မဟာဗာဗုလုန်ကို အဆုံးစီရင်ခြင်း
အခန်း ၃၅
မဟာဗာဗုလုန်ကို အဆုံးစီရင်ခြင်း
၁။ နီမြန်းသောသားရဲအကြောင်းကို ကောင်းကင်တမန်က မည်သို့ဖော်ပြ၍ ဗျာဒိတ်ကျမ်း၏ အထိမ်းအမှတ်များအကြောင်းကို နားလည်ရန် မည်သို့သောဉာဏ်ပညာ လိုအပ်သနည်း။
ဗဒိတ် ၁၇:၃ ပါ နီမြန်းသောသားရဲအကြောင်း ဆက်လက်ဖော်ပြရာ၌ ကောင်းကင်တမန်က ယောဟန်အား ဤသို့ဆို၏– “ဤနေရာ၌ ဉာဏ်ပညာရှိသော အသိတရားလို၏။ ဦးခေါင်းခုနစ်လုံးကား ထိုမိန်းမထိုင်သော တောင်ခုနစ်လုံးကို ဆိုလို၏။ ဘုရင်ခုနစ်ပါးလည်းရှိ၏။ ငါးပါးကျပြီ၊ တစ်ပါးရှိ၏။ အခြားတစ်ပါးမှာ ရောက်မလာသေး။ ရောက်လာသောအခါ တစ်ခဏသာ တည်ရလိမ့်မည်။” (ဗျာဒိတ် ၁၇:၉၊ ၁၀) ဤတွင် ကောင်းကင်တမန်က အထက်မှလာသော ဉာဏ်ပညာကို အသိပေးနေခြင်းဖြစ်၏။ ဗျာဒိတ်ကျမ်းပါ အထိမ်းအမှတ်များကို နားလည်စေသည့် တစ်မျိုးတည်းသော ဉာဏ်ပညာဖြစ်၏။ (ယာကုပ် ၃:၁၇) ယောဟန်အတန်းအစားနှင့် အပေါင်းပါတို့သည် ယင်းဉာဏ်အလင်းကြောင့် ကျွန်ုပ်တို့ အချိန်သမယသည် မည်မျှအရေးကြီးကြောင်း သိမြင်ရ၏။ ထိုဉာဏ်ပညာသည် သစ္စာရှိသောနှလုံးသားများတွင် ယေဟောဝါ၏ ဖော်ဆောင်လုဆဲ တရားစီရင်ချက်များကို နားလည်နိုင်သောအသိတရား ဆောက်တည်ပေး၍ ယေဟောဝါအား ရိုသေခန့်ညားသောသဘော ပျိုးထောင်ပေး၏။ သုတ္တံ ၉:၁၀ (သမ) ဆိုသည့်အတိုင်း– “ထာဝရဘုရားကို ခန့်ညားသောသဘောသည် ဉာဏ်ပညာ၏ အစမူလဖြစ်၏။ သန့်ရှင်းတော်မူသောအရှင်ကို သိကျွမ်းခြင်းသည် ဉာဏ်ပဋိဘာန်ဖြစ်၏။” ဘုရားသခင့်ဉာဏ်တော်က သားရဲနှင့်ပတ်သက်၍ ကျွန်ုပ်တို့အား ဘာကိုဖော်ပြသနည်း။
၂။ နီမြန်းသောသားရဲ၏ ဦးခေါင်းခုနစ်လုံးသည် အဘယ်အဓိပ္ပာယ်ရှိသနည်း၊ အဘယ်သို့ “ငါးပါးကျပြီ၊ တစ်ပါးရှိ၏” ဖြစ်သနည်း။
၂ ကြမ်းကြုတ်သော ထိုသားရဲ၏ ဦးခေါင်းခုနစ်လုံးသည် “တောင်ခုနစ်လုံး” သို့မဟုတ် “ဘုရင်” ခုနစ်ပါးကို တင်စား၏။ ကျမ်းစာ၌ ၎င်းအသုံးအနှုန်း နှစ်ရပ်စလုံးကို အင်အားကြီးနိုင်ငံများအား ရည်ညွှန်းလျက် သုံးနှုန်း၏။ (ယေရမိ ၅၁:၂၄၊ ၂၅; ဒံယေလ ၂:၃၄၊ ၃၅၊ ၄၄၊ ၄၅) ကျမ်းစာထဲတွင် အီဂျစ်၊ အဆီးရီးယား၊ ဘေဘီလုန်၊ မီဒို-ပါးရှား၊ ဂရိနှင့် ရောမတို့ကို ဘုရားသခင့်လူမျိုးတော်၏ အမှုအရေးအပေါ် ဩဇာသက်ရောက်သော အင်အားကြီးခြောက်နိုင်ငံအဖြစ် တင်ပြထားသည်။ ၎င်းတို့အနက် ငါးနိုင်ငံမှာ ယောဟန်ဗျာဒိတ်ရချိန်၌ ပေါ်ပြီး၍ပျောက်ကွယ်ခဲ့လေပြီ။ ထိုအချိန်တွင် ရောမသည် တန်ခိုးကြီးဆဲ ကမ္ဘာ့အင်အားကြီးနိုင်ငံဖြစ်၏။ ယင်းအချက်က “ငါးပါးကျပြီ၊ တစ်ပါးရှိ၏” ဟူသောစကားနှင့် ညီညွတ်၏။ သို့သော် လာရန်ရှိသော “အခြားတစ်ပါး” မှာ မည်သို့နည်း။
၃။ (က) ရောမအင်ပါယာ မည်သို့ပြိုကွဲခဲ့သနည်း။ (ခ) အနောက်အင်ပါယာ၌ အဘယ်အဖြစ်အပျက်များ ဖြစ်ပျက်သနည်း။ (ဂ) သာသနာစောင့်ရောမအင်ပါယာကို မည်သို့ယူမှတ်ရန်ဖြစ်သနည်း။
၃ ရောမအင်ပါယာသည် ယောဟန်လက်ထက်ကို ကျော်လွန်၍ နောက်ထပ်နှစ်ရာစုများစွာ တည်တံ့ရုံမက တိုးပင်တိုးချဲ့ခဲ့သည်။ အေဒီ ၃၃၀ ပြည့်နှစ်၌ ဧကရာဇ် ကွန်စတင်တိုင်းက မြို့တော်ကို ရောမမြို့မှ ဘိုင်ဇန်းတီယမ်းမြို့သို့ ပြောင်းရွှေ့လိုက်ပြီး ကွန်စတင်တီနိုးပယ်လ်ဟူသော အမည်သစ်ကို ပေးခဲ့သည်။ အေဒီ ၃၉၅ ခုနှစ်၌ ရောမအင်ပါယာသည် အရှေ့ပိုင်းနှင့် အနောက်ပိုင်းဟူ၍ ကွဲသွားသည်။ အေဒီ ၄၁၀ ပြည့်နှစ်တွင် ရောမမြို့ကိုယ်နှိုက်သည် အာရိယန်အမျိုးအစား “ခရစ်ယာန်” အဖြစ်သို့ ဘာသာပြောင်းခဲ့သော ဂျာမန်အနွယ် ဗစ်ဇဂေါ့သ်လူမျိုးတို့၏ဘုရင် အဲလရစ်၏လက်သို့ ကျရောက်သွားသည်။ “ခရစ်ယာန်” ဖြစ်သော ဂျာမန်အနွယ်များသည် စပိန်ကိုလည်းကောင်း၊ မြောက်အာဖရိကရှိ ရောမနယ်မြေ အမြောက်အမြားကိုလည်းကောင်း သိမ်းပိုက်ခဲ့သည်။ ဥရောပ၌ နှစ်ရာစုများစွာကြာအောင် ပြောင်းလဲမှုကြီးများ၊ ဆူပူထကြွမှုများနှင့် ချိန်ကိုက်ပြုပြင်မှုများ ဖြစ်ပွားခဲ့သည်။ အနောက်အင်ပါယာတွင် ကိုးရာစု၌ တတိယမြောက် ပုပ်ရဟန်းမင်း လီယိုနှင့် မဟာမိတ်ဖွဲ့သော ရှားလမိန်း၊ ၁၃ ရာစု၌အုပ်စိုးခဲ့သော ဒုတိယမြောက် ဖရက်ဒရစ်စသော ထင်ရှားသည့်ဧကရာဇ်များ ပေါ်ထွန်းခဲ့သည်။ သူတို့၏နယ်ပယ်ကို သာသနာစောင့်ရောမအင်ပါယာဟု သမုတ်သော်လည်း မူလရောမအင်ပါယာ တန်ခိုးအထွန်းတောက်ဆုံးအချိန်ကထက် များစွာသေးငယ်၏။ ၎င်းသည် အင်ပါယာအသစ်မဟုတ်ဘဲ ရှေးအင်အားကြီးနိုင်ငံ ပြန်လည်ထူထောင်ခြင်း သို့မဟုတ် ဆက်လက်တည်တံ့ခြင်း မျှသာဖြစ်၏။
၄။ အရှေ့အင်ပါယာသည် အဘယ်အောင်မြင်မှုများ ရှိခဲ့သော်လည်း မြောက်အာဖရိက၊ စပိန်နှင့်ဆီးရီးယားရှိ ရှေးရောမ၏ ယခင်ပိုင်နက်အများမှာ မည်သို့ဖြစ်ခဲ့သနည်း။
၄ ကွန်စတင်တီနိုးပယ်လ်မြို့ကို ဗဟိုပြုသော ရောမ၏ အရှေ့ပိုင်းအင်ပါယာသည် အနောက်အင်ပါယာကို အောင့်အည်း၍ အတန်ကြာ ဆက်ဆံလာခဲ့သည်။ ခြောက်ရာစုနှစ်တွင် အရှေ့ပိုင်းဧကရာဇ်မင်း ပထမမြောက် ဂျပ်စတင်းနီးယန်းသည် မြောက်အာဖရိက နယ်မြေများစွာကို ပြန်လည်သိမ်းပိုက်နိုင်ပြီး စပိန်နှင့် အီတလီတို့၏ အရေးကိစ္စတွင် စွက်ဖက်ခဲ့သည်။ ခုနစ်ရာစုတွင် ဒုတိယမြောက် ဂျပ်စတင်းနီးယန်းက စလပ်ဗစ်အနွယ်များ သိမ်းယူခဲ့သောနယ်မြေများကို အင်ပါယာအတွက် ပြန်လည်သိမ်းပိုက်ခဲ့သည်။ သို့ရာတွင် ရှစ်ရာစုရောက်သော် မြောက်အာဖရိက၊ စပိန်နှင့် ဆီးရီးယားရှိ ရှေးရောမနယ်ပယ်ဟောင်း အမြောက်အမြားသည် အစ္စလာမ်အင်ပါယာသစ်လက်သို့ ကျရောက်ခဲ့သဖြင့် ကွန်စတင်တီနိုးပယ်လ်နှင့် ရောမမြို့တို့၏လက်မှ လွတ်သွားသည်။
၅။ ရောမမြို့သည် အေဒီ ၄၁၀ ပြည့်နှစ်၌ ကျဆုံးခဲ့သော်လည်း နောက်ထပ် ရာစုနှစ်များစွာကြာမှသာ နိုင်ငံရေးရောမအင်ပါယာ၏ ခြေရာလက်ရာအားလုံး ကမ္ဘာ့ဇာတ်ခုံပေါ်မှ ပျောက်ကွယ်သည်မှာ အဘယ်သို့နည်း။
၅ ကွန်စတင်တီနိုးပယ်လ်မြို့ကိုယ်နှိုက်မူ ပို၍ကြာရှည်စွာ တည်တံ့ခဲ့သည်။ ၎င်းသည် ပါးရှား၊ အာရပ်၊ ဘူးလ်ဂါးနှင့် ရုရှားတို့၏ အကြိမ်ကြိမ်တိုက်ခိုက်ခြင်းကို ၁၂၀၃ ခုနှစ်အထိ ခံရပ်သော်လည်း နောက်ဆုံး၌ မွတ်စလင်များလက်သို့မဟုတ်ဘဲ အနောက်အင်ပါယာမှ ခရူးဆိတ်စစ်သူရဲများလက်သို့ ကျရောက်သွားသည်။ သို့တစေ၊ ၁၄၅၃ ခုနှစ်၌ မွတ်စလင်ဘာသာဝင် အော့တိုမန်လူမျိုးအုပ်စိုးရှင် ဒုတိယမြောက် မဲမက်၏ အာဏာအောက်သို့ ကျရောက်ပြီး မကြာမီ အော့တိုမန် သို့မဟုတ် တူရကီအင်ပါယာ၏ မြို့တော်ဖြစ်လာသည်။ သို့ဖြစ်၍ ရောမမြို့သည် အေဒီ ၄၁၀ ပြည့်နှစ်၌ ကျဆုံးသွားသော်လည်း နောက်ထပ်ရာစုနှစ်များစွာကြာမှ နိုင်ငံရေးရောမအင်ပါယာ၏ လက်ရာခြေရာအားလုံး ကမ္ဘာ့မြင်ကွင်းမှ ပျောက်ကွယ်သွားသည်။ သို့နှင့်ပင် ၎င်း၏သြဇာကို ရောမမြို့ရှိ ပုပ်ရဟန်းမင်း အုပ်ချုပ်ရေးစနစ်နှင့် အရှေ့သြသဒေါက်ချာ့ခ်ျများ၏ ဘာသာရေးအင်ပါယာများတွင် တွေ့နိုင်သေးသည်။
၆။ အဘယ်အင်ပါယာသစ်များပေါ်လာသနည်း၊ အဘယ်အင်ပါယာသည် အအောင်မြင်ဆုံး ဖြစ်လာသနည်း။
၆ သို့ရာတွင် ၁၅ ရာစုရောက်သော် အချို့နိုင်ငံများက အင်ပါယာသစ်များကို တည်ထောင်ကြ၏။ ထိုအင်အားကြီးနိုင်ငံ အင်ပါယာသစ်အချို့သည် ရောမကိုလိုနီဟောင်း၏ နယ်မြေများပေါ်မှာ တည်ထောင်သော်လည်း သူတို့၏အင်ပါယာများမှာ ရောမအင်ပါယာ၏ အဆက်များသာမဟုတ်။ ပေါ်တူဂယ်၊ စပိန်၊ ပြင်သစ်နှင့် ဟော်လန်တို့သည် ဝေးလံသောပိုင်နက်များကို အုပ်ချုပ်လာကြသည်။ သို့သော် ဗြိတိန်သည် အအောင်မြင်ဆုံးဖြစ်၍ ‘ဘယ်တော့မျှ နေမဝင်သော’ အင်ပါယာကြီးကို အုပ်စိုးခဲ့သည်။ ယင်းအင်ပါယာသည် တစ်ချိန်မဟုတ်တစ်ချိန်၌ မြောက်အမေရိက၊ အာဖရိက၊ အိန္ဒိယနှင့် အရှေ့တောင်အာရှအပြင် ကျယ်ပြန့်သော တောင်ပစိဖိတ်အထိ တိုးချဲ့ခဲ့သည်။
၇။ ပူးတွဲကမ္ဘာ့ အင်အားကြီးနိုင်ငံတစ်မျိုး မည်သို့ဖြစ်ပေါ်လာပြီး သတ္တမ ‘ဦးခေါင်း’ သို့မဟုတ် ကမ္ဘာ့အင်အားကြီးနိုင်ငံသည် မည်မျှကြာရှည်စွာ တည်ရှိမည်ဟု ယောဟန်ဆိုသနည်း။
၇ ၁၉ ရာစုရောက်သော် မြောက်အမေရိက ကိုလိုနီအချို့က ဗြိတိန်မှခွဲထွက်၍ လွတ်လပ်သော အမေရိကန်ပြည်ထောင်စုအဖြစ် တည်ထောင်လာသည်။ ထိုနိုင်ငံသစ်နှင့် အမိနိုင်ငံဟောင်းစပ်ကြား နိုင်ငံရေးပဋိပက္ခများ ဆက်လက်ဖြစ်ပွားခဲ့၏။ သို့တစေ၊ ပထမကမ္ဘာစစ်ကြောင့် ထိုနိုင်ငံနှစ်ခုစလုံးက မိမိတို့သည် တူညီသောအကျိုးစီးပွားရှိကြောင်း အသိအမှတ်ပြုခဲ့ရသည်နှင့်အမျှ အထူးချစ်ကြည်ရေးဆက်ဆံမှု၌ သွေးစည်းလာကြသည်။ သို့နှင့် ယခုအချမ်းသာဆုံးနိုင်ငံဖြစ်သော အမေရိကန်ပြည်ထောင်စုနှင့် ကမ္ဘာ့အကြီးမားဆုံး အင်ပါယာ၏နန်းစိုက်ရာ ဂရိတ်ဗြိတိန် နှစ်နိုင်ငံပူးပေါင်း၍ ပူးတွဲကမ္ဘာ့အင်အားကြီးနိုင်ငံတစ်နိုင်ငံ ဖြစ်ပေါ်လာသည်။ သို့ဖြစ်၍ ၎င်းသည် သတ္တမ ‘ဦးခေါင်း’ သို့မဟုတ် ကမ္ဘာ့အင်အားကြီးနိုင်ငံပင်ဖြစ်၍ ဆုံးခန်းကာလတိုင်အောင် တာရှည်ပြီး ၎င်း၏နယ်မြေပေါ်တွင် ယေဟောဝါ၏ ခေတ်သစ်သက်သေခံများ စတင်အခြေစိုက်ခဲ့သည်။ ဆဋ္ဌမဦးခေါင်း စိုးစံသော ရှည်လျားသည့် ကာလနှင့်နှိုင်းလျှင် သတ္တမဦးခေါင်းသည် နိုင်ငံရေးအဖွဲ့ရှိသမျှကို ဘုရားသခင့်နိုင်ငံတော် ဖျက်ဆီးသည့်အချိန်အထိ “တစ်ခဏသာ” တည်၏။
အဘယ်ကြောင့် အဋ္ဌမဘုရင်ဟုခေါ်သနည်း
၈၊ ၉။ ပုံခိုင်းချက်ဖြစ်သည့် နီမြန်းသောသားရဲကို ကောင်းကင်တမန်က မည်သို့ခေါ်ပြီး ၎င်းသည် အဘယ်နည်းဖြင့် ခုနစ်ပါးထဲမှ ပေါ်ထွက်လာသနည်း။
၈ ကောင်းကင်တမန်က ယောဟန်အား ဆက်လက်ရှင်းပြ၏– “တစ်ချိန်က ရှိခဲ့သော်လည်း ယခုမရှိသော သားရဲကိုယ်နှိုက်သည် အဋ္ဌမဘုရင်လည်းဖြစ်၏။ သို့သော် ခုနစ်ပါးထဲမှ ပေါ်ထွက်လာပြီးလျှင် ပျက်စီးခြင်းသို့ ရောက်ရလိမ့်မည်။” (ဗျာဒိတ် ၁၇:၁၁) ပုံခိုင်းသည့် နီမြန်းသောသားရဲသည် ဦးခေါင်းခုနစ်လုံးမှ “ပေါ်ထွက်” လာ၏။ ဆိုလိုသည်မှာ ၎င်းသည် “ပင်လယ်ထဲမှတက်လာ” သော မူလသားရဲ၏ ဦးခေါင်းများမှ ပေါက်ဖွားလာသည်၊ သို့မဟုတ် ၎င်းတို့ကြောင့် ဖြစ်ပေါ်လာသည်။ နီမြန်းသောသားရဲသည် မူလသားရဲ၏ ရုပ်တုပင်ဖြစ်၏။ ၎င်းသည် အဘယ်နည်းဖြင့် မူလသားရဲမှ ပေါက်ဖွားလာသနည်း။ စဉ်းစားကြည့်ပါ။ ၁၉၁၉ ခုနှစ်တွင် အင်္ဂလိပ်-အမေရိကန် အင်အားကြီးနိုင်ငံသည် တန်ခိုးကြီးထွားနေသော ဦးခေါင်းဖြစ်၏။ ယခင် ဦးခေါင်းခြောက်လုံးကျခဲ့၍ ကြီးစိုးသော ကမ္ဘာ့အင်အားကြီးနိုင်ငံ၏ရာထူးသည် ဤနှစ်လုံးတွဲဦးခေါင်း၏ လက်သို့ရောက်ရှိပြီး ၎င်းကို ဗဟိုပြုလျက်ရှိပြီဖြစ်၏။ ဤသတ္တမဦးခေါင်းသည် ကမ္ဘာ့အင်အားကြီးနိုင်ငံများ အစဉ်အဆက်၏ မျက်မှောက်ကိုယ်စားလှယ်အနေနှင့် နိုင်ငံပေါင်းချုပ်တည်ထောင်ရေး၌ တွန်းအားဖြစ်ခဲ့သည့်အပြင် ကုလသမဂ္ဂကို ထောက်ခံအားပေး၍ ငွေကြေးထောက်မမှုတွင်လည်း အဓိကပုဂ္ဂိုလ် ဖြစ်လျက်ရှိဆဲပင်။ ထို့ကြောင့် အထိမ်းအမှတ်အရ နီမြန်းသောသားရဲ—အဋ္ဌမဘုရင်—သည် မူလဦးခေါင်းခုနစ်လုံးမှ “ပေါ်ထွက်” လာသည်။ ဤရှုထောင့်မှကြည့်လျှင် ဦးခေါင်းခုနစ်လုံးထဲမှ အဋ္ဌမဘုရင်ပေါ်ထွက်လာသည် ဟူသောစကားသည် စောစောပိုင်းက ရူပါရုံနှင့် ညီညွတ်ပေသည်။ ယင်းရူပါရုံအရ သိုးသငယ်၏ ဦးချိုနှင့်တူသော ဦးချိုနှစ်ချောင်းရှိသည့်သားရဲ (မူလသားရဲ၏ သတ္တမခေါင်း အင်္ဂလိပ်-အမေရိကန် ကမ္ဘာ့အင်အားကြီးနိုင်ငံ) က ၎င်းရုပ်တုကိုပြုလုပ်ရန် တိုက်တွန်းပြီး ၎င်းရုပ်တုကို အသက်သွင်းပေး၏။—ဗျာဒိတ် ၁၃:၁၊ ၁၁၊ ၁၄၊ ၁၅။
၉ ထိုမျှမက နိုင်ငံပေါင်းချုပ်၏ မူလအဖွဲ့ဝင်များတွင် ဂရိတ်ဗြိတိန်နှင့်တကွ ယခင်ဦးခေါင်းများ၏ နန်းစိုက်ရာနေရာများ၌ အုပ်စိုးခဲ့သော အစိုးရများဖြစ်သည့် ဂရိ၊ အီရန် (ပါးရှား)၊ အီတလီ (ရောမ) နိုင်ငံများ ပါဝင်ကြသည်။ ယခင်ကမ္ဘာ့အင်အားကြီးနိုင်ငံ ခြောက်ခုချုပ်ထိန်းခဲ့သည့် နယ်ပယ်များကိုအုပ်စိုးသော အစိုးရများသည် အဆုံး၌ သားရဲ၏ရုပ်တုကို အားပေးထောက်ခံသူ အဖွဲ့ဝင်များဖြစ်လာကြသည်။ ဤအဓိပ္ပာယ်အရလည်း နီမြန်းသောသားရဲသည် ကမ္ဘာ့အင်အားကြီးနိုင်ငံ ခုနစ်နိုင်ငံမှ ပေါ်ထွက်လာသည်ဟု ဆိုနိုင်၏။
၁၀။ (က) နီမြန်းသောသားရဲ “ကိုယ်နှိုက်သည် အဋ္ဌမဘုရင်လည်းဖြစ်၏” ဟု အဘယ်သို့ဆိုနိုင်သနည်း။ (ခ) ယခင်ဆိုဗီယက်ပြည်ထောင်စု၏ ခေါင်းဆောင်တစ်ဦးက ကုလသမဂ္ဂကို ထောက်ခံသည့်အနေနှင့် မည်သို့ဆိုသနည်း။
၁၀ နီမြန်းသောသားရဲ “ကိုယ်နှိုက်သည် အဋ္ဌမဘုရင်လည်းဖြစ်” ကြောင်း သတိပြုပါ။ ထို့ကြောင့် ယနေ့ကုလသမဂ္ဂကို ကမ္ဘာ့အစိုးရတစ်ခုသဖွယ် ပုံဖော်ထားသည်။ တစ်ခါတစ်ရံ ၎င်းသည် အစိုးရတစ်ဖွဲ့ပမာ လှုပ်ရှားဆောင်ရွက်ပြီး အပြည်ပြည်ဆိုင်ရာ အငြင်းပွားမှုများကိုဖြေရှင်းရန် ကိုရီးယား၊ ဆိုင်းနိုင်းကျွန်းဆွယ်၊ အာဖရိကန်နိုင်ငံအချို့နှင့် လက်ဗနွန်နိုင်ငံများသို့ စစ်တပ်များပင် စေလွှတ်ခဲ့သည်။ သို့ပင်ငြားလည်း ၎င်းသည် ဘုရင်တစ်ပါး၏ ရုပ်တု မျှသာဖြစ်၏။ ဘာသာရေးရုပ်တု တစ်ဆူကဲ့သို့ဖြစ်ပြီး ထုလုပ်ကိုးကွယ်သော ပုဂ္ဂိုလ်များ သွင်းပေးသလောက်သာ ဩဇာတန်ခိုးရှိ၏။ ရံဖန်ရံခါ ဤပုံဆောင်သားရဲသည် ချည့်နဲ့ပုံရ၏။ သို့ရာတွင် ၎င်းသည် တွင်းနက်ကြီးထဲသို့ လှိမ့်ဆင်းခဲ့သည်တိုင်အောင် အာဏာရှင်ဆန်သော အဖွဲ့ဝင်နိုင်ငံများ၏ စွန့်ပစ်ခြင်းကိုခံခဲ့ရသည့် နိုင်ငံပေါင်းချုပ်နည်းတူ လုံးလုံးလျားလျား စွန့်ပစ်ခြင်းကို တစ်ခါမျှမခံရပါ။ (ဗျာဒိတ် ၁၇:၈) ယခင် ဆိုဗီယက်ပြည်ထောင်စု၏ ခေါင်းဆောင်ကြီးတစ်ဦးသည် အခြားကဏ္ဍများ၌ ရောမမြို့ရှိ ပုပ်ရဟန်းမင်းများနှင့် အခြေခံသဘောချင်း ကွဲပြားခြားနားသော်လည်း ၁၉၈၇ ခုနှစ်၌ ၎င်းပုပ်ရဟန်းမင်းများနည်းတူ ကုလသမဂ္ဂကို ထောက်ခံပြောဆိုခဲ့သည်။ ကုလသမဂ္ဂကိုအခြေခံသည့် “ပြည့်ဝစုံလင်သော အပြည်ပြည်ဆိုင်ရာ လုံခြုံမှုစနစ်” တည်ထောင်ဖို့ပင် အဆိုသွင်းခဲ့သည်။ ယောဟန် မကြာမီသိရသည့်အတိုင်း အာဏာခပ်စူးစူးဖြင့် ကုလသမဂ္ဂ လှုပ်ရှားဆောင်ရွက်မည့်အချိန် ရောက်လာမည်။ ထို့နောက် ၎င်း၏အလှည့်ရောက်သောအခါ “ပျက်စီးခြင်းသို့ ရောက်ရမည်။”
ဘုရင်ဆယ်ပါး တစ်နာရီမျှ
၁၁။ ပုံခိုင်းချက်ဖြစ်သည့် နီမြန်းသောသားရဲ၏ ဦးခေါင်းပေါ်မှ ဦးချိုဆယ်ချောင်းနှင့်ပတ်သက်၍ ယေဟောဝါ၏ ကောင်းကင်တမန်က ဘာပြောသနည်း။
၁၁ ဗျာဒိတ်ကျမ်း၏ ယခင်အခန်းကြီး၌ ဆဋ္ဌမနှင့် သတ္တမကောင်းကင်တမန်များက ဘုရားသခင့်အမျက်တော် ဖလားများကို သွန်းလောင်းခဲ့ကြောင်း ဖော်ပြ၏။ သို့ဖြင့် မြေကြီးဘုရင်များသည် ဘုရားသခင့်စစ်ပွဲ အာမဂေဒုန်သို့ စုရုံးခြင်းခံနေရကြောင်း၊ ‘မဟာဗာဗုလုန်အား ဘုရားသခင် သတိရတော်မူမည်’ ဖြစ်ကြောင်း ကျွန်ုပ်တို့သိရှိခဲ့ရပြီ။ (ဗျာဒိတ် ၁၆:၁၊ ၁၄၊ ၁၉) ယခုသော် သူတို့အပေါ်ချခဲ့သော စီရင်ချက်များကို မည်သို့ဖော်ဆောင်တော်မူမည်ဖြစ်ကြောင်း အသေးစိတ် သိရတော့မည်။ ယောဟန်အား ကောင်းကင်တမန် မြွက်ဆိုသည်ကို နားထောင်ပါ– “သင်မြင်ရသော ဦးချိုဆယ်ချောင်းကား နိုင်ငံကိုမရသေးသည့် ဘုရင်ဆယ်ပါးကို ဆိုလို၏။ သို့သော် သားရဲနှင့်အတူ တစ်နာရီမျှ ဘုရင့်အာဏာကို ရကြ၏။ သူတို့သည် အကြံတစ်ခုတည်း ရှိသဖြင့် မိမိတို့၏တန်ခိုးနှင့် အာဏာကို သားရဲအား ပေးအပ်ကြ၏။ ဤသူတို့သည် သိုးသငယ်နှင့် စစ်တိုက်ကြလိမ့်မည်။ သို့သော် သိုးသငယ်သည် သခင်တကာ့သခင်၊ ဘုရင်တကာ့ဘုရင် ဖြစ်သောကြောင့် သူတို့ကို အောင်နိုင်လိမ့်မည်။ ကိုယ်တော်နှင့်အတူ ခေါ်ယူရွေးကောက်တော်မူခြင်း ခံရသော သစ္စာရှိသူတို့လည်း အောင်နိုင်ကြလိမ့်မည်။”—ဗျာဒိတ် ၁၇:၁၂-၁၄။
၁၂။ (က) ဦးချိုဆယ်ချောင်းသည် ဘာကိုသရုပ်ဖော်သနည်း။ (ခ) ပုံခိုင်းသောဦးချိုဆယ်ချောင်းသည် အဘယ်သို့ ‘နိုင်ငံကိုမရသေး’ သနည်း။ (ဂ) ယခု ပုံခိုင်းသောဦးချိုဆယ်ချောင်းသည် မည်သို့ ‘နိုင်ငံ’ ရ၍ မည်မျှတာရှည်မည်နည်း။
၁၂ ဦးချိုဆယ်ချောင်းသည် လောလောဆယ် ကမ္ဘာ့ဇာတ်ခုံပေါ် ဩဇာလွှမ်းမိုး၍ သားရဲ၏ရုပ်တုကို ထောက်ခံသော အင်အားကြီးနိုင်ငံ ရှိသမျှကို သရုပ်ဖော်သည်။ ယောဟန်လက်ထက်က လူတို့သည် ယခုတည်ရှိသော နိုင်ငံများအနက် မပြောပလောက်သော နိုင်ငံအနည်းငယ်ကိုသာ သိရှိခဲ့သည်။ အီဂျစ်နှင့် ပါးရှား (အီရန်) စသော ထိုခေတ်က လူတို့သိရှိခဲ့သည့် နိုင်ငံများဆိုလျှင်လည်း ယနေ့ နိုင်ငံရေးဆောက်တည်ပုံ လုံးဝမတူတော့ချေ။ သို့ဖြစ်၍ ပထမရာစု၌ ‘ဦးချိုဆယ်ချောင်းသည် နိုင်ငံမရကြသေးချေ။’ သို့သော် သခင့်နေ့တော်ဖြစ်သည့် ယခုအချိန်၌ သူတို့သည် “နိုင်ငံ” သို့မဟုတ် နိုင်ငံရေးအာဏာ ရကြလေပြီ။ ကြီးမားသော ကိုလိုနီအင်ပါယာများ ပြိုကွဲသည်နှင့်အမျှ အထူးသဖြင့် ဒုတိယကမ္ဘာစစ်နောက်ပိုင်းတွင် နိုင်ငံသစ်များစွာ ပေါ်ထွန်းလာသည်။ ကမ္ဘာ့နိုင်ငံရေး အာဏာရှိသမျှကို အာမဂေဒုန်၌ ယေဟောဝါ အဆုံးသတ်တော်မမူမီ ထိုနိုင်ငံများနှင့်တကွ သူတို့ထက် ကြာရှည်စွာတည်ရှိခဲ့သော အင်အားကြီးနိုင်ငံတို့သည် သားရဲနှင့်အတူ တစ်ခဏ—“တစ်နာရီ”—မျှသာ အုပ်စိုးရကြမည်။
၁၃။ ဦးချိုဆယ်ချောင်းသည် အဘယ်နည်းဖြင့် “အကြံတစ်ခုတည်း” ရှိကြပြီး ယင်းကြောင့် သိုးသငယ်အပေါ် မည်သို့စိတ်ထားကြသနည်း။
၁၃ ယနေ့ မျိုးချစ်စိတ်ဓာတ်သည် ဦးချိုဆယ်ချောင်းကို လှုံ့ဆော်သော အထက်မြက်ဆုံး စွမ်းအားဖြစ်သည်။ သူတို့သည် “အကြံတစ်ခုတည်း” ရှိကြ၏။ ဆိုလိုသည်မှာ သူတို့သည် ဘုရားသခင့်နိုင်ငံတော်ကို လက်ခံမည့်အစား မိမိတို့၏အမျိုးသားရေး အချုပ်အခြာအာဏာကို တည်မြဲစေလို၏။ နိုင်ငံပေါင်းချုပ်နှင့် ကုလသမဂ္ဂကို သူတို့ထောက်ခံရာ၌ ဦးဦးဆုံး ဤရည်ရွယ်ချက်အတွက်ပင်ဖြစ်သည်—ကမ္ဘာ့ငြိမ်းချမ်းရေးကို ထိန်းသိမ်းခြင်းဖြင့် မိမိတို့၏တည်တံ့ရေးကို ကာကွယ်စောင့်ထိန်းရန်တည်း။ ဤသဘောထားကြောင့် ဦးချိုများသည် “သခင်တကာ့သခင်၊ ဘုရင်တကာ့ဘုရင်” သိုးသငယ်နှင့် ဧကန်အတိုက်အခံဖြစ်မည်။ အကြောင်းမှာ ခရစ်တော်လက်အောက်ရှိ မိမိ၏နိုင်ငံတော်အားဖြင့် ထိုနိုင်ငံများအားလုံးကို အစားထိုးရန် ယေဟောဝါ ရည်ရွယ်တော်မူသောကြောင့်ဖြစ်၏။—ဒံယေလ ၇:၁၃၊ ၁၄; မဿဲ ၂၄:၃၀; ၂၅:၃၁-၃၃၊ ၄၆။
၁၄။ လောကီအုပ်စိုးရှင်တို့သည် သိုးသငယ်ကို အဘယ်သို့တိုက်ခိုက်နိုင်သနည်း၊ အဘယ်ရလဒ် ထွက်ပေါ်လာမည်နည်း။
၁၄ ဤလောက၏ အုပ်စိုးရှင်များသည် ယေရှုအား မည်သို့မျှ မထိပါးနိုင်ပါ။ ကိုယ်တော်သည် သူတို့လက်လှမ်းမမှီနိုင်သော ကောင်းကင်ဘုံ၌ရှိတော်မူ၏။ သို့ရာတွင် ယေရှု၏ညီတော်များ၊ မိန်းမ၏အမျိုးအနွယ် အကြွင်းအကျန်များမူ မြေကြီးပေါ်မှာရှိပြီး အကာအကွယ်ကင်းမဲ့ဟန်ရှိ၏။ (ဗျာဒိတ် ၁၂:၁၇) ဦးချိုအတော်များများက သူတို့အပေါ် ခါးခါးသီးသီးရန်လိုသော သဘောရှိကြောင်း ပြသခဲ့လေပြီ။ ဤနည်းအားဖြင့် သူတို့သည် သိုးသငယ်ကို စစ်တိုက်ကြ၏။ (မဿဲ ၂၅:၄၀၊ ၄၅) သို့သော် များမကြာမီ “အထက်ဆိုခဲ့ပြီးသော နိုင်ငံရှိသမျှတို့ကို” ဘုရားသခင့်နိုင်ငံတော်က “ချိုးဖဲ့ဖျက်ဆီး” ရန်အချိန် ဆိုက်ရောက်လာမည်။ (ဒံယေလ ၂:၄၄၊ ၄၅) ထိုအခါ ကျွန်ုပ်တို့ တွေ့ရတော့မည့်အတိုင်း မြေကြီးဘုရင်တို့သည် သိုးသငယ်နှင့် နောက်ဆုံးစစ် ဆင်နွှဲလိမ့်မည်။ (ဗျာဒိတ် ၁၉:၁၁-၂၁) သို့ရာတွင် လူမျိုးများသည် အောင်ပွဲခံမည်မဟုတ်ကြောင်း ကျွန်ုပ်တို့ ကျေနပ်လောက်အောင် သိရှိရပြီဖြစ်၏။ သူတို့နှင့် နီမြန်းသောသားရဲ ကုလသမဂ္ဂတို့သည် “အကြံတစ်ခုတည်း” ရှိကြသော်လည်း “သခင်တကာ့သခင်၊ ဘုရင်တကာ့ဘုရင်” အပေါ် အောင်ပွဲခံနိုင်မည်မဟုတ်။ ကိုယ်တော်၏ မြေကြီးပေါ်ရှိဆဲ ဘိသိက်ခံနောက်တော်လိုက်များပါဝင်သော “ကိုယ်တော်နှင့်အတူ ခေါ်ယူရွေးကောက်တော်မူခြင်းခံရသော သစ္စာရှိသူတို့” အပေါ်လည်း စစ်နိုင်လိမ့်မည်မဟုတ်။ ဤနောက်တော်လိုက်တို့သည် စာတန်၏ယုတ်မာသော စွပ်စွဲချက်များကို ဖြေဆိုသည့်အနေနှင့် သမာဓိစောင့်သိခြင်းဖြင့် အောင်နိုင်ကြလိမ့်မည်။—ရောမ ၈:၃၇-၃၉; ဗျာဒိတ် ၁၂:၁၀၊ ၁၁။
ပြည့်တန်ဆာကို ပျက်ပြုန်းစေခြင်း
၁၅။ ပြည့်တန်ဆာအကြောင်း၊ ဦးချိုဆယ်ချောင်းနှင့် သားရဲတို့က သူ့အပေါ်မည်သို့သဘောထားပြီး သူ့အားမည်သို့ပြုမည်အကြောင်း ကောင်းကင်တမန်က မည်သို့ဆိုသနည်း။
၁၅ ဘုရားသခင့် လူမျိုးတော်သာလျှင် ဦးချိုဆယ်ချောင်း၏ ရန်ငြိုးကိုခံရသည်မဟုတ်။ ကောင်းကင်တမန်က ယောဟန်၏အာရုံကို ပြည့်တန်ဆာအပေါ် ပြန်၍စူးစိုက်စေသည်– “ကောင်းကင်တမန်က ‘သင်မြင်ရသော ပြည့်တန်ဆာ ထိုင်နေသည့် ရေများသည် လူပုဂ္ဂိုလ်များ၊ လူအုပ်များ၊ လူမျိုးများနှင့် ဘာသာစကားများကို ဆိုလို၏။ သင်မြင်ရသော ဦးချိုဆယ်ချောင်းနှင့် သားရဲတို့သည် ပြည့်တန်ဆာကို မုန်းသဖြင့် သူ့ကို ပျက်ပြုန်းစေ၍ အဝတ်အချည်းစည်း ရှိစေလျက် သူ၏အသားကို စားပြီးလျှင် သူ့ကို အပြီးအပိုင် မီးရှို့ပစ်လိမ့်မည်’ ဟုငါ့အားဆို၏။”—ဗျာဒိတ် ၁၇:၁၅၊ ၁၆။
၁၆။ မဟာဗာဗုလုန်သည် နိုင်ငံရေးအစိုးရများ၏ တိုက်ခိုက်မှုကို ခံရသောအခါ အကာအကွယ်အတွက် မိမိ၏ရေများကို အဘယ်ကြောင့် အားထားနိုင်မည် မဟုတ်သနည်း။
၁၆ ရှေးဗာဗုလုန်မြို့သည် ကျုံးရေ၏အကာအကွယ်ကို အားထားသကဲ့သို့ ယနေ့ မဟာဗာဗုလုန်လည်း “လူပုဂ္ဂိုလ်များ၊ လူအုပ်များ၊ လူမျိုးများနှင့် ဘာသာစကားများ” ဖြစ်သော ကြီးမားသည့် အသင်းသားထုကို အားထား၏။ မဟာဗာဗုလုန်ကို မြေကြီးပေါ်မှ နိုင်ငံရေးအစိုးရများက တရကြမ်းတိုက်ခိုက်မည်ဟူသော တုန်လှုပ်ဖွယ် အဖြစ်အပျက်တစ်ရပ်အကြောင်းကို မပြောမီ ကျွန်ုပ်တို့အား ဤလူများအကြောင်းကို ကောင်းကင်တမန်က သတိပြုစေသည်မှာ ဆီလျော်ပေ၏။ ထိုသို့တိုက်ခိုက်သောအခါ “လူပုဂ္ဂိုလ်များ၊ လူအုပ်များ၊ လူမျိုးများနှင့် ဘာသာစကားများ” က ဘာပြုကြမည်နည်း။ ဘုရားသခင့်လူမျိုးတော်က ဥဖရတ်မြစ်ရေ ခန်းခြောက်မည်ဟု မဟာဗာဗုလုန်အား သတိပေးနေပြီဖြစ်၏။ (ဗျာဒိတ် ၁၆:၁၂) အဆုံး၌ ၎င်းရေများ လုံးဝခြောက်သွေ့သွားလိမ့်မည်။ ၎င်းတို့သည် အရေးကြီးဆုံးအချိန်တွင် ရွံရှာဖွယ် ပြည့်တန်ဆာအိုကြီးအား ထိထိရောက်ရောက် အကာအကွယ် ပေးနိုင်မည်မဟုတ်။—ဟေရှာယ ၄၄:၂၇; ယေရမိ ၅၀:၃၈; ၅၁:၃၆၊ ၃၇။
၁၇။ (က) မဟာဗာဗုလုန်၏ ရွှေငွေဥစ္စာသည် အဘယ်ကြောင့် သူ့အား ကယ်တင်မည် မဟုတ်သနည်း။ (ခ) မဟာဗာဗုလုန်၏ ဇာတ်သိမ်းခန်းသည် အဘယ်သို့ မရှုမလှ ဖြစ်မည်နည်း။ (ဂ) ဦးချိုဆယ်ချောင်း သို့မဟုတ် တိုင်းနိုင်ငံများအပြင် အဘယ်အရာလည်း မဟာဗာဗုလုန်ကို ဝရုန်းသုန်းကား ပါဝင်ဖျက်ဆီးမည်နည်း။
၁၇ မဟာဗာဗုလုန်၏ ပေါများကြွယ်ဝသောစည်းစိမ်သည် သူ့ကို မုချကယ်တင်နိုင်မည်မဟုတ်။ သူ့အား မြန်မြန်ဆန်ဆန် ပျက်စီးစေမည့်အကြောင်းပင်ရှိ၏။ အကြောင်းမှာ ရူပါရုံက သားရဲနှင့် ဦးချိုဆယ်ချောင်းတို့သည် ပြည့်တန်ဆာကို အငြိုးတကြီး တိုက်ခိုက်သောအခါ သူ၏ ရွှန်းတင့်လှပသောအဝတ်နှင့် လက်ဝတ်ရတနာအားလုံးကို ချွတ်ယူမည်ဖြစ်ကြောင်းပြ၏။ သူ၏ရွှေငွေဥစ္စာကို လုယူကြမည်။ သူ့ကို “အဝတ်အချည်းစည်း ရှိစေလျက်” သူ၏ဇာတိရုပ်လုံးကို ဖော်ထုတ်၍ အရှက်ခွဲကြမည်။ ကြီးစွာသော ပျက်စီးပြုန်းတီးခြင်းပါတကား။ ထို့ပြင် သူ၏ဇာတ်သိမ်းခန်းလည်း အသရေမဲ့လိုက်လေခြင်း။ သူတို့သည် သူ့ကိုဖျက်ဆီးပြီး “သူ၏အသားကိုစား” ၍ သက်မဲ့အရိုးစုဖြစ်စေမည်။ နောက်ဆုံး၌ “သူ့ကို အပြီးအပိုင် မီးရှို့ပစ်လိမ့်မည်။” သူသည် အသရေရှိရှိ သင်္ဂြိုဟ်မခံရဘဲ ကူးစက်ရောဂါပိုး သယ်ဆောင်ထားသူကဲ့သို့ မီးရှို့ခြင်းခံရသည်တကား။ ဦးချိုဆယ်ချောင်း ကိုယ်စားပြုသော လူမျိုးများကသာ မဟာဗာဗုလုန်ကို ဖျက်ဆီးလိုက်သည်မဟုတ်။ ကုလသမဂ္ဂတည်းဟူသော “သားရဲ” ကိုယ်တိုင်လည်း ဤဝရုန်းသုန်းကား ဖျက်ဆီးမှုတွင် ပါဝင်၏။ ၎င်းသည် မိစ္ဆာဘာသာတရားကိုဖျက်ဆီးရန် ခွင့်ပြုချက်ပေးမည်။ ကုလသမဂ္ဂအဖွဲ့ဝင်နိုင်ငံ ၁၉၀ ကျော်အနက် အများက ဘာသာတရား၊ အထူးသဖြင့် ခရစ်ယာန်ဘောင်ကို ရန်လိုကြောင်း ၎င်းတို့၏မဲပေးပုံဖြင့် ပြသခဲ့ပြီဖြစ်သည်။
၁၈။ (က) ဗာဗုလုန်ဆိုင်ရာ ဘာသာတရားကို လူမျိုးများတိုက်ခိုက်မည့် အဘယ် အလားအလာ ကို တွေ့နေရပြီဖြစ်သနည်း။ (ခ) ပြည့်တန်ဆာကြီးကို မီးကုန်ယမ်းကုန်တိုက်ခိုက်သော အခြေခံအကြောင်းရင်းမှာ အဘယ်အရာ ဖြစ်မည်နည်း။
၁၈ လူမျိုးများသည် မိမိတို့၏တိတ်တိတ်ပုန်း ရည်းစားဟောင်းကို အဘယ်ကြောင့် ဤမျှကြမ်းကြုတ်ခက်ထန်စွာ ဆက်ဆံမည်နည်း။ မကြာသေးမီက သမိုင်းဖြစ်ရပ်များကိုကြည့်လျှင် ဗာဗုလုန်ဆိုင်ရာဘာသာတရားကို တိုက်ခိုက်ကြမည့် အလားအလာ ရှိကြောင်း တွေ့ခဲ့ရပြီ။ ယခင်ဆိုဗီယက်ပြည်ထောင်စုနှင့် တရုတ်စသောနိုင်ငံများ၌ အစိုးရ၏ဆန့်ကျင်မှုကြောင့် ဘာသာရေးသြဇာ အကြီးအကျယ် လျော့နည်းခဲ့သည်။ ဥရောပတိုက်ရှိ ပရိုတက်စတင့်နယ်ပယ် အပိုင်းအခြားများတွင်လည်း ဘာသာရေးကို စိတ်မဝင်စားမှုနှင့် သံသယစိတ် ပျံ့နှံ့မှုကြောင့် ဘုရားရှိခိုးကျောင်းများ ဟာလာဟင်းလင်းဖြစ်ခဲ့ကြရာ ဘာသာတရားသည် သေသည်နှင့်မခြား ဖြစ်လေပြီ။ ကက်သလစ် အင်ပါယာကြီးလည်း အတွင်းပုန်ကန်မှုနှင့် စိတ်သဘောကွဲလွဲမှုကြောင့် ဖရိုဖရဲဖြစ်ပြီး ၎င်း၏ခေါင်းဆောင်များလည်း ငြိမ်သက်အောင် မပြုလုပ်နိုင်။ သို့တစေ၊ မဟာဗာဗုလုန်ကို နောက်ဆုံး မီးကုန်ယမ်းကုန် တိုက်ခိုက်ခြင်းမှာ ပြည့်တန်ဆာကြီးနှင့်ဆိုင်သော ဘုရားသခင်၏ မပြောင်းလဲနိုင်သည့် တရားစီရင်ချက်ပင်ဖြစ်ကြောင်း မမေ့သင့်။
ဘုရားသခင့်အကြံတော်အတိုင်း လုပ်ဆောင်ခြင်း
၁၉။ (က) ဘီစီ ၆၀၇ ခုနှစ်တွင် အယူဖောက်ပြန်သော ယေရုရှလင်အပေါ် ယေဟောဝါ တရားစီရင်ခြင်းက ပြည့်တန်ဆာကြီးအပေါ် တရားစီရင်တော်မူခြင်းအကြောင်းကို မည်သို့နားလည်စေနိုင်သနည်း။ (ခ) ဘီစီ ၆၀၇ ခုနှစ်နောက်ပိုင်း ယေရုရှလင်မြို့၏ လူမနေသော ဆိတ်ညံခြင်းအဖြစ်က ယနေ့အဖို့ ဘာကိုတင်ကူး ခိုင်းနှိုင်းသနည်း။
၁၉ ဤတရားစီရင်ချက်ကို ယေဟောဝါ မည်သို့အကောင်အထည် ဖော်တော်မူသနည်း။ ရှေးက အယူဝါဒဖောက်ပြန်သော လူမျိုးတော်အား ယေဟောဝါအရေးယူခဲ့ပုံကိုကြည့်လျှင် နားလည်နိုင်ပါလိမ့်မည်။ သူတို့နှင့်ပတ်သက်၍ ကိုယ်တော်ဤသို့မိန့်တော်မူ၏– “ယေရုရှလင်မြို့သား ပရောဖက်တို့၌လည်း စက်ဆုပ်ရွံရှာဖွယ်သောသဘောကို ငါမြင်ပြီ။ သူတို့သည် မတရားသောမေထုန်၌မှီဝဲလျက် မုသားကိုလည်းသုံးလျက် အဓမ္မပြုသောသူတို့ကို အားပေးတတ်သဖြင့် အဘယ်သူမျှ မိမိပြုသော အဓမ္မအမှုကိုမစွန့်။ ထိုသူရှိသမျှတို့သည် ငါ၌ သောဒုံမြို့သားကဲ့သို့လည်းကောင်း၊ ယေရုရှလင်မြို့သားတို့သည် ဂေါမောရမြို့သားကဲ့သို့လည်းကောင်း ဖြစ်ကြ၏။” (ယေရမိ ၂၃:၁၄) ဘီစီ ၆၀၇ ခုနှစ်တွင် ယေဟောဝါသည် နေဗုခဒ်နေဇာကိုသုံးလျက် ဝိညာဉ်ရေးအရ မျောက်မထားသော၎င်းမြို့၏ ‘အဝတ်ကိုချွတ်၍ လှပသောတန်ဆာတို့ကို သိမ်းယူပြီး ၎င်းအား အဝတ်အချည်းစည်း ရှိရစ်စေ’ တော်မူ၏။ (ယေဇကျေလ ၂၃:၄၊ ၂၆၊ ၂၉) ထိုခေတ်က ယေရုရှလင်မြို့သည် ယနေ့ခရစ်ယာန်ဘောင်၏ ပုံစံဖြစ်ပြီး စောစောပိုင်းက ရူပါရုံ၌ ယောဟန်မြင်ရသည့်အတိုင်း ခရစ်ယာန်ဘောင်နှင့် ကျန်ကြွင်းသော မိစ္ဆာဘာသာတရားများကို အလားတူစွာ ယေဟောဝါအပြစ်ဒဏ် ခတ်တော်မူမည်။ ဘီစီ ၆၀၇ ခုနှစ်နောက်ပိုင်း ယေရုရှလင်မြို့၏ ဆိတ်ညံ၍ လူမနေသောအဖြစ်က ဘာသာရေးခရစ်ယာန်ဘောင်သည် စည်းစိမ်ဥစ္စာအချွတ်ခံရပြီး အရှက်ခွဲခံရသည့်အခါ အဘယ်ပုံစံထွက်မည်ကိုပြ၏။ မဟာဗာဗုလုန်၏ ကျန်အပိုင်းများလည်း သက်သာမည်မဟုတ်။
၂၀။ (က) ယေဟောဝါသည် လူ့အုပ်စိုးရှင်များကို တစ်ဖန်သုံး၍ မိမိ၏တရားစီရင်ချက်ကို ဖော်ဆောင်တော်မူမည်ဖြစ်ကြောင်း ယောဟန် မည်သို့တင်ပြသနည်း။ (ခ) ဘုရားသခင်၏ “အကြံတော်” ကား အဘယ်နည်း။ (ဂ) လူမျိုးများသည် အဘယ်နည်းဖြင့် မိမိတို့၏ “တစ်ခုတည်းသောအကြံ” ကို ဖော်ဆောင်ကြမည်ဖြစ်သော်လည်း စင်စစ်အားဖြင့် မည်သူ့အကြံကို သူတို့ဖော်ဆောင်နေခြင်း ဖြစ်မည်နည်း။
၂၀ လူ့အုပ်စိုးရှင်များကို ယေဟောဝါ တစ်ဖန်သုံးလျက် မိမိ၏တရားစီရင်ချက်ကို အကောင်အထည် ဖော်တော်မူ၏။ “အကြောင်းမှာ ဘုရားသခင်သည် သူတို့အား မိမိ၏အကြံတော်ကို ဖော်ဆောင်စေရန်လည်းကောင်း၊ ဘုရားသခင်၏ နှုတ်ကပါဌ်တော် ဖြစ်မြောက်သည်တိုင်အောင် သူတို့၏နိုင်ငံကို သားရဲအားပေးခြင်းဖြင့် သူတို့၏ တစ်ခုတည်းသောအကြံကို ဖော်ဆောင်စေရန်လည်းကောင်း သူတို့၏နှလုံးထဲသို့ အကြံသွင်းတော်မူ၏။” (ဗျာဒိတ် ၁၇:၁၇) ဘုရားသခင့် “အကြံတော်” ကားအဘယ်နည်း။ မဟာဗာဗုလုန်ကို အဆုံးစီရင်မည့်သူများအား စည်းလုံးစေပြီး သူ့အား အပြီးအငြိမ်း ဖျက်ဆီးစေရန်တည်း။ အုပ်စိုးရှင်များက သူ့ကိုတိုက်ခိုက်ကြသည်မှာ မိမိတို့၏ “တစ်ခုတည်းသောအကြံ” ကိုဖော်ဆောင်ရန်ဖြစ်မည်မှာ ဆိုဖွယ်မရှိ။ မိမိတို့၏ အမျိုးသားရေး အကျိုးစီးပွားအတွက် ပြည့်တန်ဆာကြီးကို တိုက်ခိုက်ရမည်ဟု သူတို့ယူဆကြ၏။ မိမိတို့နယ်မြေအတွင်း ဖွဲ့စည်းထားသော ဘာသာတရား ဆက်လက်တည်ရှိခြင်းသည် မိမိတို့၏ အချုပ်အခြာအာဏာကို အန္တရာယ်ဖြစ်စေသည်ဟု သူတို့ယူမှတ်လာကောင်း ယူမှတ်လာကြမည်။ သို့သော် စင်စစ်အားဖြင့် ယေဟောဝါက အကွက်ဆင်လျက်ရှိတော်မူမည်။ သူတို့သည် ကိုယ်တော်၏ မျောက်မထားသော ရန်သူဟောင်းကို ဖျက်ဆီးခြင်းဖြင့် ကိုယ်တော်၏ အကြံတော်ကို ဖော်ဆောင်ကြလိမ့်မည်။—ယေရမိ ၇:၈-၁၁၊ ၃၄ နှိုင်းယှဉ်။
၂၁။ မဟာဗာဗုလုန်ကို ဖျက်ဆီးရာ၌ နီမြန်းသောသားရဲကို သုံးမည်ဖြစ်ရကား ကုလသမဂ္ဂနှင့်ပတ်သက်၍ လူမျိုးများက မည်သို့ပြုမည်ဖြစ်ကြောင်း ထင်ရှားသနည်း။
၂၁ မှန်ပေသည်။ လူမျိုးတို့သည် နီမြန်းသောသားရဲ ကုလသမဂ္ဂကိုသုံး၍ မဟာဗာဗုလုန်ကို ဖျက်ဆီးကြလိမ့်မည်။ သူတို့သဘောဖြင့်သူတို့ လုပ်ဆောင်ကြသည်မဟုတ်။ အကြောင်းမှာ “သူတို့၏နိုင်ငံကို သားရဲအားပေးခြင်းဖြင့် သူတို့၏ တစ်ခုတည်းသောအကြံကို ဖော်ဆောင်စေရန်” သူတို့၏နှလုံးထဲသို့ ယေဟောဝါ အကြံသွင်းတော်မူ၏။ အချိန်တန်လျှင် လူမျိုးတို့သည် ကုလသမဂ္ဂကို အားဖြည့်ကြလိမ့်မည်။ ကိုက်ဖြတ်စရာသွားကို ကုလသမဂ္ဂအား ပေးသည့်အလား မိမိတို့၌ရှိသမျှသော အာဏာတန်ခိုးကိုပေးသဖြင့် ကုလသမဂ္ဂသည် မိစ္ဆာဘာသာကိုတိုက်ခိုက်၍ “ဘုရားသခင်၏ နှုတ်ကပါဌ်တော် ဖြစ်မြောက်သည်တိုင်အောင်” သူ့အပေါ် အောင်ပွဲဆင်လိမ့်မည်။ ဤနည်းအားဖြင့် ရှေးပြည့်တန်ဆာသည် ဇာတ်သိမ်းရလိမ့်မည်။ သူမရှိမှ အေးရလိမ့်မည်။
၂၂။ (က) ဗျာဒိတ် ၁၇:၁၈ ၌ ကောင်းကင်တမန်က မိမိ၏ထွက်ဆိုချက်ကို နိဂုံးချုပ်ပုံအားဖြင့် ဘာကိုပြဆိုသနည်း။ (ခ) ယေဟောဝါသက်သေများသည် ထိုလျှို့ဝှက်နက်နဲရာအကြောင်း ဇာတ်ရည်လည်လာသဖြင့် မည်သို့ပြုကြသနည်း။
၂၂ ကောင်းကင်တမန်က ကမ္ဘာ့မိစ္ဆာ ဘာသာရေးအင်ပါယာသည် ယေဟောဝါ၏ တရားစီရင်ကွပ်မျက်ခြင်း ဧကန်ခံရမည်ကို အလေးအနက် ဖော်ပြလိုသည့်အလား မိမိ၏ထွက်ဆိုချက်ကို ဤသို့အဆုံးသတ်လိုက်သည်– “သင်မြင်ရသော မိန်းမသည် မြေကြီးပေါ်ရှိ ဘုရင်များကို အုပ်စိုးသောနိုင်ငံရှိသည့် မြို့ကြီးကို ဆိုလိုသတည်း။” (ဗျာဒိတ် ၁၇:၁၈) မဟာဗာဗုလုန်သည် ဗေလရှာဇာလက်ထက်က ဗာဗုလုန်နိုင်ငံကဲ့သို့ “ချိန်ခွင်နှင့်ချိန်၍ လျော့ကြောင်း” တွေ့ရပြီ။ (ဒံယေလ ၅:၂၇) သူ့ကိုအဆုံးစီရင်ခြင်းသည် မြန်ဆန်၍ အပြီးအပြတ်ဖြစ်လိမ့်မည်။ ယေဟောဝါသက်သေများအနေဖြင့် ပြည့်တန်ဆာကြီးနှင့် နီမြန်းသောသားရဲဆိုင်ရာ လျှို့ဝှက်နက်နဲရာအကြောင်း ဇာတ်ရည်လည်လာသည်နှင့်အမျှ မည်သို့ပြုကြသနည်း။ ယေဟောဝါ၏ တရားစီရင်ရာနေ့အကြောင်းကို စိတ်ထက်သန်စွာ ကြွေးကြော်ကြပြီး တစ်ချိန်တည်းတွင် သမ္မာတရားကို အပတ်တကုတ် ရှာဖွေသူများအား “ယဉ်ကျေးသောစကား” ဖြင့် ဖြေကြားကြ၏။ (ကောလောသဲ ၄:၅၊ ၆၊ သမ; ဗျာဒိတ် ၁၇:၃၊ ၇) ရှေ့လာမည့်အခန်း တင်ပြမည်ဖြစ်သည့်အတိုင်း ပြည့်တန်ဆာကြီး ကွပ်မျက်ခံရသောအခါ အသက်ချမ်းသာရလိုသူအားလုံး မြန်မြန်ဆန်ဆန် ပြုမူဆောင်ရွက်ရမည် ဖြစ်သတည်း။
[လေ့လာရန်မေးခွန်းများ]
[စာမျက်နှာ ၂၅၂ ပါ ရုပ်ပုံ]
ကမ္ဘာ့အင်အားကြီးနိုင်ငံ ခုနစ်ဆက်
အီဂျစ်
အဆီးရီးယား
ဘေဘီလုန်
မီဒို-ပါးရှား
ဂရိ
ရောမ
အင်္ဂလိပ်-အမေရိကန်
[စာမျက်နှာ ၂၅၄ ပါ ရုပ်ပုံ]
“သားရဲကိုယ်နှိုက်သည် အဋ္ဌမဘုရင်လည်းဖြစ်”
[စာမျက်နှာ ၂၅၅ ပါ ရုပ်ပုံ]
သူတို့သည် သိုးသငယ်ကို ကျောခိုင်းလျက် “မိမိတို့၏တန်ခိုးနှင့် အာဏာကို သားရဲအား ပေးအပ်ကြ၏”
[စာမျက်နှာ ၂၅၇ ပါ ရုပ်ပုံ]
မဟာဗာဗုလုန်၏ အဓိက အစိတ်အပိုင်းဖြစ်သော ခရစ်ယာန်ဘောင်သည် ရှေးယေရုရှလင်နည်းတူ လုံးဝပျက်ပြုန်းလိမ့်မည်
