လူတိုင်း စိုးရိမ်​ပူပန်မှု​တွေ ရှိကြတယ်။ ဘုရား​ကျေးကျွန်တွေ​မှာလည်း ရှိပါတယ်။ ဆာလံ​ဆရာက​တောင် “စိုးရိမ်စိတ်တွေ သိပ်​များနေ” တယ်လို့ ရေးတယ်။ (ဆာလံ ၉၄:၁၉) အထူးသဖြင့် နောက်ဆုံး​ကာလမှာ “ဘဝရဲ့ စိုးရိမ်​ပူပန်စရာ​တွေ” ကြောင့် ယေဟောဝါကို ဝတ်ပြုဖို့ ခက်ခဲ​နိုင်တယ်လို့ ယေရှု ပြောတယ်။ (လုကာ ၂၁:၃၄) သင့်​မှာ​ကော ငွေကြေး၊ မိသားစု၊ ကျန်းမာရေး​နဲ့​ပတ်သက်ပြီး အလွန်အမင်း စိုးရိမ်​တာ​တွေ ရှိသလား။ အဲဒါတွေကို ဖြေရှင်း​နိုင်အောင် ယေဟောဝါ ဘယ်လို ကူညီ​ပေးနိုင်​မလဲ။

စိုးရိမ်​ပူပန်မှု​တွေ ပျောက်​သွား​အောင် ကိုယ့်​အစွမ်းအစ​နဲ့ မ​လုပ်နိုင်​ပါဘူး။ “ကျွန်တော်တို့ဟာ အဘက်ဘက်က​နေ ဖိနှိပ်ခံ​ရ” တယ်။​ “ကြံရာမရ​ဖြစ်နေ” တယ်၊ “လဲကျ” နေတယ်လို့ တမန်တော်​ပေါလု ရေးတယ်။ ဒါပေမဲ့ ‘မ​လှုပ်​နိုင်လောက်အောင် ပိတ်မိ​မနေပါဘူး။​ ထွက်ပေါက်​မရှိဘဲ မနေပါဘူး။ ဇာတ်သိမ်း​မသွား​ပါဘူး’ လို့​လည်း ပြောတယ်။ ဒါဆို ခံနိုင်ရည်​ရှိဖို့ ဘာက ကူညီ​ပေးမှာ​လဲ။ အနန္တ​တန်​ခိုး​ရှင် ယေဟောဝါ​ဆီကလာ​တဲ့ “သာမန်​ထက် ထူးကဲ​တဲ့ တန်ခိုး” က ကူညီ​ပေးမှာ ဖြစ်တယ်။—၂ ကောရိန္သု ၄:၇-၉။

“သာမန်​ထက်​ထူးကဲ​တဲ့ တန်ခိုး” ကို သင် ဘယ်လို​ ခံစားခဲ့​ရတယ်ဆိုတာ​ ပြန်​စဉ်းစားကြည့်ပါ။ အားရှိစေတဲ့ ဟောပြောချက်​ကြောင့် ယေဟောဝါရဲ့ ခိုင်မြဲ​တဲ့​မေတ္တာကို နက်နက်ရှိုင်းရှိုင်း လေးမြတ်​ခဲ့​တဲ့အချိန်​ကို ပြန်​မှတ်မိသလား။ ပရဒိသု​မျှော်လင့်ချက်​အကြောင်း တခြား​သူတွေကို ပြောပြတဲ့​အခါ ဘုရားရဲ့​ကတိ​တွေကို ပို​ယုံကြည်​လာတယ် မဟုတ်လား။ အစည်း​အဝေးတွေ တက်တဲ့အခါ၊ ကိုယ့်​ယုံကြည်ချက်​အကြောင်း တခြား​သူတွေကို ပြောပြတဲ့​အခါ ဘဝ​စိုးရိမ်​ပူပန်မှု​တွေ​ကြား ခံနိုင်ရည်​နဲ့ စိတ်​ငြိမ်သက်မှု ရှိလာပြီး ယေဟောဝါကို ပျော်ရွှင်စွာ ကိုးကွယ်​နိုင်မှာ ဖြစ်တယ်။

ဖိစီးမှုတွေ​က တစ်ချိန်တည်းမှာ ဘက်ပေါင်းစုံ​ကနေ လာတယ်လို့ သင် ခံစား​ရနိုင်တယ်။ ဥပမာ၊ ဘုရား​နိုင်ငံတော်ကို ဦးစား​ထားဖို့၊ ဘုရားရေးရာ​လုပ်ငန်းမှာ မှန်မှန်​ပါဝင်ဖို့ ယေဟောဝါ တောင်းဆို​ထားတယ်။ (မဿဲ ၆:၃၃။ လုကာ ၁၃:၂၄) ဆန့်ကျင်မှုတွေ၊ ကျန်းမာရေး​နဲ့ မိသားစု​ပြဿနာ​တွေ​ကြောင့် စိတ်​သွား​တိုင်း ကိုယ်​မပါဘူး ဆိုရင်ကော။ သင့်ရဲ့​အလုပ်​ကြောင့် ဘုရားရေးရာ​လုပ်ငန်း​အတွက် အချိန်နဲ့ ခွန်အား မရှိတော့ဘူး​ဆိုရင်ကော။ အခက်အခဲ​ပေါင်း​စုံ​က​လည်း ကြုံ၊ အဲဒါတွေကို ဖြေရှင်းဖို့ အချိန်နဲ့ ခွန်အား​က​လည်း မရှိတာ​ကြောင့် စိတ်ဓာတ်ကျ​လာနိုင်​ပါတယ်။ ယေဟောဝါရဲ့ တောင်းဆိုချက်​တွေ များ​လွန်းနေ​လား​ဆိုပြီး သံသယ​ဝင်လာ​နိုင်တယ်။

ယေဟောဝါဘုရား​ဟာ နားလည်​ပေး​တတ်​ပါတယ်။ ပေးနိုင်တာ​ထက် ပိုပြီး ဘယ်တော့မှ မတောင်းဆိုပါဘူး။ စိတ်ရောကိုယ်ပါ ခံစား​ရတဲ့​ဒဏ်ရာတွေ ပြေပျောက်​ဖို့ အချိန်​ လိုအပ်​မှန်း​လည်း သိတယ်။—ဆာလံ ၁၀၃:၁၃၊ ၁၄။

ဥပမာ၊ ပရောဖက်​ဧလိယ​ကို ယေဟောဝါဘုရား ဂရုစိုက်​စောင့်ရှောက်​ခဲ့​ပုံကို သုံးသပ်​ကြည့်ပါ။ ဧလိယ အရမ်း​စိတ်ဓာတ်ကျ​ပြီး ကြောက်ရွံ့​လာလို့ တော​ထဲ ထွက်ပြေး​တဲ့အခါ ယေဟောဝါ​က ပြစ်တင်​ဆုံးမ​ပြီး သူ့​တာဝန်ကို ပြန်သွား​လုပ်​ခိုင်းသလား။ မ​လုပ်​ခိုင်းပါ​ဘူး။ ဧလိယ​ဆီ ကောင်းကင်တမန်​ကို နှစ်ကြိမ် စေလွှတ်ခဲ့တယ်။ ကောင်းကင်တမန်​က သူ့ကို ညင်ညင်သာသာ လှုပ်​နှိုး​ပြီး စားစရာ ပေးတယ်။ ဒါတောင် နောက်​ရက် ၄၀ အထိ ဧလိယ စိုးရိမ်​ကြောက်ရွံ့​နေတုန်းပဲ။ သူ့ကို ကူညီဖို့ ယေဟောဝါ နောက်ထပ် ဘာ​လုပ်ပေးခဲ့သလဲ။ ပထမ၊ သူ့ကို ကာကွယ်​ပေးနိုင်ကြောင်း သက်သေ​ပြတယ်။ ဒုတိယ၊ “ညင်သာ​တဲ့​ စကားသံ” နဲ့  နှစ်သိမ့်​ပေးတယ်။ နောက်ဆုံး၊ ဘုရား​အပေါ် သစ္စာရှိ​ရှိ​ဝတ်ပြု​နေ​သူ ထောင်နဲ့​ချီ ရှိသေးတယ်လို့ ပြောပြတယ်။ ဒါနဲ့ ဧလိယ အားရှိသွား​ပြီး ပရောဖက်​အလုပ်ကို ဇွဲရှိရှိ ပြန်​လုပ်တယ်။ (၁ ဘုရင်များ ၁၉:၁-၁၉) ဘာသင်ခန်းစာ ရသလဲ။ ဧလိယ စိုးရိမ်​ပူပန်​နေချိန်မှာ ယေဟောဝါ​က စိတ်ရှည်ရှည်၊ ထောက်ထား​ကြင်နာစွာ ပြောဆို​ဆက်သွယ်​ခဲ့တယ်။ ဘုရားဟာ အခုထိ မပြောင်းလဲပါဘူး။ ကျွန်တော်တို့ကိုလည်း အဲဒီအတိုင်း ဂရုစိုက်​ကူညီ​ပေးမှာ ဖြစ်တယ်။

ယေဟောဝါ​အတွက် ဘာတွေ ပေးဆက်​နိုင်မလဲ​ဆိုတာ စဉ်းစားတဲ့အခါ လက်တွေ့ကျ​ဖို့ လိုတယ်။ အခု လုပ်နိုင်တဲ့​အရာတွေကို အရင်က လုပ်ခဲ့​ရာတွေ​နဲ့ မနှိုင်းယှဉ်ပါနဲ့။ ဒီ​ဥပမာ​ကို သုံးသပ်​ကြည့်ပါ– လပေါင်း၊ နှစ်ပေါင်းများစွာ လေ့ကျင့်မှု မ​လုပ်​တော့​တဲ့ အပြေးသမား​တစ်ဦးဟာ အရင်တုန်းက ပုံမှန်​လုပ်ခဲ့တဲ့ လေ့ကျင့်ခန်း​တွေကို ချက်ချင်း ပြန်​လုပ်နိုင်မှာ မဟုတ်ဘူး။ ခံနိုင်ရည်​နဲ့ ခွန်အား​ရှိလာ​အောင် လေ့ကျင့်ခန်း​တစ်ခုကို ပန်းတိုင်​ထားပြီး ဖြည်းဖြည်းချင်း လုပ်ဆောင် ရမယ်။ ခရစ်ယာန်တွေလည်း အပြေးသမား​တွေ​နဲ့ တူတယ်။ စိတ်ထဲမှာ သတ်သတ်မှတ်မှတ် ပန်းတိုင်​ချပြီး လေ့ကျင့်​ကြတယ်။ (၁ ကောရိန္သု ၉:၂၄-၂၇) သင်လည်း အခု​ချိန်​က​စပြီး လုပ်​နိုင်မယ့် ပန်းတိုင်​တစ်ခု ချပြီး ကြိုးစား​ကြည့်ရင် မကောင်း​ဘူး​လား။ ဥပမာ၊ အစည်းအဝေး​တက်ဖို့ ပန်းတိုင်​ထား​နိုင်တယ်။ ပန်းတိုင်​ကို လိုက်မီ​အောင် ကူညီ​ပေးပါလို့ ဆုတောင်း​နိုင်တယ်။ သင်က ဘုရားရေးရာ​ခွန်အား​တွေ ပြန်​ရတဲ့အခါ “ယေဟောဝါ ဘယ်လောက် ကောင်းမြတ်သလဲ​ဆိုတာ မြည်းစမ်း​ပြီး ကိုယ်တိုင်​ခံစား” ရပါလိမ့်မယ်။ (ဆာလံ ၃၄:၈) ယေဟောဝါကို ချစ်ကြောင်း တင်ပြတဲ့ ဘယ်​လုပ်ရပ်​မဆို ဘယ်လောက်​ပဲ သေးငယ်​ပုံ​ပေါက်​နေပါ​စေ ဘုရား တန်ဖိုး​ထားကြောင်း သတိရပါ။—လုကာ ၂၁:၁-၄။

ယေဟောဝါ​ဆီ ပြန်လာဖို့ ဂျူန် ဘယ်လို ခွန်အားရ​ခဲ့သလဲ။ သူ ဒီလို​ပြောပြတယ်– “ကျွန်မကို ကူညီ​ပေးပါလို့ ယေဟောဝါဘုရား​ဆီ အမြဲ​ဆုတောင်းတယ်။ ကျွန်မတို့​မြို့မှာ အစည်းအဝေးပွဲ​တစ်ခု ရှိတယ်​ဆိုပြီး ချွေးမ ပြောတယ်။ တစ်ရက်​လောက်​တော့ သွား​တက်​ဦး​မယ်​လို့ ဆုံးဖြတ်​လိုက်တယ်။ ယေဟောဝါရဲ့​လူမျိုးနဲ့​အတူ ပြန်ဆုံ​ဆည်း​ခွင့်​ရလို့ ဝမ်းသာ​လိုက်တာ။ ဒီ​အစည်းအဝေးက ကျွန်မ လိုအပ်​နေတဲ့ အားပေးမှု​တစ်ခုပါပဲ။ အခု​ဆို ဘုရားသခင်ကို ဝတ်ပြု​ပြီး အမှုတော်မှာ ပျော်ပျော်ရွှင်ရွှင် ပြန်ပါ​ဝင်​နေပြီ။ ဒါကြောင့် ကျွန်မ​ဘဝ ပို​အဓိပ္ပာယ်​ရှိ​လာတယ်။ ညီအစ်ကို/မ​တွေ​နဲ့ သူတို့ရဲ့​အကူအညီ လိုအပ်​မှန်း အခု သဘောပေါက်​လာ​ပါပြီ။ ယေဟောဝါ​ဆီ အချိန်မီ ပြန်လာ​နိုင်​ခဲ့လို့ ကျေးဇူးတင်​ လိုက်တာ။”