မူးယစ်ဆေးဝါးကို အဘယ်ကြောင့် ငြင်းပယ် သင့်သနည်း
အခန်း ၃၄
မူးယစ်ဆေးဝါးကို အဘယ်ကြောင့် ငြင်းပယ်သင့်သနည်း
“ကျွန်တော်ဟာ စိတ်ဗလောင်းဗလဲနိုင်တဲ့ သူငယ်တစ်ယောက်ပါ” ဟု မိုက်အမည်ရှိ ၂၄ နှစ်အရွယ် လုလင်ကဆိုပါသည်။ “တစ်ခါတလေ ကျွန်တော်ကြောက်တတ်တယ်။ ရွယ်တူချင်းတွေချောက်တာကိုတောင် ကြောက်တတ်တယ်။ ကျွန်တော်ဟာ စိတ်ကျပြီး မလုံမလဲဖြစ်တတ်ပါတယ်။ သေကြောင်းကြံဖူးတဲ့အခါတွေတောင်ရှိတယ်။”
၃၆ နှစ်အရွယ် အဲန်းက မိမိသည် “စိတ်လှုပ်ရှားမှုဘက်မှာ သိပ်ပြီးနုနယ်” ကြောင်း၊ “ကိုယ့်ကိုယ်ကို အထင်သေးတတ်” ကြောင်း ထုတ်ဖော်ပြောဆိုသည်။ “သာမန်ဘဝမျိုးနဲ့နေထိုင်ဖို့ အတော့်ကိုခက်ခဲတယ်” ဟူ၍လည်း ထပ်ဆင့်၍ဆိုရှာ၏။
မိုက်နှင့်အဲန်းတို့သည် ငယ်စဉ်က မိမိတို့ပြုခဲ့သည့်ဆုံးဖြတ်ချက်၏ အကျိုးရလဒ်ကိုရိတ်သိမ်းလျက်ရှိရှာသည်။ ထိုဆုံးဖြတ်ချက်ကား၊ မူးယစ်ဆေးဝါးမြည်းစမ်းရန်ပင်တည်း။ ယနေ့ သန်းပေါင်းများစွာသောလူငယ်များလည်း အလားတူပြုနေကြသည်—ကိုကင်းမှအစ ဆေးခြောက်အဆုံး၊ အပ်ဖြင့်ထိုးသွင်းလိုထိုးသွင်း၊ မျိုလိုမျို၊ ရှိုက်လိုရှိုက်၊ ရှူလိုရှူ။ အချို့သူငယ်များအဖို့ ‘ဖိုးရှူ’ ခြင်းသည် ပြဿနာရှောင်တိမ်းနည်းတစ်မျိုးဖြစ်သည်။ အချို့မှာ စပ်စုလို့။ အခြားသူတို့မူ စိတ်ကျမှု သို့မဟုတ် ငြီးငွေ့မှုကိုဖြေဖျောက်သည့်သဘော။ စမိပြီဆိုလျှင် အပျော်သဘောဖြင့်ဆက်လုပ်သူကများ၏။ ၁၇ နှစ်အရွယ် ဂရဲင့်က ဤသို့ဆို၏– “ကျွန်တော် [ဆေးခြောက်] ကိုသူ့အာနိသင်အတွက် ရှူခဲ့တယ်။ စိတ်ငြိမ်ဖို့အတွက်၊ လူမှုရေးအတွက် မဟုတ်ဘူး။ ... ဘယ်တော့မှ ရွယ်တူတွေကြောင့် ရှူတာမဟုတ်ဘူး။ ရှူချင်လို့ရှူတာ။”
မည်သို့ပင်ဖြစ်စေ၊ သင်သည် အနှေးနှင့်အမြန်၊ မူးယစ်ဆေးဝါးနှင့်ထိတွေ့ဖို့၊ လက်ကမ်းခံရဖို့အကြောင်းက များလှ၏။ “ကျွန်တော်တို့ကျောင်းရဲ့ကျောင်းစောင့်တောင်မှ ဆေးခြောက်ရောင်းနေတာ” ဟု လူငယ်တစ်ဦး ထိုသို့ဆို၏။ မူးယစ်ဆေးဝါးဆိုင်ရာတန်ဆာပလာတို့ကို ဗြောင်ဗြောင်တင်းတင်း ပြသရောင်းချကြပါသည်။ သို့ရာတွင် ထိုသို့လူကြိုက်များစေကာမူ၊ မူးယစ်ဆေးဝါးကို ငြင်းပယ်ဖို့ ခိုင်လုံသောအကြောင်းများရှိသည်။ အဘယ်ကြောင့်နည်း။
မူးယစ်ဆေးဝါး ကြီးထွားမှုကိုဟန့်တား
မိုက်နှင့် အဲန်းကဲ့သို့ ပြဿနာရှောင်တိမ်းလို၍ မူးယစ်ဆေးဝါးမှီဝဲကြသောလူငယ်များကို သုံးသပ်ကြည့်ပါ။ လွန်ခဲ့သည့်အခန်း၌ ဆိုသည့်အတိုင်း၊ စိတ်လှုပ်ရှားမှုဆိုင်ရာကြီးထွားခြင်းဟူသည် ဘဝစိန်ခေါ်ချက်များကိုရင်ဆိုင်ခြင်း၊ အောင်ပွဲနွှဲတတ်ခြင်း၊ အရှုံးကိုကြံ့ကြံ့ခံနိုင်ခြင်းတို့မှပေါက်ဖွား၏။ ပြဿနာကိုကြောက်၍ ဓာတုဗေဒအကာအကွယ်ကို အားထားသောလူငယ်များသည် မိမိတို့၏စိတ်လှုပ်ရှားမှုဆိုင်ရာကြီးထွားမှုကို ဟန့်တားရာကျသည်။ ပြဿနာများရင်ဆိုင်ဖြေရှင်းနိုင်သော ပညာဉာဏ်စွမ်း မဖွံ့ဖြိုးနိုင်ရှိနေ၏။
ရင်ဆိုင်ဖြေရှင်းနိုင်စွမ်းသည် အခြားကျွမ်းကျင်မှုများနည်းတူ လေ့ကျင့်မှ ရယူနိုင်သည်။ ဥပမာ– ကျွမ်းကျင်သောဘောလုံးသမားတစ်ယောက်၏ကစားပုံကို အကဲခတ်ဖူးသလော။ သူသည် အံ့ဖွယ်ကောင်းလောက်အောင် ခြေနှင့်ခေါင်းကို ကျင်လည်စွာအသုံးပြု၍ကစားနိုင်၏! ထိုကျွမ်းကျင်မှုကို သူမည်သို့ရယူပိုင်ဆိုင်နိုင်ခဲ့သနည်း။ အနှစ်နှစ် အလလ လေ့ကျင့်ခဲ့၍ဖြစ်သည်။ ဘောလုံးကန်ခြင်း၊ သယ်ဆောင်ခြင်း၊ ဘောလုံးဖြင့်ပရိယာယ်ဆင်ခြင်းစသည်တို့ကို ကျင်လည်သည်အထိ ကျင့်ရသည်။
ကိုင်တွယ်ဖြေရှင်းနိုင်စွမ်းသည်လည်း အလားတူပင်။ ကျင့်ရသည်—တွေ့ကြုံမှုလိုသည်! သို့ပါလျက်နှင့် နယပုံပြင် ၁:၂၂ (သမ) က ဤသို့ဆို၏– “မလိမ္မာ [အတွေ့အကြုံမဲ့၊ ကဘ] သူသည် မလိမ္မာ [အတွေ့အကြုံမဲ့] ခြင်းကိုနှစ်သက်လျက်၊ ... မိုက်မဲသူသည် အသိပညာကို မုန်းထားလျက် မည်မျှကြာနေကြမည်နည်း။” မူးယစ်ဆေးဝါးယစ်သည့်စည်းစိမ်နောက်ကွယ်တွင် ပုန်းလျက်နေသောလူငယ်သည် ‘အတွေ့အကြုံမဲ့ခြင်း’ ကိုနှစ်သက်၏။ ဘဝကိုရင်ဆိုင်ရန် လိုအပ်သော အသိပညာနှင့် ကျွမ်းကျင်မှုကို ရအောင်မမွေးမြူ။ ဆယ်ကျော်သက်တို့နှင့်စကားပြောခြင်း ဆိုသောစာအုပ်၌ မူးယစ်ဆေးဝါးသုံးသူလူငယ်များနှင့်စပ်လျဉ်း၍ ရေးသားသကဲ့သို့ဖြစ်သည်– “ထိုပစ္စည်းများကိုမသုံးဘဲ ဘဝ၏အခက်ခဲဆုံးသော သမယကိုကူးမြောက်နိုင်ပါသည်ဟူသော သင်ခန်းစာကိုသူတို့ဘယ်တော့မျှမရကြ။”
အဖြစ်မှန်ကိုရှောင်တိမ်းလို၍ မူးယစ်ဆေးဝါးသုံးခဲ့သောအဲန်းက ဤသို့ဝန်ခံသည်– “၁၄ နှစ်တိုင်တိုင် ကျွန်မပြဿနာကို ကျွန်မ မဖြေရှင်းဘဲနေခဲ့တယ်။” မိုက်လည်း အလားတူစွာပြော၏– “ကျွန်တော် ၁၁ နှစ်အရွယ်ကစ မူးယစ်ဆေးဝါး သုံးလာခဲ့တယ်။ ၂၂ နှစ်အရွယ်မှာ ဆေးဖြတ်လိုက်တဲ့အခါ ကလေးတစ်ယောက်လိုဖြစ်သွားတယ်။ လုံခြုံတဲ့ခံစားချက်ရဖို့ သူများကိုကပ်မြှောင်ပြီးနေတယ်။ မူးယစ်ဆေးဝါး သုံးတဲ့အချိန်ကစပြီး ကျွန်တော်ဟာစိတ်လှုပ်ရှားမှုဖက်မှာ ကြီးထွားခြင်းရပ်တံ့ခဲ့မှန်း နောက်တော့ သဘောပေါက်လာတယ်။”
၁၃ နှစ်အရွယ်ကစ မူးယစ်ဆေးဝါးသုံးစွဲခဲ့သူ ဖရန့်က ဤသို့ဆို၏၊ “ကြီးထွားဖွံ့ဖြိုးရမဲ့ အဲဒီအချိန်ပိုင်းတစ်ခုလုံးကို ကျွန်တော် ဖြုန်းတီးခဲ့တယ်။ ဆေးဖြတ်လိုက်တဲ့အခါ၊ ငါဟာ ဘဝကိုရင်ဆိုင်နိုင်ဖို့ အသင့်မရှိပါလား ဆိုတဲ့အသိတရားကြောင့် စိတ်နာမိတယ်။ ၁၃ နှစ်အရွယ်လိုပြန်ဖြစ်သွားတယ်။ တခြားကလေးတွေလိုပဲ စိတ်လှုပ်ရှားမှုပိုင်းမှာ ဝရုန်းသုန်းကားဖြစ်ခဲ့ရတယ်။”
မူးယစ်ဆေးဝါးဟာ ငါ့ကျန်းမာရေးကို ပျက်စီးစေနိုင်သလား
ဤလဲ စိတ်ပူစရာတစ်ကွက်။ အများခေါ် အပြင်းစားမူးယစ်ဆေးဝါးသည် လူကိုသေစေနိုင်ကြောင်း လူငယ်အများ နားလည်ကြသည်။ သို့သော် ဆေးခြောက်စသော အများခေါ်အပျော့စား မူးယစ်ဆေးဝါးကျတော့ကော။ ၎င်းတို့နှင့်ပတ်သက်သော သတိပေးချက်များအားလုံးမှာ စာခြောက်ရုပ်များသာလော။ အဖြေရှာရာ၌ ဆေးခြောက်ကို အဓိကသုံးသပ်ကြပါစို့။
(ပေါ့တ်၊ ရီဖာ၊ ဂရပ်စ်၊ ဂန်ဂျာ (ဝါ) ဝိဒ် ဟူ၍လည်းခေါ်သော) ဆေးခြောက်သည် ပါရဂူများ များစွာအငြင်းပွားစရာဖြစ်ခဲ့သည်။ ဝန်ခံရမည်ဆိုလျှင် ဟိုးဟိုးကျော်သည့် ၎င်းဆေးဝါးအကြောင်း လေ့လာရန်များစွာရှိသေး၏။ တစ်ချက်အနေနှင့်၊ ဆေးခြောက်သည် အလွန်ရှုပ်ထွေး၏။ ဆေးခြောက်စီးကရက်အငွေ့၌ ဓာတုပစ္စည်းဒြပ်ပေါင်း ၄၀၀ ကျော်ပါဝင်သည်။ ဆရာဝန်များသည် အနှစ် ၆၀ ကြာမှ စီးကရက်အငွေ့ ကင်ဆာဖြစ်စေနိုင်ကြောင်း သိမြင်ခဲ့သည်။ အလားတူ ဆေးခြောက်၏ ဒြပ်ပေါင်း ၄၀၀ သည်လူ့ခန္ဓာပေါ် မည်သို့အကျိုးသက်ရောက်ကြောင်း တပ်အပ်သိရန် ဆယ်စုနှစ်များစွာလိုအပ်ကောင်းလိုအပ်ပေမည်။
သို့သော်လည်း နာမည်ကြီး ယူအက်စ်ဆေးအဖွဲ့က သုတေသနပြုစာရွက်စာတမ်း အထောင်အသောင်းကို လေ့လာပြီးနောက် အောက်ပါအတိုင်းမှတ်ချက်ချခဲ့သည်– “နောက်ဆုံးဖြန့်ဝေသော သိပ္ပံအထောက်အထားက ဆေးခြောက်သည် စိတ်နှင့်ဇီဝအပေါ် ကျယ်ကျယ်ပြန့်ပြန့် ဩဇာသက်ရောက်ကြောင်း၊ အချို့ဩဇာသည် ယုတ်စွအဆုံး တစ်စုံတစ်ခုသောအခြေအနေအောက်၌ လူ့ကျန်းမာရေးကိုထိခိုက်စေနိုင်ကြောင်း ညွှန်ပြ၏။” အချို့သောဥပဒ်များကား အဘယ်နည်း။
ဆေးခြောက်—သင့်ခန္ဓာကို မည်သို့ထိခိုက်စေကြောင်း
ဥပမာအနေနှင့် အဆုတ်ကိုကြည့်ပါ။ ဆေးခြောက်၏ကျောရိုးရှေ့နေကြီးများကပင် အငွေ့ရှူခြင်းသည် အကောင်းမပြုနိုင်ဟု ဝန်ခံကြသည်။ ဆေးခြောက်ငွေ့သည် ဆေးလိပ်ငွေ့ကဲ့သို့ပင် ကတ္တရာစသော အဆိပ်ပစ္စည်းအမျိုးမျိုးပါရှိသည်။
ဒေါက်တာ ဖောရက်စ် အက်စ်. တဲန်နန့်၊ ဂျေအာရ်.၊ သည်ဆေးခြောက်သုံးစွဲခဲ့သော အမေရိကန်စစ်သား ၄၉၂ ဦးကိုလေ့လာသုံးသပ်ခဲ့သည်။ ၂၅ ရာခိုင်နှုန်းနီးပါးက “ကဲနဘစ်စ် ဆေးခြောက်ရှူရာမှ လည်ချောင်းနာခံစားရကြောင်း၊ ၆ ရာခိုင်နှုန်းက အဆုတ်လေပြွန်ရောင်ရမ်းနာခံစားရကြောင်း တင်ပြခဲ့ကြသည်။” နောက်လေ့လာမှုတစ်ရပ်က ဆေးခြောက်သုံးစွဲသူ ၃၀ အနက် ၂၄ ယောက်၌ အဆုတ်လေပြွန်တွင် “အဦးပိုင်းကင်ဆာနာကဲ့သို့သော အနာအဆာများ” တွေ့ရှိရသည်။
ထိုသူများသည် နောင်၌ကင်ဆာဖြစ်လာမည်ဟု မည်သူမျှတပ်အပ်မပြောနိုင်သည်မှာ မှန်သည်။ သို့သော် သင့်အနေနှင့် စွန့်စားလိုသလော။ ထို့ပြင်၊ သမ္မာကျမ်းစာက ဘုရားသခင်သည် “ခပ်သိမ်းသောသူတို့အား အသက်ကိုပေးတော်မူသည်” ဟုဆို၏။ (တမန်တော် ၁၇:၂၅) အဆုတ်နှင့်လည်ချောင်းကို ပျက်စီးစေနိုင်သည့်အရာကို တမင်ရှူရှိုက်လျှင် အသက်သခင်ကိုလေးစားရာရောက်မည်လော။
ဒေသနာ ၁၂:၆ ၌ လူ့ဦးနှောက်ကို လင်္ကာစကားဖြင့် “ရွှေဖလား” ဟုခေါ်ဆိုထားသည်။ ဦးနှောက်သည် လက်သီးဆုပ်သာသာလောက်သာရှိပြီး သုံးပေါင်သာလေးသော်လည်းမှတ်ဉာဏ်ရှိသမျှသိုမှီးရာဌာနဖြစ်ရုံမက အာရုံကြောချုပ်ထိန်းရာဗဟိုလည်းဖြစ်သည်။ ဤအချက်ကိုခေါင်းထဲထားကာ ဆေးသိပ္ပံ၏သတိပေးချက်ကို သတိပြုပါ– “ဆေးခြောက်သည် ဦးနှောက်အပေါ် ဓာတုဗေဒနှင့်လျှပ်စစ်ဇီဝကမ္မဆိုင်ရာ ပြောင်းလဲမှုများအပါအဝင် ပြင်းထန်သောသြဇာ သက်ရောက်နိုင်ကြောင်း ကျွန်ုပ်တို့ ပိုင်ပိုင်နိုင်နိုင်ပြောနိုင်သည်။” ဆေးခြောက်သည် ဦးနှောက်ကို ထာဝရပျက်စီးစေနိုင်သည်ဟူသော အထောက်အထား ယခုအချိန်၌မရှိပါ။ သို့တစေ၊ ဆေးခြောက်ကြောင့် “ရွှေဖလား” ပျက်စီးနိုင်သည်ဟူသောအချက်ကိုမူ ပေါ့ပေါ့မထားသင့်။
နောင်၌ အိမ်ထောင်သားမွေးလျှင်ကော မည်သို့ပြောမည်နည်း။ ဆေးသိပ္ပံက ဆေးခြောက်အဆများများကို “တိရစ္ဆာန်ကိုယ်တွင်းသို့သွင်း၍စမ်းသပ်သောအခါ သားမွေးရာတွင်ချွတ်ယွင်းချက်များကိုဖြစ်ပေါ်စေကြောင်း” သိရှိရသည်။ လူ့ခန္ဓာအပေါ်မှာလည်း အလားတူသြဇာသက်ရောက်နိုင်မနိုင် လောလောဆယ်သက်သေမပြနိုင်သေး။ သို့ရာတွင်၊ (ဟော်မုန်း ဒီအီးအက်စ် ကြောင့်ဖြစ်သော) သားမွေးရာတွင်ချွတ်ယွင်းချက်များသည် အနှစ်များစွာကြာညောင်းသည့်နောက်မှ သိသာပေါ်လွင်လာတတ်ကြောင်း မမေ့နှင့်။ ထို့ကြောင့် ဆေးခြောက်ရှူသူတို့၏သားမြေးများ၏အနာဂတ်ကို မသိနိုင်သေးပါ။ ဒေါက်တာ ဂါဗြေနဟာစ် ကဆေးခြောက်ရှူခြင်းသည် “မျိုးရိုးကိုလောင်းကစားခြင်း” ဖြစ်နိုင်သည်ဟုဆို၏။ သားသမီးများကို “ယေဟောဝါပေးသနားသော အမွေအနှစ်” အဖြစ်ယူမှတ်သော လူတစ်ယောက်အနေနှင့် ဤသို့စွန့်စားပါမည်လော။—ဆာလံ ၁၂၇:၃။
မူးယစ်ဆေးဝါး—သမ္မာကျမ်းစာအမြင်
ဆေးခြောက်သည် အများကြိုက် မူးယစ်ဆေးဝါးတစ်မျိုးသာဖြစ်သည်။ သို့သော် ၎င်းကိုထောက်ခြင်းအားဖြင့် မည်သည့်စိတ်ပြောင်းဆေးကိုမျှ အပျော်အတွက် မသုံးစွဲသင့်ကြောင်း သိသာထင်ရှားပေသည်။ သမ္မာကျမ်းစာက “လူပျိုတို့၏ဘုန်းကား အစွမ်းသတ္တိ” ဟုဆိုပါသည်။ (သု. ၂၀:၂၉) လူငယ်တစ်ဦးအနေနှင့် သင်၏ကျန်းမာရေးသည် ကောင်းမွန်ပေမည်။ ဘာကြောင့် စွန့်စားပြီး ၎င်းကိုအဆုံးခံချင်သနည်း။
ထို့ထက်အရေးကြီးသည်ကား၊ ဤကိစ္စနှင့်ပတ်သက်သော သမ္မာကျမ်းစာအမြင်ရှိသည်။ သမ္မာကျမ်းစာက ‘စဉ်းစားဉာဏ်သတ္တိကိုစောင့်ထိန်းပါ’ ဟုတိုက်တွန်း၏။ ဓာတုဗေဒပစ္စည်းကိုအလွဲသုံး၍ ၎င်းကိုဖျက်ဆီးဖို့မဟုတ်။ (သု. ၃:၂၁၊ ကဘ) ထပ်ဆင့်၍လည်း ဤသို့တိုက်တွန်း၏– “ကိုယ်ခန္ဓာ၏အညစ်အကြေး၊ စိတ်ဝိညာဉ်၏အညစ်အကြေးရှိသမျှတို့နှင့် ကိုယ်ကိုကိုယ်ကင်းစင်စေ” လော့။ မူးယစ်ဆေးဝါးသုံးစွဲခြင်းစသော အကျင့်များကိုရှောင်ရှား၍ ‘မိမိတို့ကိုယ်ကို အညစ်အကြေးနှင့်ကင်းစင်စေခဲ့’ သောသူများအားသာ ဘုရားသခင်က “‘သင့်တို့ကို ငါသည်လက်ခံမည်’။ ‘သင်တို့၏အဘဖြစ်မည်’” ဟုကတိပေးတော်မူ၏။—၂ ကောရိန္သု ၆:၁၇–၇:၁။
သို့သော်လည်း၊ မူးယစ်ဆေးဝါးကို ငြင်းဆန်ရန်မလွယ်ပါ။
ရွယ်တူများနှင့် သူတို့၏ဖိအား
အေးမြသောနွေညနေခင်းတစ်ခု၌ ဝမ်းကွဲညီအစ်ကိုလည်းဖြစ်၊ ရင်းနှီးသောသူငယ်ချင်းလည်းဖြစ်သော ဂျိုးနှင့်ဖရန့်တို့သည် သစ္စာဆိုကြ၏။ အငယ်ဖြစ်သူ ဂျိုးက “လူတွေဘာလုပ်လုပ်၊ တို့နှစ်ယောက် မူးယစ်ဆေးဝါးကို မသုံးစတမ်း” ဟုအကြံပြုလိုက်သည်။ နှစ်ယောက်စလုံး စိန်လိုက်ဟုဆိုခဲ့ကြသည်။ ငါးနှစ်သာကြာ၏။ ဂျိုးသည် မူးယစ်ဆေးဝါးကြောင့် ကားတိုက်မှုဖြင့် ကားထဲ၌ အသက်ပျောက်ခဲ့သည်။ ဖရန့်မှာလည်း မူးယစ်ဆေးဝါး ချိုးကပ်ခဲ့လေသည်။
ဘယ်လိုကြောင့်ပါလိမ့်။ အဖြေကို အောက်ပါသမ္မာကျမ်းစာ၏အရေးပေါ်သတိပေးချက်၌ တွေ့ရှိနိုင်သည်– “အလွဲမယူကြနှင့်။ မကောင်းသောသူတို့နှင့် ပေါင်းဖော်ခြင်းအားဖြင့် ကောင်းသောအကျင့်ဓလေ့ယိုယွင်းတတ်၏။” (၁ ကောရိန္သု ၁၅:၃၃) ဂျိုးနှင့်ဖရန့် နှစ်ယောက်စလုံး လူပေါင်းမှားခဲ့ကြသည်။ မူးယစ်ဆေးဝါးသုံးစွဲသူတို့နှင့် အပေါင်းများလာသည်နှင့်အမျှ ကိုယ်တိုင်လက်တည့်စမ်းလာကြသည်။
ကလေးနှင့်မြီးကောင်ပေါက်တို့၌ရှိသော ကိုယ့်ကိုယ်ကိုဖျက်ဆီးသည့်အကျင့် ဟူသည့်စာအုပ်က ဤသို့ဆို၏– “အများအားဖြင့် လူငယ်တို့သည် မူးယစ်ဆေးဝါးအမျိုးမျိုးသုံးစွဲရန် နီးစပ်သောသူငယ်ချင်းများ၏ ဆက်သွယ်ခြင်း၊ ‘မြူဆွယ်ခြင်း’ ကိုခံရကြသည်။ ... သူ့ဆန္ဒမှာ တက်ကြွပျော်မြူးစရာအဖြစ်ကို အတူခံစားစေလို၍ဖြစ်ချင်ဖြစ်မည်။” အဦးပိုင်း၌ဆိုခဲ့သောမိုက်က ဤအချက်ကိုထောက်ခံ၍ဤသို့ဆို၏– “ရွယ်တူများ၏ဖိနှိပ်တိုက်တွန်းမှုဟာ လွန်ဆန်ဖို့အခက်ဆုံးပဲ။ ... ပထမဆုံးအကြိမ် ကျွန်တော်ဆေးခြောက်ရှူတုန်းက ကောင်လေးတွေအားလုံးရှူလို့ ကျွန်တော်လဲရှူခဲ့တာ။ သူတို့ထဲလူဝင်ဆံ့ချင်လို့ပါ။”
တုံးတိတိဆိုရလျှင် သင့်သူငယ်ချင်းများက မူးယစ်ဆေးဝါးသုံးစွဲလျှင် သင်လည်းလူဝင်ဆံ့ဖို့အရေး လိုက်လုပ်ရမည့် စိတ်လှုပ်ရှားမှုပိုင်းဆိုင်ရာ ဖိနှိပ်မှုကို ပြင်းပြင်းထန်ထန်ခံစားရချေသည်။ သူငယ်ချင်းအသိုင်းအဝိုင်းကိုမပြောင်းလျှင် သင်ကိုယ်တိုင် မူးယစ်ဆေးဝါးသုံးစွဲသူတစ်ဦးဖြစ်လာဖို့အကြောင်း ရာနှုန်းပြည့်ရှိသည်။
“ပညာရှိတို့နှင့်ပေါင်းဖော်”
“ပညာရှိတို့နှင့်ပေါင်းဖော်သောသူသည် ပညာရှိတတ်၏။ လူမိုက်တို့နှင့်ပေါင်းဖော်သောသူမူကား ပျက်စီးတတ်၏” ဟု နယပုံပြင် ၁၃:၂၀ ကဆို၏။ ဥပမာ၊ သင်သည် အအေးမမိလိုလျှင် အအေးမိနေသောလူနှင့် နီးနီးကပ်ကပ်မနေဘဲ ရှောင်နေမည်မဟုတ်လော။ “ထို့နည်းထပ်တူ၊ ကျွန်ုပ်တို့လည်း မူးယစ်ဆေးဝါးသုံးစွဲခြင်းကို ... ကာကွယ်လိုလျှင် ... ကောင်းမွန်မျှတသောအခြေအနေကိုထိန်းသိမ်းပြီး ဘေးပြုသြဇာများနှင့်မထိတွေ့ရအောင် ရှောင်နိုင်သမျှ ရှောင်ကြဉ်ရမည်” ဟူ၍ မြီးကောင်ပေါက် ရွယ်တူဖိအား ဆိုသောစာအုပ်က ရေးသားတင်ပြ၏။
သို့ဖြစ်၍ သင်သည် မူးယစ်ဆေးဝါးကို ငြင်းလိုသလော။ ငြင်းလိုလျှင် အပေါင်းအသင်းကိုသတိပြုပါ။ မူးယစ်ဆေးဝါးရှောင်ရှားမည်ဟူသော သင့်သန္နိဋ္ဌာန်ကို ထောက်ခံမည့် ဘုရားကိုကြည်ညိုကြောက်ရွံ့သော ခရစ်ယာန်များကိုရှာ၍ ခင်မင်စွာပေါင်းသင်းပါ။ (၁ ဓမ္မရာဇဝင် ၂၃:၁၅၊ ၁၆ နှိုင်းယှဉ်။) ထွက်မြောက်ရာ ၂၃:၂ ပါစကားကိုလည်းမှတ်သားပါ။ မူလက၊ ကျမ်းကျိန်ထွက်ဆိုသော သက်သေများနှင့်စပ်လျဉ်း၍ ဆိုနေခြင်းဖြစ်သော်လည်း လူငယ်များအဖို့အကြံဉာဏ်ကောင်းတစ်လက် ဖြစ်ပေသည်။ “လူများနောက်သို့လိုက်၍ မတရားသဖြင့် မပြုရ။”
ရောမ ၆:၁၆ ၌သမ္မာကျမ်းစာက ဤသို့ဆို၏– “လူတစ်ယောက်၏အမိန့်ကို ကျွန်အဖြစ်နာခံရန် ကိုယ့်ကိုယ်ကိုပေးဆက်လျှင် မိမိသည်ထိုသူ၏ကျွန်ဖြစ်ကြောင်း သင်မသိသလော။” (နိုင်ငံတကာဘာသာပြန်သစ်) ဒါကြောင့်လည်း သမ္မာကျမ်းစာက လူငယ်တို့အား “စဉ်းစားဉာဏ်သတ္တိ” မွေးမြူရန် တိုက်တွန်းရခြင်းဖြစ်သည်။ (သု. ၂:၁၀-၁၂) ကိုယ်ပိုင်ဉာဏ်ဖြင့်စဉ်းစားတတ်ရန်သင်ယူပါ။ သို့ပြုလျှင် လမ်းလွဲလူငယ်များနောက်သို့ တကောက်ကောက်လိုက်တော့မည်မဟုတ်။
ရွယ်တူများအလိုသို့ ရှောရှောရှူရှူလိုက်ပါသူသည် ကျွန်နှင့်မခြား။မူးယစ်ဆေးဝါးနှင့် ၎င်းတို့၏အာနိသင်နှင့်ပတ်သက်၍ သင်၌စူးစမ်းလိုသောသဘောရှိပေမည်။ သို့ရာတွင် လူပေါ်သက်ရောက်သော မူးယစ်ဆေးဝါး၏သြဇာကိုသိဖို့အရေး၊ ကိုယ့်စိတ်နှင့်ကာယကို ညစ်ညူးအောင်လုပ်ရန်မလိုပါ။ မူးယစ်ဆေးဝါးသုံးစွဲသော သက်တူများ—အထူးသဖြင့် ကြာမြင့်စွာသုံးစွဲခဲ့သူများ၏ အဖြစ်သနစ်ကိုသာကြည့်ပါ။ သူတို့သည်နိုးကြားထက်မြက်သလော။ စာလိုက်နိုင်သလော။ သို့မဟုတ်၊ ထိုင်းမှိုင်း၍ စာကိုဂရုမစိုက်၊ တစ်ခါတစ်ရံ ပတ်ဝန်းကျင်ကိုပင် သတိမထားမိဘဲနေကြသလော။ မူးယစ်ဆေးဝါးသုံးစွဲသူများကိုယ်တိုင် ထိုသို့သောသူကို “လောင်စာကုန်” ဟုကင်ပွန်းတပ်ကြ၏။ “လောင်စာကုန်” တော်တော်များများသည် စပ်စုရာကစခဲ့ကြခြင်းဖြစ်သည်။ ဒါကြောင့်လည်း၊ သမ္မာကျမ်းစာက မကောင်းသောအရာများမြည်းစမ်းလိုသည့်ဉာဉ်ကိုချိုးနှိမ်၍ “မကောင်းမှုဘက်တွင် နို့စို့သူငယ်ဖြစ်ကြလော့” ဟူ၍ ခရစ်ယာန်များအားတိုက်တွန်းရခြင်းဖြစ်ပေ၏။—၁ ကောရိန္သု ၁၄:၂၀။
သင်ငြင်းပယ်နိုင်သည်!
မူးယစ်ဆေးဝါးအလွဲသုံးမှုနှင့်ပတ်သက်၍ အမေရိကန်ပြည် အမျိုးသားအဖွဲ့ ရေးသားထုတ်ဝေလိုက်သော စာအုပ်ငယ်က ဤသို့သတိရစေ၏– “မူးယစ်ဆေးဝါးသုံးခြင်းအခွင့်အခါကို ပယ်ချခြင်းမှာ ... သင့်လုပ်ပိုင်ခွင့်တစ်ရပ်ဖြစ်သည်။ အဘယ်သူငယ်ချင်းမဆို သင့်ကိုအကြပ်ကိုင်၍သြဇာသုံးလာလျှင် သင်၏လွတ်လပ်မှုကို ထိပါးစော်ကားခြင်းပင်ဖြစ်သည်။” တစ်ယောက်ယောက်က သင့်အားမူးယစ်ဆေးဝါးလက်ကမ်းလျှင် မည်သို့ပြုနိုင်သနည်း။ သတ္တိရှိရှိ ငြင်းပယ်ပါ! မူးယစ်ဆေးဝါးအလွဲသုံးမှု၏ဆိုးကျိုးအကြောင်းကို တရားဟောဖို့မဆိုလိုပါ။ ၎င်းစာအုပ်ငယ်က “ကျေးဇူးတင်ပါတယ်၊ ကျွန်တော် မရှူချင်ဘူး၊” “တော်ပါဗျာ၊ လာမနှောင့်ယှက်ပါနဲ့” ဆိုပြီးတဲ့တိုးပြောရန်၊ ထိုမျှမက “ခန္ဓာညစ်ညမ်းအောင်လုပ်ဖို့ ကျွန်တော်ဝါသနာမပါဘူး” ဆိုပြီး ခနဲ့လိုက်ရန်ပင် အကြံပေးသည်။ သူကအလျှော့မပေးလျှင် ကိုယ်ကခိုင်မာပြတ်သားစွာ ငြင်းဖို့လိုပါလိမ့်မည်! မိမိသည် ခရစ်ယာန်ဖြစ်ကြောင်း အသိပေးလျှင်လည်း အကာအကွယ်ရနိုင်သည်။
လူကြီးအဖြစ် ကြီးပြင်းလာဖို့မလွယ်ပါ။ သို့သော် ကြီးကောင်ငင်ချိန်၌ တွေ့ရသောအခက်အခဲများကိုခေါင်းရှောင်ချင်၍ မူးယစ်ဆေးဝါးသုံးလျှင် တာဝန်သိတတ်ပြီး ရင့်ကျက်သောလူကြီးတစ်ယောက်ဖြစ်လာဖို့ အလားအလာကိုပိတ်ဆို့ရာကျမည်။ ပြဿနာများကို ထိပ်တိုက်ရင်ဆိုင်ဖို့သင်ကြားပါ။ အခက်အခဲကြောင့် ခေါင်းပင်ကြီးလာသည်တိုင်အောင် ဓာတုဗေဒနည်းဖြင့် ထွက်ပေါက်မရှာပါနှင့်။ မိဘတစ်ဦး၊ သို့မဟုတ်၊ ဖြေရှင်းနိုင်စွမ်းရှိသော တာဝန်သိတတ်သူလူကြီးတစ်ဦးထံတင်ပြပါ။ ထို့ပြင် အောက်ပါသမ္မာကျမ်းစာသြဝါဒကိုလည်း စွဲမှတ်ပါ– “အဘယ်အမှုကိုမျှ စိုးရိမ်ခြင်းမရှိဘဲ၊ အရာရာ၌ကျေးဇူးတော်ကို ချီးမွမ်းခြင်းနှင့်တကွ ဆုတောင်းပတ္ထနာပြုသောအားဖြင့် သင်တို့တောင်းပန်လိုသောအရာများတို့ကို ဘုရားသခင်အား ကြားလျှောက်ကြလော့။ ထိုသို့ပြုလျှင် အဘယ်သူမျှ ကြံ၍မမီနိုင်သော ဘုရားသခင်၏ငြိမ်သက်ခြင်းသည် ယေရှုခရစ်အားဖြင့် သင်တို့၏စိတ်နှလုံးတို့ကိုစောင့်မလိမ့်မည်။”—မှန်ပေသည်၊ ယေဟောဝါဘုရားသခင်သည် သင့်အား ငြင်းပယ်ပြောနိုင်ရန် လိုအပ်သောခွန်အားကို ပေးတော်မူမည်! အခြားသူ၏တိုက်တွန်းဖိနှိပ်အကြပ်ကိုင်မှုကြောင့် သင့်သန္နိဋ္ဌ န် ပျော့မသွားစေနှင့်။ မိုက်တိုက်တွန်းသည့်အတိုင်း “မူးယစ်ဆေးဝါးကို လက်တည့်မစမ်းနဲ့။ တစ်သက်လုံး ဒုက္ခရောက်လိမ့်မယ်!”
ဆွေးနွေးရန်မေးခွန်းများ
◻လူငယ်များစွာ အဘယ်ကြောင့် မူးယစ်ဆေးဝါးနှင့် ကျော့မိကြသနည်း။
◻မူးယစ်ဆေးဝါးသုံးစွဲခြင်းသည် စိတ်လှုပ်ရှားမှုဘက် ကြီးထွားခြင်းကို မည်သို့ဟန့်တားနိုင်သနည်း။
◻ဆေးခြောက်ခန္ဓာအပေါ် အာနိသင်သက်ရောက်ပုံနှင့်ပတ်သက်၍ ဘာအကြောင်းသိရှိရပြီနည်း။
◻မူးယစ်ဆေးဝါးကိုအပျော်သုံးခြင်းနှင့်ပတ်သက်၍ သမ္မာကျမ်းစာ၏အမြင်မှာ မည်သို့နည်း။
◻အပေါင်းအသင်းကိုဂရုစိုက်ခြင်းသည် အဘယ်ကြောင့် မူးယစ်ဆေးဝါးနှင့်ကင်းရှင်းရေးအတွက် အလွန်အရေးပါသနည်း။
◻မူးယစ်ဆေးဝါးကိုငြင်းပယ်သည့်နည်းအချို့ကား အဘယ်နည်း။
[စာမျက်နှာ ၂၇၄ ပါအကျဉ်းဖော်ပြချက်]
“ကျွန်တော်တို့ကျောင်းရဲ့ကျောင်းစောင့်တောင်မှ ဆေးခြောက်ရောင်းနေတာ၊” လူငယ်တစ်ဦးအဆို
[စာမျက်နှာ ၂၇၉ ပါအကျဉ်းဖော်ပြချက်]
“မူးယစ်ဆေးဝါး သုံးတဲ့အချိန်ကစပြီး ကျွန်တော်ဟာ စိတ်လှုပ်ရှားမှုဘက်မှာ ကြီးထွားခြင်း ရပ်တံ့ခဲ့မှန်း နောက်တော့သဘောပေါက်လာတယ်။”—တစ်ချိန်ကမူးယစ်ဆေးဝါးသုံးစွဲခဲ့သည့်မိုက်
[စာမျက်နှာ ၂၆၄ ပါလေးထောင့်ကွက်]
ဆေးခြောက်—အံ့ဖွယ် ဆေးစွမ်းသစ်တစ်လက်လော
ဆေးခြောက်သည် မျက်တွင်းဖိအားလွန်ရောဂါနှင့် ပန်းနာရောဂါတို့ကို ကုသနိုင်သည့်ဆေးအာနိသင်ရှိသည့်အပြင် ဓာတုကုထုံးဖြင့်ကုသစဉ် ကင်ဆာဝေဒနာရှင် ခံစားရသောပျို့အန်ချင်သည့်ခံစားချက်ကိုပါ လျော့နည်းစေနိုင်သည် ဟူသောအဆိုနှင့်ပတ်သက်၍ လူတို့သည် ရေးကြီးခွင့်ကျယ်ပြုခဲ့ကြသည်မှာ အတန်ကြာလေပြီ။ ယူအက်စ်ဆေးအဖွဲ့၏တင်ပြချက်တစ်ချက်ကလည်း ထိုအဆိုများ မှန်သင့်သလောက်မှန်ကန်ကြောင်း သိမှတ်ပေသည်။ သို့ရာတွင် မကြာမီဆရာဝန်များက ဆေးခြောက်စီးကရက်များသောက်ရန် ဆေးညွှန်းပေးကြတော့မည်ဟု ဆိုလိုသလော။
ထိုသို့ပြုမည့်ပုံမရပါ။ အကြောင်းမှာဆေးခြောက်ပါဓာတုဒြပ်ပေါင်း ၄၀၀ ထဲမှ အချို့တို့သည် အသုံးဝင်သော်လည်း ဆေးခြောက်ရှူခြင်းဖြင့် ထိုဆေးဝါးများကိုသောက်သုံးပါက ဆင်ခြင်တုံတရားနှင့်ညီညွတ်မည်မထင်။ နာမည်ကျော်ကြားသော ပါရဂူ ဒေါက်တာ ကာလ်တန် တန်နာ က “ဆေးခြောက်ကို ဆေးဝါးအဖြစ် ဆေးညွှန်းပေးခြင်းဟာ ပင်နီဆီလင်ရဖို့အတွက် မှိုတက်နေတဲ့ပေါင်မုန့်ကို စားခိုင်းတာနဲ့မခြားပါဘူး” ဟု ပြောဆိုခဲ့သည်။ ထို့ကြောင့် ဆေးခြောက်၏ဒြပ်ပေါင်းတစ်မျိုးမျိုးက ဆေးဝါးစစ်စစ်ဖြစ်လာမည်ဆိုလျှင်ပင် ဆရာဝန်များအနေနှင့် ဆေးခြောက်မှပြုပြင်၍ရယူသော၊ “ဆင်တူယိုးမှားဖြစ်သော” ဓာတုပစ္စည်းများကိုသာ ဆေးညွှန်းပေးမည်ဖြစ်သည်။ ထို့ကြောင့်လည်း ယူအက်စ် ကျန်းမာရေးနှင့်လူ့အမှုဆောင် အတွင်းရေးမှူးက ဤသို့ရေးသားလိုက်ခြင်းဖြစ်သည်– “ဆေးခြောက်မှဆေးစွမ်းရနိုင်သည်တိုင်အောင် ဆေးခြောက်၏သိသာထင်ရှားသော ကျန်းမာရေးဥပဒ်များကို ဥပက္ခာမပြုနိုင် ဟူသောအချက်ကို အလေးအနက်ထားအပ်သည်။”
[စာမျက်နှာ ၂၇၅ ပါရုပ်ပုံ]
မူးယစ်ဆေးဝါးကို သတ္တိရှိရှိ ငြင်းပယ်ပါ!
[စာမျက်နှာ ၂၇၆ ပါရုပ်ပုံ]
မူးယစ်ဆေးဝါး သုံးပြီး ပြဿနာကို ခေါင်းရှောင်လျှင်...လူကြီးဖြစ်လာသောအခါ ပြဿနာရင်ဆိုင်ရန် အခက်တွေ့နိုင်မည်