အခန်း ၂၄

ချို​၍​ခါး​သော သတင်း​တစ်ရပ်

ရူပါရုံ ၆ ဗျာဒိတ် ၁၀:၁–၁၁:၁၉

အကြောင်း​ရာ– စာလိပ်​ငယ်​ဆိုင်ရာ​ရူပါရုံ။ ဗိမာန်တော်​တွေ့ ကြုံ​မှုများ။ သတ္တမ တံပိုးခရာ​မှုတ်ခြင်း

ပြည့်စုံချိန်– ၁၉၁၄ ခုနှစ် ယေရှု နန်းထိုင်​ချိန်​မှ ဆင်းရဲ​ဒုက္ခ​ကြီး​အထိ

၁၊ ၂။ (က) ဒုတိယ အမင်္ဂလာ​ကြောင့် ဘာ​ဖြစ်၍ ၎င်း​အမင်္ဂလာ အဘယ်အခါ အဆုံးတိုင်​မည်​ဟု ကြေညာ​မည်​နည်း။ (ခ) ကောင်းကင်​မှ မည်သူ​ဆင်းသက်လာ​သည်ကို ယောဟန် မြင်​သနည်း။

ဒုတိယ​အမင်္ဂလာ​သည် အဖျက်​သန်​လှ​၏။ ခရစ်ယာန်ဘောင်​နှင့် ၎င်း​၏​ခေါင်းဆောင်​များ​အပေါ် ကပ်​တိုက်​ခဲ့​သည်။ ဤနည်းဖြင့် “လူ​သုံးပုံတစ်ပုံ” သည် ဝိညာဉ်​ရေး​ဘက် သေ​လျက်​ရှိကြောင်း ဖော်ထုတ်​ရှုတ်ချ​ခံရ​၏။ (ဗျာဒိတ် ၉:၁၅) ၎င်းနောက်​၌ တတိယ​အမင်္ဂလာ ဘာများ ယူဆောင်​လာ​မည်​နည်း​ဟု ယောဟန် တွေးဆ​ခဲ့​ပေမည်။ သို့သော်၊ နေပါ​ဦး၊ ဒုတိယ အမင်္ဂလာ မပြီးသေး​ပါ​—ဗျာဒိတ် ၁၁:၁၄ တွင် မှတ်တမ်းတင်​သော အချက်​သို့​ရောက်​မှ​သာ ပြီးစီး​လိမ့်​မည်။ ၎င်း​မတိုင်မီ၊ ယောဟန်​သည် အခြင်းအရာ အပြောင်းအလဲ​တစ်ခု​ကို မြင်ရပြီး ကိုယ်တိုင်​ကိုယ်​ကျ တက်ကြွ​စွာ ပါဝင်​သရုပ်ဆောင်​ရမည်​ဖြစ်၏။ ၎င်း​သည် အောက်ပါ​အံ့သြ​ထိတ်လန့်ဖွယ် မြင်ကွင်း​ဖြင့် အစပြု​၏–

^၂ “ထို့နောက်၊ ခွန်အား​ကြီးသော ကောင်းကင်တမန် နောက်​တစ်ပါး ကောင်းကင်​မှ ဆင်းသက်လာ​သည်ကို ငါ​မြင်ရ​၏။ သူသည် မိုးတိမ်​ကို ဝတ်ဆင်​လျက် ဦးခေါင်း​ပေါ်​၌ သက်တံ​ရှိ၏။ မျက်နှာ​သည် နေ​နှင့်​တူ​၍ ခြေ​တို့သည် မီးတိုင်​သဖွယ် ဖြစ်၏။”​—ဗျာဒိတ် ၁၀:၁။

၃။ (က) “ခွန်အား​ကြီးသော ကောင်းကင်တမန်” ကား မည်သူ​နည်း။ (ခ) သူ့​ခေါင်း​ပေါ်​က​သက်တံ အဘယ်​အဓိပ္ပာယ်​ထူး ရှိ​သနည်း။

^၃ ဤ “ခွန်အား​ကြီးသော ကောင်းကင်တမန်” ကား မည်သူ​နည်း။ နောက်​တစ်​ကဏ္ဍ​တွင် ပါဝင်​သရုပ်ဆောင်​သော ဘုန်းပွင့်​ယေရှု​ခရစ်​ဖြစ်​ကြောင်း သိသာ​၏။ ယေရှုသည် အ​ရူပ​အဖြစ်​တည်း​ဟူသော မိုးတိမ်​ကို ဝတ်ဆင်​ထား​သဖြင့် “ကြည့်​ပါ။ ကိုယ်တော်​သည် မိုးတိမ်​နှင့်အတူ ကြွ​လာ၍ မျက်စိ​တိုင်း​သည် ကိုယ်တော်​ကို မြင်ရ​မည်။ ကိုယ်တော်​ကို ထိုးဖောက်​သော​သူတို့​ပါ မြင်ရ​ကြ​မည်” ဟူသော ယောဟန်​၏ စောစော​ပိုင်း​က စကား​များ​ကို ကျွန်ုပ်​တို့အား ပြန်သတိရ​စေ​သည်။ (ဗျာဒိတ် ၁:၇; မဿဲ ၁၇:၂-၅ နှိုင်းယှဉ်။) ခေါင်းတော်​ပေါ်​က သက်တံ​က ယေဟောဝါ​၏​ပလ္လင်တော်​ပတ်လည်​တွင် ‘မြစိမ်း​ရော​င်​သက်တံ​ရှိ’ သော ယောဟန်​၏​ရူပါရုံ​ကို ပြန်သတိရ​စေ​သည်။ (ဗျာဒိတ် ၄:၃; ယေဇကျေလ ၁:၂၈ နှိုင်းယှဉ်။) သက်တံ​သည် ဘုရားသခင့် ပလ္လင်တော်​ပတ်လည်​၌ ကြည်လင်​အေးမြ ငြိမ်သက်မှု​ရှိသည်​ကို​ပြ​၏။ ထို့​အတူ၊ ဤ​ကောင်းကင်တမန်​၏ ခေါင်း​ပေါ်​က​သက်တံ​လည်း သူ့​အား ကြိုဟော​ထားသော ယေဟောဝါ​၏ “ငြိမ်သက်ခြင်း​မင်း” ငြိမ်းချမ်းရေး အထူး​တမန်​ဖြစ်​ကြောင်းကို​ပြ​၏။​—ဟေရှာယ ၉:၆၊ ၇၊ သမ္မာ။

၄။ (က) ခွန်အား​ကြီးသော ကောင်းကင်တမန်​၏ မျက်နှာ​သည် “နေ​နှင့်​တူ” ခြင်း၊ (ခ) သူ၏​ခြေ​တို့သည် “မီးတိုင်​သဖွယ်​ဖြစ်” ခြင်း​တို့​က အဘယ်အရာကို​အသီးသီး ပုံဆောင်​သနည်း။

^၄ ခွန်အား​ကြီးသော ကောင်းကင်တမန်​၏ မျက်နှာ​သည် “နေ​နှင့်​တူ” ၏။ စောစော​ပိုင်း​၌ ဘုရားသခင့် ဗိမာန်တော်​ထဲ​က ယေရှု​နှင့်​ပတ်သက်သော ရူပါရုံ​တွင် ယေရှု၏ မျက်နှာတော်​သည် “အစွမ်းကုန် တောက်ပ​သော နေ​နှင့်​တူ” ကြောင်း ယောဟန် သတိပြုမိ​ခဲ့ပြီ။ (ဗျာဒိတ် ၁:၁၆) ယေရှုသည် ယေဟောဝါ​၏​နာမတော်​ကို ကြောက်ရွံ့​သော​သူတို့ အကျိုးအတွက် အတောင်​တော်​၏ ကုသ​ခြင်း​အစွမ်း​နှင့်​တကွ “ဖြောင့်မတ်ခြင်း နေ​မင်း” အနေ​နှင့် ထွန်း​ပ​တော်​မူ​၏။ (မာလခိ ၄:၂၊ က​ဘ) ဤ​ကောင်းကင်တမန်​၏ မျက်နှာတော်​သာမက ခြေတော်​ပါ “မီးတိုင်​သဖွယ်” ဘုန်းတောက်​၏။ မားမားမတ်မတ် ကိုယ်တော်​ရပ်တည်ခြင်း​မှာ ယေဟောဝါ​၏ “မိုး​မြေ . . . အခွင့်အာဏာ ခပ်သိမ်း” အပ်နှင်း​တော်​မူ​ခြင်း​ခံရ​သူ၏ ရပ်တည်ခြင်း​ပင်​တည်း။​—မဿဲ ၂၈:၁၈၊ သ​မ; ဗျာဒိတ် ၁:၁၄၊ ၁၅။

၅။ ယောဟန်​သည် ခွန်အား​ကြီးသော ကောင်းကင်တမန်​လက်ထဲ​တွင် အဘယ်အရာကို တွေ့​သနည်း။

 ^၅ ယောဟန် ဤသို့​ဆက်၍​ဆို​၏– “သူ၏​လက်ထဲ​၌ ဖွင့်​ထားသော စာလိပ်​ငယ်​တစ်လိပ်​ကို ကိုင်ထား​၏။ လက်ယာ​ခြေ​ကို ပင်လယ်​ပေါ်​၌​လည်းကောင်း၊ လက်ဝဲ​ခြေ​ကို မြေကြီးပေါ်​၌​လည်းကောင်း ချထား​၏။” (ဗျာဒိတ် ၁၀:၂) နောက်​စာလိပ်​တစ်လိပ်၊ ဟုတ်​စ။ ဟုတ်​ပါ​သည်။ သို့သော်၊ ဤ​တစ်ကြိမ်​တွင် တံဆိပ်​ခတ်​ထားခြင်း မရှိ။ စိတ်​တက်ကြွ​ဖွယ် ဖွင့်ဟ​ချက်​များ​ကို ယောဟန်​နှင့်အတူ ကျွန်ုပ်​တို့ တွေ့မြင်​ဖို့ မျှော်လင့်​နိုင်​သည်။ သို့ရာတွင်၊ ရှေ့​လာ​မည့်​အရာများ​၏ အပြင်အဆင်​ဆက်​တင်​ကို ကျွန်ုပ်​တို့အား အလျင်​ပြသ​၏။

၆။ (က) ယေရှု၏​ခြေတော်​သည် မြေကြီး​နှင့် ပင်လယ်​အပေါ် ချထား​သည်​မှာ အဘယ်ကြောင့် သင့်တော်​သနည်း။ (ခ) ဆာလံ ၈:၅-၉ သည် မည်သည့်​အခါ​၌ အပြည့်အဝ ပြည့်စုံ​ခဲ့​သနည်း။

^၆ ယေရှု​နှင့်​ပတ်သက်သော ဖော်ပြချက်​ကို ပြန်​ကြည့်​ကြ​စို့။ ကိုယ်တော်​၏ မီး​ခြေထောက်​တို့သည် မိမိ၏​အာဏာ အပြည့်​လွှမ်းမိုး​ပြီ​ဖြစ်သော မြေကြီး​နှင့်​ပင်လယ်​တို့ကို နင်း​လျက်​ရှိသည်။ “သူ့ကို ကောင်းကင်တမန်​တို့​အောက်​၌ အနည်းငယ်​နှိမ့်​တော်​မူ​ပြီ။ သူ၏​ခေါင်း​ကို ဘုန်း​အသရေ​နှင့် ပတ်ရစ်​တော်​မူ​ပြီ။ ဖန်ဆင်း​တော်​မူ​သော အရာများ​ကို အုပ်စိုး​စေ​၍ သိုး​နွား​အစ​ရှိသော မြေတိရစ္ဆာန်၊ မိုးကောင်းကင်​ငှက်၊ ပင်လယ်​ငါး​နှင့် ပင်လယ်​လမ်း၌ သွား​တတ်သော တိရစ္ဆာန်​မှ​စ၍ ခပ်သိမ်း​သော​အရာ​တို့ကို သူ၏​ခြေ​အောက်​၌ ချထား​တော်​မူ​ပြီ” ဟူသော ပရောဖက်ပြုချက်​ဆိုင်ရာ ဆာလံကျမ်း​တင်ပြချက်​အတိုင်း ဖြစ်သည်။ (ဆာလံ ၈:၅-၈; ဟေဗြဲ ၂:၅-၉ လည်း​ရှု။) ဘုရားသခင့် နိုင်ငံတော်​ဘုရင်​အဖြစ် ယေရှု နန်းတင်​ခံရ​သော​အ​ခိုက်၊ ဆုံးခန်း​ချိန်​အစပြု​ရာ ၁၉၁၄ ခုနှစ်​၌ ၎င်း​ဆာလံကျမ်း အကြွင်းမဲ့ ပြည့်စုံ​လာ​သည်။ သို့​ဖြစ်၍ ရူပါရုံ​၌ ယောဟန်​မြင်ရသော ဤ​အရာများ​သည် ထို​နှစ်​မှ​စ၍ သက်ဆိုင်​လာ​၏။​—ဆာလံ ၁၁၀:၁-၆; တမန်​တော် ၂:၃၄-၃၆; ဒံယေလ ၁၂:၄။

မိုးခြိမ်းသံ ခု​နစ်​သံ

၇။ ခွန်အား​ကြီးသော ကောင်းကင်တမန်​သည် မည်​ကဲ့သို့​ဟောက်​၍ ၎င်း​ဟောက်ခြင်း​သည် အဘယ်​အဓိပ္ပာယ်​ထူး ရှိ​သနည်း။

^၇ ခွန်အား​ကြီးသော ထို​ကောင်းကင်တမန်​အပေါ် စူးစိုက်​နေသော ယောဟန်​၏​အာရုံ​သည် ထို​ကောင်းကင်တမန်​ကြောင့်​ပင် ပြတ်တောက်​သွား​သည်။ “သူ [ကောင်းကင်တမန်] သည် ခြင်္သေ့​ဟောက်​သကဲ့သို့ ကျယ်​သော​အသံ​ဖြင့် ကြွေးကြော်​၏။ သူ​ကြွေးကြော်​သောအခါ မိုးခြိမ်းသံ ခု​နစ်​သံ​သည် စကားသံ​များ မြွက်ဆို​ကြ​၏။” (ဗျာဒိတ် ၁၀:၃) အားကောင်း​သော ထို​ကြွေးကြော်​သံ​ကို ယောဟန် သတိပြုမိ​ပေမည်။ ၎င်း​က ယေရှုသည် တကယ်​ပင် “ယုဒ​အနွယ်​ဝင် ခြင်္သေ့” ဖြစ်​ကြောင်း ခိုင်လုံ​စေ​သည်။ (ဗျာဒိတ် ၅:၅) ယေဟောဝါ​လည်း ရံဖန်ရံခါ “ဟောက်” တော်​မူ​ကြောင်း ယောဟန် သတိပြုမိ​ပေမည်။ ယေဟောဝါ ပရောဖက်ပြု​၍ ဟောက်​တော်​မူ​ခြင်း​က ဝိညာဏ​ဣသရေလ​ကို ပြန်လည်​စုသိမ်းခြင်း​နှင့် လာ​လတ္တံ့​သော “ထာဝရ​ဘုရား​၏ [ဖျက်ဆီးခြင်း] နေ့ရက်” ကို​ကြေညာ​၏။ (ဟောရှေ ၁၁:၁၀; ယောလ ၃:၁၄၊ ၁၆; အာမုတ် ၁:၂; ၃:၇၊ ၈) သို့​ဖြစ်၍ ခွန်အား​ကြီးသော ဤ​ကောင်းကင်တမန်​၏ ခြင်္သေ့​ကဲ့သို့​သော ကြွေးကြော်​ခြင်း​က ပင်လယ်​နှင့် မြေကြီး​အဖို့ အလားတူ ဧရာမ​အခြင်းအရာ​များ ဖြစ်ပျက်​မည်​ကို နိမိတ်​ပြ​၏။ ၎င်း​က မိုးခြိမ်းသံ​ခု​နစ်​သံ မြွက်ဆို​ရန် မေတ္တာ​ရပ်ခံ​လိုက်​သည်။

၈။ ‘မိုးခြိမ်းသံ​ခု​နစ်​သံ​၏ စကားသံ​များ’ ကား အဘယ်နည်း။

^၈ ယေဟောဝါ​၏ ပလ္လင်တော်​မှ မိုးခြိမ်းသံ​များ ထွက်ပေါ်​လာ သည်ကို ယောဟန် စောစော​က ကြား​ခဲ့​ရလေ​ပြီ။ (ဗျာဒိတ် ၄:၅) ဒါဝိဒ်​လက်ထက်​၌ ပကတိ​မိုးခြိမ်းသံ​ကို “ထာဝရ​ဘုရား​၏ အသံတော်” အဖြစ် ရံဖန်ရံခါ သမုတ်​ကြ​၏။ (ဆာလံ ၂၉:၃) ယေရှု မြေကြီးပေါ် အမှုတော်​ဆောင်​စဉ်​ကာလ​၌ ယေဟောဝါ​က မိမိ​နာမတော်​ကို ဘုန်းပွင့်​စေရန် ရည်ရွယ်​ကြောင်း လူများ​ကြား​လောက်​အောင် ကြေညာ​တော်​မူ​သောအခါ လူအများ​က မိုးခြိမ်း​သည်​ထင်​၏။ (ယောဟန် ၁၂:၂၈၊ ၂၉) ထို့​ကြောင့် ‘မိုးခြိမ်းသံ ခု​နစ်​သံ​၏ စကားသံ​များ’ မှာ ယေဟောဝါ​၏​ရည်ရွယ်ချက်များ​ကို ကိုယ်တော်တိုင် မိန့်မြွက်​သော​အသံ​ဖြစ်သည်ဟု​ဆိုလျှင် ဆီလျော်​ပေ​သည်။ မိုးခြိမ်းသံ “ခု​နစ်” သံ​မြည်​ခြင်း​က ယောဟန် အကုန်အစင် ကြား​ရ​ကြောင်းကို​ပြ​သည်။

၉။ ကောင်းကင်​က​အသံ​က အဘယ်​အမိန့်ပေး​သနည်း။

^၉ သို့သော် နားထောင်ပါ။ နောက်​အသံတစ်သံ ထွက်ပေါ်​လာ​၏။ အမိန့်​တစ်ရပ်​ဖြစ်​ပြီး ယောဟန်​အဖို့ အထူးအဆန်း ဖြစ်ချင်​ဖြစ်​မည်။ “မိုးခြိမ်းသံ ခု​နစ်​သံ မြွက်ဆို​သည့်​အခါ ငါ​ရေးမှတ်​မည်​ပြု​သော် ကောင်းကင်​မှ အသံတစ်သံ​က ‘မိုးခြိမ်းသံ​ခု​နစ်​သံ မြွက်ဆို​သည့်​အရာများ​ကို တံဆိပ်​ခတ်​လော့၊ မ​ရေးမှတ်​ပါ​နှင့်’ ဟု​ဆို​သည်ကို ငါ​ကြား​ရ၏။” (ဗျာဒိတ် ၁၀:၄) ယနေ့ ယောဟန်​အတန်းအစား​သည် ယေဟောဝါ​၏ ရည်ရွယ်ချက်များ​ကို ဖြန့်ချိ​နိုင်​ရန် ၎င်းတို့ကို ယေဟောဝါ ဖော်ပြ​ဖို့ စိတ်​ထက်သန်​စွာ စောင့်ဆိုင်း​ခဲ့​ကြ​သကဲ့သို့ ယောဟန်လည်း ထို​မိုးခြိမ်းသံ သတင်း​စကား​များ​ကို ကြားနာ​ရေးမှတ်​လို​သော​စိတ် ပြင်းပြ​ခဲ့​ပေမည်။ ထို​ဗျာဒိတ်တော်​များသည် ယေဟောဝါ ချိန်းချက်သော​အချိန်၌​သာ ရောက်လာ​၏။​—လုကာ ၁၂:၄၂; ဒံယေလ ၁၂:၈၊ ၉ လည်း​ရှု။

မြင့်မြတ်​သော လျှို့ဝှက်ချက် ပြီးစီး​ခြင်း

၁၀။ ခွန်အား​ကြီးသော ကောင်းကင်တမန်​က မည်​သူ့ကို​တိုင်တည်​၍ ကျိန်ဆို​သနည်း၊ အဘယ်​ကြေညာ​ချက်​အတွက်​နည်း။

^၁၀ ထို​အတောအတွင်း ယောဟန်​အတွက် ယေဟောဝါ​တွင် လုပ်ငန်း​တာဝန် နောက်​တစ်ရပ်​ရှိ၏။ မိုးခြိမ်းသံ​ခု​နစ်​သံ မြည်​သည့်​နောက် ခွန်အား​ကြီးသော ကောင်းကင်တမန် စကားပြော​ပြန်​သည်။ “ပင်လယ်​နှင့် မြေကြီးပေါ်​တွင် ရပ်နေ​သည်ကို ငါ​မြင်ရသော ကောင်းကင်တမန်​သည် လက်ယာလက်​ကို ကောင်းကင်​သို့ ချီ​မြှောက်​ကာ ကောင်းကင်​နှင့် ကောင်းကင်ပေါ်​ရှိ အရာများ၊ မြေကြီး​နှင့် မြေကြီးပေါ်​ရှိ အရာများ၊ ပင်လယ်​နှင့် ပင်လယ်​ထဲ​ရှိ အရာများ​ကို ဖန်ဆင်း​တော်​မူ​၍ နိစ္စ​ထာဝရ အသက်ရှင်​တော်​မူ​သော အရှင်ကို တိုင်တည်​၍ ‘နောက်ထပ် နှောင့်နှေး​မှု ရှိတော့မည်​မဟုတ်’ . . . ဟု​ကျိန်ဆို​လေ​၏။” (ဗျာဒိတ် ၁၀:၅၊ ၆) ခွန်အား​ကြီးသော ကောင်းကင်တမန်​သည် မည်​သူ့ကို​တိုင်တည်​၍ ကျိန်ဆို​သနည်း။ ဘုန်းပွင့်​ယေရှုသည် မိမိကိုယ်ကို​တိုင်တည်​၍ မ​ကျိန်ဆို​ပါ။ အကြီး​မြင့်​ဆုံး အာဏာပိုင်၊ သေခြင်းနှင့်​ကင်း​သော ကောင်းကင်​မြေကြီး ဖန်ဆင်း​ရှင်၊ ယေဟောဝါ​ကို တိုင်တည်​၏။ (ဟေရှာယ ၄၅:၁၂၊ ၁၈) ကောင်းကင်တမန်​က ဘုရားသခင့်​ဘက်၌ နောက်ထပ် နှောင့်နှေး​ကြန့်ကြာ​မှု ရှိတော့မည်​မဟုတ်​ကြောင်း ဤ​ကျိန်ဆို​ချက်​ဖြင့် ယောဟန်​အား စိတ်ချ​စေ​၏။

၁၁၊ ၁၂။ (က) “နောက်ထပ် နှောင့်နှေး​မှု ရှိတော့မည်​မဟုတ်” ဟူ​သည့်​စကား​သည် ဘာကို​ဆိုလို​သနည်း။ (ခ) အဘယ်အရာ ပြီးစီး​ခြင်း​သို့ ရောက်​သနည်း။

^၁၁ ဤ​နေရာ၌ “နှောင့်နှေး​မှု” ဟု​ပြန်ဆို​သော ဂရိ​စကားလုံး​မှာ khroʹ​nos (ခ​ရော​နော့စ်) ဖြစ်၍ စာသား​အရ၊ “အချိန်” ကို​ဆိုလို​သည်။ ထို့​ကြောင့် အချို့​သူများ​က ကောင်းကင်တမန်​၏ ကြေညာ​ချက်​ကို “အချိန်​မရှိတော့” ဟု​ပြန်ဆို​သင့်​သည်​ဆို​၏။ ကျွန်ုပ်​တို့​သိ​သော အချိန်​ဟူ​သည့်​အရာ​သည် ကုန်ဆုံး​တော့​မည့်​အလား​ဖြစ်၏။ သို့ရာတွင် ခ​ရော​နော့စ် ဟူ​သည့်​စကားလုံး​ကို ဤ​နေရာ၌ တိကျ​အညွှန်း စကားလုံး​မပါဘဲ သုံး​ထား​သည်။ ထို့​ကြောင့် ယေဘုယျ​အချိန်ကို ပြောနေခြင်း​မဟုတ်ဘဲ “အချိန်​တစ်ပိုင်း၊” “ကာလ​တစ်ပိုင်း” ကို​ဆိုလို​သည်။ တစ်နည်း​အားဖြင့် နောက်ထပ်​အချိန်​တစ်ပိုင်း မရှိတော့၊ ယေဟောဝါ မ​နှောင့်နှေး​တော့​ချေ။ ဟေဗြဲ ၁၀:၃၇ ၌​လည်း ခ​ရော​နော့စ် မှ​ဆင်းသက်​သော ဂရိ​ကြိယာ​တစ်ခု​ကို သုံး​ထား​သည်။ ထို​ကျမ်းချက်​၌ ပေါလု​က ဟဗက္ကုတ် ၂:၃၊ ၄ ကိုကိုး​ကား​လျက် “နောက်​မကျ​ဘဲ . . . ရောက်​လိမ့်​မည်” ဟု​ရေးသား​၏။

^၁၂ “နောက်ထပ် နှောင့်နှေး​မှု ရှိတော့မည်​မဟုတ်”​—ဤ​စကား​သည် အိုမင်း​လာသော ယနေ့ ယောဟန်​အတန်းအစား​အဖို့ နာ​ပျော်​ဖွယ်​ပါ​တကား။ အဘယ်​နည်းဖြင့် နှောင့်နှေး​မှု​ရှိတော့မည်​မဟုတ်​သနည်း။ ယောဟန် ဤသို့​အသိပေး​ပါ​သည်– “သတ္တမ​ကောင်းကင် တမန် တံပိုးခရာ​မှုတ်​၍ အသံပြု​မည့် နေ့ရက်​များ​၌ မိမိ​ကျွန် ပရောဖက်​တို့အား ကြေညာ​တော်​မူ​သော သတင်းကောင်း​နှင့်​အညီ ဘုရားသခင့်​မြင့်မြတ်​သော လျှို့ဝှက်ချက်​သည် ပြီးစီး​ခြင်း​သို့ အမှန်​ရောက်မည်။” (ဗျာဒိတ် ၁၀:၇) မိမိ၏​မြင့်မြတ်​သော လျှို့ဝှက်ချက်​ကို ဘုန်းတောက်​သော အောင်​ပန်း​နှင့်အတူ ပျော်ရွှင်ဖွယ် အထွတ်အထိပ်​သို့ ပို့ဆောင်​ရန် ယေဟောဝါ သတ်မှတ်​သော​အချိန် ရောက်​လေ​ပြီ။

၁၃။ ဘုရားသခင်​၏ မြင့်မြတ်​သော လျှို့ဝှက်ချက်​ကား အဘယ်နည်း။

^၁၃ မြင့်မြတ်​သော ဤ​လျှို့ဝှက်ချက်​ကား အဘယ်နည်း။ ၎င်း​တွင် ဧဒင်​၌ ဦးဆုံး ကတိပြု​တော်​မူ​သော မိန်းမ​၏​အမျိုးအနွယ် အကျုံးဝင်​၏။ အဓိက အမျိုးအနွယ်​မှာ ယေရှု​ခရစ်​ဖြစ်၏။ (ကမ္ဘာဦး ၃:၁၅; ၁ တိမောသေ ၃:၁၆) အမျိုးအနွယ် ဆင်းသက်လာ​ရာ​မိန်းမ မည်သူ​ဖြစ်သည် ဟူသော​အချက်​နှင့်​လည်း ဆိုင်​သည်။ (ဟေရှာယ ၅၄:၁; ဂလာတိ ၄:၂၆-၂၈) ထို​မှ​တစ်ဆင့်၊ ဆ​င့်​ပွား​အမျိုးအနွယ် အတန်းအစား​ဝင်​များ​အပြင် အမျိုးအနွယ်​တော် အုပ်စိုး​သော​နိုင်ငံတော်​လည်း အကျုံးဝင်​၏။ (လုကာ ၈:၁၀; ဧဖက် ၃:၃-၉; ကောလောသဲ ၁:၂၆၊ ၂၇; ၂:၂; ဗျာဒိတ် ၁:၅၊ ၆) တစ်မူထူး​သော ဤ​ကောင်းကင်​နိုင်ငံတော်​ဆိုင်ရာ သတင်းကောင်းကို ဆုံးခန်း​ချိန်​အတွင်း တစ်ကမ္ဘာ​လုံး ဟောပြော​ရမည်​ဖြစ်၏။​—မဿဲ ၂၄:၁၄။

၁၄။ တတိယ​အမင်္ဂလာ​သည် အဘယ်ကြောင့် ဘုရားသခင့်​နိုင်ငံတော်​နှင့် ဆက်စပ်​သနည်း။

^၁၄ ၎င်း​သည် အကောင်းဆုံး​သတင်း အမှန်​ဖြစ်၏။ သို့​တ​စေ၊ ဗျာဒိတ် ၁၁:၁၄၊ ၁၅ ၌ တတိယ အမင်္ဂလာ​ကို နိုင်ငံတော်​နှင့် ဆက်စပ်​ထား​သည်။ အဘယ်ကြောင့်​နည်း။ ဘုရားသခင်​၏ မြင့်မြတ်​သော လျှို့ဝှက်ချက် ပြီးစီး​ပြီ​—ဘုရားသခင့် မေရှိယနိုင်ငံတော် တည်ထောင်​ပြီ​ဟူသော သတင်းကောင်းကို တံပိုးခရာ​မှုတ်​၍ ကြေညာ​ခြင်း​သည် စာတန့်​စနစ်​ကို သာ၍​နှစ်သက်သော လူသားများ​အဖို့ အမင်္ဂလာ​သတင်း ဖြစ်၍​တည်း။ (၂ ကောရိန္သု ၂:၁၆ နှိုင်းယှဉ်။) သူတို့​မြတ်နိုး​လှ​သော လောက​အစီအစဉ် ဖျက်ဆီး​ခံရ​လု​ပြီ​ဟူသော အဓိပ္ပာယ်​ရှိ၏။ ယေဟောဝါ​၏ လက်စားချေ​ရာ​နေ့​တော် နီးလာသည်နှင့်​အမျှ နိမိတ်​မကောင်း​သည့် ထို​မုန်တိုင်း​သတိပေး​ချက်​များ ပါဝင်သော မိုးခြိမ်းသံ​ခု​နစ်​သံ​၏ စကားသံ​များသည် ရှင်း​သည်ထက်​ရှင်း၊ ကျယ်​သည်ထက်​ကျယ်​လာ​သည်။​—ဇေဖနိ ၁:၁၄-၁၈။

ဖွင့်​ထားသော​စာလိပ်

၁၅။ ကောင်းကင်​က​အသံ​နှင့် ခွန်အား​ကြီးသော ကောင်းကင်တမန်​တို့​က ယောဟန်​အား အဘယ်အရာ​မိန့်ကြား​သနည်း၊ ယောဟန်​အား ဘာဖြစ်စေ​သနည်း။

^၁၅ သတ္တမ တံပိုးခရာ​မှုတ်ခြင်း​နှင့် ဘုရားသခင်​၏ မြင့်မြတ်​သော​လျှို့ဝှက်ချက် ပြီးစီး​ခြင်း​ကို ယောဟန် စောင့်ဆိုင်း​နေစဉ် နောက်ထပ်​တာဝန် ပေးအပ်​ခံရ​သည်။ “ကောင်းကင်​မှ ငါ​ကြား​ခဲ့​ရသော အသံသည် ငါ​နှင့်​တစ်ဖန် စကားပြော​ကာ ‘ပင်လယ်​နှင့် မြေကြီးပေါ်​တွင် ရပ်​လျက်​နေသော ကောင်းကင်တမန်​လက်၌ ဖွင့်​ထားသော စာလိပ်​ကို သွား​၍​ယူ​လော့’ ဟု​ဆို​၏။ ငါသည်​လည်း ထို​ကောင်းကင်တမန်​ထံ​သို့ သွား​၍ စာလိပ်​ငယ်​ကို​ပေး​ရန် တောင်း​၏။ သူက ‘စာလိပ်​ကို ယူ၍​စား​လော့။ သင်၏​ဝမ်း​ကို ခါး​စေ​လိမ့်​မည်။ သို့သော် သင်၏​ခံတွင်း​၌ ပျားရည်​ကဲ့သို့ ချို​လိမ့်​မည်’ ဟု ငါ့​အား​ဆို​၏။ ငါသည် စာလိပ်​ငယ်​ကို ကောင်းကင်တမန် လက်ထဲ​မှ​ယူ၍ စား​လိုက်​ရာ ခံတွင်း​၌ ပျားရည်​ကဲ့သို့ ချို​သော်လည်း ဝမ်း​၌ ခါး​လေ​၏။ သူတို့က ‘သင်သည် ဘာသာ​စကား အမျိုးမျိုး​ပြော​သော လူမျိုးများ၊ တိုင်းနိုင်ငံ​များနှင့် ဘုရင်​များစွာ​တို့​နှင့် ပတ်သက်​၍ တစ်ဖန် ပရောဖက်ပြု​ရမည်’ ဟု​ငါ့​အား​ဆို​၏။”​—ဗျာဒိတ် ၁၀:၈-၁၁။

၁၆။ (က) ပရောဖက်​ယေဇကျေလ​လည်း ယောဟန်​နည်းတူ တွေ့ကြုံမှု​မျိုး မည်သို့​ကြုံကြိုက်​ခဲ့​သနည်း။ (ခ) စာလိပ်​ငယ်​သည် ယောဟန်​အဖို့ ချို​သော်လည်း အဘယ်ကြောင့် အစာ​ခြေရာ​၌ ခါး​သနည်း။

^၁၆ ယောဟန်​၏ အတွေ့အကြုံ​သည် ယေဇကျေလ ဗာဗုလုန်​နိုင်ငံ​၌ သုံ့ပန်း​ဖြစ်​စဉ်​က ကြုံ​ခဲ့​ရသော​အဖြစ်​နှင့် ဆင်တူ​သည်။ သူလည်း စာလိပ်​တစ်လိပ်​ကို​စား​ရန် အမိန့်ပေး​ခံရ​၏။ ၎င်း​စာလိပ်​သည် သူ့​ခံတွင်း​၌​ချို​သော်လည်း သူ့​ဝမ်း​၌​ပြည့်​သွားသော​အခါ ပုန်ကန်​သော ဣသရေလ​အမျိုးသားများ​အဖို့ ခါး​သော​အရာများ​ကို ကြိုဟော​ရန် သူ​တာဝန်​ရှိလာ​သည်။ (ယေဇကျေလ ၂:၈–၃:၁၅) ယောဟန်​အား ဘုန်းပွင့်​ယေရှု​ခရစ် ပေး​တော်​မူ​သော ဖွင့်​ထား​သည့်​စာလိပ်​လည်း ဘုရားသခင့် သတင်း​တော်​ဖြစ်၏။ ယောဟန်​အနေ​နှင့် “ဘာသာ​စကား အမျိုးမျိုး​ပြော​သော လူမျိုးများ၊ တိုင်းနိုင်ငံ​များနှင့် ဘုရင်​များစွာ​တို့​နှင့် ပတ်သက်​၍” ဟောပြော​ရ၏။ ထို​စာလိပ်​သည် ဘုရားသခင့် ထံ​တော်​မှ​လာသော​ကြောင့် ၎င်းကို​စား​ရာ​၌ ချို​၏။ (ဆာလံ ၁၁၉:၁၀၃; ယေရမိ ၁၅:၁၅၊ ၁၆ နှိုင်းယှဉ်။) သို့သော် အစာကြေ​ခက်​သည်ကို သူ​တွေ့ရ​၏။ အကြောင်း​မှာ ယေဇကျေလ အဖြစ်​မှာ​ကဲ့သို့ ပုန်ကန်​သော​လူသားများ​အဖို့ မနှစ်မြို့ဖွယ်​ရာ​များ​ကို ကြိုဟော​သောကြောင့်​တည်း။​—ဆာလံ ၁၄၅:၂၀။

၁၇။ (က) “တစ်ဖန်” ပရောဖက်ပြု​ပါ​ဟု ယောဟန်​အား မိန့်မှာ​သူတို့​ကား မည်သူ​များ​ဖြစ်၍ ဘာ​အဓိပ္ပာယ်​ရှိ​သနည်း။ (ခ) ယောဟန်​မြင်ရသော ဇာတ်​ဆန်​သည့် သရုပ်ဖော်​ချက်​သည် အဘယ်​အချိန်၌ ပြည့်စုံ​ရန်ဖြစ်​သနည်း။

^၁၇ တစ်ဖန်​ပရောဖက်ပြု​ရန် ယောဟန်​အား မိန့်ဆို​သူများ​သည် ယေဟောဝါ​ဘုရားသခင်​နှင့် ယေရှု​ခရစ်​ဖြစ်သည်​မှာ သေချာ​၏။ ယောဟန်​သည် ပတ်မုကျွန်း​၌ ပြည်နှင်ဒဏ်​ခံ​နေရ​သော်လည်း ထို​အချိန်အထိ ရေးမှတ်​ခဲ့​သော ဗျာဒိတ်ကျမ်း​စောင်​ပါ သတင်း​စကား​များ​ကို​သုံး​လျက် ဘာသာ​စကား အမျိုးမျိုး​ပြော​သော လူမျိုးများ၊ တိုင်းနိုင်ငံ​များနှင့် ဘုရင်​များစွာ​တို့​နှင့် ပတ်သက်​၍ ပရောဖက်ပြု​နှင့်​ပြီ။ “တစ်ဖန်” ဟူသော​စကား​က ယောဟန်​အနေ​နှင့် ဗျာဒိတ်ကျမ်း​စောင်​၌ ရေးမှတ်​သော ကျန်​သတင်း​စကား​များ​ကို ရေးသား​ဖြန့်ချိ​ရမည်ကို ဆိုလို​သည်။ သို့သော် ပရောဖက်ပြုချက်​ဆိုင်ရာ ရူပါရုံ​၌  ယောဟန် တကယ်​ပါဝင်​လျက်​ရှိသည်​ကို သတိရပါ။ အမှန်ဆိုလျှင် သူ​ရေးမှတ်​သော​အရာများ​မှာ ၁၉၁၄ ခုနှစ်​နောက်ပိုင်း၊ ခွန်အား​ကြီးသော ကောင်းကင်တမန် မြေကြီး​နှင့် ပင်လယ်​ကို​ခွလျက် ရပ်​သော​ကာလ​တွင် ပြည့်စုံ​ရမည့် ပရောဖက်ပြုချက်​ဖြစ်၏။ သို့​ဖြစ်​လျှင် ဇာတ်​ဆန်​သော ဤ​သရုပ်ဖော်​ချက်​သည် ယနေ့ ယောဟန်​အတန်းအစား​အဖို့ ဘာ​အဓိပ္ပာယ်​ရှိ​သနည်း။

ယနေ့ စာလိပ်​ငယ်

၁၈။ သခင့်​နေ့​တော်​အစ​တွင် ယောဟန်​အတန်းအစား ဗျာဒိတ်ကျမ်း​စောင်​ပေါ် အဘယ်​စိတ်ဝင်စားမှု ပြ​ခဲ့​သနည်း။

^၁၈ ယောဟန် မြင်ရသော​အရာ​က သခင့်​နေ့​တော် အစပိုင်း​၌ ယောဟန်​အတန်းအစား တွေ့ကြုံ​ရသော​အဖြစ်ကို ထူးခြား​စွာ တင်ကူး​အရိပ်​ပြ​၏။ မိုးခြိမ်းသံ​ခု​နစ်​သံ​၏ ဆိုလိုချက်​အပါအဝင်၊ ယေဟောဝါ​၏ ရည်ရွယ်ချက်များ​ဆိုင်ရာ သူတို့၏​နားလည်​ချက်​သည် ထို​အချိန်၌ မစုံလင်​ချေ။ သို့​တ​စေ၊ ဗျာဒိတ်ကျမ်း​ကို သူတို့​အလေးအနက် စိတ်ဝင်စား​ခဲ့​ကြ​ပြီး ချားလ်စ် တေ့ဇ် ရပ်စဲ​ယ်လ်​သည် မိမိ​အသက်ရှင်စဉ် ဗျာဒိတ်ကျမ်း​အပိုင်း​များစွာကို အနက်ဖွင့်ဆို​ခဲ့​သည်။ ၁၉၁၆ ခုနှစ် သူ​သေလွန်​သည့်​နောက် သူ၏​ရေးသားချက် အများအပြားကို​စုစည်း​ကာ ပြီးဆုံးလေသော​နက်နဲရာ ဟူသော​အမည်​ဖြင့် စာအုပ်​ထုတ်ဝေ​ခဲ့​သည်။ သို့ရာတွင် ယင်း​စာအုပ်​သည် ဗျာဒိတ်ကျမ်း​ကို ရှင်းပြ​ရာ​၌ ကျေနပ်ဖွယ်​မဟုတ်​ကြောင်း တွေ့ရ​လေ​သည်။ ခရစ်တော်​၏​ညီတော် အကြွင်းအကျန်​တို့သည် ၎င်း​မှုတ်သွင်းခံ ရေးမှတ်​ချက်​ကို တိကျ​မှန်ကန်​စွာ နားလည်​နိုင်​ဖို့ ၎င်း​ရူပါရုံ​များ စတင်​ပြည့်စုံ​သည့်​အချိန်တိုင် ထပ်မံ စောင့်ဆိုင်း​ခဲ့​ရ​ကြသည်။

၁၉။ (က) ယောဟန်​အတန်းအစား​သည် မိုးခြိမ်းသံ​ခု​နစ်​သံ​၏ စကားသံ​များ​ကို အကုန်အစင် မ​ဖြန့်ချိ​မီ​အချိန်​မှာ​ပင် ယေဟောဝါ​၏ အသုံးတော်​ကို မည်သို့​ခံ​ခဲ့​ရသနည်း။ (ခ) ယောဟန်​အတန်းအစား မည်သည့်​အခါ ဖွင့်​ထားသော​စာလိပ်​ငယ်​ကို​ရ​၍ ၎င်း​က သူတို့​အဖို့ ဘာ​အဓိပ္ပာယ်​ရှိ​သနည်း။

^၁၉ သို့​တ​စေ၊ သူတို့သည် မိုးခြိမ်းသံ​ခု​နစ်​သံ​၏ စကားသံ​ကို အကုန်အစင် မ​ဖြန့်ချိ​မီ​ကတည်းက ယောဟန်​နည်းတူ၊ ယေဟောဝါ​၏ အသုံးတော်​ကို​ခံရ​ကြ​လေ​ပြီ။ ၁၉၁၄ ခုနှစ်​မတိုင်မီ အနှစ် ၄၀ တိုင်တိုင် လုံ့လ​ဝီရိယ​ရှိ​စွာ ဟောပြောပြီး ပထမ ကမ္ဘာ​စစ်​အတွင်း​၌​လည်း တက်ကြွ​စွာ​ရှိဖို့ လုံးပန်း​ခဲ့​ကြသည်။ သခင်​ကြွလာ​စဉ် အိမ်သား​များ​အား အချိန်တန်​အစာ ကျွေးမွေး​နေ​သူများ​ကဲ့သို့ ဖြစ်​ခဲ့​ကြ​၏။ (မဿဲ ၂၄:၄၅-၄၇) သို့​ဖြစ်၍ ၁၉၁၉ ခုနှစ်​၌ ဖွင့်​ထား​သည့် စာလိပ်​ငယ်​တည်း​ဟူသော လူသားတို့အား ဟောပြော​ရမည့် ပွင့်လင်း​သော​သတင်း​စကား အပ်နှင်း​တော်​မူ​ခြင်း ခံရ​ကြသည်။ ဘုရားသခင်​ကို ဝတ်ပြုပါ​သည်​ဆို​သော်လည်း တကယ်​ဝတ်မပြု​သည့် သစ္စာမဲ့​အဖွဲ့အစည်း​တည်း​ဟူသော ခရစ်ယာန်ဘောင်​အတွက် သတင်း​တစ်ရပ် သူတို့၌​ရှိသဖြင့် သူတို့သည် ယေဇကျေလ​နည်းတူ​ဖြစ်၏။ သူတို့သည် ယောဟန်​နည်းတူ၊ “ဘာသာ​စကား အမျိုးမျိုး​ပြော​သော လူမျိုးများ၊ တိုင်းနိုင်ငံ​များနှင့် ဘုရင်​များစွာ​တို့​နှင့် ပတ်သက်​၍” နောက်ထပ်​ဟောပြောရန် လို​သေး​၏။

၂၀။ ယောဟန် စာလိပ်​စားခြင်း​က ဘာကို​ပုံဆောင်​သနည်း။

 ^၂၀ ယောဟန် စာလိပ်​စားခြင်း​က ယေရှု၏​ညီတော်​များ ထို​အလုပ်​တာဝန် လက်ခံခြင်း​ကို ပုံဆောင်​၏။ ၎င်း​သည် သူတို့၏ တစ်စိတ်​တစ်ပိုင်း ဖြစ်လာ​၏။ သူတို့သည် ဘုရားသခင့် မှုတ်သွင်းခံ​နှုတ်ကပါဌ်တော်​၏ ထို​အပိုင်း​မှ အာဟာရကို မှီဝဲ​လျက် ၎င်းနှင့်​တစ်ထပ်တည်း ဖြစ်လာ​သည်​အထိ​ပင်။ သို့ရာတွင် သူတို့​ဟော​ရမည့်​သတင်း​၌ လူအများ​အတွက် နား​ခါး​စ​ရာ​ဖြစ်သော ယေဟောဝါ​၏ စီရင်ချက်​များ ပါဝင်​၏။ မှန်​ပေ​သည်။ ဗျာဒိတ်​အခန်းကြီး ၈ မှ ကပ်ဘေး​များ​ပါဝင်​၏။ သို့သော် စိတ်ရင်းမှန်​သော ထို​ခရစ်ယာန်​များသည် ယင်း​စီရင်ချက်​များ​အကြောင်းကို နားလည်​၍ ၎င်းတို့ကို​ကြွေးကြော်​ရန် မိမိတို့​အား ယေဟောဝါ တစ်ဖန် သုံး​တော်​မူ​ကြောင်း သိရှိ​ရသည်မှာ မိမိတို့​အဖို့ ချို​လှ​ပေ​သည်။​—ဆာလံ ၁၉:၉၊ ၁၀။

၂၁။ (က) စာလိပ်​ငယ်​ပါ​သတင်း​သည် လူအုပ်ကြီး​အတွက်​လည်း မည်သို့​ချို​လာ​သနည်း။ (ခ) ဆန့်ကျင်သူ​တို့​အဖို့ သတင်းကောင်းသည် အဘယ်ကြောင့် သတင်းဆိုး ဖြစ်​ရသနည်း။

^၂၁ နောက်ပိုင်း၌ ယင်း​စာလိပ်​ပါ သတင်း​သည် ‘လူမျိုးများ၊ မျိုးနွယ်စုများ၊ လူ​ပုဂ္ဂိုလ်​များနှင့် ဘာသာ​စကား​များ​အားလုံး​ထဲ​မှ လူအုပ်ကြီး’ အတွက်​ပါ ချို​လာ​သည်။ လူအုပ်ကြီးသည် ခရစ်ယာန်ဘောင်​၌ ပြုလျက်​နေသော ရွံရှာဖွယ်ရာ​များ​ကို​မြင်​၍ သက်ပြင်းချ​ခဲ့​ကြသည်။ (ဗျာဒိတ် ၇:၉; ယေဇကျေလ ၉:၄) သူတို့လည်း သိုး​ကဲ့သို့​သော ခရစ်ယာန်​များ​အဖို့ ယေဟောဝါ အံ့မခန်း​စွာ ပြင်ဆင်​သော​အရာများ​အကြောင်းကို ချိုသာ​နာ​ပျော်​ဖွယ် စကားလုံး​များ​ဖြင့် ဖော်ပြ​ပြီး သတင်းကောင်းကို အားကြိုးမာန်တက် ကြွေးကြော်​ကြ​၏။ (ဆာလံ ၃၇:၁၁၊ ၂၉; ကောလောသဲ ၄:၆) သို့သော် ဆန့်ကျင်သူ​တို့​အဖို့ သတင်းဆိုး​ဖြစ်သည်။ အဘယ်ကြောင့်​နည်း။ သူတို့အား တဒင်္ဂ​ကျေနပ်မှု​ကို ပေး​နိုင်သော၊ သူတို့ အားထား​ရာ​စနစ် ပျက်​သု​ဉ်း​ရမည်​ဟူသော အဓိပ္ပာယ်​ပါ​ရှိ၍ ဖြစ်သည်။ သတင်းကောင်းသည် သူတို့​အဖို့ ပျက်စီးခြင်း နိမိတ်​တည်း။​—ဖိလိပ္ပိ ၁:၂၇၊ ၂၈; တရားဟောရာ ၂၈:၁၅; ၂ ကောရိန္သု ၂:၁၅၊ ၁၆ နှိုင်းယှဉ်။

[လေ့လာ​ရန်​မေးခွန်းများ]

[စာမျက်နှာ ၁၆၀ ပါ ရုပ်ပုံ]

ယောဟန်​အတန်းအစား​နှင့် အပေါင်းပါ​တို့သည် လူသား​အားလုံး​ကို ချို​၍​ခါး​သော​သတင်း ကြွေးကြော်