“မည်သူ စာလိပ်ကို ဖွင့်ထိုက်သနည်း”
အခန်း ၁၅
“မည်သူ စာလိပ်ကို ဖွင့်ထိုက်သနည်း”
၁။ ယောဟန်၏ ရူပါရုံထဲ၌ ယခု ဘာဖြစ်ပျက်သနည်း။
ရင်သပ်ရှုမောဖွယ်ပါတကား။ ခန့်ညားကြောက်လန့်ဖွယ်ပါတကား။ မီးခွက်များ၊ ခေရုဗိမ်များ၊ အကြီးအကဲ ၂၄ ပါးအပြင် ဖန်ရေကန်တို့ဖြင့် ခြံရံလျက်ရှိသော ယေဟောဝါ၏ ပလ္လင်တော်ဝန်းကျင်ဆိုင်ရာ ရူပါရုံပင်ဖြစ်၏။ ယောဟန်၊ သင်နောက်ထပ် ဘာကိုမြင်ရသနည်း။ ကောင်းကင်ဆိုင်ရာမြင်ကွင်း၏ အလယ်တည့်တည့်ကို ယောဟန် အထူးပြု၍ ကျွန်ုပ်တို့အား ဤသို့ပြောပြသည်– “ပလ္လင်တော်ပေါ်တွင် စံတော်မူသောအရှင်၏ လက်ယာလက်တော်တွင် စာလိပ်တစ်လိပ်ကို ငါမြင်၏။ ထိုစာလိပ်၏ စာမျက်နှာ အတွင်းအပြင် နှစ်ဖက်စလုံးတွင် စာများရေးသားထား၍ တံဆိပ်ခုနစ်ခုဖြင့် တင်းကျပ်စွာ ခတ်နှိပ်ထား၏။ ထို့နောက် ခွန်အားကြီးသော ကောင်းကင်တမန်တစ်ပါးက ‘မည်သူသည် တံဆိပ်များကိုခွာ၍ စာလိပ်ကို ဖွင့်ထိုက်သနည်း’ ဟု ကျယ်သောအသံနှင့် ကြွေးကြော်လျက်နေသည်ကို ငါမြင်၏။ သို့သော် ကောင်းကင်၊ မြေကြီး၊ မြေကြီးအောက်၌ ထိုစာလိပ်ကို ဖွင့်နိုင်သူ သို့မဟုတ် ကြည့်နိုင်သူ တစ်ယောက်မျှမရှိ။ စာလိပ်ကိုဖွင့်ရန် သို့မဟုတ် ကြည့်ရန် ထိုက်တန်သူ တစ်ယောက်မျှ ရှာမတွေ့သောကြောင့် ငါသည် သည်းထန်စွာ ငိုကြွေး၏။”—ဗျာဒိတ် ၅:၁-၄။
၂၊ ၃။ (က) စာလိပ်ဖွင့်မည့်သူတစ်ဦးဦးကို အမြန်ရှာတွေ့ဖို့ ယောဟန်အဘယ်ကြောင့် စိတ်စောနေသနည်း။ သို့သော် ထိုအလားအလာသည် မည်သို့ဖြစ်ပုံရသနည်း။ (ခ) ကျွန်ုပ်တို့ခေတ်၌ ဘုရားသခင့် ဘိသိက်ခံလူမျိုးတော်သည် ဘာကို စိတ်ဇောတကြီး စောင့်မျှော်ခဲ့ကြသနည်း။
၂ ဖန်ဆင်းရာအားလုံးတို့၏ အချုပ်အခြာ အာဏာပိုင်အရှင် ယေဟောဝါကိုယ်တော်တိုင်က ထိုစာလိပ်ကို ကမ်းတော်မူသည်။ အတွင်းအပြင် နှစ်ဖက်စလုံးတွင် စာရေးထားသည်ဖြစ်၍ အလွန်အရေးပါသော အကြောင်းအရာများဖြင့် ပြည့်နှက်နေမည်မုချ။ ကျွန်ုပ်တို့ သိချင်လှပြီ။ စာလိပ်ထဲ၌ ဘာများပါရှိပါလိမ့်။ “ဤနေရာသို့ တက်လာလော့။ နောင်ဖြစ်ရမည့် အမှုအရာများကို ငါပြမည်” ဟူ၍ ယောဟန်အား ယေဟောဝါ ဖိတ်ကြားတော်မူခဲ့သည်ကို ကျွန်ုပ်တို့သတိရ၏။ (ဗျာဒိတ် ၄:၁) ထိုအမှုအရာများကို ကျွန်ုပ်တို့ သိချင်လွန်းလှပြီ။ သို့သော် ဖြစ်မှဖြစ်ရလေ။ စာလိပ်ကို တံဆိပ်ခုနစ်ခုဖြင့် ခတ်နှိပ်၍ တင်းကျပ်စွာ ပိတ်ထားချေသည်။
၃ စာလိပ်ဖွင့်ထိုက်သူ တစ်ဦးဦးကို ခွန်အားကြီးသော ကောင်းကင်တမန် ရှာ၍တွေ့ပါမည်လော။ Kingdom Interlinear ပြန်ဆိုချက်အရ၊ စာလိပ်မှာ ယေဟောဝါ၏ “လက်ယာလက်တော်ပေါ်တွင်” ရှိသည်။ ထို့ကြောင့် လက်ဖဝါးပေါ်ရှိ စာလိပ်ကို ကမ်းပေးနေခြင်း ဖြစ်ဟန်တူသည်။ သို့ရာတွင် ကောင်းကင်၊ မြေကြီးပေါ်တွင် စာလိပ်ကိုလက်ခံ၍ ဖွင့်ထိုက်သူတစ်ဦးမျှ ရှိပုံမရပါ။ သေလွန်သဖြင့် မြေကြီးအောက်သို့ ရောက်လေပြီဖြစ်သော ဘုရားသခင်၏ ရှေးခေတ်သစ္စာရှိ အစေခံများထဲကပင် တစ်ဦးကမျှ ဤဂုဏ်ထူးနှင့်မထိုက်။ ထို့ကြောင့် ယောဟန်ခမျာ ဝမ်းနည်းပက်လက်ဖြစ်ရသည်မှာ အံ့ဩစရာမဟုတ်။ “နောင်ဖြစ်ရမည့် အမှုအရာများ” ကို ယောဟန်ခမျာ မသိဘဲနေရမည့်ပုံ ပေါက်နေပြီ။ ကျွန်ုပ်တို့ခေတ်၌လည်း ဘုရားသခင့် ဘိသိက်ခံလူမျိုးတော်သည် ဗျာဒိတ်ကျမ်းပေါ် ယေဟောဝါ၏ အလင်းတော်နှင့် သမ္မာတရား သက်ရောက်စေဖို့ စိတ်ဇောတကြီး စောင့်မျှော်ခဲ့ကြသည်။ ကိုယ်တော်သည် မိမိလူမျိုးတော်ကို “မဟာကယ်တင်ခြင်း” သို့ပို့ဆောင်ရန် ရည်သန်လျက် ပရောဖက်ပြုချက် ပြည့်စုံရမည့် သတ်မှတ်ထားချိန်၌ အဆင့်ဆင့် ဖွင့်ပြတော်မူမည်ဖြစ်သည်။—ဆာလံ ၄၃:၃၊ ၅၊ ကဘ။
ထိုက်တန်သူ
၄။ (က) စာလိပ်နှင့် ယင်း၏တံဆိပ်များကို ဖွင့်ထိုက်သောမည်သူ့အား တွေ့ရှိရသနည်း။ (ခ) ယောဟန်အတန်းအစားနှင့် အပေါင်းပါတို့သည် အဘယ်ဆုလာဘ်နှင့် အခွင့်အရေးကို ယခု ဝေမျှခံစားကြသနည်း။
၄ မှန်ပေသည်။ စာလိပ်ဖွင့်နိုင်သူတစ်ဦး တကယ်ရှိ၏။ ယောဟန်က ဤသို့ဆို၏– “သို့သော် အကြီးအကဲများထဲမှ တစ်ပါးက ငါ့အား ‘မငိုနှင့်တော့။ ကြည့်ပါ။ ဒါဝိဒ်၏ အမြစ်ဖြစ်သော ယုဒအနွယ်ဝင် ခြင်္သေ့သည် စာလိပ်နှင့် စာလိပ်၏ တံဆိပ်ခုနစ်ခုကို ဖွင့်ခြင်းငှာ အောင်နိုင်လေပြီ’ ဟုပြောဆို၏။” (ဗျာဒိတ် ၅:၅) သို့ဖြစ်၍ ယောဟန်၊ မျက်ရည်များကို သုတ်လိုက်ပါ။ ယနေ့ ယောဟန်အတန်းအစားနှင့် သူတို့၏သစ္စာရှိ အဖော်အဖက်တို့သည်လည်း ဉာဏ်အလင်းရရှိရန် စိတ်ရှည်လက်ရှည် စောင့်မျှော်ရင်း ပြင်းထန်သောစမ်းသပ်မှုများကို ဆယ်စုနှစ်များစွာ ခံခဲ့ရကြသည်။ ရူပါရုံကို ယခု ကျွန်ုပ်တို့ နားလည်ပြီဖြစ်၍ နှစ်သိမ့်ဖွယ် ဆုလာဘ်ပါတကား။ သူတစ်ပါးတို့အား ၎င်းသတင်းတော်ကို ပြောကြားခြင်းဖြင့် ယင်းရူပါရုံ၏ ပြည့်စုံချက်၌ ပါဝင်ရသည်မှာလည်း အခွင့်ထူးလှသည်တကား။
၅။ (က) ယုဒနှင့်ပတ်သက်၍ အဘယ်ပရောဖက်ပြုချက် ရှိသနည်း။ ယုဒ၏ သားစဉ်မြေးဆက်တို့သည် အဘယ်မှာ အုပ်ချုပ်ကြသနည်း။ (ခ) ရှိလောကား မည်သူနည်း။
၅ “ဒါဝိဒ်၏ အမြစ်ဖြစ်သော ယုဒအနွယ်ဝင်ခြင်္သေ့” ဟုဆိုပါကလား။ ဂျူးလူမျိုးတို့၏ဘိုးဘေး ယာကုပ်သည် မိမိ၏စတုတ္ထသားဖြစ်သူ ယုဒနှင့်ပတ်သက်၍ မြွက်ဆိုသော အောက်ပါပရောဖက်ပြုချက်ကို ယောဟန် အကျွမ်းတဝင်ရှိသည်– “ယုဒသည် ခြင်္သေ့ပျိုဖြစ်၏။ ငါ့သား၊ သင်သည် ဖမ်းယူကိုက်စားရာမှ တက်လာတတ်၏။ ဝပ်လျက်နေ၏။ ခြင်္သေ့ကဲ့သို့လည်းကောင်း၊ ခြင်္သေ့မကဲ့သို့လည်းကောင်း ဝပ်တွားတတ်၏။ အဘယ်သူ နှိုးဆော်ဝံ့မည်နည်း။ ရှိလော မရောက်မီတိုင်အောင် ရာဇလှံတံသည် ယုဒထံမှလည်းကောင်း၊ မင်းအာဏာသည် သူ၏အမျိုးအနွယ်ထံမှလည်းကောင်း မရွေ့ရ။ ရှိလော၌ လူမျိုးတို့သည် ဆည်းကပ်ကြလိမ့်မည်။” (ကမ္ဘာဦး ၄၉:၉၊ ၁၀) ဘုရားသခင့် လူမျိုးတော်၏ မင်းမျိုးမင်းနွယ်မှာ ယုဒမှဆင်းသက်လာသည်။ ဒါဝိဒ်မှစ၍ ယေရုရှလင်မြို့ကို ဗာဗုလုန်လူတို့ ဖျက်ဆီးသည့်အချိန်တိုင် ထိုမြို့၌အုပ်စိုးသော ဘုရင်အားလုံး ယုဒအမျိုးဖြစ်ကြသည်။ သို့သော် သူတို့ထဲမှတစ်ဦးကမျှ ယာကုပ် ပရောဖက်ပြုသော ရှိလောမဟုတ်။ ရှိလော၏အနက်မှာ “ပိုင်ထိုက်သူ” ဖြစ်သည်။ ၎င်းအမည်သည် ဒါဝိဒ်၏နိုင်ငံတော်ကို ယခု ထာဝစဉ်ပိုင်ဆိုင်သော ယေရှုကိုကြို၍ ရည်ညွှန်း၏။—ယေဇကျေလ ၂၁:၂၅-၂၇; လုကာ ၁:၃၂၊ ၃၃; ဗျာဒိတ် ၁၉:၁၆။
၆။ ယေရှုသည် အဘယ်နည်းဖြင့် ယေရှဲ၏ “အတက်” လည်းဖြစ်၊ “ဒါဝိဒ်၏အမြစ်” လည်းဖြစ်သနည်း။
၆ “ဒါဝိဒ်၏အမြစ်” သည် ဘာကိုရည်ညွှန်းကြောင်း ယောဟန် ချက်ချင်း ရိပ်မိ၏။ ကတိထားရာ မေရှိယကို ‘[ဒါဝိဒ်မင်း၏ ခမည်းတော်] ယေရှဲအမျိုးအငုတ်မှ ပေါက်သောအတက်၊ . . . အညွန့်’ ဟူ၍လည်းကောင်း၊ ‘လူများအဖို့ထူသော အလံဖြစ်မည့် ယေရှဲ၏အမြစ်’ ဟူ၍လည်းကောင်း ကြို၍သမုတ်ထားသည်။ (ဟေရှာယ ၁၁:၁၊ ၁၀) ယေရှုသည် ယေရှဲ၏အတက်ဖြစ်၍ ယေရှဲ၏သား ဒါဝိဒ်မင်းမျိုးမှ ဖွားမြင်တော်မူသည်။ ထို့ပြင် ကိုယ်တော်သည် ယေရှဲ၏အမြစ်အနေနှင့် ဒါဝိဒ်မင်းဆက်ကို တစ်ဖန်အညွန့်ပေါက်စေ၍ ၎င်းအား ရှင်သန်စေပြီး ထာဝစဉ် တည်မြဲစေတော်မူသည်။—၂ ဓမ္မရာဇဝင် ၇:၁၆။
၇။ အဘယ်အရာက ယေရှုအား “ပလ္လင်တော်ပေါ်တွင် စံတော်မူသောအရှင်၏ လက်ယာလက်တော်” မှ စာလိပ်ကို ခံယူထိုက်သူ ဖြစ်စေသနည်း။
၇ ယေရှုသည် စုံလင်သော လူသားတစ်ဦးအနေနှင့် စမ်းသပ်မှုအောက် အလူးအလှိမ့်ခံပြီး ယေဟောဝါကို သစ္စာရှိရှိ ဝတ်ပြုခဲ့သူဖြစ်သည်။ စာတန်၏စိန်ခေါ်ချက်ကို ထိထိမိမိ အဖြေပေးခဲ့သည်။ (သုတ္တံ ၂၇:၁၁) ထို့ကြောင့် ယဇ်ကောင်အဖြစ် အသေမခံမီည၌ “ငါသည် လောကကိုအောင်ပြီ” ဟု ဆိုနိုင်ခဲ့သည်။ (ယောဟန် ၁၆:၃၃) ယင်းကြောင့် ထမြောက်လာသော ယေရှုအား “ကောင်းကင်ဘုံ၌လည်းကောင်း၊ ကမ္ဘာမြေကြီးပေါ်၌လည်းကောင်း ရှိသမျှသော တန်ခိုးအာဏာတို့ကို” ယေဟောဝါ အပ်နှင်းတော်မူသည်။ ဘုရားသခင့်အစေခံ အားလုံးထဲတွင် ယေရှုတစ်ပါးတည်းသာလျှင် စာလိပ်ကိုခံယူကာ ၎င်း၏အရေးပါလှသောသတင်းကို ထုတ်ပြန်နိုင်သော အရည်အချင်းရှိသည်။—မဿဲ ၂၈:၁၈။
၈။ (က) နိုင်ငံတော်နှင့်စပ်လျဉ်း၍ အဘယ်အရာက ယေရှုထိုက်တန်ကြောင်း ဖော်ပြသနည်း။ (ခ) အကြီးအကဲ ၂၄ ပါးထဲမှတစ်ပါးက ယောဟန်အား မည်သူစာလိပ်ဖွင့်ထိုက်ကြောင်း ဖော်ပြသည်မှာ အဘယ်ကြောင့် သင့်လျော်သနည်း။
၈ ယေရှု စာလိပ်ကိုဖွင့်ထိုက်သည်မှာ တကယ်ပင်လျောက်ပတ်၏။ ကိုယ်တော်သည် ၁၉၁၄ ခုနှစ်စ၍ ဘုရားသခင့် မေရှိယနိုင်ငံတော်ဘုရင်အဖြစ် မင်းမြှောက်ခံရ၍ ထိုစာလိပ်ကလည်း နိုင်ငံတော်နှင့် နိုင်ငံတော်က ဖြစ်မြောက်စေမည့် အရာများအကြောင်း များစွာဖော်ပြထား၏။ ယေရှုသည် ကမ္ဘာပေါ်ရှိစဉ် နိုင်ငံတော် သမ္မာတရားကို သစ္စာရှိရှိ သက်သေခံတော်မူသည်။ (ယောဟန် ၁၈:၃၆၊ ၃၇) နိုင်ငံတော်လာပါစေဟု ဆုတောင်းရန် နောက်တော်လိုက်များအား သင်ကြားတော်မူသည်။ (မဿဲ ၆:၉၊ ၁၀) ခရစ်ယာန်ခေတ် အစပြုစဉ် နိုင်ငံတော်သတင်းကောင်း ဟောပြောခြင်းလုပ်ငန်းကို အစပျိုးပြီး နောက်ဆုံးကာလအတွင်း ထိုဟောပြောခြင်းလုပ်ငန်း ပြီးပြတ်မည့်အကြောင်းကိုလည်း ပရောဖက်ပြုတော်မူသည်။ (မဿဲ ၄:၂၃; မာကု ၁၃:၁၀) အကြီးအကဲ ၂၄ ပါးထဲမှတစ်ပါးက ယေရှုသည် တံဆိပ်များကို ဖွင့်ထိုက်သူဖြစ်ကြောင်း ယောဟန်အား ထုတ်ဖော်ပြောကြားသည်မှာလည်း လျောက်ပတ်၏။ အဘယ်ကြောင့်နည်း။ ဤအကြီးအကဲများသည် ပလ္လင်များပေါ်ထိုင်၍ သရဖူများကိုဆောင်းလျက် ခရစ်တော်နှင့်အတူ နိုင်ငံတော်ကို အမွေခံကြ၍တည်း။—ရောမ ၈:၁၇; ဗျာဒိတ် ၄:၄။
‘အသတ်ခံရသော သိုးသငယ်’
၉။ ‘ပလ္လင်တော်အလယ်တွင်’ ခြင်္သေ့အစား၊ ဘာရပ်နေသည်ကို ယောဟန် မြင်ရသနည်း။ ယင်းကို သူမည်သို့ ဖော်ပြသနည်း။
၉ ယောဟန်သည် “ယုဒအနွယ်ဝင် ခြင်္သေ့” ကိုကြည့်လိုက်သည်။ သို့သော် အံ့ဩစရာပင်။ လုံးဝမတူသော အထိမ်းအမှတ်ပြု ရုပ်လုံးသဏ္ဌာန် ပေါ်လာသည်။ “ထိုနောက် ပလ္လင်တော်မှစ၍ သက်ရှိသတ္တဝါ လေးပါးနှင့် အကြီးအကဲတို့၏ အလယ်တွင် အသတ်ခံရဟန်ရှိသော သိုးသငယ်တစ်ကောင် ရပ်လျက်နေသည်ကို ငါမြင်ရ၏။ ၎င်း၌ ဦးချိုခုနစ်ချောင်းနှင့် မျက်စိခုနစ်လုံး ရှိ၏။ ထိုမျက်စိများမှာ မြေကြီးတစ်ပြင်လုံးသို့ စေလွှတ်တော်မူသော ဘုရားသခင်၏ ဝိညာဉ်ခုနစ်ပါးကို ဆိုလို၏။”—ဗျာဒိတ် ၅:၆။
၁၀။ ယောဟန်မြင်သော “သိုးသငယ်” ကားမည်သူဖြစ်သနည်း။ ၎င်းအခေါ်အဝေါ်သည် အဘယ်ကြောင့် ဆီလျော်သနည်း။
၁၀ ပလ္လင်တော်အနီး၊ သက်ရှိသတ္တဝါ လေးပါးနှင့် အကြီးအကဲ ၂၄ ပါးတို့၏အလယ်၊ ဗဟိုတည့်တည့်တွင် သိုးသငယ်တစ်ကောင်ကို တွေ့ရ၏။ ဤသိုးသငယ်မှာ “ယုဒအနွယ်ဝင် ခြင်္သေ့၊” “ဒါဝိဒ်၏ အမြစ်” ပင်ဖြစ်ကြောင်း ယောဟန် အသိနှေးမည်မထင်။ အနှစ် ၆၀ အထက်က နှစ်ခြင်းဆရာယောဟန်သည် ရပ်ကြည့်နေသူ ဂျူးတို့အား ယေရှုကို “ဤလောက၏အပြစ်ကို ဆောင်သွားသော ဘုရားသခင်၏ သိုးသငယ်” အဖြစ် မိတ်ဆက်ပေးခဲ့သည်ကို ယောဟန်သိပါသည်။ (ယောဟန် ၁:၂၉) ယေရှုသည် မြေကြီးအသက်တာ တစ်လျှောက်လုံး အနာအဆာမဲ့ သိုးသငယ်ပမာ လောက၏ညစ်စွန်းခြင်းကို မခံဘဲနေခဲ့သဖြင့် အပြစ်ကင်းမဲ့သော အသက်တော်ကို လူသားတို့အဖို့ ယဇ်အဖြစ် ဆက်ကပ်နိုင်ခဲ့သည်။—၁ ကောရိန္သု ၅:၇; ဟေဗြဲ ၇:၂၆။
၁၁။ ဘုန်းပွင့်သောယေရှုကို “အသတ်ခံခဲ့ရဟန်ရှိသော သိုးသငယ်တစ်ကောင်” ဖြင့်ကိုယ်စားပြုသည်မှာ အဘယ်ကြောင့် သိက္ခာချရာ မရောက်သနည်း။
၁၁ ဘုန်းပွင့်ယေရှုကို “အသတ်ခံရဟန်ရှိသော သိုးသငယ်တစ်ကောင်” နှင့်နှိုင်းယှဉ်သည်မှာ ကိုယ်တော်ကိုနှိမ်ရာ၊ သိက္ခာချရာ မရောက်သလော။ လုံးဝမရောက်ပါ။ သေသည့်တိုင် ယေရှု သစ္စာစောင့်ခြင်းက စာတန့်အဖို့ မဟာအရှုံး၊ ယေဟောဝါ ဘုရားသခင်အဖို့ မဟာအောင်ပွဲဖြစ်သည်။ ယေရှုကို ဤသို့သရုပ်ဖော်သည့်အတွက် စာတန့်လောကအပေါ် ယေရှုအောင်ပွဲရခြင်းကို ကွင်းကွင်းကွက်ကွက် ပေါ်လွင်စေပြီး လူသားတို့အပေါ်ထားရှိသော ယေဟောဝါနှင့် ယေရှု၏နက်ရှိုင်းသည့် မေတ္တာတော်ကိုလည်း သတိရစေသည်။ (ယောဟန် ၃:၁၆; ၁၅:၁၃; ကောလောသဲ ၂:၁၅ နှိုင်းယှဉ်။) သို့ဖြင့် ယေရှုသည် စာလိပ်ကိုဖွင့်နိုင်သော အရည်အချင်း အထူးပြည့်ဝသည့် ကတိထားရာ အမျိုးအနွယ်တော်ဖြစ်ကြောင်း ထင်ရှားသည်။—ကမ္ဘာဦး ၃:၁၅။
၁၂။ သိုးသငယ်၏ ဦးချိုခုနစ်ချောင်းသည် ဘာကိုပုံခိုင်းသနည်း။
၁၂ အဘယ်အရာက “သိုးသငယ်” ကို ပို၍လေးမြတ်စေသနည်း။ ကိုယ်တော်၌ ဦးချိုခုနစ်ချောင်းရှိ၏။ ကျမ်းစာခေတ်၌ ဦးချိုများသည် အစွမ်းတန်ခိုး သို့မဟုတ် အာဏာကို အထိမ်းအမှတ်ပြုလေ့ရှိပြီး ခုနစ်သည် ပြည့်စုံခြင်းကိုပြသည်။ (၁ ဓမ္မရာဇဝင် ၂:၁၊ ၁၀; ဆာလံ ၁၁၂:၉; ၁၄၈:၁၄ နှိုင်းယှဉ်။) ထို့ကြောင့် သိုးသငယ်၏ ဦးချိုခုနစ်ချောင်းသည် ယေရှုအား ယေဟောဝါ အပ်နှင်းတော်မူသော အစွမ်းတန်ခိုး အပြည့်အဝကို ကိုယ်စားပြုသည်။ ကိုယ်တော်သည် “ခပ်သိမ်းသော အုပ်ချုပ်ခြင်းအာဏာစက်၊ တန်ခိုး၊ အစိုးရခြင်းမှစ၍၊ ယခုဘဝ နောင်ဘဝ၌ ခေါ်ဝေါ်သမုတ်သော ဘွဲ့နာမအလုံးစုံ” တို့ထက် များစွာကြီးမြတ်တော်မူ၏။ (ဧဖက် ၁:၂၀-၂၃၊ သမ္မာ; ၁ ပေတရု ၃:၂၂) ယေရှုသည် မိမိအား ကောင်းကင်ဘုရင်အဖြစ် ယေဟောဝါနန်းတင်သည့် ၁၉၁၄ ခုနှစ်မှစ၍ တန်ခိုးတော်၊ အစိုးရခြင်းတန်ခိုးအာဏာကို အထူးကျင့်သုံးလာခဲ့ပြီ။—ဆာလံ ၂:၆။
၁၃။ (က) သိုးသငယ်၏ မျက်စိခုနစ်လုံးသည် ဘာကိုပုံခိုင်းသနည်း။ (ခ) သိုးသငယ် ဘာကိုစတင် လုပ်ဆောင်သနည်း။
၁၃ ထို့ပြင် ယေရှုသည် သန့်ရှင်းသောဝိညာဉ်ဖြင့် ပြည့်ဝ၏။ သိုးသငယ်၌ “ဘုရားသခင်၏ ဝိညာဉ်ခုနစ်ပါး” တည်းဟူသော မျက်စိခုနစ်လုံးရှိခြင်းက ၎င်းကိုပုံခိုင်းသည်။ ယေရှုသည် ဆက်သွယ်ရေးလမ်းကြောင်းဖြစ်၍ ကိုယ်တော်မှတစ်ဆင့် ယေဟောဝါ၏ တက်ကြွသောစွမ်းအားသည် မြေကြီးပေါ်ရှိ အစေခံများထံသို့ စီးဆင်း၏။ (တိတု ၃:၆) ဤဝိညာဉ်တော်ဖြင့်ပင် ကောင်းကင်မှနေပြီး မြေကြီးပေါ်မှ အဖြစ်အပျက်များကို ကြည့်ရှုတော်မူခြင်းဖြစ်ပေမည်။ ယေရှုသည် ခမည်းတော်နည်းတူ စုံလင်သော ဝေခွဲပိုင်းခြားဉာဏ်ရှိ၏။ ကိုယ်တော့်မြင်ကွင်းနှင့် လွတ်သည့်အရာမရှိ။ (ဆာလံ ၁၁:၄; ဇာခရိ ၄:၁၀ နှိုင်းယှဉ်။) သို့ဖြစ်၍ လောကကိုအောင်နိုင်သူ ဤသမာဓိစောင့်သိရှင်၊ ယုဒအနွယ်ဝင် ခြင်္သေ့၊ ဒါဝိဒ်၏အမြစ်၊ လူသားတို့အဖို့ အသက်စွန့်သူ၊ အခွင့်အာဏာအပြည့်ရှိသူ၊ သန့်ရှင်းသောဝိညာဉ်တော် အပြည့်အဝရှိသူ၊ ယေဟောဝါဘုရားသခင်ထံမှ စုံလင်သော ဝေခွဲပိုင်းခြားဉာဏ်ရရှိသူ ဤသားတော်သည် ယေဟောဝါလက်တော်မှ စာလိပ်ကို အထူးခံယူထိုက်သူပင်တည်း။ ကိုယ်တော်သည် ယေဟောဝါ၏ မြင့်မြတ်လှသော အဖွဲ့အစည်း၌ ပေးအပ်သောဤတာဝန်ကို ဆောင်ရွက်ရန် တုံ့ဆိုင်းသလော။ မတုံ့ဆိုင်းပါ။ “သူသည် သွား၍ ပလ္လင်တော်ပေါ်တွင် စံတော်မူသောအရှင်၏ လက်ယာလက်တော်မှ စာလိပ်ကို ချက်ချင်းယူလေ၏။” (ဗျာဒိတ် ၅:၇) စိတ်ပါလက်ပါ လိုက်နာခြင်း၌ စံပြပါတကား။
ထောမနာသီချင်းများ
၁၄။ (က) ယေရှု စာလိပ်ကိုယူသောအခါ သက်ရှိသတ္တဝါ လေးပါးနှင့် အကြီးအကဲ ၂၄ ပါးတို့က မည်သို့တုံ့ပြန်ကြသနည်း။ (ခ) ယောဟန်ရရှိသော အကြီးအကဲ ၂၄ ပါးဆိုင်ရာသတင်းက သူတို့သည် မည်သူမည်ဝါဖြစ်ကြောင်း၊ ဘာရာထူးရှိကြောင်း မည်သို့အတည်ပြုသနည်း။
၁၄ ယေဟောဝါ၏ ပလ္လင်တော်ရှေ့မှ အခြားသူများ မည်သို့တုံ့ပြန်ကြသနည်း။ “သူသည် စာလိပ်ကိုယူသောအခါ၊ သက်ရှိသတ္တဝါ လေးပါးနှင့် အကြီးအကဲ နှစ်ဆယ့်လေးပါးတို့သည် နံ့သာပေါင်းဖြင့်ပြည့်သည့် ရွှေဖလားများနှင့် စောင်းများကို ကိုယ်စီကိုင်ဆောင်လျက် သိုးသငယ်ရှေ့တွင် ပျပ်ဝပ်ကြ၏။ နံ့သာပေါင်းမှာ သန့်ရှင်းသူတို့၏ ပတ္ထနာကို ဆိုလို၏။” (ဗျာဒိတ် ၅:၈) အကြီးအကဲ ၂၄ ပါးတို့သည် ဘုရားသခင့် ပလ္လင်တော်ရှေ့မှ သက်ရှိသတ္တဝါ ခေရုဗိမ်လေးပါးနည်းတူ ယေရှုရှေ့ပျပ်ဝပ်လျက် အာဏာတော်ကို ဝန်ခံကြ၏။ သို့တစေ၊ ဤအကြီးအကဲများ၌သာ စောင်းများနှင့် နံ့သာပေါင်းဖလားများရှိသည်။ * သူတို့သာလျှင် သီချင်းသစ်ကို ယခု သီဆိုကြသည်။ (ဗျာဒိတ် ၅:၉) သို့ဖြစ်၍ သူတို့သည် စောင်းများကိုင်လျက် သီချင်းသစ်သီဆိုကြသည့် သန့်ရှင်းသော “ဘုရားသခင်၏ ဣသရေလ” ၁၄၄,၀၀၀ နှင့် အတူတူပင်။ (ဂလာတိ ၆:၁၆; ကောလောသဲ ၁:၁၂; ဗျာဒိတ် ၇:၃-၈; ၁၄:၁-၄) ထို့ပြင် ထိုအကြီးအကဲ ၂၄ ပါးတို့သည် ကောင်းကင်ဆိုင်ရာ ယဇ်ပုရောဟိတ်လုပ်ငန်းကို လုပ်ကိုင်ကြောင်း တင်ပြထားသည်။ ယင်းလုပ်ငန်းကို တဲတော်၌ ယေဟောဝါအား နံ့သာပေါင်းမီးရှို့ပူဇော်သော ရှေးဣသရေလ ယဇ်ပုရောဟိတ်များ၏လုပ်ငန်းက ပုံခိုင်းသည်။ မောရှေပညတ်ကို ယေဟောဝါပယ်၍ ယေရှု၏ ညှဉ်းဆဲရာနှက်တိုင်ပေါ် တင်ရိုက်တော်မူစဉ် ထိုလုပ်ငန်းသည် မြေကြီးပေါ်မှာ ရပ်စဲသွားသည်။ (ကောလောသဲ ၂:၁၄) ဤအချက်များမှ ကျွန်ုပ်တို့ အဘယ်ကောက်ချက် ချနိုင်သနည်း။ ဤတွင် ဘိသိက်ခံ အောင်နိုင်သူတို့သည် ‘ဘုရားသခင်နှင့် ခရစ်တော်၏ ယဇ်ပုရောဟိတ်များအနေနှင့် ခရစ်တော်နှင့်အတူ ဘုရင်များအဖြစ် အနှစ်တစ်ထောင်အုပ်စိုး’ ခြင်းတည်းဟူသော မိမိတို့၏ နောက်ဆုံးသောတာဝန်ကို ထမ်းဆောင်နေသည်ဟူသော အချက်ပင်တည်း။—ဗျာဒိတ် ၂၀:၆။
၁၅။ (က) ရှေးဣသရေလခေတ်တွင် မည်သူသာလျှင် တဲတော်၏ အသန့်ရှင်းဆုံးဌာနအတွင်းသို့ ဝင်ခွင့်ရသနည်း။ (ခ) ယဇ်ပုရောဟိတ်မင်း အသန့်ရှင်းဆုံးဌာနထဲသို့ မဝင်မီ နံ့သာပေါင်းရှို့ခြင်းသည် သူ့အဖို့ အဘယ်ကြောင့် သေရေးရှင်ရေးဖြစ်သနည်း။
၁၅ ရှေးဣသရေလခေတ်၌ ယေဟောဝါ၏ ရှေ့တော်မှောက်ကို အထိမ်းအမှတ်ပြုသည့် အသန့်ရှင်းဆုံးဌာနထဲသို့ ယဇ်ပုရောဟိတ်မင်းသာလျှင် ဝင်ခွင့်ရသည်။ သူ့အဖို့ နံ့သာပေါင်းကို ကိုင်ဆောင်ခြင်းသည် သေရေးရှင်ရေးကိစ္စဖြစ်သည်။ ယေဟောဝါ၏ ပညတ်တော်က ဤသို့ဆို၏– “[အာရုန်သည်] ထာဝရဘုရားရှေ့တော် ယဇ်ပလ္လင်မီးခဲနှင့်ပြည့်သော လင်ပန်းကိုကိုင်လျက် ညက်စွာသော နံ့သာပေါင်းမွှေးအမှုန့်ကို မိမိလက်၌အပြည့်ယူ၍ ကုလားကာအတွင်းသို့ ဆောင်သွားရမည်။ ထိုအခါ သူသည် သေဘေးနှင့် ကင်းလွတ်မည်အကြောင်း၊ နံ့သာပေါင်းအခိုးအငွေ့သည် သက်သေခံချက်အပေါ်မှာရှိသော သေတ္တာအဖုံးကို မွှန်းစေခြင်းငှာ ထာဝရဘုရားရှေ့တော်၌ နံ့သာပေါင်းကို မီးပေါ်မှာတင်ရမည်။” (ဝတ်ပြုရာ ၁၆:၁၂၊ ၁၃) ယဇ်ပုရောဟိတ်မင်းသည် နံ့သာပေါင်းကိုမရှို့လျှင် အသန့်ရှင်းဆုံးဌာနထဲသို့ အောင်မြင်စွာ မဝင်ရောက်နိုင်။
၁၆။ (က) ခရစ်ယာန်စနစ်၌ မည်သူများ အသန့်ရှင်းဆုံးဌာနထဲသို့ ဝင်ကြသနည်း။ (ခ) ဘိသိက်ခံ ခရစ်ယာန်များ အဘယ်ကြောင့် ‘နံ့သာပေါင်းရှို့’ ရသနည်း။
၁၆ ခရစ်ယာန်စနစ်၌ ဥပမေယျဖြစ်သော ယဇ်ပုရောဟိတ်မင်း ယေရှုခရစ်သာမက၊ နောက်ဆုံး၌ လက်ထောက်ယဇ်ပုရောဟိတ် ၁၄၄,၀၀၀ တစ်ဦးစီလည်း ဥပမေယျဖြစ်သော အသန့်ရှင်းဆုံးဌာန၊ ကောင်းကင်ရှိ ယေဟောဝါ ရှေ့တော်မှောက်သို့ ဝင်ရောက်ကြ၏။ (ဟေဗြဲ ၁၀:၁၉-၂၃) အကြီးအကဲ ၂၄ ပါးကိုယ်စားပြုသော ဤယဇ်ပုရောဟိတ်များသည် ယေဟောဝါထံ မပြတ်မလပ် ဆုတောင်းခြင်း၊ တိုးလျှိုးတောင်းခံခြင်းတည်းဟူသော ‘နံ့သာပေါင်းရှို့ခြင်း’ မပြုလျှင် အသန့်ရှင်းဆုံးဌာနထဲသို့ မဝင်နိုင်။—ဟေဗြဲ ၅:၇; ယုဒ ၂၀၊ ၂၁; ဆာလံ ၁၄၁:၂ နှိုင်းယှဉ်။
သီချင်းသစ်
၁၇။ (က) အကြီးအကဲ ၂၄ ပါးသည် အဘယ်သီချင်းသစ်ကို သီဆိုကြသနည်း။ (ခ) ကျမ်းစာ၌ “သီချင်းသစ်” ဟူသောအသုံးအနှုန်းကို မည်သို့သုံးလေ့ရှိသနည်း။
၁၇ ယခု တေးသံသာ တလွင်လွင် ပျံ့လွင့်လာသည်။ သိုးသငယ်၏အပေါင်းပါ ယဇ်ပုရောဟိတ်များဖြစ်သော အကြီးအကဲ ၂၄ ပါးတို့က သိုးသငယ်အား သီဆိုခြင်းဖြစ်သည်။ “သူတို့သည် သီချင်းသစ်ကို သီဆိုလျက် ‘ကိုယ်တော်သည် စာလိပ်ကိုယူ၍ တံဆိပ်များကို ဖွင့်ထိုက်တော်မူ၏။ အကြောင်းမှာ၊ ကိုယ်တော်သည် အသတ်ခံ၍ အသွေးတော်ဖြင့် ဘုရားသခင်အဖို့ လူမျိုးနွယ်၊ ဘာသာစကား၊ လူပုဂ္ဂိုလ်၊ လူမျိုး အသီးသီးအထဲမှ လူတို့ကို ဝယ်ယူတော်မူပြီ’ ဟု လျှောက်ဆိုကြ၏။” (ဗျာဒိတ် ၅:၉) “သီချင်းသစ်” ဟူသောအသုံးအနှုန်းသည် ကျမ်းစာ၌ အကြိမ်ကြိမ်ပါရှိပြီး ယေဟောဝါ၏ တန်ခိုးကြီးသော ကယ်တင်ခြင်းလုပ်ရပ်များကို ဖော်ကျူးလေ့ရှိသည်။ (ဆာလံ ၉၆:၁; ၉၈:၁; ၁၄၄:၉) သို့ဖြင့် သီဆိုသူသည် ယေဟောဝါ၏နောက်ထပ် အံ့ဖွယ်အမှုများကို ကြွေးကြော်ပြီး ဘုန်းကြီးသောနာမတော်ကို ထပ်မံချီးမွမ်းနိုင်သဖြင့် ဤသီချင်းသည် အသစ်ဖြစ်၏။
၁၈။ အကြီးအကဲ ၂၄ ပါးက ဘာအတွက် ယေရှုကို သီချင်းသစ်ဖြင့် ထောမနာပြုကြသနည်း။
၁၈ သို့ရာတွင် ဤနေရာ၌ အကြီးအကဲ ၂၄ ပါးတို့သည် ယေဟောဝါ၏ ရှေ့တော်၌မဟုတ်ဘဲ ယေရှု၏ရှေ့တော်၌ သီချင်းသစ်ကို သီဆိုကြ၏။ သို့တစေ၊ မူအားဖြင့် မပြောင်းလဲပါ။ ဘုရားသခင့် သားတော်အနေနှင့် မိမိတို့အဖို့ပြုတော်မူသော အမှုသစ်များအတွက် ယေရှုကို သူတို့ချီးမွမ်းကြသည်။ ယေရှုသည် မိမိအသွေးတော်ဖြင့် ပဋိညာဉ်သစ်ကို ဖျန်ဖြေစေ့စပ်ပေးသဖြင့် ယေဟောဝါ အထူးပိုင်ဆိုင်ရာ လူမျိုးသစ်တစ်မျိုးကို ပေါ်ပေါက်စေတော်မူသည်။ (ရောမ ၂:၂၈၊ ၂၉; ၁ ကောရိန္သု ၁၁:၂၅; ဟေဗြဲ ၇:၁၈-၂၅) ဤဝိညာဏလူမျိုးသစ်၌ ပါဝင်သူတို့သည် ဇာတိပကတိ လူမျိုးများမှ လာကြသော်လည်း လူမျိုးတစ်မျိုးအဖြစ်၊ အသင်းတော်တစ်ခုအဖြစ်သို့ ယေရှုက သူတို့ကို စုရုံးတော်မူသည်။—ဟေရှာယ ၂၆:၂၊ ၃; ၁ ပေတရု ၂:၉၊ ၁၀။
၁၉။ (က) ဇာတိပကတိဣသရေလလူတို့သည် သစ္စာမဲ့ခြင်းကြောင့် အဘယ်ကောင်းချီးကို လက်လွှတ်ခဲ့ရသနည်း။ (ခ) ယေဟောဝါ၏ လူမျိုးသစ်သည် အဘယ်ကောင်းချီးကို ခံစားရသနည်း။
၁၉ မောရှေလက်ထက် ဣသရေလလူတို့ကို လူမျိုးတစ်မျိုးအဖြစ် ယေဟောဝါ ဖွဲ့စည်းတည်ထောင်စဉ်က သူတို့နှင့် ပဋိညာဉ်ဖွဲ့တော်မူ၏။ ထိုပဋိညာဉ်ကို သူတို့စောင့်စည်းလျှင် မိမိရှေ့တော်၌ ယဇ်ပုရောဟိတ်နိုင်ငံ ဖြစ်လာမည်ဟုလည်း ကတိပြုတော်မူသည်။ (ထွက်မြောက်ရာ ၁၉:၅၊ ၆) ဣသရေလလူမျိုးသည် သစ္စာမရှိသဖြင့် ထိုကတိတော်အကျိုးကို တစ်ခါမျှ မခံစားခဲ့ရချေ။ ယေရှု အာမခံသော ပဋိညာဉ်သစ်အားဖြင့် တည်ထောင်သည့် လူမျိုးသစ်မှာမူ သစ္စာတည်သည်။ ထို့ကြောင့် ၎င်း၏အဖွဲ့ဝင်တို့သည် ဘုရင်များအဖြစ် မြေကြီးပေါ်စိုးစံခွင့်၊ ယဇ်ပုရောဟိတ်များအဖြစ် အမှုထမ်းခွင့်ကိုရ၍ စိတ်နှလုံးရိုးဖြောင့်သူတို့ကို ယေဟောဝါနှင့် ပြန်လည်သင့်မြတ်စေရန် ကူညီနိုင်ကြသည်။ (ကောလောသဲ ၁:၂၀) သီချင်းသစ်၌ သီဆိုသကဲ့သို့ဖြစ်သည်– “ [ကိုယ်တော်သည်] သူတို့ကို ကျွန်တော်တို့၏ ဘုရားသခင်အဖို့ နိုင်ငံတော်နှင့် ယဇ်ပုရောဟိတ်များ ဖြစ်စေတော်မူ၍ သူတို့သည် ဘုရင်များအဖြစ် မြေကြီးကို အုပ်စိုးရလိမ့်မည်။” (ဗျာဒိတ် ၅:၁၀) အကြီးအကဲ ၂၄ ပါးတို့သည် ဘုန်းပွင့်သောယေရှုအား ဤထောမနာသီချင်းသစ်ဖြင့် သီဆိုချီးမွမ်းကြရ၍ ရွှင်လန်းကြရသည်တကား။
ကောင်းကင်ဘုံမှ သံပြိုင်တေး
၂၀။ သိုးသငယ်အား အဘယ်ထောမနာသီချင်းကို ယခု သီဆိုကြသနည်း။
၂၀ ဤသီချင်းသစ်ကို ယေဟောဝါအဖွဲ့အစည်း၏ မဟာကောင်းကင်ဗိုလ်ခြေထဲက အခြားသူများ မည်သို့တုံ့ပြန်သနည်း။ သူတို့၏ တစ်စိတ်တစ်ဝမ်းတည်း ညီညွတ်မှုကို ယောဟန်မြင်ရ၍ ပီတိဖြာသွားသည်။ “ထိုနောက် ငါကြည့်လိုက်သော် ပလ္လင်တော်မှအစ သက်ရှိသတ္တဝါတို့နှင့် အကြီးအကဲတို့၏ ပတ်လည်၌ရှိသည့် မြောက်မြားလှသော ကောင်းကင်တမန်များ၏ အသံကိုကြားရ၏။ သူတို့၏ အရေအတွက်မှာ အထောင်ထောင် အသောင်းသောင်း ဖြစ်၏။ သူတို့က ‘အသတ်ခံရသော သိုးသငယ်သည် တန်ခိုး၊ စည်းစိမ်၊ ဉာဏ်ပညာ၊ ခွန်အား၊ ဂုဏ်အသရေ၊ ဘုန်းအသရေနှင့် ချီးမွမ်းခြင်းတို့ကို ခံထိုက်တော်မူ၏’ ဟု ကျယ်သောအသံနှင့် မြွက်ဆိုကြ၏။” (ဗျာဒိတ် ၅:၁၁၊ ၁၂) မေ့မရနိုင်သော ထောမနာသီချင်း ပါတကား။
၂၁။ သိုးသငယ်ကို ချီးမွမ်းခြင်းကြောင့် ယေဟောဝါ၏ အချုပ်အခြာအာဏာတော်နှင့် ဌာနန္တရကို ဂုဏ်နိမ့်စေသလော။
၂၁ ယေရှုသည် တစ်နည်းတစ်ဖုံအားဖြင့် ယေဟောဝါ ဘုရားသခင်၏ နေရာကိုဝင်ယူပြီး ယခု ဖန်ဆင်းရာသတ္တဝါအားလုံး ခမည်းတော်အစား ယေရှုကို ချီးမွမ်းကြပြီဟု ဆိုလိုသလော။ လုံးဝမဟုတ်။ ဤထောမနာသီချင်းသည် တမန်တော်ပေါလု၏ အောက်ပါရေးသားချက်နှင့် ကိုက်ညီ၏– “ဘုရားသခင်သည် ကိုယ်တော် [ယေရှုခရစ်] ကို အလွန်ချီးမြှောက်၍ ဘွဲ့နာမတကာတို့ထက် ကြီးမြတ်သောဘွဲ့နာမကို ပေးသနားတော်မူ၏။ အကြောင်းမူကား၊ ကောင်းကင်သတ္တဝါ၊ မြေကြီးသတ္တဝါ၊ မြေကြီးအောက်၌ရှိသော သတ္တဝါတည်းဟူသော ခပ်သိမ်းသောသတ္တဝါတို့သည် ယေရှု၏ဘွဲ့နာမတော်ကို ဒူးထောက်၍ ယေရှုခရစ်သည် သခင်ဖြစ်တော်မူ၏ဟု နှုတ်နှင့်ဝန်ခံသဖြင့် ခမည်းတော်ဘုရား၏ ဘုန်းအသရေတော်ကို ထင်ရှားစေကြမည် အကြောင်းတည်း။” (ဖိလိပ္ပိ ၂:၉-၁၁) ယေရှုအား ချီးမွမ်းကြခြင်းမှာ ဖန်ဆင်းရာသတ္တဝါ အားလုံးရှေ့ အဓိကအရေးကိစ္စတည်းဟူသော ယေဟောဝါ၏ တရားသော အချုပ်အခြာအာဏာတော်ကို သင်္ကာယန ကင်းရှင်းစေခြင်းကိစ္စ၌ ကိုယ်တော်ပါဝင်ခဲ့သည့် အခန်းကဏ္ဍအတွက် ဖြစ်သည်။ ယင်းကြောင့် ခမည်းတော်အား မည်မျှဘုန်းထင်ရှားစေသည်တကား။
ကျယ်သည်ထက်ကျယ်လာသော ထောမနာသီချင်း
၂၂။ မြေကြီးပေါ်မှအသံများ အဘယ်ထောမနာသီချင်းကို ပါဝင်သီဆိုကြသနည်း။
၂၂ ယောဟန် ဖော်ပြသောမြင်ကွင်း၌ ကောင်းကင်ဗိုလ်ခြေတို့သည် ယေရှု၏ သစ္စာတည်ကြည်မှုနှင့် ကောင်းကင်အာဏာကို သိမှတ်သည့်အနေနှင့် ကိုယ်တော်၏ဂုဏ်ကို ရင့်ကျူးနေကြသည်။ သူတို့နှင့်အတူ မြေကြီးပေါ်ရှိ သတ္တဝါများလည်း ခမည်းတော်နှင့်သားတော် နှစ်ပါးစလုံးကို ထောမနာပြုကြသဖြင့် ချီးမွမ်းသံပို၍ ကျယ်လောင်လာသည်။ သားတစ်ယောက်၏ အောင်မြင်မှုကြောင့် မိဘများ ဂုဏ်တင့်သည်နည်းတူ ယေရှု၏ သစ္စာရှိလမ်းစဉ်ကြောင့် ဖန်ဆင်းခံသတ္တဝါ ခပ်သိမ်းတို့အလယ်တွင် “ခမည်းတော်ဘုရား၏ ဘုန်းအသရေတော်ထင်ရှား” ရပေသည်။ သို့နှင့် ယောဟန်က “ကောင်းကင်ပေါ်၊ မြေကြီးပေါ်၊ မြေကြီးအောက်၊ ပင်လယ်ပြင်ရှိ ခပ်သိမ်းသောသတ္တဝါနှင့် ထိုအရပ်ဒေသများ၌ ရှိကြသော အရာအားလုံးတို့ကလည်း ‘ပလ္လင်တော်ပေါ်တွင် စံတော်မူသောအရှင်နှင့် သိုးသငယ်သည် ချီးမွမ်းခြင်း၊ ဂုဏ်အသရေ၊ ဘုန်းအသရေ၊ အစွမ်းသတ္တိတို့နှင့် နိစ္စထာဝရ ပြည့်စုံတော်မူပါစေသတည်း’ ဟုဆိုသည်ကို ငါကြားရ၏” ဟု ဆက်လက်တင်ပြလေသည်။—ဗျာဒိတ် ၅:၁၃။
၂၃၊ ၂၄။ (က) ကောင်းကင်၌၊ ထို့နောက် မြေကြီးပေါ်တွင် ထိုထောမနာသီချင်း စတင်သီဆိုချိန်ကို အဘယ်အချက်က ပြညွှန်သနည်း။ (ခ) နှစ်များကုန်လွန်သည်နှင့်အမျှ ထောမနာသီချင်းသံ မည်သို့ကျယ်လောင်လာသနည်း။
၂၃ အမွန်မြတ်ဆုံးသော ဤထောမနာသီချင်းသည် အဘယ်အချိန်မှစ၍ ထွက်ပေါ်လာသနည်း။ သခင့်နေ့တော် စောစောပိုင်းမှ အစပြု၏။ စာတန်နှင့် သူ၏နတ်ဆိုးများ ကောင်းကင်မှ ပစ်ချခံရသည့်နောက်၌ ‘ကောင်းကင်ရှိ ခပ်သိမ်းသောသတ္တဝါ’ တို့သည် တစည်းတလုံးတည်း ဤထောမနာသီချင်းကို သီဆိုနိုင်ကြလေပြီ။ ထို့ပြင် မှတ်တမ်းတင်ပြသည့်အတိုင်း ၁၉၁၉ ခုနှစ်မှစ၍ ကမ္ဘာပေါ်၌ တညီတညွတ်တည်း ယေဟောဝါကို ချီးမွမ်းကြသောသူတို့၏ အရေအတွက်သည် ထောင်ဂဏန်းသာရှိသော်လည်း ၂၀၀၅ ခုနှစ်တွင် ခြောက်သန်းကျော်သွားလေပြီ။ * စာတန်၏ မြေကြီးဆိုင်ရာစနစ် ဖျက်ဆီးခံရပြီးနောက် ‘မြေကြီးပေါ်ရှိ ခပ်သိမ်းသောသတ္တဝါ’ တို့သည် ယေဟောဝါနှင့် သားတော်ကို ချီးမွမ်းသီဆိုကြမည်။ ယေဟောဝါ သတ်မှတ်သောအချိန်၌ အတိုင်းမသိ သန်းပေါင်းများစွာသော လူသေများ ထမြောက်လာကြမည်။ ထိုအခါ ဘုရားသခင့် မှတ်ဉာဏ်ထဲတွင်ရှိသော ‘မြေကြီးအောက်ရှိ ခပ်သိမ်းသောသတ္တဝါ’ တို့လည်း ၎င်းထောမနာသီချင်းကို ပါဝင်သီဆိုနိုင်ခွင့် ရှိကြလိမ့်မည်။
၂၄ ယခုပင် ‘မြေကြီးစွန်း၊ ပင်လယ်နှင့် ကျွန်းများ’ မှ လူသန်းပေါင်းများစွာတို့သည် ယေဟောဝါ၏ ကမ္ဘာလုံးဆိုင်ရာ အဖွဲ့အစည်းနှင့် ပူးပေါင်း၍ သီချင်းသစ်ကို ကျူးရင့်နေကြပြီ။ (ဟေရှာယ ၄၂:၁၀၊ သမ္မာ; ဆာလံ ၁၅၀:၁-၆) ဤဝမ်းမြောက်ဖွယ် ချီးမွမ်းခြင်းအသံသည် တစ်စစကျယ်လာပြီး လူသားတို့ စုံလင်ခြင်းအဆင့်သို့ရောက်ရှိရာ အနှစ်တစ်ထောင်အကုန်၌ အထွတ်အထိပ်သို့ ရောက်သွားမည်။ ထို့နောက် မဟာလှည့်စားသူ၊ ရှေးမြွေဟောင်း စာတန်ကိုယ်နှိုက် ဖျက်ဆီးခံရသဖြင့် ကမ္ဘာဦး ၃:၁၅ လုံးဝပြည့်စုံလာ၍ အသက်ရှင်သမျှ နာမ်ဝိညာဉ်နှင့် လူသားတို့သည် အောင်ခြင်းအထွတ်အထိပ်၌ “ပလ္လင်တော်ပေါ်တွင် စံတော်မူသောအရှင်နှင့် သိုးသငယ်သည် ချီးမွမ်းခြင်း၊ ဂုဏ်အသရေ၊ ဘုန်းအသရေ၊ အစွမ်းသတ္တိတို့နှင့် နိစ္စထာဝရ ပြည့်စုံတော်မူပါစေသတည်း” ဟူ၍ ညီညာဖြဖြ သီဆိုကြလိမ့်မည်။ စကြဝဠာတစ်ခွင်လုံး ကန့်ကွက်သံဟူ၍ ရှိမည်မဟုတ်။
၂၅။ (က) ယောဟန်တင်ပြသော စကြဝဠာထောမနာသီချင်းအကြောင်းကို ကျွန်ုပ်တို့ဖတ်ရ၍ အဘယ်ဆန္ဒ ဖြစ်ပေါ်လာသနည်း။ (ခ) ရူပါရုံအဆုံး၌ သက်ရှိသတ္တဝါလေးပါးနှင့် အကြီးအကဲ ၂၄ ပါးတို့က ကျွန်ုပ်တို့အဖို့ အဘယ် ထူးကဲပြောင်မြောက်သော စံနမူနာ ထားခဲ့ကြသနည်း။
၂၅ မည်မျှဝမ်းမြောက်ဖွယ် သမယဖြစ်မည်တကား။ ယောဟန် ဤတွင်ဖော်ပြသော အကြောင်းများကြောင့် ကျွန်ုပ်တို့၏နှလုံးသား၌ ပီတိလှိုင်းခတ်ကာ ကောင်းကင်ဗိုလ်ခြေတို့နှင့်အတူ ယေဟောဝါ ဘုရားသခင်နှင့် ယေရှုခရစ်ကို လှိုက်လှိုက်လှဲလှဲ ချီးမွမ်းရင့်ကျူးလိုသောဆန္ဒ တကယ်ပင် တဖွားဖွား ပေါ်ပေါက်လာပါသည်။ မှန်ကန်သောအလုပ်ကို စွဲစွဲမြဲမြဲ လုပ်ကိုင်သွားမည့် သန္နိဋ္ဌာန်စိတ် ယခင်ထက်ပို၍ မခိုင်မာလာပေလော။ ထိုသို့ပြုလျှင် ယေဟောဝါ၏ မစမှုကြောင့် ပျော်ရွှင်ဖွယ်အထွတ်အထိပ်သို့ ကျွန်ုပ်တို့တစ်ဦးချင်းအနေနှင့် ရောက်ရှိပြီး စကြဝဠာ ထောမနာသံပြိုင်တေးကို ပါဝင်သီဆိုရန် မျှော်လင့်နိုင်လိမ့်မည်။ ခေရုဗိမ်သတ္တဝါလေးပါးနှင့် ထမြောက်လာသော ဘိသိက်ခံခရစ်ယာန်တို့သည် တကယ်ပင် တစ်စိတ်တစ်ဝမ်းတည်း ရှိကြ၏။ အကြောင်းမှာ ရူပါရုံသည် အောက်ပါစကားများဖြင့် အဆုံးသတ်၏– “သက်ရှိသတ္တဝါ လေးပါးက ‘အာမင်’ ဟုဆိုကြ၏။ အကြီးအကဲတို့သည်လည်း ပျပ်ဝပ်ကိုးကွယ်ကြ၏။”—ဗျာဒိတ် ၅:၁၄။
၂၆။ အဘယ်အရာကို ကျွန်ုပ်တို့ ယုံကြည်သင့်သနည်း။ သိုးသငယ် ဘာကိုပြုရန် အသင့်ပြင်နေသနည်း။
၂၆ ချစ်လှစွာသောစာရှုသူ၊ သင်သည် ‘ထိုက်တန်သူ’ သိုးသငယ်၏ ယဇ်ကိုယုံကြည်၍ “ပလ္လင်တော်ပေါ်တွင် စံတော်မူသောအရှင်” ယေဟောဝါကို ကိုးကွယ်ဝတ်ပြုရန် နှိမ့်ချစွာအားထုတ်ခြင်းဖြင့် ကောင်းချီးခံစားရပါစေ။ ယနေ့ ယောဟန်အတန်းအစားသည် “အချိန်တန်လျှင် [ဝိညာဏ] အစားအသောက်တို့ကိုဝေ” ပေးသည်ဖြစ်၍ သူတို့၏အကူအညီကို လက်ခံပါလေ။ (လုကာ ၁၂:၄၂) သို့သော် ကြည့်ပါ။ သိုးသငယ်သည် တံဆိပ်ခုနစ်ခုကိုဖွင့်ရန် အသင့်ပြင်ထားပြီ။ ကျွန်ုပ်တို့ရှေ့တွင် အဘယ်စိတ်လှုပ်ရှားဖွယ် အရာများ ပေါ်ထွက်လာတော့အံ့နည်း။
[အောက်ခြေမှတ်ချက်]
^ အပိုဒ်၊ 14 “နံ့သာပေါင်းဖြင့်ပြည့်သည့် ရွှေဖလားများနှင့် စောင်းများကို ကိုယ်စီကိုင်ဆောင်လျက်” ဟူသောစကားသည် သဒ္ဒါအရ အကြီးအကဲများနှင့် သက်ရှိသတ္တဝါလေးပါး အုပ်စုနှစ်စုစလုံးကို ရည်ညွှန်းနိုင်သည်။ သို့တစေ၊ ရှေ့နောက်စကားက အကြီးအကဲ ၂၄ ပါးကိုသာ ရည်ညွှန်းကြောင်း သိသာစေသည်။
^ အပိုဒ်၊ 23 စာမျက်နှာ ၆၄ ပါ ဇယားကွက်ကိုရှု။
[လေ့လာရန်မေးခွန်းများ]
[စာမျက်နှာ ၈၆ ပါ ရုပ်ပုံ]
