အခန်း ၁၃
ပွဲနေ့အားလုံးကို ဘုရားသခင် လက်ခံသလား
“ဘုရားသခင် လက်ခံတဲ့အရာကို သိနိုင်ဖို့ အမြဲဆန်းစစ်ကြပါ။” —ဧဖက် ၅:၁၀။
၁။ ကျွန်တော်တို့ရဲ့ ဝတ်ပြုမှုကို ယေဟောဝါ လက်ခံဖို့ ဘာလုပ်ရမလဲ။ ဘာကြောင့်လဲ။
“အဖဘုရားကို နည်းမှန်လမ်းကျ ဝတ်ပြုသူတွေဟာ စွမ်းအားတော်လမ်းပြမှုနဲ့အညီ၊ အမှန်တရားနဲ့အညီ ကိုးကွယ်မယ့်အချိန် ရောက်လာမယ်။ . . . အဲဒီလို ကိုးကွယ်မယ့်သူတွေကို အဖဘုရား ရှာနေတယ်” ဆိုပြီး ယေရှု ပြောခဲ့တယ်။ (ယောဟန် ၄:၂၃။ ၆:၄၄) ကျွန်တော်တို့ယောက်တိုင်း “ဘုရားသခင် လက်ခံတဲ့အရာကို သိနိုင်ဖို့ အမြဲ ဆန်းစစ်ကြ” ရမယ်။ (ဧဖက် ၅:၁၀) အမြဲတော့ မလွယ်ဘူး။ ယေဟောဝါ မနှစ်သက်တဲ့အရာတွေ လုပ်အောင် ကျွန်တော်တို့ကို လှည့်စားဖို့ စာတန် ကြိုးစားနေတယ်။—ဗျာဒိတ် ၁၂:၉။
၂။ ဆိုင်းနိုင်းတောင်အနီးက ဖြစ်ရပ်ကို ရှင်းပြပါ။
၂ ကျွန်တော်တို့ကို လှည့်စားဖို့ စာတန် ဘယ်လို ကြိုးစားသလဲ။ တစ်နည်းကတော့ အမှားနဲ့ အမှန်ကို ရှုပ်ထွေးစေခြင်းအားဖြင့် ဖြစ်တယ်။ အစ္စရေးလူမျိုး ဆိုင်းနိုင်းတောင်အနီးမှာ စခန်းချချိန်က ဖြစ်ရပ်ကို သတိပြုပါ။ တောင်ပေါ် တက်သွားတဲ့ မောရှေ စခန်းပြန်အလာကို လူတွေ စောင့်နေကြတယ်။ နောက်ဆုံး မစောင့်နိုင်တော့ဘဲ ဘုရားတစ်ဆူ လုပ်ပေးဖို့ အာရုန်ကို တောင်းဆိုကြတယ်။ အာရုန်က ရွှေနွားရုပ် လုပ်ပေးလိုက်တယ်။ ဒါနဲ့ ပွဲခံကြတယ်။ နွားရုပ်နားမှာ ကခုန်ပြီး ဦးညွတ်ရှိခိုးကြတယ်။ နွားရုပ်ကို ဦးညွတ်ရှိခိုးတာ ယေဟောဝါကို ကိုးကွယ်ဝတ်ပြုတာပဲလို့ ယူဆခဲ့ကြတယ်။ ဒါပေမဲ့ “ယေဟောဝါအတွက် ပွဲတော်” ဆိုပြီး ရှုမြင်ရုံနဲ့ လက်ခံနိုင်စရာ ဖြစ်မသွားဘူး။ ရုပ်တုကိုးကွယ်ခြင်းလို့ ယေဟောဝါ ရှုမြင်တယ်။ လူအများစု ကွပ်မျက်ခံလိုက်ရတယ်။ (ထွက်မြောက်ရာ ၃၂:၁-၆၊ ၁၀၊ ၂၈) သင်ခန်းစာက ဘာလဲ။ ကိုယ့်ကိုယ်ကိုယ် မလှည့်စားပါနဲ့။ “မသန့်ရှင်းတာမှန်သမျှ လက်နဲ့တောင် မထိ” နဲ့။ အမှားနဲ့ အမှန်အကြောင်း ယေဟောဝါ သွန်သင်ပေးတာကို လက်ခံပါ။—ဟေရှာယ ၅၂:၁၁။ ယေဇကျေလ ၄၄:၂၃။ ဂလာတိ ၅:၉။
၃၊ ၄။ လူကြိုက်များတဲ့ ပွဲနေ့တွေရဲ့ ရင်းမြစ်ကို ဘာကြောင့် ဆန်းစစ်သင့်သလဲ။
၃ ယေရှု မြေကြီးပေါ် ရှိစဉ်တုန်းက စင်ကြယ်တဲ့ ဝတ်ပြုရေးအတွက် စံနမူနာ ချမှတ်ဖို့ တမန်တော်တွေကို လေ့ကျင့်ပေးခဲ့တယ်။ ယေရှု သေဆုံးပြီးနောက်မှာ တမန်တော်တွေက တပည့်သစ်တွေကို ယေဟောဝါရဲ့ အခြေခံမူတွေ ဆက်သင်ပေးကြတယ်။ တမန်တော်တွေ သေဆုံးပြီးနောက်မှာတော့ ဆရာအတုအယောင်တွေက အယူမှား အတွေးအခေါ်၊ တိတ္ထိဓလေ့ထုံးစံ၊ ပွဲနေ့တွေကို အသင်းတော်ထဲ သွင်းလာကြတယ်။ တိတ္ထိပွဲနေ့တချို့ကို ခရစ်ယာန်တွေ လက်သင့်ခံလာအောင် နာမည်ပြောင်းလိုက်ကြတယ်။ (၂ သက်သာလောနိတ် ၂:၇၊ ၁၀။ ၂ ယောဟန် ၆၊ ၇) ပွဲနေ့များစွာကို ဒီနေ့ထိ လူကြိုက်များနေဆဲပါပဲ။ ဒီပွဲနေ့တွေက အယူမှား ယုံကြည်ချက်တွေနဲ့ နတ်ဆိုးအယူဝါဒကိုတောင် အားပေးတယ်။ *—ဗျာဒိတ် ၁၈:၂-၄၊ ၂၃။
၄ ဒီနေ့ ကမ္ဘာတစ်ဝန်းမှာ ပွဲနေ့တွေ၊ အခါကြီးရက်ကြီးတွေဟာ လူ့ဘဝမှာ အရေးကြီးကဏ္ဍတစ်ခု ဖြစ်နေတယ်။ ဒါပေမဲ့ ယေဟောဝါရဲ့ ရှုမြင်ပုံကို သိလာတာနဲ့အမျှ ပွဲနေ့တွေနဲ့ပတ်သက်တဲ့ စဉ်းစားပုံကို ပြုပြင်ဖို့ လိုအပ်မှန်း သိလာမယ်။ လွယ်မှာတော့ မဟုတ်ဘူး။ ဒါပေမဲ့ ယေဟောဝါ ကူညီပေးမယ်ဆိုတာ စိတ်ချ နိုင်ပါတယ်။ ပွဲနေ့တွေနဲ့ပတ်သက်တဲ့ ယေဟောဝါရဲ့ ရှုမြင်ပုံကို နားလည်နိုင်ဖို့ လူကြိုက်များတဲ့ ပွဲနေ့တချို့ရဲ့ ရင်းမြစ်ကို ဆန်းစစ်ကြစို့။
ခရစ္စမတ်ပွဲ ဘယ်လို စတင်ခဲ့သလဲ
၅။ ဒီဇင်ဘာ ၂၅ ရက်မှာ ယေရှု မမွေးဖွားခဲ့ကြောင်း ဘာအထောက်အထား ရှိသလဲ။
၅ နိုင်ငံများစွာမှာ ယေရှုရဲ့ မွေးနေ့လို့ ယူဆကြတဲ့ ဒီဇင်ဘာ ၂၅ ရက်မှာ ခရစ္စမတ်ပွဲ ကျင်းပကြတယ်။ ယေရှု ဘယ်နေ့မှာ မွေးတယ်၊ ဘယ်လမှာ မွေးတယ်ဆိုတာကို ကျမ်းစာမှာ မဖော်ပြထားဘူး။ ဒါပေမဲ့ တစ်နှစ်တာရဲ့ ဘယ်အချိန်လဲ ဆိုတာကိုတော့ ဖော်ပြတယ်။ ဘက်သလီဟင်မြို့မှာ ယေရှု မွေးတုန်းက “သိုးထိန်းတွေကလည်း ကွင်းပြင်မှာ ရောက်နေပြီး” သိုးကျောင်းနေတယ်လို့ လုကာ ရေးခဲ့တယ်။ (လုကာ ၂:၈-၁၁) ဒီဇင်ဘာလမှာ ဘက်သလီဟင်မြို့က ချမ်းအေးတယ်၊ မိုးရွာတယ်၊ နှင်းကျတယ်။ ညဘက် ကွင်းပြင်မှာ သိုးထိန်းတွေ သိုးကျောင်းနေကြမှာ မဟုတ်ဘူး။ ဘာသိရသလဲ။ ယေရှုဟာ ဒီဇင်ဘာလမှာ မဟုတ်ဘဲ ရာသီဥတု မျှတတဲ့အချိန်မှာ မွေးခဲ့တယ် ဆိုတာပဲ။ စက်တင်ဘာနဲ့ အောက်တိုဘာလအတွင်း တစ်ချိန်ချိန်မှာ မွေးဖွားခဲ့ကြောင်း ကျမ်းစာနဲ့ သမိုင်းအထောက်အထားက ဖော်ပြတယ်။
၆၊ ၇ ။ (က) လူကြိုက်များတဲ့ ခရစ္စမတ်ပွဲ ဓလေ့ထုံးစံတွေ ဘယ်လို စတင်ခဲ့သလဲ။ (ခ) လက်ဆောင် ပေးရတဲ့ အကြောင်းရင်းက ဘာဖြစ်သင့်သလဲ။
၆ ဒါဆိုရင် ခရစ္စမတ်ပွဲ ဘယ်လို စတင်ခဲ့သလဲ။ စိုက်ပျိုးရေး နတ်ဘုရား ဆက်တန်အတွက် ကျင်းပတဲ့ ရောမ ဆက်တန်နေလီယာပွဲလိုမျိုး တိတ္ထိပွဲတွေကနေ ဆင်းသက်လာတယ်။ “ဒီဇင်ဘာလလယ်မှာ ကျင်းပတဲ့ ရောမ ဆက်တန်နေလီယာပွဲဟာ ခရစ္စမတ်ပွဲ ဓလေ့တွေရဲ့ နမူနာ ဖြစ်တယ်။ ဥပမာ၊ စားသောက်ပွဲကြီးတွေ ကျင်းပတာ၊ လက်ဆောင် ပေးတာ၊ ဖယောင်းတိုင် မီးထွန်းတာတွေက ဒီပွဲကနေ ဆင်းသက်လာတာ” လို့ အမေရိကန် စွယ်စုံကျမ်းမှာ ဖော်ပြတယ်။ ပါးရှား နေနတ်ဘုရား မစ်သရရဲ့ မွေးနေ့ပွဲကိုလည်း ဒီဇင်ဘာ ၂၅ ရက်မှာ ကျင်းပခဲ့ကြတယ်။
၇ ဒီနေ့ ခရစ္စမတ်ပွဲ ကျင်းပသူအများစုက ပွဲနေ့ရဲ့ ရင်းမြစ်ကို ထည့်မစဉ်းစားကြဘူး။ မိသားစုနဲ့ အတူရှိဖို့ အချိန်၊ စားကောင်းသောက်ဖွယ်တွေနဲ့ ပျော်မွေ့ချိန်၊ လက်ဆောင် ဖလှယ်ချိန်အဖြစ် ခရစ္စမတ်ပွဲကို စောင့်မျှော်တတ်ကြတယ်။ မိသားစု၊ မိတ်ဆွေတွေကို ကျွန်တော်တို့ ချစ်ကြတယ်။ ယေဟောဝါကလည်း မိမိကျေးကျွန်တွေကို အချင်းချင်း ဝေမျှစေချင်တယ်။ ကောရိန္သု ဒုတိယစောင် ၉:၇ မှာ ဖော်ပြထားသလိုပဲ “စေတနာစိတ်နဲ့ လှူဒါန်းတဲ့သူကိုပဲ ဘုရားသခင် ချစ်မြတ်နိုးတယ်။” အထူးအခါသမယ ရောက်မှပဲ လက်ဆောင်ပေးတာမျိုး ယေဟောဝါ မဖြစ်စေချင်ဘူး။ ပြန်ရဖို့ မမျှော်လင့်ဘဲ တစ်နှစ်တာရဲ့ ဘယ်အချိန်မှာမဆို မိသားစု၊ မိတ်ဆွေတွေနဲ့ အတူရှိရတာ၊ လက်ဆောင် ပေးရတာကို ယေဟောဝါရဲ့ ကျေးကျွန်တွေ နှစ်သက်ကြတယ်။ တခြားသူတွေကို ချစ်လို့ ပေးကမ်းကြတယ်။—လုကာ ၁၄:၁၂-၁၄။
၈။ နက္ခတ်ဗေဒင်ဆရာတွေက မွေးကင်းစ ယေရှုကို လက်ဆောင် ပေးခဲ့သလား။ ရှင်းပြပါ။
၈ ပညာရှိသုံးယောက်လည်း နွားစားခွက်ထဲက မွေးကင်းစ ယေရှုအတွက် လက်ဆောင်တွေ ယူလာပေးခဲ့တာပဲဆိုပြီး လူများစွာက ခရစ္စမတ်လက်ဆောင် ပေးတဲ့ အယူအဆကို ထောက်ခံကြတယ်။ သူတို့တစ်တွေ ယေရှုဆီ သွားလည်ပတ်တာ၊ လက်ဆောင် ယူသွားပေးခဲ့ကြတာ မှန်ပါတယ်။ ကျမ်းစာခေတ်တုန်းက အရေးပါတဲ့သူတစ်ယောက်ဆီ လက်ဆောင် ယူသွားပေးတာ ထုံးစံပါပဲ။ (၁ ဘုရင်များ ၁၀:၁၊ ၂၊ ၁၀၊ ၁၃) ဒါပေမဲ့ သူတို့ဟာ နက္ခတ်ဗေဒင်ဆရာတွေ၊ မှော်အတတ် လိုက်စားသူတွေ၊ ယေဟောဝါကို မကိုးကွယ်တဲ့သူတွေဆိုပြီး ကျမ်းစာမှာ ဖော်ပြထားတာကိုကော သိပါသလား။ ဒါ့အပြင် နွားစားခွက်ထဲက မွေးကင်းစ ယေရှုဆီ သွားလည်ပတ်ကြတာ မဟုတ်ဘူး။ အိမ်ထဲမှာ ရှိနေတဲ့ လသားအရွယ် “ကလေး” ယေရှုဆီ သွားခဲ့ကြတာ။—မဿဲ ၂:၁၊ ၂၊ ၁၁။
မွေးနေ့ပွဲတွေနဲ့ပတ်သက်ပြီး ကျမ်းစာ ဘာပြောသလဲ
၉။ ကျမ်းစာမှာ ဘယ်မွေးနေ့ပွဲတွေအကြောင်း ဖော်ပြထားသလဲ။
၉ ကလေး မွေးဖွားတဲ့နေ့ဟာ ပျော်စရာပါပဲ။ (ဆာလံ ၁၂၇:၃) ဒါပေမဲ့ မွေးနေ့ပွဲ ကျင်းပသင့်တယ်လို့တော့ မဆိုလိုဘူး။ စဉ်းစားကြည့်ပါ– ကျမ်းစာမှာ မွေးနေ့ပွဲ နှစ်ခုအကြောင်းပဲ ပါတယ်။ အီဂျစ်ဘုရင် ဖာရောနဲ့ ဟေရုဒ် အန္တိပမင်းတို့ရဲ့ မွေးနေ့ ဖြစ်တယ်။ (ကမ္ဘာဦး ၄၀:၂၀-၂၂။ မာကု ၆:၂၁-၂၉ တို့ကို ဖတ်ပါ။) အဲဒီဘုရင်နှစ်ပါးစလုံး ယေဟောဝါရဲ့ ကျေးကျွန်တွေ မဟုတ်ကြဘူး။ တကယ်တော့ ယေဟောဝါကို ကိုးကွယ်သူတွေ မွေးနေ့ပွဲ ကျင်းပတဲ့အကြောင်း ကျမ်းစာမှာ မတွေ့ရဘူး။
၁၀။ မွေးနေ့ပွဲကို အစောပိုင်း ခရစ်ယာန်တွေ ဘယ်လို ရှုမြင်ကြသလဲ။
၁၀ အစောပိုင်းခရစ်ယာန်တွေက “မွေးနေ့ပွဲ ကျင်းပတာကို တိတ္ထိဓလေ့အဖြစ် ယူမှတ်ကြတယ်” ဆိုပြီး ကမ္ဘာ့စွယ်စုံကျမ်းက ဖော်ပြတယ်။ အဲဒီဓလေ့တွေက မှားယွင်းတဲ့ ယုံကြည်ချက်တွေအပေါ် အခြေခံတယ်။ ဥပမာ၊ လူတိုင်းဟာ မွေးနေ့မှာ ရောက်လာတဲ့ ကိုယ်စောင့်နတ်ရဲ့ ကာကွယ်ပေးမှု ခံရတယ်ဆိုပြီး ရှေးဂရိတွေ ယုံကြည်ကြတယ်။ ကိုယ်စောင့်နတ်ဟာ မွေးနေ့ရှင်နဲ့ တစ်ရက်တည်းမှာ မွေးဖွားတဲ့ နတ်ဘုရားနဲ့လည်း ပတ်သက်တယ်ဆိုပြီး ယူဆကြတယ်။ ဒီလိုတိတ္ထိ ယုံကြည်ချက်တွေအပြင် မွေးနေ့ပွဲဟာ နက္ခတ်ဗေဒင်၊ ဇာတာခွင်နဲ့လည်း ဆက်စပ်နေတယ်။
၁၁။ ရက်ရောမှုနဲ့ပတ်သက်ပြီး ယေဟောဝါ ဘယ်လို သဘောထားသလဲ။
၁၁ လူများစွာက မွေးနေ့ကို မိမိတို့ တန်ဖိုးထားမေတ္တာပြခံရသင့်တဲ့ အထူးနေ့ရက်အဖြစ် ရှုမြင်ကြတယ်။ ဒါပေမဲ့ မိသားစု၊ မိတ်ဆွေတွေကို အထူးနေ့တစ်နေ့မှာပဲ မဟုတ်ဘဲ တစ်နှစ်ပတ်လုံး ချစ်မြတ်နိုးကြောင်း ပြနိုင်တယ်။ ယေဟောဝါက ကျွန်တော်တို့ကို အချိန်တိုင်း ကြင်နာစေချင်တယ်။ ရက်ရောစေချင်တယ်။ (တမန်တော် ၂၀:၃၅ ကိုဖတ်ပါ။) မွေးနေ့ရောက်မှ မဟုတ်ဘဲ နေ့ရက်တိုင်းမှာ အဖိုးတန် အသက်ဆုလက်ဆောင်အတွက် ဘုရားကို ကျေးဇူးတင်ကြပါတယ်။—ဆာလံ ၈:၃၊ ၄။ ၃၆:၉။
၁၂။ သေဆုံးတဲ့နေ့ဟာ မွေးဖွားတဲ့နေ့ထက် ဘယ်လို ပိုကောင်းနိုင်သလဲ။
၁၂ “နာမည်ကောင်းဟာ တန်ဖိုးကြီးတဲ့ ဆီထက် ပိုကောင်းတယ်။ သေဆုံးတဲ့နေ့ကလည်း မွေးဖွားတဲ့နေ့ထက် ပိုကောင်းတယ်” လို့ ဒေသနာ ၇:၁ မှာ ဖော်ပြထားတယ်။ သေဆုံးတဲ့နေ့က မွေးဖွားတဲ့နေ့ထက် ဘယ်လို ပိုကောင်းနိုင်သလဲ။ မွေးဖွားလာချိန်တုန်းက ဘဝမှာ အကောင်းအဆိုး ဘာမှ မလုပ်ရသေးဘူး။ ဒါပေမဲ့ ကိုယ့်အသက်တာကို ယေဟောဝါရဲ့ အမှုဆောင်ခြင်းမှာ အသုံးပြုတဲ့အခါ၊ တခြားသူတွေအတွက် ကောင်းကျိုး ပြုတဲ့အခါ “နာမည်ကောင်း၊” ဂုဏ် အသရေ တည်ဆောက်နေတာ ဖြစ်တယ်။ ကျွန်တော်တို့ သေဆုံးသွားရင်တောင် ယေဟောဝါ သတိရနေမယ်။ (ယောဘ ၁၄:၁၄၊ ၁၅) ယေဟောဝါရဲ့ ကျေးကျွန်တွေက ကိုယ့်မွေးနေ့ကိုရော ယေရှုရဲ့ မွေးနေ့ကိုပါ မကျင်းပကြဘူး။ ကျင်းပဖို့ မိန့်မှာခဲ့တဲ့ တစ်ခုတည်းသော ပွဲကတော့ ယေရှုရဲ့ သေခြင်းအောက်မေ့ရာပွဲပါပဲ။—လုကာ ၂၂:၁၇-၂၀။ ဟီဘရူး ၁:၃၊ ၄။
အီစတာပွဲ ရင်းမြစ်
၁၃၊ ၁၄။ အီစတာပွဲဟာ ဘာနဲ့ ဆက်နွှယ်သလဲ။
၁၃ အီစတာပွဲ ကျင်းပတာဟာ ယေရှုရဲ့ ရှင်ပြန်ထမြောက်ခြင်းပွဲ ကျင်းပနေတာလို့ လူများစွာ ယုံကြည်ကြတယ်။ ဒါပေမဲ့ အီစတာပွဲက အင်္ဂလို-ဆက်ဆွန်လူမျိုးရဲ့ အရုဏ်ဦးနဲ့ နွေဦး နတ်ဘုရားမ အီအောစတာနဲ့ ဆက်နွှယ်တယ်။ အီအောစတာဟာ မျိုးပွားနတ်ဘုရားမ ဖြစ်တယ်လို့ ဒဏ္ဍာရီဆိုင်ရာ အဘိဓာန်မှာ ရှင်းပြတယ်။ အီစတာပွဲထုံးတမ်းတချို့ဟာ အီအောစတာနဲ့ ဆက်စပ်နေတယ်။ ဥပမာ၊ ဥတွေဟာ “ဘဝအစနဲ့ ရှင်ပြန်ထမြောက်ခြင်း အထိမ်းအမှတ်အဖြစ် ထင်ရှားတယ်” လို့ ဗြိတိန်နီကာစွယ်စုံကျမ်းက ဆိုတယ်။ တိတ္ထိကိုးကွယ်မှုမှာ မျိုးပွားနိုင်စွမ်းရဲ့ အထိမ်းအမှတ်အဖြစ် ယုန်ကို ကြာမြင့်စွာကတည်းက အသုံးပြုခဲ့တယ်။ အီစတာပွဲဟာ ယေရှုရဲ့ ရှင်ပြန်ထမြောက်ခြင်းနဲ့ မပတ်သက်တာ ရှင်းနေပါတယ်။
၁၄ သားတော်ရဲ့ ရှင်ပြန်ထမြောက်ခြင်းကို အယူမှားဘာသာရေး ဓလေ့ထုံးစံတွေနဲ့ လူတွေ ရောယှက်နေကြတာကို မြင်တဲ့အခါ ယေဟောဝါ နှစ်သက်ပါ့မလား။ မနှစ်သက်ဘူး။ (၂ ကောရိန္သု ၆:၁၇၊ ၁၈) ယေရှုရဲ့ ရှင်ပြန်ထမြောက်ခြင်းပွဲ ကျင်းပဖို့လည်း ဘယ်တုန်းကမှ ယေဟောဝါ မမိန့်မှာခဲ့ဘူး။
ဟယ်လိုဝင်းပွဲဆိုတာ ဘာလဲ
၁၅။ ဟယ်လိုဝင်းပွဲ ဘယ်လို စတင်ခဲ့သလဲ။
၁၅ သူတော်စင်နေ့ အကြိုပွဲလို့လည်း ခေါ်တဲ့ ဟယ်လိုဝင်းပွဲနေ့ဟာ စုန်းမ၊ မှင်စာ၊ သရဲတစ္ဆေတို့နဲ့ ဆက်နွှယ်တယ်။ ဒီပွဲက အသစ်အဆန်းတော့ မဟုတ်ဘူး။ ဗြိတိန်နဲ့ အိုင်ယာလန်ရှိ ရှေးဆဲလ်တစ်လူမျိုးက နိုဝင်ဘာ ၁ ရက်နဲ့ အနီးဆုံး လပြည့်နေ့မှာ စဲမ်ဟိန်းပွဲ ကျင်းပတယ်။ ပွဲအတွင်း လူသေတွေရဲ့ ဝိညာဉ်တွေ ကမ္ဘာပေါ် ပြန်လာတယ်လို့ ယုံကြည်ကြတယ်။ ဝိညာဉ်တွေ အန္တရာယ် မပေးဖို့ လူတွေက အစားအသောက်တွေ ထုတ်ပေးကြတယ်။ ဒီနေ့ ကလေးတွေ ဝတ်ရုံ ဝတ်ဆင်ပြီး တစ်အိမ်တက်ဆင်း သွား၊ “မုန့်ကျွေးမလား၊ ခြောက်ရမလား” လို့ ပြောတဲ့အခါ တကယ်တမ်း ရှေးခေတ် နတ်ဆိုးထုံးတမ်းစဉ်လာကို လိုက်လို့ လိုက်မှန်း မသိကြဘူး။
ဘုရား နှစ်သက်တဲ့ မင်္ဂလာပွဲများ
၁၆၊ ၁၇။ လက်ထပ်ဖို့ စီစဉ်တဲ့အခါ ဘာထည့်စဉ်းစားသင့်သလဲ။
၁၆ မင်္ဂလာပွဲဟာ ပျော်ရွှင်စရာ အခါသမယပါ။ ကမ္ဘာတစ်ဝန်းမှာ မင်္ဂလာပွဲကို ပုံစံအမျိုးမျိုးနဲ့ ကျင်းပကြတယ်။ လူတွေက မင်္ဂလာပွဲဓလေ့တွေ ဘယ်ကနေ ဆင်းသက်လာတယ်ဆိုတာ ထည့်မစဉ်းစားကြဘူး။ ဒါကြောင့် ဓလေ့တချို့ဟာ တိတ္ထိဘာသာရေး ယုံကြည်ချက်တွေကနေ ဆင်းသက်လာမှန်း မသိကြဘူး။ ဒါပေမဲ့ လက်ထပ်ဖို့ စီစဉ်နေတဲ့ ခရစ်ယာန်စုံတွဲက ယေဟောဝါ နှစ်သက်လက်ခံမယ့် မင်္ဂလာပွဲ ဖြစ်စေချင်ကြတယ်။ မင်္ဂလာပွဲဓလေ့တွေရဲ့ ရင်းမြစ်ကို သိထားရင် ဆုံးဖြတ်ချက်ကောင်းတွေ ချနိုင်ပါလိမ့်မယ်။—မာကု ၁၀:၆-၉။
၁၇ မင်္ဂလာပွဲဓလေ့တချို့က ကြင်စဦးမောင်နှံကို ‘ကံကောင်း’ စေတယ်ဆိုပြီး ယုံကြည်ကြတယ်။ (ဟေရှာယ ၆၅:၁၁) ဥပမာ၊ ဒေသတချို့မှာ သတို့သားနဲ့ သတို့သမီးအပေါ် ဆန် ဒါမှမဟုတ် တစ်ခုခု ကြဲကြတယ်။ ဒါဆိုရင် သားသမီး ထွန်းကားမယ်၊ ပျော်ရွှင်မယ်၊ အသက်ရှည်မယ်၊ မကောင်းဆိုးဝါးရန်ကနေ ကာကွယ်ပေးခံရမယ်လို့ ယုံကြည်ကြတယ်။ ဒါပေမဲ့ အယူမှားဘာသာနဲ့ ဆက်စပ်နေတဲ့ ဓလေ့ထုံးစံတွေကို ခရစ်ယာန်တွေ သတိထား ရှောင်ကြတယ်။—၂ ကောရိန္သု ၆:၁၄-၁၈ ကို ဖတ်ပါ။
၁၈။ မင်္ဂလာပွဲနဲ့ သက်ဆိုင်တဲ့ ကျမ်းစာအခြေခံမူတွေက ဘာလဲ။
၁၈ ခရစ်ယာန်စုံတွဲဟာ မင်္ဂလာပွဲကို ရွှင်လန်းစရာကောင်းတဲ့၊ ဂုဏ်ရှိတဲ့၊ တက်ရောက်သူတိုင်း ပျော်ရွှင်ရတဲ့ပွဲ ဖြစ်စေချင်ကြတယ်။ မင်္ဂလာပွဲ တက်ရောက်တဲ့ ဧည့်သည်တွေက မင်္ဂလာမောင်နှံနဲ့ တခြားသူတွေကို မစာမနာ ပြောဆိုတာ၊ လိင်ကိစ္စ ထိကပါး ရိကပါး ပြောဆိုတာ၊ မလေးမစား ပြောဆိုတာမျိုး လုပ်မှာ မဟုတ်ဘူး။ (ပညာအလိမ္မာ ၂၆:၁၈၊ ၁၉။ လုကာ ၆:၃၁။ ၁၀:၂၇) ခရစ်ယာန် မင်္ဂလာပွဲဟာ “စည်းစိမ်အကြောင်း ဝါကြွား” ဖို့ အဓိက မထားဘူး။ (၁ ယောဟန် ၂:၁၆) လက်ထပ်ဖို့ စီစဉ်နေရင် ပြန်တွေးတိုင်း ပျော်စရာ အမှတ်တရတွေပဲ ဖြစ်နေဖို့ သေချာစေပါ။—ရှင်းလင်းချက် ၂၈ ကို ကြည့်ပါ။
အရက်ခွက် မြှောက်ပြီး ဆုမွန်ကောင်းတောင်းခြင်းရဲ့ ရင်းမြစ်
၁၉၊ ၂၀။ အရက်ခွက် မြှောက်ပြီး ဆုမွန်ကောင်း တောင်းခြင်းရဲ့ ရင်းမြစ်က ဘာလဲ။
၁၉ မင်္ဂလာပွဲနဲ့ မိတ်ဆုံစားပွဲတွေမှာ ပါတတ်တဲ့ ထုံးစံတစ်ခုကတော့ အရက်ခွက် မြှောက်ပြီး ဆုမွန်ကောင်း တောင်းခြင်းပါပဲ။ တစ်ယောက်က ဆုမွန်ကောင်း တောင်းပြီး တခြားသူတွေက အရက်ခွက် မြှောက်ကြတယ်။ အဲဒီထုံးစံကို ခရစ်ယာန်တွေ ဘယ်လို ရှုမြင်သင့်သလဲ။
၂၀ အရက်ခွက် မြှောက်ပြီး ဆုမွန်ကောင်း တောင်းတာဟာ “နတ်ဘုရားတွေကို အရက်ယမကာ ပူဇော်သွန်းလောင်း” တဲ့ ရှေးတိတ္ထိဓလေ့ကနေ ဆင်းသက်လာတာလို့ အရက်နဲ့ ယဉ်ကျေးမှုဆိုင်ရာ နိုင်ငံတကာ လက်စွဲစာအုပ်က ဆိုတယ်။ ဒါက “‘အသက်ရှည်ပါစေ၊’ ‘ကျန်းမာပါစေ’ လို့ ဆုတောင်းပေးတဲ့ လူမှုရေးဓလေ့ ဖြစ်နိုင်တယ်။” ရှေးအချိန်မှာ လူတွေက နတ်ဘုရားတွေဆီ အရက်ခွက် မြှောက်ပြီး ဆုတောင်းတတ်ကြတယ်။ ဒါပေမဲ့ ဒါဟာ ယေဟောဝါ ကောင်းချီး ပေးတဲ့နည်း မဟုတ်ဘူး။—ယောဟန် ၁၄:၆။ ၁၆:၂၃။
“ယေဟောဝါကို ချစ်မြတ်နိုးသူတို့၊ မကောင်းမှုကို မုန်းကြပါ”
၂၁။ ဘယ်လို ပွဲနေ့တွေကို ခရစ်ယာန်တွေ ရှောင်သင့်သလဲ။
၂၁ ပွဲနေ့တစ်ခုခုမှာ ပါဝင်မယ်၊ မပါဝင်ဘူး ဆုံးဖြတ်တဲ့အခါ ဒီပွဲက ဘယ်သဘောထား၊ ဘယ်အမူအကျင့်ကို အားပေးအားမြှောက်ပြုကြောင်း ထည့်စဉ်းစားပါ။ ဥပမာ၊ ပွဲတချို့နဲ့ ကခုန်မြူးထူးပွဲတွေမှာ ရာဂစိတ်ကို နှိုးဆွတဲ့ အက၊ အထိန်းအကွပ်မဲ့ အရက်သောက်ခြင်း၊ အကျင့်ပျက်ခြင်းတွေတောင် ပါတတ်တယ်။ အဲဒီပွဲတွေက မိန်းမလျာတွေ၊ လိင်တူသမားတွေရဲ့ ဘဝပုံစံကို အားပေးအားမြှောက်လုပ်တယ်။ မျိုးချစ်စိတ်ကို အားပေးတယ်။ ဒီလိုပွဲတွေမှာ ပါဝင်ရင် ယေဟောဝါ ရွံမုန်းတဲ့အရာကို ကျွန်တော်တို့ တကယ် ရွံမုန်းတယ်လို့ ဆိုနိုင်ပါ့မလား။—ဆာလံ ၁:၁၊ ၂။ ၉၇:၁၀။ ၁၁၉:၃၇။
၂၂။ ခရစ်ယာန်တစ်ယောက် ပွဲတစ်မျိုးမှာ ပါဝင်မယ်၊ မပါဝင်ဘူး ဆုံးဖြတ်တဲ့အခါ ဘာက ကူညီပေးမလဲ။
၂၂ ဘုရားကို ဂုဏ်မတင်တဲ့ ဘယ်ပွဲမျိုးကိုမဆို ရှောင်ဖို့ ခရစ်ယာန်တွေ အထူးဂရုစိုက်ရမယ်။ “စားတာဖြစ်ဖြစ်၊ သောက်တာဖြစ်ဖြစ်၊ ဘာကိစ္စပဲဖြစ်ဖြစ် ဘုရားသခင်ရဲ့ ဘုန်းတော်ကို ထောက်ပြီး အရာရာကို လုပ်ဆောင်ကြပါ” လို့ တမန်တော် ပေါလု ရေးခဲ့တယ်။ (၁ ကောရိန္သု ၁၀:၃၁။ ရှင်းလင်းချက်၂၉ ကို ကြည့်ပါ။) ပွဲနေ့တိုင်း အကျင့်ပျက်မှု၊ မှားယွင်းတဲ့ ဘာသာရေး၊ အမျိုးသားရေးတို့နဲ့ ဆက်နွှယ်တာတော့ မဟုတ်ပါဘူး။ ပွဲတစ်မျိုးဟာ ကျမ်းစာအခြေခံမူတွေကို မချိုးဖောက်ဘူးဆိုရင် ဒီပွဲနေ့မှာ ပါဝင်မယ်၊ မပါဝင်ဘူးဆိုတာ ကိုယ်တိုင် ဆုံးဖြတ်ရမယ်။ ကိုယ့်ဆုံးဖြတ်ချက်က တခြားသူတွေအပေါ် သက်ရောက်နိုင်ပုံကိုလည်း ထည့်စဉ်းစားချင်ကြပါတယ်။
ပြောဆိုပြုမူပုံအားဖြင့် ယေဟောဝါကို ဂုဏ်တင်ပါ
၂၃၊ ၂၄။ ပွဲတွေနဲ့ပတ်သက်တဲ့ ဆုံးဖြတ်ချက်အကြောင်း သက်သေခံ မဟုတ်တဲ့ မိသားစုဝင်တွေကို ဘယ်လို ရှင်းပြနိုင်သလဲ။
၂၃ ယေဟောဝါကို ဂုဏ်မတင်တဲ့ ပွဲတွေမှာ သင် မပါဝင်တော့တာ ဖြစ်နိုင်တယ်။ ဒါကြောင့် ယေဟောဝါသက်သေ မဟုတ်တဲ့ မိသားစုဝင်တချို့က သူတို့ကို မချစ်တော့ဘူး၊ မပေါင်းသင်းချင်တော့ဘူးလို့ ခံစားမိနိုင်တယ်။ အခါကြီးရက်ကြီးတွေဟာ မိသားစု စုဆုံပေါင်းသင်းဖို့ အခွင့်အခါကောင်းပဲလို့ ယူမှတ်နိုင်ကြတယ်။ ဘာလုပ်နိုင်သလဲ။ သူတို့ကို ချစ်ကြောင်း၊ ကိုယ့်အတွက် အရေးပါကြောင်း ပြနိုင်တဲ့ နည်းလမ်းများစွာ ရှိတယ်။ (ပညာအလိမ္မာ ၁၁:၂၅။ ) တခြားအချိန်အခါတွေမှာ ပေါင်းသင်းဖို့ သူတို့ကို ဖိတ်ခေါ်နိုင်တယ်။ ဒေသနာ ၃:၁၂၊ ၁၃
၂၄ အခါကြီးရက်ကြီးတချို့ကို လက်မခံတော့တဲ့ အကြောင်းရင်းကို ဆွေမျိုးတွေ သိချင်ရင် အကျိုးအကြောင်း ရှင်းပြဖို့ ကူညီပေးမယ့် ကျမ်းစာအခြေပြု စာပေတွေ၊ jw.org မှာ ရှာဖွေလေ့လာနိုင်ပါတယ်။ အငြင်းအခုံ လုပ်တယ်၊ အတင်း လက်ခံခိုင်းနေတယ်လို့ မခံစားရပါစေနဲ့။ အကြောင်းအရာများစွာ ထည့်စဉ်းစားပြီးမှ ဆုံးဖြတ်ထားတာ ဖြစ်ကြောင်း မိသားစုဝင်တွေ သိမြင်ဖို့ ကူညီပေးပါ။ အေးဆေးတည်ငြိမ်ပါ။ “ဆားခတ်ထားတဲ့ အစာဟာ အရသာရှိသလို ယဉ်ကျေးတဲ့ စကားတွေဟာ နှစ်သက်စရာ ဖြစ်စေတယ်။ စကားပြောဆိုတဲ့အခါ အမြဲ ယဉ်ကျေးသိမ်မွေ့ကြပါ။”—ကောလောသဲ ၄:၆။
၂၅၊ ၂၆။ ယေဟောဝါရဲ့ စံနှုန်းတွေကို သားသမီးတွေ ချစ်မြတ်နိုးလာအောင် မိဘတွေ ဘယ်လို ကူညီပေးနိုင်သလဲ။
၂၅ ပွဲတွေမှာ မပါဝင်ရတဲ့ အကြောင်းရင်းကို ကျွန်တော်တို့အားလုံး ရှင်းရှင်းလင်းလင်း နားလည်ဖို့ အရေးကြီးတယ်။ (ဟီဘရူး ၅:၁၄) ရည်ရွယ်ချက်က ယေဟောဝါ ကျေနပ်နှစ်သက်စေဖို့ပါ။ မိဘ ဖြစ်မယ်ဆိုရင် ကျမ်းစာအခြေခံမူတွေကို သားသမီးတွေ နားလည်ဖို့၊ ချစ်မြတ်နိုးဖို့ အချိန်ယူ ကူညီပေးရမယ်။ ယေဟောဝါဟာ သားသမီးတွေအတွက် တကယ့်ပုဂ္ဂိုလ် ဖြစ်လာတဲ့အခါ သူတို့လည်း ဘုရားကို ကျေနပ်နှစ်သက်စေချင်ကြပါမယ်။—ဟေရှာယ ၄၈:၁၇၊ ၁၈။ ၁ ပေတရု ၃:၁၅။
၂၆ သန့်ရှင်းစင်ကြယ်စွာ၊ ရိုးသားစွာ ဘုရားကို ကိုးကွယ်ဝတ်ပြုဖို့ အတတ်နိုင်ဆုံး ကြိုးစားနေကြတာကို မြင်တဲ့အခါ ယေဟောဝါ ပျော်ရွှင်တယ်။ (ယောဟန် ၄:၂၃) ဒါပေမဲ့ မရိုးသားတဲ့ ဒီလောကမှာ ရိုးသားဖို့ မဖြစ်နိုင်ဘူးလို့ လူများစွာ ထင်ကြတယ်။ မှန်ပါသလား။ ဒီအကြောင်းကို နောက်အခန်းမှာ သုံးသပ်ကြစို့။
^ ပွဲနေ့တွေနဲ့ပတ်သက်တဲ့ အချက်အလက်တွေကို ကင်းမျှော်စင် စာပေအညွှန်း၊ ယေဟောဝါသက်သေများအတွက် ကျမ်းစာလေ့လာမှု လမ်းညွှန်၊ jw.org တို့မှာ ရှာဖွေနိုင်တယ်။