အောင်မြင်သူများဖြစ်ရန် ကြိုးပမ်းခြင်း
အခန်း ၈
အောင်မြင်သူများဖြစ်ရန် ကြိုးပမ်းခြင်း
စမုရန
၁။ (က) အဘယ်အသင်းတော်သည် ဘုန်းပွင့်ယေရှုထံမှ သတင်းတော်ကို ဆက်လက်ရရှိသနည်း။ (ခ) ‘အဦးဆုံးနှင့် နောက်ဆုံးသောသူ’ ဟူ၍ မိမိကိုယ်ကို ခေါ်ခြင်းအားဖြင့် ထိုအသင်းတော်မှ ခရစ်ယာန်များအား ဘာကို ယေရှု သတိရစေသနည်း။
ရှးဧဖက်မြို့သည် ယနေ့ ပြိုပျက်လျက်ရှိ၏။ သို့သော် ယေရှု၏ ဒုတိယ သတင်းတော်ရောက်ရှိသည့် အရပ်ဌာနမူကား ပျားပန်းခပ်လှုပ်ရှားသော မြို့တစ်မြို့၏ တည်နေရာဖြစ်ဆဲပင်။ ဧဖက်မြို့ အပြိုအပျက်များ၏ မြောက်ဘက် ၃၅ မိုင်ခန့်တွင် တူရကီနိုင်ငံပိုင် အစ်ဇမီယာမြို့တည်ရှိ၍ ထိုတွင် ယေဟောဝါ သက်သေများ၏ စိတ်အားထက်သန်သော အသင်းတော်လေးခုကို ယနေ့တိုင် တွေ့နိုင်သည်။ ပထမရာစု၌ ဤနေရာမှာပင် စမုရနမြို့ တည်ရှိခဲ့သည်။ ယေရှု၏ နောက်စကားများကို သတိပြုပါ– “စမုရနမြို့ရှိ အသင်းတော်၏ ကောင်းကင်တမန်ထံ ဤသို့ရေးလော့– ဤကား ‘အဦးဆုံးနှင့် နောက်ဆုံးသောသူ၊’ သေပြီးမှ အသက်ပြန်ရှင်လာသူ၏ မိန့်ဆိုချက်များဖြစ်သည်။” (ဗျာဒိတ် ၂:၈) စမုရနမြို့ရှိ ခရစ်ယာန်များအား ဤအချက်ကို ဖော်ပြခြင်းဖြင့် ယေရှုက မိမိသည် မသေနိုင်သော ဝိညာဉ်အသက်တာသို့ အဦးဆုံးနှင့် နောက်ဆုံးအဖြစ် ယေဟောဝါ တိုက်ရိုက်ထမြောက်စေသော သမာဓိစောင့်ထိန်းသူဖြစ်ကြောင်း သူတို့အား သတိရစေသည်။ ယေရှုကိုယ်တိုင် အခြားဘိသိက်ခံ ခရစ်ယာန်အားလုံးကို ထမြောက်စေမည်။ သို့ဖြင့် ကိုယ်တော်သည် မိမိနှင့်အတူ မသေနိုင်သော ကောင်းကင်အသက်တာ ဝင်စားကြမည့် ညီတော်များအား ဩဝါဒပေးနိုင်သည့် အရည်အချင်းရှိပေသည်။
၂။ အဘယ်ကြောင့် ခရစ်ယာန်များအားလုံး “သေပြီးမှ အသက်ပြန်ရှင်လာသူ” ၏စကားများမှ နှစ်သိမ့်မှု ရကြသနည်း။
၂ ယေရှုသည် ဖြောင့်မတ်ခြင်းအတွက် ကြံ့ကြံ့ခံမှု၌ ရှေ့ဆောင်သဖြင့် ထိုက်သင့်သောဆုကို ရခဲ့သည်။ ကိုယ်တော်၏ သေသည့်တိုင် သစ္စာရှိခြင်းနှင့် ၎င်းနောက် ထမြောက်ခြင်းသည် ခရစ်ယာန်အားလုံးအတွက် အခြေခံမျှော်လင့်ချက်ဖြစ်သည်။ (တမန်တော် ၁၇:၃၁) “သေပြီးမှ အသက်ပြန်ရှင်” တော်မူသည့်အချက်က သမ္မာတရားလမ်းစဉ်အတွက် ခံရသမျှဆင်းရဲသည် အကျိုးမဲ့မဖြစ်ကြောင်း သက်သေပြသည်။ ယေရှု၏ထမြောက်ခြင်းသည် ခရစ်ယာန်အားလုံးအဖို့ အလွန်အားရှိဖွယ်ဖြစ်သည်။ အထူးသဖြင့် ယုံကြည်ခြင်းအတွက် ဆင်းရဲခံရမည့် အချိန်တွင်ဖြစ်သည်။ သင့်အဖြစ်သည် ဤသို့ပင်လော။ သို့ဖြစ်လျှင် စမုရနအသင်းတော်ထံ ရေးသားသော ယေရှု၏ နောက်စကားများမှ အားယူနိုင်သည်။
၃။ (က) စမုရန ခရစ်ယာန်များကို ယေရှုမည်သို့ အားပေးသနည်း။ (ခ) စမုရန ခရစ်ယာန်များ ဆင်းရဲသော်လည်း “ကြွယ်ဝ၏” ဟု ယေရှု အဘယ်ကြောင့် ဆိုသနည်း။
၃ “သင်၏ ဆင်းရဲဒုက္ခနှင့် နွမ်းပါးမှုကို ငါသိ၏။ သို့သော် သင်သည် ကြွယ်ဝ၏။ မိမိတို့ကိုယ်ကို ယုဒအမျိုးသားများ ဖြစ်သည်ဟု ဆိုသောသူတို့၏ စော်ကားပြောဆိုခြင်း ခံရသည်ကိုလည်း ငါသိ၏။ ထိုသူတို့သည် စင်စစ်အားဖြင့် ယုဒအမျိုးသားများ မဟုတ်။ စာတန်၏ အဖွဲ့ဝင်များ ဖြစ်ကြ၏။” (ဗျာဒိတ် ၂:၉) စမုရနမြို့ရှိ မိမိ၏ညီအစ်ကိုများကို ယေရှု ဝေဖန်စရာမရှိ။ လှိုက်လှိုက်လှဲလှဲ ချီးမွမ်းဖို့သာရှိသည်။ သူတို့သည် ယုံကြည်ခြင်းကြောင့် ဆင်းရဲဒုက္ခ များစွာခံခဲ့ရကြပြီ။ ပစ္စည်းဥစ္စာဘက်၌ ဆင်းရဲကြ၏။ သစ္စာတည်ကြည်မှုကြောင့် ဖြစ်ဟန်တူသည်။ (ဟေဗြဲ ၁၀:၃၄) သို့ရာတွင် သူတို့ ပဓာနထားသောအရာမှာ ဝိညာဉ်ရေးရာများဖြစ်၍ ယေရှုအကြံပြုသည့်အတိုင်း ကောင်းကင်ဘုံ၌ ဘဏ္ဍာဆည်းပူးနှင့်ပြီ။ (မဿဲ ၆:၁၉၊ ၂၀) သို့ဖြစ်၍ သိုးထိန်းချုပ်က သူတို့ကို “ကြွယ်ဝ” သူအဖြစ် မြင်၏။—ယာကုပ် ၂:၅ နှိုင်းယှဉ်။
၄။ စမုရန ခရစ်ယာန်များသည် မည်သူ၏ ဆန့်ကျင်တိုက်ခိုက်မှုများကို ခံရကြသနည်း။ ထိုဆန့်ကျင်သူတို့ကို ယေရှုမည်သို့ ယူမှတ်သနည်း။
၄ စမုရန ခရစ်ယာန်တို့သည် ဇာတိဂျူးများလက်၌ ဆန့်ကျင်တိုက်ခိုက်မှုများကို ခံခဲ့ရပြီဖြစ်ကြောင်း ယေရှု အထူးသတိပြုမိသည်။ ယခင်ကလည်း ဤဘာသာဝင် အမြောက်အမြားသည် ခရစ်ယာန်သာသနာ ပြန့်ပွားမှုကို အသေအလဲ ဆန့်ကျင်ခဲ့သည်။ (တမန်တော် ၁၃:၄၄၊ ၄၅; ၁၄:၁၉) ယေရုရှလင်မြို့ ကျဆုံး၍ ဆယ်စုနှစ် အနည်းငယ်မျှသာကြာသော ယခုအချိန်၌ စမုရနမြို့မှ ထိုဂျူးတို့သည် စာတန့်စိတ်ဓာတ်မျိုး တင်ပြနေကြသည်။ ထို့ကြောင့် သူတို့ကို “စာတန်၏ အဖွဲ့ဝင်များ” အဖြစ် ယေရှု ရှုမြင်သည်မှာ မဆန်းချေ။ *
၅။ စမုရန ခရစ်ယာန်များအတွက် ရှေ့တွင် အဘယ်စုံစမ်းမှုရှိသနည်း။
၅ ဤသို့သောမုန်းတီးမှုနှင့် ရင်ဆိုင်ရသည့် စမုရန ခရစ်ယာန်များကို ယေရှု ဤသို့နှစ်သိမ့်တော်မူ၏– “သင်ခံရမည့် ဆင်းရဲဒုက္ခများကို မကြောက်နှင့်။ ကြည့်ပါ။ စာတန်သည် သင်တို့ကို အပြည့်အဝ စမ်းသပ်ရန်နှင့် သင်တို့အား ဆယ်ရက်တိုင်တိုင် ဆင်းရဲဒုက္ခခံစေရန် သင်တို့ထဲမှ အချို့ကို ထောင်ထဲ၌ အဆက်မပြတ် အကျဉ်းချလိမ့်မည်။ သေသည်တိုင်အောင် သစ္စာရှိလော့။ သို့ပြုလျှင် သင့်အား အသက်သရဖူကို ငါပေးမည်။” (ဗျာဒိတ် ၂:၁၀) ဤတွင် ယေရှုက “သင်တို့” ဟူသော ဂရိဗဟုဝုစ်ကိန်းကို သုံးကြိမ်သုံးထားသဖြင့် အသင်းတော်တစ်ရပ်လုံးအား မိန့်ကြားနေခြင်းဖြစ်ကြောင်း ပြ၏။ စမုရနခရစ်ယာန်များ ခံရသောစုံစမ်းမှုများ မကြာခင် ပြီးဆုံးတော့မည်ဟု ယေရှုကတိမပေးနိုင်။ သူတို့ထဲမှ အချို့သည် ဆက်လက်၍ နှိပ်စက်ညှဉ်းဆဲခြင်း၊ အကျဉ်းချခြင်း ခံရလိမ့်မည်။ “ဆယ်ရက်” တိုင်တိုင် ဆင်းရဲဒုက္ခခံရကြမည်။ ဆယ်ဂဏန်းမှာ မြေကြီးဆိုင်ရာပြည့်စုံမှု သို့မဟုတ် အလုံးစုံကို ပုံဆောင်သည်။ ဝိညာဉ်ရေးဘက် ကြွယ်ဝသော သမာဓိစောင့်သိသူများပင် အသွေးအသားဖြင့် အသက်ရှင်စဉ် အပြည့်အဝ စမ်းသပ်ခံရကြလိမ့်မည်။
၆။ (က) စမုရန ခရစ်ယာန်များ အဘယ်ကြောင့် မကြောက်သင့်သနည်း။ (ခ) စမုရနအသင်းတော်ထံ ရေးသောသတင်းတော်ကို ယေရှုမည်သို့ နိဂုံးချုပ်သနည်း။
၆ သို့တစေ၊ စမုရန ခရစ်ယာန်တို့သည် မကြောက်သင့်၊ အညံ့မခံသင့်။ အဆုံးတိုင်အောင် သစ္စာတည်လျှင် သူတို့အဖို့ ကောင်းကင်ဘုံ၌ မသေနိုင်သောအသက် တည်းဟူသော “အသက်သရဖူ” သိုထားလျက်ရှိသည်။ (၁ ကောရိန္သု ၉:၂၅; ၂ တိမောသေ ၄:၆-၉) တမန်တော်ပေါလုက ဤဆုမွန်အတွက် အရာခပ်သိမ်းမက မိမိ၏ မြေကြီးအသက်တာကိုပင် အဆုံးခံထိုက်သည်ဟု ယူမှတ်သည်။ (ဖိလိပ္ပိ ၃:၈) စမုရနမြို့မှ ထိုသစ္စာရှိသူများလည်း ဤသို့ ယူမှတ်ကြပုံရ၏။ ယေရှုက အောက်ပါစကားဖြင့် မိမိ၏သတင်းတော်ကို နိဂုံးချုပ်လိုက်သည်– “အသင်းတော်တို့အား ဝိညာဉ်တော် ဆင့်ဆိုသောစကားကို နားရှိသောသူ ကြားပါစေ။ အောင်မြင် သောသူသည် ဒုတိယသေခြင်း၏ ဘေးပြုမှုကို လုံးဝ ခံရမည် မဟုတ်။” (ဗျာဒိတ် ၂:၁၁) အောင်မြင်သောသူတို့သည် သေခြင်းက မထိခိုက်နိုင်သော မသေနိုင်သည့် ကောင်းကင်အသက်တာရဖို့ စိတ်ချနိုင်သည်။—၁ ကောရိန္သု ၁၅:၅၃၊ ၅၄။
“ဆယ်ရက်တိုင်တိုင် ဆင်းရဲဒုက္ခခံ”
၇၊ ၈။ ၁၉၁၈ ခုနှစ်တွင် ခရစ်ယာန်အသင်းတော်သည် စမုရနအသင်းတော်ကဲ့သို့ အဘယ်နည်းဖြင့် “အပြည့်အဝ စမ်းသပ်” ခံခဲ့ရသနည်း။
၇ ယနေ့ ယောဟန်အတန်းအစားနှင့် အပေါင်းပါတို့သည် စမုရန ခရစ်ယာန်များကဲ့သို့ပင် “အပြည့်အဝ စမ်းသပ်” ခံခဲ့ပြီး ဆက်၍ခံလျက်ရှိကြသည်။ သူတို့သည် စမ်းသပ်မှုအောက် တည်ကြည်သဖြင့် ဘုရားသခင့် လူမျိုးတော်အဖြစ် မှတ်သားခံရသည်။ (မာကု ၁၃:၉၊ ၁၀) သခင့်နေ့တော်စတင်၍ မကြာမီ စမုရန ခရစ်ယာန်များအား မိန့်ကြားသော ယေရှု၏စကားသည် နိုင်ငံတကာမှ ယေဟောဝါ၏လူမျိုးတော် အုပ်စုကလေးကို အမှန်ပင် နှစ်သိမ့်ခဲ့သည်။ (ဗျာဒိတ် ၁:၁၀) သူတို့သည် ၁၈၇၉ ခုနှစ်မှစ၍ ဘုရားသခင့်နှုတ်ကပါဌ်တော်မှ ဝိညာဉ်ရေးရတနာများကို တူးဖော်လျက် အခြားသူများအား ဝေမျှလျက်ရှိကြသည်။ သို့သော် ပထမကမ္ဘာစစ်အတွင်း မုန်းတီးမှုနှင့် ညှဉ်းဆဲမှုကို အပြင်းအထန် ခံလိုက်ရသည်။ တစ်ကြောင်းမှာ စစ်ရောဂါပိုး အကူးစက် မခံ၍ဖြစ်သည်။ နောက်တစ်ကြောင်းမှာ ခရစ်ယာန်ဘောင်၏ အမှားများကို မကြောက်မရွံ့ ဖော်ထုတ်သောကြောင့်တည်း။ ခရစ်ယာန်ဘောင် ခေါင်းဆောင်အချို့၏ သွေးထိုးမှုကြောင့် သူတို့ခံရသော ညှဉ်းပန်းမှုသည် ၁၉၁၈ ခုနှစ်၌ အထွတ်အထိပ်သို့ ရောက်ခဲ့သည်။ ဂျူးများလက်၌ စမုရန ခရစ်ယာန်များ ခံရသည့်နှိပ်စက်မှုနှင့် ခိုင်းနှိုင်းနိုင်သည်။
၈ အမေရိကန်နိုင်ငံ၌ နှိပ်စက်ညှဉ်းပန်းမှု လှိုင်းလုံးတစ်ခုထခဲ့ရာ နောက်ဆုံး၌ ကင်းမျှော်စင်အသင်း ဥက္ကဋ္ဌသစ် ဂျိုးဇက် အက်ဖ်၊ ရပ်သဖော့ဒ်နှင့် အပေါင်းပါခုနစ်ဦး အကျဉ်းချခံရသည်အထိ ဆိုးရွားခဲ့သည်။ သူတို့အများစုသည် အနှစ် ၂၀ ထောင်ဒဏ် စီရင်ခံရကြသည်။ ကိုးလအကြာတွင် အာမခံဖြင့် လွတ်လာကြသည်။ ၁၉၁၉ ခုနှစ်၊ မေလ ၁၄ ရက်နေ့၌ အယူခံရုံးက သူတို့အပေါ်
မှားယွင်းစွာချခဲ့သော စီရင်ချက်များကို ပြောင်းပြန်လှန်လိုက်သည်။ မူလစီရင်ချက်၌ အမှား ၁၃၀ ပါရှိကြောင်း ပေါ်လွင်လာသည်။ မဟာ စိန့် ဂရက်ဂိုရီ အဆင့်ဝင် သူရဲကောင်းဘွဲ့ရ ဗရင်ဂျီတရားသူကြီး မန်တွန်သည် ၁၉၁၈ ခုနှစ်၌ ထိုခရစ်ယာန်များအား အာမခံဖြင့်လွှတ်ရန် ခွင့်မပြုဘဲနေခဲ့သည်။ နောက်ပိုင်းတွင် သူသည် လာဘ်ထိုးရန် မြှူဆွယ်မှုနှင့် လာဘ်စားမှု ၆ မှုဖြင့် ၁၉၃၉ ခုနှစ်၌ ထောင်ဒဏ်နှစ်နှစ်နှင့် ဒဏ်ငွေဒေါ်လာ ၁၀,၀၀၀ စီရင်ချက် ချခံရသည်။၉။ နာဇီဂျာမနီနိုင်ငံမှ ယေဟောဝါသက်သေများ ဟစ်တလာ၏ မည်သို့သော ဆက်ဆံမှုကို ခံခဲ့ရသနည်း။ ဘုန်းကြီးဓမ္မဆရာများ မည်သို့တုံ့ပြန်ခဲ့ကြသနည်း။
၉ ဂျာမနီနိုင်ငံကို နာဇီအုပ်စိုးစဉ် ဟစ်တလာသည် ယေဟောဝါသက်သေများ၏ ဟောပြောခြင်းလုပ်ငန်းကို လုံးဝပိတ်ပင်ခဲ့သည်။ ထောင်ပေါင်းများစွာသော သက်သေခံတို့သည် နှစ်နှင့်ချီ၍ ချွေးတပ်စခန်းများနှင့် အကျဉ်းထောင်များတွင် ရက်စက်စွာ ချုပ်နှောင်ခံရပြီး အများစုမှာ သေဆုံးခဲ့ရရှာသည်။ ဟစ်တလာ၏တပ်တွင် စစ်မှုထမ်းရန် ငြင်းဆန်သောလူငယ် ၂၀၀ လည်း ကွပ်မျက်ခံခဲ့ရသည်။ အဆိုပါ လုပ်ရပ်အားလုံးကို ဘုန်းကြီး ဓမ္မဆရာများက အားပေးထောက်ခံကြောင်း ၁၉၃၈ ခုနှစ်၊ မေလ ၂၉ ရက်ထုတ် The German Way (ဂျာမန်တို့လမ်းစဉ်) သတင်းစာပါ ဗရင်ဂျီဘုန်းကြီး၏ စကားများက သာဓကပြ၏။ သူ့ရေးသားချက်အချို့မှာ ဤသို့ဖြစ်သည်– “ယခု ကမ္ဘာပေါ်တွင် . . . ကျမ်းစာကျောင်းသားများ [ယေဟောဝါသက်သေများ] ဟုခေါ်ကြသူတို့ကို ပိတ်ပင်သောနိုင်ငံ တစ်နိုင်ငံရှိနေပြီ။ ဂျာမနီနိုင်ငံပင်ဖြစ်သည်။ . . . အဒေါ့လ်ဖ်ဟစ်တလာ အာဏာရ၍ ဂျာမန်ဗရင်ဂျီ ဘိရှော့အဖွဲ့က ထပ်မံတောင်းဆိုသောအခါ ဟစ်တလာက ဤသို့ပြောပါသည်– ‘စိတ်ထက်သန်တဲ့ ကျမ်းစာကျောင်းသားတွေလို့ခေါ်တဲ့ ဒီ [ယေဟောဝါသက်သေတွေ] ဟာ ဂြိုဟ်ကောင်တွေပဲ။ . . . ဒီကောင်တွေကို ရမ်းကုတွေလို့ပဲ ငါမှတ်တယ်။ ဒီအမေရိကန် တရားသူကြီး ရပ်သဖော့ဒ်က ဂျာမန်ဗရင်ဂျီ အသင်းသားတွေကို သိက္ခာချတာ ငါမခံနိုင်ဘူး။ ဂျာမနီနိုင်ငံမှရှိတဲ့ [ယေဟောဝါသက်သေများ] ကို ငါဖျက်သိမ်းတယ်။’” ၎င်းနောက် အဆိုပါဘုန်းကြီးက “ကောင်းပေစွ” ဟုဖြည့်စွက်လိုက်သည်။
၁၀။ (က) သခင့်နေ့တော် စတင်သည်နှင့်အမျှ ယေဟောဝါသက်သေများ အဘယ်နှိပ်စက်မှု ခံခဲ့ကြရသနည်း။ (ခ) ခရစ်ယာန်များ တရားခုံရုံးများ၌ အမှုပြိုင်သောအခါ ဘာဖြစ်လေ့ရှိသနည်း။
၁၀ သခင့်နေ့တော် အစပြုသည်နှင့်အမျှ မြွေနှင့် သူ့အမျိုးအနွယ်သည် ဘိသိက်ခံခရစ်ယာန်များနှင့် သူတို့၏အပေါင်းပါများကို ထိုးစစ်ဆင်လာသည်မှာ တစ်ထောက်မျှ မနားခဲ့။ ဤသူများစွာတို့ကို ထောင်ချ၏။ ရက်စက်ယုတ်မာစွာ နှိပ်စက်ညှဉ်းပန်းကြသည်။ (ဗျာဒိတ် ၁၂:၁၇) ထိုရန်သူတို့သည် အဆက်မပြတ် ‘ဥပဒေဖြင့် အမှုဆင်’ ကြသည်။ သို့သော်လည်း ယေဟောဝါ၏ လူမျိုးတော်က “လူ၏စကားထက် ဘုရားသခင်၏ စကားတော်ကို နားထောင်သင့်ပါ၏” ဟူသောဆောင်ပုဒ်ကို လက်မလွတ်တမ်း ကိုင်စွဲသည်။ (ဆာလံ ၉၄:၂၀၊ King James Version; တမန်တော် ၅:၂၉) ၁၉၅၄ ခုနှစ်တွင် ကင်းမျှော်စင် မဂ္ဂဇင်းက ဤသို့ဖော်ပြ၏– “လွန်ခဲ့သော အနှစ်လေးဆယ်အတွင်း နိုင်ငံပေါင်း ခုနစ်ဆယ်ကျော်တွင် တစ်ချိန်မဟုတ် တစ်ချိန်၌ ကန့်သတ်ချုပ်ချယ်မိန့်များ ထုတ်ပြန်၍ ယေဟောဝါသက်သေများကို နှိပ်စက်ခဲ့သည်။” ဘာသာရေးလွတ်လပ်မှုအတွက် တရားရုံးများ၌ တရားပြိုင်နိုင်သည့်နိုင်ငံများ၌ ဤခရစ်ယာန်များ အမှုဆိုင်သဖြင့် နိုင်ငံတော်တော်များများတွင် အပြတ်အသတ် အောင်ပွဲခံခဲ့ကြသည်။ အမေရိကန်နိုင်ငံ တရားရုံးချုပ်မှာပင် ယေဟောဝါသက်သေများ အမှု ၅၀ နိုင်လိုက်သည်။
၁၁။ ယေရှုရောက်ရှိခြင်းဆိုင်ရာနိမိတ်၏ အဘယ်ပရောဖက်ပြုချက်သည် သခင့်နေ့တော်အတွင်းရှိ ယေဟောဝါသက်သေများအပေါ် ပြည့်စုံခဲ့သနည်း။
၁၁ အဘယ်အုပ်စုကမျှ သူတို့လောက် ယေရှုအမိန့်ကိုနာခံလျက် ကဲသာဥစ္စာကို ကဲသာအား မပေးအပ်ခဲ့ချေ။ (လုကာ ၂၀:၂၅; ရောမ ၁၃:၁၊ ၇) သို့ပါလျက်နှင့် အစိုးရအမျိုးမျိုး အုပ်ချုပ်သည့် ဤမျှများပြားသော နိုင်ငံများတွင် အဘယ်အုပ်စုကမျှ သူတို့လောက် အကျဉ်းချခြင်း မခံရပါ။ ယနေ့တိုင် အမေရိကတိုက်များ၊ ဥရောပတိုက်၊ အာဖရိကတိုက်နှင့် အာရှတိုက်များ၌ ဤအတိုင်းဖြစ်၏။ ယေရှု၏ရောက်ရှိခြင်း နိမိတ်ဆိုင်ရာ မဟာပရောဖက်ပြုချက်၌ အောက်ပါအချက်ပါဝင်သည်။ “ထိုကာလ၌ လူများတို့သည် သင်တို့ကိုညှဉ်းဆဲခြင်း၊ အသေသတ်ခြင်းကို ခံစေခြင်းငှာ အပ်နှံကြလိမ့်မည်။ ငါ၏နာမကြောင့်လည်း ခပ်သိမ်းသောလူမျိုးတို့သည် သင်တို့ကိုမုန်းကြလိမ့်မည်။” (မဿဲ ၂၄:၃၊ ၉) ဤဟောကိန်းသည် သခင့်နေ့တော်အတွင်း ခရစ်ယာန်သက်သေများအပေါ် အမှန်ပြည့်စုံခဲ့သည်။
၁၂။ ယောဟန်အတန်းအစားသည် ဘုရားသခင့်လူမျိုးတော် နှိပ်စက်ညှဉ်းပန်းမှု ခံနိုင်စွမ်းရှိစေရန် မည်သို့အားဖြည့်ပေးသနည်း။
၁၂ ယောဟန်အတန်းအစားက ဘုရားသခင့်လူမျိုးတော် ဆင်းရဲခံနိုင်စွမ်းရှိစေဖို့ စမုရန ခရစ်ယာန်များထံ ယေရှု ရေးပို့သောစကား၏ ဆိုလိုရင်းကို နှလုံးသွင်းရန် အဆက်မပြတ် သတိပေး၏။ ဥပမာ၊ နာဇီတို့၏နှိပ်စက်မှု စတင်သည်နှင့်အမျှ ၁၉၃၃ နှင့် ၁၉၃၄ ခုနှစ်၌ ကင်းမျှော်စင် တွင် မဿဲ ၁၀:၂၆-၃၃ ကိုဆွေးနွေးတင်ပြသော “သူတို့ကို မကြောက်နှင့်”၊ ဒံယေလ ၃:၁၇၊ ၁၈ ကိုအခြေခံသည့် “ပြင်းထန်သော စမ်းသပ်မှု”၊ ဒံယေလ ၆:၂၂ ကို အဓိကကျမ်းချက်အဖြစ်ထား၍ရေးသော “ခြင်္သေ့ခံတွင်း” စသော ဆောင်းပါးများ ပါလာခဲ့သည်။ ဤစာအုပ်ကို အင်္ဂလိပ်ဘာသာစကားဖြင့် ပထမအကြိမ် ထုတ်ဝေသည့် ၁၉၈၀ ပြည့်လွန်နှစ်များတွင် ယေဟောဝါသက်သေများသည် နိုင်ငံပေါင်း ၄၀ ကျော်၌ ရက်ရက်စက်စက် နှိပ်စက်ခံနေကြရသည်။ ထိုအချိန်အတွင်း ကင်းမျှော်စင် က “နှိပ်စက်ခံရလျက်နှင့် ဝမ်းမြောက်၏”၊ “ခရစ်ယာန်များ နှိပ်စက်ညှဉ်းဆဲမှုကို ကြံ့ကြံ့ခံရင်ဆိုင်ခြင်း” စသောဆောင်းပါးများဖြင့် ဘုရားသခင့် လူမျိုးတော်ကို အားဖြည့်ပေးခဲ့သည်။ *
၁၃။ ယေဟောဝါ၏ ခရစ်ယာန်သက်သေများသည် စမုရန ခရစ်ယာန်များကဲ့သို့ပင် ညှဉ်းပန်းမှုကို အဘယ်ကြောင့် မကြောက်ကြသနည်း။[စာမျက်နှာ ၃၇ ပါ ရုပ်ပုံ]
၁၃ ယေဟောဝါ၏ ခရစ်ယာန်သက်သေများသည် တကယ်ပင် ကာယနှိပ်စက်မှုနှင့် အခြားသောစမ်းသပ်မှုများကို ပုံဆောင်သည့် ဆယ်ရက်တိုင်တိုင် ခံရကြသည်။ သူတို့သည် ရှေးစမုရန ခရစ်ယာန်များကဲ့သို့ပင် မကြောက်ရွံ့ကြ။ ကမ္ဘာ့ဒုက္ခ တိုးများလာငြား ကျွန်ုပ်တို့တစ်ယောက်မျှလည်း ကြောက်စရာအကြောင်းမရှိ။ ဆင်းရဲဒုက္ခများကို ကြံ့ကြံ့ခံရုံမက ‘ကျွန်ုပ်တို့၏ ဥစ္စာပစ္စည်းများကို သူတစ်ပါး အတင်းအဓမ္မ သိမ်းယူသည်ကိုပင် ဝမ်းမြောက်စွာခံယူကြ’ ရန် အသင့်ရှိပြီ။ (ဟေဗြဲ ၁၀:၃၂-၃၄၊ ခမ) ကျွန်ုပ်တို့သည် ဘုရားသခင့် နှုတ်ကပါဌ်တော်ကို လေ့လာ၍ ကိုယ်ပိုင်ဖြစ်စေလျှင် ယုံကြည်ခြင်း၌ မားမားမတ်မတ် ရပ်တည်နိုင်မည်။ ယေဟောဝါသည် သင် သမာဓိစောင့်သိရန် စောင့်ရှောက်နိုင်သည်၊ စောင့်ရှောက်မည်ကို စိတ်ချပါ။ “သင်တို့ကို သတိနှင့် ကြည့်ရှုတော်မူသောကြောင့်၊ သင်တို့၌ စိုးရိမ်ခြင်းအမှု ရှိသမျှတို့ကို ကိုယ်တော်၌ အပ်နှံကြလော့။”—၁ ပေတရု ၅:၆-၁၁။
[အောက်ခြေမှတ်ချက်]
^ အပိုဒ်၊ 4 ယောဟန် သေလွန်၍ အနှစ် ၆၀ အကြာတွင်၊ ၈၆ နှစ်အရွယ်ရှိ ပေါ်လီကာ့ပ်သည် ယေရှုပေါ် ယုံကြည်ခြင်းကို မစွန့်သောကြောင့် စမုရနမြို့တွင် မီးရှို့သတ်ခံရသည်။ ထိုဖြစ်ရပ်နှင့် တစ်ပြိုင်နက် ရေးသားသည်ဟု ယူဆရသော ပေါ်လီကာ့ပ်၏ အာဇာနည်ဘဝ အမည်ရှိစာအုပ်က မီးရှို့သတ်ရန် ထင်းများစုဆောင်းကြစဉ်၊ ထိုနေ့သည် “မဟာဥပုသ်နေ့” ဖြစ်လျက်နှင့် “ဂျူးတို့သည် ထိုကိစ္စ၌ ဝိုင်းဝန်းကူညီရန် သူတို့၏ထုံးစံအတိုင်း အလွန်စိတ်အားထက်သန်ကြ၏” ဟု ဖော်ပြထားသည်။
^ အပိုဒ်၊ 12 ၁၉၃၃ ခုနှစ် နိုဝင်ဘာ ၁ ရက်ထုတ်၊ အောက်တိုဘာ ၁ ရက်နှင့် ၁၅ ရက်ထုတ်၊ ၁၉၃၄ ခုနှစ် ဒီဇင်ဘာ ၁ ရက်နှင့် ၁၅ ရက်ထုတ်၊ ၁၉၈၃ ခုနှစ် မေလ ၁ ရက်ထုတ် (လိပ်) ကင်းမျှော်စင် များကိုရှု။
[လေ့လာရန်မေးခွန်းများ]
[စာမျက်နှာ ၃၉ ပါ လေးထောင့်ကွက်/ရုပ်ပုံ]
နာဇီအုပ်စိုးစဉ် ယေဟောဝါ၏ ဂျာမန်သက်သေခံများ သစ္စာတည်ကြည်ခဲ့ကြောင်း သမိုင်းသုတေသီများ သက်သေထူလာကြသည်မှာ နှစ်ပေါင်းများစွာရှိပြီ။ သမိုင်းသုတေသီ ကလော်ဒီ ကွန်းဇ်ရေးသားသော ၁၉၈၆ ခုနှစ်ထုတ် Mothers in the fatherland (အဖနိုင်ငံမှ အမိများ) ဟူသောစာအုပ်က ဤသို့ဆို၏– “နာဇီဝါဒီ မဟုတ်သော ဂျာမန်အားလုံးအနက် အတော်များများသည် မိမိတို့ စက်ဆုပ်သော အုပ်ချုပ်ရေးအောက်၌ မပျောက်မပျက် တည်ရှိနိုင်သော နည်းလမ်းများကို တွေ့ရကြသည်။ . . . ကိန်းဂဏန်းနှင့် အယူအဆဆိုင်ရာ နယ်ပယ်၏ တစ်ဖက်စွန်းတွင် ယေဟောဝါသက်သေ ၂၀,၀၀၀ ကိုတွေ့ရမည်။ သူတို့သည် တစ်ယောက်မကျန်ဟု ဆိုရမလောက် နာဇီအစိုးရကို အဘယ်ပုံစံဖြင့်မျှ နာမခံဘဲ ပြတ်ပြတ်သားသား ငြင်းဆန်ခဲ့ကြသည်။ . . . ဤခုခံသူအုပ်စု၏ အစွမ်းထက်သည့် စည်းလုံးခြင်းအင်အားမှာ ဘာသာရေးဖြစ်သည်။ အစကတည်းက ယေဟောဝါသက်သေများသည် နာဇီအစိုးရ၏ အဘယ်ကဏ္ဍနှင့်မျှ ပူးပေါင်းဆောင်ရွက်ခြင်းမရှိ။ ၁၉၃၃ ခုနှစ်တွင် ဂျာမန်သူလျှိုရဲတပ်ဖွဲ့က သူတို့၏ ပြည်တွင်းအဖွဲ့ချုပ်များကို ဖျက်သိမ်းပြီး ၁၉၃၅ ခုနှစ်တွင် သူတို့၏ဂိုဏ်းကို ပိတ်ပင်ခဲ့လျက်နှင့် သူတို့သည် ‘ဟိုင်းလ် ဟစ်တလာ’ ဟူ၍ပင် မဆိုဘဲနေသည်။ ယေဟောဝါသက်သေများ အားလုံးထဲမှ ထက်ဝက်ခန့် (အများအားဖြင့် အမျိုးသားများ) ကို ချွေးတပ်စခန်းများသို့ ပို့ခဲ့သည်။ သူတို့ထဲမှ လူတစ်ထောင် ကွပ်မျက်ခံရသည်။ နောက်လူတစ်ထောင်မှာ ၁၉၃၃ နှင့် ၁၉၄၅ ခုနှစ် အတွင်း သေဆုံးကြသည်။ . . . ဟစ်တလာနှင့် ပူးပေါင်းဆောင်ရွက်ပါဟု ဘုန်းကြီးဓမ္မဆရာများ တိုက်တွန်းကြသည်ကို ဗရင်ဂျီနှင့် ပရိုတက်စတင့် အသင်းသားတို့ ကြားရကြသည်။ သူတို့ဆန့်ကျင်လျှင် ချာ့ခ်ျနှင့် အစိုးရ နှစ်ဦးစလုံး၏ အမိန့်ကို လွန်ဆန်ရာကျ၏။”