တစ်ကိုယ်တည်းရာဂစိတ်ဖြေခြင်း—အလိုဆန္ဒကိုဘယ်လိုတိုက်လှန်နိုင်မလဲ
အခန်း ၂၆
တစ်ကိုယ်တည်းရာဂစိတ်ဖြေခြင်း—အလိုဆန္ဒကိုဘယ်လိုတိုက်လှန်နိုင်မလဲ
“အင်မတန်ပြင်းထန်တဲ့ စွဲလမ်းမှုတစ်မျိုးပဲ။ မူးယစ်ဆေးဝါးစွဲသလို၊ အရက်စွဲသလိုစွဲတာမျိုး။” ၁၅ နှစ်တိုင်တိုင် ဟတ္ထမေထုန် (တစ်ကိုယ်တည်းရာဂစိတ်ဖြေခြင်း) ကိုတိုက်ဖျက်လာခဲ့သော ယောက်ျားပျိုတစ်ဦးက ထိုသို့ဆို၏။
တမန်တော်ပေါလုမူ မိမိ၏အာသာဆန္ဒ မိမိအပေါ်ကြမ်းကြုတ်သောသခင် ဖြစ်ဖို့အခွင့်မပေးချေ။ သို့အစား၊ “ငါ၏ကိုယ်ကို ငါထိုး၍နှိပ်စက်လေ့ရှိ၏” ဟုဆို၏။ (၁ ကောရိန္သု ၉:၂၇၊ သမ္မ) သူ့ကိုယ်ကိုသူ အကြမ်းကိုင်၏! မည်သူမဆို အလားတူလုံ့လစိုက်ထုတ်ပါက ဟတ္ထမေထုန်မှီဝဲသောအကျင့်ကို ချိုးဖျက်နိုင်ပေသည်။
“ပြုမူလုပ်ကိုင်ရန် သင့်စိတ်ကိုအသင့်ပြင်”
တင်းနေသောစိတ်နှင့်ပူပန်မှုကို ဖြေဖျောက်သည့်အနေဖြင့် ဟတ္ထမေထုန်ကိုပြုကျင့်သောသူများ မနည်းပါ။ သို့ရာတွင် ဟတ္ထမေထုန်သည်ပြဿနာကို ကလေးဆန်ဆန်ဖြေရှင်းခြင်းသာဖြစ်သည်။ (၁ ကောရိန္သု ၁၃:၁၁ နှိုင်းယှဉ်။) “စဉ်းစားဉာဏ်သတ္တိ” ကိုပြပြီး ပြဿနာကိုယ်နှိုက်ကိုတိုက်ဖျက်ခြင်းက သာ၍ကောင်းသည်။ (သု. ၁:၄၊ ကဘ) ပြဿနာနှင့် စိတ်ပျက်စရာများကြောင့် မခံမရပ်နိုင်အောင်ဖြစ်လာသောအခါ၊ “စိုးရိမ်ခြင်းအမှုရှိသမျှတို့ကို ကိုယ်တော်၌အပ်နှံကြလော့။”—၁ ပေတရု ၅:၆၊ ၇။
တစ်စုံတစ်ရာကိုကြားရမြင်ရ၍ လိင်စိတ်ထကြွလာလျှင်မည်သို့နည်း။ သမ္မာကျမ်းစာက “ပြုမူလုပ်ကိုင်ရန် သင့်စိတ်ကိုအသင့်ပြင်ပါ။ ကိုယ်ကိုချုပ်တည်းပါ” ဟုတိုက်တွန်းသည်။ (၁ ပေတရု ၁:၁၃၊ အပြည်ပြည်ဆိုင်ရာဘာသာပြန်ကျမ်းသစ်) စိတ်အားကိုတင်းပြီး သီလပျက်အတွေးကိုပယ်ထုတ်ပါ။ ထကြွလာသောစိတ်သည် မကြာမီ ငြိမ်းသွားပါလိမ့်မည်။
သို့သော် ညအချိန်တစ်ယောက်တည်းနေသောအခါ မကောင်းသောအတွေးကိုပယ်ထုတ်ရန် အထူးသဖြင့်ခဲယဉ်း၏။ မိန်းမငယ်တစ်ဦးက ဤသို့အကြံပြု၏– “ချက်ချင်းအိပ်ရာထပြီးအလုပ်တစ်ခုခုကို လုပ်တာဟာအကောင်းဆုံးပဲ။ ဒါမှမဟုတ်၊ တစ်ခုခုစားပါ။ ဒါမှစိတ်အာရုံပြောင်းသွားပါလိမ့်မယ်။” မှန်ပေသည်။ ‘အရေးပါသော၊ ဖြောင့်မတ်သော၊ စင်ကြယ်သော၊ အသရေရှိသောအရာများကိုတွေးတောရန်’ ကိုယ်ကိုအကြပ်ကိုင်ပါ။—ဖိလိပ္ပိ ၄:၈။
အိပ်မပျော်လျှင် သစ္စာရှိဒါဝိဒ်ကိုအတုယူပါ။ ဒါဝိဒ်ဤသို့ဆို၏– “[အကျွန်ုပ်သည်] အိပ်ရာပေါ်မှာ ကိုယ်တော်ကိုအောက်မေ့၍ ညဉ့်ယံတို့၌ ကိုယ်တော်ကိုဆင်ခြင်လျက်နေ [ပါသည်။]” (ဆာလံ ၆၃:၆) မိမိစိတ်ကို အတင်းအကြပ်ပြုပြီး ဘုရားသခင်နှင့်ဘုရားသခင့်ဂုဏ်ရည်တော်များကိုတွေးတောလျှင် ၎င်းညှို့ဓာတ်မှ အလွတ်ရုန်းနိုင်ပါလိမ့်မည်။ အနှီညစ်ညမ်းသောအကျင့်ကို ဘုရားသခင်မည်သို့ရှုမှတ်ကြောင်း စဉ်းစားဆင်ခြင်လျှင်လည်း အထောက်အကူဖြစ်နိုင်သည်။—ဆာလံ ၉၇:၁၀။
ကြိုတင်ကာကွယ်ပါ
မှုတ်သွင်းခံ ပညာရှိက “ပညာသတိရှိ [ပါးနပ်၊ ကဘ] သောသူသည် ဘေးကိုမြော်မြင်၍ပုန်းနေတတ်၏။ မလိမ္မာသောသူမူကား၊ သွားမြဲသွား၍ဒဏ်ခံရ၏” ဟုရေးသားခဲ့သည်။ (သု. ၂၂:၃၊ သမ္မ) အမြော်အမြင်သုံးခြင်းအားဖြင့် မိမိသည်ပါးနပ်သူဖြစ်ကြောင်းပြသနိုင်ပါသည်။ ဥပမာ၊ တစ်စုံတစ်ခုသောအလုပ်မျိုးကိုလုပ်ခြင်း၊ အသားကပ်အဝတ်မျိုးဝတ်ခြင်း၊ တစ်မျိုးတစ်ဖုံသောအစာကိုစားခြင်းကြောင့် လိင်စိတ်ကြွတတ်သည်ကိုတွေ့ရလျှင်၊ ယင်းတို့ကိုအပြီးအပြတ်ရှောင်ကြဉ်ပါ။ ပမာအားဖြင့်၊ အရက်သည်စောင့်စည်းမှုကို လျော့စေပြီးချုပ်တည်းမှုကိုခက်ခဲစေသည်။ တဏှာရာဂဆန်သောစာစောင်၊ တီဗွီနှင့်ရုပ်ရှင်ဇာတ်လမ်းများကိုလည်း ကူးစက်ရောဂါအလား ဝေးဝေးရှောင်ပါ။ ဆာလံဆရာက “အနတ္တကိုပမာဏ မပြုစေခြင်းငှာ အကျွန်ုပ်မျက်စိကိုအခြားသို့လွှဲတော်မူပါ” ဟုဆုတောင်းပေသည်။—ဆာလံ ၁၁၉: ၃၇။
လွယ်လွယ်နှင့်လဲနိုင်သည့်အချိန်အခါများအတွက်လည်း အကာအကွယ်ယူထားနိုင်သည်။ နယပုံပြင် ၂၄:၁၀ က “သင်သည်အမှုရောက်သောကာလ၌ စိတ်ပျက်လျှင် အားနည်း [လိမ့်မည်]” ဟူ၍သတိပေး၏။ ထို့ကြောင့်အချိန်ကြာမြင့်စွာ တစ်ယောက်တည်းမနေနှင့်။ စိန်ခေါ်မှုနှင့်ပြည့်သော အလုပ်မျိုးကိုလုပ်ရန်အစီအစဉ်ဆွဲပါ။ သီလပျက်အတွေးအခေါ်နောက်သို့ တကောက်ကောက်လိုက်ပါဖို့ အခွင့်မပေးနှင့်။
မိန်းမငယ်တစ်ဦးအနေနှင့် တစ်လအတွင်း တစ်စုံတစ်ခုသောအချိန်ပိုင်း၌ လိင်စိတ်ပို၍ပြင်းပြသည်ကိုတွေ့ရတတ်သည်။ သို့မဟုတ်၊ မိမိသည်စိတ်ထိခိုက်၊ စိတ်ဆင်းရဲလျက်နေချင်နေမည်။ဝိညာဏ ထိုးစစ်
၂၇ နှစ်အရွယ်ယောက်ျားတစ်ဦးသည် ၁၁ နှစ်အရွယ်ကတည်းက အနှီအကျင့်ဆိုးကိုတိုက်ခိုက်လာခဲ့ရာ နောက်ဆုံး၌အောင်ပွဲခံလေသည်။ သူဤသို့ရှင်းလင်းတင်ပြသည်– “ထိုးစစ်ဆင်ရတဲ့ကိစ္စဖြစ်ပါတယ်။ ကျွန်တော် ခြွင်းချက်မရှိ နေ့တိုင်း ကျမ်းစာအနည်းဆုံးနှစ်ခန်းဖတ်တယ်။” သူထိုသို့မပျက်မကွက်ပြုလာခဲ့သည်မှာ သုံးနှစ်မက ရှိလေပြီ။ အခြားခရစ်ယာန်တစ်ဦးက ဤသို့အကြံပြုသည်– “အိပ်ရာမဝင်မီ ဝိညာဉ်ရေးနဲ့ပတ်သက်တဲ့စာပေတစ်ခုခုကို ဖတ်ပါ။ တစ်နေ့တာရဲ့တွေးတောစဉ်းစားမှုကို ဝိညာဏအကြောင်းအရာနဲ့အဆုံးသတ်ဖို့အင်မတန်အရေးကြီးတယ်။ တစ်နေ့တာအဆုံးမှာ ဆုတောင်းခြင်းဟာလဲ အလွန့်အလွန်အထောက်အကူဖြစ်တယ်။”
“သခင့်အမှုတော်မြတ်၌ ဆောင်ရွက်စရာများစွာရှိ” ခြင်းသည်လည်းအကူအညီဖြစ်နိုင်သည်။ ဥပမာ၊ အခြားသူများအားသမ္မာကျမ်းစာသွန်သင်ခြင်းဖြစ်သည်။ (၁ ကောရိန္သု ၁၅:၅၈၊ ကဘ) ဟတ္ထမေထုန်မှီဝဲသည့်အကျင့်ကို နှိမ်နင်းခဲ့သောအမျိုးသမီးတစ်ဦးက ဤသို့ဆို၏– “အခုအဲဒီအကျင့်ကိုဖျောက်ဖျက်ဖို့ တကယ်အထောက်အကူပြုခဲ့တာဟာ ဘာလဲဆိုတော့၊ ကျွန်မဟာ အချိန်ပြည့် ဧဝံဂေလိဟောပြောသူတစ်ဦးအနေနဲ့ ကျွန်မရဲ့စိတ်နဲ့ခွန်အားရှိသမျှသုံးပြီး တခြားလူတွေ ဘုရားသခင်နဲ့မိတ်သဟာယဖွဲ့နိုင်အောင် ဆောင်ရွက်ပေးနေခြင်းပဲဖြစ်ပါတယ်။”
‘လွန်ကဲသောတန်ခိုးတော်’ အတွက်လည်း ဘုရားသခင်ထံ နှလုံးပါလျက် တောင်းခံနိုင်သည်။ (၂ ကောရိန္သု ၄:၇၊ သမ) “ရှေ့တော်၌ စိတ်နှလုံးကို ဖွင့်ပြကြလော့။” (ဆာလံ ၆၂:၈) မိန်းမငယ်တစ်ဦးက ဤသို့ဆို၏– “ဆုတောင်းခြင်းဟာ ချက်ချင်းရနိုင်တဲ့အားကိုးအားထားရာဖြစ်တယ်။ ဆန္ဒနိုးကြားလာတဲ့အချိန်မှာ ဆုတောင်းခြင်းဟာ တကယ်ပဲအထောက်အကူဖြစ်စေတယ်။” အိပ်ရာထချိန်မှစ၍တစ်နေ့လုံး ဘုရားသခင်ရှေ့ သင့်သန္နိဌာန်ကိုဖွင့်ဆိုပြီး ကိုယ်တော့်သန့်ရှင်းသောဝိညာဉ်တော်ခွန်အားအတွက် အသနားခံပါ။—လုကာ ၁၁:၁၃။
အခြားသူများထံမှအကူအညီ
တိတု ၂:၃-၅) စိတ်အပျက်ကြီးပျက်ခဲ့သော ယောက်ျားပျိုတစ်ဦးက အောက်ပါအတိုင်းထုတ်ဖော်ပြောဆိုခဲ့သည်– “တစ်ညနေခင်းမှာ ကျွန်တော့် ဖေဖေကိုကျွန်တော် ဒီအကြောင်းပြောပြလိုက်တယ်။ ကျွန်တော့်မှာရှိသမျှသတ္တိကို ထုတ်မှပဲပြောဖြစ်တော့တယ်။ ကျွန်တော်မျက်ရည်စက်လက်နဲ့ ဖေဖေ့ကိုပြောပြပါတယ်။ ကျွန်တော်အင်မတန်ရှက်မိတယ်။ ဒါပေမဲ့ သူပြောခဲ့တဲ့စကားကို ကျွန်တော်တစ်သက်မမေ့နိုင်ဘူး။ နှစ်သိမ့်တဲ့အပြုံးနဲ့သူကျွန်တော့်ကိုပြောတယ်– ‘သားအပေါ် ဖေဖေဂုဏ်ယူမဆုံးဖြစ်မိတယ်ကွာ’ တဲ့။ သူ့ကိုဖွင့်မပြောခင် ဘယ်လောက်ကြီးမားတဲ့အခက်အခဲတွေကို ကျွန်တော်ဖြတ်ကျော်ခဲ့ရတယ်ဆိုတာကိုသူနားလည်ခဲ့တယ်။ သူ့စကားကြောင့် ကျွန်တော်အကြီးအကျယ်စိတ်ဓာတ်မြင့်တက်ပြီး သန္နိဌာန်ခိုင်မြဲလာခဲ့တယ်။”
သင်ကိုယ်တိုင်ကြိုးစား၍မအောင်မြင်လျှင် မိဘ သို့မဟုတ် ခရစ်ယာန်အကြီးအကဲတစ်ဦးစသော ထောက်မနိုင်သူတစ်ဦးဦးထံတင်ပြပါ။ မိန်းကလေးများဖြစ်လျှင် ဝါရင့်သောခရစ်ယာန်အမျိုးသမီးထံ ရင်ဖွင့်နိုင်၏။ (၎င်းလူငယ် အောက်ပါအတိုင်းဆက်လက်ပြောကြား၏– “ဒိနောက်၊ ဖေဖေက ကျွန်တော့်အဖြစ်ဟာ ‘ကယ်လို့ရသေးတယ်’ ဆိုတာကိုသဘောပေါက်စေချင်လို့ ကျမ်းချက်တချို့ကိုထောက်ပြပါတယ်။ ပြီးတော့၊ ကျွန်တော်လျှောက်နေတဲ့လမ်းမှားဟာ ဘယ်လောက်စိုးရိမ်စရာကောင်းတယ်ဆိုတာကို သေချာသဘောပေါက်အောင် နောက်ထပ်ကျမ်းချက်တွေကိုဖွင့်ပြပါတယ်။ အချိန်အပိုင်းအခြားတစ်ခုမတိုင်ခင် ‘ကင်းကင်းစင်စင်’ နေဖို့၊ ဒိနောက်၊ နောက်တစ်ကြိမ်ဆွေးနွေးမယ် ဆိုပြီးလဲပြောပါတယ်။ ပြန်ဖောက်လာရင် ဝမ်းနည်းပက်လက်မဖြစ်နဲ့တဲ့။ ယခင်ထက်ပိုပြီးကြာရှည်အောင် စောင့်ထိန်းဖို့သာကြိုးစားပါတဲ့။” ၎င်းလူငယ်သည် အကျင့်ဆိုးကိုအပြီးသတ် နှိမ်နင်းခဲ့သောအခါ ဤသို့ထပ်မံပြောဆို၏– “ကျွန်တော့်ရဲ့ပြဿနာကိုတစ်ယောက်သောသူသိရှိပြီး ကျွန်တော့်ကို အကူအညီပေးခဲ့တာဟာ အကျိုးအကြီးအမားဆုံးပဲ။”
ပြန်ဖောက်လာလျှင်
လူငယ်တစ်ဦး ၎င်းအကျင့်ကိုကြိုးစား၍ဖျောက်ဖျက်ပြီးသည့်နောက်၌ ပြန်လုပ်မိ၏။ သူဤသို့ဝန်ခံသည်– “အလေးတုံးတစ်တုံး ကိုယ်ပေါ်မှာကျလာသလိုခံစားလိုက်ရတယ်။ ကိုယ့်ကိုယ်ကို တယ်အသုံးမကျတဲ့အကောင်လို့လဲယူမှတ်မိတယ်။ ပြီးတော့၊ ငါဟာ လွန်နေပြီ။ ယေဟောဝါရဲ့မျက်နှာသာတော်မရှိတော့ဘူး။ ဒီတော့၊ ကိုယ့်ကိုယ်ကို အကြမ်းကိုင်နေလို့ ဘာထူးသေးလဲဆိုပြီးတွေးခေါ်လာတော့တယ်။” သို့သော်၊ တစ်ခါဖောက်ပြန်ရုံနှင့် တိုက်ပွဲရှုံးပြီဟုမဆိုနိုင်။ ၁၉ နှစ်အရွယ်မိန်းကလေးတစ်ယောက်က ဤသို့ပြန်၍ဆို၏– “အစပိုင်းမှာညတိုင်းပဲ။
ဒါပေမဲ့၊ ကျွန်မ ယေဟောဝါပေါ်ပိုပြီးအားထားလာတယ်။ ယေဟောဝါရဲ့ဝိညာဉ်တော်မစမှုကြောင့် ခုဆိုတစ်နှစ်အတွင်း ခြောက်ကြိမ်လောက်ပဲအရေးနိမ့်တော့တယ်။ လုပ်မိတဲ့နောက် ကျွန်မသိပ်ဝမ်းနည်းမိတယ်။ ဒါပေမဲ့၊ ကျွန်မအရေးနိမ့်ခဲ့တိုင်း၊ သွေးဆောင်မှုနောက်တစ်ကြိမ်ပြန်ပေါ်လာတဲ့အခါ ကျွန်မဟာပိုပြီးအားသန်လာပါတယ်။” ထို့ကြောင့် သူမသည် တစစဖြင့် အောင်ပွဲခံလျက်ရှိပေသည်။အကျင့်ဆိုးပြန်ထတိုင်း အကြောင်းရင်းကိုရှာပါ။ သက်ငယ်တစ်ဦးက ဤသို့ဆို၏– “ကျွန်တော်ဖတ်ခဲ့တာ၊ စဉ်းစားခဲ့တာတွေဟာဘာလဲဆိုပြီး ပြန်လည်သုံးသပ်ပါတယ်။ အမြဲလိုလိုတရားခံကိုရှာတွေ့နိုင်ပါတယ်။ ဒီနည်းအားဖြင့် ရှောင်ရှားပြီးပြုပြင်နိုင်ခဲ့တယ်။”
တိုက်ပွဲကောင်း၏ ဆုလာဘ်များ
ဟတ္ထမေထုန်မှီဝဲသည့်အကျင့်ကို ချိုးနှိမ်ခဲ့သူလူငယ်တစ်ဦးက ဤသို့ဆို၏– “အဲဒီပြဿနာကို ကျော်လွှားခဲ့တဲ့နောက်၊ ကျွန်တော်ဟာယေဟောဝါရှေ့စင်ကြယ်တဲ့ ဩတ္တပ္ပစိတ်ထားနိုင်ခဲ့ပြီ။ ဒါကိုတခြားဘာနဲ့မှ ကျွန်တော်မလဲလှယ်နိုင်ဘူး!”
မှန်ပေသည်။ ကောင်းမွန်သောသြတ္တပ္ပစိတ်၊ မိမိ၏လူ့တန်ဖိုးတိုးမြင့်လာခြင်း၊ ပို၍သန်မာသောသီလဗလ၊ ဘုရားသခင်နှင့်ပို၍ရင်းနှီးလာခြင်းတို့သည် ဟတ္ထမေထုန်မှီဝဲခြင်းအကျင့်ပေါ်အောင်ပွဲဆင်ရာမှရရှိသော ဆုလာဘ်များဖြစ်ပေသည်။ အဆုံး၌အောင်ပွဲခံခဲ့သော မိန်းမငယ်တစ်ဦးကဤသို့ဆို၏– “ကျွန်မပြောတာကိုယုံပါ။ ဒီအကျင့်အပေါ်အောင်ပွဲဆင်နိုင်ဖို့ စိုက်ထုတ်ခဲ့ရတဲ့လုံ့လဟာ အကျိုးနပ်လှပါတယ်။”
ဆွေးနွေးရန်မေးခွန်းများ
◻တဏှာအချစ်အကြောင်းတွေးတောခြင်းသည် အဘယ်ကြောင့်အန္တရာယ်ရှိသနည်း။ လူငယ်တစ်ဦး မိမိ၏အတွေးအခေါ်ကို အခြားအရာပေါ်အာရုံပြောင်းသွားအောင် မည်သို့ပြုနိုင်သနည်း။
◻ဟတ္ထမေထုန်မှီဝဲစေလိုသောသွေးဆောင်မှု နည်းပါးသွားအောင် လူငယ်တစ်ဦးအနေဖြင့် အဘယ်အကာအကွယ်များယူနိုင်သနည်း။
◻ဝိညာဏထိုးစစ်သည်အဘယ်ကြောင့်အထောက်အကူဖြစ်စေသနည်း။
◻ယင်းအကျင့်ကိုတိုက်ဖျက်ရာ၌ ဆုတောင်းခြင်းသည် မည်သည့်ကဏ္ဍမှပါဝင်သနည်း။
◻ဤကိစ္စတွင်အခက်အခဲတွေ့လျှင် တစ်ဦးဦးထံရင်ဖွင့်ခြင်းသည် အဘယ်ကြောင့်အထောက်အကူဖြစ်စေနိုင်သနည်း။
[စာမျက်နှာ ၂၀၈၊ ၂၀၉ ပါလေးထောင့်ကွက်]
ညစ်ညမ်းသောစာပေရုပ်ရှင်—အကျင့်ဖြစ်စေသည့်အန္တရာယ်ကောင်!
“အပြာစာပေဟာ နေရာတကာ ပျံ့လို့နှံ့လို့ပါပဲ– လမ်းဘေးတစ်လျှောက် သတင်းစာခုံပေါ်မှာ ဗြောင်ဗြောင်တင်းတင်း တင်ထားတာကိုတွေ့နိုင်တယ်၊” ၁၉ နှစ်အရွယ် ရော်နယ်က ပြန်၍ပြောပြ၏။ “ကျွန်တော်တို့ကျောင်းဆရာတချို့ ကျောင်းကိုယူလာတယ်။ နောက်စာသင်တန်းကိုစောင့်ယင်း သူတို့စားပွဲပေါ်မှာ ဖတ်နေပါတယ်။” မှန်၏။ အရွယ်အမျိုးမျိုး နောက်ခံအဖုံဖုံ ပညာအရည်အချင်းအဆင့်ဆင့်ရှိသော သူငါအများတို့သည် ညစ်ညမ်းသောစာပေကို အငမ်းမရ ဖတ်ရှုကြသည်။ မာ့ခ် အမည်ရှိလူငယ်တစ်ဦးက ဤသို့ဆို၏– “မလုံ့တလုံ မိန်းမပျိုပုံပါတဲ့မဂ္ဂဇင်းတွေဖတ်တဲ့အခါ စိတ်ကြွစရာကြီး! ... ဘယ်တော့အသစ်ထွက်လာမလဲဆိုပြီးမျှော်နေရတယ်။ ကြည့်ပြီးသားအဟောင်းတွေက ရိုးသွားလို့ပဲပေါ့။ အကျင့်ကိုဖြစ်နေပြီ။” သို့သော်ကောင်းသောအကျင့်လော။
ညစ်ညမ်းသောစာပေ၏ပက်စက်သည့်သတင်းမှာ ‘လိင်ဆိုတာ သာယာမှုအတွက်သာ’ ဟူ၍ဖြစ်သည်။ ၎င်းတို့သည် များသောအားဖြင့် မုဒိမ်းမှု ရက်စက်ခြင်းဖြင့်ကာမရသရယူခံစားသောအဓမ္မမှုတို့နှင့် တင်းကျမ်းပြည့်နေသည်။ ကြာသော် ဖတ်ရှုသူအများအနေနှင့် “အပျော့စား” (အလယ်အလတ်တန်းစား) သည် စိတ်ကြွစရာမဟုတ်တော့သည်ကိုတွေ့ရသဖြင့် ထို့ထက်ညစ်ညမ်းသောရုပ်ပုံ ရုပ်ရှင်များကိုရှာကြလေသည်! နယူးယောက် တက္ကသိုလ်လက်ထောက် ပါမောက္ခတစ်ဦးဖြစ်သော အဲန်စ်ဗန်ဒဲန်ဟာ့ဂ်ကဤသို့ဆို၏– “ညစ်ညမ်းတဲ့စာပေရုပ်ရှင်ဟာ တခြားလူကို အသားတစ်တုံးလိုမြင်စေပြီး ကိုယ့်သာယာမှုအတွက် အညွန့်ခူးစရာအဖြစ်သာ သဘောထားစေပါတယ်။”
ညစ်ညမ်းသောစာပေရုပ်ရှင်သည် ဖောက်ပြန်သောလိင်အယူအဆ လိင်ကိုးကွယ်သောအမြင်မျိုးကိုလည်းတင်ပြ၍ အိမ်ထောင်ရေးပြဿနာများဖြစ်ပေါ်စေလေ့ရှိသည်။ ငယ်ရွယ်သောဇနီးသည်တစ်ဦးက ဤသို့ဆိုပါသည်– “ကျွန်မဟာ ညစ်ညမ်းတဲ့စာပေရုပ်ရှင်တွေကိုကြည့်ရှုတဲ့အတွက် ကျွန်မအမျိုးသားနဲ့ဆက်ဆံတဲ့အခါမှာ စာအုပ်ထဲကလို သာမန်ထက်လွန်ကဲတဲ့ဟာကို လိုချင်တဲ့ဆန္ဒပေါ်ပေါက်လာခဲ့တယ်။ ဒီတော့ အမြဲတမ်းပဲစိတ်ပျက်ရတယ်။ ဆန့်တငံ့ငံ့ဖြစ်ခဲ့ရပါတယ်။” ညစ်ညမ်းသောစာပေရုပ်ရှင်ကြည့်ရှုသော မိမိတို့ခင်ပွန်းသည်နှင့်ဆက်ဆံရေးသည် ၎င်းကြောင့် မည်သို့ဂယက်ရိုက်ခြင်းခံရသည်နှင့်ပတ်သက်၍ ၁၉၈၁ ခုနှစ်တွင် ရာပေါင်းများစွာသော အမျိုးသမီးများကို စုံစမ်းမေးမြန်းခြင်းပြုခဲ့ပါသည်။ ထက်ဝက်နီးပါးက ကြီးမားသောပြဿနာ ကြုံတွေ့ရသည်ဟုတင်ပြကြ၏။ ၎င်းကြောင့် အချို့သောထိမ်းမြားမှုနှင့်စေ့စပ်မှုကိုပင် ဖျက်သိမ်းခဲ့ကြရသည်။
ဇနီးသည်တစ်ဦးက ဤသို့မြည်တမ်းရှာသည်– “ကျွန်မအမျိုးသားဟာ အပြာရုပ်ရှင်စာပေတွေကိုမှလိုအပ်ပြီး ဒါတွေနဲ့မှဖျော်ဖြေမှုရနိုင်တယ်ဆိုတော့ ကျွန်မဟာ သူ့လိုအင်ကိုမဖြည့်စွက်နိုင်ဘူးလို့ဘဲဆိုရပါလိမ့်မယ် ... ကျွန်မဟာ သူ့အလိုဆန္ဒကိုပြည့်ဝစေနိုင်တဲ့ အမျိုးသမီးတစ်ဦးဖြစ်ဖို့ဆုတောင်းပါတယ်။ ဒါပေမဲ့ သူဟာပလပ်စတစ်နဲ့စာရွက်ကိုပဲနှစ်ခြိုက်တဲ့အတွက် ကျွန်မလူတစ်ပိုင်းပျက်စီးခဲ့ရပြီပေါ့။ ...ညစ်ညမ်းတဲ့ စာပေရုပ်ရှင်ဟာ ... မေတ္တာရဲ့ရန်သူ ... ရွံမုန်းစရာကောင်းပြီး ရက်စက်တဲ့အပြင် အဖျက်လက်နက်တစ်လက်ဖြစ်တယ်။”သို့ရာတွင် ခရစ်ယာန်လူငယ်များအဖို့ စိုးရိမ်စရာအကြီးဆုံးမှာ ညစ်ညမ်းသောစာပေရုပ်ရှင်သည် ဘုရားသခင့်ရှေ့ စင်ကြယ်စွာနေထိုင်ရန်ကြိုးစားသောလုံ့လကို လားလားကြီးဆန့်ကျင်သည်ဟူသောအချက်ဖြစ်၏။ (၂ ကောရိန္သု ၆:၁၇-၇:၁) သမ္မာကျမ်းစာက ရှေးလူအချို့တို့သည် “စိတ်နှလုံးခိုင်မာ၍ အလျှင်းမသိသောကြောင့်... ရှက်ကြောက်ခြင်းမရှိ တပ်မက်ခြင်းအလွန်ပြင်းသည်နှင့် ညစ်ညူးသောအကျင့်အမျိုးမျိုးကို ကြိုးစား၍ကျင့်လိုသောငှာ မိမိတို့ကို ကိလေသာလက်သို့ အပ်လိုက်ကြ၏” ဟုတင်ပြထားသည်။ (ဧဖက် ၄:၁၈၊ ၁၉) သင်သည် ဤသို့သောဖောက်ပြန်ယိုယွင်းမှုနှင့် ကြုံတွေ့လိုသလော။ ရံဖန်ရံခါ ညစ်ညမ်းသောစာပေရုပ်ရှင်များကိုကြည့်ရှုလျှင်ပင် ဩတ္တပ္ပစိတ်ကို ထုံထိုင်းစေနိုင်ကြောင်းမှတ်မိပါလေ။ ၎င်းကြောင့်ခရစ်ယာန်သက်ငယ်အချို့သည် ဟတ္ထမေထုန်ကိုမှီဝဲကြ၏။ ထို့ထက်ဆိုးသည်ကား လိင်စာရိတ္တပင်ဖောက်ပြားခဲ့ကြ၏။ ထို့ကြောင့် ပညာရှိလမ်းစဉ်မှာ ညစ်ညမ်းသောစာပေရုပ်ရှင်ကို ကြိုးစား၍ဝေးဝေးရှောင်ရန်ဖြစ်၏။
သက်ငယ်ဒါရီလ်က ဤသို့ပြောကြား၏– “အပြာစာပေတွေကို တန်းကနဲမြင်ရတဲ့အခါမျိုးမနဲပါဘူး။ ဒါကြောင့် မမြင်ချင်တာတောင်မှ ဖျတ်ကနဲမြင်လိုက်ရတယ်။ ဒါပေမဲ့ ကျွန်တော် နောက်တစ်ကြိမ်ပြန်ကြည့်စရာမလိုပါဘူး။” မှန်သည်။ ဗြောင်ပြထားသည်ကိုတွေ့ရလျှင် တမင်မျက်နှာလွှဲလိုက်ပါ။ အတန်းတူများက ကြည့်ပါရှုပါဟုစေ့ဆော်တိုက်တွန်းလျှင် ငြင်းဆန်ပါ။ ၁၈ နှစ်အရွယ် ကယ်ရင် ဤသို့ဆင်ခြင်သကဲ့သို့ပင်– “မစုံလင်တဲ့လူတစ်ယောက်အနေနဲ့ စင်ကြယ်တဲ့အရာ ချီးမွမ်းစရာကောင်းတဲ့အရာတွေပေါ်မှာ အာရုံစူးစိုက်ဖို့တောင် မနဲကြိုးစားနေရတယ်။ ဒီကြားထဲ ညစ်ညမ်းတဲ့စာပေတွေကို တမင်ယူဖတ်မယ်ဆိုရင်ပိုလို့တောင်မခက်ပေဘူးလား။”
[စာမျက်နှာ ၂၀၆ ပါရုပ်ပုံ]
“ဆုတောင်းခြင်းဟာ ချက်ချင်းရနိုင်တဲ့အားကိုးအားထားရာဖြစ်တယ်။ ဆန္ဒနိုးကြားလာတဲ့အချိန်မှာ ဆုတောင်းခြင်းဟာ တကယ်ပဲအထောက်အကူဖြစ်စေတယ်”