ဘာကြောင့် အရေးကြီးသလဲ။

 အေဒီ ၃၆၊ ဆောင်းဦးရာသီရဲ့ နွေးထွေးတဲ့ နေခြည် ဖြာကျချိန် ယုပ္ပေဆိပ်ကမ်းမြို့၊ ပင်လယ်ကမ်းနားက အိမ်တစ်အိမ်ရဲ့ အမိုးပေါ်မှာ ပေတရု ဆုတောင်းနေတယ်။ အဲဒီအိမ်မှာ တည်းတာ ရက်အနည်းငယ် ကြာပြီ။ ဒီအိမ်မှာ လာတည်းတယ်ဆိုကတည်းက ပေတရုမှာ ခွဲခြားဆက်ဆံတဲ့သဘော မရှိတာ ထင်ရှားတယ်။ အိမ်ရှင်က ရှိမုန်လို့ခေါ်တဲ့ သားရေလုပ်သား ဖြစ်နေလို့ပဲ။ ဒီအလုပ်မျိုး လုပ်တဲ့သူရဲ့ အိမ်မှာ ဂျူးတွေ တည်းခိုချင်ကြမှာ မဟုတ်ဘူး။ a ဒါတောင် ယေဟောဝါရဲ့ မျက်နှာမလိုက်မှုကနေ အရေးကြီး သင်ခန်းစာတစ်ခု ပေတရု သင်ရဦးမယ်။

^၂ ပေတရု ဆုတောင်းနေတုန်း စိတ်အာရုံတစ်ခု မြင်တယ်။ ဂျူးတစ်ယောက်အတွက် စိတ်အနှောင့်အယှက် ဖြစ်စေမယ့်အရာကို တွေ့တယ်။ ပညတ်တရားအရ မစင်ကြယ်တဲ့ တိရစ္ဆာန်တွေ ပါတဲ့ ပိတ်ထည်ကြီးလို အရာတစ်ခု ကောင်းကင်ကနေ ကျလာတယ်။ အဲဒါတွေကို သတ်စားဖို့ ကောင်းကင်က အသံ ကြားတဲ့အခါ “ညစ်ညူးတဲ့အရာ၊ မစင်ကြယ်တဲ့အရာ တစ်ခုမှ ကျွန်တော် မစားဖူးပါဘူး” လို့ ပေတရု ပြန်ပြောတယ်။ အဲဒီအခါ “ဘုရားသခင် စင်ကြယ်စေပြီးသားအရာကို ညစ်ညူးတယ်လို့ မပြောပါနဲ့တော့” ဆိုပြီး ပေတရုကို သုံးကြိမ် ပြောတယ်။ (တ. ၁၀:၁၄-၁၆) အဲဒီစိတ်အာရုံကြောင့် ပေတရု ခဏတော့ စိတ်ရှုပ်သွားတယ်။

^၃ ပေတရု မြင်ရတဲ့ စိတ်အာရုံက ဘာကို ဆိုလိုသလဲ။ လူတွေကို ယေဟောဝါ ဘယ်လို ရှုမြင်ကြောင်း ဖော်ပြတဲ့ ဒီစိတ်အာရုံကို နားလည်ဖို့ အရေးကြီးတယ်။ ခရစ်ယာန်စစ်တွေအနေနဲ့ ကျွန်တော်တို့ဟာ လူတွေကို ဘုရား မြင်သလို မမြင်ရင် နိုင်ငံတော်အကြောင်း စေ့စေ့စပ်စပ် သက်သေခံနိုင်မှာ မဟုတ်ဘူး။ စိတ်အာရုံအကြောင်း နားလည်နိုင်ဖို့ ဘာတွေ ဖြစ်ခဲ့သလဲ လေ့လာကြရအောင်။

၄၊ ၅။ ကော်နေလိဟာ ဘယ်သူလဲ။ ဆုတောင်းနေတုန်း ဘာဖြစ်ခဲ့သလဲ။

^၄ မြောက်ဘက် မိုင် ၃၀ အကွာမှာ ရှိတဲ့ ကဲသရိမြို့မှာ ကော်နေလိဆိုတဲ့ လူတစ်ယောက် အရင်တစ်နေ့က စိတ်အာရုံတစ်ခု ရမှန်း ပေတရု မသိဘူး။ ရောမ တပ်စုမှူး ကော်နေလိဟာ “ဘုရားတရား ကြည်ညိုသူ” ဖြစ်တယ်။ b “သူရော အိမ်သားတွေပါ ဘုရားသခင်ကို ကြောက်ရွံ့ရိုသေ” တဲ့အတွက်  ပုံသက်သေကောင်းတဲ့ အိမ်ထောင်ဦးစီးလည်း ဖြစ်တယ်။ ကော်နေလိဟာ ဂျူးဘာသာ ပြောင်းဝင်လာသူ မဟုတ်ဘူး။ အရေဖျား ဖြတ်မထားတဲ့ လူမျိုးခြား ဖြစ်တယ်။ ဒါပေမဲ့ ဆင်းရဲတဲ့ ဂျူးတွေကို ထောက်ထားစာနာပြီး ကူညီပေးတတ်တယ်။ “ဘုရားသခင်ဆီ အမြဲ တိုးလျှိုးအသနားခံတတ်သူ” ဖြစ်တယ်။—တ. ၁၀:၂။

^၅ မွန်းလွဲ ၃ နာရီလောက်မှာ ကော်နေလိ ဆုတောင်းနေတုန်း စိတ်အာရုံတစ်ခု မြင်ရတယ်။ “မင်းရဲ့ ဆုတောင်းသံကို ဘုရားသခင် ကြားတယ်။ မင်း ပေးကမ်းစွန့်ကြဲတာတွေကိုလည်း ဘုရားသခင် မြင်တယ်” လို့ ကောင်းကင်တမန် ပြောတယ်။ (တ. ၁၀:၄) ကော်နေလိဟာ ကောင်းကင်တမန် ညွှန်ကြားတဲ့အတိုင်း တမန်တော် ပေတရုကို ခေါ်ဖို့ လူလွှတ်လိုက်တယ်။ တစ်ခါမှ မကြုံဖူးတာကို သူ ကြုံရတော့မယ်။ ကယ်တင်ခြင်းသတင်း ကြားရတော့မယ်။

၆၊ ၇။ (က) အမှန်တရား ရှာဖွေနေသူတွေရဲ့ ဆုတောင်းချက်ကို ဘုရားသခင် ဖြေကြားပေးကြောင်း ဖော်ပြတဲ့ တွေ့ကြုံမှုတစ်ခု ပြောပြပါ။ (ခ) အဲဒီလို တွေ့ကြုံမှုတွေအရ ဘာကောက်ချက် ချနိုင်သလဲ။

^၆ ဒီနေ့ခေတ်မှာကော အမှန်တရား ရှာနေတဲ့ စိတ်ရင်းမှန်သူတွေရဲ့ ဆုတောင်းချက်ကို ဘုရားသခင် ဖြေပေးသလား။ တွေ့ကြုံမှုတစ်ခု သုံးသပ်ကြည့်ပါ။ အယ်လ်ဘေးနီးယားနိုင်ငံက အမျိုးသမီးတစ်ယောက်ဟာ သတင်းကောင်း ဟောနေတဲ့ ညီအစ်မတစ်ယောက်ဆီကနေ သားသမီး ပြုစုပျိုးထောင်ခြင်းအကြောင်း ပါတဲ့ ကင်းမျှော်စင် တစ်စောင် ရတယ်။ c ဒါနဲ့ “သမီးတွေကို ပြုစုပျိုးထောင်နိုင်အောင် ကူညီပေးပါဆိုပြီး ဘုရားဆီ ဆုတောင်းနေတာ။ ရှင့်ကို ဘုရား လွှတ်လိုက်တာ။ ကျွန်မ လိုနေတာ ဒါပဲ” လို့ ညီအစ်မကို ပြောတယ်။ အဲဒီအမျိုးသမီးနဲ့ သမီးတွေ ကျမ်းစာ စလေ့လာပြီး ခင်ပွန်းဖြစ်သူလည်း နောက်ပိုင်းမှာ လေ့လာတယ်။

^၇ ဒီလိုတွေ့ကြုံမှုက တစ်ခုတည်းလား။ မဟုတ်ပါဘူး။ ကမ္ဘာတစ်ဝန်းမှာ ဒီလိုတွေ့ကြုံမှုတွေ များလွန်းလို့ တိုက်ဆိုင်မှုတော့ မဖြစ်နိုင်ဘူး။ ဒါဆိုရင် ဘာကောက်ချက် ချနိုင်သလဲ။ ပထမ၊ မိမိကို စိတ်ရင်းမှန်နဲ့ ရှာဖွေသူတွေရဲ့ ဆုတောင်းချက်ကို ယေဟောဝါ ဖြေပေးတယ်။ (၁ ဘု. ၈:၄၁-၄၃။ ဆာ. ၆၅:၂) ဒုတိယ၊ ဟောပြောခြင်းလုပ်ငန်းကို ကောင်းကင်တမန်တွေ ထောက်မနေတယ်။—ဗျာ. ၁၄:၆၊ ၇။

၈၊ ၉။ စွမ်းအားတော်အကူအညီကြောင့် ပေတရု ဘာသိသွားသလဲ။ ဘာဆက်လုပ်သလဲ။

^၈ ပေတရု အိမ်မိုးပေါ် မှာ ရှိနေတုန်းပဲ။ စိတ်အာရုံရဲ့ အဓိပ္ပာယ်ကို “စဉ်းစားမရ ဖြစ်နေ” တုန်းပဲ။ အဲဒီအချိန်မှာ ကော်နေလိ လွှတ်လိုက်တဲ့ လူတွေ ရောက်လာတယ်။ (တ. ၁၀:၁၇) ပညတ်တရားအရ မစင်ကြယ်ဘူးလို့ သတ်မှတ်ထားတဲ့ အစာကို မစားဘူးလို့ သုံးကြိမ်တိတိ ငြင်းခဲ့တဲ့ ပေတရုဟာ သူတို့နောက် လိုက်သွားပြီး လူမျိုးခြားတစ်ယောက်ရဲ့ အိမ်ထဲ လိုလိုလားလား ဝင်မလား။ သန့်ရှင်းသော စွမ်းအားတော်ကတစ်ဆင့် မိမိအလိုတော်ကို ယေဟောဝါ ဖော်ပြတယ်။ “မင်းကို လူသုံးယောက် ရှာနေတယ်။ အခု၊ ထပြီး ဆင်းသွားပါ။ သူတို့ကို ငါလွှတ်လိုက်တာ ဖြစ်လို့ စိတ်ချလက်ချသာ လိုက်သွားပါ” လို့ ပေတရုကို ပြောတယ်။ (တ. ၁၀:၁၉၊ ၂၀) မြင်ရတဲ့ စိတ်အာရုံက စွမ်းအားတော်ရဲ့ လမ်းညွှန်မှုကို လိုက်နာဖို့ ပေတရုကို အသင့်ပြင်ပေးတယ်။

^၉ ဘုရား ညွှန်ကြားလို့ ကော်နေလိ လူလွှတ်လိုက်တာ ဖြစ်မှန်း ပေတရု သိသွားတယ်။ ဒါကြောင့် အဲဒီလူမျိုးခြားတွေကို အိမ်ထဲ ခေါ်ပြီး “ဧည့်ဝတ်ပြုတယ်။” (တ. ၁၀:၂၃) ပေတရုဟာ ဘုရားအလိုတော်ကို သိလာတာနဲ့အမျှ မိမိရှုမြင်ပုံကို အလိုက်သင့် စပြောင်းလဲနေပြီ။

၁၀။ လူမျိုးတော်ကို ယေဟောဝါ ဘယ်လို ကူညီပေးနေသလဲ။ ကိုယ့်ကိုယ်ကိုယ် ဘယ်လို မေးသင့်သလဲ။

^၁၀ ယေဟောဝါက မိမိအလိုတော်ကို လူမျိုးတော် နားလည်ဖို့ အဆင့်ဆင့် ကူညီပေးနေတယ်။ (ပညာ. ၄:၁၈) “သစ္စာနဲ့ သတိပညာရှိတဲ့ ကျွန်” ကို စွမ်းအားတော်နဲ့ လမ်းညွှန်နေတယ်။ (မ. ၂၄:၄၅) တစ်ခါတလေ ကျမ်းစာ နားလည်မှု၊ အဖွဲ့အစည်း လုပ်ထုံးလုပ်နည်း ပြောင်းလဲတာတွေ ရှိနိုင်တယ်။ အဲဒီအခါ ‘ပြုပြင်ပြောင်းလဲမှုတွေကို ငါ ဘယ်လို တုံ့ပြန်သလဲ။ ဘုရားသခင့် စွမ်းအားတော် လမ်းညွှန်မှုကို လိုလိုလားလား လက်အောက်ခံနေသလား’ လို့ ကိုယ့်ကိုယ်ကိုယ် မေးသင့်တယ်။

၁၁၊ ၁၂။ ကဲသရိမြို့ကို ရောက်တဲ့အခါ ပေတရု ဘာလုပ်သလဲ။ ဘာနားလည်လာသလဲ။

^၁၁ စိတ်အာရုံမြင်ပြီး နောက်တစ်နေ့မှာ ကော်နေလိ လွှတ်လိုက်သူ သုံးယောက်၊ ယုပ္ပေမြို့က ဂျူး “ညီအစ်ကို ခြောက်ယောက်၊” စုစုပေါင်း ကိုးယောက်နဲ့ ပေတရု ကဲသရိမြို့ကို သွားကြတယ်။ (တ. ၁၁:၁၂) ကော်နေလိဟာ လူမျိုးခြား “ဆွေမျိုးသားချင်းတွေ၊ ရင်းနှီးတဲ့ မိတ်ဆွေတွေ” ကို စုထားပြီး စောင့်နေတယ်။ (တ. ၁၀:၂၄) ကော်နေလိအိမ် ရောက်တဲ့အခါ တစ်ခါမှ မစဉ်းစားဖူးတာ တစ်ခု ပေတရု လုပ်ခဲ့တယ်။ အရေဖျား ဖြတ်မထားတဲ့ လူမျိုးခြားရဲ့ အိမ်ထဲ ဝင်လိုက်တာပါပဲ။ “ဂျူးတစ်ယောက်က လူမျိုးခြားနဲ့ ပေါင်းသင်းရင်၊ လူမျိုးခြားဆီ လည်ပတ်ရင် ဂျူးပညတ်ကို ချိုးဖောက်ရာရောက်မှန်း ခင်ဗျားတို့ သိပါတယ်။ ဒါပေမဲ့ ဘယ်သူ့ကိုမှ မသန့်ရှင်းသူ၊ မစင်ကြယ်သူလို့ မယူဆသင့်တဲ့အကြောင်း ကျွန်တော့်ကို ဘုရားသခင် ဖော်ပြလိုက်ပြီ” လို့ ပေတရု ပြောတယ်။ (တ. ၁၀:၂၈) မိမိမြင်ရတဲ့ စိတ်အာရုံဟာ အစားအစာနဲ့သာ သက်ဆိုင်ရုံ မဟုတ်ဘဲ တခြားသင်ခန်းစာတစ်ခု သင်ပေးလိုကြောင်း အခု ပေတရု နားလည်ပြီ။ “ဘယ်သူ့ကိုမှ [လူမျိုးခြားကိုတောင်] မသန့်ရှင်းသူ” လို့ “မယူဆသင့်” ဘူး။

^၁၂ စုရုံးရောက်ရှိနေသူတွေဟာ ပေတရု ပြောမယ့်စကားကို ကြားချင်နေကြပြီ။ “ခင်ဗျားကို  ယေဟောဝါဘုရား မိန့်မှာထားသမျှ ကျွန်တော်တို့ ကြားနာချင်လို့ ဘုရားသခင်ရဲ့ ရှေ့တော်မှာ အခုလိုစုရုံးပြီး ရောက်နေကြတာပါ” လို့ ကော်နေလိ ပြောတယ်။ (တ. ၁၀:၃၃) စိတ်ဝင်စားသူတစ်ယောက်ဆီက အဲဒီလိုစကားမျိုး ကြားရရင် သင် ဘယ်လို ခံစားရမလဲ။ “ဘုရားသခင် မျက်နှာမလိုက်မှန်း ကျွန်တော် ကောင်းကောင်း သဘောပေါက်သွားပြီ။ ဘယ်လူမျိုးဖြစ်ဖြစ် ဘုရားသခင်ကို ကြောက်ရွံ့ရိုသေပြီး မှန်ရာ လုပ်မယ်ဆိုရင် ဘုရားရဲ့ နှစ်သက်လက်ခံမှုကို ရတာပဲ” လို့ ပေတရု စပြောတယ်။ (တ. ၁၀:၃၄၊ ၃၅) လူမျိုး၊ နိုင်ငံ၊ အပြင်ပန်းအချက်တွေပေါ် မူတည်ပြီး လူတွေကို ဘုရား မရှုမြင်မှန်း ပေတရု နားလည်ပြီ။ အဲဒီနောက် ယေရှုရဲ့ အမှုဆောင်လုပ်ငန်း၊ သေခြင်း၊ ထမြောက်ခြင်းအကြောင်း ပေတရု ဆက်သက်သေခံတယ်။

၁၃၊ ၁၄။ (က) အေဒီ ၃၆ မှာ ကော်နေလိနဲ့ လူမျိုးခြားတွေ ဘာသာပြောင်းဝင်လာခြင်းမှာ ဘာထူးခြားချက် ရှိသလဲ။ (ခ) လူတွေရဲ့ အပြင်ပန်းကို ကြည့်ပြီး ဘာကြောင့် အကဲမဖြတ်သင့်သလဲ။

^၁၃ “ပေတရု ပြောနေတုန်း” တစ်ခါမှ မဖြစ်ဖူးတာတစ်ခု ဖြစ်လာတယ်။ “လူမျိုးခြားတွေ” အပေါ် သန့်ရှင်းသော စွမ်းအားတော် သက်ရောက်လာတယ်။ (တ. ၁၀:၄၄၊ ၄၅) ဒါဟာ နှစ်ခြင်းမခံခင် စွမ်းအားတော် သွန်းလောင်းခံရကြောင်း ဖော်ပြတဲ့ တစ်ခုတည်းသော ကျမ်းစာမှတ်တမ်းပဲ။ ဘုရား နှစ်သက်လက်ခံတဲ့ အထောက်အထား ဖြစ်ကြောင်း ပေတရု သိတဲ့အတွက် အဲဒီလူမျိုးခြားအုပ်စုကို “နှစ်ခြင်းခံခိုင်းလိုက်တယ်။” (တ. ၁၀:၄၈) အေဒီ ၃၆ မှာ ဒီလူမျိုးခြားတွေ ဘာသာပြောင်းဝင်လာတာက ဂျူးတွေ အထူးမျက်နှာသာရတဲ့ ကာလ ကုန်ဆုံးကြောင်း ဖော်ပြတယ်။ (ဒံ. ၉:၂၄-၂၇) ဒီနည်းနဲ့ ပေတရုဟာ “ကောင်းကင်နိုင်ငံရဲ့ သော့တွေ” ထဲက တတိယမြောက်၊ နောက်ဆုံး သော့ကို သုံးခဲ့တယ်။ (မ. ၁၆:၁၉) အဲဒီသော့က အရေဖျား ဖြတ်မထားတဲ့ လူမျိုးခြားတွေ စွမ်းအားတော်နဲ့ ဘိသိက်ပေးခံရတဲ့ ခရစ်ယာန် ဖြစ်လာဖို့ လမ်းဖွင့်ပေးတယ်။

^၁၄ ‘ဘုရားသခင် မျက်နှာမလိုက်’ ကြောင်း ကျွန်တော်တို့ သိထားတယ်။ (ရော. ၂:၁၁) “လူအမျိုးမျိုးကို ကယ်တင်ခြင်း ရစေဖို့” ဘုရား အလိုရှိတယ်။ (၁ တိ. ၂:၄) ဒါကြောင့် လူတွေကို အပေါ်ယံကြည့်ပြီး အကဲမဖြတ်သင့်ဘူး။ ဘယ်လူမျိုး၊ နိုင်ငံသား၊ ပုံပန်းသွင်ပြင်၊ ဘာသာရေးနောက်ခံ ဖြစ်ပါစေ လူအားလုံးကို ဘုရားနိုင်ငံတော်အကြောင်း စေ့စေ့စပ်စပ် သက်သေခံဖို့ဟာ ကျွန်တော်တို့ရဲ့ တာဝန် ဖြစ်တယ်။

၁၅၊ ၁၆။ ဂျူးခရစ်ယာန်တချို့ ပေတရုကို ဘာကြောင့် ဆန့်ကျင်ကြသလဲ။ ပေတရု ဘယ်လို ရှင်းပြသလဲ။

^၁၅ ပေတရုက ဖြစ်ပျက်သမျှကို ပြောပြချင်လွန်းလို့ ဂျေရုဆလင်မြို့ကို သွားတယ်။ ဒါပေမဲ့ အရေဖျား ဖြတ်မထားတဲ့ လူမျိုးခြားတွေ “ဘုရားသခင်ရဲ့ တရားစကားကို လက်ခံ” ကြပြီဆိုတဲ့ သတင်းဟာ ပေတရု မရောက်ခင်မှာပဲ ပျံ့နှံ့သွားတယ်။ ဂျေရုဆလင်မြို့ကို ပေတရု ရောက်လာတဲ့အခါ “အရေဖျား ဖြတ်တာကို ထောက်ခံသူတွေက သူ့ကို ကဲ့ရဲ့” ကြတော့တယ်။ “အရေဖျားမဖြတ်ထားသူတွေရဲ့ အိမ်ထဲ ဝင်ပြီး သူတို့နဲ့အတူ [ပေတရု] စားသောက်ခဲ့” တဲ့အတွက် စိတ်အနှောင့်အယှက် ဖြစ်နေကြတာ။ (တ. ၁၁:၁-၃) လူမျိုးခြားတွေ ခရစ်ယာန် ဖြစ်လာလို့တော့ မဟုတ်ဘူး။ ဘုရားကျေးကျွန်တွေ ဖြစ်ဖို့ အရေဖျား ဖြတ်ခြင်း အပါအဝင် ပညတ်တရားကို လူမျိုးခြားတွေ လိုက်နာရမယ်လို့ ယူဆနေကြလို့ပဲ။ ဂျူးလူမျိုး တပည့်တချို့ဟာ မောရှေပညတ် အဆုံးတိုင်သွားတာကို လက်ခံဖို့ ခက်နေကြတယ်။

 ^၁၆ ပေတရု ဘယ်လို ရှင်းပြသလဲ။ ဘုရားအလိုတော် ဖြစ်မှန်း မိမိ စိတ်ချသွားရတဲ့ အထောက်အထား လေးခုကို တမန်တော် ၁၁:၄-၁၆ မှာ ပြောပြထားတယ်။ အထောက်အထားတွေကတော့– (၁) ဘုရားဆီက ရတဲ့ စိတ်အာရုံ (အခန်းငယ် ၄-၁၀)၊ (၂) စွမ်းအားတော်ရဲ့ မိန့်မှာချက် (အခန်းငယ် ၁၁၊ ၁၂)၊ (၃) ကော်နေလိဆီ ကောင်းကင်တမန် ရောက်သွားတာ (အခန်းငယ် ၁၃၊ ၁၄)၊ (၄) လူမျိုးခြားတွေအပေါ် စွမ်းအားတော် သွန်းလောင်းတာ (အခန်းငယ် ၁၅၊ ၁၆) တို့ ဖြစ်တယ်။ အဲဒီနောက် “ဘုရားသခင်က သခင်ယေရှုခရစ်ကို ယုံကြည်တဲ့ ကျွန်တော်တို့ကို အဲဒီဆုလက်ဆောင် [သန့်ရှင်းသော စွမ်းအားတော်] ပေးခဲ့သလို သူတို့ [ယုံကြည်သူ လူမျိုးခြားတွေ] ကိုလည်း ပေးတယ်ဆိုရင် ကျွန်တော်က ဘယ်သူမို့လို့ ဘုရားသခင်ကို တားဆီးနိုင်မှာလဲ” လို့ ပေတရု ပြောတယ်။—တ. ၁၁:၁၇။

၁၇၊ ၁၈။ (က) ပေတရုရဲ့ ထွက်ဆိုချက်ကြောင့် ဂျူးခရစ်ယာန်တွေ ဘာဆုံးဖြတ်ရတော့မလဲ။ (ခ) အသင်းတော်ရဲ့ စည်းလုံးမှုကို ဆက်ထိန်းထားဖို့ ဘာကြောင့် ခက်ခဲနိုင်သလဲ။ ကိုယ့်ကိုယ်ကိုယ် ဘယ်မေးခွန်းတွေ မေးသင့်သလဲ။

^၁၇ ပေတရုရဲ့ ထွက်ဆိုချက်ကြောင့် ဂျူးခရစ်ယာန်တွေ တစ်ခုခု ဆုံးဖြတ်ရတော့မယ်။ အရင်က ရှိခဲ့တဲ့ လူမျိုးရေး ဘက်လိုက်မှု မှန်သမျှကို ဖယ်ရှားပြီး နှစ်ခြင်းခံပြီးခါစ လူမျိုးခြားတွေကို ခရစ်ယာန်ချင်းတွေအဖြစ် လက်ခံကြမလား။ မှတ်တမ်းက ဒီလိုပြောတယ်– “ဒီအကြောင်းတွေကို ကြားတဲ့အခါ ပေတရုကို သူတို့ [တမန်တော်တွေနဲ့ တခြား ဂျူးခရစ်ယာန်တွေ] မကန့်ကွက်တော့ဘူး။ ‘ဘုရားသခင်က လူမျိုးခြားတွေကိုလည်း အသက်ရနိုင်ဖို့ နောင်တရခွင့် ပေးသနားလိုက်ပြီပဲ’ ဆိုပြီး ဘုရားကို ဂုဏ်တင်ချီးမွမ်းကြတယ်။” (တ. ၁၁:၁၈) အတွေးအခေါ်ကို ပြုပြင်ခဲ့ကြလို့ အသင်းတော် ဆက်စည်းလုံးခဲ့တယ်။

^၁၈ ဒီနေ့လည်း စစ်မှန်တဲ့ ဝတ်ပြုရေးမှာ ပါဝင်နေသူတွေဟာ “လူမျိုးတွေ၊ မျိုးနွယ်တွေ၊ လူစုတွေ၊ ဘာသာစကားအမျိုးမျိုး ပြောဆိုသူတွေထဲက ထွက်လာ” တာဖြစ်လို့ စည်းလုံးမှုကို ဆက်ထိန်းထားဖို့ ခက်နိုင်တယ်။ (ဗျာ. ၇:၉) အသင်းတော်များစွာမှာ လူမျိုး၊ ယဉ်ကျေးမှု၊ နောက်ခံ မတူသူတွေကို တွေ့ရတယ်။ ကိုယ့်ကိုယ်ကိုယ် ဒီလိုမေးသင့်တယ်– ‘လူမျိုးရေး ဘက်လိုက်မှု မှန်သမျှကို စိတ်ထဲကနေ အမြစ်ပါမကျန် ထုတ်ပစ်ပြီးပြီလား။ ညီအစ်ကို/မတွေနဲ့ ဆက်ဆံတဲ့အခါ မျိုးချစ်စိတ်၊ ယဉ်ကျေးမှု ဂုဏ်မောက်ခြင်း၊ လူမျိုးရေး ခွဲခြားမှု အပါအဝင် ဒီလောကရဲ့ သွေးကွဲစေတဲ့ စိတ်ထားတွေ ဘယ်တော့မှ မလွှမ်းမိုးစေဖို့ ဆုံးဖြတ်ထားသလား။’ လူမျိုးခြားတွေ ဦးဆုံး ဘာသာပြောင်းဝင်လာပြီး နှစ်အနည်းငယ်အကြာမှာ ပေတရု (ကေဖ) ဘာဖြစ်ခဲ့သလဲ။ တခြားသူတွေလို လူမျိုးရေး ခွဲခြားစိတ် ဝင်လာပြီး လူမျိုးခြား  ခရစ်ယာန်တွေနဲ့ “မပေါင်းဖော်တော့ဘဲ ခပ်ခွာခွာ နေ” လို့ ပေါလု ဆုံးမခဲ့ရတယ်။ (ဂလ. ၂:၁၁-၁၄) ကျွန်တော်တို့လည်း လူမျိုးရေး ခွဲခြားမှု ထောင်ချောက်ထဲ မကျဖို့ အမြဲ သတိရှိကြပါစို့။

၁၉။ အန္တိအုတ်မြို့မှာ ရှိတဲ့ ဂျူးခရစ်ယာန်တွေ ဘယ်သူတွေကို စဟောကြသလဲ။ ဘာရလဒ် ရသလဲ။

^၁၉ ဘုရားအလိုကို သိပြီးနောက် အရေဖျား ဖြတ်မထားတဲ့ လူမျိုးခြားတွေကို ယေရှုရဲ့ နောက်လိုက်တွေ စဟောကြသလား။ ဆီးရီးယားပြည်၊ အန္တိအုတ်မြို့မှာ ဘာဖြစ်ခဲ့ကြောင်း သတိပြုပါ။ d အဲဒီမြို့မှာ ဂျူးရပ်ကွက်ကြီးတစ်ခု ရှိတယ်။ အဲဒီဂျူးတွေနဲ့ လူမျိုးခြားတွေကြား ရန်လိုမှု သိပ်မရှိဘူး။ မြို့ထဲက လူမျိုးခြားတွေကို ဟောဖို့ အခြေအနေကောင်းပဲ။ ဒါကြောင့် ဂျူးလူမျိုး တပည့်တချို့က “ဂရိစကားပြောတဲ့ လူတွေဆီ” သတင်းကောင်း စဟောကြတယ်။ (တ. ၁၁:၂၀) ဂရိစကားပြောတဲ့ ဂျူးတွေကိုသာမက အရေဖျား ဖြတ်မထားတဲ့ လူမျိုးခြားတွေကိုပါ ဟောကြတယ်။ ယေဟောဝါ ကောင်းချီးပေးလို့ ‘လူအမြောက်အမြား ယုံကြည်သူတွေ ဖြစ်လာတယ်။’—တ. ၁၁:၂၁။

၂၀၊ ၂၁။ ကျိုးနွံမှု ရှိကြောင်း ဗာနဗ ဘယ်လို ပြသလဲ။ အမှုဆောင်လုပ်ငန်းမှာ ကျွန်တော်တို့ ကျိုးနွံမှု ဘယ်လို ပြနိုင်သလဲ။

^၂၀ ဂျေရုဆလင်မြို့မှာ ရှိတဲ့ အသင်းတော်ဟာ အန္တိအုတ်မြို့သားတွေကို ဟောဖို့ ဗာနဗကို စေလွှတ်တယ်။ သတင်းကောင်းကို စိတ်ဝင်စားသူ များလွန်းလို့ ဗာနဗ တစ်ယောက်တည်း မနိုင်တော့ဘူး။ လူမျိုးခြားတွေနဲ့ဆိုင်တဲ့ တမန်တော် ရှောလုကလွဲလို့ ဗာနဗကို ကူညီပေးဖို့ တခြားသင့်တော်မယ့်သူ ရှိနိုင်ပါဦးမလား။ (တ. ၉:၁၅။ ရော. ၁:၅) ဗာနဗဟာ ရှောလုကို ပြိုင်ဘက်လို့ မြင်သလား။ မမြင်ဘူး။ ကျိုးနွံမှု ရှိကြောင်း ပြတယ်။ တာရှုမြို့ကို ကိုယ်တိုင်သွား၊ ရှောလုကို ရှာပြီး အကူအညီ ရဖို့ အန္တိအုတ်မြို့ကို ခေါ်လာတယ်။ တစ်နှစ်ပတ်လုံး အဲဒီအသင်းတော်မှာ နေပြီး တပည့်တွေကို အားပေးကြတယ်။—တ. ၁၁:၂၂-၂၆။

^၂၁ အမှုဆောင်လုပ်ငန်းမှာ ကျိုးနွံမှု ရှိကြောင်း ဘယ်လို ပြနိုင်သလဲ။ ကျိုးနွံမှုဆိုတာ ကိုယ့်မှာ ကန့်သတ်ချက်တွေ ရှိကြောင်း အသိအမှတ်ပြုခြင်းကို ဆိုလိုတယ်။ ကျွန်တော်တို့အားလုံးမှာ မတူညီတဲ့ အားသာချက်၊ စွမ်းရည်တွေ ရှိကြတယ်။ ဥပမာ၊ တချို့က အလွတ်သဘော သက်သေခံရာမှာ၊ တစ်အိမ်တက်ဆင်း အမှုဆောင်ရာမှာ ကျွမ်းကျင်ပေမဲ့ ပြန်လည်ပတ်မှု လုပ်ဖို့၊ ကျမ်းစာသင်အံမှု စဖို့ အခက်တွေ့နိုင်တယ်။ အမှုဆောင်လုပ်ငန်း ကဏ္ဍတချို့မှာ တိုးတက်ချင်ရင် အကူအညီ တောင်းပါ။ ဒါဆိုရင် အမှုဆောင်လုပ်ငန်းမှာ ပိုထိရောက်ပြီး ပိုပျော်ရွှင်ပါလိမ့်မယ်။—၁ ကော. ၉:၂၆။

၂၂၊ ၂၃။ အန္တိအုတ်မြို့မှာ ရှိတဲ့ ညီအစ်ကိုတွေဟာ ညီရင်းအစ်ကိုမေတ္တာ ဘယ်လို ပြကြသလဲ။ ဒီနေ့ခေတ် ဘုရားလူမျိုးလည်း ဘယ်လို ပြကြသလဲ။

^၂၂ “တပည့်တွေက ဘုရားသခင့် လမ်းညွှန်ချက်အရ ခရစ်ယာန်ဆိုတဲ့ နာမည်ကို အန္တိအုတ်မြို့မှာ ဦးဆုံး ခံယူကြတယ်။” (တ. ၁၁:၂၆) ခရစ်တော်ရဲ့ ပုံသက်သေအတိုင်း လိုက်ချင်သူတွေအတွက် ဒီနာမည် က သိပ်သင့်တော်တယ်။ လူမျိုးခြားတွေ ခရစ်ယာန် ဖြစ်လာတဲ့အခါ ဂျူးနဲ့ လူမျိုးခြား ယုံကြည်သူတွေကြားမှာ ညီရင်းအစ်ကိုနှောင်ကြိုး ရစ်တွယ်လာသလား။ အေဒီ ၄၆ လောက်မှာ အငတ်ဘေး ဆိုက်တဲ့အခါ ဘာဖြစ်ခဲ့သလဲ။ e ရှေးခေတ်မှာ အငတ်ဘေး ဆိုက်တဲ့အခါ ငွေနဲ့ ရိက္ခာ အပိုအလျှံ မရှိတဲ့ ဆင်းရဲသားတွေ ဒုက္ခအရောက်ဆုံးပဲ။ ဒါကြောင့် ယုဒပြည်မှာ ရှိတဲ့ ဆင်းရဲသား ဂျူးခရစ်ယာန်အများစု ထောက်ပံ့မှု လိုအပ်နေတယ်။ လူမျိုးခြား ခရစ်ယာန်တွေ အပါအဝင် အန္တိအုတ်မြို့မှာ ရှိတဲ့ ညီအစ်ကိုတွေ ဒီသတင်းကို ကြားတဲ့အခါ “ကယ်ဆယ်ရေး အထောက်အပံ့တွေ” ပို့ပေးကြတယ်။ (တ. ၁၁:၂၉) တကယ့် ညီရင်းအစ်ကိုမေတ္တာပါပဲ။

^၂၃ ဒီနေ့ခေတ် ဘုရားလူမျိုးလည်း အဲဒီလိုပါပဲ။ တခြားနိုင်ငံမှာဖြစ်စေ၊ ကိုယ့်ဒေသမှာဖြစ်စေ ညီအစ်ကိုတွေ အကူအညီ လိုအပ်ကြောင်း ကြားတဲ့အခါ တလိုတလား ကူညီပေးကြတယ်။ ဌာနခွဲ ကော်မတီတွေဟာ ဟာရီကိန်း၊ မြေငလျင်၊ ဆူနာမီ အပါအဝင် သဘာဝဘေး ခံရတဲ့ ညီအစ်ကိုတွေကို ကူညီဖို့ သဘာဝဘေး ကယ်ဆယ်ရေး ကော်မတီတွေ ချက်ချင်း ဖွဲ့စည်းပေးကြတယ်။ ညီအစ်ကို/မတွေကို လိုအပ်တဲ့ အကူအညီ ပေးတာက သူတို့ကို တကယ်ချစ်ကြောင်း ပြနေတာပါပဲ။—ယော. ၁၃:၃၄၊ ၃၅။ ၁ ယော. ၃:၁၇။

၂၄။ ပေတရု မြင်ခဲ့တဲ့ စိတ်အာရုံရဲ့ အဓိပ္ပာယ်ကို ကျွန်တော်တို့ အလေးထားကြောင်း ဘယ်လို ပြနိုင်သလဲ။

^၂၄ ခရစ်ယာန်စစ်တွေအနေနဲ့ ကျွန်တော်တို့ဟာ ပထမရာစု အချိန်က ယုပ္ပေမြို့ အိမ်အမိုးပေါ်မှာ ပေတရု မြင်ခဲ့တဲ့ စိတ်အာရုံရဲ့ အဓိပ္ပာယ်ကို အလေးထားကြတယ်။ ကျွန်တော်တို့ ကိုးကွယ်တဲ့ ယေဟောဝါဘုရားဟာ မျက်နှာမလိုက်တဲ့ ဘုရား ဖြစ်တယ်။ ဘယ်လူမျိုး၊ နိုင်ငံသား၊ လူမှုရေး နောက်ခံပဲ ရှိပါစေ လူတိုင်းကို နိုင်ငံတော်အကြောင်း စေ့စေ့စပ်စပ် ဟောပြောဖို့ အလိုရှိတယ်။ ဒါကြောင့် ယေဟောဝါအကြောင်း သင်ယူခွင့် ရနိုင်အောင် လူတိုင်းကို ဟောကြစို့။—ရော. ၁၀:၁၁-၁၃။