အခန်း ၆
ပရဒိသုရောက်လုနီးပြီ!
ယခု ကမ္ဘာပေါ်ဖြစ်ပျက်နေသော မကောင်းမှုများက ပရဒိသုရောက်လုနီးကြောင်းတင်ပြ၏။ သမ္မာကျမ်းစာက ပရဒိသုရောက်မလာမီလေးတွင် ဆိုးရွားသောအချိန်ကို ကျွန်ုပ်တို့မြင်တွေ့ရမည်ဟုဆို၏။ ယင်းသို့သောအချိန်မျိုးတွင် ယခုကျွန်ုပ်တို့အသက်ရှင်နေကြသည်! အောက်ပါအရာများသည် ကျမ်းစာက ဖြစ်ပျက်လာမည်ဟုဆိုသည့်အရာအချို့ဖြစ်သည်–
စစ်ပွဲကြီးများ။ “လူတစ်မျိုးနှင့်တစ်မျိုး၊ တစ်နိုင်ငံနှင့်တစ်နိုင်ငံ ရန်ဘက်ပြုကြလိမ့်မည်။” (မဿဲ ၂၄:၇) ဤပရောဖက်ပြုချက် ဖြစ်ပျက်လာသည်။ ၁၉၁၄ ခုနှစ်ကတည်းက ကမ္ဘာစစ်ကြီးနှစ်ခုဖြစ်ခဲ့ပြီး စစ်ပွဲငယ်ပေါင်းများစွာဖြစ်ခဲ့၏။ ထိုစစ်ပွဲများတွင် လူသန်းပေါင်းများစွာသေကျေခဲ့သည်။
ရောဂါဘယပျံ့နှံ့မှု။ “အရပ်ရပ်တို့၌ . . . ကာလနာများပြားခြင်းတို့သည် ဖြစ်ကြလိမ့်မည်။” (လုကာ ၂၁:၁၁) ထိုသို့တကယ်ဖြစ်လာသလော။ ဖြစ်လာပါသည်။ ကင်ဆာရောဂါ၊ နှလုံးရောဂါ၊ တီဘီရောဂါ၊ ငှက်ဖျားရောဂါ၊ အေအိုင်ဒီအက်စ်နှင့် အခြားရောဂါများက သန်းပေါင်းများစွာသောသူတို့ကို သေစေခဲ့ပြီ။
အစားအစာမလုံလောက်မှု။ ကမ္ဘာတစ်ဝန်းတွင် အစားအစာအလုံအလောက်မရှိသူများရှိ၏။ နှစ်စဉ် သန်းပေါင်းများစွာသောသူတို့သည် ငတ်မွတ်ခြင်းကြောင့်သေဆုံးကြသည်။ ယင်းက မကြာမီ ပရဒိသုရောက်လာတော့မည့် အခြားနိမိတ်တစ်ခုဖြစ်သည်။ ကျမ်းစာကဤသို့ဆို၏– “အစာခေါင်းပါးခြင်း . . . ဖြစ်ကြလိမ့်မည်။”—မာကု ၁၃:၈။
မြေငလျင်များ။ “အရပ်ရပ်တို့၌ . . . မြေကြီးလှုပ်ခြင်းတို့သည် ဖြစ်ကြလိမ့်မည်။” (မဿဲ ၂၄:၇) ဤသို့ ကျွန်ုပ်တို့ခေတ်တွင် အမှန်ဖြစ်နေပြီ။ ၁၉၁၄ ခုနှစ်မှစ၍ မြေငလျင်များကြောင့် လူပေါင်းတစ်သန်းကျော်သေဆုံးခဲ့သည်။
လူဆိုးများ။ လူတို့သည် “ငွေကိုတပ်မက်သောသူ” နှင့် “ကိုယ်ကိုကိုယ်ချစ်သောသူ” များဖြစ်ကြမည်။ သူတို့သည် “ဘုရားသခင်ကိုနှစ်သက်သည်ထက် ကာမဂုဏ်ခံစားခြင်းကိုသာ၍နှစ်သက်သောသူ” များဖြစ်ကြမည်။ သားသမီးတို့သည် “မိဘစကားကိုနားမထောင်သောသူ” များဖြစ်ကြမည်။ (၂ တိမောသေ ၃:၁-၅) ယနေ့ ထိုသို့သောသူများစွာရှိကြောင်း သင်သဘောမတူပေလော။ သူတို့သည် ဘုရားသခင်အားရိုသေလေးစားခြင်းမရှိဘဲ ဘုရားသခင်အကြောင်းသင်ယူလေ့လာဖို့ ကြိုးစားသူတို့ကို နှောင့်ယှက်ကြသည်။
ရာဇဝတ်မှု။ “မတရားသောအမှုတို့သည်” လည်း “များပြား” ကြလိမ့်မည်။ (မဿဲ ၂၄:၁၂) လွန်ခဲ့သောနှစ်များကထက် ရာဇဝတ်မှုပို၍ဆိုးရွားလာသည်ကို သင်သဘောတူကောင်းတူပေမည်။ နေရာတိုင်းရှိလူတို့သည် လုယက်ခံရ၊ လိမ်လည်လှည့်ဖြားခံရ၊ ဘေးပြုခံရနိုင်စရာအကြောင်းရှိသည်။
ဤအရာအားလုံးက ဘုရားသခင့်နိုင်ငံတော်နီးပြီဟု တင်ပြ၏။ ကျမ်းစာကဤသို့ဆိုသည်– “ထိုအကြောင်းအရာများဖြစ်သည်ကိုမြင်ရလျှင်၊ ဘုရားသခင်၏နိုင်ငံတော် တည်လုနီးသည်ကိုသိမှတ်ကြလော့။” (လုကာ ၂၁:၃၁) ဘုရားသခင့်နိုင်ငံတော်ကား အဘယ်နည်း။ ၎င်းသည် မြေကြီးပေါ်တွင် ပရဒိသုကိုဖြစ်ပေါ်စေမည့် ဘုရားသခင်၏ကောင်းကင်အစိုးရဖြစ်သည်။ ဘုရားသခင့်နိုင်ငံတော်က လူ့အုပ်ချုပ်ရေးများကိုအစားထိုးမည်။—ဒံယေလ ၂:၄၄၊ ၄၅။
