အားပေးမှုနှင့်တကွ ယေရှုကြွလာခြင်း
အခန်း ၄
အားပေးမှုနှင့်တကွ ယေရှုကြွလာခြင်း
၁။ ယခု ယောဟန် မည်သူ့ထံစာရေးသနည်း။ ယနေ့ မည်သူများ သူ၏သတင်းကို အာရုံနစ်မျောပြီး စိတ်ဝင်စားသင့်သနည်း။
ရှ့ဆက်၍ ဖြစ်ပျက်သောအရာများကို ယနေ့ ဘုရားသခင့်လူမျိုးတော်၏ အသင်းတော်နှင့် ပေါင်းသင်းသူတိုင်း အာရုံနစ်မျောပြီး စိတ်ဝင်စားသင့်သည်။ ၎င်းမှာ သတင်းစကားတသီတသန်းဖြစ်သည်။ “ချိန်းချက်သောအချိန်” နီးလာသည်နှင့်အမျှ ၎င်းတို့သည် အထူးသက်ဆိုင်လာသည်။ (ဗျာဒိတ် ၁:၃) ထိုကြေညာချက်များကို နာခံလျှင် ကျွန်ုပ်တို့အဖို့ ထာဝရကောင်းကျိုးဖြစ်မည်။ မှတ်တမ်းက ဤသို့ဆို၏– “အာရှခရိုင်အတွင်းရှိ အသင်းတော်ခုနစ်ပါးထံ ယောဟန် စာရေးလိုက်ပါသည်။ ပစ္စုပ္ပန်၊ အတိတ်၊ အနာဂတ်ကာလ အစဉ်ရှိတော်မူသောအရှင် ထံမှလည်းကောင်း၊ ကိုယ်တော်၏ ပလ္လင်တော်ရှေ့က ဝိညာဉ်ခုနစ်ပါး ထံမှလည်းကောင်း၊ . . . ယေရှုခရစ် ထံမှလည်းကောင်း မခံစားထိုက်သော ကျေးဇူးတော်နှင့် ငြိမ်သက်ခြင်းတို့ကို သင်တို့ခံစားရကြပါစေ။”—ဗျာဒိတ် ၁:၄၊ ၅။
၂။ (က) “ခုနစ်” ဂဏန်းသည် ဘာကိုပုံခိုင်းသနည်း။ (ခ) သခင့်နေ့တော်၌ “အသင်းတော်ခုနစ်ပါး” ထံရေးသောသတင်းသည် မည်သူများနှင့်ဆိုင်သနည်း။
၂ ဤတွင် ယောဟန်က “အသင်းတော်ခုနစ်ပါး” ထံ စာရေးနေခြင်းဖြစ်သည်။ ၎င်းတို့၏အမည်များကို ပရောဖက်ပြုချက်၏ နောက်ပိုင်း၌ ဖော်ပြသည်။ ထို “ခုနစ်” ဟူသောဂဏန်းကို ဗျာဒိတ်ကျမ်း၌ မကြာခဏတွေ့ရသည်။ ပြည့်ဝမှုဟူ၍ အဓိပ္ပာယ်ဆောင်သည်။ အထူးသဖြင့် ဘုရားသခင်နှင့် ဘိသိက်ခံအသင်းတော်ဆိုင်ရာ အရာများနှင့်ပတ်သက်၍ဖြစ်သည်။ ကမ္ဘာတစ်ခွင် ဘုရားသခင့် လူမျိုးတော်အသင်းတော်၏ အရေအတွက်သည် သောင်းနှင့်ချီ၍ ရှိပြီဖြစ်ရကား မူလက ဘိသိက်ခံသူတို့၏ “အသင်းတော်ခုနစ်ပါး” ထံ ရေးလိုက်သောစကားသည် ယနေ့ဘုရားသခင့်လူမျိုးတော် တစ်ရပ်လုံးနှင့်ဆိုင်မည်မုချ။ (ဗျာဒိတ် ၁:၁၀) မှန်ပေသည်။ ယေဟောဝါသက်သေများ အသင်းတော်အားလုံးအဖို့လည်းကောင်း၊ အသင်းတော်နှင့်ပေါင်းသင်းသူ မြေတစ်ပြင်လုံး နေရာတိုင်းမှ လူအားလုံးအဖို့လည်းကောင်း ယောဟန် သတင်းပါးစရာရှိသည်။
၃။ (က) ယောဟန်၏ နှုတ်ဆက်စကားပါ “မခံစားထိုက်သော ကျေးဇူးတော်နှင့် ငြိမ်သက်ခြင်း” သည် အဘယ်ကလာသနည်း။ (ခ) တမန်တော်ပေါလု၏ အဘယ်အသုံးအနှုန်းသည် ယောဟန်၏ နှုတ်ခွန်းစကားနှင့် ဆင်တူသနည်း။
၃ “မခံစားထိုက်သော ကျေးဇူးတော်နှင့် ငြိမ်သက်ခြင်း”—အထူးသဖြင့် ၎င်းတို့၏ပင်ရင်းကို သိသောအခါ မည်မျှလိုလားဖွယ်ပါတကား။ ၎င်းတို့ဆင်းသက်လာရာဖြစ်သော “အရှင်” မှာ “အနန္တကာလမှ အနန္တကာလတိုင်” အသက်ရှင်တော်မူသော “ထာဝရဘုရင်” ပင်တည်း။ (၁ တိမောသေ ၁:၁၇၊ ခမ; ဆာလံ ၉၀:၂၊ ကဘ) “ဝိညာဉ်ခုနစ်ပါး” လည်း ပါဝင်ပတ်သက်နေသည်။ ဤအသုံးအနှုန်းမှာ ဘုရားသခင့် တက်ကြွသောစွမ်းအားတည်းဟူသော သန့်ရှင်းသောဝိညာဉ်တော်၏ လုပ်ဆောင်ခြင်း ပြည့်ဝမှုကို ရည်ညွှန်းသည်။ ဝိညာဉ်တော်သည် ပရောဖက်ပြုချက်ကို အာရုံပြုသူမှန်သမျှအား သိနားလည်စွမ်းနှင့် ကောင်းချီးကိုပေး၏။ “ယေရှုခရစ်” လည်း အရေးပါသောကဏ္ဍမှ ပါဝင်၏။ နောက်ပိုင်း၌ ကိုယ်တော်နှင့်ပတ်သက်၍ ယောဟန်က “နှုတ်ကပါဌ်တော်သည် . . . ကျေးဇူးတရားနှင့်လည်းကောင်း၊ သမ္မာတရားနှင့်လည်းကောင်း ပြည့်စုံ” တော်မူသည်ဟု ရေး၏။ (ယောဟန် ၁:၁၄၊ သမ္မာ) ထို့ကြောင့် ယောဟန်၏ နှုတ်ဆက်သဝဏ်လွှာသည် ကောရိန္သုအသင်းတော်ထံ တမန်တော်ပေါလုရေးသော ဒုတိယစာစောင်၏ နိဂုံးစကားနှင့်ဆင်တူသည်။ “သခင်ယေရှုခရစ်၏ ကျေးဇူးတော်လည်းကောင်း၊ ဘုရားသခင်၏ မေတ္တာတော်လည်းကောင်း၊ သန့်ရှင်းသောဝိညာဉ်တော်၏ မိတ်သဟာယတော်လည်းကောင်း သင်တို့အပေါင်း၌ ရှိစေသတည်း။” (၂ ကောရိန္သု ၁၃:၁၄) ဤစကားသည် ယနေ့ သမ္မာတရားကိုချစ်သော ကျွန်ုပ်တို့တစ်ဦးစီအပေါ်မှာလည်း ပြည့်စုံပါစေ။—ဆာလံ ၁၁၉:၉၇။
“သစ္စာရှိသောသက်သေ”
၄။ ယေရှုခရစ်အကြောင်းကို ယောဟန် မည်သို့ဆက်လက်ဖော်ပြသနည်း။ ထိုအခေါ်အဝေါ်များသည် အဘယ်ကြောင့် လျောက်ပတ်လှသနည်း။
၄ ယေရှုအား “‘သစ္စာရှိသောသက်သေ၊’ ‘လူသေတို့ထဲမှ သားဦး’ ‘မြေကြီးဘုရင်တို့ကို အုပ်စိုးသောအရှင်’” ဟူ၍ ယောဟန် အသိအမှတ်ပြုသည့်အတိုင်း ယေရှုသည် ယေဟောဝါပြီးလျှင် စကြဝဠာတွင် ဘုန်းအသရေ အရှိဆုံးပုဂ္ဂိုလ်ဖြစ်သည်။ (ဗျာဒိတ် ၁:၅ခ) ကိုယ်တော်သည် ကောင်းကင်ရှိ လမင်းပမာ ယေဟောဝါ၏ ဘုရားအဖြစ်တော်ကို သက်သေထူသည့် အကြီးမြတ်ဆုံးသက်သေအဖြစ် မားမားမတ်မတ် ရပ်တည်တော်မူသည်။ (ဆာလံ ၈၉:၃၇) ကိုယ်တော်သည် ယဇ်ကောင်အဖြစ် သေသည်တိုင် သစ္စာစောင့်ပြီးနောက်၌ လူသားများအနက် မသေနိုင်သော ဝိညာဉ်အသက်တာသို့ ပထမဦးဆုံး ထမြောက်သူ ဖြစ်လာသည်။ (ကောလောသဲ ၁:၁၈) ယခုကိုယ်တော်သည် ယေဟောဝါရှေ့တော်၌ မြေကြီးဘုရင် အားလုံးတို့အထက်တွင် ချီးမြှင့်ခြင်းခံရ၍ “မိုးမြေတွင် အခွင့်အာဏာခပ်သိမ်း” အပ်နှင်းခြင်းခံရသည်။ (မဿဲ ၂၈:၁၈၊ သမ; ဆာလံ ၈၉:၂၇; ၁ တိမောသေ ၆:၁၅) ၁၉၁၄ ခု၌ မြေကြီးပေါ်ရှိ တိုင်းနိုင်ငံများကို အုပ်စိုးရန် ဘုရင်အဖြစ် မင်းမြှောက်ခံရသည်။—ဆာလံ ၂:၆-၉။
၅။ (က) သခင်ယေရှုခရစ်ကို လေးမြတ်ကြောင်း ယောဟန် မည်သို့ဆက်လက်တင်ပြသနည်း။ (ခ) ယေရှုပေးသနားသော မိမိ၏စုံလင်သောလူ့အသက် ဆုကျေးဇူးမှ မည်သူများ အကျိုးခံစားကြရသနည်း။ ဘိသိက်ခံခရစ်ယာန်များသည် အထူးကောင်းချီးတစ်ရပ်ကို မည်သို့ဝေမျှခံစားကြသနည်း။
၅ ယောဟန်သည် ရှေ့ဆက်၍ အောက်ပါအမွှမ်းတင်စကားများဖြင့် သခင်ယေရှုခရစ်ကို ဂုဏ်ပြုသည်။ “ငါတို့ကိုချစ်၍ မိမိအသွေးတော်ဖြင့် အပြစ်မှ ဖြေလွှတ်တော်မူပြီးလျှင် ငါတို့ကို နိုင်ငံတစ်ခုဖြစ်စေ၍ မိမိ၏ ဘုရားသခင်၊ ခမည်းတော်အဖို့ ယဇ်ပုရောဟိတ်များ ဖြစ်စေတော်မူသော ကိုယ်တော်၌ ဘုန်းအသရေတော်နှင့် တန်ခိုးတော် ထာဝစဉ် ရှိပါစေ။” (ဗျာဒိတ် ၁:၅၊ ၆) ယေရှုသည် မိမိကိုယုံကြည်သော လူသားလောကထဲမှ ပုဂ္ဂိုလ်များ စုံလင်သောအသက်ကို ပြန်ရစေနိုင်ရန် စုံလင်သောလူ့အသက်ကို စွန့်တော်မူသည်။ ချစ်လှစွာသော အသင်စာရှုသူလည်း ပါဝင်ခံစားနိုင်ပါသည်။ (ယောဟန် ၃:၁၆) သို့သော် ယေရှု၏ ယဇ်ကောင်ကဲ့သို့သော သေခြင်းသည် ယောဟန်ကဲ့သို့ ဘိသိက်ခံခရစ်ယာန်များ ဖြစ်လာသူတို့အဖို့ အထူးကောင်းချီးရရန် လမ်းကိုဖွင့်လိုက်သည်။ သူတို့သည် ယေရှု၏ ရွေးနုတ်ဖိုးယဇ်ပေါ်အခြေခံ၍ ဖြောင့်မတ်သူအဖြစ် သတ်မှတ်ခံရသည်။ သိုးစုငယ်အဝင်တို့သည် ယေရှုနည်းတူ မြေကြီးအသက်တာ မျှော်လင့်ချက်ရှိသမျှကိုစွန့်လျက် ဘုရားသခင့်ဝိညာဉ်တော်ဖြင့် မွေးဖွားခြင်းကိုခံရကြသည်။ သူတို့သည် ထမြောက်သည့်နောက် ယေရှုခရစ်နှင့်အတူ နိုင်ငံတော်၌ ဘုရင်များ၊ ယဇ်ပုရောဟိတ်များအဖြစ် အမှုထမ်းရမည့် မျှော်လင့်ချက်ရှိကြသည်။ (လုကာ ၁၂:၃၂; ရောမ ၈:၁၈; ၁ ပေတရု ၂:၅; ဗျာဒိတ် ၂၀:၆) အခွင့်ထူးကြီးပါတကား။ ထို့ကြောင့် ယောဟန်က ဘုန်းအသရေနှင့် တန်ခိုးတော်ကို ယေရှုပိုင်ဆိုင်၏ဟု အခိုင်အမာ ကြွေးကြော်လိုက်သည်မှာ အံ့ဩစရာမဟုတ်ပါ။
“မိုးတိမ်နှင့်အတူကြွလာ”
၆။ (က) ‘မိုးတိမ်နှင့်အတူ ယေရှုကြွလာ’ ခြင်းနှင့်ပတ်သက်၍ ယောဟန် ဘာကိုကြေညာသနည်း။ ယေရှု၏ အဘယ်ပရောဖက်ပြုချက်ကို ယောဟန်သတိရကောင်းရမည်နည်း။ (ခ) ယေရှု မည်သို့ ‘ကြွလာ’ သနည်း။ မြေကြီးပေါ်၌ မည်သူများ ကြီးစွာပူဆွေးကြရမည်နည်း။
၆ ၎င်းနောက် ယောဟန်က အောင်သံဖြင့် ဤသို့ကြေညာသည်– “ကြည့်ပါ။ ကိုယ်တော်သည် မိုးတိမ်နှင့်အတူကြွလာ၍ မျက်စိတိုင်းသည် ကိုယ်တော်ကို မြင်ရမည်။ ကိုယ်တော်ကို ထိုးဖောက်သောသူတို့ပါ မြင်ရကြမည်။ မြေကြီးပေါ်မှ လူမျိုးနွယ် အားလုံးလည်း ကိုယ်တော်ကြောင့် ရင်ထုမနာ ပူဆွေးကြလိမ့်မည်။ မှန်ပေသည်၊ အာမင်။” (ဗျာဒိတ် ၁:၇) ဤတွင် ယောဟန်သည် စောစောပိုင်းက ယေရှုမိန့်ဆိုသော အစီအစဉ်စနစ်ဆုံးခန်းဆိုင်ရာ ပရောဖက်ပြုချက်ကို သတိရပေမည်။ ယေရှုဤသို့မိန့်ဆိုခဲ့သည်– “ထိုအခါ လူသား၏ပုဗ္ဗနိမိတ်သည် ကောင်းကင်၌ ထင်ရှားလိမ့်မည်။ မြေကြီးပေါ်မှာ လူမျိုးအပေါင်းတို့သည် ငိုကြွေးမြည်တမ်းကြ၍ လူသားသည် ကြီးစွာသောဘုန်းတန်ခိုး အာနုဘော်ကိုဆောင်လျက် မိုးတိမ်ကိုစီး၍ ကြွလာတော်မူသည်ကို မြင်ရကြလိမ့်မည်။” (မဿဲ ၂၄:၃၊ ၃၀၊ သမ္မာ) ထို့ကြောင့် ယေရှုသည် ယေဟောဝါစီရင်ချက်အတိုင်း နိုင်ငံများကိုသုတ်သင်ရန် အာရုံလှည့် ‘ကြွလာ’ ခြင်းဖြစ်သည်။ ကမ္ဘာပေါ် ကြီးကျယ်သော ပြောင်းလဲမှုများကိုဖြစ်စေမည်။ “လူမျိုးအပေါင်းတို့သည်” ယေရှုခရစ် ဘုရင်စင်စစ် ဖြစ်သည်ကို ဥပေက္ခာပြုခဲ့ကြသည်ဖြစ်၍ “အနန္တတန်ခိုးရှင် ဘုရားသခင့်အမျက်တော်” စူးရှခြင်းကို မုချခံရကြလိမ့်မည်။—ဗျာဒိတ် ၁၉:၁၁-၂၁၊ သမ; ဆာလံ ၂:၂၊ ၃၊ ၈၊ ၉။
၇။ ဖီဆန်သူများအပါအဝင် “မျက်စိတိုင်း” ယေရှုကို မည်သို့ “မြင်” ရကြမည်နည်း။
၇ ယေရှုသည် မိမိတပည့်များနှင့် နောက်ဆုံးတစ်ည အတူရှိစဉ် သူတို့အား “ခဏမျှကြာသော်၊ ဤလောကသားတို့သည် ငါ့ကိုမြင်ရတော့မည်မဟုတ်” ဟု မိန့်ဆိုသည်။ (ယောဟန် ၁၄:၁၉၊ သမ) သို့ဖြစ်လျှင် “မျက်စိတိုင်း” “ကိုယ်တော့်ကို” မည်သို့ “မြင်ရမည်” နည်း။ ယေရှု၏ရန်သူများသည် ကိုယ်တော်ကို ပကတိမျက်စိဖြင့် မြင်ရမည်ဟု ကျွန်ုပ်တို့မမျှော်လင့်သင့်။ ယေရှုကောင်းကင်သို့ ပြန်ကြွသည့်နောက် တမန်တော်ပေါလုက ယခုယေရှုသည် “အဘယ်သူမျှ မချဉ်းကပ်နိုင်သော အလင်းထဲ၌ နေတော်မူ” ကြောင်း၊ ကိုယ်တော်အား “အဘယ်သူမျှမမြင်ဖူး၊” “မမြင်နိုင်” ကြောင်း ဆိုပါသည်။ (၁ တိမောသေ ၆:၁၆) “သိမြင်” ဟူသောသဘောဖြင့် “မြင်” ခြင်းကို ယောဟန်ဆိုနေသည်မှာ သိသာ၏။ ဖန်ဆင်းရာများကိုထောက်၍ ဘုရားသခင့်အရူပအရည်အသွေးများကို ကျွန်ုပ်တို့မြင်နိုင် သိနိုင်သကဲ့သို့ဖြစ်သည်။ (ရောမ ၁:၂၀) “မိုးတိမ်နှင့်အတူကြွလာ” ခြင်းမှာ တိမ်နောက်ကွယ်မှနေကို ပကတိမျက်စိက မမြင်နိုင်သကဲ့သို့ ကိုယ်တော်သည် အရူပဖြစ်လိမ့်မည်ကို ဆိုလို၏။ နေ့အချိန်တွင် နေကိုတိမ်ကွယ်သောအခါမှာပင် ပတ်ဝန်းကျင်ရှိ နေ့အလင်းကိုထောက်ရှု၍ နေရှိသည်ကို ကျွန်ုပ်တို့သိရသည်။ ထို့နည်းတူ၊ သခင်ယေရှုသည် အရူပဖြစ်သော်လည်း ‘မိမိနှင့်ဆိုင်သော သတင်းကောင်းကို မနာခံသူတို့အပေါ် လက်စားချေတော်မူသောအခါ မီးလျှံ’ ပမာ ထင်ရှားတော်မူလိမ့်မည်။ ဤသူတို့လည်း ကိုယ်တော်ကို မမြင်ချင်ဘဲ “မြင်ရကြမည်။”—၂ သက်သာလောနိတ် ၁:၆-၈; ၂:၈။
၈။ (က) “ကိုယ်တော်ကို ထိုးဖောက်သောသူတို့” ကား အေဒီ ၃၃ ခု၌ မည်သူများဖြစ်၍ ယနေ့ မည်သူများဖြစ်သနည်း။ (ခ) ယေရှုသည် မြေကြီးပေါ်၌ မရှိတော့ပြီဖြစ်ရကား လူတို့သည် ‘ကိုယ်တော်ကို’ မည်သို့ ‘ထိုးဖောက်’ နိုင်သနည်း။
၈ “ကိုယ်တော်ကို ထိုးဖောက်သောသူတို့ပါ” ‘မြင်’ ရကြမည်။ သူတို့မည်သူများ ဖြစ်နိုင်မည်နည်း။ အေဒီ ၃၃ ခုနှစ် ယေရှုသေဒဏ်စီရင်ခြင်းခံရစဉ် ရောမစစ်သားများ ကိုယ်တော့်ကို တကယ်ထိုးဖောက်ခဲ့သည်။ ဂျူးများလည်း ထိုလူသတ်မှုအပြစ်နှင့် မကင်းပါ။ အကြောင်းမှာ၊ ပင်တေကုတ္တေပွဲနေ့၌ ပေတရုက ဂျူးအချို့တို့အား “လက်ဝါးကပ်တိုင်မှာ [သင်တို့] ကွပ်မျက်သောယေရှုကို ဘုရားသခင်သည် ခရစ်တော်အရာ၌လည်းကောင်း၊ အစိုးရသောအရှင်အရာ၌လည်းကောင်း ခန့်ထားတော်မူသည်” ဟု ပြောကြားခဲ့သည်။ (တမန်တော် ၂:၅-၁၁၊ ၃၆; ဇာခရိ ၁၂:၁၀ နှိုင်းယှဉ်; ယောဟန် ၁၉:၃၇ ) ထိုရောမလူများနှင့် ဂျူးတို့သေဆုံးခဲ့သည်မှာ အနှစ် ၂,၀၀၀ နီးပါးရှိပြီ။ ထို့ကြောင့် ယနေ့ ‘ကိုယ်တော်ကို ထိုးဖောက်’ သူတို့သည် ယေရှုကွပ်မျက်ခံရစဉ် ကိုယ်တော်ကို မုန်းတီးသောသဘော ပြခဲ့သူများနှင့်တူသည့် နိုင်ငံများနှင့်လူများကို ပုံဆောင်ရပေမည်။ ယေရှုသည် ကမ္ဘာပေါ်မှာမရှိတော့။ သို့သော် အတိုက်အခံပြုသူတို့သည် ယေရှုအတွက် သက်သေခံသော ယေဟောဝါသက်သေများကို ကိုယ်ထိလက်ရောက် နှိပ်စက်လျှင်ဖြစ်စေ၊ ထိုသို့နှိပ်စက်သည်ကို သဘောတူသည့်အနေနှင့် လက်ပိုက်ကြည့်လျှင်ဖြစ်စေ၊ ယေရှုကိုယ်တော်တိုင်ကို ‘ထိုးဖောက်’ သည်နှင့် မခြားပါ။—မဿဲ ၂၅:၃၃၊ ၄၁-၄၆။
“အာလဖနှင့် ဩမေဃ”
၉။ (က) ယခု မည်သူမိန့်မြွက်သနည်း။ ဗျာဒိတ်ကျမ်း၌ အကြိမ်မည်မျှ မိန့်မြွက်သနည်း။ (ခ) မိမိကိုယ်ကို “အာလဖနှင့် ဩမေဃ၊” “အနန္တတန်ခိုးရှင်” ဟု ယေဟောဝါ သမုတ်တော်မူရာ၌ အဘယ်အဓိပ္ပာယ်ရှိသနည်း။
၉ အံ့ဖွယ်တကာ့ အံ့ဖွယ်ပင်။ အချုပ်အခြာအာဏာပိုင်ရှင် ယေဟောဝါကိုယ်တော်တိုင် မိန့်မြွက်တော်မူပြီ။ ကိုယ်တော်သည် ကျွန်ုပ်တို့၏ မြင့်မြတ်သောသွန်သင်ရှင်၊ ဗျာဒိတ်တော်၏ ပင်ရင်းအမြစ်ဖြစ်ရကား ဖွင့်လှစ်လုဆဲ ရူပါရုံများအတွက် ကိုယ်တော်တိုင် နိဒါန်းပျိုးသည်မှာ လျောက်ပတ်ပေစွ။ (ဟေရှာယ ၃၀:၂၀) ကျွန်ုပ်တို့၏ဘုရားသခင်က “ငါသည် အာလဖနှင့် ဩမေဃဖြစ်၏။ ပစ္စုပ္ပန်၊ အတိတ်၊ အနာဂတ်ကာလ အစဉ်ရှိတော်မူသော အနန္တတန်ခိုးရှင်ဖြစ်၏” ဟု မိန့်တော်မူ၏။ (ဗျာဒိတ် ၁:၈) ယေဟောဝါကိုယ်တော်တိုင် ကောင်းကင်ဘုံမှ သုံးကြိမ်တိုင်တိုင် မိန့်မြွက်ခဲ့ရာ၊ ဤတစ်ကြိမ်မှာ ပထမဦးဆုံးအကြိမ်ဖြစ်၏။ (ဗျာဒိတ် ၂၁:၅-၈; ၂၂:၁၂-၁၅ ကိုလည်းရှု။) ပထမရာစု ခရစ်ယာန်များက အာလဖနှင့် ဩမေဃမှာ ဂရိအက္ခရာ၏ပထမနှင့် နောက်ဆုံးဗျည်းများဖြစ်ကြောင်း ချက်ချင်းသိကြလိမ့်မည်။ ယေဟောဝါက မိမိကိုယ်ကို ထိုဗျည်းနှစ်လုံးဖြင့်ခေါ်ခြင်းက မိမိအလျင် အဘယ် အနန္တတန်ခိုးရှင်မျှမရှိ၊ မိမိနောက်၌လည်း ရှိမည်မဟုတ်ကြောင်း အလေးအနက်ပြုသည်။ ကိုယ်တော်သည် မည်သူဘုရားသခင်ဖြစ်သည်ဟူသော အရေးကိစ္စကို အောင်မြင်စွာ အပြီးအငြိမ်း ဖြေရှင်းတော်မူမည်။ ကိုယ်တော်သည် တစ်ပါးတည်းသော အနန္တတန်ခိုးရှင် ဘုရားသခင်၊ မိမိဖန်ဆင်းရာများ အားလုံးအပေါ်စိုးစံသော အမြင့်ဆုံးအချုပ်အခြာအာဏာပိုင်အဖြစ် ထာဝစဉ် သင်္ကာယန ကင်းတော်မူမည်။—ဟေရှာယ ၄၆:၁၀; ၅၅:၁၀၊ ၁၁ နှိုင်းယှဉ်။
၁၀။ (က) ယောဟန်ဆက်လက်၍ မိမိအကြောင်း မည်သို့တင်ပြသနည်း။ သူအဘယ်မှာ အချုပ်ခံနေရသနည်း။ (ခ) ယောဟန်ရေးသော ကျမ်းလိပ်ကို မည်သူများ၏ ဝိုင်းဝန်းကူညီမှုဖြင့် အသင်းတော်များထံသို့ ပို့ခဲ့ခြင်းဖြစ်ရမည်နည်း။ (ဂ) ဝိညာဉ်အစာကို ယနေ့ အဘယ်နည်းဖြင့် မကြာခဏ ဖြန့်ဝေခဲ့သနည်း။
၁၀ ယောဟန်က ယေဟောဝါသည် အလိုတော်ရှိသည့်အတိုင်း အမှုကိုအဆုံးသတ်မည်ကို ယုံကြည်စိတ်ချကာ ကျွန်ချင်းတို့အား ဤသို့ရေးလိုက်သည်။ “ဆင်းရဲခြင်း၌လည်းကောင်း၊ နိုင်ငံတော်၌လည်းကောင်း၊ ယေရှုနှင့်အတူ ကြံ့ကြံ့ခံခြင်း၌လည်းကောင်း သင်တို့နှင့် ဝေမျှခံစားသူ သင်တို့၏ညီအစ်ကို ငါယောဟန်ဗျာဒိတ် ၁:၉) သတင်းကောင်းကြောင့် ပတ်မု၌ တစ်ကျွန်းကျသူ၊ မိမိညီအစ်ကိုများနှင့်အတူ ဆင်းရဲဒုက္ခများကို ကြံ့ကြံ့ခံလျက် လာလတ္တံ့သော နိုင်ငံတော်၌ ပါဝင်စိုးစံရန် အခိုင်အမာမျှော်လင့်သူ၊ အိုမင်းပြီဖြစ်သည့် ယောဟန်သည် ဗျာဒိတ်တော်၏ ပထမရူပါရုံကို ယခုမြင်ရလေပြီ။ ယောဟန်အတန်းအစားသည် ထိုရူပါရုံများ၏ ပြည့်စုံချက်ကိုမြင်ရ၍ ယနေ့ လှုံ့ဆော်ခံရသကဲ့သို့ ယောဟန်သည် ထိုရူပါရုံများကြောင့် များစွာအားတက်မိမည်မုချ။ ယောဟန်သည် ထိုအချိန်၌ အချုပ်ခံနေရသောကြောင့် ဗျာဒိတ်ကျမ်းကို အသင်းတော်များသို့ မည်သို့ပို့ခဲ့သည်ကို ကျွန်ုပ်တို့မသိပါ။ (ဗျာဒိတ် ၁:၁၁; ၂၂:၁၈၊ ၁၉) ယေဟောဝါ၏ ကောင်းကင်တမန်များ ပူးပေါင်းဆောင်ရွက်ခဲ့၍ ဖြစ်ရမည်။ ယနေ့ ပိတ်ပင်တားမြစ်မှုအောက် အမှုတော်ဆောင်သော သစ္စာရှိ သက်သေခံများကို ကောင်းကင်တမန်များ ကြိမ်ဖန်များစွာ ကာကွယ်သဖြင့် ထိုသက်သေခံတို့သည် သမ္မာတရားငတ်ပြတ်နေသော မိမိတို့ညီအစ်ကိုများထံ အချိန်တန်ဝိညာဉ်အစာ ပို့နိုင်ခဲ့ကြသည်နည်းတူ ဖြစ်ပေမည်။—ဆာလံ ၃၄:၆၊ ၇။
သည် ဘုရားသခင့်အကြောင်း ဟောပြောခြင်းကြောင့်၊ ယေရှုအကြောင်း သက်သေခံခြင်းကြောင့် ပတ်မုခေါ်ကျွန်းသို့ ရောက်နေပါသည်။” (၁၁။ ယောဟန် မြတ်နိုးသောအခွင့်အရေးနှင့် အလားတူသည့် အဘယ်အခွင့်အရေးကို ယနေ့ ယောဟန်အတန်းအစားက အလွန်တန်ဖိုးထားသနည်း။
၁၁ အသင်းတော်များနှင့် ဆက်သွယ်ရာ၌ ဆက်သွယ်ရေးလမ်းကြောင်းတော်အဖြစ် ယေဟောဝါ၏ အသုံးပြုခြင်းကိုခံရသော မိမိ၏အခွင့်အရေးကို ယောဟန် အလွန်လေးမြတ်တန်ဖိုးထားခဲ့ပေမည်။ ထို့အတူ၊ ယနေ့ ယောဟန်အတန်းအစားလည်း ဘုရားသခင့်အိမ်တော်သားများအား “အချိန်တန်အစာ” ပေးခြင်းတည်းဟူသော မိမိတို့၏ အခွင့်အရေးကို အလွန်ပင်တန်ဖိုးထား၏။ (မဿဲ ၂၄:၄၅၊ ကဘ) အသင်သည် ဤဝိညာဏကျွေးမွေးမှုကြောင့် ခွန်အားရပြီး ဘုန်းရှိသည့် ထာဝရအသက်ပန်းတိုင်သို့ တက်လှမ်းနိုင်သူများတွင် ပါဝင်နိုင်ပါစေ။—သုတ္တံ ၃:၁၃-၁၈; ယောဟန် ၁၇:၃။
[လေ့လာရန်မေးခွန်းများ]
[စာမျက်နှာ ၂၁ ပါ ရုပ်ပုံ]
ခက်ခဲသောကာလအတွင်း ဝိညာဉ်အစာရယူခြင်း
ဤနောက်ဆုံးကာလအတွင်း ယေဟောဝါသက်သေများ ဤမျှတိုင် နှိပ်စက်ညှဉ်းပန်းမှုနှင့် အခက်အခဲ ကြုံတွေ့နေရကား ယုံကြည်ခြင်း၌ ခိုင်ခိုင်မြဲမြဲ ရပ်တည်နိုင်ရန် ဝိညာဉ်အစာရရှိဖို့ အလွန်အရေးကြီးလှ၏။ များသောအားဖြင့် လုံလောက်သောအစာကို ရရှိကြပေသည်။ အခါပေါင်းများစွာ ယေဟောဝါ၏ အံ့ချီးဖွယ်တန်ခိုးတော် ကျေးဇူးကြောင့်ဖြစ်သည်။
ဥပမာ၊ ဂျာမန်နိုင်ငံ၌ ဟစ်တလာကြီးစိုးစဉ် ရက်စက်သော နာဇီအာဏာပိုင်များက ကင်းမျှော်စင် ကိုပိတ်ပင်ထားသော်လည်း သက်သေခံများသည် ၎င်းကို ဖယောင်းမိတ္တူကူး၍ ဖြန့်ဝေခဲ့သည်။ ဟမ်းဘတ်မြို့၌ ထိုသို့ဖယောင်းမိတ္တူကူးသော အိမ်တစ်အိမ်ကို လျှို့ဝှက်ရဲအဖွဲ့က ဝင်စီးသည်။ အိမ်သည် သေးငယ်သဖြင့် ပစ္စည်းကို အဘယ်မှာပင် သိုဝှက်စေကာမူ မလုံခြုံ။ လက်နှိပ်စက်ကို ဗီရိုထဲ၌ထားသည်။ ဝန်ကျယ်သော ဖယောင်းမိတ္တူကူးစက်နှင့် တန်ဆာပလာများကိုမူ မြေတိုက်ခန်းရှိ အာလူးထည့်သည့်ပုတ်ထဲ၌ သိမ်းဆည်းထားသည်။ ပုတ်နောက်၌ မဂ္ဂဇင်းအပြည့်ထည့်ထားသည့် လက်ဆွဲသေတ္တာတစ်လုံး ရှိသေးသည်။ ရဲများ မလွဲဧကန်တွေ့ရကြတော့မည်။ သို့သော် ဘာဖြစ်ခဲ့သနည်း။ ဗီရိုကိုဖွင့်ကြည့်သော အရာရှိသည် သူ့ဖွင့်ပုံကြောင့် လက်နှိပ်စက်ကိုမမြင်လိုက်ချေ။ မြေတိုက်ခန်းနှင့်ပတ်သက်၍မူ အိမ်ရှင်ဖြစ်သူက အောက်ပါအတိုင်း ပြန်ပြောပြ၏။ “အရာရှိသုံးဦး အခန်းအလယ်၌ ရပ်နေကြသည်။ ပုတ်ထားသည့်နေရာမှာပင်ဖြစ်သည်။ ၎င်း၏နောက်၌လည်း ကင်းမျှော်စင် အပြည့်ပါသော လက်ဆွဲသေတ္တာရှိ၏။ သို့သော် တစ်ယောက်ကမျှ သတိပြုမိဟန်မရှိ။ မျက်စိကန်းသွားကြသည့်နှယ်ပင်။” ဘုရားသခင့် အံ့ချီးဖွယ်စောင့်မမှုကြောင့် အိမ်ရှင်သည် ခက်ခဲ၍အန္တရာယ်ထူပြောသော အခါသမယအတွင်း ဝိညာဉ်အစာကို ဆက်လက်ထောက်ပံ့နိုင်ခဲ့ပေသည်။
၁၉၆၀ ပြည့်လွန်နှစ်များအတွင်း နိုင်ဂျီးရီးယားနိုင်ငံနှင့် ၎င်းမှခွဲထွက်သွားသော ဘီယာဖရာပြည်နယ်တို့စပ်ကြား ပြည်တွင်းစစ်ဖြစ်ခဲ့သည်။ ဘီယာဖရာတစ်နယ်လုံးကို နိုင်ဂျီးရီးယားပိုင်နယ်မြေက ဝိုင်းရံထားသည်ဖြစ်ရကား အပြင်လောကနှင့်ဆက်သွယ်သည့် တစ်ခုတည်းသောဆက်သွယ်မှုမှာ လေယာဉ်ပြေးလမ်းကြောင်းသာဖြစ်သည်။ သို့ဖြစ်၍ ဘီယာဖရာမှ သက်သေခံများ ဝိညာဉ်အစာအထောက်အပံ့ ဖြတ်တောက်ခံရမည့် အန္တရာယ်နှင့် ကြုံနေသည်။ သို့တစေ၊ ၁၉၆၈ ခု နှစ်ဦး၌ ဘီယာဖရာအာဏာပိုင်များက မိမိတို့၏အရပ်သားဝန်ထမ်းတစ်ဦးကို ဥရောပ၌ အရေးပါသောရာထူး ခန့်အပ်လိုက်သည်။ နောက်တစ်ဦးအား ဘီယာဖရာ လေယာဉ်ပြေးလမ်းကြောင်းကို တာဝန်ပေးလိုက်သည်။ ဖြစ်ပုံက သူတို့နှစ်ဦးမှာ ယေဟောဝါသက်သေများ ဖြစ်ကြသည်။ သူတို့သည် ဘီယာဖရာနှင့် အပြင်လောကဆက်သွယ်သည့် တစ်ခုတည်းသော ဆက်သွယ်မှု၏ အစွန်းနှစ်ဖက်တွင် ရှိနေကြသည်။ သူတို့နှစ်ဦးက ၎င်းသည် ယေဟောဝါ၏အစီအစဉ်ဖြစ်ရမည်ဟု သိမှတ်ကြသည်။ ထို့ကြောင့် ဘီယာဖရာသို့ ဝိညာဉ်အစာ တင်သွင်းခြင်းတည်းဟူသော အရဲစွန့်ပြီး သတိကြီးစွာနှင့် လုပ်ကိုင်ရသည့်အလုပ်ကို စေတနာဖြင့် ဝင်လုပ်ကြသည်။ စစ်ကာလတစ်လျှောက်လုံး အောင်မြင်စွာ ဆောင်ရွက်နိုင်ခဲ့ကြသည်။ သူတို့ထဲကတစ်ဦးက “ဒီအစီအစဉ်ဟာ လူကြံလို့ရတာမျိုးမဟုတ်ဘူး” ဟုဆို၏။
[စာမျက်နှာ ၁၉ ပါ ဇယား]
ဗျာဒိတ်ကျမ်းပါ ပုံဆောင်ဂဏန်းများ
ဂဏန်း ပုံဆောင်အဓိပ္ပာယ်
၂ အမှုတစ်ခု အခိုင်အမာအတည်ပြုခြင်းကို ဖော်ပြသည်။ (ဗျာဒိတ် ၁၁:၃၊ ၄; တရားဟောရာ ၁၇:၆ နှိုင်းယှဉ်။)
၃ လေးနက်မှုကိုပြသည်။ ပြင်းထန်မှုကိုလည်းညွှန်းသည်။ (ဗျာဒိတ် ၄:၈; ၈:၁၃; ၁၆:၁၃၊ ၁၉)
၄ တစ်ကမ္ဘာလုံးနှံ့စပ်ခြင်း၊ သို့မဟုတ် အချိုးညီမျှမှု၌ တိကျညီညာခြင်းကို ဖော်ပြသည်။ (ဗျာဒိတ် ၄:၆; ၇:၁၊ ၂; ၉:၁၄; ၂၀:၈; ၂၁:၁၆)
၆ မစုံလင်မှု၊ သာမန်မဟုတ်သော၊ ပုံပန်းပျက်သောအရာကို ဖော်ပြသည်။ (ဗျာဒိတ် ၁၃:၁၈; ၂ ဓမ္မရာဇဝင် ၂၁:၂၀ နှိုင်းယှဉ်။)
၇ ယေဟောဝါ သို့မဟုတ် စာတန်၏ ရည်ရွယ်ချက်များနှင့်စပ်လျဉ်းသော ဘုရားသခင့်သတ်မှတ်ရာ ပြည့်စုံမှုကို ဖော်ပြသည်။ (ဗျာဒိတ် ၁:၄၊ ၁၂၊ ၁၆; ၄:၅; ၅:၁၊ ၆; ၁၀:၃၊ ၄; ၁၂:၃)
၁၀ မြေကြီးပေါ်ရှိ အရာများနှင့်ပတ်သက်၍ ရုပ်ပိုင်းဆိုင်ရာ ပြည့်စုံခြင်းကို ဖော်ပြသည်။ (ဗျာဒိတ် ၂:၁၀; ၁၂:၃; ၁၃:၁; ၁၇:၃၊ ၁၂၊ ၁၆)
၁၂ ကောင်းကင်၌ဖြစ်စေ၊ မြေကြီးပေါ်ဖြစ်စေ၊ ဘုရားသခင်ဖွဲ့စည်းတော်မူသော အဖွဲ့အစည်းကို ဖော်ပြသည်။
၂၄ ယေဟောဝါ၏များပြားသော (နှစ်ဆသော) ဖွဲ့စည်းမှုအစီအစဉ်ကို ဖော်ပြသည်။ (ဗျာဒိတ် ၄:၄)
ဗျာဒိတ်ကျမ်းမှ အချို့ဂဏန်းများကို စာသားအတိုင်း နားလည်ရန်ဖြစ်သည်။ များသောအားဖြင့် ရှေ့နောက်စကားများက အဆုံးအဖြတ်ပေးသည်။ (ဗျာဒိတ် ၇:၄၊ ၉; ၁၁:၂၊ ၃; ၁၂:၆၊ ၁၄; ၁၇:၃၊ ၉-၁၁; ၂၀:၃-၅ တို့ကိုရှု။)