အခန်း ၈
ဘုရားသခင့်ရန်သူများကား မည်သူတို့နည်း
ဘုရားသခင်၏အဓိကရန်သူမှာ စာတန်ဖြစ်သည်။ သူသည် ယေဟောဝါအားဆန့်ကျင်ပုန်ကန်သော နာမ်ဝိညာဉ်သတ္တဝါတစ်ပါးဖြစ်၏။ စာတန်သည် ဘုရားသခင်အားဆက်၍ဆန့်ကျင်နေပြီး လူသားများကို အကြီးအကျယ်ဆင်းရဲခြင်းဝေဒနာခံစေသည်။ စာတန်သည် ဆိုးယုတ်သူဖြစ်၏။ သူသည် လိမ်လည်သူနှင့် လူသတ်သမားဖြစ်သည်။—ယောဟန် ၈:၄၄။
အခြားနာမ်ဝိညာဉ်သတ္တဝါများသည် ဘုရားသခင်အားဆန့်ကျင်ပုန်ကန်ရာတွင် စာတန်နှင့်ပူးပေါင်းခဲ့ကြသည်။ ကျမ်းစာကသူတို့ကို နတ်ဆိုးများဟုခေါ်သည်။ နတ်ဆိုးများသည် စာတန်ကဲ့သို့ပင် လူသားများ၏ရန်သူများဖြစ်ကြ၏။ သူတို့သည် လူတို့ကိုထိခိုက်နစ်နာစေလိုကြသည်။ (မဿဲ ၉:၃၂၊ ၃၃; ၁၂:၂၂) ယေဟောဝါသည် စာတန်နှင့်သူ၏နတ်ဆိုးတို့ကို ထာဝရဖျက်ဆီးပစ်ပါလိမ့်မည်။ သူတို့၌ လူသားတို့ကို အမင်္ဂလာဖြစ်စေရန် အချိန်တစ်ခဏသာကျန်တော့သည်။—ဗျာဒိတ် ၁၂:၁၂။
အသင်သည် ဘုရားသခင့်မိတ်ဆွေဖြစ်လိုလျှင် စာတန်သင့်အားပြုလုပ်စေလိုရာကို မပြုရပါ။ စာတန်နှင့်နတ်ဆိုးများသည် ယေဟောဝါအားမုန်းကြသည်။ သူတို့သည် ဘုရားသခင့်ရန်သူများဖြစ်ကြပြီး သင့်ကို ဘုရားသခင့်ရန်သူဖြစ်စေလိုကြသည်။ သင်သည်—စာတန် သို့မဟုတ် ယေဟောဝါ—မည်သူ့ အလိုနှင့်တွေ့လိုသည်ကို ရွေးချယ်ရမည်။ ထာဝရအသက်ရလိုပါက ဘုရားသခင့်အလိုတော်ကိုဆောင်ရွက်ဖို့ သင်ရွေးချယ်ရပေမည်။ လူတို့ကိုလှည့်ဖြားဖို့ စာတန်၌နည်းပရိယာယ်များစွာရှိ၏။ လူအများစုမှာ သူ၏လှည့်စားမှုကိုခံနေရကြသည်။—ဗျာဒိတ် ၁၂:၉။
