ဘုရားသခင့် မြင့်မြတ်သော လျှို့ဝှက်ချက်—၎င်း၏ဘုန်းတောက်သော အထွတ်အထိပ်
အခန်း ၂၆
ဘုရားသခင့် မြင့်မြတ်သော လျှို့ဝှက်ချက်—၎င်း၏ဘုန်းတောက်သော အထွတ်အထိပ်
၁။ (က) မြင့်မြတ်သောလျှို့ဝှက်ချက် ပြီးစီးခြင်းသို့ရောက်ကြောင်း ကျွန်ုပ်တို့အား ယောဟန် မည်သို့အသိပေးသနည်း။ (ခ) ကောင်းကင်တမန် ပရိသတ်ကြီးက အဘယ်ကြောင့် အသံကျယ်စွာ ပြောဆိုကြသနည်း။
ဗဒိတ် ၁၀:၁၊ ၆၊ ၇ ၌မှတ်တမ်းတင်သည့် ခွန်အားကြီးသော ကောင်းကင်တမန်၏ ကျိန်ဆိုကြွေးကြော်ချက်ကို သတိရသလော။ သူက “နောက်ထပ် နှောင့်နှေးမှု ရှိတော့မည်မဟုတ်။ သတ္တမ ကောင်းကင်တမန် တံပိုးခရာမှုတ်၍ အသံပြုမည့် နေ့များ၌ မိမိကျွန် ပရောဖက်တို့အား ကြေညာတော်မူသော သတင်းကောင်းနှင့်အညီ ဘုရားသခင့် မြင့်မြတ်သော လျှို့ဝှက်ချက်သည် ပြီးစီးခြင်းသို့ အမှန်ရောက်မည်” ဟုဆို၏။ နောက်ဆုံးသော ထိုတံပိုးခရာမှုတ်ရန် ယေဟောဝါ သတ်မှတ်သည့်အချိန် ရောက်ပြီတကား။ သို့ဖြစ်လျှင် ဘုရားသခင့် မြင့်မြတ်သော လျှို့ဝှက်ချက်သည် မည်သို့ပြီးစီးခြင်းသို့ ရောက်မည်နည်း။ ကျွန်ုပ်တို့အား အသိပေးရမည်ကို ယောဟန် တကယ်ဝမ်းသာလှ၏။ သူက “ထို့နောက် သတ္တမ ကောင်းကင်တမန် တံပိုးခရာ မှုတ်လေ၏။ ကောင်းကင်၌ ကျယ်သောစကားသံများ ဖြစ်ပေါ်လာပြီး ‘လောကီနိုင်ငံသည် ငါတို့သခင်၏ နိုင်ငံတော်၊ ထိုသခင်၏ ခရစ်တော့်နိုင်ငံတော် ဖြစ်လေပြီ။ ကိုယ်တော်သည် ဘုရင်အဖြစ် အစဉ်ထာဝရ အုပ်စိုးတော်မူမည်’ ဟုပြောဆို၏။” (ဗျာဒိတ် ၁၁:၁၅) ထိုကောင်းကင်တမန် ပရိသတ်အနေနှင့် ကျယ်သောအသံဖြင့်မက မိုးခြိမ်းသံကဲ့သို့သော အသံထားဖြင့်ပြောဆိုရန် အကြောင်းရှိပေသည်။ ဤသမိုင်းဝင် ကြေညာချက်သည် စကြဝဠာတစ်ခွင်လုံးအဖို့ အရေးပါသောကြောင့်ဖြစ်၏။ သက်ရှိသတ္တဝါ အားလုံးတို့၏ အရေးဖြစ်သည်။
၂။ အဘယ်အချိန်တွင် အဘယ်အဖြစ်အပျက်နှင့်အတူ မြင့်မြတ်သော လျှို့ဝှက်ချက်သည် အောင်ပွဲခံ၍ ပြီးစီးခြင်းသို့ ရောက်သနည်း။
၂ မြင့်မြတ်သော လျှို့ဝှက်ချက်သည် ပျော်ရွှင်ဖွယ် အထွတ်အထိပ်သို့ ရောက်ပြီတကား။ ခရစ်တော်ကို စိုးဖော်စံဖက်ဘုရင်အဖြစ် အရှင်ယေဟောဝါ နန်းတင်တော်မူရာ ၁၉၁၄ ခုနှစ်တွင် ကျက်သရေမင်္ဂလာနှင့်တကွ ဘုန်းရောင်ကွန့်မြူးလျက် အောင်ခြင်းအသရေဖြင့် ပြီးမြောက်ခဲ့လေပြီ။ ယေရှုခရစ်တော်သည် ခမည်းတော်ကိုယ်စား၊ ရန်သူဖြစ်သော လူသားလောကအလယ်တွင် တက်တက်ကြွကြွ အုပ်စိုးတော်မူပြီ။ မြွေနှင့် မြွေ၏သင်းပင်းတစ်သိုက်ကို ချေမှုန်း၍ ဤမြေကြီးပေါ် ပရဒိသုငြိမ်းချမ်းရေး ပြန်လည်ရရှိစေရန် ကတိထားရာ မျိုးနွယ်တော်အနေနှင့် နိုင်ငံတော်တန်ခိုးကို ခံယူတော်မူပြီ။ (ကမ္ဘာဦး ၃:၁၅; ဆာလံ ၇၂:၁၊ ၇) ဤနည်းဖြင့် ယေရှုသည် မေရှိယဘုရင်အနေနှင့် ယေဟောဝါ၏ နှုတ်ကပါဌ်တော်ကို ပြည့်စုံစေမည်။ ထို့ပြင်၊ အချုပ်အခြာအာဏာပိုင်ရှင်အဖြစ် “ကမ္ဘာအဆက်ဆက်” မလွဲဧကန် စိုးစံတော်မူမည့် “ထာဝရဘုရင်၊” မိမိခမည်းတော်အား သင်္ကာရှင်းစေတော်မူလိမ့်မည်။—၁ တိမောသေ ၁:၁၇၊ ခမ။
၃။ ယေဟောဝါ ဘုရားသခင်သည် ထာဝရဘုရင်ဖြစ်လျက်နှင့် မြေကြီးပေါ်တွင် အခြားအချုပ်အခြာအာဏာများကို အဘယ်ကြောင့်တည်ရှိခွင့် ပြုတော်မူသနည်း။
၃ သို့သော်၊ “လောကီနိုင်ငံသည် ငါတို့သခင် [ယေဟောဝါ] ၏နိုင်ငံတော်” မည်သို့ဖြစ်လာသနည်း။ ယေဟောဝါ ဘုရားသခင်သည် အစဉ်သဖြင့် ဘုရင်ဖြစ်တော်မူသည် မဟုတ်လော။ မှန်ပါသည်။ အကြောင်းမှာ၊ လေဝိအမျိုးသား အာသပ်က ဤသို့သီဆို၏– “ဘုရားသခင်သည် ရှေးကာလမှစ၍ . . . ငါတို့၏ရှင်ဘုရင် ဖြစ်တော်မူ၏။” အခြားဆာလံဆရာက ဤသို့ကြွေးကြော်၏– “ထာဝရဘုရားသည် စိုးစံ၍ . . . ကိုယ်တော်၏ပလ္လင်သည် ရှေ့ဦးစွာမှစ၍ တည်ပါ၏။ ကိုယ်တော်သည် ရှေးကာလမှစ၍ အစဉ်အမြဲ ဖြစ်တော်မူ၏။” (ဆာလံ ၇၄:၁၂; ၉၃:၁၊ ၂) သို့တစေ၊ ယေဟောဝါသည် ဉာဏ်ပညာရှိရှိ၊ မြေကြီးပေါ်တွင် အခြားအချုပ်အခြာအာဏာများကို တည်ရှိခွင့် ပေးတော်မူ၏။ ဤသို့ဖြင့်၊ လူသည် ဘုရားသခင့် မစမှုကိုမယူဘဲ မိမိကိုယ်ကိုမိမိ အုပ်ချုပ်၍ရမရ ဟူသော ဧဒင်၌ပေါ်ပေါက်ခဲ့သည့် အရေးကိစ္စသည် အပြည့်အဝ ဆန်းစစ်ခြင်း ခံခဲ့ရလေပြီ။ လူ့အုပ်ချုပ်ရေး မရှုမလှ အရေးနိမ့်ခဲ့လေပြီ။ “အို ထာဝရဘုရား၊ လူသည် မိမိသွားရာလမ်းကို အစိုးမရ။ သွားစဉ်အခါ မိမိခြေရာတို့ကို မစီရင်တတ်သည်ကို အကျွန်ုပ်သိပါ၏” ဟူ၍ ဘုရားသခင့်ပရောဖက် ဆိုသောစကား မှန်လှပေစွ။ (ယေရမိ ၁၀:၂၃) ကျွန်ုပ်တို့၏ ပထမမိဘနှစ်ပါး ဖောက်ပြန်သည့်အချိန်မှစ၍ လူနေထိုင်ရာမြေတစ်ပြင်လုံးသည် “မူလမြွေ၊” စာတန်၏ ကြီးစိုးမှုအောက်တွင် ရှိလာခဲ့သည်။ (ဗျာဒိတ် ၁၂:၉; လုကာ ၄:၆) ယခုသော်၊ သိသာထင်ရှားသော ပြောင်းလဲမှုကြီးတစ်ရပ်ဖြစ်ရန် အချိန်တန်ပြီ။ ယေဟောဝါသည် မိမိ၏ပိုင်ထိုက်သော ရာထူးဌာနန္တရကို သင်္ကာယနကင်းရှင်းစေရန် မိမိခန့်အပ်သော မေရှိယနိုင်ငံတော်မှတစ်ဆင့် နည်းသစ်လမ်းသစ်ဖြင့် မြေကြီးအပေါ် မိမိ၏ အချုပ်အခြာအာဏာတော်ကို စတင်ဖြန့်မိုးတော်မူပြီ။
၄။ ၁၉၂၂ ခုနှစ်မှစ၍ တံပိုးခရာများ မှုတ်သောအခါ အဘယ်အရာ ရှေ့တန်းရောက်ခဲ့သနည်း။ ရှင်းပြပါ။
၄ ၁၉၂၂ ခုနှစ်၌ တံပိုးခရာခုနစ်လက် စ၍မှုတ်သောအခါ ကျမ်းစာကျောင်းသားများ၏ အိုဟိုင်အိုပြည်နယ်၊ စီဒါပွိုင့်မြို့ စည်းဝေးကြီး၌ ဂျေ၊ အက်ဖ်၊ ရပ်သဖော့ဒ်က “ကောင်းကင်နိုင်ငံတော် တည်လုနီးပြီ” ဟူသောကျမ်းချက်ကို အခြေပြု၍ ဟောပြောချက်တစ်ရပ်ကို ပေး၏။ (မဿဲ ၄:၁၇) အောက်ပါစကားများဖြင့် သူ နိဂုံးချုပ်လိုက်သည်– “သို့ဖြစ်၍ အို အမြင့်ဆုံးသော ဘုရားသခင့်သားတို့ လယ်ကွင်းသို့ ပြန်ဆင်းကြ။ သင်တို့၏ ချပ်ဝတ်တန်ဆာကို ဝတ်ဆင်ကြ။ လေးနက်တည်ငြိမ်မှု ရှိကြ။ နိုးနိုးကြားကြား ရှိကြ။ တက်တက်ကြွကြွ ရှိကြ။ ရဲစွမ်းသတ္တိ ရှိကြ။ အရှင်သခင်၏ စစ်မှန်သောသစ္စာရှိ သက်သေခံများ ဖြစ်ကြ။ ဗာဗုလုန် အစအနမကျန် ပျက်သုဉ်းသွားသည့်တိုင် ချီတက်တိုက်ခိုက်ကြ။ သတင်းတော်ကို နေရာအနှံ့ ကြေညာကြ။ ယေဟောဝါသည် ဘုရားသခင်ဖြစ်တော်မူကြောင်း၊ ယေရှုခရစ်သည် ဘုရင်တကာ့ဘုရင်၊ သခင်တကာ့သခင် ဖြစ်တော်မူကြောင်း လောကသားတို့ သိရမည်။ ယနေ့ကား နေ့တကာ့နေ့ကြီးဖြစ်၏။ ကြည့်ပါ။ ဘုရင်မင်းမြတ် စိုးစံတော်မူပြီ။ သင်တို့သည် သံတော်ဆင့်များ ဖြစ်ကြ၏။ ထို့ကြောင့်၊ ဘုရင်နှင့် ဘုရင့်နိုင်ငံတော်ကို ကြေညာကြ၊ ကြေညာကြ၊ ကြေညာကြ။” ခရစ်တော်ယေရှု အုပ်ချုပ်သော ဘုရားသခင့် နိုင်ငံတော်ကို ရှေ့တန်းတင်လိုက်သဖြင့်၊ ကောင်းကင်တမန်များ တံပိုးခရာ ခုနစ်လက်စလုံးကို မှုတ်၍ကြေညာသော စီရင်ချက်များပါဝင်သည့် နိုင်ငံတော် ဟောပြောခြင်းလုပ်ငန်းသည် တစ်ဟုန်ထိုး အရှိန်မြင့်တက်လာသည်။
၅။ ၁၉၂၈ ခုနှစ်၌ ကျမ်းစာကျောင်းသားများ၏ စည်းဝေးကြီး၌ ဘာဖြစ်ခဲ့၍ သတ္တမ တံပိုးခရာမှုတ်ခြင်း ပေါ်လွင်လာသနည်း။
၅ သတ္တမ ကောင်းကင်တမန် တံပိုးခရာမှုတ်ခြင်းသည် ၁၉၂၈၊ ဇူလိုင်လ ၃၀ မှ ဩဂုတ်လ ၆ ရက်နေ့အတွင်း ကျမ်းစာကျောင်းသားများကျင်းပသော မီရှီဂန်ပြည်နယ်၊ ဒီထရွိုက်မြို့ စည်းဝေးကြီး၏ အဓိကကဏ္ဍရပ်များ၌ သိသာထင်ရှား၏။ ထိုအချိန်၌၊ အသံလွှင့်ရုံပေါင်း ၁၀၇ ရုံကို ‘သမိုင်းတွင် အကျယ်ပြန့်ဆုံး၊ စရိတ်အများဆုံးသော အချိတ်အဆက်’ ဟု နယူးယောက် တိုင်းမ်စ် ခေါ်ဆိုသောကွန်ရက်နှင့် ဆက်သွယ်ခဲ့သည်။ စည်းဝေးကြီးပရိသတ်သည် “စာတန်ကိုဆန့်ကျင်၍ ယေဟောဝါဘက်မှ ရပ်တည်ခြင်း ကြွေးကြော်ချက်” ကို သောင်းသောင်းဖြဖြ လက်ခံလိုက်သည်။ ၎င်းကြွေးကြော်ချက်က အာမဂေဒုန်၌ စာတန်နှင့် စာတန်၏ဆိုးယုတ်သော အဖွဲ့အစည်း မှောက်လှန်ခံရခြင်းနှင့် ဖြောင့်မတ်ခြင်းတရား မြတ်နိုးသူအားလုံး လွတ်မြောက်ခြင်းအကြောင်းကို တင်ပြထားသည်။ ဘုရားသခင့် သစ္စာရှိနိုင်ငံတော်သားများသည် ၃၆၈-မျက်နှာပါ အစိုးရ အမည်ရှိသောစာအုပ်ကို လက်ခံရရှိကြသဖြင့် ဝမ်းပန်းတသာဖြစ်ခဲ့ကြ၏။ ယင်းစာအုပ်က “မိမိဘိသိက်ခံဘုရင်ကို ၁၉၁၄ ခုနှစ်၌ ဘုရားသခင် နန်းတင်တော်မူကြောင်း” အရှင်းဆုံးသာဓကများဖြင့် တင်ပြထားသည်။
ယေဟောဝါ တန်ခိုးတော်ကို အသုံးပြုတော်မူခြင်း
၆။ ဘုရားသခင့် နိုင်ငံတော်တွင် ခရစ်တော်နန်းထိုင်ပြီ ဟူသောကြေညာချက်ကို ယောဟန်မည်သို့ သတင်းပို့သနည်း။
၆ ဘုရားသခင့် နိုင်ငံတော်၌ ခရစ်တော် နန်းတက်ပြီ—ဤကြေညာချက်သည် ဝမ်းမြောက်ဖွယ်ပါတကား။ ယောဟန် ဤသို့သတင်းပေး၏– “ဘုရားသခင်၏ ရှေ့တော်ရှိ မိမိတို့၏ ပလ္လင်များပေါ်၌ ထိုင်လျက်ရှိသော အကြီးအကဲ နှစ်ဆယ့်လေးပါးသည် ပျပ်ဝပ်၍ ဘုရားသခင်ကို ကိုးကွယ်လျက် ‘ပစ္စုပ္ပန်နှင့် အတိတ်ကာလ၌ အစဉ်ရှိတော်မူသော အနန္တတန်ခိုးရှင် ယေဟောဝါ ဘုရားသခင်၊ ကိုယ်တော်သည် မဟာတန်ခိုးတော်ကို အသုံးပြုလျက် ဘုရင်အဖြစ် စတင် အုပ်စိုးတော်မူပြီဖြစ်၍ ကိုယ်တော်၏ ကျေးဇူးတော်ကို ကျွန်တော်မျိုးတို့ ချီးမွမ်းပါ၏။’ ”—ဗျာဒိတ် ၁၁:၁၆၊ ၁၇။
၇။ (က) ပုံခိုင်းချက်ဖြစ်သော အကြီးအကဲ ၂၄ ပါးထဲမှ မြေကြီးပေါ်ကျန်ကြွင်းသူများ၊ (ခ) ကောင်းကင်ရှိ မိမိတို့နေရာသို့ ထမြောက်ခဲ့သည့် ပုံဆောင်အကြီးအကဲ ၂၄ ပါးတို့က ယေဟောဝါ ဘုရားသခင်၏ ကျေးဇူးတော်ကို မည်သို့ချီးမွမ်းကြသနည်း။
၇ ယေဟောဝါ၏ ကျေးဇူးတော်ကို ချီးမွမ်းသူများမှာ မိမိတို့၏ ကောင်းကင်ဆိုင်ရာ ရာထူးဌာနန္တရတွင်ရှိကြသော ခရစ်တော်၏ ဘိသိက်ခံညီတော်များကို ပုံခိုင်းသည့် အကြီးအကဲ ၂၄ ပါးပင်ဖြစ်သည်။ ၁၉၂၂ ခုနှစ်မှစ၍ ထိုဘိသိက်ခံ ၁၄၄,၀၀၀ ထဲမှ မြေကြီးပေါ် ကျန်ကြွင်းသူတို့သည် တံပိုးခရာမှုတ်ခြင်းဖြင့် စတင်လိုက်သောလုပ်ငန်းကို မအားမလပ် လုပ်ဆောင်လာကြသည်။ သူတို့သည် မဿဲ ၂၄:၃–၂၅:၄၆ ပါ ပုဗ္ဗနိမိတ်၏ ဆိုလိုရင်းကို အပြည့်အဝ နားလည်လာကြသည်။ သို့တစေ၊ ‘သေသည်တိုင်အောင် သစ္စာရှိကြောင်း သက်သေထူခဲ့’ ကြသော သူတို့၏သက်သေခံချင်းတို့သည် သခင့်နေ့တော် အစပိုင်းမှာပင် ကောင်းကင်၌ မိမိတို့၏ ရာထူးဌာနန္တရကို ခံယူကြပြီဖြစ်ရာ ၁၄၄,၀၀၀ အုပ်စုတစ်ခုလုံးကို ကိုယ်စားပြုလျက် ပျပ်ဝပ်၍ ယေဟောဝါကို ကိုးကွယ်နိုင်ကြလေပြီ။ (ဗျာဒိတ် ၁:၁၀; ၂:၁၀) သူတို့၏ အချုပ်အခြာအာဏာပိုင်ရှင်သည် မိမိ၏ မြင့်မြတ်သော လျှို့ဝှက်ချက်ကို အထွတ်အထိပ် ပြီးစီးခြင်းသို့ ပို့ဆောင်ရန် မနှောင့်နှေးသည့်အတွက် သူတို့အားလုံး ကိုယ်တော်ကို မည်မျှကျေးဇူးတင်ကြသည်တကား။
၈။ (က) သတ္တမ တံပိုးခရာမှုတ်ခြင်းကြောင့် လူမျိုးများ ဘာဖြစ်ကြသနည်း။ (ခ) လူမျိုးများက မည်သူများကို ဒေါသထွက်ကြသနည်း။
၈ တစ်ဖက်တွင်မူ သတ္တမ တံပိုးခရာမှုတ်ခြင်းသည် လူမျိုးများအား ဝမ်းမမြောက်စေပါ။ ယေဟောဝါ၏ အမျက်တော်ကို သူတို့ခံရန် အချိန်တန်ပြီ။ ယောဟန်ဆိုသည့်အတိုင်းဖြစ်၏။ “သို့သော်၊ လူမျိုးတို့သည် အမျက်ထွက်ကြ၏။ ကိုယ်တော်၏ အမျက်တော်လည်း သက်ရောက်ပါပြီ။ သေလွန်သူတို့ကို တရားစီရင်၍ ကိုယ်တော်၏ကျွန် ပရောဖက်များနှင့် သန့်ရှင်းသူတို့အားလည်းကောင်း၊ ကိုယ်တော်၏ နာမတော်ကို ကြောက်ရွံ့ခန့်ညားသောသူ အကြီးအငယ်တို့အားလည်းကောင်း ဆုချရမည့်အချိန်နှင့် မြေကြီးကို ဖျက်ဆီးသောသူတို့ကို ဖျက်ဆီးတော်မူမည့် သတ်မှတ်ချိန်လည်း ရောက်ပါပြီ။” (ဗျာဒိတ် ၁၁:၁၈) ၁၉၁၄ ခုနှစ်မှစ၍ ကမ္ဘာပေါ်ရှိ လူမျိုးများသည် အချင်းချင်းမက၊ ဘုရားသခင့်နိုင်ငံတော်၊ အထူးသဖြင့် ယေဟောဝါ၏ သက်သေခံနှစ်ပါးကို အမျက်ထွက်ကြ၏။—ဗျာဒိတ် ၁၁:၃။
၉။ လူမျိုးများသည် မြေကြီးကို မည်သို့ဖျက်ဆီးလျက် နေကြပြီး ၎င်းနှင့်ပတ်သက်၍ ဘုရားသခင် ဘာပြုရန် စိတ်ပိုင်းဖြတ်ထားတော်မူသနည်း။
၉ လူမျိုးများသည် မရပ်မနား စစ်တိုက်၍လည်းကောင်း၊ စီမံကွပ်ကဲမှု ညံ့ဖျင်း၍လည်းကောင်း သမိုင်းတစ်လျှောက် မြေကြီးကို ဖျက်ဆီးလာခဲ့ကြသည်။ သို့သော် ၁၉၁၄ ခုနှစ်မှစ၍ ယင်းဖျက်ဆီးမှုသည် ထိတ်လန့်စဖွယ် အတိုင်းအတာအထိ တိုးမြင့်လာသည်။ ဝိသမလောဘနှင့် လာဘ်ပေးလာဘ်ယူမှုကြောင့် သဲကန္တာရ ကျယ်သည်ထက်ကျယ်လာပြီး လယ်ယာမြေ အကြီးအကျယ် ဆုံးရှုံးရလေပြီ။ အက်ဆစ်မိုးနှင့် ရေဒီယိုသတ္တိကြွ တိမ်တိုက်များကြောင့် ကျယ်ပြောလှသော မြေဧရိယာများ ပျက်စီးရလေပြီ။ စားနပ်ရိက္ခာ အရင်းအမြစ်များ ညစ်ညမ်းခဲ့ရလေပြီ။ ကျွန်ုပ်တို့ ရှူရှိုက်သောလေ၊ သောက်သုံးသောရေလည်း ညစ်ညမ်းခဲ့ရလေပြီ။ စက်မှုလုပ်ငန်း စွန့်ပစ်ပစ္စည်းများကြောင့် ကုန်းသတ္တဝါ ရေသတ္တဝါများ အသက်ဘေးနှင့် ရင်ဆိုင်နေရကြပြီ။ အင်အားကြီးနိုင်ငံများကလည်း လူသားအားလုံးကို နျူကလီးယားလက်နက်ဖြင့် အပြီးချေမှုန်းပစ်မည်ဟု တစ်ချိန်က ခြိမ်းခြောက်ခဲ့၏။ ဝမ်းသာစရာကား၊ ယေဟောဝါသည် “မြေကြီးကို ဖျက်ဆီးသောသူတို့ကို ဖျက်ဆီးတော်မူ” မည်။ မြေကြီး၏ အခြေအနေဆိုးအတွက် တာဝန်မကင်းသော ဘဝင်မြင့်သည့် ဘုရားတရားမဲ့ လူသားများကို စီရင်သုတ်သင်တော်မူမည်။ (တရားဟောရာ ၃၂:၅၊ ၆; ဆာလံ ၁၄:၁-၃) ထို့ကြောင့်၊ ယေဟောဝါသည် အဆိုပါ ဒုစရိုက်သားများကို အရေးယူရန် တတိယ အမင်္ဂလာကို စီစဉ်တော်မူ၏။—ဗျာဒိတ် ၁၁:၁၄။
အဖျက်သမားများအဖို့ အမင်္ဂလာ
၁၀။ (က) တတိယ အမင်္ဂလာကား အဘယ်နည်း။ (ခ) တတိယ အမင်္ဂလာသည် အဘယ်သို့ လူကိုညှဉ်းဆဲရုံမက ပြုမည်နည်း။
၁၀ သို့ဖြစ်၍ တတိယ အမင်္ဂလာ,လာပြီ။ မြန်ဆန်လှ၏။ ယေဟောဝါ၏ “ခြေတင်ရာခုံ၊” ကျွန်ုပ်တို့နေထိုင်ရာ ချစ်စဖွယ် ဤကမ္ဘာမြေကြီးကို မလေးမခန့်ပြုသော ထိုသူတို့ကို ဖျက်ဆီးရာ၌ ၎င်းအမင်္ဂလာကို အသုံးပြုတော်မူမည်။ (ဟေရှာယ ၆၆:၁) ၎င်းကို မေရှိယနိုင်ငံတော်တည်းဟူသော ဘုရားသခင့် မြင့်မြတ်သော လျှို့ဝှက်ချက်က အစပြုလိုက်၏။ ဘုရားသခင့် ရန်သူများ၊ အထူးသဖြင့် ခရစ်ယာန်ဘောင် ခေါင်းဆောင်များသည် ပထမ အမင်္ဂလာနှစ်ပါး၏ ညှဉ်းဆဲခြင်းကို ခံရကြပြီ။ အဓိကအားဖြင့် ကျိုင်းကောင်ကပ်နှင့် မြင်းတပ်များကြောင့်ဖြစ်သည်။ သို့သော်၊ ယေဟောဝါ၏ နိုင်ငံတော်ကိုယ်နှိုက်ကြောင့် ကျရောက်မည့် တတိယကပ်ဘေးသည် လူကိုညှဉ်းဆဲရုံ ညှဉ်းဆဲမည်မဟုတ်။ (ဗျာဒိတ် ၉:၃-၁၉) အဖျက်သမား လူ့ဘောင်အဖွဲ့အစည်းနှင့် သူတို့၏မင်းများကို အသေထိုးသတ်ကာ ဖယ်ရှင်းပစ်လိမ့်မည်။ ၎င်းသည် အာမဂေဒုန်၌ ယေဟောဝါစီရင်ချက်၏ အထွတ်အထိပ်အဖြစ် ကျရောက်လာမည်။ ဒံယေလ ပရောဖက်ပြုသည့်အတိုင်းဖြစ်၏– “ပျက်စီးခြင်းသို့ မရောက်နိုင်သော နိုင်ငံတစ်ခုကို ထိုမင်းကြီးများ [မြေကြီးကိုဖျက်ဆီးသော အုပ်စိုးရှင်များ] လက်ထက်၌ ကောင်းကင်ဘုံရှင် ဘုရားသခင်သည် တည်ထောင်စေတော်မူမည်။ ထိုနိုင်ငံသည် အခြားသောလူမျိုးလက်သို့ မရောက်ရဘဲ အထက်ဆိုခဲ့ပြီးသော နိုင်ငံရှိသမျှတို့ကို ချိုးဖဲ့ဖျက်ဆီး၍ အစဉ်အမြဲတည်လိမ့်မည်။” ဘုရားသခင့် နိုင်ငံတော်သည် ဧရာမတောင်ကြီးပမာဖြစ်၍၊ ဘုန်းရောင်တောက်ပပြီဖြစ်သော မြေကြီးကိုအုပ်စိုး၍ ယေဟောဝါ၏ အချုပ်အခြာအာဏာတော်ကို သင်္ကာယနရှင်းစေပြီး လူသားတို့အား ထာဝစဉ်ပျော်ရွှင်စေအံ့။—ဒံယေလ ၂:၃၅၊ ၄၄၊ ၄၅; ဟေရှာယ ၁၁:၉; ၆၀:၁၃။
၁၁။ (က) ပရောဖက်ပြုချက်က အဆက်မပြတ်ဖြစ်ပျက်မည့် အဘယ်ဝမ်းမြောက်ဖွယ် ဖြစ်ရပ်များကိုဖော်ပြသနည်း။ (ခ) အဘယ်မခံစားထိုက်သော ကရုဏာတော်သည် မည်သူအားဖြင့် မည်သို့ပြည့်စုံလာမည်နည်း။
၁၁ တတိယ အမင်္ဂလာနှင့်အတူ အဆက်မပြတ်သော ဝမ်းမြောက်ဖွယ် အခြင်းအရာများ လိုက်ပါလာမည်။ ၎င်းတို့သည် သခင့်နေ့တော်တစ်လျှောက်လုံး တစ်ခုပြီးတစ်ခု ဖြစ်ပွားလိမ့်မည်။ ‘သေလွန်သူတို့ကို တရားစီရင်၍ ကိုယ်တော်၏ကျွန် ပရောဖက်များ၊ သန့်ရှင်းသူတို့နှင့် နာမတော်ကို ကြောက်ရွံ့သော သူတို့အား ဆုချရမည့်’ အချိန်တည်း။ သေခြင်းမှ ရှင်ပြန်ထမြောက်ခြင်းကို ဆိုလိုသတည်း။ သေခြင်း၌ အိပ်ပျော်နေသော ဘိသိက်ခံ သန့်ရှင်းသူများဆိုလျှင် သခင့်နေ့တော်အဦးပိုင်းတွင် ထမြောက်ကြ၏။ (၁ သက်သာလောနိတ် ၄:၁၅-၁၇) အချိန်တန်လျှင်၊ ကျန်သန့်ရှင်းသူများလည်း လျှပ်တစ်ပြက်အတွင်း ထမြောက်ခြင်းဖြင့် ထိုသူတို့နှင့် ပူးပေါင်းကြလိမ့်မည်။ ဘုရားသခင့်ကျွန် ရှေးပရောဖက်များအပြင်၊ ဆင်းရဲဒုက္ခကြီးကို ကပ်ကျော်သော လူအုပ်ကြီးဖြစ်စေ၊ ခရစ်တော်၏ အနှစ်တစ်ထောင်အုပ်စိုးမှုအတွင်း ထမြောက်လာကြမည့် ‘သေလွန်သူ အကြီးအငယ်တို့’ ဖြစ်စေ၊ ယေဟောဝါ၏ နာမတော်ကို ကြောက်ရွံ့သော ကျန်လူသားအားလုံးအပါအဝင် အခြားသူများလည်း ဆုချခံရကြမည်။ ဘုရားသခင့် မေရှိယဘုရင်လက်ထဲ၌ သေခြင်းနှင့် ဟေးဒီးစ်၏သော့များ ရှိထားရကား၊ ကိုယ်တော့်အုပ်ချုပ်မှုက ထာဝရအသက်ဆုမွန်ကို ဆွတ်ခူးရန်ကြိုးစားသောသူ ရှိသမျှတို့အား အသက်ပေးရန် လမ်းပွင့်စေ၏။ (ဗျာဒိတ် ၁:၁၈; ၇:၉၊ ၁၄; ၂၀:၁၂၊ ၁၃; ရောမ ၆:၂၂; ယောဟန် ၅:၂၈၊ ၂၉) ယင်းအသက်ဆုသည် မသေနိုင်သော ကောင်းကင်အသက်တာဖြစ်စေ၊ မြေကြီးဆိုင်ရာ ထာဝရအသက်ဖြစ်စေ၊ ယေဟောဝါ ထံတော်မှလာသော မခံစားထိုက်သည့် ကရုဏာတော်ဖြစ်၍ ခံယူသူသည် ကျေးဇူးတော်ကို ထာဝစဉ် အောက်မေ့နိုင်မည်ဖြစ်၏။—ဟေဗြဲ ၂:၉။
ပဋိညာဉ်သေတ္တာတော်ကို ကြည့်လော့
၁၂။ (က) ဗျာဒိတ် ၁၁:၁၉ အရ၊ ကောင်းကင်၌ ယောဟန် ဘာမြင်ရသနည်း။ (ခ) ပဋိညာဉ်သေတ္တာသည် အဘယ်အရာ၏ အထိမ်းအမှတ်ဖြစ်ခဲ့ပြီး ၎င်းသည် ဣသရေလလူတို့ ဗာဗုလုန်ပြည်သို့ သုံ့ပန်းအဖြစ် ရောက်သွားကြသောအခါ ဘာဖြစ်ခဲ့သနည်း။
၁၂ ယေဟောဝါ အုပ်ချုပ်တော်မူပြီ။ မေရှိယနိုင်ငံတော်မှတစ်ဆင့် လူသားတို့အပေါ် ထူးမြတ်လှစွာ အချုပ်အခြာအာဏာတော်ကို ဖြန့်မိုးတော်မူပြီ။ ယောဟန် ရှေ့ဆက်မြင်ရသောအရာက ဤအချက်ကိုထောက်ခံ၏။ “ထိုအခါ ကောင်းကင်ဘုံရှိ ဘုရားသခင်၏ ဗိမာန်တော် ကျိန်းဝပ်ရာဌာန ပွင့်၍လာသဖြင့် ဗိမာန်တော် ကျိန်းဝပ်ရာဌာနထဲက ပဋိညာဉ်သေတ္တာတော်ကို ငါမြင်ရ၏။ လျှပ်စီးများ၊ စကားသံများ၊ မိုးခြိမ်းသံများ၊ မြေငလျင်နှင့် မိုးသီးမုန်တိုင်းကြီးများလည်း ဖြစ်ပေါ်လာသည်။” (ဗျာဒိတ် ၁၁:၁၉) ဗျာဒိတ်ကျမ်း၌ ဤတစ်ကြိမ်တည်းသာ ဘုရားသခင့် ပဋိညာဉ်သေတ္တာအကြောင်း ညွှန်းဆို၏။ ပဋိညာဉ်သေတ္တာက လူမျိုးတော်ဖြစ်သော ဣသရေလလူတို့နှင့်အတူ ယေဟောဝါ ကျိန်းဝပ်တော်မူကြောင်း အထိမ်းအမှတ်ပြုသည်။ ၎င်းကို တဲတော်၏ အထူးသန့်ရှင်းရာဌာနထဲ၌ ထား၏။ နောက်သော်၊ ရှောလမုန် ဆောက်လုပ်သော ဗိမာန်တော်၏ အထူးသန့်ရှင်းရာဌာနထဲ၌ ထားရှိသည်။ သို့သော်၊ ဣသရေလလူမျိုး ဘီစီ ၆၀၇ ခုတွင်တွင် ဗာဗုလုန်သို့ သုံ့ပန်းအဖြစ် ရောက်သွားသောအခါ ယေရုရှလင်မြို့ ပစ်ထားခံရပြီး ပဋိညာဉ်သေတ္တာလည်း ပျောက်ကွယ်သွားသည်။ ထိုအခါ ဒါဝိဒ်မင်းမျိုး၏ ကိုယ်စားလှယ်များ “ထာဝရဘုရား၏ ရာဇပလ္လင်တော်ပေါ်မှာ” မထိုင်တော့ချေ။—၁ ရာဇဝင်ချုပ် ၂၉:၂၃ *
၁၃။ ကောင်းကင်ဆိုင်ရာ ဘုရားသခင့် ကျိန်းဝပ်ရာဌာနတွင် ဘုရားသခင့် ပဋိညာဉ်သေတ္တာကို တွေ့ရခြင်းက ဘာကိုပြသနည်း။
၁၃ အနှစ် ၂,၆၀၀ လွန်လေသောနောက် ပဋိညာဉ်သေတ္တာကို ယခုတစ်ဖန် ပြန်တွေ့ရလေပြီ။ သို့ရာတွင်၊ ယောဟန်၏ရူပါရုံ၌ ဤပဋိညာဉ်သေတ္တာသည် မြေကြီးဆိုင်ရာ ဗိမာန်တော်ထဲတွင် မရှိပါ။ ဘုရားသခင့် ကောင်းကင်ဆိုင်ရာ ကျိန်းဝပ်ရာဌာနထဲတွင် ရှိသည်ကိုတွေ့ရ၏။ ဒါဝိဒ်မင်းဆက်ထဲက ဘုရင်တစ်ပါးအားဖြင့် ယေဟောဝါ တစ်ဖန်အုပ်ချုပ်တော်မူပြီ။ သို့ရာတွင် ဤတစ်ကြိမ်တွင် ဘုရင်ခရစ်တော်ယေရှုသည် ကောင်းကင်ယေရုရှလင်မြို့၌ နန်းတင်ခံရပြီး အပေါ်စီးသောထိုနေရာမှ ယေဟောဝါ၏ စီရင်ချက်ကို အကောင်အထည်ဖော်တော်မူ၏။ (ဟေဗြဲ ၁၂:၂၂) ၎င်းတို့အကြောင်းကို ဗျာဒိတ်ကျမ်း၏ ရှေ့ဆက်အခန်းများက တင်ပြသွားပါလိမ့်မည်။
၁၄၊ ၁၅။ (က) ရှေးယေရုရှလင်မြို့၌ မည်သူသာ ပဋိညာဉ်သေတ္တာကို မြင်ရသနည်း။ အဘယ်ကြောင့်နည်း။ (ခ) ကောင်းကင်ဆိုင်ရာ ဘုရားသခင့် ဗိမာန်တော် ကျိန်းဝပ်ရာဌာန၌ ပဋိညာဉ်သေတ္တာတော်ကို မည်သူများ မြင်ရကြသနည်း။
၁၄ မြေကြီးဆိုင်ရာ ရှေးယေရုရှလင်မြို့၌ ပဋိညာဉ်သေတ္တာကို ဣသရေလလူအများ မမြင်ရကြ။ ဗိမာန်တော်တွင် အမှုထမ်းသော ယဇ်ပုရောဟိတ်များပင် မမြင်ရကြ။ အကြောင်းမှာ၊ ၎င်းသည် အထူးသန့်ရှင်းရာဌာနအတွင်း၌ရှိပြီး သန့်ရှင်းရာဌာနမှ ကြည့်၍မမြင်နိုင်အောင် ကန့်လန့်ကာဖြင့် ကာထားသည်။ (တောလည်ရာ ၄:၂၀; ဟေဗြဲ ၉:၂၊ ၃) ယဇ်ပုရောဟိတ်မင်းကြီးသာ အပြစ်ဖြေရာနေ့၌ အထူးသန့်ရှင်းရာဌာနထဲသို့ တစ်နှစ်တစ်ကြိမ် ဝင်သောအခါ မြင်တွေ့ရသည်။ သို့တစေ၊ ကောင်းကင်ရှိဗိမာန်တော် ပွင့်သွားသောအခါ အထိမ်းအမှတ်ပြု ပဋိညာဉ်သေတ္တာကို ယေဟောဝါ၏ ယဇ်ပုရောဟိတ်မင်းကြီး ယေရှုခရစ်သာမက သူ၏လက်ထောက်ယဇ်ပုရောဟိတ် ၁၄၄,၀၀၀ တို့ပါ မြင်ရကြသည်။
၁၅ ကောင်းကင်သို့ ဦးစွာထမြောက်ခဲ့ကြသူတို့သည် ပုံခိုင်းသော ဤပဋိညာဉ်သေတ္တာကို အနီးကပ်မြင်ရကြ၏။ အကြောင်းမှာ၊ သူတို့သည် ယေဟောဝါ၏ ပလ္လင်တော်ပတ်လည်ရှိ အကြီးအကဲ ၂၄ ပါးအဝင်အဖြစ် နေရာယူကြ၍ဖြစ်သည်။ မြေကြီးပေါ်မှ ယောဟန်အတန်းအစားကလည်း ယေဟောဝါ၏ ဝိညာဉ်တော်၏အလင်းကြောင့် ဝိညာဏဗိမာန်တော်၌ ယေဟောဝါ ကျိန်းဝပ်တော်မူပြီဖြစ်ကြောင်းကို သိမြင်ရကြသည်။ သာမန်လူသားများအား ဤထူးမြတ်သော အခြင်းအရာကို သတိပြုစေသော ပုဗ္ဗနိမိတ်များလည်းရှိ၏။ ယောဟန်၏ရူပါရုံက လျှပ်စီးများ၊ စကားသံများ၊ မိုးခြိမ်းသံများ၊ မြေငလျင်နှင့် မိုးသီးမုန်တိုင်းအကြောင်းကို ဖော်ပြ၏။ (ဗျာဒိတ် ၈:၅ နှိုင်းယှဉ်။) ဤအရာများက ဘာကိုပုံခိုင်းသနည်း။
၁၆။ လျှပ်စီးများ၊ စကားသံများ၊ မိုးခြိမ်းသံများ၊ မြေငလျင်နှင့် မိုးသီးမုန်တိုင်းကြီး မည်သို့ဖြစ်ပေါ်လျက် ရှိခဲ့သနည်း။
၁၆ ၁၉၁၄ ခုနှစ်မှစ၍ ဘာသာရေးနယ်ပယ် သွက်သွက်ခါအောင် တုန်လှုပ်၏။ သို့သော် ဝမ်းသာစရာမှာ၊ ဤ “မြေငလျင်” နှင့်အတူ၊ အပ်နှံထားသူတို့၏အသံများ လိုက်ပါလာပြီး ၎င်းတို့က တည်ထောင်ပြီဖြစ်သော ဘုရားသခင့် နိုင်ငံတော်သတင်းကို ရှင်းလင်းစွာ ကြေညာကြ၏။ သမ္မာကျမ်းစာထဲက ‘မုန်တိုင်းသတိပေးချက်များ’ လည်း မြည်ဟည်းသည်။ လျှပ်စီးပြက်သကဲ့သို့၊ ပရောဖက်ပြုချက်ဆိုင်ရာ ဘုရားသခင့် နှုတ်ကပါဌ်တော်နှင့်ပတ်သက်သော ထိုးထွင်းသိမြင်ချက်များကိုလည်း တွေ့မြင်ရ၍ ကြေညာခဲ့ကြပြီ။ ခရစ်ယာန်ဘောင်နှင့် မိစ္ဆာဘာသာအားလုံးဆိုင်ရာ ဘုရားသခင့် စီရင်ချက်များကိုလည်း ပြင်းထန်သော “မိုးသီး” ကဲ့သို့ ကျရောက်စေခဲ့ပြီ။ ဤအရာများအားလုံးကြောင့် လူတို့ အာရုံပြုမိဖို့ကောင်း၏။ သို့သော်၊ ဝမ်းနည်းစရာမှာ၊ လူအများသည် ယေရှုလက်ထက်က ယေရုရှလင်မြို့သားများနည်းတူ ဗျာဒိတ်ကျမ်းပါ ဤနိမိတ်လက္ခဏာများ ပြည့်စုံမှုကို မသိမမြင်ကြ။—လုကာ ၁၉:၄၁-၄၄။
၁၇၊ ၁၈။ (က) ကောင်းကင်တမန် ခုနစ်ပါး တံပိုးခရာမှုတ်ခြင်းက အပ်နှံထားသော ခရစ်ယာန်များအပေါ် အဘယ်ဝတ္တရား ကျရောက်စေသနည်း။ (ခ) ခရစ်ယာန်များသည် မိမိတို့ခန့်အပ်ခံရသောအလုပ်ကို မည်သို့လုပ်ဆောင်လျက် ရှိကြသနည်း။
၁၇ ကောင်းကင်တမန် ခုနစ်ပါးသည် တံပိုးခရာကို ဆက်၍မှုတ်ကာ ကမ္ဘာပေါ်တွင် သမိုင်းဝင်အခြင်းအရာများ ဖြစ်ပျက်လျက်ရှိကြောင်းကို အချက်ပြကြ၏။ အပ်နှံထားသော ခရစ်ယာန်များ၌ ထိုကြေညာချက်များကို ကမ္ဘာသိအောင် ကြွေးကြော်ရမည့် ကြီးလေးသော တာဝန်ရှိကြ၏။ သူတို့သည် ဤစေခန့်ချက်အတိုင်း ဝမ်းသာအားရ လုပ်ဆောင်နေကြသည်တကား။ ၁၉၈၆ ခုနှစ်မှ ၂၀၀၅ ခုနှစ်၊ အနှစ်နှစ်ဆယ်အတွင်း၊ ကမ္ဘာချီဓမ္မအမှု၌ သူတို့ပါဝင်ခဲ့သော အချိန်နာရီသည် နှစ်ဆမက—၆၈၀,၈၃၇,၀၄၂ နာရီမှ ၁,၂၇၈,၂၃၅,၅၀၄ နာရီ—တိုးများလာသည်ကိုကြည့်လျှင် သိသာ၏။ “သတင်းကောင်းအတိုင်းဖြစ်သည့် ဘုရားသခင့် မြင့်မြတ်သော လျှို့ဝှက်ချက်” ကို “မြေကြီးစွန်းတိုင်အောင်” ကြေညာလျက်ရှိပြီ။—ဗျာဒိတ် ၁၀:၇; ရောမ ၁၀:၁၈။
၁၈ ဘုရားသခင့် ရည်ရွယ်ချက်များ အဆက်မပြတ် ပေါ်လွင်လာသည်နှင့်အမျှ အခြားရူပါရုံများကို ကျွန်ုပ်တို့ သိရကြဦးမည်။
[အောက်ခြေမှတ်ချက်]
^ အပိုဒ်၊ 12 ဘီစီ ၆၃ ခုနှစ်တွင် ယေရုရှလင်မြို့ သိမ်းပိုက်ခံရ၍ ဗိမာန်တော် သန့်ရှင်းရာဌာနထဲသို့ ကနေးယပ်စ် ပွန်ပေးယပ်စ် ဝင်သောအခါ ဘာကိုမျှ မတွေ့ရကြောင်း ရောမလူမျိုး သမိုင်းသုတေသီ တက်စီတပ်စ်က ဖော်ပြ၏။ အတွင်း၌ ပဋိညာဉ်သေတ္တာ မရှိချေ။—တက်စီတပ်စ်သမိုင်း၊ ၅.၉။
[လေ့လာရန်မေးခွန်းများ]
[စာမျက်နှာ ၁၇၃ ပါ လေးထောင့်ကွက်]
တံပိုးခရာမှုတ်ခြင်းနှင့်တူသော ယေဟောဝါ၏စီရင်ချက် ကြွေးကြော်ခြင်းများထဲက ထင်ရှားသောကြွေးကြော်ချက်များ
၁။ ၁၉၂၂ ခုနှစ်၊ အိုဟိုင်အိုပြည်နယ်၊ စီဒါပွိုင့်မြို့– ခရစ်ယာန်ဘောင်၏ဘာသာရေး၊ နိုင်ငံရေးနှင့် မဟာစီးပွားရေးခေါင်းဆောင်များ အဘယ်ကြောင့် ငြိမ်းချမ်းရေး၊ ကြီးပွားတိုးတက်ရေးနှင့် ပျော်ရွှင်မှု မဖန်တီးနိုင်သည်ကို ထုချေရှင်းလင်းရန် စိန်ခေါ်ခြင်း။ မေရှိယ၏နိုင်ငံတော်သည် ဆေးစွမ်းကောင်းဖြစ်သည်။
၂။ ၁၉၂၃ ခုနှစ်၊ ကယ်လီဖိုးနီးယားပြည်နယ်၊ လော့စ်အိန်းဂျလိစ် မြို့– “တိုင်းနိုင်ငံအားလုံး အာမဂေဒုန်သို့ ချီတက်နေသော်လည်း ယနေ့အသက်ရှင်သူ လူသန်းပေါင်းများစွာ ဘယ်တော့မျှမသေတော့” ဟူသော လူထုဟောပြောချက်က ငြိမ်းချမ်းရေးလိုလားသော “သိုးများ” အား လူကိုသေစေနိုင်သော လူ့ပင်လယ်ကို စွန့်ခွာရန် နှိုးဆော်လိုက်သည်။
၃။ ၁၉၂၄ ခုနှစ်၊ အိုဟိုင်အိုပြည်နယ်၊ ကိုလမ်ဘတ်စ်မြို့– ဘုန်းကြီးဓမ္မဆရာများ မိမိတို့ကိုယ်ကို ချီးမြှောက်မှု၊ မေရှိယ၏နိုင်ငံတော်ကို မဟောပြောဘဲနေမှုကြောင့် စွဲချက်တင်ခံရခြင်း။ ခရစ်ယာန်စစ်များ ဘုရားသခင့်လက်စားချေခြင်းအကြောင်းကို ဟောပြော၍ ငိုကြွေးနေသောလူသားများကို နှစ်သိမ့်ရမည်။
၄။ ၁၉၂၅ ခုနှစ်၊ အင်ဒီယန်းနာပြည်နယ်၊ အင်ဒီယန်နက်ပလစ်စ်မြို့– ငြိမ်းချမ်းမှု၊ ဖွံ့ဖြိုးတိုးတက်မှု၊ ကျန်းမာမှု၊ အသက်၊ လွတ်လပ်မှုနှင့် ထာဝရပျော်ရွှင်မှု ကောင်းချီးများဆိုင်ရာ တောက်ပသော နိုင်ငံတော်ကတိကို ခရစ်ယာန်ဘောင်၏ ဝိညာဏမှောင်မိုက်နှင့် နှိုင်းယှဉ်ပြသော မျှော်လင့်ခြင်းသတင်းတစ်ရပ်။
၅။ ၁၉၂၆ ခုနှစ်၊ အင်္ဂလန်နိုင်ငံ လန်ဒန်မြို့– ကျိုင်းကောင်ပမာ ခရစ်ယာန်ဘောင်နှင့် ၎င်း၏ဘုန်းကြီးဓမ္မဆရာများကို ကပ်တိုက်၍ ဘုရားသခင့်နိုင်ငံတော်ကို ၎င်းတို့ငြင်းပယ်သည်ကို ဖော်ထုတ် ပြစ်တင်လျက် ထိုကောင်းကင်အစိုးရ ဖွားမြင်ကြောင်းကို ကြော်ငြာခြင်း။
၆။ ၁၉၂၇ ခုနှစ်၊ ကနေဒါနိုင်ငံ တိုရန်တိုမြို့– ‘ဖွဲ့စည်းထားသော ခရစ်ယာန်ဘာသာ’ ကိုစွန့်၍ ယေဟောဝါဘုရားသခင်၊ ယေရှုခရစ်နှင့် နိုင်ငံတော်ကို နှလုံးအကြွင်းမဲ့သစ္စာပြုကြရန် မြင်းတပ်အားဖြင့် နှိုးဆော်ဖိတ်ကြားချက် ထုတ်ပြန်လိုက်သည်။
၇။ ၁၉၂၈ ခုနှစ်၊ မီရှီဂန်ပြည်နယ်၊ ဒီထရွိုက်မြို့– စာတန်ကိုဆန့်ကျင်၍ ယေဟောဝါဘက် ရပ်တည်ခြင်းဟူသော ကြွေးကြော်ချက်က ၁၉၁၄ ခုတွင်နန်းထိုင်သော ဘုရားသခင့်ဘိသိက်ခံဘုရင်သည် စာတန်၏ဆိုးယုတ်သော အဖွဲ့အစည်းကိုဖျက်ဆီး၍ လူသားတို့ကိုကယ်လွှတ်မည်ဟု ရှင်းလင်းစွာတင်ပြလိုက်သည်။
[စာမျက်နှာ ၁၇၅ ပါ လေးထောင့်ကွက်]
မြေကြီးကို ဖျက်ဆီးခြင်း
“သုံးစက္ကန့်တိုင်း ဘောလုံးကွင်းလောက်ကျယ်သော နဂိုမိုးသစ်တော တစ်ပိုင်း ပျောက်ကွယ်၏။ . . . အရေးပါသောသစ်တောများ ပြုန်းတီးမှုကြောင့် အပင်နှင့်တိရစ္ဆာန်မျိုး ထောင်နှင့်ချီ၍ ပျောက်ပျက်ရသည်။”—ရုပ်ပုံပါကမ္ဘာ့မြေပုံစာအုပ် (ရဲန်း မက်ခ်နဲလီ)။
“အခြေချနေထိုင်ရာ ရာစုနှစ်နှစ်ခုအတွင်း [မဟာအိုင်ကြီးများ] လည်း ကမ္ဘာ့အကြီးမားဆုံး မိလ္လာပိုက်ဖြစ်ခဲ့ချေပြီ။”—သည်ဂလုပ်ဘ် အဲန်မေးလ် သတင်းစာ (ကနေဒါ)။
၁၉၈၆ ခုနှစ် ဧပြီလ၌ (ယခင်) ဆိုဗီယက်ပြည်ထောင်စု၊ ချနိုဘိုင်းလ်မြို့တွင်ဖြစ်ပွားသော နျူကလီးယား လျှပ်စစ်ဓာတ်အားစက်ရုံ ပေါက်ကွဲမီးလောင်မှုသည် “ဟီရိုရှီးမားနှင့် နာဂါစာကီမြို့များ ဗုံးချခံရသည့်နောက်ပိုင်း၌ အလွန်အရေးပါသော နျူကလီးယား ဖြစ်ရပ်ဖြစ်” ၍ “ဖောက်ခွဲခဲ့သမျှ နျူကလီးယားစမ်းသပ်မှုနှင့် ဗုံးများလောက် ကမ္ဘာ့လေထု၊ အပေါ်ယံမြေလွှာနှင့် ရေများထဲသို့ နှစ်ရှည်ဖြာထွက်ရောင်ခြည် ထုတ်လွှတ်ခဲ့သည်။”—ဂျမာ; နယူးယောက်တိုင်း။
ဂျပန်နိုင်ငံ၊ မီနာမာတာမြို့ရှိ ဓာတုဗေဒစက်ရုံတစ်ရုံမှ မီသိုင်းပြဒါးများ ပင်လယ်အော်အတွင်းသို့ စီးထွက်ခဲ့သည်။ ၎င်းကြောင့် ညစ်ညမ်းသွားသော ငါးနှင့် အခွံပါရေသတ္တဝါများကို စားသုံးခြင်းကြောင့် မီနာမာတာရောဂါ (အမ်ဒီ) ရကြ၏။ ၎င်းရောဂါမှာ “နာတာရှည် နဗ်ကြောရောဂါဖြစ်သည်။ . . . ယနေ့ [၁၉၈၅ ခု] အထိဆိုလျှင် ဂျပန်နိုင်ငံ၌ အမ်ဒီရောဂါစွဲကပ်သူပေါင်း ၂,၅၇၈ ဦးရှိပြီဖြစ်ကြောင်း တရားဝင်သိရှိရ၏။”—နိုင်ငံတကာ ကပ်ရောဂါဗေဒဂျာနယ်။
[စာမျက်နှာ ၁၇၆ ပါ ရုပ်ပုံ]
ဗျာဒိတ် ၁၁:၁၅-၁၉ ၏ အလွန်အရေးပါသော ကြေညာချက်များကား ရှေ့လာမည့်ရူပါရုံများ၏ ပဏာမဖြစ်သည်။ ဗျာဒိတ် အခန်းကြီး ၁၂ က ဗျာဒိတ် ၁၁:၁၅၊ ၁၇ ပါ မဟာ ကြေညာချက်ကို နောက်ပြန်မီးမောင်းထိုးလျက် အသေးစိတ်အချက်အလက်များကို အကျယ်တဝင့်ဖော်ပြ၏။ အခန်းကြီး ၁၃ က မြေကြီးကိုဖျက်ဆီးသော စာတန့်နိုင်ငံရေးအဖွဲ့အစည်း၏ အစမူလနှင့် ၎င်းပေါက်ဖွားလာပုံကိုဖော်ပြကာ ၁၁:၁၈ ၏နောက်ခံကို သိမြင်စေသည်။ အခန်းကြီး ၁၄ နှင့် ၁၅ တို့က သတ္တမတံပိုးခရာမှုတ်ခြင်းနှင့်လည်းကောင်း၊ တတိယအမင်္ဂလာနှင့်လည်းကောင်း ဆက်စပ်သော နိုင်ငံတော်ဆိုင်ရာစီရင်ချက်များကို ဆက်လက်ဖော်ပြသည်။
[စာမျက်နှာ ၁၇၄ ပါ ရုပ်ပုံ]
ယေဟောဝါသည် “မြေကြီးကို ဖျက်ဆီးသောသူတို့ကို ဖျက်ဆီးတော်မူမည်”
