မီးဖြင့် သန့်စင်ပြီးသော ရွှေကိုဝယ်ပါ
အခန်း ၁၃
မီးဖြင့် သန့်စင်ပြီးသော ရွှေကိုဝယ်ပါ
လောဒိကိ
၁၊ ၂။ ဘုန်းပွင့်ယေရှုထံမှ သတင်းတော်ရရှိသော အသင်းတော်ခုနစ်ခုမှ နောက်ဆုံးအသင်းတော်သည် မည်သည့်နေရာတွင် တည်ရှိသနည်း။ ထိုမြို့၏ အင်္ဂါရပ်အချို့မှာ အဘယ်နည်း။
လာဒိကိကား ထမြောက်ခဲ့သော ယေရှုထံမှ သတင်းတော်ရရှိသော အသင်းတော်ခုနစ်ခုအနက် နောက်ဆုံးအသင်းတော်ဖြစ်သည်။ ၎င်းသတင်းတော်၌ မျက်စိပွင့်စေသော အားတက်ဖွယ် အကြောင်းအရာများ ပါရှိသည်တကား။
၂ လောဒိကိမြို့ အပြိုအပျက်များကို ယနေ့၊ အာလရှဟီးရ်မြို့၏ အရှေ့တောင်ဘက်၊ ၅၅ မိုင်ခန့်အကွာ ဒင်းနစ်ဇလီးမြို့အနီးတွင် တွေ့နိုင်သည်။ ပထမရာစု၌ လောဒိကိမြို့သည် ကြီးပွားချမ်းသာသောမြို့ဖြစ်သည်။ ၎င်းသည် လမ်းဆုံလမ်းခွကြီးပေါ်တည်ရှိ၍ ဘဏ်လုပ်ငန်းနှင့် ကုန်သွယ်ရေးအတွက် အချက်အချာကျသည်။ နာမည်ကျော် မျက်စဉ်းဆေး ရောင်းချမှုကြောင့်လည်း ချမ်းသာရခြင်းဖြစ်သည်။ ထို့ပြင် သေးသွယ်နူးညံ့သော သိုးမွေးနက်ဖြင့်ရက်လုပ်သည့် အရည်အသွေးကောင်းသော ဝတ်ရုံကြောင့်လည်း ကျော်ကြားသည်။ မြို့၏အဓိကပြဿနာမှာ ရေရှားပါးမှုဖြစ်၍ ခပ်ဝေးဝေးက ရေပူစမ်းများမှ ရေသွယ်ယူခြင်းဖြင့် ပြေလည်စေသည်။ သို့ဖြစ်၍ ရေသည် မြို့ထဲသို့ ရောက်သောအခါ မပူမအေးသာ ရှိတော့သည်။
၃။ လောဒိကိမြို့ရှိ အသင်းတော်ထံပေးပို့သောသတင်းကို ယေရှုမည်သို့ နိဒါန်းပျိုးသနည်း။
၃ လောဒိကိမြို့သည် ကောလောသဲမြို့နှင့် နီး၏။ ကောလောသဲမြို့သားများထံ တမန်တော်ပေါလု စာရေးစဉ် လောဒိကိမြို့သားများထံ စာတစ်စောင်ပို့ခဲ့ကြောင်း ဖော်ပြသည်။ (ကောလောသဲ ၄:၁၅၊ ၁၆) ထိုစာ၌ ပေါလု ဘာအကြောင်း ရေးခဲ့သည်ကို ကျွန်ုပ်တို့မသိပါ။ သို့သော် လောဒိကိမြို့သားများထံ ယခု ယေရှုပေးပို့သော သတင်းတော်အရ၊ သူတို့သည် ဝိညာဉ်ရေးဘက်တွင် ဝမ်းနည်းဖွယ်အခြေအနေသို့ ကျဆင်းခဲ့လေပြီ။ သို့တစေ၊ ယေရှုက ခါတိုင်းကဲ့သို့ မိမိ၏အရည်အချင်းကို ဤသို့ဦးစွာတင်ပြသည်– “လောဒိကိမြို့ရှိ အသင်းတော်၏ ကောင်းကင်တမန်ထံ ဤသို့ရေးလော့– ဤကား သစ္စာရှိ၍ စစ်မှန်သောသက်သေ၊ ဘုရားသခင့် ဖန်ဆင်းခြင်း၏အစ၊ အာမင်၏ မိန့်ဆိုချက်များတည်း။”—ဗျာဒိတ် ၃:၁၄။
၄။ ယေရှုသည် အဘယ်နည်းဖြင့် “အာမင်” ဖြစ်သနည်း။
၄ ယေရှုက မိမိကိုယ်ကို အဘယ်ကြောင့် “အာမင်” ဟုသမုတ်သနည်း။ ဤဘွဲ့သည် မိမိ၏သတင်းတော်ကို တရားစီရင်ရေးသြဇာ ပို၍လေးနက်စေသည်။ “အာမင်” သည် “မုချ၊” “ဖြစ်ပါစေ” ဟူ၍အဓိပ္ပာယ်ရှိသည့် ဟေဗြဲစကားလုံး၏ အက္ခရာဖလှယ် ရေးသားချက်ဖြစ်၍ ဆုတောင်းချက် နိဂုံးတွင် ဆုတောင်းချက်ထဲမှ ခံစားချက် သဘောထားများကို ထောက်ခံသည့်သဘောဖြင့် အသုံးပြုသည်။ (၁ ကောရိန္သု ၁၄:၁၆) ယေရှုသည် “အာမင်” ဖြစ်သည်။ အကြောင်းမှာ ကိုယ်တော်၏ အပြစ်အနာအဆာကင်းသော သမာဓိနှင့် ယဇ်သကာသေခြင်းက ယေဟောဝါ၏ ကတိမွန်အားလုံး ပြည့်စုံမည်ကို အတည်ပြု အာမခံသောကြောင့်တည်း။ (၂ ကောရိန္သု ၁:၂၀) ထိုအချိန်မှစ၍ ယေဟောဝါထံ တောင်းသမျှဆုကို ယေရှုမှတစ်ဆင့် တောင်းခြင်းသည် လျောက်ပတ်၏။—ယောဟန် ၁၅:၁၆; ၁၆:၂၃၊ ၂၄။
၅။ ယေရှုသည် အဘယ်နည်းဖြင့် “သစ္စာရှိ၍ စစ်မှန်သောသက်သေ” ဖြစ်သနည်း။
၅ ယေရှုသည် “သစ္စာရှိ၍ စစ်မှန်သော သက်သေ” လည်းဖြစ်သည်။ ကိုယ်တော်သည် ယေဟောဝါ ဘုရားသခင်၏ ကျွန်အဖြစ် လုံးဝအားထားထိုက်သူ ဖြစ်သောကြောင့် ပရောဖက်ပြုချက်၌ ကိုယ်တော်ကို သစ္စာစောင့်ခြင်း၊ သမ္မာတရား၊ ဖြောင့်မတ်ခြင်းတို့နှင့် ဆက်စပ်ဖော်ပြလေ့ရှိသည်။ (ဆာလံ ၄၅:၄; ဟေရှာယ ၁၁:၄၊ ၅; ဗျာဒိတ် ၁:၅; ၁၉:၁၁) ကိုယ်တော်သည် ယေဟောဝါအတွက် အကြီးမြတ်ဆုံး သက်သေဖြစ်သည်။ စင်စစ်အားဖြင့် ယေရှုသည် “ဘုရားသခင့် ဖန်ဆင်းခြင်း၏အစ” အနေနှင့် မူလကပင် ဘုရားသခင့်ဘုန်းတော်ကို ကြေညာခဲ့သည်။ (သုတ္တံ ၈:၂၂-၃၀) မြေကြီးသားဖြစ်စဉ်အခါ သမ္မာတရားဘက်မှ သက်သေခံတော်မူသည်။ (ယောဟန် ၁၈:၃၆၊ ၃၇; ၁ တိမောသေ ၆:၁၃) ထမြောက်သည့်နောက်၊ တပည့်တော်တို့အား သန့်ရှင်းသော ဝိညာဉ်တော်ပေးမည်ဟု ကတိပြုလျက် “သင်တို့သည် . . . ယေရုရှလင်မြို့မှစသော ယုဒပြည်၊ ရှမာရိပြည်၊ မြေကြီးစွန်းတိုင်အောင် ငါ၏သက်သေ ဖြစ်ကြလိမ့်မည်” ဟုမိန့်တော်မူသည်။ ယေရှုသည် အေဒီ ၃၃ ခုနှစ်၊ ပင်တေကုတ္တေပွဲနေ့မှစ၍ “ကောင်းကင်အောက်၌ ရှိသမျှသော ဝေနေယျသတ္တဝါတို့အား” သတင်းကောင်း ဟောပြောခြင်းလုပ်ငန်း၌ ဤဘိသိက်ခံခရစ်ယာန်များအား ညွှန်ကြားတော်မူသည်။ (တမန်တော် ၁:၆-၈; ကောလောသဲ ၁:၂၃) ယေရှုသည် သစ္စာရှိ၍ စစ်မှန်သောသက်သေဟု အမှန်ခေါ်ထိုက်ပေသည်။ လောဒိကိမြို့ရှိ ဘိသိက်ခံခရစ်ယာန်များ ကိုယ်တော့်စကားကို နားထောင်လျှင် အကျိုးရှိလိမ့်မည်။
၆။ (က) လောဒိကိမြို့ရှိအသင်းတော်၏ ဝိညာဉ်ရေးအခြေအနေကို ယေရှုမည်သို့ဖော်ပြသနည်း။ (ခ) ယေရှု၏ အဘယ်နမူနာမွန်ကို လောဒိကိမြို့ရှိ ခရစ်ယာန်များ တုပရန် ပျက်ကွက်ခဲ့ကြသနည်း။
၆ လောဒိကိမြို့သားများအဖို့ ယေရှု၌ အဘယ်သတင်းတော် ရှိသနည်း။ သူတို့အတွက် ချီးမွမ်းစကားမရှိ။ သူတို့အား ဤသို့ပွင့်လင်းစွာ မိန့်ဆိုသည်– “သင်ပြုသောအမှုများကို ငါသိ၏။ သင်သည် အပူလည်းမဟုတ်၊ အအေးလည်းမဟုတ်။ အေးလျှင်အေး၊ ပူလျှင်ပူရန် ငါအလိုရှိ၏။ သင်သည် မပူမအေး နွေးရုံသာ ရှိသည့်အတွက် သင့်ကို ငါ့ပါးစပ်ထဲမှ ထွေးထုတ်တော့မည်။” (ဗျာဒိတ် ၃:၁၅၊ ၁၆) သင်သာ သခင်ယေရှုခရစ်ထံမှ ဤသို့သော သတင်းတော်ကိုရရှိလျှင် မည်သို့တုံ့ပြန်မည်နည်း။ မနိုးမကြား၊ ကိုယ့်ကိုယ်ကို မဆန်းစစ်ဘဲ နေမည်လော။ အမှန်မှာ၊ လောဒိကိမြို့သားတို့သည် မိမိကိုယ်ကို လှုံ့ဆော်ဖို့ကောင်းသည်။ အကြောင်းမှာ သူတို့သည် ဝိညာဉ်ရေးဘက် ပျင်းရိနေခဲ့ပြီ။ အမှုမဲ့အမှတ်မဲ့ နေနိုင်လွန်း၍ ဖြစ်ပေမည်။ (၂ ကောရိန္သု ၆:၁ နှိုင်းယှဉ်။) ခရစ်ယာန်များအနေနှင့် တုပအပ်သောယေရှုမှာမူ ယေဟောဝါနှင့် ကိုယ်တော်၏အမှုတော်အတွက် အမြဲတမ်း ဇွဲဟုန်းဟုန်းတောက်၏။ (ယောဟန် ၂:၁၇) ထိုမျှမက ကိုယ်တော်သည် အစဉ်ညှာတာတတ်ပြီး သိမ်မွေ့နူးညံ့ကြောင်း စိတ်နှိမ့်ချသူတို့ တွေ့ရှိကြသည်။ ပူအိုက်လှသောနေ့၌ ရေအေးတစ်ခွက် သောက်ရသည့်အလား လူကိုလန်းဆန်းစေတော်မူသည်။ (မဿဲ ၁၁:၂၈၊ ၂၉) သို့သော် လောဒိကိမြို့ရှိ ခရစ်ယာန်များမှာမူ ပူလည်းမပူ၊ အေးလည်းမအေး။ သူတို့မြို့ထဲသို့ စီးဆင်းလာသောရေကဲ့သို့ ကြက်သီးနွေး နွေးရုံသာရှိကြသည်။ ယေရှု၏ လုံးဝပစ်ပယ်ခြင်း၊ ‘ပါးစပ်မှ ထွေးထုတ်ခြင်း’ ခံထိုက်သည်တကား။ ကျွန်ုပ်တို့သည် ယေရှုနည်းတူ၊ သူတစ်ပါးအား ဝိညာဉ်ရေးဘက် လန်းဆန်းစေရန် အမြဲမပြတ် စိတ်ထက်သန်စွာ ကြိုးစားကြစို့။—မဿဲ ၉:၃၅-၃၈။
“သင်က ‘ငါကြွယ်ဝသည်’ ဟုဆို၏”
၇။ (က) လောဒိကိမြို့ရှိ ခရစ်ယာန်တို့၏ ပြဿနာဇာစ်မြစ်ကို ယေရှုမည်သို့ ဖော်ထုတ်သနည်း။ (ခ) လောဒိကိ ခရစ်ယာန်တို့သည် “မျက်စိကန်းလျက်၊ အဝတ်အချည်းစည်း ဖြစ်လျက်နေသည်” ဟု ယေရှုအဘယ်ကြောင့် ဆိုသနည်း။
၇ စင်စစ်၊ လောဒိကိမြို့သားတို့၏ ပြဿနာဇာစ်မြစ်ကား အဘယ်နည်း။ ယေရှု၏ အောက်ပါစကားများမှ ကောင်းစွာသဘောပေါက်နိုင်သည်– “သင်က ‘ငါသည် ကြွယ်ဝ၏။ ဥစ္စာဓန ဆည်းပူးရရှိပြီ။ ဘာမျှမလို’ ဟုဆို၏။ သို့သော် သင်သည် စိတ်မချမ်းမြေ့ဖွယ်၊ သနားစဖွယ်ကောင်းပြီး၊ မွဲတေလျက်၊ မျက်စိကန်းလျက်၊ အဝတ်အချည်းစည်း ဖြစ်လျက်နေသည်ကို သင်မသိ။” (ဗျာဒိတ် ၃:၁၇။ လုကာ ၁၂:၁၆-၂၁ နှိုင်းယှဉ်။) သူတို့သည် ကြွယ်ဝသောမြို့၌ နေထိုင်သဖြင့် မိမိတို့ဥစ္စာဓနကြောင့် ဟန်လှပြီထင်၏။ သူတို့၏ဘဝသည် အားကစားရုံ၊ ပြဇာတ်ရုံများ၊ ကျွမ်းဘားအားကစားရုံများ၏ ဩဇာလွှမ်းမိုးမှုကို ခံရဟန်ရှိသဖြင့် “ဘုရားသခင်ကို နှစ်သက်သည်ထက် ပျော်မွေ့ခြင်းကို သာ၍နှစ်သက်သောသူ” များဖြစ်လာကြပြီ။ * (၂ တိမောသေ ၃:၄၊ သမ္မာ) သို့သော် ပစ္စည်းဥစ္စာချမ်းသာသော လောဒိကိမြို့သားတို့သည် ဝိညာဉ်ရေးဘက် မွဲတေနေ၏။ ‘ကောင်းကင်၌ စုဆောင်းသောဘဏ္ဍာ’ ရှိလျှင်ပင် နည်းပါးလှ၏။ (မဿဲ ၆:၁၉-၂၁) သူတို့၏အသက်တာတွင် ဘုရားသခင့်နိုင်ငံတော်ကို ရှေးဦးထားခြင်းဖြင့် မျက်စိကို ရိုးရှင်းစေခြင်းမရှိခဲ့။ တကယ်ပင် အမှောင်ထဲ၌ရှိပြီး မျက်စိကန်းလျက် ဝိညာဉ်ရေးအမြင်အာရုံမရှိ။ (မဿဲ ၆:၂၂၊ ၂၃၊ ၃၃) ထို့မျှမက၊ ဥစ္စာပစ္စည်းချမ်းသာ၍ ဝတ်ရုံအကောင်းစားများ ဝယ်ဝတ်နိုင်သော်လည်း ယေရှုမျက်စိထဲ၌ အဝတ်အချည်းစည်း ဖြစ်နေ၏။ မိမိတို့ကိုယ်ကို ခရစ်ယာန်ဖြစ်ကြောင်း သိသာစေသော ဝိညာဏဝတ်ရုံ သူတို့၌ မရှိကြ။—ဗျာဒိတ် ၁၆:၁၅ နှိုင်းယှဉ်။
၈။ (က) ယနေ့လည်း အဘယ်နည်းဖြင့် လောဒိကိမြို့နှင့်တူသော အခြေအနေမျိုး တည်ရှိသနည်း။ (ခ) လောဘဇောတိုက်သော ဤလောက၌ ခရစ်ယာန်အချို့ မိမိတို့ကိုယ်ကို မည်သို့လှည့်စားကြသနည်း။
၈ ထိတ်လန့်ဖွယ်အဖြစ်ပါတကား။ သို့သော် ယနေ့လည်း အလားတူအဖြစ်မျိုးကို တွေ့ရလေ့ မရှိပေလော။ အဘယ်အကြောင်းရင်းကြောင့်နည်း။ ပစ္စည်းဥစ္စာနှင့် လူ့စွမ်းအားအရင်းအမြစ်ကို အားထားရာမှ ဖြစ်ပေါ်လာသော ကိုယ့်ကိုယ်ကို စိတ်ချယုံကြည်သောသဘောထားပင်တည်း။ ယေဟောဝါ၏ လူမျိုးတော်မှ အချို့သည် ခရစ်ယာန်ဘောင် ချာ့ခ်ျတက်သူများကဲ့သို့ ရံဖန်ရံခါ စည်းဝေးတက်လျှင် ဘုရားသခင့်စိတ်တော်နှင့် တွေ့နိုင်သည်ဟုထင်ကာ ကိုယ့်ကိုယ်ကို လှည့်စားကြ၏။ “နှုတ်ကပါဌ်တရားကို” စတိလောက်သာ “ကျင့်သောသူ” လုပ်ပြီး ခိုကပ်ကြသည်။ (ယာကုပ် ၁:၂၂) သူတို့သည် ယောဟန်အတန်းအစား အထပ်ထပ် သတိပေးနေသည့်ကြားမှ၊ ခေတ်မီအဝတ်အစား၊ ကား၊ အိမ်ရာတိုက်တာနှင့် အပန်းဖြေခြင်း၊ အပျော်အပါးလိုက်စားခြင်းကို ပဓာနထားသည့်ဘဝမျိုးကို စိတ်စွဲကြသည်။ (၁ တိမောသေ ၆:၉၊ ၁၀; ၁ ယောဟန် ၂:၁၅-၁၇) ဤအရာအားလုံးက ဝိညာဉ်ရေးအတွေးအမြင်ကို ထိုင်းမှိုင်းစေသည်။ (ဟေဗြဲ ၅:၁၁၊ ၁၂) သူတို့သည် စိတ်မပါ့တပါ မပူမအေး ဖြစ်နေမည့်အစား၊ “ဝိညာဉ်တော်မီးရှိန်” ကိုပြန်တောက်စေပြီး လန်းဆန်းတက်ကြွစွာ “နှုတ်ကပါဌ်တရားတော်ကို ဟောပြော” ရန်လို၏။—၁ သက်သာလောနိတ် ၅:၁၉၊ ကဘ; ၂ တိမောသေ ၄:၂၊ ၅။
၉။ (က) ယေရှု၏ အဘယ်စကားတော်ကြောင့် ကြက်သီးနွေးခရစ်ယာန်များ လန့်နိုးလာဖို့ကောင်းသနည်း။ အဘယ်ကြောင့်နည်း။ (ခ) လမ်းလွဲသော “သိုး” ကို အသင်းတော်က မည်သို့ကူညီနိုင်သနည်း။
၉ မပူမအေးဖြစ်နေသော ခရစ်ယာန်များကို ယေရှုမည်သို့ ရှုမှတ်တော်မူသနည်း။ ကိုယ်တော်၏ပွင့်လင်းသော အောက်ပါစကားတော်များကြောင့် လန့်နိုးလာဖို့ကောင်းသည်– “သင်သည် စိတ်မချမ်းမြေ့ဖွယ်၊ သနားစဖွယ်ကောင်းပြီး၊ မွဲတေလျက်၊ မျက်စိကန်းလျက်၊ အဝတ်အချည်းစည်း ဖြစ်လျက်နေသည်ကို သင်မသိ။” သူတို့၏သြတ္တပ္ပစိတ်သည် ထုံထိုင်းလှရကား ထိတ်လန့်ရွံမုန်းဖွယ် အခြေအနေသို့ မိမိတို့ ရောက်နေသည်ကိုပင် သတိမပြုမိကြ။ (သုတ္တံ ၁၆:၂;၂၁:၂ နှိုင်းယှဉ်။) အသင်းတော်ရှိ ဤစိုးရိမ်ဖွယ် အခြေအနေကို ပေါ့ပေါ့တန်တန်ယူမှတ်ပြီး ချောင်ထိုးမထားနိုင်ပါ။ အကြီးအကဲများနှင့် သူတို့တာဝန်ပေးအပ်ထားသူများသည် စိတ်ထက်သန်မှု နမူနာကောင်းပြ၍ မေတ္တာပါပါ ထိန်းကျောင်းခြင်းဖြင့် ဤလမ်းလွဲသော “သိုး” များအား နိုးလာစေပြီး နှလုံးအကြွင်းမဲ့ အမှုဆောင်ခြင်း၏ ဝမ်းမြောက်မှုကို ယခင်ကကဲ့သို့ ပြန်လည်ခံစားစေနိုင်ဖွယ်ရှိသည်။—လုကာ ၁၅:၃-၇။
“ကြွယ်ဝလာရန်” အကြံပေးချက်
၁၀။ မိမိထံမှဝယ်ယူပါဟု လောဒိကိမြို့ရှိ ခရစ်ယာန်များအား ယေရှုတိုက်တွန်းသော “ရွှေ” ကား အဘယ်နည်း။
၁၀ လောဒိကိမြို့ရှိ ထိုဝမ်းနည်းဖွယ်အဖြစ်ကို ကုစားနိုင်သော ဆေးရှိသလော။ ထိုခရစ်ယာန်များအနေနှင့် ယေရှု၏အောက်ပါ သြဝါဒကိုလိုက်နာလျှင် ရှိပါသည်– “သင်ကြွယ်ဝလာရန် မီးဖြင့် သန့်စင်ပြီးသောရွှေကို . . . ငါ့ထံမှဝယ်ယူရန် ငါအကြံပေး၏။” (ဗျာဒိတ် ၃:၁၈က) မီးဖြင့် သန့်စင်ချေးချွတ်ပြီးသော ခရစ်ယာန် “ရွှေ” စစ်သည် သူတို့အား ‘ဘုရားသခင့်ရှေ့တော်တွင် ကြွယ်ဝ’ စေလိမ့်မည်။ (လုကာ ၁၂:၂၁၊ သမ) ထိုသို့သောရွှေကို အဘယ်မှာ ဝယ်ယူနိုင်သနည်း။ ဒေသန္တရ ဘဏ်လုပ်ငန်းရှင်များထံမှမဟုတ်။ ယေရှုထံမှဖြစ်သည်။ တမန်တော်ပေါလုက တိမောသေအား “လာလတ္တံ့သောကာလအတွက် ကောင်းသောအခြေအမြစ်ကို ဆည်းပူးလျက် သူတစ်ပါးအား ကျေးဇူးပြုခြင်း၊ ကောင်းသောအကျင့်၌ ကြွယ်ဝပြည့်စုံခြင်း၊ စွန့်ကြဲချင်သော စေတနာစိတ်ရှိခြင်း၊ အချင်းချင်းဆက်ဆံ [“ဝေမျှ”၊ ကဘ] ခြင်းငှာ အသင့်ရှိ” ကြရန် ချမ်းသာသောခရစ်ယာန်များကို မိန့်မှာပါဟု မှာကြားရာ၌ ထိုရွှေ ဘာကိုဆိုလိုကြောင်း ရှင်းပြ၏။ (၁ တိမောသေ ၆:၁၇-၁၉၊ သမ္မာ) ရုပ်ပစ္စည်းချမ်းသာသော လောဒိကိမြို့သားတို့သည် ပေါလု၏အကြံပေးချက်ကို လိုက်နာခြင်းဖြင့် ဝိညာဉ်ရေးဘက် ကြွယ်ဝခဲ့ဖို့ကောင်းသည်။—သုတ္တံ ၃:၁၃-၁၈ ကိုလည်းရှု။
၁၁။ “မီးဖြင့် သန့်စင်ပြီးသောရွှေ” ကိုဝယ်ယူသည့် အဘယ်ခေတ်သစ် စံနမူနာများရှိသနည်း။
၁၁ “မီးဖြင့် သန့်စင်သောရွှေ” ကိုဝယ်ယူသူ မျက်မှောက်ခေတ် ပုံနမူနာများရှိသလော။ ရှိပေသည်။ သခင့်နေ့တော်ဆိုက်လုဆဲ အချိန်မှာပင် ကျမ်းစာကျောင်းသား အုပ်စုကလေးတစ်စုက သုံးပါးပေါင်းတစ်ဆူ၊ ဝိညာဉ်မသေနိုင်ခြင်း၊ မီးငရဲဖြင့်ညှဉ်းဆဲခြင်း၊ နို့စို့သူငယ်ကို နှစ်ခြင်းပေးခြင်း၊ (လက်ဝါးကပ်တိုင်နှင့် မာရိရုပ်တုများအပါအဝင်) ရုပ်တုကိုးကွယ်ခြင်းစသော ခရစ်ယာန်ဘောင်၏ ဗာဗုလုန်ဆိုင်ရာ သွန်သင်ချက်များစွာသည် မှားကြောင်း နိုးကြားသိရှိလာသည်။ ဤခရစ်ယာန်တို့သည် သမ္မာကျမ်းစာ အမှန်တရားဘက်မှ ရပ်တည်တိုက်လှန်ရာ၌ ယေဟောဝါ၏နိုင်ငံတော်ကို လူသားတို့၏ တစ်ခုတည်းသော မျှော်လင့်ချက်အဖြစ်လည်းကောင်း၊ ယေရှု၏ရွေးနုတ်ဖိုးကို ကယ်တင်ခြင်းအတွက် အခြေအမြစ်အဖြစ်လည်းကောင်း ကြွေးကြော်ကြသည်။ ကျမ်းစာပရောဖက်ပြုချက် မှတ်သားဖော်ပြသော တစ်ပါးအမျိုးသားကာလသည် မြေကြီးပေါ်မှာ ထိတ်လန့်ဖွယ်သော ဆင့်ပွားဖြစ်ပျက်မှုများနှင့်အတူ၊ ၁၉၁၄ ခုနှစ်၌ ကုန်ဆုံးမည်ဖြစ်ကြောင်း အနှစ် ၄၀ နီးပါးကြို၍ ပြညွှန်ခဲ့ကြသည်။—ဗျာဒိတ် ၁:၁၀။
၁၂။ နိုးကြားလာသော ခရစ်ယာန်များကို ဦးဆောင်သူတစ်ဦးမှာ မည်သူနည်း။ သူသည် ကောင်းကင်ဘဏ္ဍာ ဆည်းပူးခြင်း၌ ထူးခြားသော စံနမူနာကို မည်သို့ထားခဲ့သနည်း။
၁၂ နိုးကြားလာသော ခရစ်ယာန်များကို ဦးဆောင်သူမှာ ချားလ်စ် တေ့စ် ရပ်စဲလ်ဖြစ်၍ သူသည် ၁၈၇၀ ပြည့်လွန်နှစ်များ အစောပိုင်းတွင် အမေရိကန်နိုင်ငံ၊ ပဲင်စီလ်ဗေးနီးယားပြည်နယ် (ယခု ပစ်စဘာ့မြို့ တစ်စိတ်တစ်ပိုင်းဖြစ်သော) အယ်လဂေးနီမြို့တွင် ကျမ်းစာသင်တန်းကျောင်းတစ်ခု ဖွဲ့စည်းခဲ့သည်။ သမ္မာတရားကို ရပ်စဲလ် စတင်ရှာဖွေစဉ် ဖခင်နှင့်အတူ ဖက်စပ်စီးပွားလုပ်နေပြီး သန်းကြွယ်သူဌေးအဖြစ်သို့ ဦးတည်လျက်ရှိ၏။ သို့သော် သူသည် ကုမ္ပဏီကြီးတစ်ခုက ဖွင့်ထားသော စတိုးဆိုင်ခွဲလုပ်ငန်းမှ သူ၏အကျိုးအမြတ် ခံစားခွင့်ကို ရောင်းချ၍ ရှိရှိသမျှ ရွှေငွေဥစ္စာကို ကမ္ဘာတစ်ခွင် ဘုရားသခင့် နိုင်ငံတော်သတင်း ကြေညာခြင်းလုပ်ငန်းအတွက် အသုံးချလေသည်။ ၁၈၈၄ ခုနှစ်၌ ရပ်စဲလ်သည် ပဲင်စီလ်ဗေးနီးယား ကင်းမျှော်စင် သမ္မာကျမ်းစာနှင့် ဝေစာအသင်းဟူ၍ ယခု သိထားကြသော ကော်ပိုရေးရှင်း၏ ပထမဥက္ကဋ္ဌ ဖြစ်လာသည်။ ၁၉၁၆ ခုနှစ်၌ နယူးယောက်မြို့သို့အသွား၊ တက္ကဆက်ပြည်နယ် ပန်ပါမြို့အနီး၊ ရထားပေါ်တွင် ကွယ်လွန်၏။ အမေရိကန်နိုင်ငံ အနောက်ပိုင်း နောက်ဆုံးဟောပြောခြင်း ခရီးစဉ်ကြောင့် အားပြတ်သွား၍ဖြစ်သည်။ သူသည် ကောင်းကင်ဘဏ္ဍာ ဆည်းပူးခြင်း၌ ထူးခြားသောစံနမူနာ ထားခဲ့ပေသည်။ သူ၏စံနမူနာကို ယနေ့ ကိုယ်ကျိုးစွန့်ရှေ့ဆောင် ထောင်ပေါင်းများစွာ လိုက်လျှောက်နေကြသည်။—ဟေဗြဲ ၁၃:၇; လုကာ၊ ၁၂:၃၃၊ ၃၄။ ၁ ကောရိန္သု ၉:၁၆; ၁၁:၁ နှိုင်းယှဉ်။
ဝိညာဏမျက်စဉ်းဆေး လိမ်းခြင်း
၁၃။ (က) ဝိညာဏမျက်စဉ်းဆေးသည် လောဒိကိမြို့သားတို့၏ အခြေအနေကို မည်သို့ တိုးတက်ကောင်းမွန်စေမည်နည်း။ (ခ) မည်သို့သောဝတ်ရုံကို ဝယ်ဝတ်ရန် ယေရှုအကြံပြုသနည်း။ အဘယ်ကြောင့်နည်း။
၁၃ “အဝတ်အချည်းစည်းဖြစ်၍ ရှက်စရာ မပေါ်စေရန် ဝတ်စရာ ဝတ်ရုံဖြူကိုလည်းကောင်း၊ မြင်နိုင်ရန် မျက်စိလိမ်းစရာ မျက်စဉ်းဆေးကိုလည်းကောင်း ငါ့ထံမှဝယ်ယူလော့” ဟူ၍လည်း လောဒိကိမြို့သားများကို ယေရှုခပ်ထန်ထန် သတိပေးလိုက်သည်။ (ဗျာဒိတ် ၃:၁၈ခ) သူတို့သည် ဒေသန္တရ ဆေးသမားများထံမှ မျက်စဉ်းဆေးကိုမဝယ်ဘဲ၊ ယေရှုသာလျှင်ပေးနိုင်သော မျက်စဉ်းဆေးကိုဝယ်၍ မိမိတို့၏ ဝိညာဏမျက်ကန်းအဖြစ်ကို ကုသသင့်သည်။ သို့ပြုလျှင် ဝိညာဉ်ရေး ပိုင်းခြားသိမြင်ဉာဏ်ကိုရ၍ “ဖြောင့်မတ်သောသူတို့၏လမ်း” ကိုလျှောက်နိုင်မည်။ သူတို့၏ရွှန်းလဲ့သော မျက်လုံးများလည်း ဘုရားသခင့် အလိုတော်ဆောင်ခြင်းပေါ် အာရုံပြုနေမည်။ (သုတ္တံ ၄:၁၈၊ ၂၅-၂၇) ဤသို့ဖြင့် လောဒိကိမြို့မှထွက်သည့် ဈေးကြီးသော သိုးမွေးနက်ဝတ်ရုံအစား၊ ယေရှုခရစ်၏ နောက်တော်လိုက်အဖြစ် မိမိတို့၏ ထူးမြတ်သည့်ဂုဏ်ပုဒ်ကို ကြွေးကြော်သည့် “ဝတ်ရုံဖြူ” ကို ဝတ်ခြုံနိုင်လိမ့်မည်။—၁ တိမောသေ ၂:၉၊ ၁၀; ၁ ပေတရု ၃:၃-၅ နှိုင်းယှဉ်။
၁၄။ (က) ၁၈၇၉ ခုနှစ်မှစ၍ အဘယ်ဝိညာဏမျက်စဉ်းဆေး ရယူနိုင်သနည်း။ (ခ) ယေဟောဝါသက်သေများ၏ ငွေကြေးထောက်ပံ့မှု လာရာရင်းမြစ်ကား အဘယ်နည်း။ (ဂ) ယေဟောဝါသက်သေတို့သည် အလှူငွေသုံးစွဲမှု၌ အခြားသူတို့နှင့် မည်သို့ခြားနားသနည်း။
၁၄ ယခုခေတ်တွင် ဝိညာဏမျက်စဉ်းဆေး ရနိုင်သလော။ စိတ်ချ၊ ရနိုင်၏။ ပါစတာ ရပ်စဲလ်ဟု ချစ်စနိုးအခေါ်ခံရသူ ရပ်စဲလ်သည် သမ္မာတရားကို ခုခံကာကွယ်သည့် မဂ္ဂဇင်း၊ ကင်းမျှော်စင် ယေဟောဝါ၏ နိုင်ငံတော်ကို ကြေညာခြင်း ဟု ယနေ့ ကမ္ဘာတစ်ဝန်း သိရှိထားသော မဂ္ဂဇင်းကို ၁၈၇၉ ခုနှစ်၌ စတင်ဖြန့်ချိလာသည်။ ၎င်း၏ ဒုတိယလထုတ်၌ သူဤသို့ အတိအလင်း ကြေညာသည်– “[ဤမဂ္ဂဇင်းသည်] ယေဟောဝါ ၏ ကျောထောက်နောက်ခံရှိကြောင်း ကျွန်ုပ်တို့ ယုံကြည်သည်။ ဤသို့ရှိနေသမျှ ကာလပတ်လုံး လူတို့ထံမှ ထောက်ပံ့မှုရဖို့ ဘယ်သောအခါမျှ လက်ဝါးဖြန့် အသနားခံစရာ လိုမည်မဟုတ်။ ‘တောင်များတွင်ရှိသော ရွှေငွေအားလုံးကို ငါပိုင်၏’ ဟုမိန့်ဆိုသော အရှင်က လိုအပ်သော ငွေကြေးအထောက်အပံ့ကို ရပ်လိုက်သောအခါ ထုတ်ဝေခြင်းကို ရပ်ဆိုင်းရန်အချိန်တန်ပြီဟု ကျွန်ုပ်တို့ နားလည်ကြပါလိမ့်မည်။” တီဗွီတရားဟောဆရာအချို့သည် ငွေကြေးတောင်ပုံရာပုံ စုဆောင်း၍ အရှက်မဲ့စွာ (ရံဖန်ရံခါ အကျင့်ပျက်ပြားစွာ) ဇိမ်ယစ်ခဲ့ကြသည်။ (ဗျာဒိတ် ၁၈:၃) ကျမ်းစာကျောင်းသားများမူ ထိုသူတို့နှင့် လုံးဝမတူပါ။ မတောင်းဘဲရရှိသော အလှူငွေအားလုံးကို လာလတ္တံ့သော ယေဟောဝါ၏ နိုင်ငံတော်အကြောင်း ကမ္ဘာအနှံ့ ဟောပြောခြင်းလုပ်ငန်း ဖွဲ့စည်းတိုးချဲ့မှုအတွက် အသုံးပြုကြသည်။ ယောဟန်အတန်းအစားသည် ကင်းမျှော်စင် နှင့် နိုးလော့! မဂ္ဂဇင်းထုတ်ဝေမှုကို ယနေ့တိုင် ညွှန်ကြားလျက်ရှိသည်။ ၂၀၀၆ ခုနှစ်၌ ထိုမဂ္ဂဇင်းနှစ်မျိုးကို လစဉ်စောင်ရေ ၅၉ သန်းမက ထုတ်ဝေလျက်ရှိသည်။ ကင်းမျှော်စင် ကို ဘာသာစကားပေါင်း ၁၅၀ ကျော်ဖြင့် ရနိုင်သည်။ ၎င်းသည် ခရစ်ယာန် ခြောက်သန်းကျော်တို့၏ တရားဝင်ဂျာနယ်ဖြစ်၍ သူတို့သည် ထိုသို့သော မျက်စဉ်းဆေးကိုသုံးကာ မိမိတို့မျက်စိကို ပွင့်စေသဖြင့် မိစ္ဆာဘာသာကိုလည်းကောင်း၊ နိုင်ငံအားလုံးတွင် သတင်းကောင်းဟောခြင်း၏ အရေးကြီးပုံကိုလည်းကောင်း မြင်နိုင်ကြပြီ။—မာကု ၁၃:၁၀။
ပြစ်တင်ဆုံးမမှုနှင့် ပဲ့ပြင်မှုမှ အကျိုးရယူခြင်း
၁၅။ လောဒိကိမြို့ရှိ ခရစ်ယာန်များအား ယေရှုအဘယ်ကြောင့် ခပ်ထန်ထန် သြဝါဒပေးသနည်း။ အသင်းတော်အနေနှင့် မည်သို့တုံ့ပြန်သင့်သနည်း။
၁၅ လောဒိကိ မြို့သားများအကြောင်း ပြန်ပြောကြစို့။ ယေရှု၏ ခက်ထန်သောသြဝါဒကို သူတို့မည်သို့ တုံ့ပြန်မည်နည်း။ မိမိတို့ကို ယေရှုက နောက်လိုက်များအဖြစ် အလိုမရှိတော့ဟုထင်ကာ စိတ်ပျက်အားလျော့သင့်သလော။ မသင့်ပါ။ ထိုသို့လုံးဝမဟုတ်။ သတင်းတော်က ဤသို့ဆက်၍ဆိုသည်– “ငါသည် ချစ်ခင်သောသူ အပေါင်းကို ပြစ်တင်ဆုံးမ၍ ပဲ့ပြင်ပေးတတ်၏။ ထို့ကြောင့် စိတ်အားထက်သန်လော့။ နောင်တရလော့။” (ဗျာဒိတ် ၃:၁၉) ယေရှု၏ပဲ့ပြင်မှုသည် ယေဟောဝါထံမှ ပဲ့ပြင်မှုကဲ့သို့ပင် မေတ္တာတော်၏ လက္ခဏာတစ်ရပ်ဖြစ်သည်။ (ဟေဗြဲ ၁၂:၄-၇) လောဒိကိအသင်းတော်အနေနှင့် ယေရှု၏ချစ်ခင်တွယ်တာမှု စေတနာကို လက်လွှတ်မခံဘဲ ကိုယ်တော့်သြဝါဒကို လိုက်နာကျင့်သုံးသင့်သည်။ မိမိတို့၏ မပူမနွေးအဖြစ်သည် အပြစ်ပြုခြင်းနှင့် မခြားကြောင်း သိမှတ်လျက် နောင်တရသင့်သည်။ (ဟေဗြဲ ၃:၁၂၊ ၁၃; ယာကုပ် ၄:၁၇) သူတို့၏ အကြီးအကဲများလည်း ရုပ်ဝါဒဆန်မှုများကို ပစ်ပယ်ပြီး “မီးကိုဆွပေးသကဲ့သို့” ဘုရားသခင့်ထံတော်မှ ရရှိသောဆုကျေးဇူးကို “နှိုးဆွ” ကြပါစေ။ ဝိညာဏမျက်စဉ်းဆေး အစွမ်းပြလာသည်နှင့်အမျှ အသင်းတော်တစ်ရပ်လုံး စမ်းရေအေးအေးလေး သောက်လိုက်ရသည့်ပမာ လန်းဆန်းနိုင်ကြပါစေ။—၂ တိမောသေ ၁:၆၊ ကဘ; သုတ္တံ ၃:၅-၈; လုကာ ၂၁:၃၄။
၁၆။ (က) ယနေ့ ယေရှုသည် မိမိ၏မေတ္တာနှင့် ချစ်ခင်တွယ်တာမှုကို မည်သို့ထင်ရှားစေနည်း။ (ခ) ကျွန်ုပ်တို့သည် ခပ်ထန်ထန် ဩဝါဒပေးခံရလျှင် မည်သို့တုံ့ပြန်သင့်သနည်း။
၁၆ ယနေ့ ကျွန်ုပ်တို့ကော။ ယေရှုသည် ‘လောကရှိ မိမိလူတို့ကို အစဉ်မပြတ် ချစ်တော်မူသည်။’ “ကပ်ကမ္ဘာ ကုန်သည်တိုင်အောင်” ချစ်တော်မူမည်။ (ယောဟန် ၁၃:၁; မဿဲ ၂၈:၂၀) ကိုယ်တော်၏မေတ္တာနှင့် ချစ်ခင်မှုကို ခေတ်သစ်ယောဟန် အတန်းအစားမှတစ်ဆင့်၊ ခရစ်ယာန်အသင်းတော်ရှိ ကြယ်များ သို့မဟုတ် အကြီးအကဲများမှတစ်ဆင့် ထင်ရှားစေတော်မူသည်။ (ဗျာဒိတ် ၁:၂၀) အလွန်ခက်ခဲသော ယခုကာလ၌ အကြီးအကဲတို့သည် ကြီးငယ်မဟူသော ကျွန်ုပ်တို့အားလုံးကို ကူညီသည့်ကိစ္စ၌ အလေးအနက် စိတ်ဝင်စား၏။ သီအိုကရက်တစ် သိုးခြံ၏ဘောင်အတွင်း၌နေပြီး လောက၏ လွတ်လပ်ခြင်းစိတ်ဓာတ်၊ ရုပ်ဝါဒလောဘနှင့် သီလပျက် အညစ်အကြေးတို့ကို ခုခံတိုက်လှန်နိုင်ရန် ကူညီပေးလို၏။ ရံဖန်ရံခါ ခပ်ထန်ထန်ဆုံးမပဲ့ပြင်ခံရလျှင် “အပြစ်ကိုပြတတ်သော ဩဝါဒစကားသည် အသက်လမ်းဖြစ်” ကြောင်း သတိရပါ။ (သုတ္တံ ၆:၂၃) ကျွန်ုပ်တို့အားလုံး မစုံလင်သဖြင့် စိတ်ထက်သန်စွာ နောင်တရသင့်သည်။ သို့မှသာ လမ်းမှန်ရောက်ပြီး ဘုရားသခင့် မေတ္တာတော်၌ တည်နေမည်။—၂ ကောရိန္သု ၁၃:၁၁။
၁၇။ စည်းစိမ်သည် ကျွန်ုပ်တို့အား ဝိညာဉ်ရေးဘက်၌ မည်သို့ဘေးပြုနိုင်သနည်း။
၁၇ ကျွန်ုပ်တို့သည် ရုပ်ဝါဒကြောင့်ဖြစ်စေ၊ ဥစ္စာဓနကြောင့်ဖြစ်စေ၊ ဥစ္စာဓနမဲ့ခြင်းကြောင့်ဖြစ်စေ၊ မပူမနွေးမဖြစ်သင့်။ စည်းစိမ်ဥစ္စာသည် လုပ်ငန်းတော် အခွင့်အလမ်းသစ်များ ဖွင့်ပေးနိုင်စေကာမူ၊ အန္တရာယ်လည်း မကင်းချေ။ (မဿဲ ၁၉:၂၄) ကြွယ်ဝချမ်းသာသူက မိမိသည် ရံဖန်ရံခါ အလှူခပ်များများထည့်လျှင် အခြားသူများကဲ့သို့ ဟောပြောခြင်းလုပ်ငန်း၌ စိတ်ထက်သန်စရာမလိုဟု ထင်ချင်ထင်မည်။ သို့မဟုတ်၊ ချမ်းသာသောကြောင့် ပါစားပေးခံထိုက်သည်ဟု ထင်ချင်ထင်မည်။ ထို့ပြင်၊ သူကြွယ်တစ်ဦးသည် အခြားသူများမတတ်နိုင်သော ပျော်ရွှင်ဖွယ်ရာများနှင့် ဝါသနာပါရာများကို လိုက်စားနိုင်သည်။ သို့သော် ၎င်းစိတ်အပြောင်းအလဲ ဖြစ်စေသော ဖျော်ဖြေမှုများကြောင့် အချိန်ကုန်တတ်ရာ သတိမရှိသူသည် ခရစ်ယာန်ဓမ္မအမှုမှ ဝေးကွာသွားနိုင်သည်။ သို့ဖြင့်၊ သတိပညာမဲ့သူသည် မပူမနွေးဖြစ်လာသည်။ ဤကျော့ကွင်းအားလုံးကိုရှောင်၍ ထာဝရအသက်ကိုရှေးရှုလျက် နှလုံးအကြွင်းမဲ့ “ပင်ပင်ပန်းပန်း လုပ်ဆောင်ပြီး ကြိုးစားအားထုတ်” လျက်နေကြပါစို့။—၁ တိမောသေ ၄:၈-၁၀၊ ကဘ; ၆:၉-၁၂။
‘ညစာသုံးဆောင်ခြင်း’
၁၈။ လောဒိကိမြို့ရှိ ခရစ်ယာန်များရှေ့ အဘယ်အခွင့်ကောင်းကို ယေရှုထားတော်မူသနည်း။
၁၈ ယေရှုဤသို့ ဆက်လက်မိန့်ဆိုသည်– “ကြည့်လော့။ ငါသည် တံခါးဝမှာရပ်၍ ခေါက်လျက်နေ၏။ မည်သူမဆို ငါ့အသံကိုကြား၍ တံခါးဖွင့်လျှင် သူ၏အိမ်သို့ ငါဝင်ပြီးလျှင် သူနှင့်အတူ ညစာသုံးဆောင်မည်။ သူသည်လည်း ငါနှင့်အတူ သုံးဆောင်ရလိမ့်မည်။” (ဗျာဒိတ် ၃:၂၀) လောဒိကိ ခရစ်ယာန်များသာ ယေရှုအား မိမိတို့အသင်းတော်သို့ လာရန်ကြိုဆိုလျှင် သူတို့၏ မပူမအေးပြဿနာကို ကိုယ်တော် ကူညီဖြေရှင်းပေးပါလိမ့်မည်။—မဿဲ ၁၈:၂၀။
၁၉။ လောဒိကိမြို့ရှိ အသင်းတော်နှင့်အတူ ညစာစားမည်ဟူသော ယေရှု၏ကတိသည် ဘာကိုဆိုလိုသနည်း။
၁၉ ညစာအကြောင်း ယေရှုပြောသောအခါ တပည့်တော်များနှင့်အတူ ယေရှု အစာသုံးဆောင်ခဲ့သည့် အချိန်အခါများကို လောဒိကိမြို့သားများ ပြန်သတိရကြပေမည်။ (ယောဟန် ၁၂:၁-၈) ထိုအခါသမယတွင် ရှိနေသူတို့သည် ဝိညာဉ်ရေးကောင်းချီးများ ရကြစမြဲပင်။ ထို့အတူ၊ ယေရှု ထမြောက်ပြီးနောက် တပည့်တော်များနှင့်အတူ အစာသုံးဆောင်သည့် အခါသမယထူးများ ရှိပေသည်။ ထိုအခါများ၌ တပည့်တော်များ ခွန်အားများစွာ ရခဲ့ကြသည်။ (လုကာ၊ ၂၄:၂၈-၃၂; ယောဟန် ၂၁:၉-၁၉) သို့ဖြစ်၍ လောဒိကိ အသင်းတော်သို့ကြွ၍ သူတို့နှင့်အတူ ညစာသုံးဆောင်မည်ဟူသော ကတိမှာ၊ မိမိအား လက်ခံကြလျှင် သူတို့အတွက် ကြွယ်ဝသော ဝိညာဏကောင်းချီးများ ရရှိစေမည်ဟူသော ကတိပင်တည်း။
၂၀။ (က) သခင့်နေ့တော်အစပိုင်း၌ ခရစ်ယာန်ဘောင်၏ ကြက်သီးနွေးအခြေအနေကြောင့် ဘာဖြစ်ခဲ့သနည်း။ (ခ) ယေရှု၏စီရင်ချက်ကြောင့် ခရစ်ယာန်ဘောင် ဘာဖြစ်ခဲ့ပြီနည်း။
၂၀ လောဒိကိမြို့သားများအား ပေးတော်မူသော ယေရှု၏မေတ္တာပါသည့် တိုက်တွန်းစကားသည် ယနေ့ ဘိသိက်ခံခရစ်ယာန် အကြွင်းအကျန်အဖို့ အထူးအဓိပ္ပာယ်ရှိ၏။ သူတို့ထဲမှအချို့က သခင့်နေ့တော်အစပြုစဉ် ခရစ်ယာန်ဘောင် ဘာသာရေးသမားများသည် စိတ်ပျက်ဖွယ်လိလိ ကြက်သီးနွေးနွေးခဲ့ကြကြောင်း သတိရကြ၏။ ခရစ်ယာန်ဘောင် ဓမ္မဆရာအုပ်စုသည် ၁၉၁၄ ခုနှစ်၌ ကျွန်ုပ်တို့၏သခင် ပြန်ကြွလာသည်ကို ဆီးကြိုမည့်အစား၊ ပထမကမ္ဘာစစ် သတ်ဖြတ်မှု၌ ဝင်စွက်ခဲ့ကြသည်။ တိုက်ပွဲဝင် ၂၈ နိုင်ငံအနက် ခရစ်ယာန်အမည်ခံ ၂၄ နိုင်ငံပါဝင်သည်။ သူတို့၏သွေးပြစ် မည်မျှကြီးလေးလိုက်လေခြင်း။ ခရစ်ယာန်ဘောင်အတွင်း အဓိက တိုက်ခိုက်သော ဒုတိယကမ္ဘာစစ်၌ မိစ္ဆာဘာသာ၏ အပြစ်များသည် “ကောင်းကင်ဘုံတိုင်အောင်မီ” ပြန်သည်။ (ဗျာဒိတ် ၁၈:၅) ထို့ပြင် ဓမ္မဆရာအုပ်စုသည် လူသားတို့ပြဿနာကို မဖြေရှင်းနိုင်သော နိုင်ငံပေါင်းချုပ်၊ ကုလသမဂ္ဂနှင့် မျိုးချစ်တော်လှန်ရေး လှုပ်ရှားမှုများကို အားပေးထောက်ခံခြင်းအားဖြင့် ယေဟောဝါ၏ လာလတ္တံ့သော နိုင်ငံတော်ကို ကျောခိုင်းခဲ့ကြပြီ။ ဓမ္မဆရာအုပ်စုကို ယေရှုပယ်ခဲ့သည်မှာ ကြာပြီ။ သူတို့ကို အပြစ်စီရင်၍ တံငါသည်၏ ပိုက်ကွန်၌မိသော မကောင်းသည့်ငါးများကို ပစ်ပယ်သကဲ့သို့ ပယ်တော်မူပြီ။ ယနေ့ ခရစ်ယာန်ဘောင်ချာ့ခ်ျများ၏ ဝမ်းနည်းဖွယ်အဖြစ်ဆိုးက ၎င်းကို ထိုသို့စီရင်တော်မူခဲ့ပြီဖြစ်ကြောင်း သက်သေထူ၏။ ၎င်း၏ဇာတ်သိမ်းသည် ကျွန်ုပ်တို့အဖို့ သတိပေးချက်တစ်ရပ် ဖြစ်ပါစေ။—မဿဲ ၁၃:၄၇-၅၀။
၂၁။ ၁၉၁၉ ခုနှစ်မှစ၍ အသင်းတော်စစ်ထဲက ခရစ်ယာန်တို့သည် လောဒိကိမြို့ရှိ ခရစ်ယာန်များအား ယေရှုမိန့်ဆိုသောစကားကို မည်သို့တုံ့ပြန်ခဲ့ကြသနည်း။
၂၁ စစ်မှန်သော အသင်းတော်၌ပင် လူကို နိုးကြွစေလောက်အောင်လည်း မပူ၊ လန်းဆန်းစေလောက်အောင်လည်း မအေးသော သောက်ဖွယ်နှင့်တူသည့် ကြက်သီးနွေးပုဂ္ဂိုလ်များ ရှိကြသည်။ သို့တစေ၊ ယေရှုသည် မိမိ၏အသင်းတော်ကို လှိုက်လှိုက်လှဲလှဲ ချစ်ဆဲပင်။ ဧည့်ဝတ်ကျေပွန်စွာတုံ့ပြန်သော ခရစ်ယာန်များအတွက် မိမိကိုယ်ကို အသုံးတော်ခံဖို့ အသင့်ရှိတော်မူသည်။ ကိုယ်တော်အား ညစာစားရန် ခေါ်ဖိတ်သည့်အလား ကြိုဆိုသူတို့လည်း မနည်းပေ။ သို့ဖြစ်၍ ၁၉၁၉ ခုနှစ်မှစ၍ သူတို့မျက်စိပွင့်လာပြီး ကျမ်းစာပရောဖက်ပြုချက်များ၏ အဓိပ္ပာယ်ကို မြင်လာကြပြီ။ ဉာဏ်အလင်း ထွန်းလင်းသော ကာလပိုင်းကို ပျော်မွေ့ခဲ့ကြသည်။—ဆာလံ ၉၇:၁၁; ၂ ပေတရု ၁:၁၉။
၂၂။ အဘယ်အနာဂတ် ညစာစားပွဲအကြောင်း ယေရှုတွေးနေခြင်း ဖြစ်နိုင်သနည်း။ ၎င်းတွင် မည်သူများ ပါဝင်သုံးဆောင်ကြမည်နည်း။
၂၂ လောဒိကိမြို့သားများအား ယေရှုမိန့်ကြားစဉ် စိတ်ထဲ၌ အခြားညစာစားပွဲတစ်ရပ်ကို တွေးနေခြင်းလည်း ဖြစ်နိုင်သည်။ ဗျာဒိတ်ကျမ်းနောက်ပိုင်း၌ ဤသို့ဖတ်ရသည်– “သိုးသငယ်၏ ထိမ်းမြားမင်္ဂလာ ညစာစားပွဲသို့ ဖိတ်ကြားခံရသူတို့သည် ပျော်ရွှင်၏။” ဤကား မိစ္ဆာဘာသာကို ယေဟောဝါ တရားစီရင်ပြီးနောက်၌ ကိုယ်တော်ကို ချီးမွမ်းသည့်အနေနှင့် ကျင်းပသော အောင်ပွဲခံ စားသောက်ပွဲကြီး—ကောင်းကင်၌ ခရစ်တော်နှင့် ၁၄၄,၀၀၀ သောသတို့သမီး လူစုံတက်စုံ ပါဝင်သုံးဆောင်သော စားသောက်ပွဲကြီးတည်း။ (ဗျာဒိတ် ၁၉:၁-၉) ရှေးလောဒိကိ အသင်းတော်မှ တုံ့ပြန်သူများသာမက—ဘိသိက်ခံခရစ်ယာန်စစ်ဖြစ်ကြောင်း ထင်ရှားစေသည့် သန့်ရှင်းသောဝတ်ရုံ ဝတ်ဆင်သော မျက်မှောက်ခေတ် ခရစ်တော်ယေရှု၏ သစ္စာရှိညီတော်များပါ—မိမိတို့၏ သတို့သားနှင့်အတူ ထိုညစာစားပွဲတွင် မျက်နှာစုံညီ စားသောက်ရကြလိမ့်မည်။ (မဿဲ ၂၂:၂-၁၃) စိတ်ထက်သန်၍ နောင်တရရန် တိုက်တွန်းသွေးဆောင်သော အားပေးချက်ပါတကား။
အောင်နိုင်သူတို့အတွက် ပလ္လင်
၂၃၊ ၂၄။ (က) အခြားအဘယ်ဆုလာဘ်အကြောင်း ယေရှုမိန့်ဆိုသနည်း။ (ခ) ယေရှုသည် အဘယ်အချိန်တွင် မိမိ၏ မေရှိယပလ္လင်ပေါ် ထိုင်တော်မူသနည်း။ ခရစ်ယာန်အမည်ခံတို့အား အဘယ်အချိန်မှစ၍ တရားစီရင်တော်မူသနည်း။ (ဂ) မိမိ၏သေခြင်း အောက်မေ့ရာပွဲကို ယေရှု အစပြုကျင်းပစဉ် အဘယ်ထူးမြတ်သော ကတိကို တပည့်တော်တို့အား ပေးခဲ့သနည်း။
၂၃ နောက်ထပ်ဆုလာဘ်တစ်ခုအကြောင်း ယေရှု ဤသို့မိန့်တော်မူသည်– “ငါသည် အောင်နိုင်၍ ငါ့ခမည်းတော်၏ ပလ္လင်တော်ပေါ်မှာ ခမည်းတော်နှင့်အတူ ထိုင်ရသည်နည်းတူ အောင်နိုင်သူအား ငါ့ပလ္လင်ပေါ်မှာ ငါနှင့်အတူ ထိုင်ရသောအခွင့်ကို ငါပေးမည်။” (ဗျာဒိတ် ၃:၂၁) ဆာလံ ၁၁၀:၁၊ ၂ ပါ ဒါဝိဒ်၏စကား ပြည့်စုံချက်နှင့်အညီ လောကကိုအောင်နိုင်ခဲ့သူ သမာဓိစောင့်သိသူ ယေရှုသည် အေဒီ ၃၃ ခုနှစ်တွင် ထမြောက်၍ ခမည်းတော်၏ ကောင်းကင်ပလ္လင်တော်ပေါ်မှာ ခမည်းတော်နှင့်အတူ စံမြန်းရန် ချီးမြှင့်ခြင်းခံရသည်။ (တမန်တော် ၂:၃၂၊ ၃၃) ယေရှုသည် အရေးပါသော အခြားခုနှစ်သက္ကရာဇ်ဖြစ်သည့် ၁၉၁၄ ခုနှစ်၌ မိမိ၏မေရှိယ ပလ္လင်တော်ပေါ်မှာ ဘုရင်နှင့် တရားသူကြီးအဖြစ် နန်းထိုင်ရန် ကြွရောက်တော်မူသည်။ တရားစီရင်ခြင်းသည် ၁၉၁၈ ခုနှစ်၌ ခရစ်ယာန်အမည်ခံသူတို့မှ အစပြုကြောင်း ထင်ရှားသည်။ ထိုအချိန်မတိုင်မီ ကွယ်လွန်ခဲ့သော ဘိသိက်ခံအောင်နိုင်သူတို့သည် ထမြောက်၍ ယေရှုနှင့်အတူ ကိုယ်တော်၏နိုင်ငံတော်ကို ဝင်စားကြရမည်ဖြစ်သည်။ (၁ ပေတရု ၄:၁၇) မိမိ၏သေခြင်း အောက်မေ့ရာပွဲကို အစပြုကျင်းပစဉ် တပည့်တော်တို့အား ဤသို့ကတိပြု မိန့်ဆိုခဲ့သည်– “ငါ့ခမည်းတော်သည် နိုင်ငံတော်အတွက် ငါနှင့်ပဋိညာဉ် ဖွဲ့သည်နည်းတူ ငါလည်း သင်တို့နှင့် ပဋိညာဉ်ဖွဲ့၏။ သို့ဖြစ်၍ သင်တို့သည် ငါ့နိုင်ငံတော်၌ ငါ့စားပွဲတွင် စားသောက်၍ ပလ္လင်များပေါ်ထိုင်ပြီး ဣသရေလ တစ်ဆယ့်နှစ်နွယ်ကို တရားစီရင်ရလိမ့်မည်။”—လုကာ ၂၂:၂၈-၃၀၊ ကဘ။
၂၄ “အသစ်ပြုပြင်သောကာလ” အတွင်း နန်းစံဘုရင်နှင့်အတူ နန်းထိုင်၍ ကိုယ်တော်၏ စုံလင်သောယဇ်ကို အခြေပြုလျက် နာခံသူလူသားလောကကို ဧဒင်စုံလင်မှုအဆင့်သို့ မြှင့်တင်ပေးခြင်းကိစ္စ၌ ကိုယ်တော်နှင့်အတူ ပါဝင်လုပ်ဆောင်ရခြင်းမှာ ထူးမြတ်လှသည့် တာဝန်ပါတကား။ (မဿဲ ၁၉:၂၈; ၂၀:၂၈) ကျွန်ုပ်တို့ကို ယောဟန်အသိပေးသည့်အတိုင်း ယေရှုသည် အောင်နိုင်သူတို့အား “နိုင်ငံတစ်ခုဖြစ်စေ၍ မိမိ၏ဘုရားသခင်၊ ခမည်းတော်အဖို့ ယဇ်ပုရောဟိတ်များ ဖြစ်စေတော်မူ” ပြီး ယေဟောဝါ၏ ထည်ဝါခန့်ညားသော ပလ္လင်တော်ပတ်လည်ရှိ ပလ္လင်များပေါ် စံမြန်းစေတော်မူသည်။ (ဗျာဒိတ် ၁:၆; ၄:၄) ဘိသိက်ခံဖြစ်စေ၊ ပရဒိသု ပြန်လည်တည်ထောင်ခြင်း၌ ပါဝင်ဆောင်ရွက်ဖို့ မျှော်လင့်သော ကမ္ဘာသစ်အဖွဲ့ဝင်ဖြစ်စေ၊ ကျွန်ုပ်တို့အားလုံး လောဒိကိမြို့သားများအား ယေရှုမိန့်ဆိုသောစကားကို နှလုံးသွင်းကြစို့။—၂ ပေတရု ၃:၁၃; တမန်တော် ၃:၁၉-၂၁။
၂၅။ (က) ယေရှုသည် ယခင်က သတင်းတော်များမှာကဲ့သို့ လက်ရှိသတင်းတော်ကိုလည်း မည်သို့နိဂုံးချုပ်တော်မူသနည်း။ (ခ) လောဒိကိမြို့ရှိ အသင်းတော်အား ယေရှုမိန့်ဆိုသောစကားကို ယနေ့ခရစ်ယာန်တစ်ဦးစီ မည်သို့တုံ့ပြန်သင့်သနည်း။
၂၅ ယေရှုသည် ရှေ့ပိုင်းက သတင်းတော်များမှာကဲ့သို့ ဤသတင်းတော်ကိုလည်း အောက်ပါတိုက်တွန်းစကားဖြင့် နိဂုံးချုပ်တော်မူသည်။ “အသင်းတော်တို့အား ဝိညာဉ်တော် ဆင့်ဆိုသောစကားကို နားရှိသောသူ ကြားပါစေ။” (ဗျာဒိတ် ၃:၂၂) ကျွန်ုပ်တို့သည် ဆုံးခန်းကာလ၏ အဆုံးပိုင်းတွင် အသက်ရှင်နေကြသည်။ ခရစ်ယာန်ဘောင်သည် မေတ္တာအရာ၌ အေးစက်စက်ဖြစ်နေကြောင်း ကျွန်ုပ်တို့ပတ်ပတ်လည်၌ သာဓကထင်ရှားနေသည်။ ၎င်းနှင့်ဆန့်ကျင်လျက် ခရစ်ယာန်စစ်များအနေနှင့် ကျွန်ုပ်တို့သည် လောဒိကိမြို့ရှိ အသင်းတော်ထံပို့သော သတင်းတော်ကိုမက၊ အသင်းတော်များထံသို့ရေးသော ကျွန်ုပ်တို့သခင်၏ သတင်းတော် ခုနစ်ခုစလုံးကို အားတက်သရော တုံ့ပြန်ကြပါစေ။ ကျွန်ုပ်တို့ခေတ်အဖို့ဖြစ်သော ယေရှု၏အောက်ပါ မဟာပရောဖက်ပြုချက် ပြည့်စုံခြင်းတွင် အားသွန်ခွန်စိုက် ပါဝင်ခြင်းဖြင့် ထိုသို့တုံ့ပြန်နိုင်သည်– “နိုင်ငံတော်ဆိုင်ရာ သတင်းကောင်းအကြောင်းကို ကမ္ဘာတစ်ဝန်းလုံးရှိ လူမျိုးအပေါင်းတို့အား သက်သေခံဟောပြောပြီးမှ ကပ်ကမ္ဘာကုန်ဆုံးချိန် ရောက်လိမ့်မည်။”—မဿဲ ၂၄:၁၂-၁၄၊ ခမ။
၂၆။ ယေရှု အဘယ်အခါ ယောဟန်နှင့် တိုက်ရိုက်စကားပြောပြန်သနည်း။ သို့သော် အဘယ်အရာတွင် ပါဝင်တော်မူသနည်း။
၂၆ အသင်းတော် ခုနစ်ပါးထံပေးပို့သော ယေရှု၏သြဝါဒသည် ဤတွင်ပြီးဆုံးလေပြီ။ ယေရှုသည် ဗျာဒိတ်ကျမ်း၏ နောက်ဆုံးအခန်းကြီး မတိုင်မချင်း ယောဟန်နှင့် နောက်တစ်ဖန် မိန့်ဆိုခြင်းမပြုတော့။ သို့ရာတွင် ရူပါရုံများစွာတို့တွင် ပါဝင်တော်မူသည်။ ဥပမာ၊ ယေဟောဝါ၏ တရားစီရင်ချက်ကို အကောင်အထည် ဖော်ခြင်း၌ဖြစ်သည်။ သခင်ယေရှုခရစ် ဖော်ပြတော်မူသော ထူးခြားလှသည့် ဒုတိယရူပါရုံကို ယောဟန်အတန်းအစားနှင့်အတူ ဆန်းစစ်ကြပါစို့။
[အောက်ခြေမှတ်ချက်]
^ အပိုဒ်၊ 7 လောဒိကိမြို့ တည်ရှိခဲ့သော နေရာတွင် ရှေးဟောင်းသုတေသန တူးဖော်မှုများပြုကြရာ အဆိုပါနေရာများကို တွေ့ရှိရသည်။
[လေ့လာရန်မေးခွန်းများ]
[စာမျက်နှာ ၇၃ ပါ လေးထောင့်ကွက်]
ရုပ်ဝါဒနှင့် ဉာဏ်ပညာတို့၏ ပြိုင်ဆိုင်မှု
၁၉၅၆ ခုနှစ်၌ သတင်းစာ ပင်တိုင်ဆောင်းပါးရှင်တစ်ဦးက ဤသို့ရေးသည်– “ရာစုနှစ်တစ်ခုအထက်က သာမန်လူတစ်ဦး လိုချင်ရာပစ္စည်း ၇၂ မျိုးရှိသည်ဟု ခန့်မှန်းရသည်။ ၎င်းတို့အနက် ၁၆ မျိုးကို လိုအပ်ရာများအဖြစ် ယူမှတ်ကြသည်။ ယနေ့၊ သာမန်လူတစ်ဦး လိုချင်ရာပစ္စည်း ၄၇၄ မျိုးရှိပြီး ၎င်းအနက် ၉၄ မျိုးကို လိုအပ်ရာများအဖြစ် ယူမှတ်ကြသည်။ ရာစုနှစ်တစ်ခုအထက်၌ သာမန်လူတစ်ဦး ဝယ်ယူသုံးစွဲရန် အရောင်းပညာရှင်တို့ မြှူဆွယ်တိုက်တွန်းသည့် ပစ္စည်းအမျိုးပေါင်း ၂၀၀ ရှိသည်—ယနေ့မူ၊ အမျိုးပေါင်း ၃၂,၀၀၀ ဖြစ်လာပြီး ယင်းတို့ကို လက်ကာတွန်းဖယ်နေရပါသည်။ လူ့လိုအပ်ရာများမှာ နည်းပြီး—လိုချင်ရာများကား အသင်္ချေ။” ယနေ့တွင်၊ လူတို့သည် ဥစ္စာပစ္စည်း ချမ်းသာကြီးပွားမှုသာ ပဓာန ဟူသော အယူအဆ၏ တရစပ်တိုက်ခိုက်ခြင်းကို ခံနေရသည်။ သို့ဖြစ်၍ လူများစွာတို့သည် ဒေသနာ ၇:၁၂ (သမ္မာ) ၏အောက်ပါအကြံပြုချက်ကို လျစ်လျူရှုလာကြသည်– “ငွေသည် ကွယ်ကာတတ်သကဲ့သို့၊ ပညာသည်လည်း ကွယ်ကာတတ်၏။ အသိပညာ၏အကျိုးကျေးဇူး [“သာလွန်ချက်၊” ကဘ] ကား၊ ပညာရှင်အား အသက်ရှင်စေခြင်းတည်း။”
[စာမျက်နှာ ၆၇ ပါ ရုပ်ပုံ]
လောဒိကိသို့ရောက်သော ရေသည် မပူမအေးဖြစ်သကဲ့သို့ လောဒိကိမြို့ရှိ ခရစ်ယာန်များ၏ စိတ်ဓာတ်လည်း မပူမအေးဖြစ်နေ
