“ရှိရင်းစွဲကို မြဲမြဲစွဲကိုင်ထားပါ”
အခန်း ၁၂
“ရှိရင်းစွဲကို မြဲမြဲစွဲကိုင်ထားပါ”
ဖိလဒေလဖိ
၁။ ယေရှု၏ဆဋ္ဌမ သတင်းတော်မှာ အဘယ်မြို့ရှိ အသင်းတော်ကို ရည်စူးသနည်း။ ၎င်းမြို့၏အမည်သည် အဘယ်အဓိပ္ပာယ်ရှိသနည်း။
ညီရင်းအစ်ကို ခင်တွယ်မှု—နှစ်လို့ဖွယ် အရည်အသွေးပါတကား။ မိမိ၏ ဆဋ္ဌမမြောက် သတင်းတော်ကို ဖိလဒေလဖိမြို့ရှိ အသင်းတော်ထံ ယေရှုပေးပို့စဉ် ၎င်းအရည်အသွေးကို ကိုယ်တော် သတိရတော်မူပေမည်။ အကြောင်းမှာ ဖိလဒေလဖိ ဟူသောအမည်သည် “ညီရင်းအစ်ကို ခင်တွယ်မှု” ဟုအဓိပ္ပာယ် ရှိ၍ဖြစ်သည်။ လွန်ခဲ့သောအနှစ် ၆၀ ကျော်၌၊ ပေတရုက မိမိ၏သခင်ကို မြတ်နိုးခင်တွယ်ကြောင်း သုံးကြိမ်တိုင်တိုင် အခိုင်အမာ ဆိုခဲ့သည်ကို သက်ကြီးယောဟန် သတိရသေးသည်။ (ယောဟန် ၂၁:၁၅-၁၇) ဖိလဒေလဖိမြို့ရှိ ခရစ်ယာန်များ ညီရင်းအစ်ကို ခင်တွယ်ခြင်းရှိကြသလော။ ရှိကြောင်းသိသာ၏။
၂။ ဖိလဒေလဖိမြို့သည် မည်သို့သောမြို့နည်း။ ထိုမြို့ရှိအသင်းတော်သည် မည်သို့သောအသင်းတော်နည်း။ ၎င်းအသင်းတော်၏ ကောင်းကင်တမန်အား ယေရှုမည်သို့မိန့်ဆိုသနည်း။
၂ ယောဟန်လက်ထက်ရှိ ဖိလဒေလဖိမြို့သည် သာဒိမြို့၏ အရှေ့တောင်ဘက် မိုင် ၃၀ ခန့်အကွာ (ယခုခေတ် တူရကီ၏ အာလရှဟီးရ်မြို့တည်နေရာ) တွင်ရှိ၍ အတော်လေး ကြီးပွားချမ်းသာသောမြို့ဖြစ်သည်။ သို့သော် ပို၍မှတ်သားဖွယ်ကောင်းသည်မှာ ထိုမြို့ရှိ ခရစ်ယာန်အသင်းတော်၏ ကြီးပွားမှုပင်တည်း။ သူတို့သည် မိမိတို့ထံသို့လာသော ဓမ္မအမှုဆောင်ကို ဝမ်းသာအားရ ဆီးကြိုလက်ခံခဲ့ကြမည်တကား။ သာဒိမြို့မှတစ်ဆင့် လာခြင်းဖြစ်နိုင်သည်။ ထိုသူယူဆောင်လာသော သတင်းတော်၌ သူတို့အဖို့ အားတက်ဖွယ်သြဝါဒ ပါရှိ၏။ သို့သော် ၎င်းက ခန့်ညားဖွယ်ကောင်းသော ပေးပို့သူ၏ အခွင့်အာဏာအကြောင်းကို ရှေးဦးစွာ ပြဆိုသည်။ “ဖိလဒေလဖိမြို့ရှိ အသင်းတော်၏ ကောင်းကင်တမန်ထံ ဤသို့ရေးလော့– ဤကား သန့်ရှင်းသောသူ၊ စစ်မှန်သောသူ၊ ဒါဝိဒ်၏သော့ကို ပိုင်သောသူ၊ မည်သူမျှ မပိတ်နိုင်အောင် ဖွင့်၍ မည်သူမျှ မဖွင့်နိုင်အောင် ပိတ်သောသူ၏ မိန့်ဆိုချက်များတည်း” ဟု ကိုယ်တော်မိန့်တော်မူ၏။—ဗျာဒိတ် ၃:၇။
၃။ ယေရှုကို “သန့်ရှင်းသောသူ” ဟု အဘယ်ကြောင့် သမုတ်သင့်သနည်း။ ကိုယ်တော်သည် “စစ်မှန်သောသူ” ဖြစ်သည်ဟု မည်သို့ဆိုနိုင်သနည်း။
၃ လူသားယေရှုခရစ်အား ပေတရုက “ထာဝရအသက်နှင့် ယှဉ်သောစကားသည် ကိုယ်တော်၌ တည်ပါ၏။ ကိုယ်တော်သည် ဘုရားသခင်၏ သန့်ရှင်းတော်မူသောအရှင် ဖြစ်တော်မူသည်ကို အကျွန်ုပ်တို့ ယုံကြည်သိမှတ်ကြပါပြီ” ဟူ၍လျှောက်ဆိုသည်ကို ယောဟန်ကြားခဲ့ပါသည်။ (ယောဟန် ၆:၆၈၊ ၆၉၊ သမ္မာ) ယေဟောဝါသည် သန့်ရှင်းခြင်း၏ အနှစ်သာရဖြစ်သည်အလျောက် ကိုယ်တော့်တစ်ပါးတည်းသော သားတော်သည်လည်း “သန့်ရှင်း” ရပေမည်။ (ဗျာဒိတ် ၄:၈) ထိုမျှမက ယေရှုသည် ‘စစ်မှန်’ ၏။ ဤနေရာ၌သုံးနှုန်းသော ဂရိစကားလုံး (အာလေသီနော့စ်၊ a·le·thi·nosʹ) က စစ်မှန်ခြင်း သဘောသက်ရောက်သည်။ ဤသဘောမျိုးဖြင့် ယေရှုသည် ကောင်းကင်မှလာသော အလင်းစစ်၊ မုန့်စစ် ဖြစ်၏။ (ယောဟန် ၁:၉; ၆:၃၂) ကိုယ်တော်သည် မှန်သောစပျစ်နွယ်ပင်ဖြစ်၏။ (ယောဟန် ၁၅:၁) ယေရှုသည် အားထားထိုက်သူဖြစ်သည် ဟူသောအဓိပ္ပာယ်အရလည်း စစ်မှန်ပေသည်။ ကိုယ်တော်သည် အစဉ်သဖြင့် မှန်ရာကိုပြော၏။ (ယောဟန် ၈:၁၄၊ ၁၇၊ ၂၆) ဘုရားသခင်၏ ဤသားတော်သည် တကယ်ပင် ဘုရင်နှင့်တရားသူကြီးအဖြစ် အမှုထမ်းထိုက်ပေသည်။—ဗျာဒိတ် ၁၉:၁၁၊ ၁၆။
“ဒါဝိဒ်၏သော့”
၄၊ ၅။ “ဒါဝိဒ်၏သော့” သည် အဘယ်ပဋိညာဉ်နှင့် ဆက်နွှယ်သနည်း။
၄ ယေရှုလက်၌ “ဒါဝိဒ်၏သော့” ရှိ၏။ ၎င်းကိုသုံးလျက် “မည်သူမျှ မပိတ်နိုင်အောင် ဖွင့်၍ မည်သူမျှ မဖွင့်နိုင်အောင် ပိတ်” တော်မူသည်။ ဤ “ဒါဝိဒ်၏သော့” ကား အဘယ်နည်း။
၅ ယေဟောဝါသည် ဣသရေလဘုရင်ဒါဝိဒ်နှင့် ထာဝရနိုင်ငံတစ်ခုအတွက် ပဋိညာဉ်ဖွဲ့တော်မူခဲ့သည်။ (ဆာလံ ၈၉:၁-၄၊ ၃၄-၃၇) ဒါဝိဒ်မင်းဆက်သည် ယေရုရှလင်မြို့ရှိ ယေဟောဝါ၏ ပလ္လင်တော်ပေါ်မှာထိုင်၍ ဘီစီ ၁၀၇၀ မှ ၆၀၇ ခုနှစ်တိုင်အောင် အုပ်စိုးခဲ့သည်။ သို့သော် နောက်ပိုင်း၌ ၎င်းနိုင်ငံသည် ဆိုးသွမ်းလာသောကြောင့် ယေဟောဝါ တရားစီရင်တော်မူသည်။ ဤနည်းဖြင့် ယေဇကျေလ ၂၁:၂၇ (ကဘ) ပါ အောက်ပါပရောဖက်ပြုချက်ကို စတင်ပြည့်စုံစေတော်မူသည်– “ငါသည် ၎င်း [မြေကြီးယေရုရှလင်] ကို ပြိုပျက်စေမည်၊ ပြိုပျက်စေမည်၊ ပြိုပျက်စေမည်။ ဤအရာ [ဒါဝိဒ်မင်းမျိုး၏ ရာဇလှံတံ] ကိုလည်း တရားဝင် ပိုင်ထိုက်သောသူ မရောက်မချင်း၊ မည်သူမျှ ပိုင်ဆိုင်ရမည်မဟုတ်။ ထိုသူအား ငါအပ်ပေးမည်။”
၆၊ ၇။ “တရားဝင် ပိုင်ထိုက်သောသူ” သည် အဘယ်အချိန်တွင် အဘယ်သို့ ပေါ်လာရန်ဖြစ်သနည်း။
၆“တရားဝင်ပိုင်ထိုက်” သူသည် အဘယ်အခါ၊ အဘယ်သို့ ပေါ်လာမည်နည်း။ သူ့အား ဒါဝိဒ်နိုင်ငံတော်၏ ရာဇလှံတံကို မည်သို့အပ်ပေးတော်မူမည်နည်း။
၇ အနှစ် ၆၀၀ လွန်ပြီးနောက်၊ ဒါဝိဒ်မင်းမှ ဆင်းသက်လာသူ ဂျူးကညာပျို မာရိသည် သန့်ရှင်းသော ဝိညာဉ်တော်အားဖြင့် ကိုယ်ဝန်ရလေသည်။ မာရိသည် သားတစ်ယောက်ကိုမွေးမည်၊ ထိုသားကို ယေရှုဟူ၍ မှည့်ရမည်ဟု ဘုရားသခင်က ကောင်းကင်တမန် ဂါဗြေလကိုစေလွှတ်၍ ကြားပြောစေတော်မူသည်။ ဂါဗြေလက “ထိုသားသည်ကား၊ ကြီးမြတ်သောသူဖြစ်လိမ့်မည်။ အမြင့်ဆုံးသောဘုရား၏ သားတော်ဟု ခေါ်ဝေါ်သမုတ်ခြင်းကို ခံရလိမ့်မည်။ သူ့အဘဒါဝိဒ်၏ ရာဇပလ္လင်ကို ထာဝရအရှင် ဘုရားသခင်သည် သူ့အား ပေးတော်မူမည်။ ထိုသူသည်လည်း ယာကုပ်အမျိုးအနွယ်ကို အစဉ်မပြတ် အုပ်စိုးလိမ့်မည်။ သူ၏နိုင်ငံသည်လည်း ဆုံးခြင်းမရှိရ” ဟု ထပ်ဆင့်ပြောကြားလေသည်။—လုကာ ၁:၃၁-၃၃။
၈။ ဒါဝိဒ်၏ထီးနန်းကို မိမိအမွေခံထိုက်ကြောင်း ယေရှု မည်သို့သက်သေထူသနည်း။
၈ အေဒီ ၂၉ ခုနှစ်တွင်၊ ယော်ဒန်မြစ်၌ ယေရှု နှစ်ခြင်းခံသောအခါ ဒါဝိဒ်မင်းဆက်၏ မင်းလျာဖြစ်လာသည်။ ကိုယ်တော်သည် နိုင်ငံတော်သတင်းကောင်း ဟောပြောခြင်း၌ စံထားလောက်အောင် စိတ်ထက်သန်မှုကို တင်ပြပြီး ထို့အတူဟောပြောရန် တပည့်တော်များအား တာဝန်ပေးတော်မူသည်။ (မဿဲ ၄:၂၃; ၁၀:၇၊ ၁၁) ယေရှုသည် ညှဉ်းဆဲရာနှက်တိုင်ပေါ် သေသည့်တိုင် ကိုယ်ကိုနှိမ့်ချခဲ့သည်။ ဤနည်းဖြင့် ဒါဝိဒ်မင်း၏ နန်းရိုက်ရာ ဆက်ခံထိုက်သော အရည်အချင်း မိမိ၌ အပြည့်အဝရှိကြောင်း သက်သေပြ၏။ ယေဟောဝါသည် သူ့အား မသေနိုင်သော နာမ်ဝိညာဉ်အဖြစ်သို့ ထမြောက်စေပြီး ကောင်းကင်၌ လက်ယာတော်အဆင့်သို့ ချီးမြှင့်တော်မူသည်။ ထိုတွင် ယေရှုသည် ဒါဝိဒ်နိုင်ငံတော်၏ အခွင့်အာဏာအားလုံးကို အမွေခံတော်မူသည်။ အချိန်တန်လျှင် အခွင့်အာဏာကိုသုံးစွဲလျက် “ရန်သူတို့၏အလယ်၌ အုပ်စိုးတော်မူလိမ့်မည်။”—ဆာလံ ၁၁၀:၁၊ ၂; ဖိလိပ္ပိ ၂:၈၊ ၉; ဟေဗြဲ ၁၀:၁၃၊ ၁၄။
၉။ ဒါဝိဒ်၏သော့ကို ယေရှုသုံးပြီး ဖွင့်ပိတ်သည်မှာ အဘယ်အဓိပ္ပာယ်နည်း။
၉ လောလောဆယ်၌ ယေရှုသည် ဒါဝိဒ်၏သော့ကိုသုံး၍ ဘုရားသခင့် နိုင်ငံတော်ဆိုင်ရာ အခွင့်အရေးများနှင့် အခွင့်ထူးများကို ဖွင့်တော်မူမည်ဖြစ်သည်။ ယခု ယေဟောဝါသည် ယေရှုမှတစ်ဆင့် ကမ္ဘာပေါ်ရှိ ဘိသိက်ခံခရစ်ယာန်များကို “မှောင်မိုက်တန်ခိုးမှ . . . နုတ်၍ ချစ်တော်မူသောသားတော်၏ နိုင်ငံတော်ထဲသို့ သွင်းတော်မူမည်။” (ကောလောသဲ ၁:၁၃၊ ၁၄) သစ္စာမရှိသူအား ထိုအခွင့်အရေးများ မရစေရန် တားဆီးရာ၌လည်း ၎င်းသော့ကို သုံးမည်ဖြစ်သည်။ (၂ တိမောသေ ၂:၁၂၊ ၁၃) ဒါဝိဒ်နိုင်ငံ၏ ဤအမြဲတမ်းအမွေခံသည် ယေဟောဝါ၏ ကျောထောက်နောက်ခံမှု ရသည်ဖြစ်၍ အထက်ပါတာဝန် မထမ်းရွက်နိုင်စေရန် အဘယ်သတ္တဝါကမျှ မတားဆီးနိုင်။—မဿဲ ၂၈:၁၈-၂၀ နှိုင်းယှဉ်။
၁၀။ ဖိလဒေလဖိမြို့ရှိ အသင်းတော်အား ယေရှု အဘယ်အားပေးစကား မိန့်ဆိုသနည်း။
၁၀ ဖိလဒေလဖိမြို့ရှိ ခရစ်ယာန်များအား ယေရှုမိန့်ဆိုသော စကားများသည် ထိုမျှတိုင် အာဏာရှိသောသူထံမှ လာသည်ဖြစ်၍ အထူးနှစ်သိမ့်ဖွယ် ဖြစ်ပေမည်။ သူတို့အား ယေရှုချီးမွမ်းလျက် ဤသို့မိန့်တော်မူ၏– “သင်ပြုသော အမှုများကိုလည်းကောင်း၊ သင်သည် အစွမ်းခွန်အား အနည်းငယ် ရှိလျက်ပင် ငါ၏တရားစကားကို စောင့်ရှောက်၍ ငါ့နာမကို မငြင်းပယ်ကြောင်းကိုလည်းကောင်း ငါသိ၏။ ကြည့်လော့။ မည်သူမျှ မပိတ်နိုင်သော ပွင့်လျက်နေသည့် တံခါးကို သင့်ရှေ့၌ ငါဖွင့်ထားပြီ။” (ဗျာဒိတ် ၃:၈) ဤအသင်းတော်သည် တက်တက်ကြွကြွရှိသဖြင့် ၎င်းရှေ့၌၊ တံခါးတစ်ခု ပွင့်လျက်ရှိသည်။—ဓမ္မအမှုဆိုင်ရာ အခွင့်အရေးတံခါး ဖြစ်ပေမည်။ (၁ ကောရိန္သု ၁၆:၉; ၂ ကောရိန္သု ၂:၁၂ နှိုင်းယှဉ်။) ထို့ကြောင့် ယေရှုက ဟောပြောရန်အခွင့်ကောင်းကို အပြည့်အဝအသုံးပြုရန် အသင်းတော်ကို အားပေးတော်မူသည်။ သူတို့သည် ခံနိုင်ရည်ရှိပြီး ဘုရားသခင့်ဝိညာဉ်တော် အကူအညီဖြင့် ယေဟောဝါ၏ အမှုတော်၌ ထပ်ဆင့် “အမှုများ” လုပ်ဆောင်နိုင်သော အစွမ်းခွန်အား အလုံအလောက်ရှိကြောင်း တင်ပြခဲ့ပေပြီ။ (၂ ကောရိန္သု ၁၂:၁၀; ဇာခရိ ၄:၆) ယေရှု၏ မိန့်မှာချက်ကို သူတို့နာခံခဲ့ပေပြီ။ နှုတ်ဖြင့်ဖြစ်စေ၊ အကျင့်အကြံဖြင့်ဖြစ်စေ ခရစ်တော်ကို မငြင်းပယ်ခဲ့ကြချေ။
သူတို့သည် “သင့်ရှေ့မှာ ဦးညွှတ်ပျပ်ဝပ်” ရကြလိမ့်မည်
၁၁။ ထိုခရစ်ယာန်တို့အား အဘယ်ကောင်းချီးပေးမည်ဟု ယေရှုကတိပြုသနည်း။ မည်သို့ပြည့်စုံခဲ့သနည်း။
၁၁ ထို့ကြောင့် သူတို့အား အောက်ပါရလဒ် ရစေမည်ဟု ယေရှု ကတိပြုတော်မူ၏– “ကြည့်လော့။ ယုဒလူမျိုး မဟုတ်ဘဲ ဟုတ်သည်ဟု လိမ်လည်ပြောဆိုနေကြသည့် စာတန်၏ အဖွဲ့ဝင်တို့အား သင့်ခြေရင်းသို့ လာရောက်ဦးညွှတ်စေခြင်းဖြင့် သင့်ကို ငါချစ်ကြောင်း သူတို့အား သိစေမည်။” (ဗျာဒိတ် ၃:၉) ဤအသင်းတော်သည် စမုရနမြို့မှာကဲ့သို့ ဒေသခံဂျူးတို့နှင့် ပြဿနာဖြစ်ခဲ့ဟန်တူသည်။ ထိုသူတို့ကို “စာတန်၏အဖွဲ့ဝင်” ဟု ယေရှု သမုတ်တော်မူသည်။ သို့တစေ၊ ယုတ်စွအဆုံး ထိုဂျူးတို့အထဲမှ လူအချို့က ခရစ်ယာန်များ ဟောပြောနေသည့် ယေရှုအကြောင်းမှာ သမ္မာတရားဖြစ်ကြောင်း သိရကြတော့မည်။ သူတို့၏ ‘ဦးညွှတ်ခြင်း’ မှာ ၁ ကောရိန္သု ၁၄:၂၄၊ ၂၅ ပါ ပေါလုဖော်ပြသော ပုံစံအတိုင်းဖြစ်ပေမည်။ ဤသို့ဖြင့် သူတို့သည် တကယ်ပင် နောင်တရပြီး ခရစ်ယာန်များဖြစ်လာကာ တပည့်တော်များအဖို့ အသက်ဝိညာဉ်ကိုစွန့်သော ယေရှု၏မဟာမေတ္တာတော်ကို အပြည့်အဝ တန်ဖိုးထားလာကြ၏။—ယောဟန် ၁၅:၁၂၊ ၁၃။
၁၂။ ဖိလဒေလဖိမြို့မှ ဂျူးအဖွဲ့ဝင်များက မိမိတို့ထဲမှအချို့သည် ဒေသခံခရစ်ယာန် အသင်းအပင်းရှေ့ “ဦးညွှတ်” ရကြမည်ကိုသိလျှင် အဘယ်ကြောင့် ထိတ်လန့်သွားဖွယ်ရှိသနည်း။
၁၂ ဖိလဒေလဖိမြို့မှ ဂျူးအဖွဲ့ဝင်များက မိမိတို့အထဲမှ လူအချို့သည် ဒေသခံ ခရစ်ယာန်အသင်းအပင်းရှေ့ “ဦးညွှတ်” ရကြမည်ကိုသိလျှင် ထိတ်လန့်သွားပေမည်။ သူတို့သည် ၎င်းအသင်းတော်၌ ဂျူးမဟုတ်သူ များစွာရှိသည်ကိုထောက်၍ ထိုအခြင်းအရာ၏ဆန့်ကျင်ဘက်သာ ဖြစ်ရမည်ဟု ထင်ကြပေမည်။ အဘယ်ကြောင့်နည်း။ ဟေရှာယက “[ဂျူးမဟုတ်သော] ဘုရင်တို့သည် သင် [ဣသရေလလူ] ၏အဘသဖွယ်၊ မိဖုရားတို့သည် သင့်ကိုနို့တိုက်မွေးမြူသော အမိသဖွယ်ဖြစ်လျက်၊ သင့်ရှေ့မှာ ဦးညွှတ်ပျပ်ဝပ်” လိမ့်မည်ဟု ကြိုပြောခဲ့၍တည်း။ (ဟေရှာယ ၄၉:၂၃၊ သမ္မာ; ၄၅:၁၄; ၆၀:၁၄) ဇာခရိလည်း မှုတ်သွင်းခံရ၍ အလားတူစွာ ဤသို့ရေး၏– “ထိုကာလ၌ ဘာသာအသီးအသီးကို ပြောတတ်သော [ဂျူးမဟုတ်သည့်] လူအမျိုးမျိုးတို့တွင် တစ်ကျိပ်သောလူတို့သည် ယုဒလူဖြစ်သောသူ၏ အဝတ်စွန်းကိုကိုင်လျက်၊ ဘုရားသခင်သည် သင်နှင့်အတူရှိတော်မူသည်ဟု အကျွန်ုပ်တို့သည် ကြားသိ၍ သင်တို့နှင့်အတူ လိုက်ပါမည်ဟု ဆိုကြလိမ့်မည်။” (ဇာခရိ ၈:၂၃) မှန်ပေသည်။ ဂျူးမဟုတ်သူများက ဂျူးများရှေ့ ဦးညွှတ်ရမည်ဖြစ်သည်။ ၎င်း၏ပြောင်းပြန်မဟုတ်။
၁၃။ ရှေးဣသရေလလူမျိုးအား မိန့်ဆိုသော ပရောဖက်ပြုချက်များ၏ ပြည့်စုံချက်ကို ခံစားရမည့်ဂျူးများမှာ မည်သူများနည်း။
၁၃ ထိုပရောဖက်ပြုချက်များမှာ ဘုရားသခင့် လက်ရွေးစင်လူမျိုးအား မိန့်ဆိုသောစကားဖြစ်၏။ ထိုသို့မိန့်ဆိုစဉ် ဇာတိဣသရေလလူမျိုးသည် အဆိုပါ ဂုဏ်အသရေရှိ အနေအထားတွင်ရှိသည်။ သို့သော် ဂျူးလူမျိုးတို့က မေရှိယကိုပယ်သောအခါ ယေဟောဝါလည်း သူတို့ကိုစွန့်တော်မူ၏။ (မဿဲ ၁၅:၃-၉; ၂၁:၄၂၊ ၄၃; လုကာ ၁၂:၃၂; ယောဟန် ၁:၁၀၊ ၁၁) ကိုယ်တော်သည် အေဒီ ၃၃ ခုနှစ် ပင်တေကုတ္တေပွဲနေ့၌ သူတို့အစား၊ ဘုရားသခင့် ဣသရေလလူမျိုးစစ် ခရစ်ယာန်အသင်းတော်ကို ရွေးချယ်တော်မူသည်။ ၎င်း၏အသင်းဝင်တို့မှာ နှလုံးအရေဖျားလှီးခြင်းအစစ်ကိုခံသော ဝိညာဏဂျူးများဖြစ်ကြသည်။ (တမန်တော် ၂:၁-၄၊ ၄၁၊ ၄၂; ရောမ ၂:၂၈၊ ၂၉; ဂလာတိ ၆:၁၆) ထို့နောက်၌ ဇာတိဂျူးတစ်ဦးချင်းအနေနှင့် ယေဟောဝါ၏ မျက်နှာသာခံစားရသော ဆက်ဆံရေးကို ပြန်လည်ရရှိနိုင်မည့် တစ်ခုတည်းသောနည်းလမ်းမှာ ယေရှုကိုမေရှိယအဖြစ် ယုံကြည်ခြင်းသာတည်း။ (မဿဲ၂၃:၃၇-၃၉) ဖိလဒေလဖိမြို့၌ ပုဂ္ဂိုလ်အချို့သည် ထိုသို့ပြုတော့မည့်ပုံရှိ၏။ *
၁၄။ ဟေရှာယ ၄၉:၂၃ နှင့် ဇာခရိ ၈:၂၃ တို့သည် ခေတ်သစ်အချိန်များ၌ အဘယ်သို့ထူးခြားစွာ ပြည့်စုံခဲ့ပြီနည်း။
၁၄ မျက်မှောက်ခေတ်တွင် ဟေရှာယ ၄၉:၂၃ နှင့် ဇာခရိ ၈:၂၃ စသော ပရောဖက်ပြုချက်များသည် အလွန်ထူးခြားစွာ ပြည့်စုံခဲ့ကြသည်။ ယောဟန်အတန်းအစား၏ ဟောပြောခြင်းကြောင့် လူတို့သည် ပွင့်နေသောတံခါးကိုဖြတ်၍ နိုင်ငံတော်လုပ်ငန်းထဲသို့ အစုလိုက် အပြုံလိုက် ဝင်ခဲ့ကြပြီ။ * သူတို့အများထုသည် ဝိညာဏဣသရေလအမည်ကို မဟုတ်မမှန် ခံယူကြသော ခရစ်ယာန်ဘောင်ဘာသာများမှ ထွက်လာကြသည်။ (ရောမ ၉:၆ နှိုင်းယှဉ်။) သူတို့သည် လူအုပ်ကြီးတစ်အုပ်အနေနှင့် ယေရှု၏ယဇ်သွေးကို ယုံကြည်ခြင်းဖြင့် မိမိတို့ဝတ်လုံကို လျှော်ဖွပ်၍ ဖြူစင်စေကြ၏။ (ဗျာဒိတ် ၇:၉၊ ၁၀၊ ၁၄) ခရစ်တော်၏ နိုင်ငံတော်အုပ်စိုးမှုကို နာခံလျက် ကမ္ဘာပေါ်တွင် ၎င်း၏ကောင်းချီးများကို ခံစားရဖို့ မျှော်လင့်ကြသည်။ ယေရှု၏ ဘိသိက်ခံညီတော်များ ‘နှင့်အတူ ဘုရားသခင် ရှိကြောင်းကို’ သူတို့သိသောကြောင့် ဘိသိက်ခံတို့ထံလာ၍ ဝိညာဉ်ရေးအရ၊ “ဦးညွှတ်” ကြသည်။ သူတို့သည် ထိုဘိသိက်ခံတို့ကို ပြုစုလျက် သူတို့နှင့်အတူ ကမ္ဘာချီ ညီအစ်ကိုအသင်းအပင်းအဖြစ် ပေါင်းစည်းကြလေသည်။—မဿဲ ၂၅:၃၄-၄၀; ၁ ပေတရု ၅:၉။
“စမ်းသပ်စစ်ဆေးရာ အချိန်နာရီ”
၁၅။ (က) ဖိလဒေလဖိမြို့ရှိ ခရစ်ယာန်များအား ယေရှုအဘယ်ကတိ ပေးတော်မူသနည်း။ ဘာလုပ်ဖို့ သူတို့အား တိုက်တွန်းသနည်း။ (ခ) ထိုခရစ်ယာန်များ အဘယ် “သရဖူ” ကိုရဖို့ မျှော်လင့်လျက်ရှိကြသနည်း။
၁၅ ယေရှု ဤသို့ဆက်လက်မိန့်ဆိုသည်– “သင်သည် ငါ၏ ကြံ့ကြံ့ခံခြင်းဆိုင်ရာ တရားစကားကို စောင့်ရှောက်သောကြောင့် မြေကြီးပေါ်မှာ နေထိုင်သူတို့ကို စမ်းသပ်စစ်ဆေးရန် မြေကြီးတစ်ပြင်လုံးပေါ် ကျရောက်လတ္တံ့သော စမ်းသပ်စစ်ဆေးရာ အချိန်နာရီ၌ ငါလည်း သင့်ကို ကာကွယ်စောင့်ရှောက်မည်။ ငါအမြန်ကြွလာမည်။ သင်၏သရဖူကို မည်သူမျှ မလုယူစေရန် ရှိရင်းစွဲကို မြဲမြဲစွဲကိုင်ထားပါ။” (ဗျာဒိတ် ၃:၁၀၊ ၁၁) ယောဟန်လက်ထက်က ခရစ်ယာန်များသည် ၁၉၁၄ ခုနှစ်မှ အစပြုသော သခင့်နေ့တော်တိုင်အောင် အသက်မရှင်ကြသော်လည်း ယေရှုကြွလာမည်ဟူသော ယုံကြည်ချက်ကြောင့် အဆက်မပြတ် ဟောပြောနိုင်သော ခွန်အားကိုရကြ၏။ (ဗျာဒိတ် ၁:၁၀; ၂ တိမောသေ ၄:၂) “သရဖူ” သို့မဟုတ်၊ ထာဝရအသက်ဆုသည် ကောင်းကင်၌ သူတို့ကို စောင့်လျက်နေသည်။ (ယာကုပ် ၁:၁၂; ဗျာဒိတ် ၁၁:၁၈) သူတို့သည် သေသည့်တိုင်အောင် သစ္စာစောင့်လျှင် ထိုဆုကို မည်သူမျှ မလုယူနိုင်။—ဗျာဒိတ် ၂:၁၀။
၁၆၊ ၁၇။ (က) “မြေကြီးတစ်ပြင်လုံးပေါ် ကျရောက်လတ္တံ့သော စမ်းသပ်စစ်ဆေးရာ အချိန်နာရီ” ကား အဘယ်နည်း။ (ခ) “စမ်းသပ်စစ်ဆေးရာ အချိန်နာရီ” အစပိုင်း၌ ဘိသိက်ခံတို့၏အခြေအနေ မည်သို့ရှိသနည်း။
၁၆ သို့သော် “စမ်းသပ်စစ်ဆေးရာ အချိန်နာရီ” ကား အဘယ်နည်း။ အာရှတိုက်ရှိ ထိုခရစ်ယာန်တို့သည် ရောမအင်ပါယာ၏ ကြောက်မက်ဖွယ် နှိပ်စက်ညှဉ်းပန်းမှု လှိုင်းလုံးကြီးဒဏ်ကို နောက်ထပ်ရင်ဆိုင်ရသည်မှန်၏။ * သို့တစေ၊ အဓိကပြည့်စုံချက်မှာ သခင့်နေ့တော်အတွင်း ဆိုက်ရောက်၍ ၁၉၁၈ ခုနှစ်မှစ၍ အထွတ်အထိပ်သို့ တက်လျက်နေသော ဆန်ခါချ တရားစီရင်ရာ အချိန်ပင်ဖြစ်သည်။ တည်ထောင်ပြီဖြစ်သော ဘုရားသခင့်နိုင်ငံတော်ကို ထောက်ခံမည်လော၊ စာတန့်လောကကို ထောက်ခံမည်လောဆိုသည်ကို ပိုင်းဖြတ်ရန် စမ်းသပ်ခြင်းဖြစ်၏။ အတော်အတန် တိုတောင်းသောကာလ၊ တစ် “နာရီ” သာကြာသော်လည်း မကုန်ဆုံးသေးပါ။ ၎င်းအချိန်မကုန်မချင်း “စမ်းသပ်စစ်ဆေးရာ အချိန်နာရီ” အတွင်း ကျွန်ုပ်တို့ အသက်ရှင်လျက်နေကြောင်း ဘယ်တော့မျှ မမေ့အပ်။—လုကာ ၂၁:၃၄-၃၆။
၁၇ ၁၉၁၈ ခုနှစ်၌ ဘိသိက်ခံခရစ်ယာန် ယောဟန်အတန်းအစားသည်—ခိုင်ခံ့သော ထိုဖိလဒေလဖိ အသင်းတော်ကဲ့သို့—ခေတ်သစ် ‘စာတန့်အဖွဲ့’ ၏တိုက်ခိုက်မှုကို ရင်ဆိုင်ကြရသည်။ ဝိညာဏဂျူးအမည်ခံ ခရစ်ယာန်ဘောင် ဘာသာရေးခေါင်းဆောင်တို့သည် မင်းစိုးရာဇာများကို ဉာဏ်နီဉာဏ်နက်ဖြင့် ခြယ်လှယ်ပြီး ခရစ်ယာန်စစ်တို့အား နှိပ်ကွပ်စေသည်။ သို့တစေ၊ ခရစ်ယာန်စစ်တို့သည် ‘ယေရှု၏ ကြံ့ကြံ့ခံခြင်းဆိုင်ရာ တရားစကားကို စောင့်ရှောက်’ ရန် အားသွန်ခွန်စိုက် ကြိုးပမ်းခဲ့ကြပေသည်။ သို့ဖြင့်၊ ဝိညာဉ်ရေးအကူအညီ၊ ထူးခြားလှသည့် “အစွမ်းခွန်အား အနည်းငယ်” ဖြင့် ခံရပ်ကျော်လွှားပြီး မိမိတို့ရှေ့မှာ ပွင့်လျက်ရှိသော တံခါးထဲသို့ဝင်ရန် လှုံ့ဆော်ခံရလေသည်။ အဘယ်နည်းဖြင့်နည်း။
“ပွင့်လျက်နေသည့် တံခါး”
၁၈။ ၁၉၁၉ ခုနှစ်တွင် အဘယ်ခန့်အပ်မှုကို ယေရှုပြုတော်မူသနည်း။ သို့နှင့် ခန့်အပ်ခံရသူသည် မည်သည့်နည်းဖြင့် ဟေဇကိ၏ သစ္စာရှိဘဏ္ဍာစိုးကဲ့သို့ ဖြစ်လာသနည်း။
၁၈ ယေရှုသည် ၁၉၁၉ ခုနှစ်၌ မိမိ၏ကတိကို ပြည့်စုံစေပြီး ဘိသိက်ခံခရစ်ယာန်စစ် လူစုကလေးကို “သစ္စာနှင့်သတိပညာရှိကျွန်” အဖြစ် အသိအမှတ်ပြုတော်မူသည်။ (မဿဲ ၂၄:၄၅-၄၇) ဤသူတို့သည် ဟေဇကိမင်း * လက်ထက်က သစ္စာရှိဘဏ္ဍာစိုး ဧလျာကိမ် ခံစားရသော အခွင့်အရေးနှင့်ဆင်တူသော အခွင့်အရေးကို ရကြသည်။ ဧလျာကိမ်နှင့်ပတ်သက်၍ ယေဟောဝါ ဤသို့မိန့်တော်မူ၏– “ဒါဝိဒ်မင်းမျိုး၏ တံခါးသော့ကို သူ၏ပခုံးပေါ်မှာ ငါတင်ထားသဖြင့်၊ သူသည် အဘယ်သူမျှ မပိတ်နိုင်အောင် ဖွင့်လိမ့်မည်။ အဘယ်သူမျှ မဖွင့်နိုင်အောင် ပိတ်လိမ့်မည်။” ဧလျာကိမ်သည် ဒါဝိဒ်၏မင်းမျိုးမင်းနွယ် ဟေဇကိအတွက် ကြီးလေးသောဝန်ကို ထမ်းရွက်ရသည်။ ထို့အတူ၊ ယနေ့လည်း ဘိသိက်ခံ ယောဟန်အတန်းအစား၏ ပခုံးပေါ်၌ “ဒါဝိဒ်မင်းမျိုး၏ တံခါးသော့” တင်ထားသည်။ အဓိပ္ပာယ်မှာ မေရှိယနိုင်ငံတော်၏ မြေကြီးဆိုင်ရာ အမှုရေးရာများ အပ်နှင်းခံရသည်။ ဤအခွင့်ထူးကို ထမ်းဆောင်နိုင်ဖို့ ယေဟောဝါသည် မိမိ၏ကျွန်များအား ခွန်အားပေးတော်မူသည်။ သူတို့၏ ချည့်နဲ့သောအင်အားကို ဖြည့်တင်းပေးလိုက်ရာ ကမ္ဘာချီသက်သေခံခြင်း လုပ်ငန်းကြီးကို လုပ်ဆောင်နိုင်လောက်အောင် ပြင်းထန်သောအင်အားအသွင်သို့ ကူးပြောင်းခဲ့သည်။—ဟေရှာယ ၂၂:၂၀၊ ၂၂; ၄၀:၂၉။
၁၉။ ၁၉၁၉ ခုနှစ်တွင် ယေရှုအပ်နှင်းသော ဝတ္တရားများကို ယောဟန်အတန်းအစားက မည်သို့ထမ်းရွက်သနည်း။ ယင်းကြောင့် ဘာဖြစ်ခဲ့သနည်း။
၁၉ ဘိသိက်ခံ အကြွင်းအကျန်သည် ၁၉၁၉ ခုနှစ်မှစ၍ ယေရှု၏စံနမူနာကိုယူ၍ နိုင်ငံတော်သတင်းကောင်း နှံ့ပြားအောင် ဟောပြောရန်တည်းဟူသော အားကုန်လောင်း ကင်ပိန်းတစ်ရပ်ကို စတင်လိုက်သည်။ (မဿဲ ၄:၁၇; ရောမ ၁၀:၁၈) ယင်းကြောင့် စာတန်၏ခေတ်သစ်အဖွဲ့ ခရစ်ယာန်ဘောင်ထဲက လူအချို့တို့သည် ဘိသိက်ခံ အကြွင်းအကျန်ထံသို့လာ၍ နောင်တရကာ ‘ဦးညွှတ်’ လျက် ထိုကျွန်၏ အခွင့်အာဏာကို အသိအမှတ် ပြုကြလေသည်။ သူတို့လည်း ယောဟန်အတန်းအစားထဲမှ သက်ကြီးရွယ်အိုတို့နှင့် တစ်စည်းတစ်လုံးတည်း ယေဟောဝါကို ဝတ်ပြုကြလေသည်။ ယေရှု၏ဘိသိက်ခံ ညီအစ်ကိုများ အရေအတွက် ပြည့်သည်တိုင်ဖြစ်သည်။ ၎င်းနောက်၊ “လူမျိုးအားလုံးထဲမှထွက်လာ” သော “လူအုပ်ကြီးတစ်အုပ်” သည် လာ၍ ဘိသိက်ခံကျွန်ရှေ့ “ဦးညွှတ်” ကြသည်။ (ဗျာဒိတ် ၇:၃၊ ၄၊ ၉) ကျွန်နှင့် ဤလူအုပ်ကြီးသည် ယေဟောဝါသက်သေ သိုးအုပ်တစ်အုပ်အဖြစ် အတူတကွ အမှုဆောင်ကြ၏။
၂၀။ ယနေ့ ယေဟောဝါသက်သေများသည် အဘယ်ကြောင့် ယုံကြည်ခြင်း အထူးခိုင်ခံ့ပြီး ဘုရားသခင့်အမှုတော်၌ တက်တက်ကြွကြွ ရှိရမည်နည်း။
၂၀ ဖိလဒေလဖိမြို့ရှိ ခရစ်ယာန်များနည်းတူ၊ ညီရင်းအစ်ကိုခင်တွယ်မှု အစစ်အမှန်၌ ပေါင်းစည်းလျက်ရှိသော ယနေ့ ယေဟောဝါသက်သေတို့သည် ဟောပြောခြင်းလုပ်ငန်းကို အရေးတကြီး လုပ်ကိုင်ရမည်ဖြစ်ကြောင်း သဘောပေါက်ကြသည်။ များမကြာမီ၊ ဒုက္ခဆင်းရဲကြီးသည် စာတန့်လောကဆိုးကို ပြည်ဖုံးကားချစေတော့မည်။ ထိုအခါ၊ ကျွန်ုပ်တို့တစ်ဦးစီသည် ယုံကြည်ခြင်းခိုင်မြဲပြီး ဘုရားသခင့်အမှုတော်၌ တက်ကြွလျက်ရှိသည်ကို တွေ့တော်မူပါစေ။ သို့မှသာ ကျွန်ုပ်တို့၏အမည်များသည် ယေဟောဝါ၏ အသက်စာစောင်ထဲမှ ပယ်ဖျက်ခံရတော့မည်မဟုတ်။ (ဗျာဒိတ် ၇:၁၄) ဖိလဒေလဖိမြို့ရှိ အသင်းတော်အား ယေရှုပေးတော်မူသော တိုက်တွန်းဆုံးမချက်ကို အလေးအနက် ခံယူကြစို့။ သို့မှသာ ကျွန်ုပ်တို့၏ အမှုဆောင်အခွင့်အရေးကို မြဲမြဲစွဲကိုင်ပြီး ထာဝရအသက်ဆုကို ဆွတ်ခူးနိုင်ကြမည်။
အောင်နိုင်သူတို့ရသော ကောင်းချီးများ
၂၁။ ယနေ့ ဘိသိက်ခံခရစ်ယာန်တို့သည် ‘ယေရှု၏ ကြံ့ကြံ့ခံခြင်းဆိုင်ရာ တရားစကားကို မည်သို့စောင့်ရှောက်ခဲ့’ ကြပြီနည်း။ အဘယ်အလားအလာက သူတို့ကို စောင့်ကြိုနေသနည်း။
၂၁ ယနေ့ ယောဟန်အတန်းအစားသည် ‘ယေရှု၏ ကြံ့ကြံ့ခံခြင်းဆိုင်ရာ တရားစကားကို စောင့်ရှောက်ခဲ့’ ကြပြီ။ ဆိုလိုသည်မှာ ကိုယ်တော့်စံနမူနာကိုလိုက်၍ ကြံ့ကြံ့ခံခဲ့ကြပြီ။ (ဟေဗြဲ ၁၂:၂၊ ၃; ၁ ပေတရု ၂:၂၁) သို့ဖြစ်၍ ဖိလဒေလဖိမြို့ရှိ အသင်းတော်အား ယေရှုဆက်လက်မိန့်ဆိုသော အောက်ပါစကားများကြောင့် များစွာအားတက်မိသည်– “အောင်နိုင်သူအား ငါ၏ဘုရားသခင့် ဗိမာန်တော်၌ တိုင်ဖြစ်စေမည်။ သူသည် ဗိမာန်တော်မှ ပြင်ပသို့ နောက်ထပ် ထွက်ခွာရတော့မည် မဟုတ်။”—ဗျာဒိတ် ၃:၁၂က။
၂၂။ (က) ယေရှု၏ဘုရားသခင့် ဗိမာန်တော်ကား အဘယ်နည်း။ (ခ) အောင်နိုင်သူ ဘိသိက်ခံခရစ်ယာန်တို့သည် အဘယ်နည်းဖြင့် ဤဗိမာန်တော်၏တိုင်များ ဖြစ်လာကြမည်နည်း။
၂၂ ယေဟောဝါ၏ ဗိမာန်တော်အတွင်း၌ တိုင်တစ်တိုင်ဖြစ်ရသည်မှာ အခွင့်ထူးလှပါသည်တကား။ ပကတိဗိမာန်တော်သည် ရှေးယေရုရှလင်မြို့၌ ယေဟောဝါ၏ ဝတ်ပြုရေးဗဟိုဖြစ်သည်။ ယဇ်ပုရောဟိတ်မင်းသည် တစ်နှစ်လျှင်တစ်ရက်၊ ဗိမာန်တော်အတွင်း “အထူးသန့်ရှင်းရာဌာန” ၌ ယေဟောဝါ ကျိန်းဝပ်တော်မူခြင်းကို ပုံဆောင်သော အံ့ဖွယ်အလင်းရှေ့တွင် ယဇ်ကောင်များ၏သွေးကို ပူဇော်သည်။ (ဟေဗြဲ ၉:၁-၇၊ ကဘ) ယေရှု နှစ်ခြင်းခံသောအခါ နောက်ဗိမာန်တော်တစ်ဆောင် ဖြစ်ပေါ်လာသည်။ ယေဟောဝါ၏ ဝတ်ပြုရေးအတွက်ဖြစ်သည့် ဗိမာန်တော်ကဲ့သို့သော မဟာဝိညာဏ အစီအစဉ်ပင်ဖြစ်သည်။ ၎င်းဗိမာန်တော်၏ သန့်ရှင်းတကာ့ အသန့်ရှင်းဆုံးဌာနသည် ကောင်းကင်၌တည်သည်။ ထိုနေရာတွင် ယေရှုသည် “ဘုရားသခင်၏ရှေ့တော်၌” အခစားဝင်၏။ (ဟေဗြဲ ၉:၂၄) ယေရှုသည် ယဇ်ပုရောဟိတ်မင်းဖြစ်၍ အပြစ်များကို လုံးဝချေဖျက်ရေးအတွက် ယဇ်တစ်ခုတည်းသာ ပူဇော်ရသည်။ စုံလင်သူလူသား ယေရှု၏ အသွေးတော်ပင်တည်း။ (ဟေဗြဲ ၇:၂၆၊ ၂၇; ၉:၂၅-၂၈; ၁၀:၁-၅၊ ၁၂-၁၄) မြေကြီးပေါ်မှ ဘိသိက်ခံခရစ်ယာန်များသည် သစ္စာတည်သမျှကာလပတ်လုံး ဤဗိမာန်တော်၏ မြေကြီးဆိုင်ရာ တံတိုင်းတော်များအတွင်း လက်ထောက်ယဇ်ပုရောဟိတ်များအဖြစ် အမှုဆောင်ကြသည်။ (၁ ပေတရု ၂:၉) သို့သော် အောင်နိုင်သည်နှင့်တစ်ပြိုင်နက် သူတို့လည်း ကောင်းကင်ရှိ သန့်ရှင်းတကာ့ အသန့်ရှင်းဆုံးသောဌာနထဲသို့ ဝင်ရောက်ကြပြီး ဗိမာန်တော်နှင့်တူသော ဝတ်ပြုရေးအစီအစဉ်၏ တိုင်များသဖွယ် မရွှေ့နိုင်သော အထောက်အပင့်များ ဖြစ်လာကြသည်။ (ဟေဗြဲ ၁၀:၁၉; ဗျာဒိတ် ၂၀:၆) “ဗိမာန်တော်မှ ပြင်ပသို့ နောက်ထပ် ထွက်ခွာ” ရမည့်အန္တရာယ် မရှိချေ။
၂၃။ (က) အောင်နိုင်သူ ဘိသိက်ခံခရစ်ယာန်များအား ရှေ့ဆက်၍ အဘယ်ကတိကို ယေရှုပေးတော်မူသနည်း။ (ခ) ယေဟောဝါ၏ နာမတော်နှင့် ယေရုရှလင်မြို့သစ်၏ အမည်တို့ကို ခရစ်ယာန်အောင်နိုင်သူတို့အပေါ် ရေးသားခြင်းကြောင့် အဘယ်အကျိုးရလဒ် ဖြစ်ပေါ်လာသနည်း။
၂၃ ယေရှု ဤသို့ဆက်၍မိန့်ဆိုသည်– “ငါသည် သူ့အပေါ်မှာ ငါ၏ဘုရားသခင့် နာမတော်ကိုလည်းကောင်း၊ ငါ၏ဘုရားသခင့် အထံတော်၊ ကောင်းကင်မှ ဆင်းသက်သော ယေရုရှလင်မြို့သစ် တည်းဟူသော ငါ၏ဘုရားသခင့် မြို့တော်အမည်ကိုလည်းကောင်း၊ ငါ၏ နာမသစ်ကိုလည်းကောင်း ရေးသားမည်။” (ဗျာဒိတ် ၃:၁၂ခ) မှန်ပေသည်။ ဤအောင်နိုင်သူတို့အပေါ်မှာ သူတို့၏ဘုရားသခင်၊ ယေရှု၏ဘုရားသခင်—ယေဟောဝါ၏ နာမတော်ကို ရေးသားထား၏။ ဤအချက်က ယေဟောဝါနှင့် ယေရှုသည် သီးခြားပုဂ္ဂိုလ်များဖြစ်ကြကြောင်း၊ သုံးပါးပေါင်းတစ်ဆူ၏ အပိုင်းနှစ်ပိုင်း မဟုတ်ကြောင်း ထင်ရှားစေသည်။ (ယောဟန် ၁၄:၂၈; ၂၀:၁၇) ဤဘိသိက်ခံများကို ယေဟောဝါ ပိုင်တော်မူကြောင်း သတ္တဝါအားလုံး သိရကြလိမ့်မည်။ သူတို့သည် ကိုယ်တော်၏ သက်သေများဖြစ်ကြသည်။ ယေရုရှလင်မြို့သစ်၏ အမည်လည်း သူတို့ကိုယ်ပေါ်မှာ ရေးထားသည်။ ၎င်းသည် ကောင်းကင်မြို့တော်ဖြစ်၍ သစ္စာရှိ လူသားအပေါင်းတို့အပေါ် ကောင်းကျိုးချမ်းသာပေးသည့် အုပ်ချုပ်မှုသက်ရောက်စေခြင်း ဟူသောသဘောဖြင့် ကောင်းကင်မှ ဆင်းသက်လာသည်။ (ဗျာဒိတ် ၂၁:၉-၁၄) သို့ဖြစ်၍ မြေကြီးပေါ်ရှိ ခရစ်ယာန်သိုးအားလုံးလည်း ထိုဘိသိက်ခံ အောင်နိုင်သူတို့သည် ကောင်းကင်ယေရုရှလင်မြို့တည်းဟူသော ထိုနိုင်ငံတော်၏ နိုင်ငံသားများဖြစ်ကြောင်း သိကြလိမ့်မည်။—ဆာလံ ၈၇:၅၊ ၆; မဿဲ ၂၅:၃၃၊ ၃၄; ဖိလိပ္ပိ ၃:၂၀; ဟေဗြဲ ၁၂:၂၂။
၂၄။ ယေရှု၏နာမသစ်က ဘာကိုကိုယ်စားပြုသနည်း။ ၎င်းကို သစ္စာရှိဘိသိက်ခံ ခရစ်ယာန်များအပေါ်မှာ မည်သို့ရေးတော်မူသနည်း။
၂၄ အဆုံး၌ ဘိသိက်ခံ အောင်ပွဲဝင်သူတို့သည် မိမိတို့ကိုယ်ပေါ်၌ ယေရှု၏အမည်သစ် ရေးသားခံရကြသည်။ ၎င်းအမည်သစ်မှာ ယေရှုအား ယေဟောဝါ အပ်နှင်းတော်မူသော ရာထူးသစ်၊ အခွင့်ထူးများကို ဆိုလိုသည်။ (ဖိလိပ္ပိ ၂:၉-၁၁; ဗျာဒိတ် ၁၉:၁၂) အခြားမည်သူမျှ ထိုအမည်ကိုမသိ။ အဓိပ္ပာယ်မှာ မည်သူမျှ ထိုအတွေ့အကြုံမရှိ၊ ထိုအခွင့်ထူးများ အပ်နှင်းခြင်းမခံရ။ သို့တစေ၊ သစ္စာရှိညီတော်များ၏ ကိုယ်ပေါ်မှာ မိမိ၏နာမကို ယေရှုရေးသောအခါ ထိုသူတို့သည် ကောင်းကင်ဘုံတွင် ယေရှုနှင့် အလွန်ရင်းနှီးသော ဆက်ဆံရေးရှိလာကြပြီး ကိုယ်တော်၏ အခွင့်အရေးများကိုပင် ဝေမျှခံစားကြရသည်။ (လုကာ ၂၂:၂၉၊ ၃၀) ထို့ကြောင့် “အသင်းတော်တို့အား ဝိညာဉ်တော် ဆင့်ဆိုသောစကားကို နားရှိသောသူ ကြားပါစေ” ဟူသောတိုက်တွန်းချက်ဖြင့် မိမိ၏သတင်းတော်ကို ယေရှု နိဂုံးချုပ်လိုက်သည်မှာ အဆန်းမဟုတ်။—ဗျာဒိတ် ၃:၁၃။
၂၅။ ဖိလဒေလဖိမြို့ရှိ အသင်းတော်အား ယေရှုပေးတော်မူသော ဩဝါဒနောက်ကွယ်မှ မူကို ယနေ့ခရစ်ယာန်တစ်ဦးချင်း မည်သို့ကျင့်သုံးနိုင်သနည်း။
၂၅ ထိုသတင်းတော်သည် ဖိလဒေလဖိမြို့မှ သစ္စာရှိခရစ်ယာန်များအဖို့ အားတက်ဖွယ်ဖြစ်ခဲ့မည်မှာ သေချာသည်။ သခင့်နေ့တော်အတွင်း ယနေ့ ယောဟန်အတန်းအစားအဖို့လည်း အလွန်ထိရောက်သော သင်ခန်းစာတစ်ရပ် မုချပါရှိ၏။ သို့သော် ၎င်း၏မူများသည် ဘိသိက်ခံအတွက်ဖြစ်စေ၊ အခြားသိုးအတွက်ဖြစ်စေ ခရစ်ယာန်တစ်ဦးစီအဖို့ အရေးကြီး၏။ (ယောဟန် ၁၀:၁၆) ကျွန်ုပ်တို့တစ်ဦးစီအနေနှင့် ဖိလဒေလဖိမြို့ရှိ ခရစ်ယာန်များနည်းတူ အဆက်မပြတ် နိုင်ငံတော်အသီးများ သီးလျက်နေသင့်သည်။ မည်သို့ပင်ဖြစ်စေ ကျွန်ုပ်တို့အားလုံးတွင် အစွမ်းခွန်အားအနည်းငယ်စီ ရှိကြသည်။ ကျွန်ုပ်တို့အားလုံး ယေဟောဝါ၏အမှုတော်၌ တစ်ခုခုလုပ်ကိုင်နိုင်၏။ ထိုခွန်အားကို အသုံးပြုကြစို့။ တိုးများလာသော နိုင်ငံတော်အခွင့်အရေးများနှင့် ပတ်သက်လျှင် ကျွန်ုပ်တို့ရှေ့ ပွင့်လာသမျှတံခါးထဲသို့ဝင်ဖို့ အသင့်ရှိကြစို့။ ထိုသို့သောတံခါးကို ယေဟောဝါ ဖွင့်ပေးရန်ပင် ဆုတောင်းနိုင်သည်။ (ကောလောသဲ ၄:၂၊ ၃) ယေရှု၏ ကြံ့ကြံ့ခံခြင်းနမူနာကို လိုက်လျှောက်ပြီး ကိုယ်တော့်နာမအပေါ် သစ္စာစောင့်လျှင် အသင်းတော်တို့အား ဘုရားသခင့်ဝိညာဉ်တော် ဆင့်ဆိုသောစကားကို ကြားတတ်သောနား ကျွန်ုပ်တို့၌လည်းရှိကြောင်း ထင်ရှားပါလိမ့်မည်။
[အောက်ခြေမှတ်ချက်]
^ အပိုဒ်၊ 13 ပေါလုလက်ထက်၌ ဂျူးတရားဇရပ်မှူး သုဿင်သည် ခရစ်ယာန်ညီအစ်ကိုတစ်ဦး ဖြစ်လာသည်။—တမန်တော် ၁၈:၁၇; ၁ ကောရိန္သု ၁:၁။
^ အပိုဒ်၊ 14 ယောဟန်အတန်းအစားဖြန့်ချိသော ကင်းမျှော်စင် မဂ္ဂဇင်းက ယင်းကို အခွင့်ကောင်းယူပြီး ဟောပြောခြင်းလုပ်ငန်း၌ တတ်နိုင်သမျှ အပြည့်အဝပါဝင်ကြရန် အဆက်မပြတ် အရေးပေးတင်ပြလာသည်။ ဥပမာ၊ ၂၀၀၄ ခုနှစ်၊ ဇန်နဝါရီ ၁ ရက်ထုတ် ကင်းမျှော်စင်ပါ “ယေဟောဝါ၏ဘုန်းတော်ကို ကြေညာကြစို့” နှင့် “သူတို့၏အသံသည် မြေတစ်ပြင်လုံး၌နှံ့ပြား” ဟူသော ဆောင်းပါးများကို ကြည့်ပါ။ ၂၀၀၄ ခုနှစ်၊ ဇွန် ၁ ရက်ထုတ်၊ “ဘုရားသခင်၏ဘုန်းတော်ကို ထင်ရှားစေသူတို့သည် ကောင်းချီးခံစားရကြ” ဟူသောဆောင်းပါးက အချိန်ပြည့်အမှုဆောင်ရန် “ပွင့်လျက်နေသည့်တံခါး” ထဲဝင်ဖို့ အလေးအနက် ဖော်ပြသည်။ ၂၀၀၅ ခုနှစ်၏ လတစ်လတည်းတွင် အများဆုံး ရှေ့ဆောင် ၁,၀၉၃,၅၅၂ ဦး မှတ်တမ်းသွင်းခဲ့သည်။
^ အပိုဒ်၊ 16 မက်ကလင်းတော့နှင့် စထရောင်းတို့၏ စွယ်စုံကျမ်း (အတွဲ ၁၀၊ စာမျက်နှာ ၅၁၉) က ဤသို့ဖော်ပြသည်– “သာသနာပ ယဇ်ပုရောဟိတ်များသည် ခရစ်ယာန်ဘာသာ၏ သိသာထူးခြားသော ထွန်းကားပြန့်ပွားမှုကိုမြင်၍ ထိတ်လန့်သဖြင့် လူထုကို ဆူပူထကြွအောင် မီးတိုက်လိုက်ရာ ဧကရာဇ်ဘုရင်များသည် ခရစ်ယာန်ဘာသာကို သတိမထားဘဲ မနေနိုင်တော့ချေ။ သို့ဖြစ်၍ လူတို့အား ဘုရားများကို မုန်းတီးသူများဖြစ်စေသော အဆိုပါအယူဝါဒသစ်ကို တစ်စစ နှိပ်ကွပ်ရန် ထရေးဂျင် (အေဒီ ၉၈-၁၁၇ ခုနှစ်) သည် အမိန့်များ ထုတ်ပြန်ခဲ့ရလေသည်။ [ရောမပိုင် အာရှနယ်ပယ်မြောက်ပိုင်းနှင့် နယ်ချင်းစပ်သော] ဘသီးနီးယားပြည်နယ်ဘုရင်ခံ ပလီနီအငယ်၏ အုပ်ချုပ်ရေးသည် ခရစ်ယာန်ဘာသာ၏ အဟုန်ပြင်းသောပြန့်ပွားမှုကြောင့် မိမိနယ်ပယ်အတွင်း သာသနာပလူထု ဒေါသူပုန်ထကြသဖြင့် အရှုပ်အထွေးအခက်အခဲများ ရင်ဆိုင်ရလေသည်။”
^ အပိုဒ်၊ 18 ဟေဇကိဟူသောအမည်သည် “ယေဟောဝါ ခွန်အားပေး” ဟူ၍အဓိပ္ပာယ်ရှိသည်။ ၄ ဓမ္မရာဇဝင် ၁၆:၂၀၊ ကမ္ဘာသစ်ဘာသာပြန် ရည်ညွှန်းကျမ်းစာ၊ အောက်ခြေမှတ်ချက်ကိုရှု။
[လေ့လာရန်မေးခွန်းများ]
[စာမျက်နှာ ၆၃ ပါ ရုပ်ပုံ]
ဦးညွှတ်ကြရန် လူများစွာတို့အား ကူညီခြင်း
ကောင်းကင်နိုင်ငံ ဝင်စားမည့် ဘိသိက်ခံ ၁၄၄,၀၀၀ အနက်၊ မြေကြီးအသက်တာ ကုန်ဆုံးရန်လိုသေးသော ယောဟန်အတန်းအစားဝင် အကြွင်းအကျန်သည် ၉,၀၀၀ ပင် မရှိတော့ပုံရသည်။ တစ်ချိန်တည်းတွင် လူအုပ်ကြီးသည် ၆,၆၀၀,၀၀၀ မကများသော ဗိုလ်ပါအဖြစ်သို့ တိုးပွားခဲ့ပြီ။ (ဗျာဒိတ် ၇:၄၊ ၉) အဘယ်အရာက ဤမျှကြီးမားသော တိုးပွားမှုကိုဖြစ်စေရန် ထောက်ကူခဲ့သနည်း။ ယေဟောဝါသက်သေများ ဖွင့်လှစ်သော ကျောင်းအမျိုးမျိုးက ကြီးမားသော အထောက်အကူ ဖြစ်ခဲ့သည်။ ကျမ်းစာကိုနှိမ်ပြီး လောကီအတွေးအခေါ်များကို ပို့ချသော ခရစ်ယာန်ဘောင်၏ ကျမ်းစာကျောင်းများနှင့် လုံးဝမတူ၊ ထိုသက်သေခံကျောင်းများသည် ဘုရားသခင့် နှုတ်ကပါဌ်တော်ကို ယုံကြည်စေရန် သင်ကြားစွဲမှတ်စေသည်။ သန့်ရှင်းစင်ကြယ်၍ သီလကောင်းမွန်စွာ နေထိုင်ခြင်းနှင့် ဘဝကိုအပ်နှံ၍ ဘုရားသခင့်အမှုတော်ကို ဆောင်ရွက်ခြင်းတို့နှင့်ပတ်သက်၍ ကျမ်းစာ၏လက်တွေ့ကျပုံကို သင်ကြားပြသသည်။ ၁၉၄၃ ခုနှစ်မှစ၍ ကမ္ဘာတစ်ဝန်းလုံး၊ ယေဟောဝါသက်သေများ၏ အသင်းတော်တစ်ခုစီက မိမိတို့၏ နိုင်ငံတော်ခန်းမ၌ ဒေသန္တရ သီအိုကရက်တစ် ဓမ္မအမှုကျောင်း ကိုကျင်းပကြသည်။ သန်းနှင့်ချီသောသူတို့သည် ဤကျောင်းကို အပတ်စဉ်တက်ကြပြီး ကျမ်းစာပညာပို့ချမှု အစီအစဉ်အတိုင်း တစ်ပြေးညီ လိုက်ကြသည်။
၁၉၅၉ ခုနှစ်မှစ၍ ယေဟောဝါသက်သေများသည် အသင်းတော်အကြီးအကဲများနှင့် ဓမ္မအမှုထမ်းများကို သင်တန်းပေးရန် နိုင်ငံတော် ဓမ္မအမှုကျောင်း များကိုလည်း ပြုလုပ်လာခဲ့သည်။ ၁၉၇၇ ခုနှစ်မှစ၍ ရှေ့ဆောင်သင်တန်းကျောင်း များကလည်း ထောင်နှင့်ချီသော ညီအစ်ကို ညီအစ်မများကို သင်တန်းပေးခဲ့သည်။ ထိုသူတို့သည် စစ်မှန်သော ဖိလဒေလဖိ စိတ်ဓာတ်ဖြင့် ဟောပြောခြင်းလုပ်ငန်း၌ ယေဟောဝါကို အချိန်ပြည့် ဝတ်ပြုကြသည်။ ကမ္ဘာ့လယ်ကွင်း၌ အထူးတာဝန် ထမ်းဆောင်ရေးအတွက် သက်သေခံအမျိုးသားများကို သင်တန်းပေးရန် ၁၉၈၇ ခုနှစ်တွင် ဓမ္မအမှု သင်တန်းကျောင်း ကို စတင်ဖွင့်လှစ်လိုက်သည်။
ယေဟောဝါသက်သေများ ကျင်းပပြုလုပ်သော ကျောင်းမျာအနက် အထင်ပေါ်ဆုံးကား ဂိလဒ် ကင်းမျှော်စင် ကျမ်းစာကျောင်း ပင်တည်း။ နယူးယောက်ပြည်နယ်ရှိ ဤသာသနာပြုကျောင်းသည် ၁၉၄၃ ခုနှစ်မှစ၍ နှစ်စဉ်ဆိုရမလောက် ကျောင်းသားနှစ်သုတ်ကို ဘွဲ့နှင်းလာခဲ့သည်။ နိုင်ငံခြား သာသနာပြု အမှုဆောင်ခြင်းအတွက် ယေဟောဝါ၏ ဓမ္မအမှုဆောင် ၇,၀၀၀ ကျော်ကို သင်တန်းပေးခဲ့ပြီ။ ဤကျောင်းမှ ဘွဲ့ရသူတို့သည် နိုင်ငံပေါင်းတစ်ရာကျော်တွင် အမှုထမ်းခဲ့သည်။ ထိုနိုင်ငံများစွာတို့တွင် နိုင်ငံတော်လုပ်ငန်း ဖွင့်လှစ်ခြင်း၌ အသုံးတော်ခံခဲ့ကြသည်။ အနှစ် ၆၀ လွန်သည့်နောက် ကနဦး သာသနာပြုအချို့သည် ယေဟောဝါ၏ အဖွဲ့အစည်း ကမ္ဘာချီတိုးပွားရေးတွင် အသစ်သော သာသနာပြုတို့နှင့် တွဲဖက်၍ အလုပ်လုပ်ဆဲပင်။ အံ့ချီးဖွယ် ကျယ်ပြန့်တိုးပွားမှုပါတကား။
[စာမျက်နှာ ၆၄ ပါ ရုပ်ပုံ]
၁၉၁၉ ခုနှစ်တွင် နန်းစံဘုရင်ယေရှုသည် ခရစ်ယာန်လုပ်ငန်းတော်အခွင့်ထူး တံခါးတစ်ပေါက်ကို ဖွင့်တော်မူသည်။ ထိုအခွင့်ထူးကို လှမ်းယူသော သစ္စာနှံခရစ်ယာန်များအရေအတွက်သည်တိုးများလျက်ရှိသည်။
ခုနှစ် ဟောပြောခြင်းပေါက်ရောက်ရာနိုင်ငံများ ပါဝင်ဟောပြောသူခရစ်ယာန်များ * အချိန်ပြည့်ဟောပြောသူများ *
၁၉၁၈ ၁၄ ၃,၈၆၈ ၅၉၁
၁၉၂၈ ၃၂ ၂၃,၉၈၈ ၁,၈၈၃
၁၉၃၈ ၅၂ ၄၇,၁၄၃ ၄,၁၁၂
၁၉၄၈ ၉၆ ၂၃၀,၅၃၂ ၈,၉၉၄
၁၉၅၈ ၁၇၅ ၇၁၇,၀၈၈ ၂၃,၇၇၂
၁၉၆၈ ၂၀၀ ၁,၁၅၅,၈၂၆ ၆၃,၈၇၁
၁၉၇၈ ၂၀၅ ၂,၀၈၆,၆၉၈ ၁၁၅,၃၈၉
၁၉၈၈ ၂၁၂ ၃,၄၃၀,၉၂၆ ၄၅၅,၅၆၁
၁၉၉၈ ၂၃၃ ၅,၅၄၄,၀၅၉ ၆၉၈,၇၈၁
၂၀၀၅ ၂၃၅ ၆,၃၉၀,၀၂၂ ၈၄၃,၂၃၄
[အောက်ခြေမှတ်ချက်များ]
^ အပိုဒ်၊ 69 အထက်ပါကိန်းဂဏန်းများမှာ လစဉ်ပျမ်းမျှဖြစ်ပါသည်။
^ အပိုဒ်၊ 69 အထက်ပါကိန်းဂဏန်းများမှာ လစဉ်ပျမ်းမျှဖြစ်ပါသည်။
[စာမျက်နှာ ၆၅ ပါ ရုပ်ပုံ]
ယေဟောဝါသက်သေများ၏လုပ်ဆောင်ချက်မှာ နှလုံးအကြွင်းမဲ့ဖြစ်ပေသည်။ ဥပမာ၊ ဟောပြောခြင်းနှင့် သွန်သင်ခြင်းတွင် သူတို့အသုံးပြုခဲ့သော အချိန်နာရီပေါင်းနှင့် လူတို့အိမ်များ၌ သူတို့ကျင်းပခဲ့သော အခမဲ့ကျမ်းစာသင်အံမှု၏ ဧရာမ အရေအတွက်ကိုသုံးသပ်ကြည့်ပါ။
ခုနှစ် ဟောပြောခြင်းတွင်သုံးစွဲသောနာရီပေါင်း(တစ်နှစ်တာစုစုပေါင်း) ကျင်းပသောကျမ်းစာသင်အံမှု(လစဉ်ပျမ်းမျှ)
၁၉၁၈ ၁၉,၁၁၆ မှတ်တမ်းမတင်ခဲ့
၁၉၂၈ ၂,၈၆၆,၁၆၄ မှတ်တမ်းမတင်ခဲ့
၁၉၃၈ ၁၀,၅၇၂,၀၈၆ မှတ်တမ်းမတင်ခဲ့
၁၉၄၈ ၄၉,၈၃၂,၂၀၅ ၁၃၀,၂၈၁
၁၉၅၈ ၁၁၀,၃၉၀,၉၄၄ ၅၀၈,၃၂၀
၁၉၆၈ ၂၀၈,၆၆၆,၇၆၂ ၉၇၇,၅၀၃
၁၉၇၈ ၃၀၇,၂၇၂,၂၆၂ ၁,၂၅၇,၀၈၄
၁၉၈၈ ၇၈၅,၅၂၁,၆၉၇ ၃,၂၃၇,၁၆၀
၁၉၉၈ ၁,၁၈၆,၆၆၆,၇၀၈ ၄,၃၀၂,၈၅၂
၂၀၀၅ ၁,၂၇၈,၂၃၅,၅၀၄ ၆,၀၆၁,၅၃၄
[စာမျက်နှာ ၅၉ ပါ ရုပ်ပုံ]
ပထမရာစုမှ ရောမသော့
