အခန်း ၉၄
ဆုတောင်းခြင်းနဲ့ နှိမ့်ချခြင်း အရေးကြီးပုံ
-
ဇွဲမလျှော့တဲ့မုဆိုးမ ပုံဥပမာ
-
ဖာရိရှဲနဲ့ အခွန်ခံ
ဇွဲမလျှော့ဘဲ ဆုတောင်းဖို့လိုကြောင်း ပုံဥပမာတစ်ခုကို ယေရှုပြောခဲ့ပြီးပြီ။ (လုကာ ၁၁:၅-၁၃) အခု ယေရှုက ရှမာရိပြည် ဒါမှမဟုတ် ဂါလိလဲပြည်မှာ ရှိနေတာဖြစ်မယ်။ ဇွဲမလျှော့ဘဲ ဆုတောင်းဖို့လိုကြောင်း ထပ်အလေးပေးပြီး ပုံဥပမာနောက်တစ်ခု ပြောပြတယ်–
“မြို့တစ်မြို့မှာ ဘုရားသခင်ကို မကြောက်၊ လူတွေကိုလည်း ဂရုမစိုက်တတ်တဲ့ တရားသူကြီးတစ်ယောက် ရှိတယ်။ အဲဒီမြို့မှာရှိတဲ့ မုဆိုးမတစ်ယောက်က တရားသူကြီးဆီ ခဏခဏသွားပြီး ‘ကျွန်မ လူတစ်ယောက်နဲ့ အမှုဆိုင်နေရပါတယ်။ ကျွန်မအတွက် တရားသဖြင့် စီရင်ပေးပါ’ လို့အသနားခံတယ်။ တရားသူကြီးက အချိန်အတော်ကြာတဲ့အထိ မကူညီပေးဘဲ နေတယ်။ ကြာလာတော့ သူ့စိတ်ထဲမှာ ‘ငါဟာ ဘုရားသခင်ကို မကြောက်၊ လူတွေကိုလည်း ဂရုမစိုက်တတ်တဲ့သူပါ။ ဒါပေမဲ့ ဒီမုဆိုးမက လာလာပြီး ဒုက္ခပေးနေတော့ သူ့အတွက် တရားသဖြင့် စီရင်ပေးမှဖြစ်မယ်။ ဒီလိုမှမဟုတ်ရင် ငါမခံနိုင်တော့တဲ့အထိ တစ်ချိန်လုံးလာပြီး တောင်းဆိုနေလိမ့်မယ်’ လို့ပြောတယ်။”—လုကာ ၁၈:၂-၅။
ပုံဥပမာရဲ့ သက်ဆိုင်ပုံနဲ့ ပတ်သက်ပြီး “မဖြောင့်မတ်တဲ့ တရားသူကြီးတောင် ဘယ်လိုပြောတယ်ဆိုတာ ခင်ဗျားတို့ ကြားတယ်မဟုတ်လား။ ဘုရားသခင်ဆိုရင် သူရွေးချယ်ထားတဲ့သူတွေ နေ့ညမပြတ် တောင်းလျှောက်တဲ့အခါ တရားသဖြင့် မစီရင်ပေးဘဲ နေပါ့မလား။ အဲဒီအပြင် ဘုရားသခင်က သူတို့အပေါ် စိတ်ရှည်လိုက်သေးတယ်” လို့ပြောတယ်။ (လုကာ ၁၈:၆၊ ၇) သူ့ဖခင်နဲ့ ပတ်သက်ပြီး ယေရှု ဘာသွန်သင်ပေးနေသလဲ။
ယေဟောဝါဘုရားဟာ အဲဒီမဖြောင့်မတ်တဲ့ တရားသူကြီးနဲ့ တူတယ်လို့ ယေရှုပြောနေတာ မဟုတ်ဘူး။ သူတို့ရဲ့ ကွာခြားချက်ကို ထောက်ပြနေတာ။ ဇွဲမလျှော့ဘဲ အသနားခံတဲ့အခါ မဖြောင့်မတ်တဲ့ တရားသူကြီးတောင် နားထောင်ပေးတယ်ဆိုရင် ဘုရားသခင်က ပိုနားထောင်ပေးမှာ သေချာတယ်။ ဘုရားသခင်က ဖြောင့်မတ်ပြီး ကောင်းမြတ်တာမို့ သူ့လူမျိုးတွေ လက်မလျှော့ဘဲ ဆုတောင်းမယ်ဆိုရင် နားထောင်ပေးပါလိမ့်မယ်။ “ကျွန်တော်ပြောမယ်။ ဘုရားသခင်က သူတို့အတွက် တရားသဖြင့် အမြန်ဆုံး စီရင်ပေးလိမ့်မယ်” လို့ ယေရှုပြောတာကို ကြည့်ရင် အဲဒီအချက်ကို သိနိုင်တယ်။—လုကာ ၁၈:၈။
လူတွေက နိမ့်ကျသူတွေ၊ ဆင်းရဲသားတွေကို မတရားဆက်ဆံပြီး အခွင့်အာဏာရှိသူတွေ၊ ချမ်းသာသူတွေကိုကျတော့ မျက်နှာသာပေးတတ်တယ်။ ဘုရားကတော့ အဲဒီလိုမဟုတ်ဘူး။ အချိန်တန်တဲ့အခါ မျှမျှတတ တရားစီရင်မှာဖြစ်လို့ ဆိုးညစ်သူတွေ အပြစ်ပေးခံရမယ်၊ ဘုရားရဲ့ကျေးကျွန်တွေကတော့ ထာဝရအသက် ရပါလိမ့်မယ်။
မုဆိုးမလို ယုံကြည်ခြင်းမျိုး ဘယ်သူ့မှာ ရှိသလဲ။ ဘုရားသခင်က “တရားသဖြင့် အမြန်ဆုံး စီရင်ပေးလိမ့်မယ်” ဆိုတာကို ယုံကြည်တဲ့သူ ဘယ်နှယောက်ရှိသလဲ။ ဇွဲမလျှော့ဘဲ ဆုတောင်းဖို့လိုမှန်း ပုံဥပမာ ပြောပြပြီးနောက် ယေရှုက ဆုတောင်းခြင်းရဲ့ အစွမ်းကို ယုံကြည်တာနဲ့ ပတ်သက်ပြီး “လူသားရောက်လာတဲ့အခါ ကမ္ဘာပေါ်မှာ အဲဒီလိုယုံကြည်ခြင်းမျိုး တွေ့ရပါ့မလား” လို့မေးတယ်။ (လုကာ ၁၈:၈) ခရစ်တော်ရောက်ရှိချိန်မှာ အဲဒီလို ယုံကြည်ခြင်းမျိုး ရှားပါးမယ်ဆိုတဲ့သဘောနဲ့ ပြောနေတာ။
ယေရှုရဲ့စကားကို နားထောင်နေသူတချို့ဟာ ယုံကြည်ခြင်းနဲ့ ပတ်သက်ပြီး ကိုယ့်ကိုယ်ကိုယ် စိတ်ချနေကြတယ်။ သူတို့ကိုယ်ကို ဖြောင့်မတ်တယ်လို့ ယုံနေပြီး တခြားသူတွေကိုတော့ အထင်အမြင် သေးကြတယ်။ အဲဒီလိုလူတွေအတွက် ဒီပုံဥပမာကို ယေရှုဆက်ပြောတယ်–
“ဖာရိရှဲတစ်ယောက်နဲ့ အခွန်ခံတစ်ယောက် ဗိမာန်တော်ကို တက်သွားပြီး ဆုတောင်းတယ်။ ဖာရိရှဲက မတ်တတ်ရပ်ပြီး ‘ဘုရားသခင်၊ ကျွန်တော်ဟာ အများတကာလို လုယက်သူ၊ မဖြောင့်မတ်သူ၊ အိမ်ထောင်ရေးဖောက်ပြန်သူ မဟုတ်တဲ့အပြင် ဟောဒီအခွန်ခံလိုလည်း မဟုတ်တဲ့အတွက် ကျေးဇူးတင်ပါတယ်။ ကျွန်တော်က တစ်ပတ်မှာ နှစ်ကြိမ် အစာရှောင်ပါတယ်။ ရသမျှကိုလည်း ဆယ်ဖို့တစ်ဖို့ ပေးလှူပါတယ်’ လို့ ဆုတောင်းတယ်။”—လုကာ ၁၈:၁၀-၁၂။
လုကာ ၁၁:၄၂) ပြီးခဲ့တဲ့ လအနည်းငယ်မှာ သူတို့က “ပညတ်တရားကို မသိတဲ့ [ဖာရိရှဲတွေရဲ့ အနက်ဖွင့်ဆိုပုံအတိုင်း မသိတာကိုပြောနေတာ] အဲဒီလူတွေကတော့ ကျိန်ခြင်းခံရသူတွေပဲ” လို့ပြောပြီး သာမန်လူတန်းစားတွေကို အထင်သေး ရွံရှာကြောင်း ပြခဲ့ကြတယ်။—ယောဟန် ၇:၄၉။
ဖာရိရှဲတွေက သူတို့ဖြောင့်မတ်ကြောင်းကို လူရှေ့သူရှေ့ ပြတတ်ကြတယ်။ လူအထင်ကြီးအောင် အဲဒီလိုလုပ်ကြတာ။ သူတို့ အစာရှောင်တဲ့ရက်တွေကတော့ ဈေးကြီးတွေမှာ လူစည်ကားတဲ့ တနင်္လာနေ့နဲ့ ကြာသပတေးနေ့ဖြစ်ပြီး အဲဒီအချိန်မှာ သူတို့ကို လူအများမြင်နိုင်တယ်။ ဆယ်ဖို့တစ်ဖို့ပေးတဲ့အခါလည်း အပင်သေးသေးလေးတွေကအစ တိတိကျကျ ပေးကြတယ်။ (ပုံဥပမာကို ယေရှုဆက်ပြောတယ်– “အခွန်ခံကတော့ ခပ်လှမ်းလှမ်းမှာရပ်ပြီး ကောင်းကင်ကိုတောင် မော့မကြည့်ဝံ့ဘဲ ‘ဘုရားသခင်၊ အပြစ်သားဖြစ်တဲ့ ကျွန်တော့်ကို သနားပါ’ လို့ ရင်ဘတ်ကိုထုပြီး ဆုတောင်းတယ်။” အခွန်ခံက သူ့ရဲ့အားနည်းချက်တွေကို နှိမ့်ချစွာ အသိအမှတ်ပြုတယ်။ ယေရှု အခုလို နိဂုံးချုပ်တယ်– “အဲဒီနောက် အခွန်ခံ အိမ်ပြန်သွားတယ်။ ကျွန်တော် ပြောမယ်။ သူဟာ ဖာရိရှဲထက် ပိုဖြောင့်မတ်တယ်။ ကိုယ့်ကိုယ်ကိုယ် ချီးမြှောက်တဲ့သူဟာ နှိမ့်ချခံရပြီး နှိမ့်ချတဲ့သူကတော့ ချီးမြှောက်ခံရလိမ့်မယ်။”—လုကာ ၁၈:၁၃၊ ၁၄။
ရှင်းပါတယ်၊ နှိမ့်ချမှုရှိဖို့ လိုတယ်လို့ ယေရှု ပြောနေတာ။ ဒီသွန်သင်ချက်က တပည့်တွေအတွက် သိပ်အကျိုးရှိတယ်။ သူတို့ကြီးပြင်းလာတဲ့ အသိုင်းအဝိုင်းမှာဆိုရင် ကိုယ့်ကိုယ်ကိုယ် သူတော်ကောင်းလို့ ထင်နေတဲ့ ဖာရိရှဲတွေက ရာထူးအဆင့်အတန်းကို သိပ်အလေးပေးလို့ပဲ။ အဲဒီ အဖိုးတန်သွန်သင်ချက်က ယေရှုရဲ့နောက်လိုက် အားလုံးအတွက်လည်း အကျိုးရှိတယ်။