ယေရှု နှစ်ခြင်းခံ​ပြီး သိပ်​မကြာခင်မှာ ရန်သူ စာတန်​မာရ်နတ်​နဲ့ ရင်ဆိုင်ခဲ့​ရတယ်။ သူ့​အမှုဆောင်​လုပ်ငန်း စ​တောင်​မစ​ရ​သေး​ဘူး၊ ကျရှုံး​အောင်လုပ်ဖို့ စာတန်​ကြိုးစားတယ်။ မှန်ပါတယ်၊ စာတန်​က ယေရှုကို သွေးဆောင်ဖို့ အကြိမ်ကြိမ် ကြိုးစားတယ်။ နောက်ပိုင်းမှာ ယေရှု​က စာတန်နဲ့​ပတ်သက်ပြီး “ဒီ​လောကရဲ့​မင်း​က လာ​နေပြီ။ သူ​လာပေမဲ့ ကျွန်တော့်ကို မချုပ်ကိုင်​နိုင်ပါဘူး” လို့​ပြောတယ်။—ယောဟန် ၁၄:၃၀။

တမန်တော်​ယောဟန်ဟာ “မာရ်နတ်​စာတန်​လို့​ခေါ်တဲ့ ရှေး​မြွေ​ဟောင်း၊ နဂါး​ကြီး” ဘာဖြစ်မယ်​ဆိုတာ စိတ်အာရုံမှာ မြင်ခဲ့တယ်။ လူသားထု​ရဲ့​ရန်သူကြီး စာတန်ဟာ ကောင်းကင်​ကနေ ပစ်ချ​ခံရတယ်။ ‘သူ့​အတွက် အချိန်​နည်းနည်း​ပဲ ကျန်​တော့​မှန်း​သိလို့ ဒေါသတကြီး’ ဖြစ်နေတယ်။ (ဗျာဒိတ် ၁၂:၉၊ ၁၂) ခရစ်ယာန်​တွေ​က အဲဒီ “အချိန်​နည်းနည်း” အတွင်းမှာ သူတို့ အသက်ရှင်​နေရ​တယ်၊ မကြာခင် “ရှေး​မြွေ​ဟောင်း” တွင်း​နက်​ကြီး​ထဲ ပစ်ချ​ခံရ​တော့​မယ်၊ ဘုရားသခင့်​နိုင်ငံတော်မှာ ယေရှု​အုပ်ချုပ်တဲ့ အနှစ်​တစ်ထောင်​အတွင်း မလှုပ်ရှားနိုင်​အောင် ချည်နှောင်​ခံရမယ် ဆိုတာတွေကို ယုံကြည်ဖို့ အကြောင်းကောင်း ရှိပါတယ်။—ဗျာဒိတ် ၂၀:၁၊ ၂။

အဲဒီ​အချိန်အတွင်း ကျွန်တော်တို့ရဲ့​စံအိမ် ကမ္ဘာမြေကြီး​မှာ ဘာတွေ​ဖြစ်ပျက်လာ​မလဲ။ ကမ္ဘာပေါ်မှာ ဘယ်သူတွေ နေထိုင်​ကြ​မလဲ။ ဘယ်လို အခြေအနေ​ရှိမလဲ။ ဒီ​မေးခွန်းတွေကို ယေရှု​ကိုယ်တိုင် အဖြေ​ပေးခဲ့တယ်။ သိုး​နဲ့​ဆိတ် ပုံဥပမာမှာ ယေရှု​က သူ့​ညီ​တွေကို ကောင်းမှုပြု​တဲ့ သိုး​လို ဖြောင့်မတ်သူတွေ အနာဂတ်မှာ ဘာ​ကောင်းချီး​ရမယ်ဆိုတာ ပြောခဲ့တယ်။ ညီ​တွေကို ကောင်းမှု မပြု​တဲ့ ဆိတ်​လို​လူတွေ ဘာ​ရလဒ်​ရမယ်ဆိုတာ​ကိုလည်း ဖော်ပြခဲ့တယ်။ “သူတို့ [ဆိတ်​တွေ] ဟာ ထာဝရ ဖျက်ဆီး​ခံရလိမ့်မယ်၊ ဖြောင့်မတ်သူတွေ [သိုး​တွေ] ကတော့ ထာဝရ​အသက် ရလိမ့်မယ်။”—မဿဲ ၂၅:၄၆။

ဒီ​အချက်​က ယေရှု​ဘေးမှာ သစ်တိုင်တင်​ခံရတဲ့ ရာဇဝတ်သား​ကို ပြောခဲ့တဲ့​စကားတွေကို နားလည်ဖို့ ကူညီ​ပေးတယ်။ ယေရှု​က သစ္စာရှိ​တမန်တော်တွေကို ပေးခဲ့တဲ့ ကောင်းကင်​နိုင်ငံတော် ဝင်ခွင့် မျှော်လင့်ချက်ကို အဲဒီ​ရာဇဝတ်သား​ကို မပေးခဲ့​ဘူး။ အဲဒီအစား နောင်တ​ရတဲ့ ရာဇဝတ်သား​ကို “ဒီနေ့ ကျွန်တော် မှန်တာကို​ပြောမယ်။ ခင်ဗျားဟာ ကျွန်တော်​နဲ့​အတူ ပရဒိသုမှာ ရှိ​လိမ့်မယ်” လို့​ ပြောခဲ့တယ်။ (လုကာ ၂၃:၄၃) ဒါကြောင့် အဲဒီ​လူဟာ လှပတဲ့​ဥယျာဉ်၊ ပန်းခြံ​နဲ့​တူတဲ့ ပရဒိသုမှာ အသက်ရှင်ဖို့ မျှော်လင့်ချက် ရရှိ​ခဲ့တယ်။ ဒီနေ့​အချိန်မှာလည်း “ထာဝရ​အသက်” ရမယ့် သိုး​လို​လူတွေဟာ အဲဒီ​မြေကြီး​ပရဒိသုမှာ နေထိုင်ခွင့်​ရမှာ ဖြစ်တယ်။

ဒါက မြေကြီး​ပေါ်မှာ​ရှိ​မယ့် အခြေအနေနဲ့ ပတ်သက်ပြီး တမန်တော်​ယောဟန် ဖော်ပြခဲ့တဲ့​အချက်​နဲ့​လည်း ကိုက်ညီတယ်။ သူ​ဒီလို​ပြောတယ်– “ဘုရားသခင်ရဲ့ တဲတော်ဟာ လူတွေနဲ့ အတူ​ရှိပြီး ဘုရားက သူတို့ဆီ​မှာ စံမြန်း​မယ်။ သူတို့လည်း ဘုရားရဲ့​လူမျိုး ဖြစ်လိမ့်မယ်။ ဘုရားသခင်​ကိုယ်တိုင် သူတို့နဲ့အတူ ရှိနေမယ်။ ဘုရားသခင်က သူတို့ရဲ့ မျက်ရည်ရှိသမျှကို သုတ်​ပေးလိမ့်မယ်။ သေခြင်း​ရှိတော့မှာ မဟုတ်ဘူး။ ငိုကြွေး​မြည်တမ်း​ခြင်း၊ အော်ဟစ်ခြင်း၊ နာကျင်ခြင်းလည်း ရှိတော့မှာ မဟုတ်ဘူး။ အရင်က​ဖြစ်ဖူးတာတွေ ကွယ်ပျောက်​သွားပြီ။”—ဗျာဒိတ် ၂၁:၃၊ ၄။

သစ်တိုင်တင်​ခံခဲ့ရတဲ့ ရာဇဝတ်သားဟာ မြေကြီး​ပရဒိသုမှာ ပျော်မွေ့​နိုင်ဖို့​အတွက် သေ​ရာ​ကနေ အသက် ပြန်ရှင်​လာပါလိမ့်မယ်။ ဒါပေမဲ့ သူ​တစ်ယောက်တည်း ပြန်ရှင်​လာ​မှာ မဟုတ်ဘူး။ ယေရှု အခုလို ရှင်းပြတယ်– “ဒါကို မ​အံ့ဩ​ကြပါ​နဲ့။ သင်္ချိုင်းဂူ​တွေ​မှာ ရှိနေ​သူ​အားလုံး သားတော်ရဲ့​အသံကို ကြား​ပြီး ထွက်လာ​မယ့်​အချိန် ရောက်လာတော့မယ်။ ကောင်းတဲ့​အကျင့်ကို ကျင့်​သူတွေ အသက်ရှင်ဖို့ ထမြောက်​လာလိမ့်မယ်။ ဆိုးညစ်​တဲ့​အကျင့်ကို ကျင့်​သူတွေကတော့ တရား​စီရင်ခံ​ရဖို့ ထမြောက်​လာလိမ့်မယ်။”—ယောဟန် ၅:၂၈၊ ၂၉။

ဒါဆိုရင် ယေရှုနဲ့အတူ ကောင်းကင်မှာ​ရှိ​မယ့် သစ္စာရှိ​တမန်တော်တွေ၊ အရေအတွက် ကန့်သတ်​ထားတဲ့ တခြားသူတွေ​ကော ဘယ်လို​လဲ။ ကျမ်းစာ ဒီလို​ပြောတယ်– “သူတို့ဟာ ဘုရားသခင်နဲ့ ခရစ်တော်ရဲ့ ပုရောဟိတ်တွေ ဖြစ်ပြီး ခရစ်တော်​နဲ့​အတူ ဘုရင်တွေ​အဖြစ် အနှစ် ၁,၀၀၀ အုပ်စိုး​ရလိမ့်မယ်။” (ဗျာဒိတ် ၂၀:၆) သူတို့က ခရစ်တော်​နဲ့​အတူ ပူးတွဲ​ပြီး မြေကြီး​ပေါ်မှာ​ရှိတဲ့ အမျိုးသား အမျိုးသမီးတွေကို အုပ်ချုပ်​ကြပါလိမ့်မယ်။ သူတို့ဟာ မြေကြီး​ပေါ်မှာ​ရှိသူတွေကို ကိုယ်ချင်းစာ နားလည်​ပေးတတ်တဲ့ အုပ်စိုးရှင်​တွေ ဖြစ်ပါလိမ့်မယ်။—ဗျာဒိတ် ၅:၁၀။

ယေရှုဟာ မြေကြီး​ပေါ်မှာ​ရှိတဲ့ လူသားတွေ​အတွက် သူ့ရဲ့ ရွေးဖိုး​ပူဇော်သကာ​ကို အသုံးပြု​မှာ​ဖြစ်ပြီး သူတို့​အမွေ​ရထားတဲ့ အပြစ်ကို ဖယ်ရှား​ပေးပါလိမ့်မယ်။ သူနဲ့ သူ့ရဲ့​တွဲဖက် အုပ်စိုးရှင်​တွေဟာ သစ္စာရှိ လူသားတွေကို ပြည့်ဝ​စုံလင်​လာ​အောင် လုပ်ပေး​လိမ့်မယ်။ များပြား​စွာ​မွေးဖွားပြီး မြေကြီးကို ပြည့်စေ​ပါလို့ အာဒံနဲ့ ဧဝကို ဘုရားသခင်​ပြောခဲ့​ချိန်​က ရည်ရွယ်​ခဲ့​တဲ့ အသက်တာကို လူသားတွေ ခံစား​ပျော်မွေ့ကြပါလိမ့်မယ်။ အာဒံရဲ့​အပြစ်​ကြောင့် ဖြစ်ပေါ်လာတဲ့ သေခြင်း​တောင် ရှိတော့မှာ မဟုတ်ဘူး။

ဒီလို​နည်းနဲ့ ယေရှုဟာ ယေဟောဝါ​ဘုရား စေခိုင်းသမျှကို ပြီးမြောက်​အောင် လုပ်ဆောင်​ပါလိမ့်မယ်။ အနှစ်​တစ်ထောင် အုပ်ချုပ်မှု​အဆုံး​မှာ​တော့ ယေရှု​က နိုင်ငံတော်​နဲ့ ပြည့်ဝ​စုံလင်တဲ့ လူ့​မိသားစုကြီး​ကို အဖ​ဘုရားဆီ ပြန်အပ်​ပါလိမ့်မယ်။ ဒီလို ထူးခြား​အံ့သြဖွယ်​ကောင်းတဲ့ ယေရှုရဲ့ နှိမ့်ချမှုနဲ့​ပတ်သက်ပြီး တမန်တော်​ပေါလု အခုလို​ရေးခဲ့တယ်– “အရာခပ်သိမ်း​ကို သားတော်ရဲ့​ခြေအောက်​မှာ ချထား​ပြီးတဲ့အခါ အရာခပ်သိမ်း​ကို ချထား​တဲ့ ဘုရားသခင်ကို သားတော်​ကိုယ်တိုင် လက်အောက်ခံ​လိမ့်မယ်။ အဲဒီအခါ ဘုရား​သ​ခင်​ဟာ လူ​အားလုံးရဲ့ တစ်ပါးတည်းသော အုပ်စိုးရှင် ဖြစ်လိမ့်မယ်။”​—၁ ကောရိန္သု ၁၅:၂၈။

ဘုရားသခင်ရဲ့ မြင့်မြတ်တဲ့ ရည်ရွယ်ချက်​တွေ ပြည့်စုံရေး​မှာ ယေရှုဟာ အရေးပါတဲ့ အခန်းကဏ္ဍ​ကနေ ပါဝင်​နေတယ်​ဆိုတာ အသေအချာ​ပါပဲ။ အဆုံးမရှိ​တဲ့ ထာဝရ​ကာလ​တစ်လျှောက်လုံး အဲဒီ​ရည်ရွယ်ချက်​တွေ ဆက်ဖြစ်​မြောက်​သွားတဲ့အခါ ယေရှုဟာ “ကျွန်တော်ဟာ လမ်းခရီး​ဖြစ်တယ်၊ အမှန်တရား​လည်း ဖြစ်တယ်။ အသက်လည်း ဖြစ်တယ်” ဆိုတဲ့​စကားအတိုင်း အပြည့်အဝ လုပ်ဆောင်​သွားပါလိမ့်မယ်။—ယောဟန် ၁၄:၆။