ဘုရားကိုဆန့်ကျင်ဖို့ နတ်ဆိုးများ အားပေး
လူတွေကို လှည့်ဖြားဖို့ စာတန်နဲ့ နတ်ဆိုးတွေ ဘာကြောင့် အလွန်အားထုတ်နေကြသလဲ။ သူတို့ရဲ့ ပုန်ကန်မှုမှာ ကျွန်တော်တို့ကိုလည်း ပူးပေါင်းစေချင်လို့ပဲ။ သူတို့ကို ဝတ်ပြုကိုးကွယ်စေချင်ကြတယ်။ သူတို့ရဲ့ အလိမ်အညာ စကားတွေကို ယုံကြည်စေချင်ကြတယ်။ ယေဟောဝါဘုရား မကြိုက်တာတွေကို လုပ်စေချင်ကြတယ်။ အဲဒီအရာ အတော်များများက လူသေတွေနဲ့ပတ်သက်တဲ့ ထုံးစံတွေနဲ့ ဆက်နွှယ်နေတယ်။
ချစ်မြတ်နိုးရသူ သေဆုံးတာက စိတ်ပိုင်းဆိုင်ရာအရ ခံစားရခက်တဲ့ အတွေ့အကြုံပါ။ ဒီလိုအခြေအနေမျိုးမှာ ဝမ်းနည်းတာ ဖြစ်ရိုးဖြစ်စဉ်ပါပဲ။ မိတ်ဆွေလာဇရု သေဆုံးသွားလို့ ယေရှု “မျက်ရည်ကျ” ခဲ့တယ်။—ယောဟန် ၁၁:၃၅။
သေခြင်းနဲ့ဆိုင်တဲ့ ထုံးစံတွေ အမျိုးမျိုးရှိတယ်။ အတော်များများကတော့ ကျမ်းစာမူတွေနဲ့ ဆန့်ကျင်မနေပါဘူး။ ဒါပေမဲ့ ထုံးစံတချို့ကတော့ လူသေတွေ ဆက်အသက်ရှင်နေတယ်၊ အသက်ရှင်နေတဲ့သူတွေကို မြင်တွေ့နိုင်တယ်ဆိုတဲ့ အယူအဆပေါ် အခြေပြုထားတယ်။ အသုဘစောင့် အခမ်းအနားတွေ၊ ထိန်းမနိုင်သိမ်းမရ ငိုကြွေးပြီး ဝမ်းနည်းကြောင်းပြတာ၊ အသုဘ အခမ်းအနားကြီးတွေဟာ လူသေရဲ့ ဝိညာဉ် စိတ်ဆိုးမှာကို ကြောက်ခြင်းအပေါ် အခြေခံတယ်။ သေတဲ့သူဟာ “ဘာမှမသိ” တဲ့အတွက် အဲဒါတွေ လုပ်တာက စာတန်ရဲ့ အလိမ်အညာကို မြှောက်ထိုးပင့်ကော် လုပ်နေရာ ရောက်တယ်။—ဒေသနာ ၉:၅။
တခြားထုံးစံတွေနဲ့ အခမ်းအနားတွေက လူသေတွေဟာ အသက်ရှင်နေသူတွေဆီကနေ အကူအညီ လိုအပ်တယ်၊ သူတို့ကို စိတ်ကျေနပ်အောင် မထားရင် ဒုက္ခရောက်နိုင်တယ်ဆိုတဲ့ ယုံကြည်မှုကနေ ပေါက်ဖွားလာတာ ဖြစ်တယ်။ နိုင်ငံတချို့မှာဆိုရင် စားသောက်ပွဲကြီးတွေနဲ့ ပူဇော်ပသမှုတွေကို လူသေဆုံးပြီးနောက် တစ်ပတ်၊ ရက်ပေါင်း ၄၀၊ တစ်နှစ် အကြာမှာ ပြုလုပ်ကြတယ်။ အဲဒါက သေဆုံးသူ ဝိညာဉ်ဘုံကို ‘ဖြတ်သွား’ နိုင်ဖို့ ကူညီပေးတယ်လို့ ဆိုကြတယ်။ နောက်ထပ် တွေ့နေကျ လုပ်ဆောင်မှုကတော့ သေဆုံးသူကို စားစရာနဲ့ ရေ ကပ်တာပါပဲ။
အဲဒီလုပ်ရပ်တွေဟာ မှားပါတယ်၊ သေခြင်းနဲ့ပတ်သက်တဲ့ စာတန်ရဲ့ အလိမ်အညာတွေကို အားပေးအားမြှောက်ပြုလို့ပဲ။ နတ်ဆိုးသွန်သင်ချက်တွေပေါ် အခြေခံတဲ့ ထုံးစံတွေကို လုပ်ဆောင်ရင် ယေဟောဝါဘုရား နှစ်သက်ပါ့မလား။ ဘယ်တော့မှ နှစ်သက်မှာ မဟုတ်ဘူး။—၂ ကောရိန္သု ၆:၁၄-၁၈။
စစ်မှန်တဲ့ ဘုရားသခင်ရဲ့ ကျေးကျွန်တွေဟာ စာတန်ရဲ့ အလိမ်အညာတွေကို ထောက်ခံတဲ့ ဘယ်လုပ်ရပ်တွေမှာမှ ပါဝင်ပတ်သက်ကြမှာ မဟုတ်ဘူး။ အဲဒီအစား အသက်ရှင် ကျန်ရစ်သူတွေကို မေတ္တာပါပါ ကူညီပေးပြီး နှစ်သိမ့်ပေးကြတယ်။ သေဆုံးသွားသူကို ယေဟောဝါဘုရား တစ်ပါးတည်းကပဲ ကူညီပေးနိုင်တယ်လို့ သိထားကြလို့ပါ။—ယောဘ ၁၄:၁၄၊ ၁၅။
ဘုရားသခင် ရှုတ်ချတဲ့ နတ်ဆိုးပညာ
လူတချို့က နတ်ဆိုးတွေနဲ့ တိုက်ရိုက်ဖြစ်ဖြစ်၊ နတ်ဝင်သည်ကတစ်ဆင့်ဖြစ်ဖြစ် ထိတွေ့ဆက်ဆံကြတယ်။ အဲဒါကို နတ်ဆိုးပညာလို့ ခေါ်တယ်။ ဝူးဒူး၊ စုန်း၊ မှော်၊ ရှေ့ဖြစ်ဟောခြင်း၊ လူသေကို မေးမြန်းခြင်း စတာတွေဟာ နတ်ဆိုးပညာတွေ ဖြစ်တယ်။
အဲဒါတွေကို ကျမ်းစာ ပြစ်တင်ရှုတ်ချထားတယ်။ “ခင်ဗျားတို့ဆီမှာ. . . နတ်ဆရာ၊ မှော်ဆရာ၊ နိမိတ်ဖတ်သူ၊ ပယောဂဆရာ၊ စုန်းအတတ်နဲ့ပြုစားသူ၊ နတ်ကတော်ကို၊ ဗေဒင်ဆရာကို မေးမြန်းသူ၊ လူသေကိုမေးမြန်းသူ တစ်ယောက်မှမရှိရဘူး။ အဲဒီလိုလူတွေကို ယေဟောဝါ ရွံမုန်းတယ်။”—တရားဟောရာ ၁၈:၁၀-၁၂။
နတ်ဆိုးပညာနဲ့ပတ်သက်ပြီး ယေဟောဝါဘုရား ဘာကြောင့် ပြင်းပြင်းထန်ထန် သတိပေးရသလဲ။
နတ်ဆိုးပညာအားလုံးနဲ့ပတ်သက်ပြီး ယေဟောဝါဘုရား သတိပေးရတာက ကျွန်တော်တို့ အကျိုးအတွက်ပါ။ ဘုရားက လူတွေကို ချစ်ပြီး ဂရုစိုက်တယ်။ နတ်ဆိုးတွေနဲ့ပတ်သက်သူတွေ ဒုက္ခရောက်ကြမယ်ဆိုတာ ဘုရား သိထားတယ်။
ဘရာဇီးနိုင်ငံက နီးလ်ဒါဟာ နတ်ကတော်တစ်ယောက်ပါ။ သူ့ဘဝပျက်အောင် နတ်ဆိုး လုပ်ခဲ့တယ်။ “ကျွန်မအထဲမှာရှိတဲ့နတ်က ကျွန်မကို ဟိုဟာလုပ်၊ ဒီဟာလုပ်ဆိုပြီး အမိန့်ပေးတယ်။ ကျွန်မမှာတော့ သတိရလိုက်၊ မရလိုက်နဲ့ စိတ်ပိုင်းဆိုင်ရာ ပြဿနာတွေ ဖြစ်လာတော့တယ်။ နတ်ဆိုးတွေ နှိပ်စက်လွန်းလို့ အာရုံကြောတွေ ထိခိုက်ကုန်တယ်။ သက်သာရအောင် စိတ်ငြိမ်ဆေး၊ အရက်နဲ့ ဆေးလိပ်တွေ မပြတ်သောက်တယ်။ ဒီလိုဖြစ်တာ နှစ်အတော်ကြာသွားတယ်” လို့ ပြောတယ်။
နောက်ဆုံးမှာတော့ ယေဟောဝါသက်သေတွေရဲ့ ကူညီမှုကြောင့် နီးလ်ဒါဟာ နတ်ဆိုးရဲ့ ဒုက္ခပေးမှုကနေ လွတ်မြောက်ခဲ့ပြီး သိက္ခာရှိတဲ့ အသက်တာ ရရှိခဲ့တယ်။ “နတ်ဆိုးတွေနဲ့ ဘယ်တော့မှ၊ တစ်ခဏလေးတောင်မှ မပတ်သက်ကြပါနဲ့” လို့ သူပြောတယ်။