အခန်း ၂၁

ခရစ်ယာန်ဘောင်​အပေါ် ကျရောက်​သော ယေဟောဝါ​၏ ကပ်ဘေး​များ

ရူပါရုံ ၅ ဗျာဒိတ် ၈:၁–၉:၂၁

အကြောင်းအရာ– တံပိုးခရာ ခု​နစ်​လက်​အနက် ခြောက်​လက်ကို​မှုတ်ခြင်း

ပြည့်စုံချိန်– ၁၉၁၄ ခုနှစ် ခရစ်တော်​ယေရှု နန်းထိုင်​ချိန်​မှ ဆင်းရဲ​ဒုက္ခ​ကြီး​အထိ

၁။ သတ္တမ​တံဆိပ်​ကို သိုးသငယ် ဖွင့်​တော်​မူ​သောအခါ ဘာဖြစ်​သနည်း။

ဝိညာဏ​ဣသရေလ ၁၄၄,၀၀၀ ကို တံဆိပ်​ခတ်​၍ လူအုပ်ကြီး​အား ကပ်ကျော်​ရန် အတည်ပြု​ထောက်ခံ​၍ မပြီးမချင်း “လေးမျက်နှာ​လေ​များ” ကို ချုပ်ထိန်း​ခဲ့​ပါ​သည်။ (ဗျာဒိတ် ၇:၁-၄၊ ၉) သို့ရာတွင် ၎င်း​လေပြင်း​မုန်တိုင်း မြေကြီးပေါ် မ​တိုက်ခတ်​မီ စာတန့်​လောက​အပေါ် ချ​တော်​မူ​သော ယေဟောဝါ​၏ အပြစ်ပေး​စီရင်ချက်​များ​ကိုလည်း အသိပေး​ရမည်​ဖြစ်၏။ သတ္တမ​နှင့် နောက်ဆုံး​တံဆိပ်​ကို သိုးသငယ် ဖွင့်​တော်​မူ​သောအခါ ဘာ​ပေါ်လာ​မည်​ကို ယောဟန် အာရုံပြု​၍ ကြည့်​မည်​မုချ။ ယခု သူ့​တွေ့ကြုံမှု​ကို ကျွန်ုပ်​တို့အား ဤသို့​ဖောက်သည်ချ​၏– “သတ္တမ​တံဆိပ်​ကို ကိုယ်တော် [သိုးသငယ်] ဖွင့်လိုက်​သောအခါ ကောင်းကင်ဘုံ​တွင် နာရီ​ဝက်​ခန့် ဆိတ်ငြိမ်​သွား​၏။ ထို့နောက် ဘုရားသခင့် ရှေ့တော်၌​ရပ်နေ​သော ကောင်းကင်တမန် ခု​နစ်​ပါး​ကို ငါ​မြင်ရ​၏။ သူတို့အား တံပိုးခရာ ခု​နစ်​လက်ကို​ပေး​၏။”​—ဗျာဒိတ် ၈:၁၊ ၂။

စိတ်အား​ပြင်းပြ​စွာ ဆုတောင်း​ရန်​အချိန်

၂။ ကောင်းကင်​၌ နာရီ​ဝက်​မျှ ဆိတ်ငြိမ်​နေစဉ် ဘာဖြစ်​ပျက်​သနည်း။

^၂ ထူးခြားသော ဆိတ်ငြိမ်မှု​ပါ​တကား။ တစ်စုံတစ်ခု​ဖြစ်ပျက်​ဖို့ စောင့်ဆိုင်း​သောအခါ နာရီ​ဝက်​ဆို​သော အချိန်ပိုင်း​သည် အတော်ကြာ​ညောင်း​၏။ မပြတ်​သီဆို​သော ကောင်းကင်​သံ​ပြိုင် ထောမနာ​သီချင်းကို​ပင် မကြား​ရတော့။ (ဗျာဒိတ် ၄:၈) အဘယ်ကြောင့်​နည်း။ အကြောင်းရင်းကို ရူပါရုံ​၌ ယောဟန်​တွေ့ရ​၏။ “ထို့နောက် အခြား​ကောင်းကင်တမန်​တစ်ပါး ရောက်လာ​ပြီး ယဇ်​ပလ္လင်​နား​မှာ ရပ်​လေ​၏။ သူ၌ နံ့သာပေါင်း​ရှို့​သော ရွှေ​လင်ပန်း​ပါရှိ​၏။ ပလ္လင်တော်​ရှေ့၌​ရှိသော ရွှေ​ယဇ်​ပလ္လင်​ပေါ်မှာ သန့်ရှင်းသူ​အပေါင်း​တို့၏ ပတ္ထနာ​များနှင့်​အတူ ပူဇော်​ရန် သူ့​အား များစွာသော နံ့သာပေါင်း​ကို ပေး​ထား​၏။ ထို့နောက် နံ့သာပေါင်း မီးခိုး​ငွေ့​သည် သန့်ရှင်းသူ​တို့၏ ပတ္ထနာ​များနှင့်​အတူ ကောင်းကင်တမန်​၏​လက်​မှ ဘုရားသခင့်​ရှေ့တော်​သို့ တက်​လေ​၏။”​—ဗျာဒိတ် ၈:၃၊ ၄။

၃။ (က) နံ့သာပေါင်း​မီးရှို့ခြင်း​က ဘာကို​သတိ​ရစေ​သနည်း။ (ခ) ကောင်းကင်​၌ နာရီ​ဝက် ဆိတ်ငြိမ်​ခြင်း​သည် ဘာ​အတွက်​နည်း။

 ^၃ ဤ​အချက်​က ဂျူး​စနစ်​အောက်​၌ တဲ​တော်​တွင် နံ့သာပေါင်း​ကို နေ့စဉ် မီးရှို့​ပူဇော်​ကြောင်း၊ နောက်ပိုင်း၌​လည်း ယေရုရှလင် ဗိမာန်တော်၌ ထိုသို့​ပြု​ကြောင်း သတိ​ရစေသည်။ (ထွက်မြောက်ရာ ၃၀:၁-၈) ထိုသို့​နံ့သာပေါင်း မီးရှို့​ပူဇော်​စဉ် ယဇ်ပုရောဟိတ်​မဟုတ်သော ဣသရေလလူ​တို့သည် နံ့သာပေါင်း​ကို ခံ​တော်​မူ​သော​အရှင်​ထံ နှလုံး​ထဲ​၌ တိတ်ဆိတ်​စွာ ဆုတောင်း​လျက် မြင့်မြတ်​သော​နေရာ အပြင်ဘက်​၌ စောင့်နေ​ကြသည်။ (လုကာ ၁:၁၀) အလားတူ​အခြင်းအရာ ကောင်းကင်ဘုံ​တွင် ဖြစ်ပျက်​သည်ကို ယခု ယောဟန်​မြင်ရ​၏။ ကောင်းကင်တမန် ပူဇော်​သော​နံ့သာပေါင်း​သည် “သန့်ရှင်းသူ​တို့၏ ပတ္ထနာ​များ” နှင့်​ဆက်စပ်​သည်။ အမှန်​အားဖြင့် စောစော​ပိုင်း​က ရူပါရုံ​တစ်ခု​၌ နံ့သာပေါင်း​သည် ထိုသို့​သော​ပတ္ထနာ​ကို တင်စား​သည်​ဟု​ဆို​၏။ (ဗျာဒိတ် ၅:၈; ဆာလံ ၁၄၁:၁၊ ၂) သို့​ဖြစ်၍ ကောင်းကင်​မှ ပုံခိုင်း​ချက်​ဖြစ်သော ဆိတ်ငြိမ်မှု​မှာ မြေကြီးပေါ်​က သန့်ရှင်းသူ​တို့၏ ပတ္ထနာ​များ​ကို နားညောင်း​တော်​မူ​ရန် အချိန်ပေး​ခြင်း​ဖြစ်​ကြောင်း သိသာ​၏။

၄၊ ၅။ ပုံခိုင်း​ချက်​ဖြစ်သော နာရီ​ဝက် ဆိတ်ငြိမ်​ချိန်​ကို သိနိုင်​ရန် အဘယ်​သမိုင်း​ဖြစ်ရပ်​က အထောက်အကူ​ပြု​သနည်း။

^၄ မည်သည့်​အချိန်၌ ထိုသို့​ဖြစ်ပျက်​သည်ကို ကျွန်ုပ်​တို့ ပိုင်းဖြတ်​နိုင်​သလော။ ပိုင်းဖြတ်​နိုင်​ပါ​သည်။ သခင့်​နေ့​တော် အ​ဦး​ပိုင်း​မှ သမိုင်းဝင်​ဖြစ်ရပ်​များနှင့်​တကွ ရှေ့နောက်စကား​ကို စိစစ်​ခြင်း​ဖြင့်​ဖြစ်သည်။ (ဗျာဒိတ် ၁:၁၀) ၁၉၁၈ နှင့် ၁၉၁၉ ခုနှစ်​အတွင်း ကမ္ဘာ​ပေါ်​က အဖြစ်အပျက်​များသည် ဗျာဒိတ် ၈:၁-၄ ပါ ဇာတ်​ဝင်​ခန်း​နှင့် ကိုက်ညီ​လှ​၏။ ၁၉၁၄ ခုနှစ်​မတိုင်မီ အနှစ် ၄၀ အတွင်း ကျမ်းစာ​ကျောင်းသား​များ​ဟူ၍ ထို​စဉ်​က အမည်တွင်​သော ယေဟောဝါသက်သေ​များ​က တစ်ပါး​အမျိုးသား​ကာလ​သည် ၁၉၁၄ ခုနှစ်​၌ ကုန်ဆုံး​မည်​ဟု ရဲရင့်စွာ​ကြေညာ​ခဲ့​ကြသည်။ ၁၉၁၄ ခုနှစ်​၏​ဒုက္ခများ​က သူတို့​မှန်ကန်ကြောင်း သက်သေထူ​၏။ (လုကာ ၂၁:၂၄; မဿဲ ၂၄:၃၊ ၇၊ ၈) သို့သော် သူတို့​အများ​က မိမိတို့သည် ၁၉၁၄ ခုနှစ်​တွင် ဤ​ကမ္ဘာ​ပေါ်​မှ အမွေခံ​ရာ​ကောင်းကင်​သို့ ချီဆောင်ခြင်း​ခံရ​မည်​ဟု​လည်း ယုံကြည်​ကြသည်။ ထိုသို့​မဖြစ်ခဲ့​ချေ။ သို့​အစား၊ ပထမ​ကမ္ဘာ​စစ်​အတွင်း ပြင်းထန်သော​ညှဉ်းဆဲ​မှု​ကို ခါးစည်း​၍​ခံ​လိုက်ရ​သည်။ ၁၉၁၆၊ အောက်တိုဘာ ၃၁ ရက်​တွင် ကင်းမျှော်စင်​အသင်း​၏ ပထမ​ဥက္ကဋ္ဌ ချားလ်စ် တီ၊ ရပ်စဲ​လ် ကွယ်လွန်​သွား​သည်။ ထို့နောက် ၁၉၁၈၊ ဇူလိုင်​လ ၄ ရက်​နေ့၌ ဥက္ကဋ္ဌ​သစ် ဂျိုးဇက် အက်ဖ်၊ ရပ်သဖော့ဒ်​နှင့် အသင်းမ​၏ အခြား​ကိုယ်စားလှယ်​ခု​နစ်​ဦး​သည် နှစ်​ရှည်​ထောင်ဒဏ် မှားယွင်းစွာ စီရင်ချက်​ချ​ခံရ​ပြီး ဂျော်ဂျီယာ​ပြည်နယ် အတ္တ​လ​န္တာ​မြို့ရှိ အကျဉ်းထောင်​သို့ ပို့ဆောင်​ခံရ​ကြသည်။

^၅ စိတ်ရင်းမှန်​သော ယောဟန်​အတန်းအစား ခရစ်ယာန်​များသည် နား​ဝေ​တိမ်​တောင် ဖြစ်​ခဲ့​ကြသည်။ မိမိတို့ ရှေ့ဆက်​ဘာလုပ်​ရန် ဘုရားသခင် အလိုတော်​ရှိ​သနည်း။ မိမိတို့​အား အဘယ်အခါ ကောင်းကင်​သို့ ခေါ်ဆောင်​တော်​မူ​မည်​နည်း။ ၁၉၁၉၊ မေလ ၁ ရက် ထုတ် ကင်းမျှော်စင် ၌ “ရိတ်သိမ်း​၍ ပြီး​လေ​ပြီ​—ရှေ့ဆက် ဘာဖြစ်​မည်​နည်း” ဟူ၍ ခေါင်းစဉ်​တပ်​သော​ဆောင်းပါး ပေါ်ထွက်​လာ​သည်။ ယင်းက သူတို့​ဇဝေဇဝါ​ဖြစ်​ကြောင်း ပေါ်လွင်​စေ​သော်လည်း သစ္စာရှိ​များ ဆက်လက်​ကြံ့ကြံ့ခံ​သွား​ကြ​ရန် အားပေး​လျက် ဤသို့​ဖြည့်စွက် ရေးသား​လိုက်​သည်– “နိုင်ငံတော်​အတန်းအစား ရိတ်သိမ်းခြင်း​ပြီးစီး​ပြီ ဟူသော​စကား​သည် ယခု တကယ်​ပင်​မှန်​ကြောင်း၊ သူတို့​အားလုံး​ကို တံ​ဆိတ်​ခတ်​ပြီး​သဖြင့် တံခါးပိတ်​ပြီ​ဖြစ်​ကြောင်း ကျွန်ုပ်​တို့​ယုံကြည်​၏။” ခဲယဉ်း​သော ထို​သမယ​အတွင်း ယောဟန်​အတန်းအစား​၏ စိတ်​ပြင်းပြ​သော ပတ္ထနာ​များသည် များစွာသော​နံ့သာပေါင်း မီးခိုး​ငွေ့​ပ​မာ တလူလူ​တက်​ခဲ့​သည်။ ကိုယ်တော်​လည်း သူတို့၏​ပတ္ထနာ​ကို နားညောင်း​တော်​မူ​၏။

မြေကြီးပေါ်​သို့ မီး​ကျစေ​ခြင်း

၆။ ကောင်းကင်​၌ ဆိတ်ငြိမ်​သည့်​နောက် ဘာဖြစ်​ပျက်​၍ ဘာကို တုံ့ပြန်​သည့်​အနေ​နှင့်​နည်း။

^၆ ယောဟန်​က ကျွန်ုပ်​တို့အား ဤသို့​ပြောကြား​၏– “သို့သော် ကောင်းကင်တမန်​သည် နံ့သာပေါင်း​လင်ပန်း​ကို ချက်ချင်း​ယူ၍ ယဇ်​ပလ္လင်​ပေါ်​မှ​မီး​ဖြင့် ဖြည့်​ပြီး​လျှင် မြေကြီးပေါ်​သို့ ပစ်ချ​လိုက်​၏။ ထို​အခါ မိုးခြိမ်းသံ​များ၊ စကားသံ​များ၊ လျှပ်စီး​များနှင့် ငလျင် ဖြစ်ပေါ်​လာ​သည်။” (ဗျာဒိတ် ၈:၅) ဆိတ်ငြိမ်​နေရာ​မှ တစ်မုဟုတ်ချင်း ဇာတ်​ဆန်​သော လှုပ်ရှားမှုများ ဖြစ်ပေါ်​လာ​သည်။ နံ့သာပေါင်း​ယဇ်​ပလ္လင်​ပေါ်​က မီး​ကြောင့်​ဖြစ်သည့်​အတွက် သန့်ရှင်းသူ​များ​၏ ပတ္ထနာ​ကို တုံ့ပြန်​ခြင်း​ဖြစ်​ကြောင်း ထင်ရှား​သည်။ လွန်ခဲ့သော ဘီစီ ၁၅၁၃ ခုနှစ်​တွင် သိနာ​တောင်​၌ မိုးခြိမ်းသံ​များ၊ လျှပ်စီး​များ၊ ကျယ်​သော​အသံ၊ မီး​နှင့် တောင်​တုန်လှုပ်ခြင်း​တို့​က လူမျိုးတော်အပေါ် ယေဟောဝါ အာရုံပြု​တော်​မူ​ခြင်း​ကို အချက်ပြ​၏။ (ထွက်မြောက်ရာ ၁၉:၁၆-၂၀) ယောဟန်​တင်ပြသော အလားတူ တန်ခိုး​ပြ​မှုများ​က​လည်း မြေကြီးပေါ်​ရှိ ကျေးကျွန်​များ​အပေါ် ယေဟောဝါ အာရုံပြု​တော်​မူ​ခြင်း​ကို ရည်ညွှန်း၏။ သို့သော် ယောဟန်​မြင်ရသော အရာများ​ကို အမှတ်လက္ခဏာ​များ​ဖြင့် တင်ပြ​ထား​၏။ (ဗျာဒိတ် ၁:၁) သို့​ဖြစ်၍ ပုံခိုင်း​ချက်​ဖြစ်သော​မီး၊ မိုးခြိမ်းသံ၊ စကားသံ၊ လျှပ်စီး​နှင့် ငလျင်​တို့ကို ယနေ့ မည်သို့​အဓိပ္ပာယ် ဖွင့်ဆို​ရမည်​နည်း။

၇။ (က) ယေရှု ဓမ္မ​အမှုဆောင်​စဉ်​ကာလ မြေကြီးပေါ်​တွင် ပုံခိုင်း​ချက်​ဖြစ်သော အဘယ်​မီးကို တို့​ခဲ့​သနည်း။ (ခ) ယေရှု၏ ဝိညာဏ​ညီတော်​များသည် ခရစ်ယာန်ဘောင်​အတွင်း မည်သို့​မီးရှို့​ခဲ့​သနည်း။

^၇ တစ်ကြိမ်​တွင် တပည့်တော်​များ​အား ယေရှု​က “မြေပေါ်​၌ မီးလောင်​စေခြင်း​ငှာ ငါ​လာ​သတည်း” ဟု​မိန့်ဆိုခဲ့သည်။ (လုကာ ၁၂:၄၉) ကိုယ်တော် တကယ်​ပင် မီးရှို့​ခဲ့​သည်။ စိတ်ဇော​ထက်သန်​စွာ ဟောပြောခြင်း​ဖြင့် ဘုရားသခင့်​နိုင်ငံတော်​ကို အကြီးမားဆုံး​အရေးကိစ္စ ဖြစ်စေ​တော်​မူ​သောကြောင့် ဂျူး​နိုင်ငံ​တစ်ခွင်လုံး ပူပြင်း​သော​မီး​အလား အငြင်းအခုံ ဖြစ်ပွား​ခဲ့​သည်။ (မဿဲ ၄:၁၇၊ ၂၅; ၁၀:၅-၇၊ ၁၇၊ ၁၈) ပထမ​ကမ္ဘာ​စစ်​၏ ကျပ်တည်း​သော နေ့ရက်​များ​ကို ဖြတ်ကျော်​ခဲ့​သည့် ဘိသိက်ခံ​ခရစ်ယာန် အုပ်စု​ကလေး​ဖြစ်သော ကမ္ဘာ​ပေါ်​ရှိ ယေရှု၏ ဝိညာဏ​ညီတော်​များလည်း ၁၉၁၉ ခုနှစ်​တွင် ခရစ်ယာန်ဘောင်​၌ အလားတူ မီးရှို့​ခဲ့​သည်။ ထို​နှစ်​၏ စက်တင်ဘာ​လ​၌ အမေရိကန်​နိုင်ငံ၊ အိုဟိုင်အို​ပြည်နယ်၊ စီ​ဒါ​ပွိုင့်​မြို့တွင် ယေဟောဝါ​၏ သစ္စာရှိ​သက်သေခံ​များ အ​နယ်​နယ်​အရပ်ရပ်​မှ စုဝေး​လာ​ကြသောအခါ ကိုယ်တော့်​ဝိညာဉ်​တော် အထူး​ထင်ရှား​ခဲ့​သည်။ မကြာမီ​က ထောင်​ထဲ​မှ​ထွက်​လာပြီး များ​မကြာမီ စွဲချက်​များနှင့် ကွင်း​လုံး​ကျွတ်လွတ်​တော့​မည့် ဂျိုးဇက် အက်ဖ်၊ ရပ်သဖော့ဒ်​က ထို​စည်းဝေးကြီး​ပရိသတ်​အား အောက်ပါ​အတိုင်း ရဲဝံ့​စွာ​ဟောပြောခဲ့​သည်– “ကျွန်ုပ်​တို့သည် သခင့်​အမိန့်တော်ကို နာခံ​၏။ ထို့​ပြင်၊ လူ​တို့ကို ဤမျှ​ကြာမြင့်စွာ ချုပ်နှောင်​လာ​ခဲ့​သော မိစ္ဆာ​အမှား​၏ ခံတပ်​များ​ကို တိုက်ခိုက်​ဖြိုဖျက်​ရန်​တည်း​ဟူသော ကျွန်ုပ်​တို့၏ အခွင့်အရေး​နှင့် တာဝန်​ကိုလည်း အသိအမှတ်ပြု​၏။ သို့​ဖြစ်၍ ကျွန်ုပ်​တို့၏ ဘုရား​ပေး​တာဝန်​မှာ လာ​လတ္တံ့​သော ဘုန်း​ရှိန်​တောက် မေရှိယနိုင်ငံတော်​ကို ကြေညာ​ခြင်း​ဖြစ်​ခဲ့​သည်၊ ယခု​လည်း ထို​အတိုင်း​ဖြစ်ပါ​သည်။” ဘုရားသခင့် နိုင်ငံတော်​ပင်​လျှင် အဓိက အရေးကိစ္စ​တည်း။

၈၊ ၉။ (က) ခက်ခဲ​သော စစ်​ကာလ​အတွင်း ဘုရားသခင့်​လူမျိုးတော် မည်သို့သော စိတ်သဘောထား​နှင့် ဆန္ဒရှိ​ခဲ့​ကြောင်း ဂျေ၊ အက်ဖ်၊ ရပ်သဖော့ဒ်​က မည်သို့​ဖော်ပြ​သနည်း။ (ခ) မြေကြီးပေါ်​သို့ အဘယ်​သို့ မီး​ပစ်ချ​ခဲ့​သနည်း။ (ဂ) မိုးခြိမ်းသံ​များ၊ စကားသံ​များ၊ လျှပ်စီး​များနှင့် ငလျင် မည်သို့​ဖြစ်ပေါ်​လာ​သနည်း။

^၈ ဟောပြောသူ​သည် မကြာခင်​က ဘုရားသခင့်​လူမျိုးတော် ကြုံ​ခဲ့​ရသော ခက်ခဲ​မှုများ​အကြောင်းကို ရည်ညွှန်း​လျက် ဤသို့​ဆို​၏– “ရန်သူ​တို့၏ ပြင်းထန်သော​ထိုးစစ်​သည် အကြင်နာ​ကင်း​လှ​သဖြင့် သခင်​ချစ်တော်မူ​သော သိုးများစွာ​တို့သည် မှင်တက်​မိ​ကာ အံ့အားသင့်​ခြင်း​နှင့်အတူ မ​လှုပ်​မရှက်​ဖြစ်​ပြီး ဆုတောင်း​ကာ​နေ​မိ​၏။ သခင့်​အလိုတော် မည်သို့​ဖြစ်သည်​ကို ပြညွှန်​ရန် စောင့်ဆိုင်း​ခဲ့​ကြသည် . . . သို့​တ​စေ တဒင်္ဂ စိတ်ဓာတ်ကျ​ခဲ့​လျက်​နှင့် နိုင်ငံတော်​သတင်း ကြွေးကြော်​လို​သော​ဆန္ဒ​မူ တ​ငွေ့​ငွေ့ တောက်လောင်​ခဲ့​ပါ​သည်။”​—၁၉၁၉ ခုနှစ်၊ စက်တင်ဘာ​လ ၁၅ ရက်ထုတ် ကင်းမျှော်စင် စာမျက်နှာ ၂၈၀ [လိပ်]ကို​ရှု။

^၉ ၁၉၁၉ ခုနှစ်​တွင် ထို​ဆန္ဒ ပြည့်ဝ​လာ​သည်။ အုပ်စု​သေး​သော်လည်း တက်ကြွ​လှ​သော ဤ​ခရစ်ယာန်​များသည် ဝိညာဉ်​ရေး​အရ တောက်လောင်​လာပြီး ကမ္ဘာချီ ဟောပြောခြင်း​ကင်ပိန်း​ကို အစပြု​လိုက်​သည်။ (၁ သက်သာလောနိတ် ၅:၁၉ နှိုင်းယှဉ်။) မြေကြီးပေါ်​သို့ မီး​ကျ​လာ​သည်။ ဆိုလိုသည်မှာ ဘုရားသခင့် နိုင်ငံတော်​သည် တောက်လောင်​သော အရေးကိစ္စ​ဖြစ်လာ​ပြီး ယနေ့​တိုင်​ဖြစ်၏။ ဆိတ်ငြိမ်မှု​ကို ကျယ်​သော​စကားသံ​များ​က အစားထိုး​လိုက်ပြီး နိုင်ငံတော်​သတင်းကို ရှင်းလင်းစွာ လွှင့်​ဆို​လာ​ကြသည်။  ကျမ်းစာ​မှ မုန်တိုင်း​ကဲ့သို့​သော သတိပေး​ချက်​များသည် မိုးခြိမ်းသံ​တ​မျှ တ​ဂျိန်း​ဂျိန်း မြည်ဟည်း​လာ​သည်။ ထိ​န်​ထိ​န်​ညီး​သော သမ္မာတရား​ရောင်ခြည်​များသည် ယေဟောဝါ​၏ ပရောဖက်ပြု နှုတ်ကပါဌ်တော်​မှ လျှပ်စီး​ပ​မာ တလျှမ်း​လျှမ်း​တောက်​ကာ ဖြာထွက်​လာ​ရုံ​မ​က ငလျင်​ကြီး​လှုပ်​သကဲ့သို့ ဘာသာရေး​နယ်ပယ်​သည် အောက်ခြေသိမ်း တုန်ခါ​သွား​သည်။ ယောဟန်​အတန်းအစား​က လုပ်စရာ​အလုပ်​ရှိကြောင်း သိမြင်​၏။ ထို​အလုပ်​သည် ယနေ့​တိုင် လူနေထိုင်ရာ​ကမ္ဘာ​တ​လွှား ကြီးကျယ်​ခမ်းနား​စွာ တိုးချဲ့​လျက်​နေ​၏။​—ရောမ ၁၀:၁၈။

တံပိုးခရာ​များ​မှုတ်​ရန် အသင့်​ပြင်ဆင်ခြင်း

၁၀။ ကောင်းကင်တမန် ခု​နစ်​ပါး ဘာလုပ်​ရန် ဟန်​ပြင်​သနည်း၊ အဘယ်ကြောင့်​နည်း။

^၁၀ ယောဟန်​က “တံပိုးခရာ ခု​နစ်​လက်ကို ကိုင်ဆောင်​သော ကောင်းကင်တမန် ခု​နစ်​ပါး​သည် တံပိုးခရာ​မှုတ်​ရန် အသင့်ပြင်​ဆင်​ကြ​၏” ဟု ဆက်၍​ဆို​၏။ (ဗျာဒိတ် ၈:၆) တံပိုးခရာ မှုတ်ခြင်း​သည် ဘာ​အဓိပ္ပာယ်​နည်း။ ဣသရေလလူ​တို့ လက်ထက်​၌ အခါကြီးရက်ကြီး သို့​မဟုတ် ထူးခြားသော အဖြစ်အပျက်​များ​ကို သတ်မှတ်​ရန် တံပိုးခရာ မှုတ်​လေ့​ရှိသည်။ (ဝတ်ပြုရာ ၂၃:၂၄; ၄ ဓမ္မ​ရာဇဝင် ၁၁:၁၄) ထို့​အတူ၊ ယောဟန် ကြား​ရတော့​မည့် တံပိုးခရာ​သံ​များသည် သေရေးရှင်ရေး​တ​မျှ အရေးပါသော​အရာများ​ကို အာရုံပြု​စေ​လိမ့်​မည်။

၁၁။ ယောဟန်​အတန်းအစား​က ၁၉၁၉ မှ ၁၉၂၂ ခုနှစ်​အတွင်း ဘာ​ပြင်ဆင်​ရေး​လုပ်ငန်း​ဖြင့် အလုပ်များ​ခဲ့​သနည်း။

^၁၁ ကောင်းကင်တမန်​များ ထို​တံပိုးခရာ​များ​ကို​မှုတ်​ရန် ဟန်​ပြင်​ကြ​စဉ် မြေကြီးပေါ်​က ပြင်ဆင်ခြင်း​လုပ်ငန်း​ကိုလည်း ညွှန်ကြား​ကြ​မည်​ဧကန်။ ပြန်လည်​သက်ဝင် လှုပ်ရှား​လာသော ယောဟန်​အတန်းအစား​သည် ၁၉၁၉ မှ ၁၉၂၂ ခုနှစ်​အထိ လူအများရှေ့ ဟောပြောခြင်း​လုပ်ငန်း​ကို ပြန်လည်​ဖွဲ့စည်း​ပြီး ပုံနှိပ်​ထုတ်ဝေရေး အဆောက်အဦ​များ​ကို တည်ထောင်​သည့်​ကိစ္စ​ဖြင့် အလုပ်များ​ခဲ့​ကြသည်။ ၁၉၁၉ ခုနှစ်​တွင် နိုးလော့! ဟု ယနေ့​အမည်တွင်​သော ရွှေခေတ် မဂ္ဂဇင်း​ကို “အမှန်တရား၊ မျှော်လင့်ချက်​နှင့် ခံယူ​ချက်​ဆိုင်ရာ​ဂျာနယ်” အဖြစ်​ထုတ်ဝေ​လိုက်​သည်။ ၎င်း​သည် နိုင်ငံရေး​တွင် မိစ္ဆာ​ဘာသာ ဝင်စွက်​မှု​ကို ဖော်ထုတ်ခြင်း​၌ အဓိက​ကဏ္ဍ​မှ​ပါဝင်​မည့် တံပိုးခရာ​နှင့်​တူသော ကိရိယာ​ဖြစ်၏။

၁၂။ တံပိုးခရာ​မှုတ်ခြင်း​က ဘာကို​ကြေညာ​၍ မောရှေ​လက်ထက်​က ဘာကို​သတိ​ရစေ​သနည်း။

^၁၂ ယခု​ကျွန်ုပ်​တို့ တွေ့ရ​မည်​ဖြစ်သည့်​အတိုင်း တံပိုးခရာ​မှုတ်​တိုင်း ဇာတ်​ဆန်​သည့် မြင်ကွင်း​တစ်ရပ်​ကို ကြော်ငြာ​၏။ ထို​မြင်ကွင်း​၌ ကြောက်မက်​ဖွယ်​ကပ်ဘေး​များ ကမ္ဘာ့​အစိတ်အပိုင်း​များ​ကို ဘေးပြု​သည်ကို​တွေ့ရ​သည်။ ကပ်ဘေး​အချို့​က မောရှေ​လက်ထက်​၌ အီဂျစ်လူ​တို့ကို ဒဏ်ခတ်​ရန် ယေဟောဝါ လွှတ်တော်​မူ​သော ကပ်ဘေး​များ​ကို သတိ​ရစေသည်။ (ထွက်မြောက်ရာ ၇:၁၉–၁၂:၃၂) ၎င်း​တို့​ကား  ထို​နိုင်ငံ​အပေါ် ကျစေ​သော ယေဟောဝါ​၏ စီရင်ချက်​များ​ဖြစ်၍ ဘုရားသခင့် လူမျိုးတော် ကျွန်​ဘဝ​မှ လွတ်မြောက်​ရာ​လမ်းကို ဖွင့်ပေး​သည်။ ယောဟန်​မြင်ရသော ကပ်ဘေး​များလည်း အလားတူ​အရာ​ကို ဖြစ်မြောက်​စေ​သည်။ သို့ရာတွင် ပကတိ ကပ်ဘေး​များ​မဟုတ်။ ယေဟောဝါ​၏ ဖြောင့်မတ်​သော တရား​စီရင်ချက်​များ​ကို ပုံခိုင်း​သော အမှတ်လက္ခဏာ​များ ဖြစ်​ကြသည်။​—ဗျာဒိတ် ၁:၁။

“သုံးပုံတစ်ပုံ” သည် အဘယ်အရာ​ဖြစ်​ကြောင်း

၁၃။ ပထမ​တံပိုးခရာ လေးလက်​ကို​မှုတ်​စဉ် ဘာဖြစ်​ပျက်​၍ အဘယ်​မေးခွန်း ပေါ်ပေါက်​စေ​သနည်း။

^၁၃ ကျွန်ုပ်​တို့ မြင်ရ​မည်​ဖြစ်သည့်​အတိုင်း ပထမ​တံပိုးခရာ လေးလက်​ကို​မှုတ်​သောအခါ မြေကြီး၊ ပင်လယ်၊ မြစ်၊ စမ်း​ပေါက်​တို့၏ “သုံးပုံတစ်ပုံ”၊ မြေကြီးကို အလင်း​ပေး​သော အရာများ​၏ “သုံးပုံတစ်ပုံ” ဘေးသင့်​ကြ​၏။ (ဗျာဒိတ် ၈:၇-၁၂) သုံးပုံတစ်ပုံ​သည် အရာတစ်ခု​၏ အပိုင်း​ကြီး​တစ်ပိုင်း ဖြစ်သော်လည်း ထို​အရာတစ်ခု​လုံး မဟုတ်ပါ။ (ဟေရှာယ ၁၉:၂၄; ယေဇကျေလ ၅:၂; ဇာခရိ ၁၃:၈၊ ၉ နှိုင်းယှဉ်။) သို့​ဖြစ်၍ အဘယ် “သုံးပုံတစ်ပုံ” သည် ထို​ကပ်ဘေး​များ​ကို အခံ​ထိုက်​ဆုံး ဖြစ်သနည်း။ လူသား​အများထု​သည် စာတန်​နှင့် စာတန့်​အမျိုးအနွယ်​ကြောင့် မျက်စိကွယ်​၍ အကျင့်ပျက်​စီး​ခဲ့​ကြပြီ။ (ကမ္ဘာဦး ၃:၁၅; ၂ ကောရိန္သု ၄:၄) ဒါဝိဒ်​ဖော်ပြ​သော အခြေအနေ​အတိုင်း​ဖြစ်သည်– “လူအပေါင်း​တို့သည် လမ်းလွဲ​ကြပြီ။ တညီတညွတ်​တည်း ဆွေးမြေ့​ယိုယွင်းခြင်း ရှိကြ​၏။ ကောင်းသော​အကျင့်ကို ကျင့်​သော​သူ​မရှိ။ တစ်ယောက်မျှ​မရှိ။” (ဆာလံ ၁၄:၃) မှန်​၏။ လူသား​တစ်ရပ်လုံး အပြစ်စီရင်​ခံရ​မည့် အန္တရာယ်​နှင့် ရင်ဆိုင်​နေရ​သည်။ သို့သော် ၎င်း​၏​အပိုင်း​တစ်ပိုင်း​သည် အထူးသဖြင့် အပြစ်ရှိ​၏။ “သုံးပုံတစ်ပုံ” ဖြစ်သော ထို​အပိုင်း​တစ်ပိုင်း​သည် ယခု​ထက်​ပို​၍ အသိဉာဏ်​ရှိဖို့ ကောင်း​လှ​ပါ​သည်။ မည်သည့် “သုံးပုံတစ်ပုံ” နည်း။

၁၄။ ယေဟောဝါ​ထံ​တော်​မှ ကပ်​တိုက်​သတင်း​များ​ကို​ရသည့် ပုံခိုင်း​ချက်​ဖြစ်သော သုံးပုံတစ်ပုံ​သည် အဘယ်အရာ​နည်း။

^၁၄ ခရစ်ယာန်ဘောင်​တည်း။ ၁၉၂၀ ပြည့်လွန်​နှစ်များ​၌ ၎င်း​၏​နယ်ပယ်​တွင် လူသား​သုံးပုံတစ်ပုံ အကျုံးဝင်​၏။ ၎င်း​၏​ဘာသာရေး​မှာ ခရစ်ယာန်​ဘာသာစစ်​မှ တိမ်း​လွဲသွား​သော မဟာ​ဖောက်ပြန်မှု​၏ အသီးအပွင့်​ပင်။ ထို​ဖောက်ပြန်မှု​အကြောင်းကို ယေရှု​နှင့် တပည့်တော်​များ ကြိုပြော​ခဲ့​သည်။ (မဿဲ ၁၃:၂၄-၃၀; တမန်​တော် ၂၀:၂၉၊ ၃၀; ၂ သက်သာလောနိတ် ၂:၃; ၂ ပေတရု ၂:၁-၃) ခရစ်ယာန်ဘောင် ဓမ္မ​ဆရာများ​က မိမိတို့သည် ဘုရားသခင့် ဗိမာန်တော်​ထဲ​၌​ရှိ၍ ခရစ်ယာန်​ဘာသာ​တရားကို ပို့ချ​သော​ဆရာသမား​များ ဖြစ်သည်ဟု​ဆို​ကြ​၏။ သို့ရာတွင် သူတို့​ပို့ချ​သော အယူဝါဒ​များ​မှာ ကျမ်းစာ​သမ္မာတရား​နှင့် ဝေ​လာ​ဝေး။ ဘုရားသခင့် နာမတော်​ကိုလည်း အစဉ်မပြတ် အသရေပျက်​စေ​၏။ ခရစ်ယာန်ဘောင်​သည် ပုံခိုင်း​ချက်​ဖြစ်သော “သုံးပုံတစ်ပုံ” ဖြင့် အထူး​ဆီလျော်​စွာ တင်စား​ခံရ​၍ ယေဟောဝါ ထံ​တော်​မှ​လာ​သည့် ကပ်ဘေး​တ​မျှ ထက်မြက်​သည့် သတင်းစကားကို ခံယူ​ရသည်။ လူသား​ထဲ​မှ ထို​သုံးပုံတစ်ပုံ​သည် ဘုရားသခင့် မျက်နှာသာတော် စိုး​စဉ်း​မျှ မခံထိုက်။

၁၅။ (က) တံပိုးခရာ တစ်လက်​စီ​မှုတ်ခြင်း​သည် တစ်စုံတစ်ခု​သော ခုနှစ်​နှင့်​သာ ဆိုင်​သလော။ ရှင်းပြပါ။ (ခ) ယေဟောဝါ​၏ တရား​စီရင်ချက် ကြွေးကြော်​ခြင်း​၌ ယောဟန်​အတန်းအစား​အသံ​နှင့်အတူ မည်သူ​များ​၏​အသံ​လည်း ပါဝင်​လာ​သနည်း။

^၁၅ တံပိုးခရာ တစ်လက်​ပြီး​တစ်လက် မှုတ်ခြင်း​နှင့်​အညီ ၁၉၂၂ မှ ၁၉၂၈ ခုနှစ်​အထိ၊ စည်းဝေးကြီး ခု​နစ်​ခု​၌ အထူး​သန္နိ​ဋ္ဌာန်​များ ချ​ခဲ့​ကြသည်။ သို့​တ​စေ တံပိုးခရာ​မှုတ်ခြင်း​သည် ထို​နှစ်များ​အတွင်း​သာ မဟုတ်ပါ။ သခင့်​နေ့​တော် ကြာမြင့်​လာ​သည်​နှင့်​အမျှ ခရစ်ယာန်ဘောင်​၏ ဆိုးယုတ်​သော လမ်းစဉ်​များ​ကို အကြီးအကျယ် ဖော်ထုတ်​သည့်​အလုပ်​လည်း မပြတ်​ခဲ့​ချေ။ နိုင်ငံတကာ​၏ မုန်းတီးမှု​နှင့်​ညှဉ်းဆဲ​မှု​ကို ခံရ​လျက်​ကယ် ယေဟောဝါ​၏ တရား​စီရင်ချက်​များ​ကို တိုင်းနိုင်ငံ​အားလုံး ကြားသိ​အောင် တစ်ကမ္ဘာ​လုံး​တွင် ကြွေးကြော်​ရမည်။ ထို့နောက်​မှ​သာ စာတန့်​စနစ်​အဆုံး ဆိုက်ရောက်​မည်။ (မာကု ၁၃:၁၀၊ ၁၃) ဝမ်းမြောက်​ဖွယ်​ကား၊ လူအုပ်ကြီးသည် ယောဟန်​အတန်းအစား​နှင့် ပူးပေါင်း​၍ မိုးခြိမ်းသံ​နှင့်​တူသော ကမ္ဘာ့​အရေး​ဖြစ်သည့် ကြေညာ​ချက်​များ​ကို တစ်သံ​တည်း ကြွေးကြော်​ကြ​လေ​ပြီ။

မြေကြီး​သုံးပုံတစ်ပုံ လောင်ကျွမ်း

၁၆။ ပထမ​ကောင်းကင်တမန် တံပိုးခရာ​ကို မှုတ်​သည့်​နောက်​၌ ဘာဖြစ်​ပျက်​သနည်း။

^၁၆ ကောင်းကင်တမန်​များနှင့် ပတ်သက်​၍ ယောဟန် ဤသို့​ရေး​၏– “ပထမ ကောင်းကင်တမန် တံပိုးခရာ မှုတ်​လိုက်​ရာ သွေး​နှင့်​ရော​သော မီး​နှင့်​မိုးသီး ဖြစ်ပေါ်​၍ မြေကြီးပေါ်​သို့ ကျ​လာ​သဖြင့် မြေကြီး​သုံးပုံတစ်ပုံ လောင်ကျွမ်း​လေ​၏၊ သစ်ပင်​သုံးပုံတစ်ပုံ လောင်ကျွမ်း​လေ​၏၊ စိမ်း​သော​အပင်​အားလုံး လောင်ကျွမ်း​လေ​၏။” (ဗျာဒိတ် ၈:၇) ၎င်း​သည် အီဂျစ်​ပြည်​ပေါ် ကျရောက်​သော သတ္တမ​ကပ်ဘေး​နှင့်​တူ​သော်လည်း ကျွန်ုပ်​တို့​ခေတ်​အဖို့ အဘယ်​အဓိပ္ပာယ်​ရှိ​သနည်း။​—ထွက်မြောက်ရာ ၉:၂၄။

၁၇။ (က) ဗျာဒိတ် ၈:၇ ပါ “မြေကြီး” ဟူသော​စကား​က ဘာကို​ပုံဆောင်​သနည်း။ (ခ) ခရစ်ယာန်ဘောင်​၏ မြေကြီး​သုံးပုံတစ်ပုံ မည်သို့​လောင်ကျွမ်း​ခံရ​သနည်း။

^၁၇ ကျမ်းစာ​၌ “မြေကြီး” ဟူသော​စကားလုံး​သည် လူသားများ​ကို ရည်ညွှန်းလေ့​ရှိသည်။ (ကမ္ဘာဦး ၁၁:၁; ဆာလံ ၉၆:၁) ဒုတိယ​ကပ်ဘေး​သည် ပင်လယ်​ပေါ်​ကျရောက်​၍ ပင်လယ်​လည်း လူသားများ​နှင့်​ပင် သက်ဆိုင်​ပြန်​သဖြင့် “မြေကြီး” သည် စာတန်​တည်ဆောက်​သော၊ ဖျက်ဆီး​ခံရ​မည့် တည်မြဲ​ဟန်​ရှိသော လူ့​ဘောင်​အဖွဲ့အစည်း​ကို ရည်ညွှန်းခြင်း ဖြစ်​ရ​ပေမည်။ (၂ ပေတရု ၃:၇; ဗျာဒိတ် ၂၁:၁) ကပ်ဘေး​ဆိုင်ရာ ဇာတ်​ဝင်​ခန်း​က ခရစ်ယာန်ဘောင်​၏ မြေကြီး​သုံးပုံတစ်ပုံ​သည် ယေဟောဝါ​၏ မျက်​မာန်​တော်​အပူ​လောင်  ခံရ​ကြောင်းကို​ပြ​သည်။ ယေဟောဝါ​၏ အပြစ်ပေး​စီရင်ချက် ကြွေးကြော်​ခြင်း​လုပ်ငန်း​ကြောင့် ၎င်း​၏​အလယ်တွင် သစ်ပင်​များ​အလား မား​မား​ရပ်နေ​သည့် အထင်ကရ​ပုဂ္ဂိုလ်​များ လောင်ကျွမ်း​ခံရ​ကြ​၏။ ခရစ်ယာန်ဘောင်​ဘာသာ​၏ သန်းနှင့်ချီ​သော ချာ့ခ်ျ​အသင်းသားများ​အားလုံး​သည် ၎င်းကို​ဆက်လက် ထောက်ခံ​အားပေး​ကြ​မည်​ဆိုလျှင် အပူ​ဟပ်​ခံရ​သော မြက်​ပင်​များ​ပ​မာ ဘုရားသခင့်​မျက်စိ​အောက်​၌ ဝိညာဉ်​ရေး​အရ ညှိုးနွမ်း​သွားပေ​မည်။​—ဆာလံ ၃၇:၁၊ ၂။ *

၁၈။ စီ​ဒါ​ပွိုင့်​စည်းဝေးကြီး​တွင် ယေဟောဝါ​၏ တရား​စီရင်ခြင်း​သတင်းကို မည်သို့​ကြွေးကြော်​ခဲ့​သနည်း။

^၁၈ ဤ​တရား​စီ​ချက်​ကို မည်သို့​သတင်းဖြန့်​သနည်း။ ယေဘုယျ​အားဖြင့် ဤ​လောက​၏ သတင်း​မီဒီယာ​အားဖြင့် မဟုတ်ပါ။ ၎င်း​သည် ဤ​လောက​၏ အစိတ်အပိုင်း​တစ်ခု​ဖြစ်​ပြီး ဘုရားသခင်​၏ “ကျွန်” ကို အပြစ်​ပြော​လေ့​ရှိသည်။ (မဿဲ ၂၄:၄၅) ၁၉၂၂၊ စက်တင်ဘာ​လ ၁၀ ရက်​နေ့၊ အိုဟိုင်အို​နယ်၊ စီ​ဒါ​ပွိုင့်​မြို့၊ ဘုရားသခင့်​လူမျိုးတော်​၏ ဒုတိယ​အကြိမ် မော်ကွန်း​တင်​စည်းဝေးကြီး​၌ ထို​သတင်း​တော်​ကို ထူးခြားသော​နည်းဖြင့် ကြွေးကြော်​ခဲ့​သည်။ သူတို့သည် “ကမ္ဘာ့​ခေါင်းဆောင်​များ​အား စိန်ခေါ်​ခြင်း” ဟူသော​သန္နိ​ဋ္ဌာန်​ကို စိတ်အား​ထက်သန်​စွာ တ​ခဲနက် ချ​ခဲ့​ကြသည်။ ၎င်း​က ပုံခိုင်း​ချက်​ဖြစ်သော ခေတ်​သစ်​မြေကြီးကို အောက်ပါ​အတိုင်း ပြတ်ပြတ်သားသား သတိပေး​လိုက်​သည်– “ထို့​ကြောင့် မြေကြီးပေါ်​မှ လူမျိုးများ၊ သူတို့၏ မင်း​စိုး​ခေါင်းဆောင်​များ၊ ကမ္ဘာ​ပေါ်​မှ ဂိုဏ်းဂဏ​ကွဲပြား​သော​ချာ့ခ်ျ​အသင်းများ ရှိသမျှ​တို့၏ ဓမ္မ​ဆရာများ​အားလုံး၊ သူတို့၏​နောက်လိုက်​နှင့် မဟာမိတ်​များ၊ မဟာ​စီးပွားရေး​နှင့် မဟာ​နိုင်ငံရေးသမား​များ​အား မိမိတို့သည် ကမ္ဘာ​ပေါ်မှာ ငြိမ်းချမ်းရေး​နှင့် တိုးတက်​ကြီးပွားမှု ထူထောင်​ပြီး လူသားတို့အား ပျော်ရွှင်မှု​ရယူ​ခံစား​စေနိုင်​သည်​ဟု အဘယ်ကြောင့် ဆို​ကြ​ရ​ကြောင်း သက်သေပြ​ရန် ကျွန်ုပ်​တို့ တောင်းဆို​ပါ​သည်။ ဤ​ကိစ္စ​တွင် သူတို့ သက်သေ​မပြ​နိုင်​သဖြင့် သခင့်​သက်သေ​များ​အနေ​နှင့် ကျွန်ုပ်​တို့​တင်ပြသော ထွက်ဆိုချက်​ကို နားထောင်​ကြ​ရန်၊ နားထောင်ပြီး​နောက် ကျွန်ုပ်​တို့၏ ထွက်ဆိုချက် မှန်​မမှန် ပြန်ကြား​ကြ​ရန် တောင်းဆို​ပါ​သည်။”

၁၉။ ဘုရားသခင့် လူမျိုးတော်သည် ခရစ်ယာန်ဘောင်​အား ဘုရားသခင့်​နိုင်ငံတော်​နှင့်​ပတ်သက်​၍ အဘယ်​ထွက်ဆိုချက်​ကို တင်ပြ​ခဲ့​သနည်း။

^၁၉ ထို​ခရစ်ယာန်​များ ဘာ​ထွက်ဆိုချက်​ကို တင်ပြ​သနည်း။ အောက်ပါ​ထွက်ဆိုချက်​ဖြစ်သည်– “မေရှိယ​၏​နိုင်ငံတော်​သည် လူသား​တို့၏ ပြဿနာ​ရှိသမျှကို အပြီး​ကုစား​နိုင်သော ဆေး​စွမ်း​ကောင်း​ဖြစ်၍ ကမ္ဘာ​ပေါ် ငြိမ်းချမ်းရေး​ကိုလည်း​ကောင်း၊ လူသားများ​ပေါ် စေတနာ​ကောင်း​ကိုလည်း​ကောင်း သက်ရောက်​စေပြီး လူမျိုးအပေါင်း​၏ လိုအင်ဆန္ဒ​ကို ပြည့်ဝ​စေမည်​ဖြစ်​ကြောင်း၊ အစပြု​ပြီ​ဖြစ်သည့် ဖြောင့်မတ်​သော​အုပ်ချုပ်မှု​ကို စိတ်လို​ကိုယ်​လျောက် နာခံ​သူတို့သည် ထာဝရ​ငြိမ်းချမ်းမှု၊ အသက်၊ လွတ်လပ်မှု​နှင့် မကုန်ခန်း​နိုင်သော ရွှင်လန်းမှု​ကို ခံစား​ကြ​ရမည်​ဖြစ်​ကြောင်း ကျွန်ုပ်​တို့ သက်ဝင်​ယုံကြည်၍ ကြေညာ​သည်။” ဖောက်ပြန်သော ဤခေတ်ကြီး​၌ လူ့​အစိုးရ​များ၊ အထူးသဖြင့် ခရစ်ယာန်ဘောင်​ထဲ​မှ အစိုးရ​များ ကမ္ဘာ့​ပြဿနာ​များ ဖြေရှင်းရန် လုံးဝ မအောင်မြင်​သဖြင့် အထက်ပါ တံပိုးခရာ​သံ​နှင့်​တူသော စိန်ခေါ်ချက်​သည် ၁၉၂၂ ခုနှစ်​မှာ​ထက် ပို​၍​ကျယ်လောင်​၏။ အောင်ပွဲ​ဆင် ခရစ်တော်​လက်ထဲက ဘုရားသခင့်​နိုင်ငံတော်​သည် လူသား​တို့၏​တစ်ခု​တည်း​သော မျှော်လင့်ချက်​ဖြစ်သည်​မှာ မှန်​လိုက်​လေ​ခြင်း။

၂၀။ (က) ၁၉၂၂ ခုနှစ်​မှ​စ၍ ဘိသိက်ခံ​ခရစ်ယာန်​များ အသင်းတော်သည် အဘယ်​နည်းများဖြင့် တရား​စီရင်ခြင်း​သတင်း​များ​ကို တံပိုးခရာ​မှုတ်​သလို ယနေ့​တိုင် သတင်းဖြန့်​လျက်​ရှိ​သနည်း။ (ခ) ပထမ တံပိုးခရာ​မှုတ်ခြင်း​ကြောင့် ခရစ်ယာန်ဘောင်​အတွင်း ဘာဖြစ်​ခဲ့​သနည်း။

^၂၀ ဘိသိက်ခံ​ခရစ်ယာန်​များ​၏ အသင်းတော်သည် သန္နိ​ဋ္ဌာန်၊ ဝေစာ၊ စာအုပ်​ငယ်၊ စာအုပ်ကြီး၊ မဂ္ဂဇင်း​နှင့် ဟောပြောချက်​များ​ကို​သုံး​လျက် အဆိုပါ​ကြွေးကြော်​ချက်​နှင့် နောက်ပိုင်း​ကြွေးကြော်​ချက်​များ​ကို တံပိုးခရာ​မှုတ်​သည်​ပ​မာ အသံလွှင့်​ခဲ့​ကြ​၏။ ပထမ​တံပိုးခရာ​မှုတ်​သံ​ကြောင့် ခရစ်ယာန်ဘောင်​သည် မာကျော​သော​မိုးသီး​များ​ဖြင့် ပစ်ပေါက်​ခံရ​သည်​အလား ဖြစ်​ခဲ့​သည်။ ၂၀ ရာစု​စစ်​များ​၌ ခရစ်ယာန်ဘောင် ပါဝင်​ဆင်နွှဲ​ရာ​မှ ကျူးလွန်​ခဲ့​သော သွေးစွန်း​ခြင်း​အပြစ်​သည် ဘူး​ပေါ်​သလို ပေါ်လာ​ပြီး ၎င်း​သည် ယေဟောဝါ​၏ အမျက်တော်​မီး မြှိုက်​ခံထိုက်​ကြောင်း ထင်ရှား​လာ​သည်။ ယောဟန်​အတန်းအစား​သည် နောက်ပိုင်း၌ လူအုပ်ကြီး​၏​ထောက်မမှု​ဖြင့် ပထမ​တံပိုးမှုတ်​သံ​ကို ယနေ့​တိုင် ပဲ့​တင်​ခတ်​စေ​လျက်​ရှိပြီး ခရစ်ယာန်ဘောင် ဖျက်ဆီး​ခံထိုက်​သည်​ဟူသော ယေဟောဝါ​၏​အမြင်ကို လူ​တို့အား သတိပြုမိ​စေ​သည်။​—ဗျာဒိတ် ၇:၉၊ ၁၅။

မီးလောင်​သော တောင်​ပ​မာ

၂၁။ ဒုတိယ​ကောင်းကင်တမန် တံပိုးခရာ​မှုတ်​သောအခါ ဘာဖြစ်​သနည်း။

^၂၁ “ဒုတိယ ကောင်းကင်တမန် တံပိုးခရာ​မှုတ်​လိုက်​ရာ မီးလောင်​လျက်​ရှိသော တောင်ကြီး​နှင့်​တူ​သည့် အရာတစ်ခု ပင်လယ်​ထဲ​သို့ ပစ်ချ​ခံရ​၏။ ပင်လယ် သုံးပုံတစ်ပုံ​သည် သွေး​ဖြစ်​လေ​၏။ ပင်လယ်​ထဲ​မှ အသက်​ရှိသော​သတ္တဝါ သုံးပုံတစ်ပုံ​လည်း သေကြ​၏။ သင်္ဘော သုံးပုံတစ်ပုံ​လည်း ပျက်စီး​ကြ​၏။” (ဗျာဒိတ် ၈:၈၊ ၉) ဤ​ကြောက်​ဖွယ်​မြင်ကွင်း ဘာကို​ပုံခိုင်း​သနည်း။

၂၂၊ ၂၃။ (က) အဘယ်​သန္နိ​ဋ္ဌာန်​သည် ဒုတိယ တံပိုးခရာ​မှုတ်ခြင်း​ကြောင့် ဖြစ်ပေါ်​လာ​ခြင်း ဧကန်​ဖြစ်သနည်း။ (ခ) “ပင်လယ်​သုံးပုံတစ်ပုံ” သည် ဘာကို​တင်စား​သနည်း။

^၂၂ ၁၉၂၃၊ ဩဂုတ်​လ ၁၈-၂၆ တွင် အမေရိကန်​နိုင်ငံ၊  ကယ်လီဖိုးနီးယား​ပြည်နယ်၊ လော့​စ်​အိ​န်း​ဂျ​လိ​စ်​မြို့၌​ကျင်းပ​သော ယေဟောဝါ​လူမျိုးတော်​၏ စည်းဝေးကြီး​ကို နောက်ခံ​ထား​လျှင် ၎င်းကို​နားလည်​ဖို့ အလွယ်​ကူ​ဆုံး​ဖြစ်​မည်။ ဂျေ၊ အက်ဖ်၊ ရပ်သဖော့ဒ်​၏ စနေနေ့ မွန်းလွဲပိုင်း ဟောပြောချက်မှာ “သိုး​နှင့်​ဆိတ်” ဟူသော ခေါင်းစဉ်​ရှိ၏။ “သိုး” များ​မှာ ဘုရားသခင့်​နိုင်ငံတော်​ဆိုင်ရာ မြေကြီး​နယ်ပယ်​ကို​အမွေခံ​မည့် ဖြောင့်မတ်​သူများ​ဖြစ်​ကြောင်း ရှင်းလင်းစွာ တင်ပြ​လိုက်​သည်။ ၎င်းနောက် သန္နိ​ဋ္ဌာန်​ချ​ကြ​ရာ “အယူဖောက်ပြန်​သော ဓမ္မ​ဆရာများ​နှင့် သူတို့၏​သိုး​ထဲ​က အဓိပတိ​တည်း​ဟူသော လောက​ဆန်​သည့် စီးပွားရေး​နှင့် နိုင်ငံရေး ဩဇာ​ရှင်​ကြီး​များ” ၏​သီလကြောင်မှု​ကို အထူး​အာရုံပြု​စေ​သည်။ ၎င်း​သန္နိ​ဋ္ဌာန်​က “ဂိုဏ်းဂဏ​ကွဲပြား​သော ချာ့ခ်ျ​အသင်းများ​ထဲ​က ငြိမ်းချမ်းရေး​နှင့် ငြိမ်​ဝပ်​ပိပြား​မှု​ကို မြတ်နိုးသော လူ​ပရိသတ်​များ” အား “‘ဗာဗုလုန်’ ဟု သခင်​သတ်မှတ်​တော်​မူ​သည့် မဖြောင့်မတ်​သော ဘုန်းကြီး​ရဟန်း​စနစ်​များ​မှ ခွဲထွက်​လာ” ပြီး “ဘုရားသခင့် နိုင်ငံတော်​ကောင်းချီး​များ ခံယူ​ကြ” ရန် အသင့်ပြင်​ကြ​ပါ​ဟု နှိုးဆော်​လိုက်​သည်။

^၂၃ ဒုတိယ​တံပိုးခရာ မှုတ်ခြင်း​ကြောင့် ဤ​သန္နိ​ဋ္ဌာန် ပေါ်လာ​ခြင်း​ဖြစ်သည်​မှာ မုချ။ ၎င်း​သတင်းကို လက်ခံ​ကြ​မည့် ပုဂ္ဂိုလ်​များသည် အောက်ပါ​အတိုင်း ဟေရှာယ​ဖော်ပြ​သော​သူတို့​မှ ခွဲထွက်​လာ​ကြ​မည်​ဖြစ်၏– “မတရားသော​သူတို့မူကား၊ မ​ငြိမ်​နိုင်​ဘဲ​လှုပ်ရှား​၍ ရွှံ့​နှင့်​အမှိုက်​ကို​ပက်​သော ပင်လယ်ရေ​နှင့်​တူ​ကြ​၏။” (ဟေရှာယ ၅၇:၂၀; ၁၇:၁၂၊ ၁၃) သို့​ဖြစ်၍ “ပင်လယ်” သည် ဆူပူ​သောင်းကျန်း တော်လှန်မှု​များ​ကို နှိုး​ဆွပေး​သော မငြိမ်မသက် ယောက်​ယက်​ခတ်​သည့် ပုန်ကန်​သူ​လူသားများ​ကို ဆီလျော်​စွာ​ပုံခိုင်း​၏။ (ဗျာဒိတ် ၁၃:၁ နှိုင်းယှဉ်။) ထို “ပင်လယ်” ပျောက်ကွယ်​မည့်​အချိန် ရောက်လာ​မည်။ (ဗျာဒိတ် ၂၁:၁) စပ်ကြား​ကာလ​၌ ဒုတိယ​တံပိုးခရာ မှုတ်ခြင်း​နှင့်အတူ ၎င်း​၏​သုံးပုံတစ်ပုံ​တည်း​ဟူသော ခရစ်ယာန်ဘောင်​နယ်ပယ်​ထဲ​က ထိန်း​မ​နိုင်​သိမ်း​မရ​သော အပိုင်း​အပေါ် ယေဟောဝါ စီရင်ချက်​ချ​တော်​မူ​၏။

၂၄။ ပင်လယ်​ထဲ​သို့ ပစ်ချ​ခံရ​သော မီးလောင်​နေသည့် တောင်​အစိုင်အခဲ​ကြီး​က ဘာကို​ပုံခိုင်း​သနည်း။

^၂၄ မီးလောင်​နေသော တောင်​နှင့်​တူ​သည့် အစိုင်အခဲ​ကြီး​တစ်ခု ထို “ပင်လယ်” ထဲ​သို့ ပစ်ချ​ခံရ​လေ​သည်။ ကျမ်းစာ​၌ တောင်​များသည် အစိုးရ​များ​ကို အထိမ်းအမှတ် ပြု​လေ့​ရှိသည်။ ဥပမာ၊ ဘုရားသခင့်​နိုင်ငံတော်​ကို တောင်​တစ်လုံး​အဖြစ် သရုပ်ဖော်​၏။ (ဒံယေလ ၂:၃၅၊ ၄၄၊ ၄၅) ပျက်​သု​ဉ်း​သော ဗာဗုလုန်​လည်း “မီး​နှင့်​ကျွမ်းလောင်​သော​တောင်” ဖြစ်​ခဲ့​သည်။ (ယေရမိ ၅၁:၂၅) သို့သော် ယောဟန်​မြင်​သည့် တောင်​ကဲ့သို့​သော အစိုင်အခဲ​ကြီး​သည် မီးလောင်​လျက်​ရှိသည်။ ပင်လယ်​ထဲ​သို့​ပစ်ချ​ခံရ​သော ၎င်း​၏​အဖြစ်​က ပထမ​ကမ္ဘာ​စစ်​အတွင်း​နှင့် အပြီး​၌ လူသား​တို့​ဘောင်​တွင် အုပ်ချုပ်ရေး​ဆိုင်ရာ တောက်လောင်​သော ပြဿနာ​တစ်ရပ် ဖြစ်​ခဲ့​ကြောင်းကို သင့်လျော်​စွာ ပုံဆောင်​ပေ​သည်။ အထူးသဖြင့် ခရစ်ယာန်ဘောင်​အတွင်း​ဖြစ်၏။ အီတလီ​နိုင်ငံ​၌ မူ​ဆို​လီ​နီ​က ဖက်ဆစ်​ဝါဒ​ကို စတင်​လိုက်​သည်။ ဂျာမနီ​က ဟစ်တလာ​၏ နာဇီ​ဝါဒ​ကို လက်ခံ​လိုက်ပြီး အခြား​နိုင်ငံ​များ​က ဆိုရှယ်လစ်​ဝါဒ​အမျိုးမျိုးကို စမ်းသပ်​အသုံးပြု​ကြသည်။ ရုရှား​နိုင်ငံ​၌ အမြစ်​လှန် ပြောင်းလဲမှု​တစ်ရပ် ဖြစ်ပွား​ပြီး ဗော်လ်​ရှီ​ဗစ်​တော်လှန်ရေး​ကြောင့် ပထမ​ကွန်မြူနစ်​နိုင်ငံ ဖြစ်ပေါ်​လာ၍ ခရစ်ယာန်ဘောင် ဘာသာရေး​ခေါင်းဆောင်​များသည် တစ်ချိန်က မိမိတို့​ခံတပ်​စွဲ​ခဲ့​သည့် နေရာများ​၌ ဩဇာ​အာဏာ လက်လွတ်​ခဲ့​ရလေ​သည်။

၂၅။ ဒုတိယ​ကမ္ဘာ​စစ်​ပြီး​နောက် အုပ်ချုပ်ရေး​သည် အဘယ်​နည်းဖြင့် ယနေ့​တိုင် ရဲ​ရဲ​တောက်​ပြဿနာ ဖြစ်​လျက်​နေသနည်း။

 ^၂၅ ဖက်ဆစ်​နှင့် နာဇီ​စမ်းသပ်မှု​များသည် ဒုတိယ​ကမ္ဘာ​စစ်​အတွင်း ချုပ်ငြိမ်း​သွား​သော်လည်း အုပ်ချုပ်ရေး​သည် ရဲ​ရဲ​တောက်​ပြဿနာ ဖြစ်​လျက်​ရှိ​ဆဲ​ပင်။ လူ့​ပင်လယ်​သည် တော်လှန်ရေး​အစိုးရသစ်​များ​ကို အဆက်မပြတ် ပေါက်ဖွား​စေ​သည်။ ၁၉၄၅ ခုနှစ်​နောက်ပိုင်း ဆယ်စုနှစ်​များ​အတွင်း တရုတ်၊ ဗီယက်နမ်၊ ကျူးဘား​နှင့် နီကာရာဂွာ​တို့​၌ ထို​အစိုးရသစ်​များ တည်ထောင်​ခဲ့​သည်။ ဂရိ​နိုင်ငံ​၌ စစ်​အာဏာရှင်​စနစ်​ကို စမ်းသပ်​ရာ မအောင်မြင်​ခဲ့။ က​မ်​ပူ​ချား (ကမ္ဘောဒီးယား) တွင် အခြေခံ​ကွန်မြူနစ်​ဝါဒ​သို့ တစ်​ဖြုတ်​လောက် သွေဖည်​ခဲ့​ရာ​မှ လူ​နှစ်​သန်း​မ​က သတ်ဖြတ်​ခံ​ခဲ့​ရ​ကြောင်း သတင်းရ​ရှိပါ​သည်။

၂၆။ “မီးလောင်​လျက်​ရှိသော​တောင်” သည် အဘယ်​နည်းဖြင့် ယနေ့​တိုင် လူသား​ပင်လယ်​အတွင်း လှိုင်း​ဂယက် ထ​စေ​လျက်​ရှိ​သနည်း။

^၂၆ “မီးလောင်​လျက်​ရှိသော တောင်ကြီး” သည် လူသား​ပင်လယ်​ထဲ​၌ ယနေ့​တိုင် အဆက်မပြတ် လှိုင်း​ဂယက်​ထ​စေ​၏။ အာဖရိက​တိုက်၊ အမေရိက​တိုက်​များ၊ အာရှတိုက်​နှင့် ပစိဖိတ်ကျွန်း​များ​၌ အုပ်ချုပ်ရေး​နှင့်​ပတ်သက်​၍ တိုက်ပွဲ​များ ဆင်နွှဲ​လျက်​ရှိကြောင်း ကြားသိ​ရ​ပါ​သည်။ အဆိုပါ​တိုက်ပွဲ​အများ​မှာ ခရစ်ယာန်ဘောင်​နိုင်ငံ​များ၊ သို့​မဟုတ် ခရစ်ယာန်ဘောင် သာသနာပြု​များ ဘက်လိုက်​အုံ​ကြွ​မှု​တွင် ပါဝင်သော​နိုင်ငံ​များ​၌ ဖြစ်ပွား​လျက်​ရှိသည်။ ရို​မင်​ကက်သလစ်​ဘုန်းကြီး​များ​ပင် ကွန်မြူနစ် ပြောက်ကျား​တပ်သား​များ အဖြစ်​ဖြစ်စေ၊ ပြောက်ကျား​တပ်သား​များနှင့် ပူး​တွဲ၍​ဖြစ်စေ တိုက်ပွဲဝင်​ခဲ့​ကြ​လေ​ပြီ။ တစ်ချိန်တည်း​၌ ပရိုတက်စတင့် ဧဝံဂေလိ​အုပ်စု​များလည်း ကွန်မြူနစ်​တို့၏ “ဆိုးညစ်​ရက်စက်​၍ အငတ်​မပြေ​နိုင်သော အာဏာ​ရမ္မက်” ကို​တန်ပြန်​ရန် ဗဟို​အမေရိက​တွင် လုပ်ဆောင်ခဲ့​ကြသည်။ သို့သော် လူသား​ပင်လယ်​ထဲ​မှ ဤ​သိမ့်​သိမ့်​တုန်​မှု​တို့သည် ငြိမ်းချမ်းရေး​နှင့် လုံခြုံမှု​ကို မ​ဆောင်ကြဉ်း​ခဲ့​ပါ။​—ဟေရှာယ ၂၅:၁၀-၁၂; ၁ သက်သာလောနိတ် ၅:၃ နှိုင်းယှဉ်။

၂၇။ (က) “ပင်လယ်​သုံးပုံတစ်ပုံ” သည် မည်သို့​သွေး​ဖြစ်သွား​သနည်း။ (ခ) ‘ပင်လယ်​ထဲ​မှ သတ္တဝါ သုံးပုံတစ်ပုံ’ မည်သို့​သေ​ခဲ့​၍ “သင်္ဘော သုံးပုံတစ်ပုံ​လည်း” မည်သို့​ဖြစ်​လိမ့်​မည်​နည်း။

^၂၇ ဘုရားသခင့် နိုင်ငံတော်​အုပ်ချုပ်မှု​ကို နာခံ​မည့်​အစား အုပ်ချုပ်ရေး​နှင့်​စပ်လျဉ်း၍ တော်လှန်ရေး​တိုက်ပွဲ​များ​၌ ပါဝင်​ကြသော ထို​လူသား​တို့သည် သွေးစွန်း​ခြင်း​အပြစ်​နှင့် မကင်း​ကြောင်း ဒုတိယ တံပိုးခရာ​မှုတ်ခြင်း​က ထင်ရှား​စေပါ​သည်။ အထူးသဖြင့် ခရစ်ယာန်ဘောင်​၏ “ပင်လယ်​သုံးပုံတစ်ပုံ” သည် သွေး​ဖြစ်​ခဲ့ပြီ။ ၎င်း​ထဲ​မှ​သက်ရှိ​မှန်သမျှ ဘုရားသခင့် မျက်စိတော်​အောက်​၌ သေ​လျက်​ရှိကြသည်။ သင်္ဘော​များ​အလား ပင်လယ်​သုံးပုံတစ်ပုံ​ထဲ​တွင် ပေါလောမျော​နေသော ထို​တော်လှန်ရေး​အဖွဲ့​တစ်ခု​မျှ အဆုံး​၌ သင်္ဘော​ပျက်​ကပ်​နှင့် မလွတ်​နိုင်။ သိုး​ကဲ့သို့​သော လူ​သန်းပေါင်း​များစွာတို့သည် တံပိုးခရာ​ကဲ့သို့​သော ဆော်သြ​သံ​ကို​နာခံ​၍ ၎င်း​ပင်လယ်​၏ အမြင်​ကျဉ်း​သော တိုင်း​ချစ်​ပြည်​ချစ်စိတ်​ဓာတ်​နှင့် သွေးစွန်း​ခြင်း​အပြစ်​ထဲ​၌ ယခု​တိုင် လူးလွန့်​နစ်မွန်း​နေသော သူများ​ထဲ​မှ ယခု ခွဲထွက်​လာ​ကြ​သည့်​အတွက် ကျွန်ုပ်​တို့ ဝမ်းသာ​လိုက်​လေ​ခြင်း။

ကြယ်​တစ်လုံး ကောင်းကင်​မှ​ကျ​လာ

၂၈။ တတိယ​ကောင်းကင်တမန် တံပိုးမှုတ်​သောအခါ ဘာဖြစ်​သနည်း။

^၂၈ “တတိယ ကောင်းကင်တမန် တံပိုးခရာ​မှုတ်​လိုက်​ရာ မီးခွက်​ပ​မာ ထွန်းတောက်​သော ကြယ်ကြီး​တစ်လုံး ကောင်းကင်​မှ​ကျ​လာ၍ မြစ်​သုံးပုံတစ်ပုံ​နှင့် စမ်းရေ​ပေါက်​များ​အပေါ်​သို့ ကျ​လေ​၏။ ထို​ကြယ်​၏​အမည်​မှာ ဒေါ​န​ဖြစ်၏။ ရေ​သုံးပုံတစ်ပုံ​သည် ဒေါ​န​အရည်​ဖြစ်သွား​ရာ ထို​ရေ​ခါး​ကြောင့် လူများစွာ သေကြ​၏။” (ဗျာဒိတ် ၈:၁၀၊ ၁၁) ဤ​ကျမ်းချက် သခင့်​နေ့​တော်​အတွင်း မည်သို့​သက်ဆိုင်​ကြောင်း သိမြင်​နိုင်​ရန် အခြား​ကျမ်း​ပိုင်း​များ​က တစ်ဖန် အထောက်အကူ ပြု​ပြန်​သည်။

၂၉။ “မီးခွက်​ပ​မာ​ထွန်းတောက်​သော ကြယ်ကြီး​တစ်လုံး” ၏​ပုံခိုင်း​ချက်​ကို ဘာက​ပြည့်စုံ​စေ​သနည်း။

^၂၉ အသင်းတော်​ခု​နစ်​ပါး​ထံ ယေရှု​ပေး​ပို့​သော သတင်း​တော်​များ​၌ ကြယ်​၏​ပုံခိုင်း​ချက်​ကို ကျွန်ုပ်​တို့​တွေ့ခဲ့​ပြီ​ဖြစ်သည်။ ထို​သတင်း​တော်​များ​၌ ကြယ်​ခု​နစ်​လုံး​သည် အသင်းတော်များ​ထဲ​က အကြီးအကဲ​များ​ကို ပုံခိုင်း​၏။ * (ဗျာဒိတ် ၁:၂၀) ဘိသိက်ခံ ‘ကြယ်​များ’ သည် အခြား​ဘိသိက်ခံ​များ အားလုံး​နှင့်​တကွ ကောင်းကင်​အမွေခံ​အဖြစ် ဝိညာဉ်တော်ဖြင့် တံဆိပ်​ခတ်​ခံရ​သည့် အချိန်​မှ​စ၍ ဝိညာဉ်​ရေး​အရ ကောင်းကင်​ဆိုင်ရာ နေရာများ​၌ နေကြ၏။ (ဧဖက် ၂:၆၊ ၇) သို့ရာတွင် တမန်​တော်​ပေါလု​က ကြယ်​နှင့်​တူသော ထို​ပုဂ္ဂိုလ်​များ​ထဲ​မှ အယူဖောက်ပြန်သူ​များနှင့် ဂိုဏ်းဂဏ​ဝါဒီ​များ ပေါ်​လာ၍ သိုးများ​ကို လမ်းလွဲ​စေမည်​ဟု သတိပေး​ခဲ့​သည်။ (တမန်​တော် ၂၀:၂၉၊ ၃၀) ထိုသို့​သော သစ္စာဖောက်​မှု​ကြောင့် အယူဖောက်ပြန်မှု​ကြီး ဖြစ်ပေါ်​လာပြီး လမ်းလွဲ​သွားသော ထို​အကြီးအကဲ​များသည် ပေါင်းစပ်​အဓမ္မ​လူ​ဖြစ်လာ​ကာ လူသားများ​အလယ်တွင် မိမိတို့​ကိုယ်ကို ဘုရား​နှင့်​တူသော​အဆင့်​သို့ ချီးမြှင့်​လိမ့်​မည်​ဖြစ်သည်။ (၂ သက်သာလောနိတ် ၂:၃၊ ၄) ကမ္ဘာ့​ဇာတ်ခုံ​ပေါ်​တွင် ခရစ်ယာန်ဘောင် ဓမ္မ​ဆရာ​အုပ်စု ပေါ်ပေါက်​လာသော​အခါ ပေါလု​၏​သတိပေး​ချက် ပြည့်စုံ လာ​၏။ “မီးခွက်​ပ​မာ ထွန်းတောက်​သော​ကြယ်ကြီး” ဖြင့် ဤ​အုပ်စု​ကို တင်စား​သည်​မှာ ဆီလျော်​လှ​၏။

၃၀။ (က) ဗာဗုလုန်​ဘုရင်​ကို ကောင်းကင်​မှ​ကျ​လာ​သူ​အဖြစ် ပြောဆို​စဉ် ဘာကို​ဆိုလို​သနည်း။ (ခ) ကောင်းကင်​မှ​ကျ​ခြင်း​သည် ဘာကို​ရည်ညွှန်း​နိုင်​သနည်း။

^၃၀ ကောင်းကင်​မှ ထို​ကြယ်​ကျ​လာ​သည်ကို ယောဟန်​မြင်ရ​၏။ မည်သို့​ကျ​လာ​သနည်း။ ရှေး​ဘုရင်​တစ်ပါး​၏ အတွေ့အကြုံကို​ကြည့်​လျှင် နားလည်​နိုင်​မည်။ ဗာဗုလုန်​ဘုရင်​အား ဟေရှာယ​ဤသို့​ဆို​၏– “အို​နံနက်​သား၊ မိုး​သောက်​ကြယ်၊ သင်သည် ကောင်းကင်​က ကျ​လေ​ပြီ​တကား။ အပြည်ပြည်​တို့ကို နှိပ်စက်​သော​သင်သည် မြေ​တိုင်အောင် ခုတ်လှဲ​ခြင်း​ကို ခံရ​လေ​ပြီ​တကား။” (ဟေရှာယ ၁၄:၁၂) ကုရု​၏​တပ်​များ ဗာဗုလုန်​ကို ဖြို​လှဲ​သဖြင့် ၎င်း​၏​ဘုရင်​လည်း ကမ္ဘာ့​အုပ်စိုးရှင်​အဆင့်​မှ ရုတ်တရက် အရှက်တကွဲ ပြုတ်ကျ​သောအခါ အထက်ပါ​ပရောဖက်ပြုချက် ပြည့်စုံ​လာ​သည်။ သို့​ဖြစ်၍ ကောင်းကင်​မှ​ကျ​ခြင်း​သည် မြင့်သော​ရာထူးကို လက်လွတ်​ဆုံးရှုံး​၍ သိက္ခာ​ကျဆင်း​ခြင်း​ကို ရည်ညွှန်း​နိုင်​သည်။

၃၁။ (က) ခရစ်ယာန်ဘောင် ဓမ္မ​ဆရာ​အဖွဲ့​သည် အဘယ်​အချိန်တွင် “ကောင်းကင်” အဆင့်​မှ ကျဆင်း​ခဲ့​သနည်း။ (ခ) ဓမ္မ​ဆရာ​အဖွဲ့ တိုက်ကျွေး​သော​ရေ​သည် မည်သို့ “ဒေါ​န” ဖြစ်သွား​၍ လူအများ ဘာဖြစ်​ကြ​သနည်း။

^၃၁ ခရစ်ယာန်ဘောင် ဓမ္မ​ဆရာ​အုပ်စု​သည် ခရစ်ယာန်​ဘာသာစစ်​မှ အယူဖောက်ပြန်​သွားသော​အခါ ဧဖက် ၂:၆၊ ၇ ၌ ပေါလု​ဖော်ပြ​သော မြင့်မား​သည့် “ကောင်းကင်” အဆင့်​မှ ကျဆင်း​လာ​သည်။ သူတို့သည် လတ်ဆတ်​သော သမ္မာတရား ရေချို​အစား၊ ငရဲ​မီး၊ ငရဲကလေး၊ သုံးပါး​ပေါင်း​တစ်ဆူ၊ ကံကြမ္မာ​အယူ စ​သော မုသား​ခါး​ဖြစ်သည့် “ဒေါ​န” ကို​တိုက်ကျွေး​၏။ ထို​မျှ​မ​က၊ အကျင့်ကောင်း​သော ဘုရားသခင့်​ကျွန်​များ​ဖြစ်လာ​စေ​မည့်​အစား တိုင်းနိုင်ငံ​များ​အား စစ်​တ​လင်း​သို့ ခေါ်ဆောင်​သွား​သည်။ ရလဒ်​ကား အဘယ်နည်း။ ထို​မုသား​များ​ကို ယုံကြည်သူ​တို့သည် ဝိညာဉ်​ရေး​ဘက် အဆိပ်သင့်​ကုန်​ကြသည်။ သူတို့၏​အဖြစ်​သည် ယေရမိ​လက်ထက်​က သစ္စာဖောက် ဣသရေလလူ​တို့၏ အဖြစ်​နှင့်​တူ​သည်။ ထို​သူတို့အား ယေဟောဝါ​က “သူတို့ကို ဒေါ​န​နှင့် ငါ​ကြွေး​၍ အဆိပ်​ရေ​ကို တိုက်​မည်။ အကြောင်း​မူ​ကား ယေရုရှလင်​မြို့ရှိ ပရောဖက်​တို့​မှ ဘုရားမဲ့​နေခြင်း​အရာ [“အယူဖောက်ပြန်မှု၊” က​ဘ] သည် တစ်ပြည်လုံး​ကို နှံ့ပြား​လေ​ပြီ” ဟု​မိန့်တော်မူ၏။​—ယေရမိ ၉:၁၅; ၂၃:၁၅၊ သမ္မာ။

၃၂။ ခရစ်ယာန်ဘောင် ဝိညာဏ​ကောင်းကင်​မှ ကျဆင်း​ခြင်း​သည် မည်သည့်​အခါ သိသာ​လာပြီး ပြဇာတ်​ပ​မာ မည်သို့​ထင်ရှား​လာ​သနည်း။

^၃၂ ဤသူတို့ ဝိညာဏ​ကောင်းကင်​မှ ကျ​ခြင်း​သည် ၁၉၁၉ ခုနှစ်​၌ သိသာ​ထင်ရှား​လာ​သည်။ ထို​နှစ်​၌ ဘိသိက်ခံ​ခရစ်ယာန် အကြွင်းအကျန်​လေး​သည် ခရစ်ယာန်ဘောင် ဓမ္မ​ဆရာ​အုပ်စု​အစား နိုင်ငံတော်​မှု​ရေး​ကိစ္စ​များ စောင့်ထိန်း​ဖို့ ခန့်အပ်​တော်​မူ​ခြင်း ခံရ​သည်။ (မဿဲ ၂၄:၄၅-၄၇) ၁၉၂၂ ခုနှစ်​မှ​စ၍ ဤ​ခရစ်ယာန်​အုပ်စု​က ခရစ်ယာန်ဘောင် ဓမ္မ​ဆရာ​အုပ်စု​၏ ပျက်ကွက်မှု​ကို ဘွင်းဘွင်းရှင်းရှင်း ဖော်ထုတ်​ရေး​တည်း​ဟူသော ကင်ပိန်း​ကို ပြန်​စ​လိုက်​ရာ အဆိုပါ​ကျဆင်း​ခြင်း​သည် ပြဇာတ်​ပ​မာ ပေါ်လွင်​လာ​သည်။

၃၃။ ၁၉၂၄ ခုနှစ် အမေရိကန်​ပြည်ထောင်စု အိုဟိုင်အို​ပြည်နယ်၊ ကိုလမ်ဘတ်စ်​မြို့ စည်းဝေးကြီး​၌ ခရစ်ယာန်ဘောင် ဓမ္မ​ဆရာ​အဖွဲ့​၏ အတွင်းရေး​ကို မည်သို့​အထုပ်​ဖြေ​ခဲ့​သနည်း။

^၃၃ ဤကိစ္စနှင့်​စပ်လျဉ်း၍ အပေါ်လွင်ဆုံး​အချက်​မှာ “ခေတ်​များ အတွင်း ကျမ်းစာ​ကျောင်းသား​များ​၏ အကြီးကျယ်ဆုံး​သော စည်းဝေးကြီး” ဟူ၍ ရွှေခေတ် မဂ္ဂဇင်း ဖော်ပြ​သည့်​စည်းဝေးကြီး​၌ ထုတ်လွှင့်​သော ကြွေးကြော်​ချက်​ပင်​ဖြစ်သည်။ ထို​စည်းဝေးကြီး​ကို ၁၉၂၄၊ ဇူလိုင်​လ ၂၀-၂၇ ရက်​အတွင်း အိုဟိုင်အို​ပြည်နယ်၊ ကိုလမ်ဘတ်စ်​မြို့၌ ကျင်းပ​သည်။ ထို​စည်းဝေးကြီး​၌ အားမာန်ပါ​သော သန္နိ​ဋ္ဌာန်​တစ်ရပ်​ချ​ခဲ့​ပြီး နောက်ပိုင်း၌ ၎င်းကို ဝေစာ​အဖြစ် ရွက်​ရေ သန်း ၅၀ ဖြန့်ဝေ​ခဲ့​သည်​မှာ တတိယ​တံပိုးခရာ​ကို​မှုတ်​သော ကောင်းကင်တမန် ညွှန်ကြားမှု​၌ ပြုခြင်း​ဖြစ်​ကြောင်း သံသယ​မရှိ။ ၎င်း​ဝေစာ​ကို ဓမ္မ​ဆရာများ​အား စွဲချက်​တင်​ခြင်း ဟု​ခေါင်းစဉ်​တပ်​၍ ဖြန့်ချိ​ခဲ့​သည်။ ခေါင်းစဉ်​ငယ်​တစ်ခု​က “ကတိတော်​ဆိုင်ရာ အမျိုးအနွယ်​နှင့် မြွေ​၏​အမျိုးအနွယ် တိုက်ခိုက်​ခြင်း” ဟူသော​အရေးကိစ္စကို တင်ပြ​၏။ ထို​စွဲချက်​က ခရစ်ယာန်ဘောင်​ဓမ္မ​ဆရာများ ဘာသာရေး ဘွဲ့ထူး​ကြီး​များ ခံယူ​ခြင်း၊ စီးပွားရေး ပ​ဂေး​ကြီး​များနှင့် ကြေးစား​နိုင်ငံရေးသမား​များ​ကို မိမိတို့​သိုးအုပ်​ထဲ​တွင် အဓိပတိ​များ​အဖြစ် မြှောက်​စား​ထားခြင်း၊ လူရှေ့​သူ​ရှေ့ ဂုဏ်​ဖော်​လို​ခြင်း၊ မေရှိယနိုင်ငံတော်​သတင်းကို လူ​တို့အား မဟောပြော​ဘဲ​ငြင်းဆန်​ခြင်း စ​သည့်​ကိစ္စ​များ​တွင် သူတို့ကို ပြင်းပြင်းထန်ထန် အပြစ်​ဖော်​ဝေဖန်​လိုက်​သည်။ အပ်နှံ​ထားသော ခရစ်ယာန်​ယောက်​တိုင်း “ငါ​တို့​ဘုရားသခင် အပြစ်ပေး​တော်​မူ​ရာ နေ့ရက်​ကာလ​ကို” ကြွေးကြော်​၍ “စိတ်​မ​သာ ညည်းတွား​သော သူတို့အား နှစ်သိမ့်” ရန် ခန့်အပ်​တော်​မူ​ခြင်း​ခံရ​ကြောင်း အလေးအနက် တင်ပြ​လိုက်​သည်။​—ဟေရှာယ ၆၁:၂။

၃၄၊ ၃၅။ (က) တတိယ​ကောင်းကင်တမန် တံပိုးမှုတ်​ချိန်​မှ​စ၍ ဓမ္မ​ဆရာ​အဖွဲ့​၏ ဩဇာ​အာဏာ မည်သို့​ဖြစ်လာ​သနည်း။ (ခ) ခရစ်ယာန်ဘောင် ဓမ္မ​ဆရာ​အဖွဲ့​၏ နောင်ရေး​မှာ မည်သို့​နည်း။

^၃၄ တတိယ ကောင်းကင်တမန် တံပိုးခရာ​မှုတ်​သည့်​အချိန်​မှ​စ၍ လူ့​ဘောင်​အလယ်​၌ ခြယ်လှယ်​သော ဓမ္မ​ဆရာများ​၏ ကြီးစိုး​ခြင်း​ရာထူး​သည် လျှော​ကျ​လျက်​ရှိလာ​ရာ ယခု​ခေတ် ယခု​အချိန်တွင် လွန်ခဲ့သော​ရာစုနှစ်များ​တစ်လျှောက် သူတို့​အပိုင်​ယူ​ခဲ့​သော ဘုရားတမျှ​သော အာဏာကို သူတို့​ထဲ​က အနည်းငယ်​သာ စွဲကိုင်​ထား​ကြ​တော့​သည်။ ယေဟောဝါသက်သေ​များ​၏ ဟောပြောခြင်း​ကြောင့် ဓမ္မ​ဆရာ​အဖွဲ့ ပို့ချ​သော အယူဝါဒ​များစွာ​သည် ဝိညာဏ​အဆိပ်အတောက်​—“ဒေါ​န” ဖြစ်​ကြောင်း လူ​ဒုနှင့်ဒေး သိမြင်​လာကြပြီ။ ထို​မျှ​မ​က၊ ဥရောပ​မြောက်ပိုင်း​မှ ဓမ္မ​ဆရာ​အဖွဲ့​၏ အာဏာ​သည် ကုန်​လု​ခ​မ​န်း​ဖြစ်၍ အခြား​နိုင်ငံ​များ​မှာ​မူ ၎င်းတို့၏ ဩဇာ​လွှမ်းမိုးမှုကို အစိုးရ​များ​က တင်းကြပ်​စွာ ချုပ်ချယ်​ထား​သည်။ ဥရောပ​နှင့် အမေရိက​တိုက်​များ​မှ ကက်သလစ်​ကြီးစိုး​သော ဒေသ​များ​တွင် ဓမ္မ​ဆရာများ​သည် စီးပွားရေး၊ နိုင်ငံရေး​နှင့် စာရိတ္တ​ပိုင်း​တွင် ဟိုးလေးတကျော် အကျင့်ပျက်​ပြား​မှု​ကြောင့် သိက္ခာ​ကျ​ခဲ့​ကြပြီ။ သူတို့သည် အခြားသော မိစ္ဆာ​ဘာသာရေး​သမားများ အားလုံး​ကြုံ​ရသော​ကြမ္မာ​နှင့် တွေ့ရ​တော့​မည်​ဖြစ်၍ ယခု​အချိန်​မှ​စ၍ သူတို့၏​အခြေအနေ​သည် ဆိုး​သည်ထက် ဆိုး​ရုံ​သာ​ရှိ၏။​—ဗျာဒိတ် ၁၈:၂၁; ၁၉:၂။

^၃၅ ယေဟောဝါ​သည် ခရစ်ယာန်ဘောင်​ကို ကပ်​တိုက်၍​မပြီးသေး​ပါ။ စတုတ္ထ တံပိုးခရာ​မှုတ်​သည့်​နောက် ဘာဖြစ်​ပျက်​သည်ကို ကြည့်​ပါ။

မှောင်​မည်း​ခြင်း

၃၆။ စတုတ္ထ​ကောင်းကင်တမန် တံပိုးခရာ​မှုတ်​သည့်​နောက် ဘာဖြစ်​သနည်း။

^၃၆ “စတုတ္ထ ကောင်းကင်တမန် တံပိုးခရာ​မှုတ်​လိုက်​ရာ နေ​၏​သုံးပုံတစ်ပုံ၊ လ​၏​သုံးပုံတစ်ပုံ၊ ကြယ်​များ​၏​သုံးပုံတစ်ပုံ​သည် ဒဏ်ခတ်​ခံရ​၏။ သို့​နှင့် နေ၊ လ၊ ကြယ်​တို့၏ သုံးပုံတစ်ပုံ​သည် မှောင်မိုက်​၍ နေ့​၏​သုံး​ပိုင်း​တစ်ပိုင်း သည် အလင်း​မရ၊ ည​လည်း ထို့​အတူ​ဖြစ်​လေ​၏။” (ဗျာဒိတ် ၈:၁၂) အီဂျစ်​ပြည်​ပေါ် ကျရောက်​သော န​ဝ​မ​ကပ်ဘေး​သည် ပကတိ​အမှောင်​ဖြစ်၏။ (ထွက်မြောက်ရာ ၁၀:၂၁-၂၉) သို့သော် လူ​တို့ကို​ကပ်​တိုက်​သည့် ပုံခိုင်း​ချက်​ဖြစ်သော ဤ​အမှောင်​ကား အဘယ်နည်း။

၃၇။ တမန်​တော်​ပေတရု​နှင့် ပေါလု​တို့​က ခရစ်ယာန်​အသင်းတော်​ပြင်ပ​ရှိ လူတို့၏ ဝိညာဉ်​ရေး​အခြေအနေ​ကို မည်သို့​ဖော်ပြ​သနည်း။

^၃၇ တမန်​တော်​ပေတရု​က မိမိ၏​ယုံကြည်သူချင်း​များသည် ခရစ်ယာန်​ဖြစ်​မလာ​မီ​က ဝိညာဉ်​ရေး​အရ အမှောင်​ထဲ​တွင် ရှိခဲ့​ကြသည်​ဟု​ဆို​၏။ (၁ ပေတရု ၂:၉) ပေါလု​လည်း ခရစ်ယာန်​အသင်းတော် ပြင်ပ​မှ​လူတို့၏ ဝိညာဉ်​ရေး​အခြေအနေ​ကို ဖော်ပြ​ရာ​၌ “မှောင်မိုက်” ဟူသော​စကား​ကို သုံးစွဲ​၏။ (ဧဖက် ၅:၈; ၆:၁၂; ကောလောသဲ ၁:၁၃; ၁ သက်သာလောနိတ် ၅:၄၊ ၅) သို့သော် ဘုရားသခင်​ကို ယုံကြည်​သည်၊ ယေရှုကို​ကယ်တင်ရှင်​အဖြစ် လက်ခံ​သည်​ဟု​ဆို​ကြသော ခရစ်ယာန်ဘောင်​ထဲ​မှ​လူများ​ကို မည်သို့​ဆို​မည်​နည်း။

၃၈။ စတုတ္ထ ကောင်းကင်တမန်​က ခရစ်ယာန်ဘောင်​၏ “အလင်း” နှင့်​ပတ်သက်​၍ အဘယ်​အဖြစ်မှန်​ကို တံပိုးမှုတ်​၍ ကြေညာ​သနည်း။

^၃၈ ယေရှု​က ခရစ်ယာန်စစ်​များ​ကို သူတို့၏​အသီးအပွင့်​အားဖြင့် ခွဲခြား​သိမြင်​နိုင်​မည်​ဖြစ်​ကြောင်း၊ မိမိ​နောက်လိုက် အမည်ခံ​သူများစွာ​တို့​မှာ “အဓမ္မအမှု​ကို ပြုသောသူ” များ​ဖြစ်​မည်​ဟု မိန့်ဆိုခဲ့သည်။ (မဿဲ ၇:၁၅-၂၃) ခရစ်ယာန်ဘောင် နေရာယူ​ထားသော ကမ္ဘာ့​သုံးပုံတစ်ပုံ​၏ အသီးအပွင့်​ကို​ကြည့်မြင်​ပြီး ၎င်း​သည် ထူထပ်​သော​ဝိညာဏ​အမှောင်ထု​ကြီး​ထဲ​၌ စမ်း​တ​ဝါး​ဝါး သွားလာ​နေကြောင်း မည်သူမျှ မငြင်းဆို​နိုင်။ (၂ ကောရိန္သု ၄:၄) ၎င်း​သည် ခရစ်ယာန်​အမည်ခံ​သောကြောင့် အပြစ်တင် အခံ​ထိုက်​ဆုံး​ဖြစ်၏။ ထို့​ကြောင့် စတုတ္ထ​ကောင်းကင်တမန်​က ခရစ်ယာန်ဘောင်​၏ “အလင်း” သည် အမှန်​အားဖြင့် အမှောင်​သာ​ဖြစ်၍ ၎င်း​၏ “အလင်း” ပေး​ရာ​ဌာန​များသည်​လည်း ခရစ်ယာန်​ဘာသာ​မဟုတ်ဘဲ ဗာဗုလုန်​ပင်ရင်း​ဖြစ်​ကြောင်း တံပိုးခရာ​မှုတ်​၍ ကြေညာ​သည်​မှာ သင့်လျော်​လှ​၏။​—မာကု ၁၃:၂၂၊ ၂၃; ၂ တိမောသေ ၄:၃၊ ၄။

၃၉။ (က) ၁၉၂၅ ခုနှစ် စည်းဝေးကြီး​၌ ချ​ခဲ့​သော​သန္နိ​ဋ္ဌာန်​က ခရစ်ယာန်ဘောင်​၏​မိစ္ဆာ “အလင်း” ကို မည်သို့​ဖော်ပြ​သနည်း။ (ခ) ၁၉၅၅ ခုနှစ်​၌ နောက်ထပ်​မည်သို့ အထုပ်​ဖြေ​ပြန်​သနည်း။

^၃၉ ဘုရားသခင့်​လူမျိုးတော်သည် ထို​ကောင်းကင်​မှ​လာသော ကြွေးကြော်​ချက်​နှင့်​အညီ ၁၉၂၅ ခုနှစ်၊ ဩဂုတ်​လ ၂၉ ရက်​နေ့၌ အမေရိကန်​ပြည်ထောင်စု အင်​ဒီ​ယန်း​နား​ပြည်နယ်၊ အင်​ဒီ​ယန်​နက်​ပ​လ​စ်စ်​မြို့ စည်းဝေးပွဲ​ကြီး​တစ်ခု​တွင် ခန်း​လုံး​ပြည့်​စည်းဝေး​ပြီး “မျှော်လင့်ခြင်း​သတင်း” ခေါင်းစဉ်​တပ် တိကျ​ပြတ်သား​သော သန္နိ​ဋ္ဌာန်​တစ်ရပ်​ကို ဖြန့်ချိ​ရန် အတည်ပြု​လိုက်​သည်။ ဤ​တစ်ကြိမ်​လည်း ဘာသာ​စကား​ပေါင်း များစွာ​ဖြင့် ရွက်​ရေ သန်း ၅၀ ဖြန့်ဝေ​ခဲ့​ပြန်​သည်။ ၎င်း​က စီးပွားရေး​ခေါင်းပုံဖြတ် အမြတ်​ကြီး​စား​များ၊ နိုင်ငံရေး​ခေါင်းဆောင်​များနှင့် ဘာသာရေး​ဓမ္မ​ဆရာ​အဖွဲ့ ပေါင်းစပ်​၍​ကမ်း​လှမ်း​သော မိစ္ဆာ​အလင်း​ကိုလည်း​ကောင်း၊ ယင်းကြောင့် “လူတို့သည် အမှောင်​ထဲ​သို့​ကျဆင်း​ရ” ကြောင်းကို​လည်းကောင်း ထုတ်ဖော်​ရေးသား​လိုက်​သည်။ ၎င်း​ဝေစာ​က ဘုရားသခင့်​နိုင်ငံတော်​သာ​လျှင် “ငြိမ်းချမ်းမှု၊ ဖွံ့ဖြိုး​တိုးတက်မှု၊ ကျန်းမာ​မှု၊ အသက်ရှင်​မှု၊ လွတ်လပ်မှု​နှင့် ထာဝရ​ပျော်ရွှင်မှု ကောင်းချီး​များ” ရယူ​ခံစား​စေနိုင်​မည့် မျှော်လင့်ချက်​အစစ်​ဖြစ်​ကြောင်း ပြညွှန်​ထား​သည်။ ဘိသိက်ခံ​ခရစ်ယာန် အုပ်စု​ကလေး​အနေ​နှင့် ဧရာမ​ခရစ်ယာန်ဘောင် အဖွဲ့အစည်း​ကြီး​ကို ဆန့်ကျင်​၍ ဤသို့​သော​သတင်းကို ကြွေးကြော်​ရသည်မှာ သတ္တိ​ရှိဖို့လို ၏။ သို့​တ​စေ၊ သူတို့သည် ၁၉၂၀ ပြည့်လွန်​နှစ်များ​၏ အ​ဦး​ပိုင်း​မှ ယနေ့​တိုင်အောင် ထိုသို့ မသွေမဖည်​ပြု​လာ​ခဲ့​သည်။ များ​မကြာမီ၊ ၁၉၅၅ ခုနှစ်​၌ “လောက​အလင်း” ကား အဘယ်အရာ​နည်း​—ခရစ်ယာန်ဘောင်​လော၊ ခရစ်ယာန်​ဘာသာ​လော အမည်တပ် စာအုပ်​ငယ်​ကို ကမ္ဘာ​တစ်ဝန်း ဘာသာ​စကား​ပေါင်း​များစွာ ဝေငှခြင်း​ဖြင့် ဓမ္မ​ဆရာ​အတန်းအစား​၏ အတွင်းရေး​ကို အထုပ်​ဖြေလိုက်​ပြန်​သည်။ ယနေ့၊ ခရစ်ယာန်ဘောင်​၏ အရေခြုံမှု​သည် အထင်းသား​ဖြစ်၍ ကမ္ဘာ​ပေါ်​ရှိ လူ​အမြောက်အမြား ကိုယ်တိုင်​ကိုယ်​ကျ တွေ့​နိုင်​ကြသည်။ သို့​တ​စေ၊ ယေဟောဝါ​၏ လူမျိုးတော်​က ခရစ်ယာန်ဘောင်​သည် မှောင်မိုက်​သော​နိုင်ငံ​ဖြစ်​ကြောင်း မရပ်မနား ဖော်ထုတ်​လျက်​ရှိခဲ့​သည်။

ပျံဝဲ​လျက်​နေသော လင်းယုန်

၄၀။ တံပိုးခရာ လေးလက်​မှုတ်ခြင်း​က ခရစ်ယာန်ဘောင် ဘာဖြစ်​ကြောင်း​ပြသ​နည်း။

^၄၀ ပထမ တံပိုးခရာ​လေးလက် မှုတ်ခြင်း​ကြောင့် ခရစ်ယာန်ဘောင်​၏ လူခြေတိတ်​၍ သေစေတတ်သော အခြေအနေ​သည် တကယ်​ပင် ဘူး​ပေါ်​သလို ပေါ်လာ​သည်။ ၎င်းနှင့်​ဆိုင်သော “မြေကြီး” အပိုင်း​သည် ယေဟောဝါ​၏​ပြစ်​မိ​န့် ပေး​ခံထိုက်​ကြောင်း ပေါ်လွင်​ခဲ့​သည်။ ခရစ်ယာန်ဘောင်​၏ နိုင်ငံ​ဒေသ​များနှင့် အခြား​ဒေသ​များ​၌ ပေါ်လာ​သော တော်လှန်ရေး​အစိုးရ​တို့သည် ဝိညာဏ​အသက်ကို အန္တရာယ်​ပြု​နိုင်​ကြောင်း ထင်ရှား​လာ​သည်။ ၎င်း​၏​ဓမ္မ​ဆရာ​အဖွဲ့ လျှော​ကျ​သည့်​အဖြစ်​သည် အထင်းသား​ရှိပြီး ၎င်း​၏​မှောင်မိုက်​သော ဝိညာဉ်​ရေး​အခြေအနေ​လည်း လူတကာ​မြင်​နိုင်အောင် အထုပ်​ဖြေ​ခံရ​လေ​ပြီ။ ခရစ်ယာန်ဘောင်​သည် စာတန့်​စနစ်​၏ အပြစ်​အကြီးဆုံး​အပိုင်း အမှန်​ဖြစ်၏။

၄၁။ တံပိုးခရာ တစ်လက်​ပြီး​တစ်လက် ဆက်တိုက်​မှုတ်ခြင်း ခေတ္တ​ရပ်နား​စဉ် ယောဟန် ဘာကို​မြင်ရ​ကြား​ရသနည်း။

^၄၁ နောက်ထပ် ဘာ​ဖော်ပြ​စ​ရာ ရှိ​သနည်း။ ဤ​မေးခွန်း​၏​အဖြေကို ကျွန်ုပ်​တို့​မရရှိ​မီ တံပိုးခရာ တစ်လက်​ပြီး​တစ်လက် ဆက်တိုက်​မှုတ်ခြင်း ခေတ္တ​ရပ်နား​သွား​သည်။ ရှေ့ဆက်​မြင်ရသော အမှုအရာ​ကို ယောဟန် ဤသို့​ဖော်ပြ​လိုက်​သည်– “ထို​အခါ လင်းယုန်​တစ်ကောင်​သည် ကောင်းကင်​အလယ်​၌ ပျံဝဲ​လျက်​နေသည်​ကို ငါ​မြင်ရ​၏။ ထို​ငှက်​က ‘ကောင်းကင်တမန်​သုံးပါး မှုတ်​တော့​မည့် ကြွင်း​သော​တံပိုးခရာ မှုတ်​သံ​များ​ကြောင့် မြေကြီးပေါ် နေထိုင်သူ​တို့သည် အမင်္ဂလာ၊ အမင်္ဂလာ၊ အမင်္ဂလာ ရှိ၏’ ဟု ကျယ်​သော​အသံ​ဖြင့် ပြောဆို​သည်ကို ငါ​ကြား​ရ၏။”​—ဗျာဒိတ် ၈:၁၃။

၄၂။ ပျံ​နေသည့်​လင်းယုန်​သည် ဘာကို​အဓိပ္ပာယ် ဆောင်​ဖွယ်​ရှိ​သနည်း။

^၄၂ လင်းယုန်​သည် မြင့်မားသော ကောင်းကင်​ယံ​တွင် ပျံဝဲ​သောကြောင့် ၎င်းကို ကျယ်ဝန်း​သော ဧရိယာ​အတွင်း နေရာအနှံ့​မှ​လူ​တို့ မြင်နိုင်​ကြ​၏။ ၎င်း​သည် စ​က္ခု​အာရုံ စူးရှ​သဖြင့် ရှေ့​တူ​ရူ ဝေးလံ​သော​နေရာကို မြင်နိုင်​၏။ (ယောဘ ၃၉:၂၉) ဘုရားသခင့် ပလ္လင်တော်​ဝန်းကျင်​မှ သက်ရှိ​သတ္တဝါ လေးပါး​ထဲ​က တစ်ပါး​ကို ပျံ​နေသည့်​လင်းယုန်​ဖြင့် ပုံဖော်​ထား​၏။ (ဗျာဒိတ် ၄:၆၊ ၇) ဤ​ခေရုဗိမ်​ဖြစ်စေ၊ ဘုရားသခင်​၏ အမြော်အမြင်​ရှိ အခြား​အစေခံ​တစ်ဦး​ဖြစ်စေ “အမင်္ဂလာ၊ အမင်္ဂလာ၊ အမင်္ဂလာ ရှိ၏” ဟူသော အားပါ​သည့်​သတင်းကို ကျယ်လောင်​စွာ ကြွေးကြော်​လိုက်​သည်။ ထို​အမင်္ဂလာ​တစ်ခု​ချင်း​နှင့် ဆက်စပ်​နေသော ကျန်​တံပိုးခရာ သုံး​လက်​မှုတ်​သံ​ကို ကြား​ရသည်​နှင့်​အမျှ မြေကြီးပေါ် နေထိုင်သူ​များ​အနေ​နှင့် သတိပြု​ကြ​ပါစေ။

[အောက်ခြေမှတ်ချက်]

[လေ့လာ​ရန်​မေးခွန်းများ]

 [စာမျက်နှာ ၁၃၉ ပါ ဇယား]

ခရစ်ယာန်ဘောင်​၏​ရေ​များ ဒေါ​န​ဖြစ်​ကြောင်း ပေါ်လွင်​လာ

ခရစ်ယာန်ဘောင်​၏ ယုံကြည်ချက်​နှင့် သဘောထားများ သမ္မာကျမ်းစာ​အဆို

ဘုရားသခင့် ကိုယ်ပိုင်​နာမတော် အရေး​မကြီး– “တစ်ဆူတည်း​သော ဘုရားသခင့် ကိုယ်ပိုင်​နာမတော်​သုံး​ခြင်း​မှာ ကမ္ဘာ​တစ်ခွင် ခရစ်ယာန်​အသင်း ယုံကြည်ချက်​နှင့် လုံးဝ​မအပ်စပ်​ပါ။” (Revised Standard Version ၏​အချီး) ယေရှု​က ဘုရားသခင့် နာမတော်​ကို လူ​တို့ ရိုသေ​လေးမြတ်​ကြ​ပါစေ​ဟု ဆုတောင်း​၏။ ပေတရု​က “ထာဝရ​ဘုရား [“ယေဟောဝါ၊” က​ဘ] ၏​နာမတော်​ကို အမှီပြု၍ ပတ္ထနာ​ပြုသောသူ ရှိသမျှသည် ကယ်တင်​တော်​မူ​ခြင်း​သို့ ရောက်​ရ​ကြ​လတ္တံ့” ဟု​ဆို​သည်။ (တမန်​တော် ၂:၂၁၊ သမ္မာ; ယောလ ၂:၃၂; မဿဲ ၆:၉; ထွက်မြောက်ရာ ၆:၃; ဗျာဒိတ် ၄:၁၁; ၁၅:၃; ၁၉:၆)

ဘုရားသခင်​သည် သုံးပါး​တစ်ဆူ​ဖြစ်သည်– “ခမည်းတော်​သည် ဘုရားသခင်​ဖြစ်၏။ သားတော်​သည် ဘုရားသခင်​ဖြစ်၏။ သန့်ရှင်းသော​ဝိညာဉ်​တော်​လည်း ဘုရားသခင်​ဖြစ်၏။ သို့သော် သူတို့သည် ဘုရား​သုံး​ဆူ​မဟုတ်၊ တစ်ဆူတည်း ဖြစ်​တော်​မူ​၏။” (ကက်သလစ် စွယ်စုံ​ကျမ်း၊ ၁၉၁၂ ခုနှစ် ထုတ်ဝေ​ခြင်း)[2] ကျမ်းစာ​က ယေဟောဝါ​သည် ယေရှု​ထက်​ကြီးမြတ်​၍ ခရစ်တော်​၏ ဘုရားသခင်​နှင့် ဦးခေါင်း ဖြစ်​တော်​မူ​သည်​ဟု ဆို​သည်။ (ယောဟန် ၁၄:၂၈; ၂၀:၁၇; ၁ ကောရိန္သု ၁၁:၃) သန့်ရှင်းသော​ဝိညာဉ်​တော်​မှာ ဘုရားသခင့် တက်ကြွ​သော​စွမ်းအား​ဖြစ်သည်။ (မဿဲ ၃:၁၁; လုကာ ၁:၄၁; တမန်​တော် ၂:၄)

လူ့​ဝိညာဉ်​သည် မသေနိုင်– “လူသေ​သောအခါ သူ့​ဝိညာဉ်​နှင့်​ခန္ဓာ ကွဲ​သွား​၏။ သူ့​ခန္ဓာ​သည် . . . ဆွေးမြေ့ [လေ​၏။] လူ့​ဝိညာဉ်​မှာ​မူ သေ​မသွား​ပါ။” (သေ​သည့်​နောက် ဘာဖြစ်၊ ရို​မင်​ကက်သလစ် စာပေ​တစ်စောင်)[3] လူသည် ဝိညာဉ် ဖြစ်၏။  လူသေ​သောအခါ ဝိညာဉ်​လည်း သေသွား​သဖြင့် စဉ်းစားခြင်း၊ ခံစားခြင်း မရှိတော့ဘဲ လာ​ရာ​မြေမှုန့်​သို့ ပြန်သွား​သည်။ (ကမ္ဘာဦး ၂:၇; ၃:၁၉; ဆာလံ ၁၄၆:၃၊ ၄; ဒေသနာ ၃:၁၉၊ ၂၀; ၉:၅၊ ၁၀; ယေဇကျေလ ၁၈:၄၊ ၂၀)

လူဆိုးများ သေလွန်​သည့်​နောက် ငရဲ​ထဲ​၌ အပြစ်ဒဏ်​ခံရ​သည်– “မိရိုးဖလာ ခရစ်ယာန် ယုံကြည်ချက်​အရ၊ ငရဲ​သည် မကုန်ဆုံး​နိုင်သော ပူဆွေး​နာကျင်​သော နေရာ​ဖြစ်သည်။” (ကမ္ဘာ့​စာအုပ် စွယ်စုံ​ကျမ်း၊ ၁၉၈၇ ခုနှစ် ထုတ်ဝေ​ခြင်း)[4] အပြစ်​၏​အ​ခ​မှာ သေခြင်း​ဖြစ်သည်။ ညှဉ်းဆဲ​ခံရ​သော​ဘဝ မဟုတ်။ (ရောမ ၆:၂၃) လူသေ​တို့သည် ငရဲ (ဟေးဒီးစ်၊ ရှီး​အိုး​လ်) ထဲ​၌ အဘယ်အရာကို​မျှ​မသိဘဲ နား​နေပြီး ထမြောက်ခြင်း​ကို စောင့်ဆိုင်း​နေသည်။ (ဆာလံ ၈၉:၄၈; ယောဟန် ၅:၂၈၊ ၂၉; ၁၁:၂၄၊ ၂၅; ဗျာဒိတ် ၂၀:၁၃၊ ၁၄)

“မီ​ဒီ​ယက်​ထ​ရ​စ်ခ်စ် [အမျိုးသမီး​ကြားဖျန်] ဟူသော​ဘွဲ့​ကို မယ်တော်​အား ပေး​၏။” (ကက်သလစ် စွယ်စုံ​ကျမ်း​သစ်၊ ၁၉၆၇ ခုနှစ် ထုတ်ဝေ​ခြင်း)[5] ဘုရားသခင်​နှင့် လူ​တို့​စပ်ကြား တစ်ဦးတည်း​သော ကြားဖျန်​မှာ ယေရှု​ဖြစ်သည်။ (ယောဟန် ၁၄:၆; ၁ တိမောသေ ၂:၅; ဟေဗြဲ ၉:၁၅; ၁၂:၂၄)

နို့စို့​သူငယ်​များ နှစ်ခြင်း​ခံ​သင့်​သည်– “ချာ့ခ်ျ​အသင်းတော်သည် စ​ကတည်းက နို့စို့​သူငယ်​များ​အဖို့ နှစ်ခြင်း​မင်္ဂလာ​အခမ်းအနား ကျင်းပ​ပေး​ပါ​သည်။ ဤ​ကျင့်ထုံး​သည် တရားဝင်​သည်​ဟု မှတ်ယူ​ရုံ​မ​က ကယ်တင်ခြင်း​အတွက် မရှိမဖြစ်​ဟူ၍လည်း သင်ကြား​ခဲ့​ပါ​သည်။” (ကက်သလစ် စွယ်စုံ​ကျမ်း​သစ်၊ ၁၉၆၇ ခုနှစ် ထုတ်ဝေ​ခြင်း)[6] နှစ်ခြင်း​မှာ တပည့်​များ ဖြစ်​နှင့်​ပြီး ယေရှု၏​ပညတ်​များ စောင့်ရှောက်​ရန် သင်ကြား​ခံရ​ပြီး​သူများ​အတွက် ဖြစ်သည်။ ဘုရားသခင့် နှုတ်ကပါဌ်တော်​ကို နားလည်​၍ ယုံကြည်ခြင်း ကျင့်သုံး​မှ​သာ နှစ်ခြင်း​ခံနိုင်​သော အရည်အချင်း​ရှိသည်။ (မဿဲ ၂၈:၁၉၊ ၂၀; လုကာ ၃:၂၁-၂၃; တမန်​တော် ၈:၃၅၊ ၃၆)

ချာ့ခ်ျ​အများစု​သည် ဒါယကာ​နှင့် ဓမ္မ​ဆရာ​အဖွဲ့​ဟူ၍ အတန်းအစား​ခွဲထား​ပြီး ဓမ္မ​ဆရာ​အဖွဲ့က ဒါယကာ​များ​အတွက် အကျိုးဆောင်​ကြသည်။ များသောအားဖြင့် ဓမ္မ​ဆရာ​အဖွဲ့​သည် မိမိတို့၏ ဓမ္မ​အမှု​အတွက် လစာ​ရရှိ​ပြီး “သိက္ခာ​တော်​ရ၊” “Father” သို့​မဟုတ် “အရှင်​ကိုယ်တော်မြတ်” ဟူသော​ဘွဲ့များ​ကို​ယူ​ကာ ဒါယကာ​များ​အပေါ် ချီးမြှောက်​ထားခြင်း ခံရ​ကြသည်။[7] ပထမ​ရာစု ခရစ်ယာန်​အားလုံး ဓမ္မ​အမှုဆောင်​များ ဖြစ်​ကြ​၍ သတင်းကောင်း ဟောပြောခြင်း​လုပ်ငန်း​တွင် ပါဝင်​ဆောင်ရွက်​ကြသည်။ (တမန်​တော် ၂:၁၇၊ ၁၈; ရောမ ၁၀:၁၀-၁၃; ၁၆:၁) ခရစ်ယာန်​တစ်ဦး​သည် “အဖိုး​မခံ​ဘဲ ပေးကမ်း” ရမည်။ လစာ​အတွက် မပြု​သင့်။ (မဿဲ ၁၀:၇၊ ၈) ဘာသာရေး​ဘွဲ့များ သုံး​ခြင်း​ကို ယေရှု ကြပ်တည်း​စွာ တားမြစ်​တော်​မူ​သည်။ (မဿဲ ၆:၂; ၂၃:၂-၁၂; ၁ ပေတရု ၅:၁-၃)

ဝတ်ပြုရေး​၌ ရုပ်တု၊ ပုံတော်၊ လက်ဝါးကပ်တိုင်​များ​ကို အသုံးပြု​ကြသည်– “ခရစ်တော်၊ ဘုရားသခင့်​မယ်တော် အပျိုစင်​နှင့် အခြားသူ​တော်​စင်​များ​၏ . . . ရုပ်တု​များ​ကို . . . ချာ့ခ်ျ​များ​၌​ထား​ရှိပြီး ၎င်း​တို့အား ထိုက်​လျောက်​သော ကြည်ညို​ကိုးကွယ်​မှု​ကို ပြု​ရမည်။” ([၁၅၄၅-၆၃ ခုနှစ်] ထ​ရင်း​ညီလာခံ ကြေညာ​ချက်)[8] ခရစ်ယာန်​များ​အနေ​နှင့် လူ​တို့​အခေါ် တစ်ဆင့်​ကိုးကွယ်​ခြင်း​အပါအဝင် ဆင်း​တု​ကိုးကွယ်​မှု မှန်သမျှ​မှ ထွက်ပြေး​ရှောင်တိမ်း​ရမည်။ (ထွက်မြောက်ရာ ၂၀:၄၊ ၅; ၁ ကောရိန္သု ၁၀:၁၄; ၁ ယောဟန် ၅:၂၁) သူတို့သည် ဘုရားသခင်​ကို ဝိညာဉ်​နှင့်​လည်းကောင်း သမ္မာတရား​ဖြင့်​လည်းကောင်း ကိုးကွယ်​ကြသည်။ အမြင်​ဖြင့်​မဟုတ်။ (ယောဟန် ၄:၂၃၊ ၂၄၊ က​ဘ; ၂ ကောရိန္သု ၅:၇)

အသင်းသားများ​အ ဘုရားသခင့် ရည်ရွယ်ချက်များ​သည် နိုင်ငံရေး​အားဖြင့် အထမြောက်​မည်​ဟု သင်ကြား​ပေး​သည်။ ကွယ်လွန်​သူ ဂိုဏ်းချုပ် စ​ပဲ​လ်​မင်း​က ဤသို့​ဆို​၏– “ငြိမ်းချမ်းရေး​လမ်း တစ်​လမ်း​တည်း​ရှိတယ် . . . အဲဒါဟာ ဒီ​မို​က​ရေ​စီ လမ်းမကြီး​ပဲ။” သတင်း​များ​အရ၊ ဘာသာရေး​က နိုင်ငံရေး​တွင် (သာမက၊ ထကြွ​သောင်းကျန်းမှု​များ​၌​ပင်) ပါဝင်​ကြသည်။ ကုလသမဂ္ဂ​ကို “သင့်မြတ်​ညီညွတ်​ရေး​နှင့် ငြိမ်းချမ်းရေး​အတွက် နောက်ဆုံး​မျှော်လင့်ချက်​အဖြစ်” ထောက်ခံကြ​သည်။[10][10a] ယေရှုသည် ဘုရားသခင့်​နိုင်ငံတော်​ကို လူသား​တို့၏ မျှော်လင့်ချက်​အဖြစ် ဟောပြော​တော်​မူ​သည်။ နိုင်ငံရေး​စနစ် တစ်မျိုး​မျိုး​အကြောင်း ဟော​တော်​မ​မူ။ (မဿဲ ၄:၂၃; ၆:၉၊ ၁၀) ကိုယ်တော်​သည် နိုင်ငံရေး​တွင် မပါဝင်ဘဲ ငြင်းပယ်​ခဲ့​သည်။ (ယောဟန် ၆:၁၄၊ ၁၅) ကိုယ်တော့်​နိုင်ငံတော်​သည် ဤ​လောက​၏ တစ်စိတ်​တစ်ပိုင်း မဟုတ်။ သို့ဖြင့် နောက်တော်လိုက်​များလည်း လောက​၏​အစိတ်အပိုင်း ဖြစ်​ရန်​မဟုတ်။ (ယောဟန် ၁၈:၃၆; ၁၇:၁၆) လောက​နှင့်​မိတ်သဟာယ မ​ဖွဲ့​ရန် ယာကုပ်​က သတိပေး​သည်။ (ယာကုပ် ၄:၄)

[စာမျက်နှာ ၁၃၂ ပါ ရုပ်ပုံ]

တံဆိပ်​ခု​နစ်​ခု​ကို ဖွင့်လိုက်​ခြင်း​က တံပိုးခရာ ခု​နစ်​လက်ကို မှုတ်​စေ

[စာမျက်နှာ ၁၄၀ ပါ ရုပ်ပုံ]

“ကမ္ဘာ့​ခေါင်းဆောင်​များ​ကို စိန်ခေါ်​ခြင်း” (၁၉၂၂ ခုနှစ်) ဤ​သန္နိ​ဋ္ဌာန်​က “မြေကြီး” အပေါ် ယေဟောဝါ​၏ ကပ်ဘေး ကျရောက်​တော့​မည်​ကို ကြေညာ​ပေး

[စာမျက်နှာ ၁၄၀ ပါ ရုပ်ပုံ]

“ခရစ်ယာန်​အားလုံး​အတွက် သတိပေး​ချက်” (၁၉၂၃ ခုနှစ်) ဤ​သန္နိ​ဋ္ဌာန်​က “ပင်လယ်​သုံးပုံတစ်ပုံ” အပေါ် ယေဟောဝါ စီရင်ချက်​ချ​တော်​မူ​ကြောင်း အနှံ့အပြား​ကြွေးကြော်

[စာမျက်နှာ ၁၄၁ ပါ ရုပ်ပုံ]

“ဓမ္မ​ဆရာများ​ကို စွဲချက်​တင်​ခြင်း” (၁၉၂၄ ခုနှစ်) ဤ​ဝေစာ​ကို အနှံ့အပြား​ဝေငှခြင်း​ဖြင့် ခရစ်ယာန်ဘောင် ဓမ္မ​ဆရာ​၏ “ကြယ်” ကြွေကျ​ပြီ​ဖြစ်​ကြောင်း လူ​တို့အား​အသိပေး

[စာမျက်နှာ ၁၄၁ ပါ ရုပ်ပုံ]

“မျှော်လင့်ခြင်း​သတင်း” (၁၉၂၅ ခုနှစ်) တိကျ​ပြတ်သား​သော ဤ​သန္နိ​ဋ္ဌာန်​က ခရစ်ယာန်ဘောင်​၏ အလင်း​သည် အမှန်​အားဖြင့် အမှောင်​သာ​ဖြစ်​ကြောင်း ဖော်ထုတ်