ငါ့အဝတ်အစားက ငါ့ရုပ်စစ်သဏ္ဌာန်စစ်ကို ဖော်ထုတ်နေသလား
အခန်း ၁၁
ငါ့အဝတ်အစားက ငါ့ရုပ်စစ်သဏ္ဌာန်စစ်ကို ဖော်ထုတ်နေသလား
“သိပ်မတိုပါဘူး။ မေမေတို့ကသာ ခေတ်နောက်ကျတာ!” ပက်ဂီတစ်ယောက် မိဘကိုဟစ်လိုက်သည်။ ပြီးတော့အခန်းထဲ ပြေးဝင်လိုက်သည်—မိမိဝတ်လိုသောစကပ်နှင့်စပ်လျဉ်းပြီး အငြင်းအခုံဖြစ်ရာက ဤသို့ဇာတ်သိမ်းလိုက်ခြင်းဖြစ်သည်။ သင်လည်းကိုယ်မြတ်နိုးပါသည်ဆိုသော ဝတ်စုံနှင့်ပတ်သက်၍မိဘ၊ ဆရာသို့မဟုတ်အလုပ်ရှင်၏ဝေဖန်ခံရသောအခါ အလားတူအငြင်းအခုံဇာတ်၏ အဓိကသရုပ်ဆောင်ဖြစ်ခဲ့ဘူးချင်ဖြစ်ခဲ့ဘူးမည်။ သင်ကသာမန်ဝတ်နေကျဆို၏။ သူတို့က ဖရိုဖရဲနိုင်သည် ဟုပြော၏။ သင်က ကြော့မော့သည်ဆိုပါမှ၊ သူတို့က တောက်ပြောင်လွန်းသည်၊ အဓိပ္ပာယ်ပါသည်ဟု သမုတ်ကြသည်။
အမှန်ကိုဝန်ခံရလျှင်၊ အကြိုက်ထွေပြားလှ၏။ လူတိုင်းလည်း ကိုယ်ကြိုက်လိုရာကို ကြိုက်ဖို့အခွင့်ရှိပါပေသည်။ သို့သော် အဝတ်နှင့်ပတ်သက်လာသောအခါ ဘာမဆိုဝတ်ချင်သလို ဝတ်စတမ်းလော။
သတင်းမှန်လော
ပမ်ဆိုသောမိန်းကလေးက “ကိုယ့်အဝတ်အစားဟာ ဘယ်လိုလူစားဖြစ်မှန်း၊ ကိုယ့်ကိုယ်ကိုဘယ်လိုထင်မြင်မှန်း ပေါ်လွင်စေတယ်” ဟုဆိုသည်။ မှန်ပေသည်။ မိမိအဝတ်အစားသည်သတင်းတစ်ရပ်၊ မိမိနှင့်ပတ်သက်သော ကြေညာချက်တစ်ရပ်ကို အခြားသူများထံထုတ်ပြန်လျက်ရှိ၏။ ဝတ်စားပုံသည် မိမိ၌တာဝန်သိစိတ်၊ တည်မြဲမှု၊ မြင့်မားသောစာရိတ္တစံချိန်ရှိမရှိ တီးတိုးလေသံဖြင့်အသံလွင့်နိုင်၏။ သို့တည်းမဟုတ်မိမိ၏ ပုန်ကန်သောသဘော၊ မကျေနပ်သည့်သဘောကို ကျယ်လောင်စွာဟစ်ကြွေးဖော်ထုတ်တတ်သည်။ မည်သို့သောလူစားဖြစ်ကြောင်း ထုတ်ဖော်သည့်နည်းတစ်မျိုးပင်ဖြစ်နိုင်သည်။ အချို့လူငယ်များသည် စုတ်ပြဲသည့်အဝတ်၊ ပန့်ခ်ခေါ်တေလေဂျပိုးစတိုင်၊ ဈေးကြီးသည့်ဒီဇိုင်နာ၏ အဝတ်အစားမျိုးကို မိမိတို့၏တံဆိပ်သင်္ကေတအဖြစ် ရွေးချယ်ကြသည်။ အခြားသူတို့မူ၊ ဝတ်စားဆင်ယင်ပုံဖြင့်လိင်ခြားသူကို ဆွဲဆောင်လိုဆွဲဆောင်၊ ပို၍အသက်ကြီးသလို ပုံမျိုးဖမ်းလိုဖမ်းကြသည်။
ထို့ကြောင့်လည်း၊ လူငယ်အများအဝတ်အစားကို အရေးတကြီးထား၏။ သို့ရာတွင်၊ အောင်မြင်ရေးအတွက်ဝတ်စားဆင် ဟူသောစာအုပ်ပြုစုသူ ဂျွန်တီမော်လွိုင်က ဤသို့သတိပေး၏– “ကျွန်ုပ်တို့ဝတ်စားပုံသည် မြင်ရသူတို့အပေါ်သိသာသောသြဇာသက်ရောက်စေသည်နှင့်အညီ လူတို့ကျွန်ုပ်တို့ပေါ် မည်သို့သဘောထားဆက်ဆံသည်ကိုပါ ပြုပြင်ဖန်တီးနိုင်သည်။”
သင့်မိဘများက သင့်ဝတ်ပုံစားပုံအတွက်ရတက်မအေးဖြစ်ကြရသည်မှာ အဆန်းမဟုတ်။ သူတို့အမြင်တွင် အဝတ်အစားသည် သူကြိုက်ကိုယ်ကြိုက်ကိစ္စတစ်မယ်သာမဟုတ်။ သူတို့သည်သင့်အား မှန်သောသတင်းလွှင့်စေချင်သည်။ သင်သည်မျှမျှတတရှိပြီး တာဝန်သိတတ်သူတစ်ဦးဖြစ်သည်ဟူသော သတင်းမျိုးဖြစ်စေချင်သည်။ သင့်ဝတ်စားပုံသည် ဤအချက်ကိုဖြစ်မြောက်အောင်မြင်စေသလော။ သင်သည်အဘယ်အရာကိုကြည့်ပြီး အဝတ်အစားရွေးချယ်သနည်း။
“ကျွန်မဟာ သူငယ်ချင်းတွေခိုင်းသလို လုပ်တယ်”
လူငယ်အများအဖို့၊ အဝတ်အစားသည် မိမိတို့၏လွတ်လပ်မှုနှင့် သီးခြားပင်ကိုယ်စရိုက်ကို ထွက်ဆိုတင်ပြသည့် သရုပ်သကန်ဖြစ်သည်။ သို့သော်လူငယ်တစ်ဦးအနေနှင့် သင့်ပင်ကိုယ်စရိုက်သည်မတည်မမြဲ—အစဉ်ဖြစ်ပေါ်ပြောင်းလဲနေဆဲပါ။ ထို့ကြောင့် မိမိနှင့်ပတ်သက်၍ တစ်စုံတစ်ခုထုတ်ပြန်လိုသောအခါ၊ ဘာထုတ်ပြန်ရမည်၊ မည်သို့ထုတ်ပြန်ရမည်ကို တပ်အပ်မသိဘဲရှိတတ်ကြသည်။ သို့ဖြစ်၍အချို့လူငယ်များသည် ရုပ်ပျက်ဆင်းပျက်၊ ဣန္ဒြေမဲ့စွာဝတ်ဆင်ကြသည်။ သို့သော် သူတို့သည် မိမိတို့၏ “သီးခြားပင်ကိုယ်စရိုက်” ကိုပျိုးထောင်ဆောက်တည်မည့်အစား၊ မိဘတို့ကိုအရှက်ခွဲအိုးမဲသုတ်ရုံမက၊ မိမိတို့ကလေးဆန်လွန်းသည့်အဖြစ်ကို အများရှေ့ပြသနေခြင်းသာဖြစ်သည်။
အချို့လူငယ်များသည် ရွယ်တူများဝတ်ဆင်သလို ဝတ်ဆင်ချင်ကြသည်။ ထိုသို့ဝတ်ဆင်ပါမှ စိတ်ထဲလုံသလိုလိုခံစားရပြီး အုပ်စုဝင်တစ်ယောက်ဟု မိမိကိုယ်ကိုထင်ရသည်။ လူဝင်ဆံ့ချင်သည့်ဆန္ဒရှိတိုင်း မှားသည်ဟုကားမဆိုသာ။ (၁ ကောရိန္သု ၉:၂၂ နှိုင်းယှဉ်။) သို့သော် ခရစ်ယာန်တစ်ဦးသည်မယုံကြည်သောလူငယ်များနှင့် တကယ်ပင်တစ်သိုက်တည်းဖြစ်သည်ဟူ၍ အထင်ခံချင်မည်လော။ ထင်ချင်ရာထင်၊ ဖြစ်ချင်ရာဖြစ်၊ ရွယ်တူတို့အကြိုက်ကိုလိုက်ရပါမည်လော။ မိန်းကလေးတစ်ဦး ဤသို့ဝန်ခံ၏– “ကျွန်မဟာသူငယ်ချင်းတွေရဲ့ အပြောကိုမခံရအောင်၊ သူတို့လုပ်ချင်တာတွေကို အကုန်လိုက်လုပ်ပါတယ်။” သို့သော်သူတစ်ပါးထားရာနေ၊ စေရာသွားသည့်လူစား၊ အခြားသူတစ်ယောက်ပြုသမျှကိုနု၍ခံသည့်လူစားကို မည်သို့ကင်းပွန်းတပ်ရမည်နည်း။ သမ္မာကျမ်းစာက ဤသို့ဆို၏– “အကြင်သူ၏အထံ၌ အစေခံကျွန်ဖြစ်ခြင်းငှာ သင်တို့ဝင်၍အစေခံ၏၊ [သင်သည် သူ့ကိုနာခံသောကြောင့်] ထိုသူသည် ... သင်တို့၏သခင်ဖြစ်သည်ကို မသိကြသလော။”—ရောမ ၆:၁၆။
လူငယ်များအသိုင်းအဝိုင်းတွင်၊“အများလုပ်သလိုလိုက်လုပ်ရန်အလေးအနက်ပြုလွန်းသဖြင့်၊အုပ်စုဝင်တို့သည်အုပ်စု၏ပြုမူပြောဆိုဝတ်စားပုံအထုံးအဖွဲ့လက်ခုပ်ထဲမှအကျဉ်းသားများဟုဆိုရမလောက်ဖြစ်ပြီး၊မည်သို့ဝတ်စားဆင်ယင်ပြောဆိုလုပ်ကိုင်ရမည်နှင့်ပတ်သက်၍သာမက၊မည်သို့စဉ်းစား၊ယုံကြည်ရမည်နှင့်စပ်လျဉ်း၍ပင်[ရွယ်တူများ]အကြံပေးချက်ကိုအားထားကြရသည်။”—မြီးကောင်ပေါက်၊ကလေးဘဝမှလူကြီးဘဝသို့အကူး။
သို့သော် သင့်သူငယ်ချင်းများ ထိုသို့သောအကြံဉာဏ်ပေးနိုင်လောက်အောင် မည်မျှတိုင်အရည်အချင်းပြည့်ဝသနည်း။ (မဿဲ ၁၅:၁၄) သူတို့ကိုယ်တိုင် စိတ်လှုပ်ရှားမှုဘက်တွင် သင့်နည်းတူကြီးကောင်ငင်ပြဿနာများ ရင်ဆိုင်နေရကြသည် မဟုတ်လော။ သို့ဖြစ်လျှင်၊ သူတို့ပြဌာန်းသည့်စံထားအတိုင်း ပျော့ပျော့ညံ့ညံ့နှင့်လိုက်ရတော့မည်လော။ သူတို့၏စံထားများသည် သင့်သာမန်အသိဉာဏ်နှင့်လည်းကောင်း၊ သင့်မိဘများ၏တန်ဖိုးစံနှုန်း၊ ဆန္ဒတို့နှင့်လည်းကောင်း လားလားကြီးဆန့်ကျင်မှန်းသိလျက်နှင့် သင်လိုက်လျောမည်လော။
ယနေ့ “ဝင်”—နက်ဖြန် “ထွက်”
အချို့လူငယ်များသည် ဖက်ရှင်လေတိုက်သည့်ဘက်လိုက်ပါတတ်ကြသည်။ သို့သော် ၎င်းသည်အပြောင်းအလဲမြန်ဆန်လှသည်တကား။ “ဤလောက၏ဇာတ်ကွက်သည် ပြောင်းလဲလျက်နေသည်” ဟူသောသမ္မာကျမ်းစာ၏စကားကို ကျွန်ုပ်တို့သတိရမိသည်။ (၁ ကောရိန္သု ၇:၃၁၊ ကဘ) ယနေ့ “ဝင်” လာပြီးခေတ်စားသောအရာသည် နက်ဖြန်နေ့တွင် လျှပ်တပြက်အတွင်းခေတ်ကုန်သွားတတ်သည်။ (အကုန်အကျလည်းမနည်းပါ) အရှည်တိုးလိုက်လျှော့လိုက်၊ ဘောင်းဘီပွချီကျုံ့ချီ။ အကျိုးကျေးဇူးခံစားရသူများမှာ ကုန်ထုတ်လုပ်သူများနှင့် အဝတ်အထည်ဒီဇိုင်းဆွဲသူများသာဖြစ်သည်။ လွယ်လွယ်နှင့်ကြိုးဆွဲသလို ကသောလူထုပရိသတ်ထံမှ အိတ်နှင့်လွယ်ပြီးအမြတ်ရကြ၏။
လွန်ခဲ့သောနှစ်အနည်းငယ်က ဒီဇိုင်နာဂျင်းဖက်ရှင်ကို သာဓကအဖြစ်ဆိုအံ့။ ဂျင်းသည် တစ်မုဟုတ်ချင်းထိပ်ပြေးဖက်ရှင်ဖြစ်ခဲ့သည်။ လူတို့သည်ငွေများစွာအကုန်အကျခံပြီး ကယ်လ်ဗင်ကလိန်းနှင့် ဂလိုးရီးယားဗန်ဒဘီး စသောနာမည်ကြီးဂျင်းများကို ဝယ်ဝတ်ကြသဖြင့် ၎င်းအဝတ်အထည်များအတွက် လမ်းလျှောက်ကြော်ငြာများ ဖြစ်မှန်းမသိဖြစ်ခဲ့ကြလေသည်။ “လူတွေဟာ နာမည်ရချင်ကြတာကိုး။” “ဆာဂျီယိုဗလင်းတေ” ဂျင်းထုတ်လုပ်ရေးကုမ္ပဏီ၏ အကြီးအမှူးအီးလိုင်းကက်ပလင်းက ရှင်းလင်းတင်ပြ၏။ သို့သော် ဂျင်းအိတ်ထောင်ပေါ်အထင်းသားကြီးချုပ်ကပ်ထားသည့် ဤမစ္စတာပလင်းတေဆိုသူကား အဘယ်သူနည်း။ “ဤသူမတည်ရှိပါ”ဟု နယူးစဝစ်ကရေးသားဖော်ပြ၏။ ကက်ပလင်းကိုယ်တိုင်က ဤသို့ရှင်းလင်းတင်ပြ၏– “အီးလိုင်းကက်ပလင်းဆိုပြီးနာမည်ပေးရင် ဒီဂျင်းတွေကိုဘယ်သူဝယ်တော့မလဲ” ဟူသတတ်။
သို့သော်သင်က၊ ‘စတိုင်ကျကျဝတ်တာများ ဘာမတော်တာရှိလို့လဲ’ ဟူ၍မေးအံ့။ စတိုင်ကျကျဝတ်တိုင်း မှားသည်ဟူ၍ မဆိုနိုင်ပါ။ ဘုရားသခင့်ရှေးကျေးကျွန်များလည်း ဒေသအလိုက်ဝတ်စားဆင်ယင်ကြပေသည်။ ဥပမာ၊ သမ္မာကျမ်းစာက တာမာသည်ထိုခေတ်က “အပျိုကညာဖြစ်သော ရှင်ဘုရင်၏သမီးတော်ဝတ်တတ်သည့်အတိုင်း” စင်းကြောင်းပါသော ဝတ်ရုံကိုဝတ်ဆင်ကြောင်းဖော်ပြသည်။ —၂ ဓမ္မရာဇဝင် ၁၃:၁၈။
သို့သော် စတိုင်၏ကျွန်ဖြစ်သင့်သလော။ မိန်းကလေးတစ်ဦး ဤသို့ညည်း၍ပြော၏– “ဆိုင်ထဲမှာတွေ့လိုက်တဲ့ဘောင်းဘီ လှမှလှ။ လူတိုင်းဝတ်နေတဲ့ဘောင်းဘီ။ ‘မာမီ၊ အဲဒီဘောင်းဘီ ဝယ်ပေးပါ’ ပူဆာတော့၊ မာမီက ဘာပြောသလဲသိလား။ ‘အိမ်မှာချုပ် ပေးမယ်’ တဲ့ဟာ။ ‘ခက်လှချည်လား၊ မာမီ။ သမီးပြောတာကိုသဘောကို မပေါက်နိုင်ပါကလား။ သမီးဒါကိုပဲလိုချင်ပါတယ်ဆိုမှ။” တကယ်ပြောရလျှင်၊ ဖက်ရှင်ဒီဇိုင်နာတို့၏အပေါင်ခံဖြစ်ရသည့်အတွက်၊ ကိုယ့်သီးခြားပင်ကိုယ်စရိုက်အချွတ်ခံရပြီး ကိုယ့်ရုပ်စစ်သဏ္ဌာန်စစ်ပါ ပျောက်ပျက်ရချေမည်မဟုတ်လော။ စိတ်ဆွသည့်ကြော်ငြာ၊ စာတမ်းနှင့်ဒီဇိုင်နာအမည်များ ကြိုးဆွဲသလို အဘယ်ကြောင့်ကရသနည်း။
သမ္မာကျမ်းစာကရောမ၁၂:၂၌ကျွန်ုပ်တို့အားဤသို့ဆို၏– “သင်တို့သည်လောကီပုံသဏ္ဌာန်ကိုမဆောင်ကြနှင့်။ကောင်းမြတ်သောအရာ၊နှစ်သက်ဖွယ်သောအရာ၊စုံလင်သောအရာတည်းဟူသောဘုရားသခင်အလိုတော်ရှိသောအရာသည်အဘယ်အရာဖြစ်သည်ကိုသင်နိုင်မည်အကြောင်း၊စိတ်နှလုံးကိုအသစ်ပြင်ဆင်၍ပုံသဏ္ဌာန်ပြောင်းလဲခြင်းသို့ရောက်ကြလော့။” ဝတ်စားပုံနှင့်ပတ်သက်၍ ‘ဘုရားသခင်၏အလိုတော်’ သည်မည်သို့နည်း။
‘ဣန္ဒြေရ၍ ကောင်းစွာစီစဉ်ထားသော’
တိမောသေပထမစောင် ၂:၉ (ကဘ) ကခရစ်ယာန်များအား “ဣန္ဒြေ၊ သမ္မာသတိနှင့်တကွ၊ ကောင်းစွာစီစဉ်ထားသော အဝတ်ကိုဝတ်ဆင်လော့” ဟုတိုက်တွန်းထားသည်။ “ကောင်းစွာစီစဉ်ထားသောအဝတ်” သည်သပ်ရပ်သန့်ရှင်းပေမည်။ “ဣန္ဒြေ” ဆိုရာမှာပတ်ဝန်းကျင်ကို ထောက်သည့်သဘောပါ၏။ ကောင်းစွာချုပ်လုပ်ထားသောဝတ်စုံသည် အလုပ်ခွင်နှင့်လိုက်ဖက်သော်လည်း ပင်လယ်ကမ်းခြေ၌ရေကူးသောအခါ သင့်တော်မည်မဟုတ်! ပြောင်းပြန်မှာ၊ ရုံးကနားပြင်၌ ရေကူးဝတ်စုံဝတ်ဆင်လျှင် ပြောင်လှောင်စရာဖြစ်ချိမ့်မည်။
သို့ဖြစ်ရကား၊ ယေဟောဝါ၏လူငယ်သက်သေခံများအနေနှင့်၊ ခရစ်ယာန်စည်းဝေးတက်စဉ်၊ ဟောပြောခြင်းလုပ်ငန်းဆောင်ရွက်နေစဉ် မိမိတို့ဝတ်စားပုံ ပေါ့ပေါ့တန်တန်မဖြစ်လွန်းစေပဲ၊ မိမိတို့သည်ဘုရားသခင်၏ဓမ္မအမှုဆောင်များဖြစ်ကြောင်း သိသာထင်ရှားစွာဝတ်ဆင်ဖို့ ဂရုတစိုက်ပြုသင့်ပေသည်။ ၂ ကောရိန္သု ၆:၃၊ ၁၀ ပါပေါလုစကားများကို ပြန်လည်သတိရပါ– “တရားဟောခြင်းအခွင့်အရာကို အပြစ်တင်ခြင်းနှင့် ကင်းလွတ်စိမ့်သောငှာ၊ ထိမိ၍လဲစရာအကြောင်းတစ်စုံတစ်ခုကိုမျှမပြု။ ဘုရားသခင်ခန့်ထားသော [အမှုဆောင်၊ ကဘ] မှန်ကြောင်းကိုအရာရာ၌ထင်ရှားစွာပြကြ၏။”
ဣန္ဒြေဆိုရာ၌ သူတစ်ပါးခံစားချက်များကို ထောက်ညှာခြင်းလည်းမည်၏။ တမန်တော်ပေါလုဆိုသည့်အတိုင်း၊ ခရစ်ယာန်တစ်ဦးသည် မိမိသြတ္တပ္ပစိတ်ကိုသာမက၊ ‘အခြားသူ၏သြတ္တပ္ပစိတ်’ ကိုပါထည့်သွင်းစဉ်းစားပြီးမှ ပြုမူလုပ်ကိုင်သင့်သည်။ (၁ ကောရိန္သု ၁၀:၂၉) အထူးသဖြင့်မိဘများ၏ ဩတ္တပ္ပစိတ်ကိုထောက်စာသင့်သည်မဟုတ်လော။
လျောက်ပတ်စွာဝတ်ဆင်ခြင်း၏အကျိုးများ
ဧသတာ ၅:၁၊ ၂၊ ကဘ။
သမ္မာကျမ်းစာက မိဖုရားဧသတာသည် ကြင်ယာတော်ဘုရင်မင်းကြီးရှေ့တော်မှောက် အခစားဝင်ရန် အကြောင်းပေါ်ခဲ့သည်ဆို၏။ သို့ရာတွင်၊ ဘုရင်ကမခေါ်ဘဲ ကိုယ့်သဘောအလျောက်ဝင်လျှင် သေဒဏ်သင့်နိုင်သည်။ ဧသတာသည် ဘုရားသခင့်မစမှုအတွက် စိတ်ပြင်းပြထက်သန်စွာ ဆုတောင်းခဲ့မည်မှာမလွဲပါ။ သို့သော်၊ မိမိ၏ဆင်ယင်ပုံကိုလည်းဂရုစိုက်လျက်၊ အချိန်အခါနှင့်လိုက်ဖက်အောင် “မိဖုရားအဝတ်တန်ဆာကိုဝတ်ဆင်” လေသည်။“မိဖုရားဧသတာတန်တိုင်းတော်ထဲမှာ ရပ်နေသည်ကိုရှင်ဘုရင်မြင်လျှင်မြင်ချင်း၊ မိဖုရားသည်မျက်နှာသာတော်ရလေသည်။”—သင်သည်အလုပ်အင်တာဗျူးဝင်စဉ် နှစ်လိုစဖွယ်၊ ဣန္ဒြေရရဝတ်ဆင်ပါက တစ်ဖက်သားစိတ်ထဲ၌ အထင်အမြင်ကောင်းဖြစ်ပေါ်စေနိုင်သည်။ ဗဟိုလုပ်ငန်းဖန်တီးရေး ဒါရိုက်တာ၊ ဗစ်ကီအယ်လ်ဘောင်းက ဤသို့သုံးသပ်သည်– “တချို့အမျိုးသမီးများအင်တာဗျူးဖြေတဲ့အခါ အထင်အမြင်မှားတတ်ကြတယ်။ သမီးရည်းစားနှင့်ချိန်းတွေ့တဲ့ပုံစံမျိုးနဲ့၊ ညုသလို၊ မြှူသလိုဝတ်စားကြတယ်။” ရလဒ်ကားအဘယ်နည်း။ “အလုပ်ဆိုင်ရာအရည်အသွေးကျဆင်းသွားပါတယ်။” သူက “ကျပ်ကျပ်မဝတ်ဖို့၊ အဓိပ္ပာယ်ပါတဲ့ အဝတ်မဝတ်ဖို့” အကြံပြုလိုက်သည်။
ယောက်ျားပျိုများလည်း အလုပ်ရှာသည့်အခါ သပ်ရပ်ကောင်းမွန်စွာ ဝတ်စားသင့်ပေသည်။ ဂျွန်တီမော်လွိုင် က စီးပွားရေးသမားများသည် “သပ်ရပ်စွာဖြီးလိမ်း၍ ဖိနပ်များပြောင်အောင်တိုက်ပြီး ဝတ်ဆင်တတ်သည့်အတိုင်း အခြားသူများလည်း မိမိတို့နည်းတူဝတ်စားဖို့ မျှော်လင့်ထားကြသည်။”
ဣန္ဒြေမရသောဝတ်ဆင်ပုံကြောင့် အခြားသူများနှင့်မိတ်ပျက်သွားနိုင်၏။ ယနေ့ဆိုက်ကိုလိုဂျီ စာစောင်က အပျိုလူပျိုပေါက်များထံမှကောက်ယူခဲ့သည့် စစ်တမ်းတစ်ရပ်ကိုရည်ညွှန်းတင်ပြ၏။ အမျိုးသမီးများသည် “လည်ဟိုက်၊ စကပ်တို၊ ဘောင်းဘီတို၊ ဂျင်းကျပ်ကျပ်၊ ဘရာဇီယာမပါ” ဝတ်ဆင်လျှင်ယောက်ျားများက မြှူဆွယ်သည်ဟု အဓိပ္ပာယ်ကောက်ကြကြောင်းဖေါ်ပြ၏။ လူငယ်တစ်ယောက်က “မိန်းကလေးတွေ ဝတ်ဆင်ပုံကိုမြင်ရတဲ့အခါ၊ သူတို့နှင့်ပတ်သက်ပြီး စင်စင်ကြယ်ကြယ်တွေးတတ်ဖို့ဆိုတာအခက်သား” ဟုဝန်ခံခဲ့သည်။ ဣန္ဒြေရသောဝတ်စားပုံကြောင့် သူတစ်ပါးသည်သင့်ကိုယ်တွင်းအရည်အသွေးများကိုမြတ်နိုးကြမည်။ မည်သို့သောဝတ်စုံသည် ဣန္ဒြေရသည်နှင့်စပ်လျဉ်း၍မသေချာလျှင် မိဘများထံအကြံတောင်းပါ။
“အတွင်းလူ” ကိုတန်ဆာဆင်ခြင်း
တမန်တော်ပေတရုက အလှပြင်တန်ဆာဆင်ခြင်းနှင့်ပတ်သက်၍ ခရစ်ယာန်များအားဤသို့ဆို၏– “ဘုရားသခင့်ရှေ့ [အခြားလူတို့ရှေ့] မှာအဖိုးများစွာထိုက်သော နူးညံ့ငြိမ်သက်ခြင်းသဘောတည်းဟူသော မဖောက်ပြန်မပျက်စီးတတ်သော တန်ဆာဆင်ခြင်းရှိသော စိတ်နှလုံး၏အတွင်းလူဖြစ်စေကြလော့။” (၁ ပေတရု ၃:၄) ဖက်ရှင်ဆန်ဆန်ဝတ်ဆင်သည့်အတွက် ရွယ်တူများ၏အမွှမ်းတင်ခြင်းကို ခံရကောင်းခံရမည်မှန်သော်လည်း၊ အဝတ်အစားသည်တစ်ဖက်သား၏နှလုံးကို အရမယူနိုင်ပါ။ မိတ်စစ်ဆွေစစ်လည်းမဖွဲ့နိုင်။ “အတွင်းလူ”—သင့်ကိုယ်ထဲမှလူကို တန်ဆာဆင်မှသာဖြစ်မြောက်နိုင်သည်။ (၂ ကောရိန္သု ၄:၁၆) အတွင်းစိတ်လှသောသူသည် ခေတ်အမီဆုံးအဝတ်၊ သို့မဟုတ်၊ အဓိပ္ပာယ်မဲ့ဒီဇိုင်နာတံဆိပ်များဖြင့် “မှင်ကြောင်ထိုး” ထားသောအဝတ်အစားများ ဝတ်ဆင်မထားသည်တိုင်အောင်၊ အမြဲတမ်းလူချစ်လူခင် ပေါပေသည်။
မြီးကောင်ပေါက်များအဝတ်အထည်ဆိုင်များသို့ အုတ်အော်သောင်းတင်း အပြေးအလွှားသွားကြရန် နောက်ထပ်ဘာဖက်ရှင်မျိုးပေါ်လာဦးမည်ကို မည်သူမျှမသိချေ။ သင်မူကားကိုယ့်အတွက်ကိုယ်ဝေဖန်နိုင်သည်။ စံထားမြင့်သောအဝတ်အစားသာဝတ်ပါ။ ဖက်ရှင်ဆန်၍ လိင်ကိုအသားပေးသောဆင်ယင်ပုံနှင့် အဝတ်အစားမျိုးကိုရှောင်ပါ။ ခေတ်မဆန်လွန်းနှင့်။ အိုးစည်ဗုံမောင်းနှင့်နှင်လာသောဖက်ရှင်လှည်းပေါ်—အဦးဆုံးခုန်တက်သူမဖြစ်ပါနှင့်—နောက်ဆုံးသူလည်းဖြစ်ရန်မလိုပါ။ ခေတ်အကုန်မြန်သောအဝတ်အထည်များအစား၊ အဆင်အသွေးကောင်း၍ရေရှည်ခံသော အဝတ်အထည်များကိုရွေးဝယ်ပါ။ သင့်အဝတ်အစားသည် သင်နှင့်ပတ်သက်၍မှန်ကန်သောသတင်းလွင့်နိုင်ပါစေ။ (သတင်းစာ၊ ရေဒီယို၊ ရုပ်မြင်သံကြားစသည့်) လူထုဆက်သွယ်ရေးလမ်းကြောင်းနှင့် ရွယ်တူတို့သရုပ်ဖော်သော ရုပ်ပုံမျိုးမဟုတ်ဘဲ သင့်ရုပ်စစ်သဏ္ဌာန်စစ်ပေါ်လွင်နိုင်ပါစေ။
ဆွေးနွေးရန်မေးခွန်းများ
◻အဝတ်အစားသည် မည်သို့သတင်းထုတ်ပြန်သနည်း။
◻အချို့လူငယ်များသည် ဝတ်စားဆင်ယင်မှုရွေးချယ်ရာတွင် အဘယ်ကြောင့်ရုပ်ပျက်ဆင်းပျက်သည့် ဘက်သို့တိမ်းညွတ်တတ်ကြသနည်း။
◻သင်သည်ဝတ်စားပုံရွေးချယ်ရာ၌ ရွယ်တူသြဇာ မည်မျှအလွှမ်းခံရသနည်း။
◻စတိုင်နောက်ကောက်ကောက်ပါအောင်လိုက်လျှင် အဘယ်အကျိုးယုတ်စရာများရှိသနည်း။
◻‘ဣန္ဒြေရ၍ကောင်းစွာစီစဉ်ထားသော’ ပုံစံဟုတ်၊ မဟုတ် အဘယ်အရာက အဆုံးအဖြတ်ပေးသနည်း။
[စာမျက်နှာ ၉၄ ပါအကျဉ်းဖော်ပြချက်]
“ကိုယ့်အဝတ်အစားဟာ ကိုယ်ဘယ်လိုလူစားဖြစ်မှန်း၊ ကိုယ့်ကိုယ်ကိုဘယ်လိုထင်မြင်မှန်း ပေါ်လွင်စေတယ်”
[စာမျက်နှာ ၉၁ ပါရုပ်ပုံ]
မိဘများသည် သားသမီးများ၏ ဝတ်စားပုံနှင့်ပတ်သက်၍ အငြင်းပွားလေ့ရှိသည်။ မိဘများရှေးဆန်ခြင်းကြောင့်သာလော
[စာမျက်နှာ ၉၂ ပါရုပ်ပုံ]
လူငယ်တော်တော်များများ သရုပ်ပျက်ဝတ်ဆင်ခြင်းဖြင့် မိမိတို့၏သီးခြားပင်ကိုယ်စရိုက်ကို ဖိညှစ်ထုတ်ဖော်ကြသည်
[စာမျက်နှာ ၉၃ ပါရုပ်ပုံ]
အချိန်အခါနှင့်လျော်ညီစွာ ဝတ်ဆင်ပါ။ အဝတ်အစားသည် သင်နှင့်ပတ်သက်၍ သတင်းထုတ်ပြန်တတ်သည်