ယောသပ်​က အရေးကြီး​သတင်း​ပြောဖို့ မာရိ​ကို နှိုး​လိုက်တယ်။ ယေဟောဝါရဲ့ ကောင်းကင်တမန်​က အခု​လေး​တင် သူ့​အိပ်မက်​ထဲ​ပေါ်လာပြီး “ထတော့။ ကလေးနဲ့ ဇနီးကို​ခေါ်ပြီး အီဂျစ်​ပြည်​ကို ထွက်ပြေးပါ။ ဟေရုဒ်​က ကလေးကို​သတ်ဖို့ ရှာတော့မယ်။ ငါ အကြောင်း​မပြန်​မချင်း အဲဒီမှာ​ပဲ နေပါ” ဆိုပြီး ပြောလို့​ပဲ။—မဿဲ ၂:၁၃။

ယောသပ်၊ မာရိ​နဲ့ သူတို့​သားလေး​ဟာ အဲဒီ​ညမှာ​ပဲ ချက်ချင်း​ထွက်ပြေးကြ​တယ်။ အချိန်မီ​ရုံ​လေး​ပဲ။ ဘာလို့လဲ​ဆိုတော့ ဟေရုဒ်​မင်း​က နက္ခတ်ဗေဒင်​ဆရာတွေ သူ့ကို​တစ်ပတ်ရိုက်​သွား​မှန်း သိသွား​လို့​ပဲ။ တကယ်တော့ သူတို့ကို သတင်း​ပြန်ပို့​ခိုင်း​ထားတာ။ ဒါပေမဲ့ သတင်း​ပြန်​မ​ပို့​ဘဲ သူတို့​တိုင်းပြည်​ကို တခြား​လမ်း​နဲ့ ပြန်သွား​ကြတယ်။ ဒါကြောင့် ဟေရုဒ် အကြီးအကျယ် ဒေါသ​ထွက်​နေပြီ။ ယေရှုကို သတ်ချင်​နေတုန်းပဲ​မို့ ဘက်သလီဟင်​မြို့​နဲ့ ပတ်ဝန်းကျင် အရပ်ရပ်​မှာ​ရှိတဲ့ အသက်​နှစ်နှစ်​နဲ့ နှစ်နှစ်​အောက် သား​ယောက်ျား​မှန်သမျှကို သတ်ဖို့ အမိန့်ထုတ်​လိုက်တယ်။ ကလေးရဲ့ အသက်ကို သူ​တွက်ချက်​နိုင်တာ​က အရှေ့​အရပ်​က​လာတဲ့ နက္ခတ်ဗေဒင်​ဆရာတွေ​ဆီမှာ အတိအကျ မေး​ထားလို့​ပဲ။

သား​ယောက်ျားလေး မှန်သမျှကို သတ်ပစ်လိုက်​တာ​က တကယ့်ကို ထိတ်လန့်​တုန်လှုပ်​စ​ရာ​ပဲ။ ကလေး ဘယ်​နှစ်​ယောက် အသတ်ခံ​လိုက်ရတယ်​ဆိုတာ အတိအကျ မသိ​နိုင်ဘူး။ ဒါပေမဲ့ ဝမ်းနည်း​နေတဲ့ မိခင်​တွေ ရှိုက်ကြီးတငင် ငိုကြွေး​မြည်တမ်း​ကြမယ်​ဆိုပြီး ပရောဖက်​ယေရမိ ကြိုဟောတဲ့​ကျမ်းစကား ပြည့်စုံ​လာတယ်။​—ယေရမိ ၃၁:၁၅။

အဲဒီ​အချိန်အတွင်း ယောသပ်နဲ့ သူ့​မိသားစုဟာ အီဂျစ်​ပြည်​ကို ထွက်ပြေး​ပြီး အဲဒီမှာ ဆက်နေ​ကြတယ်။ တစ်ညမှာ​တော့ ယေဟောဝါရဲ့ ကောင်းကင်တမန်​က ယောသပ်ရဲ့ အိပ်မက်​မှာ ထပ်​ပေါ်လာပြီး “ထတော့။ ကလေးနဲ့ ဇနီးကို ခေါ်ပြီး အစ္စရေး​ပြည်​ကို ပြန်ပါ။ ကလေးကို သတ်ချင်တဲ့​သူတွေ သေ​ကုန်ပြီ” လို့​ပြောတယ်။ (မဿဲ ၂:၂၀) ဒါကြောင့် ယောသပ်​က သူ့​မိသားစုကို​ခေါ်ပြီး နေရင်းပြည်​ကို ပြန်လာတယ်။ ဒီ​နည်းနဲ့ ဘုရားရဲ့​သားကို အီဂျစ်​ပြည်​ကနေ ခေါ်​ခဲ့​မယ်​ဆိုတဲ့ ကျမ်းစာ​ကြိုဟောချက် ပြည့်စုံ​လာတယ်။—ဟောရှေ ၁၁:၁။

 ယောသပ်ဟာ ယုဒပြည်မှာ အခြေချဖို့ စိတ်ကူး​ထား​ပုံ​ရတယ်။ အီဂျစ်​ပြည်​ကို ထွက်မပြေး​ခင် သူတို့​နေခဲ့တဲ့ ဘက်သလီဟင်​မြို့​နား​မှာ ဖြစ်နိုင်တယ်။ ဒါပေမဲ့ အခု ယုဒပြည်မှာ ဟေရုဒ်ရဲ့​သား​ဆိုး အာခေလ အုပ်ချုပ်နေတဲ့​အကြောင်း သူ​ကြားတယ်။ ဘုရားကလည်း အန္တရာယ်​ရှိတယ်လို့ အိပ်မက်က​နေ ယောသပ်​ကို ထပ်​သတိပေး​လာတယ်။ ဒါကြောင့် ယောသပ်နဲ့ မိသားစုဟာ မြောက်ဘက်​ကို​သွားပြီး ဂါလိလဲ​နယ်၊ နာဇရက်​မြို့မှာ အခြေချ​ကြတယ်။ ဂျူး​ဘာသာရေး အချက်အချာ​နဲ့ ဝေး​တဲ့ အဲဒီ​အသိုင်းအဝိုင်းမှာ ယေရှု ကြီးပြင်း​လာတယ်။ ဒီလိုနဲ့ “သူ့ကို နာဇရက်​မြို့သား​လို့ ခေါ်​ကြ​လိမ့်မယ်” ဆိုတဲ့ နောက်​ကြိုဟောချက်​တစ်ခု ပြည့်စုံ​လာတယ်။—မဿဲ ၂:၂၃။