ဗျာဒိတ်ကျမ်း—၎င်း၏ပျော်ရွှင်ဖွယ်အထွတ်အထိပ်
အခန်း ၁
ဗျာဒိတ်ကျမ်း—၎င်း၏ပျော်ရွှင်ဖွယ်အထွတ်အထိပ်
၁။ ကျွန်ုပ်တို့ ပျော်ရွှင်သည်ကို ဘုရားသခင်လိုလားကြောင်း မည်သို့သိနိုင်သနည်း။
ယာဟန်အား ပေးတော်မူသော ဗျာဒိတ်တော်—သမ္မာကျမ်းစာ၏ပီတိဖြာဖွယ် ဤကျမ်းစောင်သည် ဘုရားရေးရာမှတ်တမ်းတော်ကို ပျော်ရွှင်ဖွယ်ဇာတ်ထွတ်ဖြင့် အဆုံးသတ်လိုက်သည်။ အဘယ်ကြောင့် “ပျော်ရွှင်ဖွယ်” ဟုဆိုရသနည်း။ သမ္မာကျမ်းစာ၏ ကလောင်ရှင်သည် “ပျော်ရွှင်သောဘုရားသခင်” ဖြစ်သည်ဟု ဖော်ပြခံရပြီး မိမိကိုချစ်သောသူတို့လက်၌ “ဘုန်းတောက်သတင်းကောင်း”ကို အပ်နှင်းတော်မူသောကြောင့်ဖြစ်သည်။ ကိုယ်တော်သည် ကျွန်ုပ်တို့ပါ ပျော်ရွှင်သည်ကို လိုလားတော်မူ၏။ ယင်းကြောင့် ဗျာဒိတ်ကျမ်းက “ဤပရောဖက်ကျမ်းစကားများကို . . . ဖတ်သူ . . . သည် ပျော်ရွှင်၏” ဟူ၍ ကျမ်းဦး၌ အာမခံထားသည်။ ၎င်း၏နောက်ဆုံးအခန်းကြီး၌လည်း “ဤစာလိပ်ပါ ပရောဖက်စကားများကို လိုက်နာသူ မည်သူမဆိုပျော်ရွှင်၏” ဟုဆိုပြန်သည်။—၁ တိမောသေ ၁:၁၁၊ ကဘ; ဗျာဒိတ် ၁:၃၊ ကဘ; ၂၂:၇၊ ကဘ။
၂။ ဗျာဒိတ်ကျမ်းမှတစ်ဆင့် ပျော်ရွှင်မှုရနိုင်ရန် ဘာလုပ်ရမည်နည်း။
၂ ဗျာဒိတ်ကျမ်းမှတစ်ဆင့် ပျော်ရွှင်မှုကို မည်သို့ရယူနိုင်သနည်း။ ၎င်း၏ပီပြင်သော သင်္ကေတ သို့မဟုတ် အထိမ်းအမှတ်များ၏ အဓိပ္ပာယ်ကို ရှာဖွေစူးစမ်းပြီး ၎င်းနှင့်အညီ ပြုမူခြင်းဖြင့်ဖြစ်သည်။ မကြာမီ ဘုရားသခင်နှင့် ယေရှုခရစ်တို့သည် ယနေ့စနစ်ဆိုးကို အဆုံးစီရင်၍ “နောက်တစ်ဖန် သေဘေးမရှိ” တော့သည့် “ကောင်းကင်သစ်နှင့် မြေကြီးသစ်” ဖြင့် အစားထိုးတော်မူသောအခါ ကသောင်းကနင်းနိုင်သော လူ့သမိုင်းသည် ကပ်ဆိုက်ခြင်းနှင့်အတူ ဇာတ်သိမ်းပါလိမ့်မည်။ (ဗျာဒိတ် ၂၁:၁၊ ၄) ကျွန်ုပ်တို့အားလုံး ထိုသို့သောကမ္ဘာသစ်၌ တကယ်ငြိမ်းချမ်းလုံခြုံစွာ နေလိုကြသည်မဟုတ်လော။ ဗျာဒိတ်ကျမ်း၏ စိတ်လှုပ်ရှားဖွယ် ပရောဖက်ပြုချက်အပါအဝင် ဘုရားသခင့် နှုတ်ကပါဌ်တော်ကို လေ့လာခြင်းဖြင့် ကျွန်ုပ်တို့၏ယုံကြည်ခြင်းကို တည်ဆောက်လျှင် ထိုကမ္ဘာသစ်၌ နေထိုင်နိုင်ပါလိမ့်မည်။
အပေါကလစ်—အဘယ်အရာနည်း
၃။ အပေါကလစ်နှင့် အာမဂေဒုန် ဘာကိုဆိုလိုသည်ဟု အများကထင်ကြသနည်း။
၃ ဗျာဒိတ်ကျမ်းကို အပေါကလစ်ဟူ၍လည်း ခေါ်သည်မဟုတ်လော။ မှန်ပါသည်။ “revelation” (ဗျာဒိတ်) မှာ ဂရိစာသားထဲမှ a·po·kaʹly·psis (အပေါကားလစ်) ဟူသော စကားလုံး၏ အင်္ဂလိပ်ဘာသာပြန်ဆိုချက်ဖြစ်သည်။ အပေါကလစ်ဟူသည် ကမ္ဘာကြီး နျူကလီးယားစစ်တွင်း ပျက်သုဉ်းခြင်းနှင့်အတူတူဟု လူအများယူဆကြသည်။ အမေရိကန်နိုင်ငံ တက်ဆတ်စ်ပြည်နယ် နျူကလီးယားထိပ်ဖူး အတော်များများ ထုတ်လုပ်ခဲ့သည့်မြို့တစ်မြို့၌ ဘာသာရေးကိုင်းရှိုင်းသူတို့က “အရင်ဆုံးသေပွဲဝင်မယ့်လူတွေဟာ ကျွန်တော်တို့ပဲ” ဟူ၍ ပြောတတ်ကြသည်။ “အာမဂေဒုန်သည် မလွှဲသာမရှောင်သာဖြစ်ရုံမက မကြာမီဖြစ်တော့မည်၊ အကောင်းနှင့်အဆိုး၊ ဘုရားသခင်နှင့် စာတန်တို့စပ်ကြား နောက်ဆုံးစစ်ပွဲသည် နျူကလီးယားကပ်ကြီးအသွင်ဖြင့် ဖြစ်လိမ့်မည်ဟု ထိုဒေသရှိဓမ္မဆရာများက ယုံကြည်ကြပြီ” ဖြစ်ကြောင်းကြားသိရပါသည်။ *
၄။ “အပေါကလစ်” သည် စင်စစ် ဘာကိုဆိုလိုသနည်း။ သမ္မာကျမ်းစာ၏ နောက်ဆုံးကျမ်းကို အဘယ်ကြောင့် “ဗျာဒိတ်” ဟု လျောက်ပတ်စွာ ခေါင်းစဉ်တပ်သနည်း။
၄ သို့သော် အပေါကလစ်သည် စင်စစ်အားဖြင့် အဘယ်အရာနည်း။ အဘိဓာန်ကျမ်းများက “ကျလုဆဲအာကာသမှ ကပ်ဆိုးကြီး” စသည့် အသုံးအနှုန်းများဖြင့် အဓိပ္ပာယ်ဖွင့်သော်လည်း ဂရိစကား အပေါကားလစ် ၏အခြေခံအဓိပ္ပာယ်မှာ “လှစ်ဟခြင်း၊” “ဖော်ထုတ်ခြင်း” ဖြစ်သည်။ ထို့ကြောင့် သမ္မာကျမ်းစာ၏ နောက်ဆုံးကျမ်းကို “ဗျာဒိတ်” ဟု လျောက်ပတ်စွာ ခေါင်းစဉ်တပ်ကြပေသည်။ ဤကျမ်း၌ ကြမ္မာဖန်သလိုခံဟူသည့်သဘောပါသော ကမ္ဘာပျက်ကပ်သတင်းဆိုးကို မတွေ့ရဘဲ ဘုရားရေးရာ သမ္မာတရားများနှင့်ဆိုင်သော ဗျာဒိတ်ကိုတွေ့ရှိရ၍ ၎င်းကြောင့် ကျွန်ုပ်တို့စိတ်နှလုံးထဲ၌ တောက်ပသောမျှော်လင့်ချက်နှင့် မတုန်မလှုပ်သော ယုံကြည်ခြင်းဖြစ်ပေါ်လာဖို့ ကောင်းပေသည်။
၅။ (က) အာမဂေဒုန်၌ မည်သူများဖျက်ဆီးခံရပြီး မည်သူများ ကပ်ကျော်မည်နည်း။ (ခ) အာမဂေဒုန်ကပ်ကျော်သူများကို အဘယ်တောက်ပသောအနာဂတ်က ဆီးကြိုနေမည်နည်း။
၅ အာမဂေဒုန်ကို သမ္မာကျမ်းစာ၏ နောက်ဆုံးကျမ်း၌ “အနန္တတန်ခိုးရှင် ဘုရားသခင်၏ နေ့ကြီးစစ်ပွဲ” အဖြစ် ဖော်ပြသည်မှန်၏။ (ဗျာဒိတ် ၁၆:၁၄၊ ၁၆၊ ကဘ) သို့သော် နျူကလီးယားကပ်နှင့် အခြားကြီးခြားနားလိမ့်မည်။ နျူကလီးယားကပ်သည် ကမ္ဘာ့သက်ရှိဟူသမျှကို သုတ်သင်ပစ်ဖို့အကြောင်းရှိသည်။ ဘုရားသခင့်နှုတ်ကပါဌ်တော်ကမူ ကိုယ်တော်ကို အန်တုသောလူဆိုးများသာ—ကိုယ်တော်ထိန်းချုပ်သော အင်အားများဖြင့် ဖျက်ဆီးခံရမည်ဟူသော ဝမ်းမြောက်ဖွယ် အာမခံချက်ကိုပေး၏။ (ဆာလံ ၃၇:၉၊ ၁၀; ၁၄၅:၂၀) လူမျိုးအားလုံးတို့ထဲမှ လူအုပ်ကြီးတစ်အုပ်သည် အာမဂေဒုန်၌ ဘုရားသခင်တရားစီရင်ခြင်း၏ အထွတ်အထိပ်ကို ကပ်ကျော်သွားကြမည်။ ထို့နောက် ခရစ်တော်ယေရှုက သူတို့ကိုပရဒိသုမြေကြီးပေါ် ထာဝစဉ်အသက်ရှင်ခြင်းသို့ ထိန်းကျောင်းပို့ဆောင်တော်မူလိမ့်မည်။ သင်သည် သူတို့အဝင် မဖြစ်လိုပေလော။ ဝမ်းသာစရာမှာ ဗျာဒိတ်ကျမ်းက ဖြစ်နိုင်သည်ဟုဆို၏။—ဗျာဒိတ် ၇:၉၊ ၁၄၊ ၁၇။
ဘုရားရေးရာ လျှို့ဝှက်ချက်များကို စူးစမ်းရှာဖွေခြင်း
၆။ ဗျာဒိတ်ကျမ်းအကြောင်း နားလည်စေရန် လွန်ခဲ့သောနှစ်များအတွင်း ယေဟောဝါသက်သေများသည် အဘယ်စာအုပ်များကို ထုတ်ဝေခဲ့သနည်း။
၆ ၁၉၁၇ ခုနှစ်ကတည်းက ကင်းမျှော်စင်အသင်းသည် The Finished Mystery (ပြီးဆုံးလေသော နက်နဲရာ) ဟူသောစာအုပ်ကို ထုတ်ဝေခဲ့သည်။ ယေဇကျေလနှင့် ဗျာဒိတ်ကျမ်းတို့ကို အခန်းငယ်တစ်ခုချင်း ရှင်းလင်းဖွင့်ဆိုသော စာအုပ်တစ်အုပ် ဖြစ်သည်။ ထို့နောက် သမ္မာကျမ်းစာပရောဖက်ပြုချက် ပြည့်စုံမှုနှင့်အညီ ကမ္ဘာ့ဖြစ်ရပ်များ ဖြစ်ပျက်လာသည်နှင့်အမျှ အခါအားလျော်စွာ Light (အလင်း) ဟူ၍ ခေါင်းစဉ်တပ်သော အတွဲနှစ်တွဲပါသည့်စာအုပ်ကို ပြင်ဆင်၍ ၁၉၃၀ ပြည့်နှစ်၌ ထုတ်ဝေလိုက်သည်။ ၎င်းက ခေတ်နှင့်အညီ ဗျာဒိတ်ကျမ်းလေ့လာချက်ကို တင်ပြသည်။ အလင်းသည် ‘ဖြောင့်မတ်သူအဖို့’ ဆက်လက် ‘ထွန်းလင်းလာ’ သောကြောင့် ၁၉၆၃ ခု၌ ယေဟောဝါသက်သေများသည် ၇၀၄ မျက်နှာပါ “Babylon the Great Has Fallen!” God’s Kingdom Rules! (“မဟာဗာဗုလုန်ကျဆုံးလေပြီ။” ဘုရားသခင့်နိုင်ငံတော် အုပ်စိုးပြီ) ဟူသော စာအုပ်ကိုထုတ်ဝေခဲ့သည်။ ၎င်းသည် ကမ္ဘာ့မိစ္ဆာဘာသာရေး အင်ပါယာဖြစ်သော မဟာဗာဗုလုန်၏အတက်အကျကို ခရေစေ့တွင်းကျတင်ပြပြီး ဗျာဒိတ်ကျမ်း၏ နောက်ဆုံးအခန်းကြီး ကိုးခန်းဆိုင်ရာ ဆွေးနွေးချက်ဖြင့် အဆုံးသတ်သည်။ ‘ဖြောင့်မတ်သူတို့၏လမ်း၊’ အထူးသဖြင့် အသင်းတော် လုပ်ငန်းဆောင်တာနှင့်ပတ်သက်သော သူတို့၏လမ်းခရီး ထိန်လင်းသည်ထက် ထိန်လင်းလာသည်နှင့်အမျှ ၁၉၆၉ ခု၌ ဗျာဒိတ်ကျမ်း၏ ရှေ့အခန်းကြီး ၁၃ ခန်းကို ဆွေးနွေးသော ၃၈၄ မျက်နှာပါ “Then Is Finished the Mystery of God” (ဘုရားသခင့် နက်နဲရာ အဆုံးတိုင်လေပြီ) ဟူသောစာအုပ် ထွက်ပေါ်လာသည်။—ဆာလံ ၉၇:၁၁; သုတ္တံ ၄:၁၈။
၇။ (က) ယေဟောဝါသက်သေများသည် ဗျာဒိတ်ကျမ်းဆိုင်ရာ ဤစာအုပ်ကို အဘယ်ကြောင့် ထုတ်ဝေသနည်း။ (ခ) ဤစာအုပ်၌ စာရှုသူအကျိုးအဖို့ သင်ကြားမှုဆိုင်ရာ အဘယ်အထောက်အကူများ ထည့်သွင်းထားသနည်း။
၇ ယခုအချိန်တွင် ဗျာဒိတ်ကျမ်းဆိုင်ရာ စာအုပ်နောက်တစ်အုပ်ကို အဘယ်ကြောင့် ပုံနှိပ်၊ ထုတ်ဝေရသနည်း။ ဖြန့်ချိခဲ့သော အကြောင်းအရာအများစုမှာ အလွန်ပင် အသေးစိတ်ဖြစ်၍ ဘာသာအများအပြားသို့ ပြန်ဆိုထုတ်ဝေရန် မဖြစ်နိုင်ခဲ့ချေ။ ထို့ကြောင့် တစ်တွဲတည်းလည်းဖြစ်၊ ဘာသာများစွာသို့လည်း လွယ်လင့်တကူပြန်ဆိုနိုင်သော ဗျာဒိတ်ကျမ်းဆိုင်ရာ စာအုပ်တစ်အုပ်ကို ထုတ်ဝေရန် သင့်မြတ်ကြောင်း တွေ့ရှိရသည်။ ထို့ပြင် အံ့ချီးဖွယ် ဤပရောဖက်ပြုချက်၏ ပီတိဖြစ်စရာကောင်းသော လိုရင်းချက်ကို စာရှုသူ ကွက်ကွက်ကွင်းကွင်း နားလည်စေရန် အထောက်အကူပြုသောရုပ်ပုံများ၊ ပုံစံကားချပ်များနှင့် အကျဉ်းချုပ်များအပါအဝင် သင်ကြားမှုဆိုင်ရာ အထောက်အကူများကိုလည်း အခွင့်အခါသင့်၍ ထည့်သွင်းထားသည်။
၈။ ပို၍အရေးပါသော အဘယ်အကြောင်းကြောင့် ဤစာအုပ်ကို ထုတ်ဝေရသနည်း။
၈ ဤစာအုပ်ထုတ်ဝေရာ၌ ပို၍အရေးပါသော အကြောင်းရင်းတစ်ရပ်မှာ လက်ရှိသမ္မာတရားနှင့် ရင်ဘောင်တန်းရန် လိုအပ်၍ဖြစ်သည်။ ယေဟောဝါသည် မိမိ၏နှုတ်ကပါဌ်တော် အနက်အဓိပ္ပာယ် ရှင်းသည်ထက်ရှင်းလာအောင် ပို၍လင်းထိန်သောရောင်ခြည် အဆက်မပြတ် သက်ရောက်စေတော်မူသဖြင့် ဆင်းရဲဒုက္ခကြီးနီးလာသည်နှင့်အမျှ အခြားပရောဖက်ပြုချက်များနှင့်တကွ ဗျာဒိတ်ကျမ်းဆိုင်ရာ ကျွန်ုပ်တို့၏နားလည်မှုသည်လည်း ထက်မြက်သည်ထက် ထက်မြက်လာမည်ဟု မျှော်လင့်နိုင်သည်။ (မဿဲ ၂၄:၂၁; ဗျာဒိတ် ၇:၁၄) ကျွန်ုပ်တို့သည် အကြောင်းစုံသိရှိဖို့လိုသည်။ ဘုရားရေးရာ ပရောဖက်ပြုချက်နှင့်ပတ်သက်၍ တမန်တော်ပေတရု ရေးသည့်အတိုင်း၊ “သင်တို့စိတ်နှလုံးထဲ၌ အရုဏ်တက်၍ ကြယ်နီပေါ်ထွက်သည့် ကာလတိုင်အောင် ထိုစကားတော်ကို မှောင်မိုက်အရပ်၌ ထွန်းလင်းသော ဆီးမီးကဲ့သို့မှတ်၍ ဂရုပြုသင့်ကြ၏။”—၂ ပေတရု ၁:၁၉၊ သမ္မာ။
၉ ဗျာဒိတ်ကျမ်းသည် ကောင်းကင်သစ်နှင့် မြေကြီးသစ်ကို ဖန်ဆင်းရန် ယေဟောဝါ ရည်ရွယ်တော်မူကြောင်း တင်ပြလျက် အခြားကျမ်းစာပရောဖက်ပြုချက် များစွာတို့၏အဆိုကို ထောက်ခံသည်။ (ဟေရှာယ ၆၅:၁၇; ၆၆:၂၂; ၂ ပေတရု ၃:၁၃; ဗျာဒိတ် ၂၁:၁-၅) ဗျာဒိတ်ကျမ်း၏ သတင်းစကားကို ဘိသိက်ခံခရစ်ယာန်များအား အဓိကရည်စူး၍ ရေးလိုက်ခြင်းဖြစ်သည်။ သူတို့ကို ခရစ်တော်က အသွေးတော်ဖြင့်ဝယ်၍ ကောင်းကင်သစ်၌ မိမိနှင့်အတူ တွဲဖက်အုပ်ချုပ်စေတော်မူသည်။ (ဗျာဒိတ် ၅:၉၊ ၁၀) သို့တစေ၊ ဤသတင်းကောင်းသည် ခရစ်တော်၏နိုင်ငံတော်အောက် ထာဝရအသက် ရဖို့မျှော်လင့်သူ လူသန်းပေါင်းများစွာတို့၏ ယုံကြည်ခြင်းကိုလည်း ခိုင်ခံ့စေမည်ဖြစ်သည်။ သင်သည် သူတို့ထဲက တစ်ယောက်လော။ သို့ဖြစ်လျှင် မြေကြီးသစ်၏ အစိတ်အပိုင်းတစ်ခုအနေနှင့် ပရဒိသုတွင် နေထိုင်လျက် ကြွယ်ဝသောငြိမ်းချမ်းမှု၌ မွေ့လျော်ကာ၊ ဒေါင်ဒေါင်မြည်သော ကျန်းမာမှုအပြင် ကုန်ဆုံးမည်မဟုတ်သော ဘုရားသခင့်ပေးသနားရာများကို ရယူခံစားရန်တည်းဟူသော သင့်မျှော်လင့်ချက်ကို ဗျာဒိတ်ကျမ်းက ခိုင်မြဲစေလိမ့်မည်။ (ဆာလံ ၃၇:၁၁၊ ၂၉၊ ၃၄; ၇၂:၁၊ ၇၊ ၈၊ ၁၆) သင်သည် ထိုကမ္ဘာသစ်ထဲသို့ ကပ်ကျော်ဝင်ရောက်လိုလျှင် တစ်ခေတ်ဆန်းစေမည့် ဗျာဒိတ်ကျမ်း၏ ရောက်လုဆဲအထွတ်အထိပ်ဆိုင်ရာ ပီပြင်လှသော ပုံဖော်ချက်ကို ချက်ချင်းဂရုပြုရလိမ့်မည်။ အမိန့်တော်ဖြစ်သတည်း။—ဇေဖနိ ၂:၃; ယောဟန် ၁၃:၁၇။
[အောက်ခြေမှတ်ချက်]
^ အပိုဒ်၊ 3 Süddeutsche Zeitung, Munich, Germany, January 24, 1987.
[လေ့လာရန်မေးခွန်းများ]
၉။ (က) အခြားပရောဖက်ပြုချက်များနှင့်အတူ ဗျာဒိတ်ကျမ်းက ဘုရားသခင် အဘယ်အရာများကို ဖန်ဆင်းမည်ဟု ဆိုသနည်း။ (ခ) မြေကြီးသစ်ကား အဘယ်နည်း။ ၎င်းအထဲသို့ အသင် မည်သို့ကပ်ကျော်ဝင်ရောက်နိုင်သနည်း။
[စာမျက်နှာ ၇ ပါ ရုပ်ပုံ]