ယေဟောဝါ၏ အမှုတော်များ—ကြီးမြတ်၍ အံ့ဖွယ်ကောင်း၏
အခန်း ၃၁
ယေဟောဝါ၏ အမှုတော်များ—ကြီးမြတ်၍ အံ့ဖွယ်ကောင်း၏
ရူပါရုံ ၁၀ ဗျာဒိတ် ၁၅:၁–၁၆:၂၁
အကြောင်းအရာ– ယေဟောဝါသည် ကျိန်းဝပ်ရာဌာနတော်တွင် စံမြန်းတော်မူခြင်း။ အမျက်တော်ဖလား ခုနစ်လုံးကို မြေကြီးပေါ်သို့ သွန်းလောင်းခြင်း
ပြည့်စုံချိန်– ၁၉၁၉ ခုနှစ်မှ အာမဂေဒုန်အထိ
၁၊ ၂။ (က) အဘယ်တတိယ နိမိတ်လက္ခဏာကို ယောဟန်တင်ပြသနည်း။ (ခ) ကောင်းကင်တမန်များပါဝင်သော အဘယ်အခန်းကဏ္ဍအကြောင်းကို ယေဟောဝါ၏အမှုတော်ထမ်းများ ရှေးကတည်းက သိရှိခဲ့ကြသနည်း။
မိန်းမတစ်ဦး သားယောက်ျားလေး ဖွားမြင်ခြင်း။ ထိုကလေးကို နဂါးကြီးတစ်ကောင် ဝါးမျိုရန် ကြံစည်ခြင်း။ ဗျာဒိတ်ကျမ်း အခန်းကြီး ၁၂ တွင် ပြတ်သားပီပြင်စွာ သရုပ်ဖော်ထားသော ကောင်းကင်ဆိုင်ရာ ထိုနိမိတ်လက္ခဏာနှစ်ရပ်က ဘုရားသခင့်မိန်းမ၏ အမျိုးအနွယ်နှင့် စာတန်နှင့်သူ၏နတ်ဆိုး အမျိုးအနွယ်စပ်ကြားရှိ ကာလကြာညောင်းလှသည့် အငြင်းအခုံသည် အထွတ်အထိပ်သို့ ရောက်လာပြီဖြစ်ကြောင်း ကျွန်ုပ်တို့အား သတိပြုမိစေသည်။ ၎င်းအထိမ်းအမှတ်များကို ပေါ်လွင်အောင်တင်ပြရာ၌ ယောဟန်ဤသို့ဆို၏– “ထို့နောက် ကောင်းကင်၌ နိမိတ်လက္ခဏာကြီးတစ်ရပ်ကို မြင်ရ၏။ . . . ထို့နောက် . . . အခြားနိမိတ်လက္ခဏာတစ်ရပ်ကို မြင်ရ၏။” (ဗျာဒိတ် ၁၂:၁၊ ၃၊ ၇-၁၂) ယခု ယောဟန်သည် တတိယနိမိတ်လက္ခဏာကို ဖော်ပြပြီ– “ထို့နောက်၊ ကောင်းကင်၌ ကြီးမြတ်၍ အံ့ဖွယ်ကောင်းသည့် အခြားနိမိတ်လက္ခဏာတစ်ရပ်ကို ငါမြင်ရ၏။ ကပ်ဘေးခုနစ်ပါးကို ဆောင်သည့် ကောင်းကင်တမန် ခုနစ်ပါးဖြစ်၏။ ၎င်းတို့သည် နောက်ဆုံးကပ်ဘေးများ ဖြစ်ကြ၏။ အကြောင်းမှာ၊ ထိုကပ်ဘေးတို့အားဖြင့် ဘုရားသခင်၏ အမျက်တော်သည် ပြီးငြိမ်းခြင်းသို့ ရောက်၏။” (ဗျာဒိတ် ၁၅:၁) ဤတတိယနိမိတ်လက္ခဏာလည်း ယေဟောဝါ၏ အမှုတော်ထမ်းများအတွက် အရေးပါလှသော အဓိပ္ပာယ်ကိုဆောင်၏။
၂ ဘုရားသခင်၏အလိုတော်ကို အပြီးဆောင်ရွက်ရာ၌ ကောင်းကင်တမန်များသည် အရေးပါသောကဏ္ဍမှ တစ်ဖန်ပါဝင်သည်ကို သတိပြုပါ။ ဤအချက်ကို ယေဟောဝါ၏ အမှုတော်ထမ်းများ သိရှိသည်မှာ ကြာမြင့်လှပြီ။ ရှေးဆာလံဆရာက မှုတ်သွင်းတော်မူခြင်းခံရ၍ ကောင်းကင်တမန်များအား ဤသို့တိုက်တွန်းခဲ့သည်– “တန်ခိုးစွမ်းရည်ကြီးမား၍ ကိုယ်တော်၏ အမိန့်တော်များကို လိုက်နာလျက် ကိုယ်တော်၏စကားကို နားထောင်သော ကောင်းကင်တမန်တို့၊ ထာဝရဘုရားအား ထောမနာပြုကြလော့။” (ဆာလံ ၁၀၃:၂၀၊ ခမ) ယခုမြင်ကွင်းသစ်၌ ကောင်းကင်တမန်များသည် နောက်ဆုံးကပ်ဘေးခုနစ်ပါးကို သွန်းလောင်းရန် တာဝန်အပ်နှင်းခံရကြ၏။
၃။ ကပ်ဘေးခုနစ်ပါးကား အဘယ်အရာများဖြစ်ပြီး ၎င်းတို့ကိုသွန်းလောင်းခြင်းက ဘာအဓိပ္ပာယ် သက်ရောက်သနည်း။
၃ အဘယ်ကပ်ဘေးများဖြစ်သနည်း။ ၎င်းတို့ကား၊ တံပိုးခရာခုနစ်ချက် မှုတ်ခြင်းနည်းတူ၊ ပြင်းထန်သော တရားစီရင်ချက်များဖြစ်၍ ဤလောက၏ အမျိုးမျိုးသော ကြန်အင်များနှင့်ပတ်သက်သည့် ယေဟောဝါ၏အမြင်ကို ကြေညာပြီး ကိုယ်တော်၏ တရားစီရင်ဆုံးဖြတ်ချက်၏ နောက်ဆုံးရလဒ်နှင့်ပတ်သက်၍ သတိပေး၏။ (ဗျာဒိတ် ၈:၁–၉:၂၁) ၎င်းကပ်များကို သွန်းလောင်းခြင်းကား၊ ယေဟောဝါ၏ တောက်လောင်သော အမျက်တော်နေ့၌ အမျက်တော်စူးရှခံရသောအရာများ ဖျက်ဆီးခံရသည့်အချိန်တွင် အဆိုပါတရားစီရင်ချက်များအတိုင်း ဖော်ဆောင်တော်မူခြင်းကို ပြညွှန်သည်။ (ဟေရှာယ ၁၃:၉-၁၃; ဗျာဒိတ် ၆:၁၆၊ ၁၇) ထို့ကြောင့် ထိုကပ်များအားဖြင့် “ဘုရားသခင်၏ အမျက်တော်သည် ပြီးငြိမ်းခြင်းသို့ရောက်၏။” သို့ရာတွင် ယောဟန်က ကပ်ဘေးများသွန်းလောင်းခြင်းအကြောင်းကို မဖော်ပြမီ ၎င်းတို့၏ထိခိုက်မှုကို ခံရမည်မဟုတ်သော လူသားအချို့အကြောင်းကို ကျွန်ုပ်တို့အား ပြောကြား၏။ ဤသစ္စာရှင်တို့သည် သားရဲ၏အမှတ်တံဆိပ်ကို ငြင်းပယ်ခဲ့ပြီဖြစ်၍ ယေဟောဝါ၏ လက်စားချေရာနေ့တော်ကို ကြွေးကြော်ရင်း ကိုယ်တော်အား သီဆိုချီးမွမ်းကြ၏။—ဗျာဒိတ် ၁၃:၁၅-၁၇။
မောရှေနှင့် သိုးသငယ်တို့၏ သီချင်း
၄။ ယခု အဘယ်အရာသည် ယောဟန်၏မြင်ကွင်းထဲသို့ ဝင်ရောက်လာသနည်း။
၄ ထူးခြားလှသော မြင်ကွင်းစုံတစ်ခုကို ယောဟန် ယခုမြင်ရ၏– “မီးနှင့်ရောနှောသော ဖန်ရေကန်နှင့်တူသည့် အရာကိုလည်းကောင်း၊ သားရဲနှင့် ၎င်း၏ရုပ်တု၊ ၎င်းအမည်၏ ကိန်းဂဏန်းတို့မှ လွတ်မြောက်အောင်မြင်သူများကိုလည်းကောင်း ငါမြင်ရ၏။ သူတို့သည် ဘုရားသခင်၏ စောင်းတော်များကိုကိုင်လျက် ဖန်ရေကန်အနီး၌ ရပ်နေကြ၏။”—ဗျာဒိတ် ၁၅:၂။
၅။ “မီးနှင့်ရောနှောသော ဖန်ရေကန်” သည် ဘာကိုပုံဆောင်သနည်း။
၅ ထို “ဖန်ရေကန်” မှာ စောစောပိုင်း၌ ယောဟန်မြင်ခဲ့သော ဘုရားသခင့်ပလ္လင်တော်ရှေ့မှ ဖန်ရေကန်ပင်တည်း။ (ဗျာဒိတ် ၄:၆) ယဇ်ပုရောဟိတ်များ မိမိတို့ကိုယ်ကိုဆေးကြောရန် ရေကိုရယူသော ရှောလမုန်၏ဗိမာန်တော်မှ “ကြေးဝါရေကန်” နှင့် ဆင်တူ၏။ (၃ ဓမ္မရာဇဝင် ၇:၂၃) သို့ဖြစ်၍ ၎င်းသည် ဘိသိက်ခံခရစ်ယာန်များ၏ ယဇ်ပုရောဟိတ်ဆိုင်ရာအသင်းတော်ကို ဆေးကြောသန့်စင်ရန် ယေရှုအသုံးပြုတော်မူသော ဘုရားသခင့်နှုတ်ကပါဌ်တော် “ရေ” ကို လျောက်ပတ်စွာ တင်စားသည်။ (ဧဖက် ၅:၂၅၊ ၂၆; ဟေဗြဲ ၁၀:၂၂) ၎င်းဖန်ရေကန်သည် “မီးနှင့်ရောနှော” ထားသည်ဖြစ်၍ ထိုဘိသိက်ခံများသည် မိမိတို့အဖို့ ပြဋ္ဌာန်းတော်မူသော မြင့်မားသည့်စံနှုန်းများကို လိုက်နာကြသည်နှင့်အမျှ စမ်းသပ်၍ သန့်စင်ခံရကြကြောင်းကိုပြ၏။ ထို့ပြင်၊ ဘုရားသခင့်နှုတ်ကပါဌ်တော်တွင် ကိုယ်တော်၏ရန်သူများကို ရည်စူး၍ထုတ်ပြန်သော မီးနှင့်တူသည့် တရားစီရင်ချက်များလည်းပါရှိကြောင်း သတိရစေသည်။ (တရားဟောရာ ၉:၃; ဇေဖနိ ၃:၈) သွန်းလောင်းလုဆဲ နောက်ဆုံးကပ်ဘေးခုနစ်ပါး၌ ထိုတရားစီရင်ချက်အချို့ ထင်ရှားလိမ့်မည်။
၆။ (က) ကောင်းကင်ဆိုင်ရာ ဖန်ရေကန်ရှေ့ ရပ်နေသောသီချင်းသည်များမှာ မည်သူများဖြစ်ကြသနည်း၊ ကျွန်ုပ်တို့ မည်သို့သိရသနည်း။ (ခ) သူတို့သည် အဘယ်နည်းဖြင့် “လွတ်မြောက်အောင်မြင်” ခဲ့ကြသနည်း။
၆ ရှောလမုန်၏ ဗိမာန်တော်မှရေကန်ကို ယဇ်ပုရောဟိတ်များအသုံးပြုရန် သွန်းလုပ်ထားသည် ဟူသောအချက်က ကောင်းကင်ဆိုင်ရာ ဖန်ရေကန်ရှေ့ရပ်နေသော သီချင်းသည်များမှာ ယဇ်ပုရောဟိတ် အတန်းအစားတစ်ခုဖြစ်ကြောင်းကိုပြ၏။ သူတို့လက်ထဲ၌ “ဘုရားသခင်၏ စောင်းတော်များ” ရှိသောကြောင့် အကြီးအကဲ ၂၄ ပါးနှင့် ၁၄၄,၀၀၀ တို့ကို သတိရစေ၏။ အကြောင်းမှာ ထိုအုပ်စုနှစ်စုလည်း စောင်းတီး၍ သီဆိုကြသည်။ (ဗျာဒိတ် ၅:၈; ၁၄:၂) ယောဟန်မြင်ရသော သီချင်းသည်တို့သည် “သားရဲနှင့် ၎င်း၏ရုပ်တု၊ ၎င်းအမည်၏ကိန်းဂဏန်းတို့မှ လွတ်မြောက်အောင်မြင်” ကြ၏။ ထို့ကြောင့် သူတို့သည် နောက်ဆုံးကာလအတွင်း မြေကြီးပေါ်နေထိုင်ကြသော ၁၄၄,၀၀၀ ထဲမှပုဂ္ဂိုလ်များ ဖြစ်ရပေမည်။ သူတို့သည် အုပ်စုတစ်စုအနေနှင့် တကယ်ပင် အောင်မြင်စွာ ထွက်မြောက်လာကြပေသည်။ ၁၉၁၉ ခုနှစ်မှစ၍ အနှစ် ၉၀ နီးပါး သားရဲ၏ အမှတ်တံဆိပ်ကိုမခံ၊ ၎င်း၏ရုပ်တုကို လူသားတို့၏တစ်ခုတည်းသော ငြိမ်းချမ်းရေးမျှော်လင့်ချက်အဖြစ် အားမထားဘဲ ငြင်းဆိုလာခဲ့ကြသည်။ သူတို့ထဲမှ အတော်များများသည် သေသည့်တိုင်အောင် ကြံ့ကြံ့ခံခဲ့ကြပြီဖြစ်၍ ယခု ကောင်းကင်ဘုံမှနေပြီး မြေကြီးပေါ်တွင်ရှိဆဲဖြစ်သော မိမိတို့၏ညီအစ်ကိုများ သီဆိုကြသည်ကို အထူးဝမ်းမြောက်သောစိတ်ဖြင့် နားထောင်ကြမည်ဧကန်။—ဗျာဒိတ် ၁၄:၁၁-၁၃။
၇။ ရှေးဣသရေလခေတ်တွင် စောင်းကိုမည်သို့အသုံးပြုကြပြီး ယောဟန်၏ရူပါရုံ၌ ဘုရားသခင်၏ စောင်းတော်များကိုတွေ့ရခြင်းက ကျွန်ုပ်တို့အား မည်သို့ဖြစ်စေသင့်သနည်း။
၇ ဤသစ္စာရှိ အောင်နိုင်သူတို့လက်ထဲ၌ ဘုရားသခင်၏ စောင်းတော်များရှိ၏။ ဤတွင် သူတို့သည် စောင်းတီးလျက်သီဆိုကာ ယေဟောဝါအား ဝတ်ပြုကြသော ရှေးဗိမာန်တော် လေဝိသားများနှင့် တူပေသည်။ အချို့လေဝိသားများဆိုလျှင် စောင်းတီး၍လည်း ပရောဖက်ပြုကြ၏။ (၁ ရာဇဝင်ချုပ် ၁၅:၁၆; ၂၅:၁-၃) ချိုအေးသောစောင်းဂီတသံက ဣသရေလလူတို့၏ ဝမ်းမြောက်ခြင်းသီချင်း၊ ယေဟောဝါအား လျှောက်ဆိုသောပတ္ထနာနှင့် ကျေးဇူးတော်ချီးမွမ်းခြင်းသီချင်းများကို ပို၍ငြိမ့်ညောင်းစေ၏။ (၁ ရာဇဝင်ချုပ် ၁၃:၈; ဆာလံ ၃၃:၂; ၄၃:၄; ၅၇:၇၊ ၈) ဝမ်းနည်းနေကြစဉ်၊ သို့မဟုတ် သုံ့ပန်းဖြစ်နေကြစဉ် စောင်းသံကိုမကြားရချေ။ (ဆာလံ ၁၃၇:၂) ဤရူပါရုံ၌ ဘုရားသခင်၏ စောင်းတော်များကို တွေ့ရသောကြောင့် ကျွန်ုပ်တို့၏ဘုရားသခင်အား ရွှင်လန်းမြူးထူး၍ အောင်သံပါသော ကျေးဇူးတော်ချီးမွမ်းခြင်းသီချင်းတစ်ပုဒ် ကြားလိုသောဆန္ဒ တဖွားဖွားပေါ်ပေါက်စေသင့်သည်။ *
၈။ အဘယ်သီချင်းကိုသီဆို၍ အဘယ်စာသားများ ပါရှိသနည်း။
၈ ဤအချက်ကိုပင် ယောဟန်တင်ပြ၏– “သူတို့သည် ဘုရားသခင်၏ကျွန် မောရှေ၏သီချင်းနှင့် သိုးသငယ်၏ သီချင်းကိုသီဆိုလျက် ဤသို့ဆို၏– ‘အနန္တတန်ခိုးရှင် ယေဟောဝါ ဘုရားသခင်၊ ကိုယ်တော်၏ အမှုတော်တို့သည် ကြီးမြတ်၍ အံ့သြဖွယ်ကောင်းလှပါ၏။ အို ထာဝရဘုရင်၊ ကိုယ်တော်၏ နည်းလမ်းတော်တို့သည် ဖြောင့်မတ်၍ ဟုတ်မှန်ပါ၏။ အို ယေဟောဝါ၊ ကိုယ်တော်တစ်ပါးတည်းသာလျှင် သစ္စာစောင့်သိတော်မူသောကြောင့် အဘယ်သူသည် ကိုယ်တော်အား တကယ်မကြောက်ရွံ့ဘဲ၊ နာမတော်ကို ဂုဏ်မတင်ဘဲ နေနိုင်ပါမည်နည်း။ အကြောင်းမှာ၊ ကိုယ်တော်၏ ဖြောင့်မတ်သော အမိန့်တော်များသည် ထင်ရှားပြီဖြစ်၍ လူမျိုးအပေါင်းတို့သည် ရှေ့တော်သို့လာ၍ ကိုးကွယ်ကြပါလိမ့်မည်။’ ”—ဗျာဒိတ် ၁၅:၃၊ ၄။
၉။ ၎င်းသီချင်းကို တစ်စိတ်တစ်ဒေသအားဖြင့် “မောရှေ၏သီချင်း” ဟု အဘယ်ကြောင့်ခေါ်သနည်း။
၉ ဤအောင်ပွဲခံသူတို့သည် “မောရှေ၏သီချင်း” ကိုသီဆိုကြ၏။ အလားတူအခြေအနေအောက်၌ မောရှေသီဆိုခဲ့သော သီချင်းနှင့်တူသောသီချင်းကို ဆိုလိုသည်။ မောရှေသည် အီဂျစ်ပြည်အပေါ်ကျရောက်သော ကပ်ဘေးဆယ်ပါးနှင့် ပင်လယ်နီတွင် အီဂျစ်တပ်များ ဖျက်ဆီးခံရသည်ကို ဣသရေလလူတို့ မျက်ဝါးထင်ထင် တွေ့မြင်သည့်နောက်၌ သူတို့ကိုဦးစီးပြီး ယေဟောဝါအား အောင်ပွဲခံ ထောမနာသီချင်းသီဆိုလျက် “ယေဟောဝါသည် ဘုရင်အဖြစ် အနန္တကာလတိုင်အောင် ထာဝစဉ် စိုးစံတော်မူလိမ့်မည်တည်း” ဟု ကြွေးကြော်ကြသည်။ (ထွက်မြောက်ရာ ၁၅:၁-၁၉၊ ကဘ) သားရဲလက်မှ လွတ်မြောက်အောင်မြင်ပြီး နောက်ဆုံးသော ကပ်ဘေးခုနစ်ပါး ကြွေးကြော်ခြင်း၌ ပါဝင်ကြသော ယောဟန်၏ရူပါရုံထဲက သီချင်းသည်တို့သည် ‘ထာဝရဘုရင်’ အား သီကျူးခြင်းကိုလည်းပြုကြသည်မှာ လျောက်ပတ်လှသည်တကား။—၁ တိမောသေ ၁:၁၇။
၁၀။ အခြားအဘယ်သီချင်းကို မောရှေရေးစပ်ခဲ့ပြီး ၎င်းသီချင်း၏နောက်ဆုံးစာကြောင်းက ယနေ့လူအုပ်ကြီးနှင့် မည်သို့သက်ဆိုင်သနည်း။
၁၀ ဣသရေလလူမျိုး ခါနာန်ပြည်ကိုသိမ်းပိုက်ရန် အသင့်ပြင်နေစဉ် ရေးစပ်သော အခြားသီချင်းတစ်ပုဒ်၌ သက်ကြီးမောရှေက ဤသို့ဆို၏– “ငါသည် ထာဝရဘုရား [ယေဟောဝါ] ၏နာမတော်ကို ဖော်ပြမည်၊ ငါတို့ဘုရားသခင် ကြီးမြတ်တော်မူကြောင်းကို ဝန်ခံကြလော့။” ထိုသီချင်း၏ နောက်ဆုံးစာကြောင်းက ဣသရေလလူမျိုး မဟုတ်သူများကိုလည်း အားပေးထားသည်။ မှုတ်သွင်းခံ မောရှေ၏စကားသည် ယနေ့လူအုပ်ကြီးသို့တိုင် သက်ရောက်၏– “လူမျိုးခြားတို့၊ သင်တို့သည် ဘုရားသခင်၏ လူမျိုးနှင့်အတူ ရွှင်လန်းစွာ ကြွေးကြော်ကြလော့။” အဘယ်ကြောင့် ရွှင်လန်းရကြမည်နည်း။ ယေဟောဝါသည် “ကိုယ်တော်၏ကျွန်တို့ အသွေးအတွက် လက်စားချေ၍ ရန်ဘက်ပြုသူတို့အား လက်စားချေခြင်းကို ပြုတော်မူမည်” ဖြစ်၍တည်း။ ဤသို့ဖြောင့်မတ်စွာ တရားစီရင်တော်မူခြင်းကြောင့် ယေဟောဝါကို မျှော်ကိုးသူများသည် အားရဝမ်းမြောက်၍ အောင်ပွဲခံကြလိမ့်မည်။—တရားဟောရာ ၃၂:၃၊ ၄၃၊ သမ္မာ; ရောမ ၁၅:၁၀-၁၃; ဗျာဒိတ် ၇:၉။
၁၁။ ယောဟန်ကြားရသောသီချင်းအတိုင်း မည်သို့ဆက်လက်၍ ဖြစ်ပျက်နေသနည်း။
၁၁ မောရှေသာ ယခု သခင့်နေ့တော်အတွင်း၌ရှိပြီး ကောင်းကင်ဘုံမှ သံပြိုင်တေးနှင့်အတူ “လူမျိုးအပေါင်းတို့သည် ရှေ့တော်သို့လာ၍ ကိုးကွယ်ကြပါလိမ့်မည်” ဟုသီဆိုနိုင်လျှင် မည်မျှဝမ်းသာလိုက်မည်ဖြစ်ခြင်း။ ရူပါရုံ၌သာမက “လူမျိုးအပေါင်း” မှ သန်းပေါင်းများစွာသောသူတို့သည် ယေဟောဝါ၏မြေကြီးဆိုင်ရာ အဖွဲ့အစည်းတော်ထဲသို့ အမှန်တကယ်ပင် အစုလိုက်အပြုံလိုက် ယခုဝင်ရောက်လာသည်ကို ကျွန်ုပ်တို့မြင်ရသည်ဖြစ်၍ အထက်ပါ ထူးကဲလှသောသီချင်းအတိုင်း အံ့ချီးဖွယ်ကောင်းစွာ ပြည့်စုံနေသည်။
၁၂။ အောင်မြင်သူများသီဆိုသော ထိုသီချင်းကို “သိုးသငယ်၏သီချင်း” ဟူ၍လည်း အဘယ်ကြောင့်ခေါ်သနည်း။
၁၂ သို့တစေ၊ ဤသီချင်းမှာ မောရှေ၏သီချင်းဖြစ်ရုံမက “သိုးသငယ်၏” သီချင်းလည်းဖြစ်၏။ အဘယ်သို့ ဖြစ်သနည်း။ မောရှေသည် ဣသရေလလူမျိုးအဖို့ ယေဟောဝါ ခန့်အပ်တော်မူသော ပရောဖက်ဖြစ်၏။ သို့သော် မောရှေကိုယ်တိုင် မိမိနှင့်တူသော ပရောဖက်တစ်ပါးကို ယေဟောဝါ ပေါ်ထွန်းစေမည်ဖြစ်ကြောင်း ပရောဖက်ပြုခဲ့သည်။ ထိုပရောဖက်ကား သိုးသငယ် ယေရှုခရစ်ပင်တည်း။ မောရှေသည် ‘ဘုရားသခင်၏ကျွန်’ ဖြစ်သော်လည်း ယေရှုမူ ဘုရားသခင့်သားတော်ဖြစ်၏။ သာ၍ကြီးမြတ်သောမောရှေ ဖြစ်တော်မူ၏။ (တရားဟောရာ ၁၈:၁၅-၁၉; တမန်တော် ၃:၂၂၊ ၂၃; ဟေဗြဲ ၃:၅၊ ၆) သို့ဖြစ်၍ သီချင်းသည်တို့သည် “သိုးသငယ်၏သီချင်း” ကိုလည်း သီဆိုကြခြင်းဖြစ်သည်။
၁၃။ (က) ယေရှုသည် မောရှေထက် သာ၍ကြီးမြတ်သော်လည်း အဘယ်ကြောင့် သူနှင့်တူသနည်း။ (ခ) ကျွန်ုပ်တို့သည် သီချင်းသည်များနှင့် မည်သို့စည်းလုံးနိုင်သနည်း။
၁၃ ယေရှုသည် မောရှေနည်းတူ လူပရိသတ်ရှေ့၌ ဘုရားသခင်၏ ဂုဏ်တော်ကိုချီးမွမ်း၍ ရန်သူအပေါင်းတို့အပေါ် ဘုရားသခင် အောင်ပွဲခံတော်မူမည်ဖြစ်ကြောင်း ပရောဖက်ပြုတော်မူသည်။ (မဿဲ ၂၄:၂၁၊ ၂၂; ၂၆:၃၀; လုကာ ၁၉:၄၁-၄၄) ယေရှုလည်း လူမျိုးအပေါင်း ယေဟောဝါထံတော်သို့ချဉ်းကပ်၍ ဂုဏ်တော်ချီးမွမ်းမည့်ကာလကို စောင့်မျှော်သည့်အပြင် ထိုအမှုဖြစ်မြောက်စေရန် ကိုယ်ကျိုးစွန့်အနစ်နာခံသော “ဘုရားသခင်၏သိုးသငယ်” အနေနှင့် မိမိ၏လူ့အသက်ကို စွန့်တော်မူ၏။ (ယောဟန် ၁:၂၉; ဗျာဒိတ် ၇:၉။ ဟေရှာယ ၂:၂-၄; ဇာခရိ ၈:၂၃ နှိုင်းယှဉ်။) မောရှေသည် ဘုရားသခင့်နာမတော် ယေဟောဝါကိုမြတ်နိုး၍ ဂုဏ်ပြုခဲ့သကဲ့သို့ ယေရှုလည်း ဘုရားသခင့်နာမတော်ကို ထင်ရှားစေတော်မူ၏။ (ထွက်မြောက်ရာ ၆:၂၊ ၃; ဆာလံ ၉၀:၁၊ ၁၇; ယောဟန် ၁၇:၆) ယေဟောဝါသည် သစ္စာစောင့်သိတော်မူသည်ဖြစ်၍ ကိုယ်တော်၏ကတိမွန်များသည် ဧကန်အမှန်ပြည့်စုံလာမည်။ ထို့ကြောင့်၊ “မည်သူသည် ကိုယ်တော်အား တကယ်မကြောက်ရွံ့ဘဲ၊ ကိုယ်တော်၏နာမတော်ကို ဂုဏ်မတင်ဘဲ နေနိုင်ပါမည်နည်း” ဟူသောတေး၏စာသားကို ထောက်ခံရာ၌ ကျွန်ုပ်တို့သည် ထိုသစ္စာရှင်သီချင်းသည်များ၊ သိုးသငယ်၊ မောရှေတို့နှင့် တစ်စိတ်တစ်သဘောတည်း ဖြစ်ကြသည်။
ဖလားကိုင်ဆောင်သော ကောင်းကင်တမန်များ
၁၄။ ကျိန်းဝပ်ရာဌာနတော်မှ မည်သူများထွက်လာသည်ကို ယောဟန်မြင်ရပြီး သူတို့အား အဘယ်အရာကိုပေးသနည်း။
၁၄ ဤဘိသိက်ခံ အောင်နိုင်သူများ၏ သီဆိုသံကို ကျွန်ုပ်တို့ကြားရသည်မှာ လျောက်ပတ်ပေသည်။ အဘယ်ကြောင့်နည်း။ သူတို့သည် ဘုရားသခင်၏အမျက်တော်နှင့်ပြည့်သော ဖလားများတွင်ပါရှိသည့် တရားစီရင်ချက်များကို မြေကြီးပေါ်၌ ကြေညာခဲ့ကြ၍ဖြစ်၏။ သို့ရာတွင် ယောဟန် ဆက်လက်တင်ပြသည့်အရ ထိုဖလားများ သွန်းလောင်းခြင်းကိစ္စတွင် လူသားများသာ ပါဝင်ကြသည်မဟုတ်။ “ဤအရာများနောက်၌ ငါကြည့်သော် ကောင်းကင်ဘုံတွင် သက်သေခံတဲတော်၏ ကျိန်းဝပ်ရာဌာနတော်သည် ပွင့်လာသည်ကို မြင်ရ၏။ ကပ်ဘေးခုနစ်ပါးကိုဆောင်သော ကောင်းကင်တမန် ခုနစ်ပါးသည် စင်ကြယ်တောက်ပြောင်သော လျှော်ချောထည်ကို ဝတ်ဆင်လျက် ရင်တွင် ရွှေရင်စည်းကိုစည်းလျက် ကျိန်းဝပ်ရာဌာနတော်မှ ထွက်လာကြ၏။ သက်ရှိသတ္တဝါ လေးပါးအနက် တစ်ပါးသည် နိစ္စထာဝရ အသက်ရှင်တော်မူသော ဘုရားသခင်၏ အမျက်တော်ဖြင့် ပြည့်လျက်ရှိသည့် ရွှေဖလားခုနစ်လုံးကို ကောင်းကင်တမန် ခုနစ်ပါးအား ပေးအပ်၏။”—ဗျာဒိတ် ၁၅:၅-၇။
၁၅။ ကောင်းကင်တမန်ခုနစ်ပါး ကျိန်းဝပ်ရာဌာနတော်မှ ထွက်လာကြသည်မှာ အဘယ်ကြောင့် အံ့ဩစရာမဟုတ်သနည်း။
၁၅ ကောင်းကင်အရာများကို တင်စားသည့်အရာများ ပါရှိသော ဣသရေလလူမျိုး၏ ဗိမာန်တော်နှင့်ပတ်သက်၍ဆိုရလျှင် ဤတွင် “ကျိန်းဝပ်ရာဌာနတော်” ဟုခေါ်သော အထူးသန့်ရှင်းရာဌာနအတွင်းသို့ ယဇ်ပုရောဟိတ်မင်းကြီးသာ ဝင်နိုင်၏။ (ဟေဗြဲ ၉:၃၊ ၇၊ ကဘ) ၎င်းသည် ကောင်းကင်ဘုံရှိ ယေဟောဝါ ကျိန်းဝပ်တော်မူရာနေရာကို တင်စားသည်။ သို့တစေ၊ ကောင်းကင်ဘုံ၌မူ၊ ယဇ်ပုရောဟိတ်မင်းကြီး ယေရှုခရစ်သာမက ကောင်းကင်တမန်များလည်း ယေဟောဝါ၏ရှေ့တော်သို့ အခစားဝင်နိုင်ကြသည်။ (မဿဲ ၁၈:၁၀; ဟေဗြဲ ၉:၂၄-၂၆) သို့ဖြစ်၍ ကောင်းကင်ဘုံရှိ ကျိန်းဝပ်ရာဌာနတော်မှ ကောင်းကင်တမန်ခုနစ်ပါး ထွက်လာသည်ကိုမြင်ရသည်မှာ အံ့ဩစရာမဟုတ်။ ယေဟောဝါဘုရားသခင် ကိုယ်တော်တိုင် ပေးအပ်သောလုပ်ငန်းတစ်ခုကို သူတို့ရရှိထားသည်– ဘုရားသခင်၏ အမျက်တော်နှင့်ပြည့်သော ဖလားများကို သွန်းလောင်းခြင်းပင်တည်း။—ဗျာဒိတ် ၁၆:၁။
၁၆။ (က) အဘယ်အချက်က ထိုကောင်းကင်တမန်ခုနစ်ပါးသည် သူတို့၏အလုပ်ကို ကောင်းစွာလုပ်ကိုင်နိုင်သော အရည်အချင်းရှိကြောင်း ပြသနည်း။ (ခ) ပုံဆောင်ဖလားများ သွန်းလောင်းခြင်းတည်းဟူသော မဟာလုပ်ငန်းတော်မြတ်တွင် အခြားသူများလည်း ပါဝင်ကြောင်း အဘယ်အချက်က ဖော်ပြသနည်း။
၁၆ ထိုကောင်းကင်တမန်များသည် ယင်းလုပ်ငန်းကို လုပ်ဆောင်ရန် အရည်အချင်းရှိကြ၏။ သူတို့သည် စင်ကြယ်တောက်ပြောင်သော လျှော်ချောထည်ကို ဝတ်ဆင်ထားသဖြင့် ယေဟောဝါ၏ မျက်မှောက်တော်တွင် ဝိညာဉ်ရေးဘက် စင်ကြယ်သန့်ရှင်း၍ ဖြောင့်မတ်ကြောင်းကိုပြ၏။ ထို့ပြင် ရွှေရင်စည်းကိုလည်း စည်းထားကြသည်။ လူတစ်ယောက်သည် အလုပ်တစ်ခုကို လုပ်ကိုင်မည်ပြုစဉ် ရင်စည်းကိုစည်းလေ့ရှိသည်။ (ဝတ်ပြုရာ ၈:၇၊ ၁၃; ၁ ဓမ္မရာဇဝင် ၂:၁၈; လုကာ ၁၂:၃၇; ယောဟန် ၁၃:၄၊ ၅) သို့ဖြစ်၍ ထိုကောင်းကင်တမန်တို့သည် ပေးအပ်သောအလုပ်တစ်ခုကိုလုပ်ရန် အသင့်ပြင်ထားကြသည်။ ထို့ပြင် သူတို့၏ရင်စည်းမှာ ရွှေရင်စည်းဖြစ်၏။ ရှေးက တဲတော်တွင် ရွှေကို မြင့်မြတ်သော၊ ကောင်းကင်နှင့်ဆိုင်သော အရာများကိုတင်စားရန် အသုံးပြု၏။ (ဟေဗြဲ ၉:၄၊ ၁၁၊ ၁၂) သို့ဖြစ်၍ ထိုကောင်းကင်တမန်များသည် အဖိုးထိုက်၍ မြင့်မြတ်သော အမှုတော်တစ်ရပ်ကို လုပ်ဆောင်ရန် တာဝန်ပေးခြင်းခံရသည်ကို ဆိုလို၏။ အခြားသူများလည်း ဤမဟာလုပ်ငန်းတော်မြတ်၌ ပါဝင်လုပ်ကိုင်ရသည်။ သက်ရှိသတ္တဝါ လေးပါးထဲမှတစ်ပါးက သူတို့အား တကယ့်ဖလားများကိုပေး၏။ ထိုသတ္တဝါသည် ခြင်္သေ့၏သဏ္ဌာန်ကိုဆောင်သော ပထမသက်ရှိသတ္တဝါဖြစ်သည်မှာ သံသယမရှိ။ ၎င်းသည် ယေဟောဝါ၏ တရားစီရင်ချက်များကို ကြွေးကြော်ရာ၌ လိုအပ်သည့် မမှိတ်မသုန်သော ရဲစွမ်းသတ္တိကို ပုံခိုင်း၏။—ဗျာဒိတ် ၄:၇။
ကျိန်းဝပ်ရာဌာနတော်ထဲမှ ယေဟောဝါ
၁၇။ ကျိန်းဝပ်ရာဌာနတော်နှင့်ပတ်သက်၍ ကျွန်ုပ်တို့အား ယောဟန်ဘာပြောပြသနည်း၊ ၎င်းက ရှေးဣသရေလခေတ်မှ ကျိန်းဝပ်ရာဌာနတော်နှင့်ဆိုင်သော အဘယ်အချက်ကို သတိရစေသနည်း။
၁၇ အဆုံး၌ ယောဟန်သည် ရူပါရုံ၏ဤပိုင်းကို ဤသို့နိဂုံးချုပ်တင်ပြ၏– “ထိုအခါ ကျိန်းဝပ်ရာဌာနတော်သည် ဘုရားသခင်၏ ဘုန်းတော်နှင့် တန်ခိုးတော်ကြောင့် မီးခိုးနှင့် ပြည့်လျက်ရှိသဖြင့် ကောင်းကင်တမန် ခုနစ်ပါး၏ ကပ်ဘေးခုနစ်ပါး မပြီးမချင်း အဘယ်သူမျှ ကျိန်းဝပ်ရာဌာနတော်ထဲသို့ မဝင်နိုင်။” (ဗျာဒိတ် ၁၅:၈) ဣသရေလလူမျိုး၏သမိုင်းတွင် ယေဟောဝါ၏ ဘုန်းတော်ထင်ရှားခြင်းကြောင့် ဗိမာန်တော်ကို တိမ်တိုက်လွှမ်းခြုံသောအခါ ယဇ်ပုရောဟိတ်များသည် အတွင်းသို့မဝင်နိုင်ဘဲ ဖြစ်ခဲ့ဖူးသည်။ (၃ ဓမ္မရာဇဝင် ၈:၁၀၊ ၁၁; ၂ ရာဇဝင်ချုပ် ၅:၁၃၊ ၁၄။ ဟေရှာယ ၆:၄၊ ၅ နှိုင်းယှဉ်။) မြေကြီးပေါ်က အဖြစ်အပျက်များတွင် ယေဟောဝါတက်ကြွစွာ ပါဝင်တော်မူသည့် အခါသမယများပင်တည်း။
၁၈။ ကောင်းကင်တမန်ခုနစ်ပါးသည် မည်သည့်အခါ ယေဟောဝါ ထံတော်သို့ပြန်သွားပြီး သတင်းပြန်ကြားကြမည်နည်း။
၁၈ ယနေ့လည်း ယေဟောဝါသည် ကမ္ဘာ့အဖြစ်အပျက်များကို အလွန်စိတ်ဝင်စားတော်မူ၏။ ကိုယ်တော်သည် ကောင်းကင်တမန်ခုနစ်ပါး သူတို့၏လုပ်ငန်းကို အပြီးဆောင်ရွက်ရန် အလိုတော်ရှိ၏။ ယခုအချိန်ကား ဆာလံ ၁၁:၄-၆ (သမ္မာ) တွင်ဖော်ပြသည့်အတိုင်း တရားစီရင်ချိန်၏ အထွတ်အထိပ်ပင်တည်း– “ထာဝရဘုရားသည် သန့်ရှင်းသောဗိမာန်တော်၌ ရှိတော်မူ၏။ ထာဝရဘုရား၏ ပလ္လင်တော်ကား ကောင်းကင်ဘုံ၌တည်း။ မျက်စိတော်သည် ကြည့်ရှု၍ မျက်ခမ်းတော်သည် လူသားတို့ကို စစ်ဆေးတော်မူ၏။ ထာဝရဘုရားသည် ဖြောင့်မတ်သောသူကို စစ်ဆေးတော်မူ၍ ဆိုးသောသူနှင့် ကြမ်းကြုတ်ခြင်း နှစ်သက်သောသူကို မုန်းတော်မူ၏။ လူဆိုးတို့အပေါ်သို့ မီးခဲမိုးရွာစေတော်မူမည်။ ကန့်နှင့် လေပူသည် သူတို့သောက်စရာဖို့ ဖြစ်လိမ့်မည်။” ထိုကောင်းကင်တမန် ခုနစ်ပါးသည် ကပ်ခုနစ်ပါးကို လူဆိုးများအပေါ်သို့ မသွန်းလောင်းမချင်း ယေဟောဝါ၏ ခမ်းနားသောရှေ့တော်မှောက်သို့ ပြန်ဝင်ခစားကြမည်မဟုတ်။
၁၉။ (က) အဘယ်သူက အဘယ်အမိန့်ကို ထုတ်ဆင့်သနည်း။ (ခ) အဘယ်အခါ၌ ပုံဆောင်သောဖလားများကို စတင်သွန်းလောင်းခဲ့ခြင်း ဖြစ်ရမည်နည်း။
၁၉ ထိတ်လန့်ဖွယ်ကောင်းသော အမိန့်တော် မြည်ဟည်းထွက်ပေါ်လာသည်– “ကျိန်းဝပ်ရာဌာနတော်မှ ကျယ်သောစကားသံက ကောင်းကင်တမန် ခုနစ်ပါးအား ‘သွားကြလော့။ ဘုရားသခင်၏ အမျက်တော်ဖလား ခုနစ်လုံးကို မြေကြီးပေါ်သို့ သွန်းလောင်းကြလော့’ ဟုဆိုသည်ကို ငါကြားရ၏။” (ဗျာဒိတ် ၁၆:၁) ဤအမိန့်ကို မည်သူထုတ်ပြန်သနည်း။ ယေဟောဝါ၏ဘုန်းတော်နှင့် တန်ခိုးတော်ကွန့်မြူးခြင်းကြောင့် ကျိန်းဝပ်ရာဌာနတော်အတွင်းသို့ မည်သူမျှမဝင်ရောက်နိုင်သည့်အတွက် ယေဟောဝါကိုယ်တော်တိုင် မိန့်ဆိုခြင်းဖြစ်ရပေမည်။ ယေဟောဝါသည် ၁၉၁၈ ခုနှစ်၌ တရားစီရင်ရန် ဝိညာဏဗိမာန်တော်သို့ ကြွလာတော်မူ၏။ (မာလခိ ၃:၁-၅) သို့ဖြစ်၍ ထိုအချိန်နောက်ပိုင်း မကြာမီတွင် ဘုရားသခင်၏ အမျက်တော်ဖလားများကို သွန်းလောင်းရန် မိန့်တော်မူခြင်းဖြစ်ရပေမည်။ အမှန်ဆိုလျှင် ၁၉၂၂ ခုနှစ်မှစ၍ ပုံဆောင်ဖလားထဲမှ တရားစီရင်ချက်များကို အပြင်းအထန် ကြွေးကြော်လာခဲ့သည်။ ယနေ့ဆိုလျှင် ၎င်းကြွေးကြော်သံသည် ကျယ်သည်ထက်ကျယ်လာပြီး အထွတ်အထိပ်သို့ ရောက်လေပြီ။
ဖလားများနှင့် တံပိုးခရာမှုတ်ချက်များ
၂၀။ ယေဟောဝါ၏ အမျက်တော်ဖလားများက ဘာကိုဖော်ပြ၍ ဘာအကြောင်းကိုသတိပေးပြီး ၎င်းတို့ကို မည်သို့သွန်းလောင်းသနည်း။
၂၀ ယေဟောဝါ၏ အမျက်တော်ဖလားများက ကမ္ဘာ့ဇာတ်ခုံ၏ ကြန်အင်လက္ခဏာများကို ယေဟောဝါ မည်သို့ရှုမြင်ကြောင်း ထင်ရှားစေပြီး ယေဟောဝါ၏ တရားစီရင်ချက်များကို သတိပေး၏။ ကောင်းကင်တမန်များသည် မောရှေ၏သီချင်း၊ သိုးသငယ်၏သီချင်းကိုသီဆိုသော မြေကြီးပေါ်ရှိ ဘိသိက်ခံခရစ်ယာန်များ၏ အသင်းတော်မှတစ်ဆင့် ဖလားများကို သွန်းလောင်းကြသည်။ ယောဟန်အတန်းအစားသည် နိုင်ငံတော်အကြောင်းကို သတင်းကောင်းအဖြစ် ဟောပြောရင်း ထိုအမျက်တော်ဖလားများ၏ အကြောင်းအရာများကို ရဲရင့်စွာ ဖော်ပြကြ၏။ (မဿဲ ၂၄:၁၄; ဗျာဒိတ် ၁၄:၆၊ ၇) ထို့ကြောင့်၊ သူတို့၏ပူးတွဲသတင်းသည် လူသားတို့အား လွတ်ငြိမ်းခြင်းအကြောင်း ကြွေးကြော်ရာ၌ ငြိမ်သက်သော်လည်း “ငါတို့ဘုရားသခင် လက်စားချေတော်မူရာ နေ့ရက်ကာလ” နှင့်ပတ်သက်၍ သတိပေးရာတွင် စစ်တိုက်သကဲ့သို့ဖြစ်၏။—ဟေရှာယ ၆၁:၁၊ ၂၊ သမ္မာ။
၂၁။ ဘုရားသခင့်အမျက်တော်ဖလား ပထမလေးလုံး၏ ပစ်မှတ်များသည် တံပိုးခရာမှုတ်ချက် ပထမလေးချက်၏ ပစ်မှတ်များနှင့် မည်သို့တူပြီး အဘယ်နေရာ၌ ခြားနားကြသနည်း။
၂၁ ဘုရားသခင့် အမျက်တော်ဖလား ပထမလေးလုံး၏ ပစ်မှတ်များသည် ပထမတံပိုးခရာမှုတ်ချက်လေးချက်၏ ပစ်မှတ်များနှင့်တူပြီး ၎င်းတို့မှာ မြေကြီး၊ ပင်လယ်၊ မြစ်များနှင့် စမ်းရေတွင်းများ၊ ကောင်းကင်မှအလင်းအိမ်များ ဖြစ်ကြသည်။ (ဗျာဒိတ် ၈:၁-၁၂) သို့သော် တံပိုးခရာမှုတ်ချက်တို့သည် “သုံးပုံတစ်ပုံ” အပေါ်ကျရောက်သော ကပ်ဘေးများကို ကြေညာသော်လည်း ဘုရားသခင့် အမျက်တော်ဖလားများ သွန်းလောင်းခြင်းသည် တစ်ခုလုံးကို ထိခိုက်စေ၏။ သို့ဖြစ်၍ “သုံးပုံတစ်ပုံ” ဖြစ်သော ခရစ်ယာန်ဘောင်သည် သခင့်နေ့တော်အတွင်း အဦးဆုံး အာရုံပြုခြင်းခံရသည်မှန်သော်လည်း စာတန့်စနစ်၏ အဘယ်အပိုင်းကမျှ စိတ်ဒုက္ခရောက်စေနိုင်သော ယေဟောဝါ၏ တရားစီရင်ချက် သတင်းများနှင့်လည်းကောင်း၊ ၎င်းတို့ကြောင့်ဖြစ်သော ပူဆွေးဝမ်းနည်းမှု ဥပဒ်နှင့်လည်းကောင်း ကင်းလွတ်ခွင့် မရကြချေ။
၂၂။ နောက်ဆုံးသော တံပိုးမှုတ်ချက်သုံးချက်သည် အဘယ်သို့တစ်မူထူးခြားပြီး ယေဟောဝါ၏ အမျက်တော်ဖလား နောက်ဆုံးသုံးလုံးနှင့် မည်သို့ဆက်စပ်သနည်း။
၂၂ နောက်ဆုံးသော တံပိုးခရာမှုတ်ချက်သုံးချက်ကို အမင်္ဂလာများဟု ခေါ်ဝေါ်သောကြောင့် ၎င်းတို့သည် တစ်မူထူးခြား၏။ (ဗျာဒိတ် ၈:၁၃; ၉:၁၂) ၎င်းတို့ထဲမှ ပထမမှုတ်ချက်နှစ်ချက်မှာ အထူးသဖြင့် ကျိုင်းကောင်နှင့် မြင်းတပ်များပါဝင်ပြီး တတိယမှုတ်ချက်က ယေဟောဝါ၏ နိုင်ငံတော်ဖွားမြင်ခြင်းကို နိဒါန်းပျိုး၏။ (ဗျာဒိတ် ၉:၁-၂၁; ၁၁:၁၅-၁၉) နောက်ဆုံးအမျက်တော်ဖလား သုံးလုံး၌လည်း ထိုသွင်ပြင်လက္ခဏာများပါရှိသော်လည်း အမင်္ဂလာသုံးပါးနှင့် အနည်းငယ်ခြားနားသည်ကို တွေ့ရပါလိမ့်မည်။ ယေဟောဝါ၏ အမျက်တော်ဖလားများ သွန်းလောင်းခြင်းကြောင့် ဖြစ်ပေါ်လာသော ဇာတ်ဆန်သည့် ထုတ်ဖော်ချက်များကို ယခု အထူးအာရုံပြုကြစို့။
[အောက်ခြေမှတ်ချက်]
^ အပိုဒ်၊ 7 စိတ်ဝင်စားဖွယ်ကား၊ ၁၉၂၁ ခုနှစ်၌ ယောဟန်အတန်းအစားသည် ကျမ်းစာလေ့လာမှုအတွက် အထောက်အကူပြုသည့် ဘုရားသခင်၏ စောင်းတော် ဟူသောစာအုပ်ကို ဘာသာပေါင်း ၂၀ ကျော်၊ အုပ်ရေပေါင်း ငါးသန်းကျော်ဖြင့် ထုတ်ဝေခဲ့သည်။ ၎င်းသည် ဘိသိက်ခံသီချင်းသည်များကို ပိုမိုစုသိမ်းနိုင်ရန် ထောက်ကူခဲ့သည်။
[လေ့လာရန်မေးခွန်းများ]
