အခန်း ၁၄
အရာရာမှာ ရိုးသားပါ
“ကျွန်တော်တို့ဟာ အရာရာမှာ ရိုးရိုးသားသား ကျင့်ကြံပြုမူချင်စိတ်ရှိ . . . တယ်။”—ဟီဘရူး ၁၃:၁၈။
၁၊ ၂။ ရိုးသားဖို့ ကျွန်တော်တို့ ကြိုးစားတာကို မြင်တဲ့အခါ ယေဟောဝါ ဘယ်လို ခံစားရသလဲ။
တစ်နေ့ ကလေးတစ်ယောက် ကျောင်းကနေ အိမ်ပြန်လာတော့ လမ်းမှာ ပိုက်ဆံအပြည့်ပါတဲ့ အိတ် ကောက်ရတယ်။ ဘာလုပ်မလဲ။ ယူထားလိုက်လို့ ရတယ်။ ဒါပေမဲ့ ပိုင်ရှင်ကို ပြန်ပေးလိုက်တယ်။ ကလေးရဲ့ လုပ်ရပ်ကို အမေ ကြားသိတဲ့အခါ သိပ်ဂုဏ်ယူတယ်။
၂ သားသမီးတွေ ရိုးသားတဲ့အခါ မိဘတွေ ပျော်ရွှင်ကြတယ်။ ကောင်းကင်ဘုံစံဖခင် ယေဟောဝါဟာ “အမှန်တရားရဲ့ ဘုရား” ဖြစ်ပြီး ကျွန်တော်တို့ ရိုးသားတဲ့အခါ ပျော်ရွှင်တယ်။ (ဆာလံ ၃၁:၅) ဘုရားနှစ်သက်မှုကို ကျွန်တော်တို့ ရချင်ကြတယ်။ “အရာရာမှာ ရိုးရိုးသားသား ကျင့်ကြံပြုမူ” ချင်ကြတယ်။ (ဟီဘရူး ၁၃:၁၈) ရိုးသားဖို့ အခက်တွေ့နိုင်တဲ့ ဘဝကဏ္ဍလေးရပ်ကို ဆွေးနွေးကြစို့။ ပြီးတော့ ရိုးသားခြင်းရဲ့ အကျိုးတချို့ကိုလည်း သုံးသပ်ကြမယ်။
ကိုယ့်ကိုယ်ကိုယ် ရိုးသားပါ
၃-၅။ (က) ကိုယ့်ကိုယ်ကိုယ် ဘယ်လို လှည့်စားမိနိုင်သလဲ။ (ခ) ကိုယ့်ကိုယ်ကိုယ် ရိုးသားဖို့ ဘာက ကူညီပေးမလဲ။
၃ တခြားသူတွေအပေါ် ရိုးသားဖို့ အရင်ဆုံး ကိုယ့်ကိုယ်ကိုယ် ရိုးသားရမယ်။ အမြဲတော့ မလွယ်ဘူး။ ပထမရာစု လောဒိကိ အသင်းတော်က ညီအစ်ကိုတွေဟာ ဘုရားနှစ်သက်မှု ရနေတယ်လို့ ယူမှတ်ပြီး ကိုယ့်ကိုယ်ကိုယ် လှည့်စားကြတယ်။ (ဗျာဒိတ် ၃:၁၇) ကိုယ်ဘယ်လို လူစားမျိုးလဲ ဆိုတာနဲ့ပတ်သက်ပြီးလည်း ကိုယ့်ကိုယ်ကိုယ် လှည့်စားမိနိုင်တယ်။
၄ “ဘုရားသခင်ကို ဝတ်ပြုနေတယ်လို့ ကိုယ့်ကိုယ်ကိုယ် ထင်နေပေမဲ့ နှုတ်ကို မစောင့်စည်းရင် ကိုယ့်ကိုယ်ကိုယ် လှည့်စားနေတာပဲ။ သူ့ရဲ့ ဝတ်ပြုမှုဟာ အချည်းနှီးပဲ” လို့ တပည့်တော် ယာကုပ် ရှင်းပြခဲ့တယ်။ (ယာကုပ် ၁:၂၆) ကောင်းတာတွေ လုပ်နေသရွေ့ ရိုင်းစိုင်းတာ၊ ထေ့ငေါ့တာ၊ လိမ်လည်တာတွေကို ဘုရား ဂရုမစိုက်ပါဘူးလို့ တွေးရင် ကိုယ့်ကိုယ်ကိုယ် လှည့်စားနေတာပဲ။ ကိုယ့်ကိုယ်ကိုယ် မလှည့်စားမိဖို့ ဘာက ကူညီပေးနိုင်သလဲ။
၅ မှန်ကြည့်တဲ့အခါ ကိုယ့်ရုပ်သွင်ကို မြင်နိုင်တယ်။ ကျမ်းစာဖတ်တဲ့အခါ ကိုယ့်အတွင်းစိတ်ကို မြင်နိုင်တယ်။ ကိုယ့်အားသာချက်တွေကိုရော ကိုယ့်အားနည်းချက်တွေကိုပါ သိမြင်ဖို့ ကျမ်းစာက ကူညီပေးနိုင်တယ်။ စဉ်းစားပုံ၊ ပြုမူပြောဆိုပုံတို့နဲ့ပတ်သက်ပြီး ပြောင်းလဲဖို့ လိုအပ်တဲ့အရာကို သိရတယ်။ (ယာကုပ် ၁:၂၃-၂၅ ကိုဖတ်ပါ။) ဒါပေမဲ့ ဘာချွတ်ယွင်းချက်မှ မရှိဘူးလို့ ယူဆရင် လိုအပ်တဲ့ တိုးတက်မှုတွေ လုပ်နိုင်မှာ မဟုတ်ဘူး။ ဒါကြောင့် ကိုယ့်ကိုယ်ကိုယ် ရိုးရိုးသားသား ဆန်းစစ်ဖို့ ကျမ်းစာကို အသုံးပြုရမယ်။ (မြည်းတမ်းစကား ၃:၄၀။ ဟဂ္ဂဲ ၁:၅) ကိုယ့်ကိုယ်ကိုယ် အရှိအတိုင်း မြင်တတ်ဖို့ ဆုတောင်းခြင်းကလည်း ကူညီပေးတယ်။ ကျွန်တော့်ကို စစ်ဆေးပေးပါ၊ ချို့ယွင်းချက်တွေ မြင်တတ်ပြီး ပြုပြင်ပြောင်းလဲနိုင်ဖို့ ကူညီပေးပါလို့ ယေဟောဝါဆီ ဆုတောင်းနိုင်တယ်။ (ဆာလံ ၁၃၉:၂၃၊ ၂၄) “ယေဟောဝါဟာ စဉ်းလဲသူကို ရွံရှာတယ်။ ရိုးဖြောင့်သူကိုတော့ ခင်မင်ရင်းနှီးတယ်” ဆိုတာကို သတိရကြတယ်။—ပညာအလိမ္မာ ၃:၃၂။
မိသားစုအတွင်း ရိုးသားပါ
၆။ ဘာကြောင့် လင်နဲ့ မယား အချင်းချင်းအပေါ် ရိုးသားသင့်သလဲ။
၆ ရိုးသားခြင်းက မိသားစုအတွင်း မရှိမဖြစ် လိုအပ်တယ်။ လင်နဲ့ မယား အချင်းချင်း ပွင့်လင်းရင် လုံခြုံမှု ခံစားရတယ်။ အချင်းချင်းအပေါ် အမှန်တကယ် ယုံကြည်နိုင်တယ်။ အိမ်ထောင်အတွင်း မရိုးသားမှုပုံစံမျိုးစုံ ရှိနိုင်တယ်။ ဥပမာ၊ အိမ်ထောင်သည်တစ်ယောက်က တခြားတစ်ယောက်နဲ့ ပရောပရည်လုပ်တာ၊ ညစ်ညမ်းရုပ်ပုံစာပေ ကြည့်တာ၊ တိတ်တိတ်ပုန်း အချစ်ဇာတ်လမ်း ဆင်တာ ဖြစ်နိုင်တယ်။ “လူလိမ်လူညာတွေနဲ့ မပေါင်းဘူး။ သရုပ်မှန် ဖုံးကွယ်ထားသူတွေကို ရှောင်တယ်” ဆိုပြီး ဆာလံဆရာ ပြောခဲ့တာ သတိပြုပါ။ (ဆာလံ ၂၆:၄) အတွေးထဲမှာတောင် အိမ်ထောင်ဖက်အပေါ် မရိုးသားရင် အိမ်ထောင်ရေး ထိခိုက်မယ်။
၇၊ ၈။ ရိုးသားမှုတန်ဖိုးအကြောင်း သားသမီးတွေကို သင်ပေးဖို့ ကျမ်းစာကို ဘယ်လို သုံးနိုင်သလဲ။
၇ ရိုးသားခြင်းက အရေးကြီးမှန်း သားသမီးတွေလည်း သိထားရမယ်။ မိဘတွေက ကျမ်းစာသုံးပြီး သင်ပေးနိုင်တယ်။ သူခိုး အာခန်၊ ငွေရဖို့ လိမ်ပြောတဲ့ ဂေဟာဇိ၊ ပိုက်ဆံခိုးတတ်ပြီး နောက်ပိုင်း ငွေဒင်္ဂါးပြား ၃၀ နဲ့ ယေရှုကို သစ္စာဖောက်ခဲ့တဲ့ ယုဒရှကာရုတ်စတဲ့ မရိုးသားသူတွေရဲ့ စံနမူနာဆိုးတွေ ကျမ်းစာမှာ ရှိတယ်။—ယောရှု ၆:၁၇-၁၉။ ၇:၁၁-၂၅။ ၂ ဘုရင်များ ၅:၁၄-၁၆၊ ၂၀-၂၇။ မဿဲ ၂၆:၁၄၊ ၁၅။ ယောဟန် ၁၂:၆။
၈ တွေ့ရှိတဲ့ ငွေတွေ ပြန်အပ်ဖို့ သားတွေကို တိုက်တွန်းခဲ့တဲ့ ယာကုပ်၊ ဘုရားအပေါ် ကတိတည်ခဲ့တဲ့ ယေဖသနဲ့ သမီး၊ ခက်ခဲတဲ့ အခြေအနေတွေမှာတောင် ရိုးသားခဲ့တဲ့ ယေရှုစတဲ့ ရိုးသားသူတွေရဲ့ စံနမူနာကောင်းတွေလည်း ကျမ်းစာမှာ ရှိပါတယ်။ (ကမ္ဘာဦး ၄၃:၁၂။ တရားသူကြီး ၁၁:၃၀-၄၀။ ယောဟန် ၁၈:၃-၁၁) ဒီစံနမူနာတွေက ရိုးသားမှုတန်ဖိုးကို သားသမီးတွေ နားလည်ဖို့ ကူညီပေးနိုင်ပါတယ်။
၉။ မိဘတွေ ရိုးသားရင် သားသမီးတွေကို ဘယ်လို အကူအညီ ဖြစ်စေမလဲ။
၉ “သူတစ်ပါးကို သင်ကြားပေးပြီး ကိုယ်တိုင်ကျတော့ ဘာလို့ မသင်ယူသလဲ။ ‘မခိုးနဲ့’ လို့ သူတစ်ပါးကို ဆုံးမပြီး ဘာလို့ ကိုယ်တိုင် ခိုးနေသလဲ” ဆိုတဲ့ အရေးကြီးတဲ့ ကျမ်းစာအခြေခံမူကနေ မိဘတွေ သင်ယူနိုင်ပါတယ်။ (ရောမ ၂:၂၁) မိဘတွေ အပြောတစ်မျိုး အလုပ်တစ်မျိုး လုပ်တဲ့အခါ သားသမီးတွေ သိတယ်။ ရိုးသားရမယ်လို့ ပြောပြီး ကိုယ်တိုင် မရိုးသားရင် သားသမီးတွေ စိတ်ရှုပ်သွားမယ်။ အသေးအဖွဲပဲဖြစ်ဖြစ် မိဘတွေ လိမ်ပြောတာကို သတိထားမိရင် သားသမီးတွေလည်း လိမ်ပြောတတ်လာမယ်။ (လုကာ ၁၆:၁၀ ကိုဖတ်ပါ။ ) မိဘတွေ ရိုးသားတာ မြင်ရင်တော့ သားသမီးတွေကိုယ်တိုင် မိဘ ဖြစ်လာတဲ့အခါ ယုံကြည်စိတ်ချထိုက်တဲ့သူတွေ ဖြစ်လာဖို့ အကူအညီ ဖြစ်နိုင်တယ်။—ပညာအလိမ္မာ ၂၂:၆။ ဧဖက် ၆:၄။
အသင်းတော်အတွင်း ရိုးသားပါ
၁၀။ ခရစ်ယာန်ချင်းတွေနဲ့ စကားစမြည် ပြောတဲ့အခါ ဘယ်လို ရိုးသားနိုင်ကြသလဲ။
၁၀ ခရစ်ယာန် ညီအစ်ကို/မတွေအပေါ်လည်း ရိုးသားရမယ်။ စကားစမြည် ပြောရာကနေ အတင်းအဖျင်း ပြောမိဖို့၊ အသရေဖျက်ပြောဆိုမိဖို့ လွယ်တယ်။ ကိစ္စတစ်ခုကို မှန်,မမှန် မသိဘဲ ပြန်ပြောရင် မုသာစကား ဖြန့်ရာရောက်သွားမယ်။ ‘နှုတ်စောင့်စည်း’ တာ ပိုကောင်းတယ်။ (ပညာအလိမ္မာ ၁၀:၁၉) ရိုးသားတယ်ဆိုတာ ထင်သမျှ၊ သိသမျှ၊ ကြားသမျှ ပြောရမယ်လို့ မဆိုလိုပါဘူး။ ပြောမယ့် အကြောင်းအရာ မှန်နေရင်တောင် ကိုယ်နဲ့ မဆိုင်တဲ့ကိစ္စ၊ ပြောဖို့ မလိုအပ်တဲ့ကိစ္စ၊ ပြောလိုက်ရင် မစာနာရာရောက်တဲ့ကိစ္စ ဖြစ်နိုင်တယ်။ (၁ သက်သာလောနိတ် ၄:၁၁) တချို့က “ငါရိုးရိုးသားသား ပြောတာပဲလေ” ဆိုပြီး ရိုင်းပျမှုအတွက် ဆင်ခြေပေးတတ်ကြတယ်။ ယေဟောဝါလူမျိုး ကျွန်တော်တို့ကတော့ အမြဲ ယဉ်ကျေးသိမ်မွေ့ပြီး ကြင်နာတတ်ချင်ကြတယ်။—ကောလောသဲ ၄:၆ ကိုဖတ်ပါ။
၁၁၊ ၁၂။ (က) အပြစ်ကျူးလွန်သူ မရိုးသားတဲ့အခါ ပြဿနာ ဘယ်လို ပိုဆိုးသွားနိုင်သလဲ။ (ခ) ဘယ်မေးခွန်းတချို့ မေးနိုင်သလဲ။ (ဂ) ယေဟောဝါရဲ့ အဖွဲ့အစည်းအပေါ် ဘယ်လို ရိုးသားနိုင်သလဲ။
၁၁ အသင်းတော်ကို ကူညီဖို့ အကြီးအကဲတွေကို ယေဟောဝါ တာဝန်ပေးထားတယ်။ ကျွန်တော်တို့ ရိုးသားရင် အကြီးအကဲတွေ ကူညီပေးဖို့ ပိုလွယ်တယ်။ ဘာကြောင့်လဲ။ နေမကောင်းလို့ ဆရာဝန်ဆီ သွားပြရင် ရောဂါလက္ခဏာတချို့ကို မပြောပြဘဲ နေမလား။ မပြောပြရင် ဆရာဝန်က ဘယ်လို ကုနိုင်မလဲ။ အလားတူပဲ ကျွန်တော်တို့ ကြီးလေးတဲ့အပြစ် ကျူးလွန်ခဲ့ရင် လိမ် မပြောသင့်ဘူး။ အကြီးအကဲတွေဆီ သွားပြီး ရိုးရိုးသားသား ပြောပြသင့်တယ်။ (ဆာလံ ၁၂:၂။ တမန်တော် ၅:၁-၁၁) အခြေအနေ နောက်တစ်မျိုးကို စဉ်းစားကြည့်ပါ– ကိုယ့်မိတ်ဆွေတစ်ယောက် ကြီးလေးတဲ့အပြစ် ကျူးလွန်ခဲ့မှန်း သိရင်ကော။ (ဝတ်ပြုရာ ၅:၁) “ငါသာ မိတ်ဆွေစစ်ဆိုရင် လျှို့ဝှက်ထားပေးမယ်” လို့ ပြောမလား။ ဒါမှမဟုတ် သူ ပြုပြင်ပြောင်းလဲဖို့၊ ယေဟောဝါနဲ့ သူ့ဆက်ဆံရေး ပိုခိုင်မာဖို့ လိုအပ်တဲ့ အကူအညီကို အကြီးအကဲတွေ ပေးမယ်ဆိုတာ သတိရမလား။—ဟီဘရူး ၁၃:၁၇။ ယာကုပ် ၅:၁၄၊ ၁၅။
၁၂ အမှုဆောင်လုပ်ငန်း မှတ်တမ်းလိုမျိုး မှတ်တမ်း ဖြည့်ရတဲ့အခါတွေမှာလည်း ယေဟောဝါရဲ့ အဖွဲ့အစည်းအပေါ် ရိုးသားရမယ်။ ရှေ့ဆောင် ဒါမှမဟုတ် တခြားအမှုဆောင်လုပ်ငန်း တစ်မျိုးမျိုးအတွက် လျှောက်လွှာ ဖြည့်တဲ့အခါမှာလည်း ရိုးသားကြတယ်။—ပညာအလိမ္မာ ၆:၁၆-၁၉ ကို ဖတ်ပါ။
၁၃။ ခရစ်ယာန်ချင်းနဲ့ စီးပွားရေး လုပ်တဲ့အခါ ဘယ်လို ရိုးသားနိုင်သလဲ။
၁၃ ခရစ်ယာန် ညီအစ်ကို/မတွေဟာ ဝတ်ပြုရေးနဲ့ စီးပွားရေးကိစ္စတွေကို ခွဲခြားထားရမယ်။ ဥပမာ၊ နိုင်ငံတော်ခန်းမမှာ၊ အမှုဆောင်လုပ်ငန်းမှာ စီးပွားရေး မလုပ်ကြဘူး။ ဒါ့အပြင် စီးပွားရေးကိစ္စတွေမှာ ညီအစ်ကို/မတွေကို အမြတ်မထုတ်ကြဘူး။ သက်သေခံတွေကို အလုပ်ခန့်ရင် အချိန်မှန် လခပေးရမယ်။ သဘောတူထားတဲ့ လုပ်အားခ ပေးရမယ်။ ဥပဒေ တောင်းဆိုတဲ့ အကျိုးခံစားခွင့်တွေကိုလည်း ပေးရမယ်။ ကျန်းမာရေး အာမခံ၊ ခွင့်ရက်ပေးခြင်းတို့လည်း ပါဝင်တယ်။ (၁ တိမောသေ ၅:၁၈။ ယာကုပ် ၅:၁-၄) သက်သေခံတစ်ယောက်ဆီမှာ အလုပ်လုပ်ရင်လည်း ဦးစားပေးခံရဖို့ မမျှော်လင့်ပါနဲ့။ (ဧဖက် ၆:၅-၈) သဘောတူထားတဲ့ အချိန်ပမာဏအတိုင်း အလုပ်လုပ်ရမယ်။ လုပ်ခနဲ့ ထိုက်တန်အောင် အလုပ်လုပ်ရမယ်။—၂ သက်သာလောနိတ် ၃:၁၀။
၁၄။ ဖက်စပ်စီးပွားရေး မလုပ်ခင် ခရစ်ယာန်တွေ ဘာလုပ်သင့်သလဲ။
၁၄ ညီအစ်ကို/မတစ်ယောက်နဲ့ စီးပွားရေး လုပ်ရင်ကော။ ရင်းနှီးမြှုပ်နှံတာ၊ ငွေချေးတာ ဖြစ်နိုင်တယ်။ ဒီလိုအခြေအနေတွေအတွက် လက်တွေ့ကျတဲ့ ကျမ်းစာအခြေခံမူ ရှိတယ်။ စာချုပ်စာတမ်းမှာ အသေးစိတ် ဖော်ပြရေးမှတ်ခြင်းပါပဲ။ ပရောဖက် ယေရမိ လယ်ဝယ်တဲ့အခါ သဘောတူစာချုပ် နှစ်စောင် ကူးရေးခဲ့တယ်။ စာချုပ်တစ်စောင်မှာ သက်သေတွေကို လက်မှတ်ထိုးခိုင်းတယ်။ နောက်နောင် အထောက်အထား ပြဖို့ စာချုပ်နှစ်စောင်လုံးကို သိမ်းထားတယ်။ (ယေရမိ ၃၂:၉-၁၂။ ကမ္ဘာဦး ၂၃:၁၆-၂၀ ကိုလည်း ကြည့်ပါ။) စာချုပ်ချုပ်တာက ညီအစ်ကိုတွေကို မယုံကြည်ရာရောက်တယ်လို့ တချို့ ခံစားကြတယ်။ ဒါပေမဲ့ စာချုပ်ချုပ်တာက အထင်လွဲစရာ၊ စိတ်ပျက်စရာ၊ စိတ်ဝမ်းကွဲစရာတွေ မဖြစ်အောင် ကာကွယ်ပေးနိုင်တယ်။ စီးပွားရေးကိစ္စ လုပ်တဲ့အချိန်မှာတောင် အသင်းတော်ရဲ့ စည်းလုံးငြိမ်သက်မှုဟာ ပိုအရေးကြီးကြောင်း သတိရပါ။—၁ ကောရိန္သု ၆:၁-၈။ ရှင်းလင်းချက် ၃၀ ကို ကြည့်ပါ။
လောကမှာ ရိုးသားပါ
၁၅။ စီးပွားရေး လုပ်တဲ့အခါ မရိုးသားမှုတွေကို ယေဟောဝါ ဘယ်လို သဘောထားသလဲ။
၁၅ ယေဟောဝါသက်သေ မဟုတ်သူတွေ အပါအဝင် လူတိုင်းအပေါ် ရိုးသားရမယ်။ ကျွန်တော်တို့ရဲ့ ရိုးသားမှုက ယေဟောဝါအတွက် အရေးကြီးတယ်။ “ယေဟောဝါက မမှန်တဲ့ ချိန်ခွင်ကို ရွံရှာတယ်။ မှန်တဲ့ အလေးကိုတော့ နှစ်သက်တယ်။” (ပညာအလိမ္မာ ၁၁:၁။ ၂၀:၁၀၊ ၂၃) ကျမ်းစာခေတ်က အရောင်းအဝယ် ကိစ္စတွေမှာ ချိန်ခွင်ကို အသုံးပြုလေ့ရှိတယ်။ ဒါပေမဲ့ ကုန်သည်တချို့က ဝယ်သူတွေကို လှည့်စားဖို့ အလေးနှစ်မျိုးနဲ့ မမှန်တဲ့ချိန်ခွင် သုံးကြတယ်။ ကျမ်းစာခေတ်ကလိုပဲ ဒီနေ့လည်း စီပွားရေးလုပ်ငန်းတွေမှာ မရိုးသားမှုတွေ တွေ့နေရတယ်။ ယေဟောဝါက မရိုးသားမှုကို အတိတ်က မုန်းခဲ့သလို ဒီနေ့လည်း မုန်းတယ်။
၁၆၊ ၁၇။ မရိုးသားတဲ့ ဘယ်အကျင့်တွေကို ရှောင်ရမလဲ။
၁၆ အလုပ် လျှောက်တဲ့အခါ၊ အစိုးရ လျှောက်လွှာပုံစံတွေ ဖြည့်တဲ့အခါ၊ စာမေးပွဲ ဖြေတဲ့အခါတွေမှာ မရိုးမသား ပြုမူဖို့ ကြုံလာနိုင်ပါတယ်။ လိမ်လည်တာ၊ ချဲ့ကားပြောဆိုတာ၊ တလွဲဖြေတာ မမှားဘူးလို့ လူများစွာ ယူဆကြတယ်။ အံ့သြစရာတော့ မဟုတ်ပါဘူး။ ဒီလောကစနစ်ရဲ့ နောက်ဆုံးကာလမှာ လူတွေဟာ “ကိုယ့်ကိုယ်ကိုယ်ပဲ ချစ်တဲ့သူ၊ ငွေကို တပ်မက်သူ၊ . . . ကောင်းမြတ်ရာကို မုန်းတီးသူ” ဖြစ်ကြမယ်လို့ ကျမ်းစာမှာ ကြိုပြောထားတယ်။—၂ တိမောသေ ၃:၁-၅။
၁၇ တစ်ခါတလေ လောကမှာ မရိုးသားတဲ့သူတွေ ကြီးပွားအောင်မြင်နေကြပုံပဲ။ (ဆာလံ ၇၃:၁-၈) ခရစ်ယာန်တစ်ယောက် ရိုးသားမှုကြောင့် အလုပ်ပြုတ်တာ၊ ငွေလိမ်ခံရတာ၊ အလုပ်မှာ ဆိုးဆိုးရွားရွား ဆက်ဆံခံရတာတွေတောင် ကြုံရနိုင်တယ်။ ဒါပေမဲ့ ကိုယ်ကျိုးစွန့် အနစ်နာခံရကျိုး နပ်ပါတယ်။ ဘာကြောင့်လဲ။
ရိုးသားခြင်းကြောင့် ရရှိတဲ့ ကောင်းချီးများ
၁၈။ နာမည်ကောင်းဟာ ဘာကြောင့် အလွန်တန်ဖိုးရှိသလဲ။
၁၈ ရိုးသားသူ၊ ယုံကြည်အားထားရသူဆိုတဲ့ နာမည်ကောင်းက တန်ဖိုးရှိတယ်။ လောကမှာ တွေ့ရခဲတယ်။ ဒီလိုနာမည်ကောင်း ထိန်းသိမ်းဖို့ အခွင့်အရေး ယောက်တိုင်းမှာ ရှိတယ်။ (မိက္ခာ ၇:၂) မှန်ပါတယ်၊ ကိုယ်ရိုးသားတာကို လူတချို့ လှောင်ပြောင်နိုင်တယ်။ မိုက်မဲသူလို့ ခေါ်နိုင်တယ်။ တခြားသူတွေကတော့ ရိုးသားမှုကို တန်ဖိုးထားမယ်။ ကိုယ့်ကို ယုံကြည်ကြလိမ့်မယ်။ ယေဟောဝါသက်သေတွေကို ရိုးသားမှုကြောင့် ကမ္ဘာတစ်ဝန်းလုံးက သိကြတယ်။ အလုပ်ရှင်တချို့က သက်သေခံတွေ ရိုးသားမှန်း သိလို့ အလုပ်ခန့်ချင်ကြတယ်။ မရိုးသားမှုကြောင့် တခြားအလုပ်သမားတွေ အလုပ်ဖြုတ်ခံရချိန်မှာ သက်သေခံတွေ အလုပ်မပြုတ်တာလည်း ရှိတတ်တယ်။
၁၉။ ရိုးသားမှုက ယေဟောဝါနဲ့ သင့်ဆက်ဆံရေးအပေါ် ဘယ်လို သက်ရောက်မှု ရှိမလဲ။
၁၉ အရာရာမှာ ရိုးသားတာက ကြည်လင်တဲ့ အမှားအမှန်သိစိတ်၊ စိတ်ငြိမ်သက်မှုတို့ကို ရရှိစေတယ်။ “အမှားအမှန်သိစိတ် ကြည်လင်နေမှန်း ကိုယ့်ကိုယ်ကိုယ် ယုံတယ်” လို့ ရေးခဲ့တဲ့ ပေါလုနဲ့ ကျွန်တော်တို့ တူနိုင်ကြတယ်။ (ဟီဘရူး ၁၃:၁၈) အရေးကြီးဆုံးကတော့ အရာရာမှာ ရိုးသားဖို့ ကြိုးစားအားထုတ်တာကို မေတ္တာရှင်ဖခင် ယေဟောဝါ သတိပြုမိပြီး တန်ဖိုးထားပါမယ်။—ဆာလံ ၁၅:၁၊ ၂။ ပညာအလိမ္မာ ၂၂:၁ တို့ကို ဖတ်ပါ။