ယေရှုနာမကို စွဲကိုင်ခြင်း
အခန်း ၉
ယေရှုနာမကို စွဲကိုင်ခြင်း
ပေရဂံ
၁။ အဘယ်အသင်းတော်က ယေရှု၏ နောက်သတင်းတော်ကို လက်ခံရရှိသနည်း။ ထိုခရစ်ယာန်များသည် မည်သို့သောမြို့၌ နေထိုင်ကြသနည်း။
စမုရနမြို့မှ ကမ်းခြေအတိုင်း မြောက်ဘက်သို့ မိုင် ၅၀ သွားပြီး ကိုင်းကပ်စ်မြစ်ဝှမ်းကိုဖြတ်၍ အတွင်းဘက်သို့ ခရီးဆက်လျှင် ယခု ဘာဂမာမြို့ဟုခေါ်သော ပေရဂံမြို့သို့ ရောက်၏။ ယင်းမြို့သည် ဇုသ သို့မဟုတ် ဂျူပီတာ နတ်ဘုရားဗိမာန်ကြောင့် ကျော်ကြားသည်။ ၁၈၀၀ ပြည့်လွန်နှစ်များ၌ ရှေးဟောင်းသုတေသန ပညာရှင်များသည် ထိုဗိမာန်၏ ယဇ်ပလ္လင်ကို ဂျာမနီနိုင်ငံသို့ ပို့လိုက်သည်။ ၎င်းကို ဘာလင်မြို့ရှိ ပေရဂံပြတိုက်တွင် အခြားတိတ္ထိနတ်ဘုရားများ၏ ရုပ်တုရုပ်ကြွများနှင့်အတူ ယနေ့တိုင် တွေ့နိုင်ပါသည်။ ဆင်းတုကိုးကွယ်မှုနှင့် ဝိုင်းရံနေသော ထိုအသင်းတော်ထံ သခင်ယေရှု ဘာသတင်းတော် ပို့ရန်ရှိသနည်း။
၂။ ယေရှုက မိမိမည်သူဖြစ်ကြောင်း မည်သို့ဖော်ပြသနည်း။ ကိုယ်တော်၌ “ထက်သောသန်လျက်” ရှိခြင်းက ဘာအဓိပ္ပာယ်ရှိသနည်း။
၂ ရှေးဦးစွာ ယေရှုက မိမိမည်သူဖြစ်ကြောင်း ဤသို့မိန့်ကြားသည်– “ပေရဂံမြို့ရှိ အသင်းတော်၏ ကောင်းကင်တမန်ထံ ဤသို့ရေးလော့။ ဤကား ထက်သောသန်လျက်ရှည် ရှိသူ၏ မိန့်ဆိုချက်များတည်း။” (ဗျာဒိတ် ၂:၁၂) ဤတွင် ယေရှုသည် ဗျာဒိတ် ၁:၁၆ ပါ မိမိအကြောင်း ဖော်ပြချက်ကို တင်ပြပြန်၏။ ကိုယ်တော်သည် မိမိတပည့်များကို နှိပ်စက်သောသူတို့အား တရားသူကြီးနှင့် လက်မရွံ့ အာဏာသားအနေနှင့် ချေမှုန်းတော်မူမည်။ ထိုအာမခံချက်သည် အလွန်နှစ်သိမ့်စရာ ပါတကား။ သို့သော် တရားစီရင်ခြင်းနှင့် စပ်လျဉ်း၍ဆိုရလျှင် ယေဟောဝါသည် “ပဋိညာဉ်တမန်တော်” ယေရှုခရစ်အားဖြင့် ဆင်းတုကိုးကွယ်မှု၊ သီလပျက်မှု၊ လိမ်လည်မှုနှင့် မရိုးသားမှုတို့ကို ကျူးလွန်၍ ဆင်းရဲသားတို့ကို မထောက်မသော ခရစ်ယာန်အမည်ခံသူတို့ တစ်ဖက်၌ “လျင်မြန်သော သက်သေဖြစ်မည်” ဟူသောသတိပေးချက်ကို အသင်းတော်အထဲရှိသူများ သတိပြုကြပါစေ။ (မာလခိ ၃:၁၊ ၅; ဟေဗြဲ ၁၃:၁-၃) ယေရှုအား ဘုရားသခင် ပေးပို့စေသော ဩဝါဒနှင့် ဆုံးမစကားများကို မပျက်မကွက် နာခံရမည်။
၃။ ပေရဂံမြို့၌ အဘယ်မှားယွင်းသော ဝတ်ပြုမှုကို ပြုကြသနည်း။ ထိုနေရာ၌ “စာတန်၏ပလ္လင်ရှိ” သည်ဟု မည်သို့ဆိုနိုင်သနည်း။
၃ အသင်းတော်အား ယေရှုဤသို့ ဆက်၍မိန့်ဆိုသည်– “သင်နေထိုင်ရာအရပ်ကို ငါသိ၏။ စာတန်၏ပလ္လင် တည်ရှိရာအရပ်ပင်ဖြစ်သည်။” (ဗျာဒိတ် ၂:၁၃က) ထိုခရစ်ယာန်တို့သည် တကယ်ပင် စာတန်ဝတ်ပြုမှုဖြင့် ဝိုင်းရံခံရသည်။ ဇုသနတ်ဗိမာန်အပြင် ဆေးပညာဆိုင်ရာနတ်ဘုရား အက်စကျူလေးပီးယပ်စ်အတွက် ဆောက်ထားသောဗိမာန် ရှိသေးသည်။ ပေရဂံမြို့သည် ဧကရာဇ်ကိုးကွယ်မှု၏ ဗဟိုအဖြစ်လည်း ထင်ရှားသည်။ “စာတန်” ဟုပြန်ဆိုသော ဟေဗြဲစကားလုံးသည် “ခုခံသူ” ဟုဆိုလို၍ သူ၏ “ပလ္လင်” မှာ အချိန်အကန့်အသတ်ဖြင့် ဘုရားသခင် ခွင့်ပြုထားသော သူ၏ကမ္ဘာ့အုပ်ချုပ်မှုကို ကိုယ်စားပြုသည်။ (ယောဘ ၁:၆၊ ကမ္ဘာသစ်ဘာသာပြန် ရည်ညွှန်းကျမ်းစာ၊ အောက်ခြေမှတ်ချက်) ပေရဂံမြို့၌ ဆင်းတုကိုးကွယ်မှု နှံ့ပြားခြင်းက ထိုမြို့၌ စာတန်၏ “ပလ္လင်” မြဲမြံကြောင်းကိုပြသည်။ ထိုမြို့ရှိ ခရစ်ယာန်များသည် မျိုးချစ်ဝတ်ပြုမှု၌ သူ့ကိုဦးမချသည့်အတွက် စာတန်မည်မျှ ဒေါသူပုန်ထလိုက်မည်ဖြစ်ခြင်း။
၄။ (က) ပေရဂံမြို့ရှိ ခရစ်ယာန်များအား ယေရှုမည်သို့ ချီးမွမ်းတော်မူသနည်း။ (ခ) ခရစ်ယာန်များကို ဆက်ဆံပုံနှင့်ပတ်သက်၍ ရောမသံတမန် ပလီနီက ဧကရာဇ် ထရေးဂျင်ထံ မည်သို့ရေးသားလိုက်သနည်း။ (ဂ) ပေရဂံမြို့ရှိ ခရစ်ယာန်တို့သည် အန္တရာယ်ကိုမမှုဘဲ အဘယ်လမ်းစဉ်ကို လိုက်သနည်း။
၄ မှန်ပေသည်။ “စာတန်၏ပလ္လင်” သည် ပေရဂံမြို့ခေါင်ခေါင်တွင် တည်ရှိ၏။ ယေရှုက “သို့တစေ၊ သင်သည် ငါ့နာမကို စွဲကိုင်၏။ စာတန်နေထိုင်ရာအရပ်၌ သင့်နံဘေးမှာ အသတ်ခံရသော သစ္စာရှိသူ ငါ၏သက်သေ အန္တိပ လက်ထက်၌ပင် သင်သည် ငါ့အပေါ်ထားရှိသော ယုံကြည်ခြင်းကို မငြင်းပယ်ခဲ့ချေ” ဟု ဆက်လက်မိန့်ကြား၏။ (ဗျာဒိတ် ၂:၁၃ခ) စိတ်ဓာတ်တက်ကြွဖွယ် ချီးမွမ်းစကားပါတကား။ အန္တိပသည် နတ်ဆိုးအလေ့အကျင့်များနှင့် ရောမဧကရာဇ် ဝတ်ပြုမှုနောက်သို့ မလိုက်မပါသောကြောင့် အာဇာနည်အဖြစ် အသတ်ခံခဲ့ရခြင်း ဖြစ်မည်မုချ။ ဤပရောဖက်ပြုချက်ကို ယောဟန်ရပြီး မကြာမီ ရောမဧကရာဇ် ထရေးဂျင်၏ ကိုယ်ရေးသံတမန် ပလီနီအငယ်က ထရေးဂျင်ထံစာရေး၍ ခရစ်ယာန်ဖြစ်သည်ဟု စွပ်စွဲခံရသူများကို သူမည်သို့အရေးယူကြောင်း ရှင်းလင်းတင်ပြသည်။ သူ့အရေးယူပုံကို ဧကရာဇ်ဘုရင်က သဘောတူ၏။ ခရစ်ယာန်မဟုတ်ဟူ၍ ငြင်းဆိုသူများသည် ပလီနီအဆိုအရ၊ “ဘုရားများထံ ကျွန်တော်မျိုး [ပလီနီ] ဆုတောင်းပတ္ထနာ ရွတ်ဆိုသည့်အတိုင်း လိုက်ရွတ်ကာ ကိုယ်တော်မြတ် [ထရေးဂျင်] ၏ရုပ်တုရှေ့ နံ့သာပေါင်းနှင့် ဝိုင်ကို ပူဇော်သည့်အပြင် . . . ခရစ်တော်ကိုကျိန်ဆဲ” ပြီးပါက လွတ်မြောက်ခွင့် ရကြ၏။ ခရစ်ယာန်အဖြစ် တွေ့ရှိလျှင် ကွပ်မျက်ခံရသည်။ ပေရဂံ ခရစ်ယာန်များသည် ဤသို့သော အန္တရာယ်နှင့် ရင်ဆိုင်ရလျက်ကယ် မိမိတို့၏ ယုံကြည်ခြင်းကိုမစွန့်။ ယေဟောဝါအား သင်္ကာယနကင်းစေသူ၊ ခန့်အပ်ခံရသော တရားသူကြီး ယေရှု၏မြင့်မြတ်လှသည့် ရာထူးဌာနန္တရကို ဆက်လက်ဂုဏ်ပြုခြင်းဖြင့် ‘ယေရှုနာမကို စွဲကိုင်’ ကြ၏။ နိုင်ငံတော်သက်သေခံများအဖြစ် ယေရှု၏ခြေတော်ရာကို သစ္စာရှိစွာ လိုက်လျှောက်ကြပေသည်။
၅။ (က) ဧကရာဇ်ကိုးကွယ်မှု၏ အဘယ်ခေတ်သစ် ပုံတူကြောင့် ကျွန်ုပ်တို့ခေတ်ရှိ ခရစ်ယာန်များ ပြင်းထန်စွာ စမ်းသပ်ခံရသနည်း။ (ခ) ကင်းမျှော်စင် က ခရစ်ယာန်များအား အဘယ်အကူအညီ ပေးခဲ့သနည်း။
၅ ယေရှုက စာတန်သည် မျက်မှောက်လောကဆိုးကို အုပ်စိုးသော်လည်း မိမိ၏သမာဓိကြောင့် မိမိကို စာတန်မခြယ်လှယ်နိုင်ဟု အကြိမ်ကြိမ် မိန့်ဆိုခဲ့ပြီဖြစ်သည်။ (မဿဲ ၄:၈-၁၁; ယောဟန် ၁၄:၃၀) ကျွန်ုပ်တို့ခေတ်တွင် တန်ခိုးကြီးနိုင်ငံများ၊ အထူးသဖြင့် “မြောက်ရှင်ဘုရင်” နှင့် “တောင်ရှင်ဘုရင်” တို့သည် ကမ္ဘာကိုစိုးမိုးရန် ကြိုးပမ်းလာခဲ့ကြပြီ။ (ဒံယေလ ၁၁:၄၀) ပြင်းပြသောမျိုးချစ်စိတ် နိုးကြားထကြွလာသည်နှင့်အမျှ ဧကရာဇ်ကိုးကွယ်မှု၏ ခေတ်သစ်ပုံတူလည်း ကမ္ဘာတစ်ခွင်သို့ အရှိန်အဟုန်ဖြင့် လွှမ်းခြုံသွားသော အမျိုးသားစိတ်ဓာတ် လှိုင်းလုံးကြီးများအသွင်ဖြင့် ပေါ်လာပြန်သည်။ ၁၉၃၉၊ နိုဝင်ဘာ ၁ ရက်နေ့ထုတ်၊ ၁၉၇၉၊ နိုဝင်ဘာ ၁ ရက်နေ့ထုတ်နှင့် ၁၉၈၆၊ စက်တင်ဘာ ၁ ရက်နေ့ထုတ် ကင်းမျှော်စင် များပါ ကြားနေခြင်းဆိုင်ရာ ဆောင်းပါးများက ဤကိစ္စနှင့်ပတ်သက်သော ကျမ်းစာသွန်သင်ချက်ကို ရှင်းလင်းစွာ တင်ပြခဲ့ရကား၊ ယေဟောဝါ၏ နာမတော်၌ လိုက်လျှောက်၍ ယေရှုကဲ့သို့ လောကကို ရဲရဲတောက် အောင်လိုသော ခရစ်ယာန်များအဖို့ လမ်းညွှန်ချက်ကို ချမှတ်ပေး၏။—မိက္ခာ ၄:၁၊ ၃၊ ၅; ယောဟန် ၁၆:၃၃; ၁၇:၄၊ ၆၊ ၂၆; ၁၈:၃၆၊ ၃၇; တမန်တော် ၅:၂၉။
၆။ ယခုခေတ်၌ ယေဟောဝါသက်သေများသည် အန္တိပနည်းတူ မည်သို့မားမားမတ်မတ် ရပ်တည်ခဲ့ကြသနည်း။
၆ ထိုသို့သောသြဝါဒကို အပူတပြင်း လိုအပ်လျက်ရှိခဲ့ကြသည်။ ယေဟောဝါသက်သေတို့သည် ပူပြင်းတောက်လောင်လျက်ရှိသော အဆင်အခြင်မဲ့ မျိုးချစ်စိတ်ဓာတ်နှင့် ရင်ဆိုင်နေရကား ဘိသိက်ခံများဖြစ်စေ၊ သူတို့၏အပေါင်းပါများဖြစ်စေ၊ ယုံကြည်ခြင်း၌ မားမားမတ်မတ် ရပ်တည်ရန်လိုသည်။ အမေရိကန်ပြည်ထောင်စု၌ ရာပေါင်းများစွာသော ကလေးသူငယ်များနှင့် ကျောင်းဆရာများသည် အလံကို အလေးမပြုသည့်အတွက် ကျောင်းထုတ်ခံရကြသည်။ တစ်ချိန်တည်းတွင် ဂျာမနီနိုင်ငံ၌ သက်သေခံတို့သည် စကြာတံဆိပ်ကို အလေးမပြုသည့်အတွက် ရက်ရက်စက်စက် ညှဉ်းဆဲခံရသည်။ ယေဟောဝါ၏ သစ္စာရှိအစေခံများသည် မျိုးချစ်စိတ်ဆိုင်ရာ ထိုသို့သော ဆင်းတုကိုးကွယ်မှု၌ မပါဝင်ဘဲ ငြင်းဆန်သောကြောင့် ဆိုခဲ့ပြီးသည့်အတိုင်း ဟစ်တလာ၏ နာဇီတို့လက်ချက်ဖြင့် ထောင်နှင့်ချီ၍ သတ်ဖြတ်ခံခဲ့ရသည်။ ၁၉၃၀ ပြည့်လွန်နှစ်များ၌ ဂျပန်နိုင်ငံ ရှင်တိုဧကရာဇ်ကိုးကွယ်မှု အထွတ်အထိပ်ရောက်သည့် ကာလအတွင်း ဓမ္မအမှုဆောင် ရှေ့ဆောင်နှစ်ဦးက ဂျပန်တို့သိမ်းပိုက်ထားသော ထိုင်ဝမ်၌ နိုင်ငံတော်မျိုးစေ့ အမြောက်အမြား ပျိုးကြဲခဲ့ပေသည်။ သူတို့ကို စစ်ဘက်ဆိုင်ရာ အုပ်စိုးရှင်တို့က ထောင်ချလိုက်ရာ ကြမ်းကြုတ်စွာ နှိပ်စက်ခံရ၍ သူတို့ထဲကတစ်ဦး သေဆုံးခဲ့သည်။ နောက်ပိုင်း၌ ကျန်တစ်ဦးကို လွှတ်ပေးသည်ဆိုသော်လည်း နောက်ကျောမှ ပစ်သတ်လိုက်သည်။ ခေတ်သစ် အန္တိပတစ်ဦးပင်။ မျိုးချစ်အထိမ်းအမှတ်များ ဝတ်ပြုမှုနှင့် နိုင်ငံတော်အပေါ် အကြွင်းမဲ့သစ္စာစောင့်မှုကို တောင်းဆိုသောနိုင်ငံများ ယနေ့တိုင်ရှိသေးသည်။ ငယ်ရွယ်သောသက်သေခံ အမြောက်အမြားတို့သည် ကြားနေခရစ်ယာန်များအဖြစ် ရဲရဲဝံ့ဝံ့ ရပ်တည်ခြင်းကြောင့် ထောင်ချခြင်းခံရသည်သာမက အဆုံးစီရင်ခံရသူလည်း မနည်းချေ။ သင်သည် ဤပြဿနာများကို ရင်ဆိုင်နေရသော လူငယ်ဖြစ်လျှင် ဘုရားသခင့်နှုတ်ကပါဌ်တော်ကို နေ့စဉ်ဖတ်ရှုသင်အံပါ။ သို့မှသာ “အသက်ချမ်းသာ ခံစားရ” ၍ ထာဝရအသက်ကို မျှော်လင့်နိုင်လိမ့်မည်။—ဟေဗြဲ ၁၀:၃၉–၁၁:၁၊ သမ; မဿဲ ၁၀:၂၈-၃၁။
၇။ အိန္ဒိယနိုင်ငံမှ လူငယ်များ အမျိုးသားရေးစိတ်ဓာတ် ဝတ်ပြုမှုဆိုင်ရာ အရေးကိစ္စကို မည်သို့ရင်ဆိုင်ခဲ့ကြသနည်း၊ အဘယ်ရလဒ်ရရှိသနည်း။
၇ ကျောင်းနေလူငယ်များလည်း အလားတူပြဿနာများနှင့် ရင်ဆိုင်ကြရသည်။ ၁၉၈၅ ခုနှစ်၌ အိန္ဒိယပြည် ကယ်ရာလာပြည်နယ်တွင် ယေဟောဝါသက်သေများ၏ ကလေးသုံးယောက်သည် ကျမ်းစာကိုအခြေပြုသော မိမိတို့၏ ယုံကြည်ခြင်းဘက်၌ အလျှော့မပေး၊ အမျိုးသားသီချင်းကို မဆိုဘဲနေသည်။ အခြားသူများဆိုကြစဉ် သူတို့တလေးတစား ရပ်လျက်နေကြသော်လည်း ကျောင်းထုတ်ခံရသည်။ သူတို့၏ဖခင်က အိန္ဒိယပြည်၏ တရားရုံးချုပ်အထိ အယူခံဝင်ရာ တရားသူကြီးနှစ်ဦးက “ကျွန်ုပ်တို့၏ မိရိုးဖလာသည် သည်းခံခြင်းတရားကို သွန်သင်သည်။ ကျွန်ုပ်တို့၏ အတွေးအခေါ်ကလည်း သည်းခံခြင်းတရားကို သွန်သင်သည်။ ကျွန်ုပ်တို့၏ ဖွဲ့စည်းပုံဥပဒေကလည်း သည်းခံခြင်းတရားကို ကျင့်သုံးသည်။ ၎င်း၏တန်ဖိုး လျော့နည်းသွားအောင် မလုပ်ဘဲ နေကြပါစို့” ဟူ၍ ရဲဝံ့စွာဆိုကာ ကလေးများအား တရားအနိုင် ပေးလိုက်သည်။ ဤအမှုအကြောင်း သတင်းစာများ၌ ပါလာသည့်ပြင် အယ်ဒီတာ့အာဘော်များကလည်း အကောင်းဘက်မှ ရေးသားကြရာ ထိုအချိန်က ကမ္ဘာ့လူဦးရေ ငါးပုံတစ်ပုံနီးပါးရှိသော ၎င်းနိုင်ငံသည် မိမိတို့နိုင်ငံအတွင်း၌ စစ်မှန်သောဘုရားသခင် ယေဟောဝါကို ကိုးကွယ်သော ခရစ်ယာန်များရှိကြောင်း၊ ထိုသူတို့သည် ကျမ်းစာမူများဘက် သစ္စာရှိရှိ ရပ်တည်ကြကြောင်း သိလိုက်ရလေသည်။
ညစ်ညူးစေသော ဩဇာလွှမ်းမိုးမှုများ
၈။ ပေရဂံမြို့ရှိ ခရစ်ယာန်များကို အဘယ်အတွက် ယေရှု အပြစ်တင်ခဲ့ရသနည်း။
၈ မှန်ပေ၏။ ပေရဂံမြို့ရှိ ခရစ်ယာန်များသည် သမာဓိစောင့်ထိန်းသူများ ဖြစ်ကြပေသည်။ “သို့ရာတွင်၊ သင့်ကို ငါအပြစ်ဆိုစရာ အနည်းငယ်ရှိ၏” ဟုယေရှု မိန့်တော်မူသည်။ သူတို့ဘာလုပ်ခဲ့၍ အပြစ်တင်ခံရသနည်း။ “ဣသရေလ အမျိုးသားများအား ရုပ်တုရှေ့ ပူဇော်သော အရာများကိုစား၍ မတရားမေထုန် ကျူးလွန်စေရန် ခလုတ်ထောင်ပါဟု ဗာလက်အား သင်ကြားပေးသူဖြစ်သော ဗာလမ်၏အယူကို ကိုင်စွဲသူများ သင့်အထဲ၌ရှိ၏။”—ဗျာဒိတ် ၂:၁၄။
၉။ ဗာလမ်ကား မည်သူနည်း။ သူ၏အကြံပေးချက်သည် အဘယ်နည်းဖြင့် “ဣသရေလ အမျိုးသားများရှေ့၌ ခလုတ်ထောင်” ခဲ့သနည်း။
၉ မောရှေလက်ထက်၌ မောဘအမျိုး ဗာလက်က ယေဟောဝါ၏ နည်းလမ်းတော်များအကြောင်း အနည်းအကျဉ်းသိသူ ဣသရေလလူမဟုတ်သော ပရောဖက်ဗာလမ်ကိုငှားရမ်း၍ ဣသရေလလူတို့ကို ကျိန်ဆဲစေသည်။ ယေဟောဝါသည် ဗာလမ်ကိုဆီးတား၍ သူ့အား အတင်းအကျပ်ပြုကာ ဣသရေလလူတို့ကို ကောင်းချီးပေးလျက် သူတို့၏ရန်သူများအပေါ် အမင်္ဂလာစကားများ ရွတ်ဆိုစေတော်မူ၏။ ယင်းကြောင့် ဗာလက်အမျက်ထွက်ခဲ့ရာ ဗာလမ်က ပရိယာယ်သုံးရန် အကြံပြု၍ ချော့မော့လေသည်။ မောဘအမျိုးသမီးများ၏ သွေးဆောင်မှုဖြင့် ဣသရေလအမျိုးသားများအား ကြီးလေးသော လိင်သီလပျက်မှုနှင့် မိစ္ဆာဘုရား ဗာလပေဂုရ ဝတ်ပြုမှုကို ကျူးလွန်စေရန်ဖြစ်သည်။ ဤနည်းဗျူဟာ အထမြောက်ခဲ့သည်။ ယေဟောဝါသည် ဖြောင့်မတ်သော အမျက်တော်မီးတောက်သဖြင့် ကပ်ဘေးကိုလွှတ်လိုက်ရာ မတရားမေထုန်ပြုသူ ဣသရေလအမျိုးသား ၂၄,၀၀၀ သေဆုံးလေသည်။ ယဇ်ပုရောဟိတ် ဖိနဟတ်က ပြတ်ပြတ်သားသား အရေးယူကာ ဣသရေလလူမျိုးထဲမှ ဒုစရိုက်ကိုပယ်ရှားလိုက်တော့မှ ကပ်ဘေးငြိမ်းသွားသည်။—တောလည်ရာ ၂၄:၁၀၊ ၁၁; ၂၅:၁-၃၊ ၆-၉; ၃၁:၁၆။
၁၀။ အဘယ်ခလုတ်တံသင်းများ ပေရဂံအသင်းတော်ထဲသို့ မသိမသာ ဝင်ရောက်ခဲ့သနည်း။ ထိုခရစ်ယာန်များက မိမိတို့၏ကျူးလွန်မှုများကို ဘုရားသခင် လျစ်လျူရှုမှာပဲဟု အဘယ်ကြောင့် ထင်မှတ်ခဲ့ခြင်းဖြစ်မည်နည်း။
၁၀ ယောဟန်လက်ထက် ပေရဂံမြို့တွင် အလားတူ ခလုတ်တံသင်းများ ရှိခဲ့သလော။ မုချရှိ၏။ သီလပျက်မှုနှင့် ရုပ်တုကိုးကွယ်မှုသည် အသင်းတော်ထဲသို့ စိမ့်ဝင်ခဲ့လေပြီ။ ထိုခရစ်ယာန်တို့သည် တမန်တော်ပေါလုမှတစ်ဆင့် ဘုရားသခင်ပေးတော်မူသော သတိပေးချက်ကို မနာခံခဲ့ကြ။ (၁ ကောရိန္သု ၁၀:၆-၁၁) သူတို့သည် နှိပ်စက်မှုကို ကြံ့ကြံ့ခံခဲ့ပြီဖြစ်၍ မိမိတို့၏လိင်ဆိုင်ရာ ကျူးလွန်မှုများကို ယေဟောဝါ လျစ်လျူရှုတော်မူမည်ဟု ထင်မှတ်ကောင်း ထင်မှတ်ကြပေမည်။ ထို့ကြောင့် ယေရှုက ထိုဆိုးယုတ်မှုကို ရှောင်ရမည်ဖြစ်ကြောင်း သူတို့အား ရှင်းလင်းစွာ နားလည်စေတော်မူသည်။
၁၁။ (က) ခရစ်ယာန်များ အဘယ်အရာကို သတိထားသင့်သနည်း။ အဘယ်အထင်မျိုးကို ရှောင်ရမည်နည်း။ (ခ) လွန်ခဲ့သောနှစ်များအတွင်း ခရစ်ယာန်အသင်းတော်မှ နှင်ထုတ်ခံရသူ မည်မျှရှိသနည်း။ များသောအားဖြင့် အဘယ်အတွက်နည်း။
၁၁ ယနေ့လည်း ခရစ်ယာန်တို့သည် “ငါတို့ထာဝရဘုရား၏ ကျေးဇူးတော်ကို မိမိတို့၏အပျော်အပါး လိုက်စားမှုများအတွက် အလွဲသုံးစားပြုလုပ်” ခြင်းကို သတိနှင့်ရှောင်ရမည်။ (ယုဒ ၄၊ ခမ) ခရစ်ယာန် သီလလမ်းစဉ်ကို လိုက်လျှောက်နိုင်ရန် အဆိုးကိုမုန်း၍ ‘မိမိကိုယ်ခန္ဓာကို ထိုးကြိတ်၍ ချုပ်ထိန်း’ ရမည်။ (၁ ကောရိန္သု ၉:၂၇ ခသ; ဆာလံ ၉၇:၁၀; ရောမ ၈:၆) မိမိတို့သည် ဘုရားသခင့်အမှုတော်၌ စိတ်ထက်သန်၍ နှိပ်စက်မှုအောက်၌ သစ္စာစောင့်သည့်အတွက် လိင်အကျင့် ဖောက်ပြန်ခွင့်ရှိသည်ဟူ၍ လုံးဝမထင်သင့်။ လွန်ခဲ့သောနှစ်များအတွင်း အများအားဖြင့် လိင်သီလပျက်မှုကြောင့် ကမ္ဘာတစ်ဝန်း ခရစ်ယာန်အသင်းတော်မှ နှင်ထုတ်ခံရသော ပြစ်မှားသူတို့၏ဦးရေသည် သောင်းနှင့်ချီ၍ များပြား၏။ အချို့နှစ်များ၌ဆိုလျှင် ဗာလပေဂုရကြောင့် ကျဆုံးခဲ့သော ရှေးဣသရေလလူဦးရေထက်ပင် များသည်။ ၎င်းအသင်းအပင်းများထဲသို့ ဘယ်တော့မျှ မကျရောက်စေဖို့ သတိပြုကြစို့။—ရောမ ၁၁:၂၀; ၁ ကောရိန္သု ၁၀:၁၂။
၁၂။ အဘယ်မူများသည် ဘုရားသခင်၏ ရှေးခေတ်အစေခံများနှင့် သက်ဆိုင်သကဲ့သို့ မျက်မှောက်ခေတ် ခရစ်ယာန်များနှင့်လည်း သက်ဆိုင်သနည်း။
၁၂ ယေရှုသည် ပေရဂံခရစ်ယာန်များအား ‘ရုပ်တုများရှေ့ ပူဇော်သော အရာများကိုစားခြင်း’ အတွက်လည်း ပြင်းထန်စွာ ပြစ်တင်တော်မူသည်။ ၎င်းကိစ္စ၌ ဘာအကျုံးဝင်သနည်း။ ကောရိန္သုလူတို့ထံရေးသော ပေါလု၏ စကားများကိုထောက်လျှင် အချို့က မိမိတို့၏ ခရစ်ယာန်လွတ်လပ်မှုကို အလွဲသုံးကာ အခြားသူတို့၏ ဩတ္တပ္ပစိတ်ကို တမင်ထိခိုက်အောင် လုပ်နေပုံရ၏။ ထို့ထက်ကား၊ တကယ့်ရုပ်တုကိုးကွယ်ပွဲ၌ တစ်နည်းတစ်ဖုံ ပါဝင်ကြခြင်းဖြစ်ဖို့ ပို၍အကြောင်းများ၏။ (၁ ကောန္သု ၈:၄-၁၃; ၁၀:၂၅-၃၀) ယနေ့ သစ္စာရှိ ခရစ်ယာန်တို့သည် ခရစ်ယာန်လွတ်လပ်မှုကို အသုံးပြုရာ၌ ကိုယ်ကျိုးမဖက်သော မေတ္တာမျိုးဖြင့် အခြားသူများ ခလုတ်တိုက်လဲစရာ မဖြစ်အောင် သတိနှင့်ရှောင်ရမည်။ တီဗွီ၊ ရုပ်ရှင်နှင့် အားကစား အကျော်အမော်များကို ကိုးကွယ်ခြင်း၊ ငွေကိုသာမက ကိုယ့်ဝမ်းကိုပါ ကိုးကွယ်ခြင်းစသော ခေတ်သစ်ရုပ်တုကိုးကွယ်မှုများကို ရှောင်ကြဉ်ရမည်မှာ အထူးဆိုဖွယ်မရှိ။—မဿဲ ၆:၂၄; ဖိလိပ္ပိ ၁:၉၊ ၁၀; ၃:၁၇-၁၉။
သင်းခွဲခြင်းကို ရှောင်လော့
၁၃။ ယေရှုသည် ရှေ့ဆက်၍ ပေရဂံမြို့ရှိ ခရစ်ယာန်တို့အား အဘယ်ဆုံးမစကား မြွက်ဆိုသနည်း။ ထိုအသင်းတော်သည် ၎င်းဆုံးမစကားကို အဘယ်ကြောင့် လိုအပ်ခဲ့သနည်း။
၁၃ ပေရဂံမြို့ရှိ ခရစ်ယာန်များအား ယေရှုဤသို့ထပ်၍ ပြစ်တင်ဆုံးမသည်– “ထိုနည်းတူ သင့်အထဲ၌လည်း နိကောလဂိုဏ်း၏ အယူကို ကိုင်စွဲသူများ ရှိ၏။” (ဗျာဒိတ် ၂:၁၅) အထက်က ဧဖက်မြို့သားများသည် ၎င်းဂိုဏ်း၏လုပ်ရပ်များကို မုန်းတီးသောကြောင့် ယေရှု၏ အချီးအမွမ်းကို ခံခဲ့ရပြီ။ သို့သော် ပေရဂံမြို့ရှိ ခရစ်ယာန်များမူ အသင်းတော်ကို သင်းခွဲခြင်းအန္တရာယ်မှ ကာကွယ်စောင့်ရှောက်ခြင်းနှင့်ဆိုင်သော ဩဝါဒကို လိုအပ်နေ၏။ ယောဟန် ၁၇:၂၀-၂၃ ပါ ယေရှုဆုတောင်းသော စည်းလုံးခြင်း မပျောက်ပျက်စေခြင်းငှာ ခရစ်ယာန်စံနှုန်းများကို ယခုထက်ပို၍ မြဲမြဲမြံမြံ ထိန်းသိမ်းရန် လိုအပ်သည်။ “ကျန်းခံ့ရေး ဒေသနာဖြင့် နှိုးဆော်သည်သာမက၊ ငြင်းဆန်သူတို့ကို ဆုံးမ” ရန်လည်းလိုသည်။—တိတု ၁:၉၊ သမ။
၁၄။ (က) ခရစ်ယာန်အသင်းတော်သည် အစောပိုင်းကတည်း မည်သူများနှင့် ရင်ဆိုင်ခဲ့ရသနည်း။ ထိုသူများအကြောင်းကို တမန်တော်ပေါလုက မည်သို့ဖော်ပြသနည်း။ (ခ) သင်းကွဲအုပ်စုနောက်သို့ လိုက်လိုသူ မည်သူမဆို ယေရှု၏ အဘယ်စကားများကို နာခံသင့်သနည်း။
၁၄ စောစောပိုင်းကတည်းက ခရစ်ယာန်အသင်းတော်သည် ဘဝင်မြင့်သော အယူဖောက်ပြန်သူတို့နှင့် ရင်ဆိုင်ရသည်။ ထိုသူတို့သည် လှည့်စားသော ပျားသကာစကားဖြင့် ယေဟောဝါ၏ ဆက်သွယ်ရေးလမ်းကြောင်းမှတစ်ဆင့်လာသော “ဒေသနာနှင့်ဆန့်ကျင်လျက် ကွဲပြားခြင်း၊ တိုက်လဲခြင်းအကြောင်း ဖြစ်ပွားစေ” ကြသည်။ (ရောမ ၁၆:၁၇၊ ၁၈၊ သမ) တမန်တော်ပေါလုရေးသော ဩဝါဒစာ အားလုံးနီးပါးတွင် ယင်းအန္တရာယ်ကိုရှောင်ရန် သတိပေးထားသည်။ * အသင်းတော်စစ်ကို ခရစ်ယာန်စင်ကြယ်ခြင်းနှင့် စည်းလုံးခြင်းအဖြစ်သို့ ယေရှု ပြန်ရောက်စေသော ယခုခေတ်၌ သင်းခွဲခြင်းအန္တရာယ် ကျန်ရှိသေးသည်။ သို့ဖြစ်၍ သင်းကွဲအုပ်စုနောက်သို့လိုက်ကာ ဂိုဏ်းဂဏထောင်လိုသူ မည်သူမဆို ယေရှု၏ အောက်ပါစကားကို နာခံသင့်သည်– “ထို့ကြောင့် နောင်တရလော့။ နောင်တမရလျှင် သင့်ထံသို့ ငါအမြန်လာ၍ ငါ့ခံတွင်းမှ သန်လျက်ရှည်နှင့် ထိုသူတို့ကို စစ်တိုက်မည်။”—ဗျာဒိတ် ၂:၁၆။
၁၅။ သင်းခွဲမှု မည်သို့အစပြုသနည်း။
၁၅ သင်းခွဲခြင်း မည်သို့အစပြုသနည်း။ ဆရာအမည်ခံတစ်ဦးက (နောက်ဆုံးကာလ၌ ကျွန်ုပ်တို့ရောက်နေပြီ အစရှိသော) ကျမ်းစာသမ္မာတရား တစ်စုံတစ်ခုကို ငြင်းခုံလျက် သံသယမျိုးစေ့များ ကြဲလိုက်ရာ အုပ်စုကလေးတစ်စု ကွဲထွက်၍ သူ့နောက်သို့လိုက်ခြင်း ဖြစ်နိုင်သည်။ (၂ တိမောသေ ၃:၁; ၂ ပေတရု ၃:၃၊ ၄) သို့တည်းမဟုတ်၊ တစ်ဦးဦးက ယေဟောဝါ၏လုပ်ငန်းတော် လုပ်ဆောင်ပုံမမှန်ဟု ဝေဖန်သည့်ပြင်၊ နိုင်ငံတော်သတင်းကို တစ်အိမ်မှတစ်အိမ် သွားဟောရမည်ဟူ၍ ကျမ်းစာကမဆို၊ လိုလည်းမလိုအပ်ဟု ရေသာခိုစိတ်ရှိသူတို့၏ အကြိုက်ကိုလိုက်၍ အခိုင်အမာ ပြောကောင်းပြောမည်။ ဤသူတို့သာ ယေရှုနှင့် တမန်တော်များ၏ စံနမူနာအတိုင်း တစ်အိမ်မှတစ်အိမ် အမှုတော်ဆောင်နေကြလျှင် စိတ်နှိမ့်ချလျက် နေပါလိမ့်မည်။ သို့သော်၊ သူတို့သည် ခွဲထွက်ပြီး အေးအေးသက်သာ လုပ်ချင်ကြ၏။ သီးသန့်အုပ်စုအနေနှင့် တစ်ခါတစ်ရံ ကျမ်းစာဖတ်ရုံသာ ဖတ်မည်။ (မဿဲ ၁၀:၇၊ ၁၁-၁၃; တမန်တော် ၅:၄၂; ၂၀:၂၀၊ ၂၁၊ ကဘ) သူတို့သည် ယေရှု၏သေခြင်း သတိရအောက်မေ့ပွဲ၊ သွေးရှောင်ရန်ဟူသော ကျမ်းစာပညတ်၊ ပွဲနေ့များကျင်းပခြင်း၊ ဆေးရွက်ကြီးသုံးခြင်းတို့နှင့် ပတ်သက်၍ ကိုယ့်သဘောနှင့်ကိုယ် လုပ်ကြံတီထွင်ကြသည်။ ထိုမျှမက၊ ယေဟောဝါ၏ နာမတော်ကို ဂုဏ်နိမ့်စေ၏။ မကြာပါ၊ မဟာဗာဗုလုန်၏ ပေါက်လွှတ်ပဲစားလမ်းစဉ်ထဲသို့ တန်းတန်းမတ်မတ် ပြန်ကျရောက်သွားတော့သည်။ ထို့ထက်ဆိုးသည်မှာ၊ စာတန်၏သွေးထိုးမှုကိုခံ၍ တစ်ခါက ညီအစ်ကိုများဖြစ်ခဲ့သူ ‘ကျွန်ချင်းတို့ကို ရိုက်နှက်’ ကြသေးသည်။—မဿဲ ၂၄:၄၉; တမန်တော် ၁၅:၂၉; ဗျာဒိတ် ၁၇:၅။
၁၆။ (က) အယူဖောက်ပြန်သူတို့၏ ဩဇာလွှမ်းမိုးမှုကြောင့် ယိမ်းယိုင်သူတို့သည် အဘယ်ကြောင့် မနှေးအမြန် နောင်တရသင့်သနည်း။ (ခ) နောင်တမရဘဲ နေသူတို့သည် မည်သို့ဖြစ်ကြမည်နည်း။
၁၆ အယူဖောက်ပြန်သူတို့၏ ဩဇာလွှမ်းမိုးမှုကြောင့် ယိမ်းယိုင်သူတို့သည် နောင်တရပါဟူသော ယေရှု၏ဆော်သြသံကို မနှေးအမြန် နာခံသင့်သည်။ အယူဖောက်ပြန်သူတို့၏ ဝါဒဖြန့်မှုကို အဆိပ်သဖွယ် ပယ်ချရမည်။ ၎င်း၏အရင်းခံကား မနာလိုမုန်းတီးမှုဖြစ်၍ အသင်းတော်အား ယေရှုကျွေးသော ဖြောင့်မတ်၊ စင်ကြယ် နှစ်လို့ဖွယ် သမ္မာတရားများနှင့် လားလားကြီး ဆန့်ကျင်၏။ (လုကာ ၁၂:၄၂; ဖိလိပ္ပိ ၁:၁၅၊ ၁၆; ၄:၈၊ ၉) နောင်တမရဘဲနေသူတို့ကို သခင်ယေရှု အမှန်ပင် ‘ခံတွင်းမှသန်လျက်နှင့် စစ်တိုက်’ တော်မူသည်။ ကမ္ဘာပေါ်တွင် တပည့်တော်များနှင့်အတူနေသော နောက်ဆုံးည၌ စည်းလုံးမှုအတွက် ဆုတောင်းခဲ့သည်ဖြစ်ရာ ထိုစည်းလုံးမှုကို ထိန်းသိမ်းရန် မိမိလူမျိုးတော်ကို ဆန်ခါချလျက်နေသည်။ (ယောဟန် ၁၇:၂၀-၂၃၊ ၂၆) အယူဖောက်ပြန်သူတို့သည် ယေရှု၏ လက်ယာလက်တော်ရှိ ကြယ်များပေးသော မေတ္တာပါအကြံပြုချက်နှင့် အကူအညီကို ငြင်းပယ်သောကြောင့် ယေရှုသည် သူတို့ကို တရားစီရင်၍ “ပြင်းစွာရိုက်ဒဏ်ခတ်” ကာ “ပြင်ပမှောင်ထဲသို့ပစ်ချ” တော်မူ၏။ သူတို့သည် နှင်ထုတ်ခံရသဖြင့် ဘုရားသခင့် လူမျိုးတော်အလယ်၌ တဆေးအဖြစ် မလှုပ်ရှားနိုင်တော့ချေ။—မဿဲ ၂၄:၄၈-၅၁၊ သမ; ၂၅:၃၀၊ သမ; ၁ ကောရိန္သု ၅:၆၊ ၉၊ ၁၃; ဗျာဒိတ် ၁:၁၆။
‘ဝှက်ထားသော မန္နနှင့် ကျောက်စရစ်ဖြူ’
၁၇။ ‘အောင်နိုင်’ သူ ဘိသိက်ခံ ခရစ်ယာန်တို့အဖို့ အဘယ်ဆုလာဘ် အရန်သင့်ရှိသနည်း။ ပေရဂံမြို့ရှိ ခရစ်ယာန်များ ဘာကို နိုင်နင်းကျော်လွှားရမည်နည်း။
၁၇ ယေဟောဝါ၏ သန့်ရှင်းသောဝိညာဉ်တော် ညွှန်ကြားချက်ဖြင့် ယေရှုပေးသော ဩဝါဒကို နာခံသောသူတို့အဖို့ ကြီးမြတ်သောဆုလာဘ် အရန်သင့်ရှိ၏။ နားထောင်ပါ– “အသင်းတော်တို့အား ဝိညာဉ်တော် ဆင့်ဆိုသောစကားကို နားရှိသောသူ ကြားပါစေ။ အောင်နိုင်သူအား ဝှက်ထားသော မန္နအချို့ကို ငါပေးမည်။ ကျောက်စရစ်ဖြူကိုလည်း ငါပေးမည်။ ထိုကျောက်စရစ်ဖြူပေါ်တွင် အမည်သစ်ကို ရေးထား၏။ ထိုအမည်သစ်ကို လက်ခံရရှိသော သူမှတစ်ပါး အဘယ်သူမျှ မသိ။” (ဗျာဒိတ် ၂:၁၇) ဤနည်းဖြင့် ပေရဂံမြို့ရှိ ခရစ်ယာန်တို့သည် စမုရနမြို့ရှိ ခရစ်ယာန်များကဲ့သို့ ‘အောင်နိုင်’ ကြရန် တိုက်တွန်းခံရသည်။ စာတန်၏ပလ္လင်တည်ရာ ပေရဂံမြို့မှ ထိုသူတို့သည် အောင်မြင်လိုလျှင် ရုပ်တုကိုးကွယ်မှုကို ရှောင်ရမည်။ သီလပျက်မှု၊ သင်းခွဲမှု၊ ဗာလက်၊ ဗာလမ်တို့နှင့်ဆက်နွှယ်သော အယူဖောက်ပြန်မှုအပြင်၊ နိကောလဂိုဏ်းတို့ကို နိုင်နင်းကျော်လွှားရမည်။ သို့ပြုလျှင် ဤဘိသိက်ခံ ခရစ်ယာန်တို့သည် “ဝှက်ထားသောမန္န” ကိုသုံးဆောင်ရန် ဖိတ်ကြားခံရမည်။ ဘာကိုဆိုလိုသနည်း။
၁၈၊ ၁၉။ (က) ဣသရေလလူမျိုးအား ယေဟောဝါ ပေးတော်မူသော မန္နကား အဘယ်နည်း။ (ခ) အဘယ်မန္နကို ဝှက်ထားသနည်း။ (ဂ) ဝှက်ထားသောမန္နကို စားခြင်းက ဘာကိုပုံဆောင်သနည်း။
၁၈ မောရှေလက်ထက်၌ ဣသရေလလူတို့ တောကန္တာရခရီးစဉ်၌ စားသုံးရန် မန္နကို ယေဟောဝါ ပေးတော်မူသည်။ ထိုမန္နသည် ဝှက်ထားခြင်းမရှိ၊ အကြောင်းမှာ ဥပုသ်နေ့မှလွဲ၍ မနက်တိုင်း အံ့ဖွယ်တန်ခိုးဖြင့်ပေါ်လာ၍ ဖြူဖွေးဖွေးဆီးနှင်းပမာ မြေပြင်ကို ဖုံးအုပ်လျက်နေသည်။ ဣသရေလလူတို့ အသက်ဆက်ရန် ပေးတော်မူရာအစာဖြစ်သည်။ ဤ “မုန့်” အချို့ကို ရွှေအိုးတစ်လုံးဖြင့်ထည့်၍ ပဋိညာဉ်သေတ္တာအတွင်း၌ “[ဣသရေလလူတို့] လူမျိုးအစဉ်အဆက်” အမှတ်တရ သိမ်းဆည်းထားရန် မောရှေအား ယေဟောဝါ မိန့်မှာတော်မူသည်။—ထွက်မြောက်ရာ ၁၆:၁၄၊ ၁၅၊ ၂၃၊ ၂၆၊ ၃၃; ဟေဗြဲ ၉:၃၊ ၄။
၁၉ လျောက်ပတ်လှသော အထိမ်းအမှတ်ပါတကား။ ၎င်းမန္နကို တဲတော်၏ အထူးသန့်ရှင်းရာဌာန၌ ဝှက်ထားသည်။ ထိုနေရာရှိ ပဋိညာဉ်သေတ္တာ၏ အဖုံးပေါ်၌ တည်လျက်နေသော အံ့ဖွယ်အလင်းသည် ယေဟောဝါ၏ ရောက်ရှိတော်မူခြင်းကို ပုံဆောင်သည်။ (ထွက်မြောက်ရာ ၂၆:၃၄) မြင့်မြတ်သည့် ထိုနေရာသို့ ထိုးဖောက်ဝင်ရောက်၍ ဝှက်ထားသော မန္နကိုစားရန် မည်သူ့ကိုမျှ ခွင့်မပြု။ သို့တစေ၊ ယေရှုက အောင်နိုင်သော ဘိသိက်ခံနောက်လိုက်များသည် “ဝှက်ထားသောမန္န” ကိုစားကြမည်ဟု မိန့်ဆို၏။ သူတို့သည် သူတို့ရှေ့က ခရစ်တော်နည်းတူ “မှန်သောသန့်ရှင်းရာဌာနတို့၏ ပုံဖြစ်သော၊ လူတို့လက်ဖြင့်လုပ်သော သန့်ရှင်းရာဌာနထဲသို့ . . . မဝင်ဘဲ၊ . . . ကောင်းကင်ကိုယ်ထဲသို့” ဝင်နိုင်ကြသည်။ (ဟေဗြဲ ၉:၁၂၊ ၂၄) သူတို့ ထမြောက်ကြသောအခါ မပုပ်ပျက် မသေပျောက်သည့်အဖြစ်ကို ယူတင်ကြလေသည်။ ၎င်းမှာ ယေဟောဝါ ပေးသနားသော အံ့ဖွယ်ရာဖြစ်၍ ၎င်းကို မပျက်စီးနိုင်သည့် “ဝှက်ထားသောမန္န” မုန့် သူတို့ရရှိခြင်းက ပုံဆောင်သည်။ အောင်နိုင်သူ ထိုလူစုကလေးသည် အခွင့်ထူး ရကြပါသည်တကား။—၁ ကောရိန္သု ၁၅:၅၃-၅၇။
၂၀၊ ၂၁။ (က) ဘိသိက်ခံ ခရစ်ယာန်များအား ကျောက်စရစ်ဖြူပေးခြင်းက ဘာကိုပုံဆောင်သနည်း။ (ခ) ကျောက်စရစ်ဖြူပေါင်း ၁၄၄,၀၀၀ သာရှိသဖြင့် လူအုပ်ကြီးသည် အဘယ်မျှော်လင့်ချက် ရှိသနည်း။
၂၀ သူတို့သည် “ကျောက်စရစ်ဖြူ” ကိုလည်း ရကြသည်။ ရောမတရားရုံးများ၌ စီရင်ချက်ချစဉ် ကျောက်စရစ်များကို သုံးကြသည်။ * ကျောက်စရစ်ဖြူသည် တရားသေ လွှတ်ခြင်းကိုဆိုလို၍ ကျောက်စရစ်မည်းသည် အများအားဖြင့် သေဒဏ်ဖြစ်သော ပြစ်ဒဏ်စီရင်ချက်ကို ဆိုလိုသည်။ ယေရှုက ပေရဂံမြို့ရှိ ခရစ်ယာန်များအား “ကျောက်စရစ်ဖြူ” ပေးခြင်းသည် သူတို့ကို အပြစ်မဲ့သူ၊ စင်ကြယ်သန့်ရှင်းသူအဖြစ် စီရင်ဆုံးဖြတ်ကြောင်း ဖော်ပြခြင်းဖြစ်မည်။ သို့သော် ယေရှု၏မိန့်ဆိုချက်သည် ထို့ထက်မက အဓိပ္ပာယ်ရှိနိုင်သည်။ ရောမခေတ်တွင် ကျောက်စရစ်များကို အရေးပါသည့် အခမ်းအနားများ တက်ရောက်သောလက်မှတ်အဖြစ် အသုံးပြုကြသည်။ ထို့ကြောင့် ကျောက်စရစ်ဖြူသည် အောင်နိုင်သူ ဘိသိက်ခံ ခရစ်ယာန်များအဖို့ အလွန်ထူးမြတ်သည့် အရာတည်းဟူသော—သိုးသငယ်၏ မင်္ဂလာပွဲကျင်းပရာ ကျက်သရေရှိသော ကောင်းကင်အရပ်သို့ ဝင်ခွင့်ရခြင်းကို ရည်ညွှန်းခြင်းဖြစ်နိုင်သည်။ ကျောက်စရစ်ပေါင်း ၁၄၄,၀၀၀ ကိုသာ ပေးတော်မူသည်။—ဗျာဒိတ် ၁၄:၁; ၁၉:၇-၉။
၂၁ သင်သည် အပေါင်းပါဝတ်ပြုသူ လူအုပ်ကြီးအဝင်ဖြစ်လျှင် ဤအချက်က သင့်ကို ထည့်သွင်းစဉ်းစားခြင်းမပြုဟု ဆိုလိုသလော။ လုံးဝမဆိုလို။ သင်သည် ကောင်းကင်သို့ဝင်ခွင့် ကျောက်စရစ်ဖြူကို မရသော်လည်း ကြံ့ကြံ့ခံလျှင် ကြီးစွာသောဒုက္ခမှ လွတ်မြောက်၍ ကမ္ဘာပေါ် ပရဒိသု ပြန်လည်တည်ထောင်ခြင်းတည်းဟူသော ရွှင်လန်းဖွယ်လုပ်ငန်း၌ ပါဝင်လုပ်ကိုင်ခွင့် ရနိုင်မည်။ ထမြောက်လာသော ခရစ်ယာန်အကြိုခေတ်က သစ္စာရှိသူများနှင့် မကြာမီက သေဆုံးခဲ့သော အခြားသိုးစုဝင်ပုဂ္ဂိုလ်များလည်း သင်နှင့်အတူ ပါဝင်လုပ်ကိုင်ကြပါလိမ့်မည်။ နောက်ဆုံး၌ ရွေးနုတ်ခံ အခြားသေလွန်သူများ အားလုံးသည် ပရဒိသုမြေကြီးပေါ် ထမြောက်လာခွင့်ဖြင့် ချီးမြှင့်ခြင်း ခံရကြမည်။—ဆာလံ ၄၅:၁၆; ယောဟန် ၁၀:၁၆; ဗျာဒိတ် ၇:၉၊ ၁၄။
၂၂၊ ၂၃။ ဘိသိက်ခံ ခရစ်ယာန်များအား ပေးတော်မူသော ကျောက်စရစ်ပေါ်မှ အမည်သည် အဘယ်အဓိပ္ပာယ်ရှိသနည်း။ ၎င်းမှ အဘယ်အားပေးမှုကို ရယူသင့်သနည်း။
၂၂ ကျောက်ဖြူပေါ်ရေးသားသော အမည်သစ်ကား အဘယ်နည်း။ လူတစ်ဦး မည်သူမည်ဝါဖြစ်ကြောင်း သိစေရန်၊ အခြားတစ်ယောက်နှင့် ခွဲခြားနိုင်ရန် အမည်ကို အသုံးပြုပါသည်။ ထိုဘိသိက်ခံ ခရစ်ယာန်တို့သည် အောင်နိုင်သူများအဖြစ် မြေကြီးအသက်တာ ပြီးဆုံးခဲ့သည့်နောက်၌ ကျောက်စရစ်ကိုရကြ၏။ ထို့ကြောင့် ကျောက်စရစ်ပေါ်ရေးသားသော အမည်သည် ကောင်းကင်၌ ယေရှုနှင့် ပေါင်းစည်းရခြင်းနှင့်ဆိုင်ကြောင်း ရှင်းနေပေသည်။ ကောင်းကင်နိုင်ငံ အမွေခံသူတို့သာ အပြည့်အဝ နားလည်၍ မွေ့လျော်ခံစားရသော တော်ဝင်လုပ်ငန်းဆိုင်ရာ အထူးရင်းနှီးမှုရှိသော ရာထူးဌာနန္တရတည်း။ ထို့ကြောင့် ၎င်းသည် “ရရှိသူမှတစ်ပါး အဘယ်သူမျှ မသိ” သောအမည်၊ ရာထူးခန့်အပ်ချက် ဖြစ်သည်။—ဗျာဒိတ် ၃:၁၂ နှိုင်းယှဉ်။
၂၃ ၎င်းသည် “အသင်းတော်တို့အား ဝိညာဉ်တော် ဆင့်ဆိုသောစကားကို” နားထောင်၍ လက်တွေ့ကျင့်သုံးရန် ယောဟန်အတန်းအစားအတွက် လှုံ့ဆော်ပေးချက်ပါတကား။ သူတို့၏အပေါင်းပါ လူအုပ်ကြီးအဖို့လည်း ဤကမ္ဘာပေါ်၌ သူတို့နှင့်ပူးပေါင်း၍ ယေဟောဝါ၏နိုင်ငံတော်ကို ထင်ရှားစေနိုင်သည့် ကာလအတွင်း သစ္စာရှိစွာ လုပ်ဆောင်ကြရန် အားပေးမှုတစ်ရပ်ပါတကား။
[အောက်ခြေမှတ်ချက်]
^ အပိုဒ်၊ 14 ၁ ကောရိန္သု ၃:၃၊ ၄၊ ၁၈၊ ၁၉; ၂ ကောရိန္သု ၁၁:၁၃; ဂလာတိ ၄:၉; ဧဖက် ၄:၁၄၊ ၁၅; ဖိလိပ္ပိ ၃:၁၈၊ ၁၉; ကောလောသဲ ၂:၈; ၁ သက်သာလောနိတ် ၃:၅; ၂ သက်သာလောနိတ် ၂:၁-၃; ၁ တိမောသေ ၆:၃-၅; ၂ တိမောသေ ၂:၁၇; ၄:၃၊ ၄; တိတု ၁:၁၃၊ ၁၄; ၃:၁၀; ဟေဗြဲ ၁၀:၂၆၊ ၂၇ တို့ကိုလည်းရှု။
^ အပိုဒ်၊ 20 ကမ္ဘာသစ်ဘာသာပြန် ရည်ညွှန်းကျမ်းစာမှ တမန်တော် ၂၆:၁၀ နှင့် အောက်ခြေမှတ်ချက်ရှု။
[လေ့လာရန်မေးခွန်းများ]
[စာမျက်နှာ ၄၃ ပါ ရုပ်ပုံ]
ဘာလင်မြို့ရှိ ဘာဂမန်ပြတိုက်တွင် တိတ္ထိဝတ်ပြုရေးဆိုင်ရာ ဤပန်းချီပန်းပုရုပ်များ တွေ့ရှိရ
[စာမျက်နှာ ၄၅ ပါ ရုပ်ပုံ]
ပဋိညာဉ်သေတ္တာတော်တွင် မန္နမုန့်အနည်းငယ်ကို ဝှက်ထားသည်။ ပုံဆောင်မန္နမုန့် စားရခြင်းဟူသည် အောင်နိုင်သော ဘိသိက်ခံများအဖို့ မသေနိုင်သည့်အဖြစ် ရရှိခြင်းကိုဆိုလို
[စာမျက်နှာ ၄၅ ပါ ရုပ်ပုံ]
သိုးသငယ်၏ မင်္ဂလာပွဲသို့ တက်ခွင့်ရသူများအား ကျောက်စရစ်ဖြူပေး
