သင့်နာမည်သည် အသက်စာစောင်တွင် ပါရှိသလော
အခန်း ၁၁
သင့်နာမည်သည် အသက်စာစောင်တွင် ပါရှိသလော
သာဒိ
၁။ သာဒိမြို့ရှိ အသင်းတော်၏ ဝိညာဉ်ရေးအခြေအနေ မည်သို့ရှိသနည်း။ မိမိ၏သတင်းတော်ကို ယေရှု မည်သို့ နိဒါန်းပျိုးတော်မူသနည်း။
ခတ်သစ် အခီဆာ (သွာတိရ) မြို့၏တောင်ဘက် မိုင် ၃၀ ခန့်အကွာတွင် ဘုန်းပွင့်ယေရှုထံမှ သတင်းတော်လက်ခံရရှိသော နောက်အသင်းတော် သာဒိ တည်ရှိ၏။ ၎င်းမြို့သည် ခရစ်သက္ကရာဇ် မတိုင်မီ ခြောက်ရာစု၌ ရှေးလစ်ဒီးယားနိုင်ငံ၏ မာန်လွှားသောမြို့တော်၊ အလွန်ချမ်းသာသော ခရိုအက်စပ်စ်ဘုရင်၏ ပလ္လင်တည်ရာဖြစ်သည်။ ယောဟန်လက်ထက်ရောက်သော် ခေတ်ကျပ်နှင့်တိုးသဖြင့် ယခင်က ထည်ဝါခမ်းနားမှုသည် သမိုင်းအဖြစ်သာ ကျန်ရစ်လေသည်။ ထိုနေရာမှ ခရစ်ယာန်အသင်းတော်လည်း ဝိညာဉ်ရေးဘက် မွဲတေလာသည်။ ယေရှုသည် ချီးမွမ်းစကားဖြင့် အစမပျိုးသော သတင်းတော်ကို ပထမအကြိမ်အဖြစ် ပေးပို့လိုက်သည်။ ချီးမွမ်းမည့်အစား ဤသို့မိန့်ဆို၏– “သာဒိမြို့ရှိ အသင်းတော်၏ ကောင်းကင်တမန်ထံ ဤသို့ရေးလော့။ ဤကား ဘုရားသခင်၏ ဝိညာဉ်ခုနစ်ပါးနှင့် ကြယ်ခုနစ်လုံး ရှိသောသူ၏ မိန့်ဆိုချက်များတည်း။ ‘သင်ပြုသောအမှုများကို ငါသိ၏။ သင်၌ အသက်ရှင်သည်ဟူသော နာမည်ရှိသော်လည်း သေလျက်ရှိ၏။’”—ဗျာဒိတ် ၃:၁။
၂။ (က) ယေရှု၌ “ဝိညာဉ်ခုနစ်ပါး” ရှိခြင်းက သာဒိမြို့ရှိ ခရစ်ယာန်များအဖို့ အဘယ်အဓိပ္ပာယ်ထူး ရှိသနည်း။ (ခ) သာဒိအသင်းတော် မည်သို့သော ဂုဏ်သတင်းရှိသနည်း။ အမှန်မှာ မည်သို့နည်း။
၂ မိမိကိုယ်ကို ‘ဝိညာဉ်ခုနစ်ပါး ရှိသောသူ’ အဖြစ် ယေရှု အဘယ်ကြောင့် တင်ပြတော်မူသနည်း။ ၎င်းဝိညာဉ်များသည် အပြည့်အဝ စီးဆင်းနေသည့် ယေဟောဝါ၏ သန့်ရှင်းသောဝိညာဉ်တော်ကို ပုံခိုင်းသောကြောင့်တည်း။ နောက်ပိုင်း၌ ယောဟန်က ၎င်းတို့ကို “မျက်စိခုနစ်လုံး” အဖြစ် ဖော်ပြသည်။ ယေရှုအား ဘုရားသခင့်သန့်ရှင်းသော ဝိညာဉ်တော်ပေးသော ထိုးဖောက်ရှုမြင်နိုင်စွမ်းကို ရည်ညွှန်းသည်။ (ဗျာဒိတ် ၅:၆) သို့ဖြစ်၍ ယေရှုသည် အခြေအနေမှန်သမျှကို ဖော်ထုတ်၍ ကိုင်တွယ်နိုင်သည်။ (မဿဲ ၁၀:၂၆; ၁ ကောရိန္သု ၄:၅) သာဒိမြို့ရှိ အသင်းတော်သည် အသက်ရှင်သည်၊ တက်ကြွသည်ဟူသော ဂုဏ်သတင်းရှိသည်။ သို့သော် ဝိညာဉ်ရေးဘက် သေလျက်နေကြောင်း ယေရှုသိမြင်နိုင်၏။ ၎င်း၏အသင်းသား အများစုသည် ခရစ်ယာန်ဖြစ်မလာမီက အခြေအနေမျိုးသို့ ပြန်ရောက်သွားသည်မှာ သိသာလှ၏။ —ဧဖက် ၂:၁-၃; ဟေဗြဲ ၅:၁၁-၁၄ နှိုင်းယှဉ်။
၃။ (က) “သာဒိမြို့ရှိ အသင်းတော်၏ ကောင်းကင်တမန်” သည် ယေရှုလက်တော်၌ “ကြယ်ခုနစ်လုံး” ရှိသည်ဟူသောအချက်ကို အဘယ်ကြောင့် အထူးသတိပြုသင့်သနည်း။ (ခ) သာဒိမြို့ရှိ အသင်းတော်အား အဘယ်လေးနက်သော သြဝါဒကို ယေရှုပေးတော်မူသနည်း။
၃ ယေရှုက မိမိသည် “ကြယ်ခုနစ်လုံး” ရှိသောသူ ဖြစ်ကြောင်းကိုလည်း “သာဒိမြို့ရှိ အသင်းတော်၏ ကောင်းကင်တမန်” အား ပြန်လည်သတိရစေတော်မူသည်။ ထိုအသင်းတော် အကြီးအကဲများကို လက်ယာလက်ထဲ ကိုင်ထားခြင်းဖြင့် သိုးထိန်းခြင်းလုပ်ငန်း၌ သူတို့ကို ညွှန်ကြားပိုင်သောအာဏာ ကိုယ်တော်၌ရှိသည်။ သူတို့သည် မိမိတို့ ‘သိုးစုအကြောင်းကိုသိ’ ရန် အားထုတ်သင့်သည်။ (သုတ္တံ ၂၇:၂၃) ထို့ကြောင့် သူတို့သည် ယေရှု၏ နောက်စကားများကို ဂရုတစိုက် နားထောင်အပ်သည်– “နိုးကြားလျက်နေလော့။ သေလုဆဲ ကျန်သောအရာများကို အားဖြည့်လော့။ အကြောင်းမှာ သင်ပြုသောအမှုများသည် ငါ၏ဘုရားသခင် ရှေ့တော်၌ ပြီးပြည့်စုံသည်ကို ငါမတွေ့ရ။ ထို့ကြောင့် ယခင်က သင်မည်သို့ ခံယူခဲ့သည်၊ မည်သို့ ကြားနာခဲ့သည်ကို အောက်မေ့၍ စောင့်ရှောက်လျက်နေလော့။ နောင်တရလော့။ သင်မနိုးထလျှင် သူခိုးကဲ့သို့ ငါ မုချလာမည်။ ငါလာမည့် အချိန်နာရီကိုလည်း သင်လုံးဝ သိရလိမ့်မည်မဟုတ်။”—ဗျာဒိတ် ၃:၂၊ ၃။
၄။ ပေတရု၏စကားများသည် “ကျန်သောအရာများကို အားဖြည့်” နိုင်ရန် သာဒိမြို့ရှိ အသင်းတော်ကို မည်သို့ထောက်ကူနိုင်မည်နည်း။
၄ သာဒိမြို့ရှိ အကြီးအကဲများသည် မိမိတို့ သမ္မာတရား ရစက ခံစားရသော ဝမ်းမြောက်ခြင်းနှင့် ကောင်းချီးများကို သတိရဖို့လိုသည်။ ယခုမူ ဝိညာဉ်ရေးလုပ်ငန်းဘက်၌ သေနေကြသည်။ ယုံကြည်ခြင်းအလုပ် ကင်းမဲ့သဖြင့် သူတို့၏အသင်းတော် မီးခွက်သည် မှိတ်တုတ်မှိတ်တုတ် ဖြစ်နေပြီ။ လွန်ခဲ့သောနှစ်များ၌ တမန်တော်ပေတရုသည် (သာဒိအသင်းတော် ပါဝင်ဖွယ်ရှိသော) အာရှတိုက်ရှိ အသင်းတော်များထံ စာရေး၍ ခရစ်ယာန်များ လက်ခံခဲ့သည့် ဘုန်းတောက်သတင်းကောင်းကို လေးမြတ်သောစိတ်ရှိရန် အားပေးခဲ့သည်။ ၎င်းသတင်းကောင်းကို ယောဟန်၏ရူပါရုံမှ ဝိညာဉ်ခုနစ်ပါးဖြင့် ကိုယ်စားပြုသော “ကောင်းကင်ဘုံမှ စေလွှတ်တော်မူသော သန့်ရှင်းသောဝိညာဉ်တော်” နှင့်တကွ ကြွေးကြော်ခဲ့သည်။ ပေတရုက ထိုအာရှခရစ်ယာန်တို့အား မိမိတို့သည် ‘မှောင်မိုက်ထဲမှ အံ့ဖွယ်သော အလင်းတော်သို့ ခေါ်သွင်းတော်မူသောအရှင်၏ ဂုဏ်ကျေးဇူးများကို ဖော်ပြစေခြင်းငှာ၊ ရွေးချယ်သောလူမျိုး၊ မင်းစည်းစိမ်ရှိသော ယဇ်ပုရောဟိတ်မျိုး၊ သန့်ရှင်းသောလူမျိုး၊ ပိုင်ဆိုင်တော်မူရာလူမျိုးတော်ဖြစ်ကြောင်း’ ပြန်သတိရစေသည်။ (၁ ပေတရု ၁:၁၂၊ ၂၅; ၂:၉) သာဒိမြို့ရှိ အသင်းတော်သည် ထိုသို့သောဝိညာဉ်ရေးရာ သမ္မာတရားများကို ဆင်ခြင်လျှင် နောင်တရလျက် “သေလုဆဲ ကျန်သောအရာများကို အားဖြည့်” နိုင်ရန် အထောက်အကူရမည်။—၂ ပေတရု ၃:၉ နှိုင်းယှဉ်။
၅။ (က) သာဒိမြို့ရှိ ခရစ်ယာန်များ၏ လေးမြတ်ခြင်းစိတ် မည်သို့ဖြစ်ခဲ့သနည်း။ (ခ) သာဒိခရစ်ယာန်တို့သည် ယေရှု၏သြဝါဒကို မနာယူလျှင် မည်သို့ဖြစ်မည်နည်း။
၅ လောလောဆယ် သူတို့၏သမ္မာတရား လေးမြတ်နှစ်သက်စိတ်သည် သေတော့မည့်မီးပမာ ဖြစ်နေ၏။ အသင်းသားအနည်းငယ်မျှသာ ဆက်၍ထွန်းလင်းနေကြသည်။ မီးပွားကို ယပ်ခတ်မီးထိုးရန်၊ မိမိတို့၏ လျစ်လျူရှုမှုကြောင့် ကျူးလွန်မိသော အပြစ်များအတွက် နောင်တရရန်၊ ဝိညာဉ်ရေးဘက်ရှင်သန်သော အသင်းတော်ပြန်ဖြစ်လာရန် သူတို့ကို ယေရှုတိုက်တွန်းတော်မူသည်။ (၂ တိမောသေ ၁:၆၊ ၇ နှိုင်းယှဉ်။) သို့မဟုတ်လျှင် တရားစီရင်ပြစ်ဒဏ်ပေးရန် “သူခိုးကဲ့သို့” ယေရှုရုတ်တရက် ကြွလာသောအခါ သာဒိမြို့ရှိ အသင်းတော်သည် အသင့်ရှိနေမည်မဟုတ်။—မဿဲ ၂၄:၄၃၊ ၄၄။
“သူခိုးကဲ့သို့” ကြွလာခြင်း
၆။ ယေရှုသည် ၁၉၁၈ ခုနှစ်၌ အဘယ်နည်းဖြင့် “သူခိုးကဲ့သို့” ကြွလာသနည်း။ မိမိနောက်လိုက်အမည်ခံတို့ အလယ်၌ အဘယ်အခြေအနေကို တွေ့တော်မူသနည်း။
၆ “သူခိုးကဲ့သို့” ငါလာမည်ဟူသော ယေရှု၏သတိပေးချက်သည် ယခုခေတ်အထိ သက်ဆိုင်၏။ သခင့်နေ့တော်တိုင် အသက်ရှင်သော ခရစ်ယာန်များနှင့် အထူးသက်ဆိုင်သည်။ ၁၉၁၄ ခုနှစ် လွန်၍မကြာမီ မာလခိ၏ အောက်ပါပရောဖက်ပြုချက် ပြည့်စုံလာသည်– “သင်တို့ရှာသောအရှင်၊ နှစ်သက်သော ပဋိညာဉ်တမန်တော်သည် မိမိဗိမာန်တော်သို့ ရုတ်တရက် ကြွလာလိမ့်မည်။ ကြည့်လော့၊ ထိုအရှင်ကြွလာလိမ့်မည်ဟု ဗိုလ်ခြေတို့အရှင် ထာဝရဘုရား မိန့်တော်မူ၏။” (မာလခိ ၃:၁၊ သမ္မာ; ဗျာဒိတ် ၁:၁၀) မိမိနောက်လိုက် အမည်ခံသူတို့ကို စစ်ဆေး၍ တရားစီရင်ရန် “ပဋိညာဉ်တမန်တော်” အဖြစ် ယေရှု ကြွလာတော်မူသည်။ (၁ ပေတရု ၄:၁၇) ၁၉၁၈ ခုနှစ်ဖြစ်သော ထိုအချိန်၌ ခရစ်ယာန်ဘောင်သည် ပထမကမ္ဘာစစ်အတွင်း သွေးသွန်းခြင်းအမှု၌ ပါဝင်ခြင်းဖြင့် ဝိညာဉ်ရေးအရ လုံးလုံးလျားလျား သေနေသည်။ ခရစ်ယာန်စစ်များပင် စစ်မဖြစ်မီက တက်ကြွစွာ ဟောပြောခဲ့သော်လည်း ဝိညာဉ်ရေးတွင် ငိုက်မျဉ်းလာသည်။ သူတို့ထဲမှထင်ရှားသော အကြီးအကဲအချို့သည် ထောင်ချခံရပြီး ဟောပြောခြင်းလုပ်ငန်း ရပ်စဲလုခမန်း ဖြစ်ခဲ့ရသည်။ နောက်တစ်နှစ်၌ ထိုခရစ်ယာန်များကို ယေဟောဝါ၏ ဝိညာဉ်တော် နှိုးဆော်သောအခါ၌ အားလုံး အသင့်မဖြစ်ခဲ့။ အချို့တို့သည် ယေရှု၏ပုံပမာထဲမှ မိုက်သောအပျိုကညာများကဲ့သို့ဖြစ်၍ ယေဟောဝါကိုဝတ်ပြုခြင်း အခွင့်ထူးအတွက် ဝိညာဉ်ရေးဘက် အသင့်မရှိခဲ့ကြချေ။ သို့သော် ဝမ်းသာစရာမှာ လူအမြောက်အမြားတို့သည် သတိပညာရှိသော အပျိုကညာများကဲ့သို့ဖြစ်၍ “လူသားသည် ကြွလာအံ့သော နေ့ရက်အချိန်နာရီကို သင်တို့သည် မသိသောကြောင့် စောင့်နေကြလော့” ဟူသောသတိပေးချက်ကို နာခံခဲ့ကြပေသည်။—မဿဲ ၂၅:၁-၁၃။
၇။ ယနေ့ခရစ်ယာန်များ အဘယ်ကြောင့် နိုးကြားရန်လိုသနည်း။
၇ သခင့်နေ့တော် အဦးပိုင်း၌သာ ခရစ်ယာန်တစ်ဦး နိုးကြားနေရန်လိုသည် မဟုတ်ပါ။ “ထိုအရာခပ်သိမ်း ပြည့်စုံချိန် နိမိတ်လက္ခဏာ” နှင့်စပ်လျဉ်းသော မဟာပရောဖက်ပြုချက်၌ ယေရှုက ဤသို့လေးလေးနက်နက် သတိပေးတော်မူသည်– “ထိုနေ့ရက်နာရီကို မည်သူမျှမသိ။ . . . သတိမလစ်ဘဲ စောင့်နေကြလော့။ ထိုအချိန်ကို သင်တို့မသိကြ။ စောင့်နေကြဟူ၍ သင်တို့အား ငါမှာထားသည့်နည်းတူ လူခပ်သိမ်းတို့အား ငါမှာထားသည်။” (မာကု ၁၃:၄၊ ၃၂၊ ၃၃၊ ၃၇၊ သမ) မှန်ပေသည်။ ဘိသိက်ခံဖြစ်စေ၊ လူအုပ်ကြီးအဝင်ဖြစ်စေ၊ ကျွန်ုပ်တို့တစ်ဦးစီသည် ထိုအချိန်တိုင်အောင် နိုးကြားနေရန်လို၏။ ဝိညာဉ်ရေးဘက် အိပ်ပျော်မသွားရန် ခုခံတိုက်လှန်ရမည်။ “သူခိုးသည် ညအခါ လာသကဲ့သို့” ယေဟောဝါ၏နေ့တော် ရောက်လာသောအခါ ကျွန်ုပ်တို့ နိုးနိုးကြားကြား ရှိသည်ကိုတွေ့၍ ကျွန်ုပ်တို့အပေါ် မျက်နှာသာပေး တရားစီရင်ချက် ချတော်မူပါစေ။—၁ သက်သာလောနိတ် ၅:၂၊ ၃; လုကာ ၂၁:၃၄-၃၆; ဗျာဒိတ် ၇:၉။
၈။ ယနေ့ ယောဟန်အတန်းအစားသည် ဘုရားသခင့် လူမျိုးတော်အား ဝိညာဉ်ရေးဘက် နိုးကြားလျက်နေစေရန် မည်သို့စေ့ဆော်သနည်း။
၈ ယနေ့ ယောဟန်အတန်းအစား ကိုယ်နှိုက်က ဘုရားသခင့်လူမျိုးတော်အား ဝိညာဉ်ရေးဘက် သက်ဝင်လှုပ်ရှားလျက် ရှိနေစေရန် လှုံ့ဆော်ပေးဖို့လိုကြောင်း သတိချပ်မိသည်။ ထို့ကြောင့် ကမ္ဘာတစ်ဝန်းတွင် နှစ်စဉ်နှစ်တိုင်း အထူးစည်းဝေးများကို အကြိမ်ကြိမ် စီစဉ်ပေးသည်။ မကြာသေးမီက ခရိုင်စည်းဝေးကြီး ၂,၉၈၁ ခုကျင်းပရာ၊ လူပေါင်း ၁၀,၉၅၃,၇၄၄ ဦးတက်ရောက်ပြီး ယုံကြည်သူလူသစ် ၁၂၂,၇၀၁ ဦး နှစ်ခြင်းခံခဲ့သည်။ ယောဟန်အတန်းအစားသည် ကင်းမျှော်စင် မဂ္ဂဇင်းကိုသုံး၍ ယေဟောဝါ၏နာမတော်နှင့် ရည်ရွယ်ချက်ကို ကြေညာခဲ့သည်မှာ အနှစ်တစ်ရာကျော်လေပြီ။ ကမ္ဘာစစ်ကြီးနှစ်ခုအတွင်း နှိပ်စက်ညှဉ်းပန်းမှုကို ခံရပ်နိုင်ရန် ကင်းမျှော်စင် က “ရဲဝံ့သူများ ကောင်းချီးရ” (၁၉၁၉ ခုနှစ်)၊ “ဆော်သြသံ” (၁၉၂၅ ခုနှစ်) နှင့် “နှိပ်စက်ညှဉ်းပန်းမှု အရေးနိမ့်” စသောဆောင်းပါးများ ရေးသားဖြန့်ချိကာ ယေဟောဝါသက်သေများကို စေ့ဆော်၍ အားသစ်သွင်းပေးခဲ့သည်။
၉။ (က) ခရစ်ယာန်များအားလုံး မိမိတို့ကိုယ်ကို မည်သို့မပြတ် မေးသင့်သနည်း။ (ခ) ကင်းမျှော်စင်သည် မည်သို့အားပေးခဲ့သနည်း။
၉ သာဒိမြို့မှာကဲ့သို့ ယနေ့အသင်းတော်များရှိ ခရစ်ယာန်အားလုံးလည်း ကိုယ့်ကိုယ်ကို အစဉ်မပြတ် ဆန်းစစ်နေရန် အလွန်အရေးကြီးသည်။ ကျွန်ုပ်တို့အားလုံး ကိုယ့်ကိုယ်ကို ဤသို့မပြတ် မေးသင့်သည်– ကျွန်ုပ်တို့ “ပြုသောအမှုများသည်” ဘုရားသခင်ရှေ့တော်၌ “ပြီးပြည့်စုံ” ၏လော။ အခြားသူများကို မဝေဖန်ဘဲ ကျွန်ုပ်တို့ ကိုယ်တိုင် ကိုယ်ကျိုးစွန့်စိတ်ဓာတ်မွေးမြူ၍ ဘုရားသခင့်အမှုတော်ကို စိုးလ်အကြွင်းမဲ့ဆောင်ရွက်ရန် အားထုတ်နေသလော။ ဤအချက်နှင့်စပ်လျဉ်း၍ ကင်းမျှော်စင် မဂ္ဂဇင်းက “ကိုယ်ကိုကိုယ် စစ်ကြောနေကြလော့” နှင့် “မိမိအလိုသို့လိုက်၍ အသက်မရှင်” စသောအကြောင်းများကို တင်ပြဆွေးနွေးခြင်းဖြင့် အားသစ်ပေးခဲ့သည်။ * ဤသို့သော ကျမ်းပေးအထောက်အမ ရှိသည်ဖြစ်၍ ယေဟောဝါရှေ့တော်တွင် သစ္စာလမ်းကို နှိမ့်ချတည်ကြည်စွာ လျှောက်လှမ်းရင်း ကိုယ့်အတွင်းလူကို စူးစမ်းစစ်ဆေးကြစို့။—ဆာလံ ၂၆:၁-၃; ၁၃၉:၂၃၊ ၂၄။
“နာမည်အနည်းငယ်”
၁၀။ သာဒိမြို့ရှိ အသင်းတော်၌ အဘယ်အားတက်ဖွယ်အချက်ကို ယေရှု သတိပြုမိသနည်း။ ၎င်းကြောင့် ကျွန်ုပ်တို့ မည်သို့ဖြစ်သင့်သနည်း။
၁၀ သာဒိမြို့ရှိအသင်းတော်အား ယေရှု ရှေ့ဆက်၍မိန့်ဆိုသော စကားများသည် အလွန်အားရှိစရာဖြစ်သည်။ “သို့သော်လည်း၊ သာဒိမြို့၌ သင်တို့တွင် မိမိတို့ဝတ်ရုံကို မညစ်ညမ်းစေသော နာမည်အနည်းငယ် ရှိပေသည်။ သူတို့သည် ထိုက်တန်သောကြောင့် ဝတ်ရုံဖြူဝတ်လျက် ငါနှင့်အတူ သွားလာရလိမ့်မည်။ အောင်နိုင်သူသည် ဤသို့ပင် ဝတ်ရုံဖြူ ဝတ်ဆင်ရလိမ့်မည်။ ငါသည် သူ၏နာမည်ကို အသက်စာစောင်မှ လုံးဝ ပယ်ဖျက်မည်မဟုတ်ဘဲ ငါ၏ခမည်းတော်နှင့် ကိုယ်တော်၏ ကောင်းကင်တမန်များရှေ့တွင် သူ့နာမည်ကို ငါ အသိအမှတ်ပြုမည်” ဟု ကိုယ်တော်မိန့်တော်မူ၏။ (ဗျာဒိတ် ၃:၄၊ ၅) ဤစကားများသည် ကျွန်ုပ်တို့ကို စေ့ဆော်သည့်ပြင် သစ္စာစောင့်ရန် သန္နိဋ္ဌာန်ကို ပို၍ မခိုင်မာစေပေလော။ အကြီးအကဲအဖွဲ့၏ ပေါ့ဆမှုကြောင့် အသင်းတော်တစ်ခုလုံး ဝိညာဉ်ရေးဘက် အိပ်မောကျသွားနိုင်သည်။ သို့တစေ၊ အသင်းတော်ထဲမှ ပုဂ္ဂိုလ်အချို့သည် မိမိတို့၏ ခရစ်ယာန်ဂုဏ်ပုဒ်ကို မညစ်မညမ်း စင်စင်ကြယ်ကြယ်ရှိစေရန် သတ္တိရှိရှိနှင့် စောင့်ထိန်းခြင်းဖြင့် ယေဟောဝါရှေ့တော်၌ ဆက်လက်၍ နာမည်ကောင်း ရကောင်းရကြပေမည်။—သုတ္တံ ၂၂:၁။
၁၁၊ ၁၂။ (က) မဟာဖောက်ပြန်သင်းခွဲမှု ကာလ၌ပင် ပုဂ္ဂိုလ်အချို့သည် အဘယ်နည်းဖြင့် သစ္စာရှိ “နာမည်အနည်းငယ်” ကဲ့သို့ ဖြစ်ခဲ့ရမည်နည်း။ (ခ) ဂျုံပင်နှင့်တူသော ခရစ်ယာန်တို့သည် သခင့်နေ့တော်အတွင်း မည်သို့သက်သာရာ ရခဲ့ကြသနည်း။
၁၁ မှန်ပေသည်၊ ထို “ဝတ်ရုံ” သည် ဖြောင့်မတ်သော ခရစ်ယာန်ဂုဏ်ပုဒ်ကို ရည်ညွှန်းသည်။ (ဗျာဒိတ် ၁၆:၁၅; ၁၉:၈ နှိုင်းယှဉ်။) သာဒိမြို့၌ အများစုက ဥပေက္ခာပြု၍နေသော်လည်း “နာမည်အနည်းငယ်” ဖြစ်သော ဘိသိက်ခံခရစ်ယာန်တို့မှာမူ ထိုဂုဏ်ပုဒ်ကို ဆက်ထိန်းသိမ်းနိုင်ကြသည်ကို တွေ့ရသဖြင့် ယေရှုအဖို့ ပီတိဖြစ်ဖွယ်ပင်။ ထို့နည်းတူ ရာစုနှစ်များစွာကြာသော မဟာဖောက်ပြန်သင်းခွဲမှု ကာလအတွင်း ကမ္ဘာ့မိစ္ဆာဘာသာအင်ပါယာ မဟာဗာဗုလုန်အထဲတွင် ခရစ်ယာန်အမည်ခံများ စုံးစုံးမြုပ်နေစဉ်တစ်လျှောက်၊ အကျပ်အတည်းကြား ရုန်းကန်အားထုတ်လျက် ယေဟောဝါ၏အလိုတော်ကို ဆောင်ရွက်သောပုဂ္ဂိုလ်အချို့ အစဉ်ရှိခဲ့မည်မုချ။ သူတို့သည် ဂိုဏ်းဂဏပေါင်းပင်များကြားက ဖုံးကွယ်နေသော ဂျုံပင်နှင့်တူသည့် ဖြောင့်မတ်သူများတည်း။—ဗျာဒိတ် ၁၇:၃-၆; မဿဲ ၁၃:၂၄-၂၉။
၁၂ ယေရှုက မိမိသည် “ကပ်ကမ္ဘာ ကုန်သည်တိုင်အောင်” ဂျုံပင်နှင့်တူသော ထိုခရစ်ယာန်တို့နှင့် အတူရှိမည်ဟု ကတိပြုတော်မူသည်။ သူတို့ မည်သူဖြစ်ကြောင်း၊ မည်သို့သော နာမည်ကောင်းကို ရထားကြကြောင်း ကိုယ်တော်သိတော်မူ၏။ (မဿဲ ၂၈:၂၀; ဒေသနာ ၇:၁) သခင့်နေ့တော် အစပြုချိန်၌ အသက်ရှင်လျက်ရှိသေးသည့် “အနည်းငယ်” သော ထိုသစ္စာရှိတို့ မည်မျှဝမ်းသာခဲ့မည်ကို တွေးကြည့်ပါ။ သူတို့သည် ဝိညာဉ်ရေးဘက်သေနေသော ခရစ်ယာန်ဘောင်နှင့် ယခုကျမှ ခွဲခြားခံရပြီး စမုရနမြို့ရှိ အသင်းတော်နှင့် ပို၍တူသော ဖြောင့်မတ်သည့် အသင်းတော်ထဲသို့ စုသွင်းခြင်းခံရကြသည်။—မဿဲ ၁၃:၄၀-၄၃။
၁၃။ “မိမိတို့ဝတ်ရုံကို မညစ်ညမ်းစေ” သော ဘိသိက်ခံ ခရစ်ယာန်များအဖို့ အဘယ်ကောင်းချီးများ သိုထားသနည်း။
၁၃ အဆုံးတိုင်သစ္စာရှိပြီး မိမိတို့၏ ခရစ်ယာန်ဂုဏ်ပုဒ်ကို မစွန်းထင်းစေရန် စောင့်ထိန်းသော သာဒိမြို့သားတို့သည် အံ့ချီးဖွယ်မျှော်လင့်ချက်ကို ရကြ၏။ ယေရှု၏မေရှိယနိုင်ငံတော် ၁၉၁၄ ခုနှစ်၌ တည်ထောင်သည့်နောက် သူတို့သည် နာမ်ဝိညာဉ်အသက်တာသို့ ထမြောက်လာကြပြီး အောင်နိုင်သူများအနေနှင့် မိမိတို့၏ အနာအဆာ အစွန်းအထင်းမဲ့ ဖြောင့်မတ်မှုကို ပုံဆောင်သော ဝတ်ရုံဖြူကို ဝတ်ဆင်ကြရလေသည်။ အသက်လမ်းကျဉ်းကို လျှောက်ခဲ့ကြပြီဖြစ်ရာ ထာဝရဆုလာဘ်ကို ခံစားကြရမည်။—မဿဲ ၇:၁၄; ဗျာဒိတ် ၆:၉-၁၁ ကိုလည်းရှု။
ထာဝစဉ် အသက်စာစောင်၌
၁၄။ “အသက်စာစောင်” ကား အဘယ်နည်း။ မည်သူတို့၏နာမည်များ ပါရှိသနည်း။
၁၄ “အသက်စာစောင်” ကား အဘယ်နည်း။ မည်သူ့နာမည် ၎င်း၌ကျန်ရှိမည်နည်း။ အသက်စာစောင်၊ သို့မဟုတ် စာလိပ်သည် ထာဝရအသက်ရရန် စောင့်မျှော်သော ယေဟောဝါ၏အစေခံများ နာမည်မှတ်တမ်းကို ရည်ညွှန်းသည်။ (မာလခိ ၃:၁၆) ဗျာဒိတ်ကျမ်း ဤနေရာ၌ ဘိသိက်ခံခရစ်ယာန်များ၏ အမည်များကို အထူးရည်ညွှန်းသည်။ သို့သော် ကမ္ဘာပေါ် ထာဝရအသက် ရမည့်သူတို့၏ အမည်များလည်း ပါရှိသည်။ ထို့ပြင် ထိုစာစောင်ထဲမှ နာမည်များကို ‘ပယ်ဖျက်’ နိုင်သည်။ (ထွက်မြောက်ရာ ၃၂:၃၂၊ ၃၃) သို့ရာတွင် သေသည့်အချိန်အထိ အသက်စာစောင်၌ မိမိတို့နာမည်ကျန်ရစ်သော ယောဟန်အတန်းအစားဝင်တို့သည် ကောင်းကင်၌ မသေနိုင်သောအသက်ကို ရကြ၏။ (ဗျာဒိတ် ၂:၁၀) မိမိ၏ခမည်းတော်နှင့် ကိုယ်တော်၏ ကောင်းကင်တမန်များရှေ့ ယေရှု အထူးအသိအမှတ်ပြုမည့် အမည်များမှာ ဤသူတို့၏ နာမည်များပင်ဖြစ်သည်။ ကြီးမြတ်လှသော ဆုပါတကား။
၁၅။ လူအုပ်ကြီးအဝင်တို့သည် အသက်စာစောင်၌ မိမိတို့နာမည် ဖျက်မရအောင် မှတ်တမ်းတင်ခံစေရန် မည်သို့ပြုကြမည်နည်း။
၁၅ အသက်စာစောင်၌ နာမည်စာရင်းဝင်သော လူအုပ်ကြီးသည် ဆင်းရဲဒုက္ခကြီးထဲမှ ထွက်မြောက်လာကြမည်။ ယေရှု၏အနှစ်တစ်ထောင် စိုးစံရာကာလ တစ်လျှောက်၌လည်းကောင်း၊ ထို့နောက် အပြီးသတ်စမ်းသပ်ရာ အချိန်၌လည်းကောင်း ယုံကြည်ခြင်းကျင့်သုံးကြလျှင် မြေကြီးပရဒိသုတွင် ထာဝရအသက်ဖြင့် ချီးမြှင့်တော်မူခြင်း ခံရကြမည်။ (ဒံယေလ ၁၂:၁; ဗျာဒိတ် ၇:၉၊ ၁၄; ၂၀:၁၅; ၂၁:၄) ထိုအခါ၊ သူတို့၏နာမည်သည် အသက်စာစောင်၌ ဖျက်မရအောင် ကျန်ရှိလိမ့်မည်။ သင်သည် သန့်ရှင်းသောဝိညာဉ်တော်အားဖြင့် ဤတွင်တင်ပြသောအချက်ကို သိရှိပြီဖြစ်၍ ယေရှု၏ အောက်ပါထပ်တလဲလဲ တိုက်တွန်းချက်ကို အားတက်သရော တုံ့ပြန်သလော– “အသင်းတော်တို့အား ဝိညာဉ်တော် ဆင့်ဆိုသောစကားကို နားရှိသောသူ ကြားပါစေ။”—ဗျာဒိတ် ၃:၆။
[အောက်ခြေမှတ်ချက်]
^ အပိုဒ်၊ 9 ၂၀၀၅၊ ဇူလိုင် ၁၅ ရက်နှင့် ၂၀၀၅၊ မတ် ၁၅ ရက်ထုတ် ကင်းမျှော်စင် တို့ကိုရှု။
[လေ့လာရန်မေးခွန်းများ]
[စာမျက်နှာ ၅၇ ပါ ရုပ်ပုံ]
အသက်စာစောင်တွင် သင်၏နာမည် ဆက်လက်တည်ရှိပါစေ
