အခန်း ၁၇
ဘုရားမေတ္တာတော် ဆက်ခံစားနေပါ
“အသန့်ရှင်းဆုံး ယုံကြည်ခြင်းကို ခိုင်ခံ့အောင် တည်ဆောက်ပြီး . . . ဘုရားသခင့်မေတ္တာ ခံစားရစေမယ့် အရာတွေကို အမြဲ လုပ်ဆောင်နိုင်လိမ့်မယ်။” —ယုဒ ၂၀၊ ၂၁။
၁၊ ၂။ ဘုရားမေတ္တာတော် ဆက်ခံစားနေနိုင်ဖို့ ဘာလုပ်နိုင်သလဲ။
ကျွန်တော်တို့အားလုံး ကျန်းမာသန်စွမ်းချင်ကြတယ်။ ဒါကြောင့် အာဟာရရှိတဲ့ အစာတွေ စားကြတယ်။ လေ့ကျင့်ခန်း မှန်မှန် လုပ်ကြတယ်။ ခန္ဓာကိုယ်ကို ဂရုစိုက်ကြတယ်။ ပင်ပန်းပေမဲ့ လုပ်ရကျိုးနပ်လို့ လက်မလျှော့ကြဘူး။ ဒါပေမဲ့ ကျွန်တော်တို့ နောက်တစ်နည်းနဲ့လည်း ကျန်းမာသန်စွမ်းနေရမယ်။
၂ ယေဟောဝါကို စတင်သိကျွမ်းလာပြီ ဖြစ်ပေမဲ့ ဘုရားနဲ့ ဆက်ဆံရေးကို ပိုခိုင်ခံ့နေစေရမယ်။ “ဘုရားသခင့်မေတ္တာ ခံစားရစေမယ့်အရာတွေကို အမြဲ လုပ်ဆောင်” ဖို့ ခရစ်ယာန်တွေကို ယုဒ အားပေးတဲ့အခါ လုပ်ဆောင်နိုင်ပုံကိုလည်း ရှင်းပြခဲ့တယ်။ “အသန့်ရှင်းဆုံး ယုံကြည်ခြင်းကို ခိုင်ခံ့အောင် တည်ဆောက်” ကြပါ ဆိုပြီး ပြောခဲ့တယ်။ (ယုဒ ၂၀၊ ၂၁) ဒါဆိုရင် ခိုင်ခံ့တဲ့ ယုံကြည်ခြင်း ဘယ်လို တည်ဆောက်နိုင်သလဲ။
ယုံကြည်ခြင်း တည်ဆောက်နေပါ
၃-၅။ (က) ယေဟောဝါရဲ့ စံနှုန်းတွေနဲ့ပတ်သက်ပြီး စာတန် ဘယ်လို ယူမှတ်စေချင်သလဲ။ (ခ) ယေဟောဝါရဲ့ ပညတ်တွေ၊ အခြေခံမူတွေနဲ့ပတ်သက်ပြီး ဘယ်လို ခံစားရသလဲ။
၃ ယေဟောဝါရဲ့ နည်းလမ်းတော်တွေဟာ အကောင်းဆုံး ဖြစ်မှန်း ကိုယ်တိုင် ယုံကြည်လက်ခံဖို့ အရေးကြီးတယ်။ ဘုရားစံနှုန်းတွေဟာ လိုက်လျှောက်ဖို့ ခက်လွန်းတယ်၊ အမှားအမှန်ကို ကိုယ်တိုင် ဆုံးဖြတ်ရင် ပိုပျော်မယ်လို့ ကျွန်တော်တို့ကို စာတန် ယူမှတ်စေချင်တယ်။ ဧဒင်ဥယျာဉ်မှာကတည်းက ဒီအချက်ကို လူတွေ ယုံကြည်အောင် စာတန် ကြိုးစားခဲ့တယ်။ (ကမ္ဘာဦး ၃:၁-၆) ဒီနေ့ထိလည်း ကြိုးစားနေတုန်းပဲ။
၄ စာတန် မှန်သလား။ ယေဟောဝါရဲ့ စံနှုန်းတွေဟာ တင်းကျပ်လွန်းသလား။ မတင်းကျပ်လွန်းပါဘူး။ ဥပမာ၊ လှပတဲ့ ပန်းခြံတစ်ခုမှာ လမ်းလျှောက်နေတယ်လို့ ကိုယ့်ကိုယ်ကိုယ် မြင်ယောင်ကြည့်ပါ။ တစ်နေရာကို ခြံစည်းရိုး အမြင့်ကြီး ခတ်ထားတာ တွေ့လိုက်တယ်။ ‘ငါသွားမယ့် လမ်းမှာ ဘာကြောင့် ဒီခြံစည်းရိုးကြီး လာပိတ်နေသလဲ’ လို့ တွေးမိနိုင်တယ်။ ဒါပေမဲ့ အဲဒီအချိန်မှာပဲ ခြံစည်းရိုးတစ်ဖက်ကနေ ခြင်္သေ့ဟိန်းသံကို ကြားလိုက်ရတယ်။ အခု ခြံစည်းရိုးနဲ့ပတ်သက်ပြီး ဘယ်လို ခံစားရသလဲ။ ခြင်္သေ့စာ ဖြစ်မသွားအောင် ကာကွယ်ပေးလို့ သိပ်ကျေးဇူးတင်တယ်။ ယေဟောဝါရဲ့ အခြေခံမူတွေက အဲဒီခြံစည်းရိုးနဲ့ တူတယ်။ မာရ်နတ်ကတော့ ခြင်္သေ့နဲ့ တူတယ်။ ကျမ်းစာက ဒီလိုသတိပေးတယ်– “သတိရှိပြီး နိုးနိုးကြားကြား နေကြပါ။ ရန်သူမာရ်နတ်က ဟိန်းဟောက်နေတဲ့ ခြင်္သေ့လို တစ်ယောက်ယောက်ကို ဝါးမျိုဖို့ လှည့်လည်ရှာဖွေနေတယ်။”—၁ ပေတရု ၅:၈။
၅ ယေဟောဝါက ကျွန်တော်တို့ကို အကောင်းဆုံးဘဝ ပိုင်ဆိုင်စေချင်တယ်။ စာတန် လှည့်ဖြားတာ မခံစေချင်ဘူး။ ဒါကြောင့် ကျွန်တော်တို့ကို ကာကွယ်ပေးဖို့၊ ပျော်ရွှင်စေဖို့ ပညတ်တွေ၊ အခြေခံမူတွေ ပေးထားတာပါ။ (ဧဖက် ၆:၁၁) “လွတ်လပ်ခြင်းနဲ့ဆိုင်တဲ့ ပြည့်ဝစုံလင်တဲ့ ပညတ်ကို အသေအချာ ကြည့်ရှုတဲ့သူ၊ အဲဒီလို ဆက်ကြည့်ရှုနေတဲ့သူဟာ . . . အဲဒီလိုလုပ်တဲ့အတွက် . . . ပျော်ရွှင်ချမ်းမြေ့ရလိမ့်မယ်” လို့ ယာကုပ် ရေးခဲ့တယ်။—ယာကုပ် ၁:၂၅။
၆။ ဘုရားရဲ့ နည်းလမ်းတော်တွေဟာ အကောင်းဆုံး ဖြစ်မှန်း ဘယ်လို ယုံကြည်စိတ်ချလာနိုင်သလဲ။
၆ ယေဟောဝါရဲ့ လမ်းညွှန်မှုအတိုင်း လိုက်လျှောက်တဲ့အခါ ကျွန်တော်တို့ဘဝ တိုးတက်ကောင်းမွန်လာတယ်။ ဘုရားနဲ့ ဆက်ဆံရေး ပိုခိုင်ခံ့လာတယ်။ ဥပမာ၊ မကြာခဏ ဆုတောင်းပါဆိုတဲ့ ဘုရားရဲ့ ဖိတ်ခေါ်ချက်ကို လက်ခံတဲ့အခါ အကျိုးခံစားကြရတယ်။ (မဿဲ ၆:၅-၈။ ၁ သက်သာလောနိတ် ၅:၁၇) ဝတ်ပြုကိုးကွယ်ဖို့ အတူတကွ စည်းဝေးကြပါ၊ အချင်းချင်း အားပေးကြပါဆိုတဲ့ ဘုရားရဲ့ ညွှန်ကြားချက်ကို နာခံတဲ့အခါ၊ ဟောပြောခြင်းနဲ့ သွန်သင်ခြင်းလုပ်ငန်းမှာ အပြည့်အဝ ပါဝင်တဲ့အခါ ပျော်ရွှင်ကြတယ်။ (မဿဲ ၂၈:၁၉၊ ၂၀။ ဂလာတိ ၆:၂။ ဟီဘရူး ၁၀:၂၄၊ ၂၅) ဒီအရာတွေက ယုံကြည်ခြင်း ခိုင်ခံ့နေစေပုံကို စဉ်းစားတဲ့အခါ ယေဟောဝါရဲ့ နည်းလမ်းတော်တွေဟာ အကောင်းဆုံး ဖြစ်မှန်း ပိုယုံကြည်စိတ်ချလာတယ်။
၇၊ ၈။ အနာဂတ်မှာ ကြုံတွေ့နိုင်တဲ့ စမ်းသပ်မှုတွေအတွက် မစိုးရိမ်ဖို့ ဘာက ကူညီပေးမလဲ။
၇ အနာဂတ်မှာ ခက်ခဲလွန်းတဲ့ ယုံကြည်ခြင်းစမ်းသပ်မှုတွေ ကြုံရမှာကို စိုးရိမ်မိနိုင်တယ်။ ဒါဆိုရင် “ငါယေဟောဝါဟာ မင်းတို့ရဲ့ ဘုရားသခင်ပဲ။ မင်းတို့ကောင်းကျိုးအတွက် သွန်သင်ပေးတဲ့အရှင်၊ မင်းတို့ လျှောက်သင့်တဲ့ လမ်းအတိုင်း လမ်းညွှန်ပေးတဲ့အရှင်ပဲ။ ငါ့ပညတ်တွေကို အာရုံစိုက်မယ်ဆိုရင် မင်းတို့ရဲ့ ငြိမ်သက်ခြင်းဟာ မြစ်လို၊ မင်းတို့ရဲ့ ဖြောင့်မတ်ခြင်းဟာ ပင်လယ်လှိုင်းတွေလို ဖြစ်လာမယ်” ဆိုတဲ့ ယေဟောဝါရဲ့ စကားတွေကို အမှတ်ရပါ။—ဟေရှာယ ၄၈:၁၇၊ ၁၈။
၈ ယေဟောဝါကို နာခံတဲ့အခါ ကျွန်တော်တို့ရဲ့ ငြိမ်သက်ခြင်းဟာ ဘယ်တော့မှ မခမ်းခြောက်တဲ့မြစ်လို ဖြစ်မယ်။ ကျွန်တော်တို့ရဲ့ ဖြောင့်မတ်ခြင်းဟာ ကမ်းစပ်ကို အဆက်မပြတ် ရိုက်ခတ်တဲ့ ပင်လယ်လှိုင်းတွေလို ဖြစ်မယ်။ ဘဝမှာ ဘာပဲကြုံရပါစေ ကျွန်တော်တို့ သစ္စာစောင့်သိနေနိုင်ကြပါတယ်။ ကျမ်းစာမှာ ဒီလိုအာမခံတယ်– “ထမ်းထားရတဲ့ဝန်ကို ယေဟောဝါဆီ ပုံအပ်လိုက်ပါ။ ကိုယ်တော် ဖေးမလိမ့်မယ်။ ဖြောင့်မတ်သူကို ဘယ်တော့မှ လဲကျခွင့်ပြုမှာ မဟုတ်ဘူး။”—ဆာလံ ၅၅:၂၂။
“ရင့်ကျက်တဲ့အဖြစ်ကို တက်လှမ်းကြစို့”
၉၊ ၁၀။ ရင့်ကျက်တယ်ဆိုတာ ဘာလဲ။
၉ ယေဟောဝါနဲ့ ဆက်ဆံရေးကို ခိုင်ခံ့စေတာနဲ့အမျှ “ရင့်ကျက်တဲ့အဖြစ်ကို တက်လှမ်း” နိုင်မယ်။ (ဟီဘရူး ၆:၁) ရင့်ကျက်တယ်ဆိုတာ ဘာလဲ။
၁၀ အသက်ကြီးလာရုံနဲ့ ရင့်ကျက်တဲ့ ခရစ်ယာန်တွေ ဖြစ်မလာဘူး။ ရင့်ကျက်လာဖို့ ယေဟောဝါကို ကျွန်တော်တို့ရဲ့ အကောင်းဆုံး မိတ်ဆွေ ဖြစ်နေစေရမယ်။ ကိစ္စရပ်တွေအပေါ် ဘုရားရှုမြင်သလို ရှုမြင်တတ်ဖို့ ကြိုးစားရမယ်။ (ယောဟန် ၄:၂၃) “အပြစ်ရှိတဲ့ အလိုဆန္ဒနောက် လိုက်တဲ့သူဟာ အပြစ်ရှိတဲ့အရာတွေကိုပဲ စိတ်ရောက်နေတတ်တယ်။ စွမ်းအားတော်နဲ့အညီ အသက်ရှင်တဲ့သူကတော့ စွမ်းအားတော်နဲ့ဆိုင်တဲ့ အရာတွေကိုပဲ စိတ်ရောက်နေတတ်တယ်” လို့ ပေါလု ရေးခဲ့တယ်။ (ရောမ ၈:၅) ရင့်ကျက်တဲ့သူက ဘဝမှာ အပျော်အပါး၊ ရုပ်ပစ္စည်းတွေကို အာရုံမစိုက်ဘူး။ ယေဟောဝါရဲ့ အမှုဆောင်ခြင်းကိုပဲ အာရုံစိုက်တယ်။ ဆုံးဖြတ်ချက်ကောင်းတွေ ချတယ်။ (ပညာအလိမ္မာ ၂၇:၁၁။ ယာကုပ် ၁:၂၊ ၃ ကိုဖတ်ပါ။) အမှားလုပ်ဖို့ ဩဇာလွှမ်းမိုးမခံဘူး။ အမှန်ကို သိပြီး အမှန်အတိုင်း လုပ်ဖို့ ဆုံးဖြတ်တယ်။
၁၁၊ ၁၂။ (က) “ပိုင်းခြားသိမြင်နိုင်စွမ်း” နဲ့ပတ်သက်ပြီး ပေါလု ဘာပြောခဲ့သလဲ။ (ခ) ရင့်ကျက်တဲ့ ခရစ်ယာန် ဖြစ်လာခြင်းနဲ့ အားကစားသမား ဖြစ်လာခြင်းတို့ ဘယ်လို ဆင်တူသလဲ။
၁၁ ရင့်ကျက်ဖို့ ကြိုးစားအားထုတ်ရတယ်။ “မာတဲ့ အစာကိုတော့ ရင့်ကျက်သူတွေပဲ စားတယ်။ သူတို့ဟာ ပိုင်းခြားသိမြင်နိုင်စွမ်းကို အမြဲ အသုံးပြုပြီး အမှားအမှန် ခွဲခြားသိနိုင်အောင် လေ့ကျင့်ထားတယ်” လို့ တမန်တော် ပေါလု ရေးခဲ့တယ်။ (ဟီဘရူး ၅:၁၄) “လေ့ကျင့်” ဆိုတဲ့ စကားလုံးက အားကစားသမားရဲ့ လေ့ကျင့်မှုကို စဉ်းစားမိစေတယ်။
၁၂ ကျွမ်းကျင်တဲ့ အားကစားသမားကို မြင်တဲ့အခါ အရည်အသွေး တိုးတက်လာဖို့ အချိန်နဲ့ လေ့ကျင့်မှု လိုအပ်ခဲ့မှန်း ကျွန်တော်တို့ သိကြတယ်။ အားကစားသမားအဖြစ် မွေးလာတာ မဟုတ်ဘူး။ ကလေးတစ်ယောက် မွေးဖွားလာချိန်မှာ လက်တွေ၊ ခြေထောက်တွေကို ဘယ်လို သုံးရမယ်ဆိုတာ ကောင်းကောင်း မသိဘူး။ ဒါပေမဲ့ မကြာခင်မှာပဲ ပစ္စည်းတွေကို ဘယ်လို ကိုင်တွယ်ရမယ်၊ ဘယ်လို လမ်းလျှောက်ရမယ်ဆိုတာ သိလာတယ်။ လေ့ကျင့်တာနဲ့ အားကစားသမား ဖြစ်လာနိုင်တယ်။ အလားတူပဲ ရင့်ကျက်တဲ့ ခရစ်ယာန်တွေ ဖြစ်လာဖို့ အချိန်နဲ့ လေ့ကျင့်မှု လိုအပ်တယ်။
၁၃။ ယေဟောဝါ စဉ်းစားသလို စဉ်းစားတတ်အောင် သင်ယူဖို့ ဘာက ကူညီပေးမလဲ။
၁၃ ယေဟောဝါ စဉ်းစားသလို စဉ်းစားနိုင်ပုံ၊ ကိစ္စရပ်တွေအပေါ် ယေဟောဝါ ရှုမြင်သလို ရှုမြင်နိုင်ပုံကို ဒီစာအုပ်မှာ ဆွေးနွေးခဲ့ကြတယ်။ ယေဟောဝါရဲ့ စံနှုန်းတွေကို ကျေးဇူးတင်လေးမြတ်ဖို့၊ ချစ်မြတ်နိုးဖို့ သင်ယူခဲ့ကြတယ်။ ဆုံးဖြတ်ချက် ချတဲ့အခါ ကိုယ့်ကိုယ်ကိုယ် ဒီလိုမေးကြတယ်– ‘ဒီကိစ္စဟာ ဘယ်ပညတ်တွေ၊ ဘယ်ကျမ်းစာမူတွေနဲ့ သက်ဆိုင်သလဲ။ ငါဘယ်လို လက်တွေ့ကျင့်သုံးနိုင်မလဲ။ ငါ့ကို ယေဟောဝါ ဘာလုပ်စေချင်မလဲ။’—ပညာအလိမ္မာ ၃:၅၊ ၆။ ယာကုပ် ၁:၅ တို့ကို ဖတ်ပါ။
၁၄။ ယုံကြည်ခြင်း တည်ဆောက်ဖို့ ဘာလုပ်ရမလဲ။
၁၄ ယေဟောဝါအပေါ် ကျွန်တော်တို့ရဲ့ ယုံကြည်ခြင်း တည်ဆောက်တာကို ဘယ်တော့မှ မရပ်တန့်ကြဘူး။ အာဟာရရှိတဲ့ အစာ စားသုံးခြင်းက ကျန်းမာသန်စွမ်းတဲ့ ခန္ဓာကိုယ် တည်ဆောက်ဖို့ ကူညီပေးသလို ယေဟောဝါ အကြောင်း လေ့လာခြင်းက ခိုင်ခံ့တဲ့ ယုံကြည်ခြင်း တည်ဆောက်ဖို့ ကူညီပေးတယ်။ ကျမ်းစာ စလေ့လာတုန်းက ယေဟောဝါအကြောင်း၊ နည်းလမ်းတော်တွေအကြောင်း အခြေခံအမှန်တရားတွေ သိခဲ့ကြတယ်။ ဒါပေမဲ့ အချိန်ကြာလာတာနဲ့အမျှ ပိုနက်နဲတဲ့ အကြောင်းအရာတွေ နားလည်ဖို့ လိုလာတယ်။ “မာတဲ့ အစာကိုတော့ ရင့်ကျက်သူတွေပဲ စားတယ်” လို့ ပြောတဲ့အခါ ပေါလု ဆိုလိုချင်တာ အဲဒီအချက်ပဲ။ သိရှိတာတွေကို လက်တွေ့ကျင့်သုံးခြင်းအားဖြင့် ဉာဏ်ပညာ ရရှိတယ်။ “ဉာဏ်ပညာဟာ အရေးကြီးဆုံးပဲ” လို့ ကျမ်းစာမှာ ဆိုထားတယ်။—ပညာအလိမ္မာ ၄:၅-၇။ ၁ ပေတရု ၂:၂။
၁၅။ ယေဟောဝါနဲ့ ညီအစ်ကို/မတွေကို အမှန်တကယ် ချစ်ဖို့ ဘယ်လောက် အရေးကြီးသလဲ။
၁၅ လူတစ်ယောက်ဟာ ကျန်းမာသန်စွမ်းနေပေမဲ့ ဆက်ကျန်းမာသန်စွမ်းနေဖို့ ကိုယ့်ကိုယ်ကိုယ် ဆက်ဂရုစိုက်နေရမယ်ဆိုတာ သိတယ်။ အလားတူပဲ ရင့်ကျက်တဲ့သူက ယေဟောဝါနဲ့ ဆက်ဆံရေး ဆက်ခိုင်ခံ့နေဖို့ ကြိုးစားရမယ်ဆိုတာ သိတယ်။ “ခင်ဗျားတို့ရဲ့ ယုံကြည်ခြင်း ခိုင်မြဲနေမနေ အမြဲ ဆန်းစစ်ပါ။ ဘယ်လိုလူစားမျိုး ဖြစ်နေတယ်ဆိုတာကို အမြဲ စစ်ဆေးပါ” လို့ ပေါလု သတိပေးတယ်။ (၂ ကောရိန္သု ၁၃:၅) ယုံကြည်ခြင်း ခိုင်ခံ့နေဖို့ထက်မက လိုအပ်တယ်။ ယေဟောဝါနဲ့ ညီအစ်ကို/မတွေကို ချစ်တဲ့မေတ္တာ တိုးပွားနေရမယ်။ “အသိပညာကို အံ့ဖွယ်နည်းနဲ့ ရထားရုံမက တောင်တွေကို ရွှေ့နိုင်လောက်တဲ့ ယုံကြည်ခြင်း အပြည့်ရှိရင်တောင် မေတ္တာမရှိရင် အချည်းနှီးပဲ” လို့ ပေါလု ပြောခဲ့တယ်။—၁ ကောရိန္သု ၁၃:၁-၃။
မျှော်လင့်ချက်ကို အာရုံစိုက်ပါ
၁၆။ စာတန်က ကျွန်တော်တို့ကို ဘယ်လို ခံစားစေချင်သလဲ။
၁၆ ယေဟောဝါရဲ့ နှစ်သက်လက်ခံမှု ဘယ်တော့မှ မရနိုင်ဘူးလို့ ကျွန်တော်တို့ကို စာတန် ထင်စေချင်တယ်။ စိတ်ဓာတ်ကျစေချင်တယ်။ ပြဿနာတွေအတွက် ဖြေရှင်းနည်း မရှိဘူးလို့ ခံစားစေချင်တယ်။ ခရစ်ယာန်ချင်းတွေကို မယုံကြည်စေချင်ဘူး။ ကျွန်တော်တို့ကို မပျော်ရွှင်စေချင်ဘူး။ (ဧဖက် ၂:၂) အပျက်သဘောက ကျွန်တော်တို့ကိုရော ဘုရားနဲ့ ဆက်ဆံရေးကိုပါ ထိခိုက်နိုင်မှန်း စာတန် သိတယ်။ ဒါပေမဲ့ အပျက်သဘောကို တိုက်လှန်ဖို့ ကျွန်တော်တို့ကို ယေဟောဝါ ပေးထားတာ ရှိတယ်။ အဲဒါကတော့ မျှော်လင့်ချက်ပါ။
၁၇။ မျှော်လင့်ချက်က ဘယ်လောက် အရေးပါသလဲ။
၁၇ သက်သာလောနိတ် ပထမစောင် ၅:၈ မှာ မျှော်လင့်ချက်ကို တိုက်ပွဲမှာ စစ်သားရဲ့ ဦးခေါင်းကို ကာကွယ်ပေးတဲ့ သံခမောက်နဲ့ နှိုင်းယှဉ်ပြီး “ကယ်တင်ခြင်းရမယ်ဆိုတဲ့ မျှော်လင့်ချက်” လို့ ခေါ်ထားတယ်။ ယေဟောဝါရဲ့ ကတိတော်တွေကို မျှော်လင့်ခြင်းက စိတ်နှလုံးကို ကာကွယ်ပေးတယ်။ အပျက်သဘောတွေကို ခုခံတွန်းလှန်ဖို့ ကူညီပေးတယ်။
၁၈၊ ၁၉။ မျှော်လင့်ချက်ကြောင့် ယေရှု ဘယ်လို အားရှိခဲ့သလဲ။
၁၈ မျှော်လင့်ချက်က ယေရှုကို အားရှိစေခဲ့တယ်။ မြေကြီးအသက်တာ နောက်ဆုံးညမှာ ခက်ခဲတဲ့ အခြေအနေ တစ်ခုပြီးတစ်ခု ကြုံခဲ့ရတယ်။ မိတ်ဆွေရင်းတစ်ယောက် သစ္စာဖောက်ခဲ့တယ်။ နောက်တစ်ယောက်က ယေရှုကို မသိပါဘူးလို့တောင် ငြင်းပယ်ခဲ့တယ်။ တခြားသူတွေက ယေရှုကို စွန့်ပြီး ထွက်ပြေးခဲ့ကြတယ်။ တစ်နိုင်ငံတည်းသားတွေက ယေရှုကို ငြင်းပယ်ခဲ့ကြတယ်။ ညှဉ်းဆဲ ပြီး သတ်ပစ်ဖို့ တောင်းဆိုခဲ့တယ်။ ဒီနာကျင်စရာ ဖြစ်ရပ်တွေကို ခံရပ်ဖို့ ယေရှုကို ဘာက ကူညီပေးခဲ့သလဲ။ “ရှေ့မှာရှိတဲ့ ဝမ်းမြောက်စရာအကြောင်းကြောင့် အရှက်ခွဲခံရတာကို အရေးမစိုက်ဘဲ ဒုက္ခသစ်တိုင်ပေါ်မှာ အသေခံခဲ့တယ်။ အခု ဘုရားသခင့်ရာဇပလ္လင်ရဲ့ ညာဘက်မှာ ထိုင်နေတယ်။”—ဟီဘရူး ၁၂:၂။
၁၉ သစ္စာစောင့်ခြင်းအားဖြင့် ခမည်းတော်ကို ဂုဏ်တင်နိုင်မယ်၊ စာတန်ဟာ မုသာကောင် ဖြစ်ကြောင်း သက်သေထူနိုင်မယ်ဆိုတာ ယေရှု သိထားတယ်။ ဒီမျှော်လင့်ချက်က ဝမ်းမြောက်စေခဲ့တယ်။ မကြာခင် ကောင်းကင်မှာ ခမည်းတော်နဲ့ ပြန်ဆုံစည်းရတော့မယ်ဆိုတာလည်း သိတယ်။ ဒီမျှော်လင့်ချက်က ခံနိုင်ရည် ရှိစေခဲ့တယ်။ ယေရှုလိုပဲ ကျွန်တော်တို့လည်း ကိုယ့်မျှော်လင့်ချက်ကို အာရုံစိုက်ရမယ်။ အဲဒါက ဘာတွေပဲ ဖြစ်လာပါစေ ခံနိုင်ရည် ရှိစေပါလိမ့်မယ်။
၂၀။ အပြုသဘောရှိဖို့ ဘာက ကူညီပေးနိုင်သလဲ။
၂၀ ယေဟောဝါက သင့်ယုံကြည်ခြင်းနဲ့ ခံနိုင်ရည်ကို မြင်တယ်။ (ဟေရှာယ ၃၀:၁၈။ မာလခိ ၃:၁၀ ကိုဖတ်ပါ။) “အလိုဆန္ဒတွေကို . . . ဖြည့်ဆည်းပေး” မယ်လို့ ဘုရား ကတိပြုတယ်။ (ဆာလံ ၃၇:၄) ဒါကြောင့် မျှော်လင့်ချက်ကို အာရုံစိုက်နေပါ။ စာတန်က သင့်မျှော်လင့်ချက်ကို ပျောက်ဆုံးသွားစေချင်တယ်။ ယေဟောဝါရဲ့ ကတိတော်တွေ ဘယ်တော့မှ ပြည့်စုံလာမှာ မဟုတ်ဘူးလို့ ခံစားစေချင်တယ်။ ဒါပေမဲ့ အပျက်သဘော ဘယ်တော့မှ ဝင်ခွင့်ပြုလို့ မဖြစ်ဘူး။ မျှော်လင့်ချက် လျော့လာတာကို သတိပြုမိရင် ယေဟောဝါဆီမှာ အကူအညီ တောင်းခံပါ။ “ဘာမှ မစိုးရိမ်ဘဲ အရာရာမှာ ကျေးဇူးတော်ကို ချီးမွမ်းကြပါ၊ ဆုတောင်းကြပါ၊ တိုးလျှိုးအသနားခံကြပါ၊ ဘုရားသခင်ဆီ အသနားခံကြပါ။ ဒါဆိုရင် လူ့ဉာဏ်နဲ့ မမီနိုင်တဲ့ ဘုရားသခင့်ငြိမ်သက်ခြင်းက ခရစ်တော်ယေရှုကတစ်ဆင့် ခင်ဗျားတို့ရဲ့ စိတ်နှလုံးနဲ့ ဉာဏ်ရည်ဉာဏ်စွမ်းကို စောင့်ရှောက်ပေးပါလိမ့်မယ်” ဆိုတဲ့ ဖိလိပ္ပိ ၄:၆၊ ၇ ပါ စကားတွေကို သတိရပါ။
၂၁၊ ၂၂။ (က) ကမ္ဘာမြေအတွက် ယေဟောဝါရဲ့ ရည်ရွယ်ချက်က ဘာလဲ။ (ခ) ဘာလုပ်ဖို့ စိတ်ပိုင်းဖြတ်ထားသလဲ။
၂၁ ရှေ့မှာရှိတဲ့ စိတ်လှုပ်ရှားဖွယ် အနာဂတ်အကြောင်းကို မှန်မှန် အချိန်ယူ တွေးတောဆင်ခြင်ပါ။ မကြာခင်မှာ အသက်ရှင်တဲ့ လူသားတိုင်း ယေဟောဝါကို ကိုးကွယ်လာကြပါတော့မယ်။ (ဗျာဒိတ် ၇:၉၊ ၁၄) ကမ္ဘာသစ်အသက်တာအကြောင်း စဉ်းစားကြည့်လိုက်ပါ။ ကျွန်တော်တို့ စိတ်ကူးလို့ ရနိုင်သမျှထက် သာလွန်နေပါလိမ့်မယ်။ စာတန်၊ နတ်ဆိုးတွေနဲ့ ဆိုးညစ်မှုမှန်သမျှ မရှိတော့ဘူး။ မဖျားနာရတော့ဘူး။ မသေရတော့ဘူး။ မနက်တိုင်း အားအင်အပြည့်နဲ့ နိုးထလာပြီး ပျော်ရွှင်နေမယ်။ ကမ္ဘာမြေကို ပရဒိသု ဖြစ်လာဖို့ အားလုံး လက်တွဲ လုပ်ဆောင်ကြမယ်။ ကောင်းမွန်တဲ့ အစားအစာနဲ့ လုံခြုံတဲ့နေရာကို အားလုံး ပိုင်ဆိုင်ကြရမယ်။ လူတွေ ရက်စက်ကြမ်းကြုတ်ကြတော့မှာ မဟုတ်ဘူး။ အချင်းချင်း အမှန်တကယ် ချစ်ခင်ကြင်နာကြမယ်။ အချိန်တန်တဲ့အခါ “ဘုရားသခင့်သားသမီးတွေရဲ့ ဘုန်းအသရေနဲ့ ပြည့်စုံတဲ့ လွတ်လပ်မှု” ကို ကမ္ဘာပေါ်က လူသားတိုင်း ခံစားကြရမယ်။—ရောမ ၈:၂၁။
၂၂ ယေဟောဝါက ကျွန်တော်တို့ရဲ့ အကောင်းဆုံး မိတ်ဆွေ ဖြစ်ချင်တယ်။ ဒါကြောင့် နေ့တိုင်း ယေဟောဝါကို နာခံဖို့၊ ဘုရားနဲ့ ရင်းနှီးဖို့ အတတ်နိုင်ဆုံး ကြိုးစားပါ။ ကျွန်တော်တို့အားလုံး ဘုရားသခင့်မေတ္တာတော် အမြဲ ခံစားနိုင်ကြပါစေ။—ယုဒ ၂၁။