အခန်း ၂
ဘုရားသခင်သည် သင်ရရှိနိုင်သမျှမိတ်ဆွေတွင် အကောင်းဆုံးဖြစ်
ဘုရားသခင့်မိတ်ဆွေဖြစ်ခြင်းသည် သင်၌ဖြစ်နိုင်သမျှတွင် အကောင်းဆုံးအရာဖြစ်၏။ ဘုရားသခင်သည် သင့်အား မည်သို့ပျော်ရွှင်နိုင်ပုံနှင့် လုံခြုံနိုင်ပုံကို သင်ကြားပေးမည်; မှားယွင်းသောယုံကြည်ချက်များနှင့် အန္တရာယ်ရှိသည့်ဓလေ့ထုံးစံများစွာတို့မှ လွတ်မြောက်စေမည်။ သင့်ဆုတောင်းချက်များကို ကိုယ်တော်နားညောင်းတော်မူမည်။ စိတ်ငြိမ်သက်မှုနှင့် ယုံကြည်စိတ်ချမှုရှိဖို့ ကိုယ်တော်ထောက်ကူပေးမည်။ (ဆာလံ ၇၁:၅; ၇၃:၂၈) ဘုရားသခင်သည် ခက်ခဲချိန်များတွင် သင့်အားထောက်မပေးမည်။ (ဆာလံ ၁၈:၁၈) ထို့အပြင် ဘုရားသခင်သည် ထာဝရအသက်ဆုကို သင့်အားကမ်းလှမ်းသည်။—ရောမ ၆:၂၃။
ဘုရားသခင်နှင့် သင် ရင်းနှီးလာသည်နှင့်အမျှ ကိုယ်တော်၏မိတ်ဆွေများနှင့် ရင်းနှီးလာလိမ့်မည်။ သူတို့လည်း သင့်မိတ်ဆွေများဖြစ်လာကြမည်။ အမှန်မှာ၊ သူတို့သည် သင်နှင့်မောင်နှမများကဲ့သို့ဖြစ်ကြမည်။ သူတို့သည် ဝမ်းမြောက်ဝမ်းသာစွာ သင့်အား ဘုရားသခင်အကြောင်း သင်ကြားပေး၍ အားပေးထောက်ကူကြလိမ့်မည်။
ကျွန်ုပ်တို့သည် ဘုရားသခင်နှင့် တန်းတူမဟုတ်ကြပါ။ ဘုရားသခင့်မိတ်ဆွေဖြစ်ဖို့ကြိုးစားနေစဉ် အရေးကြီးသောအရာတစ်ခုကို သင်သဘောပေါက်ရမည်။ ဘုရားသခင်နှင့်မိတ်ဆွေဖွဲ့ခြင်းသည် ဂုဏ်ရည်တူသူချင်း မိတ်ဖွဲ့ခြင်းမဟုတ်ပါ။ ကိုယ်တော်သည် ကျွန်ုပ်တို့ထက်များစွာအသက်ကြီး၍ ပညာရှိပြီး တန်ခိုးသာ၍ကြီးမားတော်မူ၏။ ကိုယ်တော်သည် ကျွန်ုပ်တို့၏ပိုင်သအုပ်စိုးရှင်ဖြစ်တော်မူ၏။ ထို့ကြောင့် ကိုယ်တော့်မိတ်ဆွေဖြစ်လိုလျှင် ကိုယ်တော့်စကားနားထောင်ပြီး မိန့်မှာသမျှအတိုင်းပြုရမည်။ သို့ပြုခြင်းသည် အစဉ်ကျွန်ုပ်တို့အားကောင်းကျိုးပြုလိမ့်မည်။—ဟေရှာယ ၄၈:၁၈။
