မြို့ကြီး ပျက်သုဉ်းခြင်း
အခန်း ၃၆
မြို့ကြီး ပျက်သုဉ်းခြင်း
ရူပါရုံ ၁၂ ဗျာဒိတ် ၁၈:၁–၁၉:၁၀
အကြောင်းအရာ– မဟာဗာဗုလုန်၏ ကျဆုံးခြင်းနှင့် ပျက်စီးခြင်း။ သိုးသငယ်၏ ထိမ်းမြားမင်္ဂလာကို ကြေညာခြင်း
ပြည့်စုံချိန်– ၁၉၁၉ ခုနှစ်မှ ဆင်းရဲဒုက္ခကြီး ပြီးဆုံးချိန်အထိ
၁။ အဘယ်အရာက ဆင်းရဲဒုက္ခကြီးကို အစပြုမည်နည်း။
မဟာဗာဗုလုန်၏ ဇာတ်သိမ်းပုံမှာ တုန်လှုပ်ဖွယ်ကောင်းသော ရုတ်ခြည်း ပျက်ပြုန်းခြင်းတည်း။ ၎င်းသည် သမိုင်းတစ်လျှောက် အကြီးမားဆုံးသော ကပ်ဆိုးကြီးဖြစ်ပြီး “ကမ္ဘာဦးမှစ၍ ယခုတိုင်အောင် မဖြစ်စဖူး၊ နောက်၌လည်း မဖြစ်လတ္တံ့သော ကြီးစွာသောဒုက္ခ” ကို အစပျိုးပါလိမ့်မည်။—မဿဲ ၂၄:၂၁။
၂။ နိုင်ငံရေးအင်ပါယာများ တက်လိုက်ကျလိုက် ဖြစ်ခဲ့သော်လည်း မည်သို့သောအင်ပါယာမူ တည်တံ့ခဲ့သနည်း။
၂ မိစ္ဆာဘာသာ တည်ရှိလာခဲ့သည်မှာ ကြာမြင့်လှပြီ။ ယေဟောဝါကိုအန်တု၍ လူတို့အား ဘေဘဲလ်ရဲတိုက် တည်ဆောက်စေသော သွေးဆာသူ နိမ်ရောဒလက်ထက်မှစ၍ ယနေ့အထိ အဆက်မပြတ် တည်ရှိခဲ့သည်။ ထိုသူပုန်များ၏ ဘာသာစကားကို ယေဟောဝါ ရှုပ်ထွေးစေပြီး သူတို့ကို ကမ္ဘာအနှံ့သို့ ကွဲလွင့်စေတော်မူသောအခါ သူတို့နှင့်အတူ ဗာဗုလုန်၏ မိစ္ဆာဘာသာတရား လိုက်ပါသွား၏။ (ကမ္ဘာဦး ၁၀:၈-၁၀; ၁၁:၄-၉) ထိုအချိန်မှစ၍ နိုင်ငံရေးအင်ပါယာများ တက်လိုက်ကျလိုက် ဖြစ်ခဲ့သော်လည်း ဗာဗုလုန်ဘာသာတရားမှာမူ တည်တံ့လာခဲ့သည်။ ၎င်းသည် သဏ္ဌာန်အမျိုးမျိုး၊ ပုံစံအဖုံဖုံ ပြောင်းလဲခဲ့ပြီး ပရောဖက်ပြုထားသော ကမ္ဘာ့မိစ္ဆာဘာသာအင်ပါယာ မဟာဗာဗုလုန် ဖြစ်လာသည်။ ၎င်း၏အထင်ပေါ်ဆုံးအပိုင်းမှာ ရှေးဗာဗုလုန်ဆိုင်ရာ သွန်သင်ချက်များနှင့် အယူဝါဒဖောက်ပြန်သော “ခရစ်ယာန်” အယူဝါဒ ရောနှောရာမှ ပေါက်ဖွားလာသည့် ခရစ်ယာန်ဘောင်ဖြစ်သည်။ မဟာဗာဗုလုန်သည် အလွန့် အလွန်ရှည်လျားသော သမိုင်းကြောင်းရှိသောကြောင့် ၎င်းဖျက်ဆီးခံရမည်ကို လူအများ အယုံရခက်လှ၏။
၃။ ဗျာဒိတ်ကျမ်းက မိစ္ဆာဘာသာ ပျက်သုဉ်းမည်ဖြစ်ကြောင်း မည်သို့ခိုင်မာစေသနည်း။
၃ ထို့ကြောင့် မိစ္ဆာဘာသာ၏ ကျဆုံးခြင်းအကြောင်းနှင့်၊ လုံးဝဆိတ်သုဉ်းခြင်း အဖြစ်သို့ရောက်စေသော နောက်ပိုင်းအခြင်းအရာများနှင့်ပတ်သက်၍ ဗျာဒိတ်ကျမ်းက အသေးစိတ်ဖော်ပြချက် နှစ်ရပ်ကိုပေးခြင်းဖြင့် ၎င်းဧကန်ပျက်စီးမည် ဟူသောအချက်ကို အတည်ဖြစ်စေသည်မှာ လျောက်ပတ်ပေသည်။ အဆုံး၌ နိုင်ငံရေးနယ်ပယ်မှ ရည်းစားဟောင်းများ၏ ဖျက်ဆီးချေမှုန်းခြင်းကိုခံရသော “ပြည့်တန်ဆာကြီး” အဖြစ် ကျွန်ုပ်တို့ တွေ့ခဲ့ပြီးဖြစ်၏။ (ဗျာဒိတ် ၁၇:၁၊ ၁၅၊ ၁၆) ယခုဆိုလျှင် နောက်ရူပါရုံတစ်ခု၌ ၎င်းကို ရှေးဗာဗုလုန်မြို့၏ ဘာသာရေး ဥပမေယျအဖြစ် မြင်ရမည်ဖြစ်၏။
မဟာဗာဗုလုန် တလိမ့်ခေါက်ကွေးကျခြင်း
၄။ (က) အဘယ်ရူပါရုံကို ယောဟန် ဆက်လက်မြင်ရသနည်း။ (ခ) ထိုကောင်းကင်တမန် မည်သူဖြစ်ကြောင်း ကျွန်ုပ်တို့ မည်သို့ခွဲခြားသိရှိနိုင်သနည်း၊ မဟာဗာဗုလုန်ကျဆုံးခြင်းကို သူကြေညာသည်မှာ အဘယ်ကြောင့် လျောက်ပတ်သနည်း။
၄ ယောဟန် ဤသို့ဆက်၍ဖော်ပြ၏– “ဤအရာများနောက်၌ ကြီးစွာသော အခွင့်အာဏာရှိသည့် အခြားကောင်းကင်တမန်တစ်ပါး ကောင်းကင်မှ ဆင်းသက်လာသည်ကို ငါမြင်ရ၏။ မြေကြီးသည် သူ၏ဘုန်းရောင်ကြောင့် ထွန်းလင်းလေ၏။ သူက အားကြီးသောအသံဖြင့် ဤသို့ဟစ်ကြော်၏– ‘မဟာဗာဗုလုန် ကျဆုံးပြီ၊ ကျဆုံးပြီ။’ ” (ဗျာဒိတ် ၁၈:၁၊ ၂က) ဤကောင်းကင်တမန် ကြေညာချက်ကို ယောဟန် ဒုတိယအကြိမ် ကြားရခြင်းဖြစ်၏။ (ဗျာဒိတ် ၁၄:၈ ရှု။) သို့ရာတွင် ဤတစ်ကြိမ်တွင် ကောင်းကင်တမန်၏ ဘုန်းကျက်သရေက ၎င်းကြေညာချက်ကို လေးနက်ထူးခြားစေသည်။ အကြောင်းမှာ သူ၏ဘုန်းရောင်ကြောင့် မြေကြီးတစ်ပြင်လုံး ထွန်းလင်းလေ၏။ ဤကောင်းကင်တမန်သည် မည်သူဖြစ်နိုင်သနည်း။ ထိုအချိန်မတိုင်မီ ရာစုနှစ်များစွာအထက်၌ ယေဇကျေလက ကောင်းကင်ဆိုင်ရာ ရူပါရုံတစ်ခုအကြောင်း သတင်းပေးပို့ရာ၌ “[ယေဟောဝါ] ၏ရောင်ခြည်တော်အားဖြင့် မြေတစ်ပြင်လုံးလင်း၏” ဟုဆို၏။ (ယေဇကျေလ ၄၃:၂) ယေဟောဝါ၏ ဘုန်းရောင်ကဲ့သို့ ထွန်းတောက်နိုင်သော တစ်ပါးတည်းသော ကောင်းကင်တမန်မှာ သခင်ယေရှုသာဖြစ်၏။ ကိုယ်တော်သည် “ဘုရားသခင်၏ ဘုန်းတော်ရောင်ခြည်နှင့် ဇာတိအဖြစ်တော်၏ ပုံသဏ္ဌာန်ဖြစ်” တော်မူ၏။ (ဟေဗြဲ ၁:၃) ၁၉၁၄ ခုနှစ်၌ ယေရှုသည် ကောင်းကင်ဘုရင် ဖြစ်လာပြီး ထိုအချိန်ကတည်းက ယေဟောဝါ၏ တွဲဖက်ဘုရင် တရားသူကြီးအနေနှင့် မြေကြီးပေါ် အာဏာဖြန့်ကြက်လျက်နေလေပြီ။ သို့ဖြစ်၍ မဟာဗာဗုလုန်ကျဆုံးခြင်းကို ကိုယ်တော် ကြေညာသည်မှာ လျောက်ပတ်လှ၏။
၅။ (က) မဟာဗာဗုလုန် ကျဆုံးခြင်းကို ကြေညာရာ၌ ကောင်းကင်တမန်က မည်သူများကို သုံးသနည်း။ (ခ) “ဘုရားသခင်၏ အိမ်တော်သား” အမည်ခံသူများကို စတင် တရားစီရင်တော်မူသောအခါ ခရစ်ယာန်ဘောင် မည်သို့ရှိသနည်း။
၅ ကြီးစွာသော အခွင့်အာဏာပိုင်သူ ဤကောင်းကင်တမန်သည် လူသားတို့အား ထိုအံ့ဖွယ်သောသတင်းကို ကြေညာရာ၌ မည်သူများကို အသုံးပြုတော်မူသနည်း။ ဗာဗုလုန် ကျဆုံးခြင်းကြောင့် လွတ်မြောက်လာသောလူများမှာ၊ မြေကြီးပေါ်ရှိ ဘိသိက်ခံအကြွင်းအကျန်များ၊ ယောဟန်အတန်းအစားပင်တည်း။ သူတို့သည် ၁၉၁၄ မှ ၁၉၁၈ ခုနှစ်အထိ မဟာဗာဗုလုန်လက်၌ အလူးအလိမ့် ဆင်းရဲခံခဲ့ရသော်လည်း ၁၉၁၈ ခုနှစ်တွင် အရှင်ယေဟောဝါနှင့် “[အာဗြဟံဆိုင်ရာ] မာလခိ ၃:၁; ၁ ပေတရု ၄:၁၇) ပထမကမ္ဘာစစ်အတွင်း ခရစ်ယာန်ဘောင် ကျူးလွန်ခဲ့သော ကြီးလေးသည့် သွေးစွန်းခြင်းအပြစ်၊ ယေဟောဝါ၏ သစ္စာရှိသက်သေများအား နှိပ်စက်ညှဉ်းပန်းခြင်းတွင် ကြံရာပါအပြစ်နှင့် ၎င်း၏ဗာဗုလုန်ဆိုင်ရာ အယူဝါဒတို့သည် တရားစီရင်ချိန်အတွင်း ၎င်းအဖို့ ဘာအထောက်အကူမျှ မပြုခဲ့ချေ။ မဟာဗာဗုလုန်၏ အခြားမည်သည့် အစိတ်အပိုင်းမျှလည်း ဘုရားသခင့် မျက်နှာသာတော်နှင့် ထိုက်တန်ခြင်း မရှိခဲ့ချေ။—ဟေရှာယ ၁၃:၁-၉ နှိုင်းယှဉ်။
ပဋိညာဉ်တမန်တော်” ယေရှုခရစ်တို့သည် ခရစ်ယာန်အမည်ခံသော “ဘုရားသခင်၏ အိမ်တော်သားတို့” ကို စတင်တရားစီရင်တော်မူ၏။ သို့ဖြစ်၍ အယူဖောက်ပြန်သော ခရစ်ယာန်ဘောင်သည် စစ်ဆေးခံရ၏။ (၆။ ၁၉၁၉ ခုနှစ်၌ မဟာဗာဗုလုန် ကျဆုံးပြီဟု အဘယ်ကြောင့် ဆိုနိုင်သနည်း။
၆ ထို့ကြောင့် ၁၉၁၉ ခုနှစ်ရောက်သော် မဟာဗာဗုလုန် ကျဆုံးသွားပြီး ဘုရားသခင့်လူမျိုးတော် လွတ်မြောက်လာ၍ မိမိတို့၏ ဝိညာဉ်ရေး ကြီးပွားချမ်းသာခြင်း နေပြည်တော်သို့ တစ်နေ့ချင်းအလား ပြန်လည်ရောက်ရှိ သွားကြလေသည်။ (ဟေရှာယ ၆၆:၈) ထိုနှစ်၌ သာ၍ကြီးမြတ်သော ဒါရိမင်းနှင့် သာ၍ကြီးမြတ်သော ကုရုမင်းတည်းဟူသော ယေဟောဝါဘုရားသခင်နှင့် ယေရှုခရစ်တို့သည် ယေဟောဝါ၏ လူမျိုးတော်ကို မိစ္ဆာဘာသာတရားက ဆက်ပြီးမချုပ်ကိုင်စေရန် အကွက်ဆင်ခဲ့သည်။ မိစ္ဆာဘာသာတရားသည် ယေဟောဝါ၏ လူမျိုးတော်အား ယေဟောဝါကို ဝတ်မပြုစေနိုင်ရန် မတားဆီးနိုင်တော့ချေ။ ပြည့်တန်ဆာနှင့်တူသော မဟာဗာဗုလုန်သည် ဧကန်ပျက်စီးမည်ဖြစ်ကြောင်း၊ ယေဟောဝါ၏ အချုပ်အခြာအာဏာတော် သင်္ကာယန ကင်းတော့မည်ဖြစ်ကြောင်း နားထောင်မည့်ပုဂ္ဂိုလ်များအား မကြားပြောနိုင်ရန်လည်း မတားဆီးနိုင်တော့ချေ။—ဟေရှာယ ၄၅:၁-၄; ဒံယေလ ၅:၃၀၊ ၃၁။
၇။ (က) ၁၉၁၉ ခုနှစ်၌ မဟာဗာဗုလုန် ဖျက်ဆီးမခံရသော်လည်း သူ့အား ယေဟောဝါ မည်သို့ရှုမှတ်တော်မူသနည်း။ (ခ) ၁၉၁၉ ခုနှစ်၌ မဟာဗာဗုလုန် ကျဆုံးသောအခါ ယေဟောဝါ၏ လူမျိုးတော်အပေါ် အဘယ်အကျိုး သက်ရောက်ခဲ့သနည်း။
၇ ၁၉၁၉ ခုနှစ်၌ မဟာဗာဗုလုန် မပျက်စီးခဲ့သည်မှာ မှန်၏—ဘီစီ ၅၃၉ ခုနှစ်၌ ရှေးဗာဗုလုန်မြို့ ပေရသိဘုရင် ကုရု၏စစ်တပ်လက်သို့ ကျရောက်ခဲ့စဉ် မပျက်စီးခဲ့သည်နည်းတူဖြစ်၏။ သို့သော် ယေဟောဝါ၏အမြင်တွင် ထိုအဖွဲ့အစည်းသည် ကျဆုံးခဲ့ပြီဖြစ်၏။ ၎င်းသည် တရားစီရင်ချက် ချမှတ်ခံရပြီး အဆုံးစီရင်ခြင်းခံဖို့ စောင့်ဆိုင်းလျက်နေ၏။ ထို့ကြောင့် မိစ္ဆာဘာသာတရားသည် ယေဟောဝါ၏ လူမျိုးတော်ကို မချုပ်နှောင်နိုင်တော့ချေ။ (လုကာ ၉:၅၉၊ ၆၀ နှိုင်းယှဉ်။) ယေဟောဝါ၏ လူမျိုးတော်သည် လွတ်မြောက်လာပြီး အချိန်တန် ဝိညာဉ်အစာ ကျွေးမွေးခြင်းအမှုအတွက် အရှင်၏ သစ္စာနှင့် သတိပညာရှိကျွန်အဖြစ် အမှုတော်ထမ်းရွက်ကြ၏။ သူတို့သည် “ကောင်းလေစွ” ဟူသော စီရင်ချက်ကိုခံရ၍ ယေဟောဝါ၏ အမှုတော်ကို တစ်ဖန် အားကြိုးမာန်တက် ဆောင်ရွက်ကြရန် စေခန့်ခံရလေပြီ။—မဿဲ ၂၄:၄၅-၄၇၊ ကဘ; ၂၅:၂၁၊ ၂၃; တမန်တော် ၁:၈။
၈။ ဟေရှာယ ၂၁:၈၊ ၉ မှ ကင်းစောင့်က အဘယ်အခြင်းအရာကို ကြေညာသနည်း၊ သူသည် ယနေ့မည်သူ့ကို တင်ကူးအရိပ်ပြခဲ့သနည်း။
၈ အနှစ်ထောင်ပေါင်းများစွာ အထက်၌ ယေဟောဝါသည် အခြားပရောဖက်များကိုသုံးပြီး တစ်ခေတ်ဆန်းစေသော ဤအခြင်းအရာအကြောင်းကို တင်ကူးမိန့်ဆိုခဲ့သည်။ “‘သခင်၊ ကျွန်တော်သည် နေ့အချိန်၌ ကင်းမျှော်စင်ပေါ်မှာ အစဉ်ရပ်၍ တစ်ညဉ့်လုံး၌လည်း ကင်းစောင့်လျက်နေပါ၏’ . . . ဟု ခြင်္သေ့ကဲ့သို့ကြွေးကြော်” သော ကင်းစောင့်တစ်ဦးအကြောင်း ဟေရှာယကဆို၏။ ၎င်းကင်းစောင့်သည် ဘာကိုမြင်၍ ခြင်္သေ့ကဲ့သို့သောသတ္တိဖြင့် ကြွေးကြော်သနည်း။ “ဗာဗုလုန်မြို့ ပြိုလဲပြီ၊ ပြိုလဲပြီ၊ သူ၏ဘုရားရုပ်တုဆင်းတု ရှိသမျှတို့သည် မြေပေါ်မှာ ကျိုးပဲ့လျက် ရှိကြပါသည်” ဟူသောအချက်ပင်တည်း။ (ဟေရှာယ ၂၁:၈၊ ၉) ထိုကင်းစောင့်သည် နိုးနိုးကြားကြားရှိသော ယနေ့ယောဟန်အတန်းအစားကို တင်ကူးအရိပ်ပြ၏။ ယောဟန်အတန်းအစားသည် ကင်းမျှော်စင် နှင့် အခြားသီအိုကရက်တစ် စာပေစာတမ်းများကိုသုံးလျက် ဗာဗုလုန်ကျဆုံးပြီ ဟူသောသတင်းကို အနှံ့အပြား ကြေညာ၏။
မဟာဗာဗုလုန် တန်ခိုးမှေးမှိန်လာခြင်း
၉၊ ၁၀။ (က) ပထမကမ္ဘာစစ်မှစ၍ ဗာဗုလုန်ဘာသာတရားသည် မည်သို့ သြဇာဆုတ်ယုတ်လာသနည်း။ (ခ) မဟာဗာဗုလုန်၏ ကျဆုံးခြင်းအခြေအနေကို အားကြီးသော ကောင်းကင်တမန်က မည်သို့ဖော်ပြသနည်း။
၉ ရှေးဗာဗုလုန်သည် ဘီစီ ၅၃၉ ခုနှစ်၌ ကျဆုံးရာမှ ကာလကြာရှည်စွာ တန်ခိုးမှေးမှိန်လာပြီး နောက်ဆုံး၌ လူမနေသည့်အဖြစ်သို့ ရောက်ခဲ့သည်။ ထို့နည်းတူ ပထမကမ္ဘာစစ်မှစ၍ ဗာဗုလုန်ဆန်သော ဘာသာတရား၏ ဩဇာလည်း ကမ္ဘာတစ်ခွင်လုံးတွင် သိသိသာသာ မှေးမှိန်လာသည်။ ဒုတိယကမ္ဘာစစ်ပြီးနောက် ဂျပန်နိုင်ငံ၌ ရှင်တိုဧကရာဇ် ကိုးကွယ်ခြင်းကို တားမြစ်ပိတ်ပင်ခဲ့သည်။ တရုတ်နိုင်ငံ၌ ဘာသာရေးဆိုင်ရာ ရာထူးခန့်အပ်ခြင်းနှင့် လှုပ်ရှားမှုမှန်သမျှကို ကွန်မြူနစ်အစိုးရက ချုပ်ကိုင်ထား၏။ ပရိုတက်စတင့် ဘာသာဝင်ဖြစ်သော မြောက်ဥရောပ၌ လူအများထုသည် ဘာသာတရားကို စိတ်မဝင်စားကြတော့ချေ။ မကြာသေးမီက ရိုမင်ကက်သလစ်အသင်းလည်း မိမိ၏ကမ္ဘာချီ နယ်ပယ်အတွင်းရှိ ဂိုဏ်းကွဲမှုနှင့် အတွင်းရေး ပဋိပက္ခများကြောင့် ချိနဲ့အားနည်းလာ၏။—မာကု ၃:၂၄-၂၆ နှိုင်းယှဉ်။
၁၀ အထက်ပါ ခေတ်ရေစီးကြောင်းအားလုံးမှာ ‘ဥဖရတ်မြစ် ခန်းခြောက်ခြင်း’ ၏ တစ်စိတ်တစ်ပိုင်း ဖြစ်သည်မှာ သံသယမရှိ။ စစ်ရေးအရ မဟာဗာဗုလုန်ကို တိုက်ခိုက်ရန် ပြင်ဆင်ခြင်းဖြစ်၏။ ကြီးမားသော လိုငွေပြမှုကြောင့် ချာ့ခ်ျသည် “နောက်တစ်ဖန် ဖုန်းတောင်း ယာစကာခံ” ရမည်ဟူသော ပုပ်ရဟန်းမင်း၏ ၁၉၈၆ ခုနှစ်၊ အောက်တိုဘာ ကြေညာချက်ကလည်း ‘ရေခန်းခြောက်နေကြောင်း’ ဗျာဒိတ် ၁၆:၁၂) အားကြီးသော ကောင်းကင်တမန်၏ အောက်ပါကြေညာချက်အတိုင်း မဟာဗာဗုလုန်သည် အထူးသဖြင့် ၁၉၁၉ ခုနှစ်မှစ၍ အများတကာ အံ့ဩ၍စိုက်ကြည့်စရာ ဝိညာဉ်ရေးလွင်တီးခေါင်အဖြစ် ထင်ရှားလာသည်– “နတ်ဆိုးများ နေထိုင်ရာ၊ မစင်ကြယ်သော ထွက်သက်လေအမျိုးမျိုး ခိုအောင်းရာ၊ ရွံမုန်းဖွယ်ကောင်း၍ မစင်ကြယ်သော ငှက်အမျိုးမျိုး ပုန်းခိုရာအရပ် ဖြစ်လေပြီ။” (ဗျာဒိတ် ၁၈:၂ခ) မကြာမီ မဟာဗာဗုလုန်သည် မျက်မှောက်ခေတ် အီရတ်နိုင်ငံရှိ ဗာဗုလုန်မြို့ အပြိုအပျက်ကဲ့သို့ ပကတိလွင်တီးခေါင် ဖြစ်လာလိမ့်မည်။—ယေရမိ ၅၀:၂၅-၂၈ လည်းရှု။
ကိုပြ၏။ (၁၁။ မဟာဗာဗုလုန်သည် အဘယ်အဓိပ္ပာယ်အရ “နတ်ဆိုးများနေထိုင်ရာ”၊ ‘မစင်ကြယ်သော ထွက်သက်လေအမျိုးမျိုးနှင့် ရွံမုန်းဖွယ်ကောင်း၍ မစင်ကြယ်သော ငှက်အမျိုးမျိုး ပုန်းခိုရာအရပ်ဖြစ်’ ခဲ့ပြီနည်း။
၁၁ ဤတွင် “နတ်ဆိုး” ဟူသောစကားလုံးသည် ဗာဗုလုန် ကျဆုံးခြင်းဆိုင်ရာ ဟေရှာယ၏ အောက်ပါဖော်ပြချက်မှ “ဆိတ်အသွင်ရှိ နတ်ဆိုးများ” (se‘i·rimʹ) ဟူသောစကားလုံး၏ အဓိပ္ပာယ် ထင်ဟပ်ချက် ဖြစ်ပုံရသည်– “တောသားရဲတို့သည် ထိုမြို့၌ အိပ်ကြလိမ့်မည်။ အိမ်တို့သည် မြည်တတ်သော တိရစ္ဆာန်များနှင့် အပြည့်ရှိကြလိမ့်မည်။ ကုလားအုတ်ငှက်တို့လည်း နေရာကျ၍ မျောက်တို့ [“ဆိတ်အသွင်ရှိ နတ်ဆိုးများ၊” ကဘ] လည်း ကခုန်ကြလိမ့်မည်။” (ဟေရှာယ ၁၃:၂၁) ပကတိနတ်ဆိုးများကို ရည်ညွှန်းခြင်းမဟုတ်ဘဲ မြင်သူများစိတ်ထဲ၌ နတ်ဆိုးဟုထင်စေသော သဲကန္တာရနေ အမွေးစုတ်ဖွားတိရစ္ဆာန်များကို ဆိုလိုဟန်ရှိသည်။ မဟာဗာဗုလုန်၏ အပြိုအပျက်များကြားထဲ၌ ထိုသို့သော တိရစ္ဆာန်များအပြင် မလှုပ်မရှား ငြိမ်နေတန့်နေသော အဆိပ်ရှိသည့် လေသေ (“မစင်ကြယ်သော ထွက်သက်လေ”) နှင့်မစင်ကြယ်သော ငှက်များရှိခြင်းက ၎င်း၏ဝိညာဉ်ရေး သေနေသည့်အဖြစ်ကိုပြ၏။ လူသားများအား အသက်ရှင်ဖို့ ဘာအလားအလာကိုမျှ မပေးချေ။—ဧဖက် ၂:၁၊ ၂ နှိုင်းယှဉ်။
၁၂။ မဟာဗာဗုလုန်၏ အခြေအနေသည် အခန်းကြီး ၅၀ မှ ယေရမိ၏ ပရောဖက်ပြုချက်နှင့် မည်သို့ကိုက်ညီသနည်း။
၁၂ သူ၏ အခြေအနေသည် ယေရမိ၏ ပရောဖက်ပြုချက်နှင့် လိုက်ဖက်၏– “ထာဝရဘုရား မိန့်တော်မူသည်ကား ဓားဘေးသည် ခါလဒဲပြည်သူ၊ ဗာဗုလုန်မြို့သားတို့နှင့်တကွ မင်းများ၊ ပညာရှိများအပေါ်သို့ သင့်ရောက်လိမ့်မည်။ . . . ခန်းခြောက်ခြင်းဘေးသည် မြို့၏ရေတို့အပေါ်သို့ရောက်၍ ခန်းခြောက်ကြလိမ့်မည်။ အကြောင်းမူကား၊ ထိုပြည်သည် ရုပ်တုတို့နှင့် အပြည့်ရှိ၏။ ပြည်သားတို့သည် ဆင်းတုတို့ကို အမှီပြု၍ ဝါကြွားကြ၏။ [“ဆင်းတုများကြောင့် ရူးသွပ်ကြလေပြီ၊” သမ] ထို့ကြောင့်၊ တောသားရဲတို့သည် တောခွေးတို့နှင့်တကွ ထိုမြို့၌ နေကြလိမ့်မည်။ ကုလားအုတ်ငှက်တို့သည်လည်း နေရာကျကြလိမ့်မည်။ နောက်တစ်ဖန် အဘယ်သူမျှမနေရ။ ကာလအစဉ်အဆက် လူနေရာမဖြစ်ရ။” ရုပ်တုကိုးကွယ်၍ ပတ္ထနာ အထပ်ထပ်ရွတ်ဆိုခြင်းသည် မဟာဗာဗုလုန်အား သောဒုံနှင့် ဂေါမောရမြို့များကို မှောက်လှန်တော်မူသည့် ပုံစံအတိုင်း ဘုရားသခင်၏ အပြစ်ပေးတော်မူခြင်းကို ခံရမည့်အဖြစ်မှ မကယ်တင်နိုင်။—ယေရမိ ၅၀:၃၅-၄၀။
ရာဂနှိုးဆွသော စပျစ်ရည်
၁၃။ (က) အားကြီးသော ကောင်းကင်တမန်က မဟာဗာဗုလုန်၏ ကျယ်ပြန့်သည့် ပြည့်တန်ဆာလုပ်ငန်းကို မည်သို့သတိပြုစေသနည်း။ (ခ) ရှေးဗာဗုလုန်၌နှံ့ပြားသော အဘယ်စာရိတ္တပျက်ပြားမှုကို မဟာဗာဗုလုန်တွင်လည်း တွေ့ရသနည်း။
၁၃ အားကြီးသော ကောင်းကင်တမန်က မဟာဗာဗုလုန်၏ ပြည့်တန်ဆာလုပ်ငန်း မည်မျှကျယ်ပြန့်ကြောင်း သတိပြုကြရန် ဤသို့ဆက်လက် ကြွေးကြော်၏– “အကြောင်းမှာ သူ၏ မတရားမေထုန်နှင့်ဆိုင်သည့် ရာဂနှိုးဆွသော စပျစ်ရည်ကြောင့် လူမျိုးအပေါင်းတို့သည် သားကောင်အဖြစ် ကျဆုံးကြပြီ။ မြေကြီးဘုရင်တို့သည် သူနှင့် မတရားမေထုန်ကို ပြုကြ၏။ မြေကြီးပေါ်မှ နယ်လှည့်ကုန်သည်များလည်း သူ၏ အရှက်မရှိသော စည်းစိမ်ယစ်မူးခြင်း အစွမ်းတန်ခိုးကြောင့် ချမ်းသာကြွယ်ဝကြလေပြီ။” (ဗျာဒိတ် ၁၈:၃) သူသည် တိုင်းနိုင်ငံရှိသမျှအား မိမိ၏ မစင်ကြယ်သော ဘာသာရေးလမ်းစဉ်များကို သွတ်သွင်းခဲ့ပြီ။ ဂရိသမိုင်းပညာရှင် ဟီရိုဒိုးတပ်စ်၏ အဆိုအရ ရှေးဗာဗုလုန်နိုင်ငံ၌ ကညာပျိုတိုင်း ကျောင်းဗိမာန် ဝတ်ပြုကိုးကွယ်မှု၌ အပျိုရည် အပျက်ခံရ၏။ ကမ္ဘောဒီးယားနိုင်ငံရှိ အန်ကောဝပ် ဘုရားကျောင်းမှ စစ်ဒဏ် ကြောင့် ပျက်စီးနေသည့် ဗုဒ္ဒဘာသာ ပန်းပုကျောက်ဆစ်ရုပ်များကလည်းကောင်း၊ ရာဂစိတ်ကြွစေသော ရွံရှာဖွယ်မြင်ကွင်းများဖြင့် ဟိန္ဒူဘုရား ဗိဿနိုးအား ဝိုင်းရံလျက်နေသည်ကို ပြထားသော အိန္ဒိယနိုင်ငံ ခါဂျူရာဟိုခေါ် သမိုင်းဝင်နေရာမှ ကျောင်းဗိမာန်များ၌လည်းကောင်း အော့နှလုံးနာဖွယ် လိင်ပျက်ပြားမှု ပုံဖော်ထားသည်ကို ယနေ့တိုင်တွေ့ရှိရသည်။ အမေရိကန်နိုင်ငံတွင် ၁၉၈၇ ခုနှစ်၌တစ်ကြိမ်၊ ၁၉၈၈ ခုနှစ်၌ နောက်တစ်ကြိမ်၊ တီဗွီဧဝံဂေလိ တရားဟောဆရာများ၏ လောကကို ကိုင်လှုပ်လိုက်သော စာရိတ္တပျက်ပြားခြင်း သတင်းကလည်းကောင်း၊ ဘာသာရေး အမှုဆောင်များဘောင်၌ လိင်တူဆက်ဆံမှု နှံ့ပြားခြင်းသတင်းကလည်းကောင်း ခရစ်ယာန်ဘောင်ကပင် ပကတိမတရားမေထုန် စခန်းကုန်လမ်းကုန် အလွန်အမင်း ကျူးလွန်ခြင်းကို သည်းခံခွင့်ပြုကြောင်း ထင်ရှားစေ၏။ သို့တစေ၊ တိုင်းနိုင်ငံရှိသမျှတို့သည် ထို့ထက်ဆိုးသောမတရားမေထုန်၏ သားကောင်ဖြစ်ခဲ့ရပြီ။
၁၄-၁၆။ (က) ဖက်ဆစ်အီတလီနိုင်ငံ၌ ဝိညာဉ်ရေးအရ မတရားသော အဘယ်ဘာသာရေးနှင့် နိုင်ငံရေးဆက်ဆံမှု ဖြစ်ပေါ်ခဲ့သနည်း။ (ခ) အက်ဘစီးနီးယားကို အီတလီ ကျူးကျော်သောအခါ ရိုမင်ကက်သလစ်ချာ့ခ်ျ ဂိုဏ်းအုပ်ဘုန်းကြီးများက အဘယ်ကြေညာချက်များ ထုတ်ပြန်ခဲ့ကြသနည်း။
၁၄ နာဇီဂျာမနီနိုင်ငံ၌ ဟစ်တလာအား တစ်ခဏချင်း အရှိန်အဟုန်ဖြင့် အာဏာတက်လာစေသည့် မတရားသော ဘာသာရေးနှင့် နိုင်ငံရေး ဆက်ဆံမှုအကြောင်းကို ကျွန်ုပ်တို့ သုံးသပ်ခဲ့ပြီဖြစ်၏။ လောကီရေးရာ၌ ဘာသာရေးက ဝင်စွက်သောကြောင့် အခြားတိုင်းနိုင်ငံ များစွာလည်း ခံရကြ၏။ ဥပမာ– ၁၉၂၉ ခုနှစ်၊ ဖေဖော်ဝါရီ ၁၁ ရက်နေ့၌ ဖက်ဆစ်အီတလီနိုင်ငံတွင် မူဆိုလီနီနှင့် ဂိုဏ်းချုပ် ဂါစ်ပါရီ လက်တရင် စာချုပ်ကိုချုပ်ဆို၍ ဗက်တီကင်မြို့ကို အချုပ်အခြာအာဏာပိုင် နိုင်ငံတစ်နိုင်ငံ ဖြစ်စေခဲ့သည်။ ပုပ်ရဟန်းမင်း ဆယ့်တစ်ယောက်မြောက် ပိုင်းယပ်စ်က မိမိသည် “အီတလီကို ဘုရားသခင်အားလည်းကောင်း၊ ဘုရားသခင်ကို အီတလီအားလည်းကောင်း ပြန်အပ်လိုက်ပြီ” ဟုဆို၏။ သူ့အဆို မှန်သလော။ ခြောက်နှစ်ကြာပြီးနောက် ဘာဖြစ်ခဲ့သည်ကို ကြည့်ပါ။ ၁၉၃၅၊ အောက်တိုဘာ ၃ ရက်နေ့တွင် အီတလီက အက်ဘစင်းနီးယားနိုင်ငံသည် “ကျွန်စနစ်ကို ကျင့်သုံးနေဆဲ ရိုင်းစိုင်းသော တိုင်းပြည်ဖြစ်သည်” ဆိုကာ ၎င်းကို ဝင်ရောက်ကျူးကျော်၏။ တကယ်ရိုင်းစိုင်းသူမှာ မည်သူနည်း။ မူဆိုလီနီ၏ ရိုင်းစိုင်းမှုကို ကက်သလစ်ချာ့ခ်ျက ပြစ်တင်ရှုတ်ချသလော။ ပုပ်ရဟန်းမင်းက အဓိပ္ပာယ် မရေရာသောအဆိုကို ထုတ်ပြန်ခဲ့သော်လည်း သူ၏ ဂိုဏ်းအုပ်ဘုန်းကြီးများက အီတာလျံ “အဖနိုင်ငံ” ၏ လက်နက်ကိုင်တပ်ဖွဲ့များကို ခပ်ပြောင်ပြောင်ပင် ကောင်းချီးပေးကြသည်။ အန်ထော်နီရို့စ်က အာဏာရှင်များ ကြီးစိုးသောခေတ်ရှိ ဗက်တီကင် ဟူသောစာအုပ်၌ ဤသို့ရေးသား တင်ပြလိုက်သည်–
၁၅ “[အီတလီနိုင်ငံ] အူးဒီးနဲနယ်၏ ဂိုဏ်းအုပ်ဘုန်းကြီးက [၁၉၃၅ ခုနှစ်] အောက်တိုဘာ ၁၉ ရက်နေ့စွဲဖြင့် မိမိ၏ဂိုဏ်းအုပ် အမှာစာတွင် အောက်ပါအတိုင်း ရေးသားလိုက်သည်– ‘ဤကိစ္စမှားသည်၊ မှန်သည်ဟု ကျွန်ုပ်တို့ပြောဖို့ အချိန်မတန်သေးပါ။ ပြောဖို့လည်းမသင့်ပါ။ အီတာလျံများအနေဖြင့်သာမက ခရစ်ယာန်အနေဖြင့် ကျွန်ုပ်တို့၏တာဝန်မှာ ကျွန်ုပ်တို့၏တပ်မဟာ အောင်မြင်မှုအတွက် အထောက်အကူ ပြုရန်ဖြစ်သည်။’ အောက်တိုဘာ ၂၁ ရက်နေ့၌ ပါးဂျူးအားနယ်၏ ဂိုဏ်းအုပ်ဘုန်းကြီးက ‘ကျွန်ုပ်တို့ ဖြတ်ကျော်နေသော ခက်ခဲသည့် အချိန်ပိုင်း၌ ကျွန်ုပ်တို့၏ နိုင်ငံ့ခေါင်းဆောင်များနှင့် လက်နက်ကိုင်တပ်ဖွဲ့များအပေါ် ယုံကြည်ကြရန် ကျွန်ုပ်တို့ တောင်းဆိုပါသည်’ ဟုရေးသားလိုက်၏။ အောက်တိုဘာ ၂၄ ရက်နေ့၌ ခရီမိုးနားနယ်၏ ဂိုဏ်းအုပ်ဘုန်းကြီးက စစ်တပ်အလံ တော်တော်များများကို ဘုရားထံအပ်နှံပြီး အောက်ပါအတိုင်းဆို၏– ‘ဒီရဲဘော်များအပေါ် ဘုရားသခင်ရဲ့ကောင်းချီး သက်ရောက်ပါစေ။ သူတို့ဟာ အာဖရိကမြေပေါ်မှာ အီတာလျံ ပါရမီရှင်များအတွက် မြေဆီမြေနှစ်ကောင်းတဲ့ နယ်သစ်မြေသစ်တွေကို သိမ်းပိုက်ကြပါလိမ့်မယ်။ ဒီနည်းအားဖြင့် သူတို့ဆီကို ရောမနဲ့ ခရစ်ယာန်ယဉ်ကျေးမှု ယူဆောင်သွားပါလိမ့်မယ်။ အီတလီနိုင်ငံဟာ ကမ္ဘာတစ်ခုလုံးအတွက် ခရစ်ယာန် အာစရိယအဖြစ် နောက်တစ်ဖန် ရပ်တည်နိုင်ပါစေ။’”
၁၆ အက်ဘစင်းနီးယားနိုင်ငံသည် ရိုမင်ကက်သလစ် ဘုန်းကြီးများ၏ ကောင်းချီးဖြင့် အဓမ္မ သိမ်းပိုက်ခံရ၏။ ဤဘုန်းကြီးများထဲမှ တစ်ဦးတစ်ယောက်က “လူအပေါင်းတို့၏ အသွေးနှင့် ငါကင်းလွတ်သည်” ဟု တမန်တော်ပေါလု ဆိုသကဲ့သို့ တစ်နည်းနည်းဖြင့် ဆိုနိုင်သလော။—တမန်တော် ၂၀:၂၆။
၁၇။ စပိန်နိုင်ငံ၏ ဘုန်းကြီးအုပ်စုသည် မိမိတို့၏ “ဓားလက်နက်များကို ထွန်သွားဖြစ်စေခြင်းငှာ . . . ထုလုပ်” ခြင်းကိစ္စတွင် ပျက်ကွက်ခဲ့သည့်အတွက် ၎င်းနိုင်ငံသည် မည်သို့ခံရသနည်း။
၁၇ ဂျာမနီ၊ အီတလီနှင့် အက်ဘစင်းနီးယားအပြင်၊ မဟာဗာဗုလုန်ကျူးလွန်သော မတရားမေထုန်၏ သားကောင်ဖြစ်ခဲ့ရသည့် နောက်တစ်နိုင်ငံမှာ စပိန်နိုင်ငံတည်း။ စပိန်နိုင်ငံ၌ဖြစ်ပွားသော ၁၉၃၆-၃၉ ခုနှစ် ပြည်တွင်းစစ်သည် တစ်နည်းအားဖြင့် ရိုမင်ကက်သလစ်ချာ့ခ်ျ၏ ကြီးမားသော တန်ခိုးအာဏာကို ဒီမိုကရက်တစ်အစိုးရက လျှော့ချရန် အားထုတ်ရာမှ စတင်ဖြစ်ပွားခဲ့သည်။ ပြည်တွင်းစစ် ဖြစ်နေစဉ် တော်လှန်ရေးတပ်များ၏ ကက်သလစ် ဖက်ဆစ်ခေါင်းဆောင် ဖရန်ကိုက “သန့်ရှင်းသော ခရူးဆိတ်၏ ခရစ်ယာန် စစ်သေနာပတိချုပ်” ဟူသောဘွဲ့ကို ခံယူလိုက်သည်။ ၎င်းဘွဲ့ကို နောက်ပိုင်း၌ သူလက်လွှတ်လိုက်သည်။ ထိုစစ်ထဲ၌ စပိန်လူမျိုး သိန်းချီ၍ ကျဆုံးခဲ့သည်။ ၎င်းပြင် လျှော့ပေါ့ခန့်မှန်းချက် တစ်ချက်အရ ဖရန်ကို၏ အမျိုးသားရေးဝါဒီများသည် ပြည်သူ့တပ်ဦး အဖွဲ့ဝင်ပေါင်း ၄၀,၀၀၀ ကိုသတ်ဖြတ်ခဲ့ပြီး ပြည်သူ့တပ်ဦးကလည်း ရဟန်း၊ ဘုန်းကြီး၊ မယ်သီလနှင့် ကိုရင်ပေါင်း ၈,၀၀၀ ကို သုတ်သင်ခဲ့သည်။ ဤကား ပြည်တွင်းစစ်၏ ကြောက်မက်ကြေကွဲဖွယ် အဖြစ်သနစ်ဖြစ်ပြီး “သင့်ဓားကို သူ့နေရာ၌ ပြန်ထားလော့။ ဓားကိုကိုင်သော သူရှိသမျှတို့သည် ဓားဖြင့်ဆုံးခြင်းသို့ ရောက်ကြလိမ့်မည်” ဟူသော ယေရှု၏စကားတော်ကို နာခံလျှင် ပညာရှိမဿဲ ၂၆:၅၂) ခရစ်ယာန်ဘောင်သည် ကြီးကျယ်လှသည့် ဤသို့သော သွေးသွန်းခြင်းကိစ္စတွင် ပါဝင်ခဲ့သည်မှာ အော့နှလုံးနာစရာ ပါတကား။ ဘုန်းကြီးဓမ္မဆရာအုပ်စုသည် “[မိမိ] တို့ဓားလက်နက်များကို ထွန်သွားဖြစ်စေခြင်းငှာ . . . ထုလုပ်” ခြင်းကိစ္စတွင် တကယ်ပင် လုံးလုံးပျက်ကွက်ခဲ့ပြီတကား။—ဟေရှာယ ၂:၄။
ကြောင်းကိုပြ၏။ (နယ်လှည့်ကုန်သည်များ
၁၈။ “မြေကြီးပေါ်မှ နယ်လှည့်ကုန်သည်များ” မှာ မည်သူများနည်း။
၁၈ “မြေကြီးပေါ်မှ နယ်လှည့်ကုန်သည်များ” ကား မည်သူများနည်း။ ယနေ့ သူတို့ကို ကုန်သည်ကြီးများ၊ ကုန်သွယ်ရေး လုပ်ငန်းရှင်ကြီးများ၊ ဧရာမစီးပွားရေးလောကမှ ဂျင်များဟူ၍ ခေါ်ကြပေလိမ့်မည်။ တရားနည်းလမ်းကျသော လုပ်ငန်းများ မလုပ်သင့်ဟု မဆိုလိုပါ။ အရောင်းအဝယ် လုပ်သူများအတွက် ကျမ်းစာက ပညာရှိသြဝါဒများ ပေးထားပြီး မရိုးသားမှု၊ လောဘစသည်တို့ကို မကျူးလွန်ရန် သတိပေး၏။ (သုတ္တံ ၁၁:၁; ဇာခရိ ၇:၉၊ ၁၀; ယာကုပ် ၅:၁-၅) သာ၍မြတ်သောအကျိုးစီးပွားမှာ “ရောင့်ရဲသောစိတ်ပါ [သည့်] ဘုရားဝတ်၌ မွေ့လျော်ခြင်း” ပင်ဖြစ်သည်။ (၁ တိမောသေ ၆:၆၊ ၁၇-၁၉) သို့ရာတွင် စာတန်၏လောကသည် ဖြောင့်မတ်သော မူများအတိုင်း မလိုက်ချေ။ စာရိတ္တပျက်စီးမှု များပြားလှ၏။ ဘာသာရေးနှင့် နိုင်ငံရေးလောက၌သာမက စီးပွားရေးလုပ်ငန်းလောက၌လည်း စာရိတ္တ ပျက်ပြားခြင်းကို တွေ့နိုင်သည်။ အစိုးရအရာရှိကြီးများ ဘဏ္ဍာငွေ အလွဲသုံးစားခြင်း၊ တရားမဝင် လက်နက်ကုန်ကူးခြင်းစသော အရှုပ်တော်ပုံကို သတင်းမီဒီယာများက မကြာခဏ ထုတ်ဖော်ကြ၏။
၁၉။ ကမ္ဘာ့စီးပွားရေးနှင့်ဆိုင်သော အဘယ်အချက်အလက်များက မြေကြီးပေါ်မှ ကုန်သည်များအကြောင်းကို ဗျာဒိတ်ကျမ်း၌ မနှစ်မြို့သည့်လေသံဖြင့် ဆိုရခြင်းအကြောင်းရင်းကို နားလည်စေသနည်း။
၁၉ လူသန်းပေါင်း ရာနှင့်ချီပြီး စားဝတ်နေရေး မဖူမလုံဖြစ်နေကြစဉ် နိုင်ငံတကာ လက်နက်ရောင်းဝယ်မှုသည် နှစ်စဉ် ဒေါ်လာ ၁,၀၀၀,၀၀၀,၀၀၀,၀၀၀ အမှတ်ကို ကျော်လွန်နေပြီ။ အခြေအနေ အလွန်ဆိုးနေပြီ။ သို့သော် လက်နက်တိုးမြှင့်တပ်ဆင်မှုသည် ကမ္ဘာ့စီးပွားရေး၏ ကျောရိုးဖြစ်ဟန်တူ၏။ ၁၉၈၇၊ ဧပြီလ ၁၁ ရက်နေ့၌ လန်ဒန်မြို့ထုတ် စောင့်ကြည့်သူ မဂ္ဂဇင်းမှ ဆောင်းပါးတစ်ပုဒ်က ဤသို့ရေးသား ဖော်ပြလိုက်သည်– “တိုက်ရိုက်ဆက်နွှယ်သော စက်မှုလုပ်ငန်းများကိုသာ ရေတွက်လျှင် အမေရိကန်နိုင်ငံ၌ လုပ်ငန်းပေါင်း ၄၀၀,၀၀၀၊ ဥရောပ၌ ၇၅၀,၀၀၀ ပါဝင်ပတ်သက်သည်ကို တွေ့ရ၏။ သို့သော် စိတ်ဝင်စားစရာ ကောင်းသည်မှာ လက်နက်တည်ဆောက်ခြင်းဘက်တွင် လူမှုရေးနှင့် စီးပွားရေးကဏ္ဍ ကြီးထွားလာသည်နှင့်အမျှ ထုတ်လုပ်သူများ အကာအကွယ် ကောင်းစွာရမရဟူသော တကယ်အရေးပါသည့် မေးခွန်းမှာမူ မှေးမှိန်သွား၏။” ဗုံးများနှင့် အခြားသောလက်နက်များကို ကမ္ဘာအနှံ့အပြား ရောင်းဝယ်ကြသည်နှင့်အမျှ အမြတ်ကြီးစွာ ရရှိကြ၏။ ရန်သူဖြစ်လာနိုင်သူများအားပင် ရောင်းချကြ၏။ တစ်နေ့သောအခါ ထိုဗုံးများသည် မီးလောင်တိုက်
အသွင်ဖြင့် ရောင်းချသူများအပေါ်သို့ ပြန်ကျလာဖွယ်အကြောင်းရှိ၏။ တကယ့်ဝိရောဓိပင်။ ထို့ပြင် လက်နက်ထုတ်လုပ်မှု လုပ်ငန်းနှင့်ဆိုင်သော တိတ်တိတ်ပုန်း စီးပွားရှာမှုလည်း ရှိသေး၏။ စောင့်ကြည့်သူ မဂ္ဂဇင်း ဖော်ပြချက်အရ အမေရိကန်နိုင်ငံတစ်ခုတည်း၌ “ပင်တဂွန်သည် တစ်နှစ်တစ်နှစ်လျှင် ဒေါ်လာ သန်းပေါင်း ၉၀၀ တန် လက်နက်ကိရိယာများ ပျောက်ခြင်းမလှ ပျောက်ဆုံး၏။” သို့ကြောင့်လည်း မြေကြီးပေါ်မှ ကုန်သည်များအကြောင်းကို ဗျာဒိတ်ကျမ်းက မနှစ်မြို့သည့်လေသံဖြင့် ရေးသားရခြင်းမှာ မဆန်းပါ။၂၀။ အဘယ်ဥပမာများက ဘာသာတရားသည် စာရိတ္တပျက်ပြားသည့် စီးပွားရေး၌ ပါဝင်ကြောင်းကို ပြသနည်း။
၂၀ ဘုန်းရောင်ကွန့်မြူးသော ကောင်းကင်တမန် ကြိုပြောသည့်အတိုင်း ဘာသာတရားသည် ထိုသို့သော စာရိတ္တပျက်သည့် စီးပွားရေးတွင် ခြေစုံပစ်ပါဝင်ခဲ့၏။ ဥပမာ၊ ၁၉၈၂ ခုနှစ်၊ အီတလီနိုင်ငံ၏ ဘန်ကို အင်ဘရိုစီအင်းနိုးဘဏ် ပြိုပျက်သည့်ကိစ္စ၌ ဗက်တီကင် ပတ်သက်ခဲ့သည်။ ငွေဘယ်ရောက်သွားသလဲ ဟူသောမေးခွန်း၏အဖြေကို ရှာမရသဖြင့် ယင်းအမှုသည် ၁၉၈၀ ပြည့်လွန်နှစ်များတစ်လျှောက် ကြန့်ကြာခဲ့သည်။ အမေရိကန် ဂိုဏ်းချုပ်ရဟန်း တစ်ပါးအပါအဝင် ဗက်တီကင် ရဟန်းသုံးပါးတို့အား ကလိမ်ကျသော ဒေဝါလီခံမှု၌ ကြံရာပါများဖြစ်သည် ဟူသောစွဲချက်ဖြင့် ဖမ်းဆီးရန် မီလန် ရာဇဝတ် တရားသူကြီးများက ၁၉၈၇ ခုနှစ် ဖေဖော်ဝါရီလ၌ ဝရမ်းထုတ်လိုက်သော်လည်း ဗက်တီကင်က တရားခံ လွှဲပြောင်းပေးရန် တောင်းဆိုချက်ကို ငြင်းပယ်လိုက်သည်။ ၁၉၈၇ ခုနှစ်၊ ဇူလိုင်လ၌ အီတလီအယူခံတရားရုံးချုပ်က လူထုအုံကြွ ကန့်ကွက်သည့်ကြားမှ ဗက်တီကင်နှင့် အီတလီအစိုးရစပ်ကြား ချုပ်ဆိုသော စာချုပ်ဟောင်းတစ်ရပ်ကို အကြောင်းပြု၍ ဝရမ်းစာများကို ဖျက်သိမ်းလိုက်သည်။
၂၁။ ယေရှုသည် မိမိလက်ထက်ရှိ မရိုးသားသော စီးပွားရေး အကျင့်အကြံများနှင့် ဆက်သွယ်ပတ်သက်တော်မမူကြောင်း မည်သို့သိနိုင်သနည်း၊ သို့သော် ဗာဗုလုန်ဘာသာတရားနှင့် ပတ်သက်၍ ယနေ့ ဘာကိုတွေ့နိုင်သနည်း။
၂၁ ယေရှုသည် မိမိလက်ထက်ရှိ မရိုးသားသော စီးပွားရေး အကျင့်အကြံများနှင့် ဆက်သွယ်ပတ်သက်မှု ရှိတော်မူသလော။ ပတ်သက်တော်မမူ။ ကိုယ်တော်သည် အိမ်ပိုင်ယာပိုင်ပင်မရှိ။ အကြောင်းမှာ ကိုယ်တော်သည် “ခေါင်းချရာမျှ မရှိ။” သူကြွယ်လူငယ် အရာရှိတစ်ဦးအား ယေရှု ဤသို့အကြံပေးတော်မူ၏– “ကိုယ်ဥစ္စာ ရှိသမျှကိုရောင်း၍ ဆင်းရဲသောသူတို့အား ပေးဝေလော့။ ထိုသို့ပြုလျှင် ကောင်းကင်ဘုံ၌ ဘဏ္ဍာကိုရလိမ့်မည်။ သို့ပြီးမှလာ၍ ငါ့နောက်သို့လိုက်လော့။” မွန်မြတ်သော ဩဝါဒဖြစ်ပေ၏။ အကြောင်းမှာ ထိုသို့ပြုလျှင် စီးပွားရေးကိစ္စဆိုင်ရာ အပူအပင်အားလုံးနှင့် ကင်းရှင်းနိုင်၍ဖြစ်၏။ (လုကာ ၉:၅၈; ၁၈:၂၂) ယင်းနှင့်ဆန့်ကျင်လျက် ဗာဗုလုန်ဆိုင်ရာ ဘာသာတရားသည် ဧရာမစီးပွားရေးလုပ်ငန်းနှင့် ရွံမုန်းဖွယ်ကောင်းသော အချိတ်အဆက်ရှိ၏။ ဥပမာ၊ ၁၉၈၇ ခုနှစ်၌ အောလ်ဘနီ တိုင်းစ် ယူနီယံက အမေရိကန်နိုင်ငံ ဖလော်ရီဒါပြည်နယ် မီယာမီမြို့၏ ကက်သလစ် ဂိုဏ်းချုပ်ဘုန်းကြီး၏ စီရင်မှုအောက် နယ်မြေဆိုင်ရာ ဘဏ္ဍာရေးမှူးက ချာ့ခ်ျသည် နျူကလီးယားလက်နက်များ၊ အသက် ၁၇ အထက်သာ ကြည့်ခွင့်ပြုသော ရုပ်ရှင်ကားများနှင့် စီးကရက်များ ထုတ်လုပ်သော ကုမ္ပဏီများ၌ ရင်းနှီးမြှုပ်နှံထားသည်ဟု ဝန်ခံ၏။
“ငါ၏လူမျိုးတို့၊ သူ၏အထဲမှ ထွက်လာကြလော့”
၂၂။ (က) ကောင်းကင်မှ စကားသံတစ်သံက ဘာပြောသနည်း။ (ခ) အဘယ်အရာကြောင့် ဘီစီ ၅၃၇ ခုနှစ်နှင့် အေဒီ ၁၉၁၉ ခုနှစ်၌ ဘုရားသခင့်လူမျိုးတော် ဝမ်းမြောက်ရွှင်လန်းခဲ့ကြသနည်း။
၂၂ ယောဟန်၏ ရှေ့ဆက်စကားက ပရောဖက်ပြုချက်ဆိုင်ရာပုံစံ၏ နောက်ထပ်ပြည့်စုံချက် တစ်ရပ်ကိုပြ၏– “ထို့နောက်၊ ကောင်းကင်မှ အခြားသောအသံကို ငါကြားရ၏။ ထိုအသံက ဤသို့ဆို၏– ‘ငါ၏လူမျိုးတို့၊ သင်တို့သည် သူ၏အပြစ်များနှင့် မဆက်ဆံလို၊ သူခံရသော ကပ်ဘေးများကို မခံလိုလျှင် သူ၏အထဲမှ ထွက်လာကြလော့။’ ” (ဗျာဒိတ် ၁၈:၄) ဟေဗြဲကျမ်းစာပါ ရှေးဗာဗုလုန်မြို့ ကျဆုံးခြင်းဆိုင်ရာ ပရောဖက်ပြုချက်များ၌လည်း မိမိလူမျိုးတော်အား မိန့်ဆိုသော “ဗာဗုလုန်မြို့ထဲက ပြေးကြလော့” ဟူသောအမိန့်တော် ပါရှိ၏။ (ယေရမိ ၅၀:၈၊ ၁၃) ထို့နည်းတူ၊ မဟာဗာဗုလုန် ပျက်သုဉ်းတော့မည်ဖြစ်၍ ဘုရားသခင်သည် လူမျိုးတော်အား ၎င်းအထဲမှ ထွက်ပြေးရန် တိုက်တွန်းတော်မူပြီ။ ဘီစီ ၅၃၇ ခုနှစ်၌ သစ္စာရှိ ဣသရေလလူတို့သည် ဗာဗုလုန်မြို့မှ ထွက်မြောက်နိုင်သော အခွင့်အလမ်းကို ရကြသဖြင့် အလွန်ဝမ်းမြောက်ခဲ့ကြသည်။ ထိုနည်းတူ၊ ၁၉၁၉ ခုနှစ်၌ ဘုရားသခင့် လူမျိုးတော်သည် ဗာဗုလုန်အချုပ်အနှောင်မှ လွတ်လာကြ၍ ရွှင်မြူးခဲ့ကြ၏။ (ဗျာဒိတ် ၁၁:၁၁၊ ၁၂) ထိုအချိန်မှစ၍ လူသန်းပေါင်းများစွာလည်း ထွက်ပြေးလော့ ဟူသောအမိန့်ကို နာခံခဲ့ကြ၏။
၂၃။ ကောင်းကင်မှစကားသံက မဟာဗာဗုလုန်မှ အလျင်အမြန်ထွက်ပြေးရန် အရေးကြီးကြောင်း မည်သို့ အလေးအနက်ပြု၍ ဆိုသနည်း။
၂၃ ကမ္ဘာ့ဘာသာရေးအဖွဲ့များမှ နုတ်ထွက်၍ မဟာဗာဗုလုန်မှ ထွက်ပြေးကာ အသီးအခြားနေရန် တကယ်ပင် ထိုမျှအရေးကြီးသလော။ အရေးကြီး၏။ အကြောင်းမှာ ကြာမြင့်စွာကပင် တည်ရှိလာခဲ့သော ၎င်းဘာသာရေးအဖွဲ့ကြီး မဟာဗာဗုလုန်ကို ဘုရားသခင် ရှုမြင်သကဲ့သို့ ကျွန်ုပ်တို့ ရှုမြင်ရန်လိုသည်။ ကိုယ်တော်သည် သူ့ကို ပြည့်တန်ဆာကြီးဟုခေါ်ရန် အားမနာပါ။ ထို့ကြောင့် ကောင်းကင်မှအသံက ဤမိန်းမပျက်နှင့် ပတ်သက်၍ ယောဟန်အား ဤသို့ထပ်၍ သိကြားစေ၏– “အကြောင်းမှာ၊ သူ၏အပြစ်များသည် ကောင်းကင်ဘုံ မီသည်တိုင်အောင် စုပုံပြီဖြစ်၍ သူပြုသော မတရားမှုများအတွက် သူကို ဘုရားသခင် သတိရတော်မူပြီ။ သူပေးဆက်သည့်အတိုင်း သူအား ပေးဆက်ကြလော့။ သူပြုသည့်အမှု အရေအတွက်အတိုင်း သူအား နှစ်ဆပြုကြလော့။ သူရောစပ်သောဖလား၌ သူအဖို့ နှစ်ဆရောစပ်ကြလော့။ သူသည် မိမိကိုယ်ကို ချီးမြှောက်၍ အရှက်မရှိ ဇိမ်ယစ်သည်နှင့်အမျှ သူအား ညှဉ်းဆဲ၍ ငိုကြွေးမြည်တမ်းစေကြလော့။ အကြောင်းမူကား၊ သူက ‘ငါသည် ဘုရင်မအဖြစ် စံမြန်း၏။ မုဆိုးမမဟုတ်။ ငါသည် အဘယ်အခါမျှ ငိုကြွေးမြည်တမ်းရမည်မဟုတ်’ ဟု စိတ်နှလုံးထဲ၌ အစဉ်မပြတ် ဆိုတတ်၏။ ယင်းကြောင့် ကပ်ဘေးများ၊ သေခြင်း၊ ငိုကြွေးမြည်တမ်းခြင်းနှင့် မွတ်သိပ်ခြင်းဘေးတို့သည် သူ့အပေါ်သို့ တစ်ရက်အတွင်း ကျရောက်၍ သူသည် အပြီးအပိုင် မီးဖြင့်ကျွမ်းလောင်ခြင်းကို ခံရလိမ့်မည်။ အကြောင်းမှာ သူ့အား တရားစီရင်တော်မူသော ယေဟောဝါ ဘုရားသခင်သည် ခွန်အားကြီးတော်မူ၏။”—ဗျာဒိတ် ၁၈:၅-၈။
၂၄။ (က) ဘုရားသခင့် လူမျိုးတော်သည် မဟာဗာဗုလုန်မှ ထွက်ပြေးမှသာ အဘယ်အရာကို ရှောင်နိုင်မည်နည်း။ (ခ) မဟာဗာဗုလုန်မှ ထွက်ပြေးရန် ပျက်ကွက်သူများသည် သူ၏အဘယ်အပြစ်များနှင့် ကင်းရှင်းမည် မဟုတ်သနည်း။
၂၄ ပြင်းထန်သော စကားများပါတကား! ထို့ကြောင့် ထိုင်နေ၍မဖြစ်ပါ။ ယေရမိက မိမိလက်ထက်ရှိ ဣသရေလလူတို့အား ဤသို့ပြုမူရန် တိုက်တွန်းလိုက်၏– “ဗာဗုလုန်မြို့ထဲက ထွက်ပြေး [ကြလော့။] . . . ဤအချိန်ကား၊ ထာဝရဘုရား၏ လက်စားချေတော်မူခြင်း အချိန်ဖြစ်၍ အပြစ်နှင့်အလျောက် ဆပ်ပေးနေတော်မူ၏။ ငါ၏လူတို့၊ ဗာဗုလုန်မြို့ထဲက ထွက်ကြလော့။ ထာဝရဘုရား၏ ပြင်းစွာသော အမျက်တော်မှ အသီးအသီး ကိုယ့်အသက်ကို ကယ်နုတ်ကြလော့။” (ယေရမိ ၅၁:၆၊ ၄၅၊ သမ္မာ) အလားတူစွာ ကောင်းကင်မှစကားသံက မဟာဗာဗုလုန်ခံရမည့် ကပ်ဘေးများနှင့်လွတ်အောင် သူ၏အထဲမှ ထွက်ပြေးရန် ယနေ့ ဘုရားသခင့်လူမျိုးတော်အား သတိပေး၏။ မဟာဗာဗုလုန်အပါအဝင် ဤလောကအပေါ် ချမှတ်တော်မူသော ကပ်ဘေးနှင့်တူသည့် ယေဟောဝါ၏ တရားစီရင်ချက်များကို ယခု ကြွေးကြော်လျက်ရှိကြ၏။ (ဗျာဒိတ် ၈:၁–၉:၂၁; ၁၆:၁-၂၁) ဘုရားသခင့် လူမျိုးတော်ကိုယ်နှိုက် မဟာဗာဗုလုန်နှင့်အတူ ကပ်သင့်ပြီး နောက်ဆုံး၌ မသေလိုလျှင် မိစ္ဆာဘာသာတရားမှ ခွဲထွက်လာရန်လို၏။ ထို့ပြင် ထိုအဖွဲ့အစည်းထဲ၌ နေရစ်လျှင် သူ၏အပြစ်နှင့် ဆက်ဆံရာရောက်လိမ့်မည်။ သူသည် ဝိညာဉ်ရေးဖောက်ပြားခြင်း၊ “မြေကြီးပေါ်မှာ အသတ်ခံရသောသူ ရှိသမျှတို့၏သွေး” ကိုသွန်းခြင်းအပြစ်နှင့် မကင်းသကဲ့သို့ သူတို့လည်း ကင်းကြမည်မဟုတ်။—ဗျာဒိတ် ၁၈:၂၄; ဧဖက် ၅:၁၁; ၁ တိမောသေ ၅:၂၂ နှိုင်းယှဉ်။
၂၅။ ဘုရားသခင့် လူမျိုးတော်သည် ရှေးဗာဗုလုန်မှ အဘယ်နည်းများဖြင့် ထွက်လာကြသနည်း။
၂၅ သို့သော် ဘုရားသခင့်လူမျိုးတော်သည် မဟာဗာဗုလုန်မှ မည်သို့ထွက်လာကြသနည်း။ ရှေးဗာဗုလုန်ခေတ်ကဆိုလျှင် ဂျူးတို့သည် ဗာဗုလုန်မြို့မှ ကတိထားရာပြည်တော်သို့ ပကတိခရီးကိုလျှောက်၍ ပြန်ခဲ့ရကြ၏။ သို့သော် ထိုမျှသာမဟုတ်ပါ။ ဟေရှာယက ဣသရေလလူတို့အား ပရောဖက်ပြု၍ ဤသို့ဆို၏– “ထွက်ကြ။ ထွက်ကြ။ ထိုအရပ်မှ ထွက်သွားကြလော့။ မစင်ကြယ်သောအရာကို မထိကြနှင့်။ ထိုမြို့တွင်းမှ ထွက်သွားကြလော့။ ထာဝရဘုရား၏ အသုံးအဆောင် တန်ဆာတော်များကို ထမ်းဆောင်သောသူတို့၊ ကိုယ်ကိုစင်ကြယ်စေကြလော့။” (ဟေရှာယ ၅၂:၁၁) မှန်ပေသည်။ ယေဟောဝါအား ကိုးကွယ်မှုကို ညစ်ထေးစေနိုင်သော ဗာဗုလုန်ဆိုင်ရာဘာသာတရား၏ မစင်ကြယ်သော အကျင့်ဓလေ့ရှိသမျှကို စွန့်လွှတ်ရန် လိုအပ်ခဲ့သည်။
၂၆။ ‘ထိုသူတို့အထဲမှ ထွက်ကြလော့။ မစင်ကြယ်သောအရာကို လက်နှင့်မျှမတို့ကြနှင့်’ ဟူသောစကားကို ကောရိန္သုခရစ်ယာန်များ မည်သို့နာခံကြသနည်း။
၂၆ ကောရိန္သုမြို့သားများထံ ပေါလုစာရေးရာ၌ ဟေရှာယ၏စကားကို ကိုးကား၍ ဤသို့ဆို၏– “မယုံကြည်သောသူတို့နှင့် တွဲဖက်၍ ဆန့်ကျင်ဘက်ဖြစ်သော ထမ်းပိုးကို မထမ်းကြနှင့်။ တရားသောအမှုသည် မတရားသောအမှုကို အဘယ်သို့ လက်ခံနိုင်မည်နည်း။ အလင်းသည် မှောင်မိုက်နှင့် အဘယ်သို့ ဆက်ဆံနိုင်မည်နည်း။ . . . ထိုကြောင့်၊ ထာဝရဘုရား မိန့်တော်မူပြန်သည်ကား သင်တို့သည် ထိုသူတို့အထဲမှထွက်၍ အသီးအခြားနေကြလော့။ မစင်ကြယ်သောအရာကို လက်နှင့်မျှ မတို့ကြနှင့်။” ကောရိန္သုခရစ်ယာန်များသည် ထိုအမိန့်ကို နာခံသည့်အနေနှင့် ကောရိန္သုမြို့မှ ထွက်လာစရာမလိုချေ။ သို့တစေ၊ သူတို့သည် မစင်ကြယ်သော မိစ္ဆာဘာသာ ကျောင်းဗိမာန်များကို ကာယရေးအရ ရှောင်ရှားပြီး ရုပ်တုကိုးကွယ်သူများ၏ မစင်ကြယ်သောအမှုများနှင့် ဝိညာဉ်ရေးအရ ကင်းရှင်းစွာနေရကြ၏။ ၁၉၁၉ ခုနှစ်၌ ဘုရားသခင့် လူမျိုးတော်သည် အထက်ပါနည်းအတိုင်း မဟာဗာဗုလုန်မှ ထွက်ပြေးပြီး မစင်ကြယ်သော သွန်သင်ချက်နှင့် အကျင့်ဓလေ့များကို မိမိတို့အထဲမှ တစ်စမကျန် သုတ်သင်ပယ်ရှင်းခဲ့ကြသည်။ ဤနည်းအားဖြင့် သန့်စင်သောလူမျိုးတော်အဖြစ် ကိုယ်တော်အား ဝတ်ပြုနိုင်ကြလေသည်။—၂ ကောရိန္သု ၆:၁၄-၁၇; ၁ ယောဟန် ၃:၃။
၂၇။ ရှေးဗာဗုလုန်အပေါ် ချမှတ်သောစီရင်ချက်များနှင့် မဟာဗာဗုလုန်အပေါ် ချမှတ်သောစီရင်ချက်များ အဘယ်ဆင်တူချက်များ ရှိသနည်း။
၂၇ ရှေးဗာဗုလုန်မြို့သည် ကျဆုံးပြီးနောက် အဆုံး၌ ဆိတ်သုဉ်းရခြင်းမှာ ကိုယ့်အပြစ်အတွက် ကိုယ်ဒဏ်ခံရခြင်းဖြစ်သည်။ “သူခံရသောအပြစ်သည် ကောင်းကင်တိုင်အောင်ရောက်” ၏။ (ယေရမိ ၅၁:၉) ထို့နည်းတူ မဟာဗာဗုလုန်၏ အပြစ်များသည် “ကောင်းကင်ဘုံ မီသည်တိုင်အောင် စုပုံပြီဖြစ်” သဖြင့် ယေဟောဝါ ကိုယ်တော်တိုင် သတိပြုမိလေပြီ။ သူသည် မတရားမှု၊ ရုပ်တုကိုးကွယ်မှု၊ စာရိတ္တပျက်မှု၊ ဖိနှိပ်ချုပ်ချယ်မှု၊ လုယက်မှုနှင့် လူသတ်မှုတို့ကို ကျူးလွန်ခဲ့၏။ ရှေးဗာဗုလုန်မြို့ ကျဆုံးခြင်းမှာ တစ်စိတ်တစ်ပိုင်းအားဖြင့် ယေဟောဝါ၏ ဗိမာန်တော်နှင့် ကိုယ်တော်၏ စစ်မှန်သောကိုးကွယ်သူများအပေါ် သူကျူးလွန်ခဲ့သော အပြစ်များအတွက် လက်စားချေတော်မူခြင်းဖြစ်သည်။ (ယေရမိ ၅၀:၈၊ ၁၄; ၅၁:၁၁၊ ၃၅၊ ၃၆) မဟာဗာဗုလုန် ကျဆုံးပြီးနောက် အဆုံး၌ ဖျက်ဆီးခံရခြင်းသည်လည်း ရာစုနှစ်များတစ်လျှောက် စစ်မှန်သော ကိုးကွယ်သူများအပေါ် သူပြုလာခဲ့သောအပြစ်အတွက် လက်စားချေတော်မူခြင်းဖြစ်၏။ အမှန်ဆိုလျှင် သူ၏ နောက်ဆုံးပျက်စီးခြင်းသည် “ငါတို့ဘုရားသခင် လက်စားချေတော်မူရာနေ့” ၏အစပင်တည်း။—ဟေရှာယ ၃၄:၈-၁၀; ၆၁:၂၊ သမ္မာ; ယေရမိ ၅၀:၂၈။
၂၈။ မဟာဗာဗုလုန်အပေါ် အဘယ်တရားမျှတခြင်းစံကို ယေဟောဝါ ကျင့်သုံးတော်မူသနည်း၊ အဘယ်ကြောင့်နည်း။
၂၈ မောရှေပညတ်အောက်၌ ဣသရေလတစ်ဦးသည် အမျိုးသားချင်းထံမှ တစ်စုံတစ်ရာကိုခိုးမိလျှင် အနည်းဆုံး နှစ်ဆလျော်ရ၏။ (ထွက်မြောက်ရာ ၂၂:၁၊ ၄၊ ၇၊ ၉) လာလတ္တံ့သော မဟာဗာဗုလုန် ပျက်စီးခြင်း၌ အလားတူ တရားမျှတမှုစံနှုန်းကို ယေဟောဝါသုံးတော်မူမည်။ သူပေးဆက်ခဲ့သည့်အတိုင်း နှစ်ဆပြန်ရရှိမည်။ မဟာဗာဗုလုန်သည် မိမိ၏သားကောင်များအပေါ် ကရုဏာမဲ့ခဲ့သောကြောင့် ကရုဏာတော် ပြခံရမည်မဟုတ်။ ကပ်ပါးရပ်ပါးအဖြစ် မြေကြီးသားများအပေါ် အမြတ်ထုတ်၍ “အရှက်မရှိ ဇိမ်ယစ်” လျက်နေခဲ့သည်။ ယခု သူသည် ဆင်းရဲ၍ ငိုကြွေးမြည်တမ်းရတော့မည်။ ရှေးဗာဗုလုန်က မိမိသည် လုံခြုံမှုအပြည့်အဝရှိသည်ဟု ထင်မှတ်လျက် “ငါသည် မုဆိုးမကဲ့သို့ ထိုင်၍မနေရ။ သားဆုံးခြင်းကို ငါမခံရ” ဟု ကြွားလုံးထုတ်ခဲ့သည်။ (ဟေရှာယ ၄၇:၈၊ ၉၊ ၁၁) မဟာဗာဗုလုန်လည်း မိမိလုံခြုံသည်ဟုပင် ထင်မှတ်၏။ သို့သော် “ခွန်အားကြီးတော်မူ” သော ယေဟောဝါ၏ စီရင်ချက်ဖြစ်သည့် ၎င်း၏ပျက်စီးခြင်းသည် “တစ်ရက်အတွင်း ကျရောက်” သကဲ့သို့ ကျရောက်လတ္တံ့!
[လေ့လာရန်မေးခွန်းများ]
[စာမျက်နှာ ၂၆၃ ပါ လေးထောင့်ကွက်]
“ဘုရင်တို့သည် သူနှင့်မတရားမေထုန်ကို ပြုကြ”
၁၈၀၀ ပြည့်လွန်နှစ်အစောပိုင်းတွင် ဥရောပကုန်သည်များသည် ဘိန်းအမြောက်အမြားကို တရုတ်နိုင်ငံအတွင်းသို့ မှောင်ခိုသွင်းကြ၏။ ၁၈၃၉ ခုနှစ် မတ်လ၌ တရုတ်အရာရှိများက ဥပဒေချိုးဖောက်သော ထိုကုန်သွယ်မှုကိုပိတ်ပင်ရန် အားထုတ်သည့်အနေနှင့် ဗြိတိသျှကုန်သည်များထံမှ ဘိန်းသေတ္တာပေါင်း ၂၀,၀၀၀ ဖမ်းဆီးလိုက်သည်။ ယင်းကြောင့် ဗြိတိသျှနှင့်တရုတ် ဆက်ဆံရေးတင်းမာလာသည်။ နှစ်နိုင်ငံဆက်ဆံရေး ယိုယွင်းလာသည်နှင့်အမျှ အချို့ပရိုတက်စတင့်သာသနာပြုများက ဗြိတိသျှအား အောက်ပါစကားများဖြင့် စစ်တိုက်ရန်တိုက်တွန်းခဲ့ကြသည်–
“ဤပဋိပက္ခများက ကျွန်ုပ်၏စိတ်နှလုံးကို မည်မျှရွှင်ပြုံးစေသည်ဖြစ်ခြင်း။ အကြောင်းမှာ အင်္ဂလိပ်အစိုးရသည် အမျက်ထွက်၍ ဘုရားသခင်လည်း ခရစ်တော်၏သတင်းကောင်း တရုတ်နိုင်ငံအတွင်းသို့ မဝင်ရောက်စေရန်ဟန့်တားသော အတားအဆီးများကို မိမိ၏အစွမ်းတန်ခိုးတော်ဖြင့် ချိုးဖျက်ကောင်းချိုးဖျက်တော်မူမည်ဟု ကျွန်ုပ်ထင်သည်။”—ဟင်နရီယက်တာရှပ်ခ်၊ တောင်ပိုင်းနှစ်ခြင်းသာသနာပြု။
နောက်ဆုံး၌ စစ်ဖြစ်လေသည်—ယနေ့ ဘိန်းစစ်ဟုသမုတ်သော စစ်ပင်ဖြစ်၏။ သာသနာပြုများက အောက်ပါကဲ့သို့သောအပြောများဖြင့် ဗြိတိန်နိုင်ငံကို လှိုက်လှိုက်လှဲလှဲအားပေးကြသည်–
“ကျွန်ုပ်သည် မျက်မှောက်အခြေအနေကို ဘိန်းကိစ္စ သို့မဟုတ် အင်္ဂလိပ်တို့အရေးအဖြစ်လောက်သာမယူမှတ်ဘဲ လူ့ဆိုးသွမ်းမှုကိုသုံးပြီး တရုတ်နိုင်ငံအပေါ်ထားရှိသော မိမိ၏ကရုဏာတော် ရည်ရွယ်ချက်အထမြောက်စေ၍ တရုတ်နိုင်ငံ၏အကာအရံ အုတ်တံတိုင်းကိုချိုးဖောက်ရန် ဘုရားသခင်၏မဟာကြံစည်တော်မူချက်အဖြစ် မယူမှတ်မနေ ယူမှတ်ရပါသည်။” —ပီတာပါ့ကာ၊ ကွန်ဂရီဂေးရှင်းနယ်လစ်စ်သာသနာပြု။
ကွန်ဂရီဂေးရှင်းနယ်လစ်စ် သာသနာပြုနောက်တစ်ဦးဖြစ်သူ စမ်မြူယယ်လ် ဒဗ္ဗလျူ၊ဝီလျံက ဤသို့ဖြည့်စွက်ပြောဆို၏– “ထူးခြားစွာဖြစ်ပျက်ခဲ့သမျှအမှု၌ ဘုရားသခင်၏လက်တော်ပါရှိကြောင်း ထင်ရှားပြီဖြစ်၍ မြေကြီးပေါ်သို့ ဓားကိုယူဆောင်လာမည်ဟု မိန့်တော်မူသောအရှင်သည် ရန်သူတော်များကို အလျင်အမြန်ချေမှုန်းလျက် မိမိ၏နိုင်ငံတော်ကိုတည်ထောင်ရန် ကြွလာပြီဖြစ်ကြောင်း ကျွန်ုပ်တို့သံသယမရှိ။ ငြိမ်သက်ခြင်းမင်းအား နန်းမတင်မချင်း မှောက်လှန်မည်၊ မှောက်လှန်တော်မူမည်ဖြစ်သည်။”
တရုတ်နိုင်ငံသားများအား ရက်ရက်စက်စက်သတ်ဖြတ်သည့်ကိစ္စနှင့်ပတ်သက်၍ သာသနာပြု ဂျေ၊လူးဝစ်စ်ရှပ်ခ်က ဤသို့ရေး၏– “ကျွန်ုပ်အနေနှင့် ထိုသို့သောမြင်ကွင်းများကို ဘုရားသခင့်သမ္မာတရားပြန့်ပွားရေး နှောင့်နှေးစေသော အမှိုက်သရိုက်များ ဖယ်ရှားရာတွင် အရှင်မြတ်သုံးစွဲတော်မူသော တိုက်ရိုက်ကိရိယာအဖြစ် သဘောထားပါသည်။”
ကွန်ဂရီဂေးရှင်းနယ်လစ်စ် သာသနာပြု အီလိုင်းဂျားစီ၊ဘရစ်ဂျ်မင်းက ဤသို့ဖြည့်စွက်ပြောဆို၏– “ဘုရားသခင်သည် အစိုးရအင်အား၏သန်စွမ်းသည့် လက်ရုံးကိုသုံး၍ မိမိ၏နိုင်ငံတော်အတွက် လမ်းခင်းလေ့ရှိ၏။ . . . အရေးပါလှသော ဤသမယများတွင် အသုံးတော်ခံကိရိယာမှာ လူဖြစ်၏။ ပဲ့ထိန်းသောတန်ခိုးမှာ ဘုရားတန်ခိုးဖြစ်၏။ တိုင်းနိုင်ငံရှိသမျှအပေါ် အုပ်ချုပ်သော မင်းကြီးသည် အင်္ဂလန်နိုင်ငံကိုသုံး၍ တရုတ်နိုင်ငံကိုဆုံးမပြီး နှိမ့်ချစေတော်မူပြီ။”—တရုတ်နှင့် အမေရိကန်နိုင်ငံရှိသာသနာပြုလုပ်ငန်း (ဂျွန်ကေ၊ဖဲဘင့် တည်းဖြတ်သော ဟားဗတ်လေ့လာချက်) ဟူသောစာအုပ်၌ ရေးသားထုတ်ဝေသော ၁၉၇၄ ခုနှစ်၊ စတူးဝတ်ခရေးတန်မီလာ၏ “ကြံစည်ချက်နှင့်နည်းလမ်းများ” စာတမ်းတိုမှ ကိုးကားချက်များ။
[စာမျက်နှာ ၂၆၄ ပါ လေးထောင့်ကွက်]
“ခရီးသွားကုန်သည်များလည်း ချမ်းသာကြပြီ”
၁၉၂၉ ခုနှစ်နှင့် ဒုတိယကမ္ဘာစစ်မပေါက်ကွဲမီအချိန်အတွင်း [ဗက်တီကင်ဘဏ္ဍာရေးမှူး] [ဘာနတ်ဒီနို] နိုဂါရာသည် အီတလီနိုင်ငံ၏ စီးပွားရေးကဏ္ဍအမျိုးမျိုးတွင် ဗက်တီကင်၏အရင်းငွေမြှုပ်နှံပြီး ဗက်တီကင်ကိုယ်စားလှယ်များကို ထိုလုပ်ငန်းများ၌ လုပ်ကိုင်စေသည်။ အထူးသဖြင့် လျှပ်စစ်ဓာတ်အား၊ တယ်လီဖုန်းဆက်သွယ်ရေး၊ အကြွေးစနစ်နှင့် ဘဏ်လုပ်ငန်း၊ အသေးစား ရထားလမ်းများ၊ စိုက်ပျိုးရေးကိရိယာထုတ်လုပ်မှု၊ ဘိလပ်မြေနှင့် ချည်မျှင်လုပ်ငန်းများ၌ဖြစ်သည်။ ထိုရင်းနှီးမြှုပ်နှံမှုများစွာတို့သည် စီးပွားဖြစ်ထွန်းခဲ့၏။
“နိုဂါရာသည် La Società Italiana della Viscosa, La Supertessile, La Società Meridionale Industrie Tessili, and La Cisaraion အပါအဝင် ကုမ္ပဏီတော်တော်များများကို ဝါးမြိုလိုက်သည်။ နိုဂါရာသည် ၎င်းကုမ္ပဏီများကို ပေါင်းစည်း၍ Cisa-Viscosa ဟူသောအမည်ကိုပေးလျက် အယုံကြည်အားထားရဆုံးသော ဗက်တီကင်လူဝတ်ကြောင်ဖြစ်သူ ဘာရွန်ဖရန်စက်စကို မာရိယာအိုဒါစိုအား ကွပ်ကဲစေပြီးလျှင် ဤကုမ္ပဏီသစ်ကို အီတလီနိုင်ငံ၏ အကြီးမားဆုံးသော Snia-Viscosa အထည်အလိပ်ကုမ္ပဏီက သိမ်းသွင်းစေရန် အကွက်ဆင်လေသည်။ နောက်သော် ဗက်တီကင်၏အစုရှယ်ယာ များသည်ထက်များလာပြီး အဆုံး၌ ကုမ္ပဏီကို ဗက်တီကင်က ချုပ်ကိုင်လေ၏—ဘရွန်အိုဒါစို ဒုဥက္ကဋ္ဌဖြစ်လာခြင်းက ယင်းအချက်ကို သက်သေပြ၏။
“ဤနည်းအားဖြင့် နိုဂါရာသည် အထည်အလိပ်လုပ်ငန်းအတွင်းသို့ ထိုးဖောက်ဝင်ရောက်ခဲ့သည်။ အခြားစက်မှုလုပ်ငန်းများသို့လည်း အခြားနည်းများဖြင့် ထိုးဖောက်ဝင်ရောက်ခဲ့သည်။ ကိုယ်ကျိုးမရှာသော ဤပုဂ္ဂိုလ်သည် . . . အီတလီနိုင်ငံသမိုင်း၌ အခြားမည်သည့်အရောင်းအဝယ်သမားထက်မဆို အီတလီနိုင်ငံ၏စီးပွားရေးကို ဖွံ့ဖြိုးတိုးတက်စေခဲ့ဟန်ရှိ၏။ . . . ဘင်နစ်တို မူဆိုလီနီအနေနှင့် မိမိစိတ်ကူးယဉ်သော အင်ပါယာကို ဘယ်တော့မျှကောင်းစွာ မဖန်တီးနိုင်ခဲ့သော်လည်း ဗက်တီကင်နှင့် ဘာနတ်ဒီနို နိုဂါရာတို့အား အချုပ်အခြာအာဏာနောက်တစ်မျိုးကိုဖန်တီးစေရန် အထောက်အကူပေးခဲ့သည်။”—နီနိုလိုဘဲလိုပြုစုသော ဗက်တီကင်အင်ပါယာ၊ စာမျက်နှာ ၇၁-၃။
ဤကား မြေကြီးပေါ်မှကုန်သည်များနှင့် မဟာဗာဗုလုန်စပ်ကြားရှိ ရင်းနှီးသော ပူးပေါင်းဆောင်ရွက်မှု၏ သာဓကတစ်ရပ်သာတည်း။ ထို့ကြောင့် ထိုကုန်သည်တို့သည် မိမိတို့၏စီးပွားရှာဖော်မရှိတော့သောအခါ ငိုကြွေးကြသည်မှာ မဆန်းပါ။
[စာမျက်နှာ ၂၅၉ ပါ ရုပ်ပုံ]
ကမ္ဘာတစ်ခွင် ပျံ့နှံ့သွားသော လူတို့နှင့်အတူ ဗာဗုလုန်ဘာသာ ပျံ့နှံ့သွား
[စာမျက်နှာ ၂၆၁ ပါ ရုပ်ပုံ]
ကင်းစောင့်နည်းတူ ယောဟန်အတန်းအစားသည် ဗာဗုလုန် ကျဆုံးပြီဖြစ်ကြောင်း ကြွေးကြော်
[စာမျက်နှာ ၂၆၆ ပါ ရုပ်ပုံ]
ရှေးဗာဗုလုန် အပြိုအပျက်များသည် မဟာဗာဗုလုန် ဖျက်ဆီးခံရတော့မည်ကို အရိပ်ပြ