အရက်သောက်ခြင်း—ဘာကြောင့်မလုပ်သင့်
အခန်း ၃၃
အရက်သောက်ခြင်း—ဘာကြောင့်မလုပ်သင့်
‘အရက်သောက်တာ မှားသလား။ တကယ်ပဲ ဥပဒ်ဖြစ်သလား။ ငါသောက်ရင်မှားမယ်၊ လူကြီးတွေသောက်ရင် မမှားဘူးဆိုတဲ့သဘောလား။’ ဤမေးခွန်းများကို သင်စူးစမ်းနေပါက မဆန်းပါ။ သင့်မိဘများကိုယ်တိုင် အရက်သောက်ချင်သောက်ကြမှာကိုး။ (အရွယ်ကန့်သတ်ချက်ရှိပါလျက်နှင့်) သင့်အရွယ် လူငယ်အမြောက်အမြား အရက်သောက်ကြ၏။ တီဗွီနှင့်ရုပ်ရှင်ဇာတ်လမ်းများက ၎င်းကိုမက်မောစရာလိုဖြစ်စေသည်။
အရက်ကို တန်ရုံသာသောက်သုံးပါက တကယ်ပင်လူကိုရွှင်လန်းစေနိုင်သည်။ ဝိုင်သည် နှလုံးရွှင်စေပြီး အစာမြိန်စေနိုင်သည်ဟု သမ္မာကျမ်းစာက ဝန်ခံပေသည်။ (ဒေသနာ ၉:၇) သို့ရာတွင်၊ အလွဲသုံးပါက၊ မိဘ၊ ဆရာ၊ ရဲတို့နှင့်အတိုက်အခံဖြစ်ခြင်းကအစ၊ အသေစောဖြင့်သေခြင်းအဆုံး၊ ကြီးလေးသောပြဿနာပေါင်းသောင်းခြောက်ထောင်နှင့် တွေ့တတ်သည်။ သမ္မာကျမ်းစာဆိုသည့်အတိုင်းဖြစ်ပေသည်– “စပျစ်ရည်သည် လှည့်စားတတ်၏။ သေရည်သေရက်သည်ရုန်းရင်းခတ်ပြုခြင်းအမှုကိုဖြစ်စေတတ်၏။ ထိုသို့သောအားဖြင့် မှားယွင်းသောသူသည်ပညာမရှိ။” (သု. ၂၀:၁) သို့ဖြစ်၍၊ အရက်သောက်ခြင်းကိစ္စတွင် သင့်အနေနှင့် တာဝန်သိသိ စိတ်ပိုင်းဖြတ်ဖို့အရေးကြီးလှ၏။
သို့သော်၊ အရက်နှင့် အရက်၏အာနိသင်အကြောင်း သင် မည်မျှသိသနည်း။ အောက်ပါအစမ်းမေးခွန်းများဖြင့် သိနိုင်ပါလိမ့်မည်။ မှားသလား၊ မှန်သလား ရေးဖြေပါ–
၁။ အရက်ယမကာများသည် အဓိကအားဖြင့် ဆွဆေးဖြစ်သည်․ ____
၂။ အရက်အနည်းအများမဆို လူ့ကိုယ်ခန္ဓာကိုဥပဒ်ပေးသည်․ ____
၃။ အရက်ယမကာမှန်သမျှ—အရက်၊ ဝိုင်၊ ဘီယာ—တို့သည် အမြန်နှုန်းတစ်မျိုးတည်းဖြင့် သွေးကြောအတွင်းသို့စိမ့်ဝင်ကြသည်․ ____
၄။ နို့မပါသည့်ကော်ဖီကိုသောက်လျှင်၊ ရေအေးဖြင့်ရေချိုးလျှင် အရက်မူးပြေမြန်၏․ ____
၅။ သောက်သည့်အတိုင်းအဆ တူလျှင်သောက်သူတိုင်း အာနိသင်တစ်မျိုးတည်း ခံစားရသည်․ ____
၆။ အရက်မူးခြင်းသည် အရက်စွဲခြင်းနှင့်အတူတူ․ ____
၇။ အရက်ကို ဗာဗီကျူရိတ်စသော စိတ်ငြိမ်ဆေးများနှင့်တစ်ချိန်တည်းသောက် သုံးလျှင် ၎င်းတို့အချင်းချင်း အာနိသင်တိုးပွားစေနိုင်သည်․ ____
၈။ အရက်အမျိုးမျိုးပြောင်းသောက်လျှင် မမူးစေပါ․ ____
၉။ ခန္ဓာသည် အရက်ကို အစာကဲ့သို့ချေဖျက်သည်․ ____
ဖြေပြီးပါက စာမျက်နှာ ၂၇၀ ၌ပေးထားသောအဖြေများနှင့်တိုက်ကြည့်ပါ။ အရက်နှင့်ပတ်သက်သော သင့်ယူဆချက်အချို့သည် မှားနေသလော။ မှားပါက၊ အရက်နှင့်ပတ်သက်၍ အမြင်မှားလျှင် သေဘေးဖြစ်စေနိုင်ကြောင်း မှတ်ပါလေ။ သမ္မာကျမ်းစာက အရက်ကိုအလွဲသုံးပါက “မြွေလိုကိုက်တတ်၏။ မြွေပွေးပမာ အဆိပ်ထုတ်တတ်၏” ဟုသတိပေးသည်။—သု. ၂၃:၃၂၊ ကဘ။
ဂျွန်သည် ဆယ်ကျော်သက်အရွယ်ကတည်းက အိမ်ထောင်ပြုလိုက်သည်။ တစ်ည၌ ငယ်ရွယ်သောမိမိ၏ဇနီးနှင့် စကားများ၍ ဒေါသူပုန်ထကာ အရက်ကိုမူးအောင် သောက်ပစ်လိုက်မည်ဟူသောအကြံဖြင့် အိမ်ပြင်သို့ ထွက်သွားလေသည်။ ဗော့ကာအရက် တစ်ပိုင့်လုံးကို မော့ချသည့်နောက် မေ့မြောသွားတော့သည်။ ဆရာဝန်နှင့် သူနာပြုတို့၏ ကြိုးပမ်းမှုကြောင့်မဟုတ်လျှင် အသက်ပျောက်ပြီ။ အရက်များများကို တစ်ချက်တည်း မော့ချလျှင် သေနိုင်ကြောင်း သူ့ခမျာ သိပုံမပေါက်။ မသိမှုကြောင့် သေလုနီးပါးဖြစ်ခဲ့လေသည်။
တန်ပြန်သတ္တိ
ဤကား အရက်၏မြုံနေသောတန်ခိုးပင်ဖြစ်သည်။ အရက်သည် ဆွဆေးမဟုတ်၊ နှိမ်ဆေးဖြစ်သည်။ အရက်သောက်ပြီးနောက်၌ စိတ်ကြွသလိုလိုခံစားရခြင်းမှာ အရက်သည် စိတ်ကိုနှိမ်၊ သောကစိတ်ကိုဖိထားသောကြောင့်ဖြစ်၏။ မသောက်ခင်ထက် စိုးရိမ်ကြောင့်ကျမှုကင်းပြီး သက်သောင့်သက်သာရှိစေသည်။ သို့ဖြစ်၍ အရက်ကိုသင့်ရုံသာသောက်သုံးလျှင် အတန်ငယ် ‘သောကမေ့’ စေနိုင်သည်။ (သု. ၃၁:၆၊ ၇) သာဓကအားဖြင့်၊ ပေါလ်ဆိုသောလူငယ်တစ်ဦးသည် အိမ်ထောင်ရေးသောကကို မေ့လျော့ဖို့ အရက်သောက်၏။ သူဤသို့ပြန်ပြောပြသည်၊ “အရက်သောက်ခြင်းဟာ လူကိုစိတ်ပြေလက်ပျောက်၊ သက်သောင့်သက်သာဖြစ်စေနိုင်တဲ့ နည်းတစ်နည်းဖြစ်တယ်ဆိုတာကို ကျွန်တော်ငယ်ငယ်ကတည်းက သိခဲ့ရတယ်။”
ဘာဥပဒ်မှ မဖြစ်ဘူး၊ မှန်သလား။ မှားတယ်! အရက်မှာ တန်ပြန်တဲ့သတ္တိရှိတယ်။ နာရီပိုင်းအကြာမှာ အရက်ရဲ့စိတ်နှိမ်သတ္တိ တစ်စစကုန်ခန်းသွားသည်နှင့်အမျှ သောကရေချိန်လည်းမြင့်တက်လာပြန်သည်—သို့သော် သာမန်အဆင့်အထိမဟုတ်။ မသောက်ခင်ထက် ပိုမြင့်သည့်အဆင့်သို့ခုန်တက်သွားသည်! လူသည်ယခင်ထက်ပင် ပို၍ပူပန်၍စိတ်လည်းတောင့်တင်းလာသည်။ အရက်ရှိန်သည် ၁၂ နာရီအထိပင်ခံ၏။ နောက်တစ်ကြိမ်သောက်ပြန်လျှင် သောကရေချိန်ပြန်ကျသွားမည်မှန်၏။ သို့သော် နာရီပိုင်းကြာသည့်နောက် ပြန်တက်လာမည်။ ယခင်ထက်ပင်ပို၍မြင့်မားမည်! မြင့်ချီနိမ့်ချီနှင့် ဆိုးသည်ထက်ဆိုးလာသော သံသရာဖြစ်လာတော့သည်။
ထို့ကြောင့် ရေရှည်တွက်လျှင်၊ အရက်သည် သောကရေချိန်ကိုမကျစေပါ။ မြှင့်တင်ဖို့အကြောင်းကသာများ၏။ အရက်တန်ခိုးငြိမ်းသောအခါ ပြဿနာများလည်း အတိုင်းသား။
စိတ်လှုပ်ရှားမှုဘက် မကြီးထွား
အချို့ကအရက်ကြောင့် မိမိတို့လူစွမ်းလူစ ရှိလာသည်ဟုဆို၏။ ဥပမာ၊ ဒင်းနစ်စ်သည် အရှက်ကြီးမှကြီးပေ့။ သူများနှင့်စကားရိုးရိုးလေးပင်မပြောနိုင်ရှာ။ နောက်သော်၊ ဆေးစွမ်းကောင်းတစ်လက် တွေ့လေသည်။ သူက “တစ်ခွက်နှစ်ခွက်လောက်သောက်ပြီးတဲ့နောက် ကျွန်တော်တည်ငြိမ်လာပါတယ်” ဟူ၍ဆို၏။
ခက်သည်ကား၊ လူဟူသည် ဒင်းနစ်စ်လို ပြဿနာကိုတိမ်းရှောင်ခြင်းအားဖြင့် ရင့်ကျက်မလာနိုင်။ ပြဿနာကို ပြေးတွေ့မှ။ ငယ်စဉ်အခါ ပြဿနာကိုရင်ဆိုင်ခြင်းသည် လူကြီးဘဝအတွက်ဇာတ်တိုက်သည်နှင့်မခြား။ သို့ဖြစ်၍ အရက်သည်ရေရှည်အားဖြင့် မိမိ၏အရှက်ကိုမဖြေဖျောက်နိုင်ကြောင်း ဒင်းနစ်စ်တစ်ယောက် တွေ့ရှိလေသည်။ သူဤသို့ဆို၏၊ “အရက်ရှိန်လည်းပြေရော၊ ကျွန်တော်လည်း ကိုယ့်ခရုခွံထဲ ပြန်လျှိုတော့တာပဲ။” နှစ်များစွာလွန်ခဲ့လေပြီ။ ယခုမည်သို့နည်း။ ဒင်းနစ်စ် ဆက်၍ဆိုပါသည်– “ကျွန်တော်ဟာ ကိုယ့်ပင်ကိုယ်သတ္တိကိုအရင်းခံပြီး လူတွေနဲ့မပြောဆို မဆက်သွယ်တတ်သေးပါဘူး။ ကျွန်တော်ဟာဒီနေရာမှာ မကြီးထွားဘူးလို့ဆိုရမယ်ထင်တယ်။”
စိတ်ညစ်သည့်အခါ အရက်ကိုချိုင်းထောက်လိုသုံးခြင်းလည်း ထို့အတူပင်။ ငယ်စဉ်က အရက်ကို ချိုင်းထောက်လိုသုံးခဲ့သောဂျိုအင်းက ဤသို့ဝန်ခံသည်– “မကြာခင်က ကျွန်မစိတ်ညစ်လို့ ‘ခုအချိန်များ တစ်ခွက်လောက်မော့လိုက်ရရင် အကောင်းသား’ ဆိုပြီးတွေးမိတယ်။ အရက်ရှိရင် အခြေအနေကို ပိုင်ပိုင်နိုင်နိုင် ရင်ဆိုင်နိုင်တယ်လို့ပဲထင်တာပဲ။” မဟုတ်ပါလေ!
ဆေးဆိုင်ရာ နယူးယောက်ပြည်နယ်ဂျာနယ်ပါဆောင်းပါးတစ်ပုဒ်က ဤသို့ဆို၏– “ကျောင်း၊ လူမှုရေး၊ လူလူချင်းဆက်ဆံရေးဆိုင်ရာအခက်အခဲကို ဖြေရှင်းသည့်နည်းအဖြစ် [အရက်အပါအဝင်] မူးယစ်ဆေးဝါးကို အသုံးပြုလာသောအခါ ကျန်းခံ့သောဖြေရှင်းနည်းပညာကို သင်ကြားမှုအားဘေးဖယ်လိုက်သည်။ သို့ပြုခြင်း၏ဆိုးကျိုးကို ချက်ချင်းလက်ငင်း မခံစားရသေးသော်လည်း လူကြီးဘဝသို့ရောက်၍ လူမှုဆက်ဆံရေးအခက်အခဲနှင့် ရင်ဆိုင်ရသောအခါကျမှ မိမိသည်စိတ်လှုပ်ရှားမှုဘက်တွင် အထီးကျန်ဖြစ်နေသည်ကိုတွေ့ရလိမ့်မည်။” ပြဿနာနှင့် အခက်အခဲများကို ပြေးတွေ့ရင်ဆိုင်ဖြေရှင်းခြင်းကသာ ပို၍ကောင်းသည်တကား!
“ကိုယ်တော်သည် သောက်တော်မမူ”
ယေရှုခရစ်၏စံနမူနာတော်ကို ကြည့်ပါ။ မိမိ၏မြေကြီးအသက်တာနောက်ဆုံးည၌ အလွန်ပြင်းပြသောဆင်းရဲဝေဒနာကို ခံရတော်မူ၏။ သစ္စာဖောက်ခြင်း၊ ဖမ်းဆီးခြင်းခံသည့်နောက်၌ အကြိမ်ကြိမ်စစ်ကြောခံခဲ့ရသည်။ လုပ်ကြံစွပ်စွဲခံရ၏။ တစ်ညလုံး မအိပ်ရ။ နောက်ဆုံး၌ နှက်တိုင်ပေါ် သတ်ရန် အပ်နှံခြင်းခံရလေသည်။—မာကု ၁၄:၄၃–၁၅:၁၅;လုကာ ၂၂:၄၇–၂၃:၂၅။
ထို့နောက် ကိုယ်တော်အား အာရုံထိုင်းမှိုင်း၍ စိတ်ပြောင်းလဲစေနိုင်သော ဆေးတစ်မျိုးကိုပေးကြ၏။ အခံရလွယ်စေဖို့ဖြစ်၏။ သမ္မာကျမ်းစာက ဤသို့ရှင်းလင်းဖော်ပြသည်! “သူတို့သည် မုရန်နှင့်ရောစပ်သော စပျစ်ရည်ကို ကိုယ်တော်အား တိုက်ကြ၏။ သို့ရာတွင် ကိုယ်တော်သည် သောက်တော်မမူ။” (မာကု ၁၅:၂၂၊ ၂၃၊ သက) ကိုယ်တော်သည်မိမိ၏အာရုံရှိသမျှ ထက်ထက်မြက်မြက် ရှိစေလိုသည်။ အခက်အခဲကို တန်းတန်းမတ်မတ် ရင်ဆိုင်လိုတော်မူ၏။ ကိုယ်တော်သည် သူရဲဘောနည်းသူတစ်ယောက်မဟုတ်! သို့သော် နောက်ပိုင်း၌ပြင်းလည်းမပြင်း ဆေးလည်းမပါသော စပျစ်ရည်ကိုပေးကြသောအခါ လက်ခံတော်မူသည်။—ယောဟန် ၁၉:၂၈-၃၀။
ကိုယ်တော်နှင့်ယှဉ်လျှင်၊ သင်၏ပြဿနာ၊ ဘေးကျပ်နံကျပ်အဖြစ် သို့မဟုတ် ဆင်းရဲခြင်းသည် မပြောပလောက်။ သို့သော် ကိုယ်တော့်တွေ့ကြုံမှုမှ အဖိုးတန်သင်ခန်းစာရနိုင်သည်။ (အရက်စသော) စိတ်ပြောင်းဆေးတစ်မျိုးမျိုးကိုသုံး၍ ပြဿနာ၊ ဘေးကျပ်နံကျပ်အဖြစ်နှင့် အခံရမသက်သာသောအခြေအနေများကို ဖြေရှင်းမည့်အစား၊ တိုက်ရိုက်ရင်ဆိုင်ခြင်းက သာ၍ကောင်း၏။ ဘဝပြဿနာကိုရင်ဆိုင်ဖြေရှင်းရာ၌ အတွေ့အကြုံများလေလေ ဖြေရှင်းတတ်လေလေ။ စိတ်လှုပ်ရှားမှုဘက်တွင် ကြံ့ခိုင်သော လူကြီးဘဝသို့ တက်လှမ်းနိုင်ပေလိမ့်မည်။
အရွယ်ရောက်သောအခါ၊ ရံဖန်ရံခါ အရက်အသင့်အတင့် သောက်မည်မသောက်မည်ကို သင်ကိုယ်တိုင် (နှင့်သင့်မိဘများက) ဆုံးဖြတ်ပါလိမ့်မည်။ အသိဉာဏ်ရှိသူပီပီ ဆုံးဖြတ်ပါ။ မသောက်ရန်ဆုံးဖြတ်ပါက မည်သူ့ကိုမျှ တောင်းပန်စရာမလို။ သို့သော် အရွယ်ရောက်၍ သောက်ရန်ဆုံးဖြတ်ပါက တာဝန်သိသိ သောက်ပါ။ တိမ်းရှောင်လို၍ဖြစ်စေ၊ ရဲဆေးအနေနှင့်ဖြစ်စေ ဘယ်တော့မျှမသောက်နှင့်။ သမ္မာကျမ်းစာ၏သြဝါဒမှာ ရိုးရိုးကလေးနှင့် တဲ့တိုးဖြစ်သည်။ “သောက်ကြူးလျှင် ဆူညံဆူညံနှင့် အရူးလုပ်တတ်သည်။ အရက်မူးလျှင် လူမိုက်။”—သု. ၂၀:၁၊ ယနေ့အင်္ဂလိပ်ဘာသာပြန်။
ဆွေးနွေးရန်မေးခွန်းများ
◻အဘယ်ကြောင့် လူငယ်များစွာ အရက်သောက်ကြသနည်း။
◻အရက်နှင့်ပတ်သက်၍ အဘယ်အယူအဆမှားများရှိတတ်ကြသနည်း။
◻မူး၍မောင်းလျှင် အဘယ်အန္တရာယ်များရှိသနည်း။
◻တိမ်းရှောင်လို၍ သောက်ခြင်းသည် အဘယ်အန္တရာယ်များရှိသနည်း။
◻လူငယ်တစ်ဦး ပြဿနာရင်ဆိုင်ရစဉ် မည်သို့ပြုသင့်သနည်း။ အဘယ်ကြောင့်နည်း။
[စာမျက်နှာ ၂၆၈ ပါအကျဉ်းဖော်ပြချက်]
အရက်သောက်ခြင်းသည် လူငယ်တစ်ဦးအား မြင့်ချီနိမ့်ချီနှင့် ဆိုးသည်ထက်ဆိုးလာသော သံသရာစက်ကွင်းထဲ၌ ချုပ်နှောင်ထားနိုင်သည်
[စာမျက်နှာ ၂၇၁ ပါအကျဉ်းဖော်ပြချက်]
“ကျွန်တော်ဟာ ကိုယ့်ပင်ကိုယ်သတ္တိကိုအရင်းခံပြီး လူတွေနဲ့မပြောဆို မဆက်သွယ်တတ်သေးပါဘူး။ ကျွန်တော်ဟာဒီနေရာမှာ မကြီးထွားဘူးလို့ဆိုရမယ်ထင်တယ်။”—ငယ်စဉ်အခါ အရက်အလွဲသုံးခဲ့သူ လူငယ်တစ်ဦး
[စာမျက်နှာ ၂၆၄ ပါလေးထောင့်ကွက်]
‘ကျွန်တော်တို့ ဘာကြောင့် အရက်စသောက်ခဲ့တဲ့အကြောင်း’
ငယ်စဉ်အခါ အရက်သောက်ခဲ့ကြသူများနှင့် တွေ့ဆုံမေးမြန်းခြင်း
မေးမြန်းသူ– ခင်ဗျား ဘာကြောင့် အရက်သောက်ခဲ့သလဲ။
ဘီလ်– ကျွန်တော့်အနေနဲ့ကတော့၊ အစပိုင်းမှာ ကျွန်တော့်အုပ်စုကြောင့်ဆိုရပါလိမ့်မယ်။ အဲဒီတုန်းက အရက်သောက်တာ အတော်ခေတ်စားတယ်။ အထူးသဖြင့် စနေတနင်္ဂနွေနေ့တွေမှာပေါ့။
ဒင်းနစ်စ်– ကျွန်တော် ၁၄ နှစ်အရွယ်လောက်မှာ စပြီးအရက်သောက်တယ်။ ကျွန်တော်ဖေဖေဟာ တော်တော့်များများသောက်တဲ့လူတစ်ယောက်။ အိမ်မှာလဲ အရက်စွယ်စုံပါတီ မပြတ်ဘူး။ ကလေးတစ်ယောက်အနေနဲ့ ကျွန်တော်ဟာ အရက်သောက်တာကို လူမှုရေးလို့ မှတ်ခဲ့တယ်။ ကျွန်တော်ကြီးလာတဲ့နောက် အောက်ခြေလွတ်အုပ်စုတစ်စုနဲ့ပေါင်းခဲ့တယ်။ တခြားကောင်လေးတွေအကြိုက်ကိုလိုက်ပြီး သောက်ခဲ့တယ်။
မာ့ခ်– ကျွန်တော် အားကစားလိုက်စားခဲ့တယ်။ အသက် ၁၅ နှစ်အရွယ်လောက်မှာ ဘတ်စကက်ဘောအသင်းနဲ့အတူ စပြီးသောက်ခဲ့တယ်ထင်တာပဲ။ အဓိကအကြောင်းကတော့ မြည်းစမ်းချင်လို့ပါပဲ။
ဂျိုအင်း– ကျွန်မဟာ တီဗွီထဲမြင်ရတဲ့ဟာတွေကြောင့်လို့ဆိုရမယ်။ ဇာတ်ဆောင်တွေ သောက်ကြတာကိုမြင်တော့ အဟုတ်ကြီးမှတ်တာပေါ့။
ပေါလ်– ကျွန်တော့်ဖေဖေဟာ အရက်သမားတစ်ယောက်။ အရက်စွဲမှုကြောင့် ကျွန်တော်တို့မှာ ပြဿနာဒီလောက်များတာ ခုကျွန်တော်သဘောပေါက်ပြီ။ ကျွန်တော်က ဒီပြဿနာတွေကို တိမ်းရှောင်ချင်တယ်။ အဲဒါကြောင့်လဲ ကျွန်တော်အရက်သောက်လာတယ်။ ဆန်းတယ်ဆိုရမပေါ့။
ဂျိုအင်း– ကျွန်မမိဘတွေ များများစားစား သောက်လေ့မရှိဘူး။ ဒါပေမဲ့ ဖေဖေနဲ့ပတ်သက်ပြီး တစ်ခုမှတ်မိတယ်။ လူတွေနဲ့စားသောက်တဲ့အခါမှာ ကျွန်မဖေဖေက သူဘယ်လောက်သောက်နိုင်တယ်ဆိုတာကို ကြွားတတ်တယ်။ ကျွန်မလဲအဲဒီသဘောမျိုးဝင်လာခဲ့တယ်။ အများနဲ့မတူ၊ တမူထူးတယ်လို့ကိုယ့်ကိုယ်ကို ထင်မှတ်တယ်။ တစ်နေ့မှာ၊ ကျွန်မနဲ့သူငယ်ချင်းတစ်စု သောက်ပွဲနွှဲကြတယ်လေ။ နာရီပေါင်းတော်တော်များများသောက်ကြတယ်။ တခြားလူတွေမူးကုန်ကြပေမဲ့ ကျွန်မမဖြုန်ဘဲနေတယ်။ တကယ်ပါပဲ။ ‘ငါတော့ ဖေဖေ့အတိုင်းပဲဟေ့’ ဆိုပြီးတော့တောင်တွေးခဲ့မိသေး။ အရက်နဲ့ပတ်သက်တဲ့ ဒီဉာဉ်မျိုးကြောင့် ကျွန်မသောက်ခဲ့တာဖြစ်မှာပဲ။
မေးမြန်းသူ– ဘာကြောင့် လူတော်တော်များများဟာ မူးအောင်သောက်ကြတာလဲ။
မာ့ခ်– မူးချင်လို့သောက်ကြတာပဲ။ အရသာကိုကြိုက်လို့မဟုတ်ဘူး။
မေးမြန်းသူ– ခင်ဗျားဟာ အရက်ရဲ့အာနိသင်အတွက်သောက်တယ်ပေါ့။
မာ့ခ်– ဟုတ်ပါတယ်။
ဟယ်ရီ– ကျွန်တော်လဲ အဲဒီလိုပဲပြောရမယ်။ လှေခါးတက်သလိုပါပဲ။ သောက်တိုင်း လှေခါးထစ် နောက်တစ်ထစ် တက်ချင်လို့ပါပဲ။
[စာမျက်နှာ ၂၇၀ ပါလေးထောင့်ကွက်]
အမှားအမှန် အစမ်းမေးခွန်းများအတွက် အဖြေ (စာမျက်နှာ ၂၆၃)
၁။ မှားသည်။ အရက်သည် အဓိကအားဖြင့် နှိမ်ဆေးဖြစ်သည်။ အရက်သောက်ပြီးနောက်၌ စိတ်ကြွသလိုလိုခံစားရခြင်းမှာ အရက်သည် စိတ်ကိုနှိမ်၊ သောကစိတ်ကိုဖိထားသောကြောင့်ဖြစ်၏။ မသောက်ခင်ထက် စိုးရိမ်ကြောင့်ကျမှုကင်းပြီး သက်သောင့်သက်သာရှိစေသည်။
၂။ မှားသည်။ အရက်အသင့်အတင့် သို့မဟုတ် အနည်းငယ်သောက်ရုံနှင့် ကိုယ်ခန္ဓာကို မည်သို့မျှ ကြီးကြီးကျယ်ကျယ်ထိခိုက်စေပုံမရပါ။ သို့သော် ရေရှည်သောက်ကြူးလျှင် နှလုံး၊ ဦးနှောက်၊ အသည်းနှင့် အခြားအင်္ဂါများကို ပျက်စီးစေနိုင်သည်။
၃။ မှားသည်။ အရက်သည် အများအားဖြင့် ဝိုင် သို့မဟုတ် ဘီယာတို့ထက် ပို၍လျင်မြန်စွာ သွေးကြောထဲသို့ စိမ့်ဝင်သည်။
၄။ မှားသည်။ ကော်ဖီသည် လူကိုနိုးနိုးကြားကြားရှိစေနိုင်ပြီး ရေအေးချိုးလျှင် ကိုယ်စိုမည်ဖြစ်သော်လည်း အရက်သည် အသည်း၏လုပ်ဆောင်မှုဖြင့် တစ်နာရီလျှင် အောင်စဝက်နှုန်းဖြင့် ဓာတ်မပြောင်းမချင်း သွေးကြောထဲ၌ အောင်းလျက်နေမည်သာ။
၅။ မှားသည်။ ခန္ဓာအလေးအပေါ့၊ အစာစားထား မစားထား စသည့်အကြောင်းများစွာပေါ်မူတည်၍ လူပေါ်အာနိသင်သက်ရောက်စေသည်။
၆။ မှားသည်။ အရက်မူးခြင်းသည် သောက်ကြူးသည့်ရလဒ်ကိုရည်ညွှန်းပြီး အရက်စွဲခြင်းမှာ ချုပ်တည်းမှုကင်းမဲ့စွာ သောက်တတ်သော လက္ခဏာရှိသည်။ သို့ရာတွင် မူးသူတိုင်းစွဲသူမဟုတ်။ စွဲသူတိုင်းလည်း မူးသည်မဟုတ်။
၇။ မှန်သည်။ အချို့မူးယစ်ဆေးဝါးများသည် အရက်နှင့်တွဲ၍သုံးစွဲသောအခါ သူ့ပင်ကိုယ်အာနိသင် သို့မဟုတ် အရက်တစ်မယ်တည်း၏အာနိသင်ထက် အဆများစွာ ထက်မြက်လာသည်။ ဥပမာ၊ စိတ်ငြိမ်ဆေးတစ်မျိုးမျိုးနှင့် အရက်ကိုတွဲဖက်၍သုံးစွဲသောအခါ ဆေးပြတ်ခြင်းဝေဒနာလက္ခဏာများ၊ မေ့မြောခြင်းမက သေခြင်းပင်ဖြစ်စေနိုင်သည်။ ထို့ကြောင့် အရက်တစ်ကြိမ်နှင့်ဆေးလုံးတစ်လုံး တွဲသောက်ပါက ထင်သည်ထက် များစွာသာ၍ ဆေးတန်ခိုးထက်မြက်လှသည်။ ဆေးတန်ခိုးသည် သုံးဆ၊ လေးဆ၊ ဆယ်ဆမက ဖြစ်လာနိုင်သည်!
၈။ မှားသည်။ ဂျင်ဖြစ်စေ၊ ဝီစကီဖြစ်စေ၊ ဗော့ကာ သို့မဟုတ် အခြားအရက်မျိုးပဲဖြစ်စေ၊ သောက်သည့်ပမာဏပေါ်မူတည်၍ မူးသည်။
၉။ မှားသည်။ အရက်သည် အခြားအစာအများကဲ့သို့ ဖြည်းဖြည်းချင်း ချေဖျက်ရန်မလို။ ၂၀ ရာခိုင်နှုန်းသည် အစာအိမ်နံရံကိုဖောက်၍ သွေးကြောတွင်းသို့ ချက်ချင်းပင် ဝင်ရောက်သွားနိုင်သည်။ ကျန်အရက်သည် အစာအိမ်မှ အူသိမ်တွင်းသို့၊ ထိုမှတစ်ဆင့် သွေးကြောထဲသို့စိမ့်ဝင်သွားသည်။
[စာမျက်နှာ ၂၆၆၊ ၂၆၇ ပါလေးထောင့်ကွက်နှင့် ရုပ်ပုံ]
ကားမောင်းခြင်းနှင့် အရက်သောက်ခြင်း—သေစေနိုင်သော အရောအစပ်
“မူး၍မောင်းခြင်းသည် ၁၆-၂၄ နှစ်အရွယ် လူငယ်များ သေရခြင်း၏ အဓိကအကြောင်းရင်းဖြစ်သည်” ဟု ၁၉၈၄ ခုနှစ် မူးလျက်ယာဉ်မောင်းခြင်းဆိုင်ရာ အမျိုးသား ညီလာခံ အစီရင်ခံချက် ကရေးသားလိုက်သည်။ အမှန်ပါ။ “မြီးကောင်ပေါက်တစ်ဦးအနေနှင့် အရက်မူး၍ ကားတိုက်မှုဖြစ်ပွားသည့်အကြိမ်သည် အခြားယာဉ်မောင်းများထက် လေးဆ ပို၍အဖြစ်များသည်။” (လမ်းအတွက် တစ်ခွက်။) မဖြစ်သင့်ဘဲဖြစ်ရသည့် ထိုအစုလိုက်အပြုံလိုက်သေကြေမှုကြီး ဖြစ်ရခြင်းအကြောင်းရင်းတစ်ခုမှာ အရက်တန်ခိုးနှင့်ပတ်သက်သော ဒဏ္ဍာရီအစွဲကြောင့်တည်း။ အောက်ပါတို့မှာ စံနမူနာတချို့ဖြစ်သည်–
ဒဏ္ဍာရီ– ဘီယာသာသောက်ထားလျှင် ဘေးကင်းစွာမောင်းနိုင်ပါသည်။
အဖြစ်မှန်– “၁၂ အောင်စ [၃၅၅ စီစီ] ဝင်ဘီယာနှစ်ဘူးကို တစ်နာရီမပြည့်မီအချိန်အတွင်း သောက်ထားပြီးမောင်းလျှင် ယာဉ်မောင်း၏တုံ့ပြန်သတ္တိသည် တစ်စက္ကန့်၏ ၂/၅ လျော့နည်းသွားမည်ဖြစ်၍ တစ်နာရီ ၅၅ မိုင် [၉၉ ကီလိုမီတာ] နှုန်းနှင့်မောင်းသောယာဉ်သည် နောက်ထပ် ၃၄ ပေ [၁၀ မီတာ] ပိုများလာမည်။ ၎င်းအကွာအဝေးမှာ သီသီကလေးနှင့်ကားတိုက်မှုစပ်ကြား အကွာအဝေးဖြစ်နိုင်သည်။”—ဂျိမ်းအယ်လ်မာလ်ဖက်တီ၊ အီးဒီ၊ ဒီနှင့် ဒါလင်းဂျေဝင်တာ ပီအိတ်ခ်ျ၊ ဒီ ရေးသော လူကြီးအတွက် ယာဉ်မောင်းလုံခြုံမှုနှင့် အရက်စီမံကိန်း။
ဒဏ္ဍာရီ– မမူးဘူးထင်လျှင် မောင်းနိုင်ပါသည်။
အဖြစ်မှန်– ကိုယ့်ခံစားချက်ပေါ်မူတည်၍ဆုံးဖြတ်ခြင်းသည် အန္တရာယ်ရှိ၏။ အရက်ကြောင့် ကိုယ့်အစွမ်းအစ လျော့နည်းသွားမှန်းမသိဘဲ၊ ကိုယ့်ကိုယ်ကို ပိုင်ပိုင်နိုင်နိုင်ရှိသည်ဟု ထင်ယောင်ထင်မှားတတ်သည်။
မည်သူမဆို၊ မူးပြီးမောင်းလျှင် အန္တရာယ်ရှိသည်ဖြစ်ရာ လူငယ်များအဖို့ အထူးဆိုစရာမလိုတော့။ သောက်၍မောင်းသောလူငယ်များ၏ယာဉ်မောင်းအစွမ်းအစသည် “လူကြီးများထက် ပို၍မြန်သောအရှိန်ဖြင့်ကျဆင်း၏။ လူငယ်များသည် မကျွမ်းမကျင်၊ စိမ်းဆတ်ဆတ်နိုင်သောကြောင့် ဖြစ်သည်။ တိုတိုပြောရလျှင် လူငယ်အများစုမှာ အမောင်းနှင့်အသောက် နှစ်ဘက်စလုံး၌ အတွေ့အကြုံ နုသေးသည်ဖြစ်ရာ အသောက်နှင့်အမောင်းကိုရောယှက်လိုက်သောအခါ ဆိုစရာမရှိတော့။”—ဂျိမ်းအယ်လ်မာလ်ဖက်တီ၊ အီးဒီ၊ ဒီနှင့် ဒါလင်းဂျေဝင်တာ ပီအိတ်ခ်ျ၊ ဒီ ရေးသော လူကြီး၊ ယာဉ်မောင်းလုံခြုံမှုနှင့် အရက်စီမံကိန်း ခေါင်းဆောင်၏လမ်းညွှန်။
၎င်းပြင်၊ လူငယ်သည် လူကြီးလောက် သောက်စရာမလိုဘဲနှင့်မူးနိုင်သည်။ လူငယ်၏ကိုယ်အလေးချိန်သည် များသောအားဖြင့် လူကြီးထက်ပေါ့သဖြင့် သောက်လိုက်သောအရက်ကို ပျော့စေဖို့လိုအပ်သော ကိုယ်တွင်းအရည်ဓာတ်သည် လူကြီးထက်နည်း၏။ ကိုယ်တွင်း၌ အရက်ပြင်းလေလေ မူးလေလေဖြစ်သည်။
“သတိပညာရှိသောသူသည် ဘေးကိုမြော်မြင်၍ ပုန်းနေတတ်၏။ မလိမ္မာသောသူတို့မူကား၊ သွားမြဲသွား၍ဒဏ်ခံ၏။” (သု. ၂၂:၃၊ သမ္မ) အမူးနှင့်အမောင်းကိုတွဲလိုက်လျှင် ဘေးဖြစ်နိုင်သဖြင့် ငါဘယ်တော့မှ မတွဲဘူးဆိုပြီး ကိုယ့်ကိုယ်ကိုကတိပြုလျှင် “ပညာသတိရှိသောသူ” ဖြစ်၏။ သို့ပြုလျှင် ကျိုးကန်းစေနိုင်သောအနာတရဖြစ်မှုနှင့် သေကျေမှုကို ရှောင်ရှားနိုင်ရုံမက အခြားသူများ၏အသက်ကိုလည်း လေးစားရာရောက်ပေမည်။
ထိုမျှမက၊ အောက်ပါအတိုင်းသန္နိဋ္ဌာန်ချသင့်သည်။ (၁) သောက်ထားသော ယာဉ်မောင်းနှင့် ဘယ်တော့မျှလိုက်ပါစီးနင်းခြင်းမပြုရန်။ (၂) သောက်ထားသော သူငယ်ချင်းအား ဘယ်တော့မျှ မောင်းခွင့်မပြုရန်။ သူငယ်ချင်း စိတ်ဆိုးချင်စိတ်ဆိုးပါစေ။ သူသတိတရားရလာသောအခါ သင့်ကိုကျေးဇူးတင်လိမ့်မည်။—ဆာလံ ၁၄၁:၅ နှိုင်းယှဉ်။
[ရုပ်ပုံ]
သောက်ထားသောယာဉ်မောင်းနှင့် ဘယ်တော့မှ မလိုက်နှင့်။ သောက်ထားသောသူငယ်ချင်းအား ဘယ်တော့မျှမောင်းခွင့်မပြုနှင့်
[စာမျက်နှာ ၂၆၂ ပါရုပ်ပုံ]
ရွယ်တူများ၊ တီဗွီအပြင် တစ်ခါတစ်ရံ မိဘများပင် လူငယ်များအရက်သောက်ရန် အစပျိုးပေးနိုင်သည်
[စာမျက်နှာ ၂၆၂ ပါရုပ်ပုံ]
အရက်ကို အလွဲသုံးလျှင် ‘မြွေကဲ့သို့ကိုက်တတ်သည်’
[စာမျက်နှာ ၂၆၂ ပါရုပ်ပုံ]
မူး၍ မောင်းခြင်း၏ အကျိုးဆက်
