မိတ်စစ်ဆွေစစ် ဘယ်လိုဖွဲ့ နိုင်မလဲ
အခန်း ၈
မိတ်စစ်ဆွေစစ် ဘယ်လိုဖွဲ့နိုင်မလဲ
ရော်နီဆိုသောလူငယ်တစ်ဦးက ဤသို့ညည်းရှာသည်။ “ဒီခရိုင်မှာ ကျွန်တော်ကျောင်းလာတက်တာ ရှစ်နှစ်တောင်ရှိပြီ။ ဒါပေမဲ့ ဒီအချိန်တစ်လျှောက်လုံး မိတ်ဆွေဆိုလို့ တစ်ယောက်မှမဖွဲ့နိုင်ခဲ့ဘူး!” သင်လည်းတစ်ခါတစ်ရံမိတ်ဆွေဖွဲ့သည့်ကိစ္စတွင် အလားတူအရေးနိမ့်ခဲ့ဘူးပေမည်။ မိတ်ဆွေစစ်ကားအဘယ်နည်း။ သူတို့ကိုရရှိခြင်း၏ လျှို့ဝှက်ချက်ကားအဘယ်နည်း။
နယပုံပြင်တစ်ချက်က “မိတ်ဆွေသည်အခါခပ်သိမ်းချစ်တတ်၍ ဒုက္ခကာလ၌ညီအစ်ကိုတစ်ယောက်ဖြစ်လာသည်” ဟုဆိုသည်။ (သု. ၁၇:၁၇၊ အခြေခံအင်္ဂလိပ်သမ္မာကျမ်းစာ) သို့သော် မိတ်ဆွေဟူသည် နှစ်သိမ့်မှုပေးသူတစ်ဦးမျှသာမဟုတ်။ မာဗီယာဆိုသည့် မိန်းမငယ်တစ်ဦးဤသို့ဆို၏– “တစ်ခါတလေ၊ မိတ်ဆွေလို့အခေါ်ခံတဲ့လူတွေဟာ ကိုယ်ဒုက္ခရောက်တာကိုမြင်ပြီး ‘မင်းဒုက္ခရောက်တော့မယ်ဆိုတာငါမြင်သားပဲ။ ဒါပေမဲ့၊ မင်းကိုငါမပြောရဲလို့သာမပြောဘဲနေတာ’ ဆိုပြီးပြောတတ်တယ်။ ဒါပေမဲ့ မိတ်စစ်ဆွေစစ်ဟာ ကိုယ်လမ်းမှားလိုက်နေတာမြင်တာနဲ့၊ အချိန်မနှောင်းမီသတိပေးတတ်တယ်—သူပြောတာကိုကိုယ်ကမကြိုက်မှန်းသူသိရင်တောင် သူကတော့ပြောမှာပဲ။”
သင့်အကျိုးကိုလိုလား၍ သင့်အားအမှန်အတိုင်းပြောလာသော လူတစ်ယောက်ကို သင်သည်မာနစိတ်ကြောင့် ခုခံငြင်းပယ်လိုက်မည်လော။ “မုန်းသောသူတစ်ယောက်၏ ဒရစပ်နမ်းရှုပ်မှုများအပေါ် ယုံစားနိုင်သည်ထက်၊ ချစ်သောသူတစ်ယောက်ထံမှသက်ရောက်သော ဒဏ်ရာဒဏ်ချက်များကို ပို၍ယုံစားနိုင်သည်” ဟူ၍နယပုံပြင် ၂၇:၆ ကဆို၏။ (ဘိုင်ယင်တန်) သို့ဖြစ်၍ တဲ့တိုးတွေးပြီးတဲ့တိုးပြောတတ်သောလူစားသည် မိတ်ဆွေအဖြစ်ရှာယူပေါင်းသင်းထိုက်သည့် လူစားပင်ဖြစ်သည်။
မိတ်တုမိတ်ယောင်နှင့်မိတ်စစ်ဆွေစစ်
၂၃ နှစ်အရွယ်ပက်ဂီက “‘မိတ်ဆွေ’ ဆိုတိုင်း ကိုယ့်အတွက်အကောင်းဆုံးမဖြစ်စေဘူးဆိုတာ ကျွန်မရဲ့ဘဝဟာသက်သေပဲ” ဟူ၍ဆိုပါသည်။ ပက်ဂီသည်ဆယ်ကျော်သက်အရွယ်မှာပင်အိမ်ပေါ်မှဆင်းခဲ့ရရှာသည်။ သို့သော်ဘီးလ်နှင့်ဇနီးလွိုက်ဆိုသူ ယေဟောဝါသက်သေနှစ်ဦးက သူ့ခင်မင်မှုကိုရယူခဲ့ကြပြီး သူ့အားသမ္မာကျမ်းစာသင်ကြားပေးလေသည်။ ပက်ဂီက “သူတို့နဲ့ပေါင်းသင်းတဲ့လများဟာတကယ့်ပျော်ရွှင်မှု၊ ရောင့်ရဲမှု၊ ငြိမ်သက်မှုအတိဖြစ်ခဲ့ပါတယ်” ဟုဆို၏။ သို့ပါလျက်နှင့်၊ ပက်ဂီသည် ဆုံတွေ့ခဲ့သောအချို့လူငယ်များကိုရွေးပေါင်းပြီး—ဘီးလ်နှင့်လွိုက်တို့ကိုစွန့်ခွာခဲ့သည်။
ပက်ဂီဆက်၍ ဇာတ်ကြောင်းပြန်၏– “ကျွန်မရဲ့‘မိတ်သစ်ဆွေသစ်’ တွေဆီကကျွန်မပညာတော်တော်ရခဲ့တယ်—စတီရီယိုခိုး၊ ဘဏ်ငွေလိမ်ထုတ်၊ ဆေးခြောက်ရှူ၊ နောက်ဆုံးမှာတစ်ရက်ဒေါ်လာ ၂၀၀ ကုန်ကျတဲ့ မူးယစ်ဝါးသုံးစွဲတတ်တဲ့အကျင့်ပါပဲ။” ၁၈ နှစ်အရွယ်ရောက်သောအခါ ရေးဆိုသောလူငယ်တစ်ယောက်နှင့်တွေ့၏။ ရေးသည်ပက်ဂီအသုံးလိုသလောက် မူးယစ်ဆေးဝါးများကို—အခမဲ့ပေးလေသည်။ ထိုအခါ၊ ပက်ဂီက “ငါ့ဒုက္ခတွေကုန်လွန်ခဲ့ပြီ။ ငါနောက်ကိုဘယ်တော့မှခိုးဖို့လိမ်ဖို့မလိုတော့ဘူး” ဟုထင်မှတ်ခဲ့သည်။ သို့ရာတွင်၊ ရေးသည်ပက်ဂီအားပြည်တန်ဆာအလုပ်နှင့်ဆက်သွယ်ပေးလေတော့သည်။ နောက်ဆုံးတော့ပက်ဂီသည်ထိုမြို့နှင့်မိမိ၏ပေါက်လွှတ်ပဲစား “မိတ်ဆွေများ” နှင့်ဝေးအောင်ပြေးလေတော့သည်။
တစ်နေ့သော်ထိုနယ်သစ်မြေသစ်တွင်၊ သူ့ထံယေဟောဝါသက်သေနှစ်ဦးရောက်လာ၏။ ပက်ဂီဤသို့ ဇာတ်ကြောင်းပြန်၏– “ကျွန်မမျက်အိမ်ထဲမှပီတိမျက်ရည် ရွှမ်းဝေလာပြီး အဲဒီအမျိုးသမီးနှစ်ယောက်ကို ကျွန်မဖက်ထားမိတယ်။ သူတို့နှစ်ယောက်လဲ မင်သေသေဖြစ်သွားကြတယ်။ ကျွန်မ ‘မိတ်ဆွေ’ ဟောင်းတွေရဲ့ဟန်ဆောင်မှုကို ကျွန်မရွံမုန်းလာမိတယ်။ ဒီကလူတွေကသာ တကယ့်မိတ်ဆွေမှန်းသိလာပါတယ်။” သို့နှင့်ပက်ဂီကျမ်းစာပြန်၍ သင်အံလာသည်။
သို့သော်ပက်ဂီသည်မိမိ၏ဘဝကို ဘုရားသခင့်နည်းလမ်းတော်နှင့်ညီညွတ်စေရန် ခက်ခဲစွာအားထုတ်ရ၏။ အထူးသဖြင့် ဆေးလိပ်ဖြတ်သည့်ကိစ္စဖြစ်သည်။ သို့တစေ၊ သက်သေခံမိတ်ဆွေတစ်ဦးက “အရေးနိမ့်ပြီးနောက်မှ ဘုရားသခင်ဆီမှာအပြစ်လွှတ်ဖို့ ဆုတောင်းမဲ့အစား၊ ဆေးလိပ်သောက်ချင်စိတ်ပေါက်လာတာနဲ့ ဦးအောင်ဆုတောင်းပြီး ဘုရားသခင်ထံမှာခွန်အားတောင်းပါလား” ဟူ၍အကြံပေးသည်။ ပက်ဂီက “လက်တွေ့ကျတဲ့ဒီအကြံပေးချက်တကယ်အောင်မြင်တယ်။ ... နှစ်များစွာအတွင်း ပထမအကြိမ်အနေနဲ့ စိတ်ကြည်လင်သန့်ရှင်းတဲ့အရသာကို ခံစားရတယ်။ ဣန္ဒြေသိက္ခာရဲ့အဓိပ္ပာယ်ကိုလည်း သဘောပေါက်လာတယ်။”
ပက်ဂီ၏အတွေ့အကြုံက နယပုံပြင် ၁၃:၂၀ ပါသမ္မာကျမ်းစာစကားမှန်ကန်ကြောင်း ပေါ်လွင်စေသည်– “ပညာရှိတို့နှင့်ပေါင်းဖော်သောသူသည်ပညာရှိတတ်၏။ လူမိုက်တို့နှင့်ပေါင်းဖော်သောသူမူကား၊ ပျက်စီးတတ်၏။” ပက်ဂီက “ကျွန်မဟာဘုရားသခင်ကိုချစ်တဲ့လူတွေနဲ့သာ မိတ်ဆွေလုပ်ခဲ့မယ်ဆိုရင် အခုကျွန်မရဲ့မှတ်ဉာဏ်ထဲက ဆိုခဲ့တဲ့အဖြစ်သနစ်ဆိုးတွေကို ရှောင်ကွင်းနိုင်ခဲ့မှာပဲ။”
မိတ်ဖွဲ့ဆွေရှာ
ဘုရားသခင်ကိုချစ်သောမိတ်ဆွေများကို အဘယ်နေရာတွင်တွေ့နိုင်သနည်း။ ခရစ်ယာန်အသင်းတော်၌ တွေ့နိုင်ပါသည်။ ယုံကြည်ပါသည်ဟု ပါးစပ်ကဆိုရုံမက၊ မိမိ၏ယုံကြည်ခြင်းနှင့်ဘုရားကြည်ညိုခြင်းကို အကျင့်အကြံဖြင့် ကျောထောက်နောက်ခံပြုသောလူငယ်များကိုရှာဖွေပါ။ (ယာကုပ် ၂:၂၆ နှိုင်းယှဉ်။) ထိုသို့သောလူငယ်ရှားပါးလျှင်၊ ကိုယ့်ထက်အသက်ကြီးသော အချို့ခရစ်ယာန်များနှင့် အသိအကျွမ်းလုပ်ပါ။ မိတ်ဆွေဟူသည် အသက်အရွယ်မရွေးသင့်။ သမ္မာကျမ်းစာက ဒါဝိဒ်နှင့်ယောနသန်တို့၏စံပြမိတ်ဆွေဖြစ်ကြပုံကို ရေးသားထားကာ—ယောနသန်သည်ဒါဝိဒ်၏အဖေဖြစ်နိုင်လောက်အောင် အသက်ကြီးလေသည်!—၁ ဓမ္မရာဇဝင် ၁၈:၁။
သို့သော် မည်သို့စတင်မိတ်ဖွဲ့နိုင်သနည်း။
သူတစ်ထူးပေါ်တက်ကြွစွာစိတ်ဝင်စား
ယေရှုသည် ခိုင်မြဲလှသောမိတ်သဟာယဖွဲ့နိုင်ခဲ့ရာ သူ့မိတ်ဆွေများသည် သူ့အဖို့အသက်စွန့်ရန်ပင် ဝန်မလေးခဲ့ကြ။ အဘယ်ကြောင့်နည်း။ တစ်ခုအနေနှင့်ပြောရလျှင် ယေရှုသည်လူတို့ကိုဂရုပြုစောင့်ရှောက်တော်မူ၏။ ကိုယ်တော်သည်လက်လှမ်း၍ သူတစ်ပါးကိုမစတော်မူ၏။ ပါဝင်ပတ်သက်ရန် ‘အလိုရှိ’ တော်မူ၏။ (မဿဲ ၈:၃) မှန်ပေသည်။ သူတစ်ပါးအရေးတွင်စိတ်ဝင်စားခြင်းသည် မိတ်ဖွဲ့ခြင်း၏ပထမခြေလှမ်းပင်ဖြစ်၏။
သာဓကအားဖြင့်၊ ဒါဝိဒ်အမည်ရှိလူငယ်တစ်ဦးက မိတ်ဖွဲ့ရာ၌အောင်မြင်သည့်အကြောင်းမှာ၊ “လူတွေအပေါ်တကယ့်မေတ္တာထားပြီး သူတစ်ပါးပေါ်တက်ကြွစွာစိတ်ပါဝင်စားတဲ့အတွက်” ဖြစ်သည်ဟုဆိုပါသည်။ သူဆက်၍ဆို၏– “အချက်ကြီးတစ်ချက်က၊ သူ့နာမည်ကိုသိကျွမ်းခြင်းပါပဲ။ လူတွေဟာကိုယ့်နာမည်ကို သူများမှတ်မိတယ်ဆိုရင် သဘောကျတတ်ပါတယ်။ အဲ့ဒါကြောင့်ကိုယ်တွေ့အဖြစ်အပျက်တွေကအစ၊ ပြဿနာတွေကိုပါခင်ဗျားကိုပြောပြပြီး ခွဲဝေခံစားတတ်ပါတယ်။ ဒါနဲ့ပဲမိတ်သဟာယစတင်ဆောက်တည်လာတယ်ပေါ့။”
လူမြင်တိုင်းလက်ဆွဲနှုတ်ဆက်တတ်သော ဖော်ရွေခင်မင်လွန်းသူတစ်ယောက်ဖြစ်ရမည်ကို မဆိုလိုပါ။ ယေရှုသည် ‘နှိမ့်ချသောနှလုံးထား’ ရှိတော်မူ၏။ ဟိတ်ဟန်များသောလူစားမျိုးမဟုတ်။ (မဿဲ ၁၁:၂၈၊ ၂၉) သူတစ်ပါးအပေါ်ဖြူစင်ရိုးသားစွာ စိတ်ဝင်စားတော်မူသည့်အတွက် လူတို့၏ခင်မင်မှုကို ရယူနိုင်ခြင်းဖြစ်သည်။ ထမင်းစားဖိတ်ကြားခြင်း၊ အလုပ်တစ်ရပ်တွင်ဝင်ရောက်ကူညီခြင်း စသည့်ကိစ္စသေးသေးဖွဲဖွဲပြုလုပ်ရုံဖြင့် မိတ်သဟာယကိုနက်ရှိုင်းစေနိုင်သည်။
“သင်အဘယ်သို့နားထောင်”
ယေရှုက“သင်အဘယ်သို့နားထောင်သည်ကိုဂရုပြုလော့”ဟုအကြံပေးတော်မူသည်။ (လုကာ ၈:၁၈) ဘုရားသခင့်စကားတော်ကို နားထောင်ခြင်းနှင့်ပတ်သက်၍ မိန့်တော်မူခြင်းဖြစ်သော်လည်း၊ ၎င်းမူသည်ပေါင်းသင်းဆက်ဆံရေးတွင်လည်း များစွာအရာရောက်ပေသည်။ မိတ်ဖွဲ့ရာ၌ ကောင်းစွာနားထောင်တတ်သူဖြစ်ခြင်းသည် အရေးပါလှ၏။
သူတစ်ပါးစကားပြောစဉ် ကျွန်ုပ်တို့တကယ်ပင် စိတ်ဝင်တစားနားထောင်ပါက ထိုသူကိုဆွဲဆောင်နိုင်သည်။ “ကိုယ်အမှုအရာ [ကိုယ်ပြောလိုသောအရာ] ကိုသာမရှုမမှတ်ဘဲ၊ သူ့အမှုအရာကိုအချင်းချင်းရှုမှတ်ကြ” ရန်လိုအပ်၏။—ဖိလိပ္ပိ ၂:၄။
သစ္စာရှိပါ
ယေရှုသည်မိတ်ဆွေများအပေါ် သစ္စာတည်ကြည်တော်မူ၏။ သူတို့ကို “အဆုံးတိုင်အောင်ချစ်တော်မူ၏။” (ယောဟန် ၁၃:၁) ဂေါ်ဒန်ဆိုသူလူငယ်သည် မိတ်ဆွေများအပေါ် ထိုသို့ပင်ဆက်ဆံ၏– “မိတ်ဆွေကောင်းတစ်ဦးရဲ့ အဓိကအရည်အသွေးဟာသစ္စာပါပဲ။ အခက်အခဲကြုံလာတဲ့အခါ ခင်ဗျားပေါ်ဆက်ပြီးသစ္စာစောင့်မလား။ ကျွန်တော်နဲ့ကျွန်တော့်မိတ်ဆွေဆိုလို့ရှိရင်၊ တခြားလူ ရှုတ်ချလာတဲ့အခါ အချင်းချင်းအကာအကွယ်ပေးကြပါတယ်။ တကယ်ပဲတစ်ယောက်ကိုတစ်ယောက် ကာကွယ်ပေးကြတယ်—ဒါပေမဲ့ကျွန်တော်တို့ အမှန်တရားဘက်ရပ်တည်နေမှ ခုလိုလုပ်ကြပါတယ်။”
မိတ်တုမိတ်ယောင်များမူ ရှေ့တွင်မျက်နှာချိုသွေးပြီး နောက်ကွယ်တွင် အချင်းချင်းနောက်ကျောကိုဓားနှင့်ထိုးတတ်ကြသည်။ သို့ပြုခြင်းကိုဘယ်လိုမှလဲမထင်။ နယပုံပြင် ၁၈:၂၄ (ကဘ) က “တစ်ယောက်ကိုတစ်ယောက် အစိတ်အစိတ်အမွှာမွှာဖြစ်အောင် ထုချေသောအပေါင်းအဖော်များရှိသည်” ဟုဆို၏။ သင်သည်ဝိုင်းဖွဲ့၍ မိတ်ဆွေတစ်ဦး၏အသရေပျက်အောင် အတင်းပြောခြင်းဖြင့် သူ့နာမည်ကောင်းကို “ထုချေ” သလော။ သို့မဟုတ်သစ္စာရှိရှိ သူ့ဘက်မှရပ်တည်သလော။
သင့်ခံစားချက်ကိုခွဲဝေပါ
ယေရှုသည်မိမိ၏ရင်တွင်းခံစားချက်များကို ထုတ်ဖော်ပြောဆိုခြင်းအားဖြင့်လည်း သူတစ်ပါး၏ခင်မင်ကြင်နာမှုကို ရယူနိုင်ခဲ့သည်။ မိမိသည် “သနားခြင်းစိတ်” “ချစ်သောစိတ်” “အလွန်ညှိုးငယ်ခြင်း” ရှိသည်ကိုတစ်ခါတစ်ရံမထိမ်မဝှက်ဘဲ ဖော်ထုတ်တော်မူသည်။ တစ်ကြိမ်ထက်မက “မျက်ရည်ကျတော်မူ၏။” မိမိယုံစားသောသူတို့ရှေ့၊ မိမိနှလုံးသားခံစားချက်ကို ဖော်ထုတ်ရမည်ကိုရှက်တော်မမူ။—မဿဲ ၉:၃၆; ၂၆:၃၈; မာကု ၁၀:၂၁; ယောဟန် ၁၁:၃၅။
တွေ့ရာလူရှေ့မိမိရင်တွင်းခံစားချက်ကို သွန်မှောက်ရမည်ကိုမဆိုလို။ သို့သော်လူတိုင်းအပေါ်ရိုးသားနိုင်သည်။ တစ်ယောက်ယောက်ကိုသိကျွမ်း၍ ယုံစားလာသောအခါ၊ သင့်ရင်တွင်းခံစားချက်ကို တစစဖော်ထုတ်နိုင်သည်။ တစ်ချိန်တည်းတွင်၊ သူတစ်ပါးပေါ်ထောက်ထားစာနာမှုနှင့် “ကိုယ်ချင်းစာတရား” ထားရှိခြင်းသည်လည်း အဓိပ္ပာယ်ပြည့်ဝသည့်မိတ်သဟာယအတွက် မရှိမဖြစ်ချေ။—၁ ပေတရု ၃:၈၊ ကဘ။
စုံလင်မှုရဖို့ မမျှော်လင့်နှင့်
မိတ်သဟာယသည် အစပိုင်းတွင်ကောင်းသော်လည်း စုံလင်ဖို့မမျှော်လင့်နှင့်။ “ကျွန်ုပ်တို့အားလုံးအဘက်ဘက်၌မှားတတ်ကြ၏။ သို့သော်၊ မိမိသည်တစ်ကြိမ်မျှအမှားမပြောဟုဆိုနိုင်သောသူသည် မိမိကိုယ်ကိုစုံလင်သူဟူ၍ယူမှတ်နိုင်သည်။” (ယာကုပ် ၃:၂၊ ဖိလစ်) ထို့ပြင်၊ မိတ်သဟာယသည်အကုန်အကျရှိသည်—အချိန်နှင့်စိတ်လှုပ်ရှားမှုပင်။ ပရက်စလီအမည်ရှိလူငယ်တစ်ဦးက “ကိုယ့်အနေနဲ့ပေးဖို့အသင့်ရှိရမယ်” ဟုဆိုသည်။ ဒါဟာမိတ်သဟာယရဲ့ ကြီးမားတဲ့အပိုင်းဖြစ်တယ်။ ကိုယ့်မှာခံစားချက်ရှိတာမှန်တယ်။ ဒါပေမဲ့ ကိုယ့်မိတ်ဆွေရဲ့ခံစားချက်နဲ့အတွေးအခေါ်ကို နေရာပေးတဲ့အနေနဲ့ လျှော့တန်လျှော့ပေးဖို့ အသင့်ရှိရပါလိမ့်မည်။”
သို့သော် မေတ္တာကင်းမဲ့သည့်အဖြစ်—အထီးကျန်၏ ဟာလာဟင်းလင်းသောဘဝမျိုး၏ နစ်နာမှုနှင့်နှိုင်းယှဉ်သော် မိတ်သဟာယ၏ကုန်ကျစရိတ်သည် ဘာမျှမဟုတ်။ ထို့ကြောင့် မိတ်ဆွေဖွဲ့ပါ။ (လုကာ ၁၆:၉ နှိုင်းယှဉ်။) သင့်ကိုယ်ကိုပေးပါ။ အခြားသူများစကားပြောသောအခါ နားထောင်ပါ။ သူတို့အရေးကို တကယ်စိတ်ဝင်စားကြောင်းပြသပါ။ သို့ပြုလျှင် သင်သည်ယေရှုကဲ့သို့ လူအမြောက်အမြားအား “သင်တို့သည်...ငါ၏အဆွေဖြစ်ကြ၏” ဟုဆိုနိုင်မည်ဖြစ်သတည်း။—ယောဟန် ၁၅:၁၄။
ဆွေးနွေးရန်မေးခွန်းများ
◻မိတ်ဆွေစစ်ကိုမည်သို့ခွဲခြားသိမြင်နိုင်သနည်း။ မည်သို့သောမိတ်ဆွေသည် အတုဖြစ်သနည်း။
◻အဘယ်နေရာတွင် မိတ်ဆွေရှာနိုင်သနည်း။ ရွယ်တူချည်းဖြစ်ရမည်လော။
◻မိတ်ဆွေတစ်ယောက် ကြီးလေးသောအမှားလုပ်မိလျှင် သင်မည်သို့ပြုသင့်သနည်း။
◻မိတ်ဖွဲ့နည်းလေးနည်းကားအဘယ်နည်း။
[စာမျက်နှာ ၆၆ ပါအကျဉ်းဖော်ပြချက်]
“ကျွန်မရဲ့ ‘မိတ်သစ်ဆွေသစ်’ တွေဆီကကျွန်မပညာတော်တော်ရခဲ့တယ် —စတီရီယိုခိုး၊ ဘဏ်ငွေလိမ်ထုတ်၊ ဆေးခြောက်ရှူ၊ နောက်ဆုံးမှာတစ်ရက်ဒေါ်လာ ၂၀၀ ကုန်ကျတဲ့မူးယစ်ဝါးသုံးစွဲတတ်တဲ့အကျင့်ပါပဲ”
[စာမျက်နှာ ၆၈၊ ၆၉ ပါလေးထောင့်ကွက်]
သူငယ်ချင်းအကြောင်း တိုင်ရင်ကောင်းမလား
အကယ်၍ သူငယ်ချင်းတစ်ယောက်က မူးယစ်ဆေးဝါးနှင့်လိင်ဆက်ဆံမှုကို မြည်းစမ်းလျက်နေကြောင်း၊ လိမ်လည်ခိုးဝှက်ကြောင်းသိရှိရလျှင်—တာဝန်ရှိသူထံတိုင်ကြားမည်လော။ အများအားဖြင့်မတိုင်ကြားကြပါ။ လူငယ်အများကျင့်သုံးသော ဆိတ်ဆိတ်နေဟူသည့်ထုံးနည်းကို လိုက်တတ်ကြသည်။
အချို့က “ကုန်းတိုက်သမား” ဆိုသောကင်ပွန်းအတပ်မခံလို။ အချို့၌လွဲမှားသောသစ္စာကို ပိုက်ထား၏။ ဆုံးမမှုကိုအကျိုးယုတ်သည်ဟုမြင်ကာ၊ သူငယ်ချင်း၏ပြဿနာကိုဖုံးဖိထားလျှင် သူ့အကျိုးကိုဆောင်ရာရောက်သည်ဟုထင်ကြသည်။ ထို့ပြင်ဆိတ်ဆိတ်နေဆိုသောထုံးနည်းကိုချိုးဖောက်လျှင် အသင်းအပင်း၏ကဲ့ရဲ့ပြစ်တင်ခြင်းကိုခံရပြီး မိတ်ပျက်သွားဖို့လည်းအကြောင်းရှိသည်။
သို့ရာတွင်လီအမည်ရှိသောလူငယ်တစ်ဦး မိမိအချစ်ဆုံးသူငယ်ချင်းခရစ္စ ဆေးလိပ်သောက်ကြောင်းသိရသောအခါ၊ လုပ်ဆောင်ရန်ဆုံးဖြတ်လိုက်သည်။ လီဤသို့ဆိုသည်– “ကျွန်တော့်သြတ္တပ္ပစိတ်က ‘ကျွန်တော့်ကိုတရိရိကိုက်စားပါတယ်။ တစ်ယောက်ယောက်ထံမှာ တိုင်ကြားရမယ်ဆိုတာကို ကျွန်တော်သိလို့ပါပဲ!” သမ္မာကျမ်းစာခေတ်ကလူငယ်တစ်ဦးလည်း အလားတူအခြေအနေမျိုးနှင့် ရင်ဆိုင်ခဲ့ရသည်။ “ယောသပ်သည်အသက်တစ်ဆယ်ခုနစ်နှစ်ရှိ၍ အစ်ကိုတို့နှင့်အတူ သိုးဆိတ်များကိုထိန်းလေ၏...သူတို့အပြစ်ကိုအဘအားကြားပြောတတ်၏။” (ကမ္ဘာဦး ၃၇:၂) မိမိသည်နှုတ်ဆိတ်လျက်နေလျှင် မိမိအစ်ကိုများ၏ဝိညာဉ်ရေးဘေးတွေ့မည်ကိုသိ၍ဖြစ်သည်။
အပြစ်သည် လူကိုပုပ်ပျက်ဆွေးမြေ့စေသော အင်အားဖြစ်သည်။ အပြစ်ပြုသောသူငယ်ချင်းသည် ကျမ်းစာဖြင့်ခပ်ပြင်းပြင်းဆုံးမခြင်းစသည့် ကူညီမစမှုကိုမရလျှင် ထို့ထက်မိုက်တွင်းနက်သွားရန်အကြောင်းရှိသည်။ (ဒေသနာ ၈:၁၁) သို့ဖြစ်၍၊ သူငယ်ချင်း၏အပြစ်ကိုဖုံးကွယ်ပေးခြင်းသည် သူ့အတွက်အကျိုးဆောင်ရာမရောက်သည့်ပြင်၊ ကုစားမရနိုင်လောက်အောင်ပင် အနာတရဖြစ်စေနိုင်သည်။
ထို့ကြောင့်သမ္မာကျမ်းစာက တိုက်တွန်း၏– “ညီအစ်ကိုတို့ လူသည်သတိလစ်၍ တစ်စုံတစ်ခုသောဒုစရိုက်ကိုပြုမိလျှင်၊ ဝိညာဉ်ဆုကျေးဇူးကိုခံရသောသင်တို့သည်...သိမ်မွေ့နူးညံ့သောသဘောနှင့် ထိုသို့သောသူကိုမစ၍၊ သူ၏နေရာ၌တည်မြဲတည်စေပြန်ကြလော့။” (ဂလာတိ ၆:၁) သင်သည်မိမိ၌ဝိညာဉ်ဆုကျေးဇူး (အရည်အချင်း) မပြည့်ဝဟုထင်ကောင်းထင်မည်။ သို့သော်အကူအညီပေးနိုင်သော အရည်အချင်းရှိသူအား မပျက်မကွက်အကြောင်းကြားရန် စီစဉ်သင့်သည်မဟုတ်လော။
သို့ဖြစ်၍သင့်မိတ်ဆွေထံသွား၍ သူ့အမှားကိုတင်ပြရန်အလွန်အရေးကြီး၏။ (မဿဲ ၁၈:၁၅ နှိုင်းယှဉ်။) သို့ပြုရန် သတ္တိနှင့် ရဲရင့်မှုလိုသည်။ ခိုင်မာသောသဘောဖြင့် သူ့အပြစ်နှင့်ပတ်သက်ပြီး ခိုင်လုံသည့်သက်သေအထောက်အထားတင်ပြပါ။ အထူးသဖြင့်မိမိသိရှိသည့်အရာကိုလည်းကောင်း၊ မည်သို့မည်ပုံသိရှိရကြောင်းကိုလည်းကောင်း ပြောပြပါ။ (ယောဟန် ၁၆:၈ နှိုင်းယှဉ်။) ငါဘယ်သူ့ကိုမှအသိမပေးဘူးဟူ၍ ကတိမပေးလိုက်ပါနှင့်။ အကြောင်းမှာဤသို့သောကတိမျိုးသည် ဘုရားသခင့်ရှေ့မှောက်၌တရားမဝင်ချေ။ ကိုယ်တော်သည် အပြစ်ဖုံးဝှက်ထားခြင်းကို ရှုတ်ချတော်မူသည်။—သု. ၂၈:၁၃။
အထင်လွဲမှုဖြစ်ချင်လည်းဖြစ်မည်။ (သု. ၁၈:၁၃) ထိုသို့မဟုတ်ဘဲ၊ အပြစ်တကယ်ကျူးလွန်ခဲ့သည်မှန်လျှင်၊ သင့်သူငယ်ချင်းသည် မိမိအပြစ်ပေါ်သွားသည့်အတွက် စိတ်သက်သာရာရနိုင်ဖွယ်ရှိပေသည်။ သူ့စကားကို ကောင်းစွာနားထောင်ပါ။ (ယာကုပ် ၁:၁၉) “နင်ဒါမျိုးလုပ်ဖို့မသင့်ဘူး” ဟူသောအပြစ်တင်သည့် လေသံမျိုးနှင့် ပြောဆိုခြင်းဖြင့်၊ သူနဂိုကပြောချင်ရာများကိုပင် မပြောချင်တော့အောင် မဖန်တီးလိုက်ပါနှင့်။ “နင်တကယ် လုပ်ရက်တယ်ကွာ” ဟူသောထိတ်လန့်သည့် လေသံမျိုးကိုလည်းရှောင်ပါ။ ကရားရေလွှတ်သလိုသူ့ခံစားချက်များကို သွန်ချပါစေ။ ကိုယ်ချင်းစာနာပြီး သူခံစားရသလို ခံစားကြည့်ပါ။—၁ ပေတရု ၃:၈။
များသောအားဖြင့်၊ အခြေအနေသည် သင်ပေးနိုင်သည့် အကူအညီထက်ပို၍ လိုအပ်သည်။ သို့ဖြစ်၍သင့်သူငယ်ချင်းအား မိမိအပြစ်ကိုမိဘထံ သို့မဟုတ် တာဝန်ရှိလူကြီးများထံ ဖော်ထုတ်ရမည်ဖြစ်ကြောင်း တောင်းဆိုပါ။ သူငယ်ချင်းက ထိုသို့ပြုရန်ငြင်းဆန်လျှင် မည်သို့နည်း။ သင့်တော်သည့်အချိန်ပိုင်းအတွင်း ယင်းကိစ္စကိုမဖြေရှင်းလျှင် မိမိသည်သူငယ်ချင်း အစစ်အမှန်အနေဖြင့် သူ့အစား တစ်ဦးဦးထံသို့ တိုင်ကြားရမည့်တာဝန်ရှိကြောင်း သူ့အားနားလည်စေပါ။—သု. ၁၇:၁၇။
အစပိုင်း၌သင့်သူငယ်ချင်းသည် သင်ဘာကြောင့်ဤသို့ပြုရသည်ကို နားလည်ချင်မှနားလည်မည်။ စိတ်ဆိုးပြီးသင်နှင့် အဆက်ဖြတ်ချင်လျှင်ပင်ဖြတ်မည်။ သို့သော် လီဤသို့ဆို၏– “ကျွန်တော်သက်ဆိုင်သူကို အသိပေးတာဟာ မှန်ရာကိုလုပ်တာပဲဆိုတာကို ကျွန်တော်သဘောပေါက်တယ်။ ခရစ္စတစ်ယောက်လိုအပ်တဲ့ အကူအညီကို ရနေပြီဖြစ်တဲ့အတွက် ကျွန်တော့်သြတ္တပ္ပစိတ်လည်း အများကြီးချမ်းသာလာတယ်။ နောက်ပိုင်းမှာခရစ္စကကျွန်တော့်ဆီလာပြီး၊ ကျွန်တော်ခုလိုလုပ်ခဲ့တာကို သူစိတ်မဆိုးခဲ့ဘူးဆိုပြီးပြောတယ်။ ကျွန်တော်လည်းနေထိထိုင်သာဖြစ်လာတယ်။”
သင့်အသိမိတ်ဆွေက သင့်သတ္တိရှိသောလုပ်ရပ်ကြောင့် သင့်အားဆက်၍စိတ်ဆိုးနေလျှင်၊ အစကတည်းက သူငယ်ချင်းအစစ်မဟုတ်မှန်းသိသာသည်။ သို့သော်သင့်အနေနှင့် မိမိသည်ဘုရားသခင်ပေါ်သစ္စာရှိကြောင်း သက်သေထူခဲ့သည့်ပြင် မိတ်စစ်ဆွေစစ်ဖြစ်ကြောင်းသာဓကပြခဲ့သည့်အတွက် အကျေနပ်ကြီးကျေနပ်မိပေမည်။
[စာမျက်နှာ ၆၇ ပါရုပ်ပုံ]
မိတ်ဆွေ ဖွဲ့ရာ၌ သင်သည် အခက် အခဲ တွေ့သလော
[စာမျက်နှာ ၇၀ ပါရုပ်ပုံ]
အခြားသူ၏ အရေးကို စိတ်ဝင်စားခြင်းသည် မိတ်ဖွဲ့ခြင်း၏ သော့ချက်ဖြစ်သည်
