အေဒီ ၃၂၊ ပသခါပွဲ နီး​လာတာ​နဲ့​အမျှ ဂါလိလဲ​နယ်​မှာ လူတွေကို​သွန်သင်​ပေးပြီး ယေရှု အလုပ်​များနေ​တယ်။ ဒီ​နောက် ဘုရား​ပညတ်​မှာပါတဲ့​အတိုင်း ပသခါပွဲ​တက်ဖို့ ဂျေရုဆလင်​မြို့ကို သွား​ပုံ​ရတယ်။ ဒါပေမဲ့ သူ့ကိုသတ်ဖို့ ဂျူးတွေ​ကြံစည်နေ​လို့ သတိနဲ့​သွားလာ​တယ်။ (ယောဟန် ၇:၁) ဒီ​နောက် ဂါလိလဲ​နယ်​ကို ပြန်လာတယ်။

ယေရှု ကပေရနောင်​မြို့မှာ​ ရှိနေတုန်း ဖာရိရှဲနဲ့ ကျမ်းတတ်​တွေ ဂျေရုဆလင်​မြို့ကနေ ရောက်လာတာ ဖြစ်နိုင်တယ်။ သူတို့ ဘာဖြစ်လို့ လာတာလဲ။ ယေရှုကို ဘာသာရေး​ပြစ်မှု ကျူးလွန်​သူ​အဖြစ် စွပ်စွဲ​နိုင်အောင် အကြောင်း​ရှာ​ချင်​လို့​ပဲ။ သူတို့က “ရှေး​လူကြီးတွေရဲ့ ထုံးတမ်းစဉ်လာကို ခင်ဗျားရဲ့ တပည့်​တွေ ဘာလို့ ချိုးဖောက်​တာလဲ။ သူတို့ လက်မ​ဆေး​ဘဲ အစာစား​တယ်” လို့​ပြော​ကြတယ်။ (မဿဲ ၁၅:၂) “တံတောင်ဆစ်​အထိ လက်​ဆေး” တဲ့​ထုံးစံ​ကို​ လိုက်​ဖို့ ဘုရားသခင် ဘယ်​တုန်း​ကမှ မတောင်းဆို​ခဲ့​ဘူး။ (မာကု ၇:၃) အဲဒီလို​မ​လုပ်တာ​က ကြီးလေး​တဲ့​အပြစ်​ပဲ​လို့ ဖာရိရှဲတွေ ယူမှတ်​ကြတယ်။

သူတို့ရဲ့ စွပ်စွဲချက်​ကို တိုက်ရိုက်​အဖြေပေး​မယ့်​အစား ယေရှု​က ဘုရား​ပညတ်ကို သူတို့ ဘယ်လောက်ထိ တမင်တကာ ချိုးဖောက်​နေမှန်း အခုလို​ထောက်ပြ​တယ်– “ခင်ဗျားတို့ကျတော့​ကော၊ ထုံးတမ်းစဉ်လာကို လိုက်​ဖို့​အတွက် ဘုရားသခင်ရဲ့ ပညတ်ချက်​ကို ဘာလို့ ချိုးဖောက်​တာလဲ။ ဘုရားသခင်က ‘မိဘကို ရိုသေပါ၊’ ‘မိဘကို ရင့်ရင့်သီးသီး ပြောဆိုတဲ့​သူ သေဒဏ်​ခံရမယ်’ လို့ ပညတ်​ထားတယ်။ ဒါပေမဲ့ ခင်ဗျားတို့ကျတော့ ‘“အဖေနဲ့​အမေကို ထောက်ပံ့​မယ့် ပစ္စည်း​တွေ ဘုရားသခင်​ဆီ လှူ​လိုက်ပြီ” ဆိုပြီး မိဘကို ပြောတဲ့​သူဟာ မိဘကို ရိုသေ​စ​ရာ မလို​တော့​ဘူး’ လို့​ပြော​ကြတယ်။”—မဿဲ ၁၅:၃-၆။ ထွက်မြောက်ရာ ၂၀:၁၂။ ၂၁:၁၇။

ဘုရားသခင်​ဆီ လှူ​လိုက်တဲ့ ငွေ၊ ပစ္စည်းဥစ္စာနဲ့ ဘယ်အရာကို​မဆို ဗိမာန်တော်​က ပိုင်​သွားပြီ၊ အဲဒါကို တခြား​နေရာမှာ မ​သုံး​ရ​ဘူးလို့ ဖာရိရှဲတွေ ပြော​ကြတယ်။ တကယ်တမ်း​ကျတော့ လှူ​လိုက်တဲ့​ပစ္စည်း​တွေဟာ လှူဒါန်း​သူရဲ့​လက်ထဲမှာ ရှိနေတုန်းပဲ။ ဥပမာ၊ သား​ဖြစ်သူ​က ငွေ ဒါမှမဟုတ် ပစ္စည်းဥစ္စာကို “ကော်ဘန်၊” ဘုရား ဒါမှမဟုတ် ဗိမာန်တော်ကို လှူ​လိုက်ပြီ​လို့ ပြောရင် အဲဒါကို ဗိမာန်တော်​က ပိုင်​သွားပြီ​ဆိုတဲ့ သဘော​ပဲ။ အဲဒီ​ငွေ ဒါမှမဟုတ် ပစ္စည်း​ဟာ သား​ဖြစ်သူ​ရဲ့ လက်ထဲမှာ ရှိနေပေမဲ့ ဒုက္ခ​ရောက်နေတဲ့ မိအိုဖအို​ကို ကူညီ​ပေးဖို့​တော့ အဲဒါကို မ​သုံး​ရ​ဘူးဆိုပြီး ပြောတယ်။ ဒီလို​နည်းနဲ့ သူဟာ သားသမီး​၀တ္တ​ရား ကျေပွန်​စ​ရာ​မလို​တော့​ဘူး။—မာကု ၇:၁၁။

ဘုရား​ပညတ်ကို အခုလို မ​လိမ့်​တ​ပတ်​လုပ်တဲ့​အတွက် ယေရှု ဒေါသ​ထွက်ပြီး ဒီလို​ပြောတယ်– “ခင်ဗျားတို့ဟာ ထုံးတမ်းစဉ်လာကို လိုက်​ဖို့​အတွက် ဘုရားသခင်ရဲ့ တရားစကားကို ဘေးချိတ်​လိုက်တာပဲ။ သူတော်ကောင်း ယောင်ဆောင်​သူတို့၊ ခင်ဗျားတို့​အကြောင်း ဟေရှာယ ပရောဖက်ပြုခဲ့တဲ့ စကားတွေဟာ သိပ်​မှန်တာ​ပဲ။ ‘ဒီ​လူမျိုး​က ငါ့ကို နှုတ်​နဲ့​ပဲ ရိုသေတယ်။ သူတို့ရဲ့ စိတ်​ကတော့ ငါ​နဲ့​ဝေး​လှတယ်။ သူတို့က လူ့​ထုံးတမ်းစဉ်လာကို ငါ့ရဲ့​အယူဝါဒသဖွယ် သွန်သင်တဲ့​အတွက် ငါ့ကို ကိုးကွယ်​နေတာ အချည်းနှီး​ပဲ’ လို့ သူ​ပြောခဲ့တယ်။” ယေရှု အခုလို ပြင်းပြင်းထန်ထန် ပြစ်တင်​ဝေဖန်တာ​ကို ဖာရိရှဲတွေ လုံးဝ မချေပ​နိုင်တော့ဘူး။ ဒါနဲ့ ယေရှု​က လူအုပ်​ကို အနား​ခေါ်ပြီး “နားထောင်ပါ။ ဒီ​စကားတွေ​ရဲ့ ဆိုလိုရင်းကို သဘောပေါက်​ကြပါ။ ခံတွင်းထဲ​ဝင်​တဲ့​အရာက လူကို ညစ်ညူးစေတာ မဟုတ်ဘူး။ ခံတွင်းထဲ​က ထွက်​တဲ့​အရာကသာ လူကို ညစ်ညူးစေတာ​ပါ” လို့​ပြောတယ်။—မဿဲ ၁၅:၆-၁၁။ ဟေရှာယ ၂၉:၁၃။

နောက်တော့ အိမ်ထဲ​ဝင်​တဲ့အခါ တပည့်​တွေ​က အနား​လာပြီး “သခင်​ပြောတဲ့ စကား​ကြောင့် ဖာရိရှဲတွေ စိတ်ခု​သွားတာကို သိပါသလား” လို့​မေးတော့ ယေရှု​က “ကောင်းကင်​အဖ မစိုက်ပျိုး​တဲ့ အပင်​အားလုံးဟာ အနု​တ်​ခံရမှာ​ပဲ။ သူတို့ကို ရှိပါစေ။ သူတို့ဟာ မျက်​ကန်း​လမ်းပြ​တွေ​ပဲ။ မျက်​ကန်း​ချင်း လမ်းပြ​ရင် နှစ်ယောက်​စလုံး တွင်း​ထဲ​ကျသွား​မယ်” လို့​ပြန်​ပြောတယ်။—မဿဲ ၁၅:၁၂-၁၄။

ပေတရု​က လူကို ညစ်ညူး​စေတဲ့ အရာ​အကြောင်း ရှင်းပြ​ပေးပါလို့ တပည့်​တွေ​ကိုယ်စား တောင်းဆို​လိုက်တဲ့အခါ ယေရှု အံ့သြ​သွား​ပုံပဲ။ ဒါကြောင့် “ခံတွင်းထဲ ဝင်သ​မျှ ဝမ်း​ထဲ​ရောက်​ပြီး ရေ​အိမ်မှာ စွန့်ပစ်​လိုက်ရ​တာ မသိ​ဘူး​လား။ ဒါပေမဲ့ ခံတွင်းထဲ​က ထွက်​တဲ့​အရာတွေ​ကတော့ စိတ်နှလုံး​ထဲ​က ထွက်လာ​တာ​ဖြစ်လို့ လူကို ညစ်ညူး​စေတယ်။ ဥပမာ​ပြော​ရ​ရင်၊ မကောင်း​ကြံစည်​တာ၊ လူ့​အသက်သတ်​တာ၊ အိမ်ထောင်ရေး​ဖောက်ပြန်​တာ၊ လိင်​အကျင့်​ယိုယွင်း​တာ၊ ခိုးတာ၊ မဟုတ်မမှန် သက်သေ​ထွက်ဆို​တာ၊ ဘုရားကို စော်ကား​ပြောဆိုတာ​တွေဟာ စိတ်နှလုံး​ထဲ​က ထွက်လာ​တာ​တွေ​ပေါ့။ ဒါတွေဟာ လူကို ညစ်ညူး​စေတယ်။ လက်မ​ဆေး​ ဘဲ အစာစား​တာ​က လူကို ညစ်ညူးစေတာ မဟုတ်ဘူး” လို့​ ရှင်းပြတယ်။—မဿဲ ၁၅:၁၇-၂၀။

ယေရှု​က တစ်ကိုယ်ရေသန့်ရှင်းမှုကို အားမပေး​တာ မဟုတ်ဘူး။ အစားအသောက်​တွေကို မ​ပြင်ဆင်​ခင် ဒါမှမဟုတ် အစာ​မစား​ခင် လက်​ဆေး​ဖို့​မလိုဘူးလို့ ပြော​နေတာလည်း မဟုတ်ဘူး။ အဲဒီအစား လူ့​ထုံးတမ်းစဉ်လာတွေ​ကို လိုက်နာ​ကျင့်သုံးပြီး ဘုရားရဲ့ ဖြောင့်မတ်တဲ့ ပညတ်​တွေကို ဘေးချိတ်​ထားတဲ့ ဘာသာရေး ခေါင်းဆောင်​တွေရဲ့ သူတော်ကောင်း​ ယောင်ဆောင်​မှု​ကို ပြစ်တင်​ရှုတ်ချ​နေတာ။ အမှန်​တော့ စိတ်နှလုံး​ထဲ​က ထွက်လာတဲ့ ဆိုးညစ်​တဲ့​အကျင့်တွေက လူကို​ညစ်ညူးစေတာ ဖြစ်တယ်။