၁-၃။ (က) အစောပိုင်း ခရစ်ယာန် အသင်းတော် ဘာကြောင့် စိတ်ဝမ်းကွဲသွားနိုင်သလဲ။ (ခ) တမန်တော်ကျမ်းပါ ဒီမှတ်တမ်းကို လေ့လာခြင်းကနေ ဘာအကျိုး ရနိုင်မလဲ။

 ပေါလုနဲ့ ဗာနဗ သိပ်ပျော်နေကြတယ်။ ပထမ သာသနာပြု ခရီးစဉ် ပြီးလို့ ဆီးရီးယားပြည်၊ အန္တိအုတ်မြို့ကို ပြန်ရောက်လာကြပြီ။ “လူမျိုးခြားတွေအတွက်” ယေဟောဝါ “ယုံကြည်ခြင်းတံခါး ဖွင့်ပေးခဲ့” လို့ သိပ်ဝမ်းသာနေကြတာ။ (တ. ၁၄:၂၆၊ ၂၇) အန္တိအုတ်မြို့မှာလည်း သတင်းကောင်း ပျံ့နှံ့သွားပြီး လူမျိုးခြားထဲက “လူအမြောက်အမြား” အသင်းတော်နဲ့ ပူးပေါင်းလာကြတယ်။—တ. ၁၁:၂၀-၂၆။

^၂ မကြာခင် ယုဒပြည်ကို အဲဒီတိုးတက်မှု သတင်း ရောက်လာတယ်။ အဲဒီသတင်းကြောင့် ဝမ်းမြောက်မယ့်အစား ခရစ်ယာန် မှန်ရင် အရေဖျား ဖြတ်သင့်တယ်၊ မဖြတ်သင့်ဘူးဆိုပြီး ငြင်းခုံကြတယ်။ ဂျူးခရစ်ယာန်တွေနဲ့ လူမျိုးခြား ခရစ်ယာန်တွေ အချင်းချင်း ဘယ်လို ဆက်ဆံသင့်သလဲ။ လူမျိုးခြား ခရစ်ယာန်တွေ မောရှေပညတ်ကို လိုက်နာသင့်သလား။ ဒီပြဿနာကြောင့် ခရစ်ယာန် အသင်းတော် စိတ်ဝမ်းကွဲသွားနိုင်တယ်။ ဘယ်လို ဖြေရှင်းကြမလဲ။

^၃ တမန်တော်ကျမ်းပါ ဒီမှတ်တမ်းကို သုံးသပ်တဲ့အခါ အဖိုးတန် သင်ခန်းစာများစွာ ရပါလိမ့်မယ်။ ဒီနေ့ခေတ်မှာလည်း စိတ်ဝမ်းကွဲစရာ ပြဿနာတွေ ပေါ်လာရင် ပညာရှိရှိ လုပ်ဆောင်ဖို့ ဒီမှတ်တမ်းက ကူညီပေးပါလိမ့်မယ်။

၄။ ဂျူးခရစ်ယာန်တချို့ ဘယ်လို တွေးခေါ်ကြတုန်းလဲ။ ဘာမေးခွန်း ပေါ်လာသလဲ။

^၄ အန္တိအုတ်မြို့ကို “ယုဒပြည်ကနေ လူတချို့ ရောက်လာပြီး ‘မောရှေပညတ်အတိုင်း အရေဖျား မဖြတ်ရင် ကယ်တင်ခြင်း မရနိုင်ဘူး’ ဆိုပြီး ညီအစ်ကိုတွေကို သွန်သင်ကြတယ်” လို့ လုကာ ပြောတယ်။ (တ. ၁၅:၁) ‘ယုဒပြည်က ရောက်လာတဲ့ လူတွေ’ ဆိုတာ ခရစ်ယာန်ဘာသာ ပြောင်းလာကြတဲ့ ဖာရိရှဲတွေလား။ အတိအကျ ဖော်ပြမထားဘူး။ ဘာပဲဖြစ်ဖြစ် ပညတ်တရားကို လှေနံဓားထစ် လိုက်နာတဲ့ ဖာရိရှဲတွေလို တွေးခေါ်ကြပုံပဲ။ အဲဒီအပြင် ဂျေရုဆလင်မြို့မှာ ရှိတဲ့ တမန်တော်တွေနဲ့ အကြီးအကဲတွေကိုယ်စား ပြောတာပါဆိုပြီး မဟုတ်မမှန် ပြောကြပုံရတယ်။ (တ. ၁၅:၂၃၊ ၂၄) ဘုရား ညွှန်ကြားတဲ့အတိုင်း လူမျိုးခြားတွေကို တမန်တော် ပေတရု ခရစ်ယာန် အသင်းတော်ထဲ လက်ခံကြိုဆိုခဲ့တာ ၁၃ နှစ်လောက် ရှိပြီ။ ဒါတောင် အရေဖျား ဖြတ်ခြင်းကို ယုံကြည်သူဂျူးတွေ ဘာကြောင့် ထောက်ခံနေတာလဲ။ a—တ. ၁၀:၂၄-၂၉၊ ၄၄-၄၈။

၅၊ ၆။ (က) အရေဖျား ဖြတ်ခြင်းကို ဂျူးခရစ်ယာန်တွေ ဘာကြောင့် ထောက်ခံနေတာလဲ။ (ခ) အာဗြဟံ ပဋိညာဉ်မှာ အရေဖျား ဖြတ်ခြင်း ပဋိညာဉ် ပါဝင်သလား။ ရှင်းပြပါ။ (အောက်ခြေမှတ်ချက်ကို ကြည့်ပါ။)

 ^၅ ဂျူးတွေ ထောက်ခံရတဲ့ အကြောင်းရင်း အများကြီး ရှိနိုင်တယ်။ တစ်ခုကတော့ အရေဖျား ဖြတ်ခြင်းဟာ ဘုရားနဲ့ အထူးဆက်ဆံရေး ရှိတယ်ဆိုတဲ့ အမှတ်အသား ဖြစ်ပြီး ယေဟောဝါကိုယ်တိုင် စတင်ညွှန်ကြားခဲ့တာ ဖြစ်တယ်။ အာဗြဟံနဲ့ အိမ်သားတွေ အရေဖျား ဖြတ်ဖို့ ယေဟောဝါ မိန့်မှာတယ်။ နောက်ပိုင်း၊ အစ္စရေးတွေကို ပေးတဲ့ ပညတ်မှာလည်း ဒီအချက် ပါလာတယ်။ b (ဝတ်. ၁၂:၂၊ ၃) မောရှေပညတ်အရ ပသခါ အစားအစာ စားခြင်းလို ပွဲတော်တချို့မှာ ပါဝင်နိုင်ဖို့ လူမျိုးခြားတွေ အရေဖျား ဖြတ်ရမယ်။ (ထွ. ၁၂:၄၃၊ ၄၄၊ ၄၈၊ ၄၉) ဂျူးတွေရဲ့ အမြင်မှာ အရေဖျား ဖြတ်မထားတဲ့ ယောက်ျားဟာ မသန့်ရှင်းသူ၊ ရွံစရာကောင်းသူ ဖြစ်တယ်။—ဟေရှာ. ၅၂:၁။

^၆ ယုံကြည်သူ ဂျူးတွေဟာ သွန်သင်ချက်အသစ်တစ်ခုကို လက်ခံနိုင်ဖို့ ယုံကြည်ခြင်းနဲ့ နှိမ့်ချမှု ရှိရမယ်။ ပညတ်ပဋိညာဉ်ကို ပဋိညာဉ်သစ်နဲ့ အစားထိုးလိုက်ပြီဖြစ်လို့ ဂျူးအဖြစ် မွေးလာတာနဲ့ပဲ ဘုရားလူမျိုး အလိုလို မဖြစ်တော့ဘူး။ ဒါကြောင့် ခရစ်တော်ရဲ့ နောက်လိုက် ဖြစ်ဖို့၊ အရေဖျား ဖြတ်မထားတဲ့ လူမျိုးခြား ခရစ်ယာန်တွေနဲ့အတူ ဝတ်ပြုဖို့ ဂျူးအသိုင်းအဝိုင်းမှာ နေတဲ့ ဂျူးခရစ်ယာန်တွေ သတ္တိ ရှိရမယ်။—ယေ. ၃၁:၃၁-၃၃။ လု. ၂၂:၂၀။

၇။ ‘ယုဒပြည်က လူတွေ’ ဘယ်အမှန်တရားကို သဘောမပေါက်ကြသလဲ။

^၇ ဘုရားသခင်ရဲ့ စံနှုန်းတွေဟာ မပြောင်းလဲဘူး။ ပဋိညာဉ်တရားသစ်မှာ မောရှေပညတ်ရဲ့ အခြေခံမူတွေ ပါနေလို့ပဲ။ (မ. ၂၂:၃၆-၄၀) ဥပမာ၊ အရေဖျား ဖြတ်ခြင်းနဲ့ပတ်သက်ပြီး “အတွင်းသဘောအားဖြင့် ဂျူးလူမျိုး ဖြစ်တဲ့သူသာ ဂျူးလူမျိုး အစစ်အမှန်ပဲ။ မောရှေ ရေးခဲ့တဲ့ ပညတ်တွေအားဖြင့် မဟုတ်ဘဲ စွမ်းအားတော်အားဖြင့် နှလုံးသားကို အရေဖျား ဖြတ်ထားမှသာ အရေဖျား ဖြတ်ခြင်း အစစ်အမှန်ပဲ” လို့ နောက်ပိုင်းမှာ ပေါလု ရေးတယ်။ (ရော. ၂:၂၉။ တရား. ၁၀:၁၆) အဲဒီအမှန်တရားကို ‘ယုဒပြည်က လူတွေ’ သဘောမပေါက်ကြဘူး။ ဒါ့အပြင် အရေဖျား ဖြတ်ခြင်း ပညတ်ကို ဘုရားသခင် တစ်ခါမှ မရုပ်သိမ်းခဲ့ဘူးလို့ အခိုင်အမာ ပြောနေကြတယ်။ သူတို့ တွေးခေါ်ပုံကို ပြုပြင်ကြမလား။

၈။ အရေဖျား ဖြတ်ခြင်း ပြဿနာကို ဂျေရုဆလင်မြို့မှာ ရှိတဲ့ အုပ်ချုပ်ရေးအဖွဲ့ဆီ ဘာကြောင့် တင်ပြခဲ့ရသလဲ။

^၈ “ပေါလုနဲ့ ဗာနဗက သူတို့ [“ယုဒပြည်ကနေ” ရောက်လာတဲ့ လူတချို့] နဲ့ သဘောထား ကွဲလွဲပြီး အကြီးအကျယ် ငြင်းခုံကြတယ်။ ဒါကြောင့် အဲဒီကိစ္စနဲ့ပတ်သက်ပြီး မေးမြန်းဖို့ ပေါလု၊ ဗာနဗနဲ့ ညီအစ်ကိုတချို့ကို ဂျေရုဆလင်မြို့မှာ ရှိတဲ့ တမန်တော်တွေ၊ အကြီးအကဲတွေဆီ လွှတ်ဖို့ စီစဉ်လိုက်ကြတယ်” c လို့ လုကာ ဆက်ပြောတယ်။ (တ. ၁၅:၂) “သဘောထား ကွဲလွဲပြီး အကြီးအကျယ် ငြင်းခုံ” တယ်လို့  ဖော်ပြတဲ့အတွက် နှစ်ဖက်စလုံးက ကိုယ်ပဲ မှန်တယ်လို့ ထင်နေကြတယ်။ အလျှော့ မပေးကြဘူး။ ဒါကြောင့် အသင်းတော်ရဲ့ ငြိမ်သက်စည်းလုံးမှုကို ဆက်ထိန်းဖို့ ဒီကိစ္စကို အုပ်ချုပ်ရေးအဖွဲ့ ဖြစ်တဲ့ “ဂျေရုဆလင်မြို့မှာ ရှိတဲ့ တမန်တော်တွေ၊ အကြီးအကဲတွေဆီ” တင်ပြဖို့ စီစဉ်ကြတယ်။ အန္တိအုတ်မြို့မှာ ရှိတဲ့ အကြီးအကဲတွေဆီကနေ ဘာသင်ယူနိုင်သလဲ။

၉၊ ၁၀။ အန္တိအုတ်မြို့က ညီအစ်ကိုတွေအပြင် ပေါလုနဲ့ ဗာနဗဟာ ကျွန်တော်တို့အတွက် ဘယ်နည်းနဲ့ ပုံသက်သေကောင်း ဖြစ်သလဲ။

^၉ သင်ယူနိုင်တဲ့ အရေးကြီး သင်ခန်းစာတစ်ခုကတော့ ဘုရားအဖွဲ့အစည်းကို ယုံကြည်စိတ်ချဖို့ပါ။ ဒီအချက်ကို စဉ်းစားကြည့်ပါ။ အုပ်ချုပ်ရေးအဖွဲ့ဝင် အားလုံးဟာ ဂျူးနောက်ခံရှိတဲ့ ခရစ်ယာန်တွေ ဖြစ်ကြောင်း အန္တိအုတ်မြို့မှာ ရှိတဲ့ ညီအစ်ကိုတွေ သိတယ်။ ဒါပေမဲ့ အရေဖျား ဖြတ်ခြင်း ပြဿနာကို ကျမ်းစာနဲ့အညီ ဖြေရှင်းပေးမယ်ဆိုတာ ယုံကြည်စိတ်ချတယ်။ ဘာကြောင့်လဲ။ သန့်ရှင်းသော စွမ်းအားတော်အားဖြင့်၊ အသင်းတော်ရဲ့ ဦးခေါင်း ယေရှုခရစ်အားဖြင့် ဒီကိစ္စကို ယေဟောဝါ ညွှန်ကြားမယ်ဆိုတာ စိတ်ချလို့ပဲ။ (မ. ၂၈:၁၈၊ ၂၀။ ဧ. ၁:၂၂၊ ၂၃) ဒီနေ့လည်း ကြီးလေးတဲ့ ပြဿနာတွေ ပေါ်လာတဲ့အခါ ဘုရားအဖွဲ့အစည်းကို၊ ဘိသိက်ခံ ခရစ်ယာန်တွေနဲ့ ဖွဲ့စည်းထားတဲ့ အုပ်ချုပ်ရေးအဖွဲ့ကို ယုံကြည်စိတ်ချခြင်းအားဖြင့် အန္တိအုတ်မြို့က ယုံကြည်သူတွေရဲ့ ပုံသက်သေကောင်းကို တုပကြပါစို့။

^၁၀ နှိမ့်ချမှု ရှိဖို့၊ စိတ်ရှည်ဖို့ ဘယ်လောက် အရေးကြီးကြောင်းလည်း ကျွန်တော်တို့ သင်ယူရတယ်။ ပေါလုနဲ့ ဗာနဗဟာ လူမျိုးခြားတွေအတွက် အမှုဆောင်ဖို့ သန့်ရှင်းသော စွမ်းအားတော်အားဖြင့် ခန့်အပ်ခံရပေမဲ့ အဲဒီအာဏာကို သုံးပြီး အရေဖျား ဖြတ်ခြင်း ပြဿနာကို အန္တိအုတ်မြို့မှာ ချက်ချင်း မဖြေရှင်းကြဘူး။ (တ. ၁၃:၂၊ ၃) အဲဒီအပြင် “ဗျာဒိတ်တော် ရလို့ [ဂျေရုဆလင်မြို့ကို] ကျွန်တော် သွားတာပါ” လို့ နောက်ပိုင်းမှာ ပေါလု ရေးခဲ့တာက ပေါလုကို စွမ်းအားတော် လမ်းညွှန်ကြောင်း ဖော်ပြတယ်။ (ဂလ. ၂:၂) ဒီနေ့လည်း စိတ်ဝမ်းကွဲစေနိုင်တဲ့ ပြဿနာတွေ ပေါ်လာတဲ့အခါ နှိမ့်ချမှု ရှိဖို့၊ စိတ်ရှည်ဖို့ အကြီးအကဲတွေ ကြိုးစားကြတယ်။ ကိုယ်မှန်တယ်ဆိုပြီး ငြင်းခုံနေမယ့်အစား ဘုရား စဉ်းစားပုံကို သိဖို့ ကျမ်းစာအဆို၊ သစ္စာရှိကျွန်ရဲ့ ညွှန်ကြားချက်တွေကို ရှာဖွေကြတယ်။—ဖိ. ၂:၂၊ ၃။

၁၁၊ ၁၂။ ယေဟောဝါကို စောင့်ဖို့ ဘာကြောင့် အရေးကြီးသလဲ။

^၁၁ တစ်ခါတလေ ကိစ္စတစ်ခုကို ကျွန်တော်တို့ နားလည်နိုင်အောင် ကူညီပေးဖို့ ယေဟောဝါကို စောင့်ရနိုင်တယ်။  ပေါလုခေတ်က ညီအစ်ကိုတွေဟာ ကော်နေလိ ဘိသိက်ပေးခံရတဲ့ အေဒီ ၃၆ ကနေ ၁၃ နှစ်လောက်အကြာ အေဒီ ၄၉ အထိ ယေဟောဝါကို စောင့်ခဲ့ပြီးမှ လူမျိုးခြားတွေ အရေဖျား ဖြတ်သင့်၊ မသင့်ဆိုတဲ့ ကိစ္စရဲ့ အဖြေကို ရခဲ့တာ။ ဘာကြောင့် ဒီလောက် ကြာခဲ့ရသလဲ။ ဘုရားသခင်ဟာ ဒီလောက် ကြီးမားတဲ့ အပြောင်းအလဲကို ဂျူးခရစ်ယာန်တွေ လက်ခံနိုင်အောင် အချိန် အလုံအလောက် ပေးချင်လို့ ဖြစ်နိုင်တယ်။ ဂျူးတွေ သိပ်လေးစားချစ်ခင်ရတဲ့ ဘိုးဘေး အာဗြဟံနဲ့ အရေဖျား ဖြတ်ခြင်း ပဋိညာဉ်ကို ဖွဲ့ထားတာ။ ဒါ့အပြင် ပဋိညာဉ်အတိုင်း လိုက်လျှောက်နေတာ နှစ်ပေါင်း ၁,၉၀၀ လောက် ရှိပြီ။ ဒါကို ပယ်ဖျက်လိုက်တာဟာ သိပ်ကြီးမားတဲ့ အပြောင်းအလဲ ဖြစ်တယ်။—ယော. ၁၆:၁၂။

^၁၂ ကျွန်တော်တို့ကို ကောင်းကင်ဖခင် စိတ်ရှည်ရှည်၊ ကြင်ကြင်နာနာ လေ့ကျင့်သွန်သင်ပေးလို့ ကျေးဇူးတင်စရာပါပဲ။ ယေဟောဝါ သွန်သင်ပေးသမျှဟာ အမြဲ ကျွန်တော်တို့ အကျိုးအတွက်ပဲ။ (ဟေရှာ. ၄၈:၁၇၊ ၁၈။ ၆၄:၈) ဒါကြောင့် ကိုယ့်အယူအဆပဲ မှန်တယ်ဆိုပြီး ဘယ်တော့မှ တစ်ယူသန် မဖြစ်ပါနဲ့။ အဖွဲ့အစည်းက ပြုပြင်ပြောင်းလဲမှုတွေ လုပ်တဲ့အခါ၊ ကျမ်းချက်တချို့ရဲ့ နားလည်မှု ပြုပြင်လိုက်တဲ့အခါ ဘယ်တော့မှ မဝေဖန်ပါနဲ့။ (ဒေ. ၇:၈) သင် အဲဒီလို စတွေးလာပြီဆိုရင် တမန်တော် အခန်းကြီး ၁၅ ကို လေးလေးနက်နက် တွေးတောပါ။ အဲဒီမှာပါတဲ့ မူတွေကို ဆုတောင်းပြီး ဆင်ခြင်သုံးသပ်ပါ။ d

၁၃။ အမှုဆောင်လုပ်ငန်းမှာ ယေဟောဝါရဲ့ စိတ်ရှည်မှုကို ဘယ်လို တုပနိုင်သလဲ။

^၁၃ ယုံကြည်ချက်အမှားကို စွန့်ဖို့ ဒါမှမဟုတ် ကျမ်းစာနဲ့ မညီတဲ့ ထုံးစံတွေအတိုင်း လိုက်မလုပ်ဖို့ ကျမ်းစာသင်သား ခက်နေတယ်ဆိုရင် ယေဟောဝါလို ကျွန်တော်တို့ စိတ်ရှည်ရမယ်။ သင်သားရဲ့ နှလုံးကို ဘုရားသခင့် စွမ်းအားတော် လှုံ့ဆော်ပေးဖို့ အချိန် အတော်အတန် ပေးရနိုင်တယ်။ (၁ ကော. ၃:၆၊ ၇) သင်သားအတွက် ဆုတောင်းပေးဖို့လည်း လိုတယ်။ ဒါဆိုရင် ကျွန်တော်တို့ ကူညီပေးနိုင်တဲ့ အကောင်းဆုံးနည်းကို အချိန်တန်ရင် ယေဟောဝါ သိစေပါလိမ့်မယ်။—၁ ယော. ၅:၁၄။

၁၄၊ ၁၅။ ပေါလု၊ ဗာနဗနဲ့ ခရီးဖော်တွေကို ချစ်ခင်လေးစားကြောင်း အန္တိအုတ်မြို့က အသင်းတော် ဘယ်လို ပြသလဲ။ ယုံကြည်သူချင်းတွေကို ပေါလုနဲ့ အပေါင်းပါတွေ ဘယ်လို အားပေးကြသလဲ။

^၁၄ “အသင်းတော်က ပေါလုနဲ့ ဗာနဗကို ခရီးတစ်ထောက် လိုက်ပို့ပေးတယ်။ ဒါနဲ့ သူတို့က ဖိုနီးရှားပြည်နဲ့ ရှမာရိပြည်တစ်လျှောက် သွားပြီး လူမျိုးခြားတွေ ဘာသာပြောင်းဝင်လာတဲ့အကြောင်း အသေးစိတ် ပြောပြတဲ့အခါ ညီအစ်ကိုတွေ အင်မတန် ဝမ်းမြောက်ကြတယ်” လို့ လုကာ ဆက်ပြောတယ်။ (တ. ၁၅:၃) အသင်းတော်က ပေါလု၊ ဗာနဗနဲ့ ခရီးဖော်တွေကို ကူညီပေးချင်တယ်။ ဘုရားကောင်းချီး ရစေချင်တယ်။ ခရီးတစ်ထောက် လိုက်ပို့ပေးခြင်းအားဖြင့် ချစ်ခင်လေးစားကြောင်း ပြတယ်။ ဒီနေရာမှာလည်း အန္တိအုတ်မြို့က ညီအစ်ကိုတွေ နောက်ထပ် ပုံသက်သေကောင်း ချမှတ်ခဲ့တယ်။ ညီအစ်ကို/မတွေ၊ “အထူးသဖြင့် တရားစကားအကြောင်း ပြောဆိုခြင်း၊ သွန်သင်ခြင်းတွေမှာ ကြိုးစားလုပ်ဆောင်နေသူ [အကြီးအကဲ] တွေကို” သင် ရိုသေလေးစားကြောင်း ပြသလား။—၁ တိ. ၅:၁၇။

^၁၅ ပေါလုနဲ့ အပေါင်းပါတွေဟာ ဂျေရုဆလင်မြို့ကို သွားရင်း ဖိုနီးရှားပြည်နဲ့ ရှမာရိပြည်ကို  ဝင်ကြတယ်။ အဲဒီပြည်က ခရစ်ယာန်ချင်းတွေကို လူမျိုးခြားတွေ ခရစ်ယာန် ဖြစ်လာတဲ့အကြောင်း “အသေးစိတ်” ပြောပြကြတယ်။ သတေဖန် အသတ်ခံရပြီးနောက် ထွက်ပြေးလာတဲ့ ဂျူးခရစ်ယာန်တွေလည်း နားထောင်သူတွေထဲ ပါဝင်ပုံရတယ်။ ဒါကြောင့် အားရှိသွားကြမှာပဲ။ ဒီနေ့လည်း တပည့်ဖြစ်စေခြင်း လုပ်ငန်းအပေါ် ယေဟောဝါ ကောင်းချီးပေးတဲ့ သတင်းတွေဟာ ညီအစ်ကိုတွေအတွက်၊ အထူးသဖြင့် ဆင်းရဲဒုက္ခ ကြုံနေရသူတွေအတွက် သိပ်အားပေးမှု ဖြစ်စေတယ်။ ပတ်စဉ် အစည်းအဝေး၊ စည်းဝေးပွဲ၊ အစည်းအဝေးကြီးတွေ တက်ခြင်း၊ ပုံနှိပ်ထားတဲ့ ကျမ်းစာ,စာပေတွေ ဒါမှမဟုတ် jw.org မှာ ပါတဲ့ တွေ့ကြုံမှု၊ ဘဝအတ္ထုပ္ပတ္တိတွေကို ဖတ်ခြင်းအားဖြင့် အဲဒီလိုသတင်းတွေကနေ သင် အကျိုးအပြည့်အဝ ရနေသလား။

၁၆။ အရေဖျား ဖြတ်ခြင်းကိစ္စဟာ ပြဿနာကြီးတစ်ခု ဖြစ်လာကြောင်း ဘာက ဖော်ပြသလဲ။

^၁၆ အန္တိအုတ်မြို့ကနေ ထွက်လာတဲ့ ဒီအဖွဲ့ဟာ တောင်ဘက်ကို မိုင် ၃၅၀ လောက် ခရီးနှင်ပြီးနောက် ခရီးဆုံးကို ရောက်လာတယ်။ “ဂျေရုဆလင်မြို့ကို သူတို့ ရောက်လာတဲ့အခါ အသင်းတော်နဲ့ တမန်တော်တွေ၊ အကြီးအကဲတွေ လက်ခံကြိုဆိုတယ်။ ပေါလုနဲ့ ဗာနဗက မိမိတို့ကတစ်ဆင့် ဘုရားသခင် လုပ်ဆောင်ခဲ့တာတွေကို ပြန်ပြောပြတယ်” လို့ လုကာ ရေးတယ်။ (တ. ၁၅:၄) ဒါပေမဲ့ ယုံကြည်သူ ဖြစ်လာတဲ့ “ဖာရိရှဲဂိုဏ်းဝင်တချို့က ထရပ်ပြီး ‘အဲဒီလူတွေ အရေဖျား ဖြတ်ရမယ်။ မောရှေပညတ်ကို စောင့်ထိန်းဖို့ သူတို့ကို ပြောရမယ်’ ဆိုပြီး အကြံပြုကြတယ်။” (တ. ၁၅:၅) ဂျူးမဟုတ်တဲ့ ခရစ်ယာန်တွေ အရေဖျား ဖြတ်သင့်၊ မသင့် ကိစ္စဟာ ပြဿနာကြီးတစ်ခု ဖြစ်လာတာ ထင်ရှားတယ်။ ဒါကို ဖြေရှင်းဖို့ လိုနေပြီ။

၁၇။ ဂျေရုဆလင်မြို့ အုပ်ချုပ်ရေးအဖွဲ့မှာ ဘယ်သူတွေ ပါဝင်သလဲ။ “အကြီးအကဲတွေ” ဘာကြောင့် ပါဝင်တာဖြစ်မလဲ။

^၁၇ ‘အကြံဉာဏ် တောင်းခံသူတွေဆီမှာ ဉာဏ်ပညာ ရှိတယ်’ လို့ ပညာအလိမ္မာ ၁၃:၁၀ မှာ ပြောတယ်။ အဲဒီမူနဲ့အညီ “တမန်တော်တွေနဲ့ အကြီးအကဲတွေက အဲဒီကိစ္စကို သုံးသပ်ဖို့ စုဝေးကြတယ်။” (တ. ၁၅:၆) “တမန်တော်တွေနဲ့ အကြီးအကဲတွေ” ဟာ ဒီနေ့ခေတ် အုပ်ချုပ်ရေးအဖွဲ့လိုပဲ ခရစ်ယာန် အသင်းတော်ကိုယ်စား ဆောင်ရွက်ပေးတယ်။ တမန်တော်တွေနဲ့အတူ “အကြီးအကဲတွေ” ဘာကြောင့် ပူးပေါင်းဆောင်ရွက်နေသလဲ။ တမန်တော် ယာကုပ် အသတ်ခံရပြီး တမန်တော် ပေတရုလည်း ခဏ ထောင်ကျနေတာ သတိရပါ။ တခြားတမန်တော်တွေလည်း အလားတူ ကြုံတွေ့နေရသလား မပြောနိုင်ဘူး။ အရည်အချင်းရှိ တခြားဘိသိက်ခံ အမျိုးသားတွေ ရှိထားလို့ ကောင်းကောင်း ဆက်ကြီးကြပ်ကွပ်ကဲနိုင်ခဲ့တယ်။

၁၈၊ ၁၉။ ဘယ်ပိုင်နိုင်တဲ့ စကားတွေကို ပေတရု ပြောဆိုခဲ့သလဲ။ ကြားနာသူတွေ ဘယ်လို ကောက်ချက်ချသင့်သလဲ။

 ^၁၈ “အကြိတ်အနယ် ဆွေးနွေးပြီးနောက် ပေတရု ထရပ်ပြီး ‘ညီအစ်ကိုတို့၊ လူမျိုးခြားတွေ သတင်းကောင်း ကြားနာပြီး ယုံကြည်သူတွေ ဖြစ်လာဖို့ ဘုရားသခင်က ကျွန်တော်တို့ထဲကနေ အရင်ဆုံး ကျွန်တော့်ကို ရွေးချယ်ပြီး လူမျိုးခြားတွေကို ဟောပြောစေခဲ့တာ ခင်ဗျားတို့ အသိပဲ။ စိတ်နှလုံးကို သိမြင်တဲ့ ဘုရားသခင်က ကျွန်တော်တို့ကို သန့်ရှင်းသော စွမ်းအားတော် ပေးခဲ့သလို လူမျိုးခြားတွေကိုလည်း ပေးသနားခြင်းအားဖြင့် သူတို့ကို နှစ်သက်လက်ခံတယ်ဆိုတာ သက်သေပြလိုက်တာပဲ။ ဘုရားသခင်က ကျွန်တော်တို့နဲ့ သူတို့ကို မခွဲခြားတော့ဘူး။ သူတို့ရဲ့ ယုံကြည်ခြင်းကြောင့် သူတို့ရဲ့ စိတ်နှလုံးကို စင်ကြယ်စေပြီ’” လို့ ပြောတယ်ဆိုပြီး လုကာ ဆက်ရေးတယ်။ (တ. ၁၅:၇-၉) အကိုးအကားစာအုပ် တစ်အုပ်အရ အခန်းငယ် ၇ မှာပါတဲ့ “အကြိတ်အနယ် ဆွေးနွေး” လို့ ပြန်ဆိုထားတဲ့ ဂရိစကားလုံးဟာ “စူးစမ်းခြင်း၊ မေးမြန်းခြင်း” လို့လည်း အဓိပ္ပာယ်ရတယ်။ အဲဒီညီအစ်ကိုတွေဟာ အမြင် မတူကြပေမဲ့ ကိုယ့်အမြင်ကို လွတ်လွတ်လပ်လပ် ဖော်ပြကြတယ်။ ပြဿနာကို ပွင့်ပွင့်လင်းလင်း ဆွေးနွေးကြတယ်။

^၁၉ အရေဖျား ဖြတ်မထားတဲ့ လူမျိုးခြား ကော်နေလိနဲ့ အိမ်သားတွေ အေဒီ ၃၆ မှာ ဦးဆုံး သန့်ရှင်းသော စွမ်းအားတော်နဲ့ ဘိသိက်ပေးခံရတုန်းက အဲဒီမှာ မိမိကိုယ်တိုင် ရှိခဲ့ကြောင်း ပေတရုရဲ့ ပိုင်နိုင်တဲ့စကားတွေက သတိရစေတယ်။ ဒါကြောင့် ဂျူးနဲ့ ဂျူးမဟုတ်သူတွေကို ယေဟောဝါ မခွဲခြားတော့ဘူးဆိုရင် လူတွေက ဘာလို့ ဆက်ခွဲခြားရမှာလဲ။ အဲဒီအပြင် ယုံကြည်သူတစ်ယောက်ရဲ့ စိတ်နှလုံး စင်ကြယ်လာတာဟာ မောရှေပညတ်ကို လိုက်လျှောက်လို့ မဟုတ်ဘဲ ခရစ်တော်ကို ယုံကြည်လို့ ဖြစ်တယ်။—ဂလ. ၂:၁၆။

၂၀။ အရေဖျား ဖြတ်ခြင်းကို ထောက်ခံသူတွေဟာ ဘယ်လိုနည်းနဲ့ ‘ဘုရားသခင်ကို အကဲစမ်း’ ကြသလဲ။

^၂၀ ဘုရားသခင့် တရားစကားနဲ့ သန့်ရှင်းသော စွမ်းအားတော်ရဲ့ ခိုင်လုံတဲ့ သက်သေခံချက်ကို အခြေပြုပြီး ပေတရုက “ဒီတော့ ကျွန်တော်တို့ရော ဘိုးဘေးတွေပါ မထမ်းနိုင်ခဲ့တဲ့ ထမ်းပိုးကို ဘာလို့ တပည့်တွေကို ထမ်းခိုင်းချင်တာလဲ။ ဘုရားသခင်ကို ဘာလို့ ဒီနည်းနဲ့ အကဲစမ်းနေကြတာလဲ။ ကျွန်တော်တို့ကတော့ သခင်ယေရှုရဲ့ မဟာကရုဏာတော်အားဖြင့် ကယ်တင်ခြင်း ရမယ်လို့ ယုံကြည်တယ်။ သူတို့လည်း အဲဒီအတိုင်း ယုံကြည်တယ်” လို့ ပြောတယ်။ (တ. ၁၅:၁၀၊ ၁၁) အရေဖျား ဖြတ်ခြင်းကို ထောက်ခံသူတွေဟာ တကယ်တော့ ‘ဘုရားသခင်ကို အကဲစမ်းနေတာ၊’ ‘ဘုရားရဲ့ စိတ်ရှည်မှုကို စမ်းသပ်နေတာ’ ပဲ။ ပညတ်တရားကို ဂျူးတွေကိုယ်တိုင် အပြည့်အဝ မလိုက်နာနိုင်လို့ သေပြစ်သင့်နေတာတောင် လူမျိုးခြားတွေကို လိုက်နာစေချင်နေကြတယ်။ (ဂလ. ၃:၁၀) တကယ်တော့ ယေရှုအားဖြင့် ခံစားရတဲ့ ဘုရားသခင့် မဟာကရုဏာတော်အတွက် ကျေးဇူးတင်သင့်တယ်။

၂၁။ ဗာနဗနဲ့ ပေါလု ဘာအကြောင်း ပြောပြသလဲ။

^၂၁ “သူတို့အားလုံး နှုတ်ဆိတ်သွား” တာကို ကြည့်ရင် ပေတရုရဲ့ စကား သိပ်ထိမိကြောင်း ထင်ရှားတယ်။ အဲဒီနောက် ဗာနဗနဲ့ ပေါလုက “မိမိတို့ကတစ်ဆင့် လူမျိုးခြားတွေဆီမှာ ဘုရားသခင် လုပ်ဆောင်ခဲ့တဲ့ အံ့ဖွယ်အမှုတွေ၊ ထူးဆန်းတဲ့အရာတွေအကြောင်း ပြောပြ” တယ်။ (တ. ၁၅:၁၂) အခု၊ တမန်တော်တွေနဲ့ အကြီးအကဲတွေဟာ အချက်အလက် အားလုံးကို ဆန်းစစ်ပြီး အရေဖျား ဖြတ်ခြင်းကိစ္စကို အလိုတော်နဲ့အညီ ဆုံးဖြတ်ချက် ချနိုင်ကြပြီ။

၂၂-၂၄။ (က) ဒီနေ့ အုပ်ချုပ်ရေးအဖွဲ့ဟာ ပထမရာစု အုပ်ချုပ်ရေးအဖွဲ့ရဲ့ ပုံသက်သေကို ဘယ်လို လိုက်လျှောက်သလဲ။ (ခ) အကြီးအကဲအားလုံး ဘုရားပေး အခွင့်အာဏာကို လေးစားကြောင်း ဘယ်လို ပြနိုင်သလဲ။

 ^၂၂ ဒီနေ့လည်း အုပ်ချုပ်ရေးအဖွဲ့ဝင်တွေ စုဝေးတဲ့အခါ လမ်းညွှန်ချက် ရဖို့ ကျမ်းစာကို လေ့လာကြတယ်။ စွမ်းအားတော် အကူအညီ ရဖို့ ထက်ထက်သန်သန် ဆုတောင်းကြတယ်။ (ဆာ. ၁၁၉:၁၀၅။ မ. ၇:၇-၁၁) အဲဒီအပြင် ဆုတောင်းပြီး ကြိုစဉ်းစားနိုင်ဖို့ အုပ်ချုပ်ရေးအဖွဲ့ဝင် တစ်ဦးစီဟာ ဆွေးနွေးမယ့် အချက်တွေ ကြိုရထားကြတယ်။ (ပညာ. ၁၅:၂၈) အစည်းအဝေးမှာ ပွင့်ပွင့်လင်းလင်း၊ လေးလေးစားစား ဆွေးနွေးကြတယ်။ ကျမ်းစာကို မကြာခဏ အသုံးပြုကြတယ်။

^၂၃ အုပ်ချုပ်ရေးအဖွဲ့ဝင်တွေရဲ့ ပုံသက်သေကို အသင်းတော် အကြီးအကဲတွေ အတုယူသင့်တယ်။ ကြီးလေးတဲ့ ကိစ္စတစ်ခုကို အကြီးအကဲ အစည်းအဝေးမှာ မဖြေရှင်းနိုင်ရင် ဒေသခံ ဌာနခွဲရုံး ဒါမှမဟုတ် တိုက်နယ်ကြီးကြပ်မှူး စတဲ့ ခန့်အပ်ခံ ကိုယ်စားလှယ်တွေနဲ့ တိုင်ပင်နိုင်တယ်။ လိုအပ်ရင် ဌာနခွဲရုံးက အုပ်ချုပ်ရေးအဖွဲ့ဆီ စာရေးပေးနိုင်တယ်။

^၂၄ အဖွဲ့အစည်း၊ အသင်းတော်က ပေးတဲ့ လမ်းညွှန်ချက်ကို လိုလိုလားလား လိုက်နာသူ၊ နှိမ့်ချသူ၊ သစ္စာစောင့်သိသူ၊ စိတ်ရှည်သူတွေကို ယေဟောဝါ ကောင်းချီးပေးတယ်။ အဲဒီလိုလူတွေကို ငြိမ်သက်မှု၊ ဘုရားရေးရာ ကြွယ်ဝမှုနဲ့ စည်းလုံးမှု ဆုကျေးဇူးတွေ ဘုရား ပေးကြောင်း နောက်အခန်းမှာ တွေ့ရပါမယ်။