များမကြာမီ ဖြစ်ပျက်ရမည့် အမှုအရာများ
အခန်း ၃
များမကြာမီ ဖြစ်ပျက်ရမည့် အမှုအရာများ
၁။ ဤလောကပေါ် ကျရောက်မည့် ဘုရားသခင့် တရားစီရင်ချက်မှ သင် မည်သို့လွတ်မြောက်နိုင်မည်နည်း။
ယနေ့ ကမ္ဘာ့ဖြစ်ရပ်များကို သင်အလေးအနက် အရေးပေးသင့်သည်။ အဘယ်ကြောင့်နည်း။ ဤလောကသည် ဘုရားသခင့်စီရင်မှုနှင့် လွတ်မည်မဟုတ်၍တည်း။ အသင်မူ လွတ်နိုင်၏။ သင့်ကိုယ်သင် မလွဲမသွေ ပျက်စီးရမည့် “ဤလောက၏ အစိတ်အပိုင်းမဟုတ်” ဘဲ သီးခြားနေခြင်းဖြင့်ဖြစ်သည်။ ရသေ့ကဲ့သို့ ခြိုးခြံပြီး ဘုန်းကြီးပမာ သီတင်းသုံးရမည်ကို မဆိုလိုပါ။ ကောင်းမွန်၍ အဓိပ္ပာယ်ပြည့်ဝသောဘဝဖြင့် ပျော်မွေ့နိုင်သော်လည်း နိုင်ငံရေး၏ဖောက်ပြားမှု၊ လောဘဇောတိုက်သော စီးပွားရေးစနစ်၊ ဘုရားသခင့်အသရေကို ရှုတ်ချသော ဘာသာရေးသာမက၊ အကြမ်းဖက်၍ သီလပျက်သောအကျင့်တို့ကို ရှောင်ခြင်းဖြစ်သည်။ တစ်ချိန်တည်းတွင် ဘုရားသခင်၏ မြင့်မြတ်သော အကျင့်အကြံစံနှုန်းကို လိုက်ရမည်၊ အလိုတော်ဆောင်ရွက်ရန် ကြိုးစားရမည်။ (ယောဟန် ၁၇:၁၄-၁၆; ဇေဖနိ ၂:၂၊ ၃; ဗျာဒိတ် ၂၁:၈) ဤအပိုင်းများ၌ အားထုတ်၍ လိုအပ်သလို ဘဝကိုပြုပြင်ရန် မည်မျှအရေးကြီးကြောင်း ဗျာဒိတ်ကျမ်းက တင်ပြသည်။
၂။ ဗျာဒိတ်ကျမ်း၏ မြင့်မြတ်သောပရောဖက်ပြုချက်အတွက် ယောဟန်မည်သို့ နိဒါန်းပျိုးလိုက်သနည်း။ အလွန်အရေးကြီးသော ဤသတင်းစကားကို အဘယ်သူများအား ပေးတော်မူသနည်း။
၂ မြင့်မြတ်သော ဤပရောဖက်ပြုချက်ကို တမန်တော်ယောဟန်က အောက်ပါစကားဖြင့် နိဒါန်းပျိုးလိုက်သည်– “များမကြာမီ ဖြစ်ပျက်ရမည့် အမှုအရာများကို မိမိကျွန်တို့အား ပြသရန် ဘုရားသခင် ပေးတော်မူသောယေရှုခရစ်၏ ဗျာဒိတ်တော်။” (ဗျာဒိတ် ၁:၁က) ထို့ကြောင့် အလွန်အရေးပါသော ဤသတင်းတော်ကို ဘုရားသခင်ထံမှ လက်ခံရရှိသူမှာ ထမြောက်ခဲ့သော ယေရှုခရစ်ဖြစ်သည်။ ဤတွင် ယေရှုခရစ်ကို လျှို့ဝှက်နက်နဲသော သုံးပါးတစ်ဆူ၏ အစိတ်အပိုင်းတစ်ခုအဖြစ် တင်ပြဖို့ဝေးစွ၊ မိမိခမည်းတော်၏ လက်အောက်ခံအဖြစ် ဖော်ပြထားသည်။ ထို့နည်းတူ ခရစ်ယာန်အသင်းတော် အဖွဲ့ဝင် “ကျွန်များ” လည်း ယေရှုခရစ်၏ လက်အောက်ခံဖြစ်သဖြင့် ‘သူသွားလေရာနောက်တော်သို့ အစဉ်လိုက်’ ကြသည်။ (ဗျာဒိတ် ၁၄:၄; ဧဖက် ၅:၂၄) သို့ရာတွင် ယနေ့ မည်သူများသည် ဘုရားသခင့် “ကျွန်” စစ်ဖြစ်ကြသနည်း။ ဗျာဒိတ်ကျမ်းသည် သူတို့ကို မည်သို့အကျိုးပြုသနည်း။
၃။ (က) ယေရှုခရစ်လက်အောက်ခံ ထို “ကျွန်များ” မှာ မည်သူများနည်း။ (ခ) ထိုသစ္စာရှိ “ကျွန်များ” သည် ကောင်းကင်တမန် ညွှန်ကြားမှုအောက် အဘယ်အမှုကို ဆောင်ရွက်လျက်ရှိသနည်း။
၃ ဗျာဒိတ်ကျမ်းကိုရေးသူ တမန်တော်ယောဟန်က မိမိကိုယ်ကို ထိုသို့သောကျွန်တစ်ယောက်အဖြစ် တင်ပြ၏။ သူသည် အသက်ရှင်ဆဲ နောက်ဆုံးတမန်တော်လည်းဖြစ်၊ မသေနိုင်သော ကောင်းကင်အသက်တာဝင်စားမည့် “ကျွန်များ” တည်းဟူသော လက်ရွေးစင် ဝိညာဉ်တော်-ဘိသိက်ခံအုပ်စုထဲက တစ်ယောက်လည်း ဖြစ်သည်။ ယနေ့ဆိုလျှင် သူတို့ထဲက ထောင်ဂဏန်းလောက်သောသူများသာ မြေကြီးပေါ်ကျန်ရစ်ကြသည်။ ဘုရားသခင်၌ အခြားအစေခံများရှိသေး၏။ ယောက်ျား၊ မိန်းမ၊ ကလေးများပါဝင်သည့် လူအုပ်ကြီးတစ်အုပ်ဖြစ်ပြီး အရေအတွက် သန်းနှင့်ချီ၍ရှိလေပြီ။ သူတို့သည် ကောင်းကင်တမန်များ၏ ညွှန်ကြားမှုအောက်၌ ဘိသိက်ခံ “ကျွန်များ” နှင့်အတူ ထာဝရသတင်းကောင်းကို လူခပ်သိမ်းအား ကြားပြောလျက်နေသည်။ ဤ “ကျွန်များ” အားလုံးသည် ကမ္ဘာပေါ်ရှိသိမ်မွေ့သူများ ကယ်တင်ခြင်းရရေးအတွက် ကူညီရန် မိမိတို့ကိုယ်ကို အသုံးတော်ခံကြသည်တကား။ (မဿဲ ၂၄:၁၄; ဗျာဒိတ် ၇:၉၊ ၁၄; ၁၄:၆) သင်သည် ဝမ်းမြောက်ဖွယ် သတင်းကောင်းမှ အကျိုးရယူနိုင်ရန် ဘာလုပ်ရမည်ကို ဗျာဒိတ်ကျမ်းက ပြဆို၏။
၄။ (က) ဗျာဒိတ်ကျမ်းကို ယောဟန်ရေးသည်မှာ အနှစ် ၁၉,၀၀ ကျော်ပြီဖြစ်ရာ “များမကြာမီ ဖြစ်ပျက်ရမည့် အမှုအရာများ” အကြောင်းကို ယောဟန်အဘယ်ကြောင့် ဆိုနိုင်သနည်း။ (ခ) တင်ကူးမိန့်ဆိုခဲ့သော အရာများနှင့်ပတ်သက်၍ သာဓကများက ဘာကိုပြသနည်း။
၄ သို့သော် “များမကြာမီ ဖြစ်ပျက်ရမည့် အမှုအရာများ” ကို “ကျွန်များ” အား ပြသတော်မူမည်ဟု ယောဟန် အဘယ်ကြောင့်ဆိုနိုင်သနည်း။ ထိုစကားများကို မိန့်မြွက်သည်မှာ အနှစ် ၁,၉၀၀ ကျော် ရှိပြီမဟုတ်လော။ အနှစ်တစ်ထောင်ကို “မနေ့ကဲ့သို့” ရှုမှတ်တော်မူသော ယေဟောဝါ၏အမြင်တွင် နှစ်ပေါင်း ၁,၉၀၀ သည် မြေကြီးကိုဖန်ဆင်း၍ လူသားတို့နေထိုင်နိုင်ရန် ပြင်ဆင်ရာ၌ အသုံးပြုတော်မူခဲ့သည့် အတိုင်းမဲ့ကာလနှင့်ယှဉ်လျှင် တစ်ခဏမျှသာဖြစ်သည်။ (ဆာလံ ၉၀:၄) တမန်တော်ပေါလုက မိမိကိုယ်တိုင် “မျှော်လင့်အားကြီး၍ တောင့်တ” သည်ဟုဆို၏။ မိမိအဖို့ ဆုအကောင်အထည်ပေါ်မည့်အချိန် နီးပြီဟု ယူမှတ်၍ဖြစ်၏။ (ဖိလိပ္ပိ ၁:၂၀) သို့သော် ယနေ့ဆိုလျှင် ကြိုဟောခဲ့သမျှအရာ အားလုံး အချိန်ကိုက် ဖြစ်ပျက်လာမည်ဖြစ်ကြောင်း သက်သေထူသော သာဓက များပြားလှ၏။ သမိုင်းတွင် ယခင်တစ်ခါကမျှ လူသားထုတစ်ရပ်လုံး ယခုကဲ့သို့ သေရေးရှင်ရေးနှင့် မကြုံဖူးချေ။ ဘုရားသခင်သာ ဤပြဿနာကို ဖြေရှင်းနိုင်သည်။—ဟေရှာယ ၄၅:၂၁။
ဆက်သွယ်ရေးလမ်းကြောင်း
၅။ ဗျာဒိတ်ကျမ်းကို တမန်တော်ယောဟန်လက်သို့လည်းကောင်း၊ ထို့နောက် အသင်းတော်များဆီသို့လည်းကောင်း မည်သို့ကမ်းလှမ်းခဲ့သနည်း။
၅ ဗျာဒိတ် ၁:၁ခ၊ ၂ က ဤသို့ဆက်၍ဆို၏– “ကိုယ်တော် [ယေရှု] သည် မိမိကောင်းကင်တမန်ကို စေလွှတ်၍ မိမိ၏ကျွန် ယောဟန်အား အမှတ်သင်္ကေတများဖြင့် ၎င်း [ဗျာဒိတ်တော်] ကို တင်ပြတော်မူ၏။ ယောဟန်သည် ဘုရားသခင် ပေးတော်မူသော နှုတ်ကပါဌ်တော်၊ ယေရှုခရစ်ပေးတော်မူသော သက်သေအပြင်၊ မိမိတွေ့မြင်သမျှ အရာအားလုံးကိုပင် သက်သေခံလေသည်။” သို့ဖြင့် ယောဟန်သည် မှုတ်သွင်းခံမှတ်တမ်းကို ကောင်းကင်စေတမန်မှတစ်ဆင့် လက်ခံရရှိသည်။ သူသည် စာလိပ်တစ်လိပ်ပေါ်ရေးမှတ်၍ မိမိလက်ထက်ရှိ အသင်းတော်များဆီသို့ တစ်ဆင့်ပို့လေသည်။ ကျွန်ုပ်တို့အဖို့ ဝမ်းသာစရာမှာ ဘုရားသခင်သည် ယနေ့ကမ္ဘာပေါ်ရှိ မိမိ၏ စည်းလုံးသောကျေးကျွန်များဖြင့် ဖွဲ့စည်းထားသည့် အသင်းတော်ပေါင်း ၁၀၀,၀၀၀ နီးပါးအတွက် အားတက်စရာဖြစ်စေရန် ၎င်းကိုထိန်းသိမ်းလာခဲ့သည်။
၆။ ယနေ့ မိမိ၏ ‘ကျွန်များ’ အား ဝိညာဏအစာ ကျွေးမွေးရန် မိမိအသုံးပြုမည့် ဆက်သွယ်ရေးလမ်းကြောင်းမှာ မည်သူမည်ဝါဖြစ်ကြောင်း ယေရှုမည်သို့ထုတ်ဖော်မိန့်ကြားခဲ့သနည်း။
၆ ယောဟန်လက်ထက်တွင် ဗျာဒိတ်ကျမ်းကို သတင်းပြန်ကြားရန် ဘုရားသခင်လက်၌ ဆက်သွယ်ရေးလမ်းကြောင်းတစ်ခုရှိ၍ ယောဟန်သည် ၎င်းလမ်းကြောင်း၏ မြေကြီးဆိုင်ရာအပိုင်းဖြစ်သည်။ ထိုနည်းတူ ယနေ့ မိမိ ‘ကျွန်များ’ အား ဝိညာဏအာဟာရပေးရန် ဘုရားသခင်၌ လမ်းကြောင်းတစ်ခုရှိပေသည်။ ယေရှုက ဤလမ်းကြောင်း၏ မြေကြီးဆိုင်ရာအပိုင်းမှာ “သစ္စာနှင့် သတိပညာရှိကျွန်” ပင်ဖြစ်ကြောင်း အစီအစဉ်စနစ် ဆုံးခန်းနှင့်ပတ်သက်သော မိမိ၏ မဟာပရောဖက်ပြုချက်၌ ထုတ်ဖော်မိန့်ကြားတော်မူသည်။ “ထိုသူကို သခင်က မိမိ၏ အိမ်စေများအပေါ် အုပ်ချုပ်စေ၍ အချိန်တန်အစာပေးစေရန် ခန့်တော်မူသည်။” (မဿဲ ၂၄:၃၊ ၄၅-၄၇၊ ကဘ) ကိုယ်တော်သည် ဤ ယောဟန်အတန်းအစားကိုသုံး၍ ထိုပရောဖက်ပြုချက်ကို အနက်ဖွင့်တော်မူသည်။
၇။ (က) ဗျာဒိတ်ကျမ်းပါ သင်္ကေတများသည် ကျွန်ုပ်တို့အပေါ် မည်သို့အကျိုးသက်ရောက်သင့်သနည်း။ (ခ) ယောဟန်အတန်းအစားထဲမှ အချို့တို့သည် ဗျာဒိတ်ကျမ်း၏ရူပါရုံများ ပြည့်စုံချက်၌ ပါဝင်ခဲ့ကြသည်မှာ မည်မျှကြာပြီနည်း။
၇ ယေရှုသည် ဗျာဒိတ်တော်ကို “အမှတ်သင်္ကေတ၊” သို့မဟုတ် အထိမ်းအမှတ်များဖြင့် တင်ပြတော်မူသည်ဟု တမန်တော်ယောဟန်ဆို၏။ ၎င်းတို့သည် ပီပြင်ထင်ရှား၍ သုံးသပ်ရာ၌ ပီတိဖြာစရာဖြစ်သည်။ အားမာန်တက်ကြွသော လုပ်ငန်းရပ်ကို သရုပ်ဖော်ထားသည်ဖြစ်၍ ၎င်း၏လှုံ့ဆော်မှုကြောင့် ကျွန်ုပ်တို့သည် သူတစ်ပါးအား ဤပရောဖက်ပြုချက်နှင့် ယင်း၏အဓိပ္ပာယ်ကို အားတက်သရော ပြောကြားသင့်ပေသည်။ ဗျာဒိတ်ကျမ်းသည် အားမာန်ပြည့်စေသော ရူပါရုံအများအပြားကို တင်ပြပြီး ရူပါရုံတစ်ခုစီ၌ ယောဟန်သည် တက်ကြွစွာဖြစ်စေ၊ အကဲခတ်သူအဖြစ် ဖြစ်စေ ပါဝင်ခဲ့သည်။ ဘုရားသခင်၏ဝိညာဉ်တော်က အနက်ဖွင့်ပေးသဖြင့် မိမိတို့သည် အခြားသူများအား ရှင်းပြနိုင်ကြပြီဖြစ်ရာ ယောဟန်အတန်းအစားဝင်တို့သည် ဝမ်းသာကြ၏။ သူတို့ထဲကအချို့ဆိုလျှင် ထိုရူပါရုံများပြည့်စုံချက်၌ ဆယ်စုနှစ်များစွာ ပါဝင်ဆင်နွှဲခဲ့ကြပြီဖြစ်သည်။
၈။ (က) ဗျာဒိတ်ကျမ်း၏ ရူပါရုံများသည် ကိုယ်စီကိုယ်င အဘယ်ထူးခြားချက်ရှိသနည်း။ (ခ) ဒံယေလ၏ပရောဖက်ပြုချက်က ဗျာဒိတ်ကျမ်းပါသားရဲများ အဘယ်အရာများဖြစ်ကြောင်း နားလည်နိုင်ရန် မည်သို့အကူအညီ ပေးသနည်း။
၈ ဤရူပါရုံများကို ကာလဖြစ်စဉ်အလိုက် မတင်ပြပါ။ တစ်ခုစီ၌ သူ့ပြည့်စုံချိန်နှင့်သူရှိသည်။ ဤရူပါရုံများစွာတို့သည် ရှေးကပရောဖက်ပြုချက်များမှ စကားလုံးများနှင့်ဆင်တူသည်ဖြစ်ရာ အနက်ဖွင့်ရာ၌ ထိုပရောဖက်ပြုချက်များက သဲလွန်စပေး၏။ ဥပမာ၊ ဒံယေလ၏ ပရောဖက်ပြုချက်က ကြောက်မက်ဖွယ်ရာ သားရဲလေးကောင်အကြောင်း ဖော်ပြပြီး ၎င်းတို့သည် ကမ္ဘာကိုကြီးစိုးသော အင်အားကြီးနိုင်ငံများဖြစ်သည်ဟု ရှင်းပြသည်။ ထို့ကြောင့် ဗျာဒိတ်ကျမ်းပါ သားရဲများသည် ယနေ့လက်ရှိအပါအဝင် နိုင်ငံရေးဆိုင်ရာ အရာများဖြစ်ကြောင်း နားလည်နိုင်ရန် အထောက်အကူပြု၏။—ဒံယေလ ၇:၁-၈၊ ၁၇; ဗျာဒိတ်၊ ၁၃:၂၊ ၁၁-၁၃; ၁၇:၃။
၉။ (က) ယောဟန်အတန်းအစားသည် ယောဟန်ကဲ့သို့ အဘယ်သဘောထားရှိသနည်း။ (ခ) ပျော်ရွှင်မှုသို့ ပို့ဆောင်သောလမ်းစဉ်ကို ယောဟန်မည်သို့ ပြညွှန်သနည်း။
၉ ယောဟန်သည် ယေရှုခရစ်မှတစ်ဆင့် မိမိအား ဘုရားသခင်ပေးတော်မူသော သတင်းတော်ကို သစ္စာရှိရှိ တာဝန်သိသိ သက်သေခံပေသည်။ “မိမိတွေ့မြင်သမျှ အရာအားလုံးကို” အသေးစိတ်ဖော်ပြ၏။ ပရောဖက်ပြုချက်ကို အပြည့်အဝနားလည်ပြီး ၎င်း၏မွန်မြတ်သော အချက်အလက်များကို ဘုရားသခင့်လူမျိုးတော်အား အသိပေးနိုင်ရန် ယောဟန်အတန်းအစားသည် ဘုရားသခင်နှင့် ယေရှုခရစ်ထံတော်မှ လမ်းညွှန်မှုကို စိတ်ထက်သန်စွာ တောင်းခံကြသည်။ ဘိသိက်ခံအသင်းတော်၏အကျိုးအတွက်၊ (ထို့ပြင်၊ ဘုရားသခင့်စောင်မမှုဖြင့် ဆင်းရဲဒုက္ခကြီးကို အရှင်လတ်လတ် ဖြတ်ကျော်မည့် နိုင်ငံတကာဆိုင်ရာ လူအုပ်ကြီး၏ အကျိုးအတွက်) ယောဟန်က ဤသို့ရေး၏– “ဤပရောဖက်ကျမ်းစကားများကို ကျယ်စွာဖတ်သူနှင့် ကြားနာသူတို့အပြင်၊ ၎င်း၌ရေးသားထားသောအရာများကို လိုက်နာသူတို့သည် ပျော်ရွှင်၏။ အကြောင်းမှာ ချိန်းချက်သောအချိန်နီးပြီ။”—ဗျာဒိတ် ၁:၃။
၁၀။ ပျော်ရွှင်မှုရနိုင်ရန် ဗျာဒိတ်ကျမ်းနှင့်ပတ်သက်၍ ကျွန်ုပ်တို့ဘာပြုရမည်နည်း။
၁၀ သင်သည် ဗျာဒိတ်ကျမ်းကို ဖတ်ခြင်းဖြင့် အကျိုးများစွာ ရရှိမည်။ ၎င်း၌ရေးသားသောအရာများကို လိုက်နာလျှင် သာ၍ပင် အကျိုးရမည်။ ယောဟန်က မိမိရေးသော ဩဝါဒစာတစ်စောင်၌ ဤသို့ရှင်းလင်းသည်– “ဘုရားသခင်ကို ချစ်ခြင်းသည် ကိုယ်တော်၏ပညတ်တော်တို့ကို စောင့်ထိန်း ခြင်းပင်ဖြစ်သည်။ ကိုယ်တော်၏ပညတ်တော်တို့ကို စောင့်ထိန်းရန် ငါတို့အတွက် ဝန်မလေးပေ။ အဘယ်ကြောင့်ဆိုသော် ဘုရားသခင်၏ သားသမီးဖြစ်သူသည် လောကကို အောင်နိုင်သောကြောင့်ဖြစ်၏။ ငါတို့သည် ယုံကြည်ခြင်းအားဖြင့် လောကကို အောင်ခြင်းဖြစ်ပေသည်။” (၁ ယောဟန် ၅:၃၊ ၄၊ ခမ) သင်သည် ဤသို့သောယုံကြည်ခြင်းကို တည်ဆောက်လျှင် အလွန်ပျော်ရွှင်နိုင်မည်။
၁၁။ (က) ဤပရောဖက်ကျမ်းစကားများကို လိုက်နာရန် အဘယ်ကြောင့် အရေးကြီးလှပြီနည်း။ (ခ) အဘယ်အချိန်သည် ကျလုသောဘေးပမာ အလွန်နီးကပ်နေပြီဖြစ်မည်နည်း။
၁၁ ဤပရောဖက်ကျမ်းစကားများကို လိုက်နာရန် အရေးကြီးလှပြီ။ “အကြောင်းမှာ ချိန်းချက်သောအချိန်နီးပြီ။” ဘာအတွက် ချိန်းချက်သောအချိန်ဖြစ်သနည်း။ ဘုရားသခင့် တရားစီချက်များပါဝင်သည့် ဗျာဒိတ်ကျမ်း၏ ပရောဖက်ပြုချက်များ ပြည့်စုံရန်အချိန်တည်း။ စာတန့်လောကစနစ်ကို ဘုရားသခင်နှင့် ယေရှုခရစ် အပြီးသတ်စီရင်မည့်အချိန်နီးပြီ။ ယေရှု ကမ္ဘာပေါ်ရှိစဉ် မိမိခမည်းတော်သာ ထို “နေ့ရက် နာရီ” ကိုသိသည်ဟု မိန့်ဆိုခဲ့သည်။ ကျွန်ုပ်တို့ခေတ်တွင် တိုးများလာသော ကမ္ဘာ့ဒုက္ခများကို ကြိုမြင်သဖြင့်၊ “ဤအမှုအရာအလုံးစုံတို့ မဖြစ်မပျက်မီ ယခုခေတ်လူတို့ [“ယခုလူမျိုးဆက်၊” ကဘ] သေလွန်ရကြလိမ့်မည်မဟုတ်” ဟူ၍လည်း မိန့်တော်မူသည်။ ထို့ကြောင့် ချိန်းချက်သော ဘုရားသခင့်စီရင်သုတ်သင်ချိန်သည် ကျလုသောဘေးပမာ အလွန်နီးကပ်ပြီဖြစ်ရမည်။ (မာကု ၁၃:၈၊ ၃၀-၃၂၊ ခမ) ဟဗက္ကုတ် ၂:၃ ဆိုသည့်အတိုင်းပင်– “ထိုရူပါရုံသည် ချိန်းချက်သောအချိန်နှင့်ဆိုင်၍ အမှုကုန်ရသောကာလကို ဆိုလို၏။ မုသာနှင့်ကင်းလွတ်၏။ ဆိုင်းသော်လည်း မျှော်လင့်လော့။ နောက်မကျဘဲ ဧကန်အမှန် ရောက်လိမ့်မည်။” ဆင်းရဲဒုက္ခကြီးကိုကပ်ကျော်၍ ကျွန်ုပ်တို့ ကယ်တင်ခြင်းရရေးသည် ဘုရားသခင့် ပရောဖက်ကျမ်းစကားကို လိုက်နာခြင်းပေါ် မူတည်သတည်း။—မဿဲ ၂၄:၂၀-၂၂။
[လေ့လာရန်မေးခွန်းများ]
[စာမျက်နှာ ၁၅ ပါ လေးထောင့်ကွက်]
ဗျာဒိတ်ကျမ်းကို နားလည်နိုင်ရန် အောက်ပါအချက်များ ပြုဖို့လိုသည်
● ယေဟောဝါ၏ဝိညာဉ်တော် အကူအညီရယူရန်
● သခင့်နေ့တော် အဘယ်အချိန်မှ အစပြုသည်ကိုသိရန်
● ယနေ့ သစ္စာနှင့်သတိပညာရှိကျွန်ကို သိမှတ်ရန်
