၁၊ ၂။ ဂျေရုဆလင်မြို့ကို တမန်တော် ပေါလု ဘာကြောင့် သွားသလဲ။ အဲဒီမှာ ဘာအခက်အခဲတွေ ကြုံရသလဲ။

 ဂျေရုဆလင်မြို့ရဲ့ ပျားပန်းခတ် စည်ကားတဲ့ လမ်းကျဉ်းတွေပေါ် ပေါလု လမ်းလျှောက်နေတယ်။ နှစ်ရာချီ ကြာတဲ့အထိ ဒီမြို့ဟာ စစ်မှန်တဲ့ ဝတ်ပြုရေးရဲ့ ဗဟို ဖြစ်ခဲ့တယ်။ အရှိန်အဝါ ကြီးခဲ့တဲ့ အတိတ်ကာလအတွက် မြို့သားတွေ သိပ်ဂုဏ်ယူကြတယ်။ ဒါပေမဲ့ ယေဟောဝါရဲ့ ဝတ်ပြုမှု ပုံစံအသစ်ကို ဒီမြို့က ခရစ်ယာန်တွေ လက်ခံရ ခက်နေကြတယ်။ မောရှေပညတ်ကို အဓိက ထားနေကြတယ်။ ဒါကြောင့် ဧဖက်မြို့မှာ ရှိနေချိန် ဂျေရုဆလင်မြို့ကို ပြန်သွားဖို့ ပေါလု ဆုံးဖြတ်ခဲ့တာ။ အလှူငွေ ပေးဖို့သာမက ဂျေရုဆလင်မြို့က ခရစ်ယာန်တွေရဲ့ အတွေးအခေါ်ကို တည့်မတ်ပေးချင်လို့ ဖြစ်တယ်။ (တ. ၁၉:၂၁) အန္တရာယ် ရှိနိုင်ပေမဲ့ ပေါလု သွားဖြစ်အောင် သွားခဲ့တယ်။

^၂ ဂျေရုဆလင်မြို့မှာ ပေါလု အခက်အခဲ အများကြီး ကြုံရတယ်။ ပေါလုအကြောင်း မဟုတ်တမ်း တရားတွေကို ညီအစ်ကိုတွေ ယုံကြတယ်။ ဂျူးမုန်းတီးရေးသမားတွေကြောင့် ပိုဆိုးတာတွေ ပေါလု ကြုံရတယ်။ မဟုတ်မမှန် စွပ်စွဲခံရတယ်၊ အရိုက်ခံရတယ်၊ သတ်ပစ်မယ်လို့ ခြိမ်းခြောက်ခံရတယ်။ ဒီအခက်အခဲတွေ ကြုံရပေမဲ့ နှိမ့်ချမှု၊ သတ္တိ၊ ယုံကြည်ခြင်း ရှိကြောင်း ပေါလု ပြခဲ့တယ်။ ပေါလုရဲ့ ပုံသက်သေကနေ ကျွန်တော်တို့ သင်ယူနိုင်တယ်။

၃-၅။ (က) ဂျေရုဆလင်မြို့မှာ ဘယ်သူတွေဆီ ပေါလု သွားတွေ့သလဲ။ ဘာအကြောင်း ဆွေးနွေးကြသလဲ။ (ခ) ဂျေရုဆလင်မြို့မှာ ပေါလုနဲ့ အကြီးအကဲတွေရဲ့ အစည်းအဝေးကနေ ဘာသင်ခန်းစာ ရနိုင်သလဲ။

^၃ ဂျေရုဆလင်မြို့ကို ရောက်ပြီး နောက်တစ်နေ့မှာ အသင်းတော်က တာဝန်ရှိ အကြီးအကဲတွေဆီ ပေါလုနဲ့ အပေါင်းပါတွေ သွားတွေ့တယ်။ မှတ်တမ်းမှာ တမန်တော်တွေအကြောင်း ဖော်ပြမထားဘူး။ သူတို့အားလုံး ကမ္ဘာ့ဒေသအသီးသီးမှာ အမှုဆောင်ဖို့ ထွက်သွားကြတာ ဖြစ်မယ်။ ဒါပေမဲ့ ယေရှုရဲ့ ညီ ယာကုပ် အဲဒီမှာ ရှိနေတယ်။ (ဂလ. ၂:၉) ပေါလုနဲ့အတူ “အကြီးအကဲအားလုံး” စည်းဝေးချိန် ယာကုပ် ဦးစီးခဲ့ပုံရတယ်။—တ. ၂၁:၁၈။

^၄ အကြီးအကဲတွေကို ပေါလု နှုတ်ဆက်ပြီး “သူ့ရဲ့ ဟောပြောခြင်းလုပ်ငန်းကတစ်ဆင့် လူမျိုးခြားတွေဆီမှာ ဘုရားသခင် လုပ်ဆောင်ခဲ့ရာတွေအကြောင်း အသေးစိတ် ပြန်ပြောပြတယ်။” (တ. ၂၁:၁၉) တွေ့ကြုံမှုတွေ ကြားရလို့ ညီအစ်ကိုတွေ သိပ်အားရှိသွားမှာပဲ။ ဒီနေ့ခေတ် ကျွန်တော်တို့လည်း တခြားနိုင်ငံတွေမှာ ဟောပြာခြင်းလုပ်ငန်း တိုးတက်ကြောင်း ကြားရတဲ့အခါ ဝမ်းသာကြတယ်။—ပညာ. ၂၅:၂၅။

 ^၅ ဥရောပကနေ ယူလာတဲ့ အလှူငွေအကြောင်း ပေါလု ပြောပြခဲ့မှာပဲ။ ရပ်ဝေးက ညီအစ်ကိုတွေ ဂရုစိုက်ပေးတယ်ဆိုတာ သိရလို့ အကြီးအကဲတွေ တအား ဝမ်းသာသွားကြတယ်။ ပေါလုရဲ့ စကားကြောင့် ‘ဘုရားသခင်ကို [အကြီးအကဲတွေ] ဂုဏ်တင်ချီးမွမ်းကြတယ်’ လို့ မှတ်တမ်းက ဖော်ပြတယ်။ (တ. ၂၁:၂၀က) ဒီနေ့လည်း သဘာဝဘေး၊ ရောဂါဆိုး ကြုံနေရသူ များစွာဟာ ယုံကြည်သူချင်းတွေရဲ့ အကူအညီ၊ အားပေး စကားတွေကြောင့် အားရှိသွားကြတယ်။

၆။ ဘာပြဿနာအကြောင်း ပေါလု သိခဲ့ရသလဲ။

^၆ အဲဒီနောက် ယုဒနယ်မှာ ဖြစ်နေတဲ့ ပေါလုနဲ့ပတ်သက်တဲ့ ပြဿနာတစ်ခုအကြောင်း အကြီးအကဲတွေ ပြောပြကြတယ်။ သူတို့က “ညီအစ်ကို၊ ဂျူးလူမျိုးထဲမှာ ယုံကြည်သူ ထောင်နဲ့ချီ ရှိနေပြီဆိုတာ ခင်ဗျား သိပါတယ်။ သူတို့အားလုံးဟာ ပညတ်တရားကို ထက်ထက်သန်သန် လိုက်နာသူတွေပါ။ ဒါပေမဲ့ ခင်ဗျားက ကလေးတွေ အရေဖျားဖြတ်စရာ မလိုဘူး၊ ထုံးတမ်းစဉ်လာ လိုက်စရာ မလိုဘူးလို့ ပြောနေတယ်၊ လူမျိုးခြားတွေအလယ်မှာ နေထိုင်တဲ့ ဂျူးတွေကို မောရှေပညတ် စွန့်လွှတ်ဖို့ သွန်သင်ပေးနေတယ်ဆိုတဲ့ ကောလာဟလသတင်း သူတို့ ကြားထားတယ်” လို့ ပြောပြတယ်။ a—တ. ၂၁:၂၀၊ ၂၁။

၇၊ ၈။ (က) ယုဒပြည်က ခရစ်ယာန်တွေ ဘယ်လို တလွဲ တွေးခေါ်နေကြသလဲ။ (ခ) ဒီလို တလွဲ တွေးခေါ်လို့ ခရစ်ယာန် မဖြစ်ထိုက်တော့ဘူးလား။ ဘာကြောင့်လဲ။

^၇ မောရှေပညတ်ကို ပယ်ဖျက်လိုက်တာ အနှစ် ၂၀ ကျော်နေပေမဲ့ ဂျူးခရစ်ယာန်တွေ ပညတ်တရားဘက် ဘာကြောင့် ဒီလောက် ထက်သန်နေကြသလဲ။ (ကော. ၂:၁၄) အေဒီ ၄၉ တုန်းက ဂျေရုဆလင်မြို့မှာ စည်းဝေးကြတဲ့ တမန်တော်တွေနဲ့ အကြီးအကဲတွေဟာ အသင်းတော်တွေဆီ စာတစ်စောင် ပို့တယ်။ ယုံကြည်သူ လူမျိုးခြားတွေ အရေဖျား ဖြတ်စရာ မလိုကြောင်း၊ မောရှေပညတ်အောက် မရှိတော့ကြောင်း  စာမှာ ဖော်ပြထားတယ်။ (တ. ၁၅:၂၃-၂၉) ယုံကြည်သူ ဂျူးတွေ အကြောင်းတော့ ဖော်ပြမထားဘူး။ မောရှေပညတ်ကို ဖယ်ရှားခဲ့ကြောင်း အများစု သဘောမပေါက်ကြသေးဘူး။

^၈ ယုံကြည်သူ ဂျူးတွေ ဒီလို တလွဲတွေးခေါ်နေလို့ ခရစ်ယာန် မဖြစ်ထိုက်တော့ဘူးလား။ မဟုတ်ပါဘူး။ သူတို့ဟာ တစ်ချိန်က နတ်ဘုရားတွေကို ကိုးကွယ်ခဲ့ပြီး အခု အဲဒီဓလေ့တွေကို ဆက်လိုက်နေကြတာ မဟုတ်ဘူး။ သူတို့ သိပ်တန်ဖိုးထားတဲ့ ပညတ်တရားကို ပေးခဲ့တဲ့အရှင်ဟာ ယေဟောဝါဘုရားပါ။ ပညတ်တရားကိုယ်နှိုက်ဟာ နတ်ဆိုးပညာနဲ့ မသက်ဆိုင်သလို မှားလည်း မမှားဘူး။ ဒါပေမဲ့ အဲဒီပညတ်တရားဟာ ပဋိညာဉ်ဟောင်းနဲ့ သက်ဆိုင်တယ်။ ခရစ်ယာန်တွေဟာ အခု ပဋိညာဉ်သစ်အောက်မှာ ရှိနေကြပြီ။ ပညတ်ပဋိညာဉ်ကို လိုက်နာတာဟာ စင်ကြယ်တဲ့ ဝတ်ပြုရေးမှာ လုံးဝ အကျုံးမဝင်တော့ဘူး။ ပညတ်တရားဘက် ထက်သန်နေကြတဲ့ ဂျူးခရစ်ယာန်တွေဟာ ပညတ်တရားကို လိုက်နာဖို့ မလိုတော့ကြောင်း သဘောမပေါက်တဲ့အပြင် ခရစ်ယာန် အသင်းတော်ကိုလည်း ယုံကြည်စိတ်ချမှု မရှိဘူး။ ဝတ်ပြုမှု ပုံစံ အသစ်အကြောင်း ယေဟောဝါ သင်ပေးနေတယ်။ သင်ပေးတာကို လက်ခံရမယ်။ b—ယေ. ၃၁:၃၁-၃၄။ လု. ၂၂:၂၀။

၉။ မောရှေပညတ်နဲ့ပတ်သက်ပြီး ပေါလု ဘာသွန်သင်ပေးသလဲ။

^၉ “ကလေးတွေ အရေဖျားဖြတ်စရာ မလိုဘူး၊ ထုံးတမ်းစဉ်လာ လိုက်စရာ မလိုဘူး” ဆိုပြီး လူမျိုးခြားတွေဆီမှာ နေတဲ့ ဂျူးတွေကို ပေါလု သွန်သင်ပေးနေတယ်ဆိုတဲ့ သတင်းကော။ လူမျိုးခြားတွေကို ပေါလု သတင်းကောင်း ဟောတယ်။ ပညတ်တရားကို လူမျိုးခြားတွေ လိုက်နာစရာ မလိုကြောင်း  ရှင်းပြတယ်။ လူမျိုးခြားတွေ အရေဖျား ဖြတ်ရမယ်၊ မောရှေပညတ် လိုက်နာရမယ်ဆိုပြီး သွန်သင်သူတွေ မှားကြောင်း ဖော်ထုတ်တယ်။ (ဂလ. ၅:၁-၇) လည်ပတ်ခဲ့တဲ့ ဒေသက ဂျူးတွေကိုလည်း သတင်းကောင်း ဟောတယ်။ ယေရှုရဲ့ သေခြင်းဟာ ပညတ်တရားကို အဆုံးတိုင်စေကြောင်း၊ ပညတ်တရားအားဖြင့် မဟုတ်ဘဲ ယုံကြည်ခြင်းအားဖြင့် ဖြောင့်မတ်ရာ ရောက်ကြောင်း ပေါလု ရှင်းပြခဲ့မှာပဲ။—ရော. ၂:၂၈၊ ၂၉။ ၃:၂၁-၂၆။

၁၀။ ပညတ်တရား၊ အရေဖျား ဖြတ်ခြင်းကိစ္စနဲ့ပတ်သက်ပြီး အကျိုးသင့်အကြောင်းသင့် ရှိကြောင်း ပေါလု ဘယ်လို ပြသလဲ။

^၁၀ ဥပုသ်နေ့မှာ အလုပ်မလုပ်တာ၊ အစာ ရှောင်တာ စတဲ့ ဂျူးထုံးစံတချို့ ဆက်လိုက်နေသူတွေကို ပေါလု နားလည်ပေးတယ်။ (ရော. ၁၄:၁-၆) အရေဖျား ဖြတ်ခြင်းနဲ့ပတ်သက်ပြီး စည်းမျဉ်းတွေ မထုတ်ဘူး။ တိမောသေရဲ့ ဖခင်ဟာ ဂရိလူမျိုး ဖြစ်လို့ ဂျူးတွေ ထောက်လာမှာ စိုးပြီး တိမောသေကို အရေဖျားတောင် ဖြတ်ခိုင်းတယ်။ (တ. ၁၆:၃) အရေဖျား ဖြတ်ခြင်းကိစ္စဟာ ကိုယ်ပိုင် ဆုံးဖြတ်ရမယ့်ကိစ္စပဲ။ “အရေဖျားဖြတ်ခြင်း၊ မဖြတ်ခြင်းဟာ အရေးမကြီးဘူး။ ချစ်ခြင်းမေတ္တာကနေ ပေါက်ဖွားလာတဲ့ ယုံကြည်ခြင်းကသာ အရေးကြီးတာပါ” လို့ ဂလာတိ အသင်းသားတွေကို ပေါလု ပြောခဲ့တယ်။ (ဂလ. ၅:၆) ဒါပေမဲ့ ပညတ်တရားကို လိုက်လျှောက်တဲ့အနေနဲ့ အရေဖျား ဖြတ်တာ၊ ယေဟောဝါရဲ့ မျက်နှာသာ ရဖို့ အရေဖျား ဖြတ်ရမယ်လို့ ယူဆတာဟာ ယုံကြည်ခြင်း ကင်းမဲ့ရာရောက်တယ်။

၁၁။ အကြီးအကဲတွေ ပေါလုကို ဘာလုပ်ခိုင်းသလဲ။ ပေါလု ဘာကိုတော့ မလုပ်သလဲ။ (အောက်ခြေမှတ်ချက်ကိုလည်း ကြည့်ပါ။)

^၁၁ ပေါလုနဲ့ပတ်သက်တဲ့ သတင်းတွေဟာ မမှန်ပေမဲ့ ယုံကြည်သူ ဂျူးတွေ စိတ်အနှောင့်အယှက် ဖြစ်နေသေးတယ်။ ဒါကြောင့် အကြီးအကဲတွေက ပေါလုကို ဒီလိုလုပ်ခိုင်းတယ်– “ကျွန်တော်တို့ဆီမှာ ဘုရားကို သစ္စာကတိပြုထားတဲ့သူ လေးယောက် ရှိတယ်။ ခင်ဗျားက သူတို့နဲ့အတူ သွားပြီး မောရှေပညတ်မှာ ပါတဲ့အတိုင်း ကိုယ်ကို သန့်စင်အောင် လုပ်လိုက်ပါ။ သူတို့ ခေါင်းရိတ်နိုင်ဖို့ လိုအပ်တဲ့ ကုန်ကျစရိတ်ကိုလည်း ကျခံပေးလိုက်ပါ။ အဲဒီလိုလုပ်ရင် ခင်ဗျားနဲ့ပတ်သက်ပြီး  သူတို့ ကြားတဲ့သတင်းဟာ ကောလာဟလ ဖြစ်နေမှန်း၊ ခင်ဗျားက ဖြောင့်မှန်စွာ ကျင့်ကြံပြီး ပညတ်တရားကို လိုက်နာမှန်း လူတိုင်း သိသွားလိမ့်မယ်။” c—တ. ၂၁:၂၃၊ ၂၄။

၁၂။ ပေါလုဟာ ပြောင်းသာလဲသာ ရှိကြောင်း၊ ပူးပေါင်းဆောင်ရွက်ကြောင်း ဘယ်လို ပြသလဲ။

^၁၂ တကယ့် ပြဿနာက မိမိနဲ့ပတ်သက်တဲ့ မဟုတ်မမှန် သတင်းတွေ မဟုတ်ဘဲ မောရှေပညတ်အပေါ် ယုံကြည်သူ ဂျူးတွေ စိတ်အားကြီးမှု ဖြစ်တယ်လို့ ပေါလု ပြောလိုက်လို့ ရတယ်။ ဒါပေမဲ့ ဘုရားသခင့်မူတွေနဲ့ မဆန့်ကျင်သရွေ့ အလိုက်အထိုက် လုပ်ပေးဖို့ ပေါလု အသင့်ရှိတယ်။ ဒီ့မတိုင်ခင်က “ပညတ်အောက်မှာ ရှိတဲ့သူတွေဆီ ရောက်တဲ့အခါ ပညတ်အောက်မှာ ကိုယ်တိုင် မရှိပေမဲ့ ပညတ်အောက်မှာ ရှိတဲ့သူတွေကို ရနိုင်ဖို့ ပညတ်အောက်မှာ ရှိတဲ့သူတစ်ယောက်လို ဖြစ်ခဲ့တယ်” လို့ ပေါလု ရေးခဲ့တယ်။ (၁ ကော. ၉:၂၀) အခု၊ ဂျေရုဆလင်မြို့က အကြီးအကဲတွေ အကြံပေးတဲ့အတိုင်း ပေါလု လုပ်ခြင်းအားဖြင့် “ပညတ်အောက်မှာ ရှိတဲ့သူတစ်ယောက်လို” ဖြစ်လာတယ်။ ဒီနည်းနဲ့ စံနမူနာကောင်း ချမှတ်ခဲ့တယ်။ ကျွန်တော်တို့လည်း ကိုယ့်နည်းအတိုင်း တဇွတ်ထိုး မလုပ်ဘဲ အကြီးအကဲတွေနဲ့ ပူးပေါင်းဆောင်ရွက်ဖို့ လိုတယ်။—ဟီ. ၁၃:၁၇။

၁၃။ (က) ဗိမာန်တော်မှာ ဆူပူအုံကြွအောင် ဂျူးတချို့ ဘာကြောင့် လုပ်ကြသလဲ။ (ခ) အသက်အန္တရာယ်ကနေ ပေါလု ဘယ်လို လွတ်မြောက်သွားသလဲ။

^၁၃ ဗိမာန်တော်မှာ အခြေအနေ မကောင်းဘူး။ သစ္စာကတိဖြေတဲ့ ရက်တွေ ကုန်ခါနီးမှာ ပေါလုကို အာရှနယ်က ဂျူးတွေ မြင်တော့ လူမျိုးခြားတွေကို ဗိမာန်တော်ထဲ ပေါလု ခေါ်လာတယ်လို့ မဟုတ်မမှန် စွပ်စွဲပြီး ဆူပူအုံကြွအောင် လုပ်တယ်။ ရောမ စစ်သူကြီးသာ ရောက်မလာရင် ပေါလု သေတဲ့အထိ ရိုက်ခံရမှာ။ ဒီလိုမဖြစ်ခဲ့ပေမဲ့ ရောမစစ်သူကြီးက ပေါလုကို ဖမ်းလိုက်တယ်။ အဲဒီနေ့ကစပြီး နောက်လေးနှစ်ကျော်အထိ ပေါလု ချုပ်နှောင်ခံရတယ်။ ပေါလု ကြုံရတဲ့ အန္တရာယ်ဟာ ဒီလောက်နဲ့ ပြီးမသွားဘူး။ ပေါလုကို ဘာကြောင့် တိုက်ခိုက်သလဲလို့ စစ်သူကြီး မေးတဲ့အခါ တစ်ယောက်တစ်ပေါက် အော်ဟစ်စွပ်စွဲကြတယ်။ အော်ဟစ်သံတွေကြောင့် စစ်သူကြီး ဘာမှ နားမလည်လိုက်ဘူး။ တဖြည်းဖြည်း အခြေအနေ ဆိုးလာလို့ အဲဒီနေရာကနေ ပေါလုကို ရောမစစ်သည်တွေ ထမ်းသွားကြတယ်။ စစ်တန်းလျားကို ရောက်ခါနီးမှာ “ကျွန်တော့်ကို ဒီလူတွေနဲ့ စကားပြောခွင့်ပေးပါ” လို့ စစ်သူကြီးကို ပေါလု ခွင့်တောင်းတယ်။ (တ. ၂၁:၃၉) စစ်သူကြီး ခွင့်ပြုလိုက်တဲ့အတွက် မိမိရဲ့ ယုံကြည်ချက်ကို ပေါလု ရဲရဲရင့်ရင့် ထုချေပြောဆိုတော့တယ်။

၁၄၊ ၁၅။ (က) ဂျူးတွေကို ပေါလု ဘာရှင်းပြသလဲ။ (ခ) ဂျူးတွေ ဒေါသထွက်ရတဲ့ အကြောင်းရင်းကို သိဖို့ ရောမစစ်သူကြီး ဘာလုပ်သလဲ။

^၁၄ “အခု ကျွန်တော် ထုချေမယ့်စကားကို နားထောင်ကြပါ” ဆိုပြီး ပေါလု စပြောတယ်။ (တ. ၂၂:၁) ဟီဘရူးစကားနဲ့ ပြောတဲ့အခါ အားလုံး ငြိမ်သွားကြတယ်။ ခရစ်တော်ရဲ့ နောက်လိုက် ဖြစ်နေရတဲ့  အကြောင်းရင်းကို ပေါလု ရှင်းပြတယ်။ ဂျူးတွေ ဆန်းစစ်နိုင်မယ့် အချက်တွေကို ပါးနပ်မှု ရှိရှိ ပြောတယ်။ နာမည်ကြီးဆရာ ဂါမလျေလဆီမှာ ပေါလု သင်ယူခဲ့တယ်။ တချို့ သိကြတဲ့အတိုင်း ခရစ်တော်ရဲ့ နောက်လိုက်တွေကို ညှဉ်းဆဲခဲ့တယ်။ ဒါပေမဲ့ ဒမတ်စကတ်မြို့ သွားတဲ့ လမ်းမှာ မိမိကို စကားပြောတဲ့ ရှင်ပြန်ထမြောက်ပြီး ခရစ်တော်ဆီက စိတ်အာရုံကို မြင်ခဲ့ရတယ်။ ပေါလုရဲ့ ခရီးဖော်တွေ အလင်းတန်းကို မြင်တယ်။ အသံကိုတော့ ကြားရပေမဲ့ နားမလည်ဘူး။ (တ. ၉:၇။ ၂၂:၉) စိတ်အာရုံကြောင့် မျက်စိကွယ်သွားတဲ့ ပေါလုကို ဒမတ်စကတ်မြို့ဆီ ခေါ်သွားပေးကြတယ်။ အဲဒီဒေသမှာ ရှိတဲ့ ဂျူးတွေ သိကြတဲ့ အာနနိက ပေါလု မျက်စိ ပြန်မြင်အောင် အံ့ဖွယ်နည်းနဲ့ လုပ်ပေးလိုက်တယ်။

^၁၅ ဂျေရုဆလင်မြို့ကို ပြန်သွားပြီးနောက် ဗိမာန်တော်မှာ မိမိရှေ့ ယေရှု ကိုယ်ထင်ပြခဲ့ကြောင်း ပေါလု ဆက်ရှင်းပြတယ်။ အဲဒီအခါ ဂျူးတွေ ဒေါသထွက်လာပြီး “ဒီလို လူစားမျိုးကို သတ်ပစ်။ ဒီလူ အသက်မရှင်သင့်ဘူး” လို့ အသံကုန် အော်ကြတယ်။ (တ. ၂၂:၂၂) စစ်သူကြီးဟာ ပေါလု လုံခြုံစေဖို့ စစ်တန်းလျားကို ခေါ်သွားခိုင်းတယ်။ ပေါလုကို ဂျူးတွေ ဘာကြောင့် ဒေါသထွက်ရသလဲ သိချင်နေတယ်။ ဒါကြောင့် ကြိမ်ဒဏ်ပေးပြီး စစ်ဆေးမေးမြန်းဖို့ စစ်သည်တွေကို အမိန့်ပေးတယ်။ ဒါပေမဲ့ တရားဝင် ခုခံကာကွယ်ခွင့်ကို သုံးပြီး မိမိဟာ ရောမနိုင်ငံသား ဖြစ်ကြောင်း ပေါလု ပြောတယ်။ ဒီနေ့လည်း ယုံကြည်ခြင်းအတွက် ခုခံကာကွယ်ဖို့ ဥပဒေ အမျိုးမျိုးကို ယေဟောဝါသက်သေတွေ သုံးကြတယ်။ (စာမျက်နှာ ၁၈၄ မှာ ပါတဲ့ “ ရောမဥပဒေနဲ့ ရောမနိုင်ငံသားတွေ၊” “ ခေတ်သစ် တရားဥပဒေ တိုက်ပွဲများ” လေးထောင့်ကွက်တို့ကို ကြည့်ပါ။) ပေါလု ရောမနိုင်ငံသား ဖြစ်ကြောင်း စစ်သူကြီး သိသွားတဲ့အခါ နောက်တစ်နည်း ကြံတယ်။ ပေါလု စွပ်စွဲခံရတဲ့ အကြောင်းရင်းကို သိဖို့ နောက်တစ်နေ့မှာ ဂျူးတရားရုံးချုပ် အထူးအစည်းအဝေးဆီ ပေါလုကို ခေါ်သွားတယ်။

၁၆၊ ၁၇။ (က) ဂျူးတရားရုံးချုပ်ရှေ့ ပေါလု စကားပြောချိန်မှာ ဘာဖြစ်ခဲ့သလဲ။ (ခ) အရိုက်ခံရတဲ့အခါ နှိမ့်ချမှု ရှိကြောင်း ပေါလု ဘယ်လို ပြသလဲ။

^၁၆ “ညီအစ်ကိုတို့၊ ကျွန်တော် ဒီနေ့အထိ အမှားတစ်ခုမှ မလုပ်ခဲ့မှန်း ဘုရားသခင့်ရှေ့မှာ အမှားအမှန်သိစိတ် ကြည်လင်စွာ ပြောနိုင်ပါတယ်” လို့ ဂျူးတရားရုံးချုပ်ရှေ့ ပေါလု စပြောတယ်။ (တ. ၂၃:၁) ဒါပေမဲ့ ဆက်မပြောခင်မှာပဲ “ပုရောဟိတ်မင်း အာနနိက သူ့ပါးစပ်ကို ရိုက်လိုက်စမ်း ဆိုပြီး အနားမှာ ရပ်နေတဲ့သူတွေကို ပြော” တယ်။ (တ. ၂၃:၂) တကယ့် စော်ကားမှုကြီးပါပဲ။ ဘာအထောက်အထားမှ မရှိဘဲ လူလိမ်ဆိုပြီး ပေါလုကို စီရင်တာဟာ သူတို့ ဘက်လိုက်ကြောင်း ပေါ်လွင်တယ်။ ဒါကြောင့် ပေါလုက “ထုံးဖြူသုတ်ထားတဲ့ အုတ်ရိုး၊ ခင်ဗျားကို ဘုရားသခင် ရိုက်မှာ။ ပညတ်တရားနဲ့အညီ စီရင်ဖို့ ထိုင်နေပါလျက်နဲ့ ပညတ်တရားကို ချိုးဖောက်ပြီး ကျွန်တော့်ကို ရိုက်ခိုင်းရသလား” ဆိုပြီး ပြန်ပြောတယ်။—တ. ၂၃:၃။

^၁၇ အနားမှာ ရပ်နေသူတချို့ဟာ ပေါလု ရိုက်ခံရတာကျတော့ မလန့်ဘဲ ပေါလုရဲ့ စကားကြောင့် လန့်သွားကြတယ်။ “ဘုရားသခင်ရဲ့ ပုရောဟိတ်မင်းကို မင်း စော်ကားနေတာလား” လို့ ပြောကြတယ်။ အဲဒီအခါ “ညီအစ်ကိုတို့၊ သူ ပုရောဟိတ်မင်း ဖြစ်မှန်း ကျွန်တော် မသိလို့ပါ။ ‘အုပ်ချုပ်တဲ့သူကို မလေးမစား မပြောနဲ့’ ဆိုပြီး ကျမ်းစာမှာ ရေးထားတယ်” လို့ ပေါလု ပြန်ပြောတယ်။ d (တ. ၂၃:၄၊ ၅။ ထွ. ၂၂:၂၈) နှိမ့်ချမှု ရှိကြောင်း၊ ပညတ်တရားကို လေးစားကြောင်း ပေါလု ပြလိုက်တာပါပဲ။ အခု၊ ပေါလု နောက်တစ်နည်း သုံးတယ်။ ဂျူးတရားရုံးချုပ် အဖွဲ့ဝင်တွေထဲမှာ ဖာရိရှဲတွေနဲ့ ဇဒ္ဒုကဲတွေ ပါမှန်း သိလို့ “ညီအစ်ကိုတို့၊ ကျွန်တော်ဟာ ဖာရိရှဲတစ်ယောက်ပါ။ ဖာရိရှဲရဲ့ သားလည်း ဟုတ်ပါတယ်။ လူသေတွေ ရှင်ပြန်ထမြောက်လာမယ်ဆိုတဲ့ မျှော်လင့်ချက်ကို ကျွန်တော် ယုံကြည်လို့ အခုလို စစ်ကြောစီရင်ခံနေရတာပါ” လို့ ပြောတယ်။—တ. ၂၃:၆။

၁၈။ ဖာရိရှဲ ဖြစ်တယ်လို့ ပေါလု ဘာကြောင့် ပြောသလဲ။ အခြေအနေတချို့မှာ ပေါလုလို ဘယ်လို ကျိုးကြောင်းဆင်ခြင်နိုင်မလဲ။

^၁၈ မိမိဟာ ဖာရိရှဲ ဖြစ်တယ်လို့ ပေါလု ဘာကြောင့် ပြောသလဲ။ အဲဒီဂိုဏ်းဝင်မိသားစုကနေ မွေးဖွားလာလို့  “ဖာရိရှဲရဲ့ သား” ဖြစ်တယ်။ ဒါကြောင့် ဖာရိရှဲလို့ တော်တော်များများ ယူမှတ်ကြတာ ဖြစ်နိုင်တယ်။ e ဒါပေမဲ့ ဖာရိရှဲတွေရဲ့ ရှင်ပြန်ထမြောက်ခြင်း ယုံကြည်ချက်ကို ပေါလု ဘယ်လိုလုပ် သဘောတူပါ့မလဲ။ လူသေပေမဲ့ ဝိညာဉ်မသေဘူး၊ ဖြောင့်မတ်သူတွေရဲ့ ဝိညာဉ်ဟာ လူ့ခန္ဓာကိုယ်မှာ ပြန်ဝင်စားမယ်လို့ ဖာရိရှဲတွေ ယုံတယ်။ အဲဒီအယူဝါဒတွေကို ပေါလု မယုံဘူး။ ယေရှု သင်ပေးခဲ့တဲ့ ရှင်ပြန်ထမြောက်ခြင်းကို ယုံတယ်။ (ယော. ၅:၂၅-၂၉) ဒါပေမဲ့ သေပြီးနောက် အသက်ပြန်ရှင်မယ်ဆိုတာ ဖာရိရှဲတွေလိုပဲ ပေါလု ယုံတယ်။ ဇဒ္ဒုကဲတွေကတော့ ရှင်ပြန်ထမြောက်ခြင်းကို မယုံဘူး။ ကျွန်တော်တို့လည်း ဘာသာရေး ယုံကြည်ချက် မတူသူတွေနဲ့ ဆွေးနွေးတဲ့အခါ အဲဒီလိုပဲ တူညီချက် ရှာကြရမယ်။ ကျွန်တော်တို့က ကျမ်းစာ အာဘော်ရှင်ကို ကိုးကွယ်ကြတယ်။ သူတို့က သူတို့ဘုရား ကိုးကွယ်ကြတယ်။ ဒါပေမဲ့ ဘုရားတစ်ပါး ရှိတယ်ဆိုတဲ့ ယုံကြည်ချက်ကတော့ တူတယ်။

၁၉။ ဂျူးတရားရုံးချုပ် အစည်းအဝေး ဘာကြောင့် ပျက်သွားသလဲ။

^၁၉ ပေါလုရဲ့ စကားကြောင့် ဂျူးတရားရုံးချုပ်မှာ စိတ်ဝမ်းကွဲလာတယ်။ “ဒီလိုနဲ့ ရုန်းရင်းဆန်ခတ် ဖြစ်လာတယ်။ ဖာရိရှဲတွေဘက်က ကျမ်းတတ်တချို့ ထရပ်ပြီး ‘ဒီလူမှာ ဘာအမှားမှ မတွေ့ဘူး။ ဝိညာဉ်ပုဂ္ဂိုလ် ဒါမှမဟုတ် ကောင်းကင်တမန်က သူ့ကို ပြောခဲ့တာဆိုရင် ဘယ့်နှယ်လုပ်ကြမတုံး—’ ဆိုပြီး အကြီးအကျယ် ငြင်းခုံကြတယ်။” (တ. ၂၃:၉) ကောင်းကင်တမန်တွေ ရှိတယ်ဆိုတာ ဇဒ္ဒုကဲတွေ မယုံကြဘူး။ ဒါကြောင့် ဒီစကား ကြားတဲ့အခါ သူတို့ ဒေါသထွက်ကြတယ်။ (“ ဇဒ္ဒုကဲတွေနဲ့ ဖာရိရှဲတွေ” လေးထောင့်ကွက်ကို ကြည့်ပါ။) အခြေအနေ ရုတ်ရုတ်သဲသဲ ဖြစ်လာလို့ ရောမစစ်သူကြီးက ပေါလုကို ခေါ်ထုတ်သွားတယ်။ (တ. ၂၃:၁၀) ဒါပေမဲ့ ပေါလု အန္တရာယ်ရှိနေတုန်းပဲ။ အခု ဘာဆက်ဖြစ်ဦးမလဲ။ နောက်အခန်းမှာ ပိုသိရပါမယ်။