အုပ်ချုပ်ရေးအဖွဲ့ထံမှ စာ
ယေဟောဝါဘုရားနဲ့ စကားတော် သမ္မာကျမ်းစာကို ချစ်မြတ်နိုးသူတို့–
“အမှန်တရားကိုပါ သိရလိမ့်မယ်။ အဲဒီအမှန်တရားက ခင်ဗျားတို့ကို လွတ်မြောက်စေလိမ့်မယ်” လို့ ယေရှု ပြောတယ်။ (ယောဟန် ၈:၃၂) ကျမ်းစာအမှန်တရား သိရှိစအချိန်မှာ ခံစားခဲ့ပုံကို စဉ်းစားကြည့်ပါ။ မုသာဝါဒ ပြည့်နှက်နေတဲ့ လောကမှာ အမှန်တရားကို သိနိုင်တယ်ဆိုတာ စိတ်လှုပ်ရှားစရာပါပဲ။—၂ တိမောသေ ၃:၁။
ယေဟောဝါဘုရားက ကျွန်တော်တို့ကို အမှန်တရား သိစေချင်တယ်။ လူတွေကို ကျွန်တော်တို့ ချစ်တဲ့အတွက် အမှန်တရား ပြောပြချင်ကြတယ်။ ဒါပေမဲ့ ဘုရားအမှုတော်ဆောင်ခြင်းမှာ ဒီထက်မက ပါတယ်။ ယေဟောဝါရဲ့ အခြေခံမူတွေကို အလွန်လေးစားလို့ ခရစ်ယာန်တွေအဖြစ် အတတ်နိုင်ဆုံး နေထိုင်ကြရမယ်။ ဘုရားသခင်ကို ချစ်ကြောင်း သက်သေထူနိုင်ဖို့ အရေးကြီးတဲ့နည်းကို ယေရှု ရှင်းပြခဲ့တယ်။ “ကျွန်တော်က အဖဘုရားရဲ့ ပညတ်တွေကို လိုက်နာတဲ့အတွက် အဖဘုရားရဲ့ မေတ္တာကို အမြဲခံစားရတယ်။ ခင်ဗျားတို့လည်း ကျွန်တော့်ပညတ်တွေကို လိုက်နာမယ်ဆိုရင် ကျွန်တော့်မေတ္တာကို အမြဲ ခံစားရလိမ့်မယ်” လို့ ပြောခဲ့တယ်။—ယောဟန် ၁၅:၁၀။
ယေရှုက အဖဘုရားကို အမှန်တကယ် ချစ်တယ်။ အဖဘုရား တောင်းဆိုသမျှ လုပ်ဆောင်တယ်။ ကိုယ့်အသက်ရှင်နေထိုင်ပုံမှာ ယေရှုကို တုပမယ်ဆိုရင် ကျွန်တော်တို့ကို ယေဟောဝါ ချစ်မယ်။ ကျွန်တော်တို့လည်း အမှန်တကယ် ပျော်ရွှင်ကြမယ်။ ယေရှု ပြောခဲ့သလိုပဲ “ဒါတွေကို ခင်ဗျားတို့ သိထားပြီဆိုတော့ သိတဲ့အတိုင်း လုပ်မယ်ဆိုရင် ပျော်ရွှင်ချမ်းမြေ့ရလိမ့်မယ်။”—ယောဟန် ၁၃:၁၇။
ကျမ်းစာအမှန်တရားအတိုင်း နေထိုင်ဖို့၊ ဘုရားသခင့်မိတ်ဆွေ ဖြစ်ဖို့ ဒီစာအုပ်က ကူညီပေးမယ်လို့ မျှော်လင့်ပါတယ်။ ဘုရားသခင်ကို ချစ်တဲ့မေတ္တာ တိုးပွားနေဖို့၊ ‘ထာဝရအသက်ကို စောင့်မျှော်ရင်း ဘုရားသခင့်မေတ္တာတော်’ ဆက်ခံစားနေဖို့ ကျွန်တော်တို့ ဆုတောင်းပေးလိုက်ကြပါတယ်။—ယုဒ ၂၁။
ယေဟောဝါသက်သေများရဲ့ အုပ်ချုပ်ရေးအဖွဲ့