‘အသတ်ခံရသော အသက်များ’ ဆုချီးမြှင့်ခံရ
အခန်း ၁၇
‘အသတ်ခံရသော အသက်များ’ ဆုချီးမြှင့်ခံရ
၁။ ကျွန်ုပ်တို့သည် အဘယ်သမယ၌ အသက်ရှင်နေသနည်း၊ အဘယ်သာဓက ရှိသနည်း။
ဘုရားသခင့်နိုင်ငံတော် အုပ်စိုးပြီ။ မြင်းဖြူရှင်သည် အပြီးသတ် အောင်ပွဲခံတော့မည်။ မြင်းနီ၊ မြင်းနက်နှင့် မြင်းမွဲတို့သည် ကမ္ဘာအနှံ့ ကဆုန်ပေါက်လျက်နေကြသည်။ ဘုရင်အဖြစ် ယေရှု ရောက်ရှိတော်မူခြင်းဆိုင်ရာ ကိုယ်တော့်ပရောဖက်ပြုချက်များ ပြည့်စုံလျက်ရှိသည်မှာ ငြင်းဖွယ်မရှိ။ (မဿဲအခန်းကြီး ၂၄၊ ၂၅; မာကုအခန်းကြီး ၁၃; လုကာအခန်းကြီး ၂၁) မှန်၏။ ကျွန်ုပ်တို့သည် လက်ရှိစနစ်၏ နောက်ဆုံးနေ့ရက်များအတွင်း အသက်ရှင်နေသည်။ (၂ တိမောသေ ၃:၁-၅) သို့ဖြစ်၍၊ ထိုစာလိပ်၏ ပဉ္စမတံဆိပ်ကို သိုးသငယ် ယေရှုခရစ် ဖွင့်တော်မူစဉ် အာရုံစူးစိုက်ကြပါစို့။ နောက်ထပ်အဘယ် ဗျာဒိတ်တော်တွင် ကျွန်ုပ်တို့ပါဝင်ရမည်နည်း။
၂။ (က) ပဉ္စမတံဆိပ် ဖွင့်သောအခါ ယောဟန် ဘာကိုမြင်ရသနည်း။ (ခ) ကောင်းကင်မှ အထိမ်းအမှတ်ဖြစ်သော ယဇ်ပလ္လင်အကြောင်း ဖတ်ရသည့်အတွက် အဘယ်ကြောင့် မအံ့သြသင့်သနည်း။
၂ စိတ်ထိခိုက်ဖွယ်မြင်ကွင်းကို ယောဟန်ဖော်ပြ၏– “ပဉ္စမတံဆိပ်ကို ကိုယ်တော်ဖွင့်သောအခါ ဘုရားသခင်၏ နှုတ်ကပါဌ်တော်ကြောင့်လည်းကောင်း၊ လုပ်ဆောင်နေကျ သက်သေခံခြင်းလုပ်ငန်းကြောင့်လည်းကောင်း အသတ်ခံရသောသူတို့၏ အသက်များကို ယဇ်ပလ္လင်အောက်၌ ငါမြင်ရ၏။” (ဗျာဒိတ် ၆:၉) အဘယ်အရာနည်း။ အထက်ကောင်းကင်ရှိ ယဇ်ပလ္လင်လော။ မှန်ပေသည်။ ယဇ်ပလ္လင်အကြောင်း ပထမအကြိမ် ယောဟန်တင်ပြခြင်းဖြစ်သည်။ သို့သော် ပလ္လင်တော်ပေါ်မှာ စံတော်မူသော ယေဟောဝါ၊ ပတ်ပတ်လည်ရှိ ခေရုဗိမ်များ၊ ဖန်ရေကန်၊ မီးခွက်များနှင့် နံ့သာပေါင်းကိုင်လျက်ရှိသော အကြီးအကဲ ၂၄ ပါးအကြောင်းကို ယောဟန်ဖော်ပြနှင့်ခဲ့ပြီ။ ထိုအရာများအားလုံးသည် မြေကြီးဆိုင်ရာတဲတော်၊ ဣသရေလနိုင်ငံရှိ ယေဟောဝါ၏ ဗိမာန်တော် ကြန်အင်များနှင့် ဆင်တူ၏။ (ထွက်မြောက်ရာ ၂၅:၁၇၊ ၁၈; ၄၀:၂၄-၂၇၊ ၃၀-၃၂; ၁ ရာဇဝင်ချုပ် ၂၄:၄) သို့ဖြစ်၍ ကောင်းကင်၌ အထိမ်းအမှတ်ဖြစ်သော ယဇ်ပလ္လင်တစ်ခုကို တွေ့ရသည့်အတွက် အံ့သြသင့်သလော။—ထွက်မြောက်ရာ ၄၀:၂၉။
၃။ (က) ရှေးခေတ် ဂျူးတို့၏တဲတော်၌ အသက်များကို “ယဇ်ပလ္လင် ခြေရင်းနားမှာ” မည်သို့သွန်ကြသနည်း။ (ခ) အသတ်ခံရသော သက်သေခံများ၏ အသက်များကို ကောင်းကင်ရှိ အထိမ်းအမှတ်ဖြစ်သော ယဇ်ပလ္လင်အောက်၌ အဘယ်ကြောင့် ယောဟန် တွေ့ရသနည်း။
၃ “ဘုရားသခင်၏ နှုတ်ကပါဌ်တော်ကြောင့်လည်းကောင်း၊ လုပ်ဆောင်နေကျ သက်သေခံခြင်းလုပ်ငန်းကြောင့်လည်းကောင်း အသတ်ခံရသောသူတို့၏ အသက်များကို” ဤယဇ်ပလ္လင်အောက်၌ တွေ့ရသည်။ ဘာကိုဆိုလိုသနည်း။ အသက်ကို သွေးဖြင့် အထိမ်းအမှတ်ပြုကြောင်း ယောဟန်သိပါသည်။ ၎င်းပြင် ရှေးက ဂျူးတို့၏တဲတော်၌ ယဇ်ပုရောဟိတ်များ ယဇ်ကောင်ကိုသတ်ပြီးသောအခါ သွေးကို “ယဇ်ပလ္လင်အပေါ်၌ ပတ်လည်ဖျန်း” သည်။ သို့မဟုတ် “ယဇ်ပလ္လင် ခြေရင်းနားမှာသွန်” သည်။ (ဝတ်ပြုရာ ၃:၂၊ ၈၊ ၁၃; ၄:၇; ၁၇:၆၊ ၁၁၊ ၁၂) သို့ဖြစ်၍ တိရစ္ဆာန်၏အသက်သည် ယဇ်ပလ္လင်နှင့် နီးကပ်စွာဆက်စပ်နေ၏။ သို့သော် ဘုရားသခင့် ဤအစေခံများ၏အသက် သို့မဟုတ် သွေးကို အဘယ်ကြောင့် ကောင်းကင်ရှိ အထိမ်းအမှတ်ဖြစ်သည့် ယဇ်ပလ္လင်အောက်တွင် တွေ့ရသနည်း။ သူတို့၏သေခြင်းကို ယဇ်ဆိုင်ရာသေခြင်းအဖြစ် မှတ်ယူ၍ဖြစ်သည်။
၄။ ဝိညာဉ်တော်ဖွား ခရစ်ယာန်များ၏ သေခြင်းသည် မည်သို့အားဖြင့် ယဇ်ပူဇော်ခြင်းနှင့် ဆိုင်သနည်း။
၄ အမှန်မှာ ဘုရားသခင်၏ နာမ်ဝိညာဉ်သားများအဖြစ် မွေးဖွားသူအားလုံး ယဇ်ဆိုင်ရာသေခြင်းဖြင့် သေကြပါသည်။ ယေဟောဝါ၏ ကောင်းကင်နိုင်ငံတော်တွင် ပါဝင်ဆောင်ရွက်ရသောကြောင့် သူတို့သည် ဘုရားသခင့်အလိုတော်အရ မြေကြီးပေါ် ထာဝရအသက်ရှင်မည့် မျှော်လင့်ချက်ရှိသမျှကို စွန့်လွှတ်ရကြသည်။ ဤကိစ္စတွင် သူတို့သည် ယေဟောဝါ၏ အချုပ်အခြာအာဏာတော်အတွက် ယဇ်ဆိုင်ရာသေခြင်းဖြင့်သေရန် သဘောတူကြသည်။ (ဖိလိပ္ပိ ၃:၈-၁၁ ကို ၂:၁၇ နှိုင်းယှဉ်။) ယဇ်ပလ္လင်အောက်၌ ယောဟန်မြင်ရသောသူတို့သည် တကယ်ပင် ထိုသို့သေကြ၏။ သူတို့သည် ဘိသိက်ခံများဖြစ်၍ ယေဟောဝါ၏ နှုတ်ကပါဌ်တော်နှင့် အချုပ်အခြာအာဏာတော်ကို ထောက်ခံလျက် စိတ်ထက်သန်စွာ ဓမ္မအမှုတော် ဆောင်ရွက်ခြင်းကြောင့် အသတ်ခံခဲ့ရသည်။ သူတို့၏အသက်များသည် “ဘုရားသခင်၏ နှုတ်ကပါဌ်တော်ကြောင့်လည်းကောင်း၊ လုပ်ဆောင်နေကျ သက်သေခံခြင်းလုပ်ငန်း [mar·ty·riʹan] ကြောင့်လည်းကောင်း အသတ်ခံရ” ခြင်းဖြစ်သည်။
၅။ သစ္စာရှိတို့၏ အသက်များသည် သေနေလျက်နှင့် လက်စားချေရန် အော်ဟစ်တောင်းဆိုကြသည်မှာ အဘယ်သို့နည်း။
၅ ဇာတ်ကွက်တွင် ဤသို့ဆက်၍တွေ့ရသည်– “သူတို့ကလည်း ‘သန့်ရှင်း၍ စစ်မှန်သော အချုပ်အခြာအာဏာပိုင် အရှင်သခင်၊ ကျွန်တော်မျိုးတို့၏ သွေးအတွက် မြေကြီးပေါ်တွင် နေထိုင်သောသူတို့အား တရားမစီရင်၊ လက်စားမချေဘဲ အဘယ်အချိန်အထိ ရှောင်၍နေတော်မူမည်နည်း’ ဟု အသံကျယ်စွာ ဟစ်အော်ကြ၏။” (ဗျာဒိတ် ၆:၁၀) သေလွန်သူတို့သည် သတိမရှိဟု ကျမ်းစာဆိုသည်ဖြစ်ရာ သူတို့၏အသက်ဝိညာဉ် သို့မဟုတ် သွေးသည် လက်စားချေရန် မည်သို့ဟစ်အော်နိုင်မည်နည်း။ (ဒေသနာ ၉:၅) စဉ်းစားကြည့်ပါ။ ဖြောင့်မတ်သော အာဗေလကို ကာဣန သတ်ခဲ့သည့်နောက်၌ အာဗေလ၏သွေး မဟစ်အော်ခဲ့ပေလော။ ထိုအခါ ယေဟောဝါက ကာဣနအား “သင်သည် အဘယ်သို့ပြုဘိသနည်း။ သင့်ညီအသွေး၏အသံသည် မြေထဲက ငါ့ကိုအော်ဟစ်လျက်ရှိ၏” ဟု မိန့်ဆိုခဲ့သည်။ (ကမ္ဘာဦး ၄:၁၀၊ ၁၁၊ သမ္မာ; ဟေဗြဲ ၁၂:၂၄) အာဗေလ၏သွေးက စာသားအတိုင်း တကယ် စကားပြောနေခြင်းမဟုတ်။ အာဗေလသည် အပြစ်မဲ့သားကောင်အဖြစ်သေခဲ့၍ တရားမျှတမှုက သူ့ကိုသတ်သောသူအား အပြစ်ပေးရန် ဟစ်ကြွေးနေခြင်းသာဖြစ်သည်။ ထို့အတူ၊ ထိုခရစ်ယာန် အာဇာနည်များလည်း အပြစ်မဲ့သဖြင့် သူတို့အဖို့ တရားသဖြင့် လက်စားချေကို ချေရလိမ့်မည်။ (လုကာ ၁၈:၇၊ ၈) ထောင်ပေါင်းများစွာသောသူတို့သည် ထိုသို့အသေခံခဲ့ရသဖြင့် လက်စားချေရန် အော်ဟစ်သံသည် ကျယ်လောင်၏။—ယေရမိ ၁၅:၁၅၊ ၁၆ နှိုင်းယှဉ်။
၆။ အပြစ်မဲ့သူတို့၏ သွေးကိုသွန်းသော အဘယ်ပြစ်မှုအတွက် ဘီစီ ၆၀၇ ခုနှစ်၌ လက်စားချေတော်မူသနည်း။
၆ အခြေအနေမှာ ဘီစီ ၇၁၆ ခုနှစ်၊ မနာရှေနန်းတက်စဉ်က ဖောက်ပြန်သော ယုဒနိုင်ငံနှင့် တူသည်။ သူသည် အပြစ်မဲ့သောသွေး များစွာသွန်းခဲ့၏။ ပရောဖက်ဟေရှာယကို “လွှနှင့်အပိုင်းပိုင်းတိုက်ဖြတ်” ခဲ့သူလည်းဖြစ်နိုင်သည်။ (ဟေဗြဲ ၁၁:၃၇; ၄ ဓမ္မရာဇဝင် ၂၁:၁၆) နောက်ပိုင်း၌ မနာရှေ နောင်တရပြောင်းလဲခဲ့သော်လည်း ထိုသွေးပြစ်မူကား စွန်းထင်းကျန်ရစ်ခဲ့သည်။ ဘီစီ ၆၀၇ ခုနှစ်၊ ယုဒနိုင်ငံကို ဗာဗုလုန်လူတို့ ဖျက်ဆီးသောအခါ “ထာဝရဘုရား ချမ်းသာမပေးနိုင်လောက်အောင် ယေရုရှလင်မြို့အပြည့်အလျှံ၊ အပြစ်ကင်းသူတို့ အသွေးသွန်းမှုမှစ၍ မနာရှေမင်းပြုသမျှသော ပြစ်မှုများအတွက် ထာဝရဘုရား စီရင်ချက်ချတော်မူသည့်အတိုင်း ယုဒအမျိုးကို မျက်မှောက်တော်မှ ပယ်ရှားအံ့သောငှာ ထိုဘေးသင့်ရောက်သတည်း။”—၄ ဓမ္မရာဇဝင် ၂၄:၃၊ ၄၊ သမ။
၇။ “သန့်ရှင်းသူများ၏သွေး” ကိုသွန်းသောအပြစ်မှာ အဓိက မည်သူ့အပေါ် ကျရောက်သနည်း။
၇ ယနေ့လည်း ကျမ်းစာခေတ်မှာကဲ့သို့ ဘုရားသခင့်သက်သေခံများကို သတ်သောသူတို့ သေလွန်ခဲ့သည်မှာ ကြာလှပြီဖြစ်ချင်ဖြစ်မည်။ သို့ရာတွင် သက်သေခံတို့ကို သွေးမြေကျစေသော အဖွဲ့အစည်းမှာမူ အလွန်ရှင်သန်ဆဲ သွေးအလိမ်းလိမ်း စွန်းထင်းဆဲဖြစ်သည်။ ၎င်းမှာ စာတန်၏ မြေကြီးဆိုင်ရာအဖွဲ့အစည်း၊ မြေကြီးဆိုင်ရာအမျိုးအနွယ်ဖြစ်သည်။ အထင်ပေါ်ဆုံးမှာ ကမ္ဘာ့မိစ္ဆာဘာသာအင်ပါယာ မဟာဗာဗုလုန် * ပင်တည်း။ ၎င်းသည် “သန့်ရှင်းသူတို့၏သွေး၊ ယေရှု၏ သက်သေခံတို့၏သွေးဖြင့် ယစ်မူး” နေသည်ဟု ဖော်ပြထားသည်။ မှန်ပေသည်။ ၎င်း၌ “ပရောဖက်တို့မှစ၍ သန့်ရှင်းသူတို့နှင့် မြေကြီးပေါ်မှာ အသတ်ခံရသောသူ ရှိသမျှတို့၏ သွေးကိုတွေ့ရ၏။” (ဗျာဒိတ် ၁၇:၅၊ ၆; ၁၈:၂၄; ဧဖက် ၄:၁၁; ၁ ကောရိန္သု ၁၂:၂၈) သွေးသွန်းခြင်းအပြစ်ကြီးပါတကား။ မဟာဗာဗုလုန် သက်ဆိုးရှည်နေသ၍ ၎င်း၏သားကောင် ဖြစ်ရသူတို့၏အသွေးလည်း တရားမျှတမှုအတွက် ဟစ်ကြွေးလျက်နေလိမ့်မည်။—ဗျာဒိတ် ၁၉:၁၊ ၂။
၈။ (က) ယောဟန်၏ တစ်သက်တာအတွင်း အဘယ်အာဇာနည်များ သွေးမြေကျခဲ့ကြသနည်း။ (ခ) ရောမဧကရာဇ်များ အဘယ်ညှဉ်းပန်းမှုများဖြစ်အောင် မီးထိုးခဲ့ကြသနည်း။
၈ ရက်စက်သည့်မြွေနှင့် ၎င်း၏မြေကြီးဆိုင်ရာ အမျိုးအနွယ်က ဘိသိက်ခံခရစ်ယာန်များ၏ ကြီးထွားနေသော အသင်းတော်ကို စစ်ဆင်နွှဲရာ ပထမရာစု၌ ခရစ်ယာန်အာဇာနည်များ သွေးမြေကျသည်ကို ယောဟန်ကိုယ်တိုင် တွေ့မြင်ခဲ့သည်။ သူသည် ကျွန်ုပ်တို့၏သခင် နှက်တိုင်တင်သတ်ခံရခြင်းကို မြင်ခဲ့ရပြီး သတေဖန်နှင့် အစ်ကိုဖြစ်သူ ယာကုပ်မှစ၍ ပေတရု၊ ပေါလုနှင့် အခြားရင်းနှီးသော အပေါင်းပါများ အသတ်ခံရသော်လည်း သူကိုယ်တိုင်မူ ကျန်ရစ်ခဲ့သည်။ (ယောဟန် ၁၉:၂၆၊ ၂၇; ၂၁:၁၅၊ ၁၈၊ ၁၉; တမန်တော် ၇:၅၉၊ ၆၀; ၈:၂; ၁၂:၂; ၂ တိမောသေ ၁:၁; ၄:၆၊ ၇) အေဒီ ၆၄ ခုနှစ်၌ ရောမဧကရာဇ် နီရိုက သူသည် မြို့ကိုမီးရှို့သူဖြစ်သည်ဟူသော ကောလာဟလကို တန်ပြန်သည့်အနေနှင့် ခရစ်ယာန်များကိုစွပ်စွဲကာ သူတို့ကို ဓားစာခံလုပ်ခဲ့သည်။ သမိုင်းသုတေသီ တက်စီတပ်စ်က “သူတို့ [ခရစ်ယာန်များ] သည် အသရော်ခံကာ သေရကြသည်။ အချို့ကို သားရဲတိစ္ဆာန်များ၏သားရေ လွှမ်းခြုံပေးပြီး ခွေးများ၏ကိုက်ဖြဲခြင်းကို ခံစေသည်။ အချို့ကို [နှက်တိုင်တင်သတ်] * ကြသည်။ အချို့ကို ညမီးရှူးတိုင်များအဖြစ် မီးရှို့ကြသည်။ ဧကရာဇ် ဒိုမီရှန် (အေဒီ ၈၁-၉၆) လက်ထက်တွင် နှိပ်စက်ညှဉ်းပန်းမှု လှိုင်းလုံးကြီးထပြန်ရာ ယောဟန်သည် ပတ်မုကျွန်းသို့ တစ်ကျွန်းပို့ခံရခြင်းဖြစ်သည်။ “သူတို့သည် ငါ့ကိုညှဉ်းဆဲလျှင် သင်တို့ကိုညှဉ်းဆဲကြလိမ့်မည်” ဟု ယေရှု မိန့်ဆိုခဲ့သည့်အတိုင်းဖြစ်၏။—ယောဟန် ၁၅:၂၀; မဿဲ ၁၀:၂၂။
၉။ (က) အေဒီ စတုတ္ထရာစုရောက်သော် အဘယ်ပြောင်မြောက်သော လှည့်ကွက်ကို စာတန် ထွင်လိုက်သနည်း။ ၎င်းသည် အဘယ်အရာ၏ အဓိကအပိုင်း ဖြစ်သနည်း။ (ခ) ခရစ်ယာန်ဘောင်မှ အချို့မင်းများ ပထမနှင့် ဒုတိယကမ္ဘာစစ်များအတွင်း ယေဟောဝါသက်သေများကို မည်သို့ဆက်ဆံခဲ့ကြသနည်း။
၉ အေဒီ စတုတ္ထရာစုရောက်သော် ရှေးမြွေဟောင်း စာတန်မာရ်နတ်သည် သူ၏ပြောင်မြောက်သော လှည့်ကွက်ဖြစ်သည့် အယူဖောက်ပြန်သော ခရစ်ယာန်ဘောင်ဘာသာ—“ခရစ်ယာန်” အရေခြုံ ဗာဗုလုန်စနစ်တစ်ခု—ကို မွေးထုတ်လိုက်သည်။ ၎င်းသည် မြွေအမျိုးအနွယ်၏ အဓိကအပိုင်းလည်းဖြစ်၍ ကွဲပြားဆန့်ကျင်သောဂိုဏ်းဂဏ ဒုနှင့်ဒေးဖြစ်ပေါ်လာသည်။ ခရစ်ယာန်ဘောင်သည် ပထမနှင့် ဒုတိယကမ္ဘာစစ်များအတွင်း ရန်ဘက်နှစ်ဖက်စလုံး၌ ခြေစုံပစ်ပါဝင်ခဲ့သဖြင့် သစ္စာမဲ့ ရှေးယုဒပြည်ကဲ့သို့ သွေးသွန်းခြင်းအပြစ်ကြီးကို ရွက်ထားသည်။ ခရစ်ယာန်ဘောင်မှ နိုင်ငံရေးခေါင်းဆောင်အချို့ဆိုလျှင် စစ်ကိုအကြောင်းပြု၍ ဘုရားသခင့် ဘိသိက်ခံအစေခံများကိုပင် သတ်ဖြတ်ခဲ့ကြသည်။ ဖရက်ဒရစ် ဇစ်ဖဲလ်၏ Kirchenkampf in Deutschland (ဂျာမနီနိုင်ငံရှိ ချာ့ခ်ျများတိုက်ပွဲ) ဟူသောစာအုပ်၏ သုံးသပ်ချက်က ယေဟောဝါသက်သေများအား ဟစ်တလာ ညှဉ်းဆဲပုံကို ဤသို့တင်ပြလိုက်သည်– “သူတို့ (သက်သေခံများ) သုံးပုံတစ်ပုံသည် သေဒဏ်ကြောင့်ဖြစ်စေ၊ အခြားသောကြမ်းကြုတ်ရက်စက်မှု၊ ငတ်ပြတ်မှု၊ ဖျားနာမှုတို့ကြောင့်မဟုတ်လျှင် ကျွန်ကဲ့သို့ အဆမတန် အလုပ်ကြမ်းလုပ်ရ၍ဖြစ်စေ သေဆုံးခဲ့ကြသည်။ ဤနှိပ်ကွပ်မှုသည် ယခင်နှင့်မတူ၊ ပြင်းထန်လှ၏။ အမျိုးသားဆိုရှယ်လစ် သဘောတရားနှင့် လက်မတွဲနိုင်သော အညံ့မခံသောယုံကြည်ခြင်း၏ ရလဒ်ဖြစ်သည်။” ခရစ်ယာန်ဘောင်နှင့် ၎င်း၏ဘုန်းကြီးရဟန်းအဖွဲ့အား “အပြစ်မရှိသော ဆင်းရဲသားတို့ကို အသေသတ်၍ သွန်းသောအသွေးသည် သင်၏အဝတ်စွန်း၌ထင်ရှား၏” ဟု တကယ်ဆိုနိုင်၏။—ယေရမိ ၂:၃၄ *
၁၀။ နိုင်ငံဒေသများစွာတွင် လူအုပ်ကြီးထဲမှ လူငယ်များ အဘယ်ညှဉ်းပန်းမှုများကို ခံခဲ့ကြပြီနည်း။
၁၀ ၁၉၃၅ ခုနှစ်မှစ၍ လူအုပ်ကြီးထဲမှ လူငယ်လူရွယ်တို့သည် နိုင်ငံဒေသများစွာတွင် အလူးအလဲ ညှဉ်းဆဲခံခဲ့ရကြသည်။ (ဗျာဒိတ် ၇:၉) ဥရောပတွင် ဒုတိယကမ္ဘာစစ်ကြီး ပြီးသည့်အခါမှာပင် မြို့တစ်မြို့တည်း၌ ယေဟောဝါသက်သေလူငယ် ၁၄ ဦး ကြိုးပေးခံလိုက်ရသည်။ ဘာပြစ်မှုအတွက်နည်း။ “စစ်အတတ်ကို နောက်တစ်ဖန်မသင်” ၍တည်း။ (ဟေရှာယ ၂:၄) မကြာသေးမီကလည်း အရှေ့တိုင်းနှင့် အာဖရိကတိုက်မှ လူငယ်တို့သည် ထပ်တူအရေးကိစ္စကြောင့် သေသည်အထိ ရိုက်နှက်ခြင်း၊ သေနတ်ဖြင့် ပစ်သတ်ခြင်းခံခဲ့ရသည်။ လေးစားထိုက်သော ဤလူငယ်အာဇာနည်များသည် ယေရှု၏ ဘိသိက်ခံညီတော်များကို ထောက်ခံသူများဖြစ်ကြသဖြင့် ကတိထားရာ မြေကြီးသစ်ပေါ်သို့ ထမြောက်လာမည်မုချ။—၂ ပေတရု ၃:၁၃; ဆာလံ ၁၁၀:၃; မဿဲ ၂၅:၃၄-၄၀; လုကာ ၂၀:၃၇၊ ၃၈ နှိုင်းယှဉ်။
ဝတ်လုံဖြူ
၁၁။ သွေးမြေကျ ဘိသိက်ခံခရစ်ယာန်များ အဘယ်အဓိပ္ပာယ်ဖြင့် “ဝတ်လုံဖြူ” ကိုရကြသနည်း။
၁၁ တမန်တော်ပေါလုက ရှေးခေတ်သစ္စာစောင့်တို့၏ ယုံကြည်ခြင်းအကြောင်းကို မော်ကွန်းတင်ပြီးနောက် ဤသို့ဆို၏– “ထိုသူအပေါင်းတို့သည် ယုံကြည်ခြင်းအားဖြင့် ချီးမွမ်းခြင်းသို့ရောက်သော်လည်း ကတိတော်အတိုင်း အကျိုးကျေးဇူးကိုမခံရကြ။ အဘယ်ကြောင့်နည်းဟူမူကား ထိုသူတို့သည် ငါတို့မပါဘဲ စုံလင်ခြင်းသို့ မရောက်ရမည်အကြောင်း ဘုရားသခင်သည် ငါတို့အဖို့အလို့ငှာ သာ၍မြတ်သောကျေးဇူးကို ကြံစည်တော်မူ၏။” (ဟေဗြဲ ၁၁:၃၉၊ ၄၀) ပေါလုနှင့် အခြားဘိသိက်ခံခရစ်ယာန်များ မျှော်မှန်းသည့် “သာ၍မြတ်သောကျေးဇူး” ကား အဘယ်နည်း။ ၎င်းကို ယောဟန် ရူပါရုံ၌မြင်ရ၏– “သူတို့တစ်ဦးချင်းအား ဝတ်လုံဖြူ တစ်ထည်စီ ပေးတော်မူ၏။ မိမိတို့နည်းတူ အသတ်ခံရတော့မည့် မိမိတို့၏ကျွန်ချင်း ညီအစ်ကိုများ၏ အရေအတွက် ပြည့်စုံသည်အထိ နောက်ထပ် အချိန်အနည်းငယ် နားနေရန် သူတို့ကို ပြောကြားတော်မူ၏။” (ဗျာဒိတ် ၆:၁၁) သူတို့ “ဝတ်လုံဖြူ” ရခြင်းသည် မသေနိုင်သော ဝိညာဉ်သတ္တဝါများအဖြစ်သို့ ထမြောက်ခြင်းနှင့်ဆိုင်သည်။ သူတို့သည် ယဇ်ပလ္လင်အောက်မှ အသတ်ခံရသော အသက်များအဖြစ် ဆက်နေရန်မလိုတော့ဘဲ ဘုရားသခင့် ကောင်းကင်ပလ္လင်တော်ရှေ့ ဝတ်ပြုကြသော အကြီးအကဲ ၂၄ ပါး၏အုပ်စုဝင်အဖြစ် ထမြောက်ကြရ၏။ ထိုတွင် သူတို့ကိုယ်တိုင် ပလ္လင်များကိုရကြသဖြင့် မင်းအခွင့်အရေးများ ခံစားရသည်ကိုပြ၏။ “ဝတ်ရုံဖြူ [ကို] ဝတ်” ကြသည်ဖြစ်ရာ သူတို့သည် ထိုကောင်းကင်တရားရုံးတွင် ယေဟောဝါ၏ရှေ့တော်၌ နေရာရထိုက်သော ဖြောင့်မတ်သူများအဖြစ် စီရင်ချက်ချခံရသည်ကို အဓိပ္ပာယ်ဆောင်၏။ ယင်းသည် သာဒိမြို့မှ သစ္စာရှိ ဘိသိက်ခံခရစ်ယာန်များအား “အောင်နိုင်သူသည် ဤသို့ပင် ဝတ်ရုံဖြူ ဝတ်ဆင်ရမည်” ဟူသော ယေရှု၏ကတိတော် ပြည့်စုံချက်လည်းဖြစ်၏။—ဗျာဒိတ် ၃:၅; ၄:၄; ၁ ပေတရု ၁:၄။
၁၂။ ထမြောက်ခဲ့သော ဘိသိက်ခံများ အဘယ်နည်းဖြင့် “နောက်ထပ် အချိန်အနည်းငယ် နားနေ” ကြသနည်း။ အဘယ်အချိန်အထိနည်း။
၁၂ ၁၉၁၈ ခုနှစ်၌ ကောင်းကင်ဆိုင်ရာထမြောက်ခြင်း အစပြုကြောင်း သာဓကအားလုံးက ညွှန်ပြ၏။ ၁၉၁၄ ခုနှစ်တွင် ယေရှုနန်းထိုင်၍ ကောင်းကင်မှ စာတန်နှင့် သူ၏နတ်ဆိုးများကို ဖယ်ရှားခြင်းဖြင့် စတင်အောင်ပွဲခံရန် မြင်းစီးချီတက်တော်မူသည့် နောက်ပိုင်း၌ဖြစ်သည်။ သို့တစေ၊ “မိမိတို့၏ကျွန်ချင်း ညီအစ်ကိုများ၏ အရေအတွက် ပြည့်စုံသည်အထိ နောက်ထပ်အချိန်အနည်းငယ် နားနေ” ရမည်ဟု ထမြောက်ပြီးသော ဤဘိသိက်ခံများအား မိန့်ကြားတော်မူ၏။ မြေကြီးပေါ်ရှိဆဲ ယောဟန်အတန်းအစားဝင်တို့သည် စုံစမ်းညှဉ်းဆဲမှုအောက် သစ္စာစောင့်ရမည်။ သူတို့ထဲမှအချို့မှာ အသတ်ခံရကောင်းခံရဦးမည်။ သို့သော် အဆုံး၌ မဟာဗာဗုလုန်နှင့် ၎င်း၏နိုင်ငံရေးရည်းစားများ သွန်းခဲ့သော ဖြောင့်မတ်သည့် သွေးရှိသမျှအတွက် လက်စားချေတော်မူမည်။ စပ်ကူးကာလ၌ ထမြောက်ခဲ့သူတို့သည် ကောင်းကင်တာဝန်များဖြင့် အလုပ်များလျက် နေပေမည်။ သူတို့၏နားနေခြင်းမှာ ဘာမျှမလုပ်ကိုင်ဘဲ သုခစံစားနေခြင်းမဟုတ်၊ မိမိတို့အဖို့ ယေဟောဝါ လက်စားချေမည့်နေ့ကို စိတ်ရှည်စွာ စောင့်ဆိုင်းနေခြင်းတည်း။ (ဟေရှာယ ၃၄:၈; ရောမ ၁၂:၁၉) သူတို့သည် မိစ္ဆာဘာသာ ပျက်စီးခြင်းကိုမြင်ရပြီး “ခေါ်ယူရွေးကောက်တော်မူခြင်းခံရသူ သစ္စာရှိ” များအဖြစ် သခင်ယေရှုခရစ်နှင့်အတူ ဤမြေကြီးပေါ်ရှိ စာတန့်အမျိုးအနွယ်ဆိုး၏ ကျန်အပိုင်းအားလုံးကို စီရင်သုတ်သင်ကြသောအခါ သူတို့ နားနေခြင်းသည် ပြီးဆုံးပါလိမ့်မည်။—ဗျာဒိတ် ၂:၂၆၊ ၂၇; ၁၇:၁၄; ရောမ ၁၆:၂၀။
‘သေလွန်သူတို့ အဦးထမြောက်’
၁၃၊ ၁၄။ (က) တမန်တော်ပေါလု၏ အဆိုအရ ကောင်းကင်ဆိုင်ရာ ထမြောက်ခြင်းသည် အဘယ်အချိန်တွင် အစပြုသနည်း။ မည်သူများ ထမြောက်ကြသနည်း။ (ခ) သခင့်နေ့တော်အထိ အသက်ရှင်သော ဘိသိက်ခံများသည် အဘယ်အချိန်တွင် ကောင်းကင်သို့ ထမြောက်ကြသနည်း။
၁၃ ပဉ္စမတံဆိပ် ဖွင့်ခြင်းကြောင့်ရရှိသော ထိုးထွင်းသိမြင်ချက်သည် ကောင်းကင်ဆိုင်ရာ ထမြောက်ခြင်းနှင့်ပတ်သက်သော အခြားကျမ်းချက်များနှင့် လုံးဝညီညွတ်၏။ ဥပမာ၊ တမန်တော်ပေါလုက ဤသို့ရေး၏– ယေဟောဝါ၏ “ဗျာဒိတ်တော်အားဖြင့် တစ်ဖန်ငါတို့ဆိုသည်ကား၊ သခင်ဘုရား ကြွလာတော်မူသောအခါ၊ အသက်ရှင်၍ ကျန်ကြွင်းသောငါတို့သည် အိပ်ပျော်ပြီးသောသူတို့၏ အရင်အဦး နေရာကျရကြမည်မဟုတ်။ သခင်ဘုရားသည် ကြွေးကြော်ခြင်း၊ ကောင်းကင်တမန်မင်း အသံပေးခြင်း၊ ဘုရားသခင်၏ တံပိုးတော်ကို မှုတ်ခြင်းနှင့်တကွ ကောင်းကင်ဘုံမှ ကိုယ်တိုင်ဆင်းသက်တော်မူ၍ ခရစ်တော်၌ သေလွန်သောသူတို့သည် အဦးထမြောက်ကြလိမ့်မည်။ ထိုအခါ အသက်ရှင်၍ ကျန်ကြွင်းသောငါတို့သည် အာကာသကောင်းကင်၌ သခင်ဘုရားထံတော်သို့ ရောက်စေခြင်းငှာ ထိုသူတို့နှင့်တကွ မိုးတိမ်ပေါ်သို့ ချီဆောင်ခြင်းကို ခံရသောအားဖြင့် သခင်ဘုရားနှင့်အတူ အစဉ်မပြတ် နေရကြလိမ့်မည်။”—၁ သက်သာလောနိတ် ၄:၁၅-၁၇။
၁၄ ဤအခန်းငယ်များက စိတ်လှုပ်ရှားဖွယ်အဖြစ်များကို ဖော်ပြသည်တကား။ သေလွန်နှင့်သောသူတို့သည် ယေရှု၏ ရောက်ရှိချိန်အထိကျန်ရစ်သော၊ တစ်နည်းအားဖြင့် ကိုယ်တော်ရောက်ရှိချိန်အတွင်း မြေကြီးပေါ်တွင် အသက်ရှင်နေဆဲဖြစ်သော ယေရှု၏ ဘိသိက်ခံညီတော်များထက် ဦး၍ ကောင်းကင်တက်ရကြသည်။ ခရစ်တော်၌သေလွန်သော ထိုသူတို့သည် အဦးထမြောက်ကြသည်။ ယေရှုဆင်းသက်၍၊ တစ်နည်းအားဖြင့် သူတို့ထံအာရုံလှည့်၍ သူတို့ကို နာမ်ဝိညာဉ်အသက်တာသို့ ထမြောက်စေကာ “ဝတ်လုံဖြူ” ပေးတော်မူသည်။ ၎င်းနောက်၌ လူသားများအဖြစ် အသက်ရှင်ဆဲဖြစ်သောသူတို့သည် မြေကြီးအသက်တာကုန်ဆုံး ကြလေသည်။ သူတို့အများသည် အတိုက်အခံပြုသူတို့ လက်ချက်ဖြင့် ကြမ်းကြုတ်စွာ အသေသတ်ခံရကြသည်။ သို့ရာတွင် သူတို့သည် မိမိတို့ထက် အဦးကျသူများကဲ့သို့ သေခြင်း၌ အိပ်နေရန်မလို။ သေသည်နှင့်တစ်ပြိုင်နက်—“မျက်စိတစ်မှိတ်၌”—ပြောင်းလဲ၍ ကောင်းကင်သို့ ချီဆောင်ခံရပြီး ယေရှုနှင့်လည်းကောင်း၊ ခရစ်တော်၏ခန္ဓာကိုယ်အဝင် အသင်းသားချင်းတို့နှင့်လည်းကောင်း အတူနေကြလိမ့်မည်။ (၁ ကောရိန္သု ၁၅:၅၀-၅၂; ဗျာဒိတ် ၁၄:၁၃ နှိုင်းယှဉ်။) သို့ဖြင့် အပေါကလစ်ထဲမှ မြင်းစီးသူရဲလေးဦး စိုင်းထွက်၍ မကြာမီ ဘိသိက်ခံခရစ်ယာန်များ၏ ထမြောက်ခြင်း အစပြုလေသည်။
၁၅။ (က) ပဉ္စမတံဆိပ် ဖွင့်ခြင်းကြောင့် အဘယ်သတင်းကောင်း ကြားရသနည်း။ (ခ) မြင်းဖြူစီးသော အောင်နိုင်ရှင်၏ စီးခြင်းသည် မည်သို့အဆုံးသတ်သနည်း။
၁၅ စာလိပ်၏ ပဉ္စမတံဆိပ်ကို ဖွင့်ခြင်းကြောင့် အောင်နိုင်၍ သေသည်တိုင်သစ္စာရှိသော ဘိသိက်ခံသစ္စာစောင့်တို့အဖို့ သတင်းကောင်း ထွက်ပေါ်လာ၏။ သို့သော် စာတန်နှင့် သူ၏အမျိုးအနွယ်အတွက် သတင်းကောင်းမရှိ။ မြင်းဖြူပေါ်က အောင်နိုင်ရှင်၏ စီးကြွချီတက်ခြင်းသည် တားမနိုင် ဆီးမရ ရှေ့ဆက်သွားမည်ဖြစ်၍ “မာရ်နတ်၏လက်၌ရှိ” သောဤလောကကို စစ်ကြောချိန် ဆိုက်တော့မှ အဆုံးတိုင်လိမ့်မည်။ (၁ ယောဟန် ၅:၁၉) သိုးသငယ် ဆဋ္ဌမတံဆိပ်ကို ဖွင့်သောအခါ ဤအချက် ထင်ရှားလာ၏။
[အောက်ခြေမှတ်ချက်]
^ အပိုဒ်၊ 7 မဟာဗာဗုလုန် မည်သူမည်ဝါဖြစ်ကြောင်းကို အခန်း ၃၃ တွင် အသေးစိတ် ဆွေးနွေးထားသည်။
^ အပိုဒ်၊ 8 ကမ္ဘာသစ် ဘာသာပြန် ရည်ညွှန်းကျမ်းစာ၊ စာမျက်နှာ ၁၅၇၇၊ နောက်ဆက်တွဲ ၅စီ၊ “ညှဉ်းဆဲရာနှက်တိုင်” နှိုင်းယှဉ်။
^ အပိုဒ်၊ 9 ဘာသာရေးသည် သွေးပြစ်မကင်းကြောင်း အခန်း ၃၆ ၌ ပို၍အသေးစိတ် ဖော်ပြထားသည်။
[လေ့လာရန်မေးခွန်းများ]
[စာမျက်နှာ ၁၀၂ ပါ လေးထောင့်ကွက်]
‘အသတ်ခံရသော အသက်များ’
ပြင်သစ်လူမျိုး ဟယူးဂနော့ ဂိုဏ်းဝင် မိဘများမှပေါက်ဖွားသူ ၁၈ ရာစုမှ အင်္ဂလိပ်ပရိုတက်စတင့်ဂိုဏ်းဝင် ဂျောန် ဂျော်တင်က “ညှဉ်းပန်းခြင်းစသည်နှင့် ခရစ်ယာန်ဘာသာ ဆုံးလေ၏။ . . . ခရစ်ယာန်ဘာသာကို [ရောမ] အင်ပါယာဘာသာအဖြစ် အတည်ပြုပြီး ၎င်း၏ဓမ္မအမှုဆောင်များအား စည်းစိမ်နှင့် ဂုဏ်အသရေချီးမြှင့်သည့်နောက်၌ ညှဉ်းပန်းခြင်းတည်းဟူသော ကြောက်ခမန်းလိလိအနိဋ္ဌာရုံ အင်အားကြီး လာပြီး ယင်း၏သြဇာအာဏာကို ခရစ်ဝင်ကျမ်း ယုံကြည်သောဘာသာအပေါ် ရုတ်ခြည်းပေါက်ကွဲကျရောက်စေခြင်းဖြစ်သည်” ဟုဆိုကြောင်း မက်ကလင်းတော့နှင့် စထရောင်း တို့၏ စွယ်စုံကျမ်း က ကိုးကားဖော်ပြ၏။
[စာမျက်နှာ ၁၀၃ ပါ ရုပ်ပုံ]
“သူတို့တစ်ဦးချင်းအား ဝတ်လုံဖြူ တစ်ထည်စီပေး”
