ဗျာဒိတ်ကျမ်းနှင့် အသင်
အခန်း ၄၄
ဗျာဒိတ်ကျမ်းနှင့် အသင်
၁။ (က) ဗျာဒိတ်ကျမ်းပါ အံ့ဖွယ်ကတိတော် အားလုံးနှင့်ပတ်သက်၍ အဘယ်အာမခံချက်ကို ယောဟန်ပေးသနည်း။ (ခ) “အမြန်ကြွလာမည်” ဟုဆိုသောသူမှာ မည်သူဖြစ်၍ အဘယ်အခါ “ကြွလာ” မည်နည်း။
ယရုရှလင်မြို့သစ်ဆိုင်ရာ ပီတိဖြစ်ဖွယ် ရေးသားဖော်ပြချက်ကို အသင်ဖတ်ရသောအခါ ‘ဤမျှကောင်းမြတ်သောအရာ တကယ်ဖြစ်လာနိုင်မည်လော’ ဟုမေးမိပေမည်။ ယောဟန်သည် ကောင်းကင်တမန် ဆက်လက်ပြောကြားသောစကားဖြင့် ထိုမေးခွန်းကို ဖြေကြားလိုက်ပါသည်– “ထို့နောက် ကောင်းကင်တမန်က ငါ့အား ‘ဤစကားတို့သည် သစ္စာရှိ၍ ဟုတ်မှန်၏။ မှန်ပေသည်။ ပရောဖက်တို့အား ဝိညာဉ်တော်ဖြင့် မှုတ်သွင်း၍ မြွက်ဆိုစေသော ဘုရားသခင် ယေဟောဝါသည် များမကြာမီ ဖြစ်ပျက်ရမည့် အမှုအရာများကို မိမိ၏ကျွန်တို့အား ဖော်ပြရန် မိမိ၏ကောင်းကင်တမန်ကို စေလွှတ်တော်မူ၏။ ကြည့်လော့။ ငါသည် အမြန်ကြွလာမည်။ ဤစာလိပ်တွင်ပါရှိသည့် ပရောဖက်စကားများကို လိုက်နာသူမှန်သမျှသည် ပျော်ရွှင်၏’ ဟုဆို၏။” (ဗျာဒိတ် ၂၂:၆၊ ၇) ဗျာဒိတ်ကျမ်းပါ အံ့ဖွယ်ကတိတော်ရှိသမျှ ဧကန်ပြည့်စုံလာမည်။ ကောင်းကင်တမန်က ယေရှု၏အမည်ဖြင့် ယေရှုမကြာမီ “အမြန်ကြွလာမည်” ဟုကြေညာ၏။ ယေဟောဝါ၏ရန်သူများကို ဖျက်ဆီးကာ ဗျာဒိတ်တော်၏ ကြီးမြတ်၍ပျော်ရွှင်ဖွယ်ဖြစ်သော အထွတ်အထိပ်ကို ယူဆောင်လာရန် “သူခိုးကဲ့သို့” ယေရှုကြွလာခြင်း ဖြစ်ရပေမည်။ (ဗျာဒိတ် ၁၆:၁၅၊ ၁၆) ထို့ကြောင့် ကျွန်ုပ်တို့သည် ထိုအချိန်၌ ပျော်ရွှင်သူများအဖြစ် သတ်မှတ်တော်မူခြင်းခံရလေအောင် “ဤစာလိပ်” ဖြစ်သော ဗျာဒိတ်ကျမ်းပါ စကားများနှင့်အညီ နေထိုင်အပ်ပေ၏။
၂။ (က) ဗျာဒိတ်တော်၏ ထူးကဲကြွယ်ဝခြင်းကို ယောဟန် မည်သို့တုံ့ပြန်၍ ကောင်းကင်တမန်က သူ့အား ဘာပြောသနည်း။ (ခ) “သတိထားလော့။” “ဘုရားသခင်အား ကိုးကွယ်လော့” ဟူသော ကောင်းကင်တမန်၏စကားမှ ကျွန်ုပ်တို့ ဘာသင်ခန်းစာရသနည်း။
၂ ယောဟန်သည် ဤမျှထူးကဲကြွယ်ဝသော ဗျာဒိတ်တော်ကို ခံယူရသည့်နောက်၌ အလွန်စိတ်လှုပ်ရှားသွားသည်မှာ နားလည်ရမခက်ပါ– “ငါယောဟန်သည် ဤအမှုအရာများကို ကြားရမြင်ရသူဖြစ်၏။ ငါသည် ကြားရမြင်ရသည့်အခါ ဤအမှုအရာများကို ငါ့အားဖော်ပြသော ကောင်းကင်တမန်၏ ခြေရင်း၌ ပျပ်ဝပ်၍ ကိုးကွယ်လေ၏။ သို့သော် သူက ‘သတိထားလော့။ ဤသို့မပြုနှင့်။ ငါသည် သင်နှင့် သင့်ညီအစ်ကို ပရောဖက်များ၏ ကျွန်ချင်းဖြစ်၏။ ဤစာလိပ်၌ပါသော စကားများကို လိုက်နာသူတို့၏ ကျွန်ချင်းမျှသာ ဖြစ်၏။ ဘုရားသခင်အား ကိုးကွယ်လော့’ ဟု ငါ့အား ဆို၏။” (ဗျာဒိတ် ၂၂:၈၊ ၉; ဗျာဒိတ် ၁၉:၁၀ နှိုင်းယှဉ်။) ကောင်းကင်တမန်များကို မကိုးကွယ်ရန် ထိုသို့နှစ်ကြိမ်တိုင် သတိပေးသည်မှာ ယောဟန်လက်ထက်အဖို့ အခါသင့်၏။ အကြောင်းမှာ သူ့ခေတ်က လူအချို့သည် ထိုသို့သောကိုးကွယ်မှုကို လိုက်စားကြသည်မှာ သိသာ၏။ သို့မဟုတ် ကောင်းကင်တမန်များထံမှ ဗျာဒိတ်ထူးများ ရသည်ဟုဆိုကြ၏။ (၁ ကောရိန္သု ၁၃:၁; ဂလာတိ ၁:၈; ကောလောသဲ ၂:၁၈) ဤအချက်က ယနေ့လည်း ဘုရားသခင်အားသာ ကိုးကွယ်ရမည်ဟူသောအချက်ကို အလေးအနက်ပေါ်လွင်စေ၏။ (မဿဲ ၄:၁၀) အခြားသူတစ်ဦး သို့မဟုတ် အခြားအရာဝတ္ထုကို ကိုးကွယ်ခြင်းဖြင့် စင်ကြယ်သောဝတ်ပြုရေးကို မညစ်ညူးစေသင့်။—ဟေရှာယ ၄၂:၅၊ ၈။
၃၊ ၄။ ကောင်းကင်တမန်က ယောဟန်အား ဘာဆက်ပြောသနည်း၊ ဘိသိက်ခံအကြွင်းအကျန်သည် သူ၏စကားကို မည်သို့နာခံခဲ့ပြီနည်း။
၃ ယောဟန် ဤသို့ဆက်၍ဆို၏– “သူက ‘ချိန်းချက်သောအချိန် နီးပြီဖြစ်၍ ဤစာလိပ်၌ပါသော ပရောဖက်စကားများကို ချိပ်မပိတ်နှင့်။ မဖြောင့်မတ်မှုကို ပြုသောသူသည် မဖြောင့်မတ်မှုကို ဆက်၍ပြုပါစေ။ ညစ်ညူးသူသည် ဆက်၍ညစ်ညူးပါစေ။ ဖြောင့်မတ်သူမူကား ဖြောင့်မတ်မှုကို ဆက်၍ပြုပါစေ။ သန့်ရှင်းသူသည် ဆက်၍သန့်ရှင်းပါစေ’ ဟု ငါ့အားဆို၏။”—ဗျာဒိတ် ၂၂:၁၀၊ ၁၁။
၄ ယနေ့ဘိသိက်ခံ အကြွင်းအကျန်တို့သည် ကောင်းကင်တမန်၏စကားကို နာခံခဲ့ကြပြီ။ ပရောဖက်စကားများကို ချိပ်မပိတ်ခဲ့ပါ။ စဉ်းစားကြည့်လေ၊ ဇိအုန်ကင်းမျှော်စင်နှင့် ခရစ်တော်ရောက်ရှိခြင်းကို သံတော်ဆင့်ခြင်း ၏ပထမလထုတ် (၁၈၇၉ ခုနှစ်၊ ဇူလိုင်လ) မှာပင် ဗျာဒိတ်ကျမ်းထဲမှ ကျမ်းချက်အမြောက်အမြားကို အဓိပ္ပာယ်ဖွင့်ဆိုခဲ့၏။ ဤစာအုပ်၏ပထမအခန်း၌ ကျွန်ုပ်တို့ ဆိုခဲ့သည့်အတိုင်း ယေဟောဝါသက်သေများသည် နှစ်များတစ်လျှောက် ဗျာဒိတ်ကျမ်းကိုနားလည်စေသည့် အခြားစာအုပ်များကို ထုတ်ဝေလာခဲ့သည်။ ဗျာဒိတ်ကျမ်းမှ တန်ခိုးပါသော ပရောဖက်ပြုချက်များနှင့် ၎င်းတို့၏ပြည့်စုံချက်ကိုသတိပြုရန် သမ္မာတရားမြတ်နိုးသူများအား ယခုတစ်ဖန် ကျွန်ုပ်တို့နှိုးဆော်ပါ၏။
၅။ (က) ဗျာဒိတ်ကျမ်းပါ သတိပေးချက်များနှင့်သြဝါဒကို လူတို့ဥပေက္ခာပြုလိုလျှင် မည်သို့နည်း။ (ခ) နူးညံ့သိမ်မွေ့၍ ဖြောင့်မတ်သောသူတို့ မည်သို့တုံ့ပြန်သင့်သနည်း။
၅ လူတို့သည် ဗျာဒိတ်ကျမ်းပါ သတိပေးချက်များနှင့် ဩဝါဒကို ဥပေက္ခာပြုလိုလျှင် ပြုကြပါစေ။ “မဖြောင့်မတ်မှုကို ပြုသောသူသည် မဖြောင့်မတ်မှုကို ဆက်၍ပြုပါစေ။” ပေါက်လွှတ်ပဲစားနိုင်သော ဤခေတ်၏အညစ်အကြေးထဲ၌ လူးလွန့်နေသူတို့သည် ထိုအညစ်အကြေးထဲ၌ သေလိုလျှင် သေနိုင်ပါသည်။ များမကြာမီ ယေဟောဝါသည် မဟာဗာဗုလုန်ကို ရှေးဦးစွာဖျက်ဆီးခြင်းနှင့်အတူ မိမိ၏တရားစီရင်ချက်ကို အကြွင်းမဲ့ဖော်ဆောင်တော်မူလတ္တံ့။ သိမ်မွေ့နူးညံ့သူများအနေနှင့် “[ယေဟောဝါ၊ ကဘ] ကိုရှာကြလော့။ ဖြောင့်မတ်ခြင်းနှင့် စိတ်နှိမ့်ချခြင်းကိုလည်း ရှာကြလော့။ [ယေဟောဝါ] အမျက်ထွက်တော်မူသောနေ့၌ သင်တို့သည် ပုန်းရှောင်ရာကို တွေ့ကောင်းတွေ့ကြလိမ့်မည်” ဟူသောပရောဖက်စကားကို လုံ့လစိုက်၍ နာခံကြပါစေ။ (ဇေဖနိ ၂:၃) ယေဟောဝါထံ မိမိတို့ကိုယ်ကို အပ်နှံပြီးသောပုဂ္ဂိုလ် “ဖြောင့်မတ်သူမူကား ဖြောင့်မတ်မှုကို ဆက်၍ပြုပါစေ။ သန့်ရှင်းသူသည် ဆက်၍သန့်ရှင်းပါစေ။” အပြစ်ပြု၍ခံစားရသော အဘယ်တဒင်္ဂအကျိုးမျှ ဖြောင့်မတ်ခြင်းနှင့် သန့်ရှင်းခြင်းပါရမီကို ဖြည့်ဆည်းသူတို့ခံစားရသော ထာဝရကောင်းချီးများနှင့် မယှဉ်နိုင်ကြောင်း ပညာရှိတို့ နားလည်ကြ၏။ သမ္မာကျမ်းစာက “သင်တို့သည် ယုံကြည်ခြင်း၌ တည်သလော၊ မတည်လောဟု ကိုယ့်ကိုယ်ကိုစစ်ကြောကြလော့။ ကိုယ့်ကိုယ်ကိုစုံစမ်းကြလော့” ဟုဆို၏။ (၂ ကောရိန္သု ၁၃:၅) သင်ရွေးချယ်၍ အဆုံးတိုင်လိုက်လျှောက်သော လမ်းစဉ်ပေါ်မူတည်ပြီး အကျိုးအပြစ်ကို အသင်ခံစားရလိမ့်မည်။—ဆာလံ ၁၉:၉-၁၁; ၅၈:၁၀၊ ၁၁။
၆။ ဗျာဒိတ်ကျမ်း၏ စာရှုသူများအား ပရောဖက်ပြုချက်၌ နောက်ဆုံးတစ်ကြိမ် ယေဟောဝါ မည်သို့မိန့်ကြားတော်မူသနည်း။
၆ ယခု နိစ္စထာဝရဘုရင် ယေဟောဝါက ဗျာဒိတ်ကျမ်းဖတ်သူတို့အား ရူပါရုံ၌ နောက်ဆုံးတစ်ကြိမ် မိန့်ကြားတော်မူပြီ– “ကြည့်လော့။ ငါသည် အမြန်ကြွလာမည်။ လူအသီးသီးတို့အား မိမိတို့၏အကျင့်အလျောက် ဆပ်ပေးရန် အကျိုးအပြစ်ကို ငါယူဆောင်လာမည်။ ငါသည် အာလဖနှင့် ဩမေဃ၊ အဦးဆုံးသောသူနှင့် နောက်ဆုံးသောသူ၊ အစနှင့်အဆုံး ဖြစ်တော်မူ၏။ အသက်ပင်များဆီသို့ သွားနိုင်ခွင့်နှင့် မြို့တံခါးများဖြင့် မြို့တော်တွင်းသို့ ဝင်နိုင်ခွင့်တို့ကိုရရန် မိမိတို့ဝတ်လုံကို လျှော်ဖွပ်သောသူတို့သည် ပျော်ရွှင်ကြ၏။ မြို့ပြင်တွင် ခွေးများ၊ နတ်ဝိဇ္ဇာအတတ် လိုက်စားသူများ၊ မတရားမေထုန် ပြုသူများ၊ လူသတ်သူများ၊ ရုပ်တုကိုးကွယ်သူများနှင့် မုသားကိုနှစ်သက်၍ ကျင့်ကြံသူ မှန်သမျှတို့သည် နေကြ၏။”—ဗျာဒိတ် ၂၂:၁၂-၁၅။
၇။ (က) အဘယ်အတွက် ယေဟောဝါသည် “အမြန်ကြွလာ” တော်မူသနည်း။ (ခ) ခရစ်ယာန်ဘောင် ဘုန်းကြီးဓမ္မဆရာအုပ်စုသည် ယေရုရှလင်မြို့သစ်၌ အဘယ်ကြောင့် ဝေစုရမည်မဟုတ်သနည်း။
၇ ယေဟောဝါ ဘုရားသခင်သည် မိမိ၏ထာဝရ အချုပ်အခြာအာဏာတော်ကိုလည်းကောင်း၊ အစ၌ မိမိရည်ရွယ်သည့်အတိုင်း နောက်ဆုံးတွင် ဖော်ဆောင်တော်မူမည် ဟူသောအချက်ကိုလည်းကောင်း ထပ်မံအလေးအနက် ပြုတော်မူ၏။ ကိုယ်တော်သည် တရားစီရင်၍ဒဏ်ခတ်ရန်၊ မိမိအား စိတ်ရင်းမှန်ဖြင့် ရှာသောသူတို့အား ဆုချရန် “အမြန်ကြွလာ” တော်မူမည်။ (ဟေဗြဲ ၁၁:၆) မည်သူဆုရ၍ မည်သူငြင်းပယ်ခံရမည်ကို ကိုယ်တော်၏စံနှုန်းများက အဆုံးအဖြတ်ပေး၏။ ခရစ်ယာန်ဘောင် ဘုန်းကြီးဓမ္မဆရာအုပ်စုသည် “အ၍ မဟောင်တတ်သောခွေးများ” ကဲ့သို့ပြုမူပြီး ဤတွင် ယေဟောဝါဖော်ပြသော အကျင့်ဆိုးများ လူတို့ပြုကျင့်သည်ကို မမြင်ချင်ယောင်ဆောင်၍ နေလာခဲ့ကြ၏။ (ဟေရှာယ ၅၆:၁၀-၁၂၊ သမ; တရားဟောရာ ၂၃:၁၈၊ ကမ္ဘာသစ်ဘာသာပြန် ရည်ညွှန်းကျမ်းစာ၊ အောက်ခြေမှတ်ချက်ကိုရှု။) သူတို့သည် မုသားအယူဝါဒနှင့် တရားသေအယူဝါဒများကို “နှစ်သက်၍ကျင့်သုံး” ပြီး အသင်းတော်ခုနစ်ပါးထံ ရေးလိုက်သော ယေရှု၏သြဝါဒကို လုံးလုံးလျားလျား ဥပေက္ခာပြုခဲ့ကြပြီ။ ထို့ကြောင့် သူတို့သည် ယေရုရှလင်မြို့သစ်၌ ဝေစုမရှိ။
၈။ (က) မည်သူများသာ “အသက်ပင်များဆီသို့သွား” ကြသနည်း၊ ၎င်းက ဘာကိုဆိုလိုသနည်း။ (ခ) လူအုပ်ကြီးသည် “မိမိတို့ဝတ်လုံကို” မည်သို့ “လျှော်ဖွပ်” ခဲ့ကြပြီး စင်ကြယ်သောရပ်တည်မှုကို မည်သို့ထိန်းသိမ်းကြသနည်း။
၈ ယေဟောဝါ၏ မျက်မှောက်၌ စင်ကြယ်ရန် တကယ်ပင် “မိမိတို့ဝတ်လုံကို လျှော်ဖွပ်” သော ဘိသိက်ခံခရစ်ယာန်များသာလျှင် “အသက်ပင်များဆီသို့ သွားနိုင်” သောအခွင့်ထူးကိုရကြ၏။ ဆိုလိုသည်မှာ မိမိတို့၏ကောင်းကင်ဆိုင်ရာဌာန၌ မသေနိုင်သောအသက်ကို ရပိုင်သောအခွင့်နှင့် ဂုဏ်ထူးကို သူတို့ရရှိကြ၏။ (ကမ္ဘာဦး ၃:၂၂-၂၄; ဗျာဒိတ် ၂:၇; ၃:၄၊ ၅ နှိုင်းယှဉ်။) သူတို့သည် လူသားများအဖြစ် သေဆုံးသည့်နောက် ထမြောက်ခြင်းဖြင့် ယေရုရှလင်မြို့သစ်အတွင်းသို့ ဝင်ခွင့်ရကြလိမ့်မည်။ ကောင်းကင်တမန် ၁၂ ပါးသည် ဤသူတို့အား ဝင်ခွင့်ပြုသော်လည်း မိမိတို့၌ ကောင်းကင်မျှော်လင့်ချက် ရှိသည်ဟုဆိုလျက်ကယ် မုသားနှင့် မစင်ကြယ်သောအရာကို ပြုကျင့်သောသူတို့ကိုမူ ဟန့်တားကြ၏။ မြေကြီးပေါ်မှ လူအုပ်ကြီးလည်း “သိုးသငယ်၏သွေး၌ မိမိတို့၏ဝတ်လုံကို ဖြူအောင်လျှော်ဖွပ်” ခဲ့ကြပြီဖြစ်၍ မိမိတို့၏စင်ကြယ်သော ရပ်တည်မှုကို ထိန်းသိမ်းရန်လို၏။ ဤနေရာ၌ ယေဟောဝါ သတိပေးတော်မူသော အကျင့်ဆိုးများကို ရှောင်ခြင်းဖြင့်လည်းကောင်း၊ အသင်းတော်များထံ ယေရှုပါးလိုက်သော သတင်းတော်ခုနစ်ခုပါ ဆုံးမချက်များကို နှလုံးသွင်းခြင်းဖြင့်လည်းကောင်း ထိန်းသိမ်းနိုင်၏။—ဗျာဒိတ် ၇:၁၄; အခန်းကြီး ၂ နှင့် ၃။
၉။ ယေရှု အဘယ်စကားများမိန့်ဆို၍ ကိုယ်တော်၏သတင်းတော်နှင့် ဗျာဒိတ်ကျမ်းတစ်ကျမ်းလုံးကို အဓိကအားဖြင့် မည်သူ့ထံ ပါးလိုက်ခြင်းဖြစ်သနည်း။
၉ ယေဟောဝါ မိန့်ဆိုသည့်နောက် ယေရှု မိန့်ကြားတော်မူ၏။ ဗျာဒိတ်ကျမ်းကိုဖတ်သော စိတ်နှလုံးရိုးဖြောင့်သူတို့အား အားပေးစကား ပြောကြားတော်မူ၏– “ငါယေရှုသည် အသင်းတော်များအတွက်ဖြစ်သော ဤအမှုအရာများကို သင်တို့အား သက်သေခံစေရန် ငါ၏ကောင်းကင်တမန်ကို စေလွှတ်လိုက်၏။ ငါသည် ဒါဝိဒ်၏အမြစ်၊ ဒါဝိဒ်၏ အမျိုးအနွယ်ဖြစ်၏။ ထွန်းပသော မိုးသောက်ကြယ်လည်း ဖြစ်၏။” (ဗျာဒိတ် ၂၂:၁၆) မှန်ပေသည် ထိုစကားများမှာ အဓိကအားဖြင့် “အသင်းတော်များအဖို့ဖြစ်” ၏။ ရှေးဦးစွာ မြေကြီးပေါ်ရှိ ဘိသိက်ခံခရစ်ယာန် အသင်းတော်အတွက် သတင်းစကားဖြစ်၏။ ဗျာဒိတ်ကျမ်းတစ်ကျမ်းလုံးကို အဓိကအားဖြင့် ယေရုရှလင်မြို့သစ်၌ နေထိုင်ကြမည့် ဘိသိက်ခံခရစ်ယာန်များထံ ရေးလိုက်ခြင်းဖြစ်သည်။ ထိုအသင်းတော်မှတစ်ဆင့် လူအုပ်ကြီးလည်း ဤအဖိုးတန်ပရောဖက်ပြုချက် သမ္မာတရားများကို နားလည်နိုင်ခွင့်ရကြ၏။—ယောဟန် ၁၇:၁၈-၂၁။
၁၀။ ယေရှုသည် မိမိကိုယ်ကို အဘယ်ကြောင့် (က) “ဒါဝိဒ်၏အမြစ်၊ ဒါဝိဒ်၏အနွယ်၊” (ခ) “ထွန်းပသော မိုးသောက်ကြယ်” ဟူ၍ သမုတ်တော်မူသနည်း။
၁၀ ယေရှုခရစ်သည် ဗျာဒိတ်တော်ကို ယောဟန်ထံပေးပို့ရန်၊ တစ်ဖန် ယောဟန်မှတစ်ဆင့် အသင်းတော်ထံပေးပို့ရန် တာဝန်အပ်နှင်းတော်မူခြင်းခံရ၏။ ယေရှုသည် “ဒါဝိဒ်၏အမြစ်” လည်းဖြစ်၊ “ဒါဝိဒ်၏ အမျိုးအနွယ်” လည်းဖြစ်တော်မူ၏။ ကိုယ်တော်သည် ဇာတိအရ ဒါဝိဒ်မှဆင်းသက်လာသဖြင့် ယေဟောဝါ၏နိုင်ငံတော်ဘုရင် ဖြစ်နိုင်သောအရည်အချင်းရှိ၏။ ကိုယ်တော်သည် ဒါဝိဒ်၏ “ထာဝရအဘ” ဖြစ်ခြင်းဖြင့် ဒါဝိဒ်၏ “အမြစ်” လည်းဖြစ်လာမည်။ (ဟေရှာယ ၉:၆; ၁၁:၁၊ ၁၀) ကိုယ်တော်သည် ဒါဝိဒ်မင်းဆက်တွင် သေခြင်းကင်းသော ထာဝရဘုရင်ဖြစ်၍ ဒါဝိဒ်နှင့်ဖွဲ့သော ယေဟောဝါ၏ပဋိညာဉ်တော်ကို ပြည့်စုံစေပြီး မောရှေလက်ထက်၌ တင်ကူး၍ဆိုသည့် “ထွန်းပသောမိုးသောက်ကြယ်” ဖြစ်တော်မူ၏။ (တောလည်ရာ ၂၄:၁၇; ဆာလံ ၈၉:၃၄-၃၇) ကိုယ်တော်သည် ပေါ်ထွက်လာသော “ကြယ်နီ” ဖြစ်၍ မိုးကိုလင်းစေတော်မူ၏။ (၂ ပေတရု ၁:၁၉) ရန်သူကြီး မဟာဗာဗုလုန်၏ ဉာဏ်နီဉာဏ်နက်ရှိသမျှပင် ကိုယ်တော်၏ဘုန်းတောက်သော ပေါ်ထွက်ခြင်းကို မဟန့်တားနိုင်။
“လာလော့” ဟု ဆိုပါစေ
၁၁။ လူခပ်သိမ်းအတွက်ဖြစ်သော အဘယ်ဖိတ်ကြားချက်ကို ယခု ယောဟန်တင်ပြ၍ မည်သူများ လက်ခံနိုင်သနည်း။
၁၁ ယခု ယောဟန် စကားပြောသည့်အလှည့် ရောက်ပြီ။ မိမိကြားခဲ့မြင်ခဲ့သမျှကို အလွန်လေးမြတ်သောနှလုံးဖြင့် သူဤသို့ကြွေးကြော်၏– “ဝိညာဉ်တော်နှင့် သတို့သမီးက ‘လာလော့’ ဟုအဆက်မပြတ်ဆို၏။ ကြားရသူတိုင်းလည်း ‘လာလော့’ ဟုဆိုပါစေ။ ရေငတ်သူတိုင်း လာပါစေ။ ဆန္ဒရှိသူတိုင်း အသက်ရေကို အခမဲ့ယူပါစေ။” (ဗျာဒိတ် ၂၂:၁၇) ယေရှု၏ရွေးနုတ်ဖိုးယဇ် အကျိုးကျေးဇူးသည် ၁၄၄,၀၀၀ အတွက်သာမဟုတ်၊ လူခပ်သိမ်းအား ဖိတ်ကြားတော်မူ၏။ ယေဟောဝါ၏ အားကြီးသောဝိညာဉ်တော်သည် သတို့သမီးအတန်းအစားမှတစ်ဆင့် လုပ်ဆောင်သဖြင့် “အသက်ရေကို အခမဲ့ယူပါစေ” ဟူသောသတင်းတော်ကို လူတို့သည် အဆက်မပြတ် ကြည်လင်ပြတ်သားစွာ ကြားရကြ၏။ (ဟေရှာယ ၅၅:၁; ၅၉:၂၁၊ လည်းရှု။) ဖြောင့်မတ်ခြင်းတရား ဆာမွတ်သူတိုင်း ယေဟောဝါ၏ ရက်ရောသောကျေးဇူးတော်ကို “လာ” ရောက်ခံယူနိုင်၏။ (မဿဲ ၅:၃၊ ၆) ဘိသိက်ခံယောဟန်အတန်းအစား၏ ဖိတ်ကြားချက်ကိုလက်ခံသည့် မြေကြီးအတန်းအစား ဖြစ်လာမည့်သူ အားလုံးတို့သည် ကောင်းမြတ်လှသော အခွင့်ထူးရှိကြသည်တကား။
၁၂။ ဗျာဒိတ် ၂၂:၁၇ ပါဖိတ်ကြားချက်ကို လူအုပ်ကြီးက မည်သို့တုံ့ပြန်ကြသနည်း။
၁၂ အရေအတွက် တိုးများလျက်ရှိသော လူအုပ်ကြီးသည် ၁၉၃၀ ပြည့်လွန်နှစ်များ၏ စောစောပိုင်းအချိန်မှစ၍ ထိုဖိတ်ကြားချက်ကို “ကြား” ၍ ဂရုပြုလာခဲ့ကြပြီဖြစ်၏။ သူတို့သည် မိမိတို့၏ဘိသိက်ခံ ကျွန်ချင်းများနည်းတူ ယေဟောဝါရှေ့တော်၌ စင်ကြယ်သောရပ်တည်မှုကို ရယူခဲ့ကြလေပြီ။ ယေရုရှလင်မြို့သစ် ကောင်းကင်မှဆင်းသက်၍ လူသားများထံသို့ ကောင်းချီးများသယ်ဆောင်လာမည့်အချိန်ကို သူတို့တောင့်တကြ၏။ လူအုပ်ကြီးသည် ဗျာဒိတ်ကျမ်း၏ လှုံ့ဆော်သတင်းတော်ကို ကြားသောအခါ “လာလော့” ဟုဆိုရုံမက အခြားသူများကိုလည်း ယေဟောဝါအဖွဲ့အစည်းထဲသို့ တက်ကြွစွာစုသိမ်းကြပြီး “ရေငတ်သူတိုင်း လာပါစေ” ဟုကြွေးကြော်ရန် ထိုသူတို့အား လေ့ကျင့်ပေးကြ၏။ ထို့ကြောင့် ကမ္ဘာတစ်ခွင် နိုင်ငံဒေသပေါင်း ၂၃၀ ကျော်မှ ၆,၀၀၀,၀၀၀ မကသော ဤသူတို့သည် ၉,၀၀၀ ထက်နည်းသော ဘိသိက်ခံအတန်းအစားနှင့်ပူးပေါင်း၍ “အသက်ရေကို အခမဲ့ယူပါစေ” ဟူသောဖိတ်ကြားချက်ကို လူတို့အား ကမ်းလှမ်းကြသည်နှင့်အမျှ လူအုပ်ကြီး၏အရေအတွက်သည် ဆက်၍တိုးပွားများပြားလာ၏။
၁၃။ အဘယ်သတိပေးချက်ကို ယေရှု ထုတ်ပြန်တော်မူသနည်း။
၁၃ ၎င်းနောက် ယေရှုမိန့်ကြားပြန်၏– “ဤစာလိပ်ပါ ပရောဖက်ပြုချက်စကားများကို ကြားရသူတိုင်းအား ငါသည် ဤသို့သက်သေခံ၏– မည်သူမဆို ဤအရာများထဲသို့ တစ်စုံတစ်ရာကို ထပ်ထည့်ပါက ဤစာလိပ်၌ ရေးသားထားသော ကပ်ဘေးများကို သူ့အပေါ်သို့ ဘုရားသခင် သက်ရောက်စေတော်မူလိမ့်မည်။ မည်သူမဆို ဤပရောဖက်စာလိပ်ပါ စကားများထဲမှ တစ်စုံတစ်ရာကို နုတ်ပယ်ပါက ဤစာလိပ်၌ ရေးသားထားသော အရာများတည်းဟူသော အသက်ပင်များနှင့် သန့်ရှင်းသောမြို့တော်မှ သူ့ဝေစုကို ဘုရားသခင် နုတ်ပယ်တော်မူလိမ့်မည်။”—ဗျာဒိတ် ၂၂:၁၈၊ ၁၉။
၁၄။ ဗျာဒိတ်ကျမ်း၏ “ပရောဖက်ပြုချက်” ကို ယောဟန်အတန်းအစားက မည်သို့သဘောထားကြသနည်း။
၁၄ ယောဟန်အတန်းအစားအနေနှင့် ဗျာဒိတ်ကျမ်း၏ “ပရောဖက်ပြုချက်” ကို လူတို့အား သတိပြုစေရမည်။ မကွယ်ဝှက်ရ၊ ထပ်လည်းမသွင်းရ။ ၎င်း၏သတင်းတော်ကို “အိမ်မိုးထက်မှ” လူသိရှင်ကြား ဟောပြောရမည်။ (မဿဲ ၁၀:၂၇၊ ခမ) ဗျာဒိတ်ကျမ်းသည် ဘုရားသခင် မှုတ်သွင်းတော်မူရာဖြစ်၏။ ဘုရားသခင်ကိုယ်တော်တိုင်မိန့်မြွက်၍ ယခုအုပ်စိုးလျက်ရှိသောဘုရင် ယေရှုခရစ်မှတစ်ဆင့် ပေးပို့တော်မူသော သတင်းတော်ပါ စကားလုံးတစ်လုံးကို မည်သူပြုပြင်ပြောင်းလဲဝံ့သနည်း။ ထိုသို့သောသူသည် အသက်ရရန်ကြိုးပမ်းခြင်းအမှု၌ ဆုံးရှုံး၍ မဟာဗာဗုလုန်နှင့် တစ်လောကလုံးအပေါ် ဧကန်ကျရောက်မည့်ကပ်များကို မုချခံထိုက်၏။
၁၅။ “ဤအရာများကို [ငါ] သက်သေခံ” သည်၊ “ငါအမြန်ကြွလာမည်” ဟူသော ယေရှု၏စကားများက ဘာကိုဆိုလိုသနည်း။
၁၅ နောက်ဆုံးအားပေးစကားတစ်ခွန်းကို ယခုယေရှုမိန့်ဆို၏– “ဤအရာများကို သက်သေခံသောသူက ‘မှန်ပေသည်။ ငါသည် အမြန်ကြွလာမည်’ ဟုဆို၏။” (ဗျာဒိတ် ၂၂:၂၀က) ယေရှုသည် “သစ္စာရှိ၍ စစ်မှန်သောသက်သေ” ဖြစ်တော်မူ၏။ (ဗျာဒိတ် ၃:၁၄) ဗျာဒိတ်ကျမ်း၏ ရူပါရုံများကို ကိုယ်တော်သက်သေခံလျှင် ၎င်းတို့မှန်၍ဖြစ်ရမည်။ ယေရှုနှင့် ယေဟောဝါဘုရားသခင် ကိုယ်တော်တိုင်က မိမိတို့ “အမြန်” သို့မဟုတ် မကြာမီ “ကြွလာမည်” ဟူသောအချက်ကို ထပ်ခါတလဲ အလေးအနက်ပြု၍ မိန့်ဆိုတော်မူ၏။ ယေရှုဆိုလျှင် ငါးကြိမ်မြောက်ဖြစ်၏။ (ဗျာဒိတ် ၂:၁၆; ၃:၁၁; ၂၂:၇၊ ၁၂၊ ၂၀) ‘ကြွလာတော်မူခြင်း’ မှာ ပြည့်တန်ဆာကြီးနှင့် နိုင်ငံရေး “ဘုရင်များ” ကိုလည်းကောင်း၊ “ငါတို့သခင် [ယေဟောဝါ] ၏နိုင်ငံတော်၊ ထိုသခင်၏ ခရစ်တော့်နိုင်ငံတော်” ကိုဆန့်ကျင်သော အခြားသူရှိသမျှတို့ကို တရားစီရင်၍ ဒဏ်ခတ်ရန်ဖြစ်၏။—ဗျာဒိတ် ၁၁:၁၅; ၁၆:၁၄၊ ၁၆; ၁၇:၁၊ ၁၂-၁၄။
၁၆။ ယေဟောဝါဘုရားသခင်နှင့် ယေရှုခရစ် အမြန်ကြွလာတော်မူမည်ကိုသိသဖြင့် အသင် မည်သို့ပြတ်သားစွာ လုပ်ကိုင်သင့်သနည်း။
၁၆ သင်သည် ယေဟောဝါနှင့်ယေရှု အလျင်အမြန်ကြွလာတော်မူမည်ကို သိသောကြောင့် “ယေဟောဝါ၏နေ့တော် ရောက်ရှိခြင်းကို စိတ်စွဲ” အပ်ပေသည်။ (၂ ပေတရု ၃:၁၂၊ ကဘ) စာတန့်အစီအစဉ်စနစ်မှ ဤမြေကြီးသည် တည်မြဲပုံရသည်တိုင်အောင် ဟန်မျှသာဖြစ်၏။ စာတန့်လက်အောက်ရှိ လောကီမင်းစိုးရာဇာများဖြစ်သည့် ကောင်းကင်သည် အောင်မြင်မှုရဟန်ရှိသည့်တိုင် တဒင်္ဂမျှသာဖြစ်၏။ ဤအရာများ ကွယ်ပျောက်သွားလိမ့်မည်။ (ဗျာဒိတ်၂၁:၁) ယေဟောဝါ၊ ယေရှုခရစ်လက်အောက်ရှိ ယေဟောဝါ၏နိုင်ငံတော်နှင့် ကိုယ်တော်ကတိပြုရာ ကမ္ဘာသစ်သာလျှင် တည်မြဲ၏။ ဤအချက်ကို ဘယ်တော့မျှမမေ့ပါနှင့်။—၁ ယောဟန် ၂:၁၅-၁၇။
၁၇။ ယေဟောဝါ၏ သန့်ရှင်းခြင်းကို လေးမြတ်လျှင် သင်မည်သို့ပြုသင့်သနည်း။
၁၇ ထို့ကြောင့် ဗျာဒိတ်ကျမ်းလေ့လာမှုမှ အသင်သိရှိခဲ့ရသည့် အချက်များသည် သင့်ဘဝအပေါ် အကြီးအကျယ် ဩဇာလွှမ်းမိုးပါစေ။ ယေဟောဝါ၏ ကောင်းကင်ဆိုင်ရာ ရှေ့တော်မှောက်မြင်ကွင်းကို ရိပ်ခနဲမြင်လိုက်ရသည့်အတွက် ဖန်ဆင်းရှင်၏ ထူးကဲလှသောဘုန်းတော်နှင့် သန့်ရှင်းခြင်းကို အသင် စိတ်စွဲမသွားပေလော။ (ဗျာဒိတ် ၄:၁–၅:၁၄) ဤသို့သောဘုရားသခင်အား ဝတ်ပြုရသည်မှာ အခွင့်ထူးကြီးပါတကား။ သင်သည် ကိုယ်တော်၏သန့်ရှင်းခြင်းကို လေးမြတ်သောကြောင့် အသင်းတော်ခုနစ်ပါးထံ ပါးလိုက်သော ယေရှု၏သြဝါဒကို အလေးအနက်ခံယူပြီး ရုပ်ဝါဒလိုက်စားမှု၊ ရုပ်တုကိုးကွယ်မှု၊ စာရိတ္တပျက်ပြားမှု၊ မပူမအေးဖြစ်မှု၊ အယူဝါဒဖောက်ပြန်သော ဂိုဏ်းဂဏဝါဒမှစ၍ သင့်ဝတ်ပြုမှုကို ယေဟောဝါ လက်မခံစေသော အခြားအရာရှိသမျှကို ရှောင်ပါလေ။ (ဗျာဒိတ် ၂:၁–၃:၂၂) ယောဟန်အတန်းအစားထံ ပါးလိုက်သော တမန်တော်ပေတရု၏ စကားသည် မူအရ လူအုပ်ကြီးနှင့်လည်း သက်ဆိုင်၏– “သင်တို့ကို ခေါ်တော်မူသောသူသည် သန့်ရှင်းတော်မူသည်နည်းတူ၊ ကျင့်ကြံပြုမူသမျှတို့၌ သန့်ရှင်းခြင်းရှိကြလော့။”—၁ ပေတရု ၁:၁၅၊ ၁၆။
၁၈။ သင်သည် အဘယ်အမှု၌ တတ်နိုင်သ၍ အပြည့်အဝ ပါဝင်ဆောင်ရွက်သင့်သနည်း၊ ထိုလုပ်ငန်းသည် ယနေ့ အဘယ်ကြောင့် အရေးကြီးသနည်း။
၁၈ ထို့ပြင် သင်သည် “ထာဝရဘုရား၏ မင်္ဂလာနှစ်နှင့် ငါတို့ဘုရားသခင် အပြစ်ပေးတော်မူရာ နေ့ရက်ကာလ” ကိုကြွေးကြော်ရာ၌ သစ်လန်းသော စိတ်ထက်သန်မှု ရှိနိုင်ပါစေ။ (ဟေရှာယ ၃၅:၄; ၆၁:၂) သင်သည် သိုးစုငယ်အဝင်ဖြစ်စေ၊ လူအုပ်ကြီးအဝင်ဖြစ်စေ၊ ယေဟောဝါ၏ အမျက်တော်ဖလားခုနစ်လုံး သွန်းလောင်းခြင်းကို ကြေညာ၍ စာတန်၏လောကအပေါ် ချမှတ်သော ဘုရားသခင်၏ တရားစီရင်ချက်များကို ပြောကြားရာ၌ အပြည့်အဝ ပါဝင်နိုင်ပါစေ။ တစ်ချိန်တည်းတွင် ယေဟောဝါနှင့် ကိုယ်တော်၏ တည်ထောင်ပြီဖြစ်သော ခရစ်တော်နိုင်ငံတော်ဆိုင်ရာ ထာဝရသတင်းကောင်းကို ရွှင်လန်းစွာကြွေးကြော်ခြင်း၌လည်း သင့်အသံကိုကြားရပါစေ။ (ဗျာဒိတ် ၁၁:၁၅; ၁၄:၆၊ ၇) ဤလုပ်ငန်းတော်၌ အရေးတကြီး ပါဝင်ဆောင်ရွက်ပါ။ ယေဟောဝါကို ဝတ်မပြုသေးသူများအနေနှင့်လည်း သခင့်နေ့တော်အတွင်းသို့ ကျွန်ုပ်တို့ရောက်ရှိနေပြီဟူသော အသိစိတ်ကြောင့် သတင်းကောင်း ကြွေးကြော်ခြင်းလုပ်ငန်းတွင် လာရောက်ပါဝင်ကြပါစေ။ နှစ်ခြင်းခံရန်မျှော်လင့်လျက် မိမိတို့ဘဝကို ဘုရားသခင်အား အပ်နှံသည်အထိ တိုးတက်နိုင်ကြပါစေ။ “ချိန်းချက်သောအချိန်နီးပြီ” ဖြစ်ကြောင်း သတိရပါ။—ဗျာဒိတ် ၁:၃။
၁၉။ သက်ကြီးတမန်တော် ယောဟန်၏ နိဂုံးစကားမှာ မည်သို့ဖြစ်၍ သင်မည်သို့ တုံ့ပြန်သနည်း။
၁၉ သို့ဖြစ်၍ “အာမင်။ သခင်ယေရှု၊ ကြွလာတော်မူပါ” ဟု ယောဟန်နှင့်အတူ ကျွန်ုပ်တို့ စိတ်ပြင်းပြစွာ ဆုတောင်းပါ၏။ သက်ကြီးတမန်တော် ယောဟန်က “သခင်ယေရှုခရစ်၏ မခံစားထိုက်သော ကရုဏာတော်သည် သန့်ရှင်းသူတို့နှင့်အတူ ရှိပါစေသော” ဟု ထပ်၍ဆို၏။ (ဗျာဒိတ် ၂၂:၂၀ခ၊ ၂၁) အသင်စာရှုသူ အားလုံးတို့နှင့်လည်း အတူရှိပါစေ။ သင်သည် ဗျာဒိတ်တော်၏ မဟာအထွတ်အထိပ်နီးပြီဟူသော ယုံကြည်ချက်ရှိသဖြင့် ကျွန်ုပ်တို့နှင့်အတူ လှိုက်လှိုက်လှဲလှဲ “အာမင်” ဟု ဆိုနိုင်ပါစေသတည်း။
[လေ့လာရန်မေးခွန်းများ]
[စာမျက်နှာ ၃၁၄ ပါ ရုပ်ပုံ]
“မြို့ပြင်တွင် ခွေးများ . . . ”
[စာမျက်နှာ ၃၁၅ ပါ ရုပ်ပုံ]
“မြို့တံခါးများဖြင့် မြို့တော်တွင်းသို့ ဝင်နိုင်ခွင့်ကိုရ . . . သောသူတို့သည် ပျော်ရွှင်၏”
